" البارت السابع عشر "
بعد مرور شهـر من الأحداث /
مستشفى مدينة الملك فهـد الطبية :-
طلع هيثم من غرفة العمليات وهو يطق رقبته بعد إنجاز من انجازات عديدة ... : يعطيك العافية دكتور
هيثم : يعافيك
الممرضة : دكتور نفس البنت كانت هنا من شوي .
هيثم عقد حواجبه بضيق: شسالفتها هالبنت ...؟ موجودة اللحين !
الممرضة : لا راحت .. بس خلال هالشهر جت وسألت عنك يمكن خمس مرات ودايم تكون مشغول
هيثم : ماشي ماشي
كمل طريقة وهو محتار .. خلال هالشهر دايم يجون يقولون له عن شابه تجي تسأل عنه ودون موعد ومو مريضة وسأل غادة طلعت مو هي وسارا بالكويت ! من هـذي .؟ ووش تبغى !
دكتور : هيثم راح تناوب اليوم بالطوارئ
هيثم : تمام
ممرضة : دكتور هيثم .. اجراءات خروج رنيم .؟
مشى بطريقة لحضانة الاطفال اللي صار مألوف فيها هالفترة وقف عند رنيم اللي صارت صحتها كويسة وكبرت عن اول رفعها بين يدينه وابتسم لها : ها ياخالي مستعدة تطلعين .؟
الممرضة : هههههه راح نشتاق لهالعصفورة كثير
هيثم بمزح : لا ياشيخة فكة من جية امها كل يوم ابثرتني
الممرضة : هههههههههه قلب الأم
, اما عند اسماء رجعت البيت باحباط وصعدت دون كلمة .. هزت ام فراس راسها وهي جالسة وتكلمها وهي متجاهلتها عقلها صافن بعيد .. تنهدت ودقت على فراس : هلا والله
ام فراس ووجهها نور بصوته : ياهلا فيك ومرحبا ومسهلا .. كيفك يمه .؟
فراس : حمد الله كلش تمام , انتي كيفك .؟ واخواني كيفهم .؟
ام فراس تنهدت بضيق : ماشي الحال
فراس باهتمام : وليش الضيقة يا أم فراس .؟ ماشي الحال هذي ماتمشي عندي
ام فراس : وش تبيني اقول يمه .؟ والله صايرة معد افهم انت مسافر ما أشوفك وبدر له هالشهر نوم وسهر وما يداني نحاكيه ولا نقربه مدري وش جاري له .. واسماء صايره فعالم ثاني ما أدري عنها .. حتى انس وياسمين طايرين بجمعات برا البيت واذا جلسوا بالبيت تنكاشوا مع بدر
فراس : وانتي ليش تاركه الرعيه تسيب .؟ فوضى هي ؟
ام فراس : وش بيدي بعد انا .. كل ما حاكيت احد تحسفت اني حاكيته ومافيه شي مضايقني كثر بعدك عني
فراس تنهد : بس .؟ خلاص من بكرة انا عندك
ام فراس ماصدقت : صدق .؟
فراس : ولو .. أهم شي رضاك وانا عندي خاطر اغلى من خاطرك .؟
ام فراس : الله يسعدك .. ويرضى عليك
فراس تغير صوته لعصبية خفيفة : وجاي اشوف وش عندهم الشيوخ كلن نافش ريشة !
ام فراس : لا يمه ماينفع هالاسلوب هد شوي .. اسلوبك هذا اللي يخليهم يتضايقون لاعرفوا انك راجع
فراس : ايه يصير خير .. يله يمه توصين شي ؟
ام فراس : متى بتجي بكرة .؟
فراس : مغرب
ام فراس بلهفة : والله وبتنور الرياض كلها بهالطلة
فراس : يله سلام
سكر فراس السماعة وام فراس لقت لها حاجة تشغلها عن عيالها المنفسين .. ابتسمت بفرح وهي تقوم من اللحين تجهز كلش له .. اكله المفضل من اللحين تسويه جناحه تنظفه بنفسها لأنها تعرفه ممنوع بالنسبة له خدامة تتنفس بغرفته او تقربها
***
بمؤسسة سارا دخل لؤي المكان وهو صار معتاد تواجده بالنسبة للكل وصل لمكتبها وفتح الباب بخفة كانت تكتب بانسجام بوجهها الجدي , ابتسم وهو يطالعها ومشى بخطوات هادية وحط مشروب ستار بوكس جمبها : بخ !
التفتت له سارا وقالت بضيق : يووه لؤي ! كم مرة قلت لك لاتجي بمكان شغلي
لؤي بعدم اهتمام وهو يجلس على الكرسي قدام المكتب : مليون مرة قلتي لي .. بس انتي 24 ساعة بمكان شغلك وانا 24 ساعة اشتاق لك
سارا : ايه بس كذا افقد صورتي كرئيسة .. وبصراحة انت مصدر الهاء واشاعات
لؤي : بجـد ؟ ايش اشاعاته
سارا : تسألني انا .؟ بس انا حاسه كذا
لؤي : عموما جاي اقولك اني يمكن اروح الرياض
سارا بخوف : ليش ؟
لؤي بجدية : والله مالي شغل هنا يعني .. فراس مشغول وحبيبتي تشتغل ع طول وتطردني وش يجلسني يعني ؟
سارا : لا مو قصدي كذا والله ! خلاص براحتك اجلس
لؤي ابتسم : هههههههههه امزح .. بروح اشوف الوالد وبكلمه بموضوعنا
سارا تغيرت ملامحها لضيق واضح : اهاا .. ايش راح تقوله .؟
لؤي : فيه وحده احبها واموت فيها وبتزوجها ولا بقتل نفسي
سارا : هههههههههههه فيلم هندي هو !
لؤي لانت ملامحه بنعومة وقال برومانسية : لازم اقوله من اللحين .. ومقدر اقوله ع السماعة لازم اقابله وماراح اطول برجع
سارا بعدم ارتياح : اوك .. متى راح تروح .؟
لؤي : طيارتي الليلة .. " رفع حاجب " بتشتاقي لي .؟
سارا وهي ترتب اغراضها وتكابر : مو قلت ماراح تطول ..
لؤي : لااا .؟ بس بيمر يوم كامل ماشفتيني ترا
سارا : ايه عادي بكون مشغولة اساسا ماراح احس
لؤي : والله شكلي هونت .. ماراح اقول لأبوي انا احط حياتي على المحك وتصفيق من ابوي وكفوف عشان وحده ماراح تشتاق لي حتى
سارا بتأييد : بجد لؤي .. ليش ماننتظر فترة لحد تقول لابوك .؟
لؤي : تكلمنا بهالموضوع من قبل .. وبعدين انا ماعندي شك انك الانسانة اللي بكمل حياتي معها فليش انتظر ؟
سارا بضيقة : مو عارفة .. مو متطمنة
لؤي : انا متفائل وان شاء الله خير
سارا : اوك .. استنى نطلع نفطر سوا
لؤي : خليها بعدين .. لازم اقابل فراس اللحين قبل اسافر
سارا حطت يدها على خصرها بحمق: بالله ..؟ مين اهم فراس ولا انا .؟
لؤي تنهد بحب : الظاهر فراس بينتظر اجل
سارا سحبت شنطتها : فيه مطعم يسوو وافل بيعجبك
***
بيت نـايف – الساعة 6 المغرب /
رجعت ابتسام من معهدها ..قابلتها غادة بعبايتها ومعصبة : خير ان شاء الله ! طالعة من صبح والسواق حقك مايرد
ابتسام : هدي ايش كل هالعصبية .؟ ليش ايش بغيتي .؟
غادة وهي شوي وتقطع شعرها : ناسيه ان رنيم بتطلع اليوم ! بروح اجيبها
ابتسام ابتسمت : رنيم وهيثم بالطريق لهنا
غادة فتحت عيونها : بجد !! بجد !
ابتسام : ايوه توه كلمني
غادة بقهر : حمد الله والشكر ! وليش يكلمك انتي .. امها ؟!
ابتسام : كلمك كلمني كلها سوا .. يله عاد افصخي عبايتك مافيه طلعه
غادة فصختها بحماس ورجعت تجلس بالحديقة عند البـاب بتنتظره ماراح تدخل : ...........
اما ابتسام صعدت لغرفتها فوق ورمت عبايتها وبدلت لبسها للبس بيت مريح .. جلست على التسريحة تلم شعرها وانتبهت على صورته بالكومدينة بعباية التخرج مع مجموعة من الشباب ماعرفتهم ويضحك من قلب , طالعت التقويم : مر اكثر من شهر .." تنهدت " ولمت شعرها بسرعه ونزلت ليش تفكر فيه .؟ اذا هي تدق مايرد ومطنش خلاص بالطقاق !
اول مانزلت سمعت ضجة عند الباب ابتسمت وهي تشوف رنيم بيد غادة .. ماكان لايق ما كأنها ام شايله بنتها : ههههههههههه بصراحة غدو مو لايقة عليك الأمومة
هيثم : هههههههههههههههه تو أقوله لها !
غادة وهي تبوس رنيم : رايك البايخ انتي وياه احتفظوا به لنفسكم
ابتسام : بصراحة بمناسبة طلعة رنيم انا بسوي حفلة ماصارت !
غادة بضيق وحزن بوجهها : لا ابتسام واللي يعافيك لاتسوي حاجة !
ابتسام : هاو .؟ غريبة من متى تكرهين الفشخرة انتي وهاالعلوم ..؟
غادة : لأن مافيه احد يخصني وبيحضر عشان رنيم .. بجد ابتسام تحبيني لاتسوي شي , اللي بيحضروا كلهم اهل زوجك وبيجو عشانك يكفي اني ساكنة عندك اعفيني
ابتسام ماحبت تضايقها بهالموضوع اكثر : خلاص حبيبتي ولا يهمك .. بس انتظري بسوي احلى عشاء بمناسبة العصفورة , هيثم راح تتعشى معنا ترا !
هيثم : لا لا .. جيت اوصلها وراجع
ابتسام : ياشينك .. اجلس تعشى وربي مشتاقين لك
هيثم : بعدين ابتسام فرصة ثانية ..
ابتسام : اوك في امان الله
قربت ابتسام من غادة وهي تطبع قبلة على خد رنيم : يااقلبي تجنن
غادة تنهدت : مو مصدقة انها بين يدي خلاص وبتجلس معاي
ابتسام : قولي حمد الله
غادة ضمتها ودخلت لداخل : حمد الله .. يله بدخل لا تبرد
***
اثناء مابدر جالس بملل والجـوال بيده يلعب به .. والفيلا مكتظه بهالوقت كالعادة .. وقت السهرة زفر دون نفس
: شفيك بدر كانك لك فترة الدنيا ع راسك !
بدر زاد من حدة تأففه : افففففففففف !
: شفيك خالد مشتاق لي اعذره !
التفت بدر للصوت ... وابتسم من قلب وهو يشوف نايف عند الباب وقف وسلم عليه : ايا الخسيس ! متى جيت ؟
نايف : هههههههههههههه والله وصلني خبر ان بعض الناس لو ابعد عنهم اكثر ماتوا من الشوق
بدر : سلامتك هذي زوجتك مو انا ترا !
نايف جلس : هههههههههههههههه وانت شفيك ضـايق سلامات .؟
بدر : ابد مافيه طفش وزهق وضيقة خلق .. والله فكرت اجيك هناك لما عرفت ان المدام رجعت
نايف : ايه .؟ وليش ماجيت طيب
بدر : ما أدري ماضبطت
نايف : ماوراك سالفة لو جاي كان فليناها
اجتمعوا الشباب حول نايف يسلمون عليه ويدردشون معه وسوالف ومغامرات هالرحلة كيف كانت .. والسهرة طويله
***
الكـويت /
ضرب لؤي جرس جناح فراس .. فتح فراس الباب , لؤي ببشاشة : تصدق زمان ماجيت شقتك !
مشى فراس لحد غرفته الواسعة الأنيقة بلونه المفضل " الأبيض " وشنطته على سريره ويرمي اغراضه المهمة فيها .. جلس لؤي ع طرف السرير : بتسافر اجل .؟
فراس وهو يرتب اوراقه بشنطته : بكرة
لؤي : ماقلت لي كان أأجل طيارتي لبكرة معاك
فراس : متى رايح أنت .؟
لؤي : اللحين بعد ساعة
فراس : طنشها واحجز بكرة
لؤي : لا خلاص حجزت وبروح .. شعندك بالرياض ؟
فراس : مشتاق للوالدة ورايح اشوفها
لؤي : الله يحفظها .. " تنهد " و أنا رايح اقول لأبوي
فراس وقف عن حركته والتفت للؤي : رايح عشان تقوله .؟
لؤي : ايه .. لازم اقوله من اللحين
فراس رمى اوراقه ع جنب و تنهد وجلس على كرسيه : لؤي .. من اللحين خذها مني ابوك ماراح يقتنع
لؤي : وليش لا ..؟ لاتحكم وتتشائم انا ماتوقعت اهلي يزوجوني او يزوجون نايف وحده فقيره وهذي زوجة نايف ! يمكن يفاجئونك
فراس : هالمرة ماراح تحصل معجزة ويفاجئونك ... تدري شلون سو اللي تبغى .. ماراح يعجبك كلامي ولا راح يعجبني كلامك فنسكت احسن !
لؤي : ماراح توقف جمبي يعني .؟ تعرف ابوي كلمتك عنده غير
فراس : قول الله يستر ما أقلب راس عمي عليك
لؤي بقهر : رجاء فراس ماراح توقف معي لا تتدخل اجل !
فراس : يكون احسن كمان
لؤي تنهد بضيق ووقف بطريقه لبرا : اشوفك بكرة اجل
طلع وفراس رمى بالتيشيرت بيده على الجدار وخلل يده في شعره بضيق وهو في داخله هالشهر ضايق على حالة لؤي .. ضايق لدرجة محد يتصورها رغم انه ماوضح للؤي قدام قناع البرود حقه
***
الصبـاح – 8 /
صحت ابتسام من النوم .. وبدلت لبسها ولبست عبايتها , وقت معهدها كل يوم نزلت وهي منتعشة بتسوي فطورها وتلعب مع رنيم قبل تطلع هالشهر عاشت احلى ايام عمرها مع غادة بهالبيت والعز اول مانزلت مرت على غرفة غادة حصلتها نايمة بسابع نومة ورنيم فاتحة عيونها بسريرها بس ساكته .. ابتسام : ياحياتي الهادين
طبعت بوسة على خدها وطلعت لكن وقفها صوت بكاها .. : هههههههه يعني انتبهتي احد صاحي خلاص ماتجلسي
حضنتها بين يديها وهزت غادة : غغدو
غادة تحركت بضيق بنومها : هممم
ابتسام : غااادة قومي بنتك صحت !
غادة : .....................
ابتسام : مالت قال ايش قال الامومة لايقه علي ... قومي بس !
غادة : افف ابتسام شتبين اتركيني انام .؟
ابتسام : مو وقته نومك غادة عندي معهد وتأخرت وبنتك صاحية اتركها تبكي يعني
صحت غادة بكسل : اكيد انتي صحيتيها !
ابتسام : والله كان صاحية من اول ..
غادة بعصبية : هاتيها بس اقص يدي لو ماكنتي مصحيتها
ابتسام مالها خلقها طلعت بسرعة السواق له فترة برا .. اما غادة طالعت رنيم بضيق لكن ماطولت ضيقتها ابتسمت مباشرة محد يقاوم البراءة : ياحبيبة قلبي وعمري وروحي ... اااه احببببببك.." ابتسمت رنيم بنعومة " بتوقفي قلبي انتي بتوقفيه !!
تنشطت غادة فخذت رنيم معها للحديقة عشان شمس الصباح مفيدة لها .. جلست على الكرسي الخوصي الهزاز ورنيم بحضنها , انتبهت للباب ينفتح : ابتسام وش نسيتي ..؟
بلعت العافية وهي تشوف الشخص الطويل الأسمر الجذاب داخل البيت وبيده مفتاح .. عقلها عجز يحلل " حراامي .؟ " اما نايف انتبه للصوت عقد حواجبه وهو يشوف شابه نحيلة بشعر طويل لخصرها مفتوح بطبيعته المتموجه واللمحة الحادة وبجامة فضفاضة وبيدينها رضيعة وقف يطالعها وعلى وجهه علامات استفهام : .............!!
غادة بلعت ريقها ورجلها مو شايلتها : آآآ ............... مممن .. انت ...؟
نايف : شنو منو أنت ..؟ انتي اللي شتسوين في بيتي .؟
غادة " نااااااايف !! الكلبة ابتسام ماقالت لي انه جاي " نزلت راسها وهي مو عارفة شتسوي : ............
نايف : انتي شغالة جديدة .؟
غادة بقهر : شغالة بعينك !
نايف " اوف من هالملسونة ! " ابتسم : انتي ميـن ماقلتي لي .؟
غادة : انا .. انا اخت ابتسام .. معليش تعطيني ظهرك
نايف ابتسم : اهاااا اخت ابتسام مالك اسم ؟
غادة : ............................
نايف : انا نايف .. وإنتي .؟
غادة بضيق : غادة وممكن تدخل لو سمحت عشان ادخل !
نايف : عاشت الاسامي والله... شفيك على اعصابك غادة .؟ خلاص دامك اخت ابتسام حسبة اختي ان شاء الله .. الا وينها ابتسام .؟
غادة لعنت نفسها اللي ماخذت طرحتها الرجال فالها بجد : ................. بالمعهد
نايف : اها , اوك انا صاعد لفوق كاس قهوة لو سمحتي
غادة " يوصيني !! ليش كل الناس يشوفوني خدامة ما أفهم " : ...........
نايف وهو يشوف وجهها يكشر : هههههههههه اذا يضايقك وصي الخدم وبالمرة قولي لهم ينزلون اغراضي من السياره
صعد لفوق .. وغادة جلست مصدومة بمكانها وش هالمخلوق ! تو تفهم ابتسام لما قالت لها انه غريب اطوار !! خذت رنيم وركضت لغرفتها وقفلتها عليها مليون مرة وحطت طاولة قدام الباب ومسكت جوالها تدق على ابتسام مافيه رد !! : يالله يا ابتسام وينك ..!!! تعالي تفاهمي مع رجلك بموت وش هالوضع
دق جوالها " ابتسام " ردت بسرعة : الو ابتسام الحقي !
ابتسام : بسم الله شفيك ؟
غادة : ماقلتي لي ان زوجك رجع ليه !
ابتسام : هاه .. نايف رجع .؟
غادة : بسرعة تعالي البيت بلا معهد بلا بطيخ هالمجنون بيجلطني ناوي يتقهوى معي !
ابتسام بصدمة : هو بالبيت .؟!
غادة : اييييييه .. تخيلي طلعت للحديقة فجأة دخل ويسولف و ... خلاص والله لو ماتجين لاهج من بيتك
ابتسام : جايه
سكرت السماعة وهي ضاغطة عليها .. رجع وماقالها يعني ! لا وبأي حق يسولف مع اختها وقح يسولف مع الوقحات مثله اوك بس اختي ..؟! دقت مباشرة عليه مافيه رد ! ماشي ماشي طلعت مع السواق وطنشت المعهد ..
***
بيت أبو نايف /
دخـل لؤي البيت وسلم على امه وابوه : حمد الله ع السلامة
لؤي : يسلمكم يارب ..
حمل فهد بين يدينه وجلسه على حضنه وجلس : وكيفكم ؟
ام نايف : حمد الله ..شخبار الشغل يمه .؟
لؤي ماحب يقولهم انه عطالي اللحين : ماشي ... قلت اجي يومين اشوفكم
ابو نايف : ماكان له داعي .. كان جلست عند شغلك ولاحق على شوفتنا
لؤي : شفت فراس بيجي قلت ايش يجلسني اجي انا كمان
ابو نايف : فراس بيجي .؟
لؤي : ايه بيوصل اليوم .. فين ميهاف مو شايفها .؟
ام نايف : تحصلها نايمة اكيد
لؤي : اجل انا بصعد كمان انام لي شوي من امس مو نايم
ام نايف : متى نصحيك .؟
لؤي : عصر ان شاء الله
ام نايف : بتنام من صبح لعصر !
لؤي : ماتدري قد ايش فاقد النوم اتركيني
اول ماصعد فتح جواله ماحصل رسالة منها ولا اتصال جلس بقهر الظاهر انها ماراح تشتاق له صدق .. وصار فاهم خلال هالفترة انها ماتعلن حبها حتى لما اعترفت له معاملتها له زي اول .. ابتسم بشوق وهو يتذكرها وارسل لها :
أحبك فوق ماتتصور وقد الدنيا وأكثر .. أحبك قد ما احلفلك : على غيابك انا مقدر !
وصلت الرياض حياتي <3
وصله ردها مباشرة : حمد الله على السلامة :$ , ادق ولا مشغـول .؟
لؤي طنش النوم مايعيف سوالفها ودق مباشرة وتنهد بشوق : من اللحين اشتقت لك !
سارا بضحكة خجولة :ههههههههه .. انت فين .؟
لؤي : بغرفتي .. شوي كذا وانام
سارا : ومتى راح تقـوله .؟
لؤي : انتظر الفرصة المناسبة .. اللحين بنام مافيني حيل اتكلم معه وقت اشبع نوم واصحى بقوله
سارا بضيق : اوك .. رد لي خبر اهم شي
لؤي : ايش قاعدة تسوي .؟
سارا : بالدوام طبعا
لؤي : ههههههههه استانسي ماني موجود ازعجك اليوم
سارا : لا تخاف مستانسة .. حيل بعد !
لؤي : قدها .؟
سارا : هههههههههههههههههه لا لا .. والله بشتاق لازعاجك لاتطول
لؤي : لسى بتشتاقي ..؟ ما اشتقتي للحين يعني !
سارا : يوه لؤي .. بالله روح نام هذا وانت نعسان جالس تحاسب على الحرف
لؤي : هذا انا جالس انام .. سولفيلي لحد ما انام
سارا : مقدر ابي اخلص شغلي
لؤي : اقول انا بسكر مامنك فايدة فالدوام انتي .. اذا طلعتي كلميني
سارا : ههههههههه اوك نوم العافية
سكر لؤي السماعة وغط بنومة مرتاحه .. بهالشهر اكتشف انه يعشق ترابها مو بس يحبها
***
وصلت ابتسام البيت دخلت ماحصلت احد .. طقت على باب غادة سمعت شهقتها : غادة افتحي انا ابتسام
فتحت مباشرة : اخيرا جيتي !
ابتسام : فينه ..؟
غادة : ايش عرفني من صعد وطلب القهوة ماشفته !
ابتسام طالعت الدرج : اوك ارتاحي خلاص جيت .. بروح اشوفه
صعدت ابتسام كان باب الغرفة مسكر فتحته كان نايم بعمق .. فتحت الأنوار وتوجهت له وسحبت الغطا : نايف !
نايف وهو لسى نايم : هممممممممم
ابتسام تكتفت : ممكن تصحى شوي بكلمك !
نايف مازال مغمض : اسمعك ..
ابتسام : اولا حمد الله ع السلامة ! ليش ماعطيتني خبر .؟
نايف : نسيت ..
ابتسام : بالله ..؟! وليش كل هالفترة ماترد على مكالماتي .. من شوي حتى دقيت عليك مارديت !
نايف : مدري
ابتسام حست بكمية برودة نايم اساسا وهو يكلمها : وايش هالفلة جالس تسولف مع غادة !
نايف غطى عيونه بيديه بضجر : اففففففففف ابتسام .. بالله طفي الليتات واطلعي برا وسكري الباب
ابتسام ( بالله هذي نفسية واحد راجع من المالديف !! ) طلعت لبرا وشغلت كل اليتات بطريقها وفتحت الباب على اخره وطفت التكييف وطلعت .. اما نايف تافف بقرف وقام بكسل وطفى الليتات وسكر الباب وشغل التكييف !
نزلت ابتسام ودخلت غرفة غادة وجلست بقهر .. غادة : شصاير .؟
ابتسام : مافيه شي
غادة : ايه وش قالك .؟ معقولة ماعطاك خبر انه جاي الرياض
ابتسام : اقول غادة قومي نطلع نتغدا برا
غادة : لا ابتسام مقدر مافيني حيل ... بس .. بما ان نايف رجع انا مقدر اجلس هنا
ابتسام بعصبية : كلام فاضي .. بتنثبري هنا ! وهوا طقاق يطقه انتي الداخلة وهوا الطالع
غادة : لا ابتسام بجد فشلة
ابتسام : لاتجالديني مافيه طلعه .. انا بقوم اصلح لنا غدا حدي جويعة
غادة سكتت لان ابتسام اذا عصبت ماتتجادل ..
***
بيت أبو فراس /
كانت اسماء تتمشى بغرفتها وهي تتحلطم : مشغول .. مشغول .. مشغول .. غرفة العمليات .. مو موجود .. اجازة .. مشغول .. مشغول !!! وبعديييييييييييين ؟!
ارتمت بجسمها على الكرسي بعصبية وقالت بقهر : ليش مشغول لهالدرجة ..؟
: اسماء !
اسماء : خير !!
ياسمين : امي تقول تعالي ابيك
نزلت اسماء .. ام فراس : وش كل هالجلسة بغرفتك مانشوفك !
اسماء : هلا يمه شبغيتي .؟
ام فراس ابتسمت : فراس بيجي بعد المغرب !
اسماء طالعت الساعة 5 : وليش ماقلتو لي من بدري !
ام فراس : وانتي تجلسين معي عشان اقولك .. المهم هذا علمتك مافيه طلعه اليوم يعني .. وبدر وينه .؟
اسماء جلست : لا تحاولون ماراح اروح لغرفته اناديه .. صاير يخوف هاليومين
ام فراس : قومي بس من يروح هجل ياسمين هالمسكينة .؟
اسماء : ايه تروح ياسمين .. اجل انا الكبيرة اقوم وهي الصغيرة ؟
انس : اصلن بدر مو موجود .. طلع قبل شوي
حاولت ام فراس تدق عليه لكن مافيه رد : مايرد
اسماء : احسن قلعته .. صاير هالايام ماينطاق يجلس وراه
ام فراس : ماعرفتي وش فيه طيب .؟ نفسيته مو عاجبتني
اسماء : لا ما عرفت .. وش جايبه فراس غريبة ..
ام فراس : انا طلبت منه يجي .. اشتقت له وبشوفه
اسماء : الله يهداك يا يمه ليش قلتي له .. كان خليتيه وراه
ام فراس بعصبية : عيب ! اخوك الكبيرة ذاه
اسماء تنهدت بضيق .. مع جية فراس مستحيل تطلع كل شوي المستشفى تشيك زي أول : .......
***
بيت نـايف – بعد اذان المغرب /
كانت ابتسام بالمطبخ تصلح لها ولغادة قهوة .. انتبهت لأنفاس وراها وقبلة تنطبع على كتفها : هلا بالزوجة المعصبة
كملت شغلها ببرود : ...............حمد الله ع السلامة
وقف نايف قدامها وهو لابس واضح بيطلع وتفصلهم طاولة المطبخ : يسلمك ......" طالعها من فوق لتحت بلبس الدوام تنورة وبلوزة ومسحت الميك اب وشعرها ملموم أي كلام وشكلها عشوائي مرة " بالله كذا تستقبلي زوجك اللي زمان ماشفتيه .؟
ابتسام توجهت للثلاجة وتحط الكيك بالصحن : والله لو تبي استقبال كان رديت على جوالك , او على الاقل عطيت خبر قبل تجي !!
نايف اخذ قطعة من الكيك : اختك للحين موجودة .؟
ابتسام : ايه
نايف : ايه ولمتى .؟
ابتسام : لاتفهم غلط هي مو جاية زيارة بتسكن عندي
نايف : للأبد يعني .؟
ابتسام هزت كتوفها : يمكن
واخذت الصينية وطلعت .. اما نايف ما أهتم كثير يفكر حتى اذا هي زعلانة او لا طلع مباشرة
***
نزلت ميهاف من غرفتها .. فتحت عيونها وهي تشوف لؤي جالس مع امها وابوها : لؤي !!!
لؤي التفت لها : هههههههههههههههههه هلا بخرج النوم
سلمت ميهاف عليه : متى جييت ليش ماقلت لي .؟
لؤي : من صبح وانا هنا .. جيت ونمت وشبعت نوم وصحيت وصليت وانتي بغرفتك
ميهاف : هههههههههه لو عارفة انك موجود طلعت
ام نايف : وحنا مانسوى تجلسين معانا يعنــي .؟
ميهاف : مين قال كذا ماما بس بجد مفروض عطيتوني خبر ان لؤي موجود
لؤي : ماصار شي هذا انتي عرفتي
جلست ميهاف جمبه : ايه وشخبارك ؟
لؤي : في أحسن حـال .. وانتي كيفك ؟ قالو لي خلصتي الصيفي
ميهاف : هههههههههه ايوه مو مصدقة .. بتطول هنا ؟
لؤي : لا ما حطول .. راجع باقرب فرصة للكويت
ميهاف بقهر : وليش جاي طيب اذا ماحتطول ؟
طالع لؤي ابوه وهو مو يمهم يشرب قهوته ويطالع الأخبار .. بلع ريقه لازم يقوله وقدام امه احسن يقولهم كلهم مرة وحده : يبـه
التفت له ابو نايف : هلا
لؤي : ابي اقولــك ..
قاطعه دخول نايف البيت شهقت ام نايف : نويف !!
نايف وهو مروق : ياعيون نويف انتي
ام نايف بعصبية : عيونه طل .. عيونه وهالشهرين كلها حتى مارفعت السماعة !!
نايف : روقيني يمه تو خالص من ابتسام ونهى
ابو نايف : حمد الله ع السلامة !
نايف : يسلمك .. ههههههههههههههههه الله الله لؤي هنا من متى ؟
لؤي : تو اليوم
ميهاف : هههههههههههه يمه فجأة كلكم هنا
ام نايف : ومن متى جاي ؟
نايف : امس الليل .. بس انشغلت مع الشباب ثم رحت انام وعقبها جيت
ميهاف :حرام عليك نايف ليش ماترد ع جوالك .. زوجتك مسكينة اول ماوصلت ماعرفت حتى بيتكم وين
نايف : مشكلتها محد قالها ترجع لحالها
ام نايف : هي غلطانة بس انت بعد غلطان ! كان رفضت وخليتها عندك مالك كلمة !
نايف : لا اعفيني .. لا أقولها لا ولا تقولي لا كلن يسوي اللي يريحه
لؤي تنهد الظاهر مايمدي يفتح الموضوع وسط سوالفهم مع نايف ..
ام نايف بحماس : ابسوي عزيمة قريب لك ولابتسام بمناسبة رجعتك
نايف : سوي لها لحالها انا مالي خلق
ام نايف : مو بكيفك ! تعال احضر ماراح تموت
ابو نايف : والله اليوم بركة مفروض صدق نسوي عزيمة ماحصلت لؤي ونايف وفراس مرة وحده رجعوا كلهم
نايف برواقة : ايه ميهاف شخبارك ..؟ وراك متهاوشة مع خطيبك الله يصلحك !
سكتت ميهاف خصوصا ان الكل يطالعها ماقالت لاحد طول هالشهر ... يافشلتها قدام ابوها
ابو نايف : شنو ! شنو هالهوشة !
ميهاف : مافيه شي يبه نايف يخرف
ابو نايف بحدة : ميهاف وش صــاير .؟
نايف : اوف .. كأني سويت مشكلة .؟
ميهاف طالعته بقهر .. وش بيطلعها اللحين من ابوها : ..................
ابو نايف رفع صوته : ميهاف !
ميهاف : قلت لك يبه مافيه شي .. ايش عرفني اسال نايف مو هو اللي يقول
ابو نايف : ماشي ماشي بسأل نايف ... "التفت لنايف بحدة " نايف !
نايف : هاه .. لا ترا ماوراي سالفة شفت بدر معصب قلت اكيد هي مزعلته
ام نايف طالعت ميهاف اللي نزلت راسها تهرب من نظرات ابوها : ....................
نايف : شفيكم انتو ! كملو كملو سوالفكم وتخطيطكم ايه تقولون العزيمة من بتعزمون ..؟
ابو نايف طالع بميهاف لفترة ثم وقف : انا رايح للشركة .. لؤي الحقني
لؤي تنهد : ان شاء الله
اول ماطلع طالعت ميهاف نايف وقالت بعصبية : خير ان شاء الله ! مبسوط حطيتني بهالموقف مع ابوي
ام نايف : شالسالفة ! وش مغبره ياميهاف .؟
ميهاف وقفت صاعده لفوق : ولا شي ! خلي نايف يقولك السالفة واضح انه فاهم اكثر مني
ام نايف طالعت نايف اللي جالس يغسل تمرة وياكلها : شنو تطالعيني .؟ مالي دخل اذا كل واحد زعل من نفسه
ام نايف : هذا وانت تو راجع ماخليت العائلة تجتمع ع القهوة هججتهم كلهم !
نايف مسك يدها : وحنا وش نبي بهم ..؟ انا وانتي مانكفي
ام نايف طالعته بنص عين : تعال قولي .. شخبارك مع ابتسام ؟
نايف : وش هالسؤال .؟
ام نايف : اخاف مو عاجبتك بعد !
نايف : انا قلت شي ! مو كأنك ودك تتهاوشين معي دون داعي .؟
ام نايف تنهدت : والله مو اتهاوش ولا شي .. بس مابي اللي صار مع نهى يتكرر
نايف حاس بفمه : تبين الصدق يعني والله نهى كان فلاوية اكثر .. انا مدري وش لقفني وطلقتها والله كان طيبة المخلوقة
ام نايف : تو تفزع تتحسف ! هاه وليش طلقتها اجل ؟
نايف : ههههههههههههه تصدقين نسيت ! بجد انا ليش طلقتها مافيها سبب يخليني اطلقها !
ام نايف مسكت راسها : حسبي الله بس .. انت صاحي انت .؟
نايف : استني يمه والله جالس احاول اتذكر !
ام نايف : خل مني نهى راحت خلاص .. انتبه هالمرة واثقل كلمتك لاتنطق الا بعد ماتفكر والله والله يانايف لو تطلقها ماني امك ولا اعرفك
نايف : لا تخافين حتى لو مو عاجبتني ماراح اطلقها .. ماني ناقص ترمين بحلقي حرمة ثانية بعد
ام نايف : بارك الله فيك
نايف : يله انا طالع اللحين مواعد العيال
ام نايف : لاتنسى ترا العزيمة بكرة .. وعط ابتسام خبر
نايف : كلميها انتي اخاف انسى
ام نايف حست برضا انه فهم فكرة ان الطلاق مو حل .. خلاص تقدر ترتاح من همه اخيرا .؟
***
بيت أبـو فراس /
دخل فراس البيت وضم امه وباس راسها : ليش الدموع اللحيـن .؟ خلاص هذا انا جيت
ام فراس : مو بيدي ياحبيبي .. الله لايحرمني هالطلة
فراس ابتسم : ولا منك يارب
سلم على أنس وياسمين .. طالع ام فراس : فين اسماء وبدر .؟
ام فراس : اسماء داخل موجودة .. وبدر ما أدري طالع كالعادة
فراس وهو يدخل : اها
ام فراس بقلب ام : ياليتك تجلس هنا على طول
فراس : خلاص يمه هالحكي يضايقني ويضايقك .. انا موجود اللحين وهذا المهم !
نزلت اسماء من فوق وابتسمت : فرااااس .. هلا والله بالشيخ
فراس رفع حاجبه : لا .؟ كان جلستي وراك
اسماء : شاسوي كلمتني ميهاف وانشغلت ولا كنت انتظرك معهم
سلم فراس عليها وجلس على الأريكة .. ام فراس طالعت اسماء : اسماء دقي على بدر شوفي وينه
فراس : لا لا لاتدق عليه ولا شي .. " طالع اسماء " اسوم خلصتي الصيفي .؟
اسماء : ايه خلصت
فراس : متى حابه سفريتك أجل .؟
اسماء : سفريتي !
فراس : مو انتي تبين تسافرين .. خلاص قرري متى ووين واعتبريه صار
اسماء وقفت بحماس : صدق ..؟؟ صدق !! صدققق !!
فراس : أيـه مو انا وعدتك اخر مرة
اسماء : ايه ع بالي نسيت
ام فراس : اختاري مكان صاحي عاد
اسماء : ااااااااا قلبي بيوقف خلاص ... وين وين اللابتوب اسوي بحوث وافكر فين اروح !!
راحت طيران لفوق تسوي بحوثها .. ام فراس التفتت لفراس : ليش عطيتها وجه كذا .؟ بتوديك اللحين لآخر الدنيا
فراس وقف : انا صاعد ابدل .. العشاء لا يتأخر واللي يعافيكم
ام فراس : ان شاء الله

***
بيت نـايف – الساعة 2 ونص /
كانت رنيم بسريرها وغادة تهزه وراسها مصدع : يالله يا ابتسام خلاص مابي يعني مابي !
ابتسام : مو بكيفك .. هي عزمتني وعزمتك وبتروحين يعني بتروحين
غادة : اففففففف .. ورنيم مقدر اتركها
ابتسام : لا تتركيها تروح معنا
غادة : يالله يا ابتسام بنتي تعبانه يعني صعبة والله اوديها هناك وحوسة
ابتسام : لا حوسة ولا شي ومافيه نقاش
غادة تنهدت بضيق : زين ..
ابتسام : تصدقين فيه فستان يجنن لرنيم متحمسة اشوفها فيه .. خليها تلبسه بكرة
غادة رفعت حاجبها وهي تطالع ابتسام : اقول خلي منك لبس رنيم .. ترا زوجك موجود والساعة 2 مو كأنه مفروض تبدلي هاللبس اللي انكبت عليه الصلصة
ابتسام : ماراح يجي الا صبح عارفته
غادة : ايه وانتي ايش خسرانة قومي تزبطي لحد ما يجي
ابتسام : مالي خلقه .. واساسا بروح انام بكرة وراي دوام
غادة شهقت : بتروحين !
ابتسام : ايه يكفي اليوم طلعت
غادة شوي وتبكي : وبتتركيني لحالي .. وزوجك !!
ابتسام : اساسا بيرجع بينام .. وانتي سكري عليك الباب وماحيصير شي
غادة بقهر : سوي له قهوة قبل تروحين الدوام .. لايمون علي ويوصيني مرة ثانية
ابتسام وهي طالعة : هههههههههههه اوك
طلعت ابتسام وغادة سكرت الأنوار ونامت وهي تتأمل المخلوق الملائكي جمبها
***
بسيارة نايف : ترا سويت لك مشكلة مع الوالد
بدر بضجر وهو سادح الكرسي ومسترخي : وش مشكلته .؟
نايف : قلت قدامه انك متهاوش مع ميهاف
بدر فتح عيونه : نعععععم !
نايف دون اهتمام : ايه يعني اذا قالك شي كذا ولا كذا هذا انا عطيتك خبر
بدر : وانت على أي اساس حطيتني متهاوش مع ميهاف ؟!
نايف هز كتوفه : كذا حسيت
بدر : يلعن ابو احساسك البايخ ياشيخ !! والله لو يكلمني لأحطها فوق راسك
نايف : هههههههههه يفداك راسي حط كل مشاكلك فيه
بدر : ايه .. وعلى أي اساس حسيت هالاحساس .؟
نايف : مايبي لها انت اخلاقك قافلة وميهاف اخلاقها قافلة .. متهاوشين
بدر بهمس : اها اخلاقها قافلة , لها وجه كمان
نايف برواقة : تصدق يابدر شفت لك بالمالديف سمكة غير شكل .. اكبر سمكة اصيدها بحياتي
بدر : اقول انت شخبار الزواج معك ..؟ توقعتك تكون مقفلة معك بس كأن امورك تمام
نايف : وليش تقفل معاي .؟ بصراحة يعني ابتسام هذي اعجبتني متفهمة جدا ... من وصلت ماجلست معها الا دقيقتين قبل اطلع من البيت ! وحتى اتصال ما أتصلت مو نهى اول مايمدي اوصل الباب تدق فينك !
بدر عقد حواجبه : غريب انت .. يعني بالله مبسوط ان زوجتك مطنشتك ومو مهتمة فيك
نايف : وانا ايش بستفيد من اهتمامها ..؟ خلها بحالها احسن خصوصا انها يعني افكارها معقدة شوي
بدر كشر : اتخيل اتزوج ثم ما تسأل عني بعد .. اسوي لها سالفة ماصارت
نايف : حبيبي انا عندي قاعدة .. تثيرين اهتمامي اجلس معاك تطفشيني الله يستر عليك .. بس اذا ماتقدر تثير اهتمامي تصير ذكية وتخليني براحتي
بدر : ايه بس حتى اذا كانت تاركتك اللحين ترا مصيرها البنت تحس .. وتبي رايي تطنشيك هذا عيب وبينقلب عليك بعدين
نايف وقف قدام بيت ابو فراس : تفضل وصلنا
بدر نزل : يله شكرا على التوصيلة
دخل بدر البيت حصل كلش هدوء البيت سكون مرة على غير العادة .. بالعادة هالحزة لسى سهر غريبة شعندهم , صعد لغرفته وقبل ينام مسك جواله ماحصل منها أي مسج او اتصال مر شهر للحين وماصار بينهم غير مكالمة فاشلة لتصحيح الأمور غير انها زادت الطين بله وبس , فتح حساباتها بمواقع التواصل الإجتماعي مافيه شي مهم غير لفت انتباهه تغريدة غردتها قبل ساعة بالتويتر :
" في تعاسة النساء .. فتش دائما عن الرجال ! "
كشر بقهر لها وجه تشوف حالها مسكينة .. سكر الجوال وهو يفكر وتفكيره امرضه بنظره مافيه شي يسوى كل هالزعل صدق البنات حساسات بشكل مريض ..؟ يعني ايش صار بالله فتحت نقاش مريض وزعلت من حالها تنهد هذا حاله هالشهر كل يوم يفكر مليون مرة وش صار وكيف صار وليش صار ويوصل لنفس النتيجة " هو ماغلط "
***
صحت ابتسام على المنبه وسكرته .. طالعت مكانه بالسرير مارجع للحين ..تذكرت كلام غادة امس وابتسمت بسخرية : قال ايش قال اكشخي !
بدلت لبسها وتجهزت وجلست على التسريحة تزبط مكياجها وشعرها .. انفتح باب الغرفة بهاللحظة رمته بنظره بطرف عينها ورجعت تطالع التسريحة .. نايف : صاحية .؟
ابتسام وهي ترسم كحلها : شو شايف انت .؟
نايف وهي ينزع بلوزته ويرميها : صاحية , الظاهر نظامنا معاكس حنا
وقفت ابتسام ورتبت مكياجها بشنطتها واخذت عبايتها وبطريقها لبرا : الظاهر
نزلت لتحت حست بقهر .. حتى ما سألها لوين .؟ عادي يعني مايهمه ! وش تتوقع منه وهو كان راح يتركها تروح مع رجال تتمشى بالمالديف لحالهم .. تنهدت بيأس فعلا شخصية ميؤوس منها ونزلت وبطريقها مرت غرفة غادة كانت نايمة سكرت الباب بهدوء وطلعت لدوامها .. حمدت ربها على هالدوام ولا كان ماتت حرة مع هالمتبلد
***
بيت أبو نايف /
كان لؤي صاحي بدري وبسيارته والسماعات باذنه .. : لا للحين ماقلت له
سارا تنهدت : ليش للحين لك من امس معاه .؟
لؤي بضيق : ما أدري ماتضبط الفرصة .. عموما الليلة ان شاء الله بكلمه وبرجع بكرة
سارا بضيق : اوكـ .. ايش قاعد تسوي .؟
لؤي : موصيني ابوي لكم شغلة رايح اخلصها
سارا : ههههههههههه الظاهر انت نظام الذرب المطيع ببيتكم
لؤي : عندك شك اني ذرب يعـني .؟
سارا : ههههههههههه لا .. بس كل مرة اكلمك تكون توصل امك موصيتك ميهاف .. موصيك ابوك موصيتك عمتك
لؤي : هههههههههههه لأن كل العائلة عارفة اني الوحيد اللي ماراح اردهم
سارا : مو قلت لي عمتـك عندها ولد .؟ اخر مرة كنت توصلها كمان
لؤي : عبد المجيد .؟ مسكينة تدق عليه مايرد رحمتها ففوصلتها
سارا تنهدت : فديت الذرابة انا
لؤي برومانسية : ماتفدي انتي تنفدي
سارا وردت خدودها بنعومة صوته الحالم يلمس قلبها مباشرة : اوك حياتي انتبه للطريق .. انا حسكر
لؤي فهم انها استحت : هههههههههه اوك حسكر , بالتوفيق باجتماعك اليوم
سارا : باي
سكر لؤي وتنهد بضيق .. امس كله يحاول يكلم ابوه بالموضوع ماتضبط معه يدخل عليهم احد او ينشغل او ... ظروف عديدة تمنعه ! لازم يقوله بأقرب فرصة ..رغم انه اليوم جمعة كبيرة لنايف بالكاد بيلقى وقت ..مسك جواله ودق على فراس بس مافيه رد .. اتصل مرة ثانية لكن مافيه رد تنهد اكيد نايم ! اذا رجع الرياض صار خيشة نوم
***
عند خيشة النوم .. انطق باب غرفته فتح عيونه ببطء وطالع الساعة 3 عصر : فراس يمة قوم .. الغداء جاهز
فراس بكسل : صاحي .. صاحي
جلس بكسل وسحب جواله وهو يفرك عيونه .. 45 اتصال من عدة اشخاص تنهد ورمى بجواله وقام يتوضى ويصلي ويبدل .. لبس ثوبه ورتب شعره الفحمي الكثيف ونزل ... ام فراس : كل هذا نوم
اسماء وهي جالسة على الكنبة وبيدها مجلة : من يومه خيشة نوم
فراس : يازينك ساكته بس .. فين بدر . ؟
اسماء : لما عرف انك بالبيت هج .. هههههههههههههه امزح امزح
فراس : اوكيه يالفله انتي .. فينه عاد .؟
اسماء : مدري .. يمه وين بدر .؟
ام فراس : ما أدري والله
فراس وهو يجلس : اسماء قومي شوفيه بغرفته قولي له ينزل
اسماء : ياسمين قومي شوفي بدر
فراس : ياسمين انثبري مكانك .. اعتقد اني قلت اسماء مو ياسمين !
اسماء تاففت : لازم انا يعني ! اصغر القوم خادمهم
وصعدت لفوق بقهر ..ام فراس حطت الغداء : سويت لك تبولة اعرفك تحبها
فراس وهو يرفع كممته : الله يايم .. وش هالريحة
ام فراس : فيه العافية
فراس : تغديتو انتوا .؟
ام فراس : ايه تغدينا كلنا من زمان .. صحيناك بغيناك معنا بس شكلك كنت تعبان
نزلت اسماء : مو بغرفته
فراس فتح جواله ودق عليه : هلا فراس
فراس : فينك .؟
بدر : فيني .؟ مع عبد المجيد
فراس : حضر بالبيت قبل عزيمة عمي
بدر : انت بالرياض اجل .؟
فراس : صح النوم تو تعرف اني بالرياض !
بدر : والله محد قالي .. حمد الله ع السلامة
فراس : مثل ماقلت لك قبل العزيمة تكون هنا
سكر السماعة وطالع امه : متى بتروحون اليوم .؟
اسماء : اول الناس !
فراس : اول الناس متى زين .؟
ام فراس : الساعة 9 كذا ان شاء الله
اسماء : هاه يمه حنا كمان لازم نعزمهم .. متى تهقين .؟
ام فراس : مافيه داعي خلاص عزيمة اليوم تكفي
اسماء باصرار : لا لا .. لازم نعزمهم !
ام فراس : اعزميهم انتي عزيمة بنات بس انبسطوا
اسماء : تصدقين فكرة ! صح صح احسن كذا .. اقول فراس يقولوا ماليزيا حلوة
فراس : فيه احلى
اسماء تنهدت : انا ما اعرف طيب انت وش بنظرك مكان حلو حلو مرة نروح له
فراس بتفكير : هممممم كيب تاون .. تايلند
اسماء : خلاص اجل قرر انت انا تعبت عقلي ماجاب شي
فراس : متأكدة .؟ مو اختار حاجة ثم تقولي ما أعجبني !
اسماء : اهم شي انبسط واسوي كل اللي براسي
فراس وهو عارف اللي في راسها : كل اللي براسك .. بس بعقل هاه
اسماء بثقة : طبعا !
فراس وقف : اكرمك الله يمه .. انا طالع فين انس .؟
ام فراس : تو من شوي طلع للجيران ليش
فراس : باخذه معاي .. مو عاجبيني هالجيران اللي جالسلي معاهم 24 ساعة
طلع فراس .. واسماء قامت بحماس : انا لازم البس من اللحين متحمسة !!
ام فراس : يا جعله يخلف الساعة توها 5
اسماء : ماتعرفيني يعني يمه .. اجلس سنة البس
ام فراس : اجل عجلي علينا .. فراس اللي بيودينا مو بدر تجلسين تمططين عليه وينتظرك
اسماء وهي تتذكر لما تأخرت عليه مرة ومشى وتركها ولا راحت للعزيمة ذاك اليوم : لا لا ما حتأخر مجرم هذا يسحب علي
بيت نايف /
رجعت ابتسام للبيت الساعة 6 مغرب .. كان البيت هادي دخلت عند غادة كانت صاحية بالحمام تروش بنتها : ياحياتي اللي يتنظفون
غادة طالعتها بلوم : بدري تجين ! فينك تأخرتي اليوم
ابتسام تنهدت : ادري انشغلت .. كمان فيه العزيمة احس طاقتي كلها منتهيه ابي انام
غادة : روحي بس غيري اخلصي
ابتسام : يله صاعده بشوف نايف اذا مو هنا تصعدين تساعديني
غادة : لا حبيبتي مو فاضية لك .. وراي رنيم ووراي نفسي و ...
صعدت ابتسام لفوق .. ماكان موجود تنهدت ودقت عليه جاها الرد بعد فترة : ايوه
ابتسام اول مرة تدق عليه ويرد فضلت ما تسأل وينه دامه مايسأل عنها : متى راح تروح لأهلك .؟
نايف : الساعة 9 .. راح ارجع البيت البس ونروح سوا
ابتسام : اها .. اوك
سكرت السماعة وحست الوقت لسى بدري فحبت تدلع نفسها بحمام يسوى يروقها للعزيمة .. ماحست بالوقت بالحمام طالعت الساعة كانت 8 .. شهقت وقامت بسرعة شكلها غفت بالبانيو لبست على السريع فستان وردي محشي بخرز من الصدر سيور وطايح بقماش حريري ناعم مع روج وردي .. ومكياج ناعم طالعه اكثر نقاء ونعومة .. وشعرها الأسود جعدته ونفشته بشكل كثيف وتركته مفتوح على وجهها .. فستانها الطويل للكعب مع صندل ذهبي بكريستالات ذهبية فخمه ... رشت عطرها جيفنشي بريحة الجوري وشنطتها الكلتش الذهبية نزلت لتحت دخلت عند غادة كانت رنيم لابسة فستان ناعم اورنجي على الوردي وربطة شعر ناعمه كانت قمة باللطافة وغادة جالسة تحط اللمسات الأخيرة على فستانها الموفي برسومات سوداء لتحت الركبه شعرها تاركته مفتوح كيرلي .. مع روج أحمر ومكياج كامل ثقيل ومناكير سوداء طالعت ابتسام بقهر : ليش مالبستي طقم .؟
ابتسام : ما أدري ماحسيته بيناسب
غادة : إلا بيناسب ! اصلن شكلك بايخ اول طلعة لك كعروسة ماعليك طقم
ابتسام : تهقين .؟
غادة : ايه .. بسرعة روحي البسي ويله أنا جاهزه خل نروح
ابتسام : انتظري نايف يجي بيودينا هو
غادة بضيق : ليش مايودينا السواق .؟
ابتسام : غادة شفيك نايف مو بع ترا
غادة : مو حابة اجي بينكم .. خلاص ابتسام بيوديني هيثم
ابتسام ماحبت تضايقها فتركتها على راحتها وطلعت لغرفتها تختار لها طقم .. شهقت وهي تشوفه مكمل كشخته وثوبه وغترته : يمه متى جيت ؟
نايف وهو يرش عطره : اللحين .. يله جاهزة .؟
ابتسام توجهت لخزانتها : ايه استنى اختار لي طقم
وقف نايف جمبها وهو يتمعن بالطقوم وأشر على طقم ذهبي بسلسلة طويلة وحلق رايق : هذا
ابتسام سحبته : بجد حلو .؟
سحبه نايف من يدها وابتسم : تسمحين لي .؟
ابتسام مافهمت .. لحد ماوقف وراها ويلبسها اياه .. رفعت شعرها منه وقالت بهدوء : شرايـك.. بشكلي.؟
نايف مسكها من كتوفها بعد ماخلص ولفها لجهته : تجنني .. بس .. ولا اقولك خلاص
ابتسام عقدت حواجبها : بس شنو .؟
نايف وهو يحط مفاتيحه بجيبة : خلاص يله نمشي
ابتسام : وين وين تعال ! بس شنو .؟
نايف : هههههههههههههه بتعلقين عليها يعني .. بس فيه احلى .. انبسطتي .؟
ابتسام بقهر : شعرفك بالذوق انت
نايف : معك حق شعرفني .. يله نمشي
سحبت ابتسام عبايتها ونزلت .. نايف : اختك بتضل بالبيت اجل .؟
ابتسام : لا بس بتجي مع هيثم او السواق
نايف : وش له داعي حنا رايحين رايحين تروح معنا
ابتسام : عيت شاسوي لها يعني ..؟
نايف طالع باب غرفة غادة : بتروحي تقنعيها ولا أروح انا .؟
ابتسام : لا لاتروح آخر مرة زعلت لما كلمتها .. خلها براحتها تجي مع هيثم
توجه نايف ناحية غرفتها وطق الباب .. غادة توترت خصوصا وهي تسمع كلامهم : مـ .. من .؟
ابتسام : نايف انجنيت ! اتركها
نايف اشر لها تسكت : اقول غادة ترا ماني بع .. عادي يعني تركبين معي
غادة بشراسة : لا شكرا ! هيثم بيجي
نايف : طيب انا ناوي اقفل الباب .. شلون بتطلعين
غادة " شيحس به هذا .. غصب يعني " : يخي مو غصب مابي اركب .. ابتسام ووجع وينك !
ابتسام : موجودة .. افتكي منه واركبي معنا
غادة : لا ومليون لا .. وانت هيه قفل الباب والدرايش بعد احسن مابي اروح اصلن
نايف انفجر : هههههههههههههههههههههههههههههههههههه اقول ابتسام متأكدة هذي اختك .؟
ابتسام بقهر : نايف خلاص وربي مصخت اتركها !
نايف : لا وين بقفل الباب ترا
غادة بقهر : والدرايش بعد لاتنسى ..
نايف : ولا يهمك بقفلها
ابتسام : نايف ! من جدك انت .؟
نايف : ايه من جدي مشينا بس نطلع ..تروح معي ولا ماتروح
غادة انقهرت نفسها تروح بجد بس مستحيل تتراجع .. : ابتسام ! ادخلي بكلمك
نايف مسك يد ابتسام : مافيه .. بتكلمينها كلميها هنا ولا اقعدي وراك
غادة بنبرة طفولية : اختي ولا اختك !
نايف بنفس النبرة : زوجتي ولا زوجتك
غادة بعناد : زوجتي !
نايف طالع ابتسام وهو مبتسم : افا يا ابتسام من وراي .؟
ابتسام انفجرت : خير ان شاء الله انتو ! بزارين قسم بالله ... " كملت بنبرة حادة " غادة البسي عبايتك قدامي !
غادة : مابي مابي مابي !
ابتسام بنبرة تهديدية : غاااااااااااااااادة !
غادة : اف زين
ابتسام : يله ننتظرك برا
نايف طالع ابتسام : والله عندك شخصية
ابتسام : وانت كمان لا عاد تناقرها كذا بتزعل بجد
نايف وهو طالع : هههههههههههههههههههههههه ياحليلها هي وزعلها
ابتسام انقبض قلبها " ياحليلها هي وزعلها " عبست بغيرة وركبت السيارة دون تقول شي .. ماتغار بس مهما كان هو زوجها وطريقته كذا تزعل ..بعد فترة طلعت غادة وبيدها رنيم .. نايف رفع حواجبه : من هاللي معها .؟
ابتسام طالعته بنص عين : تستهبل .. مو انا قايله لك برجع اختي والده !
نايف فتح عيونه : اختك هذي ! ع بالي ثانية
ركبت غادة وسكرت الباب بأقوى ماعندها .. نايف قال ينرفزها : ماوراك سالفة كان سكرتيه اقوى
غادة سكتت دون ترد عليه .. اما نايف كان متروق على فوران اعصابها : ما شاء الله .. من هذي بنته .؟
ابتسام طالعته بنص عين تو قالت له.. فهمت انه يبي ينرفزها : نايف !
نايف : شفيك ابتسام .. اسأل !
غادة عيونها على الطريق وناوية تسفهه لآخر الطريق ولو ان صبرها ينفذ ..
نايف : غـادة
غادة فتحت عيونها شعنده هذا يناديها كذا ! .. وابتسام حست بقهر صدق عيني عينك كذا ..
نايف : صمخا اختك اجل .؟
غادة : ما أصمخ غيرك .. خل عيونك بالطريق اشغلتنا ترا
نايف ابتسم لانه نرفزها : شفيك شبيتي !
ابتسام هالمرة هي اللي قررت تسكت لآخر الطريق .. كمل نايف : بس بقولك مبروك البنت , وهديتك جاهزة
غادة : شكرا مابي منك شي ! .. ابتسام رجاء قولي له مايحاكيني
نايف : ههههههههههههههه ابتسام تكفين توسطي لي عند اختك تحاكيني
ابتسام بقهر : حيلكم بينكم ..
غادة : بالله بعد أنتي حيلكم بينكم ! " التفتت لنايف " مالت عليك جبت لأختي تبلد
نايف طالع جهة ابتسام اللي كانت تطالع الطريق .. قال بنعومة : ابتسام
ابتسام بهدوء : ايوه
نايف : شفيك ياقلبي ساكته .؟ فيك شي .؟
ابتسام : لا مافيني شي
نايف : والله فاهمك حياتي .. انا لو مكانك وهذي اختي كان من زمان انخرست
غادة " اللهم طولك ياروح .. يالله عجل بطلعتي من هالسيارة " : .......... ابتسام !
ابتسام : نعم بعد انتي !
غادة : شفيك معصبة .. انا اللي بعصب مو انتي !
نايف : هيه هيه انتي عطيتك وجه .. ماتصارخين على زوجتي بسيارتي سامعة .؟!
غادة : ليتك ماعطيتني وجه ياشيخ مالت عليك وعلى وجهك .. ولا ترفع صوتك علي ترا حتى انا عندي لسان
نايف : اتحداك اذا عندك لسان .. انتي عندك لسانين اذا مو اكثر بعد
ابتسام كانت تطالع بالطريق بطولة وهم يتهاوشون .. نايف يحب ينرفز أي شخص يتنرفز وغادة الشخص المثالي لهالشي تتنرفز على طول ! اول ماوصلوا فتحت الباب حتى قبل توقف السيارة ونزلت .. نزلت غادة وراها وقالت بقهر : اخخخر اخخر مرة تقولين لي اركبي معه .. سامعة .؟
ابتسام : والله انتي بعد عطيتيه وجه تستاهلين .. كان حقرتيه ماينفع معه الا كذا
غادة : مستوعبة انتي وش قاعد يقول !! يقققهر .. وانتي يابردك طول الطريق ساكته
ابتسام وهي تدخل : شتبغيني اقول يعني .؟
غادة : سلامتك خلك ساكته كذا وهو يرفع ضغطي
سكتت ابتسام وفصخت عبايتها وعدلت شكلها .. وهي تطالع قلادتها من فوران اعصابها كرهت الطقم لأنه اخياره نزعته وحطته بشنطتها طالعتها غادة : خير ليش !
ابتسام : كيفي مابي البسه !! افف
دخلت ابتسام وغادة تطالعها : شعندها فجأة قلبت ..
تنهدت وكملت تضبيط شكلها وشكل رنيم وبعدها دخلوا ..
بالمطبخ /
كانت ميهاف واقفة تحتري القهوة ومعها اسماء ..
اسماء : أيـــوه .؟
ميهاف بكئابة وهي تفضفض لاسماء بس ماقالت لها انها طلعت معه المطعم مجرد قالت هوشة على الجوال : وبس .. من عقبها كلمته مرة وكان الوضع اسوأ بعد
اسماء : وانا اقول ليش بدر على هالحال
ميهاف تنهدت : مو عارفة شاسوي بصراحة .. يعني تفكيره غلط من كل النواحي وفوق انه غلط معي بالكلام ما اعتذر حتى ولا حسيته نادم
اسماء باستهزاء : هههه .؟ تبين بدر يعتذر !! خذيها قاعدة بدر مستحيل يعتذر حتى لو عرف انه غلطان عشان كذا لاتحاولين
ميهاف وهي تحس اكتئبت اكثر : يعني المفروض اعتذر انا ! وانا ماقلت شي حتى
اسماء : مدري والله .. انا اشوفه هالشهر كله مو على بعضه وتو اعرف السالفة منك ..
ميهاف: مع نفسه بصراحة انا طفشت ومليت .. لسى بفترة خطوبة وللحين كم مرة يغلط معي بالكلام وكم مرة يخوني !
اسماء : طيب جربي تتكلمي معه بطبيعية .. يمكن ينسى المشكلة وتسلكون
ميهاف : هذا مو حل يا اسماء .. اخوك ماخذني انانية بس مايبي يتزوجني حتى
اسماء : لا ميهاف لاتبالغي هالحكي مو صحيح
ميهاف : إلا صح .. ولا تدافعي عنه رجاء ترا قافلة معاي منه
دخلت ام نايف : وش مجلسكن هنا ! زوجة اخوك جت يله
ميهاف : يله يمه .. ننتظر القهوة وبنجي
ام نايف : عجلن عاد
طلعت .. ميهاف اخذت لها صينية : يله اسوم قفلي السالفة خل نروح .. ابي انساه شوي
اسماء تنهدت بضيق على حال ميهاف : مشينا
ابتسمت اسماء وهي تشوف ابتسام وغادة " مسكينة ميهاف بلشت بهالغبي بدر .. متأكدة هيثم مستحيل يكون كذا " حطت القهوة وسلمت بحرارة عليهن قالت بلهفة : هذي بنتــــك .؟ ياعمري تجننن
غادة : ايه .. تجنن وبس حاسه حالي بموت من كثر ماهي تجنن
ميهاف : اخر مرة كنا عند ابتسام ماكانت موجودة .. ياحياتي الصغيرين
اسماء بلهفة : من تشبه .؟
غادة بتفكير : مدري ما أحسها تشبه احد
ميهاف : ماتشبه ابوها .؟
غادة ضاق خاطرها على الطاري .. فين ابوها ابتسمت بمجاملة : يمكن شوي بس
اسماء الكلمة على لسانها " ماتشبه خالها " حاولت تقولها بطبيعية : طيب ماتشبه احد من اهلكم امك ابوك او اخوكم
غادة : ههههههههههه لا والله .. يمكن بس هالعيون الرمادية نفس عيون هيثم اخوي
اسماء " يالبى .. والله تخسى بنتك وعيونها مايجيبون عيونه " : اها .. ما شاء الله
سجى طمرت عندهم : الله غادة هذي بنتك .؟
غادة : هههههههههه ايوه رنومتي
وداد بلهفة : عادي اشيلها .؟
غادة بضيق : ايوه بس انتبهي
بمجلس الرجال الخارجي /
دخل نايف برواقة وسلم على الموجودين والكل يسلم عليه بحرارة اخذ مكانه جمب بدر
بدر : فينك تأخرت !
نايف : هههههههههههههه
بدر : حمد الله والشكر وش يضحكك .؟
نايف : هههههههه كيفي !
بدر هز راسه : الله يخلف بس
نايف وعيونه تمسح على الموجودين : هيثم ماجا .؟
بدر : لا .. ويقول لؤي اخوك انه ماراح يجي
نايف : اها .. بسلامته اجل .. ما شاء الله فراس هنا من متى .؟
بدر : مدري فجأة رجع
ابو عبدالرحمن " الجد " : هاه يا نايف شخبار العرس .؟
نايف : مبسوطين حمد الله .. عقبالك
ابو عبدالرحمن " الجد " : ههههههههههههههههه سامع ياعبد الرحمن .. على يدك اجل < عبد الرحمن ابو نايف
ابو عبد المجيد : سمعتو وش صار لأبو صالح .؟
ابو نايف : لا شصاير .؟
ابو عبد المجيد بضيق : ولده صالح تزوج وحدة قطرية .. ولا هي من أهل قطر الطيبين بعد لو تشوفها وطريقتها ولا شغلها مختلط وماتتغطى !
ابو نايف : افاا ! وهو ليش يزوج ولده وحده كذا .؟
ابو عبد المجيد : مسكين فقير ماخطبها له .. جاه ولده فجأة وهي معه وماله الا يرضى
ابو نايف : والله مايكون ولدي اللي مسويها .. الا ليطلقها غصب لوني اتبرا منه ! سواد وجه هذا
طالع فراس لؤي اللي كان بعيد منه .. بنظرة فهم لؤي قصده على طول , كان بلحظة احباط كأن ابوه رد على طلبه خلاص .. :.....................
تنهد فراس بضيق وهو يشوف لؤي ينزل راسه بهم وواضح انه انكسر ..
نايف : تتبرا منه مرة وحده يبه ! ماغلط الرجال ترا تزوجها .. احسن من اللي يلعبون بالحرام والمشكلة ان نظرة المجتمع لهاللي يلعب من ورا بالحرام انه محترم واللي يتزوجها وشغله حلال هذا سواد وجه .؟
طالع لؤي ابوه بعد كلام نايف اللي كأنه تكلم عنه .. لكن رد ابوه كان محبط اكثر : هاللي يلعب من ورا بالحرام مجرد نزوة وبيهديه ربي بس هاللي يتزوجها ماخذها جد وهي لاعبه على عقله !
نايف : خلاص تمام الله يرزقك واحد يلعب من ورا لورا .. اهم شي مايتزوجها !
ابو نايف بحدة : نايف ! كأنك زودتها خلك برا هالنقاش انت واراءك اللي زي وجهك
نايف بهمس : هذا انتو يالشيبان لا نحشرتوا
بدر : وأنت ليش تعور راسك بهالنقاش .. عندك وحده ناوي تتزوجها اجل ؟
نايف : لا بس هالتخلف يرفع ضغطي !
وقف لؤي وطلع برا المجلس .. قاطعه ابو نايف : لؤي .. وين يا أبوك .؟
لؤي بهدوء : شوي وراجع
طلع برا قصرهم بالكامل .. وقف عند البوابة وجلس القرفصاء وسند راسه على يدينه بضيق شلون المفروض يتكلم مع ابوه بعد ماوضح رايه بصرامة !
: اتوقع وصلك رد ابوك لطلبك ... ايش راح تسوي ..؟
التفت لؤي لفراس اللي كان واقف جمبه .... لؤي بهم :ليش تهتم .. اساسا وجهة نظر ابوي زي وجهة نظرك ! نفس الكلمة اكيد لاعبه عليه
فراس سند ظهره على الجدار وطلع سيجارته وولاعته يشبها : لا تدخل اهتمامي بوجهة نظري .. وجهة نظري وضحتها لك من اول .. اللحين جاي اسألك ايش راح تسوي .؟
لؤي بضيق : ما أدري .. بيكون غباء مني لو اصارحه عقب كلامه اللحين .؟
فراس : كويس للحين فيك عقل تعرف ان هالتصرف غباء ..
لؤي شد على راسه بقوة بيده ويحس تفكيره وقف .. كان متجهز يكلم ابوه ويقنعه بقوة لكن احبط وبقوة .. بعد صمت لفترة قال بهم : لو كنت مكاني .. ايش راح تسوي .؟
فراس وقف عقله للحظه عند هالسؤال .. " لو كنت مكاني " ماقدر يحط نفسه مكان لؤي بأي طريقة : .........
التفت له لؤي .. تنهد فراس : شالفايدة افكر بوضع مستحيل يصير لي ..
لؤي ابتسم بضيقة : انا ماتوقعت يصير لي .. ماتدري ممكن يصير لك دون تحس
فراس بقناعه داخلية : احساسي دايم واعي .. عشان كذا مستحيل يصير لي دون احس زي ماتقول
لؤي وهو مقتنع بهالشي ان فراس مستحيل بجد يكون مكانه : معك حق ...
فراس اعتدل بوقفته وبطريقه لداخل : اتركها عشيقة وبس احسن لك واحسن لها
تنهد لؤي بضيق .. وفراس رجع يدخل يقدر يساعد لؤي بكل شي , لكن هالتجربة مايقدر يساعده فيها حتى لو تمنى مايقدر يعاند قناعته ويساعده اول مارجع جلس جمبه ابو نايف : فراس
فراس : هلا عم
ابو نايف : ابي اكلمك بموضوع
فراس : هلا سم
***
اسماء اللي كان جالسة مع غادة وبنتها طول الجلسة : اقول غادة .. ترا الأسبوع الجاي عازمتك انتي وابتسام
غادة : عزيمة .؟
اسماء : مو كبيرة .. ماراح اعزم الحريم جمعة بنات بس يعني
غادة : حشوف ابتسام
اسماء باصرار : لا مافيه حشوف ! تجون يعني تجون
غادة : ههههههههه وش هالاصرار خلاص من عيوني راح نجي ... معليش اسماء انتبهي لرنيم شوي وراجعه
اسماء : ان شاء الله
اول ماراحت ظلت اسماء تطالع رنيم : افتحي عيونك ياحلوة اشوف
بينما رنيم كان نايمة المسكينة ... كشرت اسماء : مالت عليك كأنك خالك بخيلين حتى بنظرة
ميهاف : ههههههههههه سلامات اسماء شتغافصين مع نفسك .؟
اسماء : ههههههه لا بس اسولف مع الصغنونة هذي
ميهاف وهي تتأملها : ما شاء الله .. الله يرزقنا يختي
طالعت اسماء ميهاف وهي زعلانة عليها بجد .. ميهاف غير عنها ميهاف تتمنى الاستقرار تتمنى تتزوج ويكون عندها بيت وعيال , وبدر موقف بطريقها اسماء : ميهاف شرايك انام عندك اليوم .؟
ميهاف : براحتك .. تبغي تنامي نامي
اسماء : ايه ابغى وبنام .. زمان ما امسيت عندكم
ميهاف ابتسمت : حياك اجل بتنوري
اسماء : هههههههههههههه خلينا نسهر بس نحش ببدر ونسوي له سحر ولا شي يرجعه لعقله
ميهاف بقهر : مو ليكون عنده عقل بالأول .؟
اسماء : خلاص ديري بالك ع رنيم لحد ماترجع امها انا بروح اقنع امي
ميهاف : اوك
راحت اسماء لامها : يمه !
ام فراس : هلا
اسماء : ترا بنام اليوم عند ميهاف
ام فراس : لا مو حلوة ! وبعدين لؤي بالبيت وعقب اللي صار بينكم حتى عمك بيتضايق
اسماء : الله يرحمك برحمته يمه اولا ماصار شي بيني وبينه ثانيا سالفة غبر عليها الزمن واكلها .. بنام يعني بنام
ام فراس : كيفك تفاهمي مع فراس
اسماء ابتسمت : وانا ليش اقولك .؟ لاني مقدر اتفاهم مع فراس انتي تقدري
ام فراس : والله يا اسماء مو عاجبني انك تنامي عندهم
اسماء بحمق : يمممممه !! بتسدينها بوجهي يعني .؟
ام فراس تنهدت : خلاص خلاص نامي .. حنه ماتوقف
اسماء باست خد امها بقوة : تسلمييييييين لي شكرا شكرا .. وبرجع بكرة وعد
بعد العشاء وعلى آخر العزيمة .. ومابقى موجود الا عدد معدود , دخل لؤي البيت وتنحنح عند الباب قابلته ام نايف : خلصو الرجاجيل .؟
لؤي : ايه خلصوا ..
أم نايف : شفيك مو على بعضك .؟
لؤي : بنام
ام نايف : خلاص مافيه احد بطريقك روح نام وارتاح
صعد لفوق ودخل غرفته ... فتح جواله حصل رسالة منها لها ساعتين /
أحبك بهدوء واشتاقك بضجيج وبين حبي وشوقي مازال القلب يخفق بك ..
كلمني وقت تكلم ابوك
انقبض قلبه اكثر من رسالتها .. جلس مسند ظهره على باب غرفته وماسك راسه والوضع عنده يحاول يحلل .. شالمفروض يسوي .. دق جواله طالع المتصل هي زاد ضغطه على راسه وسنده على على الباب مايقدر يرد عليها وش يقول لها .. تنهد بضيق ماعمره احبط كذا ..
في الطـابق التحتي /
دخل نايف وأبو نايف البيت .. ابو نايف صعد مباشرة لفوق اما نايف طالع أمه : عادي ادخل اسلم .؟
ام نايف بحدة : بنات عمتك وعمك هنا وش تدخل !
نايف بطفش : يا عالم بزران بدخل عادي
ام نايف بحدة : نايف اعقل !
نايف : دام كذا قولي لابتسام تطلع بس
ام نايف : الحريم جايات عشانها تقعد معهن
نايف : طيب تطلع شوي بكلمها وترجع
ام نايف تنهدت ودخلت المجلس : ابتسام نايف يبيك برا
ابتسام طلعت : هلا
نايف : انا طالع اذا تو ماخلصتي ارجعي مع السواق
ابتسام : طالع للبيت .؟
نايف : أيـه
ابتسام : يله اجل بلبس عبايتي وبجي
نايف : انتظرك هنا خلصي
دخلت ابتسام : يا جماعة حنا نستأذن .. غادة يله نايف برا
غادة : مابي !
ابتسام عضت ع شفتها بهمس بمعنى لاتفشليني : غادة وش هالحكي اخلصي ..
غادة قامت لعندها : ابتسام خل نرجع مع السواق .. بيجلس يغثني طول الطريق
ابتسام : مالك شر ... واخلصي بتركبين ولا اجلسي نامي هنا
غادة شهقت : من جدك !
ابتسام اللي كانت لبست عبايتها وخلصت .. شالت رنيم معها : يله انا طالعه
طلعت ابتسام ورنيم بيديها ابتسم نايف لما شافها وانحنى لها وباسها بخدها وهي رفعت يديها الصغيره تمسك ذقنه : ههههههههههههه ياحلوك
ابتسمت ابتسام لاشعوري وهي تشوفه .. تخيلته أبو تحس لايقه عليه رغم طيشه : تبي تشيلها .؟
نايف كان متعود اخذها بين يديه وهو يسوي وجيه طفولية يلعب معها : فين امها عاد .؟
ابتسام : بتجي خل نطلع بتلحقنا
طلعوا بالسيارة .. وكانت رنيم بحضنه : ما شاء الله تمشع القلب الله يخليها
ابتسام : آممين يارب .. ماتدري قد ايش احبها
نايف : ههههههههه تحبيها جيبي زيها
ابتسام طالعته بصمت .. اذا هو ماشال مسؤوليتها كيف بيشيل مسؤولية بزران , : بجد ؟
قبل يرد عليها دخلت غادة : .........
نايف : وعليكم السلام .. داخله على يهود انتي .؟
غادة شهقت : شتسوي بنتي بحضنك !
نايف وهو يبوس خدها اليمين ثم اليسار ينرفزها : جالسين نسولف .
ابتسام تنهدت رجعوا لنفس الأسطوانة .. نايف : ابتسام خذيها خل اسوق
مر الطريق بصمت ... نايف برواقة : ايه وراكم ساكتين .. حشو بالزيارة والموجودين ما أمانع ترا
ابتسام : مافيه احد نحش فيه الكل ما شاء الله
نايف بنعومة : هذا كلامك ياقلبي لأن قلبك ابيض وتشوفي الناس مثلك ... " تغيرت نبرته " بس صدقيني بعض الناس هنا بحلقهم حش لكل الموجودين
غادة : ايه .. ابتسام شفتي ام نايف هذي حرمة ما شاء الله عليها سنعه بس يقولون عندها ولد الله يستر عليه ولا يبلانا مريض مريض
نايف يسايرها : مين لؤي او نايف .؟ اللي اعرفه ان نايف ماعليه قصور
غادة بعدوانية : انا جالسة احش معك ولا احش مع ابتسام !
نايف : انا وابتسام واحد نرد عن بعض عادي
ابتسام : قسم بالله ان رنيم اعقل منكم .. خلاص وربي مصخت
نايف بسخرية : من جد مصخت ! لمتى يعنـي حاطه راسك براسي انتي .؟ ليش تكرهيني انتي ؟
ابتسام هزت راسها مافيه امل تسكت احسن لها ..
نايف : المهم انتي غادة .. اول مانوصل البيت ابي هدوء لاتزعجينا ترا من زمان مو جالسين مع بعض نبي وجودك زي عدمك لو سمحتي
غادة : ولا يهمك اصلن قريب طالعه من بيتك !
نايف : مو بيتي بيت اختك .. تموني البيت بيتك بس شوي هدوء مايضرك
غادة عضت ع شفتها بقوة وهي خلاص بتنفجر .. يعرف ينرفزها صدق , اما ابتسام كانت تطالع نايف طول ماهو يناقر غادة مبتسم .. مبسوط من جد نفضت افكارها شتحسي به يا ابتسام تغاري من اختك !
اول ماوصلوا نزلت غادة اول وحدة .. ودخلت غرفتها مباشرة وسكرت الباب بقوة .. نايف بتسلية :ههههههههههههه بشويش بشويش ع الباب
ابتسام مشت بطريقها لغرفة غادة ... نايف : ع وين .؟
ابتسام : بكلمها بحاجة
نايف ابتسم ابتسامته الجذابه : اوك انا صاعد لاتطولي
صعد نايف لفوق وهو ينادي : ماريا ... مارياا
عقد حواجبه .. صدق من لما رجع ماشافها هي وبيان فتح جواله ودق على ماريا جاه الرد : Hi
نايف : اهلين ماريا .. كيفـك .؟
ماريا : بخير ..and you sir ؟
نايف : حمد الله .. اقول ماريا انا لي يومين في بيتي فينك ما أشوفك ؟
ماريا بقهر : it's your wife
نايف : ابتسام .؟ شفيها ؟
ماريا : لما رجعت ..told us مانجي الا يومين باس
نايف رفع حواجبه : اهاا .." ابتسم ابتسامة جانبية " ومتى هاليومين .؟
ماريا : الإثنين والجمعة
طالع نايف التقويم اليوم اربعاء : اوك ماريا مو مشكلة نشوفك الجمعة اجل
ماريا : ok bye
نايف : say hi to byan for me
ماريا : I will
سكر نايف السماعة .. دخلت ابتسام الغرفة وعلقت عبايتها : ابتسام
التفتت له : هلا
نايف ببلاهه : فين ماريا وبيان ما أشوفهن .؟
عقدت ابتسام حواجبها ليش يسأل عنهن .. قالت ببرود وهي تفصخ جزمتها : انا حددت لهن يومين بالاسبوع بس يجن
نايف : ممكن اعرف ليه
ابتسام : يضايقني وجودهن على طول عندي .. وبعدين حنا محتاجين خصوصية ومافيه زود شغل احتاجهن فيه
نايف بسخرية : خصوصية .؟ انا شايفها خربانة خربانة
ابتسام فهمت انه يلمح لغادة : هذا غير .. غادة اختي وماتضايقني هن يضايقني
نايف : واذا قلت لك اختك تضايقني .؟ ضد خصوصيتي بصراحة
ابتسام باستهزاء : واضح لدرجة من شفتها وانت تضحك وتسولف معها
نايف : عموما حياتي سوي اللي يريحك .. انا جايبهن عشان يريحونك وانتي سوي اللي يريحك
ابتسام وقفت قدامه وهو جالس على طرف السرير وشبكت يدينها ورا رقبته : اجل كذا مابينا خلاف
نايف ابتسم : ابدا
***
بيت أبو فراس /
رجعت ام فراس مع بدر اثناء ماهم جالسين بالحديقة دخل فراس .. جلس ورمى شماغه على الكرسي : فين انس وياسمين واسماء .؟
ام فراس : اسماء نايمة عند عمها وانس وياسمين راحو ينامون
فراس : اهاا .." طالع بدر بطرف عينه " انت شمسوي .؟
بدر فتح عيونه : شنو شمسوي !
فراس بشك : متأكد مو مسوي شي .؟
بدر : لا .. عندك شي قوله !
فراس : عندي انك بتتزوج هالشهرين ولا اترك البنت تشوف نصيبها مع احسن منك
بدر : نعم نعم .؟!
فراس : تو رجعت من عمي .. الخطبة الطويلة هذي مضايقته مثل ماهي مضايقة الكل !
بدر : وليش مضايقتكم ان شاء الله .؟
فراس : وانت ليش مضايقك تتزوج يعني .؟ بتموت .؟ اذا مانت ناوي تتزوج ليش خطبت .؟
بدر : راح اتزوج بس مو اللحين ولا هالسنة
فراس : اجل سرح البنت وشوف لك وحده ثانية
ام فراس : وش يسرحها ! على جثتي
بدر : على جثتي قبلك .. ماراح اسرحها
فراس بحدة : بدر ! ترا مو اكبر مشاكلي انت وزواجك !! فمالي خلق كل يوم والثاني عمي مكلمني يشكيك بدر صور مع فلانة بدر مو ناوي يتزوج .. بدر ماخذنا لعبة ! الشغل لفوق راسي مو ناقصك انت بعد
بدر : انا متفاهم مع البنت يعني ليش تتدخلون ما أدري !
فراس : متفاهمين طل .. لو متفاهمين ماتكلم عمي اكيد شايف على بنته شي
ام فراس : وانت ليش ماتبي تتزوج .. مو انت اللي سويت لي سالفة الفترة ذيك عشان تتزوجها !
فراس : لأنه بزر وكلمته رخيصة .. وانا انا الغبي والغلطان اللي احسبك رجال ورايح اخطب لك
بدر بعصبية : ترا ماعدت مراهق تجلس كل يوم والثاني تهاوشني زي اول ! قيم كلامك معي ماني بزر قدامك
فراس : حسسني انك رجال عشان اقيم كلامي ! كل يوم والثاني رايح احل لك مشكلة وليتك تتعلم بعد معك حق مانت بزر انت اخس من البزر
ام فراس : خلاص عاد ! تتهاوشون قدامي كذا .؟
فراس وقف : انا اللي عندي قلته .. تزوجها ولا افسخ الخطبة وخلها تشوف نصيبها
دخل لداخل وبدر قال بعصبية : هذا عمي لازم يتدخل بكلش !
ام فراس : وانت وش ناقصك .؟ جالس كل يوم والثاني مكالمات معها كأنها زوجتك تزوجها وافتك
وقف بدر وصعد لفوق ودق مباشرة على ميهاف جاه ردها بعد فترة : ..... ايوه
بدر : ايش قايلة لأبوك انتي .؟
ميهاف : شنو .. ماقلت شي ..
بدر : اجل ممكن اعرف يا آنسة ليش جاي يحجر لي اتزوجك ولا انسحب
ميهاف عضت على شفتها لازم تقوي نفسها وتتكلم لمتى يعني : ايه .. هذا رآيي مو ناقصة اضيع عمري مع واحد مدري هو ماخذني جد ولا لعب .. اتركني اشوف نصيبي اذا ماتبي
بدر بحدة بين اسنانة : انتبهي لكلامك ميهاف ! وحطيها ببـالك مالك نصيب غيري ..
ميهاف : اجل الحق على نفسك قبل اطير من بين يديك
بدر : ماعندك مانع يعني .؟ عادي عندك تنخطبين لثاني وتتزوجية بعد كل اللي صار بينا !
ميهاف : ايش تبغى توصله بدر .؟! انتظرك اكثر من كذا مستحيل .. وليتني انتظر حاجة صاحية كمان .. انتظر واحد يغلط علي ومايحترمني وفوق كل ذاه مايعتذر
اسماء اللي كانت جمب ميهاف انحرجت .. خصوصا وميهاف عيونها تلمع دموع واضح متأزمة بجد ..
بدر : ................ " قال بهدوء " ماغلطت عشان اعتذر
ميهاف : اجل الله يوفق كل واحد بطريقه
سكرت ميهاف السماعة دون تسمع رده .. اسماء فتحت عيونها : من جدك .؟!
ميهاف بخنقة : ايش تبغيني اسوي اسماء وربي تعبت .. انتي ماتدرين ايش صار طول هالفترة ماعدت طايقة حالي
اسماء ضمتها : روقي روقي حبيبتي .. كلش بيتصلح ان شاء الله
ميهاف فضفضت عن خاطرها وبكت بحضن اسماء .. اللي بينها وبينه مو بس خطوبة , بطبيعتها الأنثوية حبته من قلبها ورسمت احلامها ومستقبلها معه وحبها له يمكن اللي صبرها على غلطات كثيرة له للحين .. اما اسماء تو تستوعب فعلا ان ميهاف تحبه كشرت بقهر " هين يابديران ! قلة ادب بعد اوريك خل ارجع بكرة بس "
***
لؤي مانام الليل كله .. اول ما أشرقت الشمس بدل لبسه بنطال أبيض وبلوزة رسمية جنز ونظارة محوفة بأحمر وجزمة توماس رمادية وكاب " اوبي " .. وشنطته حطها على كتفه ونزل قابله ابوه طالع يتوضى للصلاة : لؤي .؟!
لؤي باس راسه : صبحك الله بالخير يبه
ابو نايف : صباح النور .. وش هالشنطة على وين .؟
لؤي : بصلي الفجر وبمشي الكويت
ابو نايف : اها توصل بالسلامة
مشى لؤي بطريقة للباب قاطعه ابو نايف : اقول لؤي ..
لؤي : هلا يبه
ابو نايف : هاليومين كأن عندك سالفة تبي تقولها لي .. وكل مرة يقاطعك احد
لؤي طالع ابوه لوهلة .. وشد على قبضته وتشجع : خل نروح نصلي عقبها نجلس واقولك
ابو نايف : اجل انتظر هنا اتوضى واجيك
دخل ابو نايف .. اما لؤي تنهد وهو في داخله صراع " لازم اقوله .. حتى لو عارض راح اعرف اقنعه "
بعد الصلاة .. كانو بالسيارة ولؤي بيوصل أبوه للشركة : هاه قول وش عندك .؟
طالع لؤي ابوه .. وقرر يمهد : هذا أبو صالح .. ولده صالح صديقي
ابو نايف : بجد .؟
لؤي : ايه كنت اعرفه ايام الجامعة .. والله رجال طيب وآدمي
ابو نايف : واضح من سواته في أبوه المسكين
لؤي :ايه يبه بس الولد يحبها من جده
تنهد أبو نايف : يابوك عيال هالوقت ماوراهم سالفة لاتصدقهم .. يخاوون هالبنيات ثم تزيغ عيونهم ويتزوجونهن ثم يجونك يقولون حب .. وهم والله مايعرفون وش معنى الحب اصلن !
لؤي بضيق : اهااا
ابو نايف : هذا اللي كنت بتقول !
لؤي : لا يبه .. كان ابي منك طلب بس خلاص قدرت احصله من نفسي
ابو نايف : كفو عليك .. من كنت صغير وانت دايم تعتمد على نفسك نادر تطلب مني شي .. خلك كذا دايم اعتمد على نفسك واترك الناس يعتمدون عليك
لؤي : معك حق .. راح اعتمد على نفسي
نزل لؤي ابوه وضرب بيده على الدركسون بالاخير ماعرفت يقوله ابد ومشى بطريقة للمطار واخذ طيارته للكويت
كان لؤي يعرف الواقع .. ويفهمه ماكان يجهله لو قال لأبوه كلش وش كان راح يصير عشان كذا قرر يهرب من هالواقع قد مايقدر
***
صحت ابتسام من النوم بدري .. رغم انه مافيه دوام لكن اكتسبت هالعادة ابتسمت وهي تطالع نايف غاط بنومة مستحيل يصحى بهالوقت نزلت من السرير واخذت لها شاور تنعش نفسها وبدلت لبسها لشورت وبلوزه ليمونيه جففت شعرها بالحمام وتركته سايح بطبيعته الناعمة .. ولبست صندل ناعم ونزلت وهي تحس بانتعاش جهزت فطور للكل وحطته المايكرويف لحد يصحون .. دخلت غرفة غادة بهدوء كانت باردة والكل نايم ملل بجد اخذت فطورها وطلعت للحديقة اثناء ماهي تاكل سمعت صوت واحد يصفر التفتت مافيه احد عقدت حواجبها .. رجع التصفير : مين ؟
: فوق !
طالعت فوق كان نايف طالع من البلكونة .. ابتسام : ههههههه صح النوم
نايف : صح بدنك .. صاحية من متى اجل .؟
ابتسام وهي تطالعه ببنطال البجامة دون بلوزة : البس حاجة لا تبرد وتعال افطر
دخل وبعد دقيقتين نزل وهو لابس بنطال جنز اسود وبلوزة بيضاء رسمية وفوقها جاليه اسود .. ابتسام : طالع ؟
نايف : ايه بس ما حطول .. مشوار ساعتين وراجع
ابتسام : اوك افطر اول
نايف وهو بطريقه لبرا : مستعجل .. بعدين
تنهدت ابتسام وهي تشوفه .. كملت فطورها ودخلت لغادة حصلتها صاحية : خير صاحية كان جيتي تفطرين معي !
غادة : تخيلي اطلع من غرفتي وزوجك المصون موجود !
ابتسام : طلع .. تعالي نطلع
غادة : حتى لو طلع .. مايعرف لا احم ولا دستور اول مايرجع ماراح يهمه
ابتسام : اففف خلاص انطقي هنا بجيب فطورك
غادة : يكون احسن بعد !
طلعت وجابت الفطور وجلسن يفطرن سوا .. غادة باعجاب : الله ابتسام اول مرة اشوفك بالشورت .. تخبلي
ابتسام : بجد .؟ عاد انا ما أحبها بس عاد دام تزوجت وخلاص قلت البسها
غادة : مرة مرة روعه لان سيقانك طويلة ما شاء الله
ابتسام : تسلمين ياعمري
عند نايف /
ابتسم وهو داخل البيت .. عقب ماخلى احد ماعزمة يتغدا عنده عزم كل ربعه , تقول ماتبي شغالة خل اشوف كيف بتسنع نفسها : احم احم ابتسام !!
طلعت ابتسام من غرفة غادة : مسرع جيت
نايف ابتسم : قايلك ما حتأخر
ابتسام : اوك ارتاح فطورك جاهزة
نايف : خلي منك الفطور اللحين .. انا بيجوني العيال يتغدون
ابتسام : مين عيال ؟
نايف : ماحتعرفينهم .. بس احسبيهم يمكن فوق ال 50 واحد
ابتسام فتحت عيونها : 50 !!
نايف باصطناع : اسف ياعمري والله بس شاسوي .. لزمو واستحيت ما أعزمهم , ياليت لو اقدر اكلم ماريا وبيان بس انتي معطيتهن اجازة
ابتسام : طيب جيب غدا من برا
نايف رفع حواجبه : ليش .؟ ماتعرفي تسوي غدا .؟
ابتسام : اعرف بس كثيرين !
نايف : معليش حياتي قدها انتي .. وبعدين انا ما أحب اعزم على اكل مطعم لو بجيب من مطعم بنروح مطعم اجل ونوفر
ابتسام تنهدت : لو اقل شي قايل لي من بدري ..
نايف : انتي تحركي اللحين وبيمديك .. القهوة والشاهي لاتنسينها كمان
طلع نايف لبرا وهو مروق .. السالفة تحدي وهو يحب التحدي , دخلت ابتسام على غادة : غادة !
غادة : نعم
ابتسام : اعجلي قومي معاي المطبخ .. نايف عازم ربعه غدا وقهوة وشاهي تعالي ساعديني
غادة فتحت عيونها : سلامات وش هالعزيمة !
ابتسام : مدري بس بسرعة تعالي وبيمدينا
حطت غادة غطاها فوق راسها وطلعت مع ابتسام .. وباشرن بالشغل ورغم ان ابتسام سنعه بجد بس الوضع اعجازي نوعا ما .. !
بعد فترة بنص الشغل سمعت صوت نايف طلعت بسرعة قبل يدخل وغادة موجودة : زان الغدا .؟
ابتسام شهقت : خلصتوا من القهوة والشاهي .؟
نايف : أيه خلصنا نبي الغدا !
ابتسام طالعت الساعة : نايف حرام عليك الساعة تو .. اصبروا شوي
نايف بتذمر : افففف مطول مرة يعني !!
ابتسام بقهر : نص ساعة تقريبا
نايف : وين نص ساعة !! نص ساعة كثير ..حاولي يخلص قبل كذا رجاء
طلع نايف لبرا وابتسام رجعت لداخل .. غادة بتذمر : امانه مافكرتي تقتليه للحين !
ابتسام وهي تحوس بالمطبخ : روقيني وخلي مني كثر الكلام !
بعد عمل اعجازي قدرن يخلصن بعد ربع ساعة .. دقت ابتسام على نايف : الغداء جاهز تفضلوا
سكر نايف السماعة : تفضلوا يا شباب الغداء بالمجلس
دخلـو وكلهم اعجبوا بتنسيق الطاولة والمأكولات ..ابتسم نايف الظاهر انه متزوج وحده اسطورية ! بس على وين مصيرها تزهق وتطلب الشغالة ..
بدر وهو يجلس : الله يرحم ايام ام يزيد بس .. للحين لاتذكرت الكبسة حقتها تحوم كبدي
عبد المجيد : بججد .. طباخة هذي ما شاء الله وش هالريحة بس
: نايف احسب حسابنا كل يوم بنتغدا عندك
نايف اعجبته الفكرة : حياك والله .. بتنبسط هي بجيتك كل يوم
عبد المجيد : هههههههههههههههههههه تنبسط بالنخل .. اقول اشبعوا بس ترا وجبة بالسنة مرة تحصل لكم
اما داخل كان ابتسام بحالة دمار انحاست الكشخة وهي ترتب المطبخ وتغسل وغادة راحت منها لأن بنتها جويعة ..
***
الكـويت – مغرب /
كانت سارا طالعة من الدوام .. انتهى دوامها واليوم حالة اكتئابية بجد تدق مايرد من امس , معقولة يكون كلم ابوه وصارت مشكلة ... دقت بمحاولة اخيرة يائسة جاها الرد : ههههههههههههههه بس بس مكالمات فجرتي جوالي
ارمشت بعيونها وهي تسمع الصوت قريب .. التفتت يمين كان واقف نزل السماعة من اذنه ودخلها بجيب جاكيته ووقف قدامها مباشرة ... دمعت عيونها دون تحس : ليش ماقلت لي قبل تمشي .؟
لؤي ابتسم باريحية وهو يمسح دموعها : ليش الدموع خلاص هذا انا قدامك
سارا ودموعها ماقدرت تحكمها : خليتني على جمر طول هالفترة
لؤي : آسف .. حقك علي غلطان
سارا وهي تمسح دموعها : وحمار بعد
لؤي : وستين حمار كمان .. رضيتي .؟
سارا : ايش صـار .؟
لؤي بضيقة : ندخل .؟
سارا : أيـوه تفضل
دخلو الشركة بمكتبها .. سارا : كلمت ابوك
لؤي : لا .. ماقدرت , " تنهد " كنت غبي لما تأملت انه بيوافق ابوي مستحيل يوافق
سارا بهم : اهـا ..
لؤي مسك يدها بسرعة : بس انا مقدر اتركك ولا اقدر استغني عنك
سارا سحبت يديها ببطء : بس ..
لؤي قاطعها : عشان كذا , طز فيهم اذا هم رافضين وانا حلفت لما رحت الرياض اني برجع مباشرة واخطبك سواء ابوي معاي او مـو معاي
سارا بصدمة : ايش يعـني ..؟
لؤي : يعني مثل ما أنا ابيك بكل الأحوال .. ابيك توافقين علي بكل الأحوال
سارا ضمت يدها بضيقة : قصدك دون يدرون أهـلك ؟
لؤي وعيونه فيها تصميم : ايه .. اهلي مستحيل يوافقوا وانا مستحيل استغني عنك
سارا : ................
***
طلعت اسماء من بيت أبو نايف ليل .. هالايام فراس موجود ماتقدر تروح المستشفى فرصتها الوحيدة اللحين السواق بيرجعها تقدر تروح للمستشفى بسرعة قبل ترجع !
السواق : البيت مدام .؟
اسماء : لا ! مدينة الملك فهد الطبية
السواق : حاضر
مدينة الملك فهد الطبية /
كان هيثم بغرفة كل انوارها طافية .. مافيها ولا سراب اضائة الا من تحت الباب نور خفيف ومستلقي وماسك راسه اليوم مافضى ولا دقيقة حتى .. المستشفى هادي بهالوقت المتأخر غمض عيونه بارهاق ..سمع صوت انثوي برا : دكتور هيثم مشعـل موجـود .؟
فتح عيونه مباشرة واستقام من سدحته .. ضيق عيونه يميز الصوت لكن ماعرفه ليش يتعب نفسه يحزر ؟يطلع ويشوف ! طلع لبرا حصلها واقفة قصيرة نحيفة صغيرة الحجم بصوت حاد : .. ترا اقلقتيني كل ما سألتك عنه قلتي مشغول قوليلي مشغول مرة ثانية وباشكيك !!
هيثم : شبغيتي منه .؟
اسماء زفرت : عندنا موعد هو ناسيه !
رمشت بعيونها اكثر من مرة والتفتت وهي تشوفه .. واقف بلبس الدكاترة والمعطف الأبيض والشعر مشعث اثر السدحة والأرهاق المعتاد بعيونه الحادة الرمادية .. بلعت ريقها وقلبها دق بعنف وهو يشوفه وقطرة عرق نزلت من جبينها ..
هيثم رفع حواجبه : بجد .؟ وش هالموعد ماعندي خبر فيه !
اسماء حست رجلها مو شايلتها .. كبست بعيونها البريئة اكثر من مرة اما هيثم للحين ماعرفها , حلل الوضع براسه من ممكن تكون ماحصل معاه شي ..
هيثم ضيق عيونه فيها : تفضلي من هنا
اسماء شدت على قبضتها : هاه وين .؟ ليه !
هيثم : مو عندنا موعد .؟ ولا نسيتي ؟
اسماء قادتها رجلها .. مشت جمبها وهي مو مصدقة ! اكيد تحلم رفعت يدها وصفت خدها بالخفيف تتأكد ماتدري ليش اصلن جالسه تمشي معه او وش شيبي ... مانتبهت الا لما كانو برا المستشفى الحديقة والمكان مظلم الا من انوار خفيفة بالمكان . .. جلس على كرسي خشبي طويل وحط رجل على رجل بجلسة انيقة وطالعها : أيـوه .. من انتي ؟
اسماء كانت واقفة وشادة على عبايتها وهي واقفة .. بلعت ريقها : مممممم .. ااا ... انااا
هيثم : صعب السؤال .؟
اسماء ماعرفت تجاوب الا هالجواب العشوائي : اسمـ اسماء ..
هيثم ضيق عيونه وهو يحاول يتذكر .. لكن عقله وذاكرته وصلته لها ع طول : اهااااا .. " رفع حاجبه " شخبار رجلك؟ اقدر اقول من مشاويرك للمستشفى رايحه جايه انها بخير
اسماء : هاه .. لا .. ايه .. ايه بخير
هيثم دخل يديه ببالطوه : وإيش بغيتي مني .؟
اسماء بلعت ريقها للمرة المليون وقلبها حالته الله العالم بها بهالوضع : ....... كيفك ؟
هيثم بعيون حادة : جايه تسأليني كيفي .؟
اسماء نزلت راسها دون ترد .. معه حق يا اسماء انتي لك شهر برج مراقبة عليه بس مافكرتي وش بتقولين له اذا قابلتيه حتى ..
هيثم وقف وهو يتمشي بالمكان ويحلل الوضع : اول مرة قابلتك كنتي مريضتي .. طلبتي مني اشتغل عندك بغطرسة ورفضت ..
اسماء قاطعته بانكار : غطرسة .. لا مو قصدي انا ..
قاطعها هيثم : وبعدها عطيتيني 30 الف الله العالم ليه ورحتي ... عقبها بمدة رجعتي ترسلين لي بنفس الطلب اني اشتغل عندكم .. الظاهر كنتي تحسبين انك بعد الفلوس اشتريتيني وبغير رايي
اسماء انصدمت وش تقول ..............
هيثم : ولما جيت بالرياض .. والصدفة اشتغلت وتزوجت اختي ولد عمك وعرفتي انا فين بالضبط صرتي تراجعين المستشفى هالفترة كلها ..
اسماء عضت ع شفتها .. وهي منعقد لسانها لأنه ما أعتبرها كلها صدف جلس يحللها براسه ..
هيثم وقف من مشيه وهو يطالعها : بعد كل هذا يجيك السؤال ..... ليش .؟
اسماء : لأن ... ممممم .. انا " قالت بنبرة مرتجفه " ما أدري
هيثم : نظرا للمواقف فيه احتمالين .. تكونين معتقده اني عبقري وناجح لكن ما أظن لأني ما أثبت لك شي برجل مكسورة ولأني ما أظن عندك بصيرة لهالأمور
اسماء وعيونها مفتوحه ع الآخر .. الظاهر هذا اللقاء اللي تطارده لها شهر انقلب ضدها ..
هيثم بنفس الوضع التحليلي الهادئ : هذا يودينا للأحتمال الثاني .. تكوني تحبيني

لالالالالالالالالالالالا لا تقولي وقفتي هنا لا بليززززز كملي ما اقدر اصبر للخميس اعرف شو ردة فعلها وشو صار بينهم . امااااا نااااايف حرام مو صاحي مجنون ضحكني كثيررررررررررر وخصوصا من يقول وقفي يمه اذكر ليش طلقتهااااا ونرفزته لغادة هههههههه الله يكون مع ابتسام بتحمل وهو ناوي عليها بس ابتسام قويه وقدهاااا بليززززز كملي بس اعرف شو صار مع هيثم واسماء .