بسم الله الرحمن الرحيم


.
.
.
ثرثرة 22
.
.
.
مدخل
.
.
.


قم رتب اشلائك ولا ينتفض عرق

احضن عذابك سكته لا ايتكلَم !

الليلة الرحلــة ..في يّدي الحرق

.................. مقدر اشيل حمولي اللي ا/تألمَ

شد العزيمة .. همتك عندي الفرق

..................واترك حنين(ن)من وفانا تعلَم

الخوف يطوي الدرب ان تاهت الطرق

..................وانا امآني للرحيــل ا/يتولمَ

سم الجهآت الأربعة كلها برق

..................وقلي على ديــرة عصآفير تحلَم

الشمس لو تغرب وفية مع الشرق

..................ما خالفت والعقل منها ا/يتبلَم

جيتك أنا وعيوني الليلة الغِرق

..................عمر(ن)غدآ لليآس عنوة ا/يسلّم

رّدَّدْكفيف الحظ ما غنت الورق

..................ورقص جريح وداع كان يتظلَم .. !



.
.
.


بدايه
مساء الاشتياق والاشواق والقلوب المنتظره =)



وش أخباركم يا أهل الثرثره أن شاء الله بصحه وبخير..,


وأن شاء الله يكون الجميع أنبسطو با الاجازه...







رجعنا....ورجعت آنفتحت آبواب آرواحنا الثرثاره ..,


فيه أسئله من بعض الاخوات..



ليش زوج مي ماهو غيور وسامح لمي تجلس عند قايد

مي عايشه عند اخوانها واخوانها مثل مانعرف ماهم مضبوطين..وقايد رجال مشهود له بأنه رجال عاقل

ووظيفته مكسبته احترام الناس...ومي بينها وبين خطيبها مكالمات..يعني مفهمته هذا الشي وعند ولد

زوجها الي توفى أفضل من عند أخوانها ...لن ولد زوجها عاقل ومحترم واخوانها العكس تماماً

يعني لآلها دخل با الغيره ولآغيره...لها دخل با العقل...خاصة ان زوجها متوفي وش يجيب الغيره..=)

.
.
.


تخصص الجموح..

انا متعمده أذكر هذا التخصص بذات لسببين..

راح ينوردون بوقتها..في ثرثره بين شخصيتين...

وفي وقتها أنتم بتعرفون ليش أنا تعمدت أصيغ هذا التخصص بشخصيه..

وعشان أيش بضبط....ترا ماكان عاسرني

أحط لها قسم مجنون وتكمل الشخصيه عادي بقسم نادر..و..مطلوب..بس ماكان راح يعطيني الصياغه الي أنا أبيها..

والهدف المنشود من هذا الشي...,



المشكله يا أهل الثرثره أنكم مسكتو في التخصص ونزلتوه للارض...ولآمسكتو في المحاضرات القيمه الي كانت تلقيها

الجموح على طالبتها..حتى ماكان يناقش المحاضرات الا كم وحده فيكم مايوصولون ل أصابع اليد الوحده..



أي نعم تتوفر دراسة التخصص بداخل لكن الدراسه في البلد الام أشمل وأعمق...


التاريخ العثماني يدرس بتركيا بشكل


أعمق واشمل وعلى أرض خصبه...كذلك التاريخ الاوربي با أوربا...والتاريخ الامريكي با أمريكا...والحضاره الاسلاميه بشكل

أكبر بمصر ..؟!


وحتى محاضرات الجموح انا أكسبتها الشموليه حتى نستفيد ماحصرتها في تاريخ بلد معين ...طرقنا الدوله العثمانيه

وقصور الاندلس

واحتلال الانجليز للهند وذكرنا شيء عن الملكات المسلمات وبا البارتات القادمه فيه تنوع أذا ربي كتب راح نطعم محاضرات

الجموح بتاريخ الامريكي والاوربي والصيني والياباني..فيها متعه حتى للي يكره التاريخ راح يستفيد لأنها ماراح

تكون سرد راح تكون با أسلوب قصه جميله تحاور فيها طالباتها ..,


وفي الاخير هذي شخصيه بروايه فيها نسبة خيال وفيها نسبة واقعيه ..

.
.
.




والتوقعات حول رهان


شخصية رهان...آبتعدو عن انه يتزوج وحده من برا...لأنه ماهو الهدف المنشود الي صغت الشخصيه عشانه...=)



قبل لآ أخلص حكي....فيه رد لـ نوفي الانقليزيه بناقشه...


وجهة نظر النوفي أن الارمله الي تحب زوجها تجلس وتربي عيالها حتى لو هي صغيره..

وجهة نظر أحترمها وفوق راسي ..

بعد أعتقد أن أشتاق اليك هذي وجهة نظرها تصحح لي اذا أنا غلطانه ..

أنا أحترم وجهة نظركم وأشوف الارمله الي تربي أيتامها مثال كبير ورمز لـ أم بضخامة الكلمه...

بس بعد فيه أرامل يتزوجون..حتى لو كانو يحبون أزواجهم ..ويبدون حياة جديده ومكان الزوج المتوفى محفوظه...
تجبرهم الظروف يتزوجون..تجبرهم الحياه الطويله ان تدور يد ثانيه تمسك يدها..تجبرهم الوحده الجبريه تدور لها
شريك...أو يمكن تجبرهم المنطقيه أنهم مايجلسون كذا...

يا خواتي الحياه قاسيه ولازم شريك....ماهو كل أرمله أخوها كفو ويساعدها أو أبوها صدر حنون ويوقف معها
أو حتى ظروف معيشتها بتسمح لها تكفي حياتها ماتحتاج أحد...طبعاً أذا وسعنا دائرة النقاش وخرجنا عن نجد وظروفها...

أنتم عادي عندكم وضع أرمله يروح شبابها تربي أطفالها وتحرم نفسها من كل شي حلال عليها عشان بس تقنع نفسها

أنها تحب الرجال الي مات وترك لها أطفال وأنها خيانه لو فكرة تتزوج غيره..؟

بعد ياخواتي هذا ماهو منطق الام العاقله

أذا جاها رجال كفو..يلم أيتامها ويلمها ترضى فيه...وتجي تحت ظله...هذي وجهة نظري انا وقابله لـنقاش...

بعد نقاش بيت نجد الي أحترق..الغرض منه هو أيصال رساله لنجد ان الذكرى عمرها ماكانت ثوب معلق بدرج

ولآنظاره بشنطتها ولآمكان مصرين نجلس فيه وكأنا نغذي حزنا ولآنبي عيونا ينشف دمعها كأنه نبي دايم نبكي بشكل يومي نبكي

عشان نقول لهذا الميت ترانا مانسيناك هذا حنا نبكي عليك ليلنا ونهارنا...مع ان الميت لو بيتكلم بيقول أتركو الذكرى بقلوبكم

ولآأبي منكم الا الصدقه والدعوه لأني في دار حق...



وأخيراً




الثرثره متشعبه جداً و ممزوجه مزج با الاختلافات...

مافيه بطل على خط واحد يكون صح..كلهم أكسبتهم الصح والغلط في قرارتهم...

كلهم بدون أستثناء...

وفي الثرثره عثرات كثيره مثل ماكان في بعض العيون وفي غرورك..لكني أحاول أوصل عمل

بفكره....ماأبي أوصل عمل كامل لكن مافيه فكره وهدف...بودي أوصل فكره أذا قرأتها قارئه أستفادة...






.
.
.



خلآص يابنات ابشركم بنفرج عن أسم أبو طلال...في ها البارت...أدوخكم وسو لنا تنافس ممتع..,


أضواء الصباح هي الي خمنت أسم أبو طلال ...,




.
.
.

لآتلهيكم الروايه عن الصلاه في وقتها..

.
.
.

بعد يومين...!

.
.
.

الثريا تضع مرهم على شفتي الدانه وذقنها المزرق ...والمنتفخ..

الدانه وعينيها ممتلئه باالدموع \ ماراح أسكت ولآ أفوتها له...ياما فوت لماهر الى أن وصلت لهذي المرحله..قهرني ...وبقول

لقايد بقول له...,

الثريا تحاول التهدئه \ خلينا نكون واضحين..أنتي تحبين رجلك..وفوق التصور...وماهر غلط صح..بس أذا بتعلمين قايد

فمعناتها فيه أحتمال كبير ماعاد يقبل يرجعك له...لنك تعرفين صرامة قايد في هذي الامور..

الدانه بوجع \ومن قالك أبي أرجع له والا أفكر أصلاً...خلاص يا الثريا خلاص انا وصلت لنقطه بنفجر...أبي أخوي

معي في هذي النقطه أبيه يكسر أيده الي أنمدت علي..هو يحسبها سايبه ومالي أحد يدافع عني..,

الثريا بتهدئه \أكيد ماهي سايبه بس خلينا عقلانين يا الدانه اذا درا قايد بتكبر المشكله ويمكن توصل أنه يضرب ماهر...واذا ضرب ماهر
ماهر بيرد عليه..وبتكون قطيعه بين الدم والرحم...وأنتي على كلامك أستفزيتيه ...

وتردف با أقناع \ مانبي ندخل الرياجيل في هذي المشكله وتكبر..قايد ماهو بمعدي ضربتك كذا

وماهر ماهو ب اول رجال يرفع يده على زوجته وينلم الموضوع بين الحريم مادرو عنه الرياجيل...أعتبريها

كبوة جواد وبنقرص اذنه وأنتهينا..الا اذا تبين تخربين بيتك هذا شي ثاني..,


الدانه بحرقه\الا ابي قايد يدري أبيه يدري...هو أخوي وهو الي بياخذ حقي منه....كسرني يا ثريا ماتوقعته يمد يده علي

ليش رخيصه انا عنده لهذي الدرجه..الي أعرفه ان الشي الغالي نحافظ عليه ونصونه ماهو نخدشه ونكسره..!



الثريا بـجديه \وانتي بعد لسانك طويل وأنتي تعرفين رجلك ماهو با الي يمسك اعصابه ...قايد ماهو بناقصه هم جديد ينضم

لـه مع هذي القائمه الي تطول ولآتقصر...تكفين دانه ماهو بوقته ابد..وأذا على الغلا...تفاهمي انتي ورجالك اذا تراضيتو

على الغلا وبنوده..,


الدانه بقهر \ ...لو أبوي حي ماقلتو قايد راعي هموم ولاهو بناقصك...ليت ابوي حي ماكان ضربني ماهر

ولآكان قلتي بنلم الموضوع ...مابيه يلم مابيه يلم ..ابيه ينعطى حجمه لأنه كبير...أبيه يتأدب ماهر وصل لنقطة الضرب..

رفع يده علي...رفعها..!


زفرة الثريا بضيق \طيب ..أرتاحي الحين وتعوذي من الشيطان والي ربي كاتبه بيصير...لو أبوي حي مايرضيه

بعد طوالة لسانك على رجالك حتى لو لك حق..كل شي بصوت الواطي والكلمه الحلوه ينحل يا قلبي بس أنتي

كتمتي وأنفجرتي..أرتاحي الحين..


كانت الدانه قد أندست في مفرش الثريا...وفضلت النوم على الحديث المؤلم...,


لذا وقفت الثريا وكبست الاناره لتخرج من الجناح....


ما أن خرجت الثريا الا وكانت الجموح واقفه عند باب جناحها...


آبتسمت وبصوت خافت \هلآوغلا...تعالي معي الصاله...دندون نايمه بغرفتي..!


الجموح بخجل \وانا جايه لك عشان دانه...!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.


با الدور الارضي...


دخلت وصايف أتيه من المجالس الخارجيه...لتجد نجد في الصاله...تشاهد لولوه وهي تعبث

با الوان والكراسات الكثيره بصحبة أميره...



وصايف \ نجد...


نجد ترفع رأسها بهدوء\ لبيه يمه...؟

وصايف ونبرة الحنان تتراقص \ عمك تركي برا بمجالس عند عمك كايد ويبيك...روحي له...

نجد تقف \ ياقلبي ياعمي..شايل همي وأكيد يبي يسلم علي...يَ جعل ربي يطول بعمره على طاعته...,

وصايف بـقلق..\اللهم أمين روحي له ..وأنا بجلس عندهم هنا...

نجد أنزلت من يدها كأس العصير وشدت الخطوات للـمجالس...!


أميره وهي ترفع رأسها مفتقده لتواجد نجد...من ثم تستقر عينها على وصايف...لتهمس \ نجاوي بببتجي..؟


تجاهلتها وصائف وهي تزفر بضيق لتركز عينيها على شيء أخر في المكان...من ثم همست بهدوء \أيه بتجي..


آبتسمت أميره لتعود لـ الوانها برفقة لولوه التي لم تعطي الامر أهتمام ...

.
.
.


أنت حبك يشبه لـ [..حب..] الوطن...لكن ظروفك بطانه فاسده..!

.
.
.

الجموح بمحاولة تبرير\ أنا عارفه ماهر أخوي عصبي ولسانه بعض الاحيان متبري منه..

دق علي قبل شوي يعلمني بأن فيه خلاف

بينه وبين دانه...مدري وش نوعية الخلاف لأنه ماوضح لي بضبط..بس يبيني أطمنه عليها...قلت هي بخير بس شوي

منطويه على نفسها بغرفة أختها..


وأردفت بهدوء\ الثريا يا قلبي...ليني راسها شوفي وش الي بيريحها وأنا بقنع فيه ماهر...أذا

عندهم مشكله با الانجاب بحاول أقول لـ أمي تقول له يراجع لها وله...واذا تبي لها بيت مستقل لأنها مره لمحت أن ماهر مايبي يستقل فيها أبد..

بحاول فيه...شوفي وش الي بينهم بضبط وخلينا نحله...


زفرة الثريا بضيق \شكل أخوك ماقالك وش الي بينهم بضبط..وهذا الي أجبره يدق عليك يسحب فيك يحسب ان عندك خبر...


تراجعت الجموح بـهدوء على الاريكه وعينيها تترقب ماهي متأكده منه با أنه سوف يصدمها..


الثريا بـوجع \ ماهر أخوك ضارب الدانه بجواله على فمها...والكدمه الي شفتوها بفمها قبل يومين ماهي من طيحه مثل ماقلت انا...

وشلون تبيني الين راس الدانه وهي حالفه تعلم أخوها وبا الحيل موجوعه منه نفسياً وجسدياً...


الجموح بصدمه وهي تزفر \ الله يهديك ياماهر.


الثريا بلوم وتقريع \ ماهر ماعاد حط حشمه لـ أحد يضرب الدانه وهي في بيتها وتحت ظل أخوها...طول ها اليومين أرقع له

وهو مثل الي يقول قطعه ماعاد يفيد فيها الترقيع....


الجموح بجديه\ ماهر مابي أدافع عنه لكن والله اعصابه مايتحكم فيها الله يهديه والا ترا الدانه ماتهون عليه..بس

أكيد الشيطان الي دخل بينهم...يا الثريا لآيكبر الموضوع ويوصل لقايد والله ان وصل لقايد ماعاد ينحل...


الثريا بضيق..\ لو أنه حريص ماوصل الامور لضرب...البنت ميبسه راسها..تقول بعلم أخوي...هو الي بياخذ حقي

وأنا ماغير أهجد فيها وأقول ترا قايد ماهو بناقص هموم وهي كسرة قلبي تقول لو أبوي حي ماقلتو كذا...!


الجموح بوجع وهي تضع كفها على كف الثريا \تكفين يا الثريا لآتعلمين لآخالتي ولآقايد...وماهر خليه علي والله ادبره

وعد وأنا عند كلمتي لأدبه ..بس تكفين لآتخرب بينهم مره وحده...


الثريا بجديه \ماقدر أوعدك...الدانه ماراح تسكت ولآيخلص الموضوع على خير...أنا مثلك ودي نكتم على الموضوع ولآيكبر

لنه لو دخل قايد فيه ماظن يحصل خير...,


صمتت الجموح وبعد ثواني \ تدري بندخل أبوي في الموضوع أحسن...!


عيني الثريا بصدمه كادت تخرج...\عمي..!

الجموح بتأكيد \ أيه أبوي...أبوي أهون من قايد في الموضوع...وبيحلها أن شاء الله...بس أنتي عليك هي ماتقول لـخالتي

ولآ لـقايد...حاولي تكفين يا الثريا حاولي...عشانها ماهو بعشان أخوي...!


الثريا..\أن شاء الله بحاول...الي بقدر فيه بحاول..!



.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

مي تغلق الباب وهي تلتقط الحديث...

وتضع أناملها على شفتيها..\أثاريك ياماهر منت بعلى زينك ياعله..وهم يبون يخبون على قايد أيا الجنيات....!

تراجعت بهدوء لتجلس على الاريكه وتضع كفها على خدها لتفكر بعمق...,

.
.
.

ضاربها مويهر..!

أثاري الوسامه ماهي أحسن شي في الرجال..!

وأنا أحسب كل وسيم لازم يكون رومنسي وحنون ..!

هذا هو رافع يده على حرمته الضعيفه المنتفه..!

بعد هي ليه ماردت عليه..ويوم ضربها بجواله ضربته بعد بجوالها..على كيفه بعد يضربني وفي بيتي..!

رخمه...!

أي نعم هي رخمه..من يوم أسمع صويتها الي مدري وش يبي واكلها وجلستها وانا عارفه انها ضعيفه وماهي مثل

خواتها ياكلونك بنظراتهم والا هي حتى لآناظرت عويناتها أبتسمت والا تهربت بنظراتها..!

وهو عاد عرف انها ضعيفه وقال بحوس فيها ولاحد بداري..أيا الخبله صدق..!

وانا أحسبها حابكتها صح وحاطته خاتم في أصبعها..!

بري حالي بس ..!

.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.


سكبت الفنجال لـعمها وهي تبتسم لحوارهم الهادئ...وترتشف فنجالها أيضاً....


كائد بمداخله هادئه \ بنتي يانجد....عمتس عنده موضوع يبي يكلمتس فيه..ولآظنتي بتردينه...!


أبتسمت نجد بستغراب \ مايحتاج يجيب له وسيط أبو حاتم ...خير ياعمي جعل يومك بعيد...,


أبو حاتم بهدوء \ خير أن شاء الله...أنتي تعرفين ياعمك انك غاليه وعزيزه عندنا...وان كلنا من عمك كايد لين انا

وعيال عمك وأخوك صدورنا هي بيتك وضلوعنا سورك..!


نجد بهدوء \أدري ياعمي أدري...الله لآيذوقني حزن عليكم...أنا خلآص بجلس هنا عند أخوي...وأم محمد بتسكن عند أختها

حصه...والبيت برممه وأجره....ماعاد أبي أسكنه عقب ماراح أغلى مافيه...لآعاد تشيل همي ...تراني مرتاحه...!


أبو حاتم \ زين رايك...بس انا عندي راي أزين منه...


نجد مبتسمه \وشو ياعم..؟


أبو حاتم ..\ قايد ماهو بدايم لكم...وثامر حتى الاخو ماعنده أخو...ولآعزوه ولآسند مثله مثل قايد...حتى عيال عم ماعنده

على الاقل قايد عنده عيال عم...والا ثويمر ماعنده أحد...


نجد وهي تشعر ب أن الاستيعاب توقف ...وبستفهام \وش تقصد يا عمي...والله مافهمت عليك..!


أبو حاتم بهدوء \ قصدي تعرسين...جايني رجال يبي يتزوجك ويلمك أنتي وأيتامك ويقول والله ماأضيمها ولآ أبكي عينها...و...


أسكتته وهي تشير بيدها وصداع يفتك برأسها يرفض فكرة الاقناع حتى \بس بس ياعم الله يرحم غاليك...قفل الموضوع ...


أبو حاتم بجديه \وليش أقفله..أنتي عادك صغيره مابعد كبرتي والعمر يا عمك وش طوله قدامك...وشلون يعني بتجلسين

كذا طول حياتك باقيه على ذكرى رجلك...!


نجد تبتلع ريقها المتيبس \أيه ياعم...مبسوطه انا كذا...ولآبي أحد يخرب علي أنبساطي...جالسه وأربي عيالي وعلى ذكرى رجلي مافيها شي...

لآهو عيب ولاحرام..ولآظني أضر أحد فيكم بجلوسي..!


أبو حاتم بتروي وأقناع\ماقلت كذا...بس السنين تطارد وانا عمك...

والمره مالها غنات عن رجال يشوف وش في خاطرها ويخلص أمورها

سندها اذا أوجعتها الدنيا...ويمسح دمعتها أذا بكت...تبات في حضنه أذا شكت..وسكنا لها وهي سكنا له...!


تنفض عن رأسها الفكره تماماً..\ثامر..ثامر ولدي هو الي قلته كله بيجي لي..هو ثمرة حب محمد و ريحته..وخلآص يكفيني هذا الشي

عمي لآتوجعني بفتحت موضوع قافلته...تكفى لآتوجعني..!


كايد يتدخل \الله يخلي لك ثويمر..لكن كم عمره توه صغير...ياقوم متى يكبر متى يعقل متى يخط الشنب ومدري بيجي صالح

والا بيجي مثل شباب ها اليومين الله يهديه لك...والموت على كل رقبه...بعد ماتظمنين ان ولدتس يقعد حي ويجي سندس..؟


نجد بصدمه \بسم الله عليه ياعماني انتم وش فيكم علي...تكفون لآتقولون كذا..!


كايد بتفهم ومحاوله أخرى\ مانبي الا مصلحتس يا نجد...لو كل مره مات رجلها وأعتزلت الرياجيل كان امور مايعلمها الا الله...

أخذي من المجرب ولآتاخذين من الطبيب مثل مايقولون لآتقعدين غصن يابس وانا عمك مثلي...الا أورقي وأزهري من جديد...!


أبو حاتم يحاصرها \هذا محمد البتار خاطبك ...ويبيك...رجال صالح مثل ماتعرفين ونعرفه...وأشوفه مناسب حتى

مره قدامك مافيه...عليه أثنين مثلك...محمد يخطبك ويبيك..لآتردينه...!



.
.
.

شعرت بأن الصداع توقف في قمة رأسها وأنفجر...!


أنفجر ..!

حول لكل خليه برأسها لـ دمار هائل....!
.
.
.


كان أبو حاتم يرمي [... العقال ...] ليستقر في حضن نجد....\طالبك ياعمك طالبك ولآني بغاصبك يمكن يكون الابو لـعيالك ويضم يتمهم ويمسح

عنك وعنهم حزنهم...!


أحتضنت [عقال ..]عمها لتغرق في البكاء الصامت...وهي تشعر بأن أنفاسها تحتضر من محاصرتهم وأقناعهم.....


أبو حاتم يقف ليجلس بقربها ويشدها لصدره..\يابوك..أبو سلمه يوم أستشهد أم سلمه كانت تقول مافيه أحد بيجي مثل أبو سلمه

لكن ربي عوضها برسول عليه الصلاة والسلام الي هو خير الرسل وافضلهم...وأنتي تقولين الحين مافيه مثل محمد

ولآبجاي عوض مثل محمد وربك كريم أرسلك الي أن شاء الله أفضل من محمد...بيعاوضك بمحمد ثاني...يكون أبو

لـعيالك...ويقوم فيك وفيهم...أن كرهتي عشرته يا أبوك بعد ماحد بغاصبك عليه..لكن جيبي على الاقل لثامر أخو

والا أخوين لآتعيشينه بعد في قطيعه..كأنه مقطوع من شجره..هو ماله أخو...وأبوه ماله أخو...يابنتي مايصير ذا الكلام

ولآيرضى فيه شرع ولآدين....!


.
.
.

ترتعش...!


كا ..من سكب على رأسه دلو ماء بارد...بثياب صيفيه في ليلة شتاء...!
كا.. من غطس رأسه في نهر ماء...ولم يستطيع أن يرفع رأسه ليتنفس...!


.
.
.



ترفض فكرة أن ترتبط بشخص أخر غير محمد مهما كان..وتحت أي فكره...!

ترفض أن تبات بحضن شخص أخر غير محمد...!

الحبيب...و....الزوج....و..الذكرى...!

.
.
.


تدعو الله كثيراً...أن يكون لها هو زوج با الجنه..!


تدعو الله كثيراً...أن تصبر حتى تموت...فتتعانق الارواح عند الرحمن...!


تدعو الله كثيراً...أن يكونا با الجنه على سرر من أستبرق..!


تدعو الله كثيراً...أن يعطيها الطاقه...كي تعيش وتنطوي الايام ..!


تدعو الله كثيراً....كي تصبر على فراقه الذي مازال واقف بحنجرتها الى الان..!


والان ...يريدون منها الاقتران بشخص اخر...!


كيف ذلك...تحت أي بند...وأي أقناع...!

.
.
.

أيضاً تعترف بأنها...!


تحتاج لرجل...يأخذها لمستشفى ...أويأخذ أطفالها....

أو

يأخذهم برحله ترفهيه...


أو لسوق...

فقائد موزع بين الف والف عمل...

لكن لآتريد ان يكون ذاك الرجل زوج...!


.
.
.

نعم...!

لآ ثامر له أخ....ولآ...لولوه لها أخت..!

عمي صادق جداً...وشفاف جداً با الوجع..!

لكن الفكره بجميع فصولها مميته...مميته..!


.
.
.


كائد بحكمته \ يا نجد الحيا...

كتمة أنفاسها لتحاول الاجابه با أتزان..\ لبيه..!

كائد بهدوء \ لو محمد حي..وأنتي الي ميته...بضنس بيقعد كل ها الفتره ماأعرس عشانه يحبتس..؟

نجد بوجع \أيه ياعم...بيقعد...محمد ماتدري أنت بحبه لي...محمد يحبني فوق ماتتخيلون...حتى المشاكل ماكان حتى بينا

مشاكل تذكر...كانت حتى قليله وكانو كلهم يحسدونا على طيب رفقتنا ..!

كائد بألم \ طيب ياعمتس انا ماقلت أنه مايحبتس..أنا أقول هو بيعرس عقبك والا.لآ...!

صمتت وهي تكتم أنفاسها بتوتر..و..أرتباك..!

كائد بوضوح\ بيعرس...ليه..عشان أيتامه تضمهم مره وعشان هو تسنعه مره...وبتجلسين انتي في قلبه وفي راسه الحبيبه والزوجه

الي ماهو أي وحده تنسيه غلاك وحبك...وهو يا أبوك الحين مايبي منك غلا ولآحب..هو يبي منك الدعوه الصالحه...و

الصدقه الجاريه..والتربيه الزينه لعياله في ظل رجال صالح وهاديه الله ان شاء الله...وأبو طلال يا عمتس والله انه مرسل صدق

مثل العوض لتس...تزوجيه وغلآ أبو ثامر مثل ماهو محفوظ لكن هذي الدنيا...!


أبو حاتم \طالبك ياعمك طالبك..تزوجين محمد يلم أيتامك ويلمك ويجي لثامر أخو وسند له في الدنيا..الضعيف والله ان قلبي يتقطع عليه

وأنتي ماتدرين..!


صمتت لدقائق...بل...نصف ساعه واكثر...


تحركت بهدوء وهي تضع [عقال..] عمها على رأسه...


وبهدوء موجع \

ياعم...بس لآيجبرني على شي مابيه...أذا كرهت عشرته يطلقني..أنا قلبي ماعاد بيتحمل بعد هم رجال ..أبي الستر لي

ولعيالي وبس..!


الابتسامه التي أشرقت بها وجه تركي ..جعلته يقبل جبين نجد...وبحنو أبوي..\أبد ياعمك أن كرهتي عشرته والا

ظلم عيالك لو بكلمه أنا الي بفكك منه..!


أبتلعت ريقها المر وهي تنسحب بمرار من المكان....


وأمواج موجعه من الذكريات تلحق بها...وتعانق كفيها...وتهمس لـ أذنيها...بأنها فقط ذكريات...!



.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

الجموح بهدوء \ قال لي قايد عن خطبته بس ما أتوقع نجد توافق...نجد حساسه من الموضوع...,

وصايف \ مدام عمي كايد وأبوك دخلو في الموضوع ماظني يعسرهم أقناعها...

الثريا ...\ ياخوفي مايعرفون لها ويوجعونها...وأنتم تعرفون نجد ينقلب مزاجها قلب في الموضوع وماعاد تمسك

دمعتها..

وبأرداف \أبو طلال وش جاه على العرس والله أن قايد دايم يضحك عليه ويقول عزتي من خذته...ياعزتي صدق لـ أخيتي

ماهي بناقصها تعقيد...

وصايف بتوضيح\أبو طلال أخلاق ووجه ضحوك..هي الي ماعرفت له وجننته...معلمني قايد بخبال حرمته...خلآص الله يستر

علينا وعليها...المهم نجد جعل ربي يهدي قلبها وتوافق..


كانت نجد في تلك الاثناء تمر من أمامهم وتصعد لدور العلوي وهي تحاول كبح أنفاسها من البكاء أيضاً أمامهم..!


زفرة وصايف \ الله يهدي قليبك ويبرد لوعته..ويكتب لك الخيره في أمورك...!



الجموح تقف ب أبتسامه وهاتفها بيدها يرن..\ أستأذنكم...معي أتصال وبروح لملحق بعدها...

وصايف مبتسمه \الله يستر عليك يا أمك...وان بغيتي شي من خواتس لآتستحين..!


الجموح تبتسم وهي تشد الخطوات للخارج مبتعده عنهم.....


من ثم ترفع الهاتف لتجيب بغضب...\ ضاربها...ضاربها..أنت وش تحس تبي

بس تفشلني ليش ماقلت لي انك ضاربها..؟


أتتها زفرته..\ هي وشلونها الحين...وش صار على فمها وفكها..؟


الجموح غاضبه جداً..\ أقولك وش صار...والله يا ماهر متوعدتك با أخوها..وهذا حقها...تبي تبرد حرتها منك ...

أنت ماتستحي على وجهك تضرب الدانه في بيت أهلها...وصلت معك لهذي النقطه...؟


ماهر بتبرير \ هي حدتني على كذا كنت متضايق وزايده هذا الشي ووصلتني لحد النرفزه ولآأنتبهت لنفسي الا انا خابطها بجوال..

بعدين تتوعد والا ماتتوعد ماعلي من أحد ماني ببزر يخوفوني بكبيرهم..المهم ليني راسها لين أجيكم وأرضيها...ممكن..؟


الجموح \ صدق عاد...بس كذا..أبشر وانا أختك...وش رايك بعد أشتري لها حلآوى لين تجي حضرت جنابك وتوديها

لملاهي..!


غرق بضحكه متهكمه \ لآبشتري لها شي أكبر من الحلوى وروحة الملاهي...وأرضيها فيه...!


الجموح تزفر بضيق\ ماهر أنت مستوعب صدق وش سويت والا الدفسه الي انت مندفسها الحين مخربه عليك أبراج

التقاطك...ماهر أنت مديت يدك على الدانه ..جعل يدك الكسر..!


ماهر يشاكسها \لآتدعين علي...يوم ضربتك قلتي لآتدعي على نفسك...!


الجموح غاضبه جداً \ أيه...تطنز...ولآتشيل في بالك ياماهر..بس والله ان أعلم أبوي عشان يعرف يربيك من جديد..هذا هو بمجالس

وأنا طالعه له...والله العظيم ان أعلمه عشان تعرف ان الله حق وماتمد يدك على الضعيفه...!


ماهر بعدم تصديق...\خوفتيني يا القويه المتمرده..وليش ماتعلمين زوجك والا خايفه عليه أبو عماره..!


الجموح بقهر \خايفه عليه...لآوالله ماني بخايفه...أنتم عيال عم تصافون من غيرنا..

أنا خايفه على دانه الي قلبها معلق فيك يا السامج وقايد لويدري بموضوع والله ماعاد تمسكها مع يدها...!


ماهر ببرود مترقب\ أصلاً ماهي بحريصه علي مثل أول...!


الجموح \وتلومها...أنت تحس انت...تضرب البنيه وتقول ماعادها بحريصه علي مثل أول...ماهر أنت والله تستاهل

أي شي تسويه فيك دانه...بعد أحسه شوي أي تصرف تتصرفه...!


ماهر بذكاء \يعني أفهم من كلامك أن قايد مابعد درا...وأن أكيد خالتي وصايف مابعد درت والاكانت بتدق علي...يعني دانه

ماقالت لآحد..!


الجموح تزفر بغيض\لآماقالت لحد..ماهو منها...من ام خالد هي الي حاشرتها للحين ماتعلم قايد...بس ماأظمن تعلمه

بأي وقت...!


ماهر بضحكه هادئه\ جيجي حليها لين أجيكم عندي فرصه يوم ونص اخر الاسبوع بس خليها تهجد لين أشوفها..!


الجموح بهدوء\دامك حريص كذا تبي ترضيها ليه موصل الامور معكم لهذي الدرجه...أنا مالي دخل فيك..وعلى فكره

أنا أصلاً بعقد الموضوع بعلم أبوي الحين لاتحسبني أضحك عليك...!


ماهر بتهكم \عادي....بزر أنا أخاف من أبوي...تدرين وش بيقول لك أبوي...بيقول حنا يا الاولين نضرب حريمنا لين

يعضون القاع...وماتغيب الشمس الا أهلهم مرجعينهم لنا...وليته يقول ها الحكي وعمي كايد موجود عشان يعطيك بعد

كلمتين زينه وأمثله حلوه من واقع ماضيه المجيد...!


الجموح بوجع\أنت تحسب الموضوع لعبه...!

ماهر بهمس\ لآماهو لعبه...أنا غلطان..وبعد هي غلطانه...شايفتني بسافر وقايل لها قبل انه شغل والا تنرفزني باالوقت الغلط..

خلاص صار الي صار وانا الحين ابي ارضيها ...


الجموح بجمود \أسفه مضطره أعلم أبوي لن دانه تبي لها رجال يوقف معها ويأدبك يا الثور وخل كلمتين الرضاوه تنفعك لأنه ماعاد

يصلحها كلمتين...!

ماهر من بين أسنانه \ أذبحك..أذا رجعت...وعد ..!


من ثم أردف بهدوء وأستعجال يصاحبه ضحكه هازئه\ياالله مع السلامه وراي لعبه حلوه لو تشوفينها أستفرغتي الي في بطنك..!

الجموح وهي تدخل المجالس \الله يحفظك...ويهديك...آبد كبدي حايمه علي من سوالفك الدايمه مايحتاج اعرف اكثر..!



دخلت الجموح لتجد عمها كائد مستغرق باالنوم...و..والداها بيده ريموت التلفاز الكبير الذي بمجالس...وموضوع

على الاخباريه..!


قبلت رأسه وأنتبه ليرحب..\يامرحبا با الزين والقبله..هلآ ببنيتي...


الجموح تجلس بجواره \الا يامرحبا فيك انت يانور عيني..وشلونك عساك بخير...

شدة صينية القهوه...لتسكب له فنجال ..\بس يا أبوك..توني منزل فنجالي...!

أبو حاتم \وشلونك الحين عساك مبسوطه...

الجموح بهدوء \عادي يبه..الحمدلله...أنا أبيك في موضوع ..وأبيك هادي مثل ما أعرفك..!

أبتعد عن وضعية الاستناد ..وبتوتر\ قايد وانتي وش بينكم ..صاير شي..لآتوجعين قلبي برجال وتفشليني عنده...!

الجموح تهز رأسها برفض..\لآ يا أبوي...قايد ماله دخل بسالفه..ولآتشغل راسك فيني...أوضاعنا عاديه...بس

دانه وماهر..شوي مرتبكه أوضاعهم...!

أبو حاتم وجه يتغير..\عسى ماشر والله ان قلبي حاس ان فيهم شي...!

الجموح وهي تضع يدها على كف والداها..\يُبه انت تعرف المشاكل بين المتزوجين تكبر وتصغر..وأن أذا هدينها أزين من أن

نقوم وندق الصدور ونكبر المواضيع...!

أبو حاتم بعدم أطمئنان \علميني وش مسوي مويهر...ولآتقعدين تلفين وتدورين..!

الجموح وهي تتحكم بوضع \ تهاوشو قبل سفرته..وهي الله يهديها أستفزته...وحذفها بجواله وضرب فمها...والبنت الحين

تقول قايد لازم يدخل با الموضوع..وحنا مانبيه يدخل...عشان ماتكبر السالفه...حنا نبي نهديها ونلمها حتى خالتي

والله انها مادرت مادرى الا الثريا...وماهر داق ومعترف بخطاه ويقول رضوتها عندي...!

ابوحاتم بغضب وغيض\جعل يده الكسر...جعل يده الكسر..الله يخس ذاك الوجه...جعل يده الكسر..مستقوي على دانه بنتي

مستقوي عليها...مابعد مت عشان يستقوي عليها جعل عظامه الكسر..!

الجموح بتهدئه \يبه الله يخليك لنا..والله غسلت شراعه..وهاوشته..والله ياضربتها ان كنها في وجهي ماهي في وجه دانه

من كبر غلاها وحبي لها...

وموجعني هذا الي مسويه فيها..لكن يا أبوي يانظر عيني..ماعلمتك الحين فا ابيك تكبر الموضوع

أبيك انت تحله...بطريقتك ..أبيك تفرك اذن ماهر عشان يدري ان مافيه شي سايب وان كل شي بثمنه...

أبو حاتم \أفرك أذنه الا با أمصع أذنه...قومي قومي أخذي لي طريق بروح لدانه...وبجلس معها...الله يسود وجه...

والله أن بغت طلاقها ان يطلقها ذا المويهر ...

الجموح \وش طلاقه الله يهديك وانت تعرف الدانه تحبه وهو يغليها...بس حزة شيطان...وأن دخلة على الدانه

الحين شكت أم قايد في الوضع وأنت تعرف خالتي وصايف ...

الا أترك الدانه انا والثريا بنهدي فيها

وبنعلمها ان أنت الي بتفرك أذن رجلها بس يبه الله الله في الفركه الي تبرد قليب دانه ...!




ختمت حديثها وهي تبتسم حتى يهدأ...


أبو حاتم تراجع بستراجع وبحرقه...\ والله ان أبرد قلبها وأن يوصلها رد عمها...!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

بعد نصف ساعه..


طرقت الباب ..وفتحته بهدوء..!.


وجدت نجد تدس رأسها بوسادتها وهي تذرف الدموع...بوجع...!


جلست بهدوء بقربها...\ نجد...محمد رجال صالح ان شاء الله وبيحفظك انتي وعيالك..وحتى قلبي بيتطمن عليك...

وأم محمد كلمتها وتدعي لك بتوفيق..صلي الاستخاره..وتوكلي على ربك...,

رفعت رأسها من الوساده...والدموع على وجها و وجع الذكريات \يمه وشلون بقبل برجال بعد محمد...وشلون..!

أم قائد مبتسمه وهي تشير لصدرها \محمد فيه....وبعقلك رتبي حياتك...الله ماقال أدفنو أنفسكم اذا ماتو رياجيلكم...لآتدفنين

نفسك يا نجد..

أعادة رأسها على وسادتها وعينيها تتأمل عيني والداتها ...

أم قائد \ عمك كلمني وقال أنك وافقتي..وكلم الرجال وقال له...وخلآص العرس بعد اسبوع مع الملكه هو ماهو بعرس عشى ياخذك

فيه...والله يوفقك ويرضى عليك..,

همسة \يمه أن كرهت عشرته ماراح أجبر نفسي عليه...ولآتنقدون علي أن رجعت لكم مطلقه عقب فتره بسيطه..!

أبتسمت بهدوء \ أنتي دخلي العقل بحياتك...وأحكمي فيه...لآتخلين قلبك الي يحكم لنه هو الي بيخليك تتخبطين...ويرجع

الف خطوه متعثره لورا...,

جلست وهي تضم ركبتيها لصدرها..وتضع أذرعها على ركبتيها..وبهدوء \يمه..محمد ما أقدر أتقبل أي رجال عقبه..

حتى حق الزوج ما أقدر أعطيه بضيع ديني وبيجي في ذمتي بعد...!

رتبت على كتفها \ لآتفكرين كذا...ولآتقولين كذا...كل الامور وكليها لربك...هو الي بيحلها في أبسط من ماتتخيلينه..

أنتي خلي العقل الي يحكم لآتحكمين القلب..ومشي سفينتك ..وآعرفك أعقل خواتك,

أغلقت أهدابها وزفرة بضيق...وكلآم منطقي من والداتها وأعمامها...وهدوء...يتقلب برأسها...!





.
.
.


أنت حبك يشبه لـ [..حب..] الوطن...لكن ظروفك بطانه فاسده..!

.
.
.
الساعه 11 م...

شعرت با أنامل دافئه..تهزها ...مره..أثتين...ثلاث..من ثم صفعه با أطراف تلك الانامل...!


فتحت عينيها بغضب...لتتفاجئ به على طرف الاخر بوضعيه نصف جالسه...ويوقضها...!


متى أتى..!


قائد بهدوء..وملآمح لآ تجعلها تتنبئ بشي..\قومي صلحي لي شي خفيف أكله...ماتعشيت..


من ثم تركها وأختفى..!


أستندت على السرير وهي تشعر بصداع...وقفت لـتبحث عن الزوج الجائع..


لتجده بعد ثواني ملقي جسده على الاريكه...وبيده جهاز التحكم..


وأبتسامه هادئه على شفتيه...\أبي عشاي بنفس يا جموح...لآتحطين لي

فيه سم ترا باقي لي أختين بزوجهم ها اليومين وأتطمن عليهم...!


رفعت شعرها للاعلى بربطه وهي تتطمن بأن الدانه لم تخبره بشيئ..أذاً تسايره بستظرافه\ليش متوقع أقتلك..؟


قائد وعينيه تدور عليها من ثم تعود لـشاشة التلفاز\ مجنون..والا..مسموم..والا مغدور...ماراح أطلع من ثلاث حالات وكلها بيدك..؟


رمت عينيها على الاكياس الموضوعه على الطاوله الزجاجيه أمامه...لتتقدم وتلتقطها...\ والا مغبون...!


كانت تلقي ضحكه هادئه له...ليلتقطها هو...وبتهكم\ يمكن...أذا فكرتي بطريقه ذكيه غير بيعة العماره..!


كانت هي قد خطت الخطوات لمطبخ ..من ثم أفرغت الاكياس...\أي عماره...؟



قائد يساير خبثها\عمارتي...أقصد....عمارتك...وماعندي مانع لو تبعينها لي..!


ختم جملته بـضحكه هادئه...لم تسمعها...,


الجموح ترفع عينيها بسقف وبتفكير أردفت ..\ أول مايخلصون المستأجرين الي تحت من فترة أيجارهم ماراح أجدده لهم وبحولها لمشاغل نسائيه ..بس مدري

عادي يصير هذا الشي والا لمشاغل النسائيه ضوابط وخرابيط....!


قفز قائد في أثناء حديثها ليقف عند باب المطبخ ليجدها تفتح الاكياس والابتسامه تتراقص على شفتيها وتحضر العشاء..


قائد \وش تقصدين...أنتي تستهبلين ومكتبي...؟


قاطعته \تحب الفلفل في الاكل صح..!


شد الخطوات أكثر لها وهو ينتبه لـمحاولة أستفزازيه لآ أكثر...\ أحبه بس أحب أحطه بيدي ولآ ينحط لي..لكن علميني يا الجموح لو الله

رزقنا أطفال...لك تخطيط معين في حياتنا..؟


توقفت عن تقطيع حبات الطماطم لثواني من ثم أعادة تقطيعها لـ اصغر وأصغر... \ تخطيط مثل أيش..؟


قائد \ تجلسين وتربين اطفالك...انا رجال ماحب أطفالي وبيتي يلحقهم أهمال أكيد ماراح تحققين توازن لآبحياتنا ولآبوظيفتك

مهما حاولتي أكيد بيكون فوق مستوى طاقتك خاصة أذا تعبو الاطفال والا درسو وأنتي بوقت تصحيح أوراق او ضغط وانا

أكره ماعلي مسألة الخدم...!


شدت البقدونس لتقطعه..وبهدوء \أفهم من حكيك ان وظيفتي على شفا حفرة من قرار منك في يوم من الايام..أحلم يَ محامي

الظلم أترك وظيفتي لو أن شاء الله اداوم با أطفالي..!


وقف بجوارها وهو يشد الفلفل الاسود ويضيفه لـ طبق ..\ الا أفهمي ان مستحيل أعدي أي تجاوز منك بـحضرة وجودي..

أعقلي وأركزي أفضل لـك عشان مانكسر بعض من جديد..العماره وباأسمك خلاص أنتهينا وأظن تعادلنا...!


ضربت كفه بخفه...\أترك الفلفل...!


غرق بضحك وهو ينزل علبة الفلفل..


همست بعد ضحكته...\وش أكبر شي يكسرنا ياقايد من جديد...؟

حاوط خصرها بهدوء \ عنـي فكرت تنفيذ بيعة العماره..مع انه مستحيل لكن لو قلت بعتيها...بتكونين كسرتيني ماهو عشانه

حلم ..أقدر أستردها لو حتى حطيت الي وراي ودوني...لكن مسألة انك بعد مصره توجعيني مره ثانيه وأنتي داريه

انك غاليه ما أعتقد أقدر آفوتها بلآ كسر لك..!


أمالة رأسها بهدوء \وشلون تكسرني..؟


آبتسم بقرب آذانها وبتهكم...\ بيكون حرمانك من وظيفتك....ولآتقدرين تتكلمين بكلمه

لأني بكون مغبون منك مره...زيدي عليها عمي تركي بيكون عرف با الموضوع وبيكون مغبون منا الاثنين من هبالي في تسجيل عمارتي ب أسمك

ومن هبال بنته العاقله تبيع عمارة رجلها..فابيقول لي تستاهل ماجاك منها ليه تسجل شغلك با أسمها وهي تستاهل ماجاها منك ليه

تسوي كذا ....وساعتها أنتي بتكونين دابلة كبد أبوك ولآلك الا تتحملين عيشتك مع رومنسيك الكذاب...!


الجموح بمغزا \ وبيحلى لك ضربي فوق فصلي من وظيفتي...جاك يامهنا ماتمنى....!


بستنكار \ والله انتي وقتها تكونين تستاهلين الضرب..بس انا رجال مايضرب كافي عليك عقاب وظيفتك ومقابلي وانا

شايش عليك ومطين عيشتك ..!


بستفهام في طياته هدف \ بس بعض الحريم في المواقف التي تستفز الرجال يستاهلون الضرب...يعني حتى لو أستفزك بكذا استفزاز

ماراح تمد يدك علي عشان تبرد خاطرك احك الصدق قايد ولآتسوي فيها المثالي...؟


تركته وآبعد يديه عنها لتصف الاطباق لهم على الطاوله...من ثم وضع طبق السلطه وبقية العشاء الخفيف


وسكب العصير....


جلس على الكرسي...\ انا مو مثالي لكن بنظري مايمد يده على المره الا الي مافيه خير...ليش اضربك انا سجلت العماره لك

عن طيب نفس ومحبه..وهذي العماره هي من حلالي الخاص...وحلالي وحلالك واحد دام تزوجنا...بعدين مسألة

الضرب تختلف من رجال لثاني..بعض الرياجيل اذا أستفز ضرب..وبعض الرجايل اذا أستفز أدبها بطريقته هو...

لكن بشكل عام انا كمحامي تجيني قضايا فيها عنف ضد الزوجه..صدقيني ما أرحم الزوج أبد مهما كانت أسبابه

والله عيب رجال يضرب مره وش يفكر نفسه...


آبتسمت لتبعده عن مسألة الضرب بعد أن قفز لـرأسها بأن ماهر لن يرحمه حكم قائد أبداً ان علم...\شكل مكتبك وقضايك

تخص النسوان اكثر من الرياجيل...دايم صيتك ظاهر لهم ولدفاع عنهم ولنصرتهم...!


بهدوء متهكم \لآ مو با الضروره لكن أنتي ياجميح ساعات تخليني أهذري ولآعاد أربط لساني

وش رايك تخليني أتعشى عشان مانغث بعضنا

في نهاية سوالفنا بعد ماتطلعين لي بسالفة الحريم وقضايهم عقبه بشوف جموح الغيرانه الي تبي تبيع مكتبي ماهو

عشان اوجاعها مني الا عشان غيرتها..؟



وضع مرفقه بنهاية حديثه على طرف الطاوله وتأملها با أبتسامه خاصه جداً...!


.
.
.

غيره...!


وليش أغار...!



آبتلعت ريقها المجنون بمحاولة هدوء وهي تشد أنظارها له بتفحص...


كان يجلس على طاولة المطبخ بهدوء شديد...وملآمحه هادئه...وأبتسامه تشق تلك الهدوء بنظره مغناطسيه..


خيل لها بأنه في مكتبه بين أوراقه...وأنها أمرأه لـ أول مره تصادفه...أتيه بقضية ما...وتشعر بأنه المنقذ...


وتلك النظره البهلونيه الصادره من محامي متلاعب تلقى لتلك المرأه...كيف ستكون ردة فعلها..!


مسحت با أنظارها له ..وكأنها ترأه لـ أول مره...


يتمتع بوسامة ما وهيبة تجعل النساء يتحلقن حوله...وكيف بوظيفته التي تكسبه هيبة أخرى...


يا الله لم أفكر بجنون الغيره الذي اظن انه بدا يتراقص الان بوقاحة امامي...!


.تركته لسنين وأنا لم أفكر في الغيره وأن أحد.


النساء قد تخطفه في غيابي كنت أقول أن صبر على غيابي فهو يحبني بصدق ويستحق أمتحان الغياب..وان


لم يصبر وأحب وتزوج غيري فقد أبعده الله عن قلبي حتى لآيؤلمني كما ألم وصايف..


لكن كيف يناوشني شعور الغيره الان هل لانه أصبح يجمعنا الزواج...ومسألة الملكيه والحصريه...!


أم هو مداعبة حب ماضي عبث به الوجع من ثم توج با الزواج من ثم تقافز الان مسألة الغيره التي هي نتاج


عن الحب..!


الحب..مع مجنون رومنسي كاذب...كيف سوف يكون ان خالطته الغيره التي ليست مرغوب بها من قبلي با أتجاه..!


اغار...!


مستحيل..!

.
.
.

همست من بين أسنانها\ ليش ها النظره ترا ما أظن يصادفني شعور غيره من ناحيتك أرتاح وآثقه في دينك وأخلاقك الحمدلله وفوقها خوفك على سمعتك كامحامي فاشل..,



غرق بضحكه رجوليه وكأنه أستمتع با التقاطه لـ الاشتعال المتصاعد من روحها فجأه وفاجئه وأستمتع...!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.
بعد أسبوع...,
.
.
.

بيت قايد...



أبو طلال وهو يكتم ضحكته و يهمس بإذن قائد \شفت أني خذيت أختك غصب ورى خشمك...!

قايد يكتم غيضه بهمس مشابه\ رحمة حالك وعارف ماراح يعدل حالك الا أختي يا الخروف..والله ان تجرك جر وراها...وتقول

الله يرحم حال أم طلال عقبها..!

أبو طلال يرفع كتفيه بتهكم...\ الشكوى لله ...المشكله والله انها أخت محامي اي شي يلفق لي قضيه وأخيس بحبوس فبصير

أثمن الكلمه معها...ولآ..أتكلم لين تسمح لي..!

حاتم بغيض \والله مايصير يا أبو نايف الحين انا الي خاطب ومتملك قبله..وذا يعرس قبلي على طول في أسبوع...!

أبو طلال بخبث وعينيه على قائد\مشكلتك ماتعرف كلمة السر الي عندي لوتعرفها كان أوراقك على طول مختومه...!

قايد بغيض\ أنتم يا الاثنين خلو كلامي على بالكم...خواتي لو يشتكون منكم والله ثم والله أن تشوفون شي مايسركم...أخر

شي كنت أبيه أني أزوجكم يا المهبل..لكن وش أسوي بقسمة الله..!

أبو طلال يكتم ضحكته وهو يرا قفزات ثامر المتجه له..\أنا عني والله ماتسمع صوتي..هاجد وماسك أرضي من الحين
معترف..!

قائد بجديه \ مدري عنك لكن تعقيدك في أم طلال لآتحطه في أم ثامر تراك خذيت قطعه من روحي..!

أبتسم ابو طلال وبجديه \ لآتشيل هم وأنا أخوك ...ماهي بلاقيه الا الي يرضيك ويرضيها...,


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.
با الدور العلوي...


الجموح بغضب \نجد خير أن شاء الله..وش ها الهبال الي فيك...؟

نجد تغلق صندلها الهادئ...\ أنتم الي مهبل..ماهو با أنا...!

جلست الجموح قرب الثريا التي تكتم ضحكتها وبهمس...\ أختك شوفي لك دبره معها صدق أحترق مخها مع بيتها شكله..!

الثريا تحرك رأسها بخبث وهمس \ماعليك..دبرتها أنتي بس سلكي لها وش زين التسليك لنجد لين تشوف الامر الواقع وتهجد..!

الجموح وهي تلتقط خبث الثريا...\أقول يا نجيد ..وراك صدق ماتفكين شعرك والله ماهيب حلوه لآمتن ها الشوشه تروعين

الرجال...وهو الضعيف يقولون متعقد من الحريم..لآتعقدينه زياده...,

نجد تكتم دموعها \بنات صدق فكو عني والله اني ماني برايقه لكم...صدق صدق..ماني برايقه...قدرو وضعي شوي ولآتغثوني...!


الثريا تقف بجديه..\فوق هذا التقدير بعد...رفضتي تشترين لك ثوب وخذيتي لك ثوب من الدرج مدري وش تحسين
فيه صدق...ومكياجك انتي الي مصلحته...تقضي ماتقضيتي حتى الجزمه...وعشى عادي مره..حتى أمه الضعيفه تحت

هي وأخته...ماشافوك ولآطلو بوجهك..تعوذي من الشيطان وخليك نجد الي كلنا نعرفها...ترا حتى هذا الي أنتي

أخذتيه محتاج لحرمه سنعه تبني معه حياته..حتى هو حياته بعد مدمره وحالته حاله من كلام قايد...!


زفرة بضيق وهدوء \فستاني حق العيد كأنه جديد مالبسته الا مره ..!


الجموح تكتم ضحكتها \شوفي بصراحه الفستان يهبل عليك..بس حنا ماتقبلنا عروس بلآفستان أبيض ولآنقش ولآمكياج

ولآتسريحه...ولآتقضي...بس هذي القصه والا انتي يانجاوي تهبلين...


القت نظره موجعه لجموح \جموح أنا تزوجته مابي فرحة العروس ولآهي بهدفي لنها راحت مع محمد..أنا تزوجته

عشان أسباب كلكم تعرفونها..,


وقفت الجموح بهدوء\الله يوفقك لكن عموماً الشوشه هذي لآزم نفكها عشان أهله تحت..والله يانجاوي..مايصير...العجيز تحت تبكبك..شكلها

بعد ماهي بمصدقه بعرس ولدها...,

الثريا تشد أنامل نجد لتلبسها خاتمين...وثم حاولة وضع المناكير..لكن نجد قذفة بعلبة المناكير للخلف..\قلت لكم أتركوني

على راحتي...وش فيكم..؟

أردفت \وين عباتي..!

الجموح مستغربه \وش تبين بعباتك...توك أصبري...!

نجد مرتبكه ومتوتره..\لآبلبسها عشان لآدق قايد أطلع على طول..!

الجموح تجلس بقربها..\بسم الله عليك...نجد والله انك عاقله..سمي ياقلبي با الرحمن...وش يطلعك الرجال بيدخل وياخذك

وانتي الحين بتنزلين تحت ويسلمون عليك أهله..وبعد العشى يدخل وتسرون...

نجد بوجع \طيب تكفون أنتبهو لعيالي..وانا بكره ان شاء الله بجي أخذهم...أمي الله يهديها ليه تحلف علي يعني ماتعرف

ماقدر أستغني عنهم..والله قلبي أحسه بينفجر..

الثريا بتهدئه\أبد أزهليهم ولآتفكرين فيهم يعني هم عند عدوان عند أهلك وخواتك...لولوه نايمه بغرفة أمي من أكثر من عشر دقايق

دوختها انا من الصبح عشان تنام ها الحين... وثموري بينام في حضني عادي..

الجموح \وأذا دخل الرجال ...حاتم بياخذ ثامر بيوديه لـمشوار مواعده فيه مدري وين...كلها ليله وحده ياروحي أنا...أذكري

ربك...!



فتح الباب بـقوه ...الزين بغضب\ ..شوشتي..الله يقلع شوشوتي..فشلتني..أخته تقول

أنتي مسويه كدش..!


الثريا \ لآحول ياذي الشوشه الي مسببه للكايد كلهم حوسه..!


الزين تعض على شفتيها \ من زينها المعصقله تقول شوشتي ماهيب زينه...وانا وش دراني ان بيجيب أخته..أحسب

ماهو بجايب أحد...خليت شوشتي على راحتها احسبه عشا عادي...ماغير حنا..وأن طالت أمه...ويسرون على طول..!


كانت تتجه لتسريحة نجد وتدخل أناملها بشعرها وتخرجها بطريقه أستعراضيه ...


أبتسمت نجد بصدق على تهكم الزين بشعرها...من ثم غرقت الجموح والثريا با الضحك...!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

الدانه مبتسمه بهدوء لحديث ودي يدور بينها وبين شقيقة محمد....

مريم \ رحلتنا الليله مانجلس في الرياض الا بوقت العطل و أحيانا بعد ماننزل العطل...قولي لي دانه ماعليك أطفال...!


الدانه مبتسمه \لآوالله...

مريم \كم لك متزوجه..أحس قريب...والله شكلك عروس بسم الله عليك..!

الدانه مرتبكه وبخجل...\ لي سنه ونص...يعني أعتبر عروس دام ماخلفت للحين...ههههه...,

مريم \ سنه ونص ماحملتي ليه ياقلبي تاكلين موانع يعني..؟

الدانه \لآ بس ما الله كتب...,

مي تتدخل ...\ وانتي يا مريم...وش وضعك ماغير محجره لمي با الاسئله من يوم جلستي ماشاء الله
خلينا ناخذ ونعطي..علميني متزوجه والا مطلقه مدري عليك بزران شكل عندك..

وليش ماتنزلون الا با العطل لرياض..وش زين الرياض

تهبل وأسواقها تفتح النفس ...كل الماركات والاشياء الحلوه برياض ...صح ماعندنا أجواء حلوه

مثل باقي المناطق لكن الرياض في عيون أهلها شي ماينوصف...خليني أعلمك وأقولك...!

قاطعتها مريم بـا أبتسامه \ حنا من أهل الرياض بس أنتقلنا لجده...أعرف الرياض أكثر منك...!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

أم قايد تزفر بألم ..\أم محمد أعتذرت عن الحضور...تقول والله انه من قلبي ابارك لها لكن ماعليه قدرو وضعي...!

أم حاتم \عزتي لقليبها وانا أشهد ...أم وحيد وليلها طويل...الله يصبر قليبها ويوفق بنيتنا...

أم قايد \الله يوفقها...ويرحم وليدها...نجد الله يجعل دربها أخضر..وجعل محمد يسعدها مثل ما أسعدها أبو ثامر وأكثر بعد..

أم سند تحاور أم قائد ..\أقول ياأم قايد...وينها مرة قايد هي سلمت علي والا ماشفتها....؟

أم قايد با أبتسامه \ الي لآبسه ذهبي قبل شوي .. الي بخرتكم أول ماجلستو..؟

أم سند \أيه..أيه..ياماشاء الله..الله يهنيهم ويوفقهم... وينها معرستنا ماشفناها ...؟

أم قايد بهدوء \بتنزل بتنزل..!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.
بعد ساعه وربع...,

.
.
.

الثريا بألم \ أنزلي وش ها التوتر...أعوذ با الله...,

نجد بعصبيه \مو متوتره...بس أنتم الله يهديكم غصب تخلوني أتوتر...وين شنطتي..!

الثريا \ أيه شنطتك خلاص ركبها قايد..لآتشلين هم...من زين ذي الخلاقين الي انتي حاطتها وخايفة تنسينها...!

نجد بتوتر\بروح أبوس لولوه...وعقبها ثامر..!

الثريا..\لولوه مو مشكله لكن ثامر الله يرحم ابوك وش بيهجده...وبعدين ثامر طلع مع حاتم على قولة اخته...



نجد تصمت وهي تتجه لتوديع لولوه...



الجموح تخرج بشنطه أخرى من غرفة الثريا...\ بنزلها الحين لخدامه تطلع لقايد ويركبها...

الثريا با أبتسامه \ خلاص جعل ربي مايهينك...


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

بـ مكان أخر...,
.
.
.

رهان مبتسم ..\ماشاء الله عليك يا طراد بصراحه أحسدك على هذا التفوق والجديه بدراسه...يعني هذي البحوث الي

بيدي بتفيديني أنا بعدين...تشوف أنها بتختصر علي الجهد والتعب...أذا خلصت الكورس ...


طراد..\شوف أنت شاطر وذكي وتقدر بذكائك تخلص كورسك بست شهورأكثر أقل يعتمد على شطارتك...تراها بسيطه...بس يبي لها واحد ذكي ويكرف

نفسه كرف..


رهان \ أنا أبي أخلص السنين بسرعه وأركز بتخصص الهندسه الكيمائيه مثلكـ ماشاء الله قطعت ثلاث سنوات الحين ومتفوق


ماشاء الله وطاق علاقات عميقه مع دكاترك وزملائك ..حمستني أكثر وأكثر ...وحسستني أن التخصص يستاهل نتعب فيه


لأنه تخصص يستاهل الواحد يتعب فيه ويهري نفسه لأنه كاسب في جميع أحواله...,


طراد بمحبه \ شوف أهم شي دماغك هذا تصفيه من أي شي يشغله ويشتته...يعني دراستك تبي واحد دماغه محصوره في

الكتب والبحوث والمواد العلميه الي تتطلبها التجربه العمليه...وأنا معك خطوه بخطوه في كل شي أي شي تشوف أن


عسير عليك بفيدك فيه حتى لو أتخرج وأسبقك لـمملكه أن شاء الله بكون على أتصال دائم معك..


أبتسم رهان \ ماتقصر ياطراد والله ماتقصر...صح معرفتي فيك بسيطه لكن والله أفتخر فيها...أنت ماشاءالله الصلاة والنوافل

محافظ عليها مانستك الحياة وزخم الدراسه والضغوط واجبك لربك...وهذا يمكن سر توفيقك ومحبة الناس لك...


طراد \ أهم شي واجبتك لربك..وبعدها يندرج كل شي..أنت ماتستبعد انك تطلع من مكانك الحين ويصير لك حادث وتتوفى

وش يبقى ياترى...مايبقى الا عملك ...تعال معي نشوف وش مصلح لنا هزاع أكل...أنا طايح جوع ولآزم أطلع لمكتبه

قريبه من الحي محتاج كم كتاب...



رهان \ مصلح لنا سنتدوتشات يقول عجيبه الله يستر علينا...!


غرق طراد بضحك وهما يدخلان على هزاع ويتشاكسن عليه..,


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

بعد أكثر من عشر دقائق...

كانت نجد تستقر ب أحد الكراسي الموجوده با الصاله..وأناملها تدعكها بعضها ببعض بتوتر وألم ومزيج

مر من ذكريات ماضيه...

لآتدري كيف عصفت بها الذكريات للتذكر ليلة عرسها وفستانها الاسطوري المكلف...

ولآ الفرحه العميقه التي كانت تسكن حنايا روحها ..ولآلهفة الانتظار والتشويق...

بعكس الان..برود...وجع..ألم..وسرعه في كل شي وكأنه غمضة عين..!



أم سند بهدوء \ماشاء الله ماشاء الله ...الله يجعله عرس مبروك ويجعله خير لهم من الي كان...لها...وله...,

مريم تنحني لدانه وبهدوء \حيل مملوحه أختك...ماشاء الله...بس بتصير أحلى لو لبست لـ أخوي فستان ابيض هادي ,

تدخلة مي وهي ترد \ فستانها بعد حلو...مو مهم الفستان اهم شي التوفيق من الله..!


أم قائد \ يابنات أدخلو ...ومريم البسي عبايتك لو تبين و أجلـسي مع أمك...بيدخل محمد الحين وبيدخله أخو نجد...


مريم قفزت لتلبس عبائتها...والبنات أيضاً خرجو من المكان...


تبقت نجد با الاريكه...


والداتها وقفت با الاستقبال....هي وأم سند وشقيقته...سمعت أصوات تبريكات...ورائحة العود تخترق أنفها...

تشعر بأنها بحلم....غفوه... ومضة فلاش ذكريات...لآتدري...



لكن تذكرت حلمها الذي لم يقفز لذاكرتها الا الان...



كلآم محمد لها بأنها أذا أتاها خاطب فلتتزوجه..!


هل يكون محمد هذا...!



هل هذا محمد الذي لم يتضح وجه ..وثامر كان با أحضانه...؟


هل أنقطاع الحلم منذو الخطبه من ثم أتيانه فجر اليوم

وآبتسامه دافئه كانت تتراقص على شفتيه تشبه الفجر كا..وقت حلمه اليوم ...

وكأن يخبرني بتلك الابتسامه بأنه راضي عن مايحدث الان...؟




.
.
.

لم تشعر الا بشخص جلس بجانبها...بعد أن القى بسلام خفيف....حتى لم يقبل جبينها...قد يكون لانها لم تقف

له با الاصل...فهي بقت جالسه....توتر لكليهما وكأنهما لـ أول مره يتزوجان..!



شعرت بقبلة قائد عانقة رأسها....وصوت دعوه خفيفه...من ثم أنسحاب...!


مريم باركت...والداته باركت....أمي باركت...من ثم صمت غريب...!




تشعر بهدوء وسرعه عجيبه با الاحداث...أو..هكذا يخيل لها...!



.
.
.


بعد أكثر من ربع ساعه....


كانت هي ترتدي عبائتها والثريا مبتسمه ومهدئه \ماعليك لاتشلين هم عيالك في عيوني...حاولي ماتكونين متوتره...

وأبتسمي شوي ...وجهك كأنه واحد مخوفك بسم الله عليك..أرتاحي شوي...

نجد تدخل يدها بكم عباتها...وهي صامته...

الجموح \تبين مويه والا شي الحين...

أشارة برأسها برفض...من ثم \يابنات أحس ركبي ترجف أخاف أطيح الحين..!

الجموح \ وش ترجف عنبو بليسك صدق أثرك رخمه..هذا وحنا نقول نجد ونجد..أثر نجد ماهي على أسمها...؟

الزين بمداخله وهي تكتم ضحكها\ يمكن عشان مالبسناك سروال طويل على ذا البرد قامت ركابتك تنافض ياعزتي لبنيت عمي صدق..

أصبرو شوي بروح أدور عند خالتي وصايف سراويل طويله وأجيكم ماراح أبطي..!

الثريا تضرب بخفه كتف الزين \أهجدي..ماهو بوقتك...,

الدانه تركض لها بقارورة ماء \أمي تقول أشربي عزيمه قبل لاتروحين..!

نجد بمحاولة هدوء \ وينها أمي ماعاد شفتها....بودعها قبل لآ أطلع..

الثريا وهي تعلم أن امها أنخرطت في البكاء ودخلت لداخل..\ماعليه ...وش تودعينها بعد انتي ..توكلي على الله بس..!

أم حاتم تقترب منهم وبهدوء..\يا الله يابنيتي لآتأخرين على رجالك برا...يا الله...!

نجد بهدوء \خلآص طيب..لآحد يوترني زياده...تكفون الله الله بلولوه وثامر...بكره باخذهم...


أخرجتها الثريا با ابتسامه ليتلقفها قائد ويحتضن يدها....




سار بها بهدوء وهو يشعر با الارتجاف الشديد الذي يعتريها يشعر وهو يحتضن ذراعها بأن الارتجاف تنقله لذراعه...

همس \ ترا أبو طلال سمح بشكل ماتتصورينه...لآيجي في بالك انه بيغثك ويكدر عيشتك...

بتلعثم \ لآتشل همي..بس ابيك تهتم بثامر ولولوه لبكره بس ياقايد لبكره..!

قايد أبتسم\أهدي شوي...أنتي الي لآتشلين هم احد....وداري محمد

وأهتمي فيه وأذا ماشفتيه زوج في بداية حياتك شوفيه ثالث أيتامك..!

لو تبين العشره الطيبه أهتمي فيه...الرجال وش يبي غير الاهتمام وأنتي على خبري سيدة الاهتمام..؟


أبتسمت با أرتباك..\ شكل الاهتمام والقلق مخلوق فيني ويجري في دمي..يمكن من هذي الناحيه مايشكي مني..لكن أوعدني

ياقايد أوعدني..أن لو شكـى لك تقوله لي لو كان تفصيلي ومحرج لك...!


قائد بعفويه\ محمد مايشكي الا أذا وصل حده...و..أنتي منتي من الي يوصل الرياجيل لهذي النقطه..


نجد بخفوت \ماعليه ياقايد..أوعدني...لو شكى لك..تقول لي...أنا أخاف ربي في العشير....!


فتح الباب لها ليركبها بهدوء...\ يا الله أستودعتك الله...ولآ..توترين كل شي بيصير أحسن من أول أن شاء الله...!




أغلق الباب...


لتلتقط عينيه ماهر الذي كان لتو ينزل من سياره ويركض با أتجاه محمد...والابتسامه تعتلي وجه...


ماهر بعتذار \والله ماقدرت أجي الا الحين...الف مبروك...أسمح لنا بنروح نودع أختنا أم ثامر..

محمد بتهكم ..\أكسر يدك..أن فتحت الباب على محارمنا..!

ماهر با أحراج وضحك\هذي ثالث خواتي لآتطينها معنا من أول ليله ترا الكايد قشران..


سلم ماهر على قائد وتجاوزه ليفتح الباب بهدوء \ الف مبروك يا ام ثامر أعذريني يا أخوك توني الحين اقدر أجيكم...

أم ثامر بهدوء \الله يبارك فيك...وجعل دانه ماتفقدك ..!

شعر بوخزه بصدره وهو يودعها با أبتسامه هادئه ويقفل الباب...


محمد يلوي ذراعه بتهكم...\قلت لك بكسر يدك..!

ماهر \ يا اخي اعقل لو قدام حرمتك شوي...انت مافيك عقل مره وحده..!

محمد يفلت يد ماهر...با ابتسامه...


سيارة سند التي خرجت بوالدة وشقيقة محمد عبرت أمام عينيه..وهو يترك ماهر ويركب السياره... وأشار بيده ليودعهم...


قائد بهدوء \الله الله فيها...أن كان لي بصدرك معزه وغلآ..لاتبكي عينها...!

أبتسم وهو يغلق الباب \ لآتحرص..!


.
.
.

أنت حبك يشبه لـ [..حب..] الوطن...لكن ظروفك بطانه فاسده..!

.
.
.

دخل ماهر مبتسم لمجلس الرجال ويبارك هو يرا المجلس خالي الا من حاتم...وكائد...ووالده..!

ماهر معتذر..وهو يقبل رأس كائد...من ثم والداه الذي كان عاقد حاجبيه...ومن ثم يسلم على حاتم...



ماهر با أعتذار \والله العظيم ماقدرت أجي...الا الحين...لكن زين اني جيت...


أبو حاتم بصوت محايد \مخالف المرجله دايم...!


ماهر أبتسم بهدوء...وهو مستغرب من تكهرب وجه والداه...بوجه..!


أبو حاتم...\صب لي فنجال دامك جيت ياراعي المرجله..!


ماهر شد الدله التي أمامه وبهدوء\أبشر...وأزين فنجال بعد يا أبو حاتم...!


مد الفنجال لوالده...من ثم أبتعد عنه قليلاً...ليجلس على طرف المركى...


أرتشف والداه الفنجال الساخن كله...من ثم...بمفاجئه قذفه بقوه بوجه ماهر...


ليرتطم الفنجال بقوه شديده بزاويه السفلى من شفتي ماهر...



وضع ماهر يده على فمه من ثم بعد ثانيه رفع رأسه وهو يتحامل على الوجع الذي شعر أنه حطم وجه...


وعينيه تكاد تخرج من رأسه من الصدمه..


تحت قفزة حاتم له وبصوت مستغرب \أفا...أفا...!


كائد بغضب \وش بلاك على مويهر...وش بلاك...!


تركي بهدوء \ جاي متأخر عن عرس بنت عمه...وأبي أدبه بحقوق بنات عمه عشان يعرفها زين ويحطها براسه أن

كان أبوهم مات فـعمهم حي مابعد وسد اللحد...!


التقط ماهر المقصد تماماً...


وهو يشعر بأن الدم تفجر من شفتيه...وحاتم شعر بغرابة تصرف والداه ..


ليردف \الله يهديك...يايبه الله يهديك...والله ماعودتنا على ضربنا صغار فتضربنا كبار...وحقوق بنات عمنا محفوظه عشان

بس تأخير منجبر هو فيه...قم معي ياماهر لآزم المستشفى شكل يبي لك غرزه ...!


شد حاتم ماهر...ومن ثم تركا المكان...أحدهم يتفجر غضب وألم والاخر مستغرب جداً...!


.
.
.


نقف هنا...
.
.
.
همسة محبه..\ النائمون طويلاً...سلآم على أرواحكم وفتح الله لكم باب روح وريحان ورب راضي غير غضبان...,
.
.
.
اللقاء يوم السبت القادم

بإذن الله....أستودعكم الله =)
.
.

هلا ومسهلا ومراحب حي الله ضمضم والحمد لله على السلامه
من طول الغيبات جاب الغنايم عرس نجد مره وحده وكسرة ماهر بهذي السرعة
هتونه انت أخت المعرس صح وإلا انا غلطانه خخخخخ
ياشماتت العذال فيك ياماهر والله قويه في حق شيخ المراجل هههههه الله لايبلاناقدام عمك وأخوك ضربه مفاجئه وبعد بفنجان
والله أخذ منك حق الدانه وزود بس وبتقعد علامه فارقه بالوجه المزيون على قولت مي
والله قويه في حق ماهر ماحبيت تكون قدام أحد أبد أتوقع بيعند ويركب راسه ولا راح يعتذر من الدانه ولا بيراضيها بعد ضرب أبوه حتى الجموح ذابحك ذابحك بس لا تورينه خشيتك شهر قدام
بس ايش بيكون رأي الدانه لو عرفت ماستبعد انها تبكي على ماهر وحنا نعرف حبها له ومابترضاها له انه ينهان وينضرب بهذي الطريقة
نجد وافقت مجبوره و مكرها وبرميه العقال بعد الي تنوخ لها رقاب القبايل >>أموت وفي نفسي شي من ذا العقال
بس أن شاء الله مع أبو طلال ماتندمين الرجال حبيب ومرجوج حبتين كود تسنعينه على قولت قايد حتى بعرسه ونجد قدامه مايترك الاستهبال طبعاً مع نجد بيكون شخص ثاني جنتل مان والركازه تقوطر منه ومراح يجبرها أو يقرب منها بيخلها على راحتها لما تعود عليه
مي شفتي فعايل المزيون هي ابعدي عن القافه الزايده بس مدري ليش اشك انك بتقولين لقايد عن ضرب الدانه لو بلغلط ويفلت لسانك بس وقتها ترحمي على روحك لان الجموح بتذبحك بس عجبتني لقافتها وردها على مريم الي مدري ويش تحس فيه مطيحه الميانه وهي أول مره تشوفهم وطايحه تحقيق كريه ماحبيتها
الجموح وقايد والله مقايضه قويه تستاهلين ياجميح وضيفتك بتكون الثمن الي تركتي قايد عشانه وبيحرمك منها لو فكرتي تبيعين العماره والغيره جعلك منها في زود


تسلم ايدك ضمضم على الإبداع وجعلها آخر الغيبات ننتظرك

وآآآآآآآآآآآآآآآآآآآآآآآآآآآآآآآآآآو
وآآآآآآآآآآآآآآآآآآآآآآآآآآآآآآآآآآو
وآآآآآآآآآآآآآآآآآآآآآآآآآآآآآآآآآو
وآآآآآآآآآآآآآآآآآآآآآآآآآآآآآآآآآو



هلاءءءءءءءءءءءءءءء مسهلاءءء

حياك الله اختي ومبروك ماجاك

آآآآآممممم مو قادره اتوقع من الفرحه خخخخخخخخخخخخخ

مبروك زواج نجد وابوطلال

ماهر ,,,,<<<<<اويييييل حالي عليك

اشتعلت الغيره عند الجميح

الزين هههههههههههههههههههههههههههههههههههههههههههههههههههههههههههه ههههههههههه ضحكتني على شوشتها

وفي انتظارك

السلام عليكم ورحمه الله
اولا الحمد لله ع السلامه ام اليزيد
والله يخلي لكم الصغيره اخية اليزيد وتتربا بعز والديها واهلها

من طول الغيبات جاب الغنايم
لي كم يوم اقول يا شين المنتدى يوم السبت بدون بارت الثرثره
لكن الحمد لله اسعد شي اني فتحته ولقيت البارت الحلو ذا

اولا تصرف الثريا والجموح بحتواﺀ مشكله ماهر والدانه جدا ممتاز
خصوصا في وجود عم منصف مثل ابو حاتم وعاد بنات اخوه بناته
واخذ حق بنته الدانه بدون شوشره او كلام ماله لزمه والرساله وصلت ماهر بكل بساطه
لكن السؤال هل بترضي الدانه والا بتتهور وتعلم قايد
والا يمكن مي بتهورها المعتاد ممكن توصل له الموضوع وهنا
قايد وش بتكون ردت فعله هل بيثور وثورته ذي بتكون بوجه من بالضبط ماظنتي تسلم منها الجموح وراح يربط اللي صار بنقاشهم بالمطبخ واه لايفكر يوجع ماهر برد الضربه لخته
مع اني اشوف قايد اكبر من هالتصرف الغبي بواجد
..........
نجد ومحمد ابو طلال
مثل ماتوقعت بعد حلم نجد انه محمد الثاني هو بو طلال
صحيح اضواﺀ المزيونه قالتها قبلي بس كنت علي باللي اني اول من قالها يالله عاد اصلا النجمه صبح بح بتعلقها علي بوابه قسم الوحي
وكل ماشفتها بستانس (ترقع لعمرها خخخخخخ)
المهم طريقه الشيبان ذي ماحبها والله بس لمثل نجد كانت الحل الوحيد عشان تقتنع بالفكره
واتوقع ابو طلال باسلوبه الحلو ودمه الشربات وحبه لعيالها بيكسبونه قلبها ولو بعد مده خصوصا اني شايفه من نجد الخوف
من الله في مسالة حقوق واجبات الزوج عليها
فاتوقع تلين ولو بعد مده
ماهر وش ممكن يحصل له بالغربه
ياخوفي تتكرر قصه حميدان التركي بشخصية ماهر
خصوصا بعد شوفتنا لتدينه
والا يمكن تستغله الفرق الضاله اللي ممكن يطلع طراد عضو منها
خصوصا بالنسبه لقسمه الحساس او اقل شي يحاولون يورطونه بشي مشابه
بس باذن الله بيكون تربيه ماهر وقناعاته وحبه لوطنه الحصن الحصين اللي بيحميه من الزلل ومو بعيد يكشف هالنوع من الخلايا للدوله
كني شطحت بس مدري احساسي يقول ان الغرض من سفرة ماهر هي هالفكره ......
ضمضم انتظر القادم بشووووق