فرص الحياة فرس جموح تنتظر من يروضها فان اقبلت عليك ان تستعد لترويضها فهي من سوف تنقلك الى حيث امانك الداخلي وروحك النقية

(10)


تتسارع الايام وتاتي الايام التي لا نرغب اره يراقبني ولاول مرة متذ سنين يتخلى عن ركنه الحبيب وانا ولاول مرة منذ سنين اتخلى عن التمعن بملامح وجه
اسرعت بجمع المتسخ من الملابس وهرعت الى خارج الغرفة ولكنه اوقفني قبل ان اغلق الباب وسحبني الى داخلها في مشهد كنت انتظره منذ سنوات ولكنه لم يكن بالرومانسية التي اتخيل فانا فعلا بين يدي كاظم والعيون تحدق بالعيون كما كنت احلم ولكنها لقطة خالية من الروحولا رومانسية فيها
قال بحدة: رتبتي امورج شهرين وقت كتفي اعتتقد
اجبته بتحدي: لا ما رتبتها طلاق ما اطلق اني باقية مو علمودك علمود خلفتي وانت براحتك متفرق عندي رتبت الغرفة الثانية ونقلت اغراضي بيها وانت اخذ راحتك
تركني بنفور وهو يقول :يا بنت الناس افتهمي اني نفسي عايف الزواج والنسوان وكل علاقة بشرية انت تفتهمين لولا
اجبت بصدق :لا
اجاب بكل غاضب: وج افتهمي اخذي جهالج واطلعي من كدام خلقتي اني واحد مريض خلصي مني
قلت بتحدي: شنو اخذ جهالي ذولة اولادك انت همين اني اذا طلعت اطلع وحدي اهلي ما مجبورين باولادك كلش كافي عليهم اني ارجعلهم
اجاب بحدة:شنو صبر هو منو قتل نفسه حتى يصير عنده طفل اني لو انتي اني الي سويت ليلة الاغراء ذيج تذكرين لو اعيد عليج الفلم الي سويتي
اجبته بكل تهور :ميحتاج تعيد اذكرها وعلى بالي وما ناسيتها والي سويته شرع الله وحلالة انت مريض وحرام عليك الي تسوي ثم قلت اني اطلق واخذ الاولاد اذا جاوبتني علىسؤالي
اجاب باستهزاء :سئلي
قلت بحدة ليش: ازوجتني اني ما اعرفك اجو اهلك يخطبون وحالي حال كل بنية يسألوها اهلها بواحد مقتنعين بي وقبلت تعتقد لو اعرف هشكل وضعي يصير ممكن اهلي يقبلون او اني اقبل زين رجعتني من رجعت لاهلي وطلبوا الطلاق اني ما ركضت وراك انت اجيت واني ما ردت الاولاد الا بعد ما ايست منك من رجعتي لاهلي اريد شي يشغل ايامي غير التفكير بك
اخذ نفس عميق وقال بوهن: عبالي اتعالج عبالي بالزواج تتحسن حالتي
سئلت باستغرابب: ليش انت شبيك
نظر لي بنظرة اندهاش وكنها للتو استوعب ما قال
ولكني بادرته بقولي: بنات الناس مو مستشفى تعالج المرضى النفسيين هاي لو عاكسين الحالة واني بمكانك وبتصرفاتك كان من زمان مصيري بيت اهلي
ثم بعدها قلت باصرار:المهم ياكاظم طلعة من البيت ما اطلع عندك كلام زايد روح لامك انفاهم وياها
خرجت وانا اشعر بزهو الانتصار وتركته خلفي يمارس طقوس الحب مع ركنه
***************************
كان المكان مظلم وانفاس كريهة تقترب من وجهي تجرد ملابسي وانا مقيد ويالة هول الفعل الذي مارسوه فعل يزلزل عرش الرحمن لبشاعته ولا قوة لي لردعهم زمجرت وتوعدت وسقطت دموعي وخارت قواي وذهب صوتي وانا مقيد ومكمم الفم
تركوني وانا لاقوة لي الملم نفسي وامسح وجهي بتراب الارض لعلي ازيل العار الذي لحق بي
وتوالت اليالي وهذا فعلهم وبعد عشرة ايام اطلقوا سراحي وانا لا استطيع السير من الذل والالم دخلت ضابط جيش مفعم بالشجاعة والرجولة وخرجت وانا أمعة لا اعرف عنوان لي
تركت اهلي واصدقائي وعملي وهمت على وجهي ابحث عن نفسي وجدتها بعد عناء ولكن كسرها لم ينجبر عدت الى عملي بعد علاج نفسي مكثف وتم خطبتي لافرح قلب والدتي ولكني فشلت كزوج يفرح قلب زوجته لم اقوى على قربها وحملتها وحملت نفسي فوق طاقتها غربان الشر عندما خطفوني اقتلعوا بفعلتهم كل رغبة داخلي بالتواصل البشري الطبيعي انا رجل بكل ما تعني الكلمة ولكني لا ارغب ان امارس رجولتي مع امرأة
يمة كاظم
لدي ام حنونة ولكني لا استحق حنانها
نهضت من مكاني وقبلتها على رأسها
قالت بلوم :يمة اذا انت متريد صبر اني اريدها
نظرت لها بنظرة مبهمة :لا اعرف ما اريد بها
وقلت لها :ان شاء الله خير
قلت لها وانا ارتب حقيبة سفري: الي تردي يصير
قالت وهي تنظر لحقيبتي: يمة وين رايح البارحة اجيت
قلت وانا تهرب من الحزن بعينيها :عندي واجب هسة خابروني
قالت بحزن: الله لا يوفقهم من خطفوك رجعوك النة مو كاظم
قبلتها على جبينها وتناولت يدها وقلت قبل ان اخرج :اندعيلي والله تعبت
قالت بمحبة: الله يريح قلبك يمك ويسر خاطرك
نعم اريد راحة قلبي حتى وان كان الثمن توقف نباضاته ماعادت روحي تقوى صراعاتها وكوابيسها
******************************
تانقت وصوت خلخالها يصل لمسمعي فتاة جميلة جدا ولها تصرفات تريبني ولكن اتمنى ان تحصل من خلالها على رجل مناسب لذلك لا ادقق كثيرا ان لست ام سيئة ولكن الموضوع ببساطة اريد لابنتي زوجا يهوى قلبها له
سئلتها :وين رايحة بهذا الليل
اجابت بهدوء: ماما بعد وكت ساعة ثمانية خلود خابرتني ادكول ياسمين مريضة تجين وياي اشوفيها
قاطعتها قائلة:و من شوكت تحبين ياسمين
اجابت :اهو ماما ضايجة واريد اطلع مو حبا بياسمين
لحظة ياسمين معناها بيت محمد فكرت للحظة
وقلت: اني اجي وياج
نظرت لي بدهشة :ماما يعني انت تحبين امها شسوين تجين
اجبت بتحجج :الدنيا ليل اشلون اخليج اطلعين وحدج
اجابت بضجر: ماما مو اول مرة
قاطعتها ::بس كل مرة ترحين لبيت خوالج هسة ذولة غرب
وقبل ان تقول شيئ اتصلت بالسائق الذي استأجرناها لخدمتنا وذهبت لاحضر نفسي لزيارة بيت الحبيب
تلاقينا مع خلود عند باب بيتهم الفخم وداخلي حسرة كيف اضاع اخوتي عليه الحب والهناء وداخلي دعوة قهر على والد خلود وكل من يكون سبب في فراق الاحبه
دخلنا وكانت بهية باستقبالنا بنظرات كلها اندهاش لتواجدي مع الفتيات
لم ابرر لها ولكني: وجهت كلامي لزهرة قائلة ماما شوفوا ياسمين ولا تاخذكم السوالف دنيا ليل
فقالت بهية بود:البيت بيتكم ام عادل خل البنات ياخذون راحتهم واني وياج نتسامر الليل طويل
قلت بهدوء: ما اريد اسببلكم ازعاج يمكن ابوكم بالبيت وتردون تاخذون راحتكم
اجابت بهدوء: ابو ياسمين بمكتبه بهذا الوقت يبقى ساعتين اكثر مرات يالة يطلع اخذوا راحتكم
بعد الضايفة جلست ومضيفتي تنظر احدنا للاخرى في جلسة تحدي واضحة ،نظراتها بدت اكثر ثقة هل تعرف شيئا
قالت وهي تفتح الحوار معي: ياسمين تحب صديقاتها هي وحيدة والله عوضها بالصديقات
قلت بمجاملة: الله يحفظها الكم زهرة هواي تحبها
اجابت بهدوء :ويحفظ بناتج ويبارك بيهم
ثم قالت :الح على محمد يزوج وحدة صغيرة بالعمر حتى يصير اخو اخت لياسمين تعرفين وضعي شلت الوحم بعد ولادة ياسمين
لم اسمع ما قالت بعد ذلك فكلمة صغيرة شلت افكاري اذن هو يريد الزواج من اجل الاولاد وانا وبهذا العمر ما دوري بحياته
اعادني الى صوابي قولها :انت وياي ام عادل
قلت بهدوء :اي وياج بس بالي يم حفيدتي مريضة شوية
اجابت بهدوء: الله يشفيه
ثم اكملت :متعرفين وحدة بنت عائلة اقصى شي عمرها ست وثلاثين اني رشحت هوازن بينة الحجي بس محمد يكول مثل بنتي شوفي غيرها بس نفس العمر
قلت بهدوء: وانت كل عقلج ازوجي يمكن هو قابل بهذا وضعة
قالت بثقة :بس اني ماقابلة اريد لبنتي اخو اخت يسندوها اني ومحد اثنينة لا اخو ولا اخت ما نريد ياسمين تبقى وحيدة مثلنا
ثم اكملت : محمد ازوج اكثر من مرة بس خطية لان يريد خاطري ماخلاني اعرف اني محمد لو انطي عيوني ما اوفي حقه اني واثقة اذا ازوج اني ابقى عنده غير شكل
قلت بمجاملة خانقة: الله يحفظكم لبعض
ثم قلت: ياريت تنطين خبر لزهرة ما ظل وقت
اجابت بهدوء: بعد وقت خلينة نسولف
قلت لها: لا والله نروح ليل الشتا يخوف
وكأن النوايا تعرف ماتريد ان سائت جلبترالحزن لقلب صاحبها وان حسنت اكسبته فرحا
غادرت منزل الحبيب بنفس اشعر وكانها تضاعف وزنها الاف المرات
دخلت السيارة وصوت تذمر ياسمين يصلني وانا في عالم اخر غير عالمها وما ان وصلت البيت حتى اسرعت لغرفتي وتناولت هاتفي واتصلت به
اتاني صوته متعبا اناسني ما كنت اريد قوله
قلت بهدوء: شبيك تعبان
اجاب بتعب :هستوني خلصت شغل الي عندي ودخت
قلت بنغزة :يمكن دخت وانت ادور على بنية عمرها مناسب حتى اجيبلك الولد
لحظة صمت ثم قال: انتي منيلج هذا الحجي
حسننا يبدوا انها اسرار عائلية لاجعلها حرب بينهم
قلت :كنت بيتك وزوجتك طلبت مني اذا اعرف وحدة مناسبة عمرها بال ست وثلاثين تريد تخطبها لرجلها
اجاب بضحكة خافتة: والله بنت اصل ام ياسمين ما اعرف اشلون اجازيها
قلت بتهكم: الله يحفظكم لبعض
اجابت بهدوء: امين يحفظج الله ام عادل
قلت بحدة: محمد تلعب عليه
اجاب بهدوء :ما لعبت عليج صغير العب عليج كبير بس ظرفي مو مثل ظرف قبل وانت الله يسلمج مسويتها حرب شيصير لو تتقربين من اهلي بدل ما تسمعيهم نغزات بكل مناسبة هاي زوجتي ام بنتي يعني احترامها من احترامي
قلت باستنكار :شنو شاكيتلك المحروسة
اجاب بحدة :شتتوقعين من الها غيري يعني لمنو تشكي عيب تعرفين شنو عيب اتقللين من احترامج الها كدام الناس ترة كلها تنتقدج متنتقدها صيري كبيرة بعين الناس وترفعي عن سوالف الصغار
اشعر بقهر بصدري ولن انام حتى اسبب له قهر مضاعف
قلت :بالمناسبة انخطبت
وساد الصمت مرة اخرى وبعدها
قال :لمنو بيه الخير
قلت بثقة :لظافر
اجاب بدهشة :ابن ابو سعد
قلت بتعالي :اي ليش تتوقع الي يخطبني اقل من هيج شي
اجاب بحدة: يعني اختاريتي
قلت بهدوء :مو معناها انخطبت اني موافقة بس احب اخليك بالصورة
اجاب بهدوء :افتهمت يعني يا محمد يا اجير بيت ابو سعد اني انخطبت للناس الي كنت اجير عدهم
قلت باندفاع: اني حبيتك اجير ما حبيتك تاجر لا تخلط الامور
اجاب بهدوء :بس هي مخلوطة من زمان
قلت بهدوء: تصبح على خير
قال بحدة: لازم النقاش ما عجبج
قلت بصدق: لا مو هذا السبب بس احس روحي متتحمل هذا الحجي وياريت اتحدد موقف لان بعد ما اتحمل هاي الوضعية
اجاب بهدوء: الله يسهل
وانتهى الحوار مثلما ابتدأ روحي مثقلة وعقلي مشوش هذا الحب اتعبني صغيرة وارهقني كبيرة
*******************************
اركض بلهلع فطرقات ما بعد منتصف الليل ترعبني
قلت : منو
فاتني صوته الهادئ :اني كاظم افتح الباب
كاظم مضى زمن طويل لم التقي به ولو صدفة حتى بت اشك انني اعرف شخص اسمه كاظم وهاهو يطرق بابي بعد منتصف الليل ليزيدني رعبا اهو شبح كاظم
فتحت الباب بتوجس ونظرت بدقة الى الواقف خلف الباب وتاكدت انه كاظم بشحمه ولحمه احتضنته بود وبادلني الاحتضان قلت له مازحا : والله نسيتك وعبالي هذا شبحك ولك وينك لا حس ولا نفس صار الك سنين لو ما احنة بمنطقة وحدة بالغلط ما مصادفك
كل هذه الثرثرة كانت من طرفي والطرف الاخر صامت حتى وصلنا لصالة المنزل وتوسد الاريكة بتعب
قلت بحذر : كاظم شبيك
اجاب بوهن : ضاكت بي وما الي غيرك
قلت بنخوة : واني الك بس كول شبيك ولك قلبي وكعته بالكاع
قال وهو يخرج من جيبه ضرف :هذا تنطي لزوجتي اذا صار علي شي
قلت بمزح: وانت شيصير عليك صار الك سنين ببغداد ادوام وكل يوم مفخخة وانت صل مال حية كل شي ما بيك
قال بجد: الناس تشرد من الموت واني رحتلة برجلي وميقبل ياخذني شكد نكس اني
قلت بشدة: كاظم انت مخبل شبيك احمد ربك منو بشكلك وظيفة ومال وجهال شتريد من الله بعد
قال بحزن : اريد ياخذني
قلت : بعتب انت متخاف الله واولادك وزوجتك المسكينة منو الها
اجاب بهدوء : الله الهم احسن من ابو ميعرف يتواصل وياهم يخاف ياخذهم بحضنه ويشم ريحتهم احس بكل لمسة المسها الهم بقذارتي واشوف ابشع مناضر شفتها بحياتي
ساد الصمت وعادت بي الذكريات التي لا ادري انسيتها ام تناسيتها عندما خطف كاظم وتناوبنة بالبحث عنه انا ومحمد واخ كاظم وبعض معارفه
وفي فجر احد الايام وجده محمد مرمي على قارعة الطريق بالقرب من معرضه في حالة هذيان لم يخبر احد من اهله تناوبنا على رعايته خلسة في احدى مستشفيات بغداد وعاد لوعيه وهو كاره لنفسه
قبل ان يخطفوه كان شابا مفعما بالحياة والنشاط والحب
عبالي من ازوج ارتاح
ثم قال : لا والله ما ردت الزواج ردت اريح امي ولا اني ارتاحيت ولا امي ارتاحت ولا بنت الناس ارتاحت ظلمتها وظلمت نفسي وياها
وبعد ان اخذ نفس عميق قال : مهند هاي الرسالة توصلها واتاكد انها باريتني الذمة محد يعرف الي صار بي غيرك وغير محمد اريدكم استروني حي واستروني ميت
قلت بهدوء : اذكر الله كاظم انت ليش هشكل اني ما اصورتك عايش ليهسة بتاثير الماضي راحت ايامه راحت ليش عايشة جواك
اجاب بحزن : والله مو بيدي والله مهند ما خليت طبيب ولا خليت فتاح فال ولا خليت ساحر وسوالف جن تعبت اشوفوني طبيعي بس وي اهلي واولادي من اتقربلهم احس الف سد وسد بيناتنة احس روحي وحش وراح افترسهم ابتعد وابتعد واشتاق كلي شسوي بروحي
لا ادري ماذا اقول له كان الصمت جوابي


وبعدة فترة قلت: متعشي
اجاب بهدوء : اي مزقنب لاتخاف عليه
قلت: لا حول ولا قوة الا بالله
قال بحزن : ماكو سيارت بالكراج وما اريد ارجع للبيت كلت اكضيها يمك للفجر
اجبت : البيت بيتك انت تعرف انت عزيز عليه بس انت ابتعدت واني خليتك على راحتك كلت شغل وبيت ومسؤولية
قاطعني قائلا: واكيد متريد تحس بالشفقة عليه من اتشوفني
قلت بحدة: كاظم هاي سوالف المخابيل جوز منها انت صديقي انت اول واحد اتعرفت عليه بالمنطقة انت كاظم الي اجيت غريب وهو كان يدافع عني انت كاظم ابو النخوة ابو قلب الطيب ليش خليت شرذمة تكسرك ليش خوية هشكل سويت بروحك
قال بحزن ونبرة صوت اقرب للبكاء : كسروني وما كدرت ارجع كاظم لي اعرفه من اشوف نفسي بالمراية اكول اني كاظم اي بالشكل بس من جواي كاظم مكسور عين وروح كاظم الي استباحوا جسمه وخلو ميسوو شي بسوك الزلم
قاطعته بحد: الزلم الي انت مو منهم مو زلم قصة وراحت ومحد يعرف عنها شي ليش اتاذي نفسك بيها
اجاب بوهن: بس اني اعرف كل شي واني عشتها وبعدها عايشة وياي
جلسنا حتى الفجر وكأننا نناقش من اتت اولا الدجاجة ام البيضة
روح كاظم موجعة ولا ترغب بالتدواي اقول له انسى ويرد عليه لا اقدر الا ان اذن الفجر وبعد الصلاة غادر كاظم من يراه يمشي على الارض يقول كاظم وبس والحقيقة ان من يمشي على الارض روح مكسور وجسد لشخص كان يدعى كاظم
***************************
منذ الفجر اعددت عجينة الخبز وعندما اختمرت خبزتها و نظفت المنزل اعددت الفطور ونظفت المطبخ بعد الفطور وسمعت رنين صوت الهاتف واستبشرت خيرا فاليوم موعد قدوم سلام من عمله ولا بد انها والدته تحدد موعد الزواج فلقد طالت الخطوبة مدتت يدي لامسك سماعة الهاتف ويد اخرى سحبتها من يدي مع نظرة حادة معناها ان ابتعد كنت اخافها واهابها واحبها كثيرا ابتعدت وانا اعرف انها تحبني
ذهبت بعيدا عن مرأى عينيها ولكني اسمع المحادثة في كل كلمة تقولها المتحدثة من الطرف الاخر والدتي تقول على شنو مستعجلين البنية صغيرة هستوها مخلصة متوسطة وانتهت المكالمة مثلما ابتدأت لا جديد واتت والدتي حيث اقف وقالت: شعندج مستعجلة على ضيم العرس وضيم بيت عمج تشتغلين وعينج على التلفيون تنتظرين ابو العرق سلام ساعة السودة الي انطينا بي حجاية لزكة لزك
لم اتفوه بكلمة واستمرت والدتي بالدعاء على،سلام وعائلته النهار باكمله
كنت اعد الغداء وللتو استيقضت اختي من نومها قالت والنوم احدث تاثيرا قويا على صوتها : ترة فزيت من النوم من ورة دعواي امي على سلام راح ينشل الرجال قبل لا يزوجج وانتي لا حس ولا نفس ظلي عوبة هسة تنفسخ الخطوبة وانتي ظلي كنسي ومسحي
اجبت باستسلام :شتردين اوكف بوجه امي واكلله اريد ازوج
قالت بحدة: لا فهمي سلام افندي انو امي متريدكم خل يشوف طريقة يقنعها
شهقت بقوة وقلت: ترديني اخابر سلام واكله تعال ازوجني
ضمت كلاتا يديها وفتحتهم بوجهي وقالت: ضلي عوبةوخليهم يكربون عليج ترة امي معتزة بيج لان تشتغلين وتنظفين اني اكبر منج ما جلبت بي وهاي اني راح ازوج واسافر والله لا يرجعني الكم
ذهبت لتكمل يومها بمشاهدة التلفزيون
اكلج صبرانتي جاية تصفنين لو جاي تتعلمين
قلت بهدوء: شفتج مشغولة كلت خل ادور دفتر الماضي
قالت بحب: وين وصلتي لياسنة
قلت بحسرة : للسنة الي كنت بيها مخطوبة لسلام
اجابت باستغراب: حيل خلصتي الدفتر كله انتي خطية سلام كضة عمر عايش على اطلال حبج
ثم قالت : تدرين من ازوجتي مرة شافه عمو مهند بالشارع سكران ويبجي
قلت بهدوء: لو ما خذته الله يرحم امي
قالت بهدوء: الله يرحمها متعرفين رب العالمين شنو ضام الج
نظرت الي مابين يديها بدلة عرس والقماش دانتيل بمنتهى الروعة
قلت : اشتغلج صدرها
نظرة لي باستغراب : اكلج تحجين صدك لو تردين تورطيني وللنص تعوفيها
اجبت بجد : لا والله جيبيها وهسة اشوفين اتصير موديل العصر
اعطتني صدر البدلة هذه البدلة شعرت بها وكانها تناديني وتقول ابدي بالبياض لعل الله يريح قلبك
بدأت اتناول حبات الكرستال واندمجت بالعمل الى درجة لم اشعر بمراقبة هوازن لي حتى قالت : عاشت الايادي شنو هذا الابداع
قلت بثقة: شعبالج هذا مشغلج اني راح اسويلة سمعه
تبادلنة الضحكات
وبعدها قالت : طلعي مواهبج وخليها جسر لاحزانج حتى تعبر الاحزان الىغير رجعة
قلت وكلي امل: ياريت تعبت اريد اشغل نفسي بشي جديد ما اظل عايشة داائرة الالم هاي
قالت بوود وماكو احسن من الشغل استقرار نفسي ومادي بس انتي خلي املج بالله كبير
قلت بهدوء: ونعم بالله
كان العمل والدراسة هو مخرج هوازان من التفكير بخالد فهل سيكون مخرجي من حياة الحزن مع كاظم
***********************
بعض الايام تبدأ رائعة وتنتهي بحزن ولسان حالنا يقول لعله خير
احتظنه خوفا ام حنانا ام شفقة المهم ان يداي تئبى مفارقة جسده ويداها تئبا مفارقة جسدي
نلتقيكم على خير باذن الله كونوا بالقرب
رمضان كريم عليكم احبتي ينعاد عليكم بالخير والبركة وراحة البال

السلام عليكم
شلونكم ام احمد مبروك عليك الشهر
مادري لكن كأني اشوف نهاية كاظم قربت .....الرجال تعب كثير وما وصل لبر الامان اللي فيه ما يعلم فيه إلا الله... لكن الله يعينه ويصبره على ما ابتلاه
تصدقين ارادة كنت متوقعه علة كاظم بس ما حبيت اتكلم بالموضوع
صبر صرت اشوف لها خط جديد في حياتها يمكن الشغل يخليها تلقى نفسها أللي تاهت ولا زواج جديد ....الله اعلم
بهيه اصدمتني اليوم ....لما اطلعت من موال الزوجه الضعيفه المغلوبه على امرها وفكرة بعقل المرأه اللى تعرف شنو تبي وشلون توصل للي تبي بدون لا تكون مكشوفه
محمد كأنه استغنى عن فكرة الزواج من ختام لكن انا لا أثق في قلوب الرجال فكل يوم هم في حال وهي كلمته وهو تعبان وماخذ في خاطره منها لمعاملتها لبهيه....بس إذا راق ما ندري شيسوي
اسعدتينا ام احمد تسلم ايدين
والله يتقبل منا ومنك صالح الاعمال ان شاء

السلام عليكم
ايباااااااااااااااهـــ ياا ابلااااااااااا والله وعرفتي تخليني اتعاااطف مع كظومي>> لايفوتس بس التعاطف والرحمه والتدليع..هههههههههه
والله ياا ابلا ولااا لتس علي يمين.. اني من كثر ماتقولين بتتعاطفين معه وبتغيرين فكرتس عنه واللي صاابه شي كبير.. توقعت انه تعرض لاعتداء بس يختي مااتقبلت هالفكره قلت كظوومي ابو شوارب يااقف عليها الصقر يتعرض لاعتداء ؟؟
ماااش ابد ابد مااااتركب على شخصيته.. بس حسبي الله علي هاللي اعتدوا عليه وعلى امثالهم.. الكثره تغلب الشجاعه حسبنا الله ونعم الوكيل
انا متعاطفه معه وكل شي بس انتبهي يااااا ابلااااااااااااا الحذر الحذر انتس تخلين كاظم يموت ومهند يتزوج صبر.. ترى هنا بيصير مافيني صبر وبفجر موقع القصه >>الفيس الارهابي.
الافكار هذي اللي ما احبها هي اللي اخاف تحصل وتصير..
صبر والله احلى شي انها تشتغل وتلهى عن كاظم ووضعه.. لكن السؤال هل صبر بتكتشف سبب بعد كاظم عنها..؟؟ اتوقع ايه.. اتوقع انها تعرف سالفة خطفه..وحتى امه يمكن متوقعه هالشي بس هي خاايفه ان شكوكها تصدق.يااقلبي عليها والله موقفها صعب وهي بس فرحت برجعة ولدها لكن رجعته حي وهو بالاصل ميت.. يعني ماراح اتفلسف على كاظم واقول حاول عشان امك واولادك لانه اكيد حاول مثل ماقال لمهند..لكن انه يبغى يحرم امه منه هالشي مايغفر له ابد.. يروح للاماكن اللي فيها حرب وضرب وتفجير لانه يبي الموت ما يعرف انه ماتدري نفس باي ارض تموت.؟؟. كاظم من قوو الصدمه باللي حصله حتى مع محاولته العلاج شكله مايبي ينسى يعني يروح للعلاج وهو بداخله راافض انه ينشى اللي حصل له. هو محتقر نفسه وكارها وهالشي اذا اجتمع بقلب انسان بيرحب بالموت بكل وقت.. لكن الصدق انا وااثقه انه ماراح يموت وصبر بتوقف معه .. يعني فيه ناس صار لهم اللي صار لكاظم الله يعينهم لكن ماكان الموت حل لوضعهم. لكن نفسي بس انه يشوووف هالحقيرين اللي اعتدوا عليه وينتقم منهم وان بغى مسااعده زارا بالخدمه>>فيس رابط راسه بشريط احمر ومخطط وجهه بالاسود ومعه الكلاشنكوف..هخهخهخه
حوار كاظم ومهند كان متعب بجد حسيت بارهاق وانا اقرا ومت مت ضحك من شفت كلامتس ابلا من اتت اولا البيضه ام الدجاجه..ههههههههه
بهيه:: يااعيييني ياااعييييني بس على اللي بدت اللعب الثقيل.. ايوااااا كذااااااااااااا خلي ختام هذي تهلوووس وماتدري وين راسها من رجليها ..احسن شي سويتيه انتس مررتي لها الفكره الاساسيه لزواج محمد وهي انه يبي اخوان لياسمين وهالشي ماراح يجي من ختام لعمرها.. وهالفكره هذي بروحها بتخلي وضع ختام مع محمد متذبذب وكله قلق وتوتر.. وهنا انتي ضربتي الهدف مباشره.. واحسن شي سووته ختام خانوم انها راحب على طول وهاوشت محمد..ههههههه
هي وهم على البر تمد لسانها اجل لااصارت معه ببيت واحد وش ممكن تسوي..
يله ان شاااء الله يجي محمد جال تكانه وماعنده انانيه ويفكر بزوجته وبنته بشكل جدي.. والاهم رووح محمد بيك اخطب مهند لبنتك ياااسمينا..
تسلم الايااادي ابلا ووراي لف سمبوسه والا كان فصفصت البارت على كيف كيفج..
كل عام وانتي وقراء احبك ذاتي بصحه وسلامه ومبارك عليكم الشهر..
ايه قبل اطلع نسيت اقوولج ابلا اعجبني مرررره مرررررره .. تشجيعتس لعمل المرأه وانتس تخلقين هالفرص لحريم القصه وكل وحده من الشي اللي هي تتقنه..بجد بجد مجتماعتنا فيها كواااادر نسائيه بقمه الابداع لكن يظلمهن المجتمع او الوقت او الشهاده ..
دمتي بود

انانية تكبر حسد غيرة صفات الكل يملكها وهناك شخص واحد يستطيع التخلص منها هو ذلك الشخص الذي اعترف بشجاعة بتواجدها داخله وقرر اعادة بناء نفسه
ان لم تعترف بخطئك سوف تستمر بارتكابه

(11)


بعض الايام تبدأ رائعة وتنتهي بحزن ولسان حالنا يقول لعله خير
احتظنه خوفا ام حنانا ام شفقة المهم ان يداي تئبى مفارقة جسده ويداها تئبا مفارقة جسدي
قلت له بحب :داني حبيبي بس باوع عليه انت من العصر الي هسة هذا وضعك ليش هشكل واحد اناني يسوي بيك هشكل
بدأت نبوبة البكاء من جديد وقلبي يعتصر مع كل دمعة يذرفها
ويقول من بين شهقاته: ما عرفتي ليش عافج زين ابدا ما سأل علي
حاولت الكلام لابرر له ولكنه قاطعني قائلا : ماما لا تقشمرين عليه كومة سامع حجي بالمدرسة بس اني اكول حجي ماما اضبط ماما هسة اني كبير بس احجيلي صح بابا نذل وعافج وطلكج بلا سبب
وضعت يدي على فمه لكي لا يكمل كلامه ويهين نفسه و والده
وقلت :داني حبيبي احنة وبيت عمو ظافر من زمان بينة مشاكل قبل لا انت تجي للدنيا وقبل لاا زوج بابا اصلا هذا غزوان يسمع سوالف الكبار ويريد يقلدهم بالحجي وياريت الكبار تفتهم الا حجيها كله حقد وانت ما اريدك تصير بدائرة الحقد هاي
نظرت لعينيه ورفعت يدي من فمه وقلت تفتهمني داني
اجاب بهدوء: ممكن اعرف قصتج وقصة بابا حتى لا كل يوم اسمع حجاية ما اعرف اردها
اخذت نفس عميق وبدأت بسرد القصة الحقيقة بحزئها الذي عشته
وما ان انتهيت حتى ادركت ان جيلسي دفن راسه تحت المخدة كاتما بكائه
قلت ببمحبة: داني جائز يجي يوم تلتقي بابوك ويفهمك شنو ضروفة اني بوقتها كنت مجروحة وما سعيت حتى اعرف ليش سو هشكل يمكن عنده اسباب
اجاب بصوت مكتوم :اكو بعض الاولاد بالمدرسة ابهاتهم يشتغلون بالجيش يكلون بابا يخابرنة كل يوم ولازم يسمع صوتنة واحد واحد اني ما عندي ابو يحب يسمع صوتي
قاطعته بمحبة :داني اني ما اكفي عمو مهند مايكفي
اجاب بحدة :انتي ماما وعمو مهند عمج واني ما عندي ابو ولا اريد يكون عندي ابو
حاولت ان الملم كسر قلبه
وقلت: داني اذا يعجبك تشوفه نكدر نتصل عليه
قاطعني بحدة: لا ما اريد عادي صار عمري ثلاث عشرة سنة مو مشكلة اتعودت ماكو ابو
وبعد ان كفكف دموعه نظرة نظرة قوة وقال: اكبر واني وانتي نروح بيت غير بيت جدو واني اصير رجال البيت وازوج واصير ابو واحب اولادي
احتظنته بقوة رجلي الصغير وقلت له :احلى اولاد واحلى ابو انت
وبعدها بدأنا نرسم خطوط مستقبلنا معا بعيدا عن اكاذيب الاب الاسطوري
تركته يغط بنوم عميق فلق انهك منذ العصر حتى الساعة العاشرة مساءا وهو يكابر على اوجاعه
دخلت صالة المنزل حيث تركت عمي مهند ووجدته كما تركته مسترخي على الاريكة بعيون متعبة
نهض بمجرد سماعه لوقع خطواتي
وبادرني بالسؤال قائل:ا شبي داني
قلت له بوهن: ابن عمي ظافر غزوان كايلة ابوك طلك امك وانهزم وعافك حتى ورث ما الك منه
نظر لي بدهشة وقال: وهذا الزعطوط اشلون يحجي بهاي السوالف
قلت بقهر: غير عمي ظافر محشي بدماغه ما اعرف شوكت هذا العم يطلعنة من دماغه
اخذ نفس عميق ثم قال : وانت شكلتي لداني
قلت بهدوء: لطفتله الحقيقة قدر الامكان وطرحت عليه اذا يريد يتصل بابو
قاطعني بحدة :سوالف المخابيل جوزي منها طاوعتج بهواي شغلات بس هاي لا
قلت بهدوء :عمو اذا داني راد يتواصل وي ابو مراح امنعه
قال بحدة :حتى يضحك على الولد بكم كلمة وانتي الخسرانة
قلت بهدوء: عمو خل يضحك عليه بالنهاية يضحك عليه لان يحبه ويريد يكون ابو الة
وقبل ان يتكلم قلت: عمو هاي افتراضات وداني ما قبل يتصل بابو
اخذ نفس عميق وزفره براحة وقال :تصبحين على خير
وغادر المكان وتركني وحدي في حيرة بدأت ولن تنتهي اقلب الارقام بهاتفي واتلصلص على رقم مميز لااعرف ان كان لازال ضمن التغطية ام خارجها
******************************
مضت عددة اسابيع ولكلمات تختنق داخلي كلما نويت فتح موضوع الارض والمشروع ولكني اليوم تسحلت بروح بهية القديمة التي كانت تواجه مجتمع باكمله واستطاعت ان تعيش بشرف
قلت :محمد هم يجي يوم وتستعارمن شغلتي القديم
رفع رأسه من الوسادة ونظر الي قائل:ا اي
تعلقت عيني بعينه بدهشة وقلت باستنكار: معقولة
اجاب بتستهزاء :ليش مو معقول اذا انتي اتخبلتي بتوالي العمر وبنص الليل جاي تسأليني هذا السوال
ضربته على كتفه بقوة لشدة استنكاري من كلامه
وقلت :محمد بلا شقة ما احب هاي سوالفك
اجاب بحدة :مو سوالفج انتي الحلوة بهية اختصري شتردين
قلت باندفاع :اي راح اختصر
وبعدها قلت اريد اشتري قطعة اوض
نظرة لي باندهاش: شكو خير تردين تزوجين تعزلين بيت وحد
قلت بنفس اسلوبه الهازء : اي جايني خوش ابن حلال فما اريد اضيق عليك انت بيت وهو بيت
ابتعدت من مرمى الوسادة حين اتجهت نحوي
وقلت : محمد بلا شقة اريد اسوي عليها مشروع
اجاب باستهزاء: شنو المشروع ياسيدة الاعمال
قلت بنهر محمد: لا تقلد صدك احجي
اجاب بجد: اي كملي وين االكاع شنو المشروع
قلت :الكاع ورى بيت ابو هديل
اجاب : بس هاي ورث لبيت
وقبل ان يكمل قلت: لبيت اهل صبر مرة كاظم ويردون يبعوها
اجاب: وهاي سهلة الكاع الج بس شنو المشروع
قلت باندفاع حتى لا ينتابني الخوف واتوقف: اريد افاتح ام هًديل ونسوي مشروع مشترك
رفع جذعه واصبح بمواجهتي وقال :تسوين اكل
قلت باصرار: مو هاي شغلتي ليش استنكف منها هسة انت تستنكف من شغلك قبل
قال بحدة: اني وحد وانتي وحدة شدكول الناس فلوسه واملاكه ورجع مرته تشتغل شغلتها القديمة
قلت باصرار:من شوكت الناس نصفتنة من شوكت حسوا بينة الناس ما حست بي اني واختي من مات ابوي ولحكته امي بعد اسبوع شسوو النة كانوا يردونة نكضي عمر على الصدقات بس خالتي حسنة فكرت بينة وانطتني فلوس وكالت اشتري لحم وتمن وسوي كبة واني اجيبلج معاميل ومخلتنة اني واختي نمد ايدنة للناس
ثم قلت :الناس شسوتلك و لحد هسة اكو ناس عيونة كلها حسد لان الصانع صار صاحب املاك مفكروا هذا الصانع شكد تعب يالة وصل لهاي المكانة
قاطعني قائلا :محتاجة شي مقصرة وياج بشي
قلت باصرار: محتاجة شي التهي بي يخلص الشغل وتخلص الطلعات ولمناسبات واظل افكر حسبة تجيبني وحسبة توديني اريد اشغل نفسي
انت هسة بس اقبل بالمبدأ من يكول ام هديل تقبل بالشركة
قال بحدة :وانتي شسوين بالشريك افتحلج احسن من مكانها وانتي صاحبة العمل تأمرين وتنهين شسوين بالشراكة
قلت :اكلك شي بس لا تضحك
قال باستهزاء :كولي يا ام الحكم وخليني اضحك لان وغفتي على معدتي (بمعنى كلامج ثقيل)
قلت بمحبة مقبول منك ابو ياسمين
ثم اكملت قائلة: احس اني وهي ممكن سوى يكون النة عمل كلش قوي يعني احسها مرزوقة وعدها حضور
قاطعني قائل:ا ليش انتي شبيج
قلت باندفاع :عاجبتني واحب اقوي علاقتي وياها
وبعد لحظات صمت اعطاني ظهره وقال :افكر بالموضوع
ثم رفع نبرة صوته وقال :بس لا تلحين
قلت وانا احتضنه :الله لا يحرمني منك فكر على راحتك المهم توافق
اتاني صوت شخير مقلد بمعنى لا تعليق
المهم اول خطوة وبقية الخطوات الله يسهلها
*****************************
اراقبها وهي تلملم المفروشات وتسحب الارائك وتذهب يمنينا ويسارا بحركة لاتنقطع البيجامة احدى ارجلها مرفوع الى الاعلى والاخرى الئ المنتصف وقميص البيجامة داخل فيها الوضعيه كلها صورة مسرحية شاهدتها قديما واسرت قلبي
تركت اهلي بعد نقاش وشد وجذب اريد الهجرة ولابد ان يرضخوا لمطلبي ولايوجد امامي غير بيت مهند اقتطع له اخوه جزء من الحديقة وجعلها بيت مستقل له
طرقت الباب الداخلي لاني اعرف كيف افتح الخارجي اسمع صوت حركة ولايوجد مستجيب لطرقاتي زدت الطرق فسمعت خطوات سريعة وصوت لم اميزه لتنفتح الباب علئ عجلة وتظهر امامي فتاة مشابه لصورة الفتاة التي وصفت بيجامة منثور عليها اشكال دبب وشعر منكوش ولا اعرف ما الطريقة المتبعة برفعه وبنطلون البيجامة مرتفع من جهة ومنخفض من جهة اخرى ونفس الحالة بالنسبة لكم البيجامة ولتنتهي الصدمة بصراخها قبل ان تدرك من انا
عمو كم مرة كاليتلك من انظف متدخل البيت اكيد دخلت السيارة ولصت الممرات
وعندما ادركت من اكون شهقت واغلقت الباب بقوة بوجهي
بصراحة لم اتمالك نفسي وانا ارى الصورة تكرر مرة اخرى فدخلت بموجة ضحك وتلك النحلة التي تتحرك بسرعة تراقبني بطرف عينها بنظرة عدم ارتياح
قلت: اكلج هاي بيتج هشكل تنظيفين اكول الرجال هاج منج يطلع الصبح يرجع تالي الليل
اجابت بتذمر :خالد يرحم اهلك مو وكت خفة دمك خل اكمل شغل قبل لا يجي الرجال لان ميكدر على فراكي
ور متني بنظرة تكبر وذهبت
وكلمتها لا يقدر على فراقي ترن بخاطري
خالد
قلت لها عيون خالد
قالت بهدوء هاي صار شهرين من ازوجنة وانت صار الك اكثر من ست اشهر زعلان وي اهلك شوكت تروح تراضيهم على الاقل يعرفون بزواجنة
ثم قالت :اني قلبي مامرتاح
قلت لها وكنت في حينها واثق من نفسي : شوفي هوازن اهلي مراح يكون عدهم اعتراض على زواجي بالعكس يفرحون لان يعرفوكم ويعرفون مهند كلش زين ومنلكة نسب مثل نسبكم لا تشيلين هم
اجابت بحب: خالد ما اكدر على افراكك اريدك تخابرهم تتصل بيهم وتوضح الموضوع حتي من تروح اروح وياك
احتضنتها بحب وقلت :اني هم ما اكدر على فراكج بس هاي شغلة مو مال تلفونات ولا تخافين اخذج وياي ما اعرفج يوم بس اني ما اروح الهم ولا اتصل عليهم هم يجون
قالت بتوسل: لا خالد عفية انت هشكل تخوفني يعني اذا اجانة ولد هم هشكل يسوي بينة هذولة اهلك حتى اذا غلطانين انت تراضيهم
قبلتها على جبينها: وقلت عوفج من هاي السوالف اني احير بيها فكري بس اشلون اني وياج نرضي بعض معليج منو يرضى ومنو يزعل
ها وين رحت
قلت لها بوهن بعيد
قالت بود: خالد انت متعب نفسك كول لبابا ترة بابا كلش متفهم والي ازوجتها لا هي موخوش بنية ولا عائلتها موخوش عائلة ليش هشكل معذب نفسك
اجبت بهدوء :وهي اشلون اتصرف وياها رجعة الي اعرفها مراح ترجع اني من اخلي ابوي بالصورة معناها اروح اجيب دانيال ومعناها ارجع اسبب الم لهوازن معناها اني طول عمري نذل
قالت باستنكار: هاي شبيك انت ليش ضاغط على نفسك بعدين اذا ما قبلت ترجع الك هذا ابنك من حقك تشوفه مثل ما من حقها تربي واكو سن قانوني
قاطعتها قبل ان تكمل: لا مو من حقي اني تنازلت عن كل شي
قاطعتني بحدة: بس الولد من حقه يشوفك توضحله تعتذر منه انت تعرف شنو ولد عمره ثلاث عشرة سنة كل صورة باله لابو انو ابو ترك امه بليلة ضلمة
قلت بثقة :هوازن مراح تكون قاسية عليه وتشوه صورتي بعينه اعرفها
اجابت بما غفلت عنه :هوازن مراح اتشوه صورتك ومهند مراح يشوه صورتك بس اهل المنطقة هم راح يتعاطفون وياك الاولاد الي بعمرة ويسمعون حجيي من اهلهم تعتقد كلهم اصدقاءه
وضعت يدي على راسي واخذت نفس عميق
وقلت :امنية دخيل الله اتركيني ترة مناقصة وجع فوق وجعي
قالت بود: اني اريد راحتك زين خليني اتواصل وي هوازن يمكن اوصل وياها لحل يمكن هي تتمنى تتواصل وي دانيال بس كرامتها تمنعها خل تجي هاي المبادرة من عدنا خل نلطف الي صار بالماضي
اجبت بثقة :ما يتلطف
اجابت بلوم: ما اعرف انت ليش هشكل سويت كانوكلت لبابا اني ازوجت وانت تعرف بابا ميعترض على اي شي من جهة مهند
قلت بجد: كنت اناني شفتها فرصة من وافق اهاجر وانطاني فلوس
قاطعتني: ليش طلقتها اشلون قلبك طاوعك
قلت بلوم :اظل اعيد عليج واكلج ما خططت فكرة واجت بالي حتى احصل على الهجرة قلبي ما وجعني من فكرت بيها ما كنت اعتقد قلبي راح ينتهي من شوقي الها ما تخيلت يوم هذا راح يصير حالي كلت انسى وتنسى ونعيش
اجابت بهدوء: يمكن انت غريبة عليك ما نسيت بس هي مستحيل تنسى اول حب بحياتها اول طعنة بحياتها
قلت باستهزاء: اني غريبة ما نسيت ليش امنية خاتون
اجابت بثقة: خالد لاتزعل انت من تخلي فكرة براسك تنسى حتى اسمك من تريد تسويها وفكرة الهجرة خلت بيتنة جحيم ومن نفذتها حسينة انت اتغيرت وزادت عاطفيتك اتخيلنة زواجك من حلا غيرك ومن قررت ترجع بعد خمس سنوات هواي بابا كان ممنون من حلا الي رجعتك النة
اخذت نفس عميق وقلت: كان الثمن غالي والشي الي حصلته رخيص وقررت ارجع بس حتى اتنفس نفس الهوى
اجابت بود: خالد اشلون اتحملت هاي المدة
قلت بصدق وانا اشير على قلبي :هذا احس جدران راح تنهار من كثر الوجع الي بيه الشوق الي بيه والذنب الي حاملة
قالت بحب: اسم الله عليك خوية الله يفرجها بس انت انوي تتواصل وياهم واني بخدمتك
تركتني بعد ان رن هاتفها
في لحظة ضعف قبل سنتان بحت لها باسرار قلب لم يعد يتحمل وجع صاحبه

قراءة ممتعة ومفيدة
اتمنى من المشرفات تكبير الخط رقم 5 ولون ازرق كبقية الاجزاء متصفح الجوال لا يدعم هذه الخاصة

شكرا أم أحمد ..

جزء اتضح به الغموض في قصة زواج هوازن من خالد .
و الذي كان أكبر ضحية فيه هو الابن دانيال ..
محزن هو موقفه مع زملائه ، دموعه وحيرته .
الأب هو صمام أمان للأبناء وسند يستندون عليه.
لا يكفي أن يكون هناك رجلا ما في حياتهم مع
غياب الأب .. فلا بد أن تحين لحظة يتساءل
الأبناء عن أبيهم ..أين هو منّا ؟ ولمَ هجرنا ؟
وتبدأ التساؤلات في أذهانهم الصغيرة ..
وإن لم يكن هناك من ُمربٍّ صالح يدعمهم
كانوا مطمعا لأناس انحرفت أخلاقياتهم وطبائعهم .

خالد .. ليس مبررا أبدا ما سطرته من أسباب
لأجل هروبك من هوازن . كان بإمكانك أن ترتب أمور هجرتك
مع وجود زوجة بجانبك وخاصة أن عائلتك على
معرفة بالعم مهند ..

بهية .. أضحكتني وهي تحاول أن تشرح لمحمد
مبرراتها لامتلاك الأرض ..
كم هي لطيفة و حبيبة تلك المرأة.
و محمد لن يكسر لها خاطرا و لن يرد لها طلبا .😊

كل الشكر والتقدير أم احمد

🍃🌸🍃