صباح الحروف الراقية .........صباح الاقلام الناضجة والراقية ........صباح الاناقة لكاتبة تميزت بالبذخ والعطاء في سطورها ......موعارفة اعبر عن فرحي وانا اشوف صرح شامخ ثالث يبنى بيننا من جديد ......وفعلا سعيدة اني للمرة الثالثة يكون لي الشرف بمتابعة كاتبة لهم بقلبي عشق لذيذ ......لما تحمله تلك السطور من لمسات لها تأثير عميق على القلب ........ضمضم ياهلا ويامرحبا بنورك وبأبداعك من جديد .....

ثرثرةأرواح متوجعة

اسم له وقع كبير ويحمل الكثير من المعاني ........العنوان بس له تأثير خطير على المشاعر ...ومتأكدة انو المحتوى يحمل الكثير من تلك المواجع


جدا عشقت شخصيات روايتك لحد الان بدون استثناء او الي كان لهم ظهور والي زاد على تعلقي اعمار الابطال اعمار ناضجة توحي بالكثير العقلانية بالتصرفات الي راح تأثر على الاحداث ........
والاسماء جدا استوقفتني .......مع انو بعض غريب او نادر مانسمع فيه بس حسيت انو للاسم نصيب كبير بالشخصيات ........محتارة ابتدي في مين امممم راح ابداء


ام قائد
ماادري هي بأي سن ترملت يعني بسن الشباب اوبعد ماصارو عيالها بسن ناضج ....شخصيتها ماظهرت بشكل واضح
الا اني قدرت اكون عنها في الوقت الحالي صورة مبسطة ماادري تتغير نظرتي لها بعدين او لا وهي ام تتمنى تزوج ولدها الوحيد وتفرح فيه وتشوف عياله خصوصا انو عمره موصغير السنين تجري وهي متلهفة لضم ذريته بس هلقائد الي اختارت له هالاسم لرغبة ببالها كبر وصار فعلا قائد لايقهر ولا يتنازل عن الي بباله حتى لو كان هالشخص امه ........كرهها لجموح لانها رفضت ولدها وحرمتها من شوفة الاحفاد .......او لعشق ولدها لها لدرجة انو رافض تحقيق امنية امه بسببها ....او لانو هالام من الامهات الي يعشقون اولادهم ويكرهو اي انثى تشاركهم هالحب حتى لو كانت الزوجة ......لسى ماتأكدت من هالنقطة

قائد وجموح

قائد له من اسمه نصيب يقود الكل على حسب رغباته ...شخصيته لحد الان جميلة .... لكن ماتخلو من الانانية والقسوة والعناد .....بدليل تمسكه بجموح تلك ا لتي جمحت عليه ورفضته ومازالت .... يمكن لانو تعود انو كلمته تكون مطاعة بدون مايزعزع احد اي رغبة من رغباته ...ويمكن يكون لعشق اصابه من الصغر لدرجة امرضته بالانانية ....يعني سنين عمر تضيع وعمر بنت عمه مع انو التحجير لايرضي دين ولا اي عرف بس للاسف بعض العادات رغم اندثارها ورغم المستوى الثقافي الي وصلت له العقول بس مازال هناك من يتمسك بها ....رغم المهنة الي يمتهنها والي اغلبها قضايا لاناث ذاقت من الظلم الكثير الا انو هالشي مامنعه من يكون ظالم

يعني حق من حقوق اي بنت تختار زوجها وابو عيالها ماله حق لاهو ولا عمه يحرموها اياه لو تزوجها وهي كارهته بيرضى بزوجة تعيش معاه جسد بدون روح لانو ممكن يملك الجسد بس القلب والمشاعر مايقدر يجبر احد عليها

شخص يدافع عن حقوق المرأة ويحاول ينتصر لها لكن عند اهم قضية ولاهم شخص يكون طرف الظالم عليها على قولة المثل باب النجار مخلع

للان ماعرفنا شخصيته وتعامله مع خواته هل هو حنون ومايرضى لهم الضرر او يخافو منه لانو قاسي مثل قسوته على جموح

الجموح تلك الجامحة الغير راغبة بأن يسير امورها احد او يفرض عليها اي امرتملك شهادة برتبة دكتورة جامعية مثقفة اسلوبها راقي مع طالباتها تحلم بالزوج والاطفال لعشقها لهم .....بس ليش رافضة قائد بالذات هل لانو فارض نفسه عليها وهي تعودت تفرض اختياراتها او لكره من الماضي .......هو مايقل عنها لابشهادة ولا بمنصب

الصورة الي محتفظة فيها سنوات مومعقولة تحتفظ بصورة شخص تكرهه وحارمها تحقق حلم من احلامها ننتظر سر رفضها

قائد والجامحة شخصيتين متساويتين بروح العناد والتحدي ننتظر هل ممكن واحد من هم ينتصر على الثاني او يكون الاستسلام نصيب واحد منهم ويسلم الراية تحت احد الظروف

ثريا وفهد

ثريا جدا تعاطفت معاها واحس العنوان يناسبها كثير خيانة من زوج وصديقة شئ كبير على قلب اي امرأة ....رغم اننا مااكتشفنا شخصيتها تفكيرها اسلوبها ....بس اعتقد انها تحمل من القوة الكثير فهي اخت قائد وابنة عم الجموح والجينات الوراثية لها دورها ...تخفي الكثير من مواجعها بقوة جبارة

نجهل الكثير عن قصة استغفال ذاك الزوج وتلك الخائنة ليغرسو خنجر الخيانة دون علم عن متى وكيف ....بس فهد هل كان مجبر على الزواج منها هل كان مايحملها مشاعر حتى يطعنها ويوجعها بالطريقة الي اوجعها فيه ...هل يملك الكثير من الخداع والمراوغة لدرجة ملك قلبها وجعلها تعشقه ثم ببساطة يتخلى عنها .

طلاقه لها كان برغبة منه او كان لقائد دور وبعد معارك ....ليش ماانجبت غير خالد رغم انو عمره مو صغير ....هل تشتكي من علة منعتها انها تحمل طول هالسنين ...

وتلك الخائنة اي اخلاق تملك حتى تبني حياتها على انقاض حياة اخرى كانت لها صديقة لكن من بدء حياته بطرقة خبيثة لن تستمر تلك الحياة ستنهار عند ابسط عائق

مااعتقد فهد رجل معدوم الاخلاق والا ماكان قائد قبل به زوج لاخته ..... اعتقد ان ذاك الفهد مغرر بتلك الحمقاء وسيندم انه بيوم بدل الثريا بالثرى

وخالد ذلك الطفل الناضج هل سيكون له دور في تغيير تلك الحياة الي انقلبت ولم تعجبه تلك التغيرات ...كلامه لامه اعطى انطباع عن حبه لوالده ........وثريا وتفكيرها بفهد وباللحظات الحميمية الي ممكن تعيشها تلك الخائنة تدل على عمق الغيرة والغيرة لاتكون على على قلب امرأة عاشقة .......ننتظر انكشاف الكثير عن حياة ثريا



الدانة وماهر

جدا موجعة موجعة قصتها تعاطفت بقوة معاها ....مسكينة مايكفيها احساسها بالنقص عن غيرها احساس انها تزوجت من زوج شفقة وتأنيب ضمير ...حتى تجلد بسياط السنة ناس عديمة الرحمة لتشوه ليس لها يد فيه ........عرجاء كلمة قاسية كيف وهي تطلق على انثى اكيد عانت بما فيه الكفاية من هذا الابتلاء ........ اذا هالعاهة اصابتها يمكن بعمر الطفولة دام ماهر كان مراهق .........كيف اجل الي يولدون وهم يعانون منها .....مستكثرين عليها الزواج من رجال بكامل صحته ويطعنوها بأشياء يمكن هي تفكر فيها ........بدل مايحمدو ربها على النعمة الي عايشينها وانو ممكن مثل ماانصابت دانة مو بعيد تصيبهم بشكل مختلف بس هذا الناس للاسف

وماهر اعتقد انو بسن المراهقة كان يسوق سيارة احد من اهله وصدم دانة وتسبب بعرجها ... ماادري انا بعد اتوقع انو متزوجها شفقة لانو يحس بالذنب .....والا لما كان سكت بدون ماينفجر مدافع عنها بدون لايوضح لها انها اكمل النساء بعينه ......اعتقد الكثير من المواجع تنتظر دانة وماادري احس هالماهر له نصيب من اسمه وهو ماهر بأخفاء الي بصدره بس بيجي اليوم الي بتطفو الخفايا للسطح


نجووووووووووود

ا لها نصيب من المواجع ارملة بعز شبابها وام لايتام كانت تتميز بشخصية مسالمة .....لكن عرفنا انها تغيرت بعد موت الزوج وصارت تعيش بحروب طاحنه مع عمات اولادها ........للمحافظة على حق الايتام هم امانة برقبتها ...عرفنا شيخة وقسوة قلبها ومايهمها تعيش وتاكل مال حرام هو حق لعيال اخوها ...ياترى الى اي مدى الطمع والقسوى بيوصل بهالعمات ...

نجود الي تحمل الكثير من العشق لذاك الزوج ....واصرارها للبقاء ببيت الزوج الراحل هل بيستمر ...او بتنجبر تترك هالبيت اعتقد انو سبب رضا قائد انها تعيش في بيتها هو ام زوجها العجوز بس اعتقد النفوس الكريهة ماراح تكتفي بالي سوته وبتزيد المواجع على نجود

وهل القوة الي تسلحت فيها بتستمر او بتنهار وتستسلم ....اعتقد هناك الكثير الي ينتظر نجووووود وعيالها


الزين
مايقدرت اكون صورة صحيحة عنها ......يعني دام انها بالجامعة تعدت سن المراهقة بس احس فيها تمرد مثل اختها وعناد وقوة بالشخصية .....بس ليش مختارة هالشلة ومصرة عليها رغم انهم مو نفس ميولها ولا انطباعها وهل بيكون لهم اثر في المستقبل يكون سبب في صحوتها ولا جموح بتقدر تحميها من الوقوع في المشاكل


ام حاتم باين انها ام حنونة وعندها وجهات نظر غير عن بناتها ....حبها لقائد وكلامها يوضح اعجابها للشخصيته وقبولها لتحجيره لبنتها


العم كايد قصته مع نوف قهرتني بس ماادري هل لما ذكر انو دموعها كانت سبب ضعفه تركها تعيش حياتها وهو الي ظل على ذكراها لو انو ماتنازل الين ماتت وهي ماححقت رغبتها ماتت محرومة من الزواج والامومة .......واذا تزوجت هل ننتظر ظهور عيالها في البارتات الجاية

ام حكيمة او ماقريت اسمها ماادري ليش جاني انطباع انو هالشخصية بتكون فاكهة الرواية يعني عجوز من الي اسلوبهم ودعاويهم وتصرفاتهم طريفة بس لما قريت الحوار طلعت حرمة عادية خخخخ ...

ننتظر ظهور حاتم ونتعرف عليه عن قرب ......ورهان اسمها شدني ومتشوقة اعرف الكثير عنها وايش بيكون دورها في الرواية هل هي مقربة لجموح او تختلف يعني كثير اشياء .........ويمكن في شخصيات لسى مخفيين عنا بكراتينهم ينتظرو ضمضم تطلعهم لنا ...


في انتظار الاحداث وماتحمله للابطال

من مواجع

يامرررررررررررررررررررررررررررحبا السسسسساع
ما شاء الله ! إذا كذا بدايه فكيف بالنّهايه !
كأن لش روايه قبلها إسمها بعض العيون حقدها في نظرها لو أني غلطانه ؟
قريت منها شوي بس ماكمّلتها >< , فشكلي برجع ليها على ماتكتبي هالرّوايه ^_^ , وبما إن طيش بعد وقّفت روايتها
اي صح ض1 تعجبني طريقة الردود + الّلهجه تبعكم > ها تعطوني كورسات فيها ؟
من ناحية التّعليق ع الرّوايه , امممممم مافي شي أعلِّق عليه لأن تونا بالبدايه
بس صراحه إسلوب شيِّق , مُذهل , خيال , إسطوري .. أهنِّيش عليه لأن نادراً ألاقي أحد بهالمستوى : )

.
.
مُتابعه لكِ دوماً :*

.
.
بسم الله الرحمن الرحيمـ...

.
.
.
ثرثرة 2
.
.
.
مدخل
.
.
.

فيِنا بصماتٌ من أمنياتِ آدم

و لهفة قابيل

فينا من دلالِ حوّاء

و حزنِ أم موسى

فينا من طهر هارون

... و عنفوان موسى

فينا من تراتيل سحرة فرعون

و أمواج من البحر المفلوق

فينا من فقدِ يعقوب

و براءةِ الذئبِ الذي طالما يتّهمونه

و فينا ريح من قميص يوسُف

فينا عيسى المسيح

و فينا سليمان الملك

فينا من مريم الـ لّم يمسسها بشر

و فينا من نوح قلب أب

و شموخ الجودي

و فينا مُحمّد المُعلّم

و محمد الأب

و مُحمد الشرف

و مُحمد المُفدّى

و مُحمد الـ لا ينتهي و لا ينفد و لا يغيب

و مُحمد السّؤدد

و محمد الذي لا يشبه إلا قلبه

و فينا الزهراء

و عائشة

و أنوار من عيون الحجاز





فينا أسراب الطيور تجيء من سبأ

و فينا بلقيس سليلة التاريخ

و إسماعيل يبني بيديه الحرم

و مكّة تحتفي بالناس

و النيل لم يعُد يطمع في العذارى

و العراقين عراقٌ واحِدة

فينا الشام لا يموتُ من كثرة ما طعنوه

فينا يثرب مازالت أمنية خفية في قلوب المهاجرين



فينا شعرٌ من ابنُ رواحة

و فينا الحيدرة

و حنظلة تغسله الملائكة لأن زمن المتاعب قد تعب

و فينا عُمر و سلمان الفارسي

فينا بلال لم يعد يبكي في شجن

فقد التقى الرسول [صلى الله عليه وسلم..]





و فينا القُدس يضيّعُها اليهود الوطنيون

و اليهود السياسيون

و اليهود المُفكرون

و اليهود الماركسيون

و اليهود الباعة المُتجولون





فينا المصابيح

و نحنُ في الظلام





للأنيق \جسور أبن أدمـ...
.
.
.

بدايه..

.
.
.

صباحكم نرجس ..
أسعدني والله الترحيب الدافئ
بـ المتصفح بـ العام بـ الخاص بـ التقيم...أخجلتمونـي يَ أحبه...,
كما أنتمـ وعهدتكم..
بآذخين بسقوف من مخمل...
.
.
.

بعض الردود خمنت أن وصايف [ أم قائد..] حاقده على [ الجموح ]...وذكـرتو عدة أسباب ..
أتوقع أسنتجتو هذا الكلام من مقدمة البارت الاول...
خطأ يَ أحبه أستنتاجكمـ .سجلو عندكم نقطه تحسب لضمضم ^^

.
.
.
الثرثره لآتصنف تحت خانة الروايات الحزينه...

ممكن العنوان أعطاكم فكرة مبدئيه ان الروايه كـ كل راح يطغى عليها الحزن...

لكن الروايه تتكلم عن جانب.. و .. زاويه ..لـ كل شخص فينا..

لـذا الأعتدال في كل شي جميل =)
.
.
.



[ ..لآتليهكم الروايه عن الصلاة في وقتها..]



.
.
.
بخبث \و مكحل العين...!

قايد بصدمه و أرتباك..\وش مكحل عينه...!

كايد بصوت رخيم مرتجف \جميح..؟

عض على شفتيه ..\أنت تنسى الي تبي وتذكر الي تبي...متى تترك حركاتك هذي ياعم... !



القى بـضحكه تهكميه..كـ عادته..\وش حركاته...انا شايب كبير في السن أخذه على قد عقله..خوياه الي بزمانه اليوم هم تحت التراب...
وحتى الأخوان والخوات مآتو...وهو بلا ضنى..وبلا عصى..!


.
.
.


يعلم تماماً أن العم كائد يتقن السخرية الشديدة من وضعه الحالـي..


ويعلم تماماً أن هذا العم يتقن العزف على الوتر تماماً..


و..


يرمي فـَ يصيب ف َيقتل..!


لـكنه بحق يتألمـ كل ما دلف الباب ليدخل فيجده يثرثر لنفسـه لماضـي لن يعود...

.
.
.


قائد بـ أشفاقه...\ الله يطولنا بعمرك يَ عم..ويخليك لنا...والله ماضحكت على حالك..لكنك الله يهديك تعرف الي يوجعني وتنبـش وراه...

كائد بخبث\لآ...تضحك علـي...وترى أبشرك الي جانـي بيجيكـ...وينحني ظهرك وتطيح عند واحد من عيال عيال عمك ..
بعد من زين الطبوع أبوك ماجاب الا أنت...ماحتال
يجيب لـه خمسه والآ ستت عيال فالح لـي بس بمطارد الغزلان..!

قائد يكتم ضحكته وهو يلتقط خبثه\ لاحول ولاقوة الا بالله..وش تبي ب أبوي الله يرحمه ويسكنه الجنه...وبعدين وش ها الفآل لـي..لآ أبشرك بعرس وبيجي علي أنا الـسته
تحسـبني مثلكـ أخلي بنت عمـي لـغيري...وهواي فيها...وأضحي لها كل سنه...

أردف \ومن رداة حظها الـضعيفه خذت لها واحد ماهو بكـفو..يضربها
ليلها ونهارها وأعرس عليها...وجابت خمس عيال وكلهم ماتو صغار...
وماتت لآحب ولآضنى...
شفت لو أنك خذتها غصب وجاك عيال منها..ماعاد نقدو عليك العرب يوم
أنك كل سنه تضحي لها..وكان أحفادك منها اليوم مزعجينكـ....

بحزن شفاف\مكتوب لها يَ ولدي و مكتوب لي..قـسمة على كل أنسان..مادريت والله أن الـسلب يضربها..شد فيها للشمال .والله
لو أني داري بوقتها كان دفنته حي..

أردف بغضب \ وأنت قم أنقلع مني ماغير تقلب في سالفة نوف جايز لكـ توجع عمك جعل الي بين ضلوعك الوجع...

غرق بضحكه خافته لـيقف ويقبل رأسه ويجلس بقربه...\ لآ والله ي عم مابي أوجعك لكن جايز لـي سوالفك...الله يطولنا بعمركـ...


صمت كايد فجئه لـيردف بعد ثواني معدوده وبـهدوء\أنت من أنت عليه...؟


قائد برحابه صدر\على نايف ولد أخوكـ...

كايد يشير بيده بعدم اهتمام \ماعرفك ولآعرفهم...لآتجلـس جنبـي...قم فارقني هناكـ....

.
.
.

العم كائد يلقـي الخيوط جميعها..ويعبث بها...ويتناسها عمداً ...أو..صدقاً...

.
.
.




أبتسم قائد وهو يرى دخول حاتم ورهان لـمجلس الواسع...

ليعلو صوت التراحيب...!

حاتم بـ أبتسامه \مكانك يابو نايف والله ماتقوم..
أرتخى حاتم ليقبل أنف قائد وكذلك رهان...

قائد\الله يعز قدركم كبرتوني يا شباب..
أبتسم رهان بخبث\انت أصلن شايب من جيل عمي كايد...!



العم كايد بصوت عالي \من الي دخلو يا ولد...؟


ليردف بكرم بدو \ قم أذبح لرياجيل الي دخلو....قم وجب الرياجيل .!


أبتسم رهان وبممازحه وخبث \والله مانذوق شي حنا سبب فيه....!

كايد / في مجلس الـ كايد ولايعلقون الذبايح...لآبالله أن تعلق ..

رهان بممازحه وخبث يتميز به\ماهذا يا عم...أتريد ان يؤكد حقوق الحيوان بأنآ متوحشون نقوم بقتل الأغنام والجمال كُلما دخل علينا ضيف من ثم أردنا أكرامه بقتل
وبا الوحشيه هذه..

ماذا اقول لـ أصدقائي بـحقوق الحيوان..!

أجب ياعم...!

هل الشعب السعودي خاصة يتميز با الكرم [الهياطي ]

كُلما دخل عليهم ضيف من ثم أرادو توجيبه وأكرامه بتنكيل بتلك الأغنام الضعيفه...

بأي عصراً انت...!

هيا... [أحتسي..]

لقد وصلنا لعصر ماك وكنتاكي وانت مازلت على [المفاطيح...]
ماهذا ياعم...!


غرق حاتم وقائد بضحكـ..

ليردف قائد \لآ بالله نبشر بخير...منك يارهان..!

تركهم العم كايد بعد أن القى نظره تفحصيه عليهم من ثم أستلقى على ظهره وتغطى بفروته وتركهم ببساطه.

رهان\ افا ياعم نمت...وخليت ضيوفك...أسهر معنا.. جايب لك بيره بَ الشعير الي تحبها...!

كايد بخبث\ عشوهم انتمـ...أنا برقد وراي روحة بدري مع الحلال أتبع الربيع..

ليردف بصوت منخفض \ وأترك البيره لآتروح فيها...!

لـيغرقون ثلاثتهم بـضحكـ ...

من ثم أردف حاتم \ رهان بيسافر يدرس برى وهذي علومه...لآتفشلنا بسفاره هناك ترى أعرف لي ناس فيها ويعرفونا..

أبتسم قائد\ خلاص خلصت أوراقك يا رهان..؟

رهان \ايه أبشرك خلصت....وبعد كم سنه برجع لكم ان شاء الله بَ الشهاده الكبيره .

قائد\الله يرجعك بسلامه ويكفيك شر ها السفره الي ماني بمرتاح لها...!

رهان بتملل\ وليه يا أخوك والله ان العلم نور ويرفع الأنسان..

قائد بجديه\ أمريكا...دوله ماعاد يروحون لها لدراسه صار الي يروح لها مفقود والي يرجع منها مولود...الله يستر عليكـ...!

قاطعه حاتم \وانا أقوله بعد بس هو يقول التخصص هذا مايندرس الا هناك...الله يستر عليه وعلى كل شاب يروح لهم

رهان \والله أنكم تضيقون الصدر....و...تجيبون الهم ..لآتسمعكم بس أمي وتقول أنثبر على راسك مافيه دراسه...يالله أقنعتها وهي ماهي مقتنعه...


ابتسم حاتم له بمسايرهـ...

من ثم تتبع نظراته لـ قائد الذي أنشغل بأوراق بيديه.


.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.

الزين تقرع الباب لتدخل...

الجموح \تفـضل...

أبتسمت الزين وهي تراقب أنغماس الجموح بـ أوراق بيديها
وعدة كتب...

رفعت رأسها الجموح لتبتسم \هلا حبـيبتي...تعالـي...شوي وأخلص الي بين يدي...

الزين بهدوء \سمعت كلام أمي لك قبل شوي...جوجو...ترى امي تبي مصلحتكـ..؟

أنخفض رأس الجموح للاوراق وبَ أبتسامه\ بتعلميني مصلحتي يا الفصغونه..؟

الزين بدلال تقترب لتصعد على طرف مكتب الجموح\ايه دام الكبار مايعرفون مصلحتهم الدور علينا يا الصغار نفهمهم وننصحهم...

أردفت بحماس\ والله قايد حنون شـوفـيه عند خواته كيف يعاملهم والـي يعامل خواته وأهله بهذي الطريقه أكيد بيكون مع زوجته أحسن و
زيدي عليه شخصيته واثقه وفيه رجوله نابعه منه ماهي تصنع ..وش تبين أكثر من كذا كل المواصفات الـي تحلم فيها كل بنت فيه...
تبين الصدق لؤطه...!


الجموح برزانه \خلصتي...!

الزين \ ..أيه خلصت ..وش في وجهك تغير لونه ترى نتناقش لآتعصبين علي...!

الجموح\الموضوع هذا بذات الف مره قلت هذا شي خاص فيني ومابي أحد يتدخل فيه...
وبعدين الله أكبر صار الحين قايد عريس لؤطه ...أجل دامه لؤطه..على حد قولكـ... يالله شدي حيلك وخوذيه عليك بعافيه..!

الزين تقف بـعد نبرة صوت الجموح الغاضبه المتهكمه..,

لتمازحها بتوتر\ المشكله انه مايبي الا انتي ...والا كان خذته من زمااااان
وبعدين هو يشوفني اخته الصغيره الى الان تصدقين اذا شاف أخواني معي والا وحده من خواته يقول لهم قولو لها ترجع كرتون الكت كات..
يذكرني يوم دخلت غرفته وانا صغيره وسرقت كرتون كت كات عنده الله لايعودها من سرقه كلن درى فيها...الحمدلله والشكر..يحسب الدنيا واقفه ماحد يكبر..
حتى هو شيب وكبر...ومايشوفني كأني نخله..
وهو كل ماشافني نفس الاسطوانه...
و يدري اني أستحي وأذا شفته احس اني بتكرفس بعباتي....
أردفت بعد ان قلبت عينيها بسقف \ولآ الي يبكيني صدق اذا سيرت على أهله..وكانو خواته متجمعين..أذا راح يشتري لبزران خواته شوكلا وعصيرات يوزعها لهم بكياس
وانا بعد يحط لي معهم ويعطيها اخته الثريا وتفشلني تقول معليش..هو مايصدق انك صرتي حرمه...وسعي صدرك..هو مثل اخوك حاتم...
فـ ذا خذتيه فهميه وعلميه ان انا صرت بجامعه...وان الي يسويه هذا اسمه عيب..يساوي بنت جامعيه مثقفه بـ مبزرة خواته

رفعت حاجبها \ وليه ماتقولين يَ الخبله ان ثامر ولد محمد يعلمه بخبالكـ...
مثلاً هواشك معه على الايباد اذا حمل العاب ..
والا..
على طراطيع العيد اذا وزعته خالتي وصايف وتقاسميتها مع ثامر و أخته وخالد....

و الا على الدباب حق ثامر اذا رحنا لمـخيم..وبعدو الرجال بمخيمهم...وش كنتـي تبوسين راس ثامر كم مره عشان دورهـ...

أذكرك بعد خبالكـ والا ناسيه كل هذي الأشياء الي تسوينها وتوصل له من سوالف البزران...

وبعدها تلومينه اذا وزع لك شوكلاتات وعصيرات مع البزران هذا لأنك بزر ومابعد كبـرتي ولآكنك خشيتي جامعه..

الزين وهي تضع اناملها بصدمه على صدرها\الله...كل ها الاشياء فيني...والله ان احسب اني حرمة عاقله...حسيت الحين اني بزر..وش أسوي وش أسوي..علميني علميني...!

تهز الجموح رأسها \حمدلله والشكر..حمدلله والشكر...مانترجي بين المقابر صوت..!

الزين بتهكم \ الاوالله حمدلله والشكر منك انتي...أجل تبيني معقده وحالتي حاله..لآ ياحبيبتي..بونس عمري توني..صغيره...بركب الدباب...
وبفحط ...وبلعب بطراطيع ورى البزران في العيد..
وبحمل العاب في ايبادي لين أقول بس..وش قدامي تكفـين اذا عقلت...هذا انتم عاقلين وفيكم الف عله...اذا العقل بنظركم يحرمني كل هذي الاشياء خليني بزر
في عين قايد وعين الجماعه كلهم بعد...بعكس والله الكاكو والعصير الي يجبيها حلوهـ...

أردفت وهي تشد الخطوات لخارج الغرفه \ راجعي راجعي اوراقك يادكتوره..أصلن الشره علي الي يجي يشوف خاطرك وش فيه...





أبتسمت الجموح على طفولة الزين الجميله...

مهما حاولت أن تجعلها تـكبر بتقريعها الدائم لها...

فـهي تستجيب أسبوع أو شهر...

من ثم تعود لـ تصرفات طفوليه...

هي لآتستطيع ان تتحكم بـنفـسها...

قد يكون لانها حضيت بدلال من الجميع...

فـ الجميع يـسكب لها الدلال في راحة كفيها...

لآتكبـر تلك الروح يَ الزين لآتكـبر...فـهي نقيه جميله...

روح طفوليه لآيشبها الا المطر..,



.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.


وضعت يدها على شقها الأيسر ...وبـألم \ أنا أسفه

أنا أسفه على السنين التسع الماضيه..

أنا أسفه على كل لمه صادقه طلعت منك ..

أنا أسفه على صدقك وطيبتك..

أنا أسفه على أني أبد ماعطيتك حقك ...

أنا أسفه على أني كذبتك الف الف مره

أنا أسفه يَ ها النبض الي صار يوجعني بكل دقه ونبضه

أنا أسفه بكل دقاتك على غدرهم وذبحكـ...!



بمقابل أردف باب المجلس الخارجي بعد ان تأكد من تدفئه عمه...
وخطى الخطوات لـ داخل الفله...
ليفاجئ بصوت حركه خفيفه من جهة قسم الحريم...



أبتسم على الأنارات الهادئه وجلوس أخته الثريا

بطرف الدرجات المقدمه ..

قائد يخطي الخطوات الهادئه وبـصوت خافت\ قماري والثريا ..وها الجو البارد...!

أرتفع رأسها ب أبتسامه كاذبه \هلا أبو نايف....كنت أظن أنك نمت من وقت طويل...

لأني ماعاد سمعت أصواتكم بمجالس..؟

قائد وهو يجلس بقربها..\راحو الشباب وجلست أراجع لي كم قضيه..وتوني أخلص...
أنتي وش مسهرك يا الغاليه..؟

ثريا بـرقه\ مآفـيه شي...بس تعرفني أحب القهوه وأكثر فيها بعد المغرب...وتسبب لـي أرق....!

أبتسم بمسايـرهـ \آها...,

ثريا \حاتم ورهان الـي كانو موجودين...والا بس رهان...لأني أسمع ضحكه الله يوسع صدرهـ ماغير ضحوكـ...

قايد \ أيه حاتمـ معه....بس والله مافـضيت لجلستهم...عندي كذا شغله كان لازم اراجعها وأدقق فيها...وملـو هم بـسرعه ومشـو...

ثريا \ ما هون رهان من الـسفر...؟

قايد بزفرهـ\ ولآفكـر ..عازم أموره الله يستر عليه...

ثريا \الله يستر عليه ويخلـيه لعين ترجيه...ها الولد الكل يحبه...مايدخل في جلـسه الا يحليها و أخلاقه عاليه..الله يحفظه ونفرح فيه...

قايد \أمين...

القى نظره على وجها الشاحب..وبرقه رفع أنامله لـوجها...\لـيش طالـعه لك هالات سوداء هنا...؟

أبتسمت وهي تبعد يدهـ \لآتبدأ موالكـ....أنا بخيـر...لآ تشيل همـي...ترى أشيل همك وهم خواتك معكـ....

ختمت جملتها بـ ضحكة باردهـ...!

تتبعت عينيه كذب الحروف بشفتيها المرتجفه...\ و تكذبين علي وعينك بعيني..يَ أم خالـد. أفآ..سهرانه والدموع اثارها باقيه بـعيونكـ...وتقولين أرق من قهوهـ...


أرتبكت ..

لتشد أناملها وتضعها بـ أحضانها...وتبعد عينيها عنه \ مافـيه شي...مجرد مراجعة حسابات...و...صفحة من حياتي يبي لازم تنطوي
وانا واثقه ان ذكرياتها ماراح تعيقني بمستقبل...انا بخير...وبطوي هذي الصفحه قريب..أنا بخير..!


قايد \ماراح تقدرين تطوينها لحالك ي َ ثريا...لآزم الكل يساعدك في طوي هذي الصفحه...أنتي مو بلحالك..ولآ ترغمين نفـسك على ان لآزم تطوين هذا الماضي بفتره
قياسيه ...

عطـي الوجع حقه لآ تقهرينه بـتكميم..تكلمـي...قولـي...أنا أسمعك لو تبيني مستمع صامت..





صمتت من ثم أبتلعت ريقها الجاف...المر \ موجوعه حيل حيل يَ قايد موجوعه ..خـنجر مسموم أنغرس بـظهري في عتمة ليل...و..رمح مسنون أنطعنت فيه بصدري بوضح النهار...

يعني ماحصل الا هـي الي مثل تؤم روحي يتزوجها...وهي وافقت...
وهي متأكده انها بتنحرني بهذا الشي...
كيف جات في باله...؟
يمكن من كلامي عنها...
بس انا ماعمري مدحت شكلها..؟
كنت بس أسولف عنها سوالف عن محبه...
وهي ...
كيف وافقت..ياترى حبته من كلامي عنه....؟؟

كنت أمدح فيه....!
و
أقولها كل شي...برومنسيته...بحبه لي....بهدايه...بكل شي...وهذا من حبي له...
بمشاكلنا...بـزعلاتنا...وترضيته لي...!

كنت أتكلم عنه ...مثل اي صديقه تتكلم مع صديقتها المقربه منها...تشكي وتحكي ...

لكن ماتوقعت أبداً انها في النهايه بيحلى في عينها وبتتزوجه...وبتحلى في عينه وبيتزوجها..


لـيش أختارها هـي بذات...ضآقو الحريم عليه...ضاقو..!

والا يـبي يتخير أكثر الاشياء الـي بتهدنـي هد...!!

طيب لـيش...انا وش سـويت له...؟



أختنقت روحها وهي تنظر لعيني قائد \ أبسألك ياقايد أنتم لـيش ماتصونون الحب...ليش تحبون بكل ذره في جسدكم سنين وسنين وفجأهـ...!

يروح كل شي بغمضة عين...وكأنكم ماحبيتو....!

وكأنه ظلكم..

أو...

أشباه لكم الي عاشو معنا وأغرقونا بـكذبة [..الحب...]..!

قول لي ياقايد...!

الحب عندكم من أيش..؟

والقلوب الي بصدوركم...هي نفسها الي تدق بضلوعنا..؟

علمني يَ قايد...!

كيف بحب من جديد..؟

و..

كيف بعقد صداقات من جديد..؟


ها الأثنين أظلمو الدنيا بعيني...خيانة [..حب..]..و...خيانة [..صداقه..]..

تزوج من صديقتي...!

صديقتي...!

صديقة العمر كله...!

لك تتخيل الوجع..؟

قائد بتهدئه \يا الثريا ...

قاطعته وهي تشير بكفها وأناملها المتفرقه أن يصمت...

لتكمل هي ثرثرتها المتوجعه...\حبيته بكل ذره فيني أعترف...!

عشقة تفاصيله...

عشت معه على الحلوه والمرهـ...

ماكنت أحب أهله ولآ أطيقهم...

بس عشان خاطر عينه..حبيتهم وحطيتهم على راسي من فوق..!

طول عشرتي معهم ماشافو مني الشينه ولآعبست في وجه صغيرهم...ولآ..كبيرهم...

صنت بيته...صنت كل شي يخصه...

حبيته ياقائد بكل عرق ينبض فيني...!

وفجأه ومن غير أي سابق أنذار...

يدخل علي وبكل أريحيه...

ويقول

الثريا...أبـيك تكونين حرمه عاقله وتتفهمين... ترى تملكت على رزان بنت عبدالرحمن...!

تدري كيف كان شعوري...!


شعور أختناق ..و..أحتقار..وغدر..وذل..و..مهانه..!

لآ...أكثر كـثير....!


لآ...لآ...


أنتم ماتعرفون عن شعور الأنثى أي شي...!

أنتم مازلتم بعصر شـهريار..ألي أكبر همومه نفسه وبس..!

الرسول صلى الله عليه وسلم قال فيما معناه..رفقاً با القوارير..!

وانتم تدرون وش قلتمـ...كسراً با القوارير...!

كسرتو قلوبنا...

تحسبون قلوبنا من فولاذ..

لآ
تحس..ولآتشعر..ولآتنبض..!

كـسرتو أرواحنا....

وأنتم تحسبون أرواحنا مَ تتعب ولآ تتوجع ولآ تمـوت وتنتهي...!
.
.
.

صمتاً يَ الثريآ...صمتاً..

فقد أغرقتيني يا الثريا ..

ب َ بحر من الوجع وأنا الجاهل با السباحه...

فكيف أنتشلك منه...!

أيَ يارب..

هل كتبت لـ أخواتي العذاب في حياتهم وأكون أنا من أتجرعه مناصفة معهم...

.
.
.

أه يا الثريا...

صمتي لشهوراً عديده

واليوم ثرثرتي بما يقتل الروح..

وينحرها....,


.
.
.

مسـحت دموعها بـ أناملها بـشده تحت أنظارهـ لـتزفر بحرارة أنفاس..و بتـماسكـ\أنا بكون بخير....صدقني بكون بخير....في حاله وحده...لما يـجي لـي فهـد
وهو مثل المتشرد الـي رفضته كل الدروب..لما يجيني وهي نافضه جيوب قلبه...وتلقاني بكل خانه وبكل زاويه ..وتلـقى كل الحكاية نزوة وطيـش كبار ..

أردفت \ ماتقدر رزان تقدم له شي انا ماسبق وقدمته..كل شي راح يكون مكرر و ملل بنسبه له...كل شي سبقتها انا فيه بـ أميال..حتى لو حاولت تتذاكـى...هي مثل
التلميذ الصغير الي حاول يقلد الاستاذ لكنه نسى انه لـسى ما تعلم الفصل بين الكلمات والجمل...!

وقفت \ بـيجي فهد...صدقني بيجي...ولعند هذا الباب بيوقف..يدورني من جديد...لكن بكـون مثل الـثريا صعبه حيل وموجعه...!


.
.
.

يوم طاحت سنيني مثل طيحة تمر..
………………أنشرى الصبر لكن من يسوم النخيل

.
.
.
يوم جديد
.
.
.

صوت خالد الفيصل ينعش الصباحات برذاذ كلماته...

برودة الأجواء...

تدفع بطبقه خفيفه باردة على زجاج السيارهـ الأمامي...

أبتسمت الجموح وبهدوء \ياااه يا حاتمـ..أجواء الروحه معك غير...

حاتم با أبتسامه هادئه..\ليش..خطوطنا تقدم خدمات حصريه..؟

الجموح \تقدر تقول كذا...

أردفت بشفافيه \ برودة الجو برى... و...صوت دآيم السيف الدافي هنا.. ..و..كاتب روائي معي ..و..صباحات الرياض..مو أقولك تفرد وتميز ..؟

أبتسم وتوقف عند الأشارهـ...ليشدهـ منظر

طفل بائع المناديل...!

و

إبتسم بعفويه وهو يفتح النافذهـ...

أبتسم الطفل وبـخطوات متسارعة يمد المناديل له...

ليأخذها حاتم وبعفويه \ماتروح للمدرسه أنت..؟

الطفل ببراءهـ\ ماقدر أروح...لآزمـ...أبيع المناديل عشان أهلي ياكلون...!

تكفى ياعمي خوذ مني ..ترى مناديلي غير..!

أبتسم وهو يأخذ جميع ماعندهـ...ويناوله النقود...ويودعه بـ أبتسامه..

الجموح \تصرفك خطأ...كذا تشجعه..بدال ماتعطيه كرتك وفيه رقمك وتساعده بشغله أحسن من كذا...أو...تكفل بدراسته...تشتري كل الي عنده...!

حاتم بهدوء\ مانقدر نغير ها الفئه.. ياجموح هذي أذا قالو لك قاع المدينه...!

لتردف بموضوع أخر\ وش صار على روآيتك القديمه..الى الان وأنت عالق بحروفها..؟

بهدوء\ كتبت ...موقف بسيط ..!

الجموح بـتدقيق \ أحيان بكتابتكـ تأكد لي أنك كنت عاشق أو مازلت..لكنك الف مره تنـكر...!

ألقى نظره متهكمه..!

الجموح بحنان \تذكر أيام الدراسه...تغيرت كثير ياحاتم ..كأنك صرت حاتم ثاني..؟

حاتم بزفرهـ\الله لآيعودها....كـانت...!

لـيصمت بـ نصف أبتسامه ذابله....!

الجموح بألم\كمل...قول...ليش سكت..!

لتردف بوجع \أنا عارفه ان هذا الموضوع يضايقك لكن انا ماسويت شي غلط...رحت وكملت دراستي الي ماهي عيب ولاهي حرام..
بنت طموحه..وكملت دراستها بحجابها وبا التزامها..ومع أخوها...وش العيب والحرام في هذي النقطه.؟..!

أبتسم بتهدئه\لامو عيب ولآحرام..بس تذكرت فترة خلافـي معه...وهي فتره موجعه بنسبه لي...بحكم عمق علاقتي فيه...

أبتسمت بتهكمـ..\أيه...قايد....يحق له مالا يحق لـغيرهـ...

ويحق له بعد...فرض نظامـ القبيله...الى عفى عنه الزمن...!

ويحق له بعد...التحجير...بـ أسم ولد العم..!

ويحق له التصفيق والمعمعه...!

صحيح...

قائد بن نايفـ..المحامي المرموق ...خساره تخسر شخص مثله يَ حاتم..معك حق..

حاتم بتفهمـ...\ الجموح..الحكـي هذا يضايقني منك...قفلي على الموضوع يَ الغاليه...

الجموح\وليش أسكرهـ...دامه أنفتح...

حاتمـ وهو يبعد عينيه عنها لـجهة مآ..\هو كان محدد الملكه والزواج...و...أنتي أصريتي على دراستكـ معي بوقتها..هو رفض وأنتي عندتي...وكسرتيه ورحتي وسكت عنك..!

الجموح أطلقت ضحكه هادئه..\سكت...آآآممم التزم الصمت...صادق ياحاتم الصمت..الي وصلني لـ الثلاثينات..والي عنوانه [التحجير..]..صادق..صمت قائد..صمت مهيب..!

هو

قالها لـ أخته ثريا...قال والله لـ أسوقها لشيب سوق...وفعلن ماكذب..!

أنا عارفه مقصده من هذا...مقصده يأدبني با السنين..

لني فضلت دراستي عليه...!

حاتم \الله يهديك حتى هو ماتزوج وهو خلاص بيخلص الثلاثين... !

الجموح \أن شاء الله يلحق عمي كايد ...ومايتزوج أحد...أنا مو حكر لا له ولا لـ أشكاله...

أبتسم لينحني لجهتها بهدوء ليفتح الباب...\يالله صباح خير..الله يعين طالباتك عليكـ..أحيانا تطلعين على أسمك...ماكذب من سماكـ..أنزلي ..

خجلت وهي لم تنتبه لجامعه...

لـتنزل بصمت مطبق بعد العاصفه...,


.
.
.
خطت الخطوات السريعه لـ جهة البوابه ...

وبثرثره صامته...
.
.
.

تبـي تعلمنـي درس للعمر كله يَ قايد...

عارفه مقصدك زين ومايجهلنـي....

مقصدك


بحفظك درس عجـز الي درستيه كله يعلمك هذا الدرس...


[ ..لآتتحدين رجآل ...]

ونسيت يَ فالح على عمق خبرتك و علمكـ...


أن أنا يمكن أكون ضلع أعوج منك...


لكن أنت كلك منـي أنا...!

.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.

أم حاتم بـختناق \يأمك والله ان قلبي مارتاح لهذي السفره يَ أمك أجلس جعل عيني ماتبكيك...
رهان وهو يضع رأسه بـحضن والداته...\ يمه برجع لكـ الناس يشيرون لي بأيدهم..
هذا رهان بن تركي...الـي درس التخصص النادر ..
أرفع رأس المملكه...!
أم حاتم\ يا ولدي الممكله ماهي منتظرتك ترفع راسها..مرفوع راسها من دونك أنت أجلس بس عندي هنيا..يارهان أنت حشاشة الجوف..!
الزين بضحكه\ حلوووه الذبه هذي يمه والله أليمه...مشكله الي ماخذ مقلب في عمره..
رهان بنظره متهكمه \أنتي شدي بس حيلكـ في تخصصك النادر وبعدين تعالي تتطنزي...يحصلكم واحد عبقري مثلي..!
الزين ترفع يديها بتهكم\ والله وش يشكي منه قسم المكتبات..أهم شي أتخرج..وأعرس..!
جلس رهان وبضحكه مجلجله \من ياخذك ي أم شعر فلافل...من ردي الحظ...ماخطبك أحد من يوم كبرتي..!
الزين بـعصبيه \يمه شوفيه سكتيه ...رهان تراك سخيف..والله سخيف..!
رهان يتوجه بكلام لوالدته..\صدق يمه ..شوفي حل لك مع شعر بنتك..ماهو بطاق بابكم أحد وشوشوتها كذا...
ام حاتم بعفويه \ يمك خلقة ربك...لآتتهزء يجيك بنات شعورهم كذا...؟
الزين بـ أختناق تام وعينيها تمتلئ بدموع \يمه وأنتي معه كذا..طيب وش أسوي سويت فرد مافاد...
مدري ليه شعري مو مثل الجموح...ولآشعركـ يمه...حظي ردي..أعرفه..!
رهان بخبث\صراحه دايم أرحمك أشوفك شاده حيلك زيوت..وأقنعه ..وفرد..بس ترى الشعر الناعم من الله...
الزين بوجع \صدق رهان..واضح مره...أنه مو ناعم وشين...!
هز رأسه بخبث\ تعرفيني واضح وماحب أجامل..شعرك مأساه..!

قاطعهم دخول ماهر..\ماعليك من الخبل...شعرك ماهو بشين...ماتشوفين شوشته اذا نزل الكاب...؟
رهان يرفع الكاب لتتكهرب خصله \انا رجال..والرجال مايعيبه الا جيبه..!
جلس ماهر بمحاذة الزين وطوق كتفيها بيمينه \ الجيب فاضي والعقل قاضي...يازينك ساكت...
رهان \أوووه جاها الـتعزيزات أرض جو...ترى منت نافعهااا صارحها بأن شوشتها أسلاك كهرب متهاوشه..!
الزين بوجع من تعليقاته \ ياربي ياماهر..تراه قاهرني من الصبح...شعري صدق مو ناعم مره..بس مقبول شكله..
أطلق ضحكه صاخبه..رهان \من الي لاعب عليك...!
ماهر \قم أنقلع...لآ...أقوم أرفسك برجلي...
رهان بـوقوف\اصلن انا قايم..بس هين بتدقون علي عقب أسبوعين تقولون مظلم البيت عقبك يا رهين..خلو ام اسلاك ملتمسه تنفعكمـ...!
زفر ماهر بتهكم...\رح بس ...!

الزين بـ دلال تضع يدها على جيبه العلوي \الي بجيبك لي..بروح المشغل اليوم فيه!
ماهر بضحك\مايصلح لكـ...خوذي الي بجيبي الي من جهتك أفضل لكـ...
الزين بخبث\أكيد انها الورقتين الزرقاء...مالي شغل لي..!
ماهر برفع حاجب متهكمه \خوذي الي من جهتك أفضل لك...
الزين تشد مافيه جيبه العلوي لتخرج لها ورقات من الصرافه..!
لتردف \حظي ردي..أأأبي الي بجيبك الثاني ..!
ماهر يبعد يده عنها ...\لآ...الرمح على ركزته...فاتك خلاص...
أم حاتم بنهر\الزين أنتي ماتستحين...؟
الزين\يمه أخواني...وليش أستحي منهم...بعدين أنا الغاليه انا القعده..؟
ماهر يخرج لها مبلغ..\يمه أتركيها على كيفها انا بس أمازحها...
الزين تقبل كايد بشده \يالبى قلبك ...أنا عارفه انك منت بتارك رهين يتطنز فيني ويفرح بشوشتي...؟

أبتسم على قفزات الزين السريعه لجناحها..ليعلو صوت ماهر \تجهزي العصر بوديك مع الدانه...!

الزين وصوتها يغيب \فديتك عيونك الثنتين...يا كايدهم انت..!

أم حاتم \ترى نص دلع الزين من راسك أنت...مايصلح ياولدي تدلل البنت كثير ..والله يشين طبوعها..

ماهر \يمه ..الزين تستاهل من يدلعها وبعدين الخبل رهان والله انه وقف العبره بحلقها حسبي الله على عدوينه...

ام حاتم \الله يخليكم لبعض ويرزقك الذريه الصالحه..
أبتسم برقه\اللهم امين..
.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.

بـ الجامعه

سماح \ترى العنود جايبه فطور اليوم عشان ترقية زوجها..ماشاء الله علق ثلاث نجومـ..!
الجموح \تبارك الله...
سماح بهمس \ بيني وبينكـ..هي خايفه يطير منها...أمه تبيه لبنت أختها من سنين وسنين..والعنود شاده حيلها...
جمال..وكشخه..و..شهاده ..وعيال مثل الورد تبارك الله..ونظافه..و..أهتمام بس تعرفين أهل الزوج..
الجموح ب أستفاهم\عليها خمسه صح...؟
سماح تشير برأسها \ولآ كانها جابت أحد ماشاء الله..هو اصلن مايشوف غيرها يعشقها عشق..
بس قلبها قارصها لن كثر الدق يفك لحامـ..
صدق مافيه أحد مرتاح...!!

أبتسمت وهي تضع روج بلون الـخوخي على شفتيها..
ليلفت نظرها شعرة بيضاء أخرى...بين خصلها...!
أختنقت تماماً...
و
هي تتاكد من تلك الشعرهـ...!
.
.
.
العنود أكبر مني بـ أربع سنوات فقط...!
وخمسة أطفال ورجل عاشق..!
و
أنا...!
...شعرات بيضاء..!
وهم يزاحم الامل..
وسنين تتقافز طرباً...!
.
.
.
قائد...!
قتلت شبابي وتريد مقاتلتي لـ البياض..!
كلا وربي...
سَ أشرب دلو البياض حتى ما أبقي شيئ...ولآتفوز بـ المعركه...
.
.
.
أهتز صوتها بـ أختناق \عندي محاضره عن أذنك..
.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.

نجد بحنان \خالـتي اشتريت القماش لك عشان تلبسينه في عرس هديل بنت أختكـ...هو القماش الـي تحبينه..وبـحط عليه موديل هادي وبيطلع عليك يهبل...
أم محمد بـمحبه\والله العظيم مكلفه على عمرك يَ الغالـيه...الدرج مليان من ها الملابس والله بعد ماعاد لـي نفـس في جديدها...
نجد\لآتقولين كذا خالتـي...هذا عرس هديل بنيت أختك فرحي أختك بلبسك وضحكتك وشكلكـ...الناس مايدرون وش في القلوب ان كانت حزينه والا فرحانه..
الا بيقولون كل هذا الخير والنعمه الي عندها وباخله على نفسها بثوب جديد...
أبتست ام محمد\قولـي يالله يَ بنتي ان الله يفرحك بغواليك ان كان ماقصرتي علي في صغر الشي والا كبره...والله لو انهم بناتي وهم بناتي ماقامو بنص الي تقومينه..
نجد\افا عليك ي خاله وليه انا ماني بحسبة بنتكـ..
ام محمد بحزن\الا والله انك اغلى منهم بعد...
نجد\اجل خلاص لاعاد تقولين هذا الحكـي....

صمتت أم محمد بحزن من ثم اردفت\نجد ي بنيتي...,

نجد \لـبيه..

ام محمد بهدوء \لـيه ماعلمتيني ان فيصل ابن سعد خاطبكـ....من فترهـ...

أرتبكت من ثم \ موضوع تسكـر في يومه...انا ماعد لـي في العرس حاجه بعد محمد الله يرحمه...وعندي ثامر وأخته يسون رياجيل الارض كلهمـ...

أم محمد \الله يخليهم لك ي كريم لكن يَ امكـ ماهو مرضيني ولا مرضي من يحبك تجلـسين كذا عقب محمد...كم لمحمد متوفـي...وانتـي توك بزهرة شبابكـ...
بتضمنين قايد الله يخليه لكم يجلـس عايش لكـ...والا عقب سنين بتضمنين ان ثامر بـيجي ولد كفو وتجين في ظلاله...لازم تعرسين رجال يكون
صدره دفئ لك وذراعه امان...

نجد بحزن عميق\يَ خالتـي انتي الي تقولين هذا الحكـي ومحمد ولدكـ...والله ماقدر اتخيل مجرد خيال اني بنام في غرفه وحده مع واحد ثاني غيرهـ...شلون عاد اكمل
كل الحياه معه....وانا بخير والحمدلله وبستين نعمه ولاني بمحتاجه أحد من فضل ربـي....

أم محمد وعينيها تلتقط دخول تغريد وأختها الصغيره مستيقضين من النومـ....\الله يكتب لك الخيره في كل أمورك ...
أردفت ام محمد \هلا با الي صاحـين قبل أمهم...هلا بنظر العين...
أبتسمت نجد \يَ الله ي حلوات غسلو وجيهكم وتعالو أفـطرو وأشربو حليب وبعده أحط لكـم افلام الكرتون...ي الله حبايبي
أم محمد \يَ نجد والله ماتستاهل شيخه تعاملين بزرانها كذا ....الله يهديها ويصلح قلبها وعقلها هي وخواتها...
نجد\ والله ياخالـتي...الاطفال مالهم ذنب في خلاف الكبار وهواشهم...ودام الفطور موجود والخير ..ليه ها الصغيرين ما ياكلون ...ترى انا يمكن صرت قاسيه..
لكن والله قـلبي مايصفط لهم الا كل خير....
أم محمد بصدق \جعل يومك بعيد يَ بنت نايف...

.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.

با القاعه...!
.
.
.
صوتها الممتزج بهدوء صارم \لو سمحتو ياخوات ..لو سمحتو...
الي ماله نيه يستمع لمحاضره ويستفيد يتفضل الله يرضى عليه يطلع ..
كلكم تعرفون ماعندي تحضير...والملازم تنزل لكم با التصوير..
والتخطيط انا بنفسي انزل ملزمتها بتصوير عشان اخواتنا المنتسبات...
فـَ الله يرضى لي عليكم...أستماع للفائده او خروج ...


بدأت القاعه تهدئ الى ان عم الصمت الـجميل..

الجموح بـهدوء\جولاتكم قفلوها يَ أخوات مو بنص المحاضره أسمع أغاني...!

هدأت القاعه...

لـتبدأ هي...

بسم الله الرحمن الرحيم
نبدا محاضرتنا...
توقفنا عند الثوره على الانجليز عام 1857م
كان السبب المباشر لثورة هو ان الانجليز أرغمو المسلمين على قطع ب أسنانهم قطع من دهن الخنزيز والبقر... لتشحيم بنادقهم
طبعاً المعروف ان المسلمين محرم عليهم الخنزيز...
والهندوسي محرم عليه دهن البقر..!
ف الجنود الي تذمرو...عاقبوهم ايضاً الضباط الانجليزي وبشكل عنيف..
هذا وصل الجنود لحاله سيئه تركتهم ينقلبون على الضباط وقتلوهم..
من ثم أنطلقو لنودلهي...
وانتشرت الثوره بشكل واسع جداً...في الهند..
مثل مانشوف كيف كانت شرارة الثوره في مصر وسوريا وليبيا وبقية الدول كيف كانت صغيره من ثم كبرت وأسقطت الحكام وهذا الي صار في الهند
لكن فيه شي افتقدو له التخطيط المنظم والقياده...
مثل الحاصل الان في مصر كيف أختلط الحابل با النابل الله يرفع عن المسلمين كربتهم ويوحد صفهم ويلم شعثهم يارب..


صمتت فجأه...!

وعينها تسقط على اثنتين يتناولون القهوه...!


بـ أخر القاعه..!

ابتسمت بـ تهكم\ قديم لما كنت ب ألابتدائي..كنت أقرا لوحات معلقه بفصلي مكتوب عليها...

أطلب العلم ولو بصين...!

وكاد المعلم ان يكون رسولا..!

وقصة أبناء الرشيد مع معلمهم..!

زمان ب أيامي...

كان الاستماع لدرس متعه..وللمعلم هيبه..!


هذا زمان..لما كنا فيه أطفال...


وبَ الوقت القريب...

كانو دكاترتي وهم يلقون محاضرتهم.. أكون انا مثل حالة حلم بيقضه..!
يحملونا لعالم ثاني...وننهل من علمهم...و
نقدر ونحترم الكرسي..الي وفر لنا وحرم غيرنا..!
واليوم أقول لكم..كل شي راح أوفره لكم..تخطيط ملازم...كل شي..

والي تطلع من المحاضره ماراح احسب لها غياب لن ماعندي تحضير..
أهم شي تتواجدون بنفس وتستمعون للمحاضره ببال صافي..
الغيت التحضير..لني أعرف بظروف بعضكم فيه المتزوجات وفيه التعبنات وفيه الحوامل..

وفيه وفيه وفيه..قلت من باب التوسعه لكم..وعدم التضيق...

وأبيكم تحضرون المحاضره وأنتم بفعل تبون العلم..ماهو ضغط مني عليكم..
ومع كذا....أحصل هذي النوعيه من البنات...!
كرسي محسوب..لـطالبه تشرب قهوه..وكأن نحنى بكـافيه...!



جمعت اوراقها وكتبها .
.وشدت الخطوات على رجاء الطالبات بمكوث..!
وسارعت الخطوات لمكتبها وتركتهم...

بلا وعيد ولآتهديد...

لكن بتأديب قادم..!
.
.
.
يوم طاحت سنيني مثل طيحة تمر..
………………أنشرى الصبر لكن من يسوم النخيل
.
.
.

أرتشف كوب الشاي..ليسأل الثريا \طيب أوديه المستشفى على طريقـي...

الثريا \ ألم بطن عادي أعطيته شراب وبتركه ينامـ ويرتاح...والمدرسه اليوم عندهم رحله..يعني ان شاء الله ماراح يفوته شي...

قائد \الجـو بارد يمكن أخذ برد...

الثريا \ يمكن...,

عينيه راقبت دخول خالد الصامت..


قائد بَ ابتسامه\علوم أبو فهد...؟

خالد بنظره منسحبه وهو يجلـس بقرب والداته \أنا أبو كايد...مو أبو فهد..؟

قائد بمسايره\أفا الي اعرفه ان الرجال يسمي على ابوه مو على عم جدهـ لـ أمه ؟

خالد بتهكم \ودي أسمي كايد..مافيها شي..!
قائد يغمس قطعة الخبزبـعسل ويلتفت لـثريا الصامته بحزن\طيب ولآنزعل شيخ الرياجيل..أبو كايد على سن ورمح..أمر وش تبي ي ابو كايد ..!
خالد بتهكم طفولي\والله انت الي تسأل..مدري عنك..!
قائد بممازحه \أيه نسيت كنت أسألك عن علومك...؟
خالد \ماعندي علوم..ولآ...شي...
ثريا \تكلم مع خالك بأدب...ماهو براس خشمك...
قايد يحرك أنامله ب أبتسامه\أتركيه .ماقال شي..صادق ماعنده علوم ولاشي..
أصلن انا الي عندي العلوم الذربه..والحركات..والدبابات وكشتات البر وحركات انتم يا الحريم ماتعرفونها..
أنشد أنتباهـ خالد وعينيه تنشد لقائد..
ليكمل قائد من دون ان ينظر لخالد وببتسامه\دايم انتم يا الحريم ناشبين لنا بسوالفنا..ماتخلونا نسولف براحتنا..تجهز بس يا بو كايد عندنا يوم الاربعاء كشتت شباب..!
قفز خالد بفرحه \صدق والله ياخال..كشته...!
قائد ..\كشته..ومن غير حريم..!
خالد بفرحه عارمه يقبل رأس خاله \الله يطول بعمرك ياخال أكيد جاهز من الحين..!
غرق بضحكه قائد ...على قفزات خالد الممتلئه بفرحه.!
ثريا \الله يهديك أكيد ماهو من صدقك بتاخذه معك...شوف مأكنه قبل شوي تعبان..
قائد\الا ان شاء الله بيروح معي وليش عمري وعدت وماوفيت..؟
ثريا بـخوف\ياربي ي قائد بيروح ولدي للبر ولوحده وينام بعيد عن حضني..لآمستحيل..!
قائد بنظره غاضبه\ياثريا..أنتِ تربين رجال ماهو بنت..وش ينام بحضنك وش يروح بعيد عنكـ...ربيه على شبت النار..ماهو على توليع شمعه..!
أردف \خالد داخل التسع...يعني رجال ماهو بزر...
ثريا بألم \داريه..لكن قـلبي عنه مايصبر...

دخلت أم قائد بخطوات متباطئه لـيشد الخطوات قائد ويقبل رأسها ويجلسها على الكرسي ..\يالله انك تصبح ها الوجه الصبوحي بكل خير..!
أبتسمت ام قائد \الوجه الصبوحي خالفنا..وخالفناهـ...وهذا أكبر عيالنا مقبل على الأربعين...!
قائد بـمحبه\لو سمحتي يمه بتكبرين كبري عمركـ شي وراجع لك ..لكن تزودين عمري سنتين فَ لآتخربين علي!
ام قائد \أمحق..ثمانيه وثلاثين أخت الاربعين من الرضاعه..!
غرق قائد بضحك لـتردف والداتها \والشيب كسى الشعر وعلوم مايعلمها الا الله...أنت متى تفرح قلبي وتاخذ بنت تركي..؟
عقد حاجبه \تو الناس يمه...؟
والدته بغضب \وين تو الناس ...بدري من عمرك يابو نايف...البنت صكت الثلاثين..لآ..أنت الي تركتها تاخذ نصيبها ولا انت الي صرت نصيبها...
ترضاها لـ أختك...ترضاها ..؟
عادل مع الناس البعيدين وظالم مع الاهل والرحم..؟
ياولدي

لآيغرك سكوت عمك تركي...ترى تركي ماسكت الامن غلاك...؟

ولآيغرك حلم حاتم ترى ماحلم الا من حبه لك...

ولآيغرك هدوء ماهر..ترى ماهدى الاحشيمه لك..

ولآيغرك تجاهل رهان..ترى ماينضمن الرهان..!

أبتسم بـثقل\ اهل ورحم..قلتيها...وأدمح لهم ويدمحون لي..!

قاطعته بعنف \وش ذنب البنت..ماتقول لي...؟
شد جسده ليقف \الحمدلله شبعت...تسلم يدك يا الثريا على الفطور..!
أمسكت كفه لتجبره على الجلوس عند ركبتها بضبط..
لينساق بـ أخفاض جناح لها...
و..يبتسم بصعوبه..\قفلي على الموضوع يمه..!
ام قائد بعنفوان وغضب..\ماهو انت الي تقفل مواضيع أفتحها انا..سود الله ها الوجه..!

ختمت جملتها بـ أن وضعت أصبعها على ذقنه لتدفعه قليلاً

تأكد من أغضابها لـيتداركها بتقبيل جبينها...

أردفت ام قائد \ أنت وش النهايه معك...وش أخرة ها الجنون وها العناد..علمني قولي..أنت بتاخذها و الا تكسير روس...؟

قائد \ أكيد ماحجرت لها الا أبيها...

ام قائد بحزم \أجل يالله قوم معي نخطبها من أهلها الحين وتاخذها با الأجازه...ونقطع ها السالفه الي استفحلت وكبرت وساقت لنا السنين سوق..
والا..أرفع أيدك عنها وخلها تاخذ نصيبها...!
أبتسم \أنا نصيبها...بس مابيها الحين...!
ام قائد بغضب\عناد...؟
قائد يرفع كتفيه \لا ...ماهو بعناد...بس ماني بمستعد لزواج الحين...
أم قائد ترفع أناملها بـوجه وبحده \الا عناد...تعلمني فيك لكن والله ثم والله
أجبرها تصمت بأن وضع أنامله على فمها برقه وشد أناملها لـيقبلها \يـمه الله يهديكـ لآتحلفين على شي وأخالفه...

من ثم وقف بهدوء \تطمني يمه كم سنه وتشوفينها تفتل في بيتك لآتشلين هم..
واذا قصدك على الكبر والسن انا ابيها كبيره وب َ الشيب ماعندي مشكله..!

وصايف بألم\ ي قايد ترى الجموح ماتنقاد...إنتيه ترخي حبالها...أترك عنك ها العناد...الي ضيع زهرة شبابك وشبابها...ترى الجموح مافيه مثلها في جماعتنا با العقل
والرزانه والمنطق والزين...يابوي انت وراك مرخصها كذا...؟

القى نظره صامته لـ والداته من ثم أنسحب بهدوء...
.
.
.

نقف هنا...
.
.
.
همسة محبة..\

اللهمـ...الـبس [والدة ] طيف الاحباب...
و...
[والدة ]..عذراً ي َ قلب

ثياب خضراً من سندس وأستبرق...

وأرفعهم في عليين...

وشفع فيهم سيد الأولين والأخرين..[عليه الصلاة والسلام..]

أمين

.
.
.
اللقاء أذا كتب الله لنا عمر وبإذنه يوم الاثنين..
.
.

مساءالنور والمحبه
اليوم اتضحت لنا الرؤيا اكثر ومدى وعلاقتهم بعض بس الي يقهر موقف قائد الحين تحبها كل الحب وآخر شي ماتبي تخطبها هذا فيه ظلم وقطع رزق شلون قدر يجمع بين الحب والظلم والاغرب سكوت اهلها عنه تبيها خذها ولا خلها تشوف نصيبها
بالنسبه للثريا الله يصبرج الخيانه من حبيب وصديق بس ثقي ان الله يمهل ولا يهمل وهالخاينه راح تشرب من الكأس نفسه لان الي خان كل هالحب والعشره والأبناء من باب اولى يخون هالنزوه الجديده بس بجد انا ملاحظه هذا الامر منتشر على مبدا خاويني وخاويج وأخذ رجلج واخليج
الله يكفينا شر هالنوعيه بس احيانا الزوجه هي السبب اذا قعدت تمدح فيه وتذكر أدق التفاصيل الجميله بينهم امام صديقتها فيحلى في عينها ...
علاقة ام محمد ومرت ولدها حلوه وجميله برغم من غياب الحبيب المشترك ووجود خواته النسرات بس في النهايه الطيب ابرك من الردى... فيه شي عجبني في هالبارت يختلف عن اسلوبج في بعض العيون وهو قلة الوصف الشعري وكثرة الحدث والحوار لست ضد هذا الوصف والشعر بس احيانا احسه اكثر من الحدث











تقبلي حبي وتقديري لك ي الغاليه وشكرا على هذه الحروف الرائعه *

مسآكـ راحه بآل


قايد الجموح *_*
الظاهر يوم بيوصل للاربعين بيتزوج
شخصيه قايد تعجبني كثير
احب الشخص لما ياخذ موقف من شغله معينه يبقى اثرها للابد
وانا اقرا البارت حسيت ان زواجه بعد سنتين
بس بترضى الجموح ولا بتعند>>رضت او عندت مالها غير قايد *_*



رهان الاسم غريب و عجيب

الله يستر من هالسفره
متوقعه بيصير له شي بس وشو الله أعلم



الثريا كثير من الاسئله؟؟؟
بس بدون اجابات



جموح القايد
بس أبي اعلق بدون القايد
للاسف التعليم من سئ لأسوء
حبيت تسلط الضوء ع التعليم وحال الطلبه
وبعد رده فعل الجموح
مع انه بهالوقت ماينفع هالاسلوب



نجد والكثير من التساؤلات
عصرت مخي لحد مانفجر بس بدون فايده


سلمت يمينك على كل حرف كتبتيه

وبانتظارك يوم الاثنين

. .