هههههههه تموت من الضحك أسماء، الواحد مكسوف لها والله
لؤي ، شكله سمع كلامي من الرد اللي فات
كسر العزلة وبيتابع حياته، آلمني وهو بيشوف الولدين وبيفتكر بنته ، نتأمل خير ان شاء الله
غادة وكسرة النفس قدام الزفتة سجى
حاجة تقهر بجد
بس عموما أحسن انها مطنشاه ، شكل ضميره واجعه شويه
على الله تحصل لؤي
بالانتظار

بالنسبة لاقتراحي بخصوص لؤي وغادة
مين قال ان بعد التعب ده هنسيبه كده وخلاص؟
احرقي دم فراس الأول وعذبيه وبعدين تسيبه غير مأسوف عليه

" الفصل السابع والأربعين "
عـند الفراق ..
يتحدث الرجل وتبكي المرأة .. وبعد الفراق تتحدث المرأة , ويصمت الرجل
شهـــــقت وعيـونها طارت وهي تنطق بصدمة : وش. ؟!!! نعــــــــــــــم عيدوا عيدوا ماسمعت !!
ام فراس التفتت لاسماء وهي تضربها على كتفها بخفه : انهبلتي ! اهجدي حمدالله والشكر ... اقولك وزعوا بطاقات عرس وداد .. الاسبوع الجاي ان شاء الله
اسماء : لــــــــيش ؟!!!! العالم دراسسسة !!!
ام فراس نفخت فيها : وانتي ليش معصبة ! البنت ماتدرس .. وبعدين خطيبها عنده بعثة يبغى ياخذها معه اكيد
اسماء بقهر : ولو ينتظرون ! مستعجلين ليش ؟
ام فراس : وانتي وش دخلك الله لايبلانا ! كيفهــــم ... وبعدين وداد مخطوبة لها سنه اللحين !
اسماء تربعت بقهر وهي تتكتف : اففففففففف ... ياحظها الاسبوع الجاي بتتزوج , ابي اتزوج بسرعة بعد انا !
ام فراس فتحت عيونها وهي تاشر لفمها : اشش اش ... لو يسمعك وش بيقول ! " هزت راسها بخيبة " ياحيف بس مارزقني ربي بنت تبرد الكبد
اسماء وقفت : كيفي والله ماينفعني ثقلي مع كتل الثلج اللي حولي !!
صعـــدت مباشرة اما ام فراس هزت راسها بيأس .. هالاسبوع مو طبيعية تهوجس بهالعرس من تصحى لحد تنام , انفتح الباب تنهدت بتعب من هواش اسماء : هلا يمي
فراس وهو يجلس : هلا فيـــك .. شفيك صاير شي ؟
ام فراس : ابد ماصار شي .." ابتسمت " ابتسام اليوم بتطلع من المستشفى ابشرك وام نايف مسويه احتفال لها بكرة
فراس هز راسه بعدم اهتمام : الله يعينكم هالفترة اجل كلها مناسبات ما شاء الله
ام فراس : دامها مناسبات فرح فالحمد لله خلنا ننبسط .." طالعته ام فراس لفترة وهو يطالع التلفزيون بصمت .. لها فترة تبي تسأله " الا اقولك فراس ؟
فراس : هممممممم
ام فراس : ابي اسألك .... غـادة وش فيها هالفترة ؟ انت تعرف شي ؟ ماعادت زي أول مكتئبة مره وما ادري وش صاير معها
فراس وعيونه مصوبه على التلفزيون: وانا شعرفني ؟
ام فراس : متأكد ؟
فراس التفت لامه تو بيتكلم أنتبه لها تـنزل .. ازدادت ملامحه نرفزه وهو يرجع يطالع التلفزيون ! غادة اللي كانت في صراع حتى تنـزل .. ضاقت من مجرد نفوره لما شافهـا ...
ام فراس ابتسمت تلطف الجو : هلا غـــدو حياك يابنتي
غادة تقدمت خطوتين وهي تنطق بهدوء : لازم ارجع لعيال ابتسام .. بس جيت أبي طلب " طالعت فراس " لو سمحت يعني ؟
فراس اللي كان يطالع التلفزيون ما انتبه لها نغزته امه : تكلمـــك البنت !
فراس ما التفت براسه حتى بعيونه بس : وش ؟
غادة نظراته تحسسها قد ايش يحتقرها .. استجمعت نفسها وهي تنزل عيونها عنه : ابتسام بسلامتها اليوم طلعت .. لو سمحت ابي اروح لها ببيتها اساعد....
قاطعها مباشرة : لا !
فتحت أم فراس عيونها وهي تلتفت له وتنطق بقهر : وليش لا ...؟! البنت ماعمرها زارت اختها من جت هنا , وبعدين اختها تعبانه الاصول انها تروح لها
فراس رفع عيونه بقلة صبر والتفت لها مرة ثانية : سوي اللي تبين !
غادة استنشقت هوا المكان وزفرت وهي تنطق : مو ضروري .. راح اقولها تمرهم وبس !
فراس رفع حواجبه : عناد هو ولا عناد ؟
غادة ارتفعت وتيرة صوتها الهادية هالفترة وهي تنطق بقهر : مابي أطلع خلاص !
ام فراس : لا تعقدينها ياغادة خلاص روحي لاختك وسعي صدرك واذا تبين تنامين عندها بعد مو مشكلة
غادة : ماني جالسة اعقد شي ... تذكرت ان عندي شغل
تو ام فراس بتنطق .. نطق فراس : اتركيها يم ! غصب تحطين نفسك المسكينه يعـــني ؟
غادة طالعته بقهر : أخسى طال عمرك .. انت المسكين !
وصعدت مباشرة ... فراس احتدت عيونه فيها وهي تصعد , نطقت ام فراس بقيلة الحيلة : ليش قلت لا من أول ؟
فراس بصوت سمعته غادة : وبنت العز ماتتحمل ينقال لها لا يعني ؟؟! اساسا ماوافقت الا عشانك .. ولا انا اتمناها تنقبر مكانها
ام فراس : ليش يا يم قاسي عليها كذا ؟ تراهي بنت كلمه وحده بس بتجبر خاطرها ؟
فراس : ما أذكر اني ابغى خاطرها ينجبر !
ام فراس نطقت بقهر : فراس ! هذي اخر مره تكلمها كذا قدامي .. مو ناقصني انا ! ماتدري اني ما انام الليل وقت اشوفك كذا ..
فراس وقف : انا صاعد انـــام ..
صعـــد فراس وهو يحس بنرفزة منها فضيعـــة .. كل اللي يعرفه ان وضعيتها الكئيبة هالفترة منرفزته ! ومأثره في ضميره بشكل سلبي
عـــند غادة فوق /
كانت على السماعة مع ابتسام : معناها اشوفك بكرة بعزيمة أم نايف وبس ..
ابتسام : والله كنت اتمنى تكوني معي اليوم بس يله حصل خير
غادة : يله ..
سكرت غادة السمـاعة وهي تتنهد بضيق وتطالع بانحاء الشقة بعد ماجمعت اغراضهم ورتبتها .. بيرجع يفضى المـــكان, كالعادة مافيه سعادة تدوم بحياتها حتى لو بسيطة .. عظت على شفتها ولحظة التقت عيونهم لثواني .. التفت مباشرة وكأنه مايهتم .. نظراته الباردة لها اقسى وسيلة يعذبها فيها .. سندت راسها وهي تحس نفسها تتعذب كل يوم أكثر .. في وقت قبل كذا ماراح يهمها انه قال " لا " ثم تراجع ! بس حاليا ماتتحمل منه النظرة .. كل شي يخصه يغمصها أكثر ..
***
ابتســــام /
أخيــــــرا تقدر تطــلع .. روحها المعنوية أكثر من عالية ! مافيه حاجه تحبطها غير حالة غادة النفسية اللي لازم تلقى لها حـل ..ركبت السيارة ونايف يركب مقعد السايق ويتنهـــد بكل حب : واخيــــرا
ابتسام بحماس : اخيــرا برجع بيتي .. " تنهدت " يازين هالشعور
نايف رفع يدها وهو يبوسها : يازينك أنتي
ابتسام : وربي هالفترة بالمستشفى على اعصابي .. خلاص محتاجة بيتي
نايف : تحسين انك كويسة خلاص ماعاد ظهرك يعورك ؟
ابتسام : لا خلاص .. ماقصروا المستشفى وتمارينهم احسني تمام
نايف : حـــمد الله " وقف سيارته " اتصلي على اختك تجيب ذيابتي
ابتسام : هههههه ذيابه من اللحين !
نايف : عندك شـــك ؟
دقت ابتسام على غادة : الـو ؟
غادة : جيتي ؟
ابتسام : أيـوه افتحي
غادة : يله ثواني
سكرت غادة السمـاعة وهي تشيل الشنـاط على كتفها وتـنزل .. كان الوقت ظهيرة فالكل بغرفته نايم عقب الدوام نادت الخدامه تساعدها وهم ينزلون الاغراض ... فتحت الباب دخلت ابتسام مباشرة سلمت عليها بحرارة : كيفـــك ياقلبي ؟
ابتسام : حمدالله تمام دامني طلعت " انحنت لعبدالرحمن بين يدين غادة وهي تشيله " هلا بقلب امه ياناس
غادة : يله انا بدخـــل عشان يجي نايف يساعدك ..
مسكت ابتسام يدها : استني .. دبري نفسك هالاسبوع يوم تجين عندي ولا تكلمت انا مع ام فراس
غادة : لا ابتسام .. صدقيني انا راضية كذا خلاص ..
ابتسام مسحت على خد غادة : وجهك شاحب .. ماراح تخدعين عيوني انتي منتي على بعضك هالمكان جالس يخنقك
غادة ابتسمت بين همها تبي تطمن ابتسام .. بينما شفايفها ترتجف تقاوم وناتها : ................
ابتسام لانت ملامحها وهي تتنهد : شفتي انك مو تمام ..
غادة قالت بقصد انها تبتعد عن الموضوع : انا راح ادخل .. ألشمس حاره مو كويسة لهم ..
ودخلت مباشرة دون تعطي ابتسام فرصه تكلمها .. تنهدت ابتسام بضيق على حالة اختها وبنتهـا الأولى
***
وصـــل بدر لأراضي السعودية وهو بدا يحس نفسه وحيد بجد .. مافيه شخص ضروري يتصل له يطمنه أنه وصل بالسلامة .. استاجر له تاكسي يوصله لشقته ..
بالطريق دق جـواله .. تنهد وهو يرد : هلا ابو قاسم
ابو قاسم " محرر " : هلا استاذ بدر .. كيف حالك ؟
بدر : بخير ..
ابو قاسم : مو بعادتك تتأخر بالدفع .. كلمت انبهك ان فيلتك بالجبيل راح ااجرها لغيرك اذا مادفعت قسيمة هالشهرين
بدر بضيق : ماتقدر تصبر اكثر من كذا ؟ هاليومين عندي مشاكل مع البنك .. اول ماتتصلح وترجع فلوسي بدفع لك
ابو قاسم : عطيتك اسبوع .. اكثر من كذا مقدر
بدر : راح ارد لك بكرة
وسكرها مباشرة والضغط المادي هاليومين متعبه .. زيادة على نقص ارباحه على الصعيد الفني بعد كلمته النرجسية بالبرنامج ( اشوف اني احسن من غيري لأن عندي اللي مو عند غيري ) مايدري كيف انفلتت من لسانه ! طبعا راح يستحقرونه ..
ارسل رسالة لفراس ( حسابي يرجع ولا راح ارفع دعوى بالمحكمه . وشكرا )
وصــل لشقته وهو ينــزل انتبه لكم رساله ببريدة .. رفع حواجبه وهو ينتبه لدعوة لزواج وداد الاسبوع الجاي ..
سكر البريد وهو يدخــــل غرفته الخاليه .. وصورتهم بيوم زواجهم على الحايط تستقبله , تنهد بضيق وهو يطرح شنطته ويرمي بجسمه على السرير وعيونه على ملامحها وهي مبتسمه من قلبها ...
قطع تأمله رنين جواله رفعه وهو يرد : هلا والله ! على البركة .. سمعت انك رجعت بيتك خلاص
نايف والفرحة واضحه بصوته : يبارك فيك .. ايه عقبال ماترجع انت بيتك !
بدر : ههههههه ببيتي انا بدري عليك
نايف : اما عاد ! ليش ماقلت لاحد ؟
بدر : محد سأل ..
نايف : ومتى وصلت ؟
بدر : تو وصلت من شوي .. كان بدق عليك بس سمعت انك تو راجع انت وعيالك قلت مافيه داعي ازعجه
نايف : كويس انك عارف ! وانت شتسوي ؟ كلمت اهلك ولا ميهاف ؟
بدر : وش اكلمهم اقول ؟ ناسي ان كلهم طارديني
نايف : وانت وش شغلك تصرف ؟ بتجلس مطرود طول حياتك ؟
بدر : لا والله ماراح اتصرف .. راح ابعد من حياتهم واترك لهم الحرية عاد يتركوني ولا يدوروني ويختاروني من جديد .. ماله داعي اجبر احد علي
نايف : من جــــدك انت ؟ غلطان وتتبجح
بدر : ايه غـلطان بس مو لهالدرجة .. قاطعين فيني كأني تارك الدين استغفر الله
نايف : اقول اكلمك بعدين ..
بدر : سلام ..
سكر نايف السمـاعة.. وهو يرجع يدخل البيت عند ابتسام اللي سادحتهم قدامها وحاطه اصبعها بيد مشعل وتحركها بنعومة ...
ابتسم نايف وهو يجلس وراها ويسندها لحضنه : ماخلصتي تتأملينهم نايمين ترا !
ابتسام : واذا نايمين ؟ اتركهم ينامون قدامي
نايف وهو يسند ذقنه على كتفها ويبوس خدها : وانا مالي وجه ؟
ابتسام اللي كانت تتأمل عيالها : اوه نايف مو وقتك انت اللحين بعدين
نايف هز راسه : الصبر لي .. اساسا محد بياكلها غيري انا عارف !
ابتسام التفتت له : بسم الله عليك
نايف رفع حواجبه : وتنكفي فيني كمان ؟
ابتسام هز راسها : يب يب ...
نايف وقف : زعلت بروح انام لحالي فوق !
ابتسام ببرود وهي تداعب خشم عبدالرحمن بخشمها : نوم العافيه
نايف وقف بنص الدرج لما استوعب انها ماراح تلحقه تراضيه .. رجع ينـزل وهو يرفع مشعل بيد وعبدالرحمن بيد ثانية .. شهقت ابتسام بخوف : نااااااااايف بيطيحون ! حرام عليك جسمهم مايتحمل
نايف صعد : سريرهم يتحملهم !
ابتسام لحقته بس ماقدرت حطهم بغرفتهم وسكرها وهو يرمي عليها جهاز الصوت : كذا تطمني ! واللحين قدامي
ابتسام تخصرت : لاااااااااا .؟؟؟ مو بكيفك بجلس معاهم
نايف سد باب الغرفة بيده : لا تحاولين ! اذا ماراح تجلسين معي اجل لاتجلسين معهم
ابتسام : اجلس مع حالي ؟
نايف هز راسه : ايه اجلسي لحالك
ابتسام : نايف ياشينك
نايف : والله كيفك ... بس سالفة اني بالبيت لحالي شهر تقربيا واللحين اتعامل معاملة الجدار ماراح اسكت لها !
ابتسام هزت راسها : مو بعقلك انت
نايف قفل الباب وهو يدخل غرفته : مو بعقلي مو صاحي والله كيفك .. تبغين المفتاح ؟ تعرفين كيف
رفعت ابتسام حواجبها وهي تشوفه متجاهلها ويدخل غرفته .. ضحكت على حالته وهي تلحقه بزر بجد لازم تراضي خاطره عشان ترجع لعيالها
***
لــؤي ،
كانت الساعة 12 مساء لما سكر انوار مكتبه وهو يــطلع .. انتبه لبريده يوصل مع الاستقبال , كمل طريقه وهو يتفحص رسايله ... عقد حواجبه وهو يشوف رساله لبريد ابوه جايه مع بريده بالغلط .. تو بيرجعها وقف وهو ينتبه لشي غريب .. فتح الرساله وهو يقرا عقد شراء بيت بأسم " لؤي عبدالرحمن نايف الشمري " .. استغرب هالعقد , ليش يشتري ابوه بيت له ..؟ رفع حواجبه وهو يستوعب ... كيف نسى تفكير ابوه المتخلف .. ابتسم بسخرية وهو يشد بيده على الورقة ويكمل طريقه يركب سيارته .. وصل للبيت بحدود الساعة 1 ونص بحيث مايقابل احد وصعـد مباشرة ..
***
اليــــوم التالي _ آلساعة 5 عصرا ، بيت نايف :
بغرفة نـــومهم كان نايف على كاميرته وعياله قدامه وهو يصــورهم , ويزيد جالس جمبه يراقب التصوير ... طلعت ابتسام بعد مالبست وهي تنطق بقهر : ناااااااااااااااايف ! عيونهم والكاميرا !!
نايف وهو يكشط صوره : مالهم شـــر
مشت ناحيته بعصبيه وهي تسحب الكاميرا : بكسرها لو تصورهم صوره ثانية .. بالفلاش بعد ؟؟
نايف تو بيرد انعقد لسانه وهو يشــوفها طالعه طلتهــا انيقة وفخــمة بنفس الوقت , وقف نايف وهو يتأملها من فوق لتحت : ناوية ماتطلعين من البيت اليوم اجل ؟
ابتسام حـطت الكاميرا على جمب وهي تسحب شنطتها الكبيرة الخاصة للمواليد : مو وقتك نايف احس متأخرة مرة
نايف : بجد اكلمك خل نكشت فيهم ونطلع مطعم
ابتسام يضايقها كلامه هذا قدام يزيد : نايف !
نايف زفر : فهمت فهمت ! يله بسبقك وترا مشعل معي
ابتسام : اصبـــر مالفيته ناوي عليه انت !
نايف : ياهوووه الوسوسة مافيها شي
ابتسام وهي تسحبه من يده وتسدحه على السرير تلفه : من جدك نايف ؟ اللف مهـم مرة ( خلصت ) يله خذه انا جايتك اللحين
شاله نايف وبيده الثانيه ماسك يد يزيد ونـزل ينتظرها لحد ماجـــته وينطلقون لبيت أم نايف اللي فرحتها اليوم باحفادها محد قدهـــا ..
***
بيت ابو نايف /
ام نايف دخلت بالصالة على ابو نايف ولؤي اللي جالسين : الضيوف عقب المغرب بيجون ترا
ابو نايف : ايه عارف
جلست ام نايف وهي تطالع بيالة لؤي الفاضيه : اصب لك بياله ثانية حبيبي ؟
لؤي : لا بطلع اللحين " تنحنح وهو يطالع ابوه " يبه انت لك شغل هاليومين بالعقارات شي ؟
ابو نايف : لا ... ليه ؟
لؤي هز راسه : بس اســـأل .
ابو نايف ابتسم : ليش انت تبي لك شي بالعقارات ؟
لؤي وهو يوقف : ابغى سلامـتك ..
طـلع بسيـــارته وهو يهز راسه .. يعني يشتري باسمه وفوقها عيني عينك يكذب , توجه للبيت المذكور بالعقد بيت كبير بحجم بيت اهله الحـالي ابتسم ابتسامه جانبية : شكله ناوي ينسخ نفسه فيني .
نـزل من سيارته وهو يفتح باب المرتبة الثانية ويسحب من الكيسة طشاش .. كتب بالعريض على الجدار " البيـــت حلال على اللي ياخذ هالورقة " ولزق ورقة عقد بيع وشراء .. السعر " صفر " البائع : لؤي عبدالرحمن نايف الشمري
المشتري : ........................ " وكتب عند خانة المشتري ( اكتب اسمك هنا يالطيب صدقها عند شاهد العدل وبالعافية )
ورجع يركب سيـــارته بعد ما ارضى نفسه بهالحركة .
***
اسمـــاء طالعت نفسها بالمرايه وهي تحوس بفمها : يله أي كلام ! " كملت بقهر " خل ماناخذ الاضواء على العروسة المبسوطة اللحين !
نـــزلت وهي تسحب عبايتها : ماااااااااااامااااا ؟ يله ؟
ام فراس : يله كلنا جاهزين .... وين غادة ؟!
اسماء : ياربي على هالبنت ... بصعد اشوفها
صعــدت مباشرة وهي تطق الباب ... وهي تنطق بقهر : لاتسألين من ! اخلصي من غيري بيزعجك يعــني !!
بعد مدة فتحت غادة الباب : هلا اسماء .. يله جاية
درعمت اسماء لداخل وهي تقزها اسماء قربت من وجهها وهي تنطق : غادة وش هالوجه ؟ مره منتهيه " عقدت حواجبها" وناحفه مرة !! هالفترة ماعمري شفتك نازله تتغدين او تاكلين شي ..
غادة : عندي اكل هنا لاتشيلين هم !
اسماء كانت منقهره مرة منها ... مشت ناحية المطبخ مباشرة دون تستشيرها وهي تفتح الثلاجة ماكان فيها شي مرة مجرد معلبات بسيطة ... والدولايب الغالب بطاطسات وكم بسكوت .. التفتت لغادة اللي نطقت بقهر : شفيك انتي ؟
اسماء : مافيه شي هنا ! قصدك انك الاسبوع اللي فات واللي قبله كله عايشه على معلبات !
غادة : مو بس معلبات ... بس خلصت اليوم ...
اسماء بانفعال : يـــــــامحاسن الصدفف " لينت صوتها " غادة شفيك ؟ منتي عاجبتني هالفترة ؟ بالحيل تعبانه وبالحيل كئيبة ... صاير معك شي كلميني انا اختك .. ماتنزلين واذا نزلتي شاردة
غادة بلعت ريقها : مو شي اقدر اقوله اسماء ..
اسماء : وش الشي اللي ماتقدرين تقولينه لي !
غادة : تأخرنـا يله ننزل ...
اسماء : صرفيني صرفيني .. هذا انتي !
غادة : مو كــذا صدقيني بس ... " تنهدت " مو صاير شي عشان اقوله
طالعتها اسماء لفترة ثم نطقت بقهر : كنت احسب انك قريبه مني اكثر من كذا .. عشان كذا فتحت لك قلبي بهيثم ... بس الظاهر ماني ذيك القريبة تتصرفين كانك واثقه فينا واهلك وكلش بس الصدق انك ماتثقين فينا ولانهمك حتى
غادة اكتفت بالصمت .. مافيه شي تقدر تقوله : ..........................
اسماء نزلت مباشرة وهي تنطق بحدة : بتروحين بسرعة انزلي ! ولا اجلسي كمان بكيفك !
تنهدت غادة باحباط وهي تسحب شنطتها وعبايتها : وانا عندي شي اقوله لنفسي عشان اقوله لك يا اسوم ؟
***
ميـــــهاف جالسة جمب ابتسام وبحضنها عبدالرحمن : يالله يا ابتسام يجنن باكله
ابتسام : ههههههههههه اذا تعبك هاتيه ؟
ميهاف وهي حبه وتميع معه : كيف يتعبني هالحلو ؟ كيفف ؟ صح دحومي ؟
ام نايف اللي مشعل بحضنها : ام عبدالمجيد ليش ماجبتي وداد معك ؟
ام عبدالمجيد : صعبه تجي وعرسها الاسبوع الجاي يادوبهاتلحق
ميهاف : الا وين ام فراس مدري ليش لازم كل مرة يتأخرون !
ام نايف : شرع وعادة فيهم
ابتسام كانت تنتظرهم بلهفة هي نفسها .. تبغى غادة توصل باقرب وقت : ..................................
ميهاف وهي تسمع الجرس : اخيرا ! هذا هم شرفوا
سلمت عبدالرحمن لام عبدالمجيد وهي تركض تفتح الباب .. دخـلوا وهي تنطق لهم بقهر : بدري ؟ وانتو لازم تتاخرون يعني
اسماء اللي كانت نفسها منسدة بسبب غادة : احمدي ربك اللي جينا !
ميهاف : وليش ماتجين ان شاء الله ؟
ام فراس : اسفهيها الله يخلفني خير بس
ميهاف سلمت على غادة وهي تعقد حواجبها : غادة فيك شي ؟
غادة : لا .. ليش ؟
ميهاف : مدري وجهك شاحب مرة مو طبيعي .. وناحفة بمجاعة ؟
اسماء بقهر : ليشش مادريتي ؟ غادة عندها خطة انها تموت من الجـوع ... ومجتهده مره بهالمشروع
ميهاف : رجيم ؟ غادة تستهبلي ... ناقصه انتي ؟
غادة تنهدت وهي تنطق : ابتسام وصلت ؟
ميهاف : ايه داخل
هزت غادة رسها وهي تدخل .. مجرد مادخلت نطقت اسماء بحره : تنرفزززز
ميهاف فتحت عيونها : شصاير ؟
اسماء وهي ترجع كحلها لشنطة المكياج بعصبية : بقولك بعدين !
ميهاف شهقت : متزاعلات ؟!
اسماء تجاهلتها وهي تدخــــل .. اما ميهاف وقفت بحيرة وهي تطالعهن : شصاير ؟!
***
فــراس :-
كان بمكتبه وقت اخيرا قدر يقرا رسالة بدر .. ابتسم بسخرية وهو يرد : بيديك ورجليك لاتقصر .
سكر جـواله وهو يلتفت للؤي : ايه وايش صار ؟
لؤي : رحت لشاهد العدل وحطيت البيت هبه للي يحصل الورقة
فتح فراس عيونه : من جدك ؟
لؤي : ايه .. عشان يعرف يتصرف من وراي مرة ثانية ! مفروض هو اكثر واحد يفهم اني مستحيل اتزوج
فراس : يابن الحلال الدنيا تمشي والكل يتمنى وماراح يصير الا اللي كاتبه ربك ناس يحلمون وناس يتمنون وربك كريم
لؤي : وش قصدك ؟ اني ممكن اتزوج بعد .. لا انت ماتعرف قد ايش مستحيل بالنسبة لي اعلق سعادتي مع شي ممكن افقده بيوم ..
فراس : والله براحتك .. انا ابوك استشارني وانتقدت فكرته بس الظاهر مايهمه راي احد دام شرا البيت
لؤي : سمعت ان بدر رجع ؟
فراس : ايه رجع ونافش ريشه اللحين يبي يحاكمني عشان ارجع له حسابه
فتح لؤي عيونه : بتوصلونها للمحاكم ؟! ماتسوى وربي !
فراس : اذا هو وصلها وقتها راح اقلب القضيه على راسه .. واتوقع انه فاهم هالشي فمجرد يهدد
لؤي : الله يصلحه ويهديه ... اهلي مره ضايقين من وضع ميهاف بالبيت
فراس : دام وافقت على هالحمار اجل الصبر فيها
لؤي : تصدق بيعرضون بالسينما عقب كم يوم فلم بخاطري اروح للبحرين اشوفه وارجع
فراس : فلم ايش ؟
لؤي : فلم حوريات اتوقع
فراس انقلبت ملامحه للنقد : بتشق مشوار للبحرين عشان فلم مب واقعي حتى ! حوريات ؟ تستهبل ؟
لؤي : خمسه وتسعين بالمية من المحيط تو ما اكتشفوه ماتقدر تثبت ان الحوريات مو موجودات !
فراس : لؤي وش رايك ماتطيح من عيني اكثر من كذا وتطلع ؟
لؤي وهو يوقف : هههههههههه طالع دون تقول ! تامر شي ؟
فراس : سلامتك
***
دخـــل نايف المقهى وهو ينتبه لبدر يأشر له ... توجه ناحيته وهو يجلس : هلا والله !
بدر : هلا بك .. كيف حالك ؟ وكيف حال رجاجيلك ؟
نايف : ياحليلهم لازم تزورني يوم تشوفهم ... اكتشفنا ان عيون مشعل زيتيه وعبدالرحمن غامقه عادية ! العالم يقدرون يفرقون اللحين
بدر : يعني مشعل طلع يشبه لك
نايف : من وين بس العيـون ؟
بدر : معك حق مايشبهون لك نهائي في الباقي
نايف : تقول المدام انهم طالعين لجدهم الله يرحمه
بدر رن جواله برسالة من فراس ... كان رده على رسالته , تحولت ملامحه للغضب لانه فاهم ان المحكمة ماراح تنفعه : كـــذا يععني !
نايف : شصاير ؟
فتح بدر الشاشه لنايف يقرا الرسالة ... نايف هز راسة : فراس فاهم بالاقتصاد كله اكثر منك .. يعني طبيعي ماراح تمشي عليه
بدر نطق بعصبية : الله ياخـــــذه بعد !
نايف : انا اقول بالرواقة كلش ينحل .. خل منك العناد ويمشي حالك
بدر تنهد بقرف : أي رواقة يا ابن الحلال هذا مايمشي معه شي ..
نايف : ولا راح يمشي معه العناد
بدر : خلك منـه ..... ميهاف كيف حالها ؟
نايف : اختارت لها وظيفة ..
بدر هز راسه : اهـا ... شركة ابوك ؟
نايف : ايه ... اختارت تكون كاتبه يعني عن بعـد ماراح تداوم
بدر فتح عيـونه : صـدق ؟
نايف : أيــه .. ابوي استغرب بس هي كانت مصره
تحولت ملامح بدر للكئابة .. هو مافكر بمشاعرها وراح للمقابله بينما هي كانت مراعيته حتى بغيابه واختارت وظيفة تراعيه فيها ... حس فعلا انه مايستحقها .
***
بيــــت ام نايف /
بالمجلس الواسع ومافيه صوت تقدر تميزه وسط السوالف بيـن الكل .. غادة حست راسها بلش يصدع من الأصوات فوقفت تطلع ..
ابتسام اللي كانت مراقبتها : غـدو على فين حبيبي ؟
غادة دون تلتفت : راجعه ..
سجى بعد خمس دقايق ماقاومت انها تلحقهـا .... طلعت مباشرة , اما اسماء كانت منتبهه فقامت مباشرة تلحقها لاتسوي شي , تلفتت بانحاء البيت تدورهم لحد ماطلعت للحديقة كانت غادة جالسة عند النافورة وسجى واقفة قدامها ... قربت بهدوء تحاول تسمع ..
سجى بثقة : احيـان الناس مايحبون يسمعون الحقيقة عشان مايشوفون اوهامهم تتحطم ! بس انا راح اقولـك على بلاطة آخر موقف بالمستشفى وضح انك مو شي بالنسبه لاحد !
اسماء عقدت حواجبها .. وش آخر موقف بالمستشفى ! فعلا من اخر زيارة لهم بالمستشفى بلشت حالة غادة .. يعني صدق صاير شي , طالعت غادة اللي ملامحها جامدة تماما : .....انتي ايش جايه هنا تسوين ؟
سجى : جايه اسأل وش صار؟ صايره مطيعه باسم الله عليك
غادة وقفت وهي تمشي متجاهلتهـا ... نطقت سجى من مكانها : روحي روحي ! ماعاد تهميني دام راسك انكسر .. الله يعطيه العافية ولد خالي اللي فاهم اشكالك
اسماء كانت حاسة ان فراس مسوي شي .. تنهدت بالخفيف وهي تدخل الموقف , انتبهت لها سجى وهي واقفة ببرود قدامها : ................
سجى : هلا اسماء ؟ شتبين ؟
اسماء بكل سهوله مدت يدينها وهي تدفر سجى لورا حتى طاحت بالنافورة .... شهقت سجى من برودة الماء وهي تنطق : ياوصخخخخه
اسماء تجاهلتها وهي تمشي ناحية غادة اللي تسحب رجلها لداخل : غــــدو !
كــانت مستمرة بالمشي .. عقدت اسماء حواجبها وهي تمشي ناحيتها وتمسك معصمها : غااااااااااادة !
مجرد مامسكت معصـمها انتبهت لأن وجهها ابيض مافيه دم .. فتحت عيونها بوسعها وهي تنتبه لها تتهاوى على الأرض , صرخت بكل قـــوتها : غاااااااااااااااااااااااااااااااادة !
حاولت تمســـكها لكن حسـت الأهم من كذا احد يفزع لها ركضت لداخل وهي تنادي : يمممممممه !! ابتسام !
ابتسام كان قلبها دليلها .. من سمعت صوت اسماء المفزوع عرفت ان غادة صاير معها شي وقفت مباشرة ويدها على قلبها وهي تنادي ميهاف : ميهاف تعالي امسكي الولد
الكل استغرب فزع ابتسام لان الصوت لسى بعيد ماوصلهم .. فهموا لما دخلت اسماء وهي مربوشة : الحـــقوني غادة طاحت علي برا ... و مو عار....
مامداها تكمل لان ابتسام ركضت مباشرة ولحقتها ام فراس والكل .... اسودت الدنيا بعين ابتسام وهي تشوفها طايحة قدام الدرج نـزلت وهي ترفع راسها لحضنها وتضرب خـدها بخفة : غاااااادة ... غااااااادة !
ام فراس كان هذا خوفها .. صرخت لأسماء مباشرة : دقي عـــلى فراس يجي بسرعـــــة
الكل كان مربوش وام نايف تجيب مـوية .. دخلت اسماء تركض تجيب جوالها وهي تدق بخوف على رقم فراس ..: رد رد رد ...
بعد فترة جاها رده : هاه اسماء ؟
اسماء بهلع : فرااااااس .... الحقـــــنا تكفى بسرعة
فراس اللي تغير صوته للجد : شفيــــكم ؟!
اسماء وهي تحاول تلقط انفاسها : حــنا .. عند زوارة ام نايف ! و و غادة اغمى عليها طلبتك بسرعة تعال
فراس فتح عيونه .. اغمى عليها ؟ , عض على شفته بضيق وهو يحس كل هذا مسؤوليته .. لو حاول يمسك اعصابه وقتها ..........
اسماء صرخت : فراااااااااااااااسس !!
فراس استجمع هدوئه : اسمــاء .. هدي واسمعيني زين
اسماء : شــــنو ....؟؟
فراس : انا جـاي .. انتوا لاتنفعلون حاولوا تصحونهـا بهدوء
اسماء عضت على شفتها وهي تنطق بقهر : ماتبي تعرف كيف اغمى عليهـأ ؟!
فراس : مو وقـته اسماء .. روحي سوي اللي قلت لك وانا خمس دقايق وعندكم
تو بتتكلم تسكرت السماعة ... اكيد يعرف انها تعبانه هالفترة ! هزت راسها بيأس وهي تطلع كانت جالسة وضامه كتوفها ومسنده راسها في حضن ابتسام ... وعيونها ميته تقريبا ,
ركضت اسماء ناحيتهم : صحـــت ؟
ام فراس تنهدت : الحمدالله يارب ..
اسماء : غـــدو حبيبتي فين عبايتك ؟ فراس جاي ياخذنا
ام فراس : كلمتيه .؟!
اسماء هزت راسها : ايه يقول مسافة الطــــريق ..
ابتسام همست لغادة : غادة تسمعيني .؟
غادة العالم حولها موقف ... ماهي مستوعبة من حولها غير ابتسام , طالعتها دون ترد , ابتسام : شرايك ترجعين معي اليوم ؟
هزت غادة راسها بمعنى لا .... دق جوال اسماء طالعت المتصل وهي تكلمهم : هذا فراس جا .. يمه يله !
ام فراس وهـي ناوية عليه من قهرها .. راحت ابتسام تحضر عباياتهم وابتسام ساعدت غادة تلبس عبايتها , بينما وقفت غادة وهي تنطق : خلاص ابتسام مافيني شي ..
حست غادة بانحراج من نظرات الكل .. اكيد انها مريضة نفسية بعيون الكل اللحين ! تنهدت بتعب ماعاد يهمها خلاص , تو فتحت ام فراس الباب كان فراس واقف ومتسند على سيارته بثوب ابيض دون غترة أو شي وكأنه يفكر بعمق .. أول ما انتبه للباب ينفتح عدل وقفته وهو يمشي ناحيتهم , نطق لأمه : وينـها ؟
ام فراس وبنظراتها عتب لولدها : جايه .. الله يعديك الآثام بس
فراس تنهد : الزيارة لسى بأولها كملوا جمالتكم واتركي غادة تطلع لحالها ..
ام فراس : كيف اخليهـــأ ؟ لازم اروح معها و ....
قاطعها فراس بهدوء : يمه .. اذا ماعليك امر ابي البنت لحالها
ام فراس ظلت تطالعه ثم نطقت : انتبه تغثها فراس ماهي ناقصتك !!
فراس انتبه لها بعبايتها جمب اسماء .. التفت لأمه : السواق موجـود اذا خلصتوا " التفت لغادة " تقدرين تمشين ؟
غادة ماردت عليـه مشت بهدوء .. عقدت حواجبها لما سكر الباب ومحد طلع غيرها , رد على نظراتها : المريضين بس يطلعون
غادة ظلت تطالعه وهو يركب مقعـده ... ماتبي تجلس معه لحالها , تنهدت بيأس وهي تنتبه له يفتح الباب الثاني من داخل .. مشت بهدوء وهي تركب بصمت : ...................
حرك فراس السيارة وهو يتكلم بهدوء : كيف أغمى عـــليك ؟
غادة بهدوء : سوء تغذيـة
فراس بمجاراه:.. وكيف صار معك سوء تغذيه ؟
غادة : مالي نفس آكــل ..
فراس التفت لها وهي تطالع الطريق .. رجع يطالع قدام وهو يغير وجهته لحد ماوقف عند مطعـم : انـــزلي ..
غادة : ماني مشتهيه آكـــل ..
فراس سكر بابه وهو يتوجه لبابها ويفتحه ويمسك معصم يدها وينـزلها .. غادة سحبت يدها مباشرة بردة فعل دفاعية وهي تضمها لصدرها , تحس يدها تكهربت .. فراس عقد حواجبه من نفورها الزايد , لكن ماعلق : ....
دخــلوا وهو ياخذ لهم طاولة .. غادة كانت تراقب تصرفاته بصمت وهي تحس قلبها بيتمزع اكثر .. جلست بمكانها وهي تنتبه له يمد لها المنيـو : اقل من خمس اطباق مافيه ! اعجلي
غادة طالعت المنيو ثم طالعته : ....... منت مضطر تجبر نفسك على حاجة ماتبغاها , رجعني للبيت وبس ..
فراس : اجبرت نفسي على حاجة ما ابغاها وقت ضربتك .. فاتوقع كذا عدل ؟!
غادة اول مرة يتكلم معها عن هالموضوع : ...............
فراس رفع حواجبه : شنو تطالعين ؟ اكيد اني ماني سادي هوايته يضرب .. عندي مبدأ الضرب حرام ! بس وقتها الشيطان كان بعيوني ماعدت اميز
غادة ساحت دمعتين على خدها ( الشياطين بعيونه عشانها ؟ ) : ...............................
فراس تنهد وهو يوقف ويدخل يدينه بجيوب ثوبه : لا تضغطين نفسك .. بصدرك شي طلعيه , انا رايح اشيك على الطلب
أول مـاطلع سندت راسها على الطـاوله وهي فعلا محتاجه تبكي .. تبكي لحد مايخف صدرها شوي , فراس اللي كان متكتف برا عند الباب ويسمع شهقاتها .. معقولة يكون بيني وبينها 10 سنين واحط راسي براسها كذا ؟ ركز فراس البنت مهما كان تضل صغيره .. كبر عقلك انت شوي ! تنهد وهو ينتظرها تخلص .. ظل يعاتب نفسه على هالتصرف ! مهما كان اللي بيني وبينها وقت وصلت حدودي طلع معدنها وساعدت ... ليش ماعرفت ارد بالمثل ؟!
صحى من تفكيره عليها وهي طالعه ومرتبه عبايتها وعيونها حمراء بفعل الدموع اللي طلعت : انا خلصت نقدر نطلع
رفع فراس عيونه بقلة صبر وهو ياشر براسه : ارجعي ادخلي !
غادة وصوتها يرتجف : مافيه داعي خلاص قلت لك .. يكـ...
فراس بحدة : غادة ! ماراح اعزك مرتين هي مره وحدة بس اذا خسرتيها فاحلمي بثانية .. فاحسن لك ترجعين وراك
غادة ( مرة وحدة بس ..؟ واذا طمعت بغيرها .. احلم ؟ ) رجعت تدخل , دخل فراس وراها وهو يجلس بعد صمت لفترة نطق : ........... كيفك اللحين احسن ؟
غادة وهي شادة شفايفها وتهز راسها بمعنى ( ايه ) : .................
فراس : طيب ممـكن تطلبين اللحين ؟
غادة بنفس الحركة هزت راسها وهي تسحب المـــنيو .. كلها اسماء غريبة ماعرفتها ولا فهمتها , رفعت عيونها له من تحت المنيو تبي تسأله لكن كان يطالع على جمب مو يمها ... فاختارت عشوائي وحطت المنيــو : خلصت ..
فراس سلم المنيو للجرسون , ثم رجع يطالعها : بمـا أن الجو هادي لأول مرة ..فراح اقولك هالمعلومة بأسلوب احسن من اللي قبله
غادة مافهمت : أي معلــومة ؟
فراس بتشديد : معلومة المستشفى آخر مرة .. امرا لافضلا اهلي قرايبي عامليهم باسلوب , اسلوب البزارة اكبري عليه
غادة شدت على قبضتها وهي تحس بقهر , لكن ماتمنت تقلب الموقف : ان شاء الله
فراس : اذا اللي طلبته تنفذ بالحرف .. وقتها لك علي مايهينك غريب بشرط أنك ماتغلطين !
غادة قلبها ضربهـا .. هالجلسة جالسة تاخذ من عمرها , تبي ترجع للبيت ... نزلت راسها : .. ميــن تقصد بغريب ؟
فراس وعيونه بعيونها : اي شخص غيري
غادة عضت على شفايفها : آخر مرة بالمستشفى .. سجى اللي كانت غلطانة مـو ..
فراس قاطعها بتشديد : ايش قلت ؟ بشرط أنك ماتغلطين .. وانتي يومها ماقصرتي
غادة ابتسمت ابتسامه صفراء : فهمت ...
وصل الجرسون وهو يدخل الطـــلب ويوزعه على الطاولة .. غادة باشرت الأكل بصحنـها انتبهت له مايـاكل وماطلب شي اساسا : ليش مـاتاكل ؟
فراس كان مثبت ايباده على الطاوله ويشتغل .. نطق وعيونه بالايباد : عليك من نفسك ماراح نطلع الا انتي لاحسه الصحون اخلصي !
غادة كانت تلعب بالملعقة بصحن الشوربة وهي تبي تتــكلم بس مو عارفه كيف تصيغ جملتها : .... فــ ..." بلعت ريقها " فراس ؟
فراس : هممممم
غادة وهي تلعب بالاكل بالملعقة بحركة لا ارادية .. فراس عقد حواجبه وهو يرفع عيونه من الايباد : شفيك تكـلمي ؟
غادة استجمعت هواء المكـان : ....... قبل شـوي .. لما قلت ..( أنتبهت لملامحه تقطب وهو يحاول يستوعب كلامها ) لما قلت راح اعزك مره .. ؟ ( كملت بصعوبة ) يعـني مافيه أمل نطلع طلعه زي كذا مرة ثانية ؟
فراس حاس بفمه وهو يحاول يعبر عن نفسه باقل ضرر ممكن : ما اظن اني راح اقدر اقدم لك أكثر من كذا ..
غادة رجعت ملامحها تحبط : ما استــاهل ؟
فراس : لا توترين الجو .. جبتك هنا اليوم لأن اللي صار فيك ذنبي , بس انا ماراح اذنب هالذنب مرة ثانية بحق نفسي .. فماراح يكون فيه مرة ثانية ..
غادة فهـمت .. استوعبت انه مستحيل يطالعها , جابها اليوم يعتذر لنفسه مو لها : ...............................
أنتبه لها فراس وقفت من الأكل : شبعتي ؟
غادة : ايه حمدالله
فراس وهو يطالع الصحون : ماكليتي شـي ؟ ناويه تطيحين مرة ثانية ؟
غادة : شبعـت والله ..
سكر فراس ايباده وهو يطلع الحساب ويوقف : معنـاها مشينا
غادة ماعارضت وهي تسحب شنطتهـا وتطلع .. أول ماركبـو دق جواله , رد مباشرة : هلا يمه
ام فراس : هلا ! شخبــار غادة اللحين .. احسن ؟
فراس وهو يطالعها وهي جالسة وتلعب باصابعها : حمدالله
ام فراس : بالبيت أنت ؟
فراس : بالطــريق اللحين
ام فراس : هي معــاك .؟
فراس : ايه
ام فراس ارتاحت معناها مارجعها للبيت على طول .. حمدالله : يله اجـــل حنا تو دقينا على السواق وننتظره يجي ياخذنا
فراس : كنسلي السواق اجل انا راح امركم اللحين بطريقي ..
ام فراس : لا لا ماعليك منا .. ارجعوا البيت وارتاحوا حنا...
فراس قاطعها : مسافة الطريق وعندكم خلكم جاهزين
سكــر فراس السماعة .. غادة : بنمـر أهلك ؟
فراس هز راسه ... رجع جواله يدق , رد بنبرة قاسية هالمرة : نعـــــــــم ؟!!
بدر : الله ينعم بحالك ! انت وين ؟
فراس : انت شتبي ؟
بدر : اذا انت بالشركة راح اجيك .. ومعاي محامي يثبت حقي
فراس ابتسم بسخرية : انتظرك انت وياه صبح أجل .. اللحين مو يمك
بدر : فاضي لك انا صبــ ..
قاطعه فراس : اقولك شلون ؟ لا تنتظرني رح للشركة وراح اقول للمحامي يستقبلك ويتفاهم معـك بالنيابة عني
بدر : ماعندي مششكلة اجل !
فراس سكر السماعة وهو يدق على المحـــامي ويتفاهم معه على الاجراءات ... ظلت هالمكالمة لحد ماوصل لبيت ابو نايف , اول ماوصل نطق للطرف الثاني : لحظة شوي ( أبعد السماعة وهو يلتفت لغادة ) دقي عليهم قولي لهم يطلعون .
غادة اللي كانت تتأمله طول الطريق ... بعد ماقابلته كل هالوقت تاكدت ان كلام ابتسام 100 % صح , هي متيمه فيه .. طلعت جوالها وهي تدق على ام فراس : الو .... خاله حنا برا , ههه اوك
طلعت من المرتبة القدامية وهي ترجع ورا ... بعد فترة ركبـوا لكن كلهم ساكتين بحكم ان فراس يكلم ماعدا من اسماء اللي همست باذن غادة : كيفــــــك يادبه ؟
غادة ابتسمت تطمنها : حمدالله احسن بكثير ..
سكر فراس السماعة وهنا ارتفع صوت اسماء : حسسسسسبي الله على بليسها من كلبه !!!
فراس غمض عيونه بصبر ثم سحب كرتون المناديل وصقع به راسها : وجع بعد !
اسماء شهقت : أاااااااا راسي
ام فراس : تستاهلين !! تو سكر السماعة تصارخين .... " ألتفت ام فراس لغادة " كيفك يمه ؟ أحسن ؟
غادة : حمدالله كويسة
اسماء : ليشش تسفهوني ! تراني سكت لاني محترمة وعاقلة .... بس الوصخة الحقيرة القليلة الادب سجى راح اطلع فيها يوم عفاريت الدنيا
ام فراس : اسماء ! وبعدين انتي وهالسجى .. والله احراج فشلتيني قدام الكل بنقارك معها
اسماء التفتت لغادة بقهر : وش كانت تقولك قبل اجي ؟ مو جالسة تذلك عشان مدري ايش ... " طالعت فراس " وانت وش مسوي بالمستشفى ! البنت جالسة تكايش عند الكل ماتركت احد
ام فراس عقدت حواجبها : وش مستشفاه ؟
اسماء : اسالي ولدك والله انا ما امداني اسمع التفاصيل
ام فراس : فراس ..؟ شصاير بعد ؟
فراس : خلي الفاهمه اسماء تكمل السالفة .. انا ما اخترت افتحها عشان اقولها
اسماء : وانا شعرفنني ؟
فراس : ماتعرفين اجل اسكتي !
تو بتتكلم اسماء رجع يدق جـوال فراس وطولت المكالمة هالمرة لحد ماوصلوا للبيت ... نـزلوا واسماء تتعلق بذراع غادة : تجين تشوفين فلم معي ؟
غادة : لا والله يا اسماء بصعد انام .. مرة هلكانة
كشت اسماء عليها : مالت ... يله اجل انا بروح اسهر على فلمي
كان فراس يصعـد لفوق وغادة وراه بمسافه ... وصلت للدرج الثالث قاطعها صوته : وقفي لحظة
التفتت وهي تنتبه له يدخل غرفـــته ويرجع يطلع والشال الأورانج بيده : شالك خذيه
غادة استلمته من يـده وهو رجع يدخل غرفته .. رفعت غادة الشال لانفها تستشعر ريحته الواضحه في الشال , صعدت لفوق وهي تجلس والشال بحضنها وكل شوي ترفعه تشم ريحـــته ...... بعد فترة وقفت وهي ترتب اغراضها وتلبس بجامتها تستعد تنـــــام .. لكن ما استسلمت من الشال اللي رمته على وسادتها جمبها .. ريحته تخدر بالفعل ..
كلها ستمضي .
سعيدة كانت الأيام ام حزينة .
سننسى الشعور الذي كنا نستشعره .
الحب الذي علقنا كل آمالنا به .
والشوق الذي يقتلنا كل ليلة .
والبكاء من عمق حزننا .
والضحك في قمة السعادة .
لكن كل ذلك سيمضي .
***
مـــــرت الأيام بوتيرة معتادة .. بدر مـــازال في تحدي مستمر مع فراس يبي يسترجع ثروته الماليه .. لكن كل محاولاته بائت بالفشل , اسماء كانت ايامها ممله وهي تحس بقهر من وداد وغبنة .. ومن هيثم اللي مايكلف نفسه يسأل عنها حتى اذا ما سألت .... نايف وأبتسام احلى ايام حياتهم مع الطفلين والالوان اللي جابوها لحياتهم ... أبو نايف ماعاد يتعرض للؤي بعد ماعرف بموقف البيت وكيف وهبه ببلاش وهو بالقيمة الفلانية .... غادة , كان يوم المطعم يوم ثمين قررت تحتفظ بشعوره في قلبها لانه ماراح يتكرر ... وبحكم انه ماراح يتكرر واحتراما لفراس اللي ضغط نفسه عشان يراضيها , قررت ماتزعجه هالفترة .... أو بالأحرى ماتزعج نفسها صعب عليها تشوفه وهي متاكده داخل نفسها انها تحبه .. واهتمت بصحتها عشان ماتزعجه أكثر ,
يـــــوم زواج وداد /
الوقــــت مغرب والكل مشغول بالاستعدادات عشان يلحقون على الحضور بدري ... إبتسام , كانت بغرفتها تستعد بينمـا نايف تحت ياخذ مهمته في انه ينتبه للبزران .. كان نايف جالس يلعب مع يزيد على البلايستيشن بينما عبدالرحمن ومشعل المنسدحين طايره عيونهم بالاصوات والألوان من الشاشه ..
بعد ربع ساعة نـزلت ابتسام بعد ماخلصت أول مانزلت شهقت وهي تشوف الأنوار مسكرة ماعدا نور الشاشة : نااااااايف !!!!
نايف وعيونه على الشاشه : هلا هلا
كبس بعيونه وهي تشغل النور فجأة .. : ياربي وانا ما اقولك انتبه لهم إلا اندم ؟ راح تعمي عيونهم كذا
حطت شنطتها على جمب وهي تنحني لهم وترفعهم بمشايتهم بعيد عن الشاشه .... نايف بعد ماخلص لعبته التفت وهو يصفر باعجاب : وش هالحلا وش هالقمر ؟
ابتسام طالعته بنظرات حادة : اسكت نايف بالله .. راح تنبسط وقت نقص لهم نظارات وهم لسى بزران ؟
نايف رفع عيونه من الكلام المعتاد : اتوقع اذا هم جاهم شي فمن كثر ماتتفاولين عليهم بسم الله عليهم !
ابتسام وهي مقهورة منه بجد : تبغاني أجل اتفرج عليك وانت تلعب بحسبتهـــم ؟
نايف سكر القيم وهو يوقف : احمدي ربك أنك مـزة معد اقدر اجادلك
هزت ابتسام راسها من تبلده وهي ترجع تضبط لبس عيالها .. اما نايف وقف جمبها وهو ينغزها بكتفه : كل هالحلا ومكشره مايضبط ؟
ابتسام تنهدت وهي تستسلم وتبتسم له .... نايف بحركة درامية مسك قلبه : اااااااه قلبي بموت ... ايه انتي ابتسمي وانا حيلتي اضيع بتفاصيل هالابتسامة
ابتسام هزت راسها من هباله : المهم حياتي يله خل نعجل .. يادوب نلحق نحطهم بعد عند الناني
نايف وهو يضبط غترته قدام المراية : بنلحق ماعليك يله .." التفت ليزيد " يزيد بسرعة بعد انت
***
ميــــهاف وقفت عند سجى : سجى الطاولات بالأخير ناقصها موية
سجى : يله رايحه اوصي لها ... اوووه امي تناديني
ميهاف : مو مشكلة روحي لها انا بوصي على الموية
بطريقها للمطبخ عند الضيافة انتبهت لابتسام تدخل توجهت ناحيتها : هلا سيـــــــمو هلا بالقمر
ابتسام اللي كانت تفح : هلا ميهاف كيفك ؟
ميهاف : ههههههههه شفيك طالعه من حرب ؟
ابتسام وهي تفك عبايتها : ياشيخه ماتدرين وش صار معاي ؟ وصلنا لعند مركز الناني طلعت ماداومت ناسيه انا حاجزينها وانتظرناها تجي ولما جت طلعت ناسية مفتاح المركز ... ورجعناها لبيتها تجيبه ومابغيت اوصل
ميهاف : لا تخافين تو ما اجتمعوا العالم .. حضور خفيف للحين
ابتسام : ام فراس لسى ماجو ؟
ميهاف ضحكت بسخرية : هههه ؟ مين ! تبينهم يجون بدري ؟؟؟ امسحيها من راســـك !
بيت أم فراس /
كانت اسماء فوق بشقة فراس على حسب اتفاقها مع غادة انها تضبط مكياجها لها وشعرها بحكم ابداعها بهالمجال ...
اسماء كانت واقفة قدام المراية تراقب فستانها الليموني وهي تنطق بقهر : احس الفستان البنفسجي كان بيطلع احلى
غادة اللي كانت تكلمها من غرفة الملابس : اسمااااااء ! خلاص قلت لك هذا حلو يعني حلو
اسماء تنهـدت وهي تطالع نفسها : الله لو بس اقدر اوريه هالكشخة " صوتت لغادة " غادة انا بسبقك تحت لا تتأخرين
غادة : اوكـــيه
نــزلت اسماء وهي ماسكه فستانها ترفعه لاتتعثر ... وقفت عند غرفتها تاخذ عبايتها وترش عطرها وهي تنــزل ابتسمت ام فراس لما شافتها : يا ما شاء الله على بنتي .. وش هالزين بس ؟
: ايه ماشاء الله لو هالصبغة مو براسها !
شهقت وهي تنتبه لفراس : يمــــــــه انت هنا ؟؟
فراس : عندك مشكله اني هنــآ؟
اسماء : لا سلامتك
ام فراس : المهم حنا لازم كل مرة نتأخر ؟ وين غادة ..؟
اسماء : مسكينه تاخرت لاني مسكتها تسوي مكياجي ... شوي وبتنزل
فراس : اذا مطولين انا بروح وتعالوا مع السواق
ام فراس : لا لا لحظة بس .. اسماء روحي عجليها
: هذا انا جيت
ياسمين باعجاب : وااااو غادة كأنك ممثلة
الكل انكتم فعلا من جمالها .. ماحرمها ربي شي ...بفستانها الابيض العاجي الطويل بتخصيره مناسبة طولها ورشاقتها
اسماء : يااااي ياغادة بصراحة تعوذي بسم الله عليك
أم فراس بذهول : الله يحفظها ياربي كاملة بسم الله عليها
غادة نزلت راسها وهي مستحية من كل هالمدح
فراس التفت يبي يفهم وش يتكلمون عنه .. والظاهر أن اهله مايبالغــــون .. كل جزء فيها ينطق أنا احسن من الثاني
اسماء : فرااااااااااس امانة امانة وش رايك ؟
غادة طارت عيونها ماتوقعت فراس موجود ... التفتت وهي تنتبه له جالس وعيونه تطالع بشكل طبيعي : متكشخة طبيعي تطلع حلوة !
اسماء : مااااالت عليك بسس .. ماتقدر تقول كلمة حلوة ؟ حتى انا ماقلت لي كلمة حلوة وانا مزة !
فراس : مابي اظلم نفسي واقول كلام حلو لناس ماتستاهل
اسماء شهقت : حنا مانستاهل ؟!!
غادة حست باحباط ... حتى بهالشكل ما يتأثر ؟
فراس وقف : انا بــرا
أم فراس ابتسمت مافاتها نظراته أول مـــانزلت .. حتى هو ماقاوم يتأمل طالعت غادة : غادة قربي أعوذك
غادة ( على ايش ما حركت رمش لاحد حتى ) : مافيه داعي والله
ام فراس : اقول تعالن بس
فـراس أول مـاطلع سحب سيجـاره من جيبة .. وهو يشعلها ويشفط ينتظرهم , التفت ل النافذة الطويلة المطلة على الصالة .. كانت تلبس عبايتهـا وضحكت من قلبها ومبسمها الوسيع زاد اتساع على كلمـة قالتها اسماء المتحمسه تتكلم .. ( كشر من انشداده لشكلها بهالطريقة .. تنحنح بينه وبين نفسه وهو يصرف عيونه وكأنه مستاء من نفسه وطلع مباشرة )
ركب سيارته وبعد فترة ركبـــوا كلهم ... اثناء ما أم فراس تسولف مع فراس بعلم الأنساب وعائلة زوج وداد , همست غادة لاسماء : يووه اسوم كحلي احسه انحاس يمدي اصلحه ؟
اسماء بصوت طبيعي : فكي اللحين طرحتك عدليه السياره تمشي محد راح يلاحظ !
فراس مباشرة : سيارتك يالشيخة عشان تقررين ؟
اسماء : وشهــــو ! السيارة تمشي .. ياما سوينااها , غادة خربان كحلها بتصلحه
فراس وعيونه على الطريق : عمره ماتصلح طرحتها لاتفكها !
اسماء بقهر : وليش ان شاء الله ؟
فراس : لأنها سيارتي ! ما اعجبك قولي لي انزلك
اسماء تكتفت : لا والله ما أعجبني
فراس وقف السيارة مباشرة وهو يتسند على المرتبة : انزلي اخلصي
غادة فتحت عيونها من جده ... ام فراس : يافراس يكفي آخر مرة سويتها هالمرة بعد
غادة فتحت عيونها زود ... سواها من قبل بعععد !!! , فراس : اسويها مرة ومليون مرة ماعندي مشكلة
اسماء تذكرت لما وقفت بنص الطريق ربع ساعة ... بلعت ريقها : لا خلاص بنكمل الهوشة بعدين فراس
فراس : لا شدعوة ؟ اللحين يله لاتجلس بخاطرك
اسماء : اففففففففف وانا شدخلني خلاص اسفة ! معك حق عمره ماتصلح هالكحل
فراس هز راسه برضا : شاطرة ( كمل طريقه )
غادة ضحكت داخلها عليهم ... فراس واسماء دراما ماتنتهي واسماء كثر ماتخسر قدامه ماتستسلم
أول مــــاوصلـوا القصر دخلو الحريم ... اما فراس راح لقسم الرجاجيل وأول مادخل بوزنه بالمجلس الكل وقف يسلم عليه حتى اللي يكرهه .. عائلة زوج وداد ماصدقـوا ان هالزواج بيحصلهم فرصة يقابلونه هو وأبو نايف , والتجار حضروا ياخذون فرصهم .... ماعدا شخص ماحرك معـاه ولا حتى وقف ظل جالس بغــروره ....
فراس أول ماوصل ناحيته وشافه ماوقف .. تجاهله كانه مو موجود اما بدر ماهمه كمل سوالفه مع اللي حوله , اول ماجلس فراس ناحية أبو نايف نطق ابو نايف باحباط : ليش سويتوا كذا ؟ الكل بيحكي اكيد
فراس دون نفس : مفروض ادنق اسلم عليه مثلا ! بالطين لحد مايلين
ابو نايف : الله يهديكم .. هذا هو حنا حاقرينه ما أثر فيه
فراس ابتسم : مين قال ؟ ساعته مو جديدة ولا جزمته
ابو نايف مافهم : وش يعني طيب ؟ حتى انا ساعتي لي سنة البسها
فراس : انت مو بدر .. ماتعرف بدر ؟ كل مناسبة طقم جديد ! هالمرة مافيه ميزانية
ابو نايف أول مرة يعرف بهالعادة .. يمكن لأنه ماوضح ساعته كانها جديده وجزمته ! , فراس تلفت بعيونه يدور لؤي .. التفت لابو نايف : فين لؤي مو شايفه ؟
ابو نايف : طلع برا مع نايف مدري وش وراهم
هز فراس راسه وهو يوقف ويطـــلع .. كانو متسندين على سيارة نايف ويسولفون عن شي بالجوال ... لؤي انتبه لفراس : هلااا جيت !
فراس : شتسون يازلايب هنا ابوكم يدوركم ؟ ( كشر وهو يشوف الكليب لمغنية بمناظر رقص والعري المعتاد ) الله يخسكم وش تشوفون ؟
نايف : هذي مغنية جديدة جالس اوريها لؤي .. بالله مو مزة ؟
فراس طالعهم باستخفاف : الله يخلف على عمي بس .. هذي مزة ؟! وجهها برطم
لؤي مسك بطنه : ههههههههههههههههههههههههههه نايف قصف مزتك وخر بس !
نايف : هاهاهاها .. وبعدين وش فيه البرطم ؟ شفايفها مليانه حلوه
لؤي : لاتحاول فراس مايحب البراطم .. يحب الفم خاتم سليمان ع قولتــــــــه
فراس طالع لؤي بنص عين ... بينما نايف مسك فمه يكتم ضحكته وهو يرفع حواجبه وينزلها وهو يطالع فراس : تحب الفم خاتم سليمـــان ؟!!!
فراس رفع حاجبه : لا أحبه برطم زيك .. كويس كذا ؟
نايف بوناسة : لاتحـــــــــــــــاول لاتحاول ! وصلت وصلت ... " وقف وهو يرمي جوال لؤي عليه ويربت كتف فراس " عوافي , هاه ؟!
لؤي اللي مافهم ولا شي .. بينما فراس طالع لؤي بعصبية : وانت ماتبلع علمك ؟!
لؤي طارت بوهته : وش قلت ... ليش شفيكم شالسالفة ؟
فراس وهو يعطيه ظهره يرجع يدخل : سلامتك خلك بالبقرة اللي في جوالك
أول مـادخل فراس كان نايف واقف عند الباب ويرميه بنظرات .. فراس هز راسه بيأس , نايف راعي طقطقة فاحسن شي يحقره..

..

قراءة ممتعة 💜

مبدعه جداً كاتبتنا الجميله
روايتك اكثر من رائعه وإن شاءالله في المستقبل نرى اسمك ساطع بين الكاتبات…
اكثر شخصيه متعاطفه معها غاده كاسره خاطري يمكن لو ظروف زواجها من فراس غير كذا كانت عاشت معه حياتها…
فراس شخص عصامي متحمل مسؤوليه كبيره مع انه يظهر غير مايخفي… .
ميهاف لو اشوي حاولت تتفهم طبيعة بدر صحيح ماانكر ان بدر متعالي وشايف نفسه بس لو تتنازل اشوي لان الحياه بيت الاهل غير عند الزوج…
اسماء هاذي غير شكل بنت مغامره الله يسعدها مع هيثم المغرور…
ابتسام ونايف الله يسعدهم…
لؤي احس تصرفاته مبالغ فيها خصوصا لما باع الفله اللي ابوه شراها يعني من البدايه كل حياته غلط لو كان اختياره صح ماكان خسر هـ الخسارة الكبيره… الله يجمعه مع بنته…
كاتبتنا الجميله بـ إنتظار المزيد من ابداعك ..

والله أكثر شي في الدنيا ينرفزني مواقف العقوق موقف لؤي مقرررف بجد ابوه مشتري له بيت ويقول على تفكيره متخلف واخر شي يسوي النذالة هذي تفو عليه وعلى تفكيره المتخلف .. ماعليه حبيبتي ياليت تسوين شي يكسر لؤي اكثر من كذا لأني شايفة مواقف العقوق تكررت كثير وكأنها شي طبيعي