الفصل الخامس
كيف أطفي الريح بثيابك وكيف اشعلك
كيف اتنثر على جمـرك وكيـف احتويك
نقضت ليل الحرير وجيت ماانت ل هلك
سمّيت باللي فتني بـك وقلت ابتديـك
الايام مرت بسرعة وعرس ميعاد قرب وكانت حوسة لان ذكريات كان عندها امتحانات فصلية وميعاد اتفقت هي وذكريات انهم الاثنتين ينظموا الحفل طبعا ميعاد اعطت الضو الاخضر لذكريات بالنتظيم لانها واثقة بذوق الحلو على ان تستشيرها بين الحين والاخر اذا كانت مو واثقة بشي معين..
ريان من جهة ثانية كان طيف رجل يحس انه قلبه مخلوع من مكانه كان باين عليه الهم هالات سوداء حوالي عيونه وضعف شوي ,, ابوه كان حاس فيه وقلبه عوره عليه لكن الي قاله لولده لازم يصير حتى لو على حساب قلبه ما هو مهم !!
بيت ام محمد
ذكريات كان تكلم ميعاد بالتلفون تقولها على اخر المستجدات الا بدخلت امها
ام محمد وهي مو عاجبها وضع بنتها قامت لا تاكل وضعفانة ولا تقعد مع اخوانها مشغولة بين دراستها وبين عرس بنت خالها
-يمه شو تسوين...
-هلا ماماتي تامرين بشي؟
بتنهيدة طويلة:سلامتك من تكلمين؟
-ميعاد ..
-اذا ما في شي مهم سكري بكلمك شوي..
ذكريات خافت وما عرفت ليش سكرت من ميعاد وركزت على امها..
-سمي يمه في شي..
ابتسمت ام محمد وقعدت جنب بنتها ولمتها:سم الله عدوك..ما في الا الخير بس اشتقت حق بنتي واخوانك مسوين اضراب علي
-فديتك ماماتي وانا اشتقت بس هانت المرجوجة بتعرس وبفضى لكم واخواني ليش اضراب ما يقعدو معك ؟
حاست ام محمد بوزها:امحق قعدة اذا قعدو سكتو ولا تكلمو ولا تكلمو عن الكورة وانا شفهمني بكلامهم؟؟
ذكريات ضحكت من قلبها:والله اوك وعن من يتكلمون؟
ام محمد ناظرتها بقو:الحين انا جايتك ابي اتكلم معك تقولين لي من .........
قاطعتها ذكريات وحضنت امها بقو...:افا الغالية تكلمي ولا يهمك..
ام محمد اخذت نظرة على غرفة بنتها وشافت فستانها كان لونه احمر شيفون بطبقات ناعمة جدا كان خفيف لكنها ما بتتكلم تعرف بنتها لا صممت على شي مستحيل تغيره ^^
ام محمد تمسح على شعر بنتها الي نامت على فخذ امها:يمه حبيبتي تراك ضعفانة وهالحال ما عجبني ليش ما تاكلين ؟؟ قولي شو مشتهية بسويلك .؟؟
-تسلمين يمه ابد مو من شي بس ما احس عمري لي نفس اكل شي..يمكن نفسية
ام محمد تبي تغري بنتها:شرايك بكرة اسويلك ذيك المعكرونة مع البروكولي ؟؟
ذكريات وهي تعشق البروكولي : يمي لذيذ اوك موافقة..
ام محمد بدزة خفيفة على راسها: موافقة !! قاعدة اخذ رايك انا..
وتكلمو عن اشيا كثيرة واغلبها اكيد كان عن عرس ميعاد والترتيبات وبعدين اقتحمو عليهم الشباب عزيز وناصر الغرفة وتغير الحديث النسائي الى حديث كروي بين الاخوان الشي الي طفر امهم وخلاها تهرب من عندهم..
بيت ام ريان ^^
بو ريان: الا البنات وين زمان ما شفتهم؟
ام ريان: لاهيين بتحضيرات ميعاد..ما باقي شي ^^
بو ريان سكت يفكر انه بنته حبيبته بتروح بتبدي حياة جديدة وقطع عليه افكاره زوجته وهي تساله سؤال كان خايف منه
-الا بو ريان ولدك ريان شفيه ؟
رفع راسه وناظرها: شفيه؟
ام ريان وباحساس الام الي ما يخيب:الولد متغير كله ساكت وقاعد بروحه واذا تكلم جاوب على قد السؤال..هو ما قالك شي؟
بو ريان بتفكير:لا وقام من عندها...وهو متضايق على وضع ولده!!
ريان كان قاعد عند البحر صارت جياته عليه كثيرة واتصلت فيه الريم..
بصوت مهموم يحاول ما يبين: هلا ريم..
-هلا والله شخبارك حبيبي..
بابتسامة خفيفة:الحمدلله وانتي شخبارك؟؟
-حدي مستانسة عشان عرس ميعاد قرب واخيرا من زمان ما صار عندنا عرس
ريان كان ساكت !!
-الو ريان معي اكلمك !!
-معك زين دوووم ان شالله..
ريم حست انه ريان في شي هي حاسة بس قالت يمكن عشان اخته وانه مضغوط لكنها ما اهتمت وكملت سوالفها عن اغراضها شو اشترت وما اشترت كلام بنات باختصار ^^
حل اليوم الموعود عرس ميعاد ^^
طبعا كاي يوم عرس الكل كان مشغول خصوصا البنات خوات العروس كان بيروحون لصالون هم وامهم وام طلال وبنتها لصالون ثاني وام محمد ما راحت مكان على قولتها بتحط بنفسها شويات هنا وهناك ^^ ميعاد الي اصرت على ذكريات انها تكون معها ما تتخيل نفسها تكون بروحها بتنجن وسبحان الله كيف بنت عمتها لها القدرة انها تهدي الواحد وتخليه يكون مرتاح ^^ وعلى هالحال ابتدى يومهم السعيد..
خلصو البنات وطبعا لازم يكون في تاخير وقالو لبعض الي يخلص يروح فورا للقاعة !! ذكريات والعروس خلصو واتوجهو لبيت بو ريان على قولت ميعاد ما في داعي اروح فنادق بيتي استر لي وطلبت من ذكريات تضل وياها وطبعا هي ما مانعت طلبات العروس اوامر...
في القاعة الجو كان خيالي ابداع ورومانسية من الف ليلة وليلة ^^ والكل كان يسال من الشركة الي نظمت الحفل وكانت المفاجاة ان خوات العروس قالو ان بنت عمتهم هي سوت كل هذا مع تنسيق مع الشركة الفلانية كانت القاعة روعة وتحفة فنية بلا بذخ او اسراف ..^^
نجي للبنات خوات العروس كان طالعين حلووين عايشة لابسة فستان لونه بنفسجي مداخلة فيه درجات من نفس اللون تصميمه روماني وشعرها كان مظفر بطريقة حلوة ورقيقة جدا ومكياجها كان ثقيل نوعا ما..
شهد كان مختارة فستان يناسب عمرها لونه مشمشي من الشيفون والدانتيل اختارته بالزور بعد لف ودوران مكياجها كان خفيف وطالع شكلها كيوت وباين انه عمرها صغطوط ^^
ريم اختارت تلبس ملك الالوان الاسود فستان اقل ما يقال انه رائع وطبعا كل شي ثاني كان بروعته المكياج كان مثل لوحة وشعرها كان مرفوع بطريقة جميلة ..وكل من شافها كان يصلي على النبي من حلاتها.. والي ما صلى على النبي عاد بكيفه
بيت بو ريان...
ذكريات كانت تفتح
قصص قديمة اغلبها كان يشمل ابوها ميعاد حبته لابو محمد مع انها ما شافته كثير لكن كلام بنته عنه يحبب الواحد فيه ما كانت تتصور انه في اب يحب بنته هالكثر مثله مسكينة ذكريات ميعاد كانت تقول بنفسها تداري شوقها وحنينها لابوها بس كل قصة وكل حرف يكشف الي تحاول تستر عليه...ونجحت ذكريات انها تمتص القلق والخوف والترقب على الاقل هالليلة ميعاد اختارتها تضل وياها وهي عارفة انها بتكون نسمة بارة منعشة تنعنش روحها ^^
لبرهة صغيرة سكتت ذكريات تتامل العروس الجميلة بتشتاق لميعاد بصورة كبيرة على الرغم من وعدها انها ما بتقطعها لكن الحياة الزوجية بتاخذ حيز من حياتها كانت ميعاد الاخت والصديقة وتقدر تقول الام الروحانية تفهم عليها ناظرتها وابتسمت وميعاد ابتسمت بالمقابل ...
ذكريات محاولة انها تتماسك:ميعاد تكفين لا تبدي لاحقة..
ميعاد ودمعة تسبح بعيونها بس ضحكت بعدها: مالت عليك تبيين ابكي بعدين ...
ذكريات مسكت ايد ميعاد وشدت عليها: بشتاق لك بنت خالي ^^
ميعاد لمتها لحضنها: وانا بعد يا بعد روح بنت خالك..حسستني اني بسافر ..
ذكريات دفتها لازم تغير الموضوع: طبعا مسافرة لمملكة خالد ^^
ميعاد فورا شب وجها ضو وبضربة خفيفة على كتف ذكريات: اقول روحي شوفي وين طقمك الذهب لبسيه وتعالي ربع ساعة وريان بيجي..
-ان شالله عمتي..الا الكيس وينه اوك تذكرت ...
طلعت ذكريات من غرفة ميعاد وهي مو مغطية نفسها لانه ما في حد بالبيت الا هي وميعاد الكل كان في القاعة والرجال كانو في قاعة ثانية وتم الاتفاق انه ريان ياخذ اخته من البيت لقاعة عرسها...ذكريات ما لبست طقمها كانت ماجلته لاخر دقيقة ما تحب على قولتها تلبس شي يخنقها ولا شي طويل ينزل من اذنها حدها لا لبست حلق يكون دائرة ..طبعا الطقم كان من الذهب الابيض فيه فصوص حمرا هدية من اخوها محمد وكان روعة رقيق جدا مثلها ومثل فستانها ...راحت ذكريات للصالة الموجودة بوسط البيت الي كانت اغراضها هناك وتوجهت للمراية الكبيرة فتحت العلبة وتاملتها مسكين محمد كم كلفه هالطقم ؟؟!!
لبسته وخلصت وحست بدوخة خفيفة كانت لثالث مرة تييها اليوم وما عرفت شو السبب اذا الاكل متاكدة انها اكلت امها ما قصرت زغطتها قبل لا تطلع البيت....
لفت بترجع لميعاد ووقف قلبها قبل لا توقف هي كانت في عيون تحرقها نظرات كلها كره وغضب وغموض واشياء ما قدرت تفسرها حست ان الدم بعروقها جف واطراف ايدها فجاة صارت ببرودة الثلج من الصدمة رجلها انشلت ما عرفت تتحرك لا يمين ولا يسار فكرة وحدة هذا من متى واقف وليش ما يتحرك ولا يغض البصر وفجاة والي زاد من ارتباكها وصدمتها انه قرب منها فتحت فمها تبي تقول شي لكن لسانها ما طاوعها وعيونها مع كل خطوة تتقرب منها تتسع بذهول لكن واخيرا رجلها قدرت انها ترجع خطوة وحدة لورى ,,,!!! لكنه مسكت بمعصمها وشد عليه وقرب منها كثير غمضت عيونها تدعي ربها ان هذا بس من تاثير الدوخة لكن الرد كان ..
-فتحي عيونك..
يامرها بكل برود..وفتحت عيونها وشافت ابتسامة سخيفة على شفايفه وشدت ايدها تبي يفكها لكنه مسكها من كتوفها يغرز اصابعه فيها يقربها منه وهو شاهد على ثورة قلبها من العرق الي برقبتها...وقال كلمتين !!
-بحرقك بناري !!
واخيرا نطقت ذكريات كانها نار وشعلت وما قدرت الا على كلمتين : انـــــــت .......... انـــــــت .....
طحن ضروسه وهو هيمان وغضبان وانسان مشاعره تناقض الثانية...
-فكني تكفى ...
رجته وياما بتترجى وعد الحر دين يا ذكريات واول الغيث قطرة فكها وعطاها نظرة اخيرة نظرة ما فهمتها ولا راح تفهم شي !!
وصلت العروس للقاعة والي كان قبل غير وبدخلة العروس غير !!
ميعاد عروستنا كانت ناعمة ورقيقة وجميلة وعذبة كل شي فيها كان خيالي مثل كل عروس لها هيبتها فستانها كان انيق وراقي مطرز بشك من الصدر للخصر مع وردة ناعمة على جنب خصرها وبعدها يتوسع الفستان مع ذيل متوسط حوافه مشكوكة بوردات رقيقة ومكياجها كان ناعم كثير بالنسبة لعروس لكنها طالعة روعة...
ريم عرفت من البنات ان ذكريات مع العروس وطبعا انقهرت اولها لكنها ما اهتمت كانت النتيجة بذهول الناس فيها تكفيها..لكن ذكريات كانت غير وتشهد بهالشي لكن بينها وبين نفسها طالعة مثل الاميرات فستانها لونه روعة وناعم لدرجة غريبة وتزينت بطقم باين انه كلف ثروة صغيرة ...ومكياجها كان غريب لكنه ابرز حلاوة عيونها وبان لونهم الغائم..
الكل كان فرحان بالعروس فرحة ام وخوات وقرايب وخلان وصديقات...وصلت العروس لعرشها وقعدت بكل شموخ..ميعاد كانت سرحانة بالقاعة الي كانت مفاجاة غير صح انها وذكريات اتفقو على معظم الاشياء لكن التطبيق ما شافت منه شي ذكريات قالت خليها ليومها بتحسي بطعم ثاني !! واي طعم تحس فيه طعم حلو جدا..قربت منها ذكريات الي كانت واقفة على طرف بعد ما الكل ابتعد امها وام ريان وخواتها وام طلال...
بضحكة صافية تنبع من قلب صافي:شرايك يا قمر مثل ما تبين ولا ..؟
وكان تقصد بالقاعة ردت عليها ميعاد وبصدق دون اي مبالغة: الا اكثر حبيبتي تسلمين وعد مني يا ذكريات اني ما بنسى لك هالمعروف ابد وانك مثل ما خدمتيني بعرسي بخدمك برموش عيني...
ذكريات تتطنز عليها:رموشك صناعية ترى ...
قربت باستها:نحنا خوات ولا توعديني بشي انتي من ذاتك بتسويه..يلا عاد بروح اشوف امي ولهت عليها ..
وخلتها ومشت ونزلت من الكوشة متوجهة لامها ومرت خالها..
سلمت على امها وحبت راسها:ربي يحفظك شهالحلاة شهالزين...ما شالله.
ذكريات حاظنة امها تبيها تبرد جنون عواطفها واكتفت بس بابتسامة..الا بام العروس تقول: ذكريات يمه تسلمين طلعتي فنانة وانا ما ادري..
تبادلو الحريم بضع كلمات الا بالبنات ياخذو ذكريات منهم..
عايشة:بس عاد قاعدة عند العيايز تتساسرون تعالي صديقاتي يبون يتعرفون عليك !!
شهد:وانا بعد يلا بدور خلصي..
ذكريات:شو دور وما دور وانا ما عندي راي !!
عايشة قربت من طاولة فيها بنات من عمرها وسلمت وعرفتهم على ذكريات..
-ما شالله هالحلوة بنت عمتك ما تتشابهون ..
ذكريات بابتسامة ومجاراة للوضع: تسلمين..
وحدة ثانية:وليش ما عرفتيها علينا من قبل ...!!
عايشة : شو اعرفكم عليها كيف ومتى واين !!
الاولى سالت: صدق انتي الي صممتي القاعة ؟
ذكريات: تقريبا تقدرين تقولي عجبتكم ؟
البنات شهقو شهقة خلوها تخاف...لكنهم ضحكو...
النبات كلهم: الا تجنن ما عجبتنا وبس..
ووحدة اقترحت عليها انها تصمم لكنها ردت انها هالمرة والاخيرة..
عايشة تتخصر:نعم وشمعنى ما يخصني ذكريات مثل ما سويتي لميعاد بتسوين بعرسي..
ذكريات رفعت حاجب: بالله الناس تقول لو سمحتي ...بعد اذنك ..مو تتامر !!
عايشة قربت منها وباست على ارنوبة انفها:افا يالغلا تامرين لو سمحتي وبليز وتكفين والي تبين..
ذكريات ضحكت عليها: ان شالله اذا الله احيانا...
عايشة بابتسامة محبة لبنت عمتها: ان شالله الله يطولنا بعمرك ^^
ذكريات بدلع: احرجتيني..يلا عن اذنكم..
البنات من راحت قطعوها..انها حبوبة وقريبة للقلب وحسدوا عايشة عليها الي تخققت اخر خقة ^^
مرت الساعات القصيرة وحان موعد دخول العريس خالد ^^
خالد كان شكله وسيم وحلو بالبشت دخل مع ابوه وعمه وصابه ذهول من شريكة حياته كانت ميعاد ملكة الملكات وصل عندها وعرف انها ميتة من الاحراج والخجل..باسها على راسها وهمس لها:مبروك غلاي ^^
-الله يبارك فيك..
بظرافة الرجال قال لها: واخيــــرا..
وفورا صدت عنه الصوب الثاني فوق الي فيها جاها يزيدها ..
نزل بو خالد وبو ريان وساسر ام ريان وطلب منها طلب...هي استغربت لكن ما علقت وراحت تنفذ طلبه..
-يمه عايشة..
-سمي ماما..
شوفي شهد المرجوجة وينها فيه وبنت عمتك وروحو للـ لوبي ابوك يبيكم !!
-ان شالله....وراحت عايشة ونادت على اختها وذكريات وتوجهو لبو ريان...
ذكريات لا شعوريا خافت وقلبها حست بوقف من كثر ما دق اليوم لكنها دعت دعاء وتوكلت على الله عساه خير...
بو ريان بوصول البنات قام يهلي ويرحب ويتغزل فيهم هو طبعا شايف بناته لكنه ما شاف بنت اخته تكلم معاهم لدقايق وضحك وسوالف على غلاسة محببة...وقعد يصبر بناته الي انفجرو من البكي من كلام ابوهم الي كان عن اختهم ميعاد ^^ حضنهم وقالهم انها سنة الحياة..
انتهى الاجتماع الصغير السري وذكريات قالت انها بتروح تشوف شكلها كيف صار حوسة ولا مقبول !!
فكت عنها حجابها وناظرت نفسها بالمراي تشوف وحدة تحسها ما تعرفها يا ربي انا شو سويت بحياتي !!نزلت راسها لكنها فورا نهرت نفسها مش الحين يا ذكريات بعدين في غرفتك ولحالك انتي ووسادتك وبس !! جت بتمشي مرة ثانية لكن الدوخة رجعت لها وبقوة حاولت تمسك الانتريه لكن قوتها خانتها وحست انه خلاص بيغمى عليها !! واغمى عليها وبدى جسمها يتهاوى على الارض وقبل وصوله لحقها ومسكها كانت حبيبات من العرق تبرق على جبينها ...
نادى على اسمها وبضربات خفيفة على خدها: ذكريات ذكريات شفيك سم الله عليك ...تسمعيني !!
لكنها ما كانت تسمع ابحرت بعالم ثاني...
حملها بين ايديه وتوجه لصوفا كبيرة نيمها عليها ..واتصل بمحمد وهو يغطي شعرها: هلا محمد انت وين ؟؟
محمد باستغراب:موجود ليش خير !!
-تعال ابيك بقاعة الحريم ضروري...
محمد بصراخ: شـــــــصاير !!
-اقولك تعال ....وسكر عنه الخط !!
محمد فورا رجع بسيارته كان يبتعد عن القاعة دقايق بعد ما دخل المعرس كلن راح لطريقه..وصل ودق عالرقم وجاه يستقبله ..
-علامك خوفتني شصاير ؟؟
مسك من ايديه واخذه وين ما ذكريات موجودة: اختك تعبانة !!
محمد من سمع كلمة اخته رجله ما شالته ...طار طيران لوين ما هي موجودة وشافها كانه نايمة..ضربها على خدودها ويحس ان حرارتها مرتفعة..وعلى طول حملها ومشى لسيارته..
-انا باخذها المستشفى بس لا تقول لحد ...قول انها مع محمد وبس !! وهالله هالله امي تتدرى بشي..
اخذها واختفى ...محمد حط اخته وراه بالسيارة وركب ومسك ايدها واتصل فورا باخوانه يلحقوه للمستشفى ...ووصاهم انهم لا زيدون السرعة..
وصل محمد للمستشفى بسرعة البرق ونادى على دكتور الطوارئ بصوت عالي اخته للحين ما صحت ولا عليها بوادر حياة الا تنفسها بس ...دخلوها غرفة الفحص ومحمد كان واقف برة مكتف ايدينه وهو يدعي ان اخته تكون بالسلامة
عزيز بهرولة وصل لعند اخوه ووجه ما يتفسر: ها بشر شفيها صحت ؟؟
محمد نفى وظل على سكوته...
ناصر: الحين امي شو نقول لها !!
زفر طويلة طلعت من صدر محمد: ما اعرف ما اعرف !!
بعد دقايق طلع الدكتور وهجمو عليه اخوانها: ها دكتور بشر ..
الدكتور: ان شالله خير بنسوي تحاليل وبننتظر النتيجة عينو خير ..ومشى وخلاهم..
دق تلفونه وكان المتصل ريان..
-هلا ريان..
-هلا محمد ..ها بشر ؟
-للحين ما في شي بسوا لها تحاليل وبعدين بنشوف امي درت بشي ؟
-لا قلت حق خواتي يغطو عليها لا تشيل هم بتصرف لا صار شي..
-جزاك الله خير يلا مع السلامة...
انتهى اليوم السعيد لكن اخره قلق وتوقعات !!
مليت جمـر انتظارك واستحيت أسألـك
واحسبتني ما بعد جيتك وفكرت اجيـك
اثرك بقلبي من البارح وانا استعجلك
واثري نسيتك من الفرحة وقمت احتريك
29-01-13, 01:12 PM
رد: ذكريات وهل الحب ينسى
جديد مواضيع قسم القصص المكتمله من وحي قلم الاعضاء
العرض العادي
