لأول مرة أعلق على القصة وأنا حقيقة من المعجبين جدا بالكاتبة وإن كانت أول قصة لها فيزداد اعجابي أكثر لأنه واضح تمكنها من عناصر الكتابة وقوة الحبكة اهنئك كثيرا على ذلك سأعلق بشكل سريع على الشخصيات :
أولا فراس : هو اروع شخصية في القصة هو الرجل الحقيقي الذي يتكل عليه كل تصرفاته مبنية على تفكير وبعد نظر بشكل عام هو الأفضل على الاطلاق .
لؤي : ضعيف شخصية ويستحق مايحصل له اكره الرجل الذي على استعداد أن يبيع اهله من اجل إمرأة الحب الحقيقي هو حب اسرتي التي انجبتني وتعبت في تربيتي لافتاة بلا اخلاق اسير وراء هواءها وانسى أمي وابي من اجلها بئس الرجل هو .
سارا : سؤال هل هي مسلمة ؟؟ كل تصرفاتها لاتدل على ذلك ابدا .
ابتسام : في بداية القصة كانت مثال رائع للفتاة المكافحة وعوضها الله خيرا بزواجها من نايف لكن بدل أن تشكر الله الذي رزقها بزوج غني ومحب اصبحت تتعالى عليه كثيرا ونست اي حالة كانت عليها ونقلها ادخلته في دوامة لاتنتهي من المشاكل وبدل أن تشكره قابلته بالبرود والتجاهل شخصيتها اصبحت غثيثة كما يقولون .
نايف : شخص رائع وطيب القلب لولا التحرر والتفتح الذي كان يعيشه ولكن يبدو أنه بدا يغير طريقه ويعتدل .
بدر وميهاف : باختصار قدر ولقي غطاه مناسبين لبعض الاثنين مغرورين ومتكبرين لايقين على بعض .
غادة : تركتها للأخير لأنها أسوأ شخصية في القصة على الاطلاق حياتها من بدايتها غلط في غلط عنيدة ومتهورة وقليلة ادب ومستحيل تعترف بخطأها رغم الكوارث اللي سوتها متخذة دور الضحية وإنه غصبا عنها واللي زادها ردات فعل ابتسام الباردة اللي تجلط فشافت نفسها ماسوت شي قليل اللي سواه هيثم فيها وأي رجل حقيقي ماراح تقل ردة فعله عن هيثم والأسوأ أسلوبها مع نايف رغم كرمه وضافها في بيته وسعى لحل مشكلتها مع زوجها ومع ذلك تكرهه وتقل ادبها عليه وكأنها هي صاحبة الفضل عليه مو هو واللي كبر راسها طبعا ابتسام .. حقيقي عاجبني اسلوب فراس معاها اقل شي ينفع لها بالعقل لاقيها في بيت دعارة كيف بيكون له نفس فيها حتى لو كان بيت أمها هي كانت تدري باللي يسير في البيت ومع ذلك بقيت فيه .. أتمنى فعلا ماتكون نهاية قصتها مع فراس انه يرجع يحبها ويسير متيم فيها لأنه بصراحة راح تكون نهاية تقليدية جدا تعودنا عليها .
في الأخير عندي ملاحظة حبيبتي متمللة أتمنى تقبليها اسلوب المخاطبة مع الوالدين في القصة فيه سوء أدب كبير سواء أسماء مع أمها نايف مع أبوه لؤي مع ابوه مهما كانت أخطاء الوالدين مايعقل إنا نكلمهم بعبارات سيئة وجارحة ولاترقى لمقام الوالدين ولعلك غاليتي تداركينه في مقبل قصتك .
لك ودي وتقديري

السلام عليكم ورحمة الله وبركاته
بالنسبة للـــردود اللي انحذفت , واللي ما انحذفت
حابه أقول اني قريتها كلها ورديت عليها بس الظاهر فيه مشكلة بعد التحديث للمنتدى وصايره الردود تنحذف
حبيت أنبه بس وان شاء الله تنحل المشكلة

" تشابتر واحد واربعين "
يقول أحد علماء النفس :
الرجال ينسون لكن لايسامحون ,
والنساء يسامحون لكن لاينسون
جـالس على شرفته .. يراقب ساعات طلوع الشمس الأولى وامامه ورقة وقلـم وكاس قهـوة , هو أكثر شخص مستمتع بهدوء البيت العارم ..هالشخص الحالم الخيالي يقدر يبحر بنفسه بعيد عن هالعالم وينسى اللي حوله لساعات ..
تنهـد وهو يفلت قلمه .. تناول فنجاله وهو يوقف ويراقب الحديقة ويشرب قهـوته , كتاباته هي متنفسه الوحيد .. لحد مايفك الحديد كثر الدق .. طالع ساعته قرب المـــوعد دخل غرفته وهو يلبس جاكيته القطني البيج على بلوزته الجنز الرسمية وبنطـال برتقالي .. ونظارته الشمسية مجرد ماخلص دق جواله .. رد مباشرة : وصلت ؟!
فراس : ايه انا عنـد الباب اللحين
لؤي : يله جايك
نزل الدرجات بسرعة حتى وصل لبرا .. حصل فراس بالمقعد اللي جنب السايق , يعني افهم وسق .. ركب : حمد الله على السلامة
فراس : الله يسلمك
لؤي وهو يحرك : كيف شغلك ؟! مشى كلش تمام ؟!
فراس : ليش عند شك انه ماراح يمشي تمام يعني ؟!
لؤي : لا حشى لله.... تصدق مالي خلق نهائي اروح لو مو انت زرعت لي مارحت اساسا
فراس : تغيير جو ...
لؤي تغيرت نبرته : ابسألك كلمت سارا ؟!
فراس تغيرت تعابيره للتشاؤم : كلمتها ! وعندي سؤال واحد بس ..؟! عقلك وين يوم تزوجتها ؟
لؤي : ياليل رجعنا لنفس المنـوال ...
فراس : والله اشوف حالتك تجيب الهم .. وهي عايشة حياتها ولا درت عنك حتى لو مكانك خذيت خطوتين ورا واختفيت من حياتها !
لؤي : وش تبغـاها تسوي يعني ؟!
فراس : ماتطلب الطلاق مثلا ! عطها ورقتها وفكنا .. والله يعوضك خير
لؤي : انا فاهم انها زعلانة .. ويحق لها اللي جاها مو سهل اضطرت تشيل مسؤولية كبيرة ..بس لازم اعطي نفسي واعطيها فرصة ثانية ..
فراس : مو كل الناس يستاهلون فرصة ثانية .. في ناس اصلا ماكانت تستاهل الفرصة الأولى !
لؤي : انا ماراح اناقشك بسارا .. ماراح احط جهدي فيها اللحين .. خل اخلص ابوي قبل
فراس : ابوك ماراح يخلص .. صدقني
لؤي لما حس بقتمه من الموضوع قرر يغيره : شخبار اصابتك .؟! متى اخر مرة رحت للمستشفى ؟
فراس : لي شهر مارحت .. خلاص معد احتاجهم
لؤي : من جدك !! مفروض وقت تبدا تلتئم يشوفونها
فراس : يشوفونها يصورون معها ؟! خلاص التئمت والحمدلله
لؤي : ما شاء الله عليك .. بالحيل مهتم بصحتك , ماعادت تعورك ؟!
فراس : نهائي ..
لؤي : افلقني ! بس معلوم ماراح تقولي
فراس : وقف عند دكتور كيف .. المشوار 3 ساعات ابي قهوة
لؤي : على اساس انت اللي تسوق ؟!
فراس وهو يطلع لابتوبه : على اساس انا اللي بجلس اشتغل طول الطريق
لؤي : حتى بالطريق ؟! هذا وانت بتغير جو ... الله لايبلانا
***
الســـاعة 8 صباحا .. كان نظـام غرف مرتب على سريرين , غادة واسماء تشاركوا الغرفة .. وحصلن نفسهن صاحيات من بدري اسماء كانت بالغرفة تكمل كشختها بينما غادة بالحمـام تاخذ لها شاور , طـلعت غادة من الحمـام بروبها وهي تتجه لشنطتها .. نطقت اسماء بتذمر : اف صبغتي نزلت صاير شكلها بايخ لازم اروح للمشغل قريب
غادة : ايه تو بقولك .. بس وقت تروحي لاتصبغي اشقر بس , لو منك بحط خصلة ملونة
اسماء عقدت حواجبها : ملونة ؟!
غادة : ايه رمادي مثلا .. او بنفسجي حتى بس بيطلع بايخ مع الاشقر ..رمادي حلو !
اسماء : خلاص وقت اروح روحي معي .. ونقرر , المهم تتوقعين احد صاحي اللحين ؟!
غادة : ما أدري احس هدوء مرة ..
اسماء : اجل بسرعة البسي خل نروح ناخذ لفه لفتين قبل يصحون
غادة : لحظة يامطيورة .. خل البس
اسماء : ناشبه تتسبحين من صبح !
طلعت غادة بسرعة بعد مالبست على السريع
اسماء : افف سنة ! خلصتي ؟! اخلصي قبل يقومون وتروح علينا الطلعة
غادة وهي تطبع البلوشر على خدودها : شاسوي بخلص مكياجي ... " رشت عطرها وسحبت عبايتها " يله سرينا
لبسن عباياتهن وهن يطـلعن والجـو يجيب انتعاش .. هالوقت من الصباح مايعلى عليه , اسماء : ياربيه الجو يجيب العافية
غادة : هههههههه انتبهي بس نضيع زي امس !
اسماء : يابنت الحلال الواحد اذا ضاع يحس نفسه مهم .. يفقدونه اهله ويبكون ووقت يرجع يضمونه ! حنا اعوذ بالله شوي ويعلقون حبل مشنقة عند الباب يستقبلنا
غادة : ايوه حنا طرق التعبير عندنا مضروبة شوي
اسماء : وماقهرني الا سجى هالوصخة ! هي اللي رايحه تركض سابقتنا ثم تجي تقول فكرة اسماء يقطعها ام وجهين ذي حقدت
غادة بحقد : وفوق انها عايشه بوجهين ولا وجه فيهم حلو !
اسماء : ههههههههههههه ايه والله صدقتي
غادة وهي تتأمل المزرعة : بس بجد اسوم شغلكم مرة رهيب .. اول مرة اشوف مكان كذا خيالي بجد
اسماء : التصميم كله كان عمي عبدالرحمن .. ووقت كبروا الشباب صار كل واحد يضيف له فكرة او مشروع او أي شي , واغلبها طبعا نايف وعبدالمجيد
غادة : ما شاء الله عليهم شاطرين جد" وقفت غادة فجأة " اسمـاء اللي قدامنا هو كباين الكهرب !!
اسماء : شف شف !! ايه هذي هي .. وجع وحنا امس ضعنا ندورها
غادة : جعله يخلف بس ..
اسماء قربت من الكبينة : تعالي نكتشف الخلل
غادة : اشتغل الكهرب خلاص !
اسماء : مشغلينه بمـولد .. ولا هو مازان
غادة : بجـد !؟ " قربت معهـا وهي تطالع تحاول تكتشف " شوفي هذا السلك مفصول اكيد هو
اسماء : تصدقين
شبكنـه مكانه واسماء تضرب يدينها ببعض : لا ويجون يهاوشونا وهم مايسوون دونا
غادة : ههههههههههههههه وناسه حلينا السالفة صدق
كملن جولتهن على المكـان .. وقت قربت الساعة تصير 10 رجـعن اول مادخلن كان الكل مجتمع على الفطور : بدري ! وين كنتن ؟!
سجى : يضيعون مرة ثانية
اسماء : مانقدر دونك !
ام فراس : اغسلن يديكن وتعالن افطرن
غادة تلفتت : فين إبتسام مو شايفتها
وداد : ماحبيت اصحيها .. مسكينة أمس مانامت طول الليل تقيئ
ام فراس : غريبة .. هي اللحين الشهر السادس مفروض وقف الوحـام
غادة : الله يعيـنها ..
ميهاف نزلت بعد فترة .... ام نايف : كل هذا تلبسين ! حشى !
ميهاف : فجأة نسيت كلمة سر شنطتي .. عقب الشين انفتحت لي
اسماء : من الفهاوة !
ميهاف : ياحلوك ساكته انتي
اسماء : المهم ! اليوم ابي اركب الخيول .. والدبابات وابغى اركب المنطاد بعد و ..
قاطعتها ام فراس : كل هذا بتسوينه اليوم !؟
اسماء : ليش مقدر ؟!
ام فراس : ايه ماتقدرين ! امس لادباب ولا خيول ولا منطاد وضعتي .. كيف بكل هذا !
غـادة : كل هذا موجود ؟ !
اسماء : ايييه كله .. بس طبعا لازم تبيعين كرامتك تشحذين نايف وعبدالمجيد
ميهاف : انا بصراحة ابي الخيل وبس ..
دخلت ياسمين بحماس : ماااااامااا .. فراس ولؤي جو !!
ام فراس : وصــــل من الصين ؟!
ام نايف : ياحليله والله كويس جا يجيب لؤي معه بعد
اسماء : لااااااااااااااااا ... جا فراس خلاص مافيه دباب ولا منطاد ولا غيره ومافيه حتى هواء نتنفسه !
ام فراس : احسن .. سنايدي والله ليته من امس هنا
اسماء : يممممه .. طاح قلبي وانا اتخيل بس
سجى : غادة شفيك كأنك مو مبسوطة ان فراس جا ؟!
غادة عقدت حواجبها .. شتبي هذي : احد قالك اني مو مبسوطة ؟
سجى : اسود وجهك من قالت ياسمين انه جا
غادة : وتراقبيني كمـان ؟ّ واضح اني شايله معك بجد
سجى رفعت حواجبها : فوق ماتتصورين
غادة وقفت : الله يعينك اجل .. انا رايحة اشوف ابتسام بس
همست وداد لسجى بعصبية : شقاعدة تقولين للبنت انتي !
سجى : قاااااااهرتني قاهرتني ! شوفي واصل من سفر ولا همها حتى رايحه تشوف اختها !
وداد : خلاص سجى .. صارت زوجته انتي مالك علاقة باللي يصير بينهم !
عـند فراس :-
دخل هو ولؤي وسلموا على الكل ... أول ماجلسـوا , جلس لؤي جمب هيثم : هلا والله بالدكتور منور والله .. ماتوقعت احصلك لا وممسي بعد
هيثم : مو ناوي والله .. بس ابوك اصر احرجني !
لؤي : هههههههه ايه معليش اجلس وسع صدرك
هيثم : لا ساعه كذا وماشي
لؤي : يوم جيت ؟! لا والله ماتروح ... حنا كلنا بنرجع اليوم خلاص ارجع معنا وبس
بدر : من امس وحنا نمسكه وهو بيطير .!
ابو نايف : شخبار الصين .؟! عسى كلش تمام ؟
فراس : ايه خلصنا كلش باجتماع واحد وكنسلنا الباقي ... واثنين من الإداريين جالسين يبيعون شهادات هناك كويس اللي رحت
ابو نايف : ايه تحتاج متابعه مستمرة ولا راح تسلم من اللي ماعندهم ضمير
فراس : لا طردتهم مايحتاج .. خل اللي يفكر يسوي سواتهم يعرف
بدر : الله وصل فراس صرنا مجلس وزراء خلاص !
عبدالمجيد : هههههههههههههههه من جد .. الا اقول وينه نايف ؟!
بدر : طفشت منه رفسته حست ام امه .. بس مافيه امل يصحى يقولي دقيقة ويرجع ينام
لؤي : نايف نومه ثقيل لاتحلمون يصحى لكم
ابو عبد المجيد : إلا اليوم طفيت المولد .. طلع الكهرب زان
بدر : بجد ؟
فراس : ليش خربان اجل ؟
ابو نايف :ايه امس طفـى ولا اشتغل نهائي .. بس غريبة كيف زان فجأة انا تو اقول بكلم عامل يصلحه
لؤي : كويس اللي تصلح اجل
هيثم : يمكن عـطل بسيط وخلاص زبط
ابوعبدالمجيد : ايه اكيد
فـراس وقف عقب ماخلص فطوره .. ودخل يشوف امه مرة وحده اول ماراح نطق بدر : اقول .. انتبهوا احد يقول لفراس وش صار امس ؟
لؤي : شصار امس ؟!
بدر : سالفة ماتسوى .. بس المهم لحد يزل لسانه بيعصب وبتخرب على الفاضي دام الامور عدت سليمة خلاص
ابو نايف : تنذكر ماتنعاد خلاص مايحتاج احد يتكلم فيها بعد
دخـل فراس يم الفيلا وتنحنح : احححم ... يمـــه
ام فراس طلعت له مباشرة .. باس راسها : هلا والله
ام فراس : حمدالله على السلامة ! كذا ماتقولي انك بترجع ؟
فراس : اهم شي أني جيت ..
سلمت عليه ياسمين .. تلفت عقبها : وين اسماء اجل ؟
طلعت اسماء : هذااااني ... كيف حالك ياصاحب السمو ؟
داخــل .. كانت سجى عند النافذة العاكسة تراقبه , داخت على شكـله بالجنـز الفاتح وتيشيرت أبيض دون تفاصيل وفوقه جاكيت أسود جلد .. تناسق الأسود مع شعره الفحمي معطيـه فخامة غير العالم .. انضرب قلبها وهي تنتبه له يرفع حاجبه باستبعـاد لكلام أسماء الكثير , تنهدت بغرام : يــــذبح .. الله ياخذها يارب
فتحت جزء من الشباك عشان تسمع .. طاحت على ام فراس تسأل : اسماء وين غادة ؟!
اسماء : صعدت لاختها فوق
ام فراس : روحي ناديـها تسلم
فراس : مافيه داعي .. طالع انا اللحين
سجى ( مو ميت حتى يشوفها ! انا من أول حاسه زواجهم مريب ) : ................
اسماء : طيب فراس تكفى نبغى نركب الدبابات طلبتك !
فراس : اختاري .. الدبابات او المنطاد او الخيول ! مو كلها
اسماء : اففف صعــــب اختار ...
انس : نبي الدبابات ّ!
اسماء : شدخلك تختار انت عني ؟!
عقد فراس حواجبه وهو ينتبه للشاش بيد انس : انس شفيها يدك !؟
انس بانتقام : اسماء عضتني ! طلعت دمي مو صاحية
اسماء عضت شفتها وهي تفتح عيونها تبيه يسكت ... التفت لها فراس : ليش عاضته !؟
اسماء : لأنه معط شعري !
انس : نصابه .. انتي معطتي شعري أول عشان كذا معطتك
اسماء : لانك قليل ادب وبزر !
انس : عشان غيرت القناة .. والله انتي البزر
فراس : ايه والله انتي البزر .. " ضيق عيونه فيها " ولك وجه جايه تبين دبابات وخيول وماخليتي شي
اسماء : اففف شاسوي .. والله هو يقهر
فراس : لا تسوين شي خذي لك أقرب سكين المرة الجاية واقطعي يده مره وحده !
اسماء : إلا بقطع لسانه ذالنمام !
فراس سحب اذنها : قدامي بعـد ؟! " هز اذنها بالخفيف " مافيه لا خيول ولا دبابات ولا غيره انثبري في البيت لين تسنعين
اسماء ترفعت على اطراف اصابعها من سحبه وهي تمسك يده تبي تفلته : ااااااااااااااا فراس توجع !! وش هالسخافة طالعين عشان مانسوي شي !
فراس افلت اذنها : تأسفي لاخوك ويمكن اتركك للدبابات بس
اسماء : على قطع يدي ما أتاسف له ! اصلن بدر بيركبني
فراس : يعــــني ؟ بنشوف اذا بيركبك ولا لا ..
اسماء طالعت انس بحقد : حسابك عندي ! " طالعت فراس بقهر " وبعدين هو حتى عورني ومعط شعري لازم يعني الف شاش على راسي عشان يوضح ! وفوقها قايل لي مكاني المطبخ !
فراس : اوك هاتي يدك واتركيه يعضك زي ماعضيتيه .. ثم لك اللي تبين
شهقت اسماء : تبيه يعضني ؟
فراس : العين بالعين . والبادي اظلم !
ام فراس : خلاص هالمرة عشاني اتركها .. اخر مرة تسويها
فـوق عند غادة /
كانت جالسة على سرير إبتسام تنتظرها تلبس بعد ماصحتها , انتبهت لغادة مسرحة بانعكاس المراية : غدو ؟
غادة : لبيك
إبتسام : فيك شي ؟ كانك مو على بعضك
غادة تنهدت : فراس جا ...
إبتسام : اهااا .. طيب ليش زعلانة ؟! انتي بحالك وهو بحاله
غادة : سجى موجودة .. احسها تراقب كلش واللي يقهر لو اقابله راح يفشلني انا متأكدة .. ومابي اتفشل قدامها ..
إبتسام : ماعليك منها .. وبعدين سجى هذي وش عندها حاطه نقرها بنقرك ؟
غادة : على كلام اسماء .. هي كانت تحب فراس
إبتسام : اوف ! بجد ؟
غادة تنهدت : تحبه بالطقاق جعله قدرها ماهمني تتزوجه بعد ... بس انا خلاص انقرفت منها بأي حق تجلس تحط من قدري كذا !
ابتسام : ماعليك منها عطيها طاف .. الحقران يقطع المصران
غادة : انا لاحقرت تتقطع مصاريني انا مو هم !
إبتسام وقفت : تعالي بس ننزل .. بيقولون وش هاللي تكد نوم للحين ؟
غادة : لا وداد قالت لهم انك تعبانة شوي ..
ابتسام : يوه ليش قالت لهم ..
غادة : عادي عشان يعذرونك
نـزلوا لتحت .. ابتسام : صباح الخير
: صباح النور
ميهاف : كيف ابتسام اللحين ؟ احسن ؟
وداد : ايه والله شلت همك امس
ابتسام بابتسامة عذبة : لا حمدالله ... اللحين مرة احسن
انتبهت غادة لسجى تطـالع من النافذة بحماس ... وداد همست لسجى بقهر من تصرفها : سسجى ! تعالي اجلسي
غادة انتبهت لخلفية النافذة ... فراس بنفسه ! صعد قلبها لحلقها مجرد ماشافته .. وانقهرت من هالوقحة اللي جالسة تقزقز !! مهما كان اللي بينهم لازم تحترم علاقتهم وش هذا ! مشت بجرأة ناحية النافذة وسكرت وهي تطالعها بنص عين : خلصتي قز ؟! خرقتيه بعيونك خلاص !
سجى : هييييه انتي وش دخلك تسكرينها ! وخري بس لايكون تغارين مثلا
غادة : انا اغار منك انتي ؟ وعــــوه
سجى : احترمي نفسك ! وعوه انتي يالشحاذة
ام عبدالمجيد طلعت من المطبخ : سجى ! غادة ! ياساتر شفيكن ؟ نخلص من سجى واسماء تجي سجى وغادة ماتخلصين مشاكل انتي ياسجى ؟
سجى سكتت وهي تتجاهلهم وترجع تجلس .. إبتسام اشرت لغادة بعيونها تطلع , وغادة حست شكلها بايخ صدق الكل يدري انه برا وواصل من سفر وهي جالسة ماطلعت لو أنس موجود حطته عذر بس القهر انه حتى ياسمين مو موجودة راحو يلعبون .. كرهت الوضع وهي تطـلع على كلمته : احمدي ربك امي شفعت لك .. الدبابات ويخب عليك اجل !
اسماء برجاء : طيب والخيول ؟
فراس رفع حواجبه : نكنسل الدبابات مره وحده ؟
اسماء : اففف لا لا اسفة خلاص كذا زين
تنحنحت غادة بالخفيف : احــم ..
ابتسمت ام فراس من قلب لما طلعت : هلا والله جيتي ؟!
غادة وهي تصرف عيونها عنه وتطالع ام فراس : ايه ... " التفتت لفراس اللي كان يطالعها بصمت " حمد الله على السلامة
فراس : يسلمك .. " التفت لأمه " يله انا ماشي
اسماء : مافيه امل نهائي ؟ حتى لو غادة نفسها فيها ..
فراس طالع غادة : غادة نفسها فيها ؟ جالسة تعطيني سبب ثاني عشان ارفض ؟!
غادة : شنـو ؟ شدخلني انا
اسماء : افف ماراح نركب الا الدبابات
غادة : ..............
ام فراس تنهدت : الله يستر عليك .. خلاص الدبابات تكفيكن
طلع مبـاشرة .. غادة رجعت تدخل واسماء دخلت تتحلطم : اااااااااااااااااااااااااااااااااا ! بايخ بايخ " جلست باحباط " يله دبابات واحمدوا ربكم واشكروه بعد
سجى : شدعـوة بس الدبابات ؟! غادة ليش ماتوسطتي لنا ؟!
غادة حست باستفزاز بجد .. هالبنت تستفزها : شايفتني مهبـولة .. كلمات فراس بالذات اوامر عندي
سجى طالعتها بنص عين : لا واضح ..
اسماء استلقت على الكنبه : سد نفسي الله يسد نفسه
غادة اللي دخلت كئابة نفس الشي " تعطيني سبب ثاني عشان ارفض ؟ " كشرت بقهر وهي تنثبر مكانها ..
***
أول ماطلع فراس من الفيلا .. طفى الكهرب مرة ثانية ! عقد حواجبه وهو يكلم ابو ناايف : عمي مو قلتو تصلح ؟!
ابو نايف : غريبة والله .. اليوم صحينا حصلناه ضبط .. مدري وش صار بعد ؟!
فراس بتذمر : هذي سالفة بعـد .. " طلع جواله " لحظة اكلم الصيانة ..
بدر دخل على نايف ونطق بعصبية : اسمع للثلاثة .. لو ماتصحى قفلت الغرفة واجلس هنا لليل
نايف وهو نص نايم : تسوي خير والله
بدر : يقطع جوك البايخ .. " التفت لعبدالمجيد " امش بس نشوف الخيول
دخل هو وعبدالمجيد حضيرة الخيـول ... عبدالمجيد انتبه لخيل جديد باللون الأبيض : وش هالخيل أول مرة اشوفه ؟
بدر : انا شاريه هدية للمدام
عبدالمجيد : حركــــات ! خيل مرة وحده ؟! وش رايها فيه ؟
بدر : للحين ماعطيـتها اياه .. شريته بداية زواجنا وماحصلت فرصة اعطيها للحين
عبد المجيد : ما تتزوجني ؟
بدر حامت كبده : يخسك حومت كبدي وع
طلـع بدر خيـله .. وهو يمتطيه برشاقة : اخلص يابطيء بسبقك
امتطى عبدالمجيد خيله برشاقه وهم يشقون طريقـهم للحلبة المخصوصة للخيول ..
اثنـاء ماهيثم يراقب منظر الخيـول الرايق ... فجأة دق جواله طالع المتصل عقد حواجبه ! رقم غريب ابعد عن الموجودين وهو يرد : أيـــوه ؟!
: عرفتني ؟
هيثم لقط الصوت مباشرة : سارا !
: ههه أيـوه ..
هيثم : ع بالي ميته بمكان ومحد داري عنك ! وينك يابنت الحلال ؟
سارا : موجودة .. بس صارت لي ظروف شوي
هيثم : اللي هي ؟
سارا : كلام كثيـر ..
هيثم : يابنت الحلال لا تتهربين ولا تبلين قولي زهقت منك وبس
سارا : انا اقول كذا عنك ؟ ..." تنهدت " ادري اني غايبة كل هالوقت وفجأة بكلمك اطلب خدمة بس ..
هيثم قاطعها : ايش خـدمته ؟!
سارا : انا جـــاية السعودية للرياض بكرة .. تقدر تستقبلني ؟
هيثم : ايش عنـدك بالرياض ؟
سارا : فيه حاجات لازم اخلصها .. تقدر ؟
هيثم : والسـكن ؟
سارا : بحـجز طبعا .. ابيك بس تستقبلني وأبيك تحجز لي باسمك ؟
هيثم عقد حواجبه : ماتعرفين تحجزين ؟
سارا : اعرف ... بس ابغى باسمك .. مو باسمي
هيثم : اوك انا اللحين مو فاضي .. بس اول ما افضى الليلة ان شاء الله بضبطه لك
سارا : شكــرا مره ..
هيثم : يله سلام ..
سكرت سارا وهي تتأمل الفوضى اللي هي فيها .. شكلها يرثى له بعد ما أهلكت نفسها من صبح في التنظيف حتى الصعب تنظيف السقف والنوافذ ترتيب الأسرة كان البيت يلمع ..
دخلت عليها صوفي : انت تلجأين حقا لإهلاك نفسك
سارا وهي توقف وتكمل شغلها : ربما ...
***
بعـد مارجع فراس وأبو نايف من كباين الكهرب ... نطق ابو نايف بعصبية : من هاللي شابك الكيبل غلط !! فجر الطبلون كله
فراس : مو هو الكهرب لما تصلح فجأة على قولتكم ! كان مضروب على اقوى شي واللحين ..
بدر : شالسالفة ؟!
ابو نايف : احد شابك الكهرب غلط .. وفجره
بدر : افــــا !
فراس : السؤال اللحين من هالملقوف !؟ مع اني تقريبا اعرف !
عبدالمجيد : ميـــن ؟
فراس وهو يتوجه للفيلا : من يعني راس كل المشاكل ؟!!!
أول مادخل الفيلا نادى : اسمــــاء ؟!!!
اسماء وهي جالسة داخل : جاي يكمل علي النكد يعني ...؟
فراس : اسمـــاء ؟!!!!
طلعت له بكئابة : هـلا ؟!
فراس بنبرة عادية : اليـوم الكهرب فجأة تصلح ..؟ ماتعرفين ليش ؟!
اسماء تحمست وابتسمت من قلبها : انـــا وغادة صلحناه ! "كملت بغرور " ادري انا رهيبات وشاطرات ! لاتحاول تتأسف اللحين يوم عرفت قد ايش انا مبدعة ؟!
فراس هز راسه : اها ... انتي وغادة ؟! روحي نادي غـادة معك طيب ودنا نعرف كيف صلحتوه لانه رجع يخرب ؟
اسماء صدقت دخلت بحماس : غادة ! فراس يبيك
غادة فتحت عيونها " وش يبي .. من متى وهو يبيني " : ..............
اسماء : اخلصي متحمسة اكمل فلسفتي !!
غادة : ليش ؟
اسماء وهي تسحبها من يدها : تخيلي يبون يعرفون كيف صلحنا الكهرب .. بس اصبري والله ما اعلمه لين يوافق على الدبابات والمنطاد وكلش !
طـلعت غادة وهي مب متطمنة .. حتى لو صدق هن صلحنه مستحيل يسألهن : ................
انتبهت له متسند على العـامود اشر لهن باصبعه يقربن : من ودهـا تبدا ؟!
اسماء رفعت يدها بحماس : انا انا ... بس لازم مقايضة اولا ّ!
فراس رفع حواجبه : مقايضه ؟
اسماء : ايه .. تتركنا نركب الدبابات والخيول والمنطاد وقتها نقولك كيف .. اما غيره معليش ماراح اعطيك سر الوصفة
فراس التفت لغادة : وانتي ؟! ماودك تقولين .؟
غادة كبست بعيونها : انا احس .. احس بس ان السالفة غلط !
اسماء : كيف السالفة غلط ؟!
فراس : احساسك صح .. الكبينة انفجرت واللحين تعطلت !
اسماء فتحت عيونها : تستـــهبل ؟!
فراس : السؤال هو .. من اللي معطيكن شهادة مكيانيكي عشان تشتغلن من راسكن ؟ انتن حتى شهادة سباك ماتجيبنها!
اسماء : ايه طبعا مو مقامنا !
فراس وهو ينقل بصره بينهن : انا فاهم اني متزوج كمخة بس اللي تو افهمه اني جمعت كمختين في بيت واحد !
غادة باستغراب : ......غريبة والله كنت متأكدة اني مركبته صح !
فراس : انتن بالذات فلس ثقافي ! ومصدقات بتصلحنه ؟!
ام فراس طلعت على صوته وهي تنتبه له متسند على العامود وقدامه غادة واسماء : ..... شفيكم ؟
فراس : تعالي تفرجي .. الحلوات هذول موكلات عمارهن عمـال وفجرن كبينة الكهرب !
ام فراس شهقت : انفجرت انفجرت ؟! ومتــــى ! لاتقولن امس ؟
اسماء عضت على شفتها لايزل لسان امها وتقول انهن ضاعن : ... لا لا ! اليوم فجر رحنا !
ام فراس : يعني الواحد امس عجز يحكي واليوم تروحن ... الواحد يتعب يقولكن الحكي تسمعن نصه وتفهمن ربعه وتسون عكسه بعد !
غادة : طيب آسفات .. والله ماقصدنا
فراس باستهزاء : لا انحلت المشكلة ! غادة اعتذرت ؟! خلاص اكيد الكبينة بتصلح نفسها بنفسها " طالعها بحدة " اسمعـي انتي ! " والتفت لاسماء " وانتي ! مبلغ الكبينة يندفع كامل
اسماء : ولا يهمك بقول لأخوي فراس يدفع لك .. مليونير ترا !
فراس ضرب راسها بخفه : تنكتين ووجهك ؟! بتدفعينه من جيبتك ! ريال على ريال لين تصلحينه كامل
اسماء : يوه فراس !! ماتقدر تدفعها يعني ؟
فراس : ليش ادفعها ..؟!! مو انتي اللي خربتيها يله صلحيها !
غادة : طيب انا مامعي .. مفلسة " طلعت جيوب بنطالها " من اليوم لبكرة ماحتحصل شي
فراس بحدة : النص بالنص .. انتي نص المبلغ وانتي نصه ! وامي مافيه وبدر مافيه ! " التفت لغادة " واختك مافيه !
غادة فتحت عيونها : كيف طيب ؟!
فراس رفع يديه : مالي دخل .. والله ثم والله لو يخلص هالشهر وهو ماتصلح ! بتاكلينها على راسك انتي وياها ! انا مطول بالي ترا بالنسبة للي شفته ...
اسماء : بكم طيب ؟
فراس : قولي 35 زائد 15 وزيديها 23 وعشان التختيم 7 ... كم ؟!
غادة : 80 ؟!!!
فراس : لا شاطرة تعرفين تحسبين
اسماء : وش 80 ؟!!!
فراس : الف .
اسماء : يووووه فراس واجد !
غادة بقهر : ايه صدق واجد وش دخلنا .؟ ماكنا ندري انه بيخرب يعني
فراس : تعرفون تخربون ولا تعرفون تصلحون !!! 80 الف ان شاء الله تبيعون خلقكم
غادة : متأكد ؟!
فراس : مية بالمية .
اسماء : بسوي أي شي ثاني الا فلوسي ! وش ذالقهر ادفع 80 الف وانا بنت الشمري
فراس : شوي شوي لاتقطعين نفسك يابنت الشمري !
غادة : طيب بنحاول نصلحه مرة ثانية ... يمكن يتصلح ومب لزوم ندفع مهر حشى ! " كملت بحلطمة " حتى انا ماجاني مهر كذا
فراس تكتف : عندك شكاوي ؟
غـادة ببراءة : والله واجد ..
فراس : انتي بالذات كيد الحريم اللي فيك هذا شغليه صح ودبريها !
غادة : كيدي عظيم بس عطفي اعظم مقدر .
فراس انقلبت ملامحه لقرف : .............. ايه لاحجت البقر
اسماء : انا ابي ارجع البيت ! وش هذا مافيه الا دبابات لا وفوقها ادفع ومدري شلون !
فراس اشر لها بيده : درب السلامة .. ارجعي البيت
اسماء : والله بجد فراس انك تقهر .. نبي ننبسط خربت علينا
داخل الفيلا /
سجى وهي تراقب الوضع .. واضح ان النقاش مطول وماتسمع فجأة انتهى بان اسماء تدخل معصبة متجاهلتهم وام فراس تدخل .. انقهرت وهي تشوف بس غادة اللي جلست ..
طالعها فراس بنص عين : وش عندك بعد ؟!
غادة : ابي .. ابي اكلمك بموضوع .. بس مو هنا
فراس استقام بوقفته : مو فاضي لك اللحين
قبل يروح مسكت غادة يده لا يروح .. وقف فراس وجسمه قشعر من لمستها التفت لها وهو يطالع يدها النحيلة اللي ماسكه معصم يده ... طالعته غادة برجاء : لو سمحت .
فراس وعينه بعينهـا ... مسك يدها اللي ماسكه يده بيده الثانية وسحبها من يده بخفه ونطق بهدوء : لا تلمسيني .. نهائي , سامعة ؟
غادة بلعت ريقها من اثر مسكته ليدها .. حست فعلا بجفاف حتى بلمسته حضنت يدها بيدها الثانية وهي منزلة عيونها : الموضوع ضروري . . . راح تقولي اللحين مو فاضي .. وبالبيت ماراح تجلس .. وبالأخير بتسافر ماقلت لك شي ..
فراس طالعتها لفترة .. واضح على عيونها منكسرة : رنيم جت امس .. جالس أنتظرك ترجعين تشتكين ؟ ماراح تسكن في بيتي ... فانسي الموضوع
غادة : ليش طيب ؟! انا مو عايشة مع أحد .. لا انت ولا أهلك .. ابي احس احد معي
فراس طالع بحدة جهة النافذة .. قمطت سجى وهي تسكر الستارة : يمة أنتبه لي !
رجع فراس يطالع غادة لما تسكرت الستارة .. كانت منزلة راسها ماتقدر تتكلم وهي تطالعه , وضامه يدها بيدها الثانية وواضح ضاغطة على شفتها : عشان ماترجعين تعورين راسي كل فترة بهالسالفة ... راح اقولها لك مرة وحده وافهميها رنيم ماراح تسكن ببيتي
غادة رفعت راسها بقهر : انا ماراح انحرم من بنتي طول عمري .. ماراح تسكن ببيتك اجل انا مابي بيتك بعد !
فراس : حتى بيتي وأهله مايبغونك ! " كمل بعصبية " تجلسين تحسسيني انك متعذبه معنا وحنا ميتين عليك .؟! لولا الظروف ماكان لك مكان عندي " كمل بحدة " صدقيني انا كاره وجودك بحياتي اكثر من الكل ! مو من زينك ولا زين اخلاقك اتعلق فيك !
غادة : لا طال عمرك ! انا اللي ميته عليك انا اللي خاطبتك اساسا وساحبتك تعيش معي
فراس رفع حواجبه وهو ينتبه لنظراتها المحتده فيه .. خطى خطوتين لقدام .. غادة تراجعت مباشرة بخوف : شنو !
لما قابل ظهرها الجدار .. وقف قدامها مباشرة وهو يسند يده على الجدار : ايه أنتي اللي خاطبتني .. ولا نسيتي ؟!
غادة بقهر وضيق من قربه وريحته الرجوليه تلفح خشمها : بأحلامك بس !
فراس : مالك مكان بواقعي عشان يكون لك بأحلامي .. استوعبي هالشي
نزل يـده من الجدار وهو يعطيها ظهره .. قبل يطلع : موضوع رنيم لعد يتكرر .
وطـلع مباشرة .. اول ماطلع انتبهت لجسمها يرجف من القهر , ارخت جسمها على الجدار وهي تعض على شفتها .. ماقدرت ترجع تدخل نزلت درج مقدمة الفيلا وراحت تمشي تدور مكان تنعزل فيه .. تحس بوهن فضيع عقب مايكلمها .. دفنت راسها بين ركبها .. وهي تكرهه بداخلها زود تكره رقابته عليها .. تكره كلامه لها .. لما كانت محبوسة عنده بطرابلس كانت اكرم من اللحين ..
أول مارجع فراس .. كان الكل مشغول بالسوالف ماعدا نايف اللي تو صاحي وجالس يفطر ..
نايف : اوه انت هنا .. حمدالله على السلامة
فراس وهو يجلس : يسلمك .
ابو نايف : عرفت من اللي خربها ؟
فراس : ايه عرفت .. وراح يصلحها بنفسه فلحد يلمسها !
ابو نايف : من ؟!
فراس : اللي هو ..
نايف : لايكون ركبتوا الخيول وانا نايم ؟
بدر : اييييييييييييه .. بنحتريك مثلا !؟
نايف : ياشينك ياكلب ... تصدق امس لما رجعت للرياض كان بنركبها بس اجلناها عشانك ! كانك كفو ؟
عبدالمجيد : ايه نايف شفت الخيل اللي شفنا امس ولا عرفنا لمين ! طلع لاختك هدية من الرومانسي هذا
نايف رفع حواجبه : اخسس اخسس ... والله وعرفنا نناسب !
بدر : ايه معـلوم عرفتوا .. عكس هيثم سبحان الله
نايف : ترا اخوك معي هاه !
بدر : حتى اخوي !
هيثم : لا والله والنعم فيهم كلهم ... حاصل لنا حنا ؟
نايف : صح لسانه ! خلك انت بس ترا ابوي كل ماقابلته حش فيك يانسيب الفلس
ابو نايف : حسبة ولدي ولا ماعليه خلاف
نايف : عموما ترا هالخيل كان بشتريه اخر مرة .. بس حصلت واحد احسن
بدر : بكم ؟!
نايف : اغلى من حقي اللي مات اول
ابو نايف : ايييه بالخيول بتقط فلوسك ! ويوم طلبك ولدك كم ريال عييت
نايف : إنا لله ... الله يخليك له يبه جعله مايحتاج لي
ابو نايف بقوة : آمين ! مدري كيف صرت ابو انت !
نايف : اشرح لك يعني ؟!
بدر : هههههههههههههههههههههههههههههههههه ! نايف انقلع قبل تتكفخ
عبدالمجيد : هههههههههههههههههه وصخ
لؤي حبس ضحكته احتراما لأبوه اللي معصب ... لكن بالأخير الكل ماقاوم ..
ابو نايف هز راسه بيأس : انا مدري للحين ليش اناقشك !
نايف : اندري عنك
***
اسمـاء اللي كانت تتمشى بالحديقة لحالها تتنفس شوي عقب فراس .. وبنفس الوقت تدور غادة اللي من طلعت مارجعت .. تنهدت بضيق : اكيد كمل عليها بعد .." طالعت ساعتها " مابقى شي على مانرجع ولاركبنا دبابات ولا شي ! اففف .. وش هالزيارة المقرفة
اثناء مشيها أنتبهت لهيثم ينسحب من جلسة الرجاجيل وباذنه جواله .. واضح المكالمة مهمة جالس يبتعد عضت على شفتها بقهر وهي تطالعه : .................
تجاهلته وهي تكمل مشيهــا .... بالأخير تراجعت وهي تحاول تعرف وجهته .. مشت ببطئ وراه ناحية الحدايق اللي دخلها ... وقفت بخطوتها وهي تحاول تتراجع .. لازم ترجع وش تلحقه له ؟!
: شايفك ترا ..
انتبهت له يطالعها وهو يسكر السماعة : .. لوين كنتي ناوية تلحقيني ؟!
اسماء برد اعتبار : حديقتنا ! انت اللي جاي مو انا
هيثم : يعجبني كبريائك اللي يمنعك تحاكيني بس يجبرك تراقبيني من بعيد .. " تغيرت نظرته " حاس عليك من قمت من الجلسة .. ماراح تكوني اسماء اذا مالحقتيني
اسماء : اها حاس علي ؟ عشان كذا جيت مكان مافيه احد ؟! يمكن كبريائك هو اللي يخليك تراقبني مو انا
هيثم ضغط على نفسه ورمى السؤال بصعوبة : الفترة اللي راحت .. ماصرتي تجين المستشفى ..
اسماء استغربت كلامه .. نطقت بقهر : صدق انك غريب .. وقت اجي ترمي كلامك علي وتتوقعني ارجع اجيك ؟!
هيثم : لأن اللي يحبك بيجيك مهما كان ! " كمل ببرود " عشان تفهميني وقت اقولك انك تخدعين نفسك
اسماء : بالله كيف تقول كذا ؟ بس معك حق هذا مو حب .. هذا مرض انك توجعني بس مازلت أبيك .. هذا اكيد مو حب
هيثم : الفرق اللي بيني وبينك اني صح شفاف ساعات واحيان قاسي وعنيد ومزاجي بس ماعمري كنت منافق .. ولا زورت نفسي ولا مرة....... كنت أنا !
اسماء : انا المزورة يعـني ؟ انت ماكنت قاسي ولا عنيد لا .. انت كنت كارثي بالنسبه لي احسك موجود بس عشان تتفنن في كسر صبري ..
هيثم : وتقنعيني انك تحبيني عقب كل هذا ؟!
اسماء عضت شفتها ونطقت بقهر : ايه .. لو عندي دليل واحد عليك .. كان ماتراجعت لحظة ..
بعد فترة صمت وحرب نظرات بين الإثنين .. عين تواجه صعوبه في التعبير وعين تواجه صعوبة بالتفسير هيثم شد على قبضته : ...... تبغيني ؟!
اسماء فتحت عيونها مب مستوعبة : ...............
هيثم : متأكدة بتتحملين هالشي ؟
اسماء ماستوعبت كلامه للحين : ........... اذا جاوبت ؟! راح تصدقني ؟
هيثم : ... انا اصدق افعال مو كلام ..
اسماء : ........... اذا انت ماتعرف الجواب عقب كل هذا .. اجل انا شكنت جالسة اسوي كل هالوقت ؟!
هيثم دخل يدينه بجيب بنطلونه : عطيني دليل .. دليل مقدر اكذبه حتى لو اجتهدت ! وانا مجتهد مثل ماتعرفين
اسماء بقهر : تدري انك تضحك ؟! تجلس تتكلم وكأنك ضحية هالعلاقة ! " عضت على شفتها " انا اللي لازم تعتذر لها وتثبت لها ! لا تجلس تجيني باسلوب ملتوي .. ماعدت اتحمل هالأسلوب ! ماراح اعطيك دليل ... ولا راح اعطيك شي .. " كملت بقوة " انا احبك هيثم ! وانت تعرف هالشي .... اللي لازم نعرفه اللحين هو انت ! ولا انا .." كملت بغصة " ماراح اجتهد عقب اليوم .. ليش اجتهد ؟! عشان تقولي كذابه ومنافقة !! شكرا يكفيني اللي وصل منك للحين !
ضربت رجلها بالارض وهي تعطيه ظهرها .. وقبل تكمل طريقها التفتت : ولعاد تطردني من سيارتك ! مو من زينها !
وكملت طريقها .... هيثم : ........................................................؟
تردد على اذنه لهجتها الحادة " انا احبك هيثم ! وانت تعرف هالشي .. ماراح اعطيك دليل " : معناها ... انا اسف مقدر اساعدك ..
اسمـاء /
ضربت خدودها وهي تعدل نفسها وتدخل الفيلا .. حصلت غادة طالعة من مؤخرة الحوش : غادة ! انتي هنا ؟
غادة : ايه .. ليش ؟
اسماء : لا بس كنت جالسة ادورك ..
غادة : موجودة ..
اسماء : تعالي بس ندخل .. الرحله هذي كلها على بعض زي وجيهم
دخـلوا داخل ... نطقت ام فراس : وينكن تاخرتن
جلست كل وحده باحباط دون كلام .. اسماء وهي جالسة جمب غادة اسندت راسها على كتفها : متى بنرجع البيت ؟
ام فراس : طفشتي عقب كل هالمشاكل ؟
اسماء : ايه والله انبطت تسبدي خلاص ... غـادة ؟!
غادة : همم
اسماء : ريحتك ريحة فراس !
غادة فتحت عيونها : شنو ؟
اسماء : ايه والله .. " شمت " ريحـته واضحه بجد
ميهاف : اووووه امداكم !
وداد : هههههههههههههههه ماعندهم صبر معاريس !
سجى كانت تطالع غادة اللي انحرجت وهي تشم ريحة بلوزتها ... بغى ياكلها من شوي طبيعي تلزق ريحته نطقت بانحراج : والله مو عارفه كيف ..
ميهاف : مو عارفة ؟!! كلش يالبريئة
ام فراس : خلاص لاتحرجون البنت !
دق جـوال ابتسام ردت مباشرة : هلا ؟! اوك تمام
وقفت وهي تلبس عبايتها : يعطيك العافية ام فراس على هالطلعة الحلوة انبسطنا بجد
ام فراس : بدري ! بتروحين من اللحين ؟
ابتسام : ايه خلاص نبغى نمشي قبل تغيب الشمس ... يله سلام
طـلعت إبتسام .... وعقبها أم عبد المجيد وبناتها ..وأم نايف .. دخل عقبها بدر : احم احـــم .... ميهاف ؟!
ميهاف : جاية !
سلمت على البنات وهي تطـلع ... ركبت السيارة دون تعليق : ...............
بدر وجه سيارته ناحية الإسطبلات ... وقف وهو يقولها : انزلي بوريك حاجة
ميهاف تكتفت : مابي مالي خلق اشوف شي .. خل نرجع البيت وبس !
بدر : انزلي وصدقيني ماراح تندمين !
ميهاف : آففف ! مابي ... شنو لعبة هي تمسح بكرامتي الأرض امس واليوم الحقك !
بدر رفع حواجبه .. ورجع يركب : انا المهبول اصلن اللي مفكر فيك ! كويس مانزلتي
ميهاف : أيـوه هذا انت تغلط .. وتجي تتكلم طبيعي ومفروض اسايرك ! لا حبيبي اذا ماتحب تعتذر لاتغلط من البداية !
بدر : خلاص انبلمي ! لا اعتذر ولا غيـره ... معليش ميهاف بس احيان استخسر اهتمامي فيك
ميهاف : شعور متبادل ...
بدر طالعها بنص عيـن ... وعقبها طلع سماعاته من الدرج وهو يشبكها باشارة لانهاء النقاش : ...
***
بعد مغادرة الكل .. دخل فراس ووهو ينتبه لهم جالسين بعباياتهم يستعـدون للرحيل : جاهزين .؟!
ام فراس : ايه
فراس : اجل مشينا
تراكض انس وياسمين للسيارة ... اما غادة واسماء كانو يسحبون رجليهن
بالسيارة ... اسماء بتذمر : اول مرة اكره رحلة زيه المرة ياساتر وش هالطفش ..
ام فراس : لا والله انبسطنا .. خلك اجتماعية وشوفي العالم وانبسطي
اسماء : من زين هالمجتمع عشان اصير اجتماعيه
فراس : الله يريحك اجل ... اقعدي بالبيت وبس
اسماء : امنيتك عاد !
فراس : لا والله شدعـوة ؟! بس مافيه داعي يجتهد احد يطلعك دام مافيه شي عاجبك .. ارتاحي بالبيت وبس
انس بتأييد : ايه والله
اسماء التفتت لانس بعصبية : طولك طول ساقي وجالس تنصحني !! هش بس
التفتت اسماء لغادة حصلتها مسندة راسها على النافذة وغاطة بنومة عميقة .. تسندت بعد هي لحد مانامت صاحيات من فجر ومن صحن وهن من سالفة لسالفة ..
أول ماوصـلوا كان الكل نايم تقريبا .. ام فراس : كلهم ناموا واضح تعبانين
فراس ضرب البوري حتى فزوا كلهم .. : وصلنا انزلوا
اسماء : انفجر راسي من البوري وش ذا !
سحب الكل رجله وهو يتـوجه لمكان نومه .. اسماء مجرد مادخلت غرفتها .. حست نفسها مرتاحة وبنفس الوقت قلقة .. قدرت تعبر عن اللي داخلها اخيرا .. بس مو مرتاحة لنتيجة فضفضتها .. لبست بجامتها وهي تسحب حرف الأتش وتضمه وتفكيرها ياخذها ويوديها .. استوعب كلامي ؟ ولا للحين متسـاهل ويحسبني العب ولا ...؟ وفكرة تودي وتجيب حتى غطت بنومـــتها
***
صبــاح ... بالمطـار ينقل بصره ينتظر مسافره يوصل . لما انتبه لها وقف وهو يستقبلها : حمدالله على السلامة ! والله وتغيرتي
سارا : ههههههههه بجد ؟! ايه معلوم بتغير كم لنا عن بعض 3 سنين ؟
هيثم سحب شنطتها : يله السيارة برا
ركبوا وسارا تراقب ممرات الرياض وبداخلها خوف من اللي راح يصير : ................
هيثم : صاير شي ؟! احس جيتك للرياض مو لله
سارا : لا مافيه شي .. شدعوه تقول كذا ؟
هيثم هز كتفه : إحساس
سارا : لا تشيل هم .. مشاكل بسيطة وبتنحل
هيثم : عموما بأي وقت ابيك تعرفين اني موجود متى ما احتجتيني .. دوريني مباشرة وقت تحتاجين كتف تسندين عليه , راح اكون لك هالشخص
سارا ابتسمت : مشكور هيثم ... بجد وحشتني
هيثم : نصابة لو واحشك ماجلستي سنتين مانعرف عنك " تذكر " اييه على فكرة !! انتي كنتي تشتغلين بشركة فراس ؟ ترا قبل فترة كلمني لؤي ولد عمه وقالي انه يبغى يتواصل معك ضروري بس وقتها ماكنت اعرف وين ارضك من سماك
سارا : ولا تقول له انك حصلتني !
هيثم استغرب : ليش ؟
سارا بربكة : لا بس .. اكيد بيصرون علي اشتغل وانا خلاص كرهت الوظيفة عندهم
هيثم : .... اهـا
سارا : انت كيفك ؟ وكيف حياتك .؟
هيثم : ولا شي ... نفسها
سارا : ماتزوجت .؟
هيثم : لا والله فكرة تودي وفكرة تجيب ولا أدري وش التالية
سارا : اخس صرت تفكر في هالموضوع يعني !
هيثم : كم عمري .. خلاص طبيعي افكر فيه
سارا : الله يوفقك ويسعدك مع اللي ترضيك يارب
وصــل هيثم عـند الشقة اللي استاجرتها : يله مفروض اعزمك ع فنجال قهوة شي بس مشغول .. بعدين ان شاء الله
سارا نـزلت : يله بــاي
مجرد ماغادرت سيارة هيثم ... وقفت لفترة ثم رفعت يدها من جديد توقف لها تاكسي .. وترجع تركب
***
فـراس كان جالس بالبيت .. ولؤي في زيارته /
فراس بصدمة : إيش ؟!
لؤي : شفيك ؟ قلت بقول لواحد اعرفه بالسفارات سالفتي .. عشان يقدر يدخلها السعودية دون يعرف ابوي ثم احطه قدام الأمر الواقع
فراس : وعلى أي اساس بتقول لهذا اللي بالسفارات ؟ بيقول لابوك على طول
لؤي : انا واثق فيه فوق اني بعطيه مبلغ يسكته
فراس : وابوك بيعطيه مبلغ ينطقه ..
لؤي : ايه بس انا واثق بالرجال من زمان اعرفه .. بيساعدني يعني
فراس : انت واثق فيه وهو واثق في ذاك وذاك يثق بالثاني .. وسلم لي على سرك !
لؤي تنهد بضيق : خلني متفائل ... احسن
فراس : اللحين هي كارشتك ماتبيك ... وقت تتعدل قرر
لؤي طالعه بنص عين : هذا انت عايش مع وحده ماتبيك .. وقفت علي ؟
فراس : عايش مو أحب ! فرق لو سمحت ..ومو عايش كمان أتعايش
لؤي : اللي هو .. " تنهد " انا كمان ما أحب انا اعشق .. فرق لو سمحت
فراس : شالفرق ! كلها بلا
لؤي : الفرق انه اذا كنت تقدر تنام .. منت عاشق , واذا اللقمة ماتوقف بنص حلقك منت عاشق .. ملخص الكلام دامك أنت هو أنت منت عاشق
فراس طالعه بنص عين : احلف ؟
لؤي : اقول .. انا بروح البيت يخسك انت واللي جالس معك .
فراس : الله معـك صدعت بي بخرابيطك
لؤي ابتسم : ماودك تجي معي ؟ نوقف بمحل شي ؟
فراس بتعابير الكسل على وجهه : لايخي والله عجزان مالي خلق اطلع
لؤي : يله ... اشوفك على خير
دخـل فراس البيت .. كان ام فراس جالسة مع ياسمين وأنس : راح لؤي ؟
فراس وهو يسترخي على الكنبة : أيـه راح
ام فراس : الله يستر عليه
فراس طالع الساعة تشير لـ 9 .. : بكرة دوامات " طالع ياسمين وانس " شتسون سريرك انتي وياه
انس : لحظة بس هاللعبة وأقوم
ياسمين : لاراح أنس رحت ..
فراس : لكم دقيقة قبل افصل التلفزيون ولعد تشوفونه
استسلم انس وهو يسكر القيم .. صعد : تصبحون على خير
ام فراس : وانت من اهله .. " تنهدت " يازينها الدوامات بنرجع ننتظم
فراس : اسماء وين ؟ لاتصدموني وتقولون نايمة من اللحين
ام فراس : مدري وينها هالبنت اصلن مو بعادتها تداوم أول يوم ..
: الزين على طاريه
ام فراس : هلا .؟!
اسماء كان حاطه قبعة على شعـــرها .. فكته وهي تنفح بشعرها بطريقة مغرية : تاااااااااااااااداااا
شهقت ام فراس .. اما فراس طارت عيـونه من المنظر : ................
كان شعرهـا بلون الكحلي مدرجه ا طرافه بكحلي أفتح ... وقاصته فيكتوريا قصير مـرة .. وناكشته بشكل جميل وشبابي ... حطت روج أحمر تكمل جمـال شعرها اللي ماراح يفهمه لا أم فراس .. ولا فراس !
فراس : كأن احد غاسل شعرك بكلوركس !
ام فراس : وش هـــذا ؟! متى رحتي للمشغل اليـــوم
اسماء هزت كتوفها : مارحت ... غادة ما شاء الله كأنها مشغل " جلست تهز راسها بحماس " هي قصته لي وصبغته
أم فراس : وينهـا ؟ الله يهديها وش هاللون وش هالقصة
اسماء : والله ياماما حلـــو ... انتظري اداوم بكرة بينجنون كلهم عليه
فراس هز راسه : انشهد ان العقل نعمة .. لا ولا الثانية لاعبة عليك لو هو حلو صدق حطته براسها بس ماخذتك مصخرة يالهبله
اسماء بلكنة غـادة الجداوية اللي تستعملها باوقات نادرة : غدوشتي فاهمــا بالدوق .. إنتا ماتفهم خليك باركينق لو سمحت
فراس بقرف : تكلمي زي العـالم .. يكفي الزفته اللي فوق وانتي خليك امعه وش ماتقول اجري وراها
اسماء : ههههههههههههههههههه
ام فراس : وينها غادة عـاد ؟
اسماء : فـوق
ام فراس : شتسوي فوق كان نزلت معك ؟
اسماء : يوم سمعت صوت فراس تحت عيت .. شاسوي اذا ولدكم مسوي لها بعبع
ام فراس هزت راسها : والله هالصبغة مب زينة يا أمك .. غيريها احسن لك
اسماء : ترا جـويل براسها بتموت قهر لو تشوف صبغتي عشان تفهمون بالذوق بس
ام فراس : احلفي عاد .. مستانسة ان هاليهودية بيعجبها شعرك
اسماء : ما أحلف على امور سخيفة .. وبعدين انتي سببتوا لي يأس من الحياة عقب أمس فصرت احتاج تجديد
فراس : انتي يأستي من الحياة ؟ انتي خليتي الحياة تيأس منك
أسماء : يله خلاص انتهى الشــو .. بصعـد خلاص
ام فراس : بتداومين بكرة ؟
اسماء : ايه بـداوم .. لاتنسين تصحيني
صعـدت اسماء حصلت غادة على راس الدرج : سمعتي ؟
غادة : القط كلمة وتفوتني كلمة .. بس كنت متوقعة مايعجبهم
اسماء : ماعليك فيهـم .. انا عاجبني وهذا أهم شي ! بصراحة يجنن مبدعه
غادة : ههههههههههههههه هوايتي من وانا بزر .. بس ابتسام ماتحب تغير بشعرها ماتعطيني وجه ماصدقت احصل احد يعطيني وجه
اسماء : تسلمي والله جميل ... يله انا بروح انام تصبحي على خير
غادة : وانتي من أهله
انتبهت غادة لخطوات أول الدرج ركضت مسرعة تصعد .. آخر شي تتمـناه تشوفه ! صعدت وهي تستلقي قدام التلفزيون صاير شغلتها هالأفلام ..
عـند فراس /
بنــص نومة ..انعقدت حواجبه بألم بنص نومة .. زاد انعقاد حواجبه والعرق ينصب من راسه ... ! فتح عيونه بضيق وهو يحس حلقة جـاف .. مسك مكان رصاصته .. " عقد حواجبه بألم وهو يرفع بلوزته " الجرح يطلع صديد .. عض على شفته هذي فايـدة الإهمـال ...
فتح درجه وهو يبلع حبتين ورا بعض دون مويـة ... بس مافيه فايدة يحس نفسه جسم بارد جدا مرمي في مقلاه حاره .. فتح باب بلكونته وهو يطلع يحس جو الغرفة مكتومة ... مسكه سعـال دون انفصال .. لكم مكان رصاصته يبغى الألم يسكن مافيه فايدة ..
البلكونة اللي فوق بلكونته مباشرة ... بلكونة شقته , غادة اللي دخلت غرفة النوم بعد ماداعبها النوم بنص الفلم .. لبست بجامتها وهي تستعد تنـام .. توجهت للبلكونة اللي تعودت تتركها مفتوحه وتنام عشان يتجدد هواء الغرفة .. اول مافتحتها انتبهت لسعلات متتالية .. عقدت حواجبها باستنكار للصوت .. خطت برا البلكونة وهي تتبع مصدر الصوت .. نزلت عيونها للبلكونة اللي تحتها .. انتبهت له ببنطـال البجامة ودون حاجه تغطي صدره .. فتحت عيونها بعدم تصديق للجرحين بصدره . . والثاني نازل تحت بمعدته .. فيه جرح متشكل على شكل ندبه قديم .. بس الثاني هو اللي يخوف واضح ملتهب ... : ............
كان مرخي جسمه على البلكونة وهو يسحب سيجارته ويوقف بنصها من نوبة السعال .. ماسك فمه يحاول يسيطر على هالسعال اللي مايوقف : اخخخ
قبضهـا قلبها وهي تشوفه بهالهيئة .. معقولة فيه هالجرحين ويتصرف طول اليوم كأن مافيه شي .. الجرح اللي بصدره هذا الرصاصة .. اللي تحته شنو ؟! " ظلت تتأمله " كلام كثير صار بطرابلس يوضح ان هالرجال وراه قصـه .. بس ليش مايتهشم ؟ ليش مايون ؟! " عضت على شفتها حتى ادمت " دخلت داخل وهي تسحب شـال طويل اورانج من درجها .. ثم راحت للمطبخ وهي تطلع مويـة بدرجة حرارة الغرفة .. واخذت سطل مويـة معه منشفة نطقت بقهر من نفسها : ولو انك ماتستاهل ..
فــراس /
اثناء ماهو جالس يعاني .. ويحاول يلتقط انفاسه .. عقد حواجبه من الشال اللي نازل ومربوط فيه قنينة موية رفع راسه لفوق ماشافها .. مجرد الشال نازل هزت الشال بمعنى " استلم " مد يده وهو يفك الشال من الموية .. وللحين متعجب اكيد شافته .. تافف وهو يلعن مكان البلكونة البايخ .. شافته بهالوضع البايخ .. سحب قنينة الموية وهو بيدخل لكن وقف لما انتبه للشال ينزل مرة ثانية ومعاه سطل موية بمنشفة : ..............................
تراجع عن الدخـول وفك الشال وهو يسحب السطل .. وبكل مرة يرفع راسه مايشوفها .. اكيد ماتبيه يشوفها : ...
غـادة فوق كانت جالسة عشان مايشوفها .. وماتلقط الا يده المرسومة بالعروق .. وهي تفك الشـال .. جلست تفكر وش ممكن ترسل بعد , انتبهت لسلة ملابسه اللي مازالت ام فراس مصرة تصعده .. سحبت منها بلوزة ثقيلة وربطتها بشالها مع ورقة .. ونزلته مرة ثانية استلمهـا وهو يقرا " تدفى كويس واترك الوجع يحرق بصدرك ونام " .. شهقت غادة وقت انفلت شالها من يدها .. مسكه فراس لايطيح ... عقبها سمع باب البلكونة يتسكر : ................
ابتسم بخفة وهو يقرا الورقة مرة ثانية .. : وانا تاركه يحرق بصدر غيري ؟ بس لازم تردها يعني البزر ..
لبس البلوزة مبـاشرة .. رغم ان ريحتها موجودة فيها ماعارض .. وهو يدخل ويرمي شالها على كنبته ويحس تنفسه رجع ينتظم بعد الهواء النظيف ..
***
ابو نايف بساعات متأخرة من الليل مازال بمكتبه ... دخل سكرتيره : عند زايره
ابو نايف: بهالساعة ؟ مين ؟ ام يزيد ؟
السكرتير : لا تقول اسمها سارا .. وتبيك ضروري
ابو نايف لقط الأسم مباشرة نطق بعصبية : اتركها تدخل !!
بعد فترة دخلت المكتب .. وهي مخبية وجهها لأول مرة بالطرحة .. لانها تخاف وجوده ويلقطها مباشرة : ....
ابو نايف وهو يحكم اعصابه : وش جاية هنا تسوين !!
سارا : السلام عليكم ... ابو لؤي ؟
ابو نايف بغضب : ايه !
سارا تنهدت : جاية اساعـدك ... واساعد نفسي ..

أيوه كده يا أسماء أخيرا
واجهته صح ورمت الكرة بملعبه
سجى غتيتة ومعندهاش دم ولا كرامة ، برغم ان غادة معملتلهاش حاجة
يلا خليها تاكل نفسها
حلو مشهد الشال ، رومانسي رغم ان احد طرفيه فراس
وده اللي انا باقوله ، ان غادة عندها رحمة وانسانية
نهاية الفصل مثيرة، سارا تقتحم على ابو لؤي
يا خوفي لتكون جاية تقوله خلي ابنك يبعد عني ههههه
كويس انك قريتي الردود ، خصوصا اني تعبت وانا باقطع في فروة فراس