السلام عليكم
بارت جميل
مادام الروايه مكتملة ليش ما تنزلي على 3 ايام في الاسبوع
شاكرة لك

" البارت التاسع عشر "

- الرجل يحب ليسعد بالحياة .. والمرأة تحيا لتسعد بالحب

بعد فتـرة من طلع بعد ماداس على مشاعرها .. انطق الباب بخفة تحنحنت : مين ؟
ام نايف : ميهاف وينك ؟
مسحت دموعها وفتحت الباب .. ام نايف مافاتها عيونها الحمراء قالت بخوف : شفيك !
ميهاف دفنت وجهها بكتف ام نايف وبكت ..: مااماا
ام نايف خافت بجد : ميهاف امي شصاير فيك .؟
ميهاف وكلامها مو مفهوم بين شهقاتها .. جلستها ام نايف جمبها على الكنبة : ارتاحي حبيبتي كلميني .. بدر قايلك شي ؟
ميهاف وهي تمسح دموعها دون فايدة : لا .. بس انا خـايفة .. خايفة ماما مابي اترككم
ام نايف ابتسمت بحنان : وهذا اللي يبكيك .؟
ميهاف : والله مو متخيلة نفسي دونك ماما مابي
ام نايف : عن الهبـال .. وانا بنقطع عنك
ميهاف :............
ام نايف : امسحي هالدموع وتعالي المعازيم جايين عشانك عيب
ميهاف : لا ماما مقدر .. وربي نفسيتي تعبانه بصعد مابي اشوف احد
ام نايف بشك : متأكدة ميهاف تبكين عشان كذا ؟
ميهاف : ايه ماما .. ليش يعني مابكي .. انتي امي من لي غيرك الله لايحرمني منك
ام نايف : ارتاحي حبيبتي اجل .. واذا حسيتي نفسك احسن حاولي تضغطي على نفسك وتنزلي مو حلوة والله
ميهاف هزت راسها .. ووقفت وسحبت رجلها لغرفتها وسكرت الباب وهي تحس نفسيتها منهارة جلست على مكتبها وهي تشوف دفترها اللي كاتبه تخطيطات زواجها وملكتها وكل شي .. رمته بالزبالة وتسندت براسها على مكتبها وهي تبكي ..طول عمرها مدلعة محد يتجرأ يقولها " لا " عشان ماتنجرح , في بيتهم ملكة الكل يراعي خاطرها وبين صديقاتها ملكة .. فين ماراحت تراعى وتدلع بشكل جدي أول مرة تنجرح بحياتها .. وقفت عند نافذة غرفتها وهي تطل على الجلسة تحت تهشم قلبها وهي تشوفه يمشي مع مجموعة شباب ويضحك ويسولف .. ما كأنه قبل شوي داس على مخلوقة سكرت الستاير ورمت بنفسها على سريرها وهي تفكر بجدية وش مفروض تسوي .. بس ماعمرها تعاملت مشكلة عشان تعرف كيف تحلها .. أكبر مشاكلها كان اذا خلص كوكيزها المفضل
بالطابق التحتي :-
اسماء : كيف تعبانه خالتي .؟
ام نايف : هههههههههه دلوعتنا تو تستوعب انها بتتركنا
ام عبد المجيد : هههههههههههه ام فراس تحملوا خذيتو دلوعة العائلة وش تبون !
اسماء وهي مفهيه : تبكي صدق يعني !
ام نايف : هي تبكي اذا ابوها رفع صوته عليها .. كيف اللحين
اسماء حاست بفمها : اتخيلني انخطب وبطلع من اهلي وابكي ! الا فكة
سجى : من جد .. اجل اخيرا بطلع اشوف حياتي واجلس اصيح .؟
ام فراس : مالت عليك وعليها .. بزع انتن
اسماء وهي تطالع ابتسام : بصراحة بصراحة ... يوما ما بطلع من بيت أهلي وراسي مرفوع دون ندم الله يعجل هاليوم بس
سجى : صح لسانك يالخايسة
اسماء : صح بدنك يالكلبة
وداد : ههههههههههههههههههه خالتي وامي معذورات لو ترمونهن صراحة
***
بيت نـايف /
كانت غادة بغرفتها كالعادة .. ماتفارقها وبيدها لعبة تهزها قدام عيون رنيم : حبو رنومة
حست بحماس وقامت تجيب عدة المكياج .. من زمان نفسها تسوي لها مكياج بس ابتسام ترفض فرصتها اللحين مسكت الروج وهي ترسمة على شفايف رنيم الصغيره الناعمة : ياقلبوس .. تمشعين قلبي انتي
طق جرس البيت .. غادة : غريبة اجل مامعهم مفتاح !
طالعت الساعة لسى بدري .. استغربت قامت وطرحتها على راسها وراحت للباب : ميـن ؟
: ..........................
غادة خافت بجد .. : ميـن ؟!
مشت بسرعة لداخل تدق على ابتسام لكن قبل توصل للجوال شخص بخفة نزل من الجدار مافكرت تلتفتت راحت تركض لداخل تلحق على نفسها اكيد حرامي ! قبل توصل لغرفتها حست شخص يسحبها من الخلف ويحضنها وهو مطوق يدينها وهمس باذنها .. همس تعرفه كويس : وحشتك ؟
غادة صدرها يصعد وينزل بعنف : ا .. ا حـممد ..
احمد : زوجتي الوفية مانستني كويس .. واللحين " نفخ بصوت مرعب " ويييييين بنتي ؟!
غادة وهي ترتجف : مو هنا .. مع ابتسام ..
احمد : قدامي اللحين تلبسين عبايتك
غادة وخوفها مسيطر عليها : طـيب .. اتركني اروح
مشت لغرفتها وبسرعة بتسكر الباب لكنه سبقها وفتحه : الظاهر انك ماتغيرتي للحين على نفس تصرفاتك
غادة صرخت فيه وهي ترمي أي غرض قدامها بوجهه : وخخخخر عننني .. وخخخخررر وخخر
فتح احمد عيونه وهو يشوف الرضيعة بالسرير .. ركضت غادة يمها وحضنتها وهي تطالعه بحدة وعيون تلمع دموع كابوسها طلع قدامها .. ناحف زيادة على نحفه ماعدا كذا ماتغير مشى يمها وسحبها من يديها وصفعها بمرفقه بقوة حتى طاح سنها والدم سال بفمها وطاحت على الارض .. رنيم بكت رغم عدم فهمها لشي
غادة وهي تسعل الدم : انت ابو انت !! الله ياخذك يارب
احمد وعيونه برنيم : هذي بنتي غادة .. مستحيل تحرميني منها حتى لو تركتيني بالسجن
غادة برجفة : وانا وش بيدي .؟ هذا حصاد فعايلك
احمد حط رنيم بسريرها وسحب غادة من شعرها حتى صار وجهها قريب من وجهه : لاتكذبين ! كنتي تقدرين تدفعينها انتي واختك ال ****** بس ان بوريك والله والله لتندمين
غادة انفتحت عيونها برعب : وكيف طلعت .. مامرت سنة
احمد : تسألين عشان مهتمة يعني !! بس انا كابوسك اللي ماراح تصحين منه
طاح عليها بضرب مرعب اجرامي رغم كل اجراماته السابقة فيها أول مرة يكون بهالشكل ورنيم تبكي بإنهيار حتى حمر وجهها البريء ..وأحمد مابالى لبكاها ولا لأنين امها كان حامل غضب معه بالسجن طول هالفترة لها بنظره مسؤوليتها انها مادفعت وتركته وراحت
***
ابتسام اثناء ماهي جالسة مع أم نايف بعد رحيل الكل .. دخل نايف : السلام
: وعليكم السلام
ام نايف : تعال يمه اجلس اشرب القهوه معنا
نايف : لا يمه راجع للبيت .. ابتسام جاية ؟
ام نايف : لا اتركها تجلس معاي شوي نسولف .. اول مرة اجلس معها جلسة كذا
ابتسام ابتسمت : وانا ما افوت جلستك خالتي .. خلاص نايف ارجع انا جالسة
انتبهت فجاة : لا مقدر ! غادة لحالها بالبيت برجع
نايف وهو طالع : ماراح اكلها .. اجلسي وارجعي لاخلصتي
وركب سيارته وهو مايبيها ترجع .. هالفترة تعاملها بارد بشكل يقهر ونظراتها لحالها تزعزعه لانه يعرف داخل نفسه انه غلطان وصل للبيت ودخل .. عقد حواجبه وهو يسمع اصوات عالية ( معقولة غادة ) فتح عيونه وهو يسمع صوت رجالي دخل بسرعة لغرفتها وهو يشوف أقبح منظر رنيم تبكي حتى ان صوتها راح واحمد حتى انه مايضرب بيده المجردة .. بخيزرانة مشى بسرعة وسحبه من طرف ثوبة من ورا وشكل غادة المتكورة على نفسها بطرف الغرفة كسره .. التفت لأحمد بنظرات نارية واحمد اللي تدارك الوضع هذا نايف وصاحب البيت ركض بينحاش لكن نايف لحقه بسرعة ومسكه حتى طرحه على الارض وهو فوقه وصرخ فيه : على وين يابن الكلب ! ماودك تاخذ حسابك قبل تفارق ؟
احمد : مااالك حق .. زوجتي ويحق لي
نايف لكمه بكل قوته : مو في بيتي يانجس .. رجولتك مالقيت تحطها الا ببزر
احمد دفع بقوته حتى انعكس للجهه الثانية وصار فوق نايف ثم وقف وركض طالع .. ركض نايف حتى وصل لآخر الحارة وادرك انه افلت .. تذكر غادة ركض راجع كانت مسكرة غرفتها لما حاول يفتحها كانت مقفلة طق الباب : غادة ... غادة ردي علي
غادة كانت ترتجف داخل وهي متسنده على الباب حتى ماقدرت توقف تروح لبنتها تهديها .. نايف مسح على وجهه : انا لله ..
غادة برجفة : ابــ ابتسام .. وينها ؟
نايف : لسى ماجت ... شصاير هالحيوان كيف دخل ؟
تنهد وهو يسمع شهقاتها : هدي غادة .. بكلم ابتسام تجي اللحين
مسك جواله ودق على ابتسام : ايوه
نايف : ابتسام خذي سواق اهلي وتعالي اللحين
استغربت ابتسام : ليش ؟
نايف : ما أدري .. رجعت وهذا زوج اختك مدري مين و... تعالي تفاهمي مع اختك
ابتسام سكرت السماعة بسرعة والتفتت لخالتها : خالتي سواقكم هنا ؟
ام نايف : ايه .. بتروحين تو بدري ؟
ابتسام : لا مقدر اجلس اكثر من كذا خلاص .. معليش اروح معاه
ام نايف : ايه بقوله يجهز السيارة
قامت بسرعة تلبس عبايتها وتركب مع السواق .. وهي على اعصابها وكل شوي تقوله " أسرع " ! اول ماوصلت دخلت كان نايف جالس بالصالة : فينها .؟
نايف : بغرفتها
طقت ابتسام الباب : غادة افتحي
انفتح الباب بسرعة .. اول مادخلت ارتمت غادة بحضنها : جاا . جاا ابتسام شاسوي
ابتسام طبطبت على ظهرها تهديها : لا تسوي شي .. انا راح اسوي ماراح ياخذك .. بس اجلسي وتكلمي شصاير
لما انسحبت من حضنها وشافت ابتسام وجهها شهقت برعب .. ملابسها دم وكدمات مرعبة بكل مكان وشعرها مشعث وبخدها أثر الكف : جعل يده الكسر .. سوا فيك كل هذا
غادة : طلع .. خلاص بيرجعني معاه اكيد مابي ارجع
ابتسام : يخسى يرجعك ... مايرجعك لو يموت
غادة جلست على الارض وهي متوترة وماسكه راسها: شاسوي .. شاسوي لازم اتصرف
ابتسام جلست جمبها : غادة .. قلت لك ارتاحي انا موجودة ماراح ياخذك
غادة بهم وانكسار : ابيه يطلقني
ابتسام : راح يطلقك صدقيني بس ارتاحي اللحين .. انا باخذ رنيم معاي فوق انتي هدي بالك
هزت راسها بموافقة وهي تحس بعجز .. اكبر مخاوفها كان هو
خذت ابتسام رنيم بين يدينها وطلعت نايف بقلق : شصاير .؟ من هاللي كان هنا
ابتسام طالعته بازدراء وصعدت دون ترد .. بنص ماهي تصعد مسك يدها ولفها له : اكلمك انا ردي !
ابتسام سحبت يديها بقوة : والله .؟ صار اللحين يهمك تعرف الجواب عشان الموضوع يتعلق بغادة .؟ وانا لو اموت واحترق ما اصريت حتى تعرف شصاير معاي !!
نايف : على اساس صار معك نفس الموقف ! وبعدين مجنونة انتي تغارين من اختك ! ترا اسأل لان مو طبيعي يدخل رجال بيتي وماتقولين مين وكيف
ابتسام احتقرت نفسها : اولا أنا ما أغار من غادة .. على الاقل مو عليك ! ثانيا مشاكلي مشاكل أهلي مالك فيها .. واللحين شمجلسك هنا الساعة 2 تو بدري على رجعتك من سهرتك
نايف : بعذرك اذا كنتي ناسية مع مشاكلك انتي وأهلك اللي مالي فيها .. بس اذكرك هذا بيتي يعني اذا ابي اعرف وش سالفة الرجال اللي دخل بيتي وجالس يضرب اخت زوجتي بعرفها .. وماتحاسبيني على جلستي ببيتي ورجعتي له .. فاهمه ؟
ابتسام : تبغى تعرف روح اسألها .. مو علاقتكم زي العسل
نايف : سألتها ماردت
ابتسام ابتسمت بسخرية .. مايحتاج تقوله يعني سأل وخلص : نايف راسي يعورني والبنت تعبانه بصعد انومها .. أجل هالنقاش أو الغيه يكون احسن
بنص ماهي تصعد تكلم : ماخطر ببالك انك لو تقولين لي بقدر أساعدك ... مع احترامي ماراح يطلع بيدك لا انتي ولا كل اهلك تساعدين اختك بس انا سهله علي , بكلمة اقدر اوديه لآخر الدنيا
ابتسام وصلت معها .. التفتت له وابتسمت ببرود : ماراح يطلع بيدي أساعدها .؟ اهاا ... راح ارجع اذكرك بكلمتك هذي وقت أحل كل شي
نايف رفع حاجبه : عموما ماتبغي تتكلمي كيفك ... بس لو تحصل مرة ثانية اعتبري اختك مطرودة وشوفي لها سكن ثاني .. بيتي مو سلجى ملجى
وصعد وسبقها لفوق .. ابتسام واعصابها فايرة لكن مستحيل تبين له ضعفها دخلت الغرفة ماكان موجود سمعت صوت من الغرفة الثانية اكيد فيها سدحت رنيم وفتحت جوالها ودقت على هيثم .. كالعادة مايرد تنهدت كويس مارد بتحاول تحل المشكله دون معرفته واذا ماقدرت وقتها مافي يدها شي ..
***
الكـويت – الساعة 7 مساءا /
تو رجعت من الدوام ودخلت تتروش وتبدل لقميصها الناعم السماوي .. طلعت للمطبخ وانتبهت بطريقها انه جالس بالصالة وقدامه اللابتوب ومنسجم رفع عيونه وابتسم : هلا والله
سارا : متى رجعت .؟
لؤي : ماطلعت اليوم اساسا
سارا : غريبة مانتبهت لك لما رجعت
هز راسه وهو مو يمها يم اللابتوب .. قربت منه : ايش قاعد تسوي .؟
لؤي وهو يتصفح موقع تسوق : ابي هدية لميهاف اعوضها .. بتكون مطنقره علي اللحين
سارا : معاها حق أنت غلطان
لؤي : لا تعاتبي انتي كمان .. بتساعدي ولا اسكتي
سارا نغزته بكوعها : شنو استاذ لؤي من اللحين اسكتي .. اصبر سنة طيب
لؤي بابتسامة جذابه : شيصبرني سنة .. ماتعرفيني يعني مستعجل ع كلش
سارا طالعت الطقم اللي فاتحه 40 الف درهم شهقت : يالله عليك يالؤي ايش هذا ! 40 الف !!
لؤي غطى عيونها بيده : لا تشوفي السعر غمضي
سارا : وخر اتركني اشوف .. والله مايسوى غالي مرة
لؤي : اشوفه يسوى .. اولا ذهب وروبي وياقوت والحلق الماس اشوفه رخيص كمان فوق انه من مناجم افريقيا
سارا ما أعجبها خذت اللاب من يده : تعال أوريك فيه واحد نفسه بالضبط بس ب 5000
طالع لؤي اللي فتحته : تستهبلي ! تقليد !! انا اهدي تقليد !!
سارا جلست اللاب على الطاولة وقالت بقهر : ايش الأنا العالية هذي .. والله اسفة يا سيد الشمري محنا قد المقام
وراحت للمطبخ .. عقد لؤي حواجبه ورجع يطالع الصورة وسكرها مباشرة اخر عمره يهدي هالأشياء ورجع يفتح صفحته الباذخه ... اما سارا كانت بالمطبخ الصغير منقهرة : والله مهما كانو لطيفين .. يظل عرق البذخ والبطرة حق الشمري فيهم طار فيني هذا وانا ابي احفظ فلوسه افف والله قهر 40 الف تطير كذا ع الفاضي
***
بيت أبو فراس .. نزلت اسماء وجلست بقهر والكل مجتمع طالعتها ام فراس : شفيك مبرطمة !
اسماء : اخخخ ناسية ملف مهم لي بالجامعة .. ولازم بكرة اروح اجيبة مالي خلق
بدر : احد قالك انسيها .؟
اسماء : احد حاكاك .؟
بدر : الكلام حق عام
فراس : بدر .. انت مسوي شي .؟
بدر تنهد : والله اني مسكين ما أخلص منكم .. تزوجنا عشان تسكون ونظل غلطانين
فراس : لا ارتاح ماراح تتزوج .. عشان كذا اسالك وش مسوي !
ام فراس شهقت : وش ماراح يتزوج .. عرسه الشهر الجاي
فراس رفع جواله : تو مسكر من عمي .. يقول البنت طالبه تأجل لبعدين ماتبي اللحين
بدر رفع حواجبه : بجد .؟ معناها كلموها هي مو انا .. عموما جت من الله " وقف " اجل انا مسافر بكرة
اسماء شهقت : وييين !
بدر : عندي عروض ببيروت .. بما انه مافيه زواج اروح اشوف شغلي
اسماء : يوه بدر ياسخيف اجلس ابغاك
بدر وهو صاعد : الحقيقة المؤلمة انه الكل يبغاني فمو بأيدك
اسماء بغلقة : اففف مامداني اشبع منه حقير
فراس : خذيها مني ولدك مسوي حاجة من وراك
اسماء : يوه منك يالموسوس انت .. وش مسوي يعني مسكين مايسلم منك
فراس : محد حاكاك انتي يالبزر خلك برا .. اكلمك يمه بتشوفين بعدين وبتقولين فراس قال
ام فراس : وش مسوي يعني .؟
فراس : تسأليني انا .. شوفي انتي شمسوي ولا معقولة فجأة كذا ماتبي تتزوج ! من راسها ! عقب ماقومت الدنيا وجلستها عشان يصير زواجهم بدري
اسماء : انا اتخيل عادي .. ميهاف ترا لها شطحاتها
ام فراس : عموما انا بكل الأحوال بكلم امها وبعرف السالفة
نزل بدر بكشخته الكاملة : يله أنا طالع تشاو
ام فراس : في امان الله
فراس وقف : انا صاعد انام .." باس راس امه " تصبحين على خير
ام فراس : وأنت من أهله حبيبي
***
بيت أبو نايف /
ابو نايف : يعني من نفسها قالت
ام نايف وهي تصب له القهوة : ايه من نفسها .. تقول ابيها بس ملكة عشان تكون حاجة رسمية ولا العرس تو بدري
ابو نايف : طيب وينها ماني شايفها
ام نايف : بغرفتها .. من امس ماطلعت
ابو نايف : قومي ناديها
قامت ام نايف وطقت باب غرفتها : مين .؟
ام نايف : انا امك .. انزلي حبيبتي ابوك تحت يسأل عنك
ميهاف : مشغولة ..
ام نايف : ماحينفع .. قايله لك ماراح يقتنع بهالقرار لين يكلمك فانزلي
تنهدت ميهاف بضيق ودخلت الحمام تغسل وجهها .. ونزلت وجلست جمب ابوها : هلا بابا
أبو نايف : شفيك حبيبتي .؟ ليش تبغي تأجلي الزواج ؟!
ميهاف بخنقه : كذا احسن ..أنا باقي أدرس وبعدين انتو مافهمتوني ! انا قايله من أول ابغى مجرد نرتبط رسمي الزواج مو ضروري
أبو نايف : تفكيرك غلط ... اللحين مفروض تكوني عنده وساكنه معاه دام صرتي رسمي زوجته
ميهاف لمعت عيونها : مابي .. مابي اسكن عنده مو اللحين تكفى بابا
أم نايف : خلاص يمه بتضلي عندنا ابوك بس يقولك افتراض
أبو نايف تنهد : خلاص براحتك .. بس وش بيفهمه اللحين مو لعوزناه حنا لما بغينا الزواج بدري !
ميهاف وقفت وصعدت لفوق ومسحت دمعتها .. الله يسامحك يابدر
***
صحت إبتسام من النـوم على صوت رنيم تبكي .. حملتها بين يديها وطلعت برا لأن نايف نايم طالعت الساعة " 4 الفجر" تنهدت شكلها ماراح تداوم اليوم , نزلت بهدوء فتحت باب غرفة غادة بهدوء حصلتها جالسة بطرف سريرها ومنلمة على نفسها وتطالع قدامها وعيونها حمراء : مانمتي .؟
التفتت لها غادة : .................
تنهدت ابتسام وجلست ع طرف السرير : نامي شوي ريحي بدنك
غادة : مقدر .. مقدر .. مقدر
ابتسام : غادة لايدخلك الخوف كذا .. قوي حالك
غادة وقفت بانفعال وهي تمشي بالغرفة روحة وجية بتوتر : شاسوي .. شاسوي .. لازم ابعدها عنه
ابتسام وقفت ومسكتها وجلستها جمبها : قلت لك هدي .. ماراح ياخذها ولا راح ياخذك ماتثقين فيني يعني .؟
غادة وعيونها تلمع : أكيد ابتسام .؟
ابتسام : أكيد ياقلبي .. وانا من عندي اغلى منك
غادة : قلتي لهيثم .؟
ابتسام : كلمته مايرد " طالعت غادة بحزن واثار ضربه بكل مكان " ... جعل يده الكسر
غادة : كسر بس .؟ جعلها تتعفن وتعفن كل جسمه
ابتسام : والله مو كفو يصير أبو الجميلة هذي
طالعت غادة رنيم بهم : وانا وش محرق قلبي غيرها ابتسام .. خايفة يسوي فيها شي وقتها صدقيني راح اموت والله راح اموت
ابتسام : بعيد الشر عنك وعنها.. ان شاء الله ماحيقدر ياخذها
غادة تنهدت : هاتيها وروحي نامي
ابتسام : لا لا انتي ارتاحي بطلع انا وياها .. ادخلي تروشي وحطي مرهم على كدماتك وديري بالك على حالك
غادة : اوك
خذت ابتسام رنيم وطلعت صاعدة لفوق .. وقفت عند راس نايف وطالعت منبهه مركدة على الساعة 7 .. انقهرت " الحقير الصلاة وينها ! " خذت المنبه وركدته على اللحين
دق منبهه فتح عيونه بانزعاج واخذ ساعته كشر وهو يشوف الوقت : وجع من مركد الساعة !!
ابتسام كانت تطبطب على رنيم حتى ماطالعته ... نايف طالعها : خير مصحيتني اللحين
ابتسام ببرود : شدخلني .. منبهي ولا منبهك , عموما وقت الصلاة اللحين
نايف تافف وعدل ساعته ورجع ينام .. ابتسام كشرت " مالت عليه حتى ماعنده نيه يقوم يصلي "
***
الكـويت – الساعة 6 صباحا /
صحت سارا بكسل على وقت الدوام .. انتبهت للؤي واقف قدام المنظرة ولابس وخالص .. عقدت حواجبها : لوين .؟
لؤي : صح النوم عيني
سارا وهي تتمغط : صح بدنك
لؤي حاس بفمه : فين عطري مو شايفه .؟
سارا وهي تطالع التسريحة وكلها عطوره ماعدا 3 لها : وكل هذا وشهو .؟
لؤي : ابي الليلك خص نص
سارا : مو عارفة يمكن بسيارتك شوف .. وبعدين مافيه داعي كل هالعطور وأنت ماتستخدمها
لؤي : من قال ما استخدمها !
سارا : ما أشوفك تستخدمها ..اشوفك معلق ع الليلك والبخور دايم
لؤي : تصدقي مهما جبت عطور .. دايم العطور المذكورة في القرآن هي اللي تشدني
سارا : ههههههه ايوه ملاحظة الصندل كمان دايم تستعمله
لؤي اخذ مفاتيحة وبوكه وباس خدها : يله عيني انا طالع
سارا : ايوه لوين .؟
لؤي : فراس بطريقه راجع رايح استقبله
سارا : هوا يـعرف .؟
لؤي : بزواجنا قصدك .؟ للحين ما قالي شي بس ماراح اخبي عليه
سارا : اوكيه حياتي انا بنام اليوم بشقتي القديمة
لؤي : وليه .؟
سارا : مشتاقه لهيوف وفيه اغراض لي هناك ابيها .." كملت بدلع " واتغلى عليك حبتين
لؤي حاوطها من خصرها بيديه الثنتين : خذي راحتك حياتي .. راح اشتاق لك
سارا وهي تحاوط رقبته بيدينها : راح اشتاق لك اكثر وأكثر .. اتركني حياتي تأخرت على دوامي
لؤي : انا كمان تأخرت على فراس لو اتركه ينتظر بالمطار اكلني
سارا : اجل تيك كيرا قلبي
لؤي وهو طالع : اشوفك بكرة !
طلع لؤي وتوجه مباشرة للمطار بعد فترة وصل فراس سلم عليه : حمد الله ع السلامة
فراس وهو يرمي الشنطة ع السواق : يسلمك
ركبوا سيارة لؤي ... فراس : أقول يا إنسان عاطل وش مشغلك عن ملكة أختك .؟
لؤي قدم ورقة لفراس .. عقد فراس حواجبه وفتحها " عقـد زواج " فتح عيونه بصدمة .. ثم رجع يسترجع هدوئة ويسكر الورقة ويجلسها بهدوء : ................
لؤي : ماحتقول شي .؟مبروك اقل شي !
فراس : مبروك عليك مرتبة ثور ومتهور
لؤي : شأسوي فراس عقلي ماحكمني .. أنا احبها
فراس ابتسم بسخرية : تحبها .؟ انت ناسي انها طنشتك أول ما انطردت من عندي ومارجعت تعطيك وجه الا بعد ماعطيتها الشركة ! مو واضح هدفها يعني
لؤي ضغط على الدركسون : فراس رجاء قول خير أو اسكت
فراس : اوه اسف كنت تبي واحد يجاملك .؟ " كمل باصطناع " الف مبروك الله يبارك لكم ومنك المال ومنها العيال
لؤي بعصبية : خلاص عاد ! تزوجتها وصارت وش تبيني اسوي يعني !
فراس ببساطة : طلقها !
لؤي : خايف ان هالموضوع مستحيل ..
فراس : المستحيل هو اللي راح يصير لك وقت يدري ابوك ! لا تجلس تتضايق وتسوي حساس بسبب كلامي لأن جايك اعظم والله يعينك
لؤي : ممكن تسكت عاد .. اصلن الحق علي انا اللي جاي اقولك
فراس : يعني مايمشي الوضع تحبها دون تتزوجها ! لازم تتزوجها !
لؤي تنهد : وصلنا انزل
نزلوا كلهم ودخلـوا الشركة ... استقبله مصعب مباشرة : حمد الله ع السلامة طال عمرك .. امر وش تشرب .؟
فراس : وخر من وجهي
وكمل طريقة .. لؤي تنهد : امسحها بوجهي مصعب , مزاجه مقفل شوي
مشى معه لؤي وابتسم : ماتبي تسألني كيف الحياة الزوجية ماشية معي .؟
فراس طالعه بنص عين .. وكمل طريقة وجلس بمكتبه : بسألك دام الفاس طاح بالراس .. وش الإجراءات اللي حاسبها اذا عرف أبوك ؟
لؤي : أنا فاهم ان ابوي بيعصب .. ويمكن يتبرا مني ما أستبعدها بس أهم اجراء اني ماراح اتخلى عنها وأن شاء الله بيقبل فيها يوم وكثر الدق على الحديد يفكه
فراس : كثر الدق على الحديد يفكه .. هذا اللي قدرت عليه ؟
لؤي : تصدق فراس دايم اخاف انا من ردات فعل ابوي .. وقت سحبت على جامعتي خفت من ردة فعله وقت خربت مشروعه خفت من ردة فعله .. أي مناسبة اكون مسوي فيها شي غلط اخاف من ردة فعله , هالمرة ما أحسني خايف .. نهائي معناها أني مو مسوي شي غلط , انا تزوجت وبالحلال
فراس : لا تقنع نفسك .. انت مسوي غلطة وكبيرة بعد وأحسن لك تخاف اذا كنت ذكي
لؤي : اذا كنت غلطة اجل انا ماني نادم .." كمل بخفة دم يكسر الجو " هههههههههه اللحين كل العائلة صارت متزوجة ترا باقي انت
فراس : واحد متزوج بنت فقر وقبلها مطلق وعنده ولد .. والثاني جالسين يسحبونه لزواجه غصب .. والثالث متزوج ورا أهله وحده لاعبه عليه ... لا والله حمستوني أتزوج
لؤي : والله أنت نكدي ! اقوله حاجة ايجابية تقول سلبيه خلاص عاد روق
فراس : راح أسكر هالموضوع وماراح ارجع اتكلم فيه .. وحتى وقت ينكشف كلش مراح اتدخل بس لؤي اذا بتسمع كلامي حط عقلك هالمفهي براسك وطلقها
لؤي : خلصت كلامك .. اجل يله نقوم كافي ولا شي
فراس تنهد بضيق من تطنيشه : الشغل لراسي مقدر
لؤي : اجل أنا طالع ... وقت تخلص شغلك دق علي
طلع لؤي من الشركة وتنهد براحة .. حمد الله ردة فعل فراس توقعها أقوى بس الظاهر انه غسل يديه منه خلاص
***
خلصت أسماء لبسها الدوام وهي مكسلة مالها خلق تداوم بس عشان هالملف .. سحبت شنطتها وعبايتها ونزلت مافيه طاولة فطور اليوم وأنس نايم قدام البلايستيشن بالصالة : هههههههههه فراس سافر خلاص رجع نظام أول !
انتبهت لبدر ينزل وشنطته السفر على كتفه : اوه اسوم صاحية
اسماء بقهر : بتسافر اللحين ؟
بدر طلع جوازه من جيب بنطاله : يب يب .. بتحوشيني يالخبله
اسماء بهم : متى بترجع .؟
بدر : وقت أخلص شغلي
اسماء تنهدت : توصل بالسلامة أجل
بدر : تبغي اوصلك للجامعة بطريقي .." توها بتقول ايه طالع ساعته بضيق " اوه لا متأخر مره يله اجل اشوفك على خير
لبست عبايتها وركبت مع السواق .. السواق : مدينة الملك فهد الطبية ؟
اسماء كشرت تعود انها ع طول تروح هناك خلاص : لااا ! الجامعة
تنهدت وهي تتذكره ونبرته الباردة " عموما سواء الإحتمال الأول او الثاني ماراح تحصلي مني شي فالوقت متأخر ارجعي بيتكم ولا عاد ترجعي لهالمستشفى الا لسبب " عقد حواجبها : سبب .؟
اهااااا ... صح صح لازم اخترع لي سبب وأروح اكسر رجلي ؟ لا لا توجع طيب بطني يوجعني !! او معي لوز .. لا صح هو جراح لازم اخترع مرض جراحي .. عملية تجميل .؟
قطع تفكيرها وصولهم للجامعة : متى ايجي ؟
اسماء : خلك قريب ماراح أطول
نزلت الجامعة وراحت مباشرة لخزانتها تجيب ملفها .. بطريقها : اسمااااء !
التفتت لـ " ريهام " تلوح لها من بعيد وتمشي يمها : هلا ريهام
ريهام : اهلا فيكي .. غريبة مداومة على اساس خلص الصيفي وماترجعين هنا خلاص
اسماء : ياليته .. بس ناسية حاجة ضرورية وجاية اخذها
ريهام : بجد .؟ يوه بخاطري نجلس سوا نشرب قهوة بس متأخرة مرة على رحلتنا
اسماء : رحلة شنو .؟
ريهام بحماس : اليوم مسوين عرض خاص لنا .. محاظرة بمدينة الملك فهد الطبية ماتتخيلي قد ايش كنت اتحلم بهالفرصة
اسماء كبست بعيونها .. وهي تستوعب صح ريهام طالبة طب : شنو !!
ريهام : ايه زي ما أقولك شايفة كيف حماس
اسماء حاولت تكون طبيعية : يوه خسارة .. والله مشتاقة لك نفسي نجلس سوا .. همممم طيب انا ماعندي شغل شرايك أروح معاكم هناك وقت تخلصي محاضرتك نجلس سوا نشرب قهوتنا
ريهام استغربت .. هي واسماء زميلات بس مو لدرجة تروح معها ولو ان نفسها تجلس مع بنت الشمري : همممم عادي عندك .؟
اسماء : ايه اساسا مالي خلق ارجع البيت ومافيه حاجة اسويها .. بس ظنك يرضون عادي اروح ؟
ريهام : ماراح ينتبهوا اركبي واذا وصلنا اجلسي معنا بالمحاضرة على اساس طالبة .. استرجعي ايام الدجة
اسماء دخلت الفكرة راسها : عبقرييييية ريهام !! يله قدام
ريهام : يـله اجل بنمشي اللحين
اسماء راحت مسرعة وقلبها دليلها .." اجل ما ارجع الا لسبب .. لقيت لي سبب خلاص !! وبلقى مليون سبب بس عشان اروح اشوفه "
***
بيت أبـو نايف /
نزلت ميهاف من غرفتها .. ام نايف : اخيرا قررتي تطلعين من هالحبس بغرفتك .؟
ميهاف بابتسامة صفراء : كنت نايمة
ام نايف : صدق .؟ ولا دريتي ان حبيب القلب هنا ونزلتي
ميهاف عقدت حواجبها : بدر هنا .؟
ام نايف : ايه .. جاي يتكلم مع أبوك الظاهر انه شايل بخاطره ان ابوك ضغط عليه بالزواج وعقبها غير رايه
ميهاف ابتسمت بسخرية .. من جد حاجة تضحك : اهاا
ام نايف : والله معه حق .. يعني شطحتك هذي ماتدخل العقل
ميهاف كملت طريقها للمطبخ : بليز ماما خلاص ولا رجعت امسك خفارة بغرفتي
صبت لها كاس ماء وجلست تشربه وهي تحسه ماينزل حلقها من الخنقة , قوي وجه بجد ووقح حسافة ماعرفتك على حقيقتك من قبل كان ماصار هذا كله ..
سمعت أبوها يحاكي أمها برا : وين ميهاف بغرفتها .؟
ام نايف : لا بالمطبخ
ابو نايف : ايه اجل قولي لها تطلع بدر بيسلم عليها قبل يسافر
ضغطت ميهاف على كاس الماء .. أول مادخلت ام نايف طالعتها : مابي اشوفه !
ام نايف : بسم الله علي تو بتكلم .. عيب يمه رجلك وطالب يشوفك
ميهاف باستعطاف : تكفين يمة مابي .. والله بنخنق مابي
ام نايف : شصاير عليك أنتي وش تنخنقين بسم الله عليك
ميهاف انتبهت لنفسها .. قالت بطبيعية : شكلي بايخ وما يمدي استعد فمو لازم
ام نايف بحزم : ميهاف ! سكت لك واجد هالفترة احرجتيني يوم ملكتك مع الحريم كلهم ومشيتها .. حطيتيني بموقف مع ابوك ومشيتها .. احرجتيني مع ام فراس وقت أجلتي ومشيتها ! واللحين مو بكيفك أطلعي طلعت نفس بليس
ميهاف انقهرت .. محد ملاحظ ان كل هذا بسبته كلش جالس ينحط براسها ما اهتمت بشكلها وهي اللي كانت ماترضى الا بأحسن كشخة وقت تشوفه طلعت وهي ببجامتها وشعرها رافعته بعشوائية ودون مكياج .. دخلت المجلس وعكسها كان بقمة اناقته كشر لما شافها : وش هالشيفه .؟!
ميهاف طالعته وجلست بهدوء بمكان بعيد عنه : بغيت شي .؟
بدر : بالله هذا شكل وحده جايه تقابل زوجها ؟!
ميهاف بقهر : لا .. هذا شكل وحده تافلة العافية من زوجها
بدر رفع حاجبه : باللهي .؟ اجل كملي تفل اهم شي وقت نتزوج تكون خلصت هالمشكلة واللي يعافيك ما أتحمل اشوفك بهالمنظر يوميا
ميهاف لمعت عيونها دموع .. انتبه بدر لعيونها قبضه قلبه وهو يشوفها شكلها يحزن : بلاها الدموع ميهاف .. اللي صار مو كبير انتي تعاملي مع الوضع طبيعي محنا أول ثنين يملكون ومايتزوجون على طول
ميهاف مسحت دموعها .. وقالت بصوت مخنوق : وانت ع بالك هذي المشكلة ! انا اللحين ابي القى حل معاد ابيك
بدر : لا تدوري حل لأن مافيه .. انتي لي ومالك غيري
ميهاف قررت تختصر النقاش لأن حالتها سائت بعد ماتحسنت : ايش جاي تبغى ؟
بدر حط كيسة ناعمة صغيرة قدامه : سامحيني مفروض بيوم الملكة بس ماحصلت فرصة .. هذي هديتي ومبروك عليك انا
ميهاف : أول مرة اشوف واحد يعزي بهدية
بدر : فكري فيها زي ماتبغي .. انا مسافر بيروت عندي كم عرض وبعدها راجع
ميهاف ماردت .. خلص مهمته وتزوجها واللحين بيرميها : ...............
بدر وقف وجلس قدامها القرفصاء ..ومسح بيده على خدها ميهاف شهقت شهقة مكتومة تنهد بدر ومسك راسها بنعومة وأسنده على كتفه : لا تحبسينها .. اشكيني لي
ميهاف انهمرت دموعها على كتفه .. وقالت بغصة : ليش تسوي كذا .؟ صدقني انا ماغصبتك والله ماغصبتك
بدر وهو يمسح على راسها قال بهدوء : أدري .. أدري
ميهاف عضت على شفتها ورفعت راسها .. مسحت دموعها ووقفت : توصل بالسلامة ان شاء الله
أول ماطلعت .. تسمرت عيونه على الكيسة تركتها تنهد وتركها وطلع لبرا وقطع طريقه .. " ليش سويت كذا يا بدر اذا كنت بتندم .؟! ارجع .؟ تو يمدي اكلم ابوها وتمشي الأمور ... لا لا مراح اسويها وأنا ماغلطت رديت اعتباري بنفس الطريقة اللي هي ردت اعتبارها فيها "
***
ممرات مستشفى مدينة الملك فهد الطبية /
ريهام : ههههههههههههههه والله فلة .. ماتوقعت بتسويها صدق
اسماء وهي مو يمها تراقب بعيونها المكان تبغى تلقطه : ايه ايه
وقفت قدامهم دكتورة : اهلين صبايا
: اهلين دكتورة
دكتورة : اهلين انا أيار .. انا المسؤولة عن زيارتكم اليوم تفضلوا معاي للمحاضرة
مشت اسماء معاهم وهي تسمعهم يسألون الدكتورة اسأله مافهمت شي منها .. أول مادخلوا المحاضرة تاففت وهي تشوف كل المحاضرات دكتورات والمحاضرة طويـلة وفوق كذا ماتفهم فيها شي حتى ريهام مطنشتها مركزة مع الشرح ..... بعد فترة غفت فيها بالنوم وسط حديث الطب الممل ... ماحست الا بعد فترة تنغزها ريهام : قومي اسوم
اسماء فتحت عيونها : هاه شنو !
ريهام : يله بناخذ جولة ع المستشفى .. هههههههههه هذي المغامرة نمتي على طول
اسماء : هاه جولة !!
ريهام : ايه يله بسرعة
مشت اسماء معاهم باقسام المستشفى وهي تدور بعيونها عنه ... تأففت بقهر .. ريهام : شفيك ؟
اسماء بقهر : ولا شي
جلسو بعد الجولة عند الكافتريا .. اسماء كانت تحرك الملعقة بقهوتها بملل والبنات متحمسات بكلام الطب ويناقشون الدكتورة التفتت الدكتورة : دكتور هيثم هنا
رفعت اسماء راسها وهي تشوفه من بعيد يمشي ولما سمع اسمه استأذن من الشخص اللي يمشي معه وجا ناحيتهم : امري دكتورة شبغيتي .؟
اسماء مسكت يد ريهام بسرعة دون شعور .. ريهام : شفيك ؟
اسماء مو يمها .. جالسة تطالعه وتحس ماتسمع اللي حولها من ضجة قلبها داخلها وهي مركزة عليه
الدكتورة : الملفات اللي طلبتها مني ارسلتها لك .. وصلتك ؟
هيثم : ما أدري ماشيكت .. عموما مشكورة دام ارسلتيها اكيد وصلت بس ما أنتبهت
الدكتورة التفتت للبنات : بنات هذا دكتور هيثم .. تخصص جراحة عظام .. دكتور هالصبايا طالبات طب
البنات بهيام وهن يشوفن الدكتور الوسيم .. وسيم ماتوصفه قمة بالوسامة : اهلين دكتور
ابتسم دون يعلق .. اختفت ابتسامته وهو يشوفها بحجابها الملفوف على راسها بإهمال وعيونها السماوية ووجهها البريء عقد حواجبه : قلتي لي طالبات طب ؟
الدكتورة : ايه
هيثم طالع اسماء : تـو أدري انك تخصص طب
ريهام نغزت اسماء : تعرفينه !
اسماء بلعت ريقها : ايه .." لمعت براسها فكرة .. وتغيرت لهجتها المترددة للثقة " ايه ! آخر مرة كنت جاية اسألك عن حاجة طبية بس أسلوبك وتعاملك ماكان مشجع
هيثم رفع حواجبه بعدم تصديق : بجـد ؟
اسماء ارتبكت من نظرته لكن كملت بثقة : ايه بجد !
هيثم : اهـا .. ايوه تفضلي وش سؤالك الطبي " كمل باستهزاء " دكتورة
اسماء كبست بعيونها بتناحه : هـاه !
هيثم التفت للدكتورة بعد مارماها بابتسامة سخرية بمعنى " من تلعبين عليه ؟ " : عموما شكرا على الملفات .. وراح ارجعها لك وقت اعدلها
الدكتورة : اوك
أول ماراح وقفت اسماء : معليش شوي وراجعة
مشت يمه بسرعة : دكتور
هيثم وقف ............. اسماء وهي مرتبكة وسط دقات قلبها زي آخر مرة وقت تشوفه تنلجم : امممممم
هيثم طالع ساعته : رجاء ماعندي وقت اضيعه ... اذا ماعندك حاجة تقوليها انا ماشي
اسماء كل مافتحت فمها رجعت تسكت .. شدت على قبضتها وقالت : بغيت أوضح اخر موقف بينا .. لأن .." ماقدرت تكمل وتقول تحليلاتك غلط "
هيثم قاطعها بنظرات شك : وليش جالسة تمثلي دور طالبة الطب اللحين .؟
اسماء : ما أمثل .. انا ادرس طب لاتنخدع بالغلاف وتظلم المحتويات
هيثم ابتسم : وتعرفي تقولي حكم بعد ؟
اسماء هنا راحت فيها .. ابتسامته وقفت قلبها .....
هيثم : اجل وش مواد مقررك .؟
اسماء قالت بسرعة : ايه انا طالبة كسلانة !
هيثم مبتسم وهو يحبس ضحكته : ههههه طالبة كسلانة .؟
اسماء لمعت عيونها وهي تشوف ضحكته الخفيفة الأنيقة .. تحس دقات قلبها مسموعة : أيـ .. أيه كسلانة جدا
التفت هيثم لصوت وراه يناديه : دكتور هيثم يطلبونك ضروري بالطوارئ
هيثم : جايك
مشى لعنده وهو يهز راسه ومبتسم وميقن انها تكذب .. عجيبة هالبنت وش تبغى بالضبط ..
اما اسماء من دلوختها ماشت بطريقها تاركه البنات .. معقولة ابتسم لها .. وضحك !! ضحك !! انهارت ضحك من فرحتها والكل يطالعها وهي تضحك وتمشي بوناسة وماهمها !! ضحك لها ضحك ضححححك ضضضحححكك ! حتى ان ريهام تناديها ومو يمها مدرعمة مبسوطة وصلت لها ريهام : ههههههههههه وين مدرعمة .؟ شسالفة هالدكتور من وين تعرفينه ؟
اسماء : هاه .. هو كان دكتوري بجدة
ريهام : يالبيه مز .. بس كأنه مغتر شوي
اسماء تنهدت بحب : يحححقق له يحححققققق له
***
بيت نايف – المغرب /
صحى نايف من نومه .. كالعادة اوقات نومه مضروبه بدل لبسه ونزل ماحصلها لكن يسمع اصوات يم غرفة غادة ما أهتم وكمل طريقه طالع اول مافتح الباب حصل قدامه رجالين أبو احمد واحمد , : خير ياطير .؟! " التفت لأحمد " لك وجه انت جاي هنا واثق اني ماراح اشوهك !
احمد : انا جاي اعتذر .. فعلا ماكان لي حق ادخل بيتك بهالطريقة
ابو احمد : وانا اعتذر عنه وعني .. سامحه كان طايش ومنقهر وماحكم عقله
نايف بجمود : مايخصني ! وانقلع انت وياه من قدام بيتي لأحفر قبوركم
أبو احمد : عيب يا نايف مهما كان انا رجال كبير ماتتكلم معاي كذا
احمد : نايف ماتتكلم مع الشايب بهالأسلوب لأحفر قبرك انا
نايف تقدم خطوتين حتى صار مواجه احمد مباشرة وقال بتشديد : قلت لك مايخصني ! شايب .؟ الله يحسن خاتمته ويله اذلفوا
انفعل احمد بيمد يده لكن ابو احمد مسكه مباشرة , اما نايف كان واقف بثقة ويدينه بجيب بنطلونه ... ابو احمد : نايف حنا مو جايين نتمشكل معاك .. بس بنت ولدي وزوجته عندك وأنت رجال فاهم وتعرف القانون بيطلعها غصب
نايف : وانا وش يخصني .؟ زوجته وبنته منه لهم انا بيتي ماتعتبه .. قبل افهمك قانون احترام ملكيات الغير
أحمد : أجل وصل كلامي لهم لأنهم مايردون .. قولهم بنتي ابيها !
نايف بطريقة لسيارته : يوصل
مشى بطريقة ... احمد بقهر : تمنيت ادفنه .. ليش ماتركتني انهد عليه يبه !
ابو نايف : من جدك انت ! اضبط نفسك .. ناسي هو مين هذا ولد عبد الرحمن الشمري مايرفع الصوت عليه كيف تمد يدك !
أحمد وهو يطالع البيت بوعيد : ماشي يا غادة انا اوريك
***
الكـويت – المساء جناح فراس /
طلع فراس للصالة والمنشفة على كتفه وبجامة سوداء بالكامل مناسبة فحامة شعره المبتل .. وقف وهو ينشف شعره : انت شمجلسك هنا للحين .؟!
لؤي المنسدح على الكنبة : شنو بنام هنا اليوم
فراس ابتسم بسخرية : على اساس متزوج ؟
لؤي تنهد : بتنام اليوم عند خويتها .. فوش يرجعني اجلس عندك
فراس جلس على الكنبة : تخاف تنام لحالك مثلا .؟
لؤي : لا بس ما أحب اجلس لحالي .. حتى شقتي القديمة كنت مشاركها مع سلطان , انت اللي دايم عايش لحالك بالله ما تحسها صعبه .؟
فراس عقد حواجبه : كيف يعني ؟
لؤي : يعني ماتتمنى تسكن مع احد .. ولا مبسوط لعيشتك كذا
فراس : لا ما اتمنى .. مناسبني وضعي
لؤي : يعني العيشة لحالك مو صعبة .؟ خصوصا انك ما شاء الله تجلس بالشهور بمدن لحالك
فراس : صعبة بس مريحة
لؤي ظل يطالع التلفزيون ..بعد فترة صمت قال : العيشة معك تجيب الهم
فراس : قدام ثلاث خطوات ثم انحرف زاوية حادة على اليسار تحصل الباب
لؤي تجاهله وتنهد : قلبي يتسرب اشتقت لزوجتي
فراس : استاجر سباك يصلحه لك .. واذا يعطله تماما يكون احسن دام مامنه فايدة هالسنة
لؤي طالعه بنص عين : ..........
فراس وقف ومشى يم غرفته : اطلب من الروم سيرفس مفرش اذا بتنام هنا
لؤي ظل يطالعه تنهد واضح انه بيضل شايل عليه طول ماهو متزوجها .. طفى التلفزيون وطلع برا ومشى لشقته ونام هناك ابتسم وهو يطالع راس سريرهم عليه نوته " زوجي العزيز .. خصص 15 دقيقة قبل النوم فكر فيها قد ايش أنت تحبني ولا تنسى تفرش اسنانك ووقت تصحى فطورك جاهز بالثلاجة دفه وبالعافية ثم بدل وتعال الشركة لأني مشتاقة لك ... تصبح على خير :** " رجع النوتة لمكانها ونفذ تعاليمها ولجأ للنوم
***
قبل تخلد ميهاف للنوم .. طق باب غرفتها فتحتها كان الشغالة : مدام .. هذا كيس كان بالمجلس
طالعت ميهاف الكيسة .. تذكرت هديته اللي جابها معاه اخذتها وسكرت الباب وفتحتها قلادة الماس فخمة ومكتوب معها رسالة " رأيتـها وماخلتها صيغت إلا لنحر امرأتي " مررت اصبعها على الطقم الخيـالي بجاذبيته ولمعته سكرته بسرعة وتركته بمكانه .. ماتبي تفكر فيه يكفي النكسة اللي صارت لها اليوم من شوفته .. تو بتغمض عيونها دق جوالها ما كان عندها نية ترد بس لما شافت المتصل " أم بدوري " .. احراج ماترد ردت : هلا والله
أم فراس : هلا فيك .. شخبارك ان شاء الله بخير .؟
ميهاف : حمد الله تمام .. انتي كيفك وكيف الكل .؟
ام فراس : حمد الله .. المهم ما أطول عليك بكرة انا بسوي جمعة أقدمك فيها لمعارفي
ميهاف مالها خلق : بكرة .؟
ام فراس : أيـه .. وبدر أصر علي قبل يسافر أسوي تقديم لك وتستاهلين فحياك بكرة
ميهاف : ان شاء الله على خير
ام فراس : يله اجل في امان الله
سكرت السماعة .. وش قصده بهالتقديم هذا ! كانت راح تفرح به لولا كلامه وطريقته .. حاليا تحس فيه نوايا خفية لأي حركة يسويها .. صدع راسها يعني يتزوجها ثم يتكلم بكلام يسم البدن ثم يجي اليوم بعده بهدية ثم يبي يقدمني لمجتمعه .. تنهدت وخلدت للنوم لو تضل تفكر بكل حركاته ماراح يبقى فيها عقل
***
بيت نـايف – صباح /
دخـل نايف البيت الساعة 6 ونص تقريبا .. صعد مباشرة لفوق كانت ابتسام ترتب سجادتهـا وبجلال الصلاة .. طلع مفاتيحه وبوكه على الطاولة وارتمى على السرير وذراعه مغطيه عيونه : بالمناسبة عمك وولده اليوم جو
ابتسام التفتت بسرعة : نعم ! متى .؟
نايف : قبل اطلع من البيت حصلتهم .. ويقولون لكم يبون بنتهم
ابتسام بانفعال : يموتون ماراح يلمسونها .. الحقير طلع ويبي ينتقم منها
نايف ومازال منسدح وصوته متخدر بينام : وانا اقول اختك تعقل وتجهز اغراضها وتروح معهم او تعطيهم رنيم
ابتسام بقهر : نعم ! وش هالقسوة اخذ بنتها واعطيهم اياه
نايف رفع يده وهو يطالعها : مو قسوة هذا المنطق .. مو زوجته وبنته ؟ خلاص الرجال معاه حق
ابتسام : انت مالك حق تتكلم اساسا وانت ماتعرف شصاير بينهم .!
نايف : مالي دخل بخصوصياتك بس انا لي بالظاهر انا شايف رجال زوجته وبنته بعيدين عنه ومن حقه يطالب بهم
ابتسام خذت جوالها وراحت تطلع من الغرفة دون ترد عليه .. ودقت مباشرة على هيثم : رد رد رد رد
بعد فترة جاها الرد : ايوه
ابتسام : هيثـم .. كيفك ؟
هيثم : حمد الله انتي اخبارك واخبار غدو وبنتها ؟
ابتسام : مو كويسين ... احمد رجع
هيثم وقف بانفعال : نعـــــــــم !!
ابتسام بقهر : ايه والله .. ويطالب ببنته و ........ انا مو عارفه شلون اتصرف
هيثم : خلاص خلاص ابتسام .. انا جايكم اليوم
سكر السماعة مباشرة ودق على أبو احمد لكن مايرد .. وأحمد جواله مغلق من ايام السجن : ابن الكلب كيف طلع !
ما قدر يصبـر استأذن من الدوام وطلع مباشرة وراح لأقرب مكان بعقله ممكن يكون أبو احمد فيه وظنه كان بمحله .. حصله مباشرة بسوق قديم كان دايم يجتمعون عمانه فيه .. وقف وراه وهو جالس مع مجموعة شيبان : ع البركة تسريح أحمد
التفت أبو احمد وقال : نعم شجاي تبي .؟
هيثم : انا اللي اسأل هالسؤال .. عموما انا اتحرى ولدك من زمان يطلع وينه اللحين ؟
أبو احمد : مالك دخل فيه .. وحنا نبغى بنتنا
هيثم : أي بنت ؟
ابو أحمد : ماشي ماشي هيثم خلك على طريقتك .. بس حنا رفعنا بالمحكمة انا نبغى نجيبها لبيت الطاعة
فتح هيثم عيونه : نعم .؟
أبو احمد : ايه ... والاجراءات للحين ماشية في غضون يومين كذا تتنفذ
هيثم شد على قبضته .. : ارفع قضية وحده وبرفع بدالها عشر .. من الآخر ماراح تحصلون شي
ومشى بطريقة واعصابه ضاربه .. بيت الطاعة .؟ لازم أعجل ارفع قضية خلع قبل يكملون .. ماطول بتفكيره وصل لبيت نايف فتحت له ابتسام : هلا هيثم .. شصار معك .؟
هيثم : وين غادة ؟
ابتسام : جوا تفضل
دخل غرفتها .. وقفت غادة مباشرة ورنيم بين يديها هيثم احتدت عيونه فيها : قد ما ودي اطبطب لك .. بس القهر اني منعتك حذرتك لا تتزوجينه , وخذي نتيجة عنادك
ابتسام بهمس : هيثم مو كذا
هيثم بانفعال : لا ! خل تدري انها بزر وان قراراتها فاشلة .. عشان مرة ثانية تفكر مرتين قبل تعصاني
غادة نزلت راسها .. معه حق عضت ع شفتها بقهر : .....................
ابتسام : صار اللي صار بنتحاسب على قبل سنة يعني .. المهم اللحين شصار ؟
هيثم بعصبية : الزفت زوجها وأبوه رافعين طلب يجيبونها لبيت الطاعة
غادة فتحت عيونها بصدمة : .. شـ ...شـ ـنو . ؟
هيثم : ايه ليش مستغربة ؟ هذا اللي من هب ناحية الباب رميتي نفسك عليه
غادة حطت رنيم بسريرها وقالت بخوف : شـ نو يعني بيت الطاعة .؟ بياخذوني غصب
هيثم بقهر : ايه يانانه هذا وقت تكون زوجتك قليلة ادب على بلاطة تسحبها فيه عشان تعقل ... شايفه فين حطيتي نفسك ! والاهم من كذا وش حطيتينا حنا فيه
ابتسام : هيثم خلاص ! ناقصة البنت .؟
هيثم بانفعال :رجاء ابتسام خليك برا .. " التفت لغادة " يله قولي لي كيف ناوية تتصرفين ؟
غادة بانفعال وسط دموعها : وانا شدخلني .؟ اساسا انت ماكنت تدري عن شي .. طاير بحياة الدكتور والمستقبل الباهر حقك ماكنت تدري ايش كان يصير بحياة بابا الله يرحمه
هيثم : كان ابو احمد يجي يضايقكم .؟ يطالبكم بفلوس .؟ يسب في أبوي .؟ وعشان كل شي سواه قررتي تكافئينه بهالطريقة .. " ارتفع صوته " انتي حتى ماحطيتي لنفسك كرامة وقت قرروا ياخذونك ببلاش
غادة بعصبية : شنو قصدك من كل هالحكي .؟ قصدك تعلمني انهم بياخذوني غصب وانت بتنتقم عشاني ماسمعت كلامك وتتركهم ياخذوني ... قول قول انطقها .. اعترف انك بتتركهم ياخذوني ........ بدال كل هالحكي والتمهيد هات الزبدة وبس !
هيثم : انا رفعت طلب خلع .. ولو تطلعي بوجهي زي آخر مرة وتقولي مابي اتطلق وقتها انا بنفسي باوصلك لبيت الطاعة , وانبسطي على حالك صرتي مطلقة قبل توصلين 20 سنة
غادة حسته يحتقرها : تحتقرني عشاني مطلقة .؟
هيثم : دون ما احتقرك العالم كله بيحتقرك .. نظرة المجتمع للمطلقة حقيرة
غادة : المجتمع مايدري وش صار بالضبط .. بس انت تدري
هيثم : اللي أعرفه اني ماتوقعت بيوم تكون اختي مطلقة ... اللي اعرفه انك سودتي وجيهنا كلنا بسبب قلة مسؤوليتك وطيشك , ماتدرين قد ايش علقت بحلقي وقت سألني المحامي الخلع لمين !
غادة بقهر : سودت وجهك .؟ على اساس كنت عادي .. على اساس كان نظرة المجتمع لنا عالية ومحترمة .. تخدع نفسك بايش .؟ قبل انا اتطلق .. عندنا أم انحاشت وتركتنا وسودت وجيهنا .." كملت بألم " اذا كنت سودت وجهك اعذرني فين بروح اشبه امي
شهقت ابتسام وغطت فمها بصدمة .. بينما هيثم ماظهر على وجهه شي غير شده على قبضته بقوة وهو يسأل : شدراك ؟
غادة ودموعها على خدها : دريت .. وبأبشع طريقة عرفت فيها وانت وابتسام مشكورين عشان تركتوني غبية ومغفلة في نظر العالم كله
فـوق /
عقد نايف حواجبة بضيق من الأصوات .. صراخ و ..فتح عيونه بسرعة وهو يستوعب صوت رجال ! اول حاجة جت براسة أحمد مرة ثانية جا ... نزل بسرعة وانتبه لهيثم يطلع من غرفة غادة ويمشي بطريقة لبرا حتى مانتبه له وهو بنص المكان .. تنهد واضح هالمشكلة قالبتهم قلب .. طق الباب على غرفة غادة : ابتسام
ابتسام وصوتها متزعزع : مو اللحين نايف شوي ! " طالعت بغادة اللي كانت دموعها على خدها وتهاوش بعصبية " حقير يقهر .. هذا وانا اخته يسوي معي كذا .؟!
ابتسام : غادة روقي .. أولا هيثم قالك رفع قضية خلع يعني واقف معاك بس يبي يفهمك ان قرارك كان غلط .. تعالي فهميني وش هالحكي وش امنا انحاشت
غادة طالعت ابتسام بقهر : في خاطرك تنكرين ! في خاطرك تجحدين !! عادي قولوها امي انحاشت واتركتنا ماتبينا .. ليش ذبحتوها بعيوني ليشش
ابتسام : صدقيني ماكنت ابيك تعرفين و ... كونها ميته ارحم من منحاشة
غادة مسحت دمعتها : ابتسام رجاء اطلعي برا
ابتسام وهي زعلانة على حالة اختها .. توها صغيره وتعيش حالة طلاق وأم فجأة كانت ميته صارت حية : غـادة ..
قاطعتها غادة : ابتسام اطلعي .. رجاء .. مـالي خلق اتكلم
تنهدت ابتسام وطلعت وهي منكسرة ... نايف : شصاير .؟ لنا يومين مو مرتاحين يوم طاب واحد واليوم الثاني اصواتكم طالعة
ابتسام تنهدت بضيق وهي تجلس على الكنبة وتمسك راسها : ما أدري
نايف بهدوء جلس جمبها : ابتسام لآخر مرة اقولها ... تبغين مساعدتي انا مستعد .؟
ابتسام هزت راسها : لا .. لا بحل الوضع أنـا
نايف : متأكدة .؟ ... اجل براحتك
ابتسام : ................................
نايف وقف وطلع لفوق .. وابتسام جلست مع نفسها تفكر وهي تطالع غرفة غادة وبخاطرها تدخل بس ماتحس تقدر تسوي شي ..
***
بيت أبو فراس – الساعة 10 ونص /
نزلت اسماء من غرفتها وهي تتمخطر على الدرج وترقص : والحياااااة بئة لونها بمبي .. وانا جمبك وانتا جمبي
ام فراس بضيق وهي تشوف فستان اسماء القصير : ياشينك يا اسماء انتي وهالقصير !
اسماء باست خد امها : واناااا جمممبك وانتااا جمممبي
ام فراس قبصت فخذها : انتبهي وانتي تتحركين
ياسمين : شفيك يمه اسماء ماعليها عتب .. شوفي بالله كانها جسمي
اسماء ويدها على خصرها : نعم نعم يالبزر تعالي قابليني !
ياسمين : عليك كععب افصخيه وبتشوفي من أطول
اسماء انقهرت ولأنها عارفه ان ياسمين المراهقة 14 سنة بتجي طولها خصوصا انها طويلة .. حتى تركيبة جسمها كمراهقة نفس اسماء مايفرقن كثير : مانيب فاصختها وانا اطول منك وغصب عنك ويله اذلفي من وجهي يالورعة
وراحت تتمشى بالحديقة تحتري أحد يوصل .. وأول ماتوافدوا الوصول كانت تستقبلهم بفرحة .. ضحكته بوجهها عطتها سعادة لشهر قدام
***
بيت أبو نايف – غرفة ميهاف /
كانت جالسة على تسريحتها بعد ماخلصت الكوفيرا تسريحها وصبغها حست الصبغة تغيير حلو بما انها تزوجت خلاص .. رشت عطرها وخذت نظرة كاملة على شكلها بعد ماخلصت انتبهت لبدر يدق عليها قررت ترد يمكن تفهم وش هالزيارة : ايوه
بدر : هـلا والله .. كيفـك .؟
ميهاف : وش هالتقديم !
بدر : خالاتي وزوجات ربعي يبون يشوفونك .. عشان كذا رجاء اطلعي بشكل يبيض الوجه ابيك ترفعين
راسي
ميهاف بغرور : مرفوع راسك لو بس اسمي مقرون باسمك
بدر : المهم ! ابيك تسحرينهم ... ابي الكل يدري اني ماتزوجت أي كلام
ميهاف ارتفع ضغطها .. مسافر مبسوط وجالس يكايش بها من بعيد : السواق جا مع السلامة
أول ماسكر بدر السمـاعة .. جته مكالمه من خالته الي بنفس عمره " اريج " رد : هلا والله
اريج بعربجتها : اسسمع انا اللحين دخلت بيتكم ... ومرتك قليلة اصل للحين ماجت
بدر : هههههههههه يحق لها ملكة ماتجي الا بعدين
اريج : اححلف بس !
بدر : تو سكرت منها بتجيكم
اريج : والله لو ماتطلع حلوة .. لا أحاسبك على كل مرة قلت فيها انا بدر ماولدتها امها اللي تملكني
بدر بثقة : اوك موافق
سكرت اريج اللي كانت واقفة مع أختها " ام فراس " : والله واثق ولدك
ام فراس : بحق يوثق .. ما خطبنا له الا زين الشمري كلهم
اسماء دخلت وجلست على الكرسي باحباط .. اريج : شبلاك بعد انتي ! توك تطامرين وتغنين
اسماء : يمه زوجة نايف مب جاية
ام فراس : افا ليه
اسماء : تقول مشغولة
ام فراس : اجل بعذرها
اسماء بانفعال : لا والله مالها عذذذذر !!!
ام فراس : هاو كيف مالها عذر !
اسماء وهي تطلع وتتحلطم : اففف
اريج : انهبلت بنتك
دخلت ياسمين بحماس : ماما ميهاف جت
اريج نطت : يله نروح نفحصها زوجة بديران
دخلت ميهاف بثقتها العالية وهي تسلم على مجتمع كامل ماتعرفهم .. أول مرة تقابل أهل أم فراس سلمت بذرابتها المعتادة على الكل لحد وصلت لأسماء : والله أهل امك كثيرين
اسماء بضجر : ايه ... صح تذكرت ! زوجة اخوك ليش ماجت .؟
ميهاف عقدت حواجبها : ابتسام .؟ ما أدري قالت لي امي انها مشغولة اليوم
اسماء حاست بفمها : وش بيشغلها يعني بلا ماتبي تجي بيتنا
ميهاف : ههههههه وانتي من متى حساسة كذا .؟
اسماء : المهم اسمعي .. ترا خالاتي بيطلعون معكم يوم كشته هذا اقتراح اريج الخبلة
ميهاف عقدت حواجبها : وعلى أي اساس مقررين هالطلعة .؟ مقدر بصراحة
اسماء : والله اريج استأذنت من بدر وبدر قال ايه فجهزت كلش
ميهاف : وبدر يقرر عني كذا دون يقولي !
اسماء : ماقالك .؟
ميهاف بقهر : لا والله ماقالي .. يقرر من راسه كذا
اسماء : ما أدري .. تعالي بس نجلس مع البنات وروقي
جلست ميهاف جمب أمها .. وهي تسولف بأناقة .. ترد على اللي يكلمها مخصوص بس ماعدا كذا تكتفي بابتسامة وهي تسمع حديث المجلس
***
الكـويت – الساعة 7 مساءا /
نزلت سارا من شركتها بعد ما دق عليها انه وصل .. ضرب البوري عشان تنتبه له وركبت /
عقدت حواجبها : من هذي سيارته ماعرفتك
لؤي : سيارتي
فتحت عيونها : متى غيرها تو قبل أمس راكبه معاك ماكانت هذي
لؤي : ايه طفشت اليوم رحت شريتها .. بخاطري من زمان
سارا وهي تقيم السيارة بعيونها : لـؤي .. انت للحين مامسكت وظيفة .؟
لؤي : لا ولا حاولت .. مرتاح هالفترة كذا
سارا : ايه بس اشوفك ترمي بهالفلوس كأنك موظف
لؤي بعدم اهتمام : الخير واجد
سارا تنهدت بضيق : مو عاجبني وضعك كذا
لؤي : انا مقصر معاك بشي .؟
سارا : مو كذا
قاطعها لؤي : اجل وظيفتي مالك فيها .. اتوظف ما اتوظف كيفي , بالله سارا كافيني أبوي مقلقني بهالمواضيع مو ناقصك انتي كمان
سارا قالت تغير الموضوع : فينك اليوم ماجيتني بالمكتب ؟
لؤي : ماصحيت بدري .. وعزمني واحد ودجيت شوي تو خلصت
سارا : اهـا .. وقف شوي قدام السوبر ماركت
وقفوا قدام السوبر ماركت ... نزلوا وهم يتمشون بين الأركان .. لؤي : تبغي حاجة معينة .؟
سارا : ايه بس غرض مخصص ... ايوه هذا هو
خذت الكم غرض وقفوا عند المحاسبة ... المحاسب : اغراضج بـمية وثلاثين دينار
سارا عقدت حواجبها : انا اشتريها من سوبر ماركت ثاني بمية بس
المحاسب ضاق .. والمحاسبين مايكرهون شي بالحياة كثر هالاشكال : والله هذي اسعارنا
لؤي أول مرة يكتشف فيها البخل هذا .. : خلاص قلبي مايسوى على الرجال بدفعها
سارا طلعت من شنطتها مية وحطتها واخذت كيستها : هذي مية مافيه غيرها .. ماني هندية قدامك تلعب علي بالاسعار
وطلعت . . المحاسب اخذها متعود ع هالاشكال هز لؤي راسه وعطى المحاسب خمسين : باقي الحساب وامسحها بوجهي
لحقها لؤي وركب السيارة : لا عاد تكرري هالحركة .. اذكر مرة اشتغلت بسوبر ماركت كرهت وقاحة الزباين اللي كذا
سارا : وقاحة !
لؤي بصدق : ايه ليش الكذب .؟ حركتك وقحة ترا هو ماراح يستفيد من الخمسين عطيتيه ولا لا راتبه ثابت ... صدقيني مو مهتم يلعب عليك ويخدع حنكتك الزايدة
سارا : ايه بس الاسعار ثابته ليش يلعب علي فيها !
لؤي : خلاص سارا سكري .. مرة ثانية اذا ناوية تكاسري قولي لي ما انزل معاك بوجودي رجاء لا تكرري هالحركة
سارا : افشلك مثلا .!
لؤي : ايه الحركة تفشل .. اكثر نقاشات اكرها نقاشات حب المادة
سارا انقهرت حست حركتها قلة ذوق صدق .. سكتت دون ترد , لؤي انتبه لها وهي ساكته وتطالع الشباك قبص خدها : ياحلوك مكشرة
سارا ابعدت يده : يوه لؤي اتركني
رجع لؤي يقبص خاصرتها : روقتي .؟
سارا ابتسمت : ايه روقت .. هههههههه صدمتك صح .؟
لؤي : ههههههه نوعا ما ماتوقعتك كذا
سارا : وتو فيه اشياء واجد فيني بتصدمك .. بس انت اللي تزوجتني يعني تصبر مو مشكلتي
لؤي : لنا الله شنسوي بعد بنصبر
أول ماوصلوا الشقة ... سارا : حياتي وش تبغى تتعشى
لؤي : لا شبعان حمد الله .. تعشي انتي انا داخل انام
سارا : متأكد ؟
لؤي : ايه متعشي قبل امرك
سارا : اجل انا كمان متعشية .. بس خفت تكون جويع
خلد لؤي للنوم وهو مدلوخ .. فتح عيونه بنص نومته وهو ينتبه لها تقوم من تمشي على الشقة تطفي الأنوار ... ابتسم على حركة الشيبان اللي سوتها بجد اول حاجة يكتشفها فيها من تزوجوا ومن عرفها , مقتصده لحد البخل عاد رغم انه ماكان يبين عليها
***
الكويت – الساعة 12 ونص /
المؤسسة بهالوقت هدوء .. كان جالس بمكتبه ينهي بعض المعاملات الضرورية بنص شغله دق جواله سياسته مايرد على احد بهالوقت بس هالرقم بالذات مستحيل يتجاهله رد مباشرة : ايوه
صوت رجالي : اهلين طال عمرك .. كيفك .؟
فراس : شداق تبغى ؟
: ابشرك .. حصلناها
فتح فراس عيونه وافلت القلم من يده ووقف : متـــأكد ؟!!
: ايه والله .. متأكد وابغى حلاوة الخبرية ؟
فراس : لازم أتاكد اول ! واذا طلع كلامك صح اعتبر نفسك مليونير .. واذا العكس أعتبر اسمك بالسوق السوداء ملغي
:لا ان شاء الله كلامي صحيح ..و ما أتوقع اقل من كذا من المدير التنفيذي
فراس : وينك ؟
: طرابلس
فراس : ولا تتحرك .. بأقرب فرصة بكون عندك
سكر السماعة وضغط على نداء السكرتير : تفضل
فراس : احجز لي اقرب طيارة لطرابلس .. ولا تهتم اذا درجة اولى او غيره اقرب رحلة لو مع العفش !
استغرب السكرتير انه يتنازل عن رفاهيته : حاضر
جلس فراس على كرسيه وهو يحس آخرة صبره هالسنين وصل لنتيجة .. شد على قبضته بعزم : والله وطحتي ومحد سمى عليك
بيت نايف .. الساعة 1 مساءا /
غادة للحين مسكرة عليها غرفتها وعايشة بتوتر فضيع .. للحين كلام هيثم براسها بيت طاعة ! بياخذونها ! .......تفكيرها طول اليوم كان يدور حول فكرة وحده والظاهر لازم تعزم عليها بلعت ريقها بخوف ووقفت عند سرير رنيم واستمدت شجاعتها لما عرفت انها مسؤولة عنها ولازم تتصرف لأن محد بينفعها ..
مسكت جوالها بيدين مرتجفه ودقت : الـو .. ممكن اطلب تاكسي بحي ال ******* شارع ******* .... ايه اللحين .. شكرا يعطيك العافية
سحبت شنطة متوسطة الحجم ودخلت الأغراض الضرورية بس اللي تحتاجها وكم لبسه لها ولرنيم .. لفت رنيم بمهادها وتركتها وهي تسحب رجلها لبرا ودخلت مكتب نايف الموجود بالطابق التحتي بلعت ريقها وهي تفتح التوجيري حقه ماتدري ليش حفظت رمزه لما فتحته ابتسام .. وسحبت لها رزمتين فلوس وطلعت وهي تترك رسالة على سريرها وخذت رنيم وشنطتها وطلعت بسرعة قبل يدق التاكسي الجرس ويخرب كلش أول ماوصل ركبت معه : المـطار !
ودقات قلبها جنونية .. حتى انها تتوتر من نظرة صاحب التاكسي ومن كلش حولها ومن السيارات والطريق وكلش , ماراح تنتظر خلع ولا بيت طاعة ولا شي ... بتروح ولا راح تطالع وراها