كاتب الموضوع :
عمر الغياب
المنتدى :
القصص المكتمله من وحي قلم الاعضاء
رد: المواجع والظنون
بعد اسبوعين..
وقوف سيارة ماجد بالمواقف تحت اسوار القصر.. الامطار التي تهطل بشدة..
ماجد: ادخلي داخل يا ملاك، عندي عملية ومضطر امشي الحين..
امسكت بيده: طمني عليك اول ما توصل، الجو ما يساعد يا ماجد..
ابتسم ماجد: وكلي أمرك لله.. وسلم لي على خالي وخالتي، وميمتك بعد
ابتسمت بحب: إن شاء الله يوصل.. تأمرني على شيء ثاني..
ماجد: سلامتك..
ملاك: ماجد لا تسرع ولي يسلمك ترى مالنا غيرك سند وعزوة
قبل يدها: روحي عسى الله يحفظكم ويخلكم لي.. يمكن أمر عليك بالليل..
لتهز رأسها وتترجل من السيارة متجهة نحو الباب الطويل.. لتدخل وتجد
ابنتها مستلقية على جحر جدتها وبكاء صقر ومناغاة صالح
وهم والتي بقيت صامتة في أجواء هكذه من ثم وضعية جمال
والذي جلس بجانب زوجته محتضن كفيها اقتربت منهم
وبحب: السلام عليكم..
لتهلل الفرحة بوجيه الكل
أم جمال: ارحبوا حي الله أم خالد..
احتضنت أمها وتشدها ملامح وهم المرهقة..
وبعقدة حاجبيها: يمه وش فيها وهم؟ وراه وجها كذا مخطوف..
تنهدت أم جمال: لا حول ولا قوة إلا بالله.. خالتها تعبت بـ السكتة الدماغية..
لتشهق ملاك وبفاجعة: لا حول ولا قوة إلا بالله..
اقتربت منها وهي ترى عيني وهم ساكنة لا سيما الاهداب ورعشة الدمع
ابتسمت بحب: وهم.. أم صقر انا وصلت
لترمش اكثر من مرة من ثم تنتبه على ملاك
وبهمس: مــــــلاك.. خالتي
واغمضت عينيها بإرهاق كبير..
لـ تحتضنها ملاك وبخوف كبير: بسم الله عليك.. يا روحي يا وهم تصبري وهذا انتِ المؤمنة المصلية.. صبرت على مصاب أبوك وأمك، قوي عزومك وأنا أختك، أمر المؤمن كله ابتلاء وخيره.. يعني يمكن لا عاشت تتوجع تبينها تتوجع يا وهم..
لتهز رأسها ودمع بـ مقلتيها وقسوة الحنين الذي يسود ما بقلبها: تعبت يا ملاك.. والله تعبت دعيت عليه بس والله ثم والله ما هقيت انه بـ يموت جاسم مات بسبب دعائي
لـ تصفعها ملاك بخد وهم
وتلك وكأنما سُكب عليها دلو من المياه..
ملاك: اصحي يا وهم وبطلي تفكرين في أوهام.. هذا اللي تقوي من عزومي.. ابد ما تمس لصلة وهم اللي اعرفها قوية وثقتها بالله كبيرة..
وهم بوجع حضنتها..
ملاك وهي تتأمل نظرة الخوف بـ عيني جمال.. وتبتسم له بحنان وهي تربت على كتفي وهم
وبهمس: مسكين أخوي بلاه مخترع من شكلك.. في احد يقابل زوجه بهالقميص الاسود كفانا الله شر.
سقطت عيني وهم وتتأمل في فستانها الاسود الخالي من أي زينة.. من ثم التفت لتنظر لـ جمال
الذي بدوره ابتسم لها بحب كبير..
وهي دون شعور بادلته الابتسامة..
جمال بفكاهية: اثر ملاك تأثر عليك، وانا لي اسبوع مقابل وجهك ومعطتني طاف كبير..
ضحكت ملاك وبخبث: ايه افا عليك يا ابو صقر، قم خذ مرتك وتوكلوا..
جمال قبل رأس أخته لتتراجع ملاك بخجل لـ يشدها جمال لحضنه
وبخبث وبهمس بين أذنيها: اعترفي ان مجيد مأثر عليك..
لتضحك ملاك وهي تلتقط خبث أخيها وبهمس: ارفق على وهم تراها قبل تكون زوجتك صحبتي وتوأم روحي وبنت عمي وش بعد
جمال: بل بل كلتيني من قشوري..
من ثم غمز لأمه وجدته: هالله الله في الصغار.. انا وزوجتي اجازة هالأيام..
لـ يشد وهم والتي بقيت مصدومة من جرأته أمام والداته..
لتعدل طرحة وتضعها برأسها متجهين للمصعد..
بينما ملاك والتي سلمت على جدتها من ثم احتضنت لولوة بكل شوق..
لولو: ماما لا عاد تغيبين عني..
ملاك وتدمع عينيها: يا روُحي ابشري كم لولو عندي أنا..
لولو بفرحة: يعني بتنامين عندي اليوم ماما..
ملاك وهي تعدل جديلة ابنتها: لا يا ماما بنروح البيت..
لولوة: أي بيت ماما.. بيت عم ماجد..
ملاك تهز رأسها: ايوه يكون بيتنا بعد..
لولوة: هو كبير زي كذا..
ابتسمت ملاك: ايه بس اصغر شوي..
دخول عبدالمحسن ليجدها
وبترحيب كبير: حي الله ملاك يا مرحبا بك..
لتقف وتسلم على رأسه ويده، لـ يشد يده
وبـ ابتسامة وهو يداعب ذقنه: أفا يا ذا العلم.. وراه مكبرتني؟! ترى خرجت قبلك للدنيا بـ خمس دقائق بس..
لتضحك ملاك: فديتك كيفك يا عبدالمحسن؟ ومبروك يابعدي..
ابتسم بحب: بخير يوم شفت هالوجه المبتسم، والله يبارك فيك..
ملاك: وش عليه بـتأخذ سوير يا اخوي..
ضحك لخبثها: ايه شفتي كيف؟ انتِ بشريني علومك مع أبو مقرن؟ عسى ما غثك بس..
ملاك: لبى قلبه.. أبو مقرن ما فيه مثله..
عبدالمحسن: هالله الله وينك يا ابو مقرن تسمع؟ بما انكِ جيت به مفاجأة وعساها تعجبك..
ملاك وهي تفتح عبائتها: ليه يا اخوي تكلف على نفسك الله يهديك..
عبدالمحسن وهو يمسك يدها، متجه للمصعد ليضغط على زر سادس، وخلال دقائق انفتحت بوابة المصعد
لتجد المدخل مزين بـ فخامة الورود الطبيعية بين زوايا المكان اعطى راحة واسترخاء..
ملاك تتسع عينيها: لا تقولها..
عبدالمحسن: وهذا البيت اللي حلمت فيه وتحقق مناك يا ملاك..
لتدمع عينيها وتحضنه: حسون ليه كلفت على نفسك وانت على وشك زواج؟
عبدالمحسن قبل رأسها: هذا شيء بسيط.. سمي بالله وادخلي برجلك اليمين..
لـ تدخل بقدمها اليمين يغلب على البيت كلاسيكية باللون البياض والبيج..
لـ يغمز عبدالمحسن لها: اللي عليك تقنعين أبو مقرن..
ملاك: يهبل البيت وشلون عرفت انه احب هاللون؟
عبدالمحسن: قلب المؤمن دليله ولا تنسين انك توأمي واحس فيك..
ملاك: جعلني ما اذوق حزنك يا عبدالمحسن.. عز الله سارة صبرت ونالت..
عبدالمحسن: أي صحيح على طاري سارة.. ابيك تشوفين وش محتاجة؟ وش اللي تبيه؟ لا تنسين انها بنت عمك..
رفعت حواجبها: علينا.. طيب يا الحنون يديك على خمس مئة ريال..
لـ يعطيها المبلغ.. وهي تضحك
وبهمس: امزح معك..
ليمسك يدها ويفتح باطنه: وهذه الف ريال.. فوقها
وغمز لها: الحين بعد ما تطمنت عليك بروح اريح شوي..
ملاك بحنان: تسلم يابعدي لا خلا ولا عدم
.
.
.
بعد مرور شهرين
في اكبر قاعة احتفالات..
أهازيج الفرح ورائحة العود الفاخر..
الشمعدانات، والورود الطبيعية تزين ممرات الكوشة..
في غرفة العرائس..
والتي تضم سارة وسلطانه وعد..
ملاك وهي تذكر الله: بسم الله عليك.. يا ما شاء الله تبارك الله وش هالزين حصنتوا انفسكم
سارة بتوتر: ملاك كيف شكلي؟
ملاك: جميلة ربي يحفظك..
ياسمين: بطلوا توتر يا عرايس..
وهم وهي تقبل وجنتي سلطانه: الليلة بـ تكتمل فرحتكم بلاها توتر وضيقة صدور
ياسمين ابتسمت: صدقتي يا أم صقر..
سارة بخوف: والله يا خوفي اطيح قدام امة لا إله إلا الله.. هو صحيح فيه حضور كثير..
ملاك تكتم ضحكتها: ما عليك انتِ بطلي هالتوتر وكل الأمور تصير زينة..
سلطانه بخوف ويديها ترتعش: انا مابي انزف..
وهم والتي تشعر بها لتبتسم لها: وش اللي ما تبين.. كل وحدة لها نص ساعة تنزف ثم مع رجلها..
ياسمين: قسم اشكالكم راحين لمذبحة روقو..
وهي تمسك بكوب العصير الانيق، وتعطيه بداية بـ سلطانه
لتبتسم لها: تفضلي يا حرم بدر..
سلطانه: ما اشتهي..
وهم بحنان: لا يا بعد قلبي اشربي بلي ريقك شوي.. هاتي ياسمين
لتأخذ الكوب وتعطيها سلطانه التي رشفت..
بينما ياسمين ابتسمت لها: يالله يا حرم عبدالمحسن..
ملاك: سارة والله ما له داعي هالخوف كله.. وبعدين ما انتِ بواثقة بنفسك.. زين مكملك ما شاء الله..
سارة بحزن تغمض عينيها وبداخلها: الله يرحمك يا أخوي..
لتأخذ كوب العصير...
من ثم تتبعها بـ وعد..
بعد ساعتين ونصف..
كانت تجلس على كوشتها من بعد اكثر من ساعات متواصلة بالتصوير ، لـ تصور مع وهم وملاك وياسمين
سارة بتوتر: هو أنا أول وحدة ليه ما خليتوني الأخيرة..
وهم ابتسمت لها: ياللا يا سوير وبلاش هبال. خليك ثقل والرزين مثل ما تدربتِ من قبل..
سارة: يا عزتي لك يا سوير.. طيب سلطانه المفروض قبلي هي اكبر وحده فينا..
ملاك بحب: ما عليه عبدالمحسن مستعجل.. ورافض بعد تصوير..
سارة بضيق: وشو..
ياسمين: ما عليه يا سارة اهم شيء انكِ تصورتِ انتِ..
وترقص ياسمين بفستان دانتيل باللون الزيتي أنقاتها لا تضاهى الليلة، وتتمايل معها وهم والتي ترتدي فستان من شيفون باللون الخربزي، وملاك والتي تبتسم لهن تتأنق باللون البحري الداكن..
.
.
.
على الجانب الآخر..
جمال: والله من قدكم الليلة ثلاث عرسان ما شاء الله تبارك الله..
ماجد ابتسم: أي والله.. الا يا أبو صقر..
جمال: سم يا أبو مقرن..
ماجد: ما عليك زود.. خالي يناديك..
جمال انتبه على أبيه ليذهب له.. وقبل رأسه
وبمحبة: آمر يا أبوي
أبو جمال: العشاء يا ابوك جاهز..
جمال: ايه يا أبوي جاهز.. كل الأمور زينة..
من ثم باشر الحضور: يا جماعة الخير العشاء جاهز اقلطوا..
بينما عند عبدالمحسن والذي يشد بشته الاسود بفخامة ويعدل نسفة شماغه..
بدر والذي انتبه على توتر اخيه: محسين وراك يا أخوك..
عبدالمحسن بضيق: يخي ماله داعي هالتكلفة..
ابتسم بدر: ما عليه يا أخوك وراه كذا ضايق صدرك تبي تهرب بنت عمي من هالوجه..
عبدالمحسن: اسكت يا شيخ يكفي اني متوتر..
بدر: ما عليه خلي الحياة عندك ايزي..
أبو جمال اقترب منهم: ها عبدالمحسن ندخل على عروسك
ليقف عبدالمحسن: أي يبه توكل على الله.
أبو جمال: هذاني اقولها مرة ثانية لا تجرح بنت عمك في يوم..
ابتسم عبدالمحسن: تأمر يا أبو جمال..
ويقبل رأس أبيه وبدوره يبتسم له: بارك الله فيك.. ما عليك خوف الله يستر عليك..
.
.
.
بعد نصف ساعة
لمح تلك الواقفة بفستان ابيض كـ حكاية ألف ليلة وليلة.. شد الخطوات ليسلم على والداته من ثم اخواته
والفرح يعانقهن جمعياً، من ثم اقترب من عروسه
لـ يتأمل عينيها وزينتها الناعمة الهادئة..
ابتسم وقبل جبينها وبهمس: مبروك..
سارة التي شدت على باقة وردة التوليب، وبهمس مماثل: الله يبارك فيك..
وخلال دقائق
كانت ترتدي عباءتها بمساعدة والداتها ودمع الذي بات قريبا من الخد
أم زيد: الله يستر عليتس ويوفقتس يا بنتي..
سارة: يمه فديتس تراني بخير لا تقلقين علي..
عبدالمحسن وهو يقبل رأس والداته ثم خالته..
أم زيد: يا امتس يا عبدالمحسن حطها بعيونك..
عبدالمحسن: ابشري بالخير يا خالتي..
امسك بها لـ يتجه نحو سيارة.. حتى تصعد ويغلق الباب، من ثم صعد هو مبتعداً عن القاعة..
.
.
.
وعد من الخوف رفضت أن تنزف حتى تذهب مع زوجها دون زفة..
أم عبدالعزيز: يا امك يا نواف حافظ عليها..
نواف ابتسم: بعيوني يا خالتي.. بشريني على سلطانه عساها بخير..
ابتسمت أم عبدالعزيز: بخير حمولتها معهم ما يقصرون.. لا تخاف يا امك..
قبلت والداتها وبكاءها من ثم ذهبت مع نواف..
وقبله بدقائق عند الرجال..
بدر: نواف يا اخوك استهدي بالله..
نواف: بدر حافظ عليها وحطها بعيونك، ولا تنسى انها خايفة..
ابتسم بدر: بعيوني يا نواف لا تفكر فيها خلك بـ ليلتك..
نواف وهو يربت على كتف صاحبه وبـ ابتسامة: مبروك يا أخوك مين يصدق انك بتأخذ اختي..
بدر: صحيح.. والله يبارك فيك.. ياللا اقلب وجهك وراه متأخرين؟
ضحك نواف: مثل ما وصيتك يا بدير ياويلك لا جات اختي زعلانه منك بيوم.. وقتها ما اعرفك
ابتسم بمحبة بدر: آها بس لا يكثر..
وهو يضبط بشته: وشلون شكلي ؟
نواف: لك هيبة والله رغم شخصيتك اللي تمثل العكس..
ضحك بدر: منك لله يا شيخ.. ياللا انقلع واخذ عروسك خلنا نشوف دربنا..
نواف سلم عليه متجه للحريم..
.
.
.
بعد ساعة ونصف..
بينما سلطانه والتي تنزف على قصيدة منسابة كـ ليل سرمدي
ممسكة بباقة الورد تحمل اللونين الابيض والليلكي..
تنظر للفرحة بمقلتي وهم وضحكة ملاك وتصفيق ياسمين.. لتجد خالتها واقفة عند احدى الكراسي وبجانبها أم علي، شدت خطواتها وقبلت رأسها من ثم يدها
أم جمال بهمس: مبروك يا بنتي..
سلطانه ابتسمت بتوتر: الله يبارك فيك يا خالتي..
من ثم قبلت أم علي، والتي ترتدي جلابيه فخمة باللون العناب..
وبفرحة عميقة: مبروتس يا بنتي جعله زواج مبارك ومنه المال ومنتس العيال..
ابتسمت بمحبة: الله يبارك فيك يا ميمتي.. ويخليك لنا..
من ثم تتجه على كوشتها يحاولون أن ترقص معهم لكنها على استحياء جلست على كوشتها والتي ممتلئة بالورد الطبيعي رائحة المكان وكأنما جنة دنيا..
ومن ثم تصور مع الجميع ملاك وَ وهم وياسمين.. وخلال دقائق وهم والتي نزلت من الكوشه لتجلس بـ عباءتها على احدى الكراسي..
لـ يدخل كل من أبو جمال وبدر.. على زفة
اقترب من والداته وجدته ليسلم عليهم من ثم احتضن اخواته..
لـ يجدها بفستان لؤلؤي بفخامة منثور بورود ناعمة.. القلادة الماسية والقرطين استدارة الخاتم والاسورة الناعمة التي تعانق معصمها..
قبل رأسها من ثم ابتسم للأهداب التي ترتعش: مبروك يا سلطانه..
وبتوتر: الله يبارك فيك..
لتجد أبو جمال شد الخطوات واقترب منها..
بدر: ها يبه هذا هي عروسي..
أبو جمال سلم عليها: مبروك يا خالك..
سلطانه بخجل كبير: الله يبارك فيك يا خال..
أبو جمال: ها يا بدر لا اشوف سلطانه زعلانه منك في يوم، وإلا والله ما انت بولدي..
قبل رأس ابيه: ابشر يا أبو جمال ما طلبت إلا عزك..
أبو جمال: الله يبارك فيكم، ويسعدكم..
لـ يأخذها ويحاول أن ترقص معه وبتشجيع ملاك وياسمين..
ضحكت ملاك: والله بدر مهو هين ما هقيته كذا..
ياسمين بـ ابتسامة: فديتهم لايقين لبعض، البنت راحت فيها..
.
.
.
بعد ساعة ونصف..
وهي تحتضن وهم، والتي تهمس بين اذنيها: لا تخافين يا قلبي.. ترى بدر ما فيه مثله مزوحي وبتسعدين معه..
سلطانه ببكاء: الله يستر..
أم جمال بمحبة: يا امتس اهِدي وانا اضمن لك بدر ربي يوفقكم ويزين حظكم..
سلمت على خالتها وترتدي عبائتها، لتخرج بمساعدة بدر وملاك..
لتصعد بالمقاعد التي بالخلف ويجلس بجانبها بدر والذي احتضن يدها الباردة بـ يده الدافئة
ملاك: بدير لا اوصيك على صديقتي حطها بعيونك تسمع..
بدر: ابشري بالخير..
لـ يحرك جمال سيارة ومبتسم: مبروك واعتبريني أخوك من الحين ان ضايقك أبو محمد بلغيني وابشري باللي يسعدك..
سلطانه بهمس: الله يبارك فيك..
بدر بهمس مماثل: سوسو تراني ما اعض لا تخافين مني..
سلطانه والتي التزمت الصمت..
.
.
.
بعد ساعتين..
بقصر أبو جمال – طابق سادس..
بغرفتها..
ملاك والتي تبعد القلادة والقرطين..
ماجد بتهكم: وراك كذا لابسه؟
ملاك: وش فيه لبسي ساتر وجميل...
ماجد: هاللون لا تلبسينه الا لي.. يبون يخطبونك ها..
لتضحك ملاك: أبو مقرن الله يهديك تراني مره وبعمر ثلاثين بعد، وين يخطبوني؟
ماجد: والله العصفورة قالت، وجاك العلم...
اقتربت منه وهي تقبل خديه: سم ولبيه عيوني.. تأمرني على شيء ثاني..
ماجد هز رأسه بضيق: لا..
ملاك: جد ماجد وش فيك؟ ليه مكدر نفسك وش له؟
سماع اخته سعاد بكلماتها والغيرة تشتعل بعروقه..
ماجد: ما فيني شيء.. أنا بنام تصبحين على خير..
لـ يستلقي على سرير ويشد لحافه مغلق الاضاءة التي بجانبه..
وبعقدة حاجبيها وبخبث: وانت من اهله عيوني..
تتجه نحو تبديل الملابس وأخذت قميص حريري باللون البياض من ثم شدت خطواتها لدورة المياه
لتزيل الميكاج من ثم أخذت دش دافئ لترتاح اعصابها، وتخرج وهي تشد روبها من برودة التكييف لتجده قد نام..
ملاك بهمس: ماجد حبيبي..
لـ يفتح عينه وينظر لها بتهكم: انتِ ليه ما تنامين
ليصمت ويجدها باللون الذي يعكس على ملامحها، ليلها الغجري الطويل..
امسك بها وبهمس: يا ويلك لو سمعت انك لبستي هاللون مرة ثانية
ملاك: طيب حبيبي من عيوني.. في مجال تخليني اشوف عيالي..
ابتعد عنها ماجد لتذهب وابتسامة لا تفارق ثغرها..
.
.
.
بعد مرور 5 سنوات
كانت تحاول أن تركض خلف ابنائها..
جمال بضحكة: يا بنت الحلال اجلسي، بـ تتعبين حيل..
وهم: أبو صقر الله يهديك يكفي متوجعة من هالحمل.. تكفى ما فيني ألبسهم من جديد لا يتسبحون بـ يغرقون المكان مويه..
جمال: روحي اجلسي عند امي وميمتي وعيالك معي..
وهم بخوف كبير: لا بالله انجنيت..
صقر: ماما شوفي كيف اطب..
لـ يقفز ويسبح بمهارة لـ يصل عند ابيه، وضحكات جمال يتردد كـ صدى بهذا المكان
وهم وهي تضع يدها على صدرها: الله لا يسامحك يا جمال كان بتهبل فيني أنا وعيالي.. خلهم يخرجون
صقر وبصراخ: ماما أنا كبير شوفي كيف؟
لـ يغطس داخل المياه..
وهم بخوف لتقوى على الوقوف ودمع يختنق بمحاجرها: جمــــــــــــــــال خاف الله فيني..
امسك بصقر: قم يا أبوك أمك متوعده فيني، وبعدين إن شاء الله وين انام الليلة معصي اجلس بالصالة.. اطلع انت واخوك يكفي تسبح..
لـ يخرجون متجهين إلا أمهم..
صالح والذي يرتعش برد، أمسكت المناشف لتمسح البلل..
وتمسك يده لتدخله نحو دورة المياه، ومن ثم نظرت لـ جمال والذي غرق بالضحك ويرسل قبلة عبر الهواء
لتبتسم وهم: الله يهديك بس قم اخرج انت بعد.. ملاك مسوية لنا المشاوي الحق عليه..
جمال: ما شاء الله على أم خالد ما تقصر دوم راعية واجب..
رفعت حاجبيها وهم: احلف بس.. يالله تعطيني صبر.. جمال قوم حبيبي خليني ارتاح شوي..
جمال: يا خوفك اللي ما له امه داعي.. قلت لك اجلسي عند الحريم وأنا لا تعبت جيتك..
لتسمع كلامه وتذهب نحو الصالة.. بعد ان غيرت ملابس اطفالها لتعبر الطابق الأول..
بعد أن سلمت على الجميع..
أم جمال: الله يهديك يا بنتي وراه ما جلستي..
وهم بتعب، وهي تشعر بـ آلام الطلق: وش اسوي يا خالتي ولدك مُصر إلا يجنني معه..
أم علي: الله يهديه.. قربي عيالتس خلهم يأكلون..
ملاك: يا بعدي حي، هلا والله بصقوري حبيبة عمه..
صقر بـ ابتسامة: خالتي انا بنتك لولو تصير حليلة لي..
لتضحك ملاك وهم والتي وضعت يدها على رأسها: يالله لا تسخط علينا..
أم جمال ضحكت: والله انه تصرفات أبوه اسم الله عليه، ما كمل 5 سنوات ومنطوقه مزيون وليدي..
لـ يحتضن جدته: ها يا جده تعطيني لولو لي..
لولوة: انا اكبر منك يا صغيرون..
صقر بضيق: مين قاله؟
أم جمال: انت لك ليان شوف وش زينها..
صقر يقلب بوجه: ليان صغيرة وانا ابي الكبيرة..
ليان ذات ثلاث سنوات..
لـ تدخل عليهم ياسمين، وهي التي تتألم من وجع
أم جمال: الله يهديك يا أم عناد، وراك جايه كذا..
ياسمين بتعب: يمه ظاهر بولد.. وعناد نايم وأبوه مسافر..
أم جمال: زين يا امك.. يا أم خالد ازهمي على أبو صقر..
ملاك وهي التي تترك سيخ الكباب: ابشري يمه.. ارتاحي ياسمين..
وهم: ظاهر الآلام الطلق
لتكتم وجعها هي الأخرى..
.
.
.
بعد ساعة ونصف..
تمت ولادة ديم ابنة جمال، وسديم ابنة حسين...
المباركات وباقات الورود، بين ممرات اجنحتهم...
دخول جمال لجناح زوجته، اقترب منها..
لطالما ضممت قلبه بين يديها حتى صار باطن كفيها هو نعيم جنته.. ولطالما كانت قريبة للحد
الذي أشعر معه بأنفاسها على غشاوة قلبه..
ما دامت عينيها تبتسم..
وهم: وينها ديم؟
جمال قبلة عميقة بجبينها: حمدلله على سلامتك، وديم قطعة منك تشبه لكِ كثير..
لتضحك بوجع: بعدي هي.. صقر وصالح مع مين ؟
أمسك خصلتها ليرجعها حول أذنها اليمنى
وقبل عينيها: بخير مع أم خالد.. يا ما شاء الله متفقين انتِ ويا أم عناد..
لتبتسم وهم: حسين جاء هي كانت قلقانه..
جمال: أفا عليك على اول طايرة جاي.. خبرك دوراته مطلوبة بالأماكن الاجنبية..
وهم: الله عوضها خير ياسمين..
جمال بحب: شدي حيلك وجبي لنا اخت لـ ديم..
وهم بضيق: تكفى لا توجعني بهالكلام، ما لك غير صقر وصالح وديم..
جمال: أي زين.. ارتاحي الحين ونامي..
وهم: ابي ديم.. كلمهم خلني ارضعها..
جمال: زين..
لـ يضغط على زر من ثم تأتي ديم
لا أحد ليفهم كيف أن سعادتها هي أن ترى ديم، أو أن تضم إلى صدرها طفلتها.. ونشوة التي تعانقها بحب كبير
شعرها ناعم، وصوتها التي تخرج من الحناجر كـ بُكاء جائعة
لا أحد يفهم كيف أنها تبكي وتضحك وتحزن وتنتشي بفعل كلمة
مـــــــاما..
.
.
.
تمت بحمد الله وفضله..
26/Sep
همسة أخيرة/ سامحت من اغتابِني وذكرني بسوء سواء بصفحتي بإذن الله تكون باللون البياض، واتمنى قراءة مُمتعة لكم وأن تكون الرواية ذكرى تستوطن قلوبكم، وعما قريب بإذن الله تنظرون إلي من غلاف كتاب..
بحفظ الله ولا تنسوني من دعواتكم الطيبة فعلًا احتاج لـ هالدعوات لا تحرموني منها، ولله الفضل كله ولا لي فضل لي بهذا العمل الذي وهبني بهذه الفكرة رغم قصة ملاك واقعية بحته رغم انني اضفت عليها بعض الخيال الذي يمس للواقعية، واتمنى أشوف ردود وتقييميات تسعدني ولأن بقرأ اكثر من مرة بكل ود وحب وامتنان كبير..
اللهم إن كانت عملاً حسنًا أغفر لي به سيئاتي وإن كان عملاً لا فائدة منه فـ يارب لا تجعلهُ بميزان سيئاتي، اللهم أغفر سلبياتها بإيجابيتها و أغفر لنا أخطاءنا وارحمنا .,
.
.
.
عمر الغياب
|
26-09-15, 04:39 PM
جديد مواضيع قسم القصص المكتمله من وحي قلم الاعضاء
العرض العادي
