فراس كل مدى ما بيزيد رصيد سيئاته بالرواية
ياريتها مارجعت الورقة
لا وكمان كانت زعلانه عليه
ايه حكايته ده يحرم العيال من أهاليها ، أعوذ بالله
هيثم يعنى النهاردة بني آدم شوي
بس بعد ما أسماء قررت تشيله من دماغها
لؤي وجع القلب كله ، اتمنى بس يتلحلح شوي
يالله بانتظار الأحداث وبالتوفيق ان شاء الله

قمــــــــــة الإحباط اني راح اضطر انزل تشابتر ومافيه غير رد واحد من ضمن مشاهدات تعتبر لا بأس بها ,
ردودكم هي دعـمي الوحيد فاتمنى محد يبخل فيها ")

" الفصل الثالث والثلاثين "
- ذآت مســاء
أخبرني أنه أحب " إبتسامتي "
فـ أخذها , ورحل .. !!
: هيــــثم .؟! هيثم !!
مستمـر بطريقة دون يلتفت عليها : ........
نزلت دمـوعها وهي تركض وتحـاول توقفه : هيثم !
اخيرا .. التفت بنظرته المشؤومة : شتبغين .؟! مو استسلمتي .؟ روحي بطريقك اجل وش تبغي فيني ؟
: لا أنت فاهم غلط انا ابيك !
نظرة احتقار : لا واضح .. " احتدت نظرته " تغيرتي منتي على خبري
" اســــــــــــــــــــمااااء "
كبست بعيونها وهي تصحى من نومها ... مسكت صدرها بضيق وهي تتنهد : حتى بالنوم ما ارتاح .؟!
ضمت وسادتها لصدرها وهي تعتصر ألم : انت فاهم غلط ..
أنفتح الباب ودخلت ياسمين : اسماء !
اسماء وهي دافنه راسها بوسادتها : وش ؟!
ياسمين : انزلي امي تبغاك ! بدر وميهاف عندنا
اسماء : جايـــه ..
اول ماطلعت ياسمين رفعت راسها وهي تطالع نفسها بمرايتها ... شحوبها زايد صحتها متعبه هالفترة .. نزلت من سريرها وهي تدخل الحمام تغسل وجهها وتضبط شكلها .. نزلت وهي تسمع اصوات الضحك والسوالف من تحت وصلت وهي تشـوف بدر وميهاف جمب بعض بالصالة ويضحكون .. وامها وياسمين وانس , وواضح على ميهاف حيوية العروسة بشكلها وضحكتها
رفع بدر عيونه لأسماء اللي نزلت : هلااا والله .. صـح النوم ! بغيت اصعد لك لو مانزلتي
ميهاف : هلا والله وينك يادجاجة كل هذا نوم .؟!
اسماء دون نفس وهي تجلس : وانتو شتحسون به ترا عندكم بيت وش جايبكم .؟!
بدر : عندنا بيوت ابشرك مب بيت
ام فراس : اييه والله صادق .. هذا بيته بعد !
اسماء وهي ماتبي تطالعهم حتى .. طاقة الحياة الزوجية حقتهم تكئبها : وبتفطرون هنا ؟!
ميهاف : والله حبيبتي عشان ماتقولين زلابه وماوراي سالفة ... بدر هو اللي مارضى الا يفطر معكم اليوم
ام فراس : حياكم الله والله بتنورون ... عاد اليوم فراس معزوم زين جيـــتو توسعون صدورنا
ميهاف : إلا اقولك اسوم .. شفتي المعرض الصيفي حق الجامعة .؟!
اسماء : لا وش هذا بعد ؟!
ميهاف : معرض فنون .. امس اشوف المسؤولة تراسلني تبغاني اداوم معاهم
اسماء : وبتداومين .؟!
ميهاف : هو المعرض 4 ايام بس ... فانا اقول وش خسرانة اساسا تعرفيني اموت على هالشغلات , بس قلت اذا حمستيني نروح سوا .؟!
اسماء : لا ماراح احمسك ولاترجيـــن مني شي .. انا زين فيني اصحى من النوم اصلن , ورمضان من اللي له خلق يداوم
ميهاف : ايه بس مايعتبر دوام ... يعني احس سعة صدر اكثر
بدر : ميهـاف .؟!
ميهاف التفتت له : لبيك
بدر : جاية تناقشين اسوم تروحين ولا لا وانا أول مرة اسمع بالسالفة .؟!
ميهاف : هذا انت موجود تسمع ..
بدر : لا اقنعتيني ... روحي عيشي مع اسوم اجل
اسماء تقهره : خلها تعيش عندي لبى قلبها .. احسن من العيشة عندك صدقني
بدر وهو يطالع ميهاف : اوك موافق اجلسي مع اسوم يله .. " التفت لاسوم " وانتي وش لبى قلبها .؟!
اسماء : وش وش لبى قلبها .؟! احبها واقول لبى قلبها
بدر : ما أحب اللي يحبون اللي احبها .. فلبقي على جمب
أسماء : بالله يعني تكره كل اللي يحبونها .؟! شالمفروض نسوي نكرهها عشان تستانس حضرتك
بدر وهو يلتفت لميهاف بنظره لها معنى : ايه ما امانع اساسا انا لو بيدي .. اصنع قلبها من جديد بدون ماضي ولا أصحاب ولا غيره اصير وحيد قلبها والسلام
وردت خـدود ميهاف وهي مو عارفه شترد حتى : ................
ام فراس : هههههههههههههههههههه هاه ياميهاف موافقة .؟!
ميهاف : وهـو موافقتي تفرق شي .؟!
أسمـاء وقفت : ماما انا بروح اشرف على الفطور
ام فراس : جعـــله أول !
ميهاف : هاه شـنو اسوم .. ماراح تروحين معـاي يعني .؟!
اسماء بكئابة : لا ميهاف نهائي نهائي مالي مزاج
أول ماطلعت اسماء همس بدر لميهاف : حياتي روحي الحقيها شوفي شفيها ..
ميهـاف : من عيـوني
طلعت ميهاف لأسماء بالمطبخ .. حصلتها جالسة على الكرسي ومسندة راسها على يدها وشاردة قربت منها بخفة ونغزت خصرها : بـــــــو !
التفتت لها بكسل : وش جابك .؟! روحي ارتاحي
ميهاف وهي توقف قدامها : جيت اساعــدك ع بالي بجد عندك شغل ! طلع ماوراك سالفة تعالي اجلسي معنا
اسماء : انتظر السواق يجيب الأغراض وببدا اشتغل
ميهاف : وانتي من متى تشتغلين وتطبخين اساسا .؟!
اسماء بنرفزة : اففففففففففففف ميهاف ! من اليوم
ميهاف : واو اوكيه هدي شوي ليش معصبة كذا .؟
اسماء : مو معصبة بس بجد تو صاحية ووراي شغل ! وانتي شغاله لي اسألة من متى تطبخي وليش تسوي !
ميهاف عقدت حواجبها وهي تمسك كتفها : اسوم فيك شي .؟ لما قالي بدر ان لك فترة مو طبيعية ماصدقته .. بس اللحين بجد ايش فيك ؟ صاير معك شي .؟! منتي على خبري
اسماء انعصرت .. قالت بهمس تكلم فيه نفسها : هو كمان قالي هالكلمة بالحلم
ميهاف : شــنو .؟!
اسمـاء نزلت راسها دون تعلق : ......................
ميهاف : اسوم انا ملاحظة من فترة زواجي بس ماحصل لي وقت اقولك ... متغيرة مرة منتي اسوم اللي اعرفها وحتى اذا انبسطتي يوم بالغلط ترجع لك الحالة مباشرة
اسماء : يتهيأ لك ...
ميهاف : لا مايتهيأ لي ! وين اسوم اللي كان تسأل عني ع طول و24 ساعة تكلمني ... انلميتي على شلة ميسون ومن عقبها ما كأنا ربع
اسماء بعصبية خفيفة : وأنتي كمان ماكنتي تسألين ! قلتي ملاحظة من فترة زواجك ... وتو قررتي تسألين .؟!
ميهاف : مو قصدي اسماء بس انتي عارفه ايش كنت اسوي .. كنت مشغولة بجد الزواج والحوسة وعقبها شهر العسل وتو ركدنا
اسماء بقهر : إذا انتي ما سألتي يعني مشغولة ! واذا انا ما سألت يعني تغيرت ! ياسلام !!
ميهاف : انا مو جالسة أذنبك او أذنب نفسي .. انا احاول افهم شصاير معك .؟!
اسماء حست ان عواطفها جالسة تنجرف .. والدموع تجمعت بعيونها تمالكت نفسها ونطقت بهدوء وهي توقف : لا تشغلين بالك ميهاف .. انا تعبانة شوي مانمت امس بصعد ارتاح ..
وقفت ميهاف مبهوته بالمطبخ ... شصاير يا اسماء ؟! وش غيرك كذا ؟!!
***
دخل نايف لداخل البيت بعد مغادرة أحمد استقبلته ابتسام بقلق : شصاير .؟!
نايف مسح على وجهه بتعب : وش صاير .؟! الرجال يبي بنته
فتحت ابتسام عيونها بوسعها : مو بكيفه !!
نايف هز كتـوفه : والله مدري وش أقول لك .. السالفة تعقدت
ابتسام : وبعدين غادة دخلت لي معصبة وتتحلطم وتسب في فراس ... شدخله .؟!
نايف : هو اللي مدبر كلش .. طرد احمد من وظيفته وعطاه صلاحيات ومحامي يقدر ياخذ فيها بنته وحضانتها
إبتسام بعدم تصديق : مستحيل .؟! ليش يسوي كذا !! مو رجعت ورقته .؟!
نايف : وين غادة اللحين .؟!
إبتسام : دخلت غرفتها وهي معصبة وقفلتها ومو راضية تكلمني حتى
نايف تنهد بتعب : عموما أنا بكلم فراس اليـوم ان شاء الله .. وان شاء الله خير
إبتسام مسكت يده برجاء : طلبتك نايف كلمه اللحين ...
نايف فتح عينه : اللحين .؟!
إبتسام برجاء : ايه تكفى نايف اللحين عشان خاطري ... والله ماراح ارتاح وانا اعرف ان احمد ناوي ياخذ رنيم بعيد ! انا احس اني بختنق وانا خالتها كيف امها ؟!
تنهد نايف بتعب : لعيـــونك بس ... بصعد ابدل بس وماشي
إبتسام : الله يخليك لي يارب ولايحرمني منك
***
الســــاعة 4 ونص عصر /
كانت ميهاف مع أم فراس بالمطبخ ... بينما بدر وأنس على البلايستيشن يلعبون
" صوت الجرس "
بدر وقف اللعبة وهو يقوم : ياويلك تغش ! راجع لك
ركض لبـــرا وهو يجاوب : جااااااي .... " فتح الباب .. ورفع حواجبه وهو يبتسم " هلاااااااا والله اما نايف ! وش جايبك ؟!
نايف : وانت شتسوي هنا .؟! مو على اساس رحتو بيتكم امس خلاص
بدر : ههههههههههههه ايه بس جاي افطر مع الأهل اليوم ... حيـاك
نايف : قبل ادخل ... اخوك هنا ؟!
بدر وهو مستغرب نايف يبغى فراس : لا مو هنا ... غريبة وش تبغى من فراس ؟!
نايف : ادق عليه مايرد قلت اجي البيت واضرب حظي ... بس الظاهر مو فيه
بدر : ولا راح يفطر هنا ... بس انت حياك افطر معي وتكلم وش تبي بفراس ؟!
نايف قبل دعـــوته ودخل ... اثناء جلستهم بالمجلس .. نايف : لا تعذب اهلك بفطوري انا بفطر ببيتي بس اقابل فراس بمشي
بدر : فراس ماراح يفطر هنا ... اجلس افطر واكيد بيرجع قبل التراويح , بس تكلم وش فيك وجهك مو على بعض !
نايف : كذا وجهي وش تبي !
بدر : وش هالمزاج لا أفقع وجهك ! تكلم وش بينك انت وفراس
نايف : أنت دريت طبعـا بسالفة فراس واخت مرتي
بدر : أيه .. هي سالفة هاليومين وين ما اروح اسمعها
نايف : أيـوه ع قولتك هذا وانت بعيد .. كيف انا اللي عايش مع بطلة الحدث بينفجر راسي
بدر : ههههههههههه الله يعـــينك
نايف : تضحك .. وش عليك ماخذ اختي ماراح تلقى منها عوار راس
بدر : ههههههههههههههههههه هو السالفة تضحكني لأن اخت زوجتك هذي مجنونة ! لقينا اللي ترفع ضغط فراس اللي مسوي برستيج لنفسه هو وبروده
نايف : هذي هي جالسة تدفع ثمن انها رفعت ضغطه ... اخوك داعم طليقها عشان يسحب منها بنتها
بدر : ايه شي متوقع من اخوي
نايف : بس يابدر ماينفع ! بنتها صغيره محتاجه امها .. غير كذا مهما كانت البنت غلطانة هي اعتذرت منه في بيتي وطاح الحطب خلاص
بدر : طاح الحطب عندها مو عنـده .. تعرف فراس مايحتاج اذكرك بوش سوا يوم ولد التويجري لعب معه بالبورصة ! جلس يتحرش فيه لين كرهه بحياته
نايف : ولد التويجري رجال ! مو حرمة ولا آي حرمة بزر مراهقة ماهي عارفة شجالسة تسوي !
بدر : ولأنها حرمة ع قولتك تلقاه حاقد اكثر ..
نايف زفر بقرف : والســـواة اللحين ..؟!
بدر حط يده على كتف نايف : لا تشيل هم أنت ارتاح وانا بكلمه لك وبقول للوالدة بعد تكلمه ... اساسا الشخص الوحيد اللي يمكن يأثر بقراره هو الوالدة
نايف : ايه واللي يعافيك اكون ممنونك والله ... تعرف ماودنا نوصلها لشي كبير واللي يسويه عيب بحق نفسه حتى
بدر : ولا يهمك من عيـوني انت روح ارتاح لك شوي ... وجهك تافل العافية يارجال
نايف : تلومني ! لي اسبوع من مشكلة لمشكلة ماخلصت .. المشكلة ولا مشكلة تخصني بعد
بدر : الله يعينك
نايف : المهم لاتنسى تكلم فراس ... ورد لي مباشرة
بدر : من عيــوني
نايف : يله انا ماشي استأذنك
بدر : اذنك معك حبيبي ..
أول ماطلع نايف دخل بدر البيـت : يمــــــــه
طلعت ام فراس له : لبيك .. من كان عند الباب .؟!
بدر : هذا نايف ... جاي يبغى فراس
ميهاف : نيــوف كان هنا .؟! ياشينك ماقلت لي اطلع اسلم عليه
ام فراس كانت حاسة : لايكون عشان مشكلته مع غادة بعد .؟!
بدر : ليش ماتدرين وش ولدك مســـوي .؟!
ام فراس : وش مسوي ..؟! لا والله ما ادري
بدر : رايح يدعـــم طليق البنت بفلوس ومحامي عشان ياخذ بنتها منها
شهقت ميهاف : معقـــــولة .؟!
ام فراس : متـــأكــــــــــــــد .؟!!
بدر : ايه متاكد هذا كلام نايف تو جايهم طليق البنت وحالف يسحب البنت من يديها
ميهاف : يؤ يؤ يؤ يؤ ..
ام فراس : لا مو صحيح هالحكي مستحيل ... ولا وش دخل فراس اصلن بطليقها .؟! مابينهم علاقة حتى
بدر : ايه انا استغربت بالبداية .. بس لما فكرت فيها فراس وقت يحط براسه احد يوصله لو تحت الارض
ميهاف : معقــولة لهالدرجة .؟ صح ان الناس تكلموا كثير ... بس مو بهالطريقة كمان بيتكلمون اكثر
ام فراس : كلمت اخوك شفت وينه .؟!
بدر : كلمت مارد علي ..
ام فراس : بيرجع اكيـــد عقب عزيمته وبفهم منه وش صاير .. مو معقولة يكون مسوي كذا ما اصدق
دخلت ام فراس المطبخ ... بدر : والله مسكينة امي مو مصدقة بهالفراس .. واخرها بتنصدم ان اللي يقال حق
ميهاف تنهدت : الله يعـــين والله المشكلة ان هالسالفة موضوعها حساس خصوصا وغادة بنت و ..... الله يهديها وش سوت بنفسها
بدر : ومالقت الا فراس ... ماراح يفوتها لها لو تموت ! وهذي أول ضربه بس
ميهاف : معقولة يسوي اكثر .!؟
بدر ابتسم بسخرية : معقــولة .؟! إلا اكيد بيسوي اكثر .. إلا وين اسوم ؟
ميهاف بضيق : تقول تعبانة مانامت فصعدت تنام لها شـــوي
بدر : عمـوما إنتي وهالمشروع اللي مدري ايش ... من اللحين اقولك ماحتروحين
ميهاف فتحت عيونها : ليش .؟!
بدر : ماحبيت افشلك قدام اهلي .. بس هالمشاوير مالها داعي ولا لها لزمة ! وقت الجامعة ايام الدوام مو اجازة ورمضان
ميهاف : إيـوه بس هذا تطوع فني وراح يحسب لي بعدين اذا احتجت اسوي عمل خاص فيني او شي
بدر : ميهاف حنا لسى سكنا سوا .. وفوق كذا رمضان ! ماهو الوقت المناسب لهالمشاريع فانسي لي هالموضوع
ميهاف حضنت يده بيدينها : مرة مافيه امـــل .؟!
بدر طالعها بطرف عينه : لا تتميلحي مافيه يعني مافيه
ميهاف : حتى لو مرة بخـــاطري .؟! ونفسي اروح
بدر : أيـه حتى لو .. لأن نفسي فيك ونفسي اشوفك بالبيت ع طول مو بمشاريع ومدري شنو
ميهاف باحباط : والله حرام مرة مصرة علي المشرفة لما راسلتني
بدر بثقة : رضا زوجك أهم !
ميهاف بتصنع للزعل : الله يعيني على رضا زوجي بس .. يبيله جهد
بدر : اقول مابقى شي على الأذان قولي اذكارك وشوفي امي ... انا بطلع اشوف اسوم
ميهاف : ان شاء الله
دخلت ميهاف المطبخ بينمـا صعد بدر لغرفة اسوم وطرق الباب طرقة وحده ودخل مباشرة .. استغرب مالها حس حصلها نايمة بجد بشكل فوضوي على السرير بالعرض وضامه وسادة بحرف H " الوسادة جزء من تكوين كلمة HAPPY " على كنبتها .. لكنها سحبت حرف الإتش وتملكته ... وواضح انها باكية قبل تغط بالنوم تأملها لفترة ثم طرى بعقلة .. الدفتر اللي خطفته من يده ورمته بين كومة كتبها .... توجه ناحية المكتب وهو يبحث بهدوء عن الدفتر اللي يحتفظ بين طياته سبب تعاسة دلـــوعته واخته ... اثناء بحثه ارتفع صوت الأذان ... فتحت اسماء عيونها بكسل وهي تستقعد بإرهاق انتبهت لبدر جالس على مكتبها شهقت : بسم الله ! شتسوي هنا ؟!
بدر بتصريف: أبد جيت اصحيك ... ولفت انتباهي مكتبك قلت اشوف كتبك
اسماء : طيب أذن ... انزل افطر
بدر وقف قدامها وهو يمد يده : يله ننزل نفطر ... اصلن انتي وحده ماتستحي ! وجودي بهالبيت صاير زيارة ترا لا اكثر ولا أقل ... يعني وقت اجي تنثبرين قدامي لين اذلف !! سامعه .؟!
ابتسمت ابتسامة صفراء : ســامعة ..
***
اثناء ما غادة بغرفتها ... كانت تسمع صوت الأذان لكن مالها استجابة متكورة على كرسيها الهزاز وعيونها اللامعة بدموعها على رنيم وهي تلعب .. وقلبها يزداد رعبه وقت تحس انها ممكن تفترق عنها : ...............
وقت سمعت صوت نايف دخل البيت ... وقفت مباشرة وهي تسمع كلامهم /
ابتسام : شصار كلمته .؟!
نايف : لا ... مايرد ولاهو بالبيت ! بس وقت اوصله راح اكلمـــه ان شاء الله
ابتسام : يالله .... يعني سوا اللي سواه واختفى !
نايف بإرهاق : ابتسام واللي يعافيك .. ابي حاجة خفيفة اكلها بصلي بالبيت وبنام مافيني حيل
إبتسام : تعال افطر زي العالم وش فطور خفيف ؟
نايف : مالي نفس ... ابي انااام وبس ! لو ما انام اللحين ماقمت للتراويح
إبتسام : خلاص ولا يهمك ان شاء الله ..
عــند غادة /
رجعت عيـــونها تدمع ... وهي تجلس قدام رنيم اللي تضحك وهي تمد لعبتها لغادة توريها : ماااامااا
شهقت شهقه مكتومة وهي ترد : ياعيـون ماما " ضمتها لحضنها " ماراح اتركهم مستحيل تبعدين عني ... مستحيل ما اعيش دونك ..حبيبتي انتي
رنيم بانزعاج وهي تبكي اثر ضم غادة لها بقوة ... غادة افلتتها وهي تجلسها : امك صاير عندها هواية جديدة ... هواية انها تسوي اشياء تدري انها راح تندم عليها .. بس انا مستعدة اندم بكلش إلا انتي ... كلش إلا انتي عمري انتي .. والله لو تبعدين عني اموت ... مقدر اعيش دونك انا ..
***
فـراس /
بعـد ما طلع من صلاة المغرب ... وركب سيارته سأله السواق : لوين .؟!
فراس : قبل تتحرك انزل الصيدلية اصرف الأدوية اللي بالورقة
أول مانــزل السواق .. دق جواله تنهد بضيق وهو يطالع المتصل ويرد : هلا لؤي .
لؤي : هلا فيــك .... كيفك .؟!
فراس : حمدالله بخير ... انت اللي كيفك حالتك حاله صيام وسفر ! متى بترجع .؟
لؤي : تو وصلت واشنطن اللحين ... بفطر وبتأكد من كم عنوان يخصها
فراس باقتضاب : اها .
لؤي : وانت كيفــــك .؟! شخبار اصابتك عسى احسن ؟
فراس : تسكن شوي وتنغزني شوي ... حمدالله ع كل حال
لؤي : اهم شي انت لا تهملها .. من يوم ليــــوم روح للمستشفى يشيكون لك عليها
فراس : مو ضروري مستشفى ... اسنع نفسي دون
لؤي : انا عارف انت ليش ماتبي المستشفى ! لأن اخر مره رحنا سوا قالك الدكتور مفروض تجلس بالمستشفى فتره ويمكن نجلسك بالمستشفى !
فراس : ترا حده دكتور مبتدئ يعني لا تاخذ بكلامه ... وبعدين انا مافيني شي لاتشيل هم ! اهم شي انت اخلص ارجع
لؤي : ماراح ارجع قبل احصلها ... ولا وقتها ماله قيمة كل هالتعب اللي جالس اسويه
فراس : من أول اقولك ماله قيمة ... بس أنت معند , الوالدة تدق اكلمك بعدين
لؤي : ع خير
فراس رد على امه : هلا يمه .. معليش تدقين علي وانا بالمسجد ماقدرت ارد
ام فراس : وينك انت اللحيـــن .؟!
فراس : ليش ؟!
ام فراس : ابي اعرف متى بترجع البيت ..
فراس : حاليا عندي كم شغــــلة ... يمكن ارجع عقب التراويح ان شاء الله
ام فراس : بتطول يعني .؟!
فراس : تبيني ضروري اجل ..؟! صاير شي ؟
ام فراس : ماصاير الا كل خير ان شاء الله .. احتريك اجل عقب التراويح ان شاء الله
فراس : ع خيــــر
***
هـــيثم :-
بعـــد ما انتهى من عمله المكتبي طق رقبته وهو يطالع التقويـــم ... مر اكثر من اسبوع على آخر مرة جت , عقد حواجبه بضيق من تفكيره .. تافف وهو يسحب الملف ويطلع من مكتبه
: اسمــــــــــــــااااء !
التفت بسرعـــة يدور ... لكن رجع احباطه لما طلع المقصود طفلة صغيرة تركض بالممر , ابتسم وهو يطالع الطفلة ونشاطها ( مو مرة يختلفون .. )
: هيـثم
التفت للدكتور : هلا دكتور
: ههههههههه شفيك مصفن بالبزر .؟!
هيثم : لا مافيه شي اطالع بس يعني
مراد : ماعلينا المهم .... بغيت اسالك بتمسك المناوبة اليوم ولا بتطلع تصلي .؟!
هيثم : على هواكم ..
مراد : معناها انت طلعت تصلي قبل امس ... اليوم انا بطلع المناوبة عليك
هز هيثم راسه دون اعتراض ... فور مغادرة مراد رجع يلتفت لمكان الطفلة اختفت .. تنهد بضيق وهو يكمل طريقه وهو يهمس لنفسه : شكلي رسميا انجنيت ..
***
الســـاعة 11 /
دخل فراس البيـــت ..تحنحن وهو عـند الباب ..
بدر : ادخــل مافيه احد
دخل فراس وهو يجلس : السلام عليكم
ام فراس + بدر : وعليكم السلام
فراس طالع بدر : امداك تشتاق لنا .؟!
بدر : حــرام اشتاق لكم يعني ..؟!
ام فراس : المهـم ... فراس يمه بكلمك بموضوع
فراس : الله يستر ... هاتي تفضلي
ام فراس : انت مســـوي شي .؟! هاليومين قصدي
فراس عقد حواجبه : مافهمت
بدر على بلاطة : نايف اليوم جا ويقول انك داعم طليق البنت عشان يسحب بنتها
فراس ببرود : طليقها .؟ وانا وش علاقتي بالموضوع ... اساسا ما اعرف الرجال
بدر : تســـوقها فراس ؟! الرجال بنفسه قال للبنت انك جاي ومكلمه
فراس هز كتوفه : يمـكن
ام فراس : معقــــــــــــــولة .؟!!
فراس تنهد : كل الموضوع ان نايف طلب مني أوظف طليقها عشان يرضى يطلقها ... وانا لما وظفته وسويت فيها جميلة مفروض تشكرني عليها ردت علي بهالطريقة ! فانا ماني ملزوم اتركه يشتغل عندي ودون شهادة !! طردته ...وعطيته تعويض لأن الطرد مفاجئ ... اذا هو قرر ياخذ بنته أو غيره انا مالي علاقة
بدر رفع حواجبه : اقص يدي لو منت طارده عشان يسوي هالحركة
فراس بتبلد : قصـها اجل
ام فراس بضيق : طيب شلون نفهمهم اللحين ان مالك علاقة باللي يصير .؟!
فراس تنرفز : شلون نفهمهم .!؟ ليش حنا مديونين لعيال الفقر بشي ؟!!! ترا ماشافوا هالعز إلا من ورانا ... واللحين صار لهم مقدار ولازم نفهمهم ! بستين داهية ان شاء الله عمرهم مافهموا
بدر : يارجــال رمضان استهد بالله
فراس : عمـــــوما ... حتى لو هالشي صار لها أنا ماراح يطلع مني إلا اقول أحسن ! وتنتظر الجاي راح يكون احسن بكثير
ام فراس : يا ولدي وش لك انت بالمشاكل ! خلاص بزر وتعلمت درسها
بدر : بجد فراس قفل الموضوع مالك خلق ترا تنقد نفسك مع الناس عشانها
فراس : وهو انا منقود علي خلقــــه ! وين ما أروح أسمع نفس الحكي عنها .... " كمل بعصبية " وانا لو عارف أن هالحكي بيطلع كان سويتها وقفلت عليها خل يتكلمون بحق أقل شي
بدر : وهو أنت ماقفلت عليها .؟!
فراس عض على شفتها بقهر : أقول اقلب وجهك ... اساسا فيه ناس مثلك لازم ينسحب عليهم برمضان عشان ينقبل صيامنا ! انقلع لبيتك
بدر : بنقلع دون تقــول .. اهم شي انا قلت لك اللي كان نايف جاي اليوم يقوله لك دام وصل انا اطلع من السالفة
فراس : قول لنايف يصف على جمب أحسن له
وقــف بدر عند الدرج وهو ينادي : ميهـــــــــاف يله مشينا
عـند ميهاف /
تنهدت بيأس وهي تقول لاسوم : يله اسوم انا ماشيه ...وترا عازمتك بكرة حياك وأي وقت تبين
اسماء : مقدر اجي ... استانسي انتي تو نقلتو سوا وخليك مني
مالقت ميهاف رد ... لها ساعة معها تحاول تقنعها انها تروق وتشكي لها بس مافيه امل .. لبست عبايتها ونزلت ماحصلت بدر ... نزلت راسها وهي تنطق بصوت معتدل : السلام عليكم
ام فراس + فراس : وعليكم السلام
ام فراس : بدر برا يحتريك
هزت ميهاف راسها : كيفـــك فراس .؟! حمد الله ع سلامتك خطاك السوء
فراس : يسلمك يارب وهناك العقلان
ميهاف : هناك خير ... يله تمسون على خير
ام فراس : وانتي مـن أهله ..
طلعت ميهاف وهي تركب السيارة ... كان يكلم بالجوال فسكتت : ايه تو كلمته
نايف : هاه .؟! طلع له علاقة
بدر : والله مدري ... هو يقول يمكن
نايف بنرفزة : نعععععععم .؟! وش يعني يمكن هذي
بدر : ما أدري ... بس عموما هو مو ناوي خير واذا كانت هالحركة مو منه ماراح تسلم من حركه ثانيه منه فالله يعينك
نايف : اقول سكر سكر ... بكلمه انا ! مابقى شي على مايجي احمد وحالف ياخذ البزر
بدر : يله سلام
سكر نايف السماعة ودق مباشرة على فراس ... جاه الصوت بنبرة مالها خلق : نعـــــم ؟!
نايف : ينعم بحالك ..... سلامات فراس وش هالسماجة !
فراس : وش بعـد .؟! ترا اقلقتوني .. الواحد مايصدق يخلص من مشكلة تدخلونه ثانيه
نايف : لاااااا انت اللي تقول هالحكي .؟! وانا اللي بمشاكل ماخلصت من وراك ! هي كلمة وحده كلم احمد وطلع الفكرة من راسه مثل مادخلتها ... ولا أقلها لاتدعمه
فراس : أولا ... سواء انا دخلت الفكرة او مادخلتها الرجال يبغى بنته وهذا حقه .. وصدقني حتى دون دعمي ودون فلوسي بيقدر ياخذها لأن الحضانه حقه
نايف : بس انت تعرف وش احمد ! تعرف انه مجرم وماله امان تجلس الطفلة معه
فراس : طيب ؟!
نايف : يعني راح تسوي اللي براســـــك .؟!
فراس : أقول نايف انت جالس تحطني بشي مالي فيه ...وانا وش علاقتي بين ام وأبو وبنتهم ! يصطفلون يخي
وسكرها مباشرة .... تنهد نايف بضيق اما غادة اللي كانت واقفة وابتسام جمبه ويسمعون المكالمة نطق نايف بقهر : ابفهم انا وين عقلك وانتي ترسلين رسايل تهديد لفراس ؟!! ويننن ؟!
غادة ودموعها بعينها : نايف دق عليه مرة ثانيه .. بكلمه انا بتأسف .. لو يبي بوصل لرجله وبتأسف بس يخلي بنتي تكفى
إبتسام قبضها قلبها على اختها ... نطقت بهدوء : يعني نهائي مو راضي ؟!
نايف : مو سالفة راضي او مو راضي ... هو كان مسويها جميلة وموظف الرجال وقت صار اللي صار واختك الشاطرة حطت راسها براسه طرده
غادة بقهر : مو صح ! الموضوع مو بس كذا .... احمد حتى لو ينطرد اخر شي يفكر فيه بنته ... فراس عطاه فكره اني ام مو كويسة واني مهمله رنيم .. عشان كذا احمد يبغى ياخذها
نايف بهدوء : إذا انا فهمت شي من مكالمتي مع فراس .. فهمت شي واحد ان القانون مع احمد حتى دون دعم فراس يعني اسف بس اذا بياخذ بنته مابيدي امنعه , لأني حتى لو اوقف ضده هو وراه ظهر أقوى ... لو اعطيه مبلغ بيعطيه فراس اكثر .... فطبخ طبختيه يالرفلاء اكليه
نغزته ابتسام وهي تهمس له : نااايف !! مو كذاا
نايف لفط يده بضيق بمعنى " وش اسوي بها يعني !؟ " .... إبتسام رفعت عيونها لغادة اللي تجمعت الدموع بعيونها مرة ثانية وانسحبت بهدوء لغرفتها ورنيم معها ... تنهدت ابتسام بضيق : لا حول ولا قوة إلا بالله ..
نايف وقف : انا طالـع
ابتسام : لوين .؟! احمد بيجي مو ...؟ ماراح تجلس
نايف : مالي علاقة .... بيجي يبي غادة تتفاهم معه , وعقليها وتفاهموا معاه عشان اقل شي يقسم اقامتها بينه وبينها
إبتسام حست انها ضغطت على نايف اكثر من اللزوم فهزت راسها بموافقة : ان شاء الله
مجرد ماطلع التفتت لغرفة غادة .. وهي تحس بضيق ماتقدر تقابلها حتى اللحين ... بس وش بيدها طقت الباب : غادة ؟! ... غادة ؟
: ......................................
فتحت الباب وهي تدخل ... حصلتها دافنه راسها بين ركبها وتبكي بقهر ورنيم جالسة تراقب وحواجبها معقودة وما بيدها شي : .............
انقبض قلب ابتسام وهي تشوف رنيم .. هي نفسها تحس نفسها مكسورة لافكرت ان رنيم تفارقهم كيف غادة , قوت نفسها وهي تجلس جمب غادة وتحاوطها من كتوفها وتحضنها : خلاص حبيبتي لاتكسرين قلبي عليك كذا
تعلقت غادة ببلوزة ابتسام وهي تجهش بالبكاء : كيف بعيش ابتسام كيف بعيش ؟!!! حرااام عليه مـــو كذا ... والله والله لو عارفة ماسويتها .... كلش غلط سويته بحياتي عشانها ... ماعمري ندمت على زواجي من احمد بس عشانها ..
مسحت ابتسام على ظهرها : روقي روقي استهدي بالله ... البكاء ماحيسوي شي
غادة : معقودة ايدي ... ابي حاجة اسويها واسويها .. ابي حاجة اسويها واسويها .. " صرخت بقهر " ابي حاجة اسويها واسويها
إبتسام : غادة شوفي بنتك تطالعك وضايعة ... ضميها اشبعي منها قبل يوصل أحمد
غادة : كيف ابتسام .؟! انا مو مستوعبة انها تتركني كيف تبيني اودعها كييييف ؟ ... كل ماعشت لحظة حلوه بحياتي يلحقها مصيبة .. صرت اخاف من الفرحة ابتسام صرت اخاف انبسط .. والله اخاف
إبتسام ماقاومت دموعها تنزل على شكــل اختها وحالتها ..
***
ميـــهاف
طالعت ساعتها باقي نص ساعة ويرجع .. توجهت للمطبخ وهي تحاول تعرف وش مفروض تسوي .. ماعمرها طبخت إلا حاجة خفيفة .. وهذا اللي سوته سلطة خفيفة مع كاس موية وكاس عصير انتبهت للي يحضنها من ورا فجأة : يمه ! متى جيت .؟!
بدر وهو ينحني براسه ويسنده على كتفها : تو .. اللحين .. وجالس افكر انا متزوج حورية ولا شالسالفة .؟
ميهاف بنعومة : شنو ع بالك تغشمرني بكلمتين عقب المشروع .؟! " كملت بمرح " كلمة وحدة كافية واذوب
بدر : واللي يذوب بحرف واحد منك وش يسوي .؟!
التفت له ميهاف وهي تشبك يدينها ورا رقبته : الله يعـــينه وقتها ... لأني جبت راسه ولايمكن اتركه
بدر : هـذا المطلوب !
ميهاف : هههه اتركني طيب خل نجلس ناكل
بدر وهو يتركها : ههههههههه اوك
أول ماجلسوا طالع بـدر الأكل : أقـول ميهاف كيفك مع الطبخ .؟!
ميهاف : هو يعني الطبخ الطبخ ما اعرفه نهائي ... بس تطمن اعرف كل المطاعم والله
بدر بأصطناع : لا والله ريحتيني الله يريحك ... بس لمتى مطاعم يعني .؟!
ميهاف : اوك بتعـلم لاتنغزني بتلميحاتك كذا
بدر : والله مو قصدي ... بس جالس امهد لك أنه اذا تبين طباخة ترا ماعندي مانع , انا حاطه بحسابي عموما لأن عارفك ماتطبخين
ميهاف : هممممم .. مو عارفة , ماحيضايقك وجود طباخة بالبيت يعني ؟!
بدر باستغراب : وليش يضايقني .. هي بوظيفتها وش علي منها ؟!
ميهاف : مو عارفة لأن دايم الناس ببداية زواجهم مايحبون احد يكون معهم يضايقهم
بدر : اذا تضايقك بلاها ... بس بالنسبة لي ماتضايقني , يضايقني ما آكل وجبة محترمة اكثر
ميهاف رفعت حواجبها : شقصدك .؟! انا ما اعرف اسوي حاجة محترمة
بدر : انا قلت كذا .؟! ياحبك تقوليني كلام ماقلته ... قصدي اني ما أقدر افرض عليك جدولي الغذائي لأن صعب تسوينه كله بينما الطباخة هذا شغلها اقدر امون من هالناحية يعني
ميهاف : براحتك اجل ... اذا تبي طباخة معناها نجيب مو مشكلة
بدر : انا ابغى راحتك انتي ... وبعدين انا عمى عيني اشم ريحة طبخ مع وحده فاتركي هالشغلات للطباخة
ميهاف : ياعيني على الحساسية !
بدر : وبعدين المـــوية هذي ما اشربها ... فين مويتي ؟!
ميهاف عقدت حواجبها : ِشفرقت كلها موية .؟!
بدر : إلا فرقت ... انا مويتي معدنية مقدر اشرب هذي
ميهاف وهي حمدت ربها انه طرى الطباخة لأنها ماتقدر تمشي مع تشرطاته : اوك راح اجيبهـا
بعد ماجابت المـــوية .. جلست جمبه وهي تتعلق بذراعه , بدر : هههههههه شلون آكل طيب ؟!
ميهاف : مو مشـكلة أنا ااكلك .. بس ذراعك اللحين رهينتي ماتاخذها من حضني
بدر : ميهـاف مو ناوية تصومين بكرة ؟!
ميهاف باصطناع للغباء : إلا بصوم ان شاء الله
بدر : أجل الزمي العافية وخليني آكل
ميهاف وهي تضم ذراعه لصدرها اكثر : شأسوي طيب .؟! جالسة وقدامي حبيبي وفارس أحلامي ..؟! ما أقاوم نفسي
بدر وقلبه يدق مع كل كلمة تقـولها ... هاليومين يحس نفسه بنعيم معها : يابنت النـاس انتي بتخربينا رمضان هذا !
ميهاف : ههههههههههه شكـله كذا
***
فـور وصـول أحمد للبيت ... دخلته ابتسام وراحت لغادة وقالت بكئابة : غادة .. احمد هنا ..
وقفت غادة وهي تلبس عبايتها : إبتسام خلي رنيم معاك شوي ...
دخلت المجلس وطاحت عينها عليه وهو جالس بالثوب ... رفع عينه لها وإبتسم بسخرية : شنو ناوية تروحين معنا ؟!
غادة شدت على قبضتها ونطقت بقهر : جايه اترجاك ماتاخذهـا ... " خنقتها عبرتها " احمد انــا مستعدة اجي جدة كل اسبوع يومين واخليها تزورك بس ... بس لاتاخذها , هذي بنتي احمد البنت مالها إلا امها انت كيف تفكر ؟
احمد ابتسم : اخر مرة جيت كنتي تهاوشين ولسانك اطول منك ... اشوفك اللحين منكسرة وتترجيني , فين اختك التاجرة ماتقدر تساعدك ؟!
غادة لعنت فراس بداخلها مليون مرة .. لو هو مو بالسالفة قدرت بسهولة : لاتراوغ كلامي ... احمد انا طالبتك ماتاخذها ..
احمد : غادة انا قلتها لك ولاراح اعيدها ! تبين ارجعك لذمتي وترجعين معي انتي وبنتك لبيتك وتتعوذين من الشيطان ماعندي مانع .... ماتبين ترجعين قلعتك بس بنتي باخذها
غادة باحباط : آخر كلام عندك ؟!
احمد : أيــه واعجلي علي تأخرت وراي طريق سفر
غادة وكلش داخلها جالس يموت : ............. معناها انا موافقة ترجعني ..
ابتسم احمد برضا : معناها روحي جهزي اغراضك ... وانا بنادي الشيخ
تلاحقت دموعها على خدها وهي تطلع .... استقبلتها ابتسام بقلق : شفيك شصار .؟!
غادة : بجهز شنطتي ... برجع معهم ..
فتحت ابتسام عيونها : نعـــــــــــم .؟!! وش قلتي ؟!
غادة بقهر : برجع لاحمد ... مقدر اترك بنتي ابتسام مقدر ! حتى لو ارجع له دامني معها انا بخير
إبتسام توجهت لباب المجلس ونطقت بصرامة : احمد ! انتظر بنتك بتجيك ... وغادة مالك امل ترجع لك
غادة فتحت عيونها : إبتسام شجالسة تسوين .؟!
سحبت ابتسام غادة من يدها ودخلتها داخل : مجنونة انتي !! وقت هو ياخذ بنته راح تنقسم اقامتها ... ومصيرها ترجع لك وصدقيني احمد بالاخير بيزهق وبيرجعها لك !! اما انك تضيعين حياتك للمرة الثانية انا مستحيل اسمح لك هالمرة !! واصبري علي بلقى لك حل
غادة وعيـونها على رنيـم اللي ضايعة وهي تطالعهم .... غطت وجهها بقلة حيله وهي تبكي بقهر : ليش كل هذا جالس يصير ... ليشش ليشش .؟! " رمت المخدة جمبها بقهر " لييششش ليشش ؟!
وقفت إبتسام وهي تنطق بهدوء احتراما لحالتها : غادة شوفي بنتك قبل تروح ..
فتحت غادة عيونها بجنون وهي تصرخ : ماراح تروح ! ماراح تروح !! ماراح تروح ساممعععععه !
عضت ابتسام على شفتها : غادة مافي يدنا شي .. هو ابوها وحقه ..
صرخت غادة فيها بغضب ودموعها ترسم خنادق على خدها : ماراح تروح إلا على جثتي !!
سمعـوا صوت احمد اللي انتبه لصراخها : إبتسام لو سمحتي عقلي اللي عندك واخلصوا هاتو البنت ولا دخلت واخذتها بالقوة
إبتسام : غادة هاتيها .. تكفين لاتعورين قلبي
غادة كانت ضامتها بتملك وردة بشراسة : قلت لا يعني لا !
احمد اللي سمع ردها ... دخل مباشرة وهو يحاول ياخذها من يدها , اما غادة كانت تقاوم بقوة وهي ضامتها ورنيم بكت لا ارادي من تنازعهم لها ... اما احمد بحركة قوية نزعها من يدها وطلع مباشرة .. لحقته غادة لكن قبل كذا مسكتها ابتسام : غاااادة خلاااص اهدي
اما غادة كانت حالتها اقرب للجنــــون وهي تصارخ وتحاول تلحقه .: رجعععععهااا لااااا ... اتركيييييييييييني مابببي مابي !!
صفعتها ابتسام بقوة عشان ترجعها لعقلها : غااااااااااادة !!!
لكن مـــافيه امل .. مجرد طاحت على الأرض وبدت تضرب راسها بالأرض بقهر : بنـــــــــتي ... بنتي بنتي
حست إبتسام بخوف من حالتها ... ركضت لجوالها وهي تدق على رقم معين : ألو هيثم !!
هيثم بقلق من نبرتها : هلا ابتسام ... شفيك عسى ماشر ؟!
ابتسام : هيثم طلبتك تجي اللحين ... غادة غادة مو عارفه شاسوي معها تعبانة
هيثم بقسوة : وانا شدخـــلني ؟!
ابتسام : هيثم حرام عليك ... البنت بتنجن بين يدي وانت تقول هالحكي ؟!
هيثم بعد صمت لفترة : ..........إبتسام انا وضحت ان ..
قاطع كلامه صرخة من ابتسام وعقبها تركت السماعة .... هيثم : الو ؟! الو ! ..... ابتسام انتي معي !؟
عض على شفته وهو يسكر السمـاعة ... حول طريقه مباشرة من شقته لبيت إبتســـام , بعد فترة وصل فتحت له ابتسام الباب دخل مباشرة : وينك يابنت ادق ماتردين ! شصاير ؟!
إبتسام اللي كانت حالتها سيئة لكن متمالكة نفسها عشان اختها : احمد خذا رنيم ..
هيثم بصدمة : متى ؟! وكيف ؟!
ابتسام : تو من شوي .... و وغادة انجنت انمشعت وانا احاول امسكها ماتطلع للشارع
هيثم : وش صار على السماعة .؟!
إبتسام : فقدت وعيـها فجأة .. لها يومين ماتاكل وحالتها حاله
تنهد هيثم : هي وينـها اللحين ؟!
إبتسام : بغرفتها ..
هيثم : فيـه احد .؟!
إبتسام : من بيكون هنا بهاللحزة !!
دخـل هيثم .. وهو يدخل غرفتها كانت منسدحة ع سريرها وواضح عليها عدم الراحة بنومها وتنهج حتى بنومها جلس على طرف سريرها وهو يراقبها : .................. انتي اللي نقلتيها لهنا .؟!
إبتسام : هو فيه غيري ..!؟ المهم كيفها اللحين !!
هيثم وعيونه معلقه فيها وهي تنهج بنص نومها : مجرد ارهاق .. تنتبه لصحتها وأكلها وبتكون تمام
وقف هيثم وهو يطـلع ... : ليش ماقلتي لي ان احمد يبيها ؟!
إبتسام بقهر : ليش انت تهتم فيها ولا وش يصير بها ؟! لما قلت لها نقول لهيثم ! خافت وقالت لا
هيثم : عمـوما انتي كمان انتبهي لنفسك .. غلط انك نقلتيها لغرفتها وانتي حامل
إبتسام : شاسوي اتركها طايحه ؟!
هيثم : انا ماشي ..
طلـع مباشرة اما ابتسام رجعت تجلس قدام غادة وهي تحس بكسرة على حالتها
***
دخــل نايف البيت ... الساعة 3 حـكم /
البيت هـادي تماما كل الأنوار طافية ... مو بالعادة ينامون قبل يتسحرون صعد لغرفته كانت إبتسام على سجادتها وتصلي والنور مسكر مجرد نور القمر من النافذة الطويلة , أستشعر من كئابة الجـو أن رنيم راحت أكيد : .....
بعد تسليمتها من صلاتها نطق بهدوء : كيفـك ؟!
إبتسام التفتت نص التفاته : ...............................
تنهد نايف وهو يتربع قدامها على سجادتها ويحضن يدينها بيده : معليش كنت مشغول ماقدرت أكون موجود .. طمنيني عنك ؟!
إبتسام هزت راسها بصمت وقالت بصوت مبحوح : حمدالله على كل حال ..
نايف : وغـادة ؟!
إبتسام : الله يعيـنها ..
حاوطها من كتوفها وهو يضمها لصدره : وجهـك شاحب
اسندت ابتسام راسها لصدره وهي تنطق : نـايف .. انتبه تحطني نهى ثانية بحياتك ..
نايف عقد حواجبه : ليش تقولين كذا .؟!
إبتسام : اليـوم لما شفت كيف أحمد وغادة جالسين يتنازعون رنيم .... مسكتني خنقة ماتخيلت مشاعرها .. مابي اللي بطني يضطر بيوم يعيش كذا ..
نايف : يامهبـــولة انا جالس كل يوم أموت فيك مليون مرة ... وانتي تقولين لاتحطني نهى ثانية , لايكون ببالك اني مطلق نهى لأني رجال الطلاق عنده عادي .. انا ماحصلت مع نهى اللي كنت احتاجه
إبتسام رفعت راسها له : وحصلته معاي .؟!
نايف : وأكثــر .. إبتسام انتي مو مستوعبة نظرتي لك , لو بس تشوفين نفسك من عيوني راح تشوفين قد ايش انتي انسانة رايقة وغالية .. بالحيل غالية
إبتسام : ...........................
نايف : واللي ببطنك ان شاء الله راح يكون في احسن بيئة .. عنده أم ماراح يحصل مثلها " ابتسم وهو يكمل " صح أبوه يخلفه ربي بس دام أمه موجوده بتعقل ابوه له
ابتسمت ابتسام ابتسامة صفراء : شكـرا نايف .. كنت محتاجة هالكلمتين بس
ابتسم نايف وهو يمسح على راسها من ورا الجلال ويطبع قبلة على جبينها : ولــــو .
***
بنفـــس المكان السابق /
: كلش أقوله معرض لسوء فهمك ... حتى السكـوت ..
كمل طريقه دون يرد : ............
نطقت بعصبية : ليـــــــــش ماتوقف اذا جيت اكلمك .؟!
التفت لها ونطق ببرود : نعـم ؟!
عضت على شفتها بقهر : هيــثم انا طابت نفسي .... انا برحل مقدر اكمل كذا ..
رد مباشرة : تعرفين الطريق ولا أدلك .؟!
" رررررررررررررررررررررن "
فتحت عيـونها وهي تصحى وهالأحلام جايبة لها توتر ... تعودت وجوده هالفترة بأحلامها معاد يفارقها : .....
نهضت من سريرها وهي تجاري الروتين مثل كل يوم .. عشان ترجع تنام وترجع تحلم وترجع تبكي .. نزلت لتحت حصلت الكل بالصالة : السلام عليكم
: وعليكم السلام والرحمة
جلست بصـــمت : .........
وكان الصمت سيد الموقف فالكل مشغـول باللي بإيــده ... اما فراس كان مروق شعور الأنتصار مسيطر على حواسه
نطقت ام فراس : هييييه الايام شلون تمشي .. من يصدق نص رمضان راح
فراس : أنس .. كم ختمت للحين من مرة ؟!
أنس : مـــرة
فراس : وانتي ياسميـن ؟!
ياسمين : ولا مرة .. تو ماخلصت
فراس : لأنك شاطرة صح .؟! هالتلفزيون بغرفتك خاطرك تشوفينه بالزبالة ؟!
ام فراس : توها بزر معليش اهم شي تختم قبل يخلص رمضان
ياسمين الحساسة تجمعت دموعها : .....
فراس : بسك دموع !
وقفت ياسمين وهي تصعد .... فراس بتذمر : بزران بجد
ام فراس : قلتها بزران ماينشره عليــــهم " تنهدت " أيه صح اسماء ميهاف داقة عليك من شوي تقول تدق ع جوالك ماتردين
اسماء دون نفس : شتبغى .؟!
ام فراس : اظن ناوية تسوي عشاء ببيتها يعني ... زي النزالة ببيتها يعني
اسماء : متى ؟
ام فراس : الليلة فحطي حسابك اجهزي عقب التراويح بنطلع مباشرة
اسماء : ان شاء الله ..
ام فراس : انا مربكتني هالعزيمة .. اول عزيمة من عقب آخر مرة مدري وشلون بقابل ابتسام
فراس : لايكون للحين قصدكم السالفة السخيفة اللي صارت مع اختها !
ام فراس بضيقة : اللي سمعته من ام نايف ان حالتهم حالة عقب ماراحت بنتهم ... وظني مايجون اصلن
فراس دون نفس : اقول انا طالع
صعـد لغرفته وهو يدق على لؤي : الو ؟!
لؤي : هلا ..
فراس : وش فيه صوتــــك ؟!
لؤي : أبد سلامتك .... تو طلعت من المستشفى
فراس : سلامات وش تسوي بالمستشفى ؟!
لؤي بنبرة لها مليون معنى : انا مصدوم حاليا فماراح اعاتبك ... بس رحت ادور قلت يمكن تكون سارا ولدت وطلع معي حق جابت بنت
فراس : ...........................
لؤي : ماتبي تعرف وش المفاجئة الكبيرة .؟!
فراس : عن الألغاز لؤي تكلم زي الناس
لؤي : بنفس المستشفى اللي كنت فيه ... واسمك بسجل الزوار !
فراس هذا الي كان خايف منه صار : ..................
لؤي بنبرة حادة : انا مو قادر استوعب نفسي ان عندي بنت ... ومو قادر استوعب انك قابلتها .. ومو قادر استوعب ان كل هالفترة انا اشكي لك همي وانت تواسيني وكأنك مو عارف شي ! فهو سؤال واحد وعقبها ما أتمنى اشوفك الا بالمناسبات .... مرتي وبنتي فين اللحين ؟!
فراس تنهد بضيق : لؤي انـــا ..
قاطعه لؤي : مابي اسمع شي عنك ! مرتي وبنتي فين .؟! ولا راح تمثل نفسك ماتعرف مرة ثانية !!
فراس : .................... قالت لي بتطلع من المستشفى وتستقل بنفسها بمكان بعيد
لؤي : وماتعرف هالمكان فين ولا ماتبي تقول ؟!
فراس باقتضاب : ما اعرف
سكر لؤي السمــــاعة مباشرة ..... اما فراس مسك راسه وهو يحس صداعه ضرب , ليش يالؤي عرفت ليش ! تافف وهو يرمي جوالـه وانتصاره طفى عقب هالمكالمة ..
***
إبتســـام دخلت غرفة غادة .... حصلتها صاحية لكن مستلقيه وضامة وسادتها وتطالع بالجدار قدامها : صباح الخير
غادة : ...............
إبتسام : غادة ردي عــلي .؟ انتي بخير ؟ امس نشفت لما شفتك بهالحالة
غادة : ايه إبتسام بخير ... بخير كثييييييير فوق ماتتصورين
تنهدت ابتسام بضيق : عارفة انك زعلانة .... بس ..
غادة قاطعتها : بس شنو .؟! اذا عندك حل قولي ... لأني احس حالي جالسة اموت
ابتسام : بسم الله عليك !!
غادة : ما امزح معك ابتسام ... جالس هالشعور يناوبني من امس احسه يسيطر علي
إبتسام : وش شعوره حبيبتي وش فيك ؟!
غادة : شعور اني معد اكون موجودة ..
إبتسام : تفي من فمك غادة وش هالكلام !! " كملت بقهر " اذا انتي تبغين رنيم ..؟! فأول شي لازم تسوينه هو تصحين من اللي انتي فيه وتصيرين قوية ... عشانها !
غادة : هي موجودة عشان اصحى لها ؟
إبتسام : مصيرك راح تشوفينها ... اسبوعين ان شاء الله
غادة بكئابة : على مين تلعبين ابتسام ؟! احمد ماراح يرجعها لي ... وحتى اذا رجعها انا مابيها تزورني ابيها تسكن معي .. بس ماراح اقول إلا الله لايوفق من كان السبب ..
إبتسام تنهدت وهي تنسحب من غرفتها ... نفسيتها مرة بالحضيض استقبلها نايف بالصالة : شلونها ؟!
ابتسام : للحين مكتئبة ... " تنهدت بضيق " ماراح يلقى ولد عمك خير من اللي سواه فيها
نايف : وانتي مقتنعه ان فراس حاط الذنب على نفسه .. هو اساسا لما كلموه قال انا ماسويت شي !
ابتسام : واضح مرة ...
نايف : المهم متى راح تروحين اليوم ؟!
ابتسام : وين ؟
نايف : ميهاف اختي عازمتك ببيتها مو ؟
ابتسام : اعتذرت منها ... وين اروح مالي خلق اقابلهم عقب اخر مرة , وبعدين احس حالي تعبانة وحالة غادة مو مطمنتني مقدر اخليها لحالها ..
نايف : اللي يريحك اجل
***
بعد صلاة التـــراويح /
ميهاف تحس بحيوية ... خلصت تعليماتها للطباخة والخادمة وهي تحمد ربها اللي رزقها واحد ماقصر بدلالها اللي تعودته ببيتها حتى عقب تزوجها ... وقفت قدام المراية تعدل كشختها وشعــرها الجعــد رفعته لفوق بتسريحة فوضوية ..وطالعه قمة الإغراء بالليموني وتشكليته على جسمها .. انطلقت تشرف على التجهيزات وهي بقمة حماسها لهالمناسبة .. بعد فترة جت امها وفهـد ضمت فهد وهي ترفعه : هلاااا واللله بحبيبي وحششششتني !!
ام نايف وهي تقيم مكان اقامة بنتها بعيونها : لا ما شاء الله البيت يفتح النفس
ميهاف بثقة : طبعــا ... وماشفتي غرفة النـوم خيالية مرة تعالي اوريك قبل يجتمعون الناس
ام نايف بعد مادخلت الغرفة وشافتها : ما شاء الله .. شغل صح , المهم كيفك انتي عسى امورك تمام ؟!
ميهاف وابتسامتها مافارقتها : مبسوطة مرة ماما لاتشيلين همي
ام نايف : حمدالله ... انا خفت من حالتكم قبل تنقلون قلت يمكن مايمشون
ميهاف : ههههههههههه لا وين وحنا نستغني عن بعض اصلن .!؟
ضرب الجرس .. نزلت فهود : فهود حبيبي روح افتح الباب
بعد فترة تجمــع الضيوف القليلين بحكم مساحة البيت .. قررت تجمع القريبين بس :-
عـند اسماء كانت واقفة قدام المراية تزيد من البودرة تحت عينها تخفي شحوبها الواضح /
: اســـــــــوم وش هذا !!
اسوم التفت لميهاف : هلا ميهاف
ميهاف : وش هالنحف يابنت ! اخبرك صعلوكة بس مو كذا ؟!
اسماء : نفسي ماتغيرت بس تتوهمين
ميهاف التفتت لوداد : وداد تعالي .. بالله اسوم كانت كذا من زمان ولا ناحفة
وداد قربت وهي تشيد براي ميهاف : لا والله اسماء ناحفة !
سجى : هههههههههههههههه تصوم من قلب الأخت
تجاهلتهن اسماء وهي تدخل مكياجها لشنطتها .. وتدخل عند الحريم وتاخذ لها مكان بحيث تحتفظ بصمتها لين تخلص : ..
ميهاف عند البنات : بالله بنات اسوم متغيرة كذا ليه .؟!
سجى : لها فترة صايرة نفسيه مدري وش تحس به !
وداد : حاولتي تكلمينها طيب .؟!
ميهاف : ايه حاولت بس مرة ضايقة ماترد حتى ... مو بس حنا حتى بدر متضايق من حالتها وهو بنفسه حاول معها بس مدري شفيها
تنهدت ميهاف وهي تطالعها بمجلس الحريم ورجل على رجل وساكته على غير عادتها : ...............
دخلت ميهاف وهي تضيف الحريم بالقهـوة .. بعد ماخلصت جلست جمب اسماء وقالت باصرار : اسمعي مو بكيفك ! ماراح استسلم وانا اشوفك بهالحالة .. اختاري ياتبتسمين ياتبتسمين
اسماء : مو محصلة سبب ابتسم له
ميهاف : وش تبين سبب اكثر من انك تشوفين بيت اخوك ! انا احتريك تجين تزعجيني تشوفين غرفتي مير ماتحركتي حتى .... يله اعرض لك انا اللحين قومي معي اوريك
اسماء : لا ميهاف مافيه داعي ... واساسا مالي خلق وامي بس بتعصب فخلينا هنا احسن
تنهدت ميهاف بضيق : وبعدين اسوم .؟! مو محصلة وسيلة لك .... كيف ارجعك مثل ماكنتي .؟! كيف اخليك تفتحين قلبك لي ؟
اسماء بضيق : وقت تحصلين هالوسيلة عطيني طريقتها ... لأن بخاطري ارجع مثل ماكنت
ووقفت وهي تطـلع من الغرفة .. قابلتها امها بالطريق : اسماء وش هالحالة ! مكشرة وحالتك حالة ... الكل يسأل وش فيك !!
اسماء : فجأة صاروا الناس مهتمين فيني ! يتركوا عنهم الحشرية احسن ... مو ؟!
ام فراس : هاو اسوم وش هالاسلوب ! هذول اهلك ... مهتمين فيك هذا جزاهم ؟!
اسماء تنهدت : ماما انا بكلم السواق وبرجع البيت ..
ام فراس : طيب اصبري شوي ... لو يرجع اخوك للبيت ومايحصلك بيزعل
اسماء : تعبانة ماما مو قادرة ..
ام فراس بقلة حيلة : اوك روحـي .. وانا ماحطول
***
انسحب بدر من جلسة البلياردو وهو ياخذ مكانه جمب نايف على طاولة القهوة : شخبــارك .؟
نايف : زين حمدالله
بدر : وش صار مع سالفة فراس .؟! مشى كلش تمام
نايف ارتسم على ثغره ابتسامة سخرية : تمام .؟! ليش عمر اخوك دخل في شي وصار تمام
بدر : اوف شصار .!؟ ماقال لي الحيوان
نايف : طبعا ماحيقلوك .. هو ع باله ان محد فاهم حركاته , " تنهد " صار اللي يبغاه الرجال خذا بنتها واللحين هي الله يعلم بحالها
بدر : طول بالك .. انت نفسك مو تاخذ يزيد احيان .؟! عادي هي مفروض تتقبل طبيعة الحياة المنفصلة هذي
نايف : ماعمري اخذته إلا بطلب منها ... ماعدا ذلك مستحيل احرم ولدي امه , وبعدين الله يسامحك على هالمقارنه , انا نفس احمد خريج السجون ؟
بدر : معك حق ... بس شتسوي مالها الا الصبر مو اول ولا اخر حرمة يصير لها كذا
نايف : اللي مضايقني يابدر هالمشكلة صارت تنعكس على حياتي وبيتي .. صاير اتمنى اطلعها لبيت لحالها بس ..
بدر : بس شنو .؟! عادي خل تروح لبيت لحالها مو مشكلة
نايف : اخاف انطقها وتصير حساسية وزعله وانا مالي خلق .. عاد انا عايش مع آدمية احتاج هكر يهكر راسها اعرف وش تفكر فيه ! احيان اقول شي سخيف تصير مشكلة مالها اول ولا تالي ... واحيان اجيب الطامة وتضحك ولا كأن صار شي
بدر : ههههههههههههههههههههههههه وش ردة الفعل العكسية هذي
نايف : ماشفت شي من عقول الحريم ... اصبر على ميهاف توكم في العسل انتو بتجيك لحظة بحياتك تنعقد يديك وانت تحاول تماشي عقولهن
بدر : اقـول خلك على جمب انا والحب فاهمين بعض
نايف : برجع اسالك عقب شهر
بدر : ههههههههه عموما انا رايح اللحين البيت ... ابي الحق اشوف اهلي قبل يرجعون , تامر شي ؟
نايف : سلامتك في امان الله
***
وقفت السيــارة .. تنهدت اسماء وهي تعدل جلستها وتفتح الباب انتبهت انها قدام المستشفى التفتت للسواق : وجع ! وش كلام انا .؟!
السواق خاف : انتي في كلام مدينة الملك فهد
اسماء : لا ماقلته ! انا قايله البيت !!
السواق عصب : إلا انتي في قول مدينة ملك فهد ! فكر انا مجنون
اسماء كبست عيونها بخوف .. معقولة تكون قالته دون تحس .؟! بلعت ريقها وهي ترد بهمس : والله ياكومار شكلي انا المجنونة هنا ..
كومار بنرفزة : اللحين وش ؟! بيت !؟
اسماء بهدوء مرتعب : لا ... ثواني وراجعة ..
نـزلت وهي تسحب خطواتها ... صارت حافظة الممرات اللي يمشي فيها عادة : .......
وتحس كل نظرة بالمستشفى توترها .. بلعت ريقها وهي تنتظر اللحظة اللي يظهر قدام عيـنها , انتبهت له اخيرا بعد فترة بأول الممر .. يمشي وبيده اوراق ومنشغل كعادته .. شدت على عبايتها بقبضتها وهي تحس برعب عقب ماكان يروقها صار يخوفها : ............
اخيرا بعد ما انتهى كلامه مع الدكتور بجانبه .. انتبه لها وقف مكانه وهو يطالعها : ..........
بعد فترة قرر يمشي لأن واضح انها ماراح تتحرك ... قاطعه صوتها المرتجف : دكتـــــور !
ماعرف يفسر صوتها .. صوت مبحوح مخنوق بعبرة أول مرة تناديه بهالنبرة ضيق عيونه فيها ثم رد : وش جـــايبك هنا .؟!
اسماء وشفاتها ترتجف تتخنق العبرة : وحــدة من ثنتين .... أنت او قسم النفسية
هيثم : مافهمت ..
اسماء وعيونها الزرقاء تطالعه بخوف .. حس كأنه كسر طفلة واضح بزر : انا مريضة ... فيني علة , مدري حلها عندك ولا عند قسم النفسية ... بس انا محتاجة اتعالج
هيثم : سلامتك .. لاتقولين كذا شصاير ؟
اسماء : ماعدت طايقة حالتي .. هذا اللي صار ..
هيثم : .........
اسماء : لو الزمن يرجع ما اخترت ادخل مستشفى انت فيه .. ولا اخترت اعرفك .. ولا اخترت كل هذا .. واللحين انا جالسة ادفع ثمن كل هالاختيارات ..
هيثم : اذا منتي قد القرب مني لاتقربين ... ليه .؟! لأن أي محاولة منك تقربين مني وعقبها تبعدين بفهمها انها لعبة منك وأنا اكره شخص يلعب فيني , مفهوم .؟!
اسماء : قصدك اني العب فيك .؟!
هيثم : يومين اشوفك وشهر عقبها تختفين ؟! شتسمين هذا مو لعـــب .؟!
اسماء بقهر : عقب كل اللي سويته .. وعقب كل اللي صار .. هذي فكرتك عني .؟! العب .؟ ليتني العب .. امنيتي
هيثم : يقولك انتبهي من شر ماتتمنين
اسماء عضت على شفتها : ......... ليتني انتبهت منك اكثر ..
هيثم مهما حـاول ينطق بكلمة يريح نفسه ويريحها فيها مايقدر.. عض على شفته : عموما قسم النفسية بالجناح الثاني مو هنا
اسماء بقهر : اصبر علي ... برجع ارتب حياتي وبرجعك غريب مثل ماكنت !
وعطته ظهرها مباشرة وهي تمشي مسرعة تطــــلع وقلبها زادت جروحه .... اما هيثم لكم الجدار بقهر ! ليش قلت كل هذا ! لو ساكت مو احسن بالله !
***
عـند بدر .. اثناء جلسته مع امه وميهاف بعد انتهاء العزيمة /
ام فراس : الله يخلي لكم هالبيت .. بس مو كان لو انه اكبر احسن .؟!
ميهاف : شدعوة كبير وحنا ثنين بس ... هذا كويس لنا
بدر : إلا اسوم وينها .؟!
ميهاف بقهر : طلعت بدري .. ماجلست ربع ساعة حتى
بدر : ليه شفيها .؟!
ام فراس : تقول تعبانة ..
بدر : وهو حنا لنا شهور وهي تعبانة ! شالسالفة يمه البنت يوم عن يوم حالتها اسوأ
ام فراس : والله تعبت فيها تتكلم مو راضية ..
بدر تذكر الدفتر .... قلبه يقوله ان علتها فيه , : لا تخافين يمه انا بعرف قريب وش فيها .

اكتر بارت تعب نفسيتي
قهر ماله حدود
كالعادة تصرف ابتسام في الوقت والطريقة أحسن ما يكون
انها ردت غادة عن انها ترجع مع الكلب أحمد ، حبست أنفاسي بجد لما قالت هترجع معاه
نايف معذور يزهق بصراحة اتحمل كتير
أعده أحسن شخصية رجولية في الروايه
(اسماء بقهر : اصبر علي ... برجع ارتب حياتي وبرجعك غريب مثل ماكنت ! )
يا ريت تقهري اللى خلفوه والله ، خلينا نتشمت فيهم شوية
ارتحت نفسيا شوية ان لؤي قرب يوصل لسارة
بس خليني أقول ان سارة غلطانة انها ماتصلتش بلؤي رغم انها عارفة ان فراس كداب
رغم القهر انما إبداع وتسلم إيديك والرواية تستحق كل دعم في الواقع