كاتب الموضوع :
عجااايب
المنتدى :
القصص المكتمله من وحي قلم الاعضاء
رد: رواية نبي رد الثنا
ان شاء الله تستمتعون بالقراءه..
..البارت السادس عشر..
""قلت لك برجعها ومابطول شفتي كيف""
سحبت شفايفي جوة فمي وضغطت عليهم ماراح ابكي ماراح ابكي انا قويه وانا من نفسي غيرت راي وانا ابغى كذا ومتوقعه كذا حسية بغصه بحلقي بهذي اللحظه كرهت عمتي بقوه ليش تصر عليه كذا مع ان شخصيته قويه بس يسمع كلام امه ولا يرضى ع زعلها جد كرهتها ليش تهتم اذا هو مو مهتم ابدا اش بتستفيد هي ماقدرت اصبر اكثر اكون بينهم وكأني لعبه بين يدهم مشيت بخطوات سريعه ودخلت الغرفه بدون مااطالع بأحد ماينفع اطلع من البيت جربت ومااستفدت شي الا رجعت بشكل ابشع كرهته بعد حبي واضح له وهو مستغله بالطول والعرض وانا الغبيه عارف اني بنتظره وانه مابيتأخر شوي ويجي لو ماقدمت له شي كان جينا اسرع فسخت عبايتي بعنف احس عقلي عقل طفله كلمه ترضيها واغير قناعاتي بثواني غمضت عيوني بيأس اذا انا مو حابه شخصيتي كيف بيحبني هو انسدحت وانا امسح عيوني بقوه من قبل ماتنزل الدموع حاسه بأحساس بشع وقت مايحتاج شي يتعدل اسلوبه انسدحت ع بطني ودفنت وجهي بالمخده ماابغى يشوف خيبة املي تعبت واحنا لسى بالبدايه كيف بعدين بتحمل سمعت لما الباب انفتح اكرهه واكره اسلوبه واكره تصرفاته اكرهه سمعته يقول""ليه مارديتي ع امي لما كلمتك دخلتي بدون ماتردين""
انا بصراحه ماسمعتها بس ليه ارد عليها اشكرها يعني علشانها قالت له روح جيب زوجتك من الصبح راحت هو شكله حاس بالفخر ان الفكره مو فكرته قال بستنكار واضح لاني مارديت عليه ولا تحركت""مانمتي عارف مايمديك والحين جاوبي لا تتهربين ليش ماتردين عليها التطنيش مو اسلوب""
بس اللعب والغش اسلوب بس الاهانه اسلوب والتهرب هو الفن الوحيد الي اتقنه لا يكلمني لاني ماراح ارد عليه الحين ابغاه ينسدح ويسكت يسكر فمه عن تعبيراته الفريده لما حسيت بيده ع كتفي وهو يقول بعصبيه""رؤيا ا......""
بعدت عن يده بعنف وسرعه وجلست ع حافت السرير من الجهه الثانيه ع ركبتي من الاندفاع والكبت والسكوت عليه وقلت بعصبيه وبصوت عالي والدموع تحرق عيوني وانا اطالع فيه بحقد""لا تلمسني لا تقرب مني خليك بعيد ماابغاك ولا ابغى العيشه معاك ولا ابغى طاريك اطلع من الغرفه ماابغاك""
قلتها بصوت واضح مع اني مو مسيطره ع تصرفي كان صدري يطلع وينزل بقوه من تنفسي الي اخذه بصعوبه من العصبيه انفجرت بوجهه ثرت اسلوبه استفزني تحكم بأعصابي معصب لاني مارديت ع امه الي لها الفضل بتعاستي هذي ليتها ماأختارتني لولدها ليتني ماعرفتها اساسا تصلبت ملامح وجهه مع جسمه وقال بصوت هادي واضح""هذي غرفتي""
فهمت قمت وقفت ع السرير ومشيت عليه ونزلت ع الارض وعيوني ع الباب هذي غرفته يعني انا اطلع من عيوني بس هو سد الباب بجسمه وانا من السرعه ولان عيوني مركزه ع الباب غرفته واحد متزوج ويقول غرفتي مو غرفتنا صدمت فيه رجعت خطوه كانت الغضب مسيطر علي لدرجة مايهمني شي بهذي اللحظه قلت بدون مااطالع بعيونه""ابعد ابعد احسن لك""
بأكثر طريقه يكون امر حازم وتهديد قال بصوت رقيق""اش فيك رؤيا""
جمعت كفي بقبضه نفسي اضربه بفمه زاد غضبي انفجرت رجع لهذا الاسلوب ماني غبيه اقصد مو مره غبيه علشان تنفع معاه مره ثانيه يرجعني بهذا الاسلوب واجلس بالغرفه بهذا الاسلوب بعد ماراح اضربه بس ببعده عن الباب حطيت يدي ع كتفه اليسار وانا احاول ادفه لجة اليمين ابعد عن الباب طالعه من الغرفه يعني طالعه كان اصراري وكأن بالغرفه خطر حاسه نفسي خارجه عن السيطره بكل معنى الكلمه لان هذي مو تصرفاتي وانا احاول اقول""ابعد""
مع اني استخدم كل قوتي الي زاد بغضبي الا انه ماتحرك ومثبت نفسه بالارض مثل الجدار انقهرت شلت يدي من ع كتفه وطالعت فيه وانا احس راسي يغلي كان يطالع فيني وكأني مجنونه وقال بعيونه استغراب كبير""اش فيك تو جايه من بيتكم وراضيه تذكرتي يعني""
استغرابه كان كارثه مو عارف ليش ابغى اطلع مو حاس بطريقة بالكلام مو غلط اسلوبه الملتوي وتذكيره للموضوع الاساسي وكأنه شي مسلم منه ولازم ارضى هد حيلي رجعت خطوه مو عارفه شلون اتعامل معاه ولا شي يفيد فيه حطيت يدي ع جبهتي ومسحت عليها و ع بداية شعري وانا اللف بكامل جسمي ماعنده اسلوب الحين عرفت المعنى الحقيقي لكلمة مابيد حيله كل شي جربت ومافاد ابعد عنه اهرب اطنش اهتم مابقي الا الاستسلام حسيته مسك ذراعي ولفني له طالعت فيه بيأس وقلت بصوت اجوف""انت انسان صعب""
صعب مره مايهتم بشي ولا شي ولا حتى بذوق قال ولسى يده ع ذراعي""والله انتي الي صعبه انا اقول كل شي بصراحه لكن انتي لا فجاه تقلبين من غير مااعرف السبب(بعد يده عني وكمل)طفشت من اسلوبك""
رمشت كذا مره وانا ارجع شعري ورا اذني تدرون اش حسيت بهذي اللحظه مهما راح اوصف ماراح تدرون تمنيت تنشق الارض بس ماتبلعني انا تبلعه هو طفش من اسلوبي وهو ماقد جلس يوم كامل معاي لو حسبنا كل الساعات ماتكمل يوم غمضت عيوني بس بسرعه فتحتها بلعت ريقي بصعوبه وقلت بصوت يرتجف""اسفه ازعجتك""
بنهايه انا الي اعتذرت وين كنا ووصلنا لايش دايما اتفأجا اقصد بدايما اذا تكلمت معاه اتفاجا نوصل لأيش طفش وانا بعد طفشت من اسلوبه طفشت من طريقة حياتنا تقدم خطوه بس انا رجعت خطوه وانا امسح عيوني الي متجمع فيها الدموع مابغاه يقرب ابدا ولا ابغى اسمع صوته لما بعدت يدي عن عيوني قال بنبره مقنعه""خلينا نتفاهم تعالي""
بس لما فتح ذراعينه بدعوه صامته لاحضانه طالعت فيه شويه وانا احس بضطراب نتفاهم كذا مع اني عارفه انها ماراح تتكرر وراح اندم بعدين الا اني حركت راسي بطريقة لا وبقوه كل شي الا هذا الاسلوب صرت اكرهه مايستخدمه الا بطريقه غلط قال بحزم واثق""تعالي""
كانت بيننا مسافة ذراعه بس ماتحركت من مكاني كنت امنع نفسي اتقدم علشان كذا مااهتميت اني ابعد ع قد من اني رافضه هذي الطريقه الا اني كنت اتمنى بوقت ثاني علشان يحضني غمضت عيوني انكر حقي ومطلبي وامنيتي حركت راسي بطريقة لا بأصرار حسيت بقربه فتحت عيوني وحسيت بيده كانت ع مؤخرة رقبتي من ورا واصابعه بشعري ويده الثانيه ع ظهري طالعت بعيونه وقبل ماافهم شي سحبني له وحضني لا ماكان حضن كان عقاب ضغط بيده الي ع رقبتي بقوه لدرجة ماقدرت اتنفس وبيده الثانيه يشد بقوه حسيته بيكسر عظامي مع كذا ماطلعت صوت احتجاج ولا حركه تمنع كنت احس بسرعة ارتفاع صدره ونزوله وريحته تغلغلت بروحي كان احساسي بصلابة صدره وبقوة يده احساس عذب حسيت بهشاشتي وانوثتي مع خشونته رفعت يدي الثنتين وحاوط خصره برقه وكأني راضيه بالعقاب بس هو خفف ظغطه ع راسي وصار يدلك رقبتي بأبهامه برشاقه اخذت نفس عميق وكانت مشبعه منه حاسه اني مو بالارض طايره كان تدفع الدم بعروقي سريع استجابه لقلبي كل شي اختفى تعطل اي فكر بعقلي حاسه الجو ثقيل حاسه بأن الهواء اختفى كان كل شي موجود بالدنيا رماح وبس ارتجفت وانا احس بدقات قلبه كنت قريبه منه ارتجفت وانا احس بتأثيري عليه لانه شدني له اكثر رفعت يدي لظهره بسحب خفيف وقلت بتنهيد سعاده واكتفئ""رماح""
كان حضنه غير كان مشدود ودافي مرر اصابع يده ع العمود الفقري خلت جسمي يتكهرب كنت بعالم ثاني لما فجأه بعد عني كنت حاسه بدوخه ورجلي مو مستعده لوزني الي كان ع رماح توازنة وطالعت فيه ومشاعر الحب لسى بعيوني وواضح مو عارفه ليش بعد تقدمت خطوه بس هو مشى بتجاه السرير وهو يقول بصوت اجش""اذا مره ثانيه قلت لك تعالي تجين(انسدح ع السرير وانا عيوني عليه للحين ماانتهى السحر ماجمعت كمل)تأخرت بالنوم""
واعطاني ظهره كنت لسى واقفه مكاني اطالع فيه بنظرات ماكان يشوفها لو شافها كان عرف قد ايش انا تأثرت بكلامه فتحت الدولاب واخذت ملابس ودخلت الحمام وسكرت الباب انسدح جنبه ع السرير وانام مستحيل اخذت دش ابرد كل شي مشاعري قهري جرحي خلاص لا اكبر الموضوع هو كان عقاب وبس مو ذنبه اني حبيت العقاب انا حسيت فيه تأثر بس كيف قدر يسيطر ع نفسه بسيطه تذكر انك رؤيا جالس يتفنن بتجريحي كل مره ع جانب اسم ع مسمى يارماح طلعت من الحمام واخذت القرآن وطفيت النور بدون ماالتفت عليه وطلعت من الغرفه مافي نور كيف اقرا جلست بالصاله مابغى احلل اي شي فتحت القرآن وقريت حتى حسيت بالراحه من جديد بس ماراح ادخل ذيك الغرفه الي نفسي يغير اي شي فيها كرهتها حطيت القرآن ع الطاوله ودخلت المطبخ مع ان مالي نفس بشي بس علشان اسلي نفسي كانت الساعه اتوقع ثنين ونص فسويت طبخه صح ثقيله للفطور بس من زمان نفسي اسويها بس احسها طويله هذا وقتها وبعد ماخلصتها وحطيتها بالفرن رتبت الي خربته وطلعت من المطبخ كانت الساعه اربعه ونص جلست وشغلت التلفزيون بدون حماس بديت احس بكسل لو انسدح بس انام وانا مصره بعد مايطلع رماح من الغرفه سليت نفسي حتى الساعه خمسه وقمت سكرت الفرن وسويت حليب وانا اسمع الاذان جلست بالمطبخ ماابغى لما يطلع اشوفه او يشوفني واكسر خاطره لما سمعت الباب يتسكر طلعت وصحيت عمتي بدون ماافكر بأمس هي تحبني اكثر منه ورحت لزيدان وصحيته هو يصلي دايما بالمسجد الا الفجر مع انها الاهم وجهزت الفطور كنت اشغل نفسي لاخر نفس ما طالعت فيه لما دخل البيت وراح للغرفه يلبس لبس الدوام كنت مشغوله واكلت انا لقمتين قبل مايجي ولما حسيت ان خلاص يمديه لبس وبيطلع مشيت للغرفه بخطوات بطيئه ولما وصلت عند الباب انفتح وحده مارفعت عيوني بعدت علشان يمر بس مامر حسيت بيده ع ذقني وقبل مايرفع وجهي بعدت وجهي عن يده بعصبيه بدون مااطالع فيه ماادري ليه اعاقبه اني مااطالع فيه وهو يعاقبني يحضني عايله غريبه صح واول مامر بسرعه دخلت وسكرت الباب وراي انسدحت ع السرير وغمضت عيوني ونمت لاني تطمنت انه مو موجود بالبيت بعد ماقريت سورة الملك..
تأنقت اليوم اكثر من العاده بكثير وكأني اثبت له ولي ان رفضه ماعنى لي شي جلسنا ع غداء بدون مايصير بيننا كلام من رجع وهو ساكت ماعلق ع شكلي ولا حتى بنظره تقريبا ماشافني وهذا مااعجبني بس الي مااعجبني صدق لما قال""اليوم اصحابي عزموني ع طلعه للبر وزوجاتهم معاهم(طالع فيني بنظره عاديه ولا كأن بنينا شي)خليك جاهزه بعد صلاة العصر""
..نهاية البارت..
..عافاكم..
..عجايب..
الحمدلله.
....بٲذن الله لي حسنه ولك حسنه....
(تخيّل لو لم يبقى معك من نعمِ الله
إلّا الذي شكرتهُ عليها .. بالأمس ؟
- كم نحن مقصِّرون بالشكر.)ربي مااصبح بي من نعمة او بٲحدا من خلقك فهو منك وحدك لا شريك لك.لك الحمد ولك الشكر
|
12-09-14, 07:50 AM
جديد مواضيع قسم القصص المكتمله من وحي قلم الاعضاء
العرض العادي
