كاتب الموضوع :
عمر الغياب
المنتدى :
القصص المكتمله من وحي قلم الاعضاء
رد: المواجع والظنون
البارت
-25-
.
.
.
يا ليل لا تعتب علي إذا رحلت مع النهار
فالنورس الحيران عاد لأرضه.. ما عاد يهفو للبحار
وأنامل الأيام يحنو نبضها
حتى دموع الأمس من فرحي.. تغار
وفمي تعانقه ابتسامات هجرن العمر حتى إنني
ما كنت أحسبها.. تحن إلى المزار
فالضوء لاح على ظلال العمر فانبثق النهار
* * *
يا ليل لا تعتب علي
فلقد نزفت رحيق عمري في يديك
وشعرت بالألم العميق يهزني في راحتيك
وشعرت أني طالما ألقيت أحزاني عليك
الآن أرحل عنك في أمل.. جديد
كم عاشت الآمال ترقص في خيالي.. من بعيد
و قضيت عمري كالصغير
يشتاق عيدا.. أي عيد
حتى رأيت القلب ينبض من جديد
لو كنت تعلم أنها مثل النهار
يوما ستلقاها معي..
سترى بأني لم أخنك و إنما
قلبي يحن.. إلى النهار
* * *
يا ليل لا تعتب علي..
قد كنت تعرف كم تعذبني خيالاتي
وتضحك.. في غباء
كم قلت لي إن الخيال جريمة الشعراء
و ظننت يوما أننا سنظل دوما.. أصدقاء
أنا زهرة عبث التراب بعطرها
ورحيق عمري تاه مثلك في الفضاء
يا ليل لا تعتب علي
أتراك تعرف لوعة الأشواق؟
و تنهد الليل الحزين و قال في ألم:
أنا يا صديقي أول العشاق
فلقد منحت الشمس عمري كله
وغرست حب الشمس في أعماقي
الشمس خانتني وراحت للقمر
و رأيتها يوما تحدق في الغروب إليه تحلم بالسهر
قالت: عشقت البدر لا تعتب
على من خان يوما أو هجر
فالحب معجزة القدر
لا ندري كيف يجئ.. أو يمضي كحلم.. منتظر
فتركتها و جعلت عمري واحة
يرتاح فيها الحائرون من البشر
العمر يوم ثم نرحل بعده
ونظل يرهقنا المسير
دعني أعيش ولو ليوم واحد
وأحب كالطفل.. الصغير
دعني أحس بأن عمري
مثل كل الناس يمضي.. كالغدير
دعني أحدق في عيون الفجر
يحملني.. إلى صبح منير
فلقد سئمت الحزن و الألم المرير
* * *
الآن لا تغضب إذا جاء الرحيل
و أترك رفاقك يعشقون الضوء في ظل النخيل
دع أغنيات الحب تملأ كل بيت
في ربى الأمل الظليل
لو كان قلبك مثل قلبي في الهوى
ما كان بعد الشمس عنك و زهدها
يغتال حبك.. للأصيل
* * *
يا ليل إن عاد الصحاب ليسألوا عني.. هنا
قل للصحاب بأنني
أصبحت أدرك.. من أنا
أنا لحظة سأعيشها
و أحس فيها من أنا؟!
فاروق جويده
.
.
.
ياسمين: حسين.. به شيء ما تعرفه..
لتشد البطانيه لحضنها: انا ماني بنت..
اغمض عينه وبتهكم ويتأمل نقش الحناء: وش قلتي ؟
ياسمين ابتعدت بخوف لتوليه ظهرها: تعرف طليق أم خالد
لـ يختنق الصوت وشموع تنطفئ
لـ يمسكها من معصمها: افهم ان
يصمت من هول الصدمة وتتسع عينه
ياسمين ببكاء وبوجع: اساسًا ما لك حق فيني.. إن شاء الله انحرق
شد وجهها: يـــــــــــــاسمين.. انا ماني طرطور عندك.. كيف قسى قلبك كذا، وكيف وصل لك.. كــــــــيف
ياسمين بدمعة: كنت وقتها بروحي بغرفتي.. ما دريت إلا مسدس فوق راسي كتم انفاسي حاولت اصرخ اضربه لكن.. لكن
لــ تسقط ياسمين وتصرخ: كــــــــــــافي مابي اتذكر.. حرام عليك..
حسين دمعت عينه وبقهر رجال: قولي وش صار بعدها يا كيف قدر يأخذك الخسيس..
ياسمين بضعف: اغمى علي من الخوف وصار اللي صار..
اقترب منها لـ يحضنها وتبكي بغصة: مت ما كنت قادرة انطق.. خفت ان اكون حامل.. بس كانت اوهام..
حسين بوجع وبصبر: اشششش.. الله قادر يجبر كسرك
ياسمين ببكاء مختنق: آآآآآآآآآآآآآآآه تعبانة يا حسين. والله تعبت
قبل رأسها وخديها وابتسم بحب: نامي الحين ارتاحي..
ياسمين بخوف ابتعدت منه: لا تقرب مني..
حسين: إن شاء الله نامي ياسمين..
لتغمض عينيها بتعب وتغلق الأباجورة التي بجانبها
ليجلس حسين على الاريكة والانوار الخافتة تعم الاجواء
وهدوء ما يسبق العاصفة
.
.
.
في الجهة الأخرى
متوترة تقف مقابل أمام المرآه تعكس صورة عروسة حزينة
لتخرج من دورة المياه ترتدي قميص حريري عسلي طويل ومحتشم وتربط روبها بإحكام..
ابتسم ماجد: نعيمًا..
رفعت عينيها وبخجل اردفت: الله ينعم عليك..
ماجد وهو يشير للكرسي الذي بجانبه: تعالي هنا يا ملاك
شدت خطواتها وبتوتر كبير جلست بقربه ليمسك يدها المرسومه بنقش الحناء
ابتسم: حلوه الحناء.. تراني ما اعض.. بما ان نوم مجافيك نسولف ازين..
ملاك بهدوء: وش نسولف فيه ؟
ماجد اغرق بـ عينيها وثغرها الفاتن ويثرثر بداخله
(خلف الله على امن جابتك.. كل هالزين لي يا جعلني ما انحرم منه.. ارفقي على قلبي الرهيف يا بنت الحلال)
ماجد: يعني وش اللي تحبين
ملاك بخوف ( هذا من جده بـ نقضي الليلة كلها سوالف ابي انام.. لي يومين عيا النوم يزورني وعيالي يارب تحفظهم من بكره اقول له يجبيهم لحضني ما اقدر ابعد عنهم أكثر من كذا.. أي لازم اقوله..)
ليهمس: مــــــــــلاك.. أم خالد انتِ معي
لتبتسم بتوتر: ايه ما يخالف بكره تجيب لي عيالي
ماجد رفع حاجبيه: عيالك..
ملاك: ايه تراني ما اقوى على بعدهم..
ماجد: ابشري وممكن تركزين معي شوي..
ليرفع خصلتها ويقبل خديها من ثم عنقها..
ملاك بصدود: انا آسفه بس ما اقدر.. والله ما اقدر
اغمض عينيه لـ يتنهد: اصبر يا مجيد..
ليردف بعدم اتزان: اجل احشمي عمرك ولا تلبسين هالملابس قدامي..
ابتعد عنها بجفاء.. لـ تمسك يده
وببحة: أبو مقرن ما كان قصدي.. بس
ماجد نظر لعينها: خلاص يا ام خالد.. تصبحين على خير
لـ يستلقي على سرير ويغطي نفسه بالبطانية، ويطفئ الاضاءة التي بجانبه..
لتقترب هي وبهدوء ومغمضة العنين.. تحاول ان تنام رغم انها مُتعبة
لـ تتقلب وبداخلها تثرثر..
(نامي يا مليك يارب سامحني)
لـ يمسك خصر الملاك
ماجد: يا ويلك لو سمعت لك حس
تشعر بأن قلبها للتو سوف يخرج..
ماجد وبهمس: من أول من شفت دمعة بـ عيونك وانا حلفت ما عاد هالعين تبكي.. حبيت فيك قوتك رغم ضعفك الظاهر لي.. اطوي صفحة الماضي يا ملاك وانسي وعيشي لحظتك..
ملاك تكتم شهقتها: ماجد..
ابتسم في ظلمة الجو الهادئ بينهم ليمسح على ليلها الطويل
ملاك: ما كنت اقصد اذي مشاعرك
لتتوسد صدره وتنام من جديد بروح ممتلئة حنين لطفلة لا تنام سوى بأحضان أبيها..
.
.
.
بجناح جمال..
وهم والتي لم تغير فستانها وبكاء صقر..
وهم وهي تقبل خديه: يا روحي نام انت شف اخوك صالح بسم الله عليه نام.. لا تعبني يا روح امك..
جمال ولج لـ يجدها تهدهد ابنه: صباح الخير..
ابتسمت وهم: هلا حبيبي.. وراك كذا تعبان..
جمال بهم: الله يستر عليهن.. كل وحده عند زوجها وربي يوفقهم ويهنيهم..
اقتربت منه لتطبع قبله على ذقنه: جعلني ما انحرم منك.. باين انك مرهق جهزت لك الحمام..
جمال قبل عينيها بكحل الفاحم: ياهي جميلة عيونك.. انا بعرف تحطين سحر بدورة المياه وش تحطين بالمويه
لتضحك بخبث: ابد خلطتي سرية.. الا عليك تأخذ لك دش دافئ.. وتروق
سقط عينه على صقر ليقبل خده: امك بتجنني يا ولد.. تعالي انتِ نزلت كذا بدون ما يتغطى هاليدين..
وهم: لا يا حبيبي كان عليه جاكيت.. بعدين وش اللي اجلس عاري.. لا تطول الهرجة وخلني انوم صقوري..
جمال: طيب.. شلت شيء ثقيل اليوم..
وهم بتعب تكتمه: لا عادي ما صار شيء
تنهد وبقل صبر: وهــــــــيم..
لتضحك بحب: هالاسم لميمتي وش له تسرقه..
جمال: لا تتهربين.. اعرفك عنيدة لي كلام ثاني معك..
وهم: يمكن اتأخر بشوف لولو وخلودي صعبة يجلسون عند خالتي..
جمال: أي روحي لي الله..
وهم وهي ترضع ابنها: أبو صقر لا تنسى دورة المياه الله لا يهينك..
ابتسم ويقبل ثغرها: من عيوني ولا تبطين علي..
وهم: إن شاء الله..
.
.
.
في ساعات الصباح الاولى
بالحديقة..
أم جمال: صبحك الله الخير يا خالتي..
لتجلس بجانبها..
أم علي: يا مرحبا حي هالصباح.. الا يا امتس وش بـ تطبخين اليوم ؟
ابتسم أبو جمال وهو يشد فنجان القهوة: ولا عليك أمر يمه.. بـ نذبح الذبايح..
ابتسمت أم علي: أي بالله.. اقول يا امك وش رأيك نسير على البر الجو هالايام يرد الروح..
أم جمال: أي والله يا صالح الجو حلو..
أبو جمال: ابشروا بالخير.. نعزم امورنا الليلة ونتوكل على الله..
أم علي: وازهم اخوك اللي ما عادني اشوفه..
أبو جمال: إن شاء الله يمه..
اقترب عبد المحسن وسلم على جدته من ثم امه وابيه: صبحكم الله بالخير..
أم علي: هلا والله بولدي.. يا ما شاء الله
ابتسم: عسى ما انحرم من ضحكتك يا ميمتي بشريني كيف حالك..
أم علي: طيبه طاب حالك.. انت يا ولد ما تبي تتزوج انت واخوك الاغبر بدير
كتم ضحكته: بدري يمه ..
أم جمال: أي بالله عليك فيه يا خالتي..
ام علي بغضب: انت ما تقولي وش اللي ناقصك.. وظيفتن ومتوظف وعندك بيت ما لك معاذير
ابتسم عبدالمحسن ويقبل راسها: جعلني ما خلا منك ما ودي في هالفترة مضغوط ماني حول زواج ومسؤولية..
أم علي: لا بالله.. اقول تخير الحين ما لك غير سارة بنت عمك..
أبو جمال بضيق: يا يمه هِدي ولي يسلمك لا يترفع عليك الضغط..
أم علي: عندك اعتراض على بنت عمك يا ولد..
عبد المحسن: ما عندي اعتراض مير انها مثل ياسمين وملاك..
أم علي تكزه بعكازها: يا الاغبر وشوله ياسمين وملاك.. هي بنت عمك مهيب محرمه عليك يوم انتس تقول انها مثل اخواتك..
ضحك عبدالمحسن: طيب موافق بس مهو الحين اجلي الموضوع..
أم علي: وش تأجيله خير البر عاجله.. صالح يا أمك ازهم على أخوك وخله يجيني ذا الحزه..
أبو جمال: ابشري..
أم علي: قم انت وخذ لك هديتن تناسبها مهو أي كلام
كتم ضحكته: ميمتي ما ودك ادور لك عريس
أم علي تشد نقابها: قم يا مسود الوجه.. بعد هالعمر ادور لي غير المرحوم قم لا بارك الله في الشيطان..
ليقف عبدالمحسن ويقهقه..
ويردف: اجل يا ميمتي اجلي الموضوع
أبو جمال: روح يا محسين..
.
.
.
بحلول الظهيرة
استيقظت من النوم لتجد رأسها ثقيل رمشت عينيها لتجد نفسها تتوسد بوسادة قاسية لـ تحاول أن تستوعب موقفها لتكتم شهقتها وبخجل ابعدت روحها..
ابتسم هو لـ يشدها لصدره: صباح الخير يا ملاك..
اغمضت عينيها والحمره يشتعل بالخدين وبداخلها تثرثر( يا فضحيتك يا ملاك نايمه بصدره وهذاني الخايفة لا والله اني ما استحي)
قبل عينيها: صح النوم يا كسوله.. هو كذا نومك ثقيل..
وبخجل وتوتر اردفت لتحاول أن تنهض لكن ممسكها بشدة
لتردف وتفتح عينها لتسقط على عينيه السوداء: آسفه ضايقتك بنومك..
ابتسم بخبث: ولك شخير كان بودي اسجله عشان تسمعين صدق لكن يدينك مقيدتني..
ملاك وتلمع الدمع بمقلتيها: صدق هالحكي مو من عادتي اشاخر يمكن لاني مانمت لي يومين..
لـ يضحك من قلبه.. وتسقط دمعتها
امسك نفسه من ثم قبل جبينها: أفا تبكين سامحيني يا روحي..
ملاك بخجل: ممكن ابي اروح دورة المياه..
ماجد: اوكيه..
لتبتعد عن احضانه وتشد خطواتها لدورة المياه وقفت أمام المرآه لتضع يديها على الخدين الساخنة ومورده
فتحت الصنبور لتغسل وجهها: اصحي يا ملاك.. وش فيك تخورينها من أول ليلة لا بالله جبت العيد وانتهيت..
هو طيب مثل ما قال جمال هو خويه واحكم فيه بتصرفاته.. ما تصرف مثل طارق
لتغمض عينيها بوجع.. لتتوضأ من جديد وتفرش اسنانها..
خرجت لترتجف من البرودة وتشد روبها..
ماجد: بردانة..
ابتسمت له: شوي..
أمسك الكونترول ليغلق التكييف..
ليتسم لها: جهزي نفسك بعد شوي بنمر على بيتنا غدانا اليوم عند الوالد..
ملاك: إن شاء الله..
امسكت عبائتها لتصلي الفجر من ثم الظهر..
فتحت حقيبة ملابسها صغيرة لتأخذ فستان باللون البندق وتجهز اغراضها..
.
.
.
بعد نصف ساعة
وقف سيارته امام بيته.. لـ يترجل ويجد فيصل ابن اخته..
ليدخل فيصل وبفرح: يمه.. جدي خالي وصل..
سعاد وهي ممسكه بالمبخرة: حياهم الله..
لتدخل ملاك بتوتر للبيت المتواضع بالنسبة لقصرهم الفخم..
سعاد بترحيب: حي الله العرسان تو ما نور المكان
تقدمت ملاك بخطوات لترفع نقابها وتسلم على سعاد
وبـ اتزان: تسلمين يا ام فيصل ومنور بـ اهله..
سعاد بـ ابتسامة: أي والله اقلطوا داخل..
ماجد: أفا كرتي انحرق ما به ترحيب لي يا ام فيصل..
سعاد بفكاهة: شعبت من وجهك..
أبو ماجد الذي كان يجلس بالكرسي لـ يقف ويقترب ماجد ويمسك بملاك من معصمها..
سلم على ابيه: يبه هذه ملاك..
ابتسم أبو ماجد وبمحبة: حي الله ملاك هلا ببنتي..
وبخجل وتوتر كبير لتنحني وتقبل رأسه ويده: ارتاح يا عمي..
أبو ماجد لا يستطيع الوقوف بسبب ألم مفاصله..
وابتسم: يابري حالي برياه..
كيف حالك يا عمك؟ عسى مجيد ما غثك بعلومه !
ابتسمت بخجل لتنظر لماجد: لا حمد لله امورنا زينه انت وشلونك ياعم ؟
أبو ماجد: لوني زين يا عسى ايامكم تزين..
سعاد: ارتاحي يا ملاك البيت بيتك..
ملاك نظرت لسعاد: ميخالف يا ام فيصل ابي دورة المياه..
سعاد ابتسمت: ايه حياك معي..
.
.
.
أبو ماجد: يا ما شاء الله، ها بشر يا ابوك عسى امورك زينه..
ابتسم ماجد وامسك يد ابيه وقبلها: بخير جعلني ما انحرم من شوفتك وانت سعيد.. انت طمني عن صحتك يا الغالي..
أبو ماجد: الحمد لله صحتي زينه..
ماجد: جعله دوم..
لـ يسحب فنجان قهوة ويمدها على ابيه
ويردف بـ ابتسامة: سم يا أبوي..
أبو ماجد: سلمت.. يا أبوك ازهم على سعاد..
ليقف ماجد: ابشر..
شد خطواته ويجدها تبعثر ليلها طويل الغجري وتضع طرحتها على رأسها
لـ يقبل خدي الورد..
وبشهقة: مـــاجد
ضحك: اشبك خفتي..
بداخلها: (هذا من اولها يخرعني.. ينعاف تاليها الله يستر)..
ماجد: الا وين ام فيصل؟
ابتسمت بثقل: بالمطبخ..
ماجد: اجلسي عند الوالد.. وأنا بشوف سعاد
لتهز رأسها..
.
.
.
بالقصر - بالمجالس الرجال
أبو جمال: حي الله ولدي..
ابتسم حسين: الله يبقيك ياعمي.. عساك طيب..
أبو جمال: الحمد لله، وشلونك يا أبوك..
ابتسمت بوجع: بخير يا أبوي.. إلا وين عبدالمحسن وبدر ؟
أبو جمال: كل واحد بعمله.. عسى حسين ما ضايقك
ياسمين: ما به ضيقه يبه.. أجل أنا بشوف امي وميمتي..
أبو جمال: روحي الله يستر عليك..
لتبعد عنهم.. ونظر أبو جمال لأبن اخيه..
ليردف: أبو عناد
ابتسم: لبيه يا عم..
أبو جمال وبفطنة: وراه تقل فرحتك مقتولة
ابتسم ببهوت: ابد يا عم.. ما بي الا العافية
وبهمس: يا عمك وجهك تعبان.. اسمعني يا ولدي فيه سالفه ما عرفتها ويحز بخاطري
لـ يقاطعه ويسلم على رأس عمه: فديتك يا عمي اعتبرها وصلت.. وياسمين هي روحي يا عمي والله قادر يمسح على صدرها وصدري ولا تضايق نفسك..
ابتسم براحة: هقوتي ما خاب ظني فيك.. يا عمك هذه تذاكر السفر.. شهر عسل
حسين بضيق: ليه يا عمي كلفت على نفسك..
ابتسم بمحبة: انت ولدي وهي بنتي تهقى وش بتكون هديتكم ؟
حسين: خيرك سابق يا عمي..
أبو جمال: وبيتك بدور الرابع من يومي وانا مجهزها لك.. الا عليك تختار ديكوركم وهالخرابيط..
حسين: مالك لواء يا عمي.. بشف لي شقة مفروشة لين ما يفرجها الله ويفتح علي من اوسع ابوابه..
أبو جمال طبطب على كتفه: ما عليه يا عمك.. انت ولدي يا حسين لك مثل جمال وعبدالمحسن وبدر..
حسين: عساني ما انحرم منك ياعمي..
.
.
.
بالصالة
سارة: هلا والله بالعروسة
ابتسمت بوجع وسملت علي سارة من ثم خالتها لـ تنتهي بجدتها، وتجلس بجنابها..
أم علي: ها وش لونتس يا بنتي..
ياسمين: بخير يا ميمتي..
أم علي: ياسمين يا امتس سنعي لي هالراديو
ابتسمت: ابشري..
لتضعها على الاذاعة الاخبار..
..: تمت الاعدام طارق بن مساعد الحامدي.. وذلك بتهمة تهريب المخدرات والاغتصاب..
أم علي بفطنة: مهو طارق طليق ملاك..
ياسمين بوجع: الا هو يمه..
أم علي: الحمد لله.. اللي الله فكنا من شره اعوذ بالله..
ياسمين: وينها أم صقر ؟
أم جمال: مع عيالها عسى الله يسعدها.. واخيرًا شفت وليدي مرتاح..
أم زيد: عسى الله يديمها لهن يا فاطمة..
أم جمال: وتتكمل فرحتنا بموافقة العروس..
لتخجل سارة وتنهض من مكانها..
ياسمين: في اخبار زينة بشروني..
أم جمال: اليوم بالصبح أبوك خطب سارة لـ عبدالمحسن..
ضحكت ياسمين: يا ما شاء الله.. والعروس استحت..
لتتوعد بها سارة وتتجه معها لـ تجلس على احدى كراسي طاولة الطعام بالمطبخ..
ياسمين بخبث: حسون مثل أبوي طيب وحنين جعله طولة العمر..
سارة: لا والله.
ياسمين نظرت بعيني سارة: أي والله.. تعالي لا يكون بـ ترفضين
سارة تهز كتفيها: مدري..
ياسمين: استخيري وربي يكتب لك ما فيه الخير.. تعال نشوف وهم اكيد انها متوهقة..
سارة: قدام..
.
.
.
بالطابق الثالث – غرفة وهم
وضعت يديها على رأسها: صقوري يا عمري نام..
لتطرق الباب ياسمين وتفتحه بهدوء: أم صقر..
يغلب على غرفتها الكبيرة طابع البياض وكلاسيكة المكان يثير لها روقان
الطاولة البنية فوقها الأناء ممتلئة بالورود الجوري.. والشمعدانات المشتعلة باللون البياض..
لـ تجدها بمسافة اميال عند سريرها واقفة وتنفخ بخصلتها : تعالي ياسمين ربي جابك..
ياسمين اقتربت بخطوات وتكتم ضحكتها: وش فيك وراه كذا مهبله بنفسك..
وهم: جعل ربي يهديه صقر ذبحني من البارح عيا يسكت واخوك يا ما شاء الله عليه هج وخلاني بروحي..
ضحكت ياسمين لتشاركها سارة..
وهم بضيق: احلفوا بس والله بعدني ما نمت تعبانة..
ياسمين امسكت صقر لتهدهد وتغني له: صقوري يا روح عمتك انت.. اعوذ بالله وراه وجهك تقل طماطم..
ضحكت سارة: أي بالله صدقتي.. وصلوحي وينه روح خالته..
ياسمين: الخلا بس.. ابي اعرف وش له تكونين خالته..
سارة: يالليل النشبة يمي انا خالته وعمته ارتحتي..
ضحكت ياسمين: الله يكون بعونك يا أخوي.. وهيم سمعتي آخر الاخبار..
لـ تقرصها على فخذيها: ياسميــــن..
بخبث اردفت: سوير انخطبت لـ محسين لايقين على بعض مهو صحيح
ضحكت وهم لتدمع عينيها: أي بالله انا اشهد.. يا ما شاء الله تبارك الله وش الافراح اللي تهل علينا مثل المطر..
سارة: بايخين..
وهم: المهم ابي اخذ لي دش يروق مودي المتعكر..
سارة: ولا يهمتس فديت خالته انا صلوحي بـ يجلس عندي..
وياسمين: وانا بعد صقر معي عجلي لأن الغدا على وشك يجي من المطبخ..
وهم: يا فشلتي عند خالتي قلت بساعدها بس مثل ما انتو شايفين..
ياسمين: ازهلليها يامره.. وانجزي..
وهم: لبى قلوبكم والله.. البيت بيتكم به مكسرات وشاي بالترمس مجهزته..
سارة: يختي ما عليتس فينا اجهزي سريع..
لـ يتجهون نحو صالة التلفاز..
ويجدون الطاولة الدائرية البيضاء فوقها طبقات من الكيك ودلة القهوة وترمس الشاي..
لتضحك سارة: اقسم ان الحلا لذيذ.. انا بجيب عربيتهم ونأخذ راحتنا اكثر..
ياسمين: اوكيه هاتي صلوحي هنا..
وتجلس على الاريكة البيضاء..
خلال دقائق امسكت ياسمين بصقر لـ تضعه بالعربية هو واخيه..
سارة: ارتاحي انا اللي بـ صب لك قهوة..
امسكت دله بيدها اليسرى لتقدم لها فنجان القهوة
ابتسمت ياسمين والتي كانت ترتدي فستان طويل باللون الابيض والحمر برسومات معينة..
وبهمس: سلمتي..
سارة: اخبارتس وش لون زواج معتس ؟
ياسمين: الحمد لله.. هذاني اعيش يومي..
سارة: الله يوفقتس يا قلبي..
.
.
.
بعد نصف ساعة..
وهم التي اخذت دش دافئ.. من ثم ارتدت بلوزة عارية انيقة بها ورود كبيرة باللون السواد ومن ثم تنورة تصل لساقيها بذات اللون انتهت بالجاكيت الرسمي بنفس الخامة لتتجه للمرآه وتضع بضع المساحيق التجميلية وانتهت بوضع احمر شفاه باللون الخوخ.. لتفتح ليلها طويل والذي صبغته باللون الزيتوني لتسرح شعرها بـ الاستشوار وتضع عود اصفهان تحت اذنيها..
خرجت لتجد ياسمين وسارة يقهقهان
اقتربت منهم لتجلس بقرب بجانب سارة..
سارة: يا ما شاء الله وش هاللوك الجديد.. ترفقي على ولد عمي..
ابتسمت وهم: تسلمين يا سوير.. جد احس نفسي ماني متقبله صبغه الجديد مالها إلا يومين وتو بان لونها..
ياسمين: والله جميلة عليك ما شاء الله حمستيني اغير انا كمان..
سارة: لا بالعكس ياسمين الاسود لابق عليك اكثر من الصبغات..
وهم: عجبتكم الجلسة تراها وحده ونص..
ياسمين: يا ويلي من ميمتي انزلن والا العكاز بعلم بجنوبكم الليلة..
لتغرق وهم وسارة بالضحك..
وهم: والله ما تكتمل الجلسة الا بـ ملاك..
وبخبث: وش رأيك نزعجها سوير ؟
ياسمين: لا حرام عليك تلقينها عند حمولتها..
سارة بفكاهة: قــدام يا ام صقر.. ودي اسمع صوتها وهي خجول..
امسكت هاتفها لتتصل على ملاك.. لتجد الخط مشغول
نظرت لعيني سارة وبتهكم: شف ما به سحا الاخت مشغولة
ياسمين: يا خبيثة وهــيم بطلي..
لتهز رأسها بالرفض وتتصل مرة ومرتين حتى
رفعت الخط وبحيا: جعلك العافية يا وهيم..
ضحكت وهم: هلا والله بالعروس اللي من الحين ماتبي جلستنا.. تتغلين انتِ وهالوجه
ملاك: ضحكتي من سرك.. خلينا اشوف وجهك.. بعدين تعالي ما تعرفيني اني مشغولة
وهم بخبث: كيف مجيد عساه طيب انا اشهد انه منصرع منك ولا تنكرين..
ابتسمت بخجل: روحي وانتِ تفكيرك المتصدي..
وهم: لا تنسين تلبسين له الاحمر أبو ريش هديتي لك..
ملاك: انتِ اللي مبدله الشنطة.. طيب يا ام صقر مردوده لك الله لا يعوقني بشر..
ضحكت وهم: أي والله اجل ما أخذت لي قمصان قطنية وساترة.. اتركي ثقل عنك وهالله الله بالزين وتكشخ..
ياسمين بصوت عالٍ: ما عليك فيها يا أم خالد..
ملاك: اقلبي وجهك الحين فضحتيني عند الرجال..
وهم وهي تنظر لسارة: شف الله الله وصرنا نستحي..
ملاك: وهيم جعلك الصلاح وش مأخذه على هالمساء.. لا يكون هلوسة النوم بس..
وهم: ما فيني الا العافية.. ياللا ما اطول عليك وانتبهي على نفسك..
ابتسمت ملاك: إن شاء الله وهيم كيف عيالي طمنيني عليهم..
ابتسمت بحنو: ما بهم الا العافية خالتي ماهي مقصره وميمتي بعد..
ملاك: كلها كم يوم واجي لكم إن شاء الله..
وهم: على خير يا قلبي.. مع سلامه..
ملاك: يا هلا..
اغلقت من ملاك لتنظر لهن: وش فيكم..
ياسمين: سبحان اللي يتغير.. عسى الفرحة دوم معانقتك
وهم: تسلمين يا قلبي.. خلينا ننزل..
لـ ينهضون من امكانهم متجهين للطابق الارضي بالمصعد..
وهم تدفع عربية ابنائها لتسلم على الجالسين..
أم جمال: حي الله بنيتي.. قربي عيالك
وهم وهي تعطيها صقر: سامحيني يا خالتي ادري مقصره معك بس والله صقر مبهذلني البارح كله سهاري معه..
لتقبل وجنتيه: يا ذكر الله عليك.. هو يرضع يا امك..
وهم: رافض الله يهديه وما شاء الله صالح هادي بسم الله عليه..
أم علي: هاتيه اقرأ عليه كود يطيب..
لتقدم لها رضيع وتذكر عليه بعض الآيات المعطره وترقيه..
وهم: انا بروح للمطبخ تبون شيء يا خالتي..
أم جمال: ولا عليك امر جددي القهوة والشاي..
ابتسمت وهم: ابشري.. تعالي يا سوير..
.
.
.
في فيلا أبو عبدالعزيز - صالة تلفاز
أم عبدالعزيز: وراك مكدر خاطرك.. يا ولدي بنات عمك وخلاتك وش زينهم..
عبدالعزيز: ما عليه يا امي مالي نصيب هي رجعت لزوجها رفيقي حسين عناد يا يمه ما تذكرينه
ابتسمت ام عبدالعزيز: يا ما شاء الله.. ماهي نصيبك يا ولدي خلني اشوف لك بنات عمومتك..
عبدالعزيز: زين يمه.. على هواك.. يا وعد استعجلي بالغدا..
لتأتي وعد ممسكه بالصحن الكبير الممتلئ بكبسة باللحم لتضعه على الطاولة..
وبهمس: حياك الله يا اخوي.. بكلم أبوي..
ليقف عبدالعزيز ويساعد امه على الوقوف.. ليجلسن على الكراسي طاولة الطعام..
.
.
.
بالمساء
بالفيلا أبو ماجد – تحديدًا بجناح ماجد
ماجد: ياللا يا أم خالد ورانا طايرة..
ملاك وهي ترتدي عبائتها والقافزين: ولا عليك امر يا أبو مقرن توصلني عند اهلي بسلم عليهم..
ابتسم ماجد: من عيوني..
امسك بالحقائب السفر ويعانق كفها: توكلنا على الله..
.
.
.
بضع لحظات حتى تصل إلى قصر أبيها
لـ يدخل ماجد المجالس الرجال..
رائحة العود الاصيل والقهوة.. ليجد الطاولة الكبيرة مزينة بما ألذ وطاب..
جمال: هلا والله حي الله العريس.. يا ما شاء الله وش هالزين تصدق بالله ما عرفتك
سلم على عمه من ثم جلس بجانب جمال..
ماجد بتهكم: وراه دعاية كرست.. مكثر هاليومين يهديك الله..
لـ يضحك جمال: الله الله.. اذكر الله يا مجيد..
ماجد: لا إله إلا الله.. وش لونك يا عمي..
أبو جمال: بخير انت كيف حالك يا ولدي..
ماجد ابتسم: طيب طاب حالك ياعم..
ليكزه جمال على جنبه: من الحين يا الخبيث اهتمام بعمك الله يرحم ايامي الخوالي..
ماجد ابتسم ليردف بهمس: اسكت قطع ذا الوجه.. وراه تبي تكدرني بس تلايط
حسين: اخبارك يا أبو مقرن..
ماجد: هلا والله بالعديل.. بخير جعلك بخير..
ابتسم حسين: الحمد لله..
جمال: هيه الحين صايرين نسايب لا اسمع من اخواتي احدن يتشكى منكم ثم والله لا اعرف لا صاحب ولا اخو..
ماجد رفع حاجبه الايسر: يا حليلك.. آها بس لا يكثر وصب لي قهوة
حسين كتم ضحكته: ما يعرف لك إلا أبو مقرن..
جمال: ما عليه لأنه عريس مير مردوده له..
عبدالمحسن: اخباركم يا أبو مقرن ؟
ابتسم ماجد: بخير.. انت وشلون مكتبك وشغلك ؟
عبدالمحسن: الحمد لله وشغل ماشي من احسن ما يكون..
ماجد وهو يأخذ الفنجان من يد جمال: الله يزيده من رزقك..
عبدالمحسن: آمين..
.
.
.
بمجالس الحريم..
دخلت ملاك مرتديه فستان بـ كاروهات كبيرة باللون البياض والسواد وقلادة ماسية تحتضن عنقها..
والقرطين واحمر الشفاه ممتلئ ثغرها الناعم..
أم علي: حي الله ام خالد..
اقتربت منها وتسلم على خديها من ثم رأسها ويدها..
أم علي: يا ذكر الله.. الله يحفظكن..
من ثم سلمت على والداتها لـ تحضنها
وببكاء: وش لونك يمه عساك طيبه ؟
ملاك: أفا يمه وش له تبكين.. والله اني بخير وابشرك ماجد طيب معي مهو اللي خبرك..
أم جمال وهي تمسح دمعتها بطرف طرحتها: يالله لك الحمد.. جعله العافية..
ملاك: وينهم عيالي يمه؟
أم جمال: مع وهم ما قصرت حرمة أخوك..
ابتسمت ملاك: فديت قلبها.. اجل عن إذنكم بشوفهم ..
أم زيد: الله يسهل دربتس يا بنتي..
ابتعدت عن المجالس لتجد وهم وهي تزين طوق الورود الذي يعناق ليل الطويل اللؤلؤة..
لـ تنتبه لولوة وتركض بـ اتجاهها: مـــــــــاما..
فتحت ذراعيها لتعانقها بشدة وتقبل خديها وعينيها: يا روُحي انتِ بخير يا ماما..
لولوة بحب: احبك ماما كثير انا فقدتك لا تخليني بروحي..
ملاك بدمعة: ابشري يا روحي اساسا ما راح اسافر بتعذر من عمك وبقول له بجلس عند عيالي
لتعض الخدين: ها وش رأيك؟
لولوة وبعقدة حاجبيها: لا يا ماما روحي افرحي انا اصلُا احب اشوفك فرحانة عشان انا افرح معك..
ملاك حضنتها: يابعدي والله فديتك بسم الله عليك وش هالزين..
لولوة: خالة وهم ما قصرت معي يا ماما، وخالو جمال قال قريب بدخل المدرسة..
ملاك اغمضت عينها لـ تقابل تلك الصديقة والاخت.. لتنزل ابنتها على الأرضية
من ثم حضنت وهم باشتياق كبير: يا كثر ما اكون بعيدة عنك يا وهم..
ابتسمت وهم بحب وهي تمسح على شعرها: اهم شيء انك تكونين بخير وهذا يهمني..
ملاك: جعلني ما افقدك يا ام صقر..
لتبتعد عنها وتضربها على كتفيها: وش الهبال على تالي العمر
كتمت ضحكتها: ابد ما سويت شيء..
رفعت حاجبها وتضع يدينها على خصرها: احلفي بس..
وهم: ما عليك قولي الصدق وشلون ماجد معك.. احس نفسيتك تغيرت كثير..
ملاك: حمد لله على كل حال.. توني ما عرفته زين بس إن شاء الله انه طيب وابن حلال
لتغمز لها وهم: يا عزتي لك يا وهيم.. اقول تعالي بس وخذي ولدك خلودي مبهذل بـ اختك..
ملاك: فديته وينه ؟
.
.
.
السجن
بهمس: يا ابو كرم ما اقدر الحراسة هنا متشددة مهو أي سجن هذا.. اللي ابيك تفهمه تأخذ الورقة هم يسمحون برسائل ارسلها على مكتب أبو جمال..
أبو كرم: ابشر طال عمرك.. ما لك الا اللي يرضيك..
جاسم: مابي كلام ابي افعال.. تفهمني..
أبو كرم: إن شاء الله..
اغلق هاتفه وبدون احد ينتبه له.. خرج من دورة المياه.. لـ يمسكه العسكري ويضعه بزنزانة..
لـ يجلس بسريره بتعب وامسك الهاتف لـ يعطيه خويه الذي تعرف عليه..
جاسم: مشكور..
..: ولو بالخدمة..
استلقى على سريره الاعمال الشاقة يوميًا يبذل جهد فوق طاقته..
...: تم الحُكم عليه 10 سنوات بالسجن لـ اشتراكه ببضع الجرائم..
.
.
.
نهاية البارت الخامس والعشرون من الفصل الخامس
يوم السبت القادم نبدأ ندخل بالفصل الاخير وهو الفصل السادس الذي يضم / 5 بارتات..
.
.
.
معظم الإبداعات الإنسانية أفرزها الألم
سلمان عودة
.
.
.
عمر الغياب
|
10-09-15, 07:36 AM
جديد مواضيع قسم القصص المكتمله من وحي قلم الاعضاء
العرض العادي
