كاتب الموضوع :
ضمني بين الاهداب
المنتدى :
القصص المكتمله من وحي قلم الاعضاء
رد: الحظوظ العاثرة بقلمي / ضمني بين الاهداب
بسم الله الرحمن الرحيم...
.
.
.
العثرة السابعة عشر
.
.
.
مدخل
.
.
.
كان لدي حلم
يعلو سقف الكلام فوق الإلهام
ويتوحدان ِ بالعاطفة
شفافة كانت الأمنيات أمام الأمس
والساعات الخاطفة
مرّت على صمت ٍ
دونما اكتراث للظل الواقف أمام العاصفة
* *
كان لدي حلم
هديل الأيام أيقظ غفوة العمر
فاسّتبدّ به الحزنُ
لا الحياة لها وزن ولا
الفرح ــ مقابل البكاء ــ له وزنُ
وكانت الذكريات من الصحو واجفة
* *
كان لدي حلم
النايات تغازل شرفة العشاق
والعشاق فراقهم واقع
تُعيد لحن الماضي فتحييه
والأحلام عدوة الواقع
كانت الأقدار للإنسان آسفة
* *
كان لدي حلم
كان وكانت وكنّا
في كفاف وفي عفاف الليل
قلوبنا عاكفة
آل حوفان
.
.
.
بداية
مساء الخير على الكل
الله يوفق الجميع في اختبارتهم...
احر التعازي لمتابعتي مسس ليلى في وفاة والدها الله يغفر له ويرحمه
الي يسأل ليش البارتات قصرت شي طبيعي بنات حياتنا ها اليومين مضغوطين من مذاكرة لعيالنا وتجهيزات لرمضان الله يبلغنا و التزامتنا اليومية ..وبيني وبينكم انا من ايام البارتات الطويلة ماعاد اثق فيكم 😬
.
.
.
لاتليهكم الرواية عن الصلاة في وقتها...
.
.
.
بعد اربع ساعات...
.
.
.
كان يقف بهدوء الدنيا فوق رأسها...!
يمسح على خصلاتها الغافية معها..والانين الذي يخرج بشكل متقطع يلامس شيء ما في روحه العنيدة...
لايدري لما خصته في مرحلة تعارف قصيرة بأشياء عميقة...
لامس أصابعها التي تحمل أساورة طبية بأسمها قبض بكفها بكفه...
هاهي المرة الفريدة والغريبة التي ينحني فيها بكل عنجهيته ليقبل جبينها بأسرع من ثانية كانت تلك القبلة المسروقة لايدري لما لكنها قبلة...!
هو يريد اشياء ويخطط ﻷمور لكنه الحاصل انه ينهزم في الخلوات...!
اتكئ من جديد على حاجز السرير وبهمس/ خسارة انتي في ابوك...بس ذي غلطة امك الفالحة الي راهنت على خبلها وما ربحت وهذا انتي مقطوطه هنا لابنيدر ولاعنيد؟.!
ابعد خصلة ملتصقة على خدها بأطراف اصابعه/وبقلعته ولده ذا الي راح الله من زين الابو حتى اسمه يجيب الحرقان دامر جعله فوق راسه دماره ...بنته وبنقطها عليه وانتي بزوجك على مزاجي انا...
من ثم اردف/ابوك مزوجك ذا الخبل الي لو اسرحه مع الغنم رجعت الغنم وهو مارجع..قال ايش ملحق سياسي الله من شين الوجه !
اقترب من وجها اكثر وهو يتفحص ملامحها المشتاق لها لتلك البعيدة لوالدته...لفت انتباه حقيبتها التي يرن هاتفها في داخله...وبفضول عقاب الدائم فتح الحقيبة واطل على الاسم
أبوي...
امال شفتيه بتهكم/توك تشوف رقمها وتدق يامال الدق اجل هاك...!
كان الذي فعله ان اعطاه مشغول...!
يتصل مرة اخرى...كذلك فعل بخبث...!
من ثم ابتسم واقفل الهاتف ووضعه في حقيبتها...هل سوف يستغرب ويقلق...يتمنى له الجنون في الحقيقة...!
على الجانب الاخر
كان الجوال يرن لمرة العاشرة وهي تتجاهله ولاتستطيع اقفاله ﻷجل والداها وليس من الذوق ان تحضر اتصاله فمهما كان هي لاتفعل هكذا...وضعته على الصامت وادخلته جيب بالطوها وتحدثت بهدوء لوالدة احدى مريضاتها...
كانت تلامس شعر الطفله وتطمئن والداتها من ثم استأذنت وخرجت...
توجهت لمكتبها فقد انتهت من جولتها على المرضى الصغار عندما دخلت المكتب تفاجئات به يجلس وبجواره بوكيه ورد...!
همست بستغراب/انت هنا...؟
متضح لها انه مصاب با الملل ويأتي الى هنا كلما شعر با الملل وهذا شيء لا تريده...
ابتسم بخبث وهو يقف/ هذا الورد ..
هي كانت تعتقد انه اتى به لها لامست بطراف اصابعه..
ليهمس /جاي ازور فيه اختي هنا بس لقيت ابوك مرتز عندها تصدقين...!
شعرت بكمية حرج كبيره وهي تعلم انه خبيث اوهمها ان الباقة لها همست بعد ان تداركت الموضوع/وش يجيب ابوي لختك مستحيل..،
ابتسم غتار بخبث/عادي من ريحة حبه الاول...!
شعر بغضبها /لاحب اول ولاتالي كان طيش مراهقه لااكثر ولا اقل وبعدين انت كل شوي بتجي هنا عندي افرض ان ابوي بيدخل الحين مثل عادته انت تبي مشاكل بيني وبين ابوي...!
غتار بعدم اهتمام/عادي خليه يجي وش بيصير يعني ان صار شي فعليك موعلي وتحملي ابوك شي طبيعي متحملة غثاثته كل ها السنين وش بيضر الحين بعد...!
فخر تزفر بضيق/شوف ياغتار انا بقولك شي مدري هو لايق اقوله او لا بس لازم تسمعه انت وشخصيتك هذي ماكنت ابد احلم ارتبط في شخصيه زي كذا بس مثل ماتشوف ارتبطنا عشان مصلحة العايلة ماهو عشان تغث ابوي مثل مااشوف.
حرك عصاة لكفه الاخر وبتهكم /ماشاء الله ياكبر عقلك… ياحظي فيك...!
فخر بهدوء /عاد الي هو رجاء ابعدنا من الاحراجات وكثرة دخولك مكتبي...جدا يسبب لي حرج ...
غتار يتخابث/ عادي قولي رجلي مايقدر الايتطمن علي كل يوم تراني غثيث وكل يوم هنا حتى افكر ادخل بصفقة في ها المستشفى امسك لهم تاثيثهم ماش كنه ذوق عجوز ميت رجلها الي شارين منه ها الاثاث..!
فخر بهدوء/اتركك من كلام لايودي ولايجيب ولو شريت كل المجمع الطبي مايعنيني انا ماوافقت عليك الالهدف واحد واتوقع مايجهلك وهدفك بعد مايجهلني
من ثم اردفت وهي ترى عينيه الباردة/بلاش النطنطه كل شوي مايليق علينا هذا الشي لاانا قدام زملائي ولابعد انت ...!
وبجزم/وانت ياغتار واضح عليك مستخف في كل شي ولاتشوف احد الابنص عين واتمنى ان نظرتي فيك غلط لكن لو ابوي في المسشتفى مستحيل الايمر مكتبي اطلع لو سمحت...
بغتارية/مربيك ابوك على طبعه الشين تفكرين واجد ومشغلة راسك فيني وكل شوي تشوفين الامور بزواية ...!
ابتسمت وبجديه/صحيح اني مشغله مخي فيك لكن ماهي الفكرة الي تشوفها انا مشغلة نفسي في مقصدك من هذا الارتباط هل تبي تضر ابوي فيه والاصدق مثل ماتقول نجمع العايلتين...!
يرواغ/ انتي ليش متوجسه مني....؟!
فخر بشفافية/اكيد بكون متوجسة تصرفاتك ماهي واضحه منت مفهوم بنسبة لي وحقيقة حقيقة ياغتار انت شخص بنسبة لي مو مريح ومدري ليش يجيني ها الشعور...عكس عمي بندر لما قابلته كان واضح ومريح وهدفه واضح عكسك تماما...
رفع حاجبيه /قابلتيه وين...؟
زفرة بهدوء /قابلته في مكان قريب ودردشنا مع بعض...!
من ثم اردفت/اتمنى منك ماتجي مكتبي كل شوي ...
يرواغ بمكر/ اي تامرين امر يا اميرة البندر كلهم ماهو بس عقاب لكن امريني بكل شي الاهذا الشي عشان الدكاتره الي هنا لازم امرهم لانهم ماسكين علاجي من زمان...!
وبهدوء ماكر/انا اضغط رجلي عشان احافظ على لياقتي لكن لو تبيني اغير المستشفى كله واحول لثاني عشان ماتنحرجين بعد على خشمي
همست بلباقه/لاتغيره ولاشي الموضوع ابسط من كذا لاتمر مكتبي واذا شفتني تجاهلني...!
في هذه الاثناء فتح عقاب الباب وهو يريد ان يراها فقط فهو قد ضغط عليها في الصباح ويحمل لها وجبة غداء صغيرة..تفاجئ بغتار في المكتب ليتحول لبركان...!
عقاب بغضب هادر/وانا الي موجعني قلبي عليك ونادم على اسلوبي الجاف معك الصبح اجي القاك مع هذا وكني ماربيت ولاعطيت الثقه
غتار يقاطعه/الي يسمعك ياعمي يقول شايفنا مسوين شي عظيم انت الي وش تبي عند المهر وش حنيت له بضبط يالله علمني
من ثم اردف/انا شفتك وجيت بنتك قلت عمي الحمدلله شكلكم قريتو عليه قالت لاوالله ماقرينا عليه
بثورة/تنكت انت ووجهك يابو ثلاث رجول انت ماتعرف السلوم ياولد بنيدر والاتبيني اقعدها في بيتي عشان ترتاح
بنبرة هدوء خبيثه/لاوالله مانكت بس ماحبيت ادخل عند ام العنود واحرجك وانت عندها عاد رجلي الثالثه جرتني لمكتب المدام وش تبيني اسوي اقعد امتر ها الاسياب لين تخلص تمقلك في بنت العنود...!
خبيث..!
يتلصص ليوجع ...!
فخر تهدئ الوضع/طيب ياغتار انت اساسا كنت طالع لختك الله معك
وقف وهو يتكئ/اجل استأذن دامني ماهو مرغوب فيني لكن الورد الي جبته لك لايذبل حطيه في مويه الحين يافخر...!
خرج تحت صدمةعقاب من ثم بقى الاثنين في المكتب وحيدين شعرت به ينفجر وهو يشد بوكيه الورد ويقذف به لقمامة...
فخر بجدية/يكذب عليك يبه يستفزك الورد اساس لخته انت اذكى من كذا ..أهد...
عقاب بغضب/ومن سمح له يستفزني غير حضرة جنابك مرخيه له الحبل وسردي مردي شكله...!
بوجع/سامحني يبه والله ماهو مقصدي اقهرك وماهو انا الي ترخي حبالها...
عقاب يشير بيده/ماحد قاهرني ولالو ذراعي غيرك يافخر لاتقولين ماهو قصدي اقهرك قهرتيني وخلصتي واخذ عقلك ولد بنيدر مثل ماشوف
اردف وهو يشير بيده/برفع لممدوح الحين اجازه اضطراريه لك ولاتناقشيني بحرف.!
كان يشير لشفتيه بأصبعه بحزم ابتلعت اعتراضها لوقته همست بمسايره/طيب يبه بكيفك ...
عقاب بحزم/ وغتار ذا انا بتصرف معه الحين والحقيني انتي بسياره في مكانها الي دايم...
زفرت بضيق واسترجعت وهي تراه يرحل ...لكنها تداركت وهي تريد الاسراع خلفه لايفتعل فضيحة مع غتار...
على الجانب الاخر وعند بوابة الطوارئ كان غتار يجري مكالمة عندما انتبه لسيارتين اسعاف كلاهما ينزل منهما ضباط بزي الطيارين ..
لفت نظره الزي والحدث ولكنه مازال يجري مكالمته لكن ما انزل السرير ذو العجلات بسرعه ورفع من ثم دفع على عجالة ليدخل كان هو أول ماوقعت عينيه على الشخص المصاب وكان يتضح ان اصابته خطيره...
كان عقاب على الجهة الاخرى قد وضع يده على كتف غتار وبعصبية / التفت لي هنا وبنتفاهم الحين...!
التفت غتار وهمس يعتذر لمتصل من ثم بتهكم/ لبيه ياعمي امر...
عقاب بغضب / وش رايك تطلق بنتي وتقصر شر بيجي من ذا العرس...!
غتار وعينه تلتفت بتلقائية لسرير الاخر الذي خرج من الاسعاف الاخر وادخل امام عينيه وبمحاذته تماما...!
عندما وقعت عينيه على الشخص المصاب...كاد ان يجن وهو يصدم من الشخص المسعف ../انا اخو غيااام...!
انتبه عقاب لصدمة غتار وتوجهت عينيه لحين ينظر ليجد غيام هو الذي يجري به الكادر الطبي لداخل...!
غتار الذي قفز خلفهم وهو يضغط على قدمه ولايشعر فما كان من عقاب ايضا الايلحق بهم...تحت انظار فخر التي استفسرت فورا من المسعفين ليخبروها انهم طيارين حصل خلل في طائراتهم اثناء التدريب وسقطت لكنهم قد فتحو مظلاتهم وخرجو لكنهم اصيبو اصابات متفرقه ...
.
.
.
وأنت بعيد هكذا
وأنا أقف على عتبة القلق
والمسافة بيني وبين لقائك
جسر من الليل
.
.
.
ساعة مضت...
وهو يشعر بأنه سوف يموت في مكانه ويقطع المكان ذهاب واياب غير مهتم بقدمه التي لاتتحمل كثرة الوقوف...
وجه المسود ياقته التي فتحها وهو يشعر انه لايتنفس لايتحمل فكرة ان يصاب احد من اخوانه بأذى...
هو لايوصل لهم مشاعره دائم لابشكل مباشر ولاغير مباشر...
بل كثير من المشحنات تحصل بينه وبين غيام وخصوصا بسبب قصته مع تلك..!
حاكم بهدوئه دائم يغض الطرف عن كثرة مشاكستي له...
لكن غيام لايغض الطرف بل يحصل تلاسن في كثير من الاحيان بيننا ...!
الحقيقة هو يحب غيام كثيرا وينظر له بعيني انه احمق صغير حتى وان اصبح رجل بزي عسكري ورتبة وقامة طويلة هو يراه ذاك الطفل الذي لايعرف مصلحته...!
ويثبت ذلك له انه لايعرف مصلحته في امور عديدة...!
لطالما علم بأنه يخرج تلك الكارثة التي يعرفها من مشاكل عديده يعلم انه وظفها يعلم بأنه اخرج احد اخوتها من التوقيف يعلم بأنه يرتكب حماقات لا تليق ب البندر ...!
لكن في حقيقة الامر لتو عندما شعر انه سوف يخسره علم ان بينه وبين غيام فوهة عميقة هي القسوة منه ﻷجله والتمرد من غيام ردة فعل طبيعية منه ..!
همس الجالس والعاقد ذراعيه بلا اهتمام /انت ماودك تنثبر ...!
القى نظرة لعقاب وبجدية/اشوفك جالس هنا مارحت لمكان لايكون مشاعر العم الحين تو تصحى...!
امال شفتيه عقاب بتهكم/ كل شي يجوز شفني جالس هنا من ساعه وابوك ماشرف يشوف ولده ولابنته شفت ان ابوكم مايستاهل حتى يصير ابو ...!
تجاهله غتار وهو يرى فخر تخرج وتتوجه لهم وبصوت مملوئ با الاطمئنان/الحمدلله هو وخويه الحين طيبين تو الدكاتره داخل بشروني غيام فيه كسر بيده ورضوض وخويه بعنايه الحين بس حالتهم مستقره الحمدلله...
غتار يضغط عكازة ويتمم بصوت خافت با الشكر لله...
نظرت فخر للجالس في الطرف لتهمس/معليش يبه اخرتك نمشي الحين لو تبي ،..
عقاب بتهكم وهو يقف/وليته على شي يستاهل على سوير وعوير والي مافيه خير ماغير اعدمو طيارة الدولة على دلاخة ولد بندر...
غتار يتجاهله ويشد هاتفه ليتصل على والده لكن في تلك الاثناء كان بندر يدخل المكان بكل فخامته البندرية ويتبعه اثنين من الضباط من زملاء غيام...
انتبه غتار وبطمئنان/ابشرك بخير يايبه مافيه الاكسر بيده ورضوض...الحمدلله طيب وحالته مستقره...
بندر الذي توسط المكان وسارع غتار لتقبيل رأسه.../انت صادق والا تقول ذا الحكي ووراه الي اكبر منه...
غتار /لاوالله اني صادق الحمدلله الي ربي سلمه...
بندر بخوف/لازم اشوفه بعيني واتطمن عليه ..
ماان شد الخطوات هو وغتار حتى انتبه للواقف مع طبيبه..،
كان هو...
العقاب الذي في هيئة بشر...!
لما هو هنا...!
هل علم بحادث غيام ودمه حن...!
هل عدت يا عقاب...!
همس لغتار بستغراب/وش عنده عقاب هنا...!
غتار بتجاهل/ خلنا ندخل لغيام ونتطمن عليه...
في المقابل
فخر بغضب/يبه على الاقل قل له حمدلله على سلامة ولدك ..والاخلني اسلم عليه دامك ماتبي عيب يايبه والله العظيم ومنقود وماسك يدي كأني بزر...!
شدها خلفه وهو يشد الخطوات للخارج/ تعلميني المناقيد انقدي على عمرك اول داخل وانتي تسولفين وتبوسمين مع العلة الي ابتليت فيه من الله...
فخر بعصبية/ هد يدي يبه انا مو بزر تسحبها وراك قدام ذا العالم...
اطلق يدها وهاهما في الشارع امام بوابة المستشفى...
همس بغضب/ها على ايش اخذتي ابو ثلاث رجلين ها على ايش...طلعتي من رضاي وكل يوم والثاني اا
قاطعته/ هذا ماهو موضوعنا الحين انت ماتقول لي ليش انت زاير بنت العنود..سبحان الله الحين اختلفت الموازين...!
بعصبية /بتحاسبيني انتي ذلحين ؟
فخر بحزم /لاحشى بس اشوف بنت العنود زرتها والله اعلم كم قعدت عندها والا انا ممنوع احتك في عمي وعياله ويوم خذيت ولده قومت الدنيا وماقعدتها...ليه بنت العنود ماهي ببنت بندر بعد والاعند العنود كل شي يختلف...!
نظر لها بغضب واشار بأصبعه وهو يطرق رأسها/مخك المصدي ذا وراثته من امك...!
من ثم تركها وركب سيارته لتركب بجوارها بعدها بصمت غاضب ...!
وبغضب /بمر اخذ لك غدا نسيت غداك في مكتبك...
فخر تتماسك حتى لاتنتابها ضحكة/مابي غدا حعقيالي سويته وفشلتني عند الي هناك انسدت نفسي يبه انسدت...
عقاب يحاول تمالك اعصابه/وش دخل العيشه في الي سويته ذا شي وذاك شي ثاني اجل تقعدين على جوعك وماتكسرينه الابقهوه والاعصير مثل عادتك دايم...وبعدين وش سويت ماسويت شي...!
فخر /كل ذا يبه وتقول ماسويت شي اجل لاخذيته وشفتني معه دايم وش بتسوي...هذا انت بتقعدني عندك في البيت عشانك شفته في مكتبي...!
عقاب بضيق.../ليته يطلقكك ويفكني من وجه الودر...!
نظرت بصدمة من ثم زفرة بضيق وصمتت...!
هو في المقابل بتجاهل وكأنه لم يقل شيء /ذا مطعم زين واكله صحي اغلبه مشوي وسلطات زينه...!
.
.
.
وأنت بعيد هكذا
وأنا أقف على عتبة القلق
والمسافة بيني وبين لقائك
جسر من الليل
.
.
.
ابتسم رياش بزهو وهو يرى السفرة الطويلة الممتدة وتحلق عائلته الكبيرة حولها بمناسبة تعارف على زوجته الجديده الذهب...
.../يبه هذا زيان امي بيدينها الي جعل ربي يحرمها من النار مسويته لك بحطه عندك وقدامك...
ابتسم رياش...
لتقف ابنته سمية بطبق اخر /والمرقوق ذا فديت الي زينته كل شي تلمسه امي له نكهه وذوق مايعرف له مثلها احد هاك يبه خله جنبك ...
ابعدت هي الطبق بخبث...
دلال تقف ببطنها المنتفخ /المنتو مايضبطه كثر امي وخرو بس اطباقكم حشرتو ابوي وابوي مايبي الا منتو امي...
سمية بغضب/دليل حركاتك ذي منتي مخليتها ابوي يحب المرقوق ظني مايبي اطباقكم صح يبه...!
كانت تحلق يديها على كتف والداها ليهمس رياش /ظني وانا ابوك اني باكل من ذي الزلطه ماش معدتي مابي اثقل فيها ...
دلال بستغراب/ها يبه سلطه عاد اخبرك تحب السفره دسمه عسى مافيك شي...
رياش بتهرب /لامافيني شي لاتفاولين علي تعرفيني ماداني عسى مافيك وعسى مافيك ابد مقرر اني اكل خفيف...
سمية بصدمة/يبه لاتقول انك تبي تسوي رجيم وانت اكبر واحد كنت تضحك علينا لاقلنا لك رجيم لاماصدق...!
رياش يتظاهر بغضب/وانتي ماغير ناشبة بحلقي من يوم قعدت انتي وصحن امك بكيفي وانا ابوك اقول شي امس واليوم اغيره ..!
ريم تتدخل بمكر /ايه عمتنا الجديده شكلها قايلة لك سو رجيم يمه من العمات الجديدات يمه...!
الذهب تبتسم بثقل/ابد ابو ممدوح مالحه ربي وقابله والرجال مخابر ماهي مناظر...
ريم /ماشاء الله ياعمتنا الجديدة اجل تقولين مالحه الله وقابله تدهنين سير ابوي شكلك قدامنا وبلحالكم تقولين سو رجيم اجل ابوي يخلي صحون امي وعماتي ويقول ابي سلطه...!
رياش بتهكم/ماغير امك طويلة لسان بس ان ربي مالح امك والاانتي مثل الجحه الي لاطعم ولا لون ...!
ام ممدوح تتدخل /ماعليك منها ياالذهب ترا هروج ريم دايم ماهي بموزونه اخذي وخلي...
الذهب تبتسم ...
لتهمس ام سلطان / اقول يابو ممدوح متى تاخذنا كلنا للمزرعه مبطين ماتجمعنا هناك ..
رياش يحرك مسبحته/ابد متى ماتبون نروح كلنا ها ياام عزام انتي خوية لنا والا بعد بتقولين دورية الحريم خوياتي ومدري وش...
ام عزام تبعد كأس العصير /اكيد دورية خوياتي ماخليها عشان عيالك وحريمك الي ربي ماذر فيهم ملح هناك اقابل العلوم الزينه والقلوب الطيبه والا هنا ناشبين بحلقي بعضهم...!
ام سلطان بغضب/ وش تقصدين يا فهده طلعي الي بقلبك...!
ام عزام بتهكم/والله الي على راسه بطحى يحس عليها..المرة الي راحت مدحتي ثوبي واول ماركبت السياره انشق شقين تقولين ماسكه مقص ولاهي بأولة لك اذكري ربك يا العيون...!
ام سلطان بعصبية /أي عيبتنا بعيبها ماتذكرين الحرمة الي مدحتيها في عرس ال سالم بغت تفطس بين ايدينا لين ذكرتي ربك...انتي العيون والي ماتذكرين ربك قطع من جلسة انتي فيها...
الذهب تكاد عينيها تخرج ليهمس رياش /ماشاء الله عليكم كل وحدة كلامها لثانيه سم سديتو نفسي...ابقوم اجل...!
كان يتظاهر بتمثيل لتقفز ام سلطان /لاوالله ماتقوم يابو ممدوح جعل الي يسد نفسك مايربح انا بجي احسن منها وبقصر الشر اجلس فديتك...
ام عزام هي الاخرى تقفز بجواره /وين يا رياش مشتاقين لك كلنا وتقوم زعلان منا ماعليه هذاني بحب راسها قدامك كله ولا زعلك علينا..
ام سلطان /لاوالله ماتحبين راسي ياام عزام خلاص وانا اختك الله يقطع الشيطان وغزاته...
ابتسم رياش بخبث من ثم القى نظره لذهب المتجمده في مكانها والتي لم تستوعب العائلة الرياشيه...
بادلته الابتسامة بشيء من الارتباك ومحاولة الاستيعاب
.
.
.
وأنت بعيد هكذا
وأنا أقف على عتبة القلق
والمسافة بيني وبين لقائك
جسر من الليل
.
.
.
في المساء...
ورد التي تجلس بجوار سريره وكرسيها ملاصق له تأتيه كلما خلا المكان من الزوار...
وهو يشعر بتعب من الرضوض والكسر ويأن من وقت ﻷخر ...
تضع اصابعها في شعره برقه وهي لا تكتم بكائها من انينه /غيام ياقلبي انا بسم الله عليك ماعليه شوي والمسكن ياخذ مفعوله ...
غيام بألم /ورد ...جسمي كله خلي احد يجي يعطيني مسكن اقو...
ورد / المسكن قوي بس شوي توهم طاقينك فيه...عسى الي فيك فيني
غيام بوجع يزفر /لابسم الله عليك..وين غتار ناديه...
كانت ترى وجه وهو يعتصر الوجع والا الم من ثم بعد ربع ساعه بدأ يغط في نوم متقطع...
كانت متشبثه بكفه الممتلئة خدوش او با الاحرى هو قابض على اصابعها وتشعر بأنها سوف تفتت..
بأنين /ورد...ورد...
ورد وهي تشعر بأن روحها تتألم /لبيه..لبيه...!
غيام / لاتجلسين هنا ...ورد.. روحي...وخلي غتار يجي.!
شعرت بأنه أشفق عليها من طول الجلوس بقربه وهو يهلوس ولا يشعر بشيء..ربتت على كفه وقبلة كتفه السليمة ...
اقتربت منه ووضعت رأسها بمحاذات راسه
همست با القرب من اذنه عندما شعرت به يدخل في المسكن والنوم...
همست برقه له /غيام والله العظيم ماتحرك من هنا لين ربي يشفيك...!
الله يخليك لي ياربي ماقدر اشوفه كذا يون كذا احس قلبي تقطع...
كانت تمسح ذقنه براحة كفها...
شعرت با المسكنات بدأت مفعولها...وهاهو ينام...كانت تمسح فكه ب سبابتها ..وروحها المتولعة به تتألم ...من ثم همست له لتقطع طول الانتظار كي يستيقظ من جديد لها...
بلوم وعتب / مع انك مغازلجي ومحرق قلبي غيره لكن والله العظيم اموت فيك ولابي شي يأذيك حتى لو الشوكه..
رفعت رأسها من جديد ونظرت لوجه عن قرب وبمشاكسة تخصها لملامحه النائمة / ترا فتحت جوالك انا اعرف رقمك السري يدي حكتني يوم عطوني جوالاتك...عطيتها حضر انت مالك الاانا حتى شف ماونيت الا بااسمي...!
كانت تعلم لو انه لو مستيقظ وبوعيه سيقتلها لكنه نائم
لذا همست من جديد وهي تمسح على حاجبه الايسر بسبابتها/والله ياغيام مافيك الا ذا الشي المخيس والاوالله انك رجال وطيب وحبوب ليت ربي يفكك من المغازل عشان قلبي يرتاح مرة وحده...
من جديد تطبع على خده قبلة وتضع رأسها بجانب رأسه..يدها مشبوكة في يده.../الحقيقة انا كان نفسي اخذ واحد ضابط احس الي يشتغلون في السلك العسكري مليانين رجولة وانضباط وماكان في راسي ولاواحد با المية ان الي اشوفه لما كنت اطلع لمدرستي وهو لكليته بتزوجه...!
.../ولاكان في بالي ان الي سوا له ابوه حفلة تخرج وعزمونا عليه اني بتزوجه...كنت اشوفكم يا البندر بشكل خاص شي كبير من مدح ابوي لكم واخواني...
وبعذوبة /ولما طحت عليك وانقذتني عشت احلام اليقظة والمراهقات خصوصا لما تملكنا ماكنت ادري ان قلبك ذا مع غيري...
من ثم /بس ولو...اباخذ قلبك لي غصب عنك وعنهم العشر...
وضعت ذراعها فوق صدره بهدوء كي تعلم عندما يتحرك واغمضت عينيها بمحاذة رأسه...
على الجانب الاخر...
ترتشف الشوربة الساخنة تحت انظار بندر...
بندر ../على الاقل امك وانا ابوك المفروض انها دارية توك تعلمينها ومايمديها تجي حجزة على رحلة الفجر الله يخليك لها...
المهر بهدوء/يبه الحمدالله هذاني زينه...
بندر بلوم/ وحتى رجلك مادرا ولاعلمتيه بأنك تعبتي ومدري وش في غتار ماكلمه الاكيد انه طار عقله مع حادث غيام وهذا هو يقول بجيكم على اول حجز...
كادت عينيها تخرج /يبه ليه الله يهديك علمته...
بندر بغضب/وش الي ليه...خليه يجي ويشوفك انتي لاتحسبيني راضي عن وضعكم ذا كنكم مطلقين هو في الغرب وانتي في الشرق...انا اقول عقب ماربي يشافيك خوذي بنتك وسافري مع رجلك خلاص شغلك واستقر واي احد يديره...!
المهر بعصبية/ذا شي راجع لي انا ..وماقدر اخلي شي تعبت عليه عشان خاطر رجال مهما كان...!
بندر غاضب/ الرجال ذا رجلك وابو بنتك وحالته ماسرتني ماغير لحاله في ذي الغربه
المهر ترتشف الحليب الساخن/ماعليه يبه اهم ماعلى الحرمة شغلها ومكانتها الاجتماعية والايايبه انت حتى تركت امي وطلقتها وانا عليك عشان شي تافه والحين تبيني اخلي شغلي عشان دامر وش يدريك يمكني هاينه عنده في اتفه الاشياء يبيعيني...!
زفر بهدوء وتلك العثرة التي هي بمثابة عن الف عثرة/ خلي مني الخبال وتقليب في الفات ولاجاء رجلك بعلمه انك بتعودين معه تقعدين لمن هنا امك لاهية بحياتها وانا مثل ماتشوفين الشغل اخذ وقتي وانتي شغلك يديره لك اي احد...
وقف بندر بحزم وترك لها المكان...رمت الملعقة بغضب وزفرة...
في الخارج كان غتار يقف عند الكوانتر وتأكد ان عقاب اجبر فخر على الاجازة كي لاتراه...
ابتسم بخبث وهو يتصل على رقمها...لكنها لاتجيب..!
مغرورة كوالدها....!
ارسل لها رسالة نصيه فقد اعطته حضر في الواتس...
( انتي بتردين والا اكلم فارس بشكل مباشر واخليه يجبرك تتواصلين معي ..حنا كبار بلاش شغل المراهقين وعنادهم...!)
بعد وقت قصير جاءته رسالة من الواتس وعلم انها ازالة الحضر عندما وجدها...
( لو سمحت خلك عقلاني لمره وحده ولاتضغطني اكثر من كذا ...هذا ابوي جلسني لاول مره في البيت عشان حضرة جنابك..لاتدق على فارس)
ابتسم بخبث (احسن شي سواه ابوك ...بيني وبينك انا لابس ثوب العاشق واغار عليك من دوامك هنا...(
غاضبه وهي تجلس وتبعد الابتوب والاوراق الطبية من امامها وتضعها على الكومدينة لترسل كلمة واحدة (نعم...!)
لم يرد...!
او با الاحرى وجدة نفسها محضورة منه في الواتس...!
ياالله ماهذه الكارثة البشرية المسماه غتار..!
هو في المقابل وضع هاتفه في جيبه وكان ينتظر طبيب يأتيه ليطمئن على حالة غيام اكثر...وجد شابة تقف بجوار وتستفسر عن اسم غيام الكامل...لتخبرها الممرضة باخر تطورات حالته...!
كانت متوترة...ويبدو خائفة...!
لم يحتج لذكاء ليعلم انها هي...!
بغيض وعنجهية /أنتي.!
.
.
.
وأنت بعيد هكذا
وأنا أقف على عتبة القلق
والمسافة بيني وبين لقائك
جسر من الليل
.
.
.
فارس يبتسم لمتابعينه في السناب وهو يتناول وجبة صحية ويخبرهم بأخر التطورات لاعلانه هنا...
هي في المقابل كانت تتناول وجبتها بصمت مطبق وتنظر لاجواء التي خلف الزجاج با القرب من الموقد ورائحة الخبز والصباح...
كان ينظرلها باطراف عينيه ولم يغب عنه حالة التجاهل التام التي تمارسها ضده الان...
لعبة الكر والفر معها يشعر بأنها حياة وروتين ...هو لم يغفر لها ولن يغفر لكن في ذات الوقت سيتعايش معها...
اصبحت واقعه مثلما كانت ماضية المؤلم...!
تحول حبه لها لرغبة دائمة في ايذائها..لفظيا و نفسيا...!
لايراها ابدا في صورة الانثى المتزنة العاقلة...يراها في ثياب المظاهر وحب الذات والمقارنة...
مهما اخبرته انها تغيرت هو لايرى ذاك التغير لايراه...ويعلم بأنها تتألم في داخلها لكن لاضير فلتتألم كما تألم وتغير...بسببها...!
.../ممكن اعرف وش فيك من امس وانتي كذا ...!
ارتشفت الشاي الساخن وشدة الوشاح عليها / مافيني شي بس متى نرجع...
بتهكم /لايكون تبين الرياض..؟
زفرة /ابي امي..واحشتني مره ولاشبعت منها اخر مره وابي لا نزلنا السعودية اجلس عندها اسبوع او اثنين...
انزل هاتفه .../الله..اسبوع والا اثنين..ليه مالك رجال وراك عنده احتياجات و طلبات...؟
عهد تنظر له /عادي اعتبرني قطعة اثاث وراحت تتنظف ورجعها في مكانها لاخلصت ترى مو شغله...
وقفت وعندما حاولت العبور كان كفها عالق في كفه .../قطعة اثاث...ليش تشوفين نفسك في ها الخانة عندي..
عهد ببرود/فكني يا فارس لاتقول اني مو في ها الخانة عندك...
وقف بجوارها.../عمري ماعاملت الانثى بذي الطريقة بس انتي الي اجبرتيني اسوي فيك كذا...كل الي تشوفينه هذا من عقب كلامك وافعالك...شوفي وين وصلت...
بعصبيه /طيب وين وصلت تغيرت للافضل صرت واحد ثاني شخصية ثانية وصار لك تجربتك وشغلك الخاص ومعجبينك وبرامج واعلانات وبزنس..حتى يوم تقول اني اذيتك انا في الحقيقة مااذيتك انا الي دفعتك الف خطوة لقدام...!
من ثم اردفت /وكل شوي تذكرني في عثرة سويتها وكان ماحد يغلط وليت كل العثرات مثل عثرتي الي خلتك بذا المكان لكن ماكفاك تجريحك لي ليل ونهار ختمتها انك ماتبي عيال مني...انت شخص حقود حقود حقود ...!
كانت تختم كلماتها ببكاء مرير أرعبه...
همس بتهدئة /عهد ...أهدي.....!
همست بغضب /وشلون تبيني اهدا وانت كل شوي والثانيه ترمي علي كلمة مثل السم وفوقها طالع لي بسالفة ماتبي حمل مافي شي يهين المره كثر ها الشي من الرجال انه مايبي منها حمل...!
فارس بغضب/ ماحنا مستقرين ياعهد شوفة عينك..!
عهد بعصبية اكبر/ ولااتوقع بنستقر وانت بهذا الحقد الي زي ابوك عقاب...!
اشتعل فارس فجأة وكاد ان يفقد اعصابه وهو يتناول ذراعها بقوة وكفه عالقة في الهواء كان يريد صفعها وفي اللحظات الاخيرة تمالك نفسة ودفعها من امامه وخرج...
.
.
.
نقف هنا
.
.
.
همسة محبة...قال صلى الله عليه وسلم من صلى الضحى أربعا وقبل الاولى أربعا بني له بيت في الجنة
ومعنى قبل الاولى اربعا اي قبل صلاة الظهر
.
.
.
اللقاء يتجدد ان شاء الله السبت القادم...
|
14-05-17, 07:28 PM
جديد مواضيع قسم القصص المكتمله من وحي قلم الاعضاء
العرض العادي
