اخيراً لقيتكم و صلت لكم كنت ضايعه ورتني تفاحة

بس والله يان جمال يبله عقل ينطع على جنوبه من اي زمن اغبر جاء جعله يتشفق على شوفت وهم ولا يطولها
وأن شاء الله تروح مع جدتها طول مدة حملها وهو يقعد بحسرته

سارة ملح الروايه حبيتها السميه ههههه أصلا كل السارونات عسل
فيه كم شي بالي ودي افجره أن زيد كان يحب ياسمين ويوم تزوجة عاف الزواج وماقدر ينسها وهذا سب جنانه عالى العرس الحين اتوقع


وسلامتك ماتشوفين شر وقت ماتشوفين نفيك طيبه اكتبي البارت وطويله

السلام عليكم ورحمة الله وبركاته

دائما تحرجوني بكرمكم.. الله لا يخليني من هالدعم والتشجيع..
يؤسفني اني اقول هالبارت آخر بارت ولنا لقاء إن شاء الله بعد الاختبارات النهائية.. تعرفون اختباراتي بعد اسبوعين
ولا يمديني ابدن اكتب.. وبعد كمان رواية ما تشغلكم عن القراءة للأختبارات ،ويعز علي فراقكم!! لكن هالبارت ممتع لأبعد احد راح نتقل للشخصيات توقفنا عندهم بحدث معين وراح نكمل عليها مشاهد اخرى......
تدرون اليوم خلصت كتابة البارت وغير كذا كتبته وانا جداً تعبانة لي 3 ايام قايم علي وجع ظهري أول مرة يزورني هالألم الله يعين بس وغير يدي المجروحة بس كله لـ عيونكم تهون... ادري هذرت واجد ،وسامحوني على القصور...

ولي عوودة على ردودكم الجميلة ^^
.
.
.


دقائق مراجعة الفصل الثالث من البارت الحادي عشر، ويتم تنزيله وقراءة ممتعة



.
.
.


عمر الغياب

الفصل الثالث:

البارت
-11-




.
.
.




دنياي!

أنفاس الشتاء تهزني

و يضيق صدري

من سحابات الدخان

و يخيفني شبح الزمان..

فمدينة الأحزان تقتلني..

لا شيء فيها.. لا حياة.. و لا أمان

و أنا بها شيء من الأحزان

يمضي علي العمر وحدي في السكون

يوم مع الآلام يمضي في مدينتنا و آخر.. للجنون

* * *

القلب يا دنياي يقتله الجليد

لا شيء في عمري جديد

لو كنت أرجع مرة

و أشم عطر مدينتي قبل الزفاف

كانت طهارتها تشع النور في هذي الضفاف

يا ليتني يوما أراها في ثياب حيائها

لكنها.. قتلت جنين الحب في أحشائها

و مضت تعيش حياتها بين الذئاب

و على ضفائر شعرها نام العذاب

و بجلدها الفضي أنفاس و عطر.. و اغتصاب

و زوابع الصيف الحزين

تجيء حبلى بالتراب

و مدينتي الحيرى بقايا.. من شباب

* * *

و أمام دخان المدينة

صار قلبي.. يحترق

تتعثر الأنفاس في صدري..

و صوتي يختنق

و أعود أذكر قريتي

كم كان طيف الحب يملأ مهجتي..

و أنامل الأشواق كم عزفت لشدو طفولتي..

و جدائل الصفصاف كم نظرت إلينا في الخفاء

و حياؤها الفطري يمنعها

و تجذبها حكايات اللقاء

يا ليتني يوما أعود لقريتي..

الناس فيها كالطيور الراحلة

يمشون في صمت و ينسون السفر..

و يداعبون الليل و الأغصان.. في ضوء القمر

فيهم وفاء الطيبين المخلصين من البشر

أما أنا.. قد كان لي قلب

و ضاع على الطريق

و غدوت فيك مدينتي مثل الغريق..

و مضيت في الطرقات أحكي قصتي..

قد كان لي قلب يعيش الحب طفلا

مثله مثل البشر

قد كان لي وتر مع الأحزان ينسيني..

و حطمت الوتر

قد كان لي أمل تبعثر في الليالي.. و اندثر

قد كان لي عمر ككل الناس..

ثم مضى العمر

ماذا أقول؟؟!



فاروق جويدة..





.
.
.




سارة: زيد خذ ها الطقم جميل..
زيد اشار لـ سلسلة الذهب الابيض
وابتسم: أنا عجبني هذا وش رأيتس فيه؟!
ابتسمت سارة: والله ما انت هين.. يا ما شاء الله يهبل..
زيد ابتسم: عجبتس ..
سارة: أي حلو الحيين خلنا نخرج عشان يمديك تروح للحلاق وتزبط نفسك..
زيد: زين الحين نروح بس بالأول بدفع قيمة هالسلسلة واجي لتس..

بضع دقائق لـ يمر على محل الورد وأخذ باقة من الياسمين..
سارة: وتعرف وش تحب بعد..
زيد: هي مثل اسمها ياسمين.. الحين باقي شيء..
سارة: أبيك تشتري لك كبك وشماغ جديد وبعد حذاية الله يكرمك
زيد: أي صحيح بدر قال لي.. بس وش به شماغي
سارة: زيد تستهبل شماغك مهلوك من سنين جدتي.. وصلني للفيصيلة..
زيد: آمري لله.. نتكشخ لعيونها..
سارة بخبث: عاد يا اخوي لا تنجرح مني.. ابي ياسمينة تشهق بـ اسمك
لـ يضرب رأسها ومن ثم ابتسم: انا قايلن لتس مخفه.. بس ما احد مصدقني..
سارة: وجع.. انت ما توب الا لمن تضربني.. الله يعين المسكينة الي بـ تأخذك
زيد بحب: إلا الله يهنيها.. يا انتس عذول
سارة: أي الله يهني سعيد بـ سعيده..



.
.
.













في الجانب الآخر





ياسمين: يبه صعبة هو شرط يشوفني..
ابتسم لها بحنان: يا أبوك شوفة لكم إثنينتكم ..
أم جمال: أي يا أمك هو ولد عمك مهوب غريب..
ياسمين بخوف: يبه ماني جاهزة
أبو جمال ربت على كتفيها ثم مسح شعرها بحنان نظر لـ عينيها الضائعة والخائفة: معك وقت جهزي نفسك لأن بعد صلاة العشاء مباشرة بـ يطلب شوفتك..
أم جمال: إن شاء الله يا ابو جمال.. قومي يا امك جهزي نفسك..
ياسمين: إن شاء الله..
ام جمال: صالح ابشرك وهم حامل
تهلل وجه وابتسم بفرح: يارب لك الحمد وشكر.. هي وينها
ام جمال وهي تمسك يدينه وبثبات: بجناحها ما صدقت انها تغدت.. ولدك الله يهديه بس
تغير ملامح وجه وثم استغفر: لا تجبين طاريه مسود الوجه.. هو احد يسوي سواة هالمخبول...
أم جمال بحُزن اردفت: والله يا صالح ما يهون علي اشوف ولدي بـ الحال ،وهي الله يهديها عنيدة ترخي الحبل مهوب تشده..
أبو جمال: ولدك الاغبر ما راعى انها يتيمة.. وبنت اخوي ما حدها على شقا بس ربك كريم وبعوضها بولدها
أم جمال: توه متصل علي وبشرني ان عملية ملاك نجحت
أبو جمال: ملاك بنتي بخير.. يالله لك الحمد
لـ يسير بخطوات مُتعبة من ثم استند على كفي زوجته..
أم جمال: الله يهديك يا أبو جمال ارتاح لك شوي..
أبو جمال: بذبح لي كم ذبيحة وبوزعها صدقة.. بنتي تستاهل
أم جمال: ملحوق عليه.. ارتاح وانا بكلم بدر
أبو جمال: وينه هو الحين.. ابي اسمع صوتها
أم جمال: يقول باقي ما صحت من البنج.. الود ودي اروح لها الحين بس ربي يصبرني على بُعدهم..
أبو جمال: والله يـ انه اسعد خبر سمعته.. امي وينها..
أم جمال: نامت.. كليت شيء احط لك الغدا..
أبو جمال ابتسم: لا شبعان من هالاخبار الزينة


.
.
.


بعض طرقات على بابها.. من ثم تدخل بخطوات خجولة..
لتجدها نائمة.. لـ تعود ادراجها وتغلق الباب ولكن سمعت نداء
وهم وهي تستيقظ وعينيها الناعسة تعاود النوم: ياسمين.. تعالي..
ياسمين: سامحيني صحيتك من نومك..
ابتمست لها وهم: تعالي ماهي بينا.. وش فيك مترددة
ياسمين تدس اناملها بين شعرها لتردف بخجل: زيد طالب شوفتي اليوم.. وانا محتارة وش البس
وهم: مبروك يا عسى ربي يهنيكم ويسعدكم..
ياسمين مُرتبكة وتجلس بجانبها على سرير: وهم خايفة كثير ولا احد من اخواني فيه
وهم بحب: وتخافين ليه.. فديتك عمي موجود الله يخليه لنا واخوك بدر بعد..
لـ تقف على الأرضية الباردة ثم امسكت بـ يديها: تعالي نشوف ملابس تناسبك
ياسمين: ما ظنتي في لبس مناسب.. تعرفين من زمان معتزلة عن الالوان ما غير البس الاسود ورماديات..
ابتسمت وهم من ثم دخلت لـ غرفة تبديل الملابس وفتحت الدولاب لـ تأخذ طقم
مُطعم بـ كرستالات بسيطة يتدلى بقصة فرنسية من صدر وتنورة طويلة من الخامة السكرية..
ياسمين: مستحيل البس هذا لبس..
لـ تزفر وهم: شوفي ها اللبس بـ يعكس على لون بشرتك عشان كذا لا تعاندين وخذي قيسيه..
ياسمين: تمزحين وهم.. فشلة أخذ من لبسك..
ابتمست لها بحنان: لا فشلة ولا غيره.. ولو سمحتي لا تغيرين الموضوع ما عاد في وقت.. انتظرك لا تطولين..
خرجت لتغلق باب الغرفة من خلفها.. من ثم جلست بالكرسي القريب واغمضت عينيها لبرهة من الزمن لـ تفتح عينيها على صوت الباب لـ تجد ياسمين بهلة ناعمة وجميلة
لـ يبتسم ثغرها: يا ما شاء الله تبارك الخالق.. تدرين اخاف زيد بدل ما يكون زواج بعد شهر يصير عقب اسبوع..
لـ يحمر وجه ياسمين: احسه مكلف بروح ابدله..
لـ تقف وتقترب منها وتمسك كفيها: بالعكس لبس جداً ناعم وانيق ولا تفكرين تبدلينه.. باقي لك.. اممممم
وهي تخطو لتصل للمنضدة وتسحب درج لـ تمسك بصندوق ابيض اللون ومن ثم فتحته لتأخذ القرطين اللؤلؤي وقدمتها لـ ياسمينة
ابتسمت: تدرين صايرة من الممثلات الفرنسيات..
ياسمين: وهم احس نفسي مبالغة وغير كذا انتي توك عروس صعب
لـ تقاطعها وهم: اقول لا يكثر حكيك.. لبسك هو لبسي وتركي عنك توتر زايد
لمعت عيني ياسمين بدموع وحضنتها وهم: لا تبكين يا قلبي.. وربي بيسرها لك..
ياسمين: خايفة يكون مصيري مثل حسين يحبني وفجأة في أول ليلة رجعت لـ أهلي مكسورة الجناح..
وهم: حسين غير عن زيد.. ياسمين ترى اصابعك مهيب مثل بعض.. انتي استخرتي..
ياسمين نظرت لعين وهم من ثم اشارت برأسها..
لتردف بحنان: ربي بيسرها إن شاء الله..





.
.
.





برلين
في المستشفى


جمال: يا اخوك اصحي وسمعيني صوتك.. تدرين طارق أخذ جزاه وابشرك حكموا عليه بالحبس 15 سنة..
لـ تشد كفيه حركة اناملها وبفرحة حقيقة: ملاك تسمعيني..
ليضيق عينها انزعاجاً من ذلك الضوء..
جمال قبل يديها: حمد لله على سلامتك يا ملاك..
حركة صدرها والاكسجين فوق فمها وتنفسها ثقيل.. ودمع يسكب على خديها حُزناً
جمال: لا تبكين يا ملاك..
لـ تمد يديها وتُبعد الاوكسجين وبتأوه أليم ينبض بـ فوائدها: عيالي..
ابتسم بحنو وقبل جبينها: بخير تبين تكلمينهم..
ملاك: أي ابي اسمع صوتهم..
جمال: ابشري ذا هالحين ادق عليهم..
امسك هاتفه لـ يتصل على ياسمين..


.
.
.

في الجانب الآخر

رنين هاتف ياسمين يعلو لتسير بخطوات من ثم رفعت الهاتف الملقي على الاريكة
لـ يطعن فؤادها " اخي جمال يتصل بك "
خرجت ياسمين وهي ترتب شعرها المُبعثر على كتفيها.. نظرت لـ وهم
مدت الهاتف لها وبوجع: اخوك يدق عليك..
ياسمين نظرت لعينها المُنكسرة من ثم رفعت الخط
واردفت: يا مرحبا جمال.. وشلون ملاك
جمال بداخله (حتى انتي ياسمينة صرتي مثلهم مقاطعتني.. ليت ما نطقتها)
زفر بتعب: بخير.. والحمد لله نجحت العملية..
ياسمين بفرح: صدق.. ياربي لك الحمد.. طيب كيفها الحين؟!
جمال: هذا هي تبي تسمع صوتكم..
وضع الهاتف على اذنيها وبهمس: ياسمين
لتسقط دمع من مقلتيها: يا عيونها.. انتي بخير ملاك
ابتسمت: بخير.. عيالي ياسمين ابي اسمع صوتهم.. هم بخير
ياسمين مدت اناملها لتمسح دموعها وضحكت: والله بخير حتى خلودي صاير ينام ويأخذ حليبه وبعد لولو بخير ومشتاقين لك كثير
ملاك بضُعف ودمع لمع بعينها: يا روحي..
وهم وهي تشهق بألم: هذه ملاك..
لـ تهز رأسها ياسمين: ملاك هذه وهم تبي تحكيك..
ابتسمت بوجع: وهم..
امسكت الهاتف برجفة وبخفوت: يا عيونها فديتك ملاك وحشتيني يهون على قلبك القاسي
وبكت لتشاركها البكُاء تلك البعيدة عنها بمسافات واميال..
ملاك تهمس بصعوبة: والله مهوب مني من الظالم.. تدرين اني صرت مجنونة بسببه
وهم: اششش لا تقولين كذا.. انتي اقوى مني بكثير.. اصلا انتي العاقلة فينا..
ملاك: تدرين جمال يحكي لك عنك كثير..
لـ تصمت وهم وتثرثر تلك بـ اشياء موجعة لروحيهما
وهم ابتسمت: ما علينا أهم شيء انتي بخير.. متى ناوية ترجعين لنا
ملاك لـ تأخذ أنفاس ثلاثاً: مدري والله.. ابي اسمع صوتهم..
وهم: ابشري من عيوني
لـ تجد لولو وياسمين..
وهم: تعالي لولو هذه ماما تبي تكلمك..
اخذت الهاتف بلهفة لـ تصرخ ببكاء: ماما..
ابتسمت بحب وكأنما ترى دمع يسكب على وجنتيها: يا عمري لولو حبيبتي كيفك ماما
لولو بحزن: وينك ماما ابي اروح عندك
بكت: فديتك ماما.. لولو انتي طيبه يا عمري تدرين انا بخير
لولو: ماما كلنا نبيك حتى خلود كله يبكي
ملاك بحب: حبيبتي لولو خليك قوية عشاني يا عمري وانا برجع لكم لا تخافين ماما..
لولو: ماما لا تطولين كثير..
ملاك: ابشري يا عيون امك.. ماما تأكلين زين
ضحكت لولو: ماما صار عندي ألعاب كثيرة كله من خالو جمال
ملاك: يا عمري تتهني فيها.. تعرفين ماما اول ما اوصل بوديك الملاهي وبلعبك وبأخذ لك ملابس كثيرة يا روحي..
لولو بسعادة: ماما احبك كثير
تحاول تكتم عبرتها: وانا بعد احبك كثير.. نامي زين مهوب تسهرين
لولو: طيب ماما..
ملاك: الله يحفظك يا عمري..
لولو تشد كفي ياسمين: ابي العب...
ياسمين: طيب لولو.. ملاك دقيقة امي منتظرة اتصالك
ملاك: امي.. طيب معك على الخط ما راح اقفل لا تخافين..
ابتسمت ياسمين: تدرين الكل مشتاق لك يا ملاك
باب الوجع لا يُغلق ،والحنين بات زائر ثقيل...
وبخوف: وانا بعد مشتاقة لكم كثير..
نزلت ياسمين بدرجات واطرقت على باب غرفة ابيها وامها..
أم جمال: تفضلي ياسمين..
لـ تطل وتجد ابيها مستلقي على سرير وامها بجوارها تمسد رأسه..
ابتسمت واقتربت: يمه ملاك على الخط..
أم جمال بفرحة: هي صحت.. عطيني اياها
ياسمين ابتسمت لها: أي يمه وحكت معي ومع بنتها..
أم جمال بـ لهفة امسكت الهاتف: يمه ملاك.. انتي بخير يا عيوني
ملاك: بخير يمه.. ولهني صوتك يمه.. ولهانة على شوفتكم..
أم جمال: يا نظر عيني.. عسى ما تشكين شيء..
ملاك بوجع: اشكي منكم ولكم يمه.. ابي حضنك يمه ابي انسى كل الي صار لي
أم جمال وهي تبكي: يا عيوني انتي يا ملاك.. متى بـ تجين والا روحت عندك..
أبو جمال: الله يهديك يا مره وش تروحين..
ملاك: مدري يمه.. ودي انك بقربي
أم جمال: بجي لك يمه.. ولا اخليك بروحك عند هالكفار..

ابو جمال: استغفر الله العظيم.. عطيني اياها اكلمها..
اخذ الهاتف منها وبنبرة حنونة: يا ابوك ملاك وشلونك عساك طيبه
لتبكي بحزن اتخم قلبها: يبه فديتك انا بخير.. بس تعبانة من فرقاكم.. ودي تجون عندي..
أبو جمال: بنجي يبه..
لـ يسحب جمال الهاتف: يبه الله يهديك وش تجي.. إن شاء الله كلها كم شهر ونرجع ما له داعي تجي..
أبو جمال يقاطعه بحده: اسكت يا ولد وعطني اختك.. مالي حكي معك..
مد الهاتف لـ يخرج مختنُق.. وضع يديه على جبينه ويمسده بـ إرهاق


بضع دقائق – دخل ليجدها مستلقية بهدوء ومغمضة جفنيها لترمش اهدابها
نظرت لـ هالات سوداء تحت عينيه وجه المُرهق ،والارق يلازمه كـ صديق يخشى الغياب..



ملاك وبهمس: جمال وش إلي صاير بينكم انت وهم..
جمال: ولا شيء لا تشغلين بالك أهم ما علي راحتك
ملاك بعتاب: إن ما شكيت لي يا أخوي تشكي لمين .. وهم صوتها مهوب طبيعي ولا تقول لي أنها من كثر ماهي مشتاقة لي باين صوتها أنها تعبانة وتعاني..
زفر جمال: مالك بها.. ذا الحين اهتمي بنفسك
ملاك: تدس عني يا جمال.. انت ما شفت وجهك الي غرقان تعب..
جمال: سكري الموضوع يا ملاك..



.
.
.

الرياض


في بيت أبو جاسم

كانت تمسك رأسها بصدمة.. ونظرت لعينيه

فرح: انت مجنون صورة جاتني بالغلط تقوم تأخذها
جاسم: صورة وجات لك وش تبين بعد
فرح بقهر: جاسم خاف ربك انت تبي تهدم بيت البنت واسكت لك.. لا تنسى إن دنيا دين وسلف والي سويته في بنت ناس مصيره يرجع لي حرام عليك اللهم يمهل ولا يهمل..
تقدم جاسم إليها وامسك زندها ليقف مقابلاً لها: أقول طسي عن وجهي مسويتي له مواعظ وحكم.. يالله ذلفي داخل و يا ويلك إن سمعت لك حس.. حشيت رجولك حش..
فرح بصدمة: لا ما انت جاسم أخوي.. الدكتور الطيب!!
ليغرز أصابعه في ذراع فرح: جاسم الأولي الي تقولين عنه مات وراح.. الحين جاسم شخص ثاني مثل ما أخذ وهم مني برجعها لي غصبن عنه..
فرح صرخت: انت انهبلت المره متزوجة جاسم ترى أمي كلمت عمي.. وعمي ينتظرك عشان تخطب مدى رسمي
اتسعت حدقيتي عينيه مندهشاً: ردينا لطير يـ الي وبعدين مع أمي ليه ما تفهم أني مابي غير وهم لي...

تقف أم جاسم من خلفه وبغضب: بنت أختي ما تجوز لك متزوجة ولد عمها الي تحبه وتصون بيته..
جاسم ليولي ظهره ونظر لأمه
وبضيق: يمه شلون تخطبينها وانا مابي هالمدى إلي أزعجتني فيها هو بالغصب أتزوجها..
بسخرية أم جاسم: مثل ما انت راضي تقتنع.. إن وهم ما هي من نصيبك..
جاسم: يمه..
أم جاسم بقسوة: أسكت يا ولد بطني تبي تخرب بيت وهم وتبي أسكت لك.. والله يا جاسم إن بكره تروح معي بيت عمك وتمم خطبتك وتنسى ها الوهم من بالك.. ولا سوالفك كلها عند أبوك وحزتها دبر عمرك..

فرح ببكاء: يمه..
أم جاسم: أسكتي يا فرح.. وش قرارك؟!
جاسم: بس يمه ما أحبها كيف تبين أخذ وحده ما أحبها
أم جاسم: الحب يجي مع العشرة وقبلها الاحترام والثقة تكون متبادلة بينكم مهوب تخون فيها
جاسم: أي خير إن شاء الله..

أم جاسم: مثل ما قلت لك ،وهذاني اقولها مرة ثانية وهم ماهي من نصيك.. ولا تحاول تلعب على راسي وتسكتني بكم كلمة
جاسم: يا يمه افهميني بنت عمي ما ابيها.. انا احب وهم انتي ما تبين تشوفين سعادتي
ام جاسم: اسمع ان كان تبي رضاي تأخذ بنت عمك وإلا والله لا ازعل عليك ليوم يبعثون..
جاسم يمسك كفها ويقبلها: يمه وش فيك قلبتي علي... وهذاني وانا خاطبها قبل ما اسافر وش جازني.. اول ما رجعت من السفر تزوجت من غيري.. وانا اطالع يرضيك هالشيء يمه..
أم جاسم: لا حول ولا قوة إلا بالله.. انا قلت لـ عندي وانت بكيفك...


.
.
.


بعد نصف ساعة


بمركز الشرطة




الضابط: طارق زيارة لك..
تقدم بخطوات ثقيلة ويضع يديه على زنزانة وبصدمة: جاسم
جاسم بقهر: انت غبي في أحد يسوي إلي سويته يا المهبول ..
طارق بسخرية: ما هموني أهم شيء كسرت عجوز قريح..
جاسم: في أحد يترك ملاك.. يا الخبل أخوها وراه خير كثير انت ناسي إنه مدير بنك وغير الأراضي الي يمتلكها..
طارق بمكر: أسمع كلم لي محامي يخرجني من هالمكان وانا بتصرف وحتى بنت خالتك اضمنها لك زوجة وش تبي بعد..
جاسم ضحك: أحلف.. الحين أجيب لك أكبر المحامين بس وش ضمان ..
طارق: خذها مني وعد
جاسم: صار..



.
.
.



في احدى البيوت ذات طبقة راقية



ورود وهي تسكب بعض شاي وتقدمها لـ سلطانه
ورود: سمي..
سلطانه: تدرون ملاك رجعت..
وعد بصدمة: رجعت لبيت أهلها.. تحكين صدق
سلطانه: أي والله قبل أسبوع أخوي نواف دق على خويه بدر ..اخو ملاك..
ورود ضحكت ودمع يسكب على وجنتيها: الله يبشرك بالخير.. والله القاطعة وحشتني..
سلطانه: أي بالله وحشتني سوالفيها ليت الأيام تعود ونرجع مثل ما كنا.. لا زواج فرقنا ولا غيره..
وعد: يا فرحتك يا وهم أكيد أنها طايرة من الفرحة.. تدرون وش رأيكم نتصل على ياسمين ونتفق نجي لها في يوم..
سلطانه وَ ورود: تم..

لتقف ورود وابتسمت لهم: البيت بيتكم
سلطانه: أقول أجلسي متعبه نفسك
وعد: أي بالله ارتاحي كل بعد شوي جايه بصحن متروس أكل
ضحكت ورود: ما عندي أغلى منكم ومرة وحده بشوف توأم الله يهديهم...
سلطانه بغمزة لـ وعد: دام كذا الله يسهلك دربك خضر..

لتخرج ورود وتلتفت وعد لـ سلطانه
وعد: وش عندك انتي من يوم ما جيتي.. مدري ليه وراك سالفة وكبيرة بعد..
ابتسمت لتردف: أبد بس تعرفين أخوي نواف حبيبي رجال يعجبك ،وغير كذا يدور على عروس وجيت بالي .. عاد ما أبيك تردين علي الحين.. أبيك تفكرين وتعطيني رأيك..
ملامحها وجهها والذي اكتسى بالحمرة: سلطانه فجاءتني..
سلطانه بحنان: تعرفين هو أخوي وولدي وما بلقى وحده مثلك تصونه وتحافظ عليه..
وعد وضعت يديها على وجهها: خلاص قفلي سيرة انت دوم تحرجيني ..
ضحكت سلطانه وبمكر: تدرين أخوي حنون وطيب ..
أخذت علبة المنديل لترميها على سلطانه..
سلطانه: فديت مرة أخوي الي تستحي الله يرحم أيام زمان.. أبي مثل ابوي ...
لتضحك بشدة وتدمع عينيها

وعد اتسعت عينيها: سلطــــــانه وجع اسكتي خلاص.. توبة اقول لك شيء..
سلطانه مسحت دموعها: عاد ما قلت الا صدق.. تدرين عاد اخوي الكبير ومستعجل على زواج
وعد: سلطانه خلاص يختي
لتضحك بشدة: الله يسعدك يا وعد...
وعد: يالله احس بشعور غريب.. انتي الحين وش الي يضحكك ها ست سليطين..
سلطانه: نعم وش سليطين اقول دلعي سوسو
وعد: بكيفي وطسي عن وجهي بس...
لتحضنها سلطانه وتقبل خديها: فديت مرة اخوي تستحي..





.
.
.




في بيت أبو ماجد

كان يجلس مقابلا لأبيه وبجانبه اخته.. التي تسكب له فنجان القهوة..

ماجد: يا سعاد الله يرحم والدينك فكيني من هالموضوع..
سعاد: يخي عيال اخوانك تزجوا وعيلوا وانت باقي ما تزوجت
ماجد بضيق: انتي وش فيك أنا مابي مره عقب المها الله يرحمها ..
سعاد: شف ماني ساكتة لك عقب هالسنين كلها وما تبي تعرس..

أبو ماجد: قولي له يا سعاد رأسه يابس عنيد.. يا ولدي خلني أفرح فيك واشوف أحفادي حوليني قبل الله يأخذ أمانته..
ليقبل رأس والده: يا يبه لك طولة العمر.. مالكم بطويلة أنا زواج مابي.. نفسي عافته..
سعاد: شفت يا يبه كأنه مسحور ما يبي العرس..
ماجد وبغضب: استغفر الله العظيم.. قلت لك ماني متزوج ارتحتي.. برد قلبك الحين..
سعاد: ماني مرتاحة إلا لمن أشوفك مع عروسك.. أسمع زين يا ماجد انت أخوي وسندي وانا أبي أفرح فيك.. مين بـ يبقى لك بعد ابوي له طولة العمر.. انت تعرف دنيا تلاهي وانا أختك طاوعيني وتزوج وصدقني بتعين من الله خير..
ماجد: أقول أروح داومي ابرك لي..
سعاد: شفت يبه من نطري سيرة زواج إلا هو هج..
أبو ماجد بضيق: الله يستر عليه... ويرزقه الذرية الصالحة..
سعاد: يبه فديتك لا تضيق بخاطرك وسع صدرك بإذن الله بـ وافق أنا بزن عليه الين ما يوافق..
أبو ماجد: ما قصرتي يا أبوك..
ليقف ويستند على عكازه..
سعاد: يبه وين رايح..
أبو ماجد: وين بعد يا أبوك بـ رح للنخل يبي له مدراه وانتي بعد يا أبوك لا تبطين على رجلك وعيالك أمديهم وصلوا من مدراسهم..
سعاد: وين أروح بعد يا ابوي الباب على الباب هذا هو بيتي.. انت وش مشتهي اليوم ...
ابتسم أبو ماجد: ما عليك قصور يا بنيتي.. الي تسوينه نعمه ورضا من رب العالمين..
سعاد وهي تقبل جبينه: ونعم بالله يبه.. انتبه على نفسك زين مو تبطي يبه..
أبو ماجد: حاضر يا أبوك على أمرك كم سعاد عندي..
سعاد: تسلم يبه.. الله يطولنا بعمرك عساك ذخر لنا إن شاء الله ..




.
.
.


وهو يركب سيارته لـ يتصل على ذاك الغائب..متجه لـ عمله بالمستشفى

ماجد: علامك انت وراه صوتك كذا..
جمال بهم: أبد يا أخوي تعبان وجالسين نكفر عن الي سويته..
ماجد: وش تكفيره وش مسوي انت..
جمال: تلفظت على الأهل وو.......
ماجد: استغفر الله العظيم.. انت وبعدين معاك.. اعوذ بالله.. وراك صاير عود كبريت كل ما احد اكلمك شبيت نار..
جمال: والله مدري وش أقولك.. أني منقهر خلها بالقلب يا أخوي ..
ماجد: أي زين الي تسويه فيك مهبول انت والله ما انت صاحي.. تدري زين الي تسويه فيك.. يمكن تعقل وتركد وبعدين ماني خابرك كذا..
جمال: ما عليك فيني انت وش فيك معصب..
ماجد: أختي كله تحن وتزن على رأسي من اشوفها تفتح سيرة زواج يخي كبدي دبلت من هالموضوع
جمال: وهي صادقة انت ما تقل لي وش الي ناقصك..
ماجد: أقول عاد انت آخر من يتكلم.. ناقصك انت ثاني..
ضحك جمال: شر البلية ما يضحك .. وراه ما تقصد علي ودي أسمع كم قصيدة..
ماجد: لا بالله حالتك مهيب زينة .. أجل تبي قصيد يا قيس زمانك..
جمال ابتسم: والله إن الحب بلوه .. ماجد قل قصيد عاد ذلتينا..
ماجد: زين يا ابوي أذيتنا الله يهديك أسمع...



جابك الله من غياب ٍ ضيّق صدور المباني
قبل لا الوحشه تزعزع بيتك الصلب وتبيده
بيتك اللي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو إنك جيت متأخر ثواني
ماتشوف إلا بقايا من حصاه ومن حديده
من عرفتك وأنت تايه من مواني لي مواني
وتارك ٍ قلبي مولّع من وقيده في وقيده
ضاعت سنيني أحد بهاليالي وتحداني
وأنت ماتشبع غياب ولاتخاف من النقيده
ودي أتحمد لك الله بالسلامه , مامداني
كل ماتوصل برحله ترجع برحله جديده
دام تدري كل وجه ٍ غير وجه الله فاني
ياخي أكسبلك ثواب وخاف ربك في عبيده
كان فيني عيب قلي:فيني العيب الفلاني
كان هرجي مزعلك في شي قلي:لاتعيده
عيب تصغر في عيوني وأنت برقاب الغواني
كيف تستسهل طعوني وأنت خابرني وليده ؟
لعنبوك أن مت بيدك من يفكك من أخواني ؟
لحزنوا ربعي على فرقاي شاللي تستفيده ؟
أنت منت اللي عشقته أنت أكيد انسان ثاني
ليه صرت بهالبرود وبهالاحاسيس البليده ؟
وين حبك للزعل .وين العناد الأولاني ؟
وين حنّية زمان وفرحة العمر الرغيده ؟
وين ذاك اللي اليا أقبل مايبات إلا بمأني ؟
وين راح اللي اليا أقفى مايروح ألا فقيده ؟
واحد ٍ من جابه الله بس يامر ويعصاني
الوحيد اللي أخافه غصب وأمشي معه سيده
(مابغيت أطيح بيده) لين ماربي بلاني
ولا أنا لو هي بكيفي (مابغيت أطيح بيده)
ذاك بس اللي يامن جيته يلخبط كياني
اللي بنظره ينشف دم قلبي في وريده
قبل أشوفه أجمع اله أحلى القصايد والمعاني
وأن لقيته ماعرفت أقول لي جمله مفيده
الف مره قبله أعد القصيده من لساني
ولعنبوه أن جيت عنده قمت أخربط بالقصيده
أمدحه وأنا أدري أنه لو تباطاني نساني
أنطحه وانا أعرفه مجنون وأفكاره عنيده
من يسوي بي سواتك يالرهيف الاسمراني ؟
منهو من الناس غيرك غلطته ترفع رصيده ؟
من يقص(جناح طيرك)وأنت أعز أنسان جاني ؟
ليه أخاف(رماح غيرك)وأنت ضرباتك سديده ؟
ان تبعتك .أتبعك من طيبي وواسع بطاني
ولا أنا لاجيت أكيد انسان عزالله بكيده
أقدر أنزع لك ثيابي وألبس ثياب الأناني
وأقدر أطلع من عذابي والعب بدورك وأجيده
ومستعد أكسب رهاني لو بغيت أكسب رهاني
وأخدعك بحساس كاذب وأتحدى من يصيده
أبك أنا لي شفت خلّي حط غيري في مكاني
والله إني لتركه وأن صد لعشق سيد سيده
جيت مابيك تحقرني جيت أبيك تعز شاني
جيت أبي فزعة ظلوعك من مشاعرك البليده
خلني داخل (حدودك) وأجبر بخاطر زماني
أكذب بباقي (وعودك) وأصدق بلحظه سعيده
أنتشلني من (برودك) لو تولّع بالمحاني
عطني أحساس (بوجودك) وأخذ كل اللي تريد
تكفى واليا قلت :تكفى بيع خلق الله عشاني
لاتضيّع من يديني فرصة العمر الوحيده
يعلم الله شفت منك ومن غيابك ماكفاني
كان ماتقدر تخفف هم قلبي !! لاتزيده
شف غيابك وش يسوي بالصدور وبالمباني
وأنت تدري كيف كانت صدمت غيابك شديده
والله أنك لو وصلت البيت متأخر ثواني
مالقيت إلا بقايا




جمال: صح لسانك والله يصبر قلبي على الفرقا..
ماجد: الله لا يبلانا.. أقول صوم صوم يا أخيك والله يعينك.. إلا ما بشرتني وشلون الأهل عساهم بخير ؟!
ابتسم جمال: لا حمد لله.. الأهل بخير ودكتور جورج ما قصر..
ماجد: على العموم حمد لله على سلامة وما تشوفون شر إن شاء الله..
جمال: شر ما يجيك.. والله يسلمك يا أبو مقرن..
ماجد: متى العودة؟!
جمال: قريب إن شاء الله..
ماجد: على خير يا أبو صالح تامرني على شيء..
جمال: أبد سلامتك..
ماجد: الله يسلمك.. في أمان الله
جمال: مع سلامه..



.
.
.







بعد صلاة العشاء مباشرة..


وهي تبخر شماغه وتذكر الله على جماله.. وتحصنه ثلاثاً من اعينٌ حاسدة

زيد بضيق : يا يمه خنقتني من هالبخور..
أم زيد: من فرحتي يا أمك الله يبلغني واشوف عيال عيالك..
زيد قبل رأسها: أبشري بالخير يمه.. إلا وشلون ثوبي؟!
ساره: والله انك كشخة يا أخوي.. عاد هالله الله بثقل ورزة..
زيد: سوير أسكتي عاد كافي أني متوتر.. يمه وش رأيتس بالهدية إلي جبتها بتعجبها يمه..
لتبكي أم زيد..
زيد: أفا يمه وراتس قلبتيها نكد الله يهديتس بس رايح أعرس وشو له تبكين..
أم زيد: يا أمك دموع الفرح..
زيد: أمسحي دموعتس يا الغالية.. وعاد كثري بدعاء أنها توافق علي ويوفقني ربي..
أم زيد بضيق: وليه ما توافق يا أمك انت زينة شباب كلهم..
زيد ابتسم: عاد يا الغالية هذا بنظرتس.. انتي تدرين عاد يمه قبلوني اتوظف هنا ،وبنيت لي شركة صغيرونة إذا الله فتحها علي بـ أبيع واشتري من نخل.. ويمكن ابيع خيولي بعد..
أم زيد: أي بالله فاتحة خير عليك.. بس يا أمك انت بتهدني وبـ تسكن هنا..
زيد: مدري والله يمه لكن ملحوق عليه.. أنا رايح..
أم زيد: الله يوفقك يا وليدي..


.
.
.



في مجلس رجال


جلس بـ الكرسي العنابي بتموجات سوداء مقابله عمه أبو جمال..
وبجواره ابيه.. وبدر في طرف مقابلا للباب..

أبو زيد: شف يا زيد ان ما ركدت الليلة هالعكاز على جنوبك وهذاني قلته لك..
ابتسم بفرحة: ها يبه ابشر.. ابشر بالخير..
كتم ضحكته وبجدية: اسمع وانا ابوك.. المره يبي لها صبر تأخذ وتعطي معها
زيد وهو يقبل يديه والابتسامة لا تغادر ثغره: إن شاء الله على أمرك يبه.. ما رحت بعيد
أبو زيد بفخر: ما منك خوف يا زيد.. وذا الي ابيه الي انحرمت منه تأخذه انت.. الله يهنيك يا ابوك
زيد وبصبر: ايه يا يبه هالحين بشوفها.. يبه يصير نكتب العقد
أبو زيد: لا حول ولا قوة إلا بالله.. يا ولدي اركد
زيد: انت تدري يا ابوي من يوم قبلوني هنا بالرياض وانا حاس بشعور غريب.. يبه تدري احسها قريبة مني بالحيل..
أبو زيد وهو ينظر لعين ابنه ولمعة سعادة بداخله( الله يرزقك اضعافها يا ابوك انت تستاهل يا ولدي.. بار بي وبأمك..)
لـ يردف: هذا وانت ما شفتها ومصروع اجل لو شفتها وش بتسوي.. ما اقول غير الله يخلف علي..
زيد امسك صدره: ايه يا عمي وراه ما تكلم بنتك..
كزه على جانبه: اسكت يا ولد.. الله لا يشيقنا.. يا ابو جمال يا اخوي.. انت اعلم بجنون ولدي لكن يعجبك بوقت شدة ..واتفقنا ان يشوفها
ابتسم أبو جمال: يأمر زيد يا اخوي..
زيد بضحكة: تسلم يا عمي ما قصرت طال عمرك..
أبو جمال: بدر رح نادي اختك..
لـ يقف بدر: ابشر يبه.. هالله الله وش هالكخشة تدري يا زيد ما عرفتك..
زيد: جد ولا تهايط..
بدر وهو يربت على كتفه: لا جد والله شكلك متغير..
زيد: ايه عجل وانا اخوك..
بدر بخبث: تدري بـ اقول لأختي تهون مسكينة..
زيد مسكه من ياقة ثوبه: اقول طس وشف اختك ولا تحرق لي اعصابي تراني ماسك اعصابي ومتوتر يا الهيس..
ضحك بدر ودمعت عيناه: ابشر ابشر بس فكني الله يأخذ ابليسك..
زيد زفر: أي اشول..

أبو جمال وهو يتلثم بـ شماغه وضحك..
أبو زيد: لحول يـ ذا الولد.. والله يا اخوي امسحها بوجهي هالمرة..
ابو جمال: لا يا اخوك افا عليك.. زيد مثل حسبة ولدي ما عليك الله يسعدهم وهينيهم..
أبو زيد ابتسم: الله آمين..


.
.
.


دخل ليجدها ترتعش خوفاً.. ليشد خطواته وقبل رأسها
وبحنان: شوفي وش سوى فيني معرسك ماسكني من ثوبي مستعجل يبي يشوفك.. انا قلت له هونا ما دريت الا..
ياسمين طالعي فيني
ياسمين وهي تلقي نظرة للأرضية الرخام..
لـ يرفع ذقنها: ياسمينة وراك خايفة.. تراه زيد ولد العم الي يلعب معك وانت صغيرة ما تذكرينه..
أم جمال: ما عليك يمه.. هي بس مستحية شوي.. يالله عاد يمه رجال ينتظر وانتي جالسة لي هنا.. يا خديجة عطيني صينية العصير
خديجة وهي تهز رأسها: إن شاء الله ماما..
أم جمال: هاك خذي صينية..
ياسمين: يمه مابي والله خايفة..
بدر: تطمني انا معك.. وابوي بعد.. يالله عاد ابطيت على ولد العم تصدقين من بدخل بـ يمسكني وبصفقني كم كف يالله عاد..
ترضين اخ العروس وانصفق من يد المعرس
ضحكت ياسمين...
بدر: ايه يبه ضحكي.. بس ظاهر ترضينها علي..
ياسمين: لا والله محشوم يا أخوي
بدر: دام كذا اجل قدامي...

أخذت صينية العصير ومن ثم شدت خطواتها بتردد كبير..
زيد لمح طرف تنورتها لـ ينظر للأرضية ومن شدة توتره لم يرفع رأسه...
وياسمين تقدمت بخطوات خائفة من ثم وزعت العصير لـ ابيها وعمها.. لـ تتجاهل زيد ،وضعت الصينة بطاولة لتجلس بجانب ابيها..
أبو جمال: ها يا زيد هذه بنت عمك ياسمين وصلت..
زيد وقلبه يضخ بدقات سريعة ليبلع ريقة ثم رفع رأسه ونظر لـ تلك المُختبأه بكم عمه
ابتسم: وشلونك ياسمين..
ياسمين بخوف صمتت وهي تقرص كفي ابيها: يبه والله خايفة.. ابي اخرج
أبو جمال كتم ضحكته وأشار لبدر لـ يخرج..

أبو زيد ابتسم بحنان: ياسمين ترى هالنظرة لك وله.. انتي بعد لك حق تشوفينه.. بعدين مو تقولين خدعتوني
رفعت رأسها لـ تنظر بعينه وبخوف شدت كفي والداها: يبه خلاص تكفى ما عاد ابي.. ابي اروح..
انسحب أبو زيد بهدوء..

أبو جمال: عاد يبه انا جنبكم قريب.. مو تبطي يا زيد معك 5 دقائق
بخوف ياسمين وكأنما الأمان ابتعد عنها وبداخلها (يبه الله يسامحك وين بـ تروح وتخليني هنا.. يمه احس نفسي بموت يالله انك ترحمني..)
ابتسم بتوتر: ياسمين.. رفعي راسك.. ابوي صادق من حقك تشوفيني..
ياسمين بصدمة: ها..
ابتسم لها بحنان وهو يذكر ربه على الملاك الرباني مرتبكا ضائعاً.. لـ يلاحظ ارتعاش أناملها وبعفوية: هو انتي ناعمة كذا..
وبعقدة حاجبيها: نعم..
نظر لـ عينيها ويبحر بـ سوداها لـ تبعث له رجفة و إرتباك..
وبنبرة لا يخلو من البحة: يصير نملك الحين.. ولك مني وعد لا اسوي لك زواج كل الرياض تتكلم فيه.. وش قولك يا بنت العم
لـ يعاتب نفسه عندما رأى خوفها ويديها التي ترتعش بشدة.. لـ يدخل بدر
وبمزح: الأخ عجبتك الجلسة وش رأيك اجيب لك العصير..

لـ تقف وتهرب بعيداً عن عينيه.. امسك قلبه الذي بات يؤلمه
بدر: يا رجال وش فيك.. انت مهوب طبيعي
زيد ابتسم: عادي ألم خفيف يروح ويرجع.. بدر انا كلمت المأذون وهو بالطريق تكفى يا اخوك اقنع بـ عمي وانا توني وعدتها اني لا اسوي لها زواج بالي تبيه.. نخيتك يا اخوك لا تردني..








.
.
.


نهاية البارت الحادي عشر من الفصل الثالث...
لقاؤنا بعد الاختبارات النهائية إذا الله مدني بعمر...


.
.
.





لا تستبطىء الإِجابة وقد سددت طرقاتها بالذنوب.. |~




.
.
.




عمر الغياب

السلام عليكم ورحمة الله وبركاته
جاسم انسان نذل عديم الشرف والمروه هو وطويرق العله
بجد الله يستر على وهم من خططهم وجمالوا انسان شكاك واناني
ملاك ياقلبي عليها الله يسهل العلاج وترجع لاهلها
ياسمين وزيد يجنن لقاءهم
ساره هالبنت عسل
الف سلامه عليك عموره حبيبتي وماتشوفين شر ان شاء الله
ان شاء الله نلتقي بعد الاختبارات شدي حيلك واحنا بإنتظارك