استغربت لما فراس يقول للؤي خليها عشيقة.. ويا خوفي يتزوجها لؤي بالسر وبعدين اهله بيجبروه يتزوج وحدة تانية
غادة اظن الافضل انها تسكن مع اخوها لانه بنفس المدينة افضل من انه تكون ببيت اختها
بانتظار الفصل الجديد يوم الخميس

" البارت الثامن عشر "
" اذا اردت شيئا بقوة فأطلق سراحه , واترك له باب القفص مفتوحا فإن عاد إليك فقد كان دائما لك وإن لم يعد ... فإنه لم يكن لك من البداية ! "
تسارعت دقات قلبها وتوسعت عيونها وهي تستوعب .. واقف ببرود بعد ماخلص تحليل مشاعرها بعد ما أنتهت مهلة جوابها .. نطق : من ردة فعلك ارجح الأحتمال الثاني ... " كمل بنفس النبره الباردة " عموما سواء الأحتمال الأول او الثاني ماراح تحصلي مني شي فالوقت متأخر ارجعي بيتكم ولا عاد ترجعي لهالمستشفى الا لسبب
اسماء تو تستوعب انه رفضها كلش فيها تجمد .. تو تستجمع قوتها عشان تتكلم أقل شي تنفي عشان تنقذ باقي مشاعرها لكنه مشى من جمبها بهدوء ودخل للمستشفى .. مشت قشعريرة بكل جسمها ! وش صار قبل شوي .؟ كان واقف قدامي ! تكلم معي ..؟ لا كيف شلون صار كذا ... سحبت رجلها بخيبة وركبت مع السواق وبنبرة يائسة " البيت"
اما هيثم دخل وجلس على مكتبه وعيونه متسمرة على الأوراق , بنت فهاد الشمري مرة وحده جايه برجليها لعندي .؟ ماطال تفكيره عقله ومبادئه مرتبه .. حتى لو البنت فاسدة ماراح يفضحها بيكتم سرها وبيتصرف طبيعي ما كأن صار شي , خصوصا انه يشتري راحة راسه
- الظاهر يا اسماء ان هيثم مو الجذاب المثالي اللي تخيليته
***
الكـويت /
تنهدت سارا : اتركني أفكر لؤي
لؤي : شتفكري فيـه .؟
سارا : باللي قلته .. مو شايف انك قلت حاجة كبيرة جدا ويحتاج لها اقل شي تفكير
لؤي : انا مابيك تشوفيها حاجة كبيرة .. اعتبري الوضع طبيعي انا مستقل عن أهلي تماما
سارا بضيقة : لسى محتاجة تفكير
لؤي تنهد : خلاص براحتك .. فكري وردي لي بأقرب فرصة
سارا : لؤي
لؤي قبل يطلع التفت : لبيه
سارا وعيونها بالارض تبعد عنه : لحد ما أجيك واقولك ردي مابي اشوفك .. مابي اشتت تفكيري
لؤي طالعها دون مايرد لفترة .. ثم طلع برا المكتب , دق جواله " فراس " رد مباشرة : ايوه
فراس : ماقلت لي انك راجع للكويت .؟
لؤي : هذا أنت عرفت .. متى بترجع انت .؟
فراس : يمكن ما أرجع هالفترة ..
لؤي : ليش صاير شي .؟
فراس : لا .... يمكن اسافر مع الأهل
لؤي : اها ..
فراس ضيق عيونه وهو يطالع من نافذة غرفته اسماء نازلة من السواق وداخله : انا بسكر
سكر السماعة ونزل مباشرة .. البيت كله هدوء والأنوار مسكرة الساعة 1 ونص , اول مادخلت اسماء وصلها السؤال : فين كنتي ؟!!
رفعت اسماء راسها له وهو واقف قدامها ومتكتف .. قالت بصوت مازالت اثار الخيبة فيه : عند عمي ابو نايف
فراس طالع ساعته : لهالحزهـ .؟
اسماء : ايه ..
فراس : كان انقبرتي عندهم لحد بكرة او دقيتي علي أجي اخذك .. اما راكبه مع السواق بهالوقت !!
اسماء مالها خلق : ان شاء الله
فراس : انقلعي لغرفتك
صعدت اسماء لفوق .. وفراس رجع لغرفته ونام مباشرة
***
الصبـاح /
صحت اسماء من نومها .. طالعت بالمراية شكلها الفوضوي تنهدت بضيق شكلها قطعت اخر حبل للأمل بيديها رتبت شكلها ونزلت لتحت كان العائلة كلها مجتمعة على غير العادة لكن اصوات طالعة الظاهر نقاش حاد جالس يصير , تأكدت من صوت بدر المعصب : مالكم دخل يعني مالكم دخل !
فراس : انت للحين تناقش .؟
بدر : شنو للحين اناقش ! الموضوع يخصني لو ماتدري يعني
فراس : بحياتي كلها ما أذكر قررت حاجة وقبلت النقاش فيها
بدر وقف بانفعال : ماودك تنقلع للكويت وتنثبر هناك ولعد تورينا وجهك ! غايب كل هالفترة وراجع وعلى بالك كلمتك تمشي
فراس ارتفع صوته طول النقاش وهو يرد بنبره هاديه لكن انتهى صبره : تاكل تبن يا زفت وتختار الفاظك معي , محد ممشي امورك كلها غيري انا .. ودك تجرب اسحب نفسي منك تماما واشوف كيف بتوقف على رجليك !
بدر : يدك وماتعطيك .. مصدق نفسك الهواء اللي من دونه بموت ! في ستين داهية
فراس سحب ياقة بدر ونطق بين اسنانه وهو شاد على قبضته : لا تكبــر بالـ....
قاطعهم ام فراس اللي اقحمت نفسها بينهم لحد ما أفلت فراس بدر .. ام فراس : مو صاحين ! كل هذا عشان موضوع مايسوى
فراس تنهد وهو يهدي اعصابه ويجلس بينما بدر مازال واقف ... كمل فراس بنبره هادية : بدر .. انا ما أغصبك تتزوج ولا لي مصلحة في قرارك , بس عمي طالب هالشي ومن حقه تبغاها خذها هذي هي موجودة ماتبغاها اتركها تشوف حياتها
بدر جلس دون يتكلم : ....
اسماء انقهرت منه خصوصا بعد حالة ميهاف امس : حرام عليك يابدر .. اللي بيشوف موقفك ماراح يصدق انك خاطب ميهاف اللي الكل يتمناها
ام فراس بقهر : من جد بسم الله عليها تعجز تدور فيها عيوب مالها مثيل ... وانت محسسنا غاصبينك على وحده ماتسوى
تنهدت اسماء وهي تشوفه ساكت وعيونه بالطاولة .. حطت يدها على كتفه : وامس عرفت انها شايله بخاطرها عليك كثير .. حرام اللي تسويه فيها ترا البنت تحبك
بدر وقف بهدوء وهو طالع : سوو اللي تبون
ام فراس : موافق يعني خلاص !
بدر : ايه ..." وطلع وسكر الباب "
فراس : حمد الله والشكر بس كأني جالس اناقش بزر
اسماء ابتسمت من قلبها : شلون يعني خلاص بيتزوجون قريب !!
ام فراس بفرحة : ايييييه .. حسبي الله على بليسه بديران مابغى يفرحني فيه , فراس كلم عمك من اللحين واتفقوا ع كلش
فراس : كلمي انتي زوجة عمي وبس .. انا هالورع ماعاد اتدخل في اموره
اسماء : يوه لايكون زعلت بس من حكيه .. ترا يقط خيط وخيط
فراس : قدامه عشرين سنه يعيشها يتعلم فيها قبل يقدر يزعلني .. انا طالع انام بس
اسماء بحماس : انا رايحه ابدل وبروح لميهاف .. وناسه دام فيه خطوبة وعرس قريب قدامنا شغل
ام فراس : هههههههههه انا رايحة اكلم زوجة عمك
***
بيت نايف :-
كانت ابتسام بالمطبخ وماسكه راسها وهي تسمع نايف جالس بالصالة ويتناقر مع غادة اللي بغرفتها ومو عارفه تحقره وهو يغلط ...بعد ماخلص دخل المطبخ وهو يضحك : ههههههههههههههههههههههه ابتسام شتسوين ؟
ابتسام وهي تطلع الكيكة من الفرن : هيثم بيتعشى معنا اليوم .. راح تكون موجود ؟
نايف وهو يتكي على الطاولة : تبغيني اكون موجود .؟
ابتسام : براحتك .. ماتفرق معاي انا
نايف : لا ماراح اجلس ..واحد مكلمني بيتعشى معي فطالع
ابتسام : بس حاول ترجع بدري شوي .. مو حلوة ماشفت هيثم من رجعت
نايف وهو طالع : بحاول ..
قبل يصعد لفوق يبدل ابتسم وقرب من باب غرفة غادة وطقه .. غادة : مين .؟
نايف : هههههه انا .. انا طالع تبغين اجيب لك حاجة معاي وانا راجع .؟
ارتفع ضغط ابتسام .. ما سألها هالسؤال ورايح يسأل غادة بس عشان ينرفزها طلعت من المطبخ : نايف !
نايف : هلا
ابتسام شدت على الي بيدها وقالت بنعومتها المعتادة: اترك البنت بحالها حبيبي خلاص
نايف : جزاي اسألها وش تبي .؟
غادة : ابي قلعتك .. يله انقلع
نايف : هههههههههههههههههههه بس .؟ من عيوني .. يله اجل سلام
غادة : تافه بجد ع كلش يضحك !
طلع نايف وابتسام دخلت على غادة : غادة وش قلت امس انا ! خلاص يختي اسفهيه .. لانك تردين عليه يقعد يناقرك
غادة : هو يوخر عني .. اصلن اسمعي اذا جا هيثم اليوم بقوله اني بطلع لشقه لحالي
ابتسام : ماراح يوافق .. وانا مستحيل اوافق شقه لحالك مع بنت صغيره ! بتنثبري هنا وبتعقلي
غادة بقهر : والله انا اعقل وما أدري ايش وهو كيفه !
ابتسام : اقول خلك ع حالك اذا قالك كلمة رديها عشر .. عايشه مع بزارين انا
***
شقة سارا – صباح /
قامت من سريرها وهي مانامت اساسا كل شوي تفزفز هذي عادتها بالنوم اذا صار شي مقلقها .. شالمفروض تسوي تقول لأحد .؟ هيثم اقل شي .. لا لا هيثم مستحيل يوافق وبينتقدها بقوة .. !
كلمت الدوام وبلغتهم انها ماراح تجي .. اول ماسكرت السماعة طالعتها هيفاء : شنو صاير بالدنيا .. سارا ماتبي تداوم لا لا لا معجزه هذي
سارا جلست على الكنبة قدام التلفزيون : اسكتي هيفاء راسي مصدع بينفجر
هيفاء : يو يو علامج يابنية شنو صاير .؟
سارا تنهدت لازم تقول لأحد .. ماتقدر تفكر بعقلها خصوصا وعواطفها تحكمها : انخطبت
هيفاء طاح الصحن من يدها وركضت لحد ماصارت جمبها : شنو شنو شنو ! لاتقولي .. لؤي ؟!
سارا هزت راسها باحباط : ايه ..
هيفاء : ايه وليش زعلانه ! ماتبينه !
سارا بضيق : ناوي نتزوج سر .. محد يدري
هيفاء سكتت لما استوعبت الوضع : ............
سارا : عشان كذا متضايقة .. وش ممكن يصير لو يكتشفون او .....ااخ راسي عورني من التفكير خلاص
هيفاء : معاج حق .. بس وقت تتزوجوا تحطون اهله قدام الأمر الواقع مالهم الا يوافقوا
سارا : مابي ادخل عليهم بهالطريقة غصب ..
هيفاء : والله مدري شنو اقولج ..
سارا : عارفه ... اللي يوجع ان الرد الصحيح هو لا بس هل انا قوية ومستعده اجاوب بلا .؟
هيفاء سكتت .. ماتقدر تعلق خصوصا وهي تعرف قد ايش سارا متولعه فيه
***
ميهاف ارمشت بعيونها اكثر من مرة بعدم تصديق : وافق .؟
ام نايف : ايه كلمتني امه قبل شوي .. وتتفق معي على الموعد و ...
ابتسمت ميهاف : بجد يعني .؟
ام نايف : ايه مو مصدقة يعني
ميهاف : ابدا ! تو اسماء كلمتني وجلست اكذبها .. احس غريب يعني
ام نايف : لا خلاص تفاهموا معه ووافق ..
ميهاف " غريبة وافق اجل ليش ماكلمني للحين " : خلاص اجل انا صاعده ابدل قبل تجي اسوم
ام نايف : حلو بتجي تساعدك تخططين .. ترا الملكة قريبة
ميهاف : متى .؟
ام نايف : بعد اسبوعين
ميهاف بحماس : تمام تمام ..
صعدت لفوق مسرعة .. للحين ماسامحته على كلامه عشان كذا ماراح تكلمه راح تنتظر مبادرته للاعتذار فتحت دولابها بحماس بخاطرها تسوي كلش اليوم انفتح باب غرفتها ودخلت اسماء وهي تزغلط : كولولولولوللولوليش الف الصلاة والسلام عليك ياحبيب الله محمد كولولولولوليش ! !
ميهاف سلمت عليها وهي تضحك : ههههههههههههههههه تعالي تعالي قولي لي كلش شلون وافق !
اسماء : ههههههههههه والله مدري السالفة تضحك .. على قولة فراس كانا نناقش بزر نافخ ريشه ويحلف مايبي شوي كلمتين من امي بحنيتها قال خلاص موافق
ميهاف : وكيف يحلف مايبي يعني !
اسماء : لا تاخذين بخاطرك .. اصلن احسه كان يحلف ويهاوش وكل هذا بسبب اسلوب فراس مايبيه يغصبه على شي , بس لما جيناه بأسلوب طاح الحطب
ميهاف تنهدت : حمد الله اجل .. دريتي الملكة بعد اسبوعين ؟
اسماء : ايييييه واكيد عقبها بفترة العرس .. هالفترة بيكون قدامك شغل كثير
ميهاف : ايه .. والمحبط ادق على لورا ابي منها كم فستان ماترد نهائي !
اسماء : وعيه لورا مدري ليش ناشبه فيها انتي .. مرة سوت لي مقلب بفستان كرهتها
ميهاف : بصراحة معاي رائعة .. ماعمرها صممت لي حاجة وما سألو الناس عنها
وانغمست بتخطيطاتهن بحماس ماتركن حاجة ماخططن لها .. ومن يحب ترتيب الفشخرة اكثر من ميهاف واسماء .؟
***
دخل نايف الشركة وهو يطالع بالمكان : والله وتغيرت .. ههههه اكيد بتتغير لي سنة مو داخلها
قابله سكرتير ابوه وسلم عليه بحرارة : اهليييين نايف .. وين يارجال كم لنا ماشفناك !
نايف : هلا هلا والله معاذ .. كيفك شلون صحتك .؟ حمد الله تمام وين بكون ضايع بهالدنيا
سكرتير : هههههههههه وامورك تمام ! ما اسمع عنك الا من الوالد جمد حساب نايف كنسل سفرة نايف
نايف : هههههههههههههه وانت تطيعه يالخاين ! افزع لي شوي واسحب عليه
سكرتير : بايع وظيفتي انا .. اخر خبري فيك انك متزوج قريب الف مبروك
نايف : يبارك فيك .. المهم وين الوالد ؟
سكرتير : بمكتبه تفضل
دخل نايف وجلس على الكرسي وبعد فترة صمت : على فكرة لون ستارة مكتبك مو مناسب
طالعه ابو نايف : اخيرا جيت !
نايف : والله علقت شوي مع الزحمة .. آمر
ابو نايف : ايه .. رجعت من سفرتك خلاص امسك وظيفتك
نايف كشر : ياليت تنسى لي هالموضوع
ابو نايف : انساه طل ! انا قايل تتزوج وتتوظف .. الزواج وتم اللحين امسك وظيفتك .. كيف ناوي تصرف على بيتك .؟
نايف : الخير واجد ما اذكر انك مفلس
ابو نايف : انا مالي دخل .. انت صرت ابن مستقل يعني تتولى مسؤولية نفسك وعيالك
نايف تنهد : يبه انت تعرفني الحاجة اللي تفرض علي ما أحبها ولا اسلك فيها !
ابو نايف : انت اللي خليتنا نفرضها غصب
نايف : خلاص انا تو متزوج ماتميت شهرين حتى .. خل انبسط هالفترة وبعدين اداوم
ابو نايف بصرامة : ببدا اسجل حضورك من الاسبوع الجاي .. ولاتفكر تطلب فلوس مني ولا من لؤي !
وقف نايف وطلع دون يتكلم .. تافف بقهر وركب سيارته ودق على بدر : هلا نايف وينك .؟
نايف : كنسل موعدنا اليوم ماراح اجي
بدر : ليش عسى ماشر .؟
نايف : ماشر ..
سكر السماعة ووصل البيت .. دخل وصعد مباشرة , ابتسام كانت مع غادة بالمطبخ استغربت جا وصعد دون كلمة .؟
غادة : مو كأنه رجلك جا .؟
ابتسام : ايه .. غريبة كملي كملي انا صاعدة اشوفه
غسلت يديها وصعدت .. عقدت حواجبها وهي تشوفه منسدح على الأريكة ويبدل بالقنوات : مسرع جيت على اساس معشى .؟
نايف وعيونه بالتلفزيون : اعتبريني مو موجود
ابتسام جلست على الكرسي المنفرد جمب الأريكة : صاير شي .؟ هههههه مو بالعادة تصعد دون تطلع صوت غادة .؟
نايف : مو صاير شي .. شوي تعبان ومصدع بارتاح
ابتسام قلقت بجد .. لامست جبينه بيديها لكنه مسك يدها مباشرة وابعدها عن جبينه بنفور استغربت ابتسام : شفيك انت مو طبيعي .؟!
نايف : قلت لك مافيني شي .. تعبان وبنام وخلصنا ! افف
ابتسام : طيب ليش تتكلـم معاي كذا ؟ انت متضايق فيه حاجة مو طبيعية
نايف عدل سدحته وجلس وقال بعصبية : كيف اصير طبيعي ! مافيه شي بحياتي يمشي طبيعي عشان اصير طبيعي .. وظيفتي غصب عني سفراتي غصب عني اكنسلها زيارات غصب عني اروح لها .. زواجي غصصصب عني !! وتقوليلي مو طبيعي
ابتسام كسرها كلامه .. متزوجها غصب ! اخيرا نطقها ..: .................
نايف تافف ومسح على شعره بقلق وهو يتجه للنافذة يبعد عن عيونها اللامعه تعلن دموعها .. قال بهدوء : قلت لك اتركيني ارتاح ..
ابتسام شدت على قبضتها وهي تخفي انكسارها توجهت للحمام للصيدلية وطلعت حبة مسكنة وسكبت كاس موية وحطتها بالطاولة جمب السرير وقالت بهدوء : هذي حبة مسكنه وكاس ماء .. خذ حبه تخفف عليك وارتاح وخفف التكيف وبيروح الصداع ان شاء الله
عض نايف على شفته بقهر التفت يبي يبرر لكن قابله الباب يتسكر طلعت .. مسك راسه وهو يحس جاه صداع بجد اما ابتسام اول ماطلعت وقفت قدام المراية بالممر وهي تطالع نفسها بقوة وتتنفس الصعداء : ماراح اسامحك لو تبكين عشانه ! هـدي بالك .. كان واضح من اول
شدت على قبضتها واسترجعت هدوئها واعصابها .. ونزلت قابلتها غادة : وينه .؟
ابتسام بطبيعية : شكله مصدع وتعبان شوي .. تركته ينام
غادة : عقوبة ربي !! مايضيع حق احد يستاهل
ابتسام طالعت الساعة : فينه هيثم تأخر هو كمان
غادة : من جـد
صوت الجرس يرن .. ابتسام ابتسمت : هذا هو .. روحي افتحي وانا بجيب القهوة
غادة طلعت بحماس : لاتنسي رنيم معاك
***
بيت أبو نايف /
ميهاف : ياشينك .. اجلسي شوي خل نخلص تخطيط الأكل والمائدة
اسماء : خلاص ميهاف الساعة 12 تاخرت
دقت اسماء على السواق : الو مدام
اسماء : هلا راج .. انا في بيت ابو نايف تعال خذني
السواق : آسف مافيه اقدر
اسماء : اشرح لي شلون ماتقدر !
السواق : سيد فراس قول بعد ساعة 10 مافيه توصيل
اسماء : احلف !
السواق : والله .. خلاص انا مابي مشاكل
سكرت اسماء السماعة وقالت بقهر : رجعنا للتعقيدات حقت فراس
ميهاف : سلامات شصاير .؟
اسماء : امس رجعت متأخر الساعة 1 .. اللحين مطلع نظام للسواق عقب 10 مايوصل احد ! شنو 10 دجاج حنا
ميهاف : خلاص كلميه يجي ياخذك .. دام معطل السواق يتحمل المشاوير
اسماء : هذا اللي بيصير .. والله لاطلع كل يوم واسهر ل 1 عشان اقلقه يجي ياخذني
دقت اسماء وهي منتفخة جاها الرد : ايوه
اسماء : يقول السواق انك مانعه يطلع عقب 10 !
فراس : ايه .. عندك اعتراض .؟
اسماء : لا .. بس ابي ارجع البيت تعال خذني !
فراس : بنام .. كلمي بدر لسى مارجع البيت
اسماء : مانيب بدر بيقول روحي مع السواق وهو ماله دخل .. انت صاحب القرار تعالي خذني !
فراس بحدة : اسماء دقي على بدر وارجعي معه قبل ما اسفر السواق عشان تعرفين !
اسماء بقهر : زين
سكرت السماعة وقالت بقهر : قال يسفر السواق قال ! بسم الله عليه راج فيك ولا فيه
ميهاف انبسطت : دقي على بدر طيب !
اسماء : هذا اللي بيصير
دقت على بدر : نعم !
اسماء ابعدت السماعة وقالت بحلطمة : وش ذالاخوان كل واحد اخلاقه تجاريه اكثر من الثاني
بدر تنرفز : الو !!
اسماء : هاه هاه .. ابيك تجي تاخذني
بدر : قولي للسواق ماني فاضي
اسماء : السواق ممنوع يجي ياخذني .. قوانين السيد فراس الجديدة
بدر : دامها قوانين فراس يجي ياخذك هو
اسماء : فراس نايم .. يله بدر اشحذكم انا
بدر تنهد : جاي بس مب اللحين اذا خلصت
اسماء : ومتى بتخلص ان شاء الله .؟
بدر : وش رايك تحاسبيني بعد على طلعاتي !!
اسماء سكتت : زين .. احتريك مو تنساني
سكر بدر السماعة دون يرد .. اسماء جلست بقهر : اخواني خرا ! لو اسمعك مرة ثانية تشكين من نايف قدامي عطيتك بوكس يطيرك لآخر الدنيا
ميهاف : ههههههههههههه والله لو عندك نايف مارد عليك اصلن
اسماء : وانا وش استفدت من اللي ردوا علي . ! ليتهم ماردوا اساسا
ميهاف : الله يعينك يختي .. بس احسن اجلسي نكمل تخطيطنا
اسماء : تعالي وش ورانا
***
بيـت نايف /
له ساعتين منسدح لكن النوم ماحصل .. تنهد بضيق وهو يطالع الحبه وكاس الموية عرفت تحسسه بتأنيب الضمير , لو مصارخه عليه وقاهرته كان ارتاح .. جلس واتجه للنافذة وهو يشوف الجلسة تحت جالسه مع غادة وهيثم وتضحك ضحكتها الناعمة اللي هي مجرد ابتسامة تمتم : مخلوقة من حجر انتي .. معقولة مو متضايقة بجد ؟!
تذكر كلامها انه مفروض يشوف هيثم .. اقل شي يسويه بعد كلامه معها ظل واقف عند النافذة ودق على جوالها , انتبه لها وهي تمسك الجوال وتعقد حواجبها بضيق ثم ترد : هلا
نايف ارتبك : اا .. انا احسن اللحين وبنزل اسلم على هيثم
ابتسام : طيب ؟
نايف اول مره يحس موقفه ضعيف قدام احد : اذا يضايقك ماحنزل
انتبه لها توقف وتبتعد من جلستهم : مايضايقني البيت بيتك
نايف : ولا تدرين خلاص مو لزوم
توقعها تصر .. لكنها ردت ببرود : اوك
وسكرتها .. تأكد انها زعلت طبيعي تزعل واحد ومغصوب عليها ! اففف وانا شدخلني هذا الصدق رمى جواله وبدل ملابسه وطلع من الباب الخلفي
عند الجلسة /
غادة مستغربة : غريبة ليش تسأل !
هيثم بهدوء وهو يرتشف عصيره : كانت مريضة عندي بجدة .. سؤال عادي يعني
ابتسام : متأكد سؤال عادي ! مافي عقلك افكار ثانية
غادة تحمست : امااا !! بججد .؟
هيثم ( مابقى الا هي ! والله لو معد في الدنيا حريم ) : لاتتحمسين انتي وياها .. انا مستحيل اخذ من الشمري فارتاحوا
غادة : وليش ان شاء الله !
هيثم : دون ليش
ابتسام : خلاص مو ضروري الشمري .. ماودك تتزوج بجد هيثم شوف كم عمرك بتدخل الثلاثين خلاص
هيثم : بعدين ابتسام .. انا للحين ما استقريت
ابتسام : بساعدك !
هيثم : لا تنزلين من كرامتي بهالكلمة ابتسام .. ولعد اسمعها لو سمحتي !
غادة : الا غريبة مريضتك بجدة ! هم بالرياض
ابتسام : الناس مايسافرون يعني
غادة : طيب دام مريضتك اكيد شفتها
هيثم باحتقار : دون تصير مريضتي .. هي تعرف الغطا اصلن
غادة : حلـوة صح !
هيثم ورنيم بحضنه شالها بالهواء وهو يبتسم لها : رنومتي احلى .. صح رنومة صح ياقلبي
غادة بفخر : اكييييد رنيم احلى .. هذي مو حي الله هذي رنيم بنت غادة وست انعام
ابتسام : ههههههههه بشويش لاتذبحين نفسك من الخقة بس
هيثم : غادة انتي ماتطلعينها للشمس .. صح ؟
غادة : الصدق ايه ما اطلعها
هيثم : واضح ! عيونها للحين فيها صفار .. من اليوم طلعيها لاصارت الشمس باردة صبح او قبل المغرب
غادة : كان اطلعها .. بس عقب مارجع نايف ماصرت اطلع من غرفتي اصلن
هيثم : ولو غلط , مسكينة واضح عليها
ابتسام : المهم ع طاريها .. غادة ترا بكرة عزيمتها
غادة : اكيد بروح ! ابي اشوف بيتهم يصرع زي بيت اهل نايف ولا لا
***
اثناء ما اسماء وميهاف متبطحات على سرير ميهاف ويحوسون باللابتوب يدورون افكار .. دق جوال اسماء الساعة 3 " بدر " : اخيرا !
: هلا
بدر : انا برا اطلعي
لبست اسماء عبايتها ... ميهاف : كانك ضايقة انك تاخرتي عندنا ! ترا مو اجانب حنا
اسماء : أيه عارفه بس ولو .. امي بتسوي لي سالفة اللحين اصبري علي
رافقتها ميهاف للباب : يله اشوفك على خير
اسماء : بكرة لا تنسين تجين .. وتعالي بدري اول الناس
ميهاف : بحـاول يله باي
سكرت الباب وتنهدت وهي تفكر انه برا .. هالفترة تحس بينهم مسافة وحاجز قوي , حتى رغم انه وافق للحين متكبر يدق يتكلم معها لو حتى دون يعتذر .. صعدت لفوق وكملت تخطيط بنفسها واهم حاجة بتخطيطها الأجود والافخم بكل حاجة .. ذائقتها الجمالية عالية وماترضى الا بالكامل
سيارة بدر /
اسماء : صراحة بدور يفوتك .. خططنا لكلش ياعمري عليها ميهاف مجتهده كلش حاطته اجود شي
بدر ومسند مرفقة على الباب ويسوق بيد : لو ماتسوي كذا اصلن ياويلها
اسماء : احول شوي اسلوب طيب ! " تتهزا به " ياويلها
بدر : نايف بالبيت ؟
اسماء : مدري .. لا ماشفته
بدر : اكيد ببيته اجل
اسماء : طبعا ببيته ! انت لو تتزوج بتجي تجلس عندنا يعني
بدر كشر : احد يطلع من جحيم ويرجع له برجله
اسماء : اقول بدر .. ابي اسألك سؤال من زمان بخاطري
بدر : شنو ؟
اسماء :انت ليش فجأة قررت تخطب ميهاف ؟
بدر بتملص : مافيه حاجة معينه .. سيرتها طيبة ودايم تمدحونها فحسيتها مناسبة
اسماء : ايه بس حنا لنا يمكن سنتين نحاول فيك رافض قطعا .. وفجأة جيت من نفسك
بدر : شفتها بالصدفة
اسماء فتحت عيونها على وسعها : هااااااه !
بدر دفر راسها اللي وصل لكرسيه : وخخري شوي وش هالشفاححه
اسماء : شنو شنو شنو ! اول مرة ادري بهالحكي .. شلون شفتها .؟
بدر : كنت انتظر نايف بالحديقة وهي طلعت
اسماء : أيه .؟
بدر وهو يتذكرها : شفت احلى منظر بحياتي .. وحده جسدت الكمال
اسماء : ايه وحنا من زمان نقولك ! وانت اصقه
بدر ابتسم : مبسوطة ؟
اسماء بصدق :اكييييييد مبسوطة .. احب ثنين على قلبي بيتزوجون اكيد بنبسط
بدر كشر : مو انتي ! ...." كمل بصوت خافت " قصدي هي ؟
اسماء وهي ترقص بحواجبها : الله الله ... اكيد مبسوطة حاصلها السوبر ستار بدر قرر يرمي عزوبيته عشانها وبيتزوجها
بدر : اهاا
اول ماوصلو صعدت اسماء لغرفتها .. تنهدت بضيق طول اليوم تشغل نفسها تفكر بس وقت الليل كيف تشغل نفسها .؟ مافيه غيرها هي وهالفكره بالغرفة , ضربت راسها بقهر : معقولة يا اسماء تخربين السالفة كلها كذا ! اففف اكرهني
والهرب كان تبدا تخطط لبكرة من اللحين .. خواته بيجون وهن أملي الوحيد !! صعب اوصله مباشرة ..
***
ابتسام واقفة عند الباب تودع هيثم .. هيثم : فينه نايف .؟ الوقت متأخر
ابتسام طالعت الساعة 1 ونص .. ماحبت تقوله انه فوق : هو دايم يتأخر عادي
هيثم : يله اجل انتبهي لنفسك .. في امان الله
طلع وهي مشت بطريقها ترتب المكان والمطبخ .. بعد ماخلصت دخلت غرفة غادة كانت جالسة وتبرم اظافرها ورنيم نايمة : مانمتي .؟
غادة : اللحين بنام
ابتسام : تصبحي على خير اجل
غادة : وانتي من أهـله
سحبت ابتسام رجلها لفوق .. دخلت الغرفة كانت فاضية اكيد طلع , تنهدت وهي تسحب المغاطة من شعرها ويتناثر على وجهها , طالعت الحبة جمب السرير ما أكلها خذتها ورجعتها مكانها ونامت وراها دوام واخر شي تحتاجة تشيل همه
عند نايف – قدام بيت نهى :-
نايف والسماعة باذنه : انا عند الباب
نهى : اوك بوصي الخدامة تفتح لك
فتحت الخدامة ودخل لداخل .. كانت بكامل اناقتها ولبس سهراوي ارجواني : حمد الله ع السلامة .. تو مانور البيت , كم لك من وصلت تو تطل علينا
نايف استرخى على الكنبة : هلا نهى .. فينه يزيد خفت حرارته .؟
نهى جلست جمبه ورجل على رجل : لا والله .. وزعلان عليك يقول ماجيت تشوفه
نايف : مالي اسبوع وتو فضيت
نهى : ولو هذا ولدك من اولوياتك ! ماتنلام العرس ماخذ عقلك
نايف : نايم اللحين ؟
نهى : ايه
نايف وقف : انا صاعد اشوفه
نهى : بتتعشى هنا ؟
نايف وهو يصعد : شبعان لاتكلفي على حالك
فتح غرفة يزيد الطفولية ونور سهاريه خفيف .. جلس على طرف السرير ويده تلامس جبينه فتح يزيد عيونه اثر اللمسة وفز بسرعة لما شافه وضمه : باااباااا
نايف : ههههههه هلا بولي العهد
يزيد : متى جيت ؟
نايف : اللحين .. كيفك حبيبي ماما تقول انك تعبان ؟
يزيد : لا لا مب تعبان .. ابي اروح معك السيارة
نايف : بكرة ان شاء الله .. الوقت متأخر اللحين
يزيد بزعل : انت تنسى بكرة
نايف : هههههههه صح معك حق بنسى .. خلاص مو مشكلة وقت انسى ذكرني
يزيد : طيب
دخلت نهى .. ابتسمت وهي تشوف يزيد : هههههههههه صحيت ؟
يزيد المتعلق برقبة نايف : اييييه
نهى : ارجع نام حبيبي ارتاح .. ابي اكلم ابوك لحالنا
رجع ينام .. وطلعوا نايف : وش تبين ؟
نهى : ع العشى .. جاهز تحت تعال
على طاولة العشاء .. نهى : انا مسافرة قريب مع صاحباتي
نايف وهو ياكل : طيب شاسوي لك ؟
نهى : يزيد .. ماراح اخذه طبعا رايحه اوسع صدري مابي بزورة
نايف : مو مشكلة قوليلي متى وباخذه
نهى : ووين بيجلس ؟
نايف : عند جدته فين يعـني
نهى : لا ! اول كنت اوافق يجلس عند جدته لانك عايش هناك .. يزيد يجلس معاك بنفس البيت
استرخى نايف على الكرسي وتكتف وهو يطالعها : وش تلمحين له ؟
نهى : ايه مافيها شي يجلس معك وزوجتك
نايف : تسوقينها على راسي لانك ماتدرين ولا تسوين نفسك مو عارفة !
نهى : طول عمرها ماراح تدري .. مصيرها بتدري قولها من اللحين احسن
نايف : انتي مالك شغل .. وقت يجلس معاي احطه فين ما احطه
نهى : لا يكون مو ولدي !
نايف : لا مو ولدك .. ولدنا
نهى : معليش نايف احترم رغبتي .. انا مو حابه ولدي يجلس بمكان انت مو فيه
نايف وقف : حمد الله اكرمك الله .. يله انا ماشي
نهى لحقته : فين بدري .. وبعدين لاتطنش كلامي كذا ! انا جاده نايف والله لازعل
نايف دون اهتمام وهو طالع : والله يانهى اللي عندي قلته حبيتي اهلا وسهلا ماتبين مو لازم تسافرين
انقهرت وهو يسكر الباب يعني مافيه نقاش .. ضربت برجلها : هين ما اذكرك تحترم مشاعري لهالدرجة ! فجاه صرت تخاف على المدام تنجرح !!
وقت رجوعه كان اذان الفجر .. صلى الفجر بالمسجد ثم دخل البيت سمع صوت بالمطبخ دخل كانت بلبس الدوام وجالسة تشرب كاس قهوتها ومارفعت عينها حتى له : ........
تنهد مافيه شي يقوله طلع من المطبخ ..طالعته ابتسام وهو يصعد مافيه حتى سلام ! سحبت عبايتها وطلعت لدوامها
***
بيت أبو فراس /
على اخر الظهر كانت اسماء خلصت كل التجهيزات مع الخدامة بالمطبخ طلعت للصالة والكل جالس يتغدا ماعدا بدر برا كالعادة .. قالت بتودد : فراااس
فراس : لا
اسماء : بسم الله مامداني اقول ! وش لا .. تدري وش ابي منك .؟
فراس : ما ادري ولا ابي ادري .. وايش ماكان الجواب لا
اسماء : طيب طلب صغنون والله
فراس رفع عينه لها : انا وش قلت ؟
اسماء : مالي دخل ليش تقول لا وانت ماتدري وش ابي
فراس : لاني ماعمري قلت لك ايه في حاجة وماندمت ... فهمتي ؟ خلاص اقلبي وجهك ولا انثبري تغدي
ام فراس تنهدت : وش بغيتي ؟
اسماء : البنات بيجون عصر .. ابيكم تصرفون نفسكم
طالعت فراس : للحين لا ؟
فراس : ايه لا .. كان عندي موعد عصر بعد بكنسله بجلس بالبيت
اسماء : ياااشينك .. لا تصير سالفة عناد !
فراس : مو عناد .. بجلس ابي اعرف ليش كل ماعزمتي احد تطردين الكل ! اكيد صاير شي عشان كذا ماتبين احد
ياسمين : انا بروح لهاجر
فراس : مافيه ! اجليها بكرة .. اليوم محد يطلع الا اسماء اذا تبغى
اسماء بقهر : زعلت زعلت زعلت !
فراس : ابركها ساعة .. من اول ازعلي
ام فراس : خلاص اسماء اسمعي الكلام .. وحنا ماراح نزعجكم فين بتجلسون ؟
اسماء : عند البركة بالقبو
ياسمين بحماس : بتسبحون !
اسماء : لا ! بس مكان جلسة حلو .. ومو حق وراعين اهم شي
فراس : حبيبتي ياسمين تبغي تسبحي ؟
ياسمين بخوف وهي تطالع نظرات اسماء الثاقبة لها ... فراس مسك يدها : ماعليك منها طالعيني انا .. تبغي تسبحي ؟
ياسمين بخوف ونبره خافته : ايه ..
فراس : روحي اسبحي .. واذا اسماء قالت لك حاجة علميني عليها
اسماء : ياشينك فراس !!! وربي وربي قهرتني خلاص ماراح اعزمهم ومابي احد يجيني
ام فراس :ا نهبلتي ! بس عشان بنت صغيره بتسبح .. ياحلوها تعطيكم جو مير
اسماء صعدت وهي تتحلطم : جو الخياس اللي بتعطينا بيت مقرف ..
ام فراس هزت راسها بينما فراس ياكل وماعليه منها .. ومحد اشطر منه بالعناد فتح جواله ودق : هلا منير .. اليوم مقدر اقابلك اجلها بكرة .... يله سلام
ام فراس طالعته : هاو فراس من جدك ! كنسلت موعدك عشان تجلس
فراس ببرود : ايه بجلس .. ابي اعرف وش الشي المهم بهالجمعات حقتها عشان تطرد العالم
اسماء بغرفتها ونفسها قافلة من اللبس ومن كلش زي مايقولوا طابت .. بس مهما كان الموضوع مو بس جمعة الموضوع خطة مستقبلية ! لازم تلبس وتمزمز : ابتسام هالخايسة لمحت لميهاف مرتين وهي مخطوبة حتى سجى المعفنة لمحت لها وانا لا !! ليش يعني طايحة طايحة مرة من عينها فتحت غرفتها الواسعة واختارت طابع انثوي هالمرة فستان زيبرا رسمي لنص الساق مع مناكير أسود وأبيض .. وشعرها لففته ع جمب .. وروج أحمر على البرتقالي .. رشت عطرها وهي واقفة قدام المراية وتحس بفخر : ايه يا اسماء كذا ! لو تفكر بس تلمح ان وحده من هالسلق بتاخذها لهيثم علي وعلى اعدائي بهاجمها !! هيثم حقي انا وبس خبت وجهها وهي تستوعب كلامها وخدودها وردت وتضحك بخجل .. انس كان واقف عند الباب ويهز راسه وهو يشوفها جالسة وضامة ركبتها لصدرها ومخبية وجهها وتضحك بحياء : حمد الله والشكر
التفتت له اسماء : خير !
انس : ولا شي بس جالس امر
اسماء : اقول اقلب وجهك .. ولا وش رايك بعد تجلس تتسبح مع ياسمين ! مبزرة صدق
خذت جوالها ونزلت لتحت تكمل شغلها وهي تشوف الساعة : افف متأخرين مفروض جايين
رن الجرس راحت ركض : ميييين .؟
ميهاف : انا افتحي
فتحت اسماء : بدرررري كان ماجيتي
ميهاف وهي تفك لثمتها وتهف على وجهها : ياشيخه اسكتي صارت لي سالفة .. السواق مب موجود مع امي ونايف مايرد اضطريت اركب مع الجيران وسواقهم سيارته الله يعز النعمة
اسماء : وشوله راكبه معهم ! كان علمتينا نوصي بدر
ميهاف نغزتها : وجعوه استحي !
اسماء وهي تدخل : لك وجه تستحين .. ترا مكتشفه عنك خبر يسود الوجه
ميهاف : شنو .؟
اسماء : غطي وجهك بس وادخلي فراس موجود
دخلت ميهاف البيت ووقفت عند الصالة مع اسماء : السلام عليكم
ام فراس : وعليكم السلام هلا ميهاف هلا حبيبتي
فراس : هلا والله
ميهاف : كيفكم ان شاء الله بخير .؟
ام فراس : حمد الله نزقح انتي كيفك ؟.
ميهاف : بخير دامك بخير خالتي ..
اسماء : سنه تسلمين !! خل ندخل بس
نزلوا للقبـو وين الجلسة الرايقة قدام البركة .. وجو رايق ميهاف بحسرة : اااا شهالمكان اجعتي قلبي .. اشتهيت اسبح
اسماء : ولا يهمك بيجي يوم نسبح ان شاء الله
ميهاف : الله الله اسوم كأنه لوكك غير هالمرة
اسماء : هاه ! بجد .؟
ميهاف : ايه صايرة ليدي بجد
اسماء انبسطت : صدق صدق صدق !!
ميهاف : هههههههههه يمه روعتيني .. ايه شفيك اول مرة امدحك
فصخت ميهاف عبايتها وهي تقول : قهر كان علمتيني بتكشخين كذا .. انا اليوم قلت بنات بس وماكلفت حالي مرة
اسماء ( احسن صيري مخنزة عشان ماتلتفت لك خليني اشوف نصيبي ) : عادي طالعة كيوت وبعدين لاحقة على الفشخرة بملكتك اركدي
ميهاف وقلبها يدق بقوة : يوه اسكتي يا اسماء كل ماتذكرت انها الخميس الجاي احس اعصابي تخلص
اسماء : هههههههههه ماتدري قد ايش متحمسة
دق الجرس ..قامت اسماء : رايحة اشوف
فتحت الباب كان وداد وسجى : هلا والله مرحبا ومسهلا
وداد : هلا اسسوم .. الله الله وش هالشياكة يختي
اسماء وهي تلف على حالها والدنيا مو سايعتها من الثقة اللي عطوها : تسلمي
سجى : قلطينا وين نقلط !
اسماء : يادفشك شوي شوي ... من هنا تفضلو ولاتفكون فراس موجود وسجى لاتتربعين عندهم
تسلمين ! ارمي السلام وكملي دربك
سجى ( ياليل هالغثيثة اسماء ) : زين زين احححول
اول مادخلت سجى تشققت لما شافته جالس وصافط رجل فوق رجل وبيديه الأيباد يتصفح فيه ويسولف
مع امه باناقته بالثوب مع غزارة شعره الفحمي المرتب على ورا مافاقت من تأملها الا على نغزة اسماء :بنت !
سجى : هاه ! هلا هلا السلام عليكم ... كيفكم .؟
ام فراس : وعليكم السلام مرحبا ومسهلا نورتو ..حمد الله
فراس : على البركة وداد الخطبة
وداد : يبارك فيك وعقبالـك ان شاء الله
ام فراس بلهفة : آممين
فراس نزل عيونه للايباد كانه ماسمعهم .. اما سجى تنهدت يفتن ماتوفيه حقه قمة بالفتنة ونزلت بخيبة مامداها تتمقل
***
بيت نـايف /
كانت ابتسام بغرفتها . . من رجعت من الدوام وهو نايم للحين عصر دخلت الحمام وبدلت /
بلوزة طويلة لوركها .. مع بنطال ضيق اسود جلد وهيلز سوداء .. وشعرها مموج ومسرحته من فوق على الخفيف والباقي طايح على ظهرها .. مكياج خفيف روج وردي فاتح وظل اسود !
فتح نايف عيونه ببطء وكسل .. انتبه لها واقفة قدام المراية وترتب نفسها وتطالع تتأكد من طلتها , فاتنة جميلة مافيه حاجة بعقلة توفي شرح شكلها بالوردي كيف يفتن
عدل جلسته : آلله ابتسام شهالحلا .. كل هذا عشاني ؟
ابتسام طالعت انعكاسة من المراية .. وتوجهت لشنطتها الكلتش السوداء تحط اغراضها فيها كأنها ترد على جوابه
نايف : طالعه .؟
ابتسام : ايه
نايف وهو ماسك رقبته بارتباك يبغى يصلح الوضع مو عارف: تبغي اوصلك .؟
ابتسام سحبت عبايتها : السواق برا
وطلعت .. تنهد نايف ونهض من سريره يتجهز يطلع .. اصلن من متى بدا يهتم بمشاعرها .؟ كيفها ماتزوجت عشان ارجع لنفس الاسطوانة زعل ونراضي وحوسة .. تبغى ترضى ولا تجلس
نزلت ابتسام حصلت غادة بعبايتها ورنيم بيدها جاهزة : يله نطلع .؟
غادة : يله
ركبوا مع السايق لحد ماوصلوا ... غادة وهي تتامل البيت : مو فخم زي بيت ابو نايف .. انعم مرة
ابتسام : مريته مرة قبل اسافر المالديف ..بصراحة يجنن حسيته قطعة فنية
نزلوا وضربوا الجرس .. فتحت اسماء بحماس : هلا هلا هلا والله .. لازم انتن اخر من يحضر يعني !
ابتسام : متآخرين بجد .؟
اسماء : ايوه الكل موجود .. هذا وانتي العروسة
ابتسام : ههههههههه مو عشان كذا
اسماء : تفضلوا حياكم
دخلـوا ... استوقفهم صوت ام فراس : هذي ابتسام
انتبوا للجلسة الجانبية .. غادة ماميزت فراس لأنها بوقتها ماكانت بحالة تتذكر فيها احد ولأنه كان عتمة وظلمة وقتها .. الملاحظة الوحيدة لما شافته انه " مين هالمزيون .؟ "
ابتسام : هلا ام فراس كيفك شلونك .؟
ام فراس : حمد الله .. انتي بخير دامك بخير
ابتسام بلباقة : تسلمين
ام فراس قامت من مكانها واخذت رنيم .. غادة بانحراج : لا واللي يعافيك بتزعجك
ام فراس : مالك فيها .. روحي انبسطي مع البنات واتركيها معي اتسلى انا وياها
غادة :ههههههههههه الله يعينك اجل
كملن طريقهن لتحت .. ام فراس راحت تجلس .. فراس : من هالثنتين ؟
ام فراس : زوجة نايف واختها .. اختها نفسها اللي كانت بطريقك ذاك اليوم
فراس طالع البنت بيد امه : اهاا ..
بالجلسة تحت .. غادة : اسماء شوفي امك .. قولي اذا بتزعجها رنيم تجيبها
اسماء : لا ماعليك امي متعودة ارتاحي أنتي
سجى : اقول اسوم غريبة اهلك بالبيت !
اسماء : ماعليك منهم خذو راحتكم
ميهاف : اساسا ترا محد يطرد اهله اذا جا يعزم غيرك يالخايبة .. شفيها لو جلسوا .؟
اسماء وهي تقدم الشاهي : مافيها شي نقطيني عاد
ميهاف ابتسمت وهي تطالع غادة : غدو بسم الله عليك محلوة مرة
ابتسام : تلومينها .؟ لها شهر عناية ماعقبها ولا قبلها عناية
غادة : من ذوقك ياقلبي .. حلو ان فيه تأثير وجهودي مب ضايعه
ميهاف : اقول وينها رنومة .؟
غادة : مع ام اسماء .. بس اسماء تكفين جيبيها ماحرتاح كذا
اسماء حطت يدها على خصرها : وش قصدك .؟! ماتثقين في امي ؟
غادة : لا مو كذا بس بتزعجها والله
اسماء : ماعليك لا ازعاج ولا يهم يحزنون اتركيهم دام جالسين على راسي بالبيت ينفعونا
وداد : شخبار تجهيزاتك ميهاف ملكتك الاسبوع الجاي خلاص
ميهاف : كلش تمام حمد الله ..اذا اسماء مانكبتني طبعا
اسماء : اعتمدي اعتمدي خلاص !
ابتسام : ميهاف حابه اساعدك بحاجة .. امري بجد
ميهاف : لا ياعمري حضورك يسوى ويستوي
ابتسام : مو جالسة ارمي مجاملات انا .. بجد قولي ولا بسوي من راسي
ميهاف : هههههههه خلاص بكلمك اليوم لارجعت البيت ونتفق
ابتسام : ايه كذا من اول
غادة واسماء وسجى كانوا واقفات عند طرف المسبح .. غادة غمزت لسجى بمعنى نطرحها .. سجى بصوت مرتفع : لا لا اطرح الكل ولا اسماء .. ماتعرفينها لاعصبت تخوف
غادة : اشش يافضحه وش رايك تتكلمين بميكرفون بعد
التفتت اسماء : وجع وجع مافيه امان !! غغدو !!
غادة : هههههههههههههههههههههه امزح امزح مو من جدي
اسماء : ايه انتبهي كلش ولا هالكشخة تخرب
غادة نزعت جزمتها وجلستها وغطت رجلها : واااااه منعشش
سجى جلست جمبها : من جد .. صار بخاطري اسبح من جد
غادة مدت يديها تدفها : ولا يهمك
نطت سجى برا المسبح : يمممه ماتفوت فرصة !
غادة : ههههههههههههههههههه ماحبيتها تجلس بخاطرك
بالطابق الفوق : -
ام فراس : فراس ماتبي تحطها بحضنك تجرب
فراس عقد حواجبه : لا يمه اتركيها معك .. مالي بالبزران انا
ام فراس : هاو ! ولا جاك ولد شبتسوي ؟
فراس : ماراح يجيني عشان افكر وش بسوي
ام فراس ضاقت من رفضه للفكره بشكل قاطع : ليش حبيبي ؟ وش اللي رافضه بالزواج ..
فراس : كله .. مو شايف فيه ولا ميزة
ام فراس : مايصلح كلامك .. هذا شرع ربك وفطرة تقول عنها مافيها ولا ميزة
فراس طالع امه : يمه واللي يعافيك ويحفظك ويخليك لي اذا تحبيني بجد لا تفتحين معي هالموضوع مرة ثانية
ام فراس تنهدت بضيق : ان شاء الله
صعدت اسماء : فراس ! نبي نصعد لو سمحت
فراس اخذ ايباده ومشى طالع برا : انا طالع اساسا
اسماء كشت عليه وهو معطيها ظهره : مابغغى !
شهقت اسماء وهي تشوف امها تمسح دمعتها : يمه شفيك !
ام فراس ابتسمت : مافيني شي يمه .. خذي البنت وديها لامها وانا صاعده لغرفتي
اسماء شهقت : شنو لا اخاف احملها
جلستها ام فراس على مفرشها : خلاص تجي امها تاخذها انا صاعده ارتاح
استغربت اسماء وهي تشوف امها تصعد : شفيهم شصاير ؟
راحت للبنات يصعدون وخذت غادة رنيم .. وطلعوا بالحديقة يتمشون والجو عليل ووش احلى من جمعة بنات
***
سـارا :-
رجعت من الدوام وماعرفت تجلس بالشقة بدلت لبسها وطلعت تتمشى بالشوارع زي كل يوم من قالها لؤي .. تتمشى تحاول تقرر او بالاحرى تحاول تعرف كيف تقوله " لا " دون تجرحه والأهم تجرح نفسها .. جلست بمقاعد بحديقة وتنهدت وهي تمسك راسها ..النوم جافاها وكلش انقلب عكسي ضمت ركبها لصدرها ودفنت راسها وهي تحس حيلتها بكلش ضايعة !
بالشقة /
كانت هيفاء جالسة على نار .. الساعة 2 وهي طالعة من الساعة 6 !! دقت عليها مليون مرة ماترد ... جلست بضيق مو عارفة شتسوي ..دقت على لؤي : ايوه
هيفاء : الو .. سلام عليكم انا هيفاء رفيجت سارا
لؤي تغير صوته : هلا والله مرحبا .. امري
هيفاء : سلامتك بس حبيت اسألـك سارا معاك ؟
لؤي : لا .. ليش ؟
هيفاء قررت تقوله ايش بيدها : طالعة من الساعة 6 للحين ماشفتها
لؤي قام بسرعة من سريره كان مستعد للنوم : شنو !
هيفاء : وربي خايفه عليها مدري فين راحت ولا ترد على جوالها ... طوط طوط .. الو الو ؟
نهض لؤي بسرعة وبدل بسرعة ونزل .. وصل لشركتها ماحصلها راح لكل مكان راح له معاها لكن ماحصلها .. وقف يلتقط انفاسه وهو تعب من الركض ماترك مكان مادورها فيه .. استعاد نشاطه ورجع يركض يدور
***
بيت أبو فراس – الساعة 11 .. وبجلسة رايقة بالحديقة /
ميهاف : يعني انتي ثانوي بس .؟
غادة : لا .. شهادة الثانوي اخر سنة ما اخذتها
اسماء : ايه .؟ مفروض تاخذيها طيب ايش تنتظري
غادة : ماراح تزبط .. خلاص انا يأست من الدراسة
ابتسام : وش هالحكي مو بكيفك . انا راح اسجلك وتروحي غصب
غادة سكتت ماتبي تناقش هالموضوع قدام العالم .. بس هي مستحيل تدرس وبنتها وش تقدر تسوي بها .؟
وداد : اقول ميهاف .. الملكة ببيتكم .؟
ميهاف : ايه طبعا
اسماء تنهدت : ااااخخ عقبال ملكتي ببيتنا ان شاء الله
سجى :نجيب عبد المجيد يخطبك وخلاص من بكرة ملكتك !
اسماء فتحت عيونها بوسعها وانفعلت : الله لا يقوله ... وععععع وعع مالت الا عبد المجيد !! قال عبد المجيد قال
سجى : واحمدي ربك واشكريه بعد .. وش اللي مو عاجبك فيه ؟
اسماء : يكفي بس انه اخوك .. هذا لحاله سبب انعذر عليه !
سجى : اصلن محد ميت عليك فارتاحي .. بيتزوج الكل الا انتي
اسماء : تخسين يالبزر تعرسين قبلي .. والله لا اعرس قبلك ولا اعزمك بعد
وداد : سسجى خلاص اصكتي
ميهاف : وانتي اسماء اهجدوا .. ديك وجني
اسماء لفت بغرور : انا داخله اجيب العصير
اول ماراحت قالت سجى بحلطمة : مالت عليها ذالبزر اسماء مصدقة عمرها شي !!
اسماء دخلت بقهر .. وععع عبد المجيد وحضرات بنات جدة ساكتات عرضت نفسي عرض ولا تكلمن حتى اففففف !! جهزت العصير وطلعت .. سمعت البـاب ينفتح : لحظظظه من انت !! البنات هنااا
: للعشره وبدخل
اسماء : ذاه بدر بنات قومن
بعد ماراحن دخل شهقت اسماء اللي كانت واقفة وهي تشوف نايف .. وراحت ركض هز نايف راسه : مصدقه عمرها اسوم تستحي
بدر : ههههههههههه لا تقول قدامها كذا بلعتك ... حياك بس
اسماء وصلت لهم تلهث .. ميهاف : شفيك ؟
اسماء : اخوك ذالوصخ ! واخوي ذالوصخ ! لا احم ولا دستور
ميهاف : نايف ؟
ابتسام حست بقهر هالانسان مب معقول صدق مايفوت فرصة يطالع فيها احد !
اسماء : اسفه يازوجته بس والله يقهر
ابتسام ابتسمت : لا عادي حبيبتي
غادة : خذي رااااحتك اسوم .. يقهر من جد وش هالوقاحة !
اسماء : ايه وصصخ وش يحسبني بزر !!
غادة : تعالي عيشي عنده عاد تكرهين نفسك
اسماء : ياحبيبتي مجننك
ابتسام كانت جالسة بصمت .. وهن يحشن فيه من قلب اسماء وغادة وسجى لأنهن بنظره بزران وشوله يتغطن !
***
بالمجلس /
نايف : ايه طيب .؟
بدر : ههههههههههه يا نايف ماجا وقت انك تستسلم .. كم لك تحارب ابوك
نايف : هالوظيفة مستحيله .. يبغى يموتني جوع ماعندي مشكلة
بدر : والله مدري شأقول لك .. بس انا صح ما اشتغل مكتبي وامشي بمزاجي بس لو اضطر يعني وماعندي العرض اشتغلت وانا ما اشوف الدرب بعد
نايف : انت انت وانا انا .. يعني ماني مضطر اسوي كذا عشانك بتسوي كذا
بدر : براحتك .. بس ترا شايف حلال ابوك كله صار بحضن لؤي وانت بتروح عليك وبتندم
نايف : هذا انت الحلال كله بحضن فراس .. نادم .؟
بدر : لا تقارن .. انا الصغير والحق ان فراس يمسك كلش بس انتو هذا حقك
نايف : بلا حق بلا بطيخ
بدر تثاوب : يازين النوم بس
نايف : قوم نام انا كمان ماشي
بدر : يله اجل
وقف نايف طالع .. وصله بدر للسيارة .. نايف : يله في امان الله
فتح بدر عيونه : تستهبل ! زوجتك عندنا ماراح تاخذها .؟
نايف عقد حواجبه : عندكم ؟ وانا شعرفني
بدر : جعله يخلف بس .. انا اعرف عنها اكثر منك
دق نايف عليها .. ابتسام : ايوه
نايف : انتي عند بيت عمي .؟
ابتسام : ايه
نايف : لسى بخاطرك تسهري ولا خلاص اخذك معاي
ابتسام : براحتك
نايف : براحتك انتي ايش دخلني انا
ابتسام : طالعه ثواني
سكرت ابتسام : غادة يله نمشي
اسماء باحباط : بدررري
ابتسام : لا حبيبتي كثر خيرك وما قصرنا .. نشوفك قريب
اسماء : في امان الله اجل انتبهوا على حالكم
اول ماطلعوا دخل بدر لداخل وجلس مع امه .. ام فراس : هلا .. غريبة جاي بدري
بدر : نايف ماله خلق اليوم ورجع بيته قلت وش يجلسني بعد انا ارجع
ام فراس تنهدت بضيق : اها
بدر : شفيك يمـه مانتي على بعضك .؟
ام فراس ابتسمت ابتسامة صفرا : مافيني شي حبيبي .. تبغى عشاء ؟
بدر : لا حمد الله شبعان
***
طلع الفجر .. والنور بدا يكتشح المكان وسط ظلمة الليل وهو للحين ماترك مكان مادور فيه لحد وصل لحديقة وانتبه لبنت موجودة لحالها دافنة راسها بين رجليها قلبه دق بسرعة جنونية وهو يدعي ربه تكون هي قرب منها وهز كتفها بخفة .. رفعت راسها بسرعة تظهر عيونها المرجانية الدامعة تثبت لها انها هي مسحت دموعها بسرعة : هلا لؤي
لؤي اهتز كلش فيه وهو يشوفها بهالمنظر .. : ليش تبكين .؟
سارا : ..................
لؤي : بسببي ؟
سارا هزت راسها : لا .. بسببي
لؤي : قلبتينا فوق تحت .. ايش كنتي تسوي ماتركنا مكان مادورنا عليك فيه
سارا :لـؤي .. انا ...
ماقدرت تكمل .. تنهد لؤي : تعالي معاي اللحين نتكلم بعدين
هزت راسها بموافقة .. مشى معها لشقتها وهو طول الطريق يطالعها بصمت لحد ماوصلوا .. سارا : شكرا تعبتك معاي
لؤي : وقفي مكانك .. ماراح تمشين لحد ماتقولي لي ليش كنتي تبكين ؟
سارا : لـؤي .. بالنسبة ل
كمل لؤي : لخطبتي .. ايوه شفيها ؟
سارا : ليش ؟
لؤي : شهالسؤال الغبي ؟
سارا دمعت عيونها : رجاء لؤي جاوب
لؤي : خلاص خلاص يابنت الحلال لاتبكين .. " تنهد بضيق " ايش اجاوبك اذا ماكنتي تعرفي الجواب للحين معناها ماتدرين قد ايش انا اموت فيك
سارا بهم : اذا ... اذا قلت لا .. ايش راح يصير .؟
لؤي : ماراح اوافق
سارا : على شنو ؟
لؤي : على الـ لا حقتك .. " مسك يدينها " بس راح اسألك ليش لا .؟ مو عاجبك العريس ترا تاجر
سارا : مو وقت ضرافتك ! اتكلم معاك بجد ..!! انا ..انا
لؤي بهدوء وهو يمسح دموعها : انا ما انكت سارا .. انا اتكلم بجد , وعارف انك خايفة من اهلي و .. بس صدقيني مايقدروا يسوو شي حتى لو عرفوا
سارا : يعني اتزوجك وما أقدر اعلنك .؟ مقدر اقول للعالم هذا زوجي .. مقدر حتى اتكلم عنك مع احد
لؤي : حنا بالكويت .. يعني المجتمع هنا كله ماراح يعرف حتى لو اعلنتي لهم ليش مكبرتها كذا ؟
سارا بألم : احترت .. شالمفروض اسوي ؟
ضمها لؤي بحنان وهم يمسح على راسها : لاتفكري كثير .. لأن أي حاجة بتسوينها بالحياة لها مساوئ ومحاسن .. بس دايم العقل والمنطق يركز على المفاسد لأنا خايفين ننجرح , وهالشي راح يخلينا طول عمرنا خايفين وواقفين بنفس النقطة لازم نندفع ونشوف حياتنا .. واذا انجرحنا بنتعلم نمسح دموع بعض ونكمل .. مو هذا الغرض من الزواج؟
سارا دفنت وجهها بصدره .. ماتبي تخسره وهذا المؤلم بالموضوع قالت بين دموعها : ليش دايم احسني احسن بعد كلامك
لؤي بثقة : لأنك تحبيني ياهبله
***
وصـلت ابتسام وغادة ونايف للبيت والطريق هدوء طول الوقت .. اول ماوصلوا صعد نايف وابتسام جلست عند غادة
غادة : شمجلسك عندي بنام انا
ابتسام طالعت الساعة : لسى بدري
غادة : مو بدري تعبانه انا خلاص بنام
ابتسام : تصبحي على خيـر
طلعت بتصعد بنص طريقها فكرت انه اكيد ماتعشى كشرت ( احسن عمره ماتعشى شدخلني ! ) تنهدت وهي تستسلم لطبيعتها وتدخل المطبخ وتحط عبايتها وشنطتها على جمب وتفتح الثلاجة تطلع اللي تحتاجه بنص شغلها مر نايف من المطبخ : ابتسام سوي عشاء .. حدي جويع
شدت ابتسام على الملعقة بيدها .. نايف : اوه جالسة تسوين .. خلاص اجل شكرا
رمت الملعقة على الطاولة وخذت اغراضها وطلعت صاعده .. عقد نايف حواجبه : خير شعندها بعد !
ابتسام رمت اغراضها بانزعاج .. فوق انها تسوي له يجي يتأمر عليها بعد على باله ماتعرف شغلها مثلا .؟! بدلت لبسها ونامت وهي تحس بقهر منه بجد , صح كانت متوقعه مغصوب على الزواج بس وقت يرميها بوجهها ويتهمها هنا توجع بجد سمعت باب الغرفة ينفتح غمضت عيونها مباشرة .. ماتبي تتكلم حتى
***
الكويت الساعة 7 .. بشقة سارا دخلت وهي تسحب رجلها بهدوء ثم رجع للباب وهمست : مافيه احد ادخل
دخل لؤي وهو يطالع المكان شقة بسيطة تميل للضيق .. ضيقة مرة صالة وغرفتين ومطبخ مفتوح فقط ! ..
سارا : خذ راحتك انا داخلة ابدل
لؤي هز راسه وهو يطالع المكان ويكلم نفسه : كانت عايشه هنا طول هالفترة
دخل للمطبخ وهو يفتح ازرار كم قميصه ويرفعه ويفتح الثلاجة .. اكثر ماقدر عليه سندويتشه بنص شغله دخلت المطبخ : شنو قاعد تسوي .؟
لؤي عقد حواجبه : اشوفك لابسه .. لوين ؟
سارا : الدوام
لؤي : ارتاحي اليوم حياتي .. تو رجعتي وسهرانه الليل كله
سارا : لا بداوم فيه اجتماع مهم
لؤي وهو يحط الصحون على الطاولة : اوك افطري قبل
جلست سارا : هههه تسلم يدينك
لؤي وهو يصب لها كاس العصير : فيه العافية
سارا : شهالعز .؟
لؤي : شفتي هذا الزوج اللي كنتي بتفوتينه
سارا لاحظت المائدة مرتبة صدق .. حاط المزهرية بالنص وحركات دلع صح :المهم .. متى وكيف و ...؟
لؤي جلس على الطاولة قدامها : زي ماتبين .. اللي تتمنينه اطلبيه وانا انفذه
سارا : وانت ماتبغى حاجة معينه يعني .؟
لؤي بتفكير : همممم .. لا غير اني اشوفك بالابيض مابي
سارا حمرت خدودها : .........
لؤي قبص خدها : فديييتها
وقفت سارا بعد ماخلصت فطورها : يله انا ماشيه تأخرت
لؤي : يله اوصلك معاي
طلعت سارا معه وطول الطريـق يسولفون بكلش ايش صارلهم بالتفصيل اليومين اللي راحت .. وقد ايش اشتاقوا لبعض لحد ماوصلها وراح بطريقه
***
الأسبوع الجاي – يوم ملكة بدر وميهاف /
بيت أبو فراس – عصر /
كان بدر بغرفته يرتب كشخته لهاليوم .. انطق الباب : مين .؟
اسماء : انااا
بدر : تفضلي
دخلت اسماء وهي تشوفه واقف قدام خزانته : كيفـــه عريسنا المز !
بدر وهو يكمل : هلا اسوم .. تمام وش بكون يعني
اسماء : مبسوط !! مو بتتزوج الحلوة حبيبة القلب
بدر : أيش جاية تبغين انتي .؟
اسماء جلست على كنبته : بدر .. انت ماكلمت ميهاف من بعد مشكلتكم صح
طالعها بدر دون يرد : .........
اسماء : اخر مرة حتى لما جتني شكلها احبطت .. لانك ماعطيتها حتى سلام
بدر : كانت جمعة بنات ايش تبغيني اطب بنص السوالف اسلم !
اسماء : لا مو كذا .. بس اقل شي دق عليها كيف بتقابلها اليوم و ...
بدر قاطعها : اسماء رجاء انتي مالك دخل فلا تحشرين حالك .. وحياتي انا اقدر اتصرف فيها ماطلبت مساعدتك
اسماء : يمه لا تاكلني طيب .. جزاي اللي جايه انصحك بعد
بدر حقرها وهو يدخل غرفته الثانية : اطلعي لو سمحتي ببدل
اسماء طلعت وهي منقهرة منه : كشش بس ! عظم الله اجرك يا ميهاف غثاثه ..." تنهدت " ياترى بيحضر هيثم اليوم .. ادري دكتور بس معقولة مايجي .. يارب يارب يارب يجي
صعد فراس لفوق وهو يشوفها رافعه يديها للسماء وتدعي : خير شتسوين .؟
اسماء انتبهت : هاه .. جالسة ادعي لبدر بالتوفيق
فراس طالعها باستخفاف وكمل طريقه لغرفته .. اما اسماء ركضت لغرفتها اول ماوصلت الكوفيره عشان تتضبط خلصت على اذان العشاء .. وراحت بدري مع السواق قبل أهلها وصعدت لميهاف مباشرة دخلت عليها ماكانت موجودة : ميهاف .؟ غريبة امها تقول بغرفتها
ميهاف : خليك عندك جالسة البس انتظري
جلست اسماء على جوالها : اهاا اوك انتظرك... شخبار اعصابك بس .؟
ميهاف : يوه اسكتي على جمر مدري شصاير .. والقهر مافيه حاجة ضابطة معاي !
اسماء : ليش شصاير .؟
ميهاف :اول شي انكبت مع مسؤولة الحلا .. ثم فستاني مابغى يطلع بععد .. واخر شي كلمني لؤي يقول مايقدر يجي وهذا اللي اتلف اعصابي خلاص !
اسماء : يوه كيف مايجي !
ميهاف : يقول عنده شغله مهمه بشكل ما اتخيله اليوم ومايقدر يأجلها
اسماء : عادي روقي .. مصيره يحضر العرس اكيد
ميهاف : ياحلوه مايحضر كمان !
اسماء : اهم شي خليك مزة .. قبل اطلع شفت بدر وهو يمشع القلب مع الكشخة والتزبيط
ميهاف سكتت : ..................
اسماء : اقول اطلعي بس اشوف وجهك !
طلعت ميهاف وهي خالصة .. الفستان طويل ضيق عاجي مع كعب فضي
اسماء عقدت حواجبها : ليش مالبستي الوردي ؟
ميهاف ضاقت : امي عيت .. ليش مو حلو .؟
اسماء : لا هو حلو .. بس حسيت الوردي عرايسي اكثر
ميهاف وهي تمشي قدام المراية : خلاص اسكتي شاسوي يعني
اسماء : ماعليك تجنني يله بس ننزل
ميهاف : لا شلون ! ما انزل الا قبل يكتمل الحضور بس اسومتكفين انزلي تأكدي كلش تمام ... مابي ولا حاجة من ترتيباتي تخرب سامعة !
اسماء : عارفه عارفه خلاص
نزلت اسماء وميهاف وقفت قدام المراية وأول مرة ماتكون واثقة من طلتها .. اول مرة تكون مرتبكة انها ماتعجب احد او تقول كلمة " يارب يعجبه " رغم انها شايله بخاطرها بس مستعده تنسى كلش كرمال هاليوم بس سعادتها ماتنوصف وقفت قدام المراية وهي مو متخيلةان بنهاية هاليوم بتكون رسمي زوجته خلاص
نزلت اسماء تحت وابتسمت ونزلت بسرعة وهي تشوف ابتسام : هلا والله جيتي
ابتسام : هلا اسوم .. ايه كيفك وكيف العروسة .؟
اسماء : تمام حمد الله .. وين غادة .؟
ابتسام : ماجت .. بنتها اليوم مو تمام وجلست عندها
اسماء : ياعمري شفيها .؟
ابتسام : تبكي طول الوقت فيه حاجة مضايقتها بتوديها المستشفى وتشوف عاد
اسماء : والله خساره .. بس يله فرصة ثانية
ابتسام : ان شاء الله ..
ام نايف : هلا والله ابتسام متى جيتي ماشفتك .؟
سلمت ابتسام عليها : هلا خالتي .. هههه شكلك كنتي منشغله في حاجة اعملها قوليلي
ام نايف : ارتاحي كلش جاهز تمام
***
عـند الرجاجيل /
دخل نايف وسلم على بدر اللي كان براس المجلس : من قـدك من قـدك !
بدر : محد .. انت شايف احد قدي .؟
نايف : انطم بس وعن نفخة الراس .. هههههههه ودك اعطيك من خبراتي ولا مايحتاج .؟
بدر : لا مض هالليلة على خير دون خبراتك .. صدق لؤي ماراح يجي .؟
نايف : مدري ماكلمته بس اسمع ابوي يهاوشه على السماعة اليوم
بدر : يقنعني ان كل ذاه شغل يعني .؟
نايف : وانت شعليك حضر ولا ماحضر ماتفرق
بدر : ايه بس السالفة اصول
بركن ثاني /
ابو نايف : انشهد اني ماغلطت يم اعتمدت عليك .. ماتوقعت الأمور تزبط بس كثر خيرك
فراس : مو انا قلت لك انه بيتزوجها الشهر هذا خلاص معناها بيصير
ابو نايف : اقول فراس .. ابسألك عن لؤي صاير معه شي .؟
فراس : لا .. ليش تسأل ؟
ابو نايف : ما أدري معادهوب على خبري .. اجل معقولة يفوت ملكة اخته
فراس وهو متأكد انه عشانها : لا عمي حسب معرفتي مو صاير شي
ابو نايف : ان شاء الله
تنهد فراس وهو محتقر لؤي داخله اجل يسحب على اخته عشانها صدق خيبة
***
الكـويت /
سارا : لؤي بجد نقدر نأجـله .. اذا بتروح لملكة اختك روح
لؤي : ماراح اروح يعني ماراح اروح .. هالليلة تسوى عمري كله وتبيني اروح ؟!
سارا : بجد لؤي .؟ مو زعلان عشاني طلبت يكون زواج بالمحكمة وبس
لؤي : هو قهر اني ماحشوفك عروسة .. بس فرحتي نفسها
: استاذ لؤي
لؤي بحماس مسك يدها : دورنا
سارا بارتباك : ايه
دخـلوا مع الشهود " هيفاء واختها " وقع لؤي وكله ثقة بقراره بينما سارا كانت مرتبكة بجد بلعت ريقها ثم وقعت ضمتها هيفاء مباشرة : الف مبروك حبيبتي
سارا : يبارك فيك ..
التفتت للؤي بربكة : مبروك
لؤي بابتسامة واسعة : يبارك فيـك .. وشكرا هيفاء تعبناك معانا
هيفاء : مو مشكلة كرمال سارا .. اخيرا بتنقلعي من الشقة وبرتاح
سارا : هههههههههه طلعي على حقيقتك يالخاينة
هيفاء بهم : بس بجد .. والله بشتاق لك يا خايسة
لؤي كان الدنيا مو سايعته مو مصدق رغم انها كانت بسيطة .. حتى بلبسها الدوام ماغيرته طلعت وراحوا بس هذا مايهم المهم انهم صاروا لبعض بالكامل وهذا يكفيه : مشينا قلبي ؟
سارا : يـ .. يله .. هيوف اشوفك بعدين
اول ماطلعوا صرخ لؤي بأعلى صوته بشكل لفت كل اللي حوله .. سارا فزت : بسم الله شفيك !
حصلت نفسها بالهواء وهو يدور بها : مو مصدق .. مـو مصدققق ! انتي انتي مستوعبة اللي صاير .؟
سارا : هههههههههههههههههههههههههه لؤي نزلني
لؤي مشى بها بين يديه لحد ماوصلوا السيارة ودخلها وركب وتنهد بحب : بيجي يوم يقتلني هالحب انا عارف
سارا : ههه بسم الله عليك
لؤي : راحت علي خلاص .. والله اعشقك بشكل ماتتخيلينه
سارا : انا اكثـر .. وربي مو مصدقة انك قبلتني بهالطريقة
لؤي حضن يديها : انا اللي مو مصدق .. انتي اللي قبلتيني رغم ان اهلي ضد هالفكرة وماراح انسى هالمعروف طول عمري
ابتسمت سارا وهي تطالعه بحب وبعيونه حب اكبر
***
نزلت بتألق وسط عيـون الكل وكأنها نجمة .. مع الأغنية الشغالة باختيارها تقدمت امها وضمتها : يابعد عمري مامي
ام نايف : الله يوفقك يابنتي ويكتب لك الخير
باست ميهاف خد امها : امين ماما
كملت طريقها وهي تسلم على الكل ومبتسمة من قلبها .. وصلت لأم فراس : الف مبروك حبيبتي .. الله يوفقكم
ميهاف : ان شاء الله خالتي
جلست بعد ماخلصت .. نطت جمبها اسماء : ترا شوي وينادونك للكتاب
ميهاف مبتسمة : عارفة
اسماء : منتي خايفة !
ميهاف : هههههههههههههه مرتبكة مو خايفة .. شدعوة اخاف
دق جوال ام نايف ردت : هلا .. اللحين .؟ يله يله .." سكرت " ميهاف امي يله حبيبتي
تنفست الصعداء ومشت مع امها .. دخلت عند ابوها ونايف سلم عليها ابوها وضمها من قلب دلوعته هذي : ماني مصدق جا اليوم اللي اشوفك فيه عروسة
ميهاف : ههههههه .. حاس حالك كبرت ؟
ابو نايف : راحت علي كبرت من قبل على راس نايف
نايف : ههههههههههههه ميهاف شهالزين اول مرة احس السنافير حلوين
ميهاف : ها ها .. ماراح تقهرني اليوم موت
نايف : اقول وقعي بس .. هذا جزاي امدحك مشكلتكم يالسنافر ماتنعطون وجه
وقعت ميهاف ... نايف نط على طول : يله بروح اناديه
ابو نايف : الله يخلف بس مافيه ركادة
ميهاف : بابا ماما اطلعوا
ابو نايف : تطردينا !
ميهاف بربكة : يوه بابا رجاء .. والله وجودكم مربكني زيادة
ابو نايف : ههههههههههههههههههههههههههههههه قومي قومي يا ام نايف نطلع
ام نايف : بس لاتطولون هاه .. ابو نايف لاتتركهم ربع ساعة وارجع اسحب بدر
طلعوا .. وجلست ميهاف وهي مشبكه يدينها بعد فترة هدوء انفتح الباب رفعت عيونها وهي تشوفه بطلته الفاتنة بالثوب والدقلة السوداء , نظرتها له هالمرة غيـر .. غير عن كل مرة دون شعور منها وقفت مشى بخطوات راكدة لحد ماوقف قدامها وأول مرة تلحظ ميهاف فرق الطول الشاسع بينهم بعد صمت لفترة .. قالت ميهاف : مبــروك بدر
بدر : يبـارك فيك .. مبروك انتي , مبسوطة اللحين ؟
ميهاف رفعت راسها وطالعته : لا تقولها كذا .. ماراح اعرف اجاوب
بدر : ايش قلت .؟ سالتك اذا مبسوطة .؟
ميهاف : حيل .. وأنت ؟
بدر : كنت ساكت طول هالفترة عشان ما اضايقك .. بس ايش تتوقعي مشاعري وكلش مقرر غصب عني ؟
ميهاف : غصب ؟ مو كأني غصبتك .. انا عطيتك خيار
بدر : خيارين اهونهما مر ؟
ميهاف : مر ؟
بدر وعيونه ثاقبه بعيونها بحدة : ميهاف انا ما أحب احد يجبرني على شي .. ولا شي حتى شرب الموية !
ميهاف تحطمت توقعته اكيد انتهى عناده ومبسوط اللحين : ....... ليتك جلست ساكت وماضايقتني
بدر : لاا .. انتهت مهلتك اللحين لازم تسمعين ردي على موقفك هذا لأني ناوي ادفعك ثمنه
ميهاف فتحت عيونها : شنو ؟
بدر : مثل ما قلت لك انا ما أنجبر على شي .. واذا حصل اعرفي اني ماراح انساها ولا راح اسكت
ميهاف بقهر : الكتاب ليش وقعته ! ماكان ضروري تنجبر
بدر : لاتفهمين غلط .. وقعته عشان ماعندي نية اتركك لغيري
ميهاف شدت على قبضتها وكلش فيها يرتجف قهر : ..................
بدر : وبما اني وقعته .. ماعندي مانع اطلقك اللحين لو تبغي ؟
ميهاف فتحت عيونها : نعم !
بدر وهو يمسح على خدها الناعم بطرف اصبعه : بس انا اعرفك .. مستحيل تتركيني زي ما أنا مستحيل اتركك
ميهاف نزلت دمعة من عينها قابلت اصبعه ... بدر : بس الزواج اللي ناوينه عقب شهر راح تروحين لأبوك وتطلبين يأجله
ميهاف بقهر : اطلب انت !
بدر : ماعندي مانع اذا يناسبك .. بس راح تصير مشاكل وانتي عارفة , فاتركيها بيني وبينك وقولي لعمي ان رغبتك تأجلين الزواج
ميهاف : مابي .. ماراح اقوله
بدر بسخرية : راح تقـولي .. ولا الطلاق عندي زي السلام واستانسي بكونك مطلقة من أول نظرة
ميهاف بانكسار : ليش تسوي كذا .؟ انا وش غلطت معك
بدر بحدة : لويتي ذراعي .. وصار اللي براسك وتزوجتك بالموعد اللي اخترتيه جا دوري اسوي اللي براسي
ميهاف تلاحقت دمعاتها على خدها : ...............
حاوط بدر خصرها بيده وقرب منها وباسها .. ثم ابتسم وهو يحس انشفى قهره : اشوفك بعدين .. ارجعي لمعازيمك وانبسطي ..
قبل يطلع وقف والتفت لها : على فكرة طالعة قمـر اليوم
طلع .. وميهاف ارتخى جسمها وجلست على الكنبة ودمعاتها تتلاحق غطت وجهها وبكت بقهر بكت بحرقة من معاملته وتحقيره معه حق صورتها اهم شي بالنسبة لها مستحيل تتطلق .. مسكت صدرها مكان قلبها مكان جرحها : ياربي شاسوي

اووووف شو القهر يابدر نرفزني ودي من ينطية على راسه . ونايف فلة كالعادة هههه . اما اسماء وهيثم توقعت رفضه شو راح تسوي اسوم عقولة يكون الطريق مسدوم وخصوصا رفض هيثم الموضوع حتى لما فتحوه اخواته واسماء راسمها على ابتسام وغادة ما يجيب فائدة . شكرا حبي ومنتظرك للقادم .

بدر طلع نذل بحركته.. مع انها بنت عمه ومو غريبة
نايف .. يا ترى شو اللي حيحرك المياه الراكدة بينه وبين ابتسام
لؤي .. اتمنى ما يتخلى عن حبه بيوم من الايام
بانتظار الفصل القادم