فصل رائع وغني بالاحداث شدتني لقاءت فراس وغاده ومتحمسه كثير لزيارتها لجد ولردة فعل فراس بعد ما سمع كلام سجى وحقدها على غاده . اسوم انتي مقبله على ايام سوده وشكله هيثم حيطلع من عينك الحساب القديم والجديد وربنا يعينك بعد تهديد هيثم ( لا تستعجلي على اللقاء ) . مشكلة اسوم انها مندفعه عاطفيا ومتهوره جدا وشكلة هيثم حيجيبلها العقد بس انا بصراحة بتونس كثير على ردات فعلها . وتونسني كثير رداة فعل الرايق نايف بس برافو على ابتسام ربته وخلتة يمشي على عجين ما يلخبطوه ويخاف من ردة فعلها وذاب في حبها عقبال فراس . بليزز يا متمللة نزلي الفصل اليوم بليزززز

تشابتر تسعة واربعين
- في عرفنا الشرقي دائما مايرتبط الانفصال بمأساة , لانجيد الإنفصال برقي , لا ننفصل بسلام ..
أثناء استلقائه على كنبته ويتابع الفلم الثالث على التوالي .. بدا يغفي على آخره لكن انتبه من نومه والساعة تدق على التاسعة صباحا نـزلت إبتسام .. أرمقته بنظره جانبية وهي تكمل طريقها للمطبخ ..
تنهد نايف انتهى الاسترخاء اللحين يبدا الصراع النفسي .. طفى التلفزيون وهو يتبعها للمطبخ كانت تحرك الملعقة بحركة لولبية في كاسها دون تلتفت .. تنحنح وهو يوقف جمبها ويتسند على دولاب المطبخ وراه : اححم .. ابتسام
ابتسام بهدوء : مو شايفني اسوي قهوتي .؟
نايف : واذا ؟
ابتسام رفعت عيونها بحده له : معناها اني جالسه اسوي ترويقة يومي اللي تعدل مزاجي أكثر منك .. فلاتزعجني لو سمحت
نايف : حكيك سم كالعادة .. ( زفر ) متى تفضين طيب حضرتك عشان نكلمك ؟
ابتسام وهي تسكب قهوتها بفنجالها : والله ياقلبي لا تنتظر مني شي ماني شايفته فيك !
نايف : روقي عاد هالزعل كله كبير على قلبك
ابتسام ابتسمت وهي تنتبه ليزيد ورا نايف : صح النوم ياعسل
نايف التفت وهو يتنهد : صح النوم يزيد
يزيد وهو يفرك عيونه بكسل : جوعان ؟
ابتسام : خسى الجوع حبيبي اللحين اصلح لك احلى فطور ( طالعت نايف ) وش نفسك تاكل بعد انت ؟
نايف وهو يطلع من المطبخ : انسدت نفسي مابي شي
همست ابتسام دون نفس : احسن ... ( توجهت للثلاجة تجهـز فطور يزيد )
***
لـــؤي اللي كان متربع مع جده عقب ماراح فراس ... طالع ساعته 3 : يله جدي انا ماقصرت .. تامر شي ؟
ابو عبدالرحمن : آيه امرك شي .. خلك محلك جاي معك
فتح لؤي عيونه : هـاه ؟ بتجي معي الرياض !!
ابو عبدالرحمن بعصبية : اطرش !! ايه بجي معــــك اشتقت لاحفادي وعيالي وبجي اغسل شراع كم واحد فيهم ! عندك مانع ؟؟؟
لؤي : لا لا حشى ماعندي مانع .. حياك
ابو عبدالرحمن : قليل حلا بعد ... ( وراح تاركه )
لؤي حك راسه بارتباك اوضاع الرياض مخبوصه .. وجده اهم شي عنده العائلة ! ( تنهد بضيق ) والله الظاهر ان فيه كم واحد بينلعن شكله الله يعين
***
نـــزلت غادة وعبايتها عليها وطرحتها على كتوفها ... كانت تنزل مستعجلة طقت باب غرفة اسماء : نععععم
غادة : ينعم عليك ياشيخة .. اعجلي البنات برا ماعندك نية تروحين اجل ؟
اسماء بكئابة : ايه مالي خلق روحي لحالك !
غادة : لا اسماء تكفين ... انتي اللي علقتيني بالروحه عن السخافة وقومي
اسماء : غادة خلاص ماراح اروح يعني ماراح اروح ... يعني ميهاف ماتكفي ؟
تنهدت غادة شكل مودها مأتش وماتتحمل احد يحاكيها : يله براحتك
نزلت غادة وهي تلف طرحتها على وجهها وتستعد تربط نقابها ... ام فراس : اسماء ماراح تروح ؟
غادة : لا والله مدري شجاها فجأة تقول ماتبي ..
ام فراس : يله ماعليه اهم شي انتي اطلعي وتوسعي ... معك فلوس ؟
غادة انحرجت بس ماتبيها من ام فراس : أيـه .. ايه معي
ام فراس شدت على لهجتها : متأكدة ؟
غادة وهي تطلع : ايه متاكدة تسلمين خالتي
أول ماطلعت غادة ... ام فراس : غريبة من وين لها الفلوس ؟ طلبت من فراس اجل .؟ لا يكون من اختها !! ليش اوجع راسي ادق ع فراس واسأله وبس
دقت على فراس .. بعد فترة جاها الرد : حمدالله على سلامتك
فراس : تو ماوصلت .. بالمطار للحين
ام فراس : اييه صح راح عن بالي ان طيارتك تو .. يله مابي اشغلك بس بغيت اسألك انت عطيت غادة فلوس قبل تروح ؟
فراس : لا ماعطيتها شي
ام فراس : الله يهديك ويصلحك ! وليش ماعطيتها ماتدري انها بتطلع السوق اليوم واكيد تبي !
فراس : والله اعذريني اهم شي بجدولي كان طلعت الفصعة غادة للسوق ! شعرفني يعني ؟!!
ام فراس : انا خايفة تكون تاخذ من اختها لاني يوم سألتها قالت ايه
فراس : واذا خذت من اختها ؟ بتفلس مثلا !
ام فراس : لا يمه حرام بتجي بوجهك انت .. بيقولون مايعطيها ومن هالحكي
تنهد فراس : يمه انا طيارتي اللحين دبريها من عندك ونتصافى بعدين
ام فراس : يله بروح اشوف ... توصل بالسلامة
***
ميهــاف وغادة بالسوق /
ميهاف وهي تتمشى مع غادة اللي كانت متحمسة مع الاسواق والجو
ميهاف : واسماء ليش ماجت ؟
غادة : ما ادري خبرك بهالبنت فجاة تمسك معها تنفيسه وانا ماحبيت اضغط عليها تركتها براحتها
ميهاف : ياشينها والله ..
دق جـوال غادة , طلعت جوالها كان المتصل أم فراس : هلا خالتي
ام فراس : هلا غادة شخبار السوق ؟
غادة : تو دخلنا اللحين
ام فراس : اسمعي حبيبتي السواق عند البوابة .. روحي وخذي منه البطاقة
غادة : بطاقة ايش .؟
ام فراس : بطاقتي .. اصرفي من قلبك ومرة ثانية قولي لي الصدق .. انا زي امك عيب عليك
غادة انحرجت من قلب .. بس حمدت ربها لانها كان بتنحرج مامعها ولا ريال : تسلمين لي خالتي
ام فراس : فدا عيونك حبيبتي .. يله انبسطي اصرفي عنك وعن اسماء مابي البطاقة ترجع لي فيها ريال !
غادة : هههههههههه لا عاد !
ام فراس : يله سلام
سكرت ام فراس من غادة ... تو بتجلس طق جرس البيت , عقدت حواجبها : من بيجينا بهالوقت ؟ ( نادت ) انسس قم شف الباب !!
ركض انس ناحية الباب .. : ميــــــن ؟!
لؤي : افتح انا لؤي
فتح انس الباب وابتسامته تزيـــد وسع وهو يشوف جـــده : يـــــــــــــــبه !!! ( باس راسه وخشمه باحترام ) هلا والله مرحبا
ابو عبدالرحمن : ما شاء الله تبارك الرحمن .. صايرن رجال هاه ؟ ( التفت للؤي ) بذمتي ان سلامه ازين من سلامك
لؤي : اجل عقبال مايكبر وتصير سواقته بعد ازين من سواقتي ويقضي مشاويرك ! هاه ؟
ابو عبدالرحمن صقعه براسه بقوته : وتــــرد ياقليل الحلا ! لسانك صايرن اطول منك هاه !!
لؤي وهو يفرك مكان الضربه : شاسوي بك جدي طفرتني ... طول الطريق مستلمني مافيه شي فيني عاجبك !
ابو عبدالرحمن بعصبية : ولا راح يعجبني ! لا خشتك عليها حلا ولا حكيك ولا حتى سيارتك ! ( ألتفت لانس ) عندكم احد ؟
انس : ههههههههههههههههه لا مافيه احد حياكم تفضلوا
لؤي : انا استأذن خذ راحتك مع البنات بلا ما افصلكم
ابوعبدالرحمن وهو يدخل :أصلن محد عزمك !
لؤي هز راسه وهو يرجع لسيارته .... اول مادخل ابوعبدالرحمن انتبه لأم فراس عند الباب تغير وجهها للدهشه : عمـــي ؟!!
ابو عبدالرحمن كان صاحب هيبه في العائلة كذا .. ام فراس ماصدقت انه جاي بزيارة طبيعية كذا
ابو عبدالرحمن : السلام عليكم ! شلونتس يانورة ؟
ام فراس : هلا والله مرحبا ومسهلا ... وش هالزيارة الحلوه ؟
ابو عبدالرحمن : شفت ولا واحد فيكم صاحي يجي يزورني قلت انا اجي ازوركم !
ام فراس : والله ان معك حق .. حنا مقصرين بس شالسواه بعد ؟
ابو عبدالرحمن وهو يدخل : يله ماهيب مشكلة صار الحق لكم يالصغار !!
ام فراس : مالنا حق بوجودك ياعمي .. انت روق اعصابك بس
ابوعبدالرحمن : خلي مني هالحكي ..( كمل بانفعال ) وين مرة فراس ؟!
ام فراس ضاقت من الحظ .. يعني ماعمر غادة طلعت ويوم جا جدهم تطلع : والله طلعت مع ميهاف
ابوعبدالرحمن : يعني من هاللحين شطاطه ! المرة تقر ببيتها
ام فراس : والله العظيم ياعمي ان هذي أول طلعه لها غير الزيارات من تزوجت .. وانا اللي اصريت عليها حرام
ابو عبدالرحمن وهو ياخذ مكانه براس الصالة : ولا تكون بتطــــول ؟!!!
ام فراس : لا ان شاء الله ماراح تطول
ابو عبدالرحمن : ووين اسمــــاء ؟
ام فراس التقتت لياسمين : اصعدي بسرعه شوفي اختك قولي جدك تحت عجليها تنزل
صعدت ياسمين ركض ... فتحت الباب مباشرة كانت اسماء مستلقيه ع سريرها : افففففففففففففف خييييييييييييير !!!
ياسمين : اششش قصري ... جدي تحت
اسماء نقزت من سريرها : نععععم ؟ وش جابه فجاه كذا ؟؟؟
ياسمين : مدري فجأه جا .. تقول امي بسرعة انزلي
قامت مباشرة من سريرها وهي تركض لغرفة الملابس تغير الشورت قبل ينغسل شراعها ..شهقت وهي توقف قدام المراية وتنتبه لأن لون شعرها رمادي ! خلاص بتموت رسمي .. تركته على تموجه وهي تـــنزل .. انتبهت لعيونه تنفتح بوسعها وينطق : نورة ! من هالشغالة ؟!!
اسماء بقهر : يبـــــــه ..
ابو عبدالرحمن ضيق عيونه : اسمـــــاء ؟!!! وش ذالطرحه اللي على راستس ؟
ام فراس : ماهيب طرحة ياعمي .. المهبولة صابغة شعرها رمادي
ابوعبدالرحمن : الله لايبارك فيتس .. وش ذاللون المقرف
اسماء شهقت : مقرف مره وحده ؟
ابوعبدالرحمن : ابعدي ابعدي لاتسلمين علي وذاه لون شعرتس تحومين الكبد !
اسماء : مو لهالدرجة يبه !
ابو عبدالرحمن : ألا لهالدرجة ونص ! الله يستر من ميهاف بعد اخبرهاهي المهبولة شعرها كل شوي لون ! مادريت انتس اهبل منها
ام فراس : لا تطمن ميهاف ماعليها لون شعرها زين .. محدن مهبول غيرها !
قربت اسماء تسلم لكن فجاة انتبهت له يرفع اصبعه بتهديد : وخري عني وش جايبتس !
اسماء قربت باصرار وباست راسه : تحرمني من السلام عليك يعني ؟
ابوعبدالرحمن : ماتنعاقين انتي ماشاء الله عليتس
اسماء : الله يخليك لي يبه مقدر ما اسلم عليك
ابوعبدالرحمن : وانخطبتي يالبازع ؟
اسماء وردت خدودها : أيه بس العرس بعدين بعدين جدا
ابو عبدالرحمن بعصبية : وليش بعدين !!
ام فراس : عندها اختبارات ودراسه ماراح تقدر تتزوج تتخرج ويصير خير
ابو عبدالرحمن : أيـه .. وش سر المرزوق ذلا كل عيالي ناشبين فيهم !
ام فراس : هذا النصيب ياعمي .. المهم تراني محلفتك اليوم ممساك عندنا
ابو عبدالرحمن : لا ! بخلص اشوف مرة فراس وبظهر اشوف نايف وعياله
ام فراس : لا والله ان ترتاح ياعمي !! ونايف وعياله يحضرون قدامك متى مابغيت ( التفتت ام فراس لأسماء ) اسماء روحي دقي على زوجة عمك عبدالرحمن واعزميها هي وعمتك ونايف وعياله
ابو عبدالرحمن : واعزمي رجلتس مره وحده خل اشوفه !
فتحت اسماء عيونها بوسعها : وانا شدخلني اعزمه جدي ..؟ يعني خطيبي بس ما اقدر ..
ابو عبدالرحمن : اعتقيني من ذالهبال ! بقص يدي من باطها لو رقمه مب عندتس وتسولفين معه بعد !!
اسماء فتحت عيونها ..: هاه !
ابو عبدالرحمن : هويتي بعد ! اعجلي كلميه
اسماء : لا جدي تكفى .. بعدين اللحين بيجون اهلنا و .... مب وقته ..
وراحت مباشرة قبل يطول السالفة معها اكثر وهي اللي ماتقدر حتى تفتح محادثة هيثم للحين عقب كلامه لها بآخر مكالمة ... تو بتدق على الأهل دق جوالها : هلا غدو !
جاها صوت غادة المرتبك : اسماء !! ارسلت امك لميهاف تقول تعالوا اللحين جدك موجود ... صدق ؟
اسماء : ايه صدق اعجلوا تعالوا كلانا !
غادة بهلع : شلون اسماء مقدر مقدر .. حالتي حاله وشيفة السوق و ...... تكفين شوفي امك اذا عندها مفتاح للباب الخارجي للشقة !
اسماء : من جدك غادة ! مافيها شي والله ليش كل هالحوسة ؟
غادة بتوتر : اسماء لا تحوسيني واللي يسلمك .. ترا اللي فيني كافيني
اسماء : خلاص زين زين بسألها ! مع انه من اللحين ماظني معها , اختصري كل هالتعب وادخلي عادي !
غادة : اسماء افهميني جدك أول مرة اشوفه و ..... والله مرتبكة دون شي
اسماء : انا لله وانا اليه راجعون ! جدي بعبع بياكلك !
غادة بطفرة صبر : اسسسسسسمااااااااءء !!
اسماء : اقول غادة ارجعي مغرب وبس بيكون طلع يصلي وتصعدين مباشرة
غادة : مجنونة انتي ! يكفي انه جا وانا طالعه بيقول اللحين مشاويرها ماتخلص! يكفي انه للحين ...
قاطعتها اسماء : هذي امي اصبري ! يمه عندك المفتاح الخارجي لشقة فراس ؟ ( تنهدت وهي ترجع للسماعة ) لا والله ماعندها شي
غادة بقهر : ياربي شاسوي ! طيب سيمو ما أقدر اصعد دون يشوفني ..؟؟
اسماء تنهدت : لا مايمدي متربع بالصالة كأنه جهاز كشف ! ( نغزتها ام فراس ) ايييي ... المهم انتي شوفي فراس المصون وين حط المفتاح
غادة بقهر : وين بيحطه معه اكيد !! يله اسوم اشغلتك روحي شوفي جدك
اسماء : يله
سكرت غادة والتفتت لميهاف اللي كانت تمشي وتطالع بالمحلات : ههههه شفيك غادة كأنك انخبيتي من دريتي ان جدي موجود !
غادة : هش ميهاف واللي يسلمك حالتي حاله .. ومقدر اصعد ابدل و فوق كل هذا جدك اللحين يحتريني خص نص ! ياربي بموت
ميهاف برواقة : معليش قلبي عاد جدي روحه وحياته فراس ! اتوقع ماشال هم زوجة احد كثر فراس ! خطب له كثير بس ماكان يجي نصيب من ورا عناد الشاطر زوجك
غادة : ميهااااااااااف ! مفروض تواسيني تخوفيني زود ...
ميهاف : انتي هدي ترا كلمت السواق وشوي ويجي ... تعالي ندخل هالمحل على بال مايجي
غادة : أي محــــل ؟!
ميهاف اشرت لمحل قمصان وآندر وير : هنـــا ياقلبي هنا .. باشتري واحد هدية لوداد وانا ناقصني كم شي بعد
غادة حست بقهر .. ميهاف اللحين الكل يعرف انها متهاوشه وبدر بس يضلون زوجين , وهي واضح ان مافيه بينها وبين فراس أي روابط .
ميهاف نغزتها : غادة شفيك فهيتي !! يله بدخل ترا
غادة : ادخلي معليش ... انا فيه هدية وداد بروح اتاكد منهم غلفوها ولا لا ثم نتقابل عند البوابة
ميهاف : اشوفك اجل .. مو تأخرين ترا السواق بيجي باي لحظة
غادة : لا ما حتأخر
***
نـايف :-
كان متربع على الكنبة وحوله هالة سوداء وهو يراقبها تعيش يومها الطبيعي قدام عينه .. جالسة ترضع التوأم ثم تقوم للغسيل ثم تاخذ مكالمة ولا فيه شي تأثر بيومها ...
دق جواله ... طالع المتصل وهو يكبس عيونه تنحنح وهو يرد بربكة : هلا والله !
نايف عض على شفايفه : افا يبه شفيك !
ابوعبدالرحمن : اسمع يانويف هي ربع ساعة لو ما أشوف عيالك قدامي ياويلك
نايف : روق يبه الله يهداك وش ربع ساعة طريق القصيم لحاله مب ربع ساعة ! وبعدين امهم ماراح تخليهم يمسكون خط
ابو عبدالرحمن بانفعال : يومه ليش ماتخليك !!! عيالك ولا عيالها .؟!! نخلص من نهى وهبالها تجينا الاخرى ... اسمع تجي انت وعيالك مب بس التوم يزيد يحضر بعد .... ولا تتفلسف انا بالرياض في بيت عمك فهاد الله يرحمه !
نايف : ما شاء الله حمدالله ع سلامتك يبه .. دام كذا من عيوني اجل
ابو عبدالرحمن : مابي عيونك ! مالت عليك وعلى عيونك ... ابي احفادي وبس اعجل جبهم ! ....
هز نايف راسه : ههههههههههههه ياحليلك يا يبه حتى انا مابي اعطيك عيوني
ابو عبدالرحمن : طوط طوط طوط
نايف التفت لإبتسام اللي كانت برا بالحوش وتو دخلت .. : سومتي
ابتسام : وش ؟
نايف : ابوي نايف الكبير بالرياض وطالب يشوف عيالي ماشافهم من انولدوا جهزيهم خل نروح نسلم عليه
ابتسام : بالرياض وين ؟
نايف : بيت فراس
ابتسام : ماشي دقيقة بس اجهز واجهزهم
نايف : وماودك تسامحيني قبل نروح طيب . ؟ ترا طق قلبي خلاص لي ساعة اشوفك معطية كلش بالبيت وجه اكثر مني
ابتسام : لانهم كلهم يستاهلون اكثر منك
نايف : على راسي ... بس جد ابتسام يعني راحت علي نومة ماحسيت ! ومن قبلها كنت قايلك اني تعبان وانتي اصريتي
ابتسام تكتفت : لو انت مهتم ماكان راحت عليك نومة
نايف : ياليييييييييل .. وش جاب ذاه لذاه !!
ابتسام تنهدت : نايف ... صدقني الموضوع مايسوى هالزعل انا عارفه ؟ بس صدقني انا يحز بخاطري وقت ما اشوفك مسؤول .. يعني امنيتي اكون مع واحد يهتم فيني مو انا اهتم فيه !
نايف وقف وهو يمسك يدينها بكفوفه ويجمعها سوا : صدقيني انا مو مهمل كذا الا لاني عارف انك قدها وقدود .. يعني امانه ابتسام انتي محتاجه مني شي ؟ محد محتاج هنا غيري
ابتسام بزعل : إلا محتاجه .. انا خلاص وقفت وظيفتي ومابي اعيش خوف انك تترك وظيفتك او يصير شي .. وبعدين المسؤولية كبرت ماعدنا اثنين بس عشان كل واحد يهتم بحاله وخلصنا .. عيالنا بكرة بيكبرون مابي اشيل هم دراستهم و مشاويرهم و .... يكفي لما كانو في بطني ماشلت مسؤوليتهم معي ولا شوي
نايف ابتسم : يالله يا ابتسام قد ايش تفكرين لقدام .. يعني لاني نمت وتركتك بالشركة معناها تدخليني كبسولة زمن ومدارس ومدري ايش ... الله يحيينا لبكرة يارب
ابتسام بقهر : وهذا قصدي من المسؤولية ! انا ابي واحد يفكر لعشر سنين قدام .. نايف تكفى انت مو ناقصك شي ليش تقهرني بحركات بايخه كذا ! ماتقدر تكون مسؤول يعني ؟
نايف مسح على وجهه : افكر في عمر يمكن ما اعيشه ! خليك في اليوم وبكرة يحلها الف حلال ! وبعدين انا مانيب فقري ولا مقطوع عشان افكر واخاف ... حمدالله ربي كافيني
ابتسام سحبت يدينها من يده : شفت انك ماراح تفهمني !
نايف : طبيعي ماراح افهم ! يعني اللحين لو انتي رحتي تجهزين ونطلع لجدي وننبسط مو أحسن من نقاش في امور يمكن ماتصير اصلن !
ابتسام بقهر : شنو تتفاول انت علينا ؟ وش امور يمكن ماتصير . . جالس تودع وانا مو عارفة ؟!
نايف : ماتفاولت على احد !
ابتسام : إلا هالامور ماراح تصير الا اذا احد فينا صار له شر ! !
نايف : سلامتنا من الشر بس بجد ليش نستعجل على امور بعيده ...
ابتسام : من جد معك حق .. ليش اجلس اقهرك بامور بعيده وانت حتى الامور الحالية مو عارف تشيلها !
صعدت بعدها عشان تنهي النقاش وهي تحس بقهر ! مفروض جلست حاقرته ... توقعت لما تتكلم يفهم بس عبث
***
أول ماوقفت السيارة عند الباب التفتت غادة لميهاف : بتنزلين ؟
ميهاف : مو بيدي والله لا يدري اني ماره ومانزلت بيغسل شراعي
غادة نزلت وهي تسحب كومة اكياس معها فرغت طاقة كل هالفترة اللي راحت بالسوق . . أول مادخلت ركضت لها اسماء : هلا جيتو !!
ميهاف : ايه تو جينا وين جدي .؟
اسماء : جدي بالمجلس يحتري نايف وعياله .. غدو فرصتك اركضي بسرعه لفوق قبل ينتبه
غادة تجمعت دموعها كانت شايله هم كيف تشوفه بهالشكل : ششكرااا اسماء
اسماء : غدو وش كل هالاكياس خميتي السوق كله !!!
ميهاف : ههههههههههههههه شفتي حصلت وحده تغلبني .... لا وجزعه تشتري دون تعاين حتى
غادة : اسوم شريت لك اشياء تجنن .. تفوتك !
اسماء : يؤ ليش وش عليك مني انا ..؟
غادة : حلو وش علي منك يكفي انك عروسة وللحين ماشريتي شي
ميهاف : غادة بخاطرك تجلسين تسولفين لين يطلع ابوي ويكبشك !
غادة شهقت ... : لا لا بروح اللحين
ركضت لداخل بينمـا دخلت ميهاف للمجلس : السلام عليكم ورحمة الله وبركاته !
ابو عبدالرحمن تهلهل وجهه : هلا هلا هلا بالغالية .. هلا ببنتي هلا بحبيبتي , الله يسعدلي ذالوجه ! تعالي وانا ابوتس
شهقت اسماء وهي تضرب على صدرها : يبــــــــــــه !! كل هالترحيب لها وانا مابغيت تسلم علي
ميهاف وهي تحضن جدها : انا غير ياقلبي انا اكبر حفيدة بنت !
اسماء بقهر : بسلامتك ياقلبي ! وداد جايه قبلك !!
ابو عبدالرحمن : شششب ولا كلمة ! ترفعين صوتس على ميهاف ... ( التفت لميهاف بابتسامة ناعمه وهو يحضنها ) كلش الا ميهاف سامعتني يالبازع ! الا وين البازع اخرى سجى ؟؟
ام فراس : الله ياعمي تكفى لاتجمعهن .. يفضى راسي وقت تجي سجى واسماء سوا
ابوعبدالرحمن : شفتي انتس مافيتس ذرة انوثة ! شوفي شوفي ميهاف تعلمي منها ( مسح على راس ميهاف بشعرها الطويل لخصرها ) شوفي الشعر بس ما شاء الله تبارك الرحمن شوفي الزين ... وانتي كنتس ملحاق ياسمين احسن منتس
اسماء تكتفت بزعل : زيييين زين ! اصلن عادي وانا مابي احد يحبني ولا احد يهتم فيني , زييييين ؟؟؟
ابو عبدالرحمن فتح عيونه : وترفعين صوتس يالبازع .. فكوني اقوم عليها اقطع العقال فوق ظهرها
اسماء عطته ظهرها وهي تطلع وتطربق الارض بطريقها ... ابوعبدالرحمن : بنات اخر زمن !
ميهاف : والله يبه مسكينه حرام كسرت خاطرها كذا
ابوعبدالرحمن التفت لام فراس : وين الاخرى ..؟! تراني جالس امسح كرامتي وانا احتري وحدتن الظاهر ماهمها اني هنا !! اسمعي يانورة ياويلتس ياسواد ليلتس لو تطلع شينه !
ميهاف : يوه يبه ليش كذا .. اهم شي البنت اخلاقها شدخل الزين
ابوعبدالرحمن : اخلاقها تخليها لها ! اهم شي حلوه وبس
ام فراس : يا عمي تحكم وانت ماشفتها .. اصبر اكيد راحت تضبط عمرها
ميهاف : كويس اللي لحقت وانا اقولها عادي طلعت ياجدي مب هوين
ابو عبدالرحمن : إلا وين بديــران ..؟!!
ميهاف تلخبطت .. ماعرفت شتقول : مدري يبه والله ..
ام فراس : اللحين اكلمه يجي
ابو عبدالرحمن بصرامة : لا !! تاليته جاي وبشوفه اللحين خل البنت تشرف اجلس معها مانيب فاضي له
ام فراس : الله يعافيك عمي بشويش عليها
ابو عبدالرحمن : وانا باكلها !!!!!
ام فراس : العفو مب قصدي يعني بس خبرك أول مرة تشوفك واخاف تفهم اسلوبك غلط ..
غـادة لبست فستان أبيض منقـوش بورود فوشية بستايل ربيعي بكم علاق والفستان لآخر ساقها .. مع كعب قصير , وزينه باكسسوار ذهبي وهي تترك شعرهـا الستريت يطيح على كتـوفها ومكياج بألوان ناصعه متماشية مع الفستان
أول مانزلت انتبهت لاسماء جالسة قدام التلفزيون والريموت بيدها على فمها وواضح حمقانه ..
غادة : اسماء شتسوين هنا لحالك ؟
اسماء : كيفي !
غادة : افا اسوم شفيك اليوم وربي تقهرين .. انبسطي وتعالي معي برا!
اسماء : ما ابغى .. خل شيبة النحس ينبسط مع ميهاف يشبع بها
غادة فتحت عيونها : شيبة النحس قصدك جدك ؟!
اسماء : ايه قصدي جدي !!
غادة : اف وليش زعلانه طيب .؟
اسماء : غادة وربي مالي مزاج وبعدين بسرعه اطلعي تراه شوي ويدخل يسحبك من شعرك ! يسويها ترا
غادة بربكة : طيب اسماء والله انا خايفة .. يعني مدري أول مرة اشوفه وشكله شخصية قوية بسم الله
اسماء : عشتــوا ! شف من يقول هالحكي ..؟ لا ترتاعين مب صاير اعدى من فراس
غادة تنهدت بضيق : طيب تطلعين معي ؟
اسماء : لاااا وستين لااا ! ماراح يشوف خشتي طول ماهو هنا
غادة تنهدت : ماشي ... طيب شوفي شكلي مضبوط ؟!
اسماء دون نفس : زينه اخلصي علينا عاد
غادة مشت بالممر وهي توقف عند المراية تضبط شعرها .. خذت شهيق زفير : غادة الوضع اوكيه .. اعتبريه رجال كبير عادي وسلمي وخلصنا !
كشت على نفسها بالمراية : ليش لبست هالثوب كانه طلع بايخ !
: غااااااااااااااااادة !
كان صوت ام فراس تنادي من برا .. بلعت ريقها وهي ترد : جااااايه جايه
مسكت بطنها وهي تشد شفايفها ببعض : ياربي رحمتك
خذت شهيق دون زفير وهي تطــلع لبرا .. اول ماوصلت الباب دعت ربها يمشي امورها , هالشايب صوته طالع من وهي بالبيت شكله يخوف بجد ..... طقت الباب طقتين : .........................
جاها صوت ام فراس : ادخلي غادة مافيه احد
فتحت الباب وهي تدخــل وعيونها بالارض ماتبي ترفعها وتشوفه .... اما ابو عبدالرحمن طالعها من فوق لتحت وابتسامته انرسمت وهو ينطق : هلا بزوجة الغالي .. هلا ومرحبا حياتس ليش واقفة عند الباب
غادة رفعت عيونها وهي تطيح عليه كان مبتسم .. حمدت ربها توقعته يطلع يخوف اكثر , مشت ناحيته وهي تنحني تبوس راسه : كيف حالك عمي ؟
غادة ارتبكت من مصافحته .. ما افلت يدها لما خلصت المصافحه ظل حاضنها وهو يطالعها وبيده الثانيه مسح على خدها : عاش من شافتس ابوي
غادة من الربكة تلخبطت بالرد : الله يشوفك !!
تلون وجهها وهي تستوعب ردها الغبي .. ابو عبدالرحمن : هههههههههههههههههههههههههههههههههه ! امنا بالله
غادة شدت شفايفها لاتبكي .. كرهت نفسها وردها الغبي : ............................
ميهاف : هههههههههههههههههههههههههههه اول مرة بحياتي اشوف غادة مرتبكه كذا !
ابو عبدالرحمن وعيونه فيها : ما شاء الله تبارك الرحمن .. ما شاء الله تبارك الرحمن .. والله زين مانقيتوا
غادة بلعت ريقها .. جده غازلها اكثر منه هو نفسه : ..............
ابو عبدالرحمن ومازال ماسك يدها وهي على حنيتها وهي تسلم عليه ويده على خدها : ليش ساكته يابوتس ؟
غادة خافت ترد رد غبي زي اللي قبله : ..................................
ام فراس حست بغادة ماتعودت على هالمواقف : ههههههههههههههه ياعمي احرجت البنت حرام
ابو عبدالرحمن وهو يربت على المكان جمبه : تعالي اجلسي جمبي
غادة ( جمببببببببه بعد !! ) جلست بربكة من هالإنسان : .....................................
اما ابو عبدالرحمن كانت غادة نالت قبوله بقوه .. درجة القبول تعتمد على درجة الجمال : ....................
ابو عبدالرحمن وهو يمسح على راسها : شخبارتس ويا فراس ؟ ان شاء الله مرتاحين .؟
غادة وهي منزله راسها ولمسته تربكها : ان شاء الله ..
ابو عبدالرحمن : ان شاء الله هذي ماتمشي الحال .. سولفي لي ترا اعرفه هالولد احيان يخبص !
غادة ابتسمت ع مصطلح يخبص : هههههه لا بسلامته مايخبص ولا غيره ..
ابوعبدالرحمن : يازين من ضحك .. وش هالمبسم خاتم سليمان
غادة انحرجت زود .. هالمدحه مو أول مرة تنقال لها : .............
ميهاف : الله يهديك يبه ترا اهل جده ماعندهم خاتم سليمان تلقاها تحسبك تسبها
غادة : لا لا اعرفه ..
ابو عبدالرحمن : شفتي تعرفه ! الله يحرسها يارب
غادة وهي منجذبه للمدح الزايد : ويخليك يارب
صوت ضرب الجرس .. ام فراس : اكيد هذا نايف ... يله بروح اشوف
غادة قامت تدخل .. ابوعبدالرحمن : والله حرام احد يخلي رفقة القمر ويرافق نايف ! لا بارك الله في حزته
غادة سوت نفسها ماسمعت وهي تطلع وتركض لداخل وقلبها يضرب .. أول مادخلت ابتسمت من قلبها لاسماء : حرام عليك اسماء تقولين عن جدك من شوي شيبه والله يجنن !
اسماء حركت فمها باستهزاء : والله يجنن ! قدرك اجل !! وش جابك ارجعي له
غادة : والله ودي بس نايف جا وطلعت غصب
اسماء : شلون اجل .؟ انبسط الشيبه عليك .؟
غادة جلست : يالله يا اسماء اول مرة بحياتي كلها احد يدلعني ويحاكيني كذا بغيت انجلط بمكاني !
اسماء : ايه ياعمري مزة هذا اهم شي عنده !
غادة تنهدت بحلم : والله حبيته من قلبي ياخذ العقل
اسماء : خرفنها خرفنها جدي
غادة : يحق لي والله .. قسم بالله خيال جدك هذا ( ابتسمت وهي تطالع يدها اللي كان ماسكها طول الجلسه )
: غـــادة !
ابتسمت غادة من قلب وهي تنتبه لإبتسام تدخل : هلااااا والله حبيبتي ( وقفت تضمها ) وين عصافيرك ؟
ابتسام : برا مع جدهم .. شخبارك ؟ اسومه شخبارك ؟
اسماء دون نفس : زينة
ابتسام : افااا ليش اسوم زعلانة .؟
غادة : اسئليها من صحت اليوم وهي اخلاقها تجارية ما شاء الله
اسماء وقفت وهي تسكر التلفزيون : انبسطوا انتو بلا ما اخرب جوكم باخلاقي ( صعدت لفوق )
كبست ابتسام بعيونها : شفيها بجد ! لايكون زعلت .؟
هزت غادة كتوفها : مدري عنها والله ... ( ابتسمت ) اقول ابتسام اول ماتزوجتي وسلمي على جدهم ! كيف كان ؟
ابتسام عقدت حواجبها : عادي مافيه شي مميز يعني رجال كبير وسلمت عليه
غادة : قصدي يعني ما دلعك بزيادة ؟
ابتسام : لا والله كانت الجلسة رسمية اساسا .. انتي سلمتي عليه ؟
غادة : لا اليوم أول مرة اسلم عليه تخيلي .. وربي يا ابتسام كنت حطيح بمكاني يعني اول مرة احس بمعاملة كذا !
ابتسام : أيه تستاهلين خل يعوضك اقل شي عن زوجك الرومنسي
غادة : شجاب طاريه اللحين !
ابتسام وهي تتذكره اخره مرة بالشركة : مافيه شي ... المهم غدو بكرة انا عازمتك ضروري ضروري والاعتذار مرفوض سلفا
غادة : مقدر اقولك ايه من راسي .. استني بشوف خالتي شتقول
ابتسام : قولي وما أعتقد ترفض لك شي .. اهم شي بكرة تكونين عندي وبس
غادة : على خير ان شاء الله
***
خلص اجتماعـاته المتتالية ورا بعض ... سكر الملف وهو يرميه على مسعود وراه : خلصنا اليـوم ؟
مسعود : تقدر تاخذ اجتماعات بكرة اذا تبي تخلص بدري
فراس وهو يوقف : لا مو ضروري .. خلنا على راحتنا احسن شغل بكرة اتركه لبكره , السيارة جاهزة ؟
مسعود : اكيد تفضل
نـــزل فراس بسيارته : خذني لسوق المنطقه
السواق : حاضر
دق جـــواله
كانت المكالمة الثالثة قبلها مكالمتين ماقدر ياخذها بالاجتماع .. رد مباشرة : هلا والله
ام فراس : هلا فيــــك .. شخبارك ؟ شخبار الشغل ؟
فراس : على خير ان شاء الله .. انتو كيفكم ؟
ام فراس : حمد الله ... تخيل من عندنا ؟
فراس عقد حواجبه : وانا شعرفني .. خبري كل الناس عندكم انتو !
ام فراس : لا هذا واحد مو على طول يجينا يعني !
فراس بضيق : وش هالسالفة يمه قولي من وبس ! بلا هالحزازير
ام فراس بحماس : جــــدك اليوم جانا
فراس : ابوي نايف .؟!
ام فراس : أيه جانا بدري اليوم
فراس : غريبة عليه هالكرم بالزيارات اخبره عقب الشين يطلع من ديرته
ام فراس : وطلع اليوم الله يهنيه ... وجلس عندنا وقابل عروستك
فراس : أيـــــه و بعدين ؟
ام فراس : انبسط عليها مره اعجبته جدا جدا !
فراس رفع حواجبه : اهـــا .
ام فراس بقهر : اها وبس .؟! بين لي انك مبسوط
فراس : وانا شدخلني ؟ المصلحه مصلحتها هي انا ماراح تفرق معي اعجبته ولا لا ... المهم , بسألك بدر تواصل معك اليوم ؟
ام فراس بهم : لا والله .. معد شفته اصلن من قلعته من البيت الله يصلحك
فراس : اها , ماشي اجل تامرين على شي ؟
ام فراس : سلامتك حبيبي .. متى راجع ؟
فراس : الشغل يحكمني متى ماخلصت جيت
ام فراس : جدك بيجلس عندنا الليلة ومدري لمتى بيضل .. حاول ترجع قبل يرجع
فراس : ما أدري يمه والله مافيه شي بيدي
ام فراس : الله يستر عليك اجل
سكر فراس السماعة وهو يبتسم ابتسامه جانبية : هالفصعه اعجبته .؟! ( طالع السايق ) وقف هنـا !
نـزل من السيارة وهو يدخل المـــول .. زفر : وين ذاه بعد
: هنـــا !
التفت للشاب الطويل بمظهر شبابي : اخيرا !
الشاب : هههههههههههه طول بالك تو جيت
فراس : تعال نجلس بكافيه انا مطول معك
الشاب تنهد : اللهم اجعـــله خير
جلســـوا بالكافيه .. اففتح الشاب الكلام : والله غريبة عليك تكلمني .. انا بحياتي كلها ماجا بيني وبينك تواصل
فراس بجلسته الانيقة رجل على رجل .. وقهوته بين اصابعه : بالمقابل كان بينك وبين اخوي تواصل
عقد حواجبه : ايه بس لنا زمان عن بعض ... يعني كذا سنه مو شايفه
فراس وهو يجلس قهوته ويعدل جلسته : بعد موت أبوي الله يرحمه ... انت كنت تشوفه بشكل يومي , وهذا كل اللي احتاجه
خالد استغرب : ايوه وبعدين ؟
فراس : شردة فعله ؟ انا كنت مهمل بوقتها ولا التفت له .... والظاهر اللحين التفت متأخر وجالس ادور اخوي مو محصله فسق تماما
خالد تنهد : والله مدري شا أقولك فراس ... يعني ردة فعله كانت بارده نهائي للحين كلمته تتردد باذني وقت عزيته طالعني دون نفس وقالي : واذا صرت يتيم , وبعدين يعني ؟
فراس : وما تعرف متى دخلت فكرة الشهره لراسه ؟ متى قرر
خالد : هو بدر ماكان شاطر بالدراسة .. ووقت دخل الجامعة ماضبطت معه كان يفوت الكلاسات وجاته على البارد المستريح حساباته بالتواصل الاجتماعي ارتفعت مشاهداتها وفجأة صاروا الناس يطلبونه
فراس ابتسم بسخرية : يعني قرر يصير مشهور عشان كم لايك وكم زفت !
خالد : تقريبا .. من ماراح يختار الحياه السهله يخي ؟
فراس : ايه وبعدين ؟ انت ليش ماعاد بينك وبينه تواصل
خالد : تغير مره .. لا تحسب انه احترمني عشان كان صديقي ثلاث سنين .. بدر علمني افهم ان الناس كلها ممكن تتغير وقت يحصلون غيرك يروحون وكانهم ماعرفوك ... وانا ما اخذتها شخصي يعني يمكن معد صار يعجبه واحد عادي زيي يصير صديقه وهو مشهور! او يمكن الموضوع ابسط من كذا معد حصل وقت لي
فراس : حصل وقت يتركك ولا حصل وقت يودعك ؟ لا الموضوع مو كذا ... الموضوع انك لك كرامه وماتركض وراه , وبدر مايعجبه الا اللي يركض وراه
خالد : ههههههههههههههه ماعاد عندي شغل الا الحقه .؟
فراس : وسخافات البنات والدشره هذي .. من أول ولا عقب ماكبروا راسه الاعلام ؟
خالد : لا والله لما كان معاي ماكان بينه وبينهن شي
فراس تنهد : ماشي يعطيك العافية خالد اعذرني قطعت وقتك
خالد : ابد حاضر لعيونك متى مابغيت .. تامر شي ثاني ؟
فراس : سلامتك .. انت اذا محتاج شي لايردك الا لسانك
خالد : تسلم والله ماتقصر
تنهد فراس أول ماراح خالد .. ( اللحين امس عند عمي عبدالرحمن تعمدت اقول قدامه اني مسافر ! عشان يروح يشوف امي بس عبث) طلع بوكه وهو يدفع الحساب ويوقف ... بطريقه انتبه لمحـل مجوهرات تردد براسه كلام سجى امس (بس تخيلي طلع صدق شكل فراس ماعطاها طقم لزواجها , يوم سألتها صرفتني ورفضت توريني اياه ... وانا فعلا ماشفته عليها من قبل ) حاس فمه بضيق وهو يطالع الساعة ... دخل المحـل واسقبلته البايعه : مرحبا مسيو
فراس مسح بعيونه على المحـل .. رفع اصبعه ياشر لطقمين : طلعي لي هالثنين
استغربت البايعه اختياره السريع .. نزلت الطقمين وهي تفتحها قدامه : عجبوك ؟
فراس جلس بكرسي الخدمة وهو يفحصها بعيونه : ألماس ؟
البايعه وهي تأشر تشرح له الطقم : هالفصين ألماس بس الباقي اكسسوار
فراس اشر براسه : شيليه اجل ... هذا الثاني قيراط كم ؟
البايعة : هذا 2
فراس همس بينه وبين نفسه : ماينفع للهياط .. ( ألتفت لها وهو يعطيها الطقم ) عطيني طقم 4 قيراط لو سمحتي
البايعه : حاب الطقم يكون قلادة وحلق ؟
فراس : وخاتم !
البايعه سحبت طقم من الخزنه وفتحته قدامه : تفضل .. شو رايك بهذا ؟
فراس : مافيه انطع ؟ باهت بالمرة
البايعه احتارت : معليش اعرف ايش مناسبة الطقم لأعرف اساعدك ؟
فراس وقف وهو يمشي على الطقوم حتى استطرف انتباهه طقـم عبارة عن قلادة وحـلق وخاتم .. الألماس الأصفر بتشكيلة هندسيه على الصدر .. اشر له : هذا
البائعة : ذوقك كثير منيح .. هذا لسى نازل هالشهر وحديث بالمرة وماراح تحصل منه كثير
فراس : هذا المطلوب
البائعة : حابه يكون مغلف ؟
فراس : ماراح يضر
اثناء ماهي تغلفة تكى بمرفقه على الطاولة ظل يتمعن القطع الألماسيه باشكالها وبريقها .. : ممكن على ذوقك قطعة تناسب حرمة كبيرة بالعمر
البائعة بحماس من الربح اللي نزل فجأة : منيـــح .. عندي ساعة ذهب اتمنى تعجبك
فراس طالع الساعة ابتسم برضا : كويسة غلفيها اجل مع الطقم وخليني اسري
البائعة : من عيوني حاب اغلفها كلها سوا ولا افصلها ؟
فراس : لا طبعا افصليها !
البائعة : اوكيه
توجه للمحاسبه أول ماوقف دق جـواله ... رفع جواله ( غادة ) : ام قليب حاسه انها جمطت بطاقتي اجل !
رد : ايه نعم ؟
غادة وواضح على صوتها فرط السعادة : حمــــــــــــدالله على السلامة !
فراس : سكري السبيكر اولا ثم تكلمي !
غادة كشرت وهي تلتفت لإبتسام اللي اشرت لها تسكر السبيكر .. سكرته: يمه شعرفك !
فراس : باخص حركاتك البايخه ... شبغيتي ؟
غادة بحماس وهي توقف تبعد من ابتسام شوي : شفت جــــدك
فراس : ايه ؟ وعسى بيضتي وجهي ؟
غادة بحماس : بيضته وبس .؟!!! رفعت راسك للسماء السابعة
فراس : وليش تحسسيني انك مسويه انجاز ؟ غصب عنك اصلن !
غادة كشرت وهي تقز السماعه بقهر : لا مو غصب .. هذا جدك مايحب اسماء ! كارشها مسكينه .. هذا دليل اني غير
فراس رفع حواجبه : الله لايعطيك العافية ياجدي من اللحين كبرت لي راسها .. لا ياشيخه ماحزرتي جدي يهد في اسماء لانها طبيعيه ماتعرف تتصنع زي بعض الناس
غادة شهقت : يشهد ربي علي اني ماتصنعت !!
فراس وهو يسلم بطاقته للبايعه : وانتي داقة تكايشين اللحين ؟
غادة تحنحنت : لا والله .. داقة اطلب منك طلب
فراس : اللي هو ؟
غادة : ابتسام اختي عازمتني بكرة وبخاااااااطري اروح لها .. تكفى قول ايه
فراس مباشرة : لا ... شي ثاني ؟!
غادة فتحت عيونها : شنو شي ثاني ! لحظة لحظة ليش لا !!
فراس وهو يستلم بطاقته من البايعه ويسحب الكيسه معه ويطلع : رجعي السبيكر
غادة : شنو ؟ ليش ؟
فراس : مالك شغل ! رجعيه وبس
غادة عضت على شفايفها وهي تدخل الغرفة وتسكرها تاركه ابتسام بالصالة : اذا قصدك تقول كلمه توجع ابتسام فلا شكرا !
فراس : شدعوه اوجعها ؟ بس اذا تبين الصدق ... اختك لسانها تقصه اذا كانت تبيك تدخلين بيتها
غادة بقهر : وابتسام بشنو طولت لسانها معك ؟ اصلن مابينك وبينها شي !
فراس : غادة ! مو عشان طلعتي اليوم السوق وجدي نفخك بكم كلمة تحسبين انك تقدرين تجادليني ؟ قلت لا يعني لا وخلصنا
غادة عضت على شفايفها : بس ...
فراس ببرود : المهم لا اوصيك ؟ روحي لامي تبكبكي عندها عشان تكلم تفزع لك واوافق .. طيب ؟
غادة : في ذمتك متى سويت كذا !
فراس : طلعتك اليوم مثلا .. عموما سويها تراهي ناجحة تماما
غادة بقهر : ماراح اروح ..
فراس : لا لاتقولينها بهاللهجة الكسيحة قدامي .. قدام امي مثل كل مرة !
غادة ونفسها طابت : ان شاء الله , شي ثاني ؟
فراس : مع السلامة .
سكر السماعة بينما غادة رمت الجوال بقهر .. داقه عليه مبسوطة وماعرف يسكرها قبل ينكد عليها !!
طق باب غرفتها : غادة ؟!
غادة تنحنحت : جايتك لحظه ( وقفت قدام التسريحة تعدل شعرها وتكبس بعيونها لا تدمع ... تاففت بقهر تكره حساسيتها معه ليش لازم يخلي اللي يحبونه يندمون ..)
طلعت من الغرفة واستقبلها وجه ابتسام القلق : شفيك يابنت الحلال ؟ هذي اللي سبيكر قمتي مره وحده وسكرتي الباب!
غادة : ههههههههههههه سر !
ابتسام : المهم شصار ؟ هاه بكرة بتجين .؟
غادة : والله يا ابتسام احس صعبه .. جدهم موجود وبينام هنا وانا اليوم طالعه اتخيله يشوفني بكره بطلع بعد بيقول داجة هالبنت !
ابتسام تنهدت باحباط : معك حق .. ( طالعتها بنظره لها معنى ) يعني الافندي ماقال لا ؟
غادة بشكل طبيعي قد ماتقدر : إلا قال لا .. عشان هالسبب .. جده وكذا
ابتسام رفعت حواجبها : اهــــاا
غادة : ابتسام ... انتي صاير بينك وبين فراس كلام شي ؟
ابتسام : ليش تسألين ؟
غادة حاولت يكون السؤال طبيعي : لا بس لانه يلمح لكلام بينك وبينه .. ومدري انا مافهمت وماابغى اساله
ابتسام هزت كتوفه لكنها فهمت انه رفض عشان اخر مره : على حد علمي مافيه .. وش بيجيب الكلام بيني وبينه ؟
غادة هزت راسها : اهــا
ابتسام : حابه ننـزل ؟
غادة وهي ترمي بجسمها على الكنبه : لا نايف تحت والظاهر العالم بيجون اكيد يسلمون .. واسماء مالها خلق , خليني هنا وبس
ابتسام : انا شايله هم عيالي ودي انزل اشوفهم
غادة : ريحي بالك انتي ابوهم معهم !
ابتسام بقهر : ان هذي المصيبة !!
تحت /
نـايف سادح مشعل بحضن عبدالرحمن وعبدالرحمن منفجر بالبكاء من اثر الثقل على فخذه .. صرخ عليه جده : وعمـــى بعد ! شل الولد مسكين كسرت رجله
نايف : هههههههههههه شاسوي به هالدحيم نفسيه وش فيها لو نام اخوه بحضنه يعني
ميهاف وهي تشيل مشعل من عبدالرحمن : صاحي انت ؟! تجارب هم عندك تحوس فيهم
ابو عبدالرحمن : الشرهه على اللي يحسبك أبو ! ماتعرف تسوي شي صح انت بحياتك ؟
نايف بتبلد : شاسوي يبه انت عارفني من يومي سجين عادات سيئة
ابو عبدالرحمن : انشهد مالت على خشتك ! المهم متى ناوي تسوي الشغل اللي وصيتك عليه ؟
نايف : لا فضيت
ابو عبدالرحمن : هذا انت لا فضيت لا فضيت ! هم لا فضيت قلت لي بعدين
نايف : يا يبه والله والله مافضيت يعني من بديت وظيفتي وانا من شغله لشغله ماخلصت
ابو عبدالرحمن لما انتبه لميهاف طلعت من المجلس .. التفت لنايف : نويف .. دق على بدر شف وينه
نايف فهم ان جده انتبه .. تنهد وهو يرضخ لطلبه ويدق .. بعد فترة جاه صوت بدر : ايه نعم ؟
نايف : هلا بدر ... علومك ؟!
بدر : عايش .. شتبي ؟
نايف : انا في بيتكم ومعي ابوي نايف ... ويسأل عنك وينك يارجال ؟
بدر : واذا في البيت شاسوي به يعني ؟
نايف ماقدر يتكلم لان ابو عبدالرحمن يحدق فيه بقوه : المهم هو يحتريك .. لا تتأخر
بدر : ماراح اجي ارتاح ! .................... طوط طوط
سكر نايف السماعة وهو يرد على نظرات جده : يقول مشغول مايقدر يجي
ابو عبدالرحمن : نااااااااااااايف ! عينك بعيني وانطق .. شصاير مع بدر ؟
نايف : اسأله انا شعرفني ..
ابو عبدالرحمن : تكذب علي انت ووجهك ؟
نايف تنهد : يايبه والله مدري كل اللي اعرفه ان بينه وبين فراس مشاكل
ابو عبدالرحمن ضيق عيونه : بس مشاكل بينه وبين فراس ؟
نايف تنهد : وبينه وبين ميهاف .. وبينه وبين ابوي .. وبينه وبين الإعلام .. ومن كل مكان
ابو عبدالرحمن : وهالحكي من متــــى ؟!
نايف : له شهرين ..
ابو عبدالرحمن : وساكتين تخلون المشكلة تكبر !!!
نايف : والله يايبه بدر معنـد وانت تعرفه راسه يابس .. واللحين كل علومه منخبصه ومع ذلك مازال مكبر راسه
ابو عبدالرحمن : واللحين ماراح يجي عشان مشغول ولا رافض ؟
نايف : رافض ..
تو ابو عبدالرحمن بيتكلم رن الجرس .. قام نايف يفتح الباب كانت عمته وعبدالمجيد وسجى ... نايف : هلا هلا والله مرحبا ومسهلا نورتوا
عبدالمجيد : احححممم اكيد منوره !
نايف : عمتي وسجى منورينه .. انت خلك ع جمب
ام عبدالمجيد : وين ابوي ؟!
نايف : موجود بالمجلس الخارجي
داخـــل /
كانت ميهاف جالسه وبحضنها مشعل تلعبه .. بينما اسماء متربعه ومسنده راسها على الكنبة .. التفتت لها ميهاف : اسماء بجد عاد ! وش هالهبال !
اسماء كشرت : وش هباله .؟ اذا حكيت ما اعجبكم واذا سكت ما اعجبكم .. شاسوي يعني ؟
ميهاف : مين قال اذا حكيتي مايعجبنا .. والله تصيرين الجو كله جعلني فدا
اسماء رفعت جوالها بقهر وهي تزيد قهر لما تشوف مامنه أي بادرة .. مايحس انه المفروض يكلمها عقب ماكسر خاطرها .. : تدرين متى اموت قهر ؟
ميهاف عقدت حواجبها : بسم الله عليك من القهر ..
اسماء : لا صدقيني اموت من الحرة لما اتذكر ان كيدي عظيم مع ذلك ماسويت شي ! يعني مفروض اشتغل بهالكيد !
ميهاف : انتي ما اشتغلتي بهالكيد ؟ اذا انتي ما اشتغلتي اجل انا شنو ؟
اسماء : انتي شنو !
ميهاف تنهدت باحباط : ابد سلامتك ..
اسماء : تسلكين لي .؟
ميهاف وهي تهز مشعل بحضنها : لا والله بس .. مدري كل حاجه ملخبطه وانا تعبت من هاللخبطة ومو عارفة كيف ارتب كلش
اسماء : تقدرين ك بداية تردين على أخوي
ميهاف : ما أقدر .. انتي تحسبيني اسوي كذا اكرهه ؟ لا صدقيني انا احبه فوق ماتتصورين وفوق ما اتحمل .. بس مستحيل يخطر ببالك شصاير عشان انا سويت كذا ..
اسماء : صح ما أعرف .. بس اعرف انه مافيه شي بيتصلح اذا ترك على حاله لازم تتحركين وتاخذين لك موقف , هالحقران ماحينفعكم صدقيني
ميهاف : ايوه ؟ وليش هالموقف مايكون منه بحكم أنه الغلطان بحقي ..؟
اسماء تنهدت : ما أعرف والله
ميهاف : معناها براحته .. مو ضروري يهتم فيني راح اتعايش مع هالنسيان والاهمال
اسماء لما حست بقلة حيلتها في انها تواسي ميهاف قررت تغير الموضوع : وين غادة وابتسام ؟
ميهاف : اتوقع صعدوا لفوق .. يمكن يبون يتكلمون عن حاجة لحالهم
اسماء تنهدت بملل .. : ....................
: الســـلام عليكم !
كانت سجى ... كشرت اسماء : كملت !
ميهاف : هلا والله سجوي حياك ياعسل .. متى جيتوا ؟
سجى : تو من شوي .. كأنكم ناقصين ؟
اسماء : ياعيوني .. لا تكونين اشتقتي لغادة بس ؟
سجى : لا ما اشتقت لها ! كنت احكي عن ابتسام
اسماء : ايوه صدقتك
جلست سجى : بكيفك لاتصدقين .... كيفك ميهاف ؟
ميهاف : حمدالله بخير .. انتي كيفك عيوني ؟
سجى : حمد الله بعافية
ميهاف : وكيف وداد ؟ مبسوطة العروسة ؟
سجى : ههههههههههههههه جحدتنا بالمرة
غادة وقفت عند الدرج وهي تحس بهم لما شافت سجى .. همست لابتسام بقرف : كنت حاسه عشان كذا اقولك خلينا فوق
سجى ابتسمت : هلا ابتسام هلا ياعسل
غادة جلست دون نفس .... ابتسام : هلا فيك سجى ( توجهت لميهاف ) فين اخوه ؟
ميهاف : برا عند جدي
ابتسام خذت مشعل بين يديها : فيه احد برا ؟
ميهاف : ايه عبدالمجيد جا
ابتسام : يوو .. ابي اشوف دحوم اخاف يهملونه
ميهاف : لا ماعليك نايف معهم برا ...
ساد الصمت على الجلسة بشكل عجيب ... غادة قافله نفسيتها واسماء نفس الشي , وميهاف كانت حاسه بهالجوا بينما ابتسام راحت لغرفه لحالها ترضع ولدها
***
بــــدر /
كان بشقته اللي تحولت لفوضى بكل مكان .. منسدح على الكنبه ومغطي عيونه بذراعه , والأنوار طافيه والجو يوحي بكساحه ... وانغام اغنية ( أنتحل شخصيتك ) تجول بالمكـــان
دق جواله .... رفعه بكسل وهو يرد مباشرة : نعم ..
نايف : انت وين ؟!
بدر : بالبيت ..
نايف : انا مسافة الطريق واكون عندك !
بدر : ماتقصر .. بس ماله داعي
نايف : اقول تلايط ... انا بالطريق اللحين
بدر : راح تكون انت الوحيد اللي يكلمني يعني .؟ مايحتاج خلك مع الحزب احسن
سكر نايف السماعة دون يرد بينما بدر رمى جواله وهو على نفس وضعه .. عيونه تمسح على الشقه بكسل , قبل شهر كانت حبيبته تتمشى حوله بالبيت .. وشهرته مرتفع .. والكل يتمنى صحبته .. شصار ؟ كيف انقلب الحال كذا ..؟ حتى اهله ما اهتموا ولا حاولوا يتواصلون معه ...
رمى الوسادة بقهر حتى ضربت بمزهريه وطاحت وانكسرت .. ما عرف يبكي حتى باختصار روحه كانت تتمزق من لكن يكابر يعترف لأحد ان هالوضع ماعاد ينطاق .. يحس بوحدة فضيعه .. مسك صدره بخنقه وجلس بقهر وهو يسحب اقرب بلوزه جمبه تستر صدره العاري مع بنطاله القطني Nike.. وهو ينتبه لنفسه بالمراية ذقنه ماحلقه فترة ... وهو اللي كان يوميا يطالع نفسه بالمراية فوق الساعه .. اللحين ما انتبه حتى لأنه يحتاج يحلق .. سحب مفاتيحه وبوكه وغترته الصفراء , ونظارته الشمسيه .. طلع من شقته وهو يسكر الباب ويلف غترته بشكل عشوائي حول وجهه ...
اول مانزل لعند سيارته كان نايف تو وقف سيارته ... نـزل وهو ينتبه لبدر كبس عيونه : بدر !
بدر دون نفس : لا خياله
نايف : والله معك حق خياله .. وش هالشيفه .؟ انت انت بدر طالع ببنطال قطني وتيشيرت .. لا والغترة مو مناسبه !
بدر : كنت بمر البقاله بس مايستاهل البس
نايف : اخبرك حتى ببيتك كاشخ .. المهم ماعلينا تعال اركب
بدر : وين ؟
نايف : بكلمك .... اركب !
بدر تمنى يكابر اكثر .. لكنه كان محتاج فعلا لاي شخص جمبه , ركب سيارة نايف : ...................
نايف : اولا ليش رافض تجي بيت اهلك !
بدر : ناس طردوني مافيه داعي يشوفوني
نايف : اهبل انت ؟! اللي طردك فراس شذنبها امك واخوانك ... رح شفهم !
بدر : جدي هناك ... مو رايق له ..
نايف : مو عذر والله ! وترا جدي حاس على كلش .. ومن اليوم يراقب ميهاف ويحتريك تجي تاخذها !
بدر ابتسم ابتسامة جانبية ساخرة : ايه زين
نايف : بدر يخي وش فيك ..؟ ترا مايسوى طول بالك
بدر بقهر : ماراح اسوي اللي يبغاه فراس ! انا اللي احط القوانين مو أتبع قوانين غيري ... وقوانينه ماراح يمشيها علي
نايف : أي قوانين أي بطيخ ... اقولك امك حرام عليك رح شوفها
بدر : حتى امي مايهمها .. من يومها وهي ماكلمتني
نايف تنهد : يا ابن الحلال لاتعذب نفسك بهالشكل لاتنحدر لهاليأس يامعود .. خلك عاقل شوي تكفى
بدر انفعل : شايفني مجنون اجل !!!!
نايف : اين مجنون واكبر مجنون بعد .. وش ذالوضع ! حل امورك يارجال ما اعرفك كذا .. خل مني فراس انت من يومك بمشاكل معه .. بس ميهاف شذنبها تو بأول سنه من زواجها في بيت اهلي !
بدر : والله انا ماطردتها .. وبيتها مفتوح 24 ساعه متى مابغت حياها الله .. وترجيتها اكثر من مره ترجع .. اكثر من كذا ما أقدر كيفها تصطفل , الشي الوحيد اللي تعلمته من هذا كله اني ما أمن احد على شي .. محد يستاهل ومحد دايم لاحد
نايف : اوفف .. شصاير اجل عشان تحمق ميهاف كل هذا !
بدر استوعب ان نايف بطريق لبيتهم : نايف وين رايح !!!
نايف : بروح لجدي .. ماتبي تسلم عليه ؟!
بدر بحدة : وقف السيارة
نايف : اوقفها شنو بنص طريق سريع ؟. احدر الشيطان بيتكم هذا مو بيت غريب
بدر بعصبية : بيت انطردت منه ما ارجع له !!! لو ايش !!! ماعندي كرامه انا ...؟؟؟ وقف السيارة
نايف : إنا لله يارجال طول بالك و ...............
فتح نايف عيونه وبدر يقاطع كلامه بفتحة الباب فجأة ... صرخ فيه نايف : يامهبـــــــــــــــــــــول
قفز بدر على الطريق وهو يمشي برجله حتى وصل للرصيف : بلى بشكلك بعد بنص الطريق
رجع نايف : تستهبل انت !!! اركب عن الهبل
بدر : بترجعني بيتي انا ركبت ... بتروح بيتنا روح لحالك
نايف : عارف شلون .؟ انا الغلطان اللي جيتك من البداية
بدر : ايه والله غلطان بس رفعت ضغطي على الفاضي
قفى بدر وهو يكمل طريقه مشي بكسل .. محفظته مو معاه ياخذ تاكسي ومجرد يجر ذيل خيبته بطريقه معه للبيت , أول مــاوصل اخيرا للبيت تراجع خطوتين وهو ينتبه للسيارة اللي عند بابه .... تافف بضيق : يالله وش هالبلشة !!
انحبست انفاسه وهو ينتبه لشخص يأشر له : هذااا هو هناك !!!
حـاول يركض بس عرف ان مافيه فايدة .. مستحيل يقدر على خمسة ومعاهم سيارة , طلع بضيق وهو ينطق : هلا ..
نطق واحد فيهم بنبرة غاضبه : لا هــــلا ولا غلا !!! وينك اسبوع ماتنشاف ؟!!
بدر تنهد : معليش فلوسكم مادبرتها للحين .. يومين كذا وراح ...
قاطعه واحد فيهم بركله بأقوى ماعنده على معدته ... مسك بدر بطنه من ألم ركلته : أخخخخخخخ
الرجال : بدر واضح انك مفلس .. اخبارك بكل المجلات ماوراك شهره ولا شي من عقب هوشتك مع مدير اعمالك .. اللي مصبرني ما اروح للشرطة انك ولد الشمري ومو معقول مايكون معك فلوس !
بدر صرخ فيه بقهر : عارف اني ولد الشمري وتتجرا تمد رجلك
الرجال : هههههههههههههههههههههه ولد الشمري وانت مافي جيبتك حتى خمس الاف تدفع مقدم .. ( تفل ) وتبن ياولد الشمري
رجال ثاني : اسمع عاد ! لك هالاسبوع تدفع ولا حنا نعرف اخوك راح نتفاهم معه .. واذا ماقدرنا نوصل اخوك فعمك وأبو حرمتك يصلي معنا بنفس المسجد كل يوم راح نشوفه
بدر وهو يمسح تفلته من وجهه .. وبداخله غصه .. حصا خانقه على حلقه : ......................
رجال : ايه خلك ساكت .. المهم حنا حذرناك فلوسنا توصل ولا ماراح تلقى خير
ركبــوا سيارتهم ... بينما كان بدر بمكانه .. ماعرف يصلب طوله يوصل لشقته الا بصعوبة .. كان ماسك معدته ويسحب رجله سحب .. في نص الدرج اطلق ضحكه عبت البناية : ههههههههههههههههههههههههههه ولد الشمري؟ ههههههههه بدر الشمري ؟! هههههههه ( ارتجفت شفاته بنص ضحكته الطويله عض شفته يمنع خنقته .. لكن هيهآت رفع يده يغطي عيونه وهو يسيح بجسمه على الدرج ودموعه نزلت بخنقه ) ااااه يا يمه انكسر ظهري شاسوي .؟
رفع جـــواله بصعوبه وقت دق .. ( ابوي نايف ) سكر المكالمه وصورة خلفية جواله تستقبله .. صوره له بأوج وسامته واناقته وابتسامته اللامعة حس أنه كان عايش وهم .. وهم اختفى قبل يحسه .. رمى جواله حتى تهلهل مع الدرج وانكسر ضرب راسه بالجدار بقوته وهو يمسك حلقه يبغى عبرته تنفك .. تسمرت عيونه في نص دموعه على كتفه .. وهو يتوهم يد ناعمه حنونه بتجاعيدها الخفيفة على كتفه وبوجهها القلق : يمه وش لك بالتمثيل ؟ والله مامنه خير انت احسن من كذا .. لا يعاقبك ربي يمه من فسااد هالدرب
كانت نبرته مغرورة ونرجسية وقت رد عليها : يمه ولدك مزيون حرام تخشينه في بيتك ! لازم العالم يكحلون عيونهم لاتصيرين انانية
مسك راسه وهو يطرد انانيته من راسه ويمسك كتفه وين ماتوهم يدها : والله معك حق يا يمه .. ما حصلت من هالدرب الا نار احرقتني
ما وقف وهمه هالحـــد .. كانت فيه يد أنعم تمسح على خــده ووجه ملائكي با ابتسامه ادفى من جمـود قلبه .. : .....
تحطم لأن الوهم مايتكلم ... مجرد تفاصيلها بهالبيت تلاحقه .. هذي هي عند الباب مستغربه انه على الدرج : قلبي شتسوي هنا لحالك .؟
وهذي هي بالمطبــخ مبتسمه : ماما مرسله لنا غدا يجنن .. يفوتك , ارتاح على مايجهز
وهذي هي على المكتب متحمسه لتسجيلها بالجامعة .. وهذا هو يرمي تعليق بايخ : ياليت تكنسلين هالموضوع !
وهذي هي تترجـاه مايكون خاينها .. وهذا هو بسواد وجهه خاينها : ...............
وهذي هي ترتب شنطتها ودمعتها على خدها .. وتهدده تترك البيت له وتطلع , وهذا هو ماحرك ساكن .. وبوقاحه يهددها انها بتندم : ..................
مســـك راسه من اخطاءه اللي تلاحقه .. : يابعـــدك ياميهاف .. كيف سويتي من اللاوجود وجود , رغم كل هالفراغ حولي كيف محاوطه فيني بكل مكان .. كيف يكون في غيابك كل هالحضور ؟
وقف بقلة حيلة من الدرج وهو ينــزل يلملم بقايا جواله .. يتمنى يكون فيه امل في جواله عشان يدق عشان يسمع صوتها بس : .....................
لكن مــافيه أمل .. وقف بخيبة وهو يصعد وهموم الدنيا مثقله كتوفه .. أول مادخل غرفة نومه واسترخى على السرير كانت أوراق المحكمة ملقاه باهمال هناك .. ابتسم بسخرية وهو يعفطها بيده ويرميها بقلة حيلة : ......
ويغرق بنومه يتمنى مايصحـــى منها .. ومافيه أوجع من انك تنام وأنت تبكي .. !
***
أسمـــاء /
كان الكل مجتمع ويسولف .. وجدها دخل عند الحريم بعد ماطلع نايف وعبدالمجيد , ومجتمع بين بناته ويسولف مع الكل ماعدا هي متربعه ومتكتفه وبحضنها جوالها وتخرقه بعيونها .. ( يعني !! كذا حتى مافيه بسم الله عليك عقب خرعة امس ) بعد مايأست ..... فتحت جوالها وهي ترسل له رساله بقهر /
الســلام عليكم
المهم تراني زعلانة !
المرة الجاية ياليت تتأكد من طعم كلماتك قبل تلفظها
غــادة كانت جالسة جمب اسماء ومتكتفه وتتابع الجلسة بصمت ... قطع صمتها أبو عبدالرحمن وهو ينطق بحنية وبعيونه حنية اكثر : غـــزالنا
ما أستوعبت هالنداء رغم انه كان يطالعها اشرت لنفسها : انــا ؟!
ابو عبدالرحمن : وفيه غزال هنا غيرك .؟ ايه انتي ابوي
غادة انغسلت كئابتها : لبيه عمي
ابو عبدالرحمن : افا وش عمي هذي .؟ ناديني يبه
غادة ابتسمت : ان شاء الله
ابو عبدالرحمن ربت على المكان جمبه : تعالي اجلسي جمبي ليش جالسه هناك .؟
كان الكل مستغرب قبول ابو عبدالرحمن الزايد لغادة .. ما عمره عامل احد كذا , لكن الحقيقة كانت قسمين .. قسم أنها زوجة أحب حفيد لقلبه وقسم انها دخلت قلبه بجد .. ومافيه قلب ارهف من قلب الكبار يحس : ...........
سجى : يبه اللحين في يوم هي صارت غزالنا ! وحنا سنين وما اعجبناك ؟
أبو عبدالرحمن وهو يحضن يدها وهي جمبه : كلكن فيكن الخير ان شاء الله .. بس هذي عاد زوجة فراس مب حي الله
غادة رفع حاجبها وهي تطالع سجى .. وتنطق بدلع : الله يخليك لي يبه .. والله احرجتني
سجى تمنت تقوم تعفسها ..
ام عبدالمجيد : هههههههههههههههه هاه كان جيت من عرسهم عشان تشوفها !
ابوعبدالرحمن : والله انا عقب ماشفتها لي حكي مع فراس ! اجل احد يتزوج قمر كذا ويسوي زواج محكمة ..حسابي معه بعدين
غادة ( لا تكفى مو ناقصني ! يكفي امه تدافع شوي كلاني ) : ....................
ابو عبدالرحمن التفت غادة : إلا هو متى ناوي يرجع .؟!
غادة انخبصت .. هو يقولها شي عشان تعلمه خذت الرد الانسب : ع حسب شغله
ابو عبدالرحمن : هاه ! وماقالك هالشغل متى يخلص!!
غادة انقهرت من نفسها .. زوجها ولا تدري عن شي : لا والله ....
ابوعبدالرحمن طلع جواله بقهر : انا اشوفه لك الخايب !! ( جلس فترة ينتظر الرد ) سلام !
فراس : وعليكم السلام والرحمة ... هلا يبه , سمعنا انك في الديرة ؟!
أبو عبدالرحمن : فــي الديرة !! في بيتك يالجيد !
فراس : منــوره ومشرفه والله
ابو عبدالرحمن : شغلك خلص .؟!
فراس : لا ماخلص والله
ابو عبدالرحمن : ومتى بيخلص ان شاء الله ؟!
فراس : شالسالفه يبه كأنك شايل علي .. شنو يعني متى بيخلص الشغل مو على هواي
ابو عبدالرحمن : الشغل مو على هواك هاه ؟! واذا طلبتك بكرة تجي ؟
فراس : بقولك مقدر .. شنو يبه ؟ كانك ماعمرك اشتغلت .. مفروض انت سيد الفاهمين يعني
ابو عبدالرحمن : انا خمس ايام كذا وراجع للقصيم
فراس : افف بدري كذا ؟ ليش مستعجل ترا محد يحتريك هناك غير دجاجك وغنمك !
ابو عبدالرحمن : ابرك منك والله اقلها يحتروني مو مسافرين ولا سائلين ... المهم انا فيه كم موضوع مهم ابي احاكيك عنه فحاول ترجع بدري قبل ارجع
فراس : ان شاء الله خير
ابو عبدالرحمن وهو يطالع غادة ويبتسم : ترا اذا مارجعت باخذ غــدَي ولعد تسأل عنها !
غادة نزلت راسها وهي تحس هالانسان فعلا يحرج .. لكن ماتمنت شي كثر انها تسمع رد الطرف الثاني : ...............
فراس : ماتغلى عليك والله فداك .. خذها ولعد ترجعها بعد !
ابو عبدالرحمن : قــدها اجل .؟ اخذها ولعد ارجعها !
غادة عضت شفتها بقهر .. وملامحها انقلبت من الحيا بكلام ابو عبدالرحمن للاحباط ... ويافرحتها والكل بالجلسة عرف برده وملامح الشماته بوجه سجى تقهرها اكثر : ..............
فراس : وانا عمري مزحت معك ؟ لو هي عيوني فداك بتوقف على غدَي < نطقها بنفس طريقة جده
ابو عبدالرحمن : هاه خلك ع كلمتك .. زين ؟ يله فارق
فراس : هههههههه وانا على كلمتي لاتخاف
ابو عبدالرحمن : يله مع السلامة
سكر ابو عبدالرحمن السماعه ... على صوت الاذان : يله وين انس نطلع للصلاه ؟
ام فراس : بالملحق اكيد
وقف ابو عبدالرحمن يطلع وسجى اطلقت تعليقها السخيف : والله الرجاجيل غريبين ... يعني زوج وداد للحين مو راضي نشوفها حابسها ! وناس بايعينها برخيص
غادة هذا اللي كانت متوقعته : ...............................
ميهاف : يابنت الحلال وداد توهم بالعسل فرحانين .. تصبر كم شهر وتشوف العين القشرا
سجى : مو هذي اللي يغبن ! يعني بعض الناس هنا تو تموا شهر
غادة تنهدت بضيق وهي توقف وتطلع لفوق ..... استوقفها صوت ام فراس : غادة وين يا امي ؟
غادة ابتسمت دون نفس : بصعد اصلي
ام فراس : اجل يله حنا كلنا مفروض نروح نصلي
***
نزع قفازاته الشفافه بعد العملية الفاشله .. وهو يرميها ويغسل يده ويطلع ويستلم روبه وجواله من الممرضة , عقد حواجبه وهو ينتبه للرسالة ويفتحها : ................................. ( هز راسه بيأس وهو يرجع جواله لجيبه دون يرد)
: شعندك !
التفت لمراد جمبه : هلا مراد .. ابد مافيه بس عملية سلطان محمد فشلت
مراد : امانة ؟ الله يعين اهله ياحرام تعبوا عشان فلوس العملية
تنهد هيثم : امر ربك وش بيدك تقول ؟
مراد : خلص دوامك ؟
هيثم : ايه تعديت ال 54 ساعة اللحين
مراد : الله يصبر راسك عليك
هيثم : ويصبر كلن على نفسه .. زين ؟
مراد : هههههههههههههههه ابد انا متفاهم مع عمري
هيثم : يله انا ماشي .. تامر شي ؟
مراد : سلامتك اشوفك بكرة
هيثم : على خير
دخل هيثم مكتبه وهو يسحب اغراضه بشنطته .. ويعلقها على كتفه ويطلــع أول ماركب سيارته رجع يفتح جواله ويطلع على رسالتها العفوية .. مافهمت ان رسالتها زادت الطين بله , لأن ماكان هذي الرساله اللي متوقعها بعد كلامه لها ولا بهالسرعه .. حس انها ماخذت كلامه جد ولا حتى انجرحت كفاية ولا فكرت كفاية ... رمى جواله على المقعد الثاني ... لآن بهالحالة وش طالع بيده غير ينتظرها تفهم مقصده
***
نــايف وصل عند البااب ياخذ ابتسام يرجعها .. قابله ابوه تو واصل : هلا يبه
ابو نايف : هلا نايف .. سلمت ع جدك ؟
نايف : ايييه من زمان ... انت تو جاي ؟
ابو نايف : تو انفك الشغـــل ... المهم شبغيت اسألك ؟ اخوك متى اخر مره شفته ؟
نايف : ما أدري لي زمان والله .... ليه ؟
ابو نايف بعصبية : مدري عنه ! طلع لي فجأة بسالفة يسكن لحاله ... ولما رفضت معد داوم ولعد شفته وجهه ولعد يرد حتى
تنهد نايف : يا يبه انت متى تفهم لؤي ؟ ترا مافيه ابسط من لؤي ... السالفة كلها اسلوب ! وانت الله يهداك من يكلمك ترد عليه رد ذاه كبره
ابو نايف : لأن حكيه ماهو موزون !!!
نايف : معناها بعمركم ماراح تتفاهمون ( عقد نايف حواجبه فجأة ! حس ان كلمته هذي موجهه له بعد كلامه هو وابتسام اليوم !)
ابو نايف تنهد : معناها بحاول اكلمه مره ثانيه ونتفاهم
نايف هز راسه وهو يضحك : ...............
ابو نايف عقد حواجبه : الله يخلف وش يضحكك !
نايف : ابد سلامتك .. ايه حاول حاول تفاهموا كل الناس مفروض تتفاهم وش هالهبال ؟!
انفتح الباب وطلع ابتسام ومعها الشغاله تساعدها في شيل التوأم ... استلم نايف مشعل منها , وابتسام سلمت على ابو نايف وطلعـوا .... أول ماركبوا السياره سال نايف : كيف الزيارة ؟!
ابتسام : كويسه ..
نايف سرق نظره لها ورجع يطالع الطريق : اقول سيـــمو ..
ابتسام تنهدت : شنــو ؟
نايف : شفيك تنهدين من دخلتي .؟ روقي شوي عشان اعرف اتكلم
ابتسام قلبت عيونها دون ترد : ................................
نايف التفت لورا وهو يشوف يزيد نايم .. ومشعل وعبدالرحمن نايمين .. نطق بعفوية : ابتسام تدرين اني اموت فيك ؟
ابتسام ببلادة : موت
نايف كبس عيونه برعب : شنو ! اموت مره وحده !
ابتسام : ماجبت حاجه من راسي انت بخاطرك تموت .. معناها موت مين ماسكك
نايف : مقبولة منك .. اوك ؟ حموت
ابتسام كانت منقهره من رواقته الزايده حتى عقب ماعطته اللي بخاطرها : ...........................
وقف نايف سيارته عند مكـان معين .. والتفت لها : ألبزورة نايمين اتركيهم بالسيارة
عقدت ابتسام حواجبها وهي تشوف المكان كان عند جسر النافورة .. تنهدت بضيق : نايف مو وقته مشينا البيت وبس!
نايف : انا لله ؟!!! انزلي يابنت الحلال ومالك الا اللي يرضيك
نزلت ابتسام وهي تنتبه له ماد يده يحضن يدها ووقفوا قدام النافورة .. نطق نايف : ابتسام .. بالنسبة لليوم ..
ابتسام : شنو اليوم ؟
نايف : انا لله ! اتركيني اكمل يابنت الناس .... ابي افهمك شغله , انا عرفت نسوان كثير مثلك بحياتي .. امي مثلا دكتورتي لما درست برا .. وكثير كثير .. والنسوان اللي مثلك هم الوحيدات اللي ماعمري تفاهمت معاهم ولا حتى هضمتهم
ابتسام رفعت حواجبها : ...............................
نايف : واللي ماتخيلته انك انتي بالذات بتخليني افهمهم ... ابتسام انتي نقيضي انا فاهم وقت اكون اسود راح تكوني ابيض ووقت اكون ابيض حتكوني اسود , انا فاهم هالشي صدقيني
ابتسام تنهدت : انا فاهمه كمان هالشي ..
نايف : واللي ابغاه منك انك تعرفي اني اللي تتمنينه راح يكون حاضر لك دايم .. والله لو تطلبي حاجه بآخر الدنيا راح اجيبها لك .. بس وقت تطلبي بس ! يعني مستحيل افهم انك تبين شي دون تنطقين .... ما عمري خططت لبكرة عشان اخطط لسنين جايه ..
ابتسام : ....................
نايف : بس اقدر البي لك المدرسة اللي تبينها لعيالنا .. واقدر البي لك الوظيفه اللي يحتاجونها .. والبيت اللي تتمنينه .. خططي لبكرة وانا خدامك
ابتسام كانت تطالعه بصمت : ...............
نايف : هذا هو الزواج ابتسام .. وقت انا ما أقدر انتي تقدري .. ووقت انتي ما تقدري انا اقدر , مو ضروري نخطط كلنا تقدري انتي تخططي وانا انفذ .. مو عدل ؟
ابتسام ماتوقعت هالإقناع ... ابتسمت بنعومه : عدل ..
نايف : رضيتي ياغلاي؟
ابتسام تنهدت : اسفه ياعمري .. والله ماكان يستاهل كل هالزعل , بس صدقني انا مو اتكلم عن كذا وبس .. بس فيه اوقات كثيره اتمناك جمبي ما ابيك تنفذ وبس ابي احس ان بينا شراكة بالقرار .. ابي اشارك معك تفاصيل ما اشاركها احد .. فاهم علي ؟
نايف : فاهم وراح احاول والله .. بس بالهون شوي علي
ابتسام : وانا اموت فيك كمان ع فكرة
نايف مد لسانه : موتي !
ابتسام ابتسمت : لعيونك والله
نايف : واذا تبين مبادرة بالتخطيط .. فترا سنة بالكثير وخل نجيب غير هالثنين خاطري ببنية
ابتسام : من عيوني والله .. شي ثاني ؟
نايف عقد حواجبه : جد عاد .؟ وانا توقعتك ترميني من الجسر
ابتسام : ارميك عشان حاجة بخاطري .. ( رفع يدينها الثنين وهي فاتحه كل اصابعها ) ماراح اجيب اقل من هالعدد !
نايف ضحك من قلبه على نظرة الاصرار وهي تقولها : ههههههههههههههههههههههههههههههههههههههههههه شنو ابتسام ؟ ناويه تعمرين الرياض على حسابي ؟!
ابتسام نغزته بكوعها : وش احلى من العيال .. وبعدين ما ابغى عيالي اذا كبروا يصير فيهم زيي .. بس اخ واخت وتفرقنا بسهوله , ابيهم يحصلون بعض على طول ووين مايلتفتون يحصلون اخوانهم
نايف : شوي شوي على عقلك يا ابتسام .. ادعي بس يكونون على قلب بعض مو تجيبين لي درزن يجيبون العيد في بعض وفينا
ابتسام : ان شاء الله راح يكونون على قلب بعض .. الله يصلحهم ان شاء الله
نايف : اقول مشينا البيت !
ابتسام : يوه بدري والله الجو رايق اتركنا شوي نوسع صدرنا
نايف : مع نفسك برجع البيت انام قبل تمر كم سنه ويجي جيشك ومعد انام ولا ارتاح بحياتي
ابتسام : هم وقت يطلعون لك ماراح ترتاح .. بس لو يطلعون لي فا ابشر بالعز !
نايف : والله البزر هو بزر ودك انا ودك انتي !
***
اسمــاء حست بقهر فضيع وقت فتحت جوالها وحصلته فاتح الرساله ولا رد عليها له ساعتين !! .. انتبهت لجدها جالس مع عمها بالصاله لحالهم ولقت الخطة المثالية ! تنحنحت وهي ترسم ابتسامه وتجلس عند جدها : يبــه
ابو عبدالرحمن : هلا
اسماء : يبـه سمعت انك راح تسافر عقب خمس ايام ؟
ابو عبدالرحمن : ايه سمعتي ! عجليني عاد وبعدين ؟
اسماء ابتسمت ابتسامه عريضه : شرايك يعني انا اقول شرايك بس ..
ابو عبدالرحمن بنفاذ صبر : راايي في وش اخلصي علي !
اسماء بصوت خافت بالكاد يسمع : وش رايك تعزم هيثم تشوفه ....
ابو عبدالرحمن : هااااه ؟ وش تقولين انتي ما سمع ! خرساء ؟؟؟؟
ابو نايف : يا يبه تقولك وش رايك تعزم خطيبها .؟ يعني خبرك عشان يتعرف عليك ويشوفك
ابو عبدالرحمن بانفعال : عشششنا !! وصرنا انا اللي نعزم الصغار ... الحق لي انا يجي يشوفني مب انا اعزمه !
اسماء بقهر : وهو شعرفه عنك يعني ... اكيد مايدري .. مايعرفك حتى
ابو عبدالرحمن : انخرسي بس الله يقلع عدوتس ! وتراديني بعد .؟
اسماء بقهر : خلاص لاتسوي شي ... أصلن انت تكرهني ومن جيت وانت ترمي علي كلام ... ايه مانيب غادة عشان ترزني !!
وقفت بقهر وهي تطلع ...بينما ابو عبدالرحمن نطق بصوت عالي : وجع بعد بنات اخر زمن !
ابو نايف : روق يا يبه شفيك عليها .؟ المسكينه قالت لك اقتراح ارفضه وبس بلا ماتطالبها
ابو عبدالرحمن : يومــــها بازع تستــــاهل ! المهم انا ابي اسألك عن شي
ابو نايف : سم يبه
ابو عبدالرحمن : فيه شي مب طبيعي صاير مع بدر وابي اعرفه اللحين !!
ابو نايف تنهد بضيق : ليش محد قالك ..؟
ابو عبدالرحمن : كل ماسألت احد تهرب .. واللحين انت بتقولي , ليش ميهاف جالسه عندك ؟
ابو نايف : ماتوفقوا يايبه .. والغلط منه مب منها , رافض دراستها ووظيفتها و ..
قاطعه ابو عبدالرحمن : دحيم !! صاحي انت ؟ رجلها هذا اذا رفض دراستها ووظيفتها حقه تجلس تترك البنت تحرد وتزعل بدل ماتعقلها ؟
ابو نايف : ماهوب كذا .. صاير مشكله ثانية اكبر من كذا شكله والبنت ماقالت لي , وبعدين مالقينا منه ردة فعل تقنع مهملها
ابو عبدالرحمن : الله اكبر عليك ياعبدالرحمن .. هذا وانت صرت جد وللحين ماتعرف تحل مشكلة بزران ؟! هذا بدر ولد فهاد اللي مفروض بمكانة عيالك عقب ماتيتم ... مايجهلك ان الولد ماعنده ابو يعقله من وهو صغير مفروض تعامله مثل ولدك وتعقله مو رجل بنتك وتتعدوى له
ابو نايف : يايبه انا ماتعدويت له .. بس الولد ماعاد الواحد قدر يتفاهم معه ولا شي ولا ...
قاطعه ابو عبدالرحمن : اسكت اسكت اسكت ! ماوراك سالفة انت ولا منك خير اللي تارك المشكله كذا لها شهور ... انا بس عرفت بالجرايد انخبيت وجيت وانت خابر وبالع علمك
ابو نايف تنهد بضيق : هذا العلم صار عندك بالقوه .. انا ماعاد بيدي شي
ابو عبدالرحمن : من اول مابيدك شي .... وفراس ليش مهمله كذا ! مو بعادته
ابو نايف : بدر رافع قضيه على فراس .. وفراس مطنشه للحين
ابو عبدالرحمن فتح عيونه : موصلينها للمحاكم ؟
ابو نايف : لا ما انتشرت للحين بما ان فراس مارد على الموضوع ... بس الله يسهل الحال
ابو عبدالرحمن تنهد وهو يفكر بهالمشكلة : ................................
ابو نايف : تامرني ع شي يبه قبل امشي ؟
ابو عبدالرحمن : سلامتك !
ابو نايف : يله اشوفك ع خير
اول ماطلع ابو نايف انتبه لاسماء عند الباب بالحوش تنتظره : عمي !
ابتسم ابو نايف : تبغيني اكلمه ؟
اسماء : تكفى
ابو نايف : ولا يهمك خلاص بكلمه واقوله بكره يجي يسلم على جدك .. ( فتح جواله ) وهذا بكلمه قدامك عشان ترتاحين
اسماء بحماس : تمااام !
ابو نايف : جواله مغلق ... يله اكيد دكتور مشغول وقت يشوف مكالمتي بيدق وبقوله
اسماء تنهدت : اوكيه .. اهم شي بكره عمي تكفى
ابو نايف : ان شاء الله من عيوني .. تامرين شي ثاني ؟
اسماء بوناسه : سلامتك
ابو نايف : يله ادخلي وقولي لام نايف وميهاف يجهزون انا برا انتظرهم
اسماء : ان شاء الله
دخلت اسماء وهي تنتبه لامها تحط العشاء عند أبو عبدالرحمن بالجلسة الارضيه : غريبة جالسين بالجلسة الارضية لكم سنين ما استعملتوها ؟!
ام فراس : اريح لجدك كذا
اسماء : اهـــا .
ام فراس : اجلسي تعشي
جلست اسماء وياسمين كانت جالسة وأنس .... ابو عبدالرحمن : هاو وين غادة نادوها تتعشى
ام فراس : وصيت عشاها لها عمي ...عشان انس
ابو عبدالرحمن : تتغطى من هالبزر ؟!!
انس بزعل : يبه انا مانيب بزر ! انا رجال خلاص
ابو عبدالرحمن : إلا بزر وستين بزر بعد.. تعش تعش بس ( التفت لاسماء ) وانتي روحي تعشي مع مرة اخوك فراس مسافر مسكينه لحالها فوق
اسماء تبيها من الله : ان شاء الله يله بروح اللحين
صعدت لغادة فوق وهي تطق الجرس ... فتحت غادة مباشرة : هلا سيمو
اسماء : الملك أمر ان حضرتك ماتاكلين لحالك ووصاني لك ... اوكيه ؟
غادة : هههههههههههههههههه ليه تقوليها كذا حياك تفضلي
اسماء : تسلمين
غادة وهي تجلس : اسماء شفيك اليوم .؟ صاير معك شي ؟ منتي على بعضك يختي
اسماء تنهدت : والله ياغادة مكبوته مرة
غادة : كان طلعتي معنا اليوم بدال ماتكبتي نفسك زيادة بالبيت
اسماء : تدرين اليوم جالسة اشوف ميهاف كيف حالتها .. يعني حرام البنت تو تزوجت قريب وكانها مطلقه رجعت لاهلها .. وانتي بعد حالتك ماتسر .. واخاف اكثر من نفسي وايش بيصير لي وقت اتزوج ..
غادة : يابنتي المكتوب مكتوب .. لاتشوفين ناس وتتركين ناس , يعني شوفي ابتسام ما شاء الله مبسوطة
اسماء نزلت راسها بكئابة : ................................
غادة : اقول اسوم ! بما انك اليوم مارحتي معنا طبعا انا ماقاومت اشتري لك كم حاجة لما شفتها بتطلع خيااااااال عليك
اسماء : يوووه غادة ! ياشينك انتي زمان ماطلعتي للسوق ايش عليك مني ؟
غادة وقفت بحماس : استني اجيبها لك حاجة خيال !
***
ميهـاف :
تو استلقت على سريرها تستعد للنوم .. وهي تحس بضيق فضيع نظارات الكل لها اليوم كانهم مستشعرين اللي صاير ويحاولون يفهمون او يحللون من الغلطان ...
كانت عيونها متسمرة على السقف وهي بنفسها تتسائل عنه .. لها فترة ماتسمع عنه الا من الاعلام اخبار ماتسر ( هواش مع مدير اعماله _ افلاسه _ مطالب بفلوس _ سقوطه فنيا ) والمشكلة ماتسمع حتى من اهله اذا هو بخير او لا .. كأنه بعالم ثاني بعيد عن الكل .. شي عجيب في الإنسان وقت نحب نشوف الدنيا بالوانها وبداية كل يوم نعد نفسنا انا نسعد اللي نحبهم لاننا بمجرد سعادتهم نصير اسعد وبحزنهم نحس وكأننا على حدود البكاء .. شي داخلها مب متطمن وكأنها حاسه انه في حاله نفسيه .. ابعد من سيئة .. بس صعبه تتصل .. وصعبه تتجاهل .. وراح تضل عالقة بالنص ..
***
صحــى هيثم من نومه باليوم الثاني الساعه 9 صباحا /
عقد حواجبه وهو ينتبه لمكالمه من أبو نايف ... شي نادر مره انه يشوف اتصال منه , رجع جواله مكانه وهو يغسل وجهه ويفطر ويبدل ملابسه يستعد يطلع .. مجرد ماثبت نظارته الشمسيه فتح جواله وهو يدق على ابو نايف : هلا والله مرحبا
هيثم : هلا فيك زود ... كيف الحال ؟ شخبارك وشخبار العيال ؟
ابو نايف : الله يسلمك كلهم بخير ... انت شلونك لا حس ولا خبر ؟ ناسبناك مرتين واللحين بالطريق للثالثه ومازلنا مانشوفك
هيثم : والله خبرك الشغل مايترك احد منخبصين فيه من صبح لليل
ابو نايف : الله يعينك ويوفقك .. المهم بغيت اقولك الشايب جاي للرياض خمس ايام كذا وهو مقيم في بيت فراس لحد مايرجع , قلت اعطيك خبر اذا بتقوم بالواجب اليوم وتشوفه
هيثم : ما شاء الله ... على خير ان شاء الله بمره اليوم قبل اطلع دوامي , بس ماعندي له رقم ياليت تعطيهم خبر اني بزورهم عصر
ابو نايف : ولا يهمك انا ابلغهم .. الله يستر عليك
هيثم : وعليك يله سلام
سكر هيثم السماعه وهو يرجع جواله لجيبه ويطلع لدكتور كيف ياخذ له فطور

فصل هادئ وجميل …
فراس أخيراً شريت الهديه… عقبال ماانشوفك منسجم مع غاده…
الجد وجوده ان شاءالله يحل كل المشاكل اللي حاصله… اسماء الى الأن موفاهمه حجم الكلام اللي انقال او معناه الحقيقي… لانها بنظرها اللي كانت تعمله صح…
ابتسام ونايف حبيت تفاهمهم…
بدر ان شاءالله يتغير ويصير احسن… المسأله محتاجه وقت…

كاتبتنا الجميله تسلمين على البارت الجميل…
بـ إنتظارك دائماً…

ايه الجد السطحي ده؟ ولا اللي يكون مراهق
ماعلينا جد فراس هيكون عامل ازاي يعني
نايف له سحر عجيب ، رغم ان أي حد مكان ابتسام هيجي عليه وقت ويتغاظ منه ، لكن برده طريقته السحرية في حل المشاكل تخلي أي حد حتى ابتسام تستسلم
كالعادة فراس نكد علي غادة، هو تقريبا بيدفعها تمن الهدية مقدم، ده لسه لما يديهالها
أسماء غاظتني جدا، لأنها خفيفة ورامية نفسها على هيثم زيادة عن اللزوم
على رأيه كان مفروض انجرحت اكتر من كده، لدرجة انها تفسخ الخطوبة حتى من وصلة التهزيئ المحترمة لكن انا استغربت انها اساسا مستنية رده
بدر ، كويس انه ابتدى يحس بتأنيب الضمير على شغله ووضعه
هل الجد هو اللي هيكون له ايد في انهاء الأزمة ولا ايه ؟ هنشوف
تسلم ايديك