كاتب الموضوع :
نبضي آبها
المنتدى :
القصص المكتمله من وحي قلم الاعضاء
رد: جنوبي وعشق مهرة من مهرة جنوبية
البارت العاشــر
خذيت الحب وخذيت الحنان وما بقى لي شي
دخيلك رد لي بعض الحنان أجامل أصحابي
ترى ما عاد باقي في رصيد القلب غير شوي
بغيت آعيش به لكن عجزت وماتت أعصابي
أنا ما أريده لغيرك أنا والله أريده لي
أخاف أفقد حناني لا عطيتك وأفقد أقرابي
أعوّد لا معي هذي ولا حتى معاية ذي
مثل من تاب في الدنيا وهو ما أظن قد تابِ
أقلّك خلّها تخلط تزوّد طينها بالميّ
مدامك من سكن عرش الخفوق وأوّل أحبابي
يا أجمل من بكت لجله عيوني يا شبيه الضيّ
ترى نورك كسر وجه الصباح ومات بأهدابي
نهارك تبتسم لجله ورود وفي هجيرك فيّ
وليلك يسهر عيون الملا يقرون بكتابي
الشاعــــــــــــــــر :
فهد الشهراني
احمد/
من ليلة الملكة وانا حالي مايسر صديق ولاعدو تفكيري وعقلي
عند خلود حتى النوم جافاني وان نمت مااحس بحالي ..حتى احلامي
كلها في خلود صورتها ليلة الملكة مو راضية تروح من عقلي اتخيلها
قدامي اتصلت عليها ثالث يوم من الملكة كلمتني شوي وقالت ذحين
مشغوله لما اخلص راح اتصل عليك وتسحب علي اسبوع كامل ..
والمشكلة انا في الديرة عندي ايجازة اسبوعين ومشااااااااااق لها
وادق مشوار لين آبها واكلم الحارس قال كله بيت مافي روح سفر
واتصل عليها جوالها مقفل واتصل على خالي قال حنا في مكة ..
خلود سافهتني وراحت بدون ماتقول لي وتستآذن مني يصر خير
ياخلود والله لعلمها كيف تعمل لي حساب من اولها تطنيش ..
آمي/
آحسها مو متقبله خلود مره وزعلآنة باقي لين جتها جارتنا ام سعد
تبارك لها ملكتي وكنت في البيت وسمعتها تمدح في خلود لآنها حضرت
الملكة قالت آمي والله انا ماابغها لولدي لكن هو وابوه ...
قالت آم سعد ياصفية تعوذي من الشيطان دام ولدك يبغها خلاص لاتسوي
مثلي سعد الله يرحمه مات وهو يبغى اخت صديقه وحلفت ماياخذها وخرج
وهو زعلان ولاعاد رجع علي إلآ في كفنه مات وهو قلبه معلق باالزواج والله
اني اموت في اليوم الف مرة اتمنى يرجع واعطيه اللي هو يبغى لكن فات الفوت
ابكي ليل نهار على سعد الحسايف في صدري كل يوم تشب جديدة على ولدي
وانت ياصفية لاتغلطي غلطتي مامعك إلآ ولد واحد خليه يشوف حياته ..
ومن بعد كلام ام سعد وانا احسها متغيره وماعاد تجيب سيرة خلود مره ..لآنها
من زمان تخاف من فكرة آني اموت لآني ولدها الوحيد جيت عندها وهي واخواتي
جالسين وقلت يمه رضاك عندي باالدنيا كلها وانا احس انك باقي زعلانة مني علشاني
اخذت خلود واخاف اموت وانت غضبانه علي وعلشان كذا بطلق خلود اهم شي رضاك
عني والزوجة بدالها زوجة إلآ انت ياالغالية ماراح اتعوضك واخطبي لي أي وحده تعجبك
اهم شي رضاك ..وانا موصادق لآني مستحيل اطلق خلود لو على قطع رقبتي ..
قالت بخوف لآوالله ماتطلقها الله يرزقها بها واشوف عيالك اهم شي عندي سعادتك
هههههههه آمي يبغى لها شوي سياسة وتلين عندها حب تملك وغيره تبغى كل شي
لها وتخاف ان خلود تحرمها مني ..
قلت لها آجل بكرة تجهزي انت والبنات ونروح مكة نعتمر وبعدها ننزل جدة علشان
البنات يشترون لهم اغراض ونروح نتمشى ..قالت آمي بفرحة الله يوفقك ويحفظك
واخواتي مصدومين يناظرون في بعض مو مصدقين لآني كنت اكرشهم كرش
ماعندي تفاهم ..
رحنا مكة والله يغفر لي والله مارحت إلآ علشان خلود على آمل آني بشوفها ونعتمر
ومن الربشة اللي فيني واصك بين الصفا والمروة 14شوط آمي واخواتي راحوا فيها
استغفرالله كل تفكيري عند خلود ولآحسيت إلآ آمي لما قالت احمد معقوله ماخلصنا
سبع اشواط لنا حدود ساعتين الناس جت بعدنا وخلصت وحنا باقي واستآجر جنب الحرم
وانام لين اليوم الثاني من التعب واتصل على جوالها مقفل واتصل على خالي قال والله حنا
في الجبيل خلود بتسلم جدتها رحمة وتعطيها كسوتها ونتمشى ومعنا عبدالله وناصر واهلهم
لماسمعت خالي حسيت الدنيا تدور فيني قلت طيب ليش جوال خلود مقفل قال مشاري رمها
في المسبح إذا تبغى تكلمها بعطيها جوالي .قلت بضيق لا ماله داعي واقفل وضغطي مرتفع
من خلود تروح ولاتقول لي والمشكلة انها رايحه عند زايد اللي سبق وخطبها والطامة الكبرى
ناصر الغثيث اكثر شخص اكرهه اتمنى له الموت حتى يوم الملكة الكل بارك لي إلآ هو ..
تعوذت من الشيطان اللي يوسوس لي ان زايد راح يشوفها او ناصر استغفر الله مستحيل
هي حريصة رحنا جدة واخلاقي قافلة من خلود واتحلف فيها وبنفس الوقت زاد شوقي لها
اشتريت لها سلسال وجوال احس كآني مسحور لها لكن ماراح اخلي تطنيشها لي يمر
كذا هانت بيرجعون يوم الآحد واتفاهم معها ..
آم فضل / قاعدة تبكي كعادتها بس المرة ذي تبكي من الفرحة آخيرآ الدنيا راح
تضحك لها ولعيالها الحمدلله ربي ماضيع صبرها نادية نزل اسمها ترسيم شملها
الآمر الملكي بترسيم كل موظف على بند الآجور وصارت تدرس صباحي الحمدلله
وكرم ربي ماله حد وخطبها صديق ابوخالد زوجته متوفيه ولاعنده إلآ ولد واحد
ودام انه من طرف ابو خالد وافقنا على طول..
فضل / وهو يشوف دموع آمه طبعها كذا تبكي سواء فرح او حزن يتمنى انه
يموت ولآيشوف العيون ذي تبكي لكن هي قالت له انها ترتاح لما تبكي ..
قال يمه ابوخالد اتصل يقول ابو مازن بيغى الملكة الآسبوع ذا او الجاي
ام فضل : خلاص الآسبوع ذا إن شاء الله خذ فلوس من نادية واعط ابوخالد
يشتري الذبائح واغراض الملكة
فضل: ابوخالد قال لي ان الملكة هو متكفل فيها وقال علي الحرام ماتدفعون
ولا ريال والرجال بحطهم في بيتي ..
ام فضل: لا يافضل والله خسارة عليه وهو ماقصر معنا حاول فيه
فضل : والله عجزت معه يقول خلاص هو متكفل بكل شي ..
ام فضل : الله يوفقه و يحفظه والله ماادري كيف ارد جمايله ابوخالد ..
في آبها/
احمد اتصلت على خالي علشان اروح لخلود قال والله انا في النماص
من جيت من الجبيل عند عامل مات وبخلص اوراقه ...
ويوم الآثنين قلت اكيد صايم ماراح يروح مكان واتصل عليه العصر
قال والله انا في المستشفى هو كل يوما اثنين وخميس يزور كل المرضى
اللي في المستشفى قلت له والحل ابغى خلود ضروري ياخال قال تعال بعد
العشاء لآنها صايمة وانواع التصريف .وذحين لي ربع ساعة في المجلس
انتظرها تجي واتحلف فيها...
في غرفة خلود/
خلود وفاطمة معهم مجلة وقاعدين سوالف لين دخلت زينة :
بنت انت باقي متبطحه على المجلة ذي واحمد تحت ينتظرك ..
خلود:بدون اهتمام زينة تعالي شوفي الموديلات ذي روعة .
زينة: وهي تسحب المجلة ياحمارة والله احمد تحت رسلت
تولين تقول لك ..
خلود: وهي تفز يمه وش جابه ذا وش يبي ..
زينة: حلوه ليش جاي جاء علشان يسولف مع آمي ياحمارة قومي
تجهزي ابوي اتصل معصب ويقول وين وخلود وانا بروح اجهز قهوة
خلود: وهي تحس بنضات قلبها سريعة بمجرد ماسمعت آسمه طيب
وش البس
زينة: أي شي على السريع والله عيب تآخرتي عليه
فاطمة : روحي اغسلي وجهك وانا بطلع لك على ذوقي ..
في المجلس/
ابوخالد : المعذرة يااحمد والله نسيت المغرب اقول لخلود انك جاي
ذحين تجي وذا جواز السفر حق خلود إذا تبغى تروح شهر عسل
والشقة حصلت لك شقة حلوه وكبيرة واي وقت تكون فاضي تعال
المكتب علشان توقع العقد ..وذحين انا بروح خلود بتجي ولاتروح علشان
تتعشى معنا ..
احمد: وهو واصل حده تسلم العشاء مااقدر والله مشغول مره ثانية ..
ماشاء الله يعطيني جواز السفر سلامات يحسبني بوديها دبي او تركيا ليه قاعد على
كنز انا اصلآ مستحيل اوديها علشان تكشف وجهها لي هناك والله مامعها إلآ مكه جدة
وإذا عندي باقي فلوس نروح الطائف وبعدين باقي حاقد عليها بسبب تطنيشها ضروري
اكون حازم معها ليش الدلع وهو في ثرثرته الصامته يتوعد في خلود وقاعد يشوف جواز
السفر شوي يشم ريحة عطر مو غريبة رفع عيونة للي واقفة عند الباب وبيدها صينية بمجرد
ماشافها نسي كل شي الوعيد والكلام اللي له اسبوع وهويحفظه علشان يقوله لها ضرب
به عرض الحائط بمجرد ماشاف الآرونج اللي هي لابسته ضاعت علومه مايدري متى
وصلت لعنده وحطت الصينية على الطاولة وكيف هو وقف لها هو تمد يدها علشان تسلم عليه
هو سحب يدها وحضنها وهي تحاول تفك نفسها منه ..
خلود: يممه وش فيه كذا معصب وعاقد حواجبه شكله بيقوم يمحطني باالعقال
علشاني تآخرت لكن بمجرد ماحس فيني تعلقت عيونه فيني وتحولت نظراته
لشي ثاني رجف كل جسمي من نظراته وزاد لما حضني بقوة حسيت ريحة
عطره تخنقني ..
قلت له احمد فكني لو سمحت خالد بيجي ذحين ..
احمد : ماحسيت بنفسي إلا لماتكلمت حاولت اتدارك الوضع بس خلاص
خربتها حاولت اكون طبيعي قلت وليش خالد يجي دوبه سلم علي ..
خلود: وهي خجلانه علشان يجلس معنا ..
احمد: وهو ساكت اخرج جواله واتصل هلا خالد وينك اهاااا طيب لااشوف وجهك
تجي المجلس ..كيف ليش بجلس مع زوجتي انت وش دخلك بيننا اقول لا اشوفك يله سلام.
احمد هو يفترسها بنظرتها بكل جراءة بداية بوجهها الخالي من المكياج ماغير كحل ومرطب
شفايف الزمام اللي في خشمها خدودها المورده من الخجل شعرها المرفوع لفوق وواصل لين
وسط ظهرها مو لابسه لآحلق ولا سلسال ولاشي ماغير الدبلة كانت فتنة اجمل من ليلة الملكة
الجمال والفتنة ذي وهي مو كاشخه ماعندها خبر اني بجي اجل كيف لو كانت كاشخه تبارك
الرحمن نسيت ابو الزعل كله علي الحرام ياخلود مااضيق صدرها بكلمه ذي مثلها حرام تزعل.
يناظر فيها وهي تصب قهوة الآرتباك والتوتر والخوف باين من رجفة يديها وهي
تمسك الفنجال اعطتني الفنجال وامسكه واليد الثانية مسكت يدها لين جلستها جنبي
قلت اجلسي جنبي ترى مااعض والله قربها ذا يذبح قاعد اسيطر على مشاعر اجتاحتني
وهي قربي قلت كيفك ياخلود وسلامة الآسفار وكيف الجبيل حلوه ..
خلود: احس برجفة موقادرة حتى انطق حرفين قلت بخير الحمدلله والجبيل حلوه
بس آبها احلى ..
احمد: وهو يناظر لحركة شفايفها وهي تتكلم بهمس كانت مغريه قال آبها
حلوه اكيد دام خلود فيها..طيب بتاريخ كم تبغي الزواج يكون ..
خلود: وهي ترجف من قربه الزواج احسن يكون بشهر 8 ..
احمد: وهو يفترسها بنظراته لاوالله مو بدري الزواج راح يكون في شهر 7
اختاري تاريخ 25او 26او 28علشان اضبط ايجازتي واحجز القاعة والمطربة ..
خلود: وهي تحسب حنا ذحين نهاية 5 مستحيل باقي شهر ..لا التاريخ مو مناسب
مره علشان الآختبارات ..
احمد: ليه انت عندك دوام وش دخلنا حنا لآانا ولاانت عندنا اختبار ..
خلود: وهي تبي أي عذر بس الزواج مايكون بشهر 7 بس اخواني يختبرون
احمد: وش دخلني انا فيهم خلود بصراحة انا رجال ماعاد عندي صبر ابغى
الزواج في اقرب وقت كلمت خالي وقال ماعندي مانع كلم خلود ليش التآخير
خلود: وهي تحس كآنها في فرن من الحرارة طيب انا مايمدي اتجهز شهر مايكفي
احمد: بكل جراءة موضروري تتجهزي راضي فيك كذا بدون انا بجهزك على
ذوقي وهو يغمز لها بعيونه ...
خلود:من الآحراج مو قادرة تقول شي ..احمـــــــــد وبعدين..
احمد: وهو مستمتع في خجلها ياعيوووووووووووووووون احمد اطلبي
أي شي إلآ تآخير الزواج ماعندي ..
قطع عليهم صوت جواله ويشوف إلآ آمه والله مو وقتك وهو يرد هلا والله..
صفية : هلا احمد رحت تشوف حجز القاعة والآغراض اللي وصيتك فيها
احمد: وهو يقرب خلود ويحضنها مع الجنب ويرد على آمه لآوالله مارحت
اليوم انا مشغول والله انا ذحين عند واحد مشتاق له وكان مسافر وهو يقرب
خلود منه ويحضنها وهي فكت يده وهو يمسكها قالت بروح المطبخ وانت
خذ راحتك وبرجع ..
احمد خلاص يمه ابشري اروح واتصل فيك واعلمك وش صار مع السلامة
خلود : وهي تغسل وجهها تحس بحرارة وزينة واقفه عندها اشبك تبكي
لايكون الديناصور ذا طردك ..
خلود: بضيق لآوالله بس عنده اتصال وخرجت علشان ياخذ راحته ..
زينة : اهااااا اهم شي بشري عساه رومنسي بس وهي تضحك ..
خلود: بضيق زينة انقلعي عني بلا سخافة ..
زينة: عمومآ انا هنا حولك إذا صار شي كذا او كذا صفري لي واجيك
وهبي شانش بروحش مثل ماتقول جدتي فاطمه هههه
احمد: وهو يشوفها تدخل خجلانه يحبها بجنون في اقل من ثلاث اسابيع ملكة قلبه
ماتوقع انه يحبها كذا هي صح جميله وفاتنة ومغريه بس فيها شي ثاني يجذب
طريقتها في الكلام حركاتها كان ناوي ما يروح شهر عسل خارج المملكة بس
من شاف الآرونجي وهو رايح يها لآباالله تستاهل تروح أي مكان هي تختاره
يتمنى ياخذها من ذحين لماكان وحدهم ...تنهد وهو يشوفها تجلس بيعد عنه
احمد: خلود وين تبغين نروح شهر العسل تركيا ماليزيا دبي
خلود: مو ضروري خارج المملكة مكة والمدينة تكفي ..
احمد: ليش ذا شهر عسل هذا انت كل سنه تروحي خارج المملكة ..
خلود: بهدوء احمد الوضع يختلف انت عليك اكثر من قرض ليش
الخسارة ومكة والمدنية افضل
احمد: لآإن شاء الله نروح اختاري انت بس ومن عيوني نروح ..
خلود : بخجل من كلامه تسلم عيونك ...
احمد : وهو ياخذ كيس ويقوم يجلس معها على نفس الكنب معي هدية
ذا جوال ومسجل فيه كل ارقامي اتمنى اتصل تردي مو احصله مقفل
او تعطي مشاري يكسره
خلود: وهي تشوف الجوال مشكور والله ابوي جاب لي اليوم جوال ماكان تعبت نفسك ..
احمد : قربي وارفعي شعرك علشان آلبسك السلسال ..
خلود: وهي خايفة من قربه وهو مره جريء والبلوزة فيها فتحة كبيره يعني
ظهرها كله باين وهي خلت شعرها مفتوح علشان يغطي الظهرها قالت تسلم
خله في العلبة بعدين انا راح البسة ..
احمد: خلود ترى والله انا مااعض قرب لين جلس وراها قال يله ارفعي شعرك
خلود: بيدين ترجف وهي ترفع شعرها لفوق ...
تحس في يده على رقبتها مثل النار كل جسمها يرجف وهي مغمضة عيونها لين حست
في السلسال يستقر على رقبتها وهويقول بصوت هامس احلى من العقد لباسه..
وهي خلاص تبي تقوم ماعاد تتحمل قربه وهو مسكها وثبتها وانفاسة تحرق رقبتها..
خلود: وهي تحاول تفك نفسها احمد وبعدين فك خلاص ..
احمد : يقوم يجلس مكانه وحاس انه مره خربها بس هو في قربها ينسى نفسة ..
غصب عنه ..
خلود: وهي تحس برجفه بكل جسمها قالت احمد اتمنى اللي صار قبل
شوي مايتكرر ..
احمد: وهو مستمتع والله مااضمن نفسي لكن بحاول بصراحة انت انسانة
مغريه وعلشان كذا خلينا نعجل باالزواج افضل لي ولك ..
وهو يشوف وجهها كله احمر من الخجل حس انه خربها مره معها
قال انا ذحين بروح وذي فلوس وإذا احتجتي شي اتصلي في أي وقت
خلود: احمد طيب اجلس شوي ماشربت فهوتك ولآاكلت حلى ..
احمد : وقلبه يرجف كل مانطقت اسمه تسلمين والله والحلى خلاص
الحلا ذا يجيب سكر لكن في حلا ثاني إذا ماعندك مانع وهو يغمز لها
خلود: احمـــــــــــد وبعدين معك والله اروح واخليك
احمد: وهو يمسك يدها ياعيون احمد ماسآلتي وين انا ساكن ذحين
خلود: خالد قال لي انك في شقة كان جلست ابوي يقول عادي
كان جلس في الملحق ...
احمد: والله خرجت قبل يطردني
خلود: وهي تضحك مستحيل ابوي يطردك فديته ..
احمد : وذايب من ضحكتها ومن عيونها قال خلود لك سلام حااار
من بسمة وقرب منها وطبع بوسه على عيونها وهو يقول بسمة قالت سلم
لي على خلود في عيونها وذي إمانة وخرج وهو يضحك ...
خلود: وهي تحط يدها على وجهها يمه مره قليل آدب مايستحي ..
زينة: وهي واقفة وراها مين هو اللي قليل آدب ها ..
خلود: بخوف يمه وجع يوجعك خرشتي قلبي وبعدين وش دخلك انت
زبنة: وهي تضحك مايحتاج شفت كل شي هههههههههههه
خلود: بخوف زينة وش شفتي ..
زينة : والله العظيم شفت كل شي
خلود: بعصبية وش شفتي ..
زينة وهي تضحك شفت الجوال الجديد اللي في المجلس ياوسخه ليش
وش صار ها ؟؟
خلود: ولا صار شي
زينة: وهي تشوف السلسال ياهوو حركات ولد عمتي هدايا وهي تقرب وتشوف
قديم السلسال ابو كلب قديم مره مين باقي يحط حرفين قديم مره ...
خلود: وش دخلك محد طلب رآيك ..
زينة : وهي تقرب وتضحك والله ولد عمتي ماهو هين ذيب
وش اللي على رقبتك ههههههههههههههههههههههه
خلود: وهي بتموت من الخجل زينة وجع يوجعك والله انك وسخة
زينة: وهي تضحك انا وسخة الله يسامحك المهم تعالي ابوي فوق
يبغاك وغطي على رقبتك آمي لآتشوفك بعدبن هههههههههههه..
وهي تقابل فاطمة في الدرج فاطمة سلامات ايش فيك معصبة كذا
خلود: زينة السخيفة ...
في الصالة فوق / خلود والبنات وامها وابوها
ابوخالد: ترى اليوم بعت العمارة اللي في الجبيل اللي عطتك
جدتك رحمة وسعرها حلو وحصلت لك عمارة هنا في آبها جديدة
دورين و ملحق في حي جديد فيه خدمات وبضبط لك الدور الآول
كامل سكن واستقبال والباقي تآجرينها وتستفيدي من المبلغ وش
رآيك ....
خلود : بضيق لآنها راح تخرج من البيت اللي عاشت اجمل ايامها فيه
مدري اللي تشوفه انت وآمي
ابوخالد: امك موافقه والحي قريب منا شارعين بس وعندي
عامل مغربي شغله حلو وجبت لك صور ديكورات والمعتق
اختاري اللي يعجبك والآلوان وهو ينفذها وكمان الآثاث راح نسافر
الآسبوع الجاي جدة انا وانت وآمك وتختاري اللي يعجبك..
زينة: بآعتراض ياسلام آمي وخلود بس وانا ؟؟
ابوخالد: انت عند اخوانك صعبه نروح كلنا فاطمة عندها دوام
زينة: فاطمة عندها دوام مشكلتها انا وش دخلني رجلي على رجلك ..
ابوخالد: وهو يشوف زوجته ساكته عارفه ان صدرها ضايق
علشان زواج خلود قرب وبتروح كل ليلة يحس فيها وهي تبكي
قال آم خالد ليش ساكته عسى ماشر ,,
ام خالد: بضيق ولا شي ..
زينة : لالالالالالالا ايش كذا يمه تعاملي ابوي حرام عليك ترى بخلي
عمتي صفية تخطب له ..
ابوخالد: وهو يضحك وبتحضري زواجي يازينة
زينة: اكيد بحضر موكفاية زواجك الآول على آمي ماحضرت محد عزمني
ههههههههههههههههههههههههههههه
ام خالد: وهي تضحك غصب عنها زينة بلا خبال
زينة : ذحين ضحكتي لما السالفة فيها زوجة ثانيه ومن قبل ابوي متشفق
على نظرة منك عيونه احولت مسكين صدق المثل اللي يقول لاتضرب
الحرمة باالعصى اضربها بحرمه مثلها تتعدل ... زينة لماشافت امها جايه
لهاراحت وراى ابوها بس فرده من حذيان امها سبقتها على ظهرها زينة ابوي
انا في وجهك امنعني من مرتك اح والله تعور يمه ماشاء الله وش التصويب
الدقيق ذا تنفعي في الرماية مايفوتك شي ..
ابوخالد: وهو ميت ضحك تستاهلي وصالحة مستحيل اتزوج عليها مهما كان الله يخليها
زينة: والله استاهل انا اللي ابي مصلحتك وترى امي تتغلى عليك بس قدامك وإذا تآخرت كل وقتها
رايحه جاية زينة خلود فاطمة زينب اتصلوا على ابوكم اشتقت له ..اااااقصد تقول تآخر
آم خالد: وهي تطير عيونها في زينة ياكذابه طيب فيك يازينة
زينة: هيا احلفي ماتقوليها يله
ام خالد: اقول اتصلوا بس مااقول اشتقت له ..
زينه : اهاااا شفت انها ماتحبك تزوج عليها احسن لك خذك مهرة صغيره تهتم فيك
ابوخالد: وهو يضحك زينة وبعدين معك خلاص ..
آم خالد: طيب يازينة طيب
زينة : ليش انت زعلانه ذحين عادي ذا زوجك اعترفي له بمشاعرك الكتمان يقتل الحب
خلود : وهي ميته ضحك هي فاطمة تتمنى تكون جريئه مثل زينة قالت ابوي
انا بروح انام باقي محتاج شي...
ابوخالد: لاالله يحفظك ...
يوم الآربعاء في الديرة /
احمد: وهو خارج من المسجد العصر ويشوف خاله ابوخالد ومعه سيارة
ناصر غريبة وهوعنده اكثر من سيارة غير سيارة خالد
احمد: السلام عليكم ياابوخالد كيفك متى نزلت الديرة
ابوخالد: حياك الله يااحمد والله من الصباح نزلت علشان اساعد فضل
ملكة اخته الليلة عزمك فضل ..
احمد : عزمني الظهر ماقصر بس الآهل مين ينزلهم
ابوخالد: بكل بساطة ناصر الصباح اخذت سيارته واعطيته الجمس علشان
خالد امه تخاف عليه يسوق مع العقبة
احمد: ليش ياخال ناصر يجيبهم وانا البارح عند خلود وماقلت لي
ابوخالد: عادي ماصار شي انت وناصر واحد
احمد: بنفخه لاوالله مو واحد رجاء ياخال خلود ماعاد تركب مع ناصر ولا حتى ابوي
إذا انت مشغول موضروري تجي الديرة او انا اخذها
ابوخالد: وهو يشوف احمد معصب ياولد اشبك معها خالد وامها واخواتها مو وحدها وناصر
مو غريب ..
احمد: زوجتك وبناتك ياخال بكيفك بس زوجتي رجاء ماعاد تركب مع ناصر ذا
وناصر غريب لانعرفه ولاشي ..
بعد صلاة العشاء في بيت الجدة فاطمة /
خلود: فطوم وش اسوي احمد يقول ذحين بيجي اطلعي لي صعبه مره
جدتي فاطمة هنا واخاف عمي حسن او عياله يجون معهم نسخه من المفاتح
فاطمة:قولي له ان آمي في الملكة وماتقدري تطلعي له
خلود: قلت له قال ابيك شوي بس ..
فاطمة : عادي اطلعي له جدتي موجوده عادي راح تتصرف إذا جاء احد
وبعدين محد راح يجي كلهم في ملكة نادية ...
احمد في الصالة جده وبعدين نادي خلود ابغاها شوي بس
الجده : ياولد توكل على الله وش تبغاها ذا الحزه ريحنا ..
احمد: بطفش وليش مارحتي الملكة ترى عيب عليش جيرانش ياجده
وناديه كانت تدرسش ولاتروحي لها والله عيب ..
الجده: ولا بروح عندي بنات ولدي وحدهم اخليهم امهم في الملكة ..
احمد: جده تنادي خلود وإلآ والله ادخل انا لها شوفي حلفت ..
الجده: انا آم حسن انا تحلف علي ياولد صفية توكل يله اسر عني ..
احمد وهو يطنش جدته ويخرج جواله ويتصل هلا خلود تعالي انا
في الصالة عند جدتي بسرعة مستعجل ...
شوي إلآ هي داخله عنده ..جدتها يمه خلود خليك منه تراه خبل
خلود: وهي تحاول تكون طبيعيه هلا احمد كيفك وهي تمد يدها وكاالعادة
يسحبها ويحضنها ويبوس خدها
الجده فاطمة: آنا ام حسن احمد سود الله ذا الوجه فكها ..
خلود: ميته خجل وهي تفك نفسها منه احمد ليش كذا
احمد: بسلم عليك عادي وانت ياجده عادي زوجتي بسلم عليها
الجده: الله لايسلم عدوك استح على وجهك خبل والله انك خبل ..
احمد: وهو يضحك بنت ولدك حلوه اخذت عقلي اااه ياجده عذبتني وهو يضحك
الجده : وهي مستحيه خرجت من الصاله وهي تقول خبل ياالله في صلاح الحال خبل..
خلود: احمد ليش كذا شوف جدتي خرجت ..
احمد : وهو يقرب منها معطي الباب ظهره ومقابل لها قال خليها تروح
انامتعمد اسوي كذا علشان تخرج وبعدين ليش عباية كتف لآبسه لايكون لبستيها اليوم
خلود: بحرج لاوالله عباية فطوم اختي لبستها ذحين علشان ..وماقدرت تكمل
احمد : يلاحظ ارتباكها والخوف علشان ايش ..
خلود: ولاشي يااحمد بسرعة وش تبي قبل احد يجي ...
احمد : محد بيجي لاتخافي كلهم في الملكة قولي ليش لآبسه عبايه في البيت
خلود: احمد وبعدين خلاص لبستها وبس تحقيق هو ..
احمد: وهو يقرب منها ويفتح العبايه وخلود بشهقه احمد ايش تسوي فك
احمد بقوته فكها وهو يفترسها بنظراته بكل وجرئه ويناظر في خلود وهو يضحك
ويقول عادي ترى احب البجامه يعني كان عادي تطلعي بدون عبايه ..
خلود: احمد بلا سخافه خلاص فكني وهي تحاول تركب ازرار العباية بيدين
ترجف ..
احمد: مسك يدها وهو يشوفها خلاص بتبكي قال اسف والله ورفع يدها وهو يبوسها
خلاص خلود اسف والله ..
خلود: احمد خلاص الله يخليك روح فطوم لوحدها تنتظرني لاتحرجني ..
احمد: والله ماكنت ناوي اجي بس لماعرفت ان ناصر هو اللي جابكم ارتفع
ضغطي خلود لاعاد اسمع انك ركبتي مع احد غير خالي حتى لو كان ابوي
خلود: وهي تناظر فيه احمد عادي الوضع بعدين اهلي معي
احمد : حتى ولو ناصر وغيره لآتركبين معه ياخلود رجاء خالي مو
فاضي اتصلي علي او مو ضروري تطلعين من البيت ..
خلود: احمد انت مو واثق فيني
احمد: وهو يناظر في وجهها المصدوم لاوالله اني واثق فيك بس
خلود: بس ايش يااحمد قول ..
احمد: خلاص ياخلود انا بروح اهم شي ماتركبي مع احد
خلود: وهي تمسك يده احمد لحظه لاتروح قول ليش ..
احمد: وهو يتمنى ياخذها بعيد عن كل البشر قرب منها لين حط
جبهته على جبهتها وهو يقول بصوت هامس خلود انــا اغاااااااااااااااااااااار
تعرفين ايش معنى اغاااااااااااااااااااااار حتى من اهلك انا احبك تعرفي وش
معنى احبك هذا انا اعترف لك صح انه بدري اعترافي لك بس ماعاد اقدر
اكتم احبك انا واغاااااااااااار من كل شي حولك حتى لماشفت صورة العرض
في الواتس حاطه صورة عبدالله اخوك ضااق صدري .. راعي شعوري انا اغار
خلود: وهي موقادرة حتى تتحرك علشان تبعده عنها تحس بخدر بكل جسمها
اعترافه الصريح بحبه لها وما اكتفى كمان يغار مو أي غيره حتى من اهلها يغار
موقادرة تقول له شي فضلت تكون ساكته احسن موقادرة تصف شعورها هو اول
رجل يقول لها احبك بنبره ثانيه ومختلفه هو مختلف بكل شي حتى بحضنه مختلف
بس هي تحاول تسيطر على نفسها معه باقي بدري على انها تصرح له وهي بطبعها
تفضل السكوت ..
احمد : وهو حاس صدرها المضطرب انفاسها الغير منتظمه مستسلمه له ماحب
يضيع على نفسه فرصه مثل كذا اغرق وجهها بقبلات ومارجع من نشوته على صوت
جدته من خارج الصالة تقول احمد خلاص ياولد روح الله يستر عليك خل البنت تجلس
مع اختها
قال وهو يبعد عن خلود اعوذ باالله من جدتي تصلح تشتغل في الهيئة ..
خلود وهي موقادره ترد خجلانه مسك يدها وهو معطي الباب ظهره
قال انا بروح تبغي شي ..
وقبل ماترد سمعت صوت الباب ينفتح وظهر لها شخص كانت تتمنى
ماتشوفه العمر كله او مايشوفها وهي واقفه مع احمد تجمد فيها كل شي
وهو يتفحصها بنظراته وهو يقول اووه خلود الحلوه هنا مع حبيب القلب
انتهى
|
08-05-13, 06:35 PM
جديد مواضيع قسم القصص المكتمله من وحي قلم الاعضاء
العرض العادي
