" البارت الثالث والعشرين "
- الحب يضعف التهذيب في المرأة ويقويه في الرجل
أم فراس ماسكه الـورقة قالت بدهشة : جبتي A ؟!
اسماء وهي واقفة بفخر : يب يب يب !
ام فراس : ما أصدق .. والله انا اقول بترسب
اسماء : ايه ايه قللو من قــدري ! وعلى فكرة ترا اقدر احقق اهداف اكثر بس موقعكم الجغرافي مايسمح لي
دخـل بدر البيت ... ام فراس : تعال جابك الله شف اختك وش نجحت فيه
بدر عقد حواجبه : طلعت النتايج ؟! شخبار درجة ميهـاف ؟
اسماء وهي ترفع ورقتها قدامه : مالت وش لك بميهاف اللحين .. شفني انا اول قدامك
بدر وهو ياخذ الورقة رفع حواجبه بدهشة : اما عاد !
اسماء بثقة وغرور وهي مستمتعة بردات فعلهم : قـايله لكم انا داهية بس انتو ماتفهمون
بدر : الف مبروك والله مانتي بسيطة
اسماء ويدها على خصرها وتحرك شعرها : وتأكد ان درجتي بتكون احسن من درجة زوجتك بعد
بدر وهو يرمي عليها ورقتها : في هذي عاد تبطين
اسماء : لا تتحدى !
بدر : مدحناك بس لا تتحلمين تغلبينها ..
اسماء مسكت جوالها وهي تدق على ميهاف : اوريك اللحين ..
بدر جلس وهو مسند راسه على يده ومبتسم وهو يحتريها ترد : حطي سبيكر
جا صوتها الناعم : هلا اسـوم
اسماء وهي تخز بدر : اقـول ميهاف ! كم نتيجتك ؟!
ميهاف : انتي اول كم .؟
اسماء : انا 4.8
ميهاف : اكثر منك حبه بس
اسماء سكرت السماعة مباشرة والتفتت وقالت بكبر :نسبتها اقل مني حبه !
ام فراس : بجد ؟! غريبة ...
بدر بثقة : اعذريها مشغولة تفكر فيني ... المهم يمه كلميها انا موجود بكرة بس اذا تبي تروح معي تشتري للبيت
ام فراس : بس بكرة ؟! ماراح يكفي
بدر : بكرة وبعده واللي تبي .. اهم شي تردلي خبر
اسماء : وليه ماتكلمها انت ؟!
بدر : لسى بينا حواجز ... ماراح اكلمها قبل تكلمني
اسماء : ياشين المكابر بس
طلع بدر .. وام فراس صعدت جلست اسماء على الكنبة وتنهدت وهي تفكر للحين مر يومين على رسالتها له .. للحين متفائلة برده .. ان شاء الله ماراح يخيبها متفائلة جدا بالايام الجاية .. بس ماعندها الشجاعة تروح المستشفى تستلم جوابه .. ولو انه عطاها اياه من قبل ..
***
غـادة صعدت ورجلها مو شايلتها طيـارته الخاصة ... مافيها غيره ولورا وهي ورنيم وهي بعبايتها لأول مرة تحس العباية منقذة عشان مايشوفها ... فراس كان موجود من قبل وبجلسته الملكية رجل على رجل وقدامه مشروب بكاس أنيق وباكيت سيجايره وثلاث جوالات .. كانت ريحته كاسيه طيارته الصغيرة ريحة سيجاير مع كلونيا .. التفت نص التفاته لما ركبوا عقد حواجبه لما شافها بعبايتها رجع يطالع قدام وقال بهمس سمعه الكل : ياشين اللي يسوقون الشرف
جلسة غادة بأبعد مكان عنه .. لكن ما ابتعدت عن محيط عيونه ولورا كانت جالسة بهم وتهز رجلها بتوتر .. نطق اخيرا بعد فترة هدوء : حرك كابتن
وارتفعت الطيـارة عن اراضي طـرابلس لتنتقل لجنة خضراء ... فراس بعد ما اخيرا صار بالطيارة وعنده وقت ومتأكد وقت يوصل راح يكون مشغول فتح جواله وانفض سيل المكالمات المجنون تنفس الصعداء وتو بيقرر من يدق عليه دق جواله " أم فراس " رد مباشرة : هلا يم
غادة انغزت هنا .. هذي أمه يعني " أم فراس " يالله انا وش موقعي هنا بالضبط استمعت باصغاء لباقي المكالمة ..
فراس : لا بس مشغول شوي .... لا لا اللحين فاضي شعندكم ؟! ......." ارتفعت نبرته بانزعاج درجة " شنـو ؟! ..... ايه ؟! .........وهذا بدر متى ناوي يصير رجال !! ...... انحلت اللحين ايه بس بكرة بيرجع مرة ثانية .... ابو طبيع مايخلي طبعه ........ لا خلاص انا بحول المهر لحساب بنت عمي ارسليلي رقم حسابها .... اوك ... اوك .... يله برجع اكلمك
نزل السماعة وفي ثانتين رجعها لأذنه ينتظر الرد : السلام ..
ميهاف كانت منخبه .. فراس وداق عليها هي ؟! : هلا والله وعليكم السلام ..
فراس : ماحصلت فرصة قبل .. بس مبروك زواجك على التنح ولدنا
ابتسمت ميهاف : هههههه شدعوة تنح ؟!
فراس بصدق : لا والله تنح .. امي داعيه له عشان يرزقه ربي وحده مثلك ولا محد بيصبر انا فاهم
ميهاف بقهر : ان شاء الله بيتغير
فراس : قدهـا ان شاء الله .... انا داق اعتذر بالنيابة عنه
ميهاف كانت متوترة صدق .. حتى بطفولتها مو موجود ماتعرفه ابد : على شنو ؟!
فراس : انتي عارفه على شنو .. على انك بتتزوجين اكبر ثور ممكن تعرفينه بحياتك
ميهاف : ههههههههه معناها انا بقرة اجل
فراس : محشومة يابنت العم .. المهم انا داق بطلب منك طلب
ميهاف بربكة : آمر
فراس : مايامر عليك ظالم ... بس انا اعرف اخوي واعرف طبعه واعرف انه ممكن يغلط دون يحس الشي المهم الي ابيه منك ماتترددين تكلميني وقت تحتاجين شي او يغلط عليك بدر كلميني مباشرة وانا ارجعه لك للدرب كلميني حتى قبل تكلمين عمي اذا ممكن ... اعتبريني بمكانة المرحوم عمك فهاد ولا تترددي ترفعي السماعة لأي شي ... وألف مبروك مرة ثانية ان شاء الله زواج الدهر
ميهاف ارتبكت بعد كل هالكلام : ان شاء الله مايحصل بينا شي ..
قاطعها فراس مباشرة : في حال حصل انا اقول !
ميهاف بلعت ريقها للحين ماهي مستوعبة انه اساسا داق عليها : ان شاء الله
سكر فراس السماعة مباشرة .. وغادة مازالت تتمعن بمكالمته اللي بعدها مباشرة رفع السماعة يدق على رقم ثاني ... بدأت رنيم في البكاء .. رفع عيونه بحده لها مباشرة : ممكن تسكتينها ؟!
غادة ارتبكت وهي تهزها وتهمس باذنها : خلاص ماما
كان مستمر في التحديق فيها لحد ما سكتت رنيم وغادة تحس كلش فيها يرجف وهو يحدق .. اول ماسكتت نزل عيونه لجواله ورفعه لإذنه وقال مباشرة : شصـــاير ؟!
لؤي تنهد بضيق : جالس أخذ درس في الحياة ان كلامك كان صح
فراس بضيق : عرف ؟!
لؤي : لا ... ليته عرف هذا اللي مخوفني ردة فعله كانت قاسيه وهو ماعرف .. مجرد عرف عن وظيفتي كيف لو يعرف ؟
فراس بهمس : ما اظن ينفع اقولك اني قلت لك بهالحالة
لؤي : .........
فراس : وهي ؟!
لؤي : هي بالكويت ... ماكلمتها الا مرة للحين ومو عارف شاسوي ابي ارجع لها بس أبوي معند
فراس : شوري ؟!
لؤي : دايم شورك يحتاج شجاعة وانا رخمة !
فراس : دامها خاربه خاربه قول لأبوك كلش .. مايحتاج تصدمه مرتين
لؤي : قلت لك .. انا رخمة
فراس : اللي رخمة مايتهور مثل ما انت تهورت .. معناها طلقها واترك كلن بحاله
لؤي : تقدر تقنع ابوي يرجعني للكويت ؟!
فراس : اذا بقنعه .. راح تكون تحت مسؤوليتي يعني زواجك تحت مسؤوليتي
لؤي : يعني لا ؟!
فراس : هذا انت فهمتها ..
لؤي : مالي الا الصبر لحد مايتركني ارجع للكويت
دق جـواله الثاني .. رفعه يشوف الاتصال : لؤي اكلمك بعدين
سكرها مباشرة ورد : ايوه !
: اهلين .. رصدناها بشاليه بسويسرا
فراس : أرسل العنوان لي اللحين .. وجهز سيارة تاخذني اول ما اوصل عفوا سيارتين مو سيارة
: حاضر
سكرها وهو يشوف المتصل " اسماء " رد : هلا اسوم
اسماء بحماس : متى رحلتنا !؟
فراس : ما نقدر اللحين ..بعد زواج بدر
اسماء : باقي على زواج بدر شهر كامل يمدي !!
فراس : طيب مشغول مقدر اللحين بعدين ..
اسماء بقهر : كنت عارفه انك كالعادة تسلك لي ولا ماعندك نية من أول تسفرني !!
فراس بحده : اسماء !!
اسماء : خلاص مع السلامة
سكـر السماعة وتنهــد لازم يدق على عمه .. ووراه البنك يحول مهر بدر ومليون شغله فوق راسه ..كانت غادة تراقبه وهو ماوقف مكالمات حاست بفمها ( اجل هذي قيمة انك تكون هامور السوق )
***
خـلص نايف شغله بملل وهو فعلا كاره هالدوام مر على أبوه ودخل دون يطق الباب : انا طالع !
ابو نايف دون يرفع عيونه له : بدري ؟!
نايف وهو طالع : بكمل بكره انا طالع وبس
دخل مكتب ابتسام ماحصلها عقد حواجبه .. مر من عنده موظف : تدور عن المدام ؟!
نايف : ايه تعرف وينها ؟!
الموظف : غريبة ماتعرف .. استأذنت قبل ساعتين وطلعت
نايف : اهـا .. خلاص يعطيك العافية
طلع بسيـارته ودق عليها ماترد عليه .. له كم يوم حالته متأزمة معها ماتكلمه واذا كلمته تكسر عظامه بكلامها لدرجة صار معد يتجرأ يكلمها احيان ... دخل البيت بضيق وماله نفس يجي اصلن بس محتاج كم غرض تافف : الواحد يزعل يوم يومين .. مو أسبوع يا ساتر ..
طلعت من المطبخ وهي تحط الغداء على الطاولة .. التفتت له ببرود : تغدا !
نايف تنهد : ببدل وبنزل
صعد وبـدل ولبس لبس طلعه .. ماعنده نيه يجلس بهالبيت ضاق به الأكسجين هنا خصوصا انه ماتعود يتعب نفسه مع زعل احد .. نزل وجلس وكانت جالسة قدامه على الطاولة ومجرد قدامها كاس عصير عقد حواجبه : فين غداك ؟!
ابتسام دون تطالعه حتى بنفس النبرة الباردة : تغديت
نايف حمد ربه ردت عليه بالعادة تحقره .. ماكان متوقع رد اصلن لما سالها او توقع تعطيه كلمه تسكته قال يحاول يلطف الجو : كأن الأكل حار شوي ؟!
ابتسام رفعت راسها .. وقفت وسحبت الصحن من قدامه نايف فتح عيونه ومسكه من الجهه الثانية : شنو !
ابتسام سحبته منه وهي ترميه بالزبالة : الزباله تستــاهله اكثر منك !
مامداه يرد صعدت لفوق .. شد على قبضته : انا وش يلقفني احاكيها ! لو تاركها مع حالها ابرك لي ! نفسية بجد
وطلع وهو يرجف الباب وراه .. ودق على بـدر : وينك ؟!
بدر : انا عند عبد المجيد .. تجي ؟!
نايف : دقايق واكون عندكم
***
دخل هيثم شقته بعد اسبوع منقطع عنها .. وماحيطول محتاج يبدل وكم غرض وطالع رفع بلوزته ورماها طاح من جيبه ورقة .. اخذها كان أعتراف اسماء جلس على سريره وهو يقرا الورقة بتمعن " خصوصا انه واضح للكل " .. من الكل ؟! اهلها ؟! معقولة ! لا مو لهالدرجة حتى لو اذا البنت فالتها ... قال بنبره متنرفزة يكلم نفسه : طيب تعترف وتختفي اسبوع ؟! " رمى الورقة " حمد الله والشكر !! فجأة لبست العقل وصارت ثقل
دخل الحمـام وبدل ملابسه .. اول ماطلع من الشقة وقف بنص الممر ورجع يفتح الباب ويدخل ويآخذ الورقة ويدخلها بجيبه ويكمل طريقه
أول ماوصل المستشفى وقف عند الإستقبال : سعاد !
سعاد وخدودها مورده من نبرته باسمها : اهلين دكتور
هيثم بتوتر وهو يحك ذقنه : تعرفي .. البنت اللي دايم تجي تسأل عني ماجت هالأسبوع ؟!
سعاد بضيق : ايه المزعجة ..؟!
هيثم : ايه المزعجة
سعاد : لا ماشفناها والله هالفترة الظاهر ملت
هيثم : اها .. اوك
كمل طريقه لشغله " لما تحصل شخص خطفك من نفسك ؟ " : واضح خاطفك من نفسك .. والله هالحريم بياعات حكي !
ضرب فيه شخص وهو يمشي مستعجل وضرب في راسه نفخ بعصبية : اعمى ماتشوف !!!
طالب طب بارتباك خصوصا ان منصب هيثم عالي هنا ويتمنى يتعلم منه : آسف استاذ مانتبهت لك
هيثم وهو ماسك راسه : اقول حل عن جوي
وكمل طريقه .. الطالب : غريبة معصب !
***
سـارا :-
كانت راجعة من دوامها وتحس بتعب فضيع .. نفسيا وجسديا استقبلتها هيفاء اللي جالسة على الكنبة قدام التلفزيون : جيتي ؟!
سارا بانهاك : ايه .. داخله ابدل ثم نتغدا
هيفاء : اوك
دخلت سارا غرفتها .. وهي تستنشق ريحته بالغرفة ريحة بخور ومسك حست حاجة تنغزها بقلبها وقت استنشقت ريحته مسكت صدرها وهي تحاول تهدي النغز : صاير شي .. صاير شي اكيد ..
طلعت جوالها من شنطتها وبمحاولة متأكدة من فشلها ... نزلت جوالها بضيق لما مارد ودخلت تحت الموية بضيق وبدلت وطلعت .. جلست على طاولة الأكل .. هيفاء بضيق : مارد عليج للحين ؟!
سارا بهم هزت راسها : .........
هيفاء : والله ماودي اضايقج السوري بس كثير رفيجاتي تزوجن سعوديين وصار معاهن نفس المنوال
سارا بغصة : لؤي غير ..
هيفاء : ان شاء الله ... بس طريقته هذي ماتطمن فاذا بتسمعي كلامي ..
قاطعتها سارا بعصبية : ماراح اسقطه ماراح اسقطه ! لعد تتكلمي بهالموضوع واللهي راح ازعل !
هيفاء تنهدت : مو عارفه شنو اقولج ...
سارا بتردد : رقم ولد عمه عندي ...
هيفاء : مو دقيتي على بيته وعصب ؟! تدقي كمان على ولد عمه !
سارا : ولد عمه يدري .. عن زواجنا ..
هيفاء بقهر : مو فاهمة كيف انتي للحين متعلقة فيه اساسا عقب كلامه لج
سارا : فيه صوت داخلي يقولي اصبري اصبري .. دايم فيه امل بقلبي .. يمكن عنده عذر
هيفاء : ياحبيبتي اللي يبغى يضل معاج راح يلقى مليون طريقة .. واللي يبغى يتركج رح يلقى مليون طريقة لاتضيعين حياتج تتمسكين في واحد مهملج
سارا : مو مهملني !! خوفي بس يكون ابوه عرف
هيفاء : جربي دقي على ولد هالعم يمكن ينفعنا !!
سارا وهي تتذكر كلامه وطريقته العليا : لا لا هونت .. هذا مايحشم ..
هيفاء : وبعدين معاج انتي ؟!
سارا تغير الموضوع اللي جالس يطعن فيها : راح اروح لموعدي .. تروحي معاي ؟!
هيفاء : طبعا .. بس ولدج هذا لازم يعرف اني نفعته أكثر من ابوه
سارا : ان شاء الله بنت
هيفاء : شدعوه تفائلي وقولي صبي ان شاء الله
سارا ابتسمت بألم : لؤي يحب البنيات اكثر
هيفاء : يوه اللي يجي من ربج يا مأحلاه
***
أسماء حاطه رجل على رجل تبرد اظافرها .. وميهاف تطالعها بنص عين وهن جالسات بغرفة ميهاف : ممكن اسألك مرة ثانية وش جالسة تسوين هنا ؟!
اسماء : انا اشكل خطر على نفسي .. عشان كذا ما أجلس لحالي عشان اعقل شوي
ميهاف عقدت حواجبها : وللمرة الثانية مافهمت !
اسماء : الزبدة اني لو اجلس لحالي راح اودي نفسي لمذبحي .. عشان كذا بروح معاكم وانتوا تشترون اثاثكم
ميهاف : حياك والله ..
اسماء : غصب عنك
ميهاف : عن الغلط عاد !!
اسماء : افففف وينه بدر تأخر ؟!
ميهاف : مدري عنكم .. مو جاي معاكم
اسماء : ايه حطنا وقال مشغول شوي وبيرجع
ميهاف طالعت خاتم اسماء الألماسي : صح اسوم دايم اقول بسأل عن هالخاتم .. مرة جميل من وين ؟!
اسماء : ايه هذا .. هدية من بدر اتوقع قبل كم شهر بصراحة نص اغراضي اللي يسألوني عنها الناس هدية منه
ميهاف : دايم يهدي يعني ؟!
اسماء : من جدك .. كل ماغاب عنا كم يوم جاب .. مو فراس يغيب شهور ومانشوف منه شي
ميهاف : حرام عليك تقولين كذا .. واضح انه مشغول وبدر فاضي
اسماء : والله اللي يبي يهدي بيهدي .. وكمان فراس فلوسه اكثر من بدر
ميهاف : اقول خل ننزل لأمي وامك تحت
اسماء : لا مابي !
ميهاف : ليه ؟!
اسماء : أمي تسولف عن سجى
ميهاف استغربت : ليه ؟!
اسماء : امي ناوية تخطبها دون يعرف فراس .. وتحطه قدام الأمر الواقع
ميهاف فتحت عيونها : من جدكم ؟!
اسماء : اندري عنهم ! ذالبزر مدري وش شايفين فيها
ميهاف : مو كذا .. سجى والنعم فيها بس وش هالنظام بتظلمون الأثنين سوا
اسماء : روحي فهمي أمي .. مالقت الا فراس بيسكت لها والله مايتزوجها اخوي واعرفه
ميهاف : والله غلط مرة
اسماء : كيفهم يسوو اللي يبغوا
***
بيت عبد المجيـد /
عبد المجيد : زواجك الشهر الجاي خلاص ؟!
بدر والبسمة شاقه وجهه : ايه ولاتخاف عازمك
عبد المجيد : والله تعزمني انت ولا بنت خالي المزة جعلها تسلم بتعزمني
بدر : اقول احترم نفسك .. لاتجيبها على لسانك حتى
عبد المجيد يقهره : رقمها موجود .. ادق عليها وتعزمني مباشرة عاد بدق مرة وحده اعتذر عن آخر صدفه بينا
بدر فتح عيونه : وش صدفته ؟!
عبد المجيد : آخر عزيمة ببيت خالي عبدالرحمن طحت فيها
بدر ضيق عيونه : وانت جالس تقزقز ؟!
عبدالمجيد وصل لهدفه واضح ارتفع ضغطه : خلاص هد يخي مامداني حتى اشوفها .. دخلت على طول
بدر بكبر : شف وفتح عيونك مايهمني .. بس وقت تشوف اعرف ان اللي جالس تشوفه حلالي ومالك الا تقزقز من بعيد
عبد المجيد : وراك كبرتها .. ترا طيحه عادية
بدر : انت النجس اللي جايب الطاري احفظ لسانك
عبد المجيد : اوك آسف .. " التفت لنايف وقال بصدق " اسف نيوف سامحني مو قصدي اتكلم عن اختك كذا
نايف اللي كان شارد : هاه .؟ لا عادي
بدر : شفيك نايف ؟ منت على بعضك
نايف : إلا معاكم مافيه شي
عبد المجيد : صدق ؟ اجل وش كنا نقول ؟
نايف : كنتوا تناقشون بيت بدر ..
طالع بدر وعبدالمجيد ببعض ثم طالعوه : صاير معاك شي .؟ ماخلصت اجل مشكلة لؤي ؟
نايف فرك عيونه : لا بس صاحي من فجر ..
عبد المجيد : وش الله حادك على العنا .. كان ارتحت شوي
نايف وقف وهو ماشي لبرا : استأذنكم ..
قبل يركب سيارته كان بدر قدامه : شنو بعد ؟
بدر فتح باب السيارة : انا بسوق .. انت دايخ ماينفع تسوق اركب
تنهد نايف وركب ... بدر : على وين ؟! بيتك ؟
نايف وهو يطالع النافذة : حطني عند شركة أبوي
بدر : مو تعبان من الشغل .؟! وش صاير فجاة صرت تحب الشغل
نايف سكت ماعلق : .................
بدر : او صاير شي ببيتك .. " كمل بروقان " لايكون متهاوش مع المـدام ؟!
نايف : ......................
بدر : من جدك ؟ ما اعرفك يشيل معك زعل احد امك وابوك يزعلون عليك شهور ماتهتم
نايف : وانا قلت اني متضايق .؟ تعبان وابي انام
بدر : وبتنام بالشركة ؟!
نايف بنرفزة : خلاص ودني البيت .. انبسطت ؟!
بدر : نايف انا خويك تكلم .. شفيك ؟! عرفت عن نهى ؟
نايف : تقريبا
ابتسم بدر : ومتضايق لأنها زعلانه عليك ؟!
نايف : قلت لك مو متضايق !!
سكت بدر لفترة ... بعدها قال : يوم 28 يناير 2015 الساعة 5 مساء بهاللحظة نايف صار يحب
نايف طالعه بنص عين وهو متسند على المركى بينهم : .................
بدر وهو مبتسم : لا تطالعني كذا ولاتستحي قدامي .. هذا الحق البنت جابت راسك
نايف : لا تخرف بدر وربي مزاجك خرا ..
بدر : اوك . . تذكر كلامي هذا بعدين
نايف : يمكن اهتم فيها .. بس طبيعي البنت ماقصرت معاي بس مو حب فانثبر
بدر : ماقلت شي بنثبر بس قابلني بعد ماتستوعب
رفع نايف جواله ينشغل فيه ويتجاهل كلام بدر ... أول ماوقف قدام بيته فتح باب السيارة وتنفس براحه وكأن الجو داخل كان كاتمه أول مادخل للبيت صعد لفوق أول مادخل غرفته عقد حواجبه وهو يشوف حرمتين موجودتين وحده تشتغل بشعر إبتسام والثانية مكياجها طلع وسكر الباب جاه صوتها : نـايف ؟!
نايف : ايه .. ليش ماقلتي لي ان عندك ضيوف ؟!
ابتسام : طيب ليش طلعت .. " كملت بسخرية " لايكون تستحي ؟! اقول ادخل واترك الشرف لأهله حبيبي
وقف نايف مصدوم من كلامها : لكلش حدود إبتسام !
انفتح باب الغرفة وهي واقفة قدامه بكامل انقاتها .. انصدم نايف وهو يشوفها واقفة وماعندها مانع يشوف اللي وراها عقدت حواجبها : ليش كل هالصدمة ؟! جالس تشوف حاجة غريبة عليك يالمحترم
مسكها من معصم يدها وسحبها وراه وهو ينزل الدرجات حتى صاروا لحالهم بالصالة وافلت يدها لما صارت قدامه : معك حق ! ماعمري احترمت ان بنت محرمه علي ... عارف ! بس ع الأقل كنت مستعد احط لنفسي حدود عشانك !! مايبين بعينك يعني ؟!
ابتسام : لا تضحكني .. اشوفك احترمت نفسك قدامي بالمالديف , ايه مايبين بعيني خصوصا وانت تخدع نفسك والهبلة اللي انت متزوجها
نايف : وش جاب اللحين ؟! مر عليها شهور انا نفسي نسيتها
ابتسام : لا مانسيتها .. بس لأنك متعود عليها ..
نايف صرخ فيها : قلت لك اني غلطان ! وش اسوي بنفسي عشان ترضين !! ماتركت حاجة ماراضيتك بها !! هدايا ؟ حقرتيها .... ٍسفريات ؟ رفضتيها !! اموت يعــني ؟!!
ابتسام بقهر والعبره خانقتها : انا طالعة معزومة لزواج .. ووقت ارجع وافك فستاني راح يكون فيه ريحة رجال او علامة برقبتي .. اوك ؟! ووقتها راح اسألك اذا كان هدية راح ترضيك ؟!
نايف والإرهاق واضح فيه .. اردع جسمه حتى استرخى على الكنبة ومسك راسه وابتسام مسحت دمعة انسابت على خدها : مدام نقدر نمشي ؟!
ابتسام التفت لصوتهن جاي من فوق التفتت لنايف : قوم لمكان ثاني لو سمحت .. عباياتهن هنا
نايف طالعها ... ابتسام ردت على نظرته وهي تطالع الأرض : عشانهن مو عشانك .. مايستاهلن بنات ناس محترمين ينعرضن قدامك
زفر نايف بتنهيدة طالعه من قلبه .. ومشى ناحية باب البيت وطلع وابتسام اول ماطلع جلست على الكنبة وانسابت دمعة يتيمة على خدها دق جوالها .. تنهدت ومسحت دموعها وردت : هلا خالتي
ام نايف : هاه جاهزة ؟ تأخرنا على الجماعة
ابتسام : يله مسافة الطريق وراح اكون بالفندق ان شاء الله.. ميهاف معاكي ؟
ام نايف : لا ميهاف طالعة مع زوجها واهل زوجها تشتري لبيتها
ابتسام : الله يوفقها .. اوك جايتك
سكرت ولبست عبايتها وطلعت وهي من داخلها تحاول تثبت نفسها وتلم شتاتها
***
اسماء : لا وععع وش هالخياس !
بدر طالعها وهو صابر عليها له ثلاث ساعات تذم بكلش يختارونه : يمه خذي تاكسي وارجعي انتي وياها للبيت
ام فراس : هاو وانا وش ذنبي ؟!
بدر مد اصبعه بتهديد : اسوم قسم بالله لو ماتبلمين لأدق على السواق يجي يرجعك للبيت
اسماء برجاء : لا تكفى لا... بتندم لو ترجعني
بدر : صدقيني ماحندم
اسماء : لأنك ماتعرف وش جالس يصير براسي .. اتركني جمبك احسن لك
ميهاف عقدت حواجبها : شفيك انتي ؟!
اسماء تاففت : رايحه للكافي اشرب قهوه انتو كملوا
بدر : من اول يختي
بدر غمز لأمه : يمه الحقيها لاتسوي مصيبة .. مو صاحية هذي
ام فراس : هي المصيبة ولا أنت ودك تطردني ؟!
بدر : هههههههههههه الله يطول لي بعمرك بس
ام فراس : يله لعيونك انت وميهاف .. اجلسوا شوي لحالكم اختاروا
ميهاف عضت ع شفتها وهي تشوف ام فراس تلحق جهة اسماء .. طالعها بدر وهو يمد ذراعه لها : يلا ؟
ميهاف مشت دون تعلق بذراعه .. مسك بدر يدها ورجعها : ماد ذراعي للجدار انا ؟
ميهاف وهي تطالع حولها : والله احراج
سحب بدر يدها وعلقها بذراعه : ايه كذا مضبوط .. يله وش ودك تختاري للمطبخ ؟ولا اقولك هذا اتركيه للطباخ
ميهاف وهي متوترة من معاملته : ممكن سؤال ؟!
بدر : تفضلي
ميهاف : فين راح نسكن للحين محد علمني ..
بدر : الدور فوق بيت اهلي .. مو ابوي الله يرحمه بحياته باني دور ثالث للي يتزوج منا
ميهاف بضيق : ايه .. بس انا مو حابه
بدر : وليش ان شاء الله ؟
ميهاف : دون تتضايق .. ما أبي اكون قريبة من أهلك ولا أهلي مو انت قلت مايتدخلوا
بدر : ماراح يتدخلوا
ميهاف : بس راح يعرفوا اذا طلعت واذا رجعت واذا عزمت
بدر : وإذا ؟!
ميهاف : لك فترة ترا تغلط وانا ما اقول شي واسامح .. اقل شي ابغاه هو بيت لحالنا بعيد كإعتذار
بدر طالعها لفترة بعيونها الفاتنة : خلاص من عيوني .. راح اعطي المقاول خبر يدور لي فيلا
ميهاف : بجد ؟!
بدر : يب .. كم ميهاف عندي ؟!
ميهاف : لا أنت مو طبيعي اليوم وش هالرواقة ؟!
بدر : انا ماعمري تضايقت الا لسبب .. شايفه فيه حاجه تضايقني اليوم ؟
ميهاف : واللهي احيان دون سبب تسوي مشكلة
بدر : اعصب يعني ؟!
ميهاف : لا لا .. ماصدقنا مزاجك يتعدل تكفى
بدر رفع حاجبة : على فكرة ! تعالي .. هذا عبد المجيد من وين شايفك ؟!
بلعت ميهاف ريقها ( طريت عليه المشاكل .. ليتني ساكته ) : عمتي دقت علي افتح لهم .. لما طلعت كان بوجهي يعني بشكل طبيعي
بدر : لا طبيعي ولا غيره .. لعد تمشي الا بطرحتك اذا كذا !
ميهاف : ان شاء الله
بدر : والله لو يجيني مرة ثانية احد ثاني يتكلم انه شافك لارجع فيكي انتي
ميهاف : وانا ايش دخلني صدفه والله !
بدر : المهم انا حذرتك عشان ماتلوميني اذا جيتك أتكلم
ابتسمت ميهاف دون شعور على غيرته .. واشرت على قطعه : شرايك بهالطاولة ؟!
بدر : والله انا مو عاجبني شي هنا .. مابي اشتري بيتي من هنا باشتريه من برا
ميهاف : بس كذا بيطول
بدر : ادفع لهم عشان مايطولون
ميهاف : براحتك .. اللي يريحك
بدر : اجل خل نطلع .. وش يجلسنا هنا نص بضاعتهم خراط
ميهاف : يله اجل ندور امك واسماء
بدر : روحي لهم انتي .. انا ثانية عندي مكالمة
ميهاف : اوك
بدر عض على شفته : نسيت جوالي بالسيارة .. هاتي جوالك
ميهاف طلعت جوالها من شنطتها وعطته اياه .. بدر فتح جوالها وقبل مكالمته وقبل كلش توجه لسجل الكالمات طارت عيونه وهو يشوف مكالمة " ولد عمي فراس " ومدة المكالمة 7 دقايق والمكالمة من طرف فراس ( وش يبي فراس داق عليها ) ! ماتعب نفسه يفكر دق مباشرة من جوالها على فراس .. جاه الرد مباشرة : هلا والله
بدر : .................
فراس : ميهـاف ؟!
بدر : هلا فراس
فراس باستنكار : بدر ؟!
بدر : ايه بدر .. كيفك ؟!
فراس وهو يمشي : حمدالله .. ماعندك جوال تدق معه ؟!
بدر : معاي .. بس بسألك وش داق عليها تقول ؟!
فراس : مايخصك .. مو انت اللي بتحاسبني على مكالماتي
بدر : ناسي انها زوجتي ؟!
فراس : ناسي انها زوجة اخوي ؟! وقبل يطيح حظها وتصير زوجة اخوي كانت بنت عمي
بدر عقد حواجبه : ماحتقولي يعني .. هي موجودة باسألها
فراس : اسأل .. بس لو اعرف انك مطول لسانك وقتها قص هاللسان بيكون على يدي
بدر : حولت لها المهر ؟!
فراس : ايه حولته .. شي ثاني ؟
بدر : لاتنسى تحضر العرس .. ولعد تدق عليها رجاء مهما كان زوجتي ومايرضيني
فراس : ان شاء الله ما اضطر ادق عليها .. ولا ترا ماعندي حماس اكون بينكم
بدر : اجل خلك بعيد
فراس : اقول دامك دقيت .. بدل هالحكي اللي زي وجهك وقف مع عمي وحاول تهدي المشكلة
بدر : وش مشكلته ؟! .... ااااه قصدك لؤي !
فراس : ايه قصدي نسيبك لؤي
بدر : والله مو عارف المشكلة اساسا
فراس : ونعم ولد العم ..
بدر : والله ابعد عن الشر وغنيلوا .. وش لي بوجع الراس
فراس : يله انا بسكر .. طوط طوط
سكر بدر السماعة وراح لطاولة أهله وحط جوال ميهاف قدامها وقال وهو ماشي : انا بالسيارة لاتطولون
ام فراس : تعال اجلس معنا
بدر : مستعجل وراي مشوار
ام فارس : بنات قوموا اجل
اسماء : تو اشرب قهوتي !
ام فراس : خذيها معك .. بتأخرين الرجال عشان قهوتك
اسماء سحبت كوكيزها وقهوتها .. وطلعوا وركبوا وطول الطريق ام فراس هي اللي تسولف ومحور الحديث وقف بدر قدام بيتهم نزلت ام فراس واسماء ...بدر : اركبي قدام
ميهاف : غريبة موصلهم قبلي
بدر : لأني ابيك بكلمة راس
ميهاف ركبت قدام : وش كلمة راسه ؟!
بدر : اشوف بسجل مكالماتك فراس داق عليك .. خير ياطير ؟
ميهاف بطبيعية : ايه ؟ يبارك ويقول اذا احتاج أي شي وكلام كذا ...
بدر : اها .. اليوم مابي اعكر عليك بس هي كلمة وحده لايصير بينكم مكالمة مرة ثانية , أوك ؟
ميهاف : هو اللي دق على فكرة .. انا مالي دخل
بدر : فيه خيار اسمه رفض المكالمة
ميهاف : فشلة ! اخوك وش هالعقل وش بيقولي يعني !!
بدر : هذا عقلي طيب .. يضايقني الموضوع خصوصا ان فراس بيده كلش مابي تصبي علومي عنده
ميهاف : ع بالك اني جالسة انقل اخبارك ؟!
بدر : ماقلت كذا .. بس يمكن يجي عارض بالكلام
ميهاف تنهدت : تطمن .. بس داق يبارك وبس وانا نفسي استغربت
بدر : خلاص بارك لك وانتهت .. ما اظن بينكم مواضيع اكثر من كذا
ميهاف : قولتك ..
بدر : شوفي ترا مابي امدح نفسي بس والله اني طيب .. لكن عمى عيني اللي يخالف كلامي واتوقع واجب الزوجة تطيع زوجها
ميهاف طالعته بنص عين ... بدر : عندك راي ثاني ؟!
ميهاف رجعت تطالع الطريق : لا طبعا ..
وصل بدر لبيت أبو نايف ونزلت ميهاف .. وهي تحاول قد ماتقدر تمشي هالعلاقة اللي طاح قلبها فيه ضحية ,
***
هـيثم واقف قدام الفندق .. وهو مستغرب انها طالبه منه يجي ياخذها بعد فترة طلعت وركبت : السلام عليكم
هيثم وهو يحرك السيارة : وعليكم السلام
ابتسام : عسى ما أشغلتك ؟!
هيثم :لا أبد بس فين نايف ؟
ابتسام بطبيعية : اكيد نايم .. الوقت متاخر وما احب اركب مع السواق بهالوقت
هيثم : اهـا .. من هذا زواجه ؟
ابتسام : وحده من صاحبات ام نايف .. تبي احد يروح معها وميهاف بنتها مشغولة فاخذتني
هيثم : اهـا ..
ابتسام : شفت لك هناك مزز .. ماودك بوحده تكمل بها دينك ؟
هيثم : ومزة هي الصفة الوحيدة ؟! وش اسوي بحالي اذا طلعت غبية ولا مجنونة
ابتسام : معك حق
هيثم : اختاري كويس المرة الثانية
ابتسام : واضح تسلك لي .. لو اجيبك الكاملة المكلمة ماراح تاخذها
هيثم : لا شدعوة ؟ فيه احد يعيف الكمال ؟ بس مو الكمال الشايل خشمه اهم شي العفوية
ابتسام : اوه هذول نادرات ..
هيثم : وصلنا انزلي ..
ابتسام : يعطيك العافية على التوصيلة
هيثم : ولا يهمك
نزلت ابتسام ودخلت البيت ... ماكان موجود تنهدت له فترة ما تأخر برا البيت بس احسن يجلس وراه صعدت لغرفتها ورتبت نفسها ونامت مباشرة ..
***
غـادة شادة على اعصابها طول الطريق ماغفت عيونها ... لحد ماوصلوا نزل فراس واشر عليهن طاح قلب غادة لما توجهت اصبعه ناحيتها : رافقهن بالسيارة الثانية للفندق ..
ارتاحت لما عرفت انهم واضح بينفصلون .. اعصابها كلها مشدودة ورجلها ما تشيلها وقت تكون حوله : .......
فمشت بهدوء وركبت السيارة مع لورا .. بينما فراس ركب سيارته وتوجه للمنتجع وهو يدعي ربه يطرحه فيها لكن ما استجيبت دعوته وقت استقبله زوجها وسلم عليه باحترام وهو يعرفه .. اشتغل معه بكم صفقة وهذا اللي موتر الموضوع وكان الموضوع مرتب ان اللقاء صدفه : كيفك ياشيخ خالد ؟!
خالد : حمد الله مبسوطين ... ما شاء الله وش تسوي بسويسرا
فراس : شغل .. وانت شتسوي هنا ؟
خالد : شهر العسل
فراس : ما شاء الله تزوجت .. الف مبروك
خالد : هههههههههههه يبارك فيك
فراس : معقولة ياشيخ ماتعزمنا ؟!
خالد : صار كلش على عجل ومختصر .. وماكنت وقتها بدبي
فراس : لا مايمشي الموضوع كذا .. عازمك انت والمدام لحفلة على شرفكم
خالد : ماله داعي كلافة
فراس باصرار : لا ياشيخ ماتمشي السالفة كذا .. انا مصر خلاص موعدنا الليلة
خالد : خلاص انا بس انفع .؟! المدام مين تجلس معاه ؟
فراس : تقدر تجلس مع مرافقتي
خالد استغرب : من متى تتعامل مع مرافقات ..
فراس كان فاهم انها ماراح تمشي كذا .. خالد عارف نظامه رجاجيل : معرفه قديمه .. اتوقع كذا انحلت ؟!
خالد : ايه خلاص تمام نقابلك الليلة اجل
فراس : على خير ان شاء الله
رجع فراس وركب مع سايقه : الفندق ..
فتح جواله ودق على مسعود : الضيفة موجودة بالفندق ؟!
مسعود : ايه تو وصلنا الثنتين موجودات ..
فراس : دق على اقرب مصممة تجي تاخذ مقاساتها .. وترتب لي شكلها لليلة
مسعود : حاضر
سكـر فراس السماعة وكلش فيه يصبر نفسه لبكرة .. بكرة بيشوفها اخيرا القدر وافق على لقائهم ..
عنـد غادة شهقت لما شافت قدامها حرمة .. ومسعود جمبها : اتركيها تاخذ مقاساتك !
غادة : وليش ان شاء الله ؟!
مسعود : رجعنا لطولة اللسان !!
غادة : وانت رجعت لقلة الحيا .. اشوفك قدام معزبك حاشم نفسك ولا راح تتطاول
مسعود : والله هذي أوامره .. اجلسي لين يجي بنفسه وتتأكدين
غادة : والله انا ما اسوي شي قبل اعرف ليش .. عطني السبب وقتها اوك !
مسعود : الليلة فيه مناسبة .. وشكلك يبي ترتيب
غادة : وانا شدخلني بالمناسبة ان شاء الله !
مسعود : وقت يقول طال عمره ان لك دخل معناها لك دخل !! سامعة ؟"التفت للمصممة " خذي مقاساتها
غادة تراجعت لورا ... مسعود بطولة بال وهو يحس انه بيقتل هالبنت : ادق عليه يعني ؟!
غادة برعبه : لأا !
مسعود : يعـــني ؟!
غادة بتردد : طيب وش وضع هالمناسبة ...؟
مسعود : وش يعني ؟!
غادة : لا تقول مختلطة ؟
مسعود : حنا بسويسرا وش تتوقعين !!
غادة : تكفى مابي ..
لورا اللي كانت تتابع بصمت : احسن لك بتسمعي الكلمة .. لانوه اذا مامشيتي بالطيب راح يمشوكي بالغصب
غادة بقهر : مابي ! وانا شدخلني والله ماغلطت ولا سويت شي
لورا : وقت حصلكي ببيتي انكتبتي مجرمة
غادة : وليش يالغبراء !! انتي وش وراك وش مسوية الله يسود وجهك !!
انتبهت فجاة لمسعود السماعة باذنه ويتكلم : طال عمرك .. نستعمل العنف ؟!
فراس : شصاير ؟!
مسعود : الضيفة رافضه !
فراس : وش هالضعف مسعود .. من متى رافضة هذي تمشي عندي !
مسعود : تكلمها ؟!
فراس عصب : فاضي انا اداري بزران !! مسعود الظاهر بخاطرك تنطرد !! مو عارف تحكم بزر ؟ على شنو موظفك اجل !!
مسعود جت براسه : خلاص حاضر
سكر السماعة والتفت لغادة بعصبية : الظاهر انتي ناوية تحديني لأقصى ماعندي !
غادة بسخرية : كرشك المعزب !
مسعود : عطاني اذن استعمل القوة .. راضية ؟
غادة فتحت عيونها : شنو ؟!
مسعود : كيفك انتي ..
غادة بخضوع : زين ...
مسعود : انا طالع بس لو اسمع انك مزعجه المصممة وقتها انا اللي باخذ مقاساتك
غادة فتحت عيونها : تخسى يالأرهط !
مسعود وهو منقهر منها ومن لسانها الطويل وحكيها اللي مايفهم نصه مايدري ليش مهمته تكون معها دايم : ..
ابتدت مهمـات المصممة والمكياج والتغيير الكـامل .. ورفضت تماما أي لبس عاري يطلعونه لها وبعد معاناة قدروا يخلصون معها .. طلع شكلها النهائي بفستان عفيف ابيض بأكمام طويله وطويل لتحت الكعب شعرها الطويل لخصرها طالع مثالي مع حشمة ثوبها ... طلع شكلها الكامل انيقة وجميـلة بشكل مايوصف .. حتى انها زعلت على نفسها لما شافت نفسها بهالشكل .. مفروض تنبسط وقت تكون بهالكمال .. بس ماتقدر الا تزعل على حالها اللي انقلب .. وصار وضعها تطلع بهالشكل قدام الكـل .. مسحت على الثوب بيدينها ..
لورا : طالع بتجنني
غادة التفتت لها بعيون دامعة : كله منك
لورا : ايه طبعا .. هالجمال كله لأنك بنتي
غادة بعفوية وقهر : لا حبيبتي طالعة لأبو.... " مسكت لسانها وهي تعض على شفتها وتمسكها نفس اللوعة لكل مواقفها مع أبو هيثم " انقبض قلبها وكلش فيها وهي تسمع صوته برا : وينهـا ؟!
: داخل طال عمرك
فراس : خلصوا ؟
: ايه طبعـا ..
غادة كانت عازمة لما يوصل تكلمه وتطلب منه يعفيها من هالطلب .. بس كل شجاعتها تروح وقت يكون يجي الصدق .. انفتح الباب ودخل الغرفة رجعت لورا خطوتين تلقائيا حتى صارت جمب رنيم المنسدحة على السرير : ..........
فراس مشى حتى صار بنص الغرفة وهو يمسح بعيونه عليها من فوق لتحت : تمام كذا
غادة شدت على قبضتها وسط نظراته : ..................................... !!
فراس التفت لمسعود : يله السيارة جاهزة مشينا
غادة تشجعت وقالت بتردد : لـوين ؟!
فراس أول مرة يسمع صوتها .. التفت لها : راح يشرح لك مسعود كلش بالسيارة
غادة بلعت ريقها : مقدر اترك بنتي ..
فراس طالع برنيم المنسدحة : وفروا لها حاضنة
غادة : ما ... مـ
عقد فراس حواجبه ... غادة : مافيه داعي انا موجودة !
فراس رفع حواجبه باتسفهام : تعارضين طلبي ؟ عفوا تعارضين أمري ؟
غادة : ممو كذا ..
فراس تقدم كم خطوة يمها .. ويديه بجيب بنطاله : هيه انتي انا ساكت لك من أول .. عرفت انك سعودية وسكت وصلتني اخبار انك مسببه فوضى وبرضو سكت .. من الآخر خذيها نظام الأم العاقلة وجالسة تسوقي الشرف علي وعباية وما أدري ايش وشوفني انا المسكينة ماراح ينفعك وخلي ببالك نقطة ترا مافيه شي يستهويني كثر دق الخشوم فاحترمي مكانتك وتصرفي على اساسها
غادة انعقد لسانها وهي تبلع ريقها : ............
فراس : خلي العقل والشرف لأهله لانك بعيدة عنه .. واللحين قدامي والمرة الجاية اللي اشوفك لابسه فيها عباية راح اشقها فوق راسك ...
غادة نزلت راسها وهي شاده على قبضتها قريب منها ونظراته محدقة ونبرته حادة وصارمة : ...................
فراس وهو محدق فيها : قدامي !
غادة تلقائيا مشت .. ماتدري بجد وين حطت نفسها فيه كلش فيها جالس يرجف وهي تمشي باللولبي تبع الفندق والأنظار تتجه لها باعجاب ..
ركبت بسيارة وهي تشوف يركب سيارة ثانية قدام سيارتها ... ركب مسعود قدام وهو ينطق تعاليمه : وقت نوصل هناك خليك قريبة من الرئيس .. ولاتنطقي بحاجة غبية وحاولي ماتتكلمي اساسا !
غادة هزت راسها بصمت .... ابتسم مسعود وهو يشوفها خضعت تماما وجالسة بهدوء ومنزلة راسها ... ولما وصلوا : انزلي وصلنا
نزلت مباشرة .. انتبهت لفراس واقف مكانه ويطالعها مشت بهدوء ورجلينها تقصف بها طالعها بنظرة قبل يدخل : لا يلعب عقلك كثير .. السالفة كلها اني محتاج وحده من جنس حواء توقف زي المزهرية جمبي ومو فاضي ادور !
دخل فراس وهي تمشي وراه ... ووقف مكانه لفترة وهو يشوفها ماتغيرت مجردت ازدادت قبح بعمليات التجميل الواضحة والخلاعة المعتادة جمب خالد ... اول ماشافته مشت ناحيته بجرأة ومدت يدها : اهلين .. كم لنا ماشفنا بعض 13 سنـة ؟! صاير رجال وعين الله عليك
شد فراس على قبضته وهو يحكم اعصابه ... رد : اهلا .. 13 سنة ونص مرت , بالنسبة لك ماتغيرتي
خالد : ما شاء الله تعرفون بعض
فراس وهو يطالعها : اكيد مين مايعرف ريم .. ولو سمعتها تسبق
غادة ماكانت معهم منزلة راسها بهدوء .. ريم طالعتها : مين هاي .؟ جوزتك !؟
فراس : وحده من الشارع جبتها تتسلى معك .. قلت اكيد مواضيعكم مشتركة
خالد : اكيد البنات مواضيعهن وحده
غادة ماعلقت حتى .. سلمت عليها ريم وهي كانت منقاده بهدوء ..
خالد دق جواله : انا رايح استلم هالمكالمة
ريم : ماتطول حياتي
أول ماراح خالد التفتت ريم لفراس : ماصدقت لما قالي خلودي انوه فراس الشمري عازموه .. بس الظاهر انه مازلت ماتعلمت درسك لهلأ
فراس بثقة : مافيه داعي اخاف دامك مازلتي على نفس المستوى ل 13 سنة , الخوف عليك لأني صرت فوق ماتتخيلين
ريم : لنشوف مين حيغلب مين !
فراس : مافيه مجال مقارنه .. انتي حتى مو في مستـواي !
غادت رفعت عيونها مستغربة من هالمحـادثة ... ومن لمعة الغضب بعيـونه ..

الفصل روعة
لى عودة للتعليق

رغم ان الفصل مش قصير الا انى بحس بيخلص بسرعة من الحماس
أسماء من ساعة الاعتراف وهى معتزلة هيثم ، مش عارفة هى خايفة ولا مش عارفة تتصرف ولا ايه؟ لكن واضح ان هيثم ابتدى يحبها ، لا وقاعد على نار وتعصب
وقعت يا دكتور
لؤى انا شايفة ان مشكلته مش بس فى ابوه ووضع زواجه الغريب
مشكلته شخصية ، يعنى قاعد مهموم ومابيعملش حاجة، حتى مش راضى يطمن سارا وسايبها للظنون، حاساه سلبى ع الأخر
وأخوه نايف زيه، بس اظن لأنه مش راضى يعترف بتأثير زعل ابتسام عليه لأنى أظن لو واجه نفسه هيتصرف بطريقة غير كده وهيعرف يراضيها ازاى
اللى الأمور اتحسنت معاهم بدر وميهاف ،
بالنسبة لفراس توقعت انه هيبدأ البداية دى مع غادة ،والله البنت دى اتبهدلت ع الآخر من أول الرواية لحد الوقت واتمسح بكرامتها البلاط
انا متعاطفة معاها ع الآخر
أى نعم هو يخوف بس انا نفسى تجمد قدامه شوى ، يعنى هى برضه من الشخصيات اللى مشكلتهم شخصية، ومش عارفة تتعمل مع مشاكلها وبتعقدها زيادة زى ما هربت
اظن ان بداية الفرج لها لو قويت شوية وواجهت الأمور عن كده
تسلم ايديك