كاتب الموضوع :
روتيلا
المنتدى :
القصص المكتمله من وحي قلم الاعضاء
رد: الفراشة
إن كنت صديقي.. ساعدني
كي أرحل عنك..
أو كنت حبيبي.. ساعدني
كي أشفى منك
لو أني أعرف أن الحب خطيرٌ جداً
ما أحببت
لو أني أعرف أن البحر عميقٌ جداً
ما أبحرت..
لو أني أعرف خاتمتي
ما كنت بدأت...
إشتقت إليك.. فعلمني
أن لا أشتاق
علمني
كيف أقص جذور هواك من الأعماق
علمني
كيف تموت الدمعة في الأحداق
علمني
كيف يموت القلب وتنتحر الأشواق
...........الفصل العاشر .............
...........في الطائرة ............
في طائرة صقر الخاصة وعلى كراسي متقابله جلسوا جميعا في مجموعات إلا صقر جلس بمفردة بعيدا قليلا عنهم كل من يراة يعتقد إنه نائم ولكنه يفكر في كلامة مع يوسف
: إيه يا دكتور خلاص المشكلة اتحلت
يوسف : الحمد لله
صقر : كل البنات كدة حتى شوف فستان روتيلا
يوسف بهدوء : لو كانت روتيلا هي اللي اختارت مستحيل كان هايبقى بالشكل ده
صقر بتوجس : وهي ليه ما اخترتش ؟
يوسف :.....
صقر بحدة : هي كانت رافضة الزواج ؟
يوسف : لأ...لأ ,لحظة روتيلا أصلا معرفتش إلا امبارح بموضوع الزواج
: الزواج تم من اسبوع يا يوسف
يوسف : أيوة ..أنت عارف مرض الوالد وكمان هو كان مصمم إنه هو اللي يقولها بنفسة
وبعدين ...امتحاناتها في الكلية خلصت امبارح فالوالد خبرها لما وصلت هنا
صقر : يعني وافقت من غير اجبار أو إعتراض
: لأ خالص محدش أجبرها وبعدين روتيلا بكرة تعرفها مستحيل ترفض للحاج كلمة
صقر بانتباه مفاجئ : كلية إيه ؟
: فنون جميلة
: لكن والدك قال ..
يوسف يقاطعة ضاحكا : الوالد كلنا عندة في المدرسة احنا متعودين على كدة
صقر يفتح عينة وفي نفسة : أه يا محيرتي كل المسلمات التي تخيلتها عنك ذهبت
ينظر لها وهي نائمة على كتف أخوها يغطيها بجاكيتة ويداريها
الفراشة رائعة الجمال احرقتني ببهاء ضوئها وليس العكس
يقف صقر ويذهب لعمر ومروان .
: أهلا ..أهلا بالعريس
صقر بتنهيدة ويجلس : بتشربوا إيه
: نسكافية
يأخذ زجاجة ماء ويشرب منها
عمر يغمز لمروان : الظاهر في حد زعلان إن الحبيبة في حضن غيرة
مروان : أيوة واخد بالك - بس إية الجمال دا كلة يا صقر لو كنت شوفتها قبلك - أه - بس
صقر بغضب : عارف أنا كان المفروض أسيب الواد خالد يدبحك
عمر ضاحكا : في حد بيغير هنا ولا حاجة
صقر:......
مروان يضحك : أول مرة أشوف صقر كدة
عمر : بصراحة يا مروان روتيلا تستاهل
صقر يقف ويمسك بزجاجة الماء ويرشها عليهم فضحكوا بصوت عالي
........روتيلا ..........
تفتح عينها على أصوات الضحك العالية
: اتخضيتي
: لأ
يوسف : تعبانة -دايخة
: أيوة
: الناس تدوخ في عربية ولا أتوبيس وأنتي تدوخي في الطيارة
روتيلا بتضحك بتعب : وراثة -مامي كانت كدة
ابيه عايزة أروح الباث روم
يقف يوسف ويساعد روتيلا -يشاهدهم صقر ويتبعهم
: خير
يوسف : رورو دايخة شوية وعايزة ترجع
صقر بقلق : تعبانة أخليهم يجهزوا اسعاف في المطار
: لأ...لأ اطمن هي بس بدوخ في الطيارة
خرجت روتيلا فمد صقر يدة على جبينها فبعدت ووقفت وراء يوسف
مسح صقر بيدة على وجهه في حركة متكررة يفعلها دائما عندما يغضب ليمنع انفجارة وتركهم وعاد لمقعده
نظر يوسف لروتيلا بنظرة عاتبة وبنبرة حانية : حبيبتي صقر جوزك
روتيلا وقد تخضب وجهها من الخجل وبصوت يكاد يسمع : عارفة
: روتيلا أنا مسافر الساعة 5 أنتي عارفة ميعاد مناقشة الرسالة أنا كدة هاسافر وأنا قلقان عليكي
: لأ خالص تروح وتيجي بالسلامة وخلاص يا أبيه مفيش داعي للقلق
يوسف يقبلها على جبينها : عارف إنك بنوتة شاطرة وعاقلة
كل ذلك تحت أنظار صقر الغاضبة وإحساس أخر لا يدرك ما هو
وايضا أنظار لميس
.....لميس ......
: شكلها دلوعة وهاتتعب أخوكي
سارة تضحك : مين روتيلا ...أبدا خالص دي لذيذة أوي - بس تعرفي يحق ليها لو اتدلعت
لميس : ليه أنا شايفاها عادية ربنا يستر ومتفضحناش وسط أصحابنا شايفة لبسها عامل إزاي
:مالة لبسها تايير شيك جدا وهي بصراحة محلياه أكثر
وبعدين نصيحة ليكي متتكلميش بالطريقة دي أدام يوسف واضح جدا إنها غالية عنده
لميس بضيق : أف عارفة
..................
وصلت الطائرة وتوجهوا جميعا لقصر صقر حيث أيضا حفل لميس
.......في القصر ........
الحفل الصغير من وجهة نظر عروستنا لميس كان ضخم من خلال عين الجميع - وهذا سبب توتر
: أنا حذرتك لميس أنا أسف أنا مش هاحضر معاكي - بعد أذنك صقر بيه ممكن مكان أصلي فية
: أه طبعا مروان مع يوسف
مروان : اتفضل يوسف
صقر معاتبا أخته التي تكاد تبكي : هو حذرك ؟
:.....
: أوكي اتحملي -روحي اقعدي مع ضيوفك شوية وبعدين أستأذني وروحي راضي جوزك وجهزي نفسك للسفر
لميس بترجي : صقر اقنعة
: لأ -ولأول مرة يلفت نظرة ما ترتدية واحدة من أخواته.. هو حذرك من المبالغة في الفستان والحفلة اتحملي خطأك
ذهبت سارة ولميس للخارج
أم صقر :طيب روتيلا هاتحضر معاهم
ينظر صقر لروتيلا الجالسة وهي واضعة يدها على عينها وجبهتها
: لأ
أم صقر : على فكرة أنا هأجل إعلان زواجك بعد ما تيجي من السفر
: لية
أم صقر بصوت هادي : ليه إية يا حبيبي يعني أنت شايفها عادي تتجوز انهاردة وتسافر بكرة
صقر وهو لا يزال عينة على روتيلا : اللي تشوفية
: لما ترجع ننظم حفلة كبيرة نعلن فيها جوازك
صقر لم ينتبهة لأمه ونادى على روتيلا : روتيلا
: ....
: روتيلا
قام ليجلس بجانبها ففوجئ بها تميل برأسها مغشيا عليها
صقر وهو يحملها بسرعة لجناحة يخاطب أمة المتوترة : ماما بسرعة أكيد ريهام برة ناديها بسرعة
صقر يكاد يجن خارج غرفتة منتظرا أحد منهم يخرج يطمأنه
: الحمد لله اطمن
: خير يا ريهام
:صدقني كويسة بس هي ضعيفة شوية وعلاجها كان كوباية حليب آنتي شربتها ليها وملعقة عسل وهي نايمة زي البيبيهات دلوقتي
صقر وهو لازال قلق : نوديها المستشفى أحسن نعملها تحاليل شاملة
: لأ خالص اهدى أنا أول مرة أشوفك كدة ..وتابعت تغيظة وهي ضاحكة ...
بس على رأي عمر بجد البنت تجنن
صقر بحدة : عارفة أنا هادبح عمر أخوكي ده
تضحك ريهام عاليا : عشت اليوم اللي شوفت فيه صقر الجارحي يحب ده محمود هايفرح للخبر ده أوي
صقر برفض :حب إيه كل الحكاية البنت أمانه
ريهام ضاحكة : ايوة ...أيوة ... كلنا بنقول كدة ...
لحظة رايح فين
.......مي .......
كانت تنظر للفتاة النائمة وهي مبهورة من جمالها شافت فيها برائة وملائكية نادرة
: ماما روحي وأنا هافضل معاها
: لأ يا حبيبتي
يدخل صقر المتوتر من كلام ريهام والقلق على جوهرتة : عاملة إيه دلوقتي
مي : الحمد لله يا حبيبي
يقترب من سريرها ويسرح فيها فترة
: ماما هي هاتصحى إمتي
لم يجد رد لأنهم خرجوا وتركوه معها تقدم وجلس بجانبها ومسح على شعرها فترة وهو يحاول أن يسمي ما يشعر به نحوها
فهذة الصغيرة تجعلة يظهر مشاعر لم يكن يدري إنها موجودة عنده ..
الكل لاحظ ..
وعند هذه الفكرة وقف الصقر منتفضا : لأ مستحيل ...مستحيل أنا صقر الجارحي مستحيل تتحكم فيه عواطفة مستحيل تتحكم في أمرأة لأ .....طفلة
ويخرج مندفعا فتستيقظ روتيلا وتجلس على السرير
وجد أمه ومي بالخارج جلس معهم : خلوا حد يجهزلي شنطة سفر لأسبوعين
: بس مش أفضل تأجل السفرشوية
صقر : لأ ..أنا شغلي مستحيل يتأجل
أم صقر بحيرة : بس يا ابني مراتك
صقر بحدة يحاول أن يتجاهل بيها مشاعرة أو يداريها : ماما لو سمحتي إنتي عارفة مكنتش بفكر اتجوز ولولا الصلح وشروطة كنت زماني رايق دلوقتي ولو كنت فكرت في الجواز كنت أكيد مش هاتجوز واحدة محتاجة بيبي سيتر مش زوج
صمت صقر عندما شهقت مي وعرف أن روتيلا تقف خلفة وسمعت كل حديثة
أم صقر : تعالي يا حبيبتي عاملة إية دلوقتي
:........
مي : روتيلا محتاجة يا حبيبتي حاجة
روتيلا بتوتر وهي تحاول أن تخرج صوتها : أيوة ......القبلة مش عارفة منين ....و كمان ...أنا ممكن أجهز الشنطة ......أنا كنت بجهز شنط أخواتي وخالد على طول
وقف صقر ونظر لها قليلاً و في نفسة ( أخواتك وخالد )ثم خرج من الجناح دون أن يرد عليها مغلقا الباب خلفة بقوة
......لميس ........
حاولت أن تظهر سعيدة وسط صديقاتها ثم تركت الحفل وذهبت ليوسف : حبيبي أخبارك إيه ؟
: اتبسطي
لميس بحزن : لأ طبعا اتبسط إزاي وحبيبي زعلان مني ..أنا أسفة
يوسف يمسك أيدها ويقبلها :حبيبتي أنا كمان أسف كان المفروض أراعي رغبتك في الحفلة بس أنتي عارفة الأسبوع اللي فات كنت أزاي مضغوط وكمان روتيلا وقلقي عليها
لميس : .....
يوسف : حبيبتي مالك
لميس : أبدا بس مش شايف إنك شوية بتبالغ في حماية أختك
: أبدا عادي ومتنسيش أنا حاسس من ناحيتها بالذنب فلولا اتصالي بالشيخ سالم وأقتراح الصلح بالنسب كانت زمانها بعيده عن كل ده بتكمل دراستها وبتحقق أحلامها كانت عايزة تسافر ألمانيا تكمل دراستها تفتكري صقر ممكن يسمح ليها بكده
لميس بزعل : يوسف حبيبي عمي السبب مش انت وبعدين أنا هو قدامك صقر سمحلي
: صدقيني مع روتيلا مستحيل هايسمحلها
: ليه بقى
: لأن الزوجة غير
لميس بدلع : يعني أنا لومكانها مكنتش هاتسمحلي أكمل
: لأ طبعا مجنون أنا أبعدك عني
تقف لميس وتشد يدة ليقف معها : متقلقش عليها مع صقر هو كان مفيش أحن منه وكمان صبور جدا علينا متتصورش أد أيه... وكفاية كلام عليهم وتعال نجهز نفسنا لشهر العسل
........جناح صقر ........
بعد توضيبها لشنطة صقر اتوضت وهي تمسك إسدال الصلاة دخل صقر الذي نظر لها قليلا
: اقعدي
جلست روتيلا وهو ظل واقفا واضعا يدة في جيب بنطلونه
: احنا محتاجين أننا نتكلم مع بعض شوية بس الوقت ضيق إن شاء الله بعد ما أرجع في حاجات كتير أحب أفهمها ليكي وتوجيهات مهمه لازم تلتزمي بيها .. لكن مبدئيا أنا مسافر تقريبا أسبوعين عايزك الفترة دي تتعرفي على والدتي كويس وأخواتي وعلى نظام البيت وطبيعة الحياة فيه -ده هايسهل عليكي أكيد الحياة هنا
وبحدة قليلا وصوت أعلى :ولو سمحتي لما أكلمك على الأقل تبصي ليا
عندما لم يجد استجابة لكلامة : أنتي سمعتي قلت إية
روتيلا وهي تبلع ريقها وتحاول ترفع رأسها وتنظر له : أيوة
صقر وهو ينظر لحقيبتة : إنتي جهزتيها
اومأت برأسها بنعم :............
: مسمعتش
مرة أخري لا تستطيع النظر له أو الكلام
صقر يتنهد : روتيلا لو سمحتي ارفعي راسك وكلميني
تتجمع الدموع بعينها وتظل كما هي
صقر وهو يتحرك لغرفة الملابس : يالله - طفلة فعلا طفلة - أنا الظاهر هاتعب معاكي أكتر ما كنت اتصور
ظلت روتيلا مكانها وهي في قمة الحزن والحرج اخوها سافر وهي وحدها معه قالت في نفسها : لازم أحاول
عندما خرج صقر من غرفة الملابس ومتوجه للحمام أوقفة صوت روتيلا : أأنا أسفة
نظر لها صقر مستفهما : .........
:أأنا بس عارفة أن بابا حذرك ..عن أأنا ..وسكتت قليلا مع تقدم صقر نحوها فقامت من مكانها
صقر باستفهام : عايزة تقولي إيه ؟؟
روتيلا بتوتر وتلعثم : أقصد إنك .. أقصد أنا ..يعني بابا قالك
صقر يحثها على الكلام : أيوه سامعك
: قالك يعني إني صغيرة وأأنت مسمعتش
ثم أطلقت زفير قوي دليل على المجهود الذي بزلته
صقر ضحك بتسلية وخبث مفاجئ : وإنتي زعلانه علشان قلت عليكي طفلة
روتيلا مستغربة ضحكة : لأ ..أقصد بابا مش ..
صقر يقرب أكثر منها : عموما أنا يسعدني جدا لما أرجع من السفر تثبتي ليا العكس وظل ينظر لها وينظر للسرير
وفي لحظة بهت روتيلا تماما وشحب لونها وانقطع نفسها لدرجة أن صقر خاف عليها وأخذ ماء من على الكوميدينو ورشه عليها : روتيلا ..روتيلا حبيبتي خدي نفسك خدي نفسك
أخيرا تنفست بالراحة ونظرت له ودمعها مغرقة وجهها : أنا أقصد بابا مخدعكش وأنت اللي صممت
وجرت ودخلت الحمام تسبقها شهقاتها
صقر : غبي ...غبي ...هي ببرائة بتعرفني حقيقة زواجي وأصراري عليها وأنا أعاملها بخبث زيها زي اللي بعرفهم غبي
..........................
.....بعد عدة أيام ........
روتيلا استطاعت أن تتغلب على خجلها قليلا وتتنقل في البيت بحرية أكثرساعدها في ذلك حنية أم صقر وخفة دم سارة وأيضا أطفال مي الذين دخلا قلبها فورا عند
رؤيتهم نست أو تناست صقر -تتصل يوميا بوالدها قبل صلاة الفجر وبعد صلاة العشاء كالعادة لتكون هي أول وأخر شئ يسمعه الشيخ هكذا يقول لها
وتتواصل أيضا مع خالد بجميع وسائل الإتصال وأصبحت سارة تشاركها الضحك على هذه الرسائل التي يتفنن فيها خالد لأدخال البهجة لنفسها
أما صقر فكان يتواصل مع أمه دائما لتخبرة عن تقدم روتيلا واندماجها معهم دون أن يحاول أن يكلمها فبعد أخر موقف معها قرر أن يقف مع نفسة وقفة طويلة حتى يحاول
يفهم مشاعرة لدرجة أنه بعد أن أخذ زوجتة العرفي سمر معه يومين فقط رجعها مصر ثانيا ..
وأم صقر كانت أيضا سعيدة بوجود كنتها الجميلة والتي شدها إليها بالإضافة لجمالها الخارجي رقة طبع وجمال داخلي لا يقل جمالا عن جمالها الخارجي
: ربنا يبلغني اليوم اللي أشوف فية أولادك يا صقر يا ابني
.......مي ........
اليوم عاد زوجها من السفر فهو في سفر دائم هذه الفترة لسنغافورة يفتح مكتب لشركة عمها التي يديرها ياسين زوجها بكفاءة عالية
: أخبار العرسان إية ؟
مي : تمام لميس بتكلمنا مبسوطة وصقر لسة مسافر
ياسين يضحك : للدرجة دي بابا ورط صقر في الجوازة دي يسافر تاني يوم
مي مدافعة : لأ حرام عليك إنت لو شفتها يا حبيبي مستحيل تقول دي ورطة
: إزاي
مي : حاجة كدة ولا في الخيال ملاك أنا عمري ما شفت الجمال ده _ أنا يا بنت أعجبت فيها فما بالك زوجها
: معقولة - غريبة صقر سافر ليه طيب ؟
مي : أنت عارف الجواز تم بسرعة وهو كان مرتب للسفر من زمان - بس أنا متأكدة إنه هايموت دلوقتي ويرجع
وتكمل وهي تضحك : أنا عمري ما شفت صقر كدة عصبي ومتوتر - صدقني داب فيها أول ما شافها
ياسين يضحك باستهزاء وحقد لعائلة الشيخ : غريبة الشيخ عندة بنت حلوة كدة
مي مندفعة : وأكتر دي متقولش عليها حلوة دي تقول عليها فتنه شعر واصل لأخر ضهرها ناعم حرير لونة بني على خصل ذهبي -أنا كنت فاكراها صبغاة بس هي حلفت ليا أنها عمرها ماحطت عليه صبغة
ولا لون عنيها خضرا وجواها لون كهرماني يظهر لما تضحك وشفايفها تجنن ولا بياضها يعكس ضوء الشمس
عارف رموشها مش عادية جسمها ملفوف متحسش فيه عضمة من ليونتة وفي نفس الوقت جسمها مليكان --حقيقي تجنن -تجنن أكيد صقر بيدعي لعمي ليل نهار
ياسين الذي سرح تماماً وهو ينظر لزوجتة
: حبيبي ...حبيبي .. ياسين حبيبي مالك
ياسين ينتبهة لزوجتة ويبلع ريقة : لأ ...لأ .. يا حبيبتي كنتي بتقولي إية
: ياسين مالك أنا كنت بكلمك عن روتيلا
ياسين بعدم اهتمام وتوتر : مين روتيلا
: سبحان الله روتيلا مرات صقر
ياسين يقف في عجالة ويتجة لمكتبة في البيت : معلش يا حبيبتي عندي تليفون مهم لازم أعملة
مي : أف يا ربي شغل ..شغل
........نهاية الفصل العاشر..........
لا يجوز وصف محاسن المرأة ومفاتنها أمام الرجال، والحديث الذي ورد في ذلك حديث صحيح رواه البخاري عَنْ عَبْدِ اللَّهِ بْنِ مَسْعُودٍ رَضِيَ اللَّهُ عَنْهُ قَالَ: قَالَ النَّبِيُّ صَلَّى اللَّهُ عَلَيْهِ وَسَلَّمَ: لَا تُبَاشِرُ الْمَرْأَةُ الْمَرْأَةَ فَتَنْعَتَهَا لِزَوْجِهَا كَأَنَّهُ يَنْظُرُ إِلَيْهَا.
|
03-01-16, 01:28 AM
جديد مواضيع قسم القصص المكتمله من وحي قلم الاعضاء
العرض العادي
