كاتب الموضوع :
ضمني بين الاهداب
المنتدى :
القصص المكتمله من وحي قلم الاعضاء
رد: ثرثرة أرواح متوجعه
بسم الله الرحمن الرحيم
.
.
.
ثرثرة 12
.
.
.
مدخل
.
.
.
جايك لو ان الجموع تصيح
مستعذب الموت ومغامر
لاخذك واطلع بساط الريح
وابعدك من قصرك العامر
كم مر في صاحبك تجريح
واحتاج لاحساسك الغامر
ليتك معه حزة التصبيح
والليل ليتك معه سامر
بعض الغلا ما يبي توضيح
تلقاه لمعزبه دامر
خليت عذالنا بقريح
في عيني الكل متوامر
اطلب ولو بس بالتلميح
ومطاع يا لمترف الضامر
الا انك من العيون تطيح
في هذي اعصاك لو تامر
.
.
.
بدايه
آوقاتكم نسمات أيمانيه ملتفه بـ أرواحكم الطيبه...
أن شاء الله أن الجميع بـصحه وعافيه...,
نقطة الثريا ورواية حاتم ...وأنكم مستغربين كيف مافهمت أن هي المقصوده..؟
خلونا واقعين شوي ..=)
كيف تفهم أن هي المقصوده....هي كانت تقرأ مثل أي قارئ...
و
حاتم بـحياته ...ما ..لمح بخصوص الثريا شي...
تبون الثريا تعرف وهي الي تزوجة على طول مثل ماقالو أول مافتحت عيونها لدنيا خذت فهد..
فَ .. طبيعي جداً أن الثريا تقرأ وتحلل النص على أنه عاشق وتعثر لآ أكثر..,
فيه ضيف شرفنا اليوم...من بداية الروايه كنا نسمع عنه ..و...لآ...نشوف أطلالته...=)
شنطة اليزيد المليانه نجوم نفتحها لـ مسلمه وملامح=)
مسلمه حره توقعت توقع صائب في الجموح راح نشوفه اليوم
و
ملامح ورديه لها توقع صائب في موقف الشخصيه الي بتطل علينا اليوم
أيضاً...
راح نكتفي بـثرثره كل سبت...ونلغي ثرثرة كل الاثنين......
فـيكون بارت واحد أسبوعياً...لفتره معينه
ماودي بعتب منكم يـ الغوالـي..
لأني أن شاء الله راح أعوضكم بـحجم البارت كـ عمق أحداث وطول...
ومالكم الا الي يرضيكم ان شاء الله ...
،
أقترحت علي أم الوليد...حدث معين بين الجموح وقايد..
ليتكم تعرفون أقتراحها ها العجوز المراهقه ..=&
.
.
.
لآتلهيكم الروايه عن الصلاة في وقتها..,
.
.
.
يومين مضـت...,
.
.
.
أبتسم وهو يدلف الباب \أنا أسف تأخرت عليكم ربع ساعه...بس كنت بـ أجتماع ..وتأخر الاجتماع شوي..,
أم سعد \ مآهنا تأخير يا ولدي ...ماورانا شي...الله يكون بعونك أنت والله الي مشغول...
جلـس على كرسيه والابتسامه ترتسم على شفتيه لـيجد دوسيه أوراق ويتفحصه بهدوء...
فوز\ أستاذ قايد والله أعتذر لك من كلام البلوى الي ربطني ربي فيه...أخر مره لما كنت معنا بمحكمه ماقدرت أعتذر
لك...
أبتسم من غير أن يرفع عينيه لها ..\ لآتعتذرين أنتي مالك دخل ..هذا أنسان م يستاهل حتى أنك تتعقدين من أفعاله الي
تصدر منه..وبعدين المخدرات مضيعه ثلاث أرباع عقله يعني ماينشره عليه...
أم سعد \ ياوليدي يعني هي بتطلق منه والا بتقعد لها سنين ...,
قايد \...عندي أوراق بين يدي وشهود وتقرير المستشفى لما أنضربت فوز...أذا ماطلق
تخلعه هي على طول مايبي لها قلق ...
أم سعد \الله يجزاك خير ويطمن قلبكـ...يا أمك رداة حظ يوم ربي بلانا فيه...رجال وسخ لسان وفعل...الله لآيجزى
من مدحه لنا خير...قالو مصلي مسمي...ماعلمونا بصدق...حسبي الله عليهم...
أغلق الدوسيه والاوراق \ تنحسب مرحله في العمر وتروح...وبعدين ياخاله أنا أناديك أم سعد أم سع...ولآبعد شرفنا سعد الله يحفظه...؟
ختم حديثه بضحكه متودده...,
زفرة بضيق \ياوليدي سعد ياقربه من عمرك لكن الله يرحم الحال...توفى قبل خمس سنين..الله يصبرني على لوعة موته ..
حادث...الله يرحمه ويرحم أهل الـسيارة الي صدمها ثنين شباب بعد وماتو معه...
قائد بحزن \الله يرحمه...
فوز بتوتر\خايفه يَ أستاذ قايد منه..هو ...متهور جداً...ويسوي أي شي...هذاك اليوم طلعني من المدرسه بعد مادق
وقال والله لـ أسوي جريمه الحين فـي أي وحده من البنات الي بتطلع وأنتي الي بتحملين هذا الشي...لو ماطلعت معه كان
تسبب على بنات المسلمين...
قائد \ماعليك منه ومن تهديده..كان أتصلتي على البواب يتصل على الشرطه تتفاهم معه...أو.. تقولين للمديره... هو بس
يدري أنه يرعبك بهذا الشي...هذا هو خذاك بغصب ودخلك الشقه وشرب وسكر ونام معك بـ الاكراه...
وأنتي لولا فتحة المكيف المفتوحه ماقدرتي تهربين منه..
رجال شفته ماعنده الا اللسان الوسخ...فقط...وداري أن ماوراك ظهر...أنا أضفة في أوراقـي
للقاضي هذا الشي وأستشهدت فيه مساعدة جاركم لـك..وصدقيني بـسعى في سجنه ماهو بس خلعك منه...,
أم سعد \الله يجزاك خير..
قائد \بكره الجلسه...وأن شاء الله توزعين علينا يا أم سعد حلاوة فكاك فوز من رجال مايستاهلها...!
أم سعد بخوف\أن شاء الله أن شاء الله والله يكفيني ويكفي بنيتي شره...و...يكفيك شره...
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
الجموح \شجرة الدر...بفعل شخصيه لـ أمرأه قويه جداً..وملكه...خاصة أنها عاصرة مرحلة جداً حرجه في ظل
الحروب الصليبيه على العالم الاسلامي ...و..زادها وفاة زوجها والحملات الصليبيه على شواطئهم
وأخفت الوفاة وكانت الأوامر تصدر تحت ختم زوجها...وماكان أحد يدري بوفاته... حتى حضر أبنه الي كان من زوجه ثانيه ...
لكن نهايتها كانت بشعه ...
أيضاً تفضلـي يا نوره...
نوره \زبيدة زوجة هارون الرشيد..بدولة العباسيه...,
أبتسمت الجموح \ برافو عليك يا نوره ...ذكرتيني بـشخصية زبيده.. يا أخوات أنا كنت شغوفه جداً با الدوله العباسيه
وأدق التفاصيل فيها..وكان عندي كتب كثيره ومراجع لـهذي المرحله من العالم الاسلامي وأنا بـمثل أعماركم...
زبيدة ... كنيه لها لكن اسمها الحقيقي أمة العزيز
كان جدها أبوجعفر المنصور لما يرقصها ب أحضانه ويلاعبها يقول
زُبيده..زُبيده....يعني من شدة بياضها ...لانها كانت بيضاء..فسميت بزبيده...
طبعاً كلكم تعرفون قصة الحب الشديده الي كانت بين هارون الرشيد وزبيده...
لوتقرأون يا أخواتي في سيرة هذي الـمرأه جداً جميله ...ومملوئه أحداث..
برغم بذخها ودلالها وترفها الا انها تألمت كثير..
كانت أول زواجها ماتنجب ...بمعنى تأخرت بـ الانجاب...
ونذرت أن أذا الله رزقها بـ الانجاب فـ راح تعمل عمل خيري
ضخم...ورزقها الله بـ الامين...وبفعل عملت طريق طوله 900 كيلو لخدمة الحجاج ..والمسافرين..والمعتمرين لمكه..
وكان بدايته من الكوفه با العراق..
وقدمة حليها وذهبها ومجواهرتها..لـ حفر الري والاستراحات والعيون..وكانت
تأمر بصيانه دوريه لـهذا المشروع بشكل سنوي..وأسم الطريق [درب زبيده..]
...وكانو يسمونها بـ [أم الفقراء..]
وبسياق ذكر قصة زبيده راح أورد لكم
قصة الصراع الي دار بين أبنها الامين وأبن زوجها المأمون ...بشكل سريع ومختصر..
لما دارت الحرب بين الاخوين كان كفة الامين راجحه وكان متوقعين
أن الانتصار كان له..فقالت له أذا أنتصرت على أخوك..وسيق لك أسير..لآتمنع عنه جاريه وأجعل قيوده من فضه وأحسن
له...لكن حدث العكس وقتل قواد المأمون أبنها الوحيد الامين ..وحزنت عليه حزن كبير وعظيم..
وكان المامون بمثل ولد لها لانها ربته ف ام المامون الفارسيه ماتت بعد ولادة المامون بثلاث ايام
وارسل لها المامون يعتذر عن مقتل الامين وانه ما امر بقتله
فردت عليه برساله: "أهنئك بخلافة قد هنأت نفسي بها عنك قبل أن أراك، ولئن كنت قد فقدتُ ابنًا خليفة، فقد عُوضت ابنًا خليفة لم ألده، وأسأل الله أجرًا على ما أخذ، وإمتاعًا بما عوَّض".
فايزه \ دكتوره ..شخصية الخيزران...!
أبتسمت \ والخيزران..كانت والدة الرشيد والهادي أبناء المهدي ابن ابو جعفر المنصور....وهي كانت شخصيه قويه ومؤثره
برغم من أنها كانت جاريه...لكن كان لها شأن في التأثير على زوجها..قيل أنها سممت أبنها الهادي..أو..دست لـه جواري
يقتلونه..بسبب عقوقه لها...
أبتسام \ شخصية الملكه هيام...!!!
الجموح \أوه هويام ...ياحبكم لـ الربط الحين...؟
غرق الجميع بـضحك ...
ساره \الممثله يا دكتوره تهبل ...الا..ملكة جمال..أختاروها صح...
وماكنت أدري أن الدوله العثمانيه بتركيا أحسبها عربية الأصل والمنبع...
وأقول وش في الأتراك ياخذون تاريخنا...الى أن أتحفتنا وحده من خواتي بأن الاتراك
يمثلون تاريخهم وأن الدوله العثمانيه هي تركيه...
الجموح \ التاريخ المشترك بينا وبينهم هي الفتوحات الأسلاميه ..الي صهرت الأجناس مع بعض وطبقنا القاعده الأساسيه
لهذا الدين أن لآفضل لـعربي على أعجمي الا بـ التقوى...وهم ماهم يمثلون تاريخهم..هم يمثلون الأسلام والفتوحات في
ظله والتوسعات و المسلسل الي تتحدثون عنه [..حريم السلطان..] أشوفه بعد حديث المجالس للاسف فيه كمية أخطاء ..
وهذي الاخطاء راح تترسخ فيكم...
وهذا الي يكرهني في الاعمال التاريخيه خاصة الضخمه...الي تسعى لتسويق أكثر من المضمون..؟
لمى \دكتوره متابعه أنتي للمسلسل..؟
أشارة بنفي \لآ والله ماتابعته لكن شفت الجدل فيه قلت أطلع عليه من باب أخذ العلم من الشيء...وأطلعت على كذا حلقه فقط..
لمى بحماس\ السلطان سليمان م كنا ندري عنه ولآ عن حريمه ولآ عن حياته
الحين حتى أمي وجدتي يسألون عن أحداث الحلقه وش سوت هيام و السلطان...حتى ملابسهم ..أحزمتهم ..أكسسوارت
شعورهم...مكياجهم ..تسريحاتهم صارت الموضه يادكتوره با الاسواق ...!
الجموح بمناقشه جميلة وهي تشير بـ أناملها \ أكثر من ستين أو سبعين بميه من الأحداث الي موجوده با المسلسل هي حبكه دراميه..
القائمين على المسلسل ركزو على المشاهد الي تبهر المشاهد حتـى ينجذب لمسلسل...و..ركزو كثير على مسألة العشق..
لكن بصفه عامه
السلطان سليمان...يعتبر عاشر سلطان بدوله العثمانيه...وأعظم توسع لدوله بعهده أمتد حكمه لمدة سته وأربعين سنه..
وضم تحت حكمه أكثر العواصم الي قامت فيها الحضارات...
كان من أعدل حكام الدوله العثمانيه وطبعاً هذا الشي أنهز وأربك المشاهد بتصويرهم لـعدم العدل بين
زوجاته ...أيضاً...تمثيل شخصية سليمان
بأنه زير نساء...كل همه وتفكيره منحصر في النساء والحرملك والخ...
وأذا رجعنا للحرملك..فلعلم يا أخوات
مشاهد الأختلاط بين الرجال والنساء في الحرملك مآهي موجوده با الاصل فا النساء كآنو لايختلطون با الرجال
أبداً والحرس يكونون خارج الحرملك..و..حتى الي بداخل الحرملك مو كلهم ملك السلطان..بعضهم
موظفات او أداريات...والقليل هم ملك اليمين...وأضيفو أن ملك اليمين مدة تسع سنوات اذا لم يتزوجها
السلطان فـهي تعتق وتتزوج أيضا...
ومشاهد عري الصدور والقبل والخمور ترفع الف علامة أستفهام لـصناع المسلسل..؟
وخآصة أنه يناقش أهم حقبة تاريخيه تخص الدوله العثمانيه..!
أنا مو ضد تسليط الضوء على شخصيات مهمه بتاريخ...
أنا ضد أنهم يسلطون الضوء الخاطئ بقصد او من غير قصد
وبعض المشاهدين للاسف ماعندهم خلفيه تاريخيه تخليهم ند قوي يناقشون ويعترضون ويفندون...
قرأت أن الاتراك أنفسهم خرجو في مظاهرات كبيره لوقف المسلسل..لأنه يسيء لـتاريخ سليمان...هذا بحد ذاته
مايخليكم تتوقفون شوي ...و...تبحثون في حيثيات العمل المعروض...!
وأخيراً
أقرو الكتب...والسير..تفقهو في التاريخ..أستمتعو بـ أستنشاق رآئحة الماضي المجيد...
الماضـي هو الحاضر....ومن لآماضي له لآحاضر له...والتاريخ يـقرأ لـ أخذ العضه والعبره من أشخاص عظام
كان وجودهم تهتز لـه الناس...واليوم هم تحت التراب مقرونين بـ العمل...وأنطو في صفحة النسيان..!
.
.
.
فهد الجالـس با أرتباك عينيه تنتقل لـ الـمـجلـس الـمصمم بحسب ذوق قائد..
على الطـريقه التقليديه..
جـلسه عربية..بلون البيج و الذهبي..
كان يجلس بـ صدر المكان..
لـيحضـر له الـقهوجـي الموجود با المجالـس الخارجية القهوه ..
و..
رائحة الزعفران تتطاير من فنجال....
فهد بـستفهام\علمت أم قايد أن أنا موجود بمجالس..؟
القهوجي\أيه..شوي وتـدخل...قالت ماح تتأخر..
أنسحب القهوجي بعد ثالث فنجال لـفهد..وخرج..
.
.
.
كآن ينتظر أم قائد بعدما أخبروه بأن قائد ليس هنا....
جاء...
ليضع جميع النقاط الهاربه عن الحروف مكانها...
مخطئ....
ويعلم ذلك..
وأتخذ خطوة الـمجئ الى هنا...
بعد مكالمة من خالد ب الأمس حملة كلماته بكاء موجع له
...و...
رجاء عميق بـ أن يعودون كما كانو من قبل...
هو نادم جداً...
بعدما أختفت هي تماماً عن ذراعه بـ ليل طويل طال عليه بعدها..
تفاجئ بأنه لم يشعر بشيء مع رزان..؟؟
غير..مرارة الـفراق لتلك...!
.
.
.
منذو أن طلق الثريا..تأكد بأن العقل مضى معها..
أي عقل كان في رأسه عندما لم يعصيه عن تطليقها...؟
كيف أصبحت هكذا...؟
أي...
زلة قدم أهلكت الروح تلك...؟
هل هي كما قالت والداتي لي ذات يوم متهكمه بأن زواجه من رزان ماهي الا [..نزوه...]..؟
أتت سريعه لتختفي بأ أكثر من سرعتها؟
وأن الثريا لآ تقارن بـ الثرى...
أي وربـي نزوه ...
أقسم بربي ثلاث وأربع وخمس من القسم...بأنها كانت نزوة عقيمه.....!
.
.
.
كنـتي ..
تمدحين لي أخلاقها كثيراً...
ولطفها كثيراً...
ترسل الأطباق التـي أحب لكِ...فـ..تخبريني بفرح بأنها منها...!
قصص كثيره تحكينها لـي ...و..التي حكت لك تلك القصص هي...
تخبريني بجنون عوفيتك تفاصيل يومك معها...أو..سهرتك...!
بعفويتك أنتي...أعلم..
وبـتشوق منـي كنت مراراً أكبح جماحه....
لـ أدخل بمصادفة البحته بعد سفرة ليومين أتصلت عليك كثيراً بوقتها
لكن هاتفك كان مغلق...
فقررت مفاجئتك فتحت الباب بمفاتيحي...
لـ أجدها بمنزلي مرتديه لبنطال ضيق..و...قميص حريري خفيف يلتصق
بمعالمها الانثويه...!
...فـ...
تفاجئة هي بدخولي
و..
وقفت مبهوتاً..لـترسخ صورتها برأسي بعد أن أعطيتها مسحة مكبرة لتحفظ برأسي...!
همت ..وعشقت تلك الصورة المكبره...!
.
.
.
بت معك لليالي طويلة...وتلك الصوره عالقة برأسي...
لم أشعر بوجودك ولآبحديثك...فتلك كانت متشبثة برأسي...
شيطان مآ..نحتها بعقلي نحت حتى رسخت...!
بحينها..أردتها فقط...
ومادون ذلك لآ...أريد...!
مآعاد يعجبني فيك شي...
وكل تلك المميزات التي كانت فيك لم أعد أراها...
أستحدثت العيوب الكثيره..كي أقتنع بفكرة بأني لم أعد أريدك ...
أردت المغامره السريه...
وحتى أن كانت مغامرة قاتله..لن أتراجع.!
كنت متشوق لها لـكن لآ...أريد طرق باب الحرام...
أردت الحلال...
غامرت بـخطبه سريه...فـ أن وافقت وضعت الثريا أمام الأمر الواقع وسوف ترضخ ...
كنت بحينها متأكد بأنها سوف لن تتخلى عني...
وأن لم توافق...فـسوف لن تخبر صديقتها كـي لآتبتعد صديقتها عنها...
وكنت سأحاول أبعاد الثريا عنها أذا رفضت...
وسأختلق ألف كذبه كـي تنفصل تلك العلاقه بينهما..!
...كنت فقط أريدها....
والغيت جميع الحسابات ..تحت بند سوف تحل في حينها....
والثريا كانت من ضمن تلك الحسابات التي الغيتها وسوف تحل في حينها...!
لتأتيني الموافقه التي لم تتمهل كثيراً...!
فلم يعد يعنيني أن تغضب او تجن أو حتى تموت...
فسوف أقوم بأرضائها بطريقتي الخاصه..!
.
.
.
لكنك أوقفتي قائد بوجهـي الذي أستل الطلاق منـي بجملة قصيرة منه...!
[ فهد..جيبها بطلاق والا بخلع...الثريا مَ تبيك...فـ أقصر المشاكل طلق بهدوء...]...!
وأصبح قائد الصديق ضدي فجأه...
أرعبني وقوفه ضدي...
فـ...
هو لآيكسب خصم أبداً...
ومن يكسبه خصم فقد خسر بشده...
وطلقتها طلقة واحده...
لعلها تسكن قليل..وتعيد حسابتها كثيراً..
ويصمت قائد عني..من ثم أعيد حسبتي من جديد...
.
.
.
وها أنا...هنا...
بعد أتصال من خالد وأستدارجه ليخبرني بـتلك الثريا كيف هي أخبارها...؟؟
لـينصف روحي ببكائه العميق...يريد مني أن أعود لـوالدته..
وكأنه يعلم بأن والداه بات نادم وبشده....
.
.
.
و جن جنوني أيضاً بـعد أن أخبرني...
بأنها كانت سوف ترتبط بـشخص لآ أعرفه....!
لكن هو من رفضه ذاك الصغير ...؟
من ثم راح يبكي بشده...ويتوسل بشده...!
.
.
.
نعم
لقد ندمت وهآ أنا سأفرش لها الأعذار مقرونة با الأفعال ..
ويجب أن تسامح كـي لآ يضيع كل شي من جديد...!
تلك السنوات التي بيننا ستشفع لي با الاعتذار...!
خالد أيضاً سيشفع لي...عندها...!
حبها لي سيشفع وستعود...!
وآثق بعودتها لأنها لن تجد أفضل منـي في المميزات الكثيره ..
أذا أستثنينا [..الزله ..]..!
وهي تحـبني وسوف تسامح.....؟
وخالد....سوف يجعلها ترضخ...!
.
.
.
وهي أمرأه ...
والمرأه...
يتسع قلبها لـزلات الرجل الكثيره...وتغفر...!
والمرأه...
هي ترق عندما تأتيها نادم متوسل..فتصفح...!
والمرأه...
تقدم أطفالها على وجعها وكل شي......!
والمرأه...
عندما تكون مطلقة تكون ضعيفة جداً...وتقبل جميع الحلول...!
والثريا...أمرأه....مثل جميع النساء...!
ربآه...أجعلها تغفر..كـ بقية النساء..!
.
.
.
تدخل أم قائد بوقارها...
لتقاطع ثرثرته الطويلة بـروحه...بترحيب دافئ \حي الله أبو خالد...يا مرحبآ ومسهلااا..
وقف بحترام وشد الخطوات ليقبل رأسها...\الله يحيكـ...وشلونك يمه عساك طيبه...
جلـست بهدوء بعد السلامـ\الله يسلمك بخير يافهد..وشلونك وشلون أمك عسى جماعتك وأهلك بخير...؟
فهد بتوتر \بخير الله يعافيك..وين قايد ماهو موجود..؟
أم قائد بأرتباك\لآوالله اليوم عنده شغل بمكتبه..الله يكون بعونه...
أبتسم \خالد وشلونه عساه طيب...عسى م يزعجكم كثير..؟
أم قائد \طيب يا أبو خالد...ماهوب يزعجنا حنا أهله وهو ببيته...الله يـحفظه لعين ترجيه...
صمت قليلاً....
ليردف \ وشلون أم ثامر و الدانه عساهم بخير...؟
أم قائد \ أبشرك بخير وعافيه...وشلون خواتك وأهل بيتك...؟؟
فهد \ الحمدلله...كايد عمي عسى صحته زينه ..؟
أم قائد \ مافيه صحه هذيك حالها لكن الحمدلله ...
الصمت المرتبك خيم من جديد...!
ليردف فهد \ خالد يقول يبي دباب..بس أمه رفضت...؟
همس بـ أخر الجمله...بوتيرة خاصه ..
لـيشعل بـروحه الف قنديل من الندم...,
أبتسمت \ الثريا حريصه وماهيب تحب الدبابات مثل منت عارف...وخالد الله يهديه راكب راسه...لكن دامها
رافضه فـ أكيد لصالحه..
فهد مرتبك \ أكيد...مَ راح أخالفها أجل ...!!
القت نظره ..عليه..لـترى مسحة حزن...
تسكن تلك التقاسيم ...!
فهد..!
أنعم الله عليه بوسامة بمسحة رجولية خالصه...
والان ترى أن تلك المسحه تراجعت كثيراً...
لآ
تدري لما...!
قد بدآ...لها نحيل...
وخسر الكثير من وزنه..
وكأنه أصبح مريض...!
هل يخيل لـي...؟
أم
بفعل هو خاسر لـ الكثير من وزنه...؟
مآزالت تحبه...كـ... أبن لها...!
فلطالما كان يحبها فهد ويودها...!
ولطالما عانق الدعوات بـتوفيق مع أبنتها في جنح من الليل مظلم..!
لكنه أصاب الثريا بسهم...
أخترق ذاك السهم جسد الثريا ..ليستقر بـقلبي أنا...!
أرتبك من نظراتها لـيهمس \يمه...مستغربه من زيارتي صح...!
وصايف بـوجع \بيتك ياولدي..وأنت تعرف بمعزتك مهما كان...,
فهد بألم \يمه...أذا أخطينا هل فيه مجال للابواب تنفتح من جديد أذا جبنا مفاتيح الاعذار..؟
كانت مستغربه بـ الفعل من زيارته المفاجئه...
لكن
لم...!
تتوقع ...بأنه...أتى لـهذا الامر...؟
جاء...معتذر..؟
توقعته جاء لـ أي شي أخر ...!
همست بألم \يا أبو خالد...مَ فيه أبواب تحتاج لمفاتيح...لن الابواب...صارت جدران يا ولدي...!
برتباك يغير مكانه لـيحتضن كفها بـندم...
و
يرصف الهدوء المرتبك مع كلماته ...\ يايمه ..أبي أرجع الثريا..أم ولدي..؟
أبتلع ريقه بمراره..\مابغيت الي حصل يصير لكنه غصب عني صار...وخالد أمس أتصل علي ولو تسمعين بكاه رحمتيه....
خالد صار مشتت من بيت لبيت...ومستواه الدراسي تراجع..
أنا مخطي لكن الزواج مثل ماتعرفين حق من حقوق الرجال الشرعيه..
لآ أحدثت ولآ أبدعت...
وأنا عارف أن أنتي موجوعه من الزواج الثاني لكن يا يمه حطي خالد
فوق الـ جرح ويندمل...
يثرثر بما يملئ الروح وجع فوق وجعها...!
أستغرقت ثواني..
من ثم ردت بصوت رخيم\ ياأبو خالد..ماختلفنا أن عرس الرجال على مرته حق من حقوقه لو فيها شي..
لكن ماهو الي مثل الثريا يـعرس عليها ويجيب فوق راسها مره..
الثريا ماهي عشانها بنتي ..لآ بالله...
القاصي والداني يحكون فيها..ويضربون الامثال..وأنت وأهلك أول الشاهدين
زوجتك هي وكانت بعمر الورد...صغيره..ماكادت كيد الحريم..
حطت أهلك أهلها ..لآشكو..ولآ..تمشكلو معها..
حتى الحموان يحبونها ويحشمونها..من أحترامها وتقديرها لهم..
واذا عزمت أنت الرجال ..بيضت وجهك..
ومدت السـفره الي كله شغل يدها..من كل صنف ومن كل لون بفضل الله وحمدهـ...
وأن جيت للوصف...فـ الوجه بدر..والجسم ريان...
مدري وش تدور في الحريم اذا هذي كلها فيها..؟
ويوم تزوجت عليها خذيت أقرب قريبه لـها وصديقه.........ماماليت الايام..
ولآحشمة العشره..
ويوم طاح الي في راسك اليوم ي فهد جاي تقول يايمه رجعي الثريا..!!
وش تبيني أرد عليك يافهد..وش أقول لكـ..؟
وش الرد الي ينرد عليك دام فعل يمناك ماترك للمعاذير باب...؟
أردفت والعبره تختنق بها\انا لايرضيني تشتت خويلد..ولآيرضيني طلاق بنتي..لكن ماعاد خليت للماء مجرى..
ولآخليت للحكي مكان..
فهد مقاطعها\ يايمه..صدقتي بكل حرف قلتيه..والله أنا نادم ..وعاض أصابيعي ندم بعد...وأستاهل الوضع
الي حطيت نفسي فيه لكن يايمه لكل جواد كبوه..
قاطعته\كبواتك كثيره وهذي بذات كبيره.
فهد يزفر بضيق\ ماخبرت قلبك بقساوة الحجر..خليها تطلب..وتامر..وتشرط وتدلل..بيت...
بحط لها بيت لحالها بعيد عن أهلي عند بابك هنا تامر فيه هي وتنهى...
رضوهـ...تكيل من الذهب وتنقى من الالماس ..تزهى فيه بنت نايف وهي كفوهـ...
تبيني أطلق الي خذيته عليها تبشر...
والله من هذيك الليله وانا عارف كبـر خطاي ..
تكفين يمه...ساعديني رجعيها لـي ولها الي تبي...
يا يمه والله أني أحبها وعارف ومتأكد أنها فيني ذايبه...
لكن الشيطان دخل بينا وفرق قلوبنا بنزوته...
أنا مخطـي..جايك معترف...قولي لها...أنا بـحقها مخطي ..وجاي لها أعتذر..
ام قايد بألم\ وش جاي عقبه..تحسب الثريا تبي الذهب والماس..يابو خالد انت أبخس باالخير الي هي فيه...
لآتزيد وجعاتك بهذي بعد..
فهد\يمه...والله أن قلبي شاب..يبيها...وش تبين أسوي وأسوي..أنا أقول لك ولها أطلبو..؟
ام قايد\ماظنـي بنت نايف اذا عافت شي ترجع له من جديد...أنت أبخس الناس بثريا
خذيتها بزر وتربت على يمناك...!
أنكمش وجه فهد من تجهم وصايف...
ليردف بأصرار \كل الرجال لهم الزلات الي أكبر من كذا..
أنا زليت ..وعارف أن زلتي كبيره....لكن ...لآزم تسامحني أذا ماهو عشاني عشان ولدها عشان السنين الي
قضيناها مع بعض على الحلو والمر...
أبتسمت بـألم \ يا فهد...تبي الحين الثريا وأنت قبل مرخصها ...م فيه شي ينتظر ..الثريا خاطبها رجال يـ سعد عينها لو توافق
عليه...!
فهد بزفرة وجع \عارف الموضوع وهو الـي جابني لك...خالد قال لـي وأنه رفض الخطبه...عشان كذا أمه
رفضت...لآتلعبين بهذي الورقه يمه تبين تزيدين وجعتي أكثر عارف مقصدك...!
أبتسمت بضيق \ صدق خالد...بس خطبها قبل يومين رجال غيره....وماظن الرجال ينرد أبد...!
شعر بأن الأوكسجين للحظه أنقطع...!
لآ
يدري لمآ...شعر بأن الابواب الضخمه أغلقت بـ الف قفل...و...لآ...يوجد مفاتيح ...!
سوى بصيص أمل صغير ومضى...!
فهد بـتوتر \ من يمه من...؟
وصايف \ رجال ولد رجآل...لآ...تنشد...!
فهد بجديه \ علميها أني هنا...خليها تظهر لـي الحين...قولي لها يمه أني بـ الباب...!
وصايف بجديه أيضاً\ماهي بظاهره...مالكـ لوآآ..!
فهد بأصرار يقف\يمه...قولي لها...أنا هنا..جايها معتذر وندمان...أبي أرجعها اليوم اليوم هي وخالد...يطلبون الي
يبون مخطي وأستاهل العقاب...لكن تتزوج غيري لآ..
ماهو بحل تهرب من قساوة جرحي تدور طب غيري..أنا الي جرحت وانا الي بداوي...لكن تعطيني فرصه...!
وصايف \ عود يا فهد من الباب الي جيت منه ...ترى مَ عاد القلوب على خبرك صافيه...!
فهد أنحنى لها وقبل رأسها ...
وبصوت متـرجي\ لآتكونين أنتي والزله والفراق ضدي بصف الثريا..خليها بس تطلع لي...أنا عارف
بتعاتبني كثير ..و...بتلومني كثير ..و...بتوجعني كثير وأخرتها بترجع معي...
صلحي الي أنكسر بينا بحكمتك ...أكسبي في قلوبنا أجر...
هي قلبها يبيني وأنا مخطي وجاي أعتذر وقلبي عليها شفقان......!
اشارت بـرفض \ ماعليه يا فهد..كل واحد فيكم شاف نصيبه خلاص...روح بحالك وأترك بنيتي بحالها...وخالد
الله يصلحه ...قلبي عليه مفطور لكن على بنتي من فعلتك مفطور أكثر...!
تراجع بألم...بعد وقوفه...
يود أقتحام المكان وأخذها بيدها ....
والهروب من زلته ومن خطبة الرجل الذي لم تحدد أجابتها عليه...
يود الكثير والكثير...
لو أن الأيام تسرق لـي الثريا...وأحتضنها من جديد...
لن أبدلها بـ أحد مهما كان...عهد صدق ...لآ...كذب...!
كيف أقتحام المكان...وأخذها كيف...!!
همس بضيق..\ تدوس على قلبها عشان بس تجرحنـي...أكيد الـي خطبها عنده مره غيرها...بـتوجع قلبها عشان
رزان ...و...رزان بطلقها...ماراح اخليها على ذمتـي بعد ماترجع الثريا...
أشارت برأسها بـ النفـي \لآ...الرجال الي خطبها توه ولد ..مآبعد خذا غيرها...هي أول فاله...!!
أنشطار روح لآ..أقل...!
أنفلتت منه ضحكه بارده غير مصدقه...\ أول فاله...!
أرتفعت عيني وصايف بـجديه \أيه أضحك وأزيدك بعد تعـرفه زين......!
عينيه الـمستغربه ...وبعدم تصديق\من..؟
وصايف \حآتم ..!
حرك شفتيه بصدمه \ ولد عمها تركي...
ليردف \لآ....يمه تمزحـين...أكيد تبين بس توجعيني عشان الي سويته بثريا....؟
وصايف بتأكيد \لآ..والله يافهد...خطبها حاتم ...تستاهل يا فهد تستاهل ياما قلت لك الثريا مايفرط فيها الا الخسران...وش كنت
أقولك وش كنت أعيد وازيد...!
تأكد بأن المنافسه غير متكأفه بـ الاصل...
وأنه خاسر بـجميع الـجوانب...!
سيلعب وتر الحب وخالد...والندم...,
بـعصبيه \أنتي قلتي ياسعد عينيها لو توافق عليه..يعني مابعد وافقت...خلاص يمه...علميها أني جاي معتذر...هي
ماتبـي حاتم ولآغيره..
هي بس تبـي فهد...تبي الي قضت معه أحلى العمر...ألي فتحت عيونها على الحب بصدره..
الي هو عيونها وقلبها وهواها...
القت نظره متألمه...له....لتصمت بحيره...!!!
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
الزين وهي تراجع أجابتها لتجدها صحيحه مائة بمئه...
وتبتسم بعد أن حمدت الله وشكرته...
أروى \والله يا الزين ..أجابتك كمبيوتر...مَ يحتاج مراجعه...
الزين \من فضل الله...أنتي بس أذكريه...
أروى \ ماشاء الله ...الله يرزقنا...
لتردف\..قولي لي أنتي ليش مَ عاد تعطين البنتين هذوليك وجه...صاير شي
بينكم...متهاوشين..؟
الزين وهي تغلق أوراقها \ لآ...مابينا شي..بس أختي الجموح تتضايق أذا مشيت معهم او جلست..وبيني وبينك..أنا
بس كان عندي فضول لآ..أكثر...بس دام أختي نبهت..فهي والله تنفذ ومن دون رحمه هههاي...
أروى \ صادقه أختك... تعجبني راكزه وعاقله...تحسسك أنها قياديه...
الزين \ ماقلت لك أنها مخطوبه وقريب بتتزوج أن شاء الله...؟
أروى \ صدق على البركه....من خذت..؟
الزين \خذت ولد عمي قايد...هو يحبها من زمان ويبيها بس تعلقت أمورهم كان فيه مشكله بسيطه وأنحلت..؟
أروى بستغراب \مشكله وش مشكلته..قولي..!
الزين بتراجع \ها...لآ...عادي..مشكله صغيره...تقومين معي نشتري فطور..؟
أروى \ سماجه...قولي لي قصتهم بتفصيل...أنا أحس أن الجموح ماترتبط بأحد الا مثل شخصيتها...قولي ..؟؟
الزين بأرتباك\أنتي مكبره الموضوع...خطب... و..وافقنا...أف منك ترى ماحب تهويل المواضيع ياالله تروحين معي نشتري والا
أشتري لوحدي..؟
أروى تقف معها \ا أذا بغيتي قلتي واذا مابغيتي جنيه ماتطلعين الحكي...
سمر بـ أبتسامه تتهادى وهي ترفع أناملها لـهم
ليتضح خاتم الخطوبه تحت صوت شهقات القروب...القريب منهم....!
الزين تنظر بـ استغراب \مخطوبه سمر..!
أروى \أيه توك تدرين كش علينا وعلى حظوظنا هذي الحظوظ الي تسدح ماهي حنا...تدرين من خذت..؟
عينيها تنظر بـستغراب...\من..؟
أروى \ خذت لها دكتور أد الدنيا على قولتهم.. ها النتيفه الـي ماتنقبل ولآريح ولآطعم أعرست..!
الزين بستغراب \ كل قروبنا الي مخطوب والي معرس والي ها السنه زواجه...بسم الله الرحمن الرحيم ورى ماعاد بقى الا انا..!
أروى مبتسمه \أنا معك.....وبعدين تونا صغنونات..!
الزين \كنت أضحك أبي أعرس أبي أعرس...بس الحين صدق..ماتلام الجموح يوم حست نفسها كبرت..؟
البنات يتزوجون صغيرات...صديقاتي بثانوي كلهم تزوجو..
والي عليها طفل والي حامل...والحين كل قروبنا الي مخطوب
والي حامل والي بيتزوج...قسم أن تصكني الغلقه صدق لو أقعد افكر با الموضوع...!
طبطت على أكتافها بضحك \بتعرسين بس تخرجي...!
أبعدت يدها عن كتفها بغضب \أبعدي هناك بس...ورى كلهم أعرسو فجأه ...وأنا ماغير أعافر بهذا القسم ومهريه نفسي
مذاكره ...!!!
سمر بـ المقابل كانت تنظر لـ الدبله الجميله المزينه بـ أصبعها ...
و
كأنها تغيض با المقابل الـعازبات با الـقروب...
أمالت شفتيها الزين بضيق \شف شف..من زين الأصابع الـمنقطه بحروق..أبد بكره بتحذف الدبله وتنسى مكانها
بس عشانها فرحانه فيها الحين ماغير ترزز ها الاصبع قدامنا...
أروى \ من الصبح وهي جالسه قدامي وأنتي ماغير مبحلقه في ها الورق مانتبهتي أشغلت عمرها وأشغلت البنات معها
كل شوي ترز ها الاصبع يا تزين شعرها يا تسوي حركات مدري وش تبي...المهم تطلع ها الدبله...!
الزين \شوفي شوفي...!
كانت سمر تحتضن أناملها بـ دلع ...
وتحرك شفتيها بحديث خاص لـ أحدى صديقاتها المقربات...!
الزين بضيق \حومة كبدي ماعاد أبي أفطر...ياربي وش ها الموضوع الي طلع لي الحين...العالم أعرسو وخلوني...والا
أنا يتهايلي...لكن الجموح أعرست وحاتم خاطب خلاص أنفرطت السبحه وبيجي دوري..ههههههه...!
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
غاضبه عليه منذو يومين...
منذو أخبارها بتلك الخطبه الـتي بنظرها غير متكافئه...
كيف يقترن بـ أمرأه سبق لها الزواج وأيضاً لديها ولد ...؟
ما الذي يجبره على أن يتزوج مطلقه...؟
وهو لم يسبق له الزواج...!
نعم الثريا تحبها وتودها ولكن ليس لدرجة أن تأخذ حاتم أبنه الذي لم يسبق له الزواج...!
تتمنى لها الخير لكن ليس على حساب أرتباط بـ أبنها...!
لن توافق....!
حاتم الواقف أمامها ...جعلها تبعد أنظارها عنه لـ الجهة الاخرى....
حتـى الجموح شقيقته التي دائم كانت معه في كل شي بقت صامته مصدومه من تلك الخطبه طوال أخباره لنا...
من ثم دخلا بـغرفته وأمضيا ساعة كاملة بحديث لآ أدري مافحواه....!
لكنه خرج مبتسم....وهي خرجت أيضاً مبتسمه....!
ويحاولا أقناعي بـ أعذار واهيه...؟
كيف يقترن بـ مطلقه...لآ أريدها له..!
حاتم بمحاولة جديده لـ أقناعها \ يمه...أنتي ماتبين الا سعادتي ...صح كلامـي والا ماهو صحيح....!
أم حاتم غاضبه \ سعادتك يعني مقرونة بثريا...عجيب حكيك يا ولد بطني...!
جلس بجوارها وبـدفئ \ آبيها يمه...أشوفها مناسبه لي وبتسعدنـي...؟
أم حاتم متهكمه \ والشروط...والعيوب...صارت الحين الثريا خالية منها كلها...حتـى أبوك وافق ..أنتم وش أنتم ناوين فيه
علي...!
حاتم \كل خير يمه...هذا وأنتي تحبين الثريا وتغلينها تقولين كذا...عشانها بس مطلقه..؟
أم حاتم \ أيه نعم أحبها وأودها لكن ماني بعميا عشان أزوجها ولدي...أنت مابعد تزوجت ولآفيك عيب..لكن هي
تزوجت وتطلقت وعليها ولد طولها...
لتردف\مالقيت الا الثريا تخطبها..وش يشكون منه البنات يومك عايفهم...وش يشكون منه بنات خوالك وخالاتك..
وش يشكون منه الي ترفضهم دايم كل ماقلت لك فلانه وفلانه..
تقول فلانه فيها عيب وعلانه فيه عيبين وأنا مابي الا على شروطي
عشان أرتاح معها ومابي أستعجل وأخر شي تبي الثريا...الثريا مطلقه ياولدي والحق مايزعل أحد؟
زفر بضيق \لآ..يمه الحق مايزعل صدقتي ...!
أم حاتم \دامه مايزعل أحد وش تبي فيها...صح المره مزيونه لكن ماهوب الزين الي كايد..زينها في النسوان واجد...
أبتسم لـغضب والداته...ويلتزم الصمت تحت كلماتها حتى تهدئ قليلاً...
أم حاتم \وحتى المره ماتبي العرس ماهيب تبيك عقب فهد...تبي بس تربي ولدها...كم مره قالت لي...حتى الرجال الي خطبها
الي مقنعينها عليه هم امها واخوها ...
وأنت وشلون جات براسك فجأه...؟
زفر بضيق \يمه...لو أقولك الصدق بترضين والا لآ...؟
أم حاتم \وش صدقه ..أبد ماني براضيه...ثريا منت ماخذها...؟
أبتسم بهدوء \ يازينك معصبه...ترى الثريا أبيها...خلآص...مآقدر أصبر أكثر من كذا...لو تاخذ غيري
بطيح مريض وهي علتي ودواي...
وأنتي السبب يمه...!
نظرت له بـ ستغراب \ ياحويتم قول غير ها الحكي...وش تبي فيها..ماتصلح لك...أنت وش الي خلاك تحط عينك عليها
أكيد أنه قايد...أيه قايد....المره عقب رجال لآتقدم حب قايد على نفسك...!
أشار برفض \لا والله ماهو بقايد...أنا الي أبيها يمه...وأنتي تقولين لو أحكي الصدق ماتبين توافقين...
يمه راحتي في الثريا...
ليردف بـشفافيه \الثريا بنت عمي أنا مهتويها قبل ماتاخذ فهد وقبل حتى ما أسافر...
لكن قلت صغيره ولآ أبي أخذها صغيره أبيها
على الاقل تكبر شوي وتتحمل الحياة الزوجيه ...لكن أنخطبت لفهد ولآعاد ودي أقطع في نصيبها لما قالو وافقت وقلت الخيره فيما أختاره
الله..
بعدها ماكنت معارض أتزوج أحد...
لكن ماكنت مستعجل كنت أبي وحده على الاقل أحسها تشبها...أو تشابها...!
والحين يمه بعد ماتطلقت قلت أصبر شوي تلقط انفاسها وتلم روحها وأخطبها ...لن ربي أراد لـي أن أتاخر بـقرار الزواج
عشان تطلق هي ويجمع ربي قلبي فيها...لحكمه يعلمها سبحانه...
وبتودد عميق لها \يا يمه والله العظيم أنا مهتوي الثريا...لآ...تكثرين العتب أعرفك تتدورين الي
يريحني ولايهون عليك وجع قلبي....
بغضب \دامك تبيها ليه ماحجرت لها مثل ماسوى قايد في أختك...ليه...؟
بـصبر \يمه الله يهديك..أنا ضد هذا الشي ياتبيني هي برضاها يا الله يستر عليها ويوفق خطاها...م أبي أجبار حتى لو هي
تبيني...وحتى الحين لو ماتبيني الله يستر عليها لكن تبقى هي هوى نفسي والي أبيها...
صمتت بوجع \ لآتلومني ياولدي...أبي لك بنت...أنت أول بختها...مافي الثريا منقود الا انها مطلقه وبعد فوقه عليها ولد..وش
بيقولون الناس فيك..حتى الأبكار موصـي بزواجهم الرسول عليه الصلاة والسلام..!
حاتم \اللهم صلي وسلم عليه...والناس مايهموني...أطيبهم بيقول خذت الي يستاهلها والخيب بيقول وش يبي فيها ...
والخيب مالـي فيه حاجه....
زفرة بضيق \ الله يكتب الي فيه الخير...لكن والله أنها الي ماهي بقلبي لك...ياولدي شفت خالك طراد..عليه عذارى ينحكى
في زينهم وينشرق...وش بلاك صاد الخاطر منهم شوري عليك..والثريا جنبهم ماتنحسب ...!
أشار بـ أصرار \الله يحفظهم لـ أهلهم...أنا محدد أختياري...الثريا...!
أم حاتم بغضب \يا حويتم ولدها وش كبره..وش بتسوي فيه..؟
حاتم \ بعامله مثل ولدي..وآفقي يمه...أنتي رافضتها ويمكن كاره هذا الشي وهو فيه خيره لك ولـي...!
حركت رأسها بـضيق \لاحول ولاقوة الا باالله...الله يكتب الي فيه الخير وش عاد أقول...
أبتسم أبتسامه واسعه لـيقبل رأسها وبهمس \الله يطول بعمرك يمه في طاعته...
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
أبتسمت ثريا بعدما وجدت العم كائد بصاله الداخليه...لـتقبل رأسه ويده من ثم جلست بقربه..
كائد غاضب جداً...\أنتم وينكم كـني أصيح في وسط المقابر ماحد يرد لي الصوت..طلعوني في المجالس ماهنا
سفر ولآنور عندكم...كنـي في قبر...!
الثريا \ بسم الله عليك...وش مضيق صدرك....؟
كائد \ماهو بمضيق صدري شي...لكن قايد ماعاد أشوفه هو يمسي عندكم والا وينه يختفي فيه...خطب جميح منآ
وماعاد شفته مناك...هذا وهو خاطبها وشلون لو معرس عليها...
الثريا \ ياحبي لك ياعم..قايد مشغول ...والشغل لـفوق راسه....سم وش بغيت وأنا أكلمه الحين وأعلمه...؟
كائد يشير لها بـ أن تجلس بجواره..
لتجلس الثريا بهدوء...
كائد بلوم وهو يهمس \وأنتي وراتس يا الخبله..خاطبتس واحد ماينرد وتقولين مابيه...وش فيتس ماتبينه هو عاد قليبتس يبي ذاك
الي مايثمنك ولآ حط لك قدر..؟
الثريا بـألم وجسدها ينتفض \ وش له الحكي هذا الحين..خلاص مابيه ..ولآ..أبيك ياعم تقول شي الله يخليك..
كائد \أبلعي لسانتس بس وأسمعي ...تبين تحرقين كبيدت فهيدان صح...؟
أرتفع حاجبها ...!
كائد مستغرق بحديثه \خلاص أكويه بـحويتم...وأفلحـي...!
أردف بمحاولة أقناع \وش زينه...مايشكي شي...أحمدي ربتس وأشكريه..أزين من صفوق الـي
وافقتي عليه ماعنده مره ولآغثى..والرجال يبيتس..تردينه عشانتس مطلقه..!..
يمكن أنه عوضتس الي ربتس أرسله لنه الي عالم وشايفتس...؟
يمكن انه دعوة مظلومتن ب أخر الليل....؟
يمكن انه الدواء لعلتس...؟
وش ماتبينه يابوتس وهو الكوي الي بتكوينه الي يوجعتس....؟
أخذيه وتوكلي على فرداً صمد...م ينسى عبداً شكى..!
بألم \ ي عم أنا وحاتم مثل ثوب ماهو بمقاسي...!
كايد بغضب\ الا بمقاستس بمقاستس..وأذا هو طويل تلحفـي فيه ولآهو بجاي قصير لن القصر ماهو في أخلاق حاتم...و
يا ثريا حاتم لك ذرى بعد الله...لآتحسبين أنتس في رخاء دايم...
أكوي كبيدت فهيدان ...والله يا عمتس
أن تعمين عينه وتشوين كبده...ولآ أنتي بندمانه أن شاء الله...
أنتي ماتقولين ليش ماتبينه وش العيب الي فيه..؟
زفرة بضيق \مافيه عيب والله يكرم أبو تركي من العيوب لكن ياعم العيب فيني أنا...ليتني مطلقه وبس الا مطلقه ومعي ولد
وش الي يحده علي..
كايد \ ...الحين جايتس واحد يدري أنتس مطلقه وعندتس ولد ومارده هذا الشي...وش معناته يا الخبيله معناته
يبيتس أنتي ... وآفقـي عليه...شوري عليتس...شوري عليتس...!
دخول نجد المؤيد \ وأنا أقوله بعد...تاخذ حاتم وتحرق كبد فهد ...وش فيه
حاتم والله مافيه العيب ...واذا المقصد طلاق...فوسعـو مداركم ياعالم...
أحلى شي المطلقات...
مجربين الزواج ولآيبون فشل ثاني..
يبون يبنون أسره ويأسسون حياة ثابته مافيها تكرار فشل...
وبعد تجربتهم يكونون حكيمات وحريصات...
بوجهة نظري الي أشوف أن حاتم مشاركني فيها أن الطلاق ماهو عيب ...الطلاق بدايه جديده...ومافيه مشكله
أذا تزوجتي عزوبي ماسبق له زواج...وين المشكله..صح مو كثيرين لكن ماهو كارثه تتزوجين عزوبي!
أبتسمت بتهكم \شكلك مغمضه عيونك أنتي صدق...هذا وأنتي قاريه خزبقته وعارفه وش وراه...وجاي يبي
يدفن كل شي بمطلقه عشان تكمل معه ومعي...
نجد \مو مشكله...بدايه جديده لكل واحد منكم...مع أني ما أيدك أن له تجربه ..
حاتم كاتب مبدع أقنعنا بشخصية جواد لدرجة توقعنا أنه حاتم...
لتردف \أستانسي أنتي بس با الولد..ماعليك من أحد...
غرقت نجد بضحك بعد همستها الخبيثه لـتقذفها الثريا بـ فنجال كان بـيدها لـيرتطم بساق نجد...
نجد بألم \ رجلي بغيتي تكسرينها وأنا صادقه..
أستانسي با الولد ولآعليك من القيل والقال أنتي ما ضربتيه على يده وقلتي تعال أخطبني
هو الي يبتيس على قولة عمي كايد...توكلي على الله يابنت الحلال ولاتكثرين التفكير...شوري عليتس هههههه!
الثريا غاضبه لـتتجاهل أقناع نجد وتصمت ...
لتدخل وصائف وتسلم وبجديه \ تعالي يا الثريا هنا أبيك...!
نجد مقاطعه\يمه جعل عيني ماتبكيك شوري على ها الخبله تلاحق الولد لايطير...أحد يحصله فرصة تضرب
العصافير بـ حجر واحد وتقول لا...!
الثريا تلتفت با أبتسامه وهي تقف \الـعصافير مرة وحده على حد علمي أنها عصفورين ماهي مجموعة عصافير...
على كذا بنسوي فيها شوي يا نجد فـي الحوش ..؟
نجد \ الحين رجال ..مثقف فاهم..و..ولد عم...ومابعد تزوج...وبيحر كبد فهد...وبيحر كبد ناس قلوبهم سود
عشانك تطلقتي وهم مالهم هم الا شل وحط في لحوم الناس ..
زيدي عليها العصافير الي جالسه أصلن فوق الشجر تناظر الحال
شفتي العصافير الي صدتيها كم ..وأنتي تضحكـين على بعد نظري...؟
الثريا وهي تشد الخطوات لوالدتها\بنعزم جيرانا على ها العصافير..وبعد نظرك طبقيه على شويخه الي رافعة ضغطك ببيتك
علي لآتطبقين شي...!
كايد بـضجر \ وين حليبتي...؟
نجد تسكب له \هذا هو...وأنت يا عمي ودك بس تـصارخ وتقول كني بمقابر...مأكأني جايتك
قبل شوي وقلت في خاطرك شي تبي شي..وقلت مـا بي شي...هو كل شوي أنت بعلم جديد..؟
كايد بضجر \ وين عيالتس..ماشوفهم...أنا ذبحني الخلا...
غرقت بضحك \ الخلا ونجد الحيآ...لآ..با الله ماهنا خلا...أنت بس الي ودك با الخلا يمكن تذكرت أريش العين في الخلا!
كايد ..\يازينتس يا نجد ويازين علومتس...أريش عين الله يرحمه ويسكنه الجنه..
نجد \جبت لك راديو جديد غير الي عندكـ...أزين وأصفى ...
كايد \ يَ جعل خيرتس واجد....فيه محطة الكويت...والباديه!
نجد مبتسمه \الله المستعان يا الباديه لكن فيه كل العلوم الطيبه....
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
زفرة بضيق وهي تتذكر مرورها بـ الأمس على صاحب العقار صباحاً..
كآنت معها صديقتها ..خرجتا سوياً من الجامعه وأستقلا سيارة صديقتها...
لعرض عمارة قائد للبيع
نعم عرضت العماره للبيع بأكملها...
وبـسعر نوع ما زهيد كـي تتعجل البيعه بقدر أكبر...!
تعلم تماماً بأن هذا الأمر سوف يصيبه في مقتل...
فـ..
هي تعلم بأن هذا الأمر المجنون يناطح الأمر المجنون ذاته
الذي فعله هو قبل سنوات....
هو مجرد دين أسدده بكامله الان له...!
هل من ضير...أو..لوم...؟
فليفتح مكتب أخر فـي الف رقعة بـ البلاد...
لكن مكتبه الـذي له مكانة خاصة عنده...أصبح الان في طي
الماضي بعدما أصبح لي..!
أوا..
ليست السنين هي من تداوي السنين كـما جاد بها سموه...!
أذن فـلتداوي السنوات مَ خلفته السنوات...
الا..يؤمن با الكلمات التي يتفوه بها...!
لست خائفة أبداً منه با العكس تماماً...
لآ...أشعر با الخوف...أشعر با الرضا التام...
وبأن هناك
جمرة سُكب عليها الماء البارد الان فأ أنطفئت....!
مآذا ..سوف يفعل...يصرخ..؟
يملئ الدنيا صراخ...كمآ..ملئتنها أنا لسنوات..!
يغضب...فلينفجر فقد أنفجرت عشرات المرات ولم أجد أذان صاغيه..!
يقول بأني مجنونة ولست با الجموح العاقلة المتزنة...!
تضحكني هذه العباره كثيراً أن نطق بها...!
فـ هو أيضاً...قائد مجنون...وكأنه لم يكن قائد العاقل المتزن..بعدما صرخ بأني له [محيره...]....!
أذن فلـ يتصافـى المجانين الان...!
وتلك البيعه أقسم لـتخلف له بقلبه حرق لآيندمل...
وتبدل شعره الأسود بياض من شدة الوجع...!
هو الأحمق..!
كيف يسلم لـي رقبته وهو من سن السكين على رقبتـي لسنوات مضت...!
أكبـر توقع هو أن لآيحتمل تلك الفاجعه على قلبه ويموت...!
خيار لآ أريده...!
كـي لآ...أحمل دم بعنقـي...
فلست راغبة بـ دم أدفع فيما بعد ديته...!
لكن صاحب العقار أخبرني ب مشكله تكمن في البيع وليس
العرض
ف البيع يتوجب محرم لي بدرجه الاولى كي يكون معرف
كيف أبيع العماره من أين لي بمحرم. ؟
لمآ يربطونآ على أملاكنآ بتلك الشروط..!
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
الدانه يرتفع حاجبيها بصدمه \ لآ..مستحيل تمزحين أنتي...!
الجوهره \ لآوالله ما أمزح...هذا الشي المفروض...شوفي خوذيها قاعده الرجال تخدمينه بعيونك يعطيك ظهره...
الي تجيك خدومه وحبوبه وتداري خاطره هذي يدعس عليها ولآيهمه...والي تجيك هو أخر همومها ولآتعطيه وجه
هي بمقابل تكون أول همومه ويداري خاطرها ولآيبي فراقها...!
الدانه \لكن ماهر غير...ماهر لو أسوي الي تقولينه مايتحمل هو شراره...ماعنده طولة بال كثير..وماتعود هذي
الاشياء الي تتكلمين عنها مني...وبعدين أنا من نفسي مابي أسوي كذا...
الجوهره تأكل قطعة الحلا الاتيه بها أحدى المدرسات..\تحملي أجل ماجاك من ماهرك...والله أنه خابزك وعاجنك صح
أجل مالكم الاسنه ومعطيك أشكل...وش بيسوي بعدين يا دندون...خليك ذكيه شوي...شدي بس شدي...ماراح ينقطع خيطه
لآيهمك...!
لتردف\ شفتي أبو العيال ...كان كذا وأردى بعد وكنت ساكنه عند أهله وأطبخ لهم بعد وأغسل ملابس أخوانه فوقها
والعزايم انا الي أنا أصلحها ولآتمشيات ولآطلعات...لكن يوم شفت النفس شافت ماتكره وريته العين الحمراء وخليته
أخر همومي ...وهذا هو صار خاتم بصبعي...
صح تعبت على ماوصلت لطيحة الي في راسه بـس صدقيني بوضعك
هذا أنتي جالسه تأذين نفسك..لآزم يحترم رغباتك وتكونين بـقائمة أهتمامته...ماهو لآزم يصير خاتم في أصبعك
لكن يصير على الاقل يهتم فيك...
وأنتي تهبلين وش حلاتك...اللهم الشي الوحيد الي معقدتك وصدقيني تقدرين تتعالجين لو تبين وأعطيك كذا دكتور تروحين له..
لآتعتمدين على الدكاتر الي قبل...و..با الاساس عادي ...الحمدلله..,
أشارة برأسها وبهمس \ صدقتي أنا الي خليته كذا بس والله أحبه وغصب عني يطلع دلالي له واهتمامي...
الجوهره \ماختلفنا كلنا نحب رياجيلنا فيه رياجيل يحبون كذا ويدللوون حريمهم بعد لكن في رياجيل مثل الثور الي
عندك ماينخ الا بتطنيش...صدقيني هذا الحل المناسب له..طنشيه وأشغلي نفسك بـ أشياء كثيره غيره...سوي زيارات..
أنتي منطويه...شوفينا كل أثنين نسوي لمه يحبها قلبك...وش رايك تدخلين في ها الدوريه...بملاهي أو بمطاعم أو حتى ببيت..؟
أبتسمت الدانه \خلاص أجل...بشوف رايه...وأرد لك خبر...مليت من جلسة بجناحي وهو ولآهمه...أوكي صار أن شاء الله
بقنعه لو يرفض..,
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
بمقابل..
مصدومة تماماً \وشو يمه...فهد هنا....!!
وصايف بحرقه \أيه بمجالس...والله يا بنتي أنه ناحف وشاين وندمان...قال حكـي كثير قطع قلـبي...يقول ندمان
وتشرط وتختال بنت نايف..تستاهل وأنا أستاهل الي يجيني..بيت وطلاق رزان وحكي كثير قاله...
قال أنها زله...ويبيك تطلعين له...
قلبه مفجوع عقب خطبة صفوق معلمه خالد وقايل ان خالد يبكي يبيكم ترجعون..وجاي يبيك...
يقول تطلعين الحين..وهو بـيعتذر لك...أطلعي له...صلحي الي أنكسر بينكم...والمره هي تحفظ بيتها...وتنسى
وجعاتها عشان هذا البيت وعشان ولدها...!
.
.
.
فهد بنسبه لـي...!
حبيب متدثر بـ أغطية الغيوم البيضاء التي رحلت به...!
فهد بنسبه لـي...!
نهر عشق أغطس فيه كل ليله..وأخرج منتعشة لكن مبلله...!
فهد بنسبه لي...!
حكايات عشق..بجميع فصولها عشتها...وبـ أخر فصولها...فصل عنقـي عن جسدي...!
فهد بنسبه لـي....!
قهقات غدر بـ حسن نية ..!!
وضعت يدها تلقائي على صدرها....
تشعر بأن ذاك القلب..خرج....وذهب يركض له....فـ...الشوق جارف...برغم من الغدر...!
صمتت...وبعد ثواني همست...\ هو بمجالس...!
وصايف \ايه...ويبيك...أسمعيه يا أمك..يمكن يطيح الوجع الي بينكم ...يمكن يرتاح قلبي من شوفتك بـ الف وجع طول الليل
يمكن يرتاح قلبي من شوفة عيون خالد وكأنه يتيم...يبيك...ويبي أبوه...والدنيا ماهي بكيفه..
يمكن يرتاح قلبي من التفكير فيك كل شوي...بتوفقين وأنا حيه...والا..أموت وعيونك مليانه حسره على كل شي...!
أرحمي خالد من عيشته من دون ابو والابو حي..
وأرحميني كل يوم أشوفك تذبلين قدامي ومافي يدي شي...
و
أرحمي الي برا حاس بغلطته وجآي يعتذر والدمع والله انه بعينه...!
.
.
.
أبتلعت ريقها....حاولت تنطق...
لكن...ذاك الدمع أستوطن الحنجره...!
لـتبتلع الوجع من جديد...
وتحاول الكره فيخرج صوتها بـ ألف عله...!
أشارت برأسها بوجع \يمه العذر مايقبل أذا صار غدر...
وتردف بـ جمع شتات الكلمات \ غدر فيني ..خذا رزان...ليته خذا أي حرمه ثانيه بقول
قصرت في حقه...
بقول أستاهل يمكن ماقمت بواجبه بقول أشياء كثيره بجمع له الأعذار لكن رزان وهو يمه كيف قوى يعتذر...
العذر مايقبل مع الغدر...!
وصايف تمسك بيدها بجديه \أطلعي لفهد...أسمعي منه هو...أسمعي وش بيقول لك..الرجال والله أنه شفقان شفاقه...
وعشان خالد...ولدك..ضنآك...
مرتجفه جداً...وهي تبعد أنامل والداتها من معصمها وبـألم \أتركيني يمه......مابي أشوفه....مابي...
الوجع بصدري يزيد أكثر
يكفي أنه صار... مداين...و...شوارع...و..بيوت...و..أبواب....
ليه تبيني أتراجع عن قراري...؟
وأنتي الي ماتراجعتي يوم خذا غيرك نايف...
ماعاد بقبله يمه...ماعاد بقبله...مثل ماعفتي نايف...أنا عفت فهد أضعافك...,
أفلتت يدها بألم وهي تزفر الوجع \أيه...أنا ذقت ها الوجعه...وأنتي تبين تسوين مثلي...!
عيني الثريا الممتلئه دمع معلق...بقت صامته...!
لتردف \أنا غيرك...وضعي غيرك...وجعي غيرك...كل شي غيرك....انا خذاها على تالي العمر...ماعاد ينفع في تالي
العمر مثل ماكان ينفع في اوله...
لآعاد القلب يقدر يتحمل مثل ماكان....ولآ الروح تحتال في الصدمه...!
أشارت برأسها بـكبرياء مؤلم جداً..\لآ..يمه...مَ أبي أطلع له..ويهزمنـي حبه وأدوس على جرحي وأقول بيضمد بيضمد..
عشان عيونه الندمانه وعشان دموع بعيون خالد....وعشان عيونك المترجيه الـي تطلبني با أني أنسى...
ما أبي أنسى...رجال باعني وقال زله...
بعض الزلات تقتل الارواح...
همست بجديه \ عشان ولدك خالد...خالد يستاهل أنك تبلعين كل شي عشانه....تبلعين عظم زلته عشان خالد...!
بـنحر وريد \الا يستاهل الروح...لكن أرجع لـ أبوه..عشان بكره يجـي معه أخو وأثنين...وأنا بـ الف عله وحاله نفسـيه...
فهد داس علي وعلى خالد...
تحاول التماسك \وبكره يكبرخالد وينسـى..بكره بيعرف أني ضحيت بهذا الزواج لأنه فشل ولايقبل الترميم لانه
أنهدم خلاص....
لتردف \و أبوه يهدم كل شي ويرجع يقول تعالي نبنيه...خلآص...زلته عمرة بـصدر عماير من الوجع ماتنهدم...!
قتل روحي يمه فهد يوم تزوج رزان...وجاي يعتذر...!
والارواح ماترجع للحياه بعذر...!
أطلعي له يمه..وقولي له....
م..
ينفع لجرحنا عذر الي بينا أنت الي هدمته ولآتلوم صاحبك أذا ماعاد قبل حتى يشوفك..
شوفتك تنزع الروح منه..!
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
رهان مبتسم \ حيا الله زوين...
الزين تركب وتضع جميع دفاترها ومراجعها بـ أحضان رهان \ أمسك أمسك...!
رهان الغاضب \وشو هذا ...انا الغلطان الي جبتك....
ركبت الزين وأقفلت الباب \ ماهو من طيبك..الله يخلي بابتي الي أرسلك ..!
لتردف بحماس \وين بتوديني وين ...؟
رهان بـ خبث \ البيت يعني وين...!
الزين \ وشو البيت ...لآ..ياقلبي مر فيني مطعم أخذ لي شي أكله ...أترك سيره عطره وراك عشان أدعي لك بتوفيق بسفرتك..!
رهان بـ أبتسامه \قربت سفريتي وأحس برتباك...!
الزين بجديه تتراجع \ وش ترتبك..خلاص هذا ماكان حلمك...أكيد أرتبكاك شي طبيعي...قو قلبك كلها كم سنه وترجع
المهم تهتم بس بصلاتك هناك..!
رهان \ أيه أكيد ان شاء الله...الصلاه هي راحة الانسان والصله الي يشكي لربه همومه وكل شي بدنياه يوجعه...
الزين \ فزاع سابقك بسنه هناك ...
رهان مبتسم \أيه..عشان انا كذا متطمن وفي كذا واحد أعرفه...بيهون الله كل شي...
الزين تضع يدها على يده القريبه \ تكفـى رهان خل همك الدراسه هناك..لآيمين ولآيسار...لآتخالط اصدقاء السوء
ولآتدخل نفسك بـ اشياء مالك فيها دخل...أنت مسافر فقط لدراسه...وهذا الشي الرئيسي الي بيخليك تتغرب عنا
غيره لآيهمك...
أبتسم \ أكيد يا الزين لآتوصيني في هذي الامور...المهم أنتي أعقلـي ...
تقلب عينيها بدلع \والله أني عاقله وش زيني...!
ليقف بجانب مطعم ...قريب ...
لتطلق الزين ضحكه \ يازين يا رهان...أيه كذا السيره العطره الي بتخلينا ندعي ليلنا ونهارنا ترجع بسرعه...!
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
أمضى اليومين الماضيه بعشـرات الاتصال على قائد....
الذي كان فيها متهكم ..خبيثٍ...أستغل الوضع جيداً...
فهو مراراً وتكراراً...
أقسم أن يرد لـي صفعتي له بـ سفر الجموح معـي...!
لكن لم أعتقد ولو للحظه بأن يكون جاداً معـي في هذا الكلام...الا...بعد تعليقاته الساخره...
من ثم أخباره لـي بأن الثريا رافضه هذا الامر جملة وتفصيلاً...
بسبب أنها مطلقه وأنه أعزب..!
وأنه لن يساعدني الا بعد مضـي سنين طويله...
هذا أذا لم تقترن الثريا بأ أخر...!
تباً لك يا قائد....
رد على أتصالي الان...
فـ...أمي موافقه...والثريا باتت قريبه...ولن أسمح لها بأن ترفضني...وترحل من جديد مع أخر...
هي لي وأنا لها...!
.
.
.
لو الفرح...شعب ..و..جلآ...ماقلت ليه...؟
لـعيونها ... فلترحل أخر جاليه...!
.
.
.
بعد ساعتين..
.
.
.
قائد مبتسم وهو يرى أتصالات حاتم المتكرره...ويتجاهلها
قائد \ أموري لآ تحوسين شي...!
أميره \والله ماسويتي شي وشفيييك عليي...أزعل والله...!
قائد بصبر \ وش قالت الدكتوره الي مرينا عليها قبل شوي ...قالت لآزم نضبط الحروف...لآتشدين على الياء...وشفيك علي...وانا
حركت أناملها بضجر \ انا لـبي خلقني كذا...أمي تقوله...
قائد \ربـي...رآآآء...
أميره \ لآآآآ..!
قائد \أميره ترى سمعتك مره تنطقين الحرف وش زينه بلاش تخبيص...شوي شوي وأنتي تحكين..,
أردف بغضب \أتركي حزام الامان عليك لآتحوسين فيه...وش فيك كذا..؟
أميره بـضجر \عصريني يا قييودي عصررييني...!
أوقف سيارته عند باب الفله ...\ أسمعي الحين بننزل نسلم على خواتك وش أسمائهم ذكريني يا الله..؟
أميره \ ثلييييا...و..نجودييي...ودندونه...أنا اعلفيهم أنت تحسبنيي ماعلفيهم..؟
قائد \ ثريآآ..أعرفهم ...أموره وش أتفقنا عليه تعدلين الحروف شوي شوي...عشان أفهم عليك ترى مانفهم عليك زين...
شوفي أنتي بعض الاوقات تقولين قايد ماترصين على الياء تدرين ليش...لأنك دايم تنطقين أسمي كرري ألاسماء عشان يتدرب
لسانك حبيبتي الذكيه أنتي..!
أشارت برأسها ...
ليردف وهو يحملها ويفتح الباب لينزل\يمكن نحصل أمي ...لآ..تسلمين عليها اذا مانادتك...و...لآ تحكين شي خليك جنبي وعاقله ومؤدبه عشان أذا رجعنا
أشتري لك الي تبين...
أشارت برأسها أيضاً...والابتسامه الشقيه ترتسم على شفتيها...,
لحظات ليتواجد بصاله بصحبة الصغيره
نجد أرتفعت عينيها بـستغراب وبهمس \ ليش جايبها هنا ...؟
قائد \لآزم لي أوراق من هنا...ولآزم أخذها أتركها يعني بسياره...!
نجد تقف \والله ناوي على فاجعه انت اليوم....
أرتفع حاجبه بتهكم \أعوذ با الله منك صايره بومه...!
نجد بـ أبتسامه صادقه \ أهلا أموري...هلا والله..نورتي الـمكان ....
أنخفضت نجد لـها لتقبلها وتحتضنها بدفئ....\أشتقنا لك...والله صاير بطه..بسم الله عليك...؟
أميره بأرتباك \ أأأأأأنا ببببعد أأأأشتقت لك..!
التقط قائد التأتأه...لأ تاتيها الا حين أرتبكاها وحديثها مع الاشخاص غير
المتواجدين معها بـ أستمرار...
أبتسم بدفئ \ ليس تستحين من نجد ..هذي أختك حبيبتك..؟
حركت خصلات شعرها للوراء بأرتباك \قققققيودي أنا ماسحيييت...
مع أنخفاض قائد لمستواها...
دست رأسها الصغير بـصدره وهي تبتسم بـ أرتباك...
نجد بأبتسامه حزينه \عشانها مو متعوده علينا...
أبعد رأسها وبـهمس \ خربتي شعرك...خليني أصلح لك...
نجد بمشاركه \لآ...أنا يـا قايد بصلحه لها...وأصلحه أحسن من كذا...تعالي أموره..
أشارت برأسها برفض لـتدس جسدها الصغير ليلاصق قائد...
قائد بـ أبتسامه \ماعليه...أطلعي فوق جيبي لـي الاوراق الي على مكتـبي الي بجناحي..شوفيها بدوسيه أصفر...لآتتأخرين
عشان صدق ماتجي الفاجعه....
نجد \أثرك منت على حكيك...خايف من أمي...والله ياودها تربيك من جديد...
دفعها برقه \عجلي بس...
قاطعهم دخول الثريا المبتسم وتحمل صحن مملؤ بـ المكسرات...
وبيدها الاخرى كوب شأي تتطاير منه رائحة النعناع...
نجد \شوف أختك هذي أذا فكرت وتوترت تاكل ...تهقى تفكر بـ الي يدق عليك كل شوي وأنت تصرفه...!
أبتسم قائد بمكر \يمكن...عاد سبحان الله مثلها يحب المكسرات والشاهي...زي كذا بضبط...!
الثريا بتجاهل \ أعوذ بالله ...كل الناس تحب المكسرات مع الشاهي يعني مثلاً تنوكل المكسرات مع حليب..ودكم تعلقون بس؟
أنتبهت الثريا لـ الصغيره المختبئه خلف قائد ....لتضع الشاي والمكسرات على الطاوله
وبـفرح \يسلم عمرك يا قيود جبت أموري...تعالـي أسلم هلا هلا هلا....
خطت أميره الخطوات الخجله..لتحتضنها الثريا...وتقبلها...
من ثم أنسحبت بسرعه لتجلس
بقرب قائد الذي جلس على الكنبه وأستولى على مكسرات وشاي الثريا ..وجلست هي بقربه...
وتطلق أبتسامات مرتبكه من ثم تختبئ خلف الـخداديه التي أحتضنتها بقرب من قائد...
الثريا \يالبي يازينها ياليت خلودي هنا كان بياكلها....والله محلوه بسم الله عليها...العيد الي راح يوم شفناها بدس كانت
أنحف من كذا...
نجد تضع يدها على خصرها \والله أمي صدق مسببه لنا رعب...أجل يجيبها لي قايد ببيتي أذا بغينا نشوفها...المشكله
البنت متطيره منا ماتعودت علينا...ماغير تدسس وراك...ياروحي ..,
قايد يرتشف الشاي ويلقي نظره لها ...ويأكل من المكسرات بهدوء \ يا الله نجاوي روحي جيبي الاوراق...قبل يصير
مذبحه جماعيه لنا بعد شوي...
الثريا \تتنطز والله ترى امي بتذبحك لآ يكون ماقلت لك...
قايد \هذي أختي ...وين يعني أخفيها من الوجود عشان ترتاح أمي...مي ولآتبي تشوفها ممكن أتقبل هذا الشي لكن
أختي مصيرها تجي وتجلس هنا وهي عارفه هذا الشي وموافقه عليه...فـ وش يضر قدمنا الموضوع والا أخرناه...ماراح
يصير الا العوافي أن شاء الله...
ليردف بـ ضحك \شاهيك حار ي ثريا ...أحرق لساني...!
قفزت أميره لـتهمس له بأذنه...
ليقبلها بـعذوبه \ياناس ها البنت بتاكل عقلي..
ليردف قايد \تقول عطني الشاي أنفخ فيه عشان يبرد ومايحرقك...ويولموني بحب البنات خويلد وثويمر مايفكرون كذا...
الثريا \ والله ياقايد تحسسني أنها بنتك ماهي بـ أختك...لبى روحها عشانك تحبها حبتك...شوفها تستحي منا حتى
ماتحط عيونها بعيونا...ماغير تبسم وتصدد...ي رب ترحم الحال...
زفرت وهي تجلس بقربهم....
قائد \ نجد أخلصي جيبي الاوراق مابي أتاخر على المكتب ياالله يمديني أودي أميره لشقه وأطلع لمكتب...
نجد \ طيب بـطلع أجيبها...وأنت أذا دخلت عليك أمي سو نفسك ميت لا أوصيك...؟
غرق بضحك...و..عينيه تراقب خروجها..
يحمد الله على التدريج النفسـي بنفسية نجد....
باتت تضحك...وتلقي النكت...
باتت تخالطنا بكثره ولم تعد تعتزل...
هي قويه بما يكفـي لـ أن تقود سفينتها بنفـسها ولآ تغرق....
لكني فقط كنت خائف عليها لآ أكثر
وجه أنظاره لـ الثريا التي كانت جالـسه بقربه لـيهمس بـعد أن شد خصلات شعر قابعة على كتفها...\فكرتي زين با الموضوع
الي بنشب لك فيه لين توافقين...؟
الثريا بـهمس \أيه فكرت فيه...وأستخرت...
قائد \أذا ردك جاهز مثل اخر مره...فـ ..برجع أقولك فكري زين...!
الثريا \ لآ...مآعاد يحتاج تفكير..لأني لو أجلس بعد وأفكر...بغير راي...أنا موافقه على حاتم..
تحرك قائد لـيقابلها بفرح \ هذا الرد الي يبرد القلب....
قبل جبينها بفرح ...لتتراجع هي بخجل يصاحبه ألم...
قائد \ رجــال بـيسعدك يا ثريا...أن شاء الله....لآتشلين هم...
أبتسمت لتردف \فهد....جاء لنا اليوم...!
قائد بـستغراب وعصبيه \وش يبي...؟
الثريا وأناملها مرتبكه تعانق بـعضها بـ توتر \ يبي يرجعنـي....لكنـي رفضت...أمي كانت تبي تخليني أقابله...لكن ماقدرت...
خفت أنهزم ياقايد..و..اوافق ...وانا ماقدر ارجع له ماقدر اتقبله من جديد...ماقدر اعيش الوجع الف مره...ولآ..أقدر أشوف فهد
ولآ اتراجع عن تحصني بجراحي...أخاف أذا يعتذر يخوني الي بين ضلوعي ويقول مسموح...وأخاف من اشياء كثيره
مدري وش المكتوب فيها...!
.
.
.
نقف هنا...
.
.
.
همسة محبه\سبحان من تحدى بذُباب المشركين..وضرب العنكبوت مثلاً لضالين..وذكر خلقه لبعوض أزراء للكافرين..وحمَل
الهدهد رسالة التوحيد فجاء بخبريقين...سبحان ربي الاعلى ..سبحان ربي العظيم......سبحان الله وبحمده...
.
.
.
اللقاء أن شاء الله
يوم السبت القادم...
أستودعكم الله =)
.
.
|
10-11-12, 10:30 AM
جديد مواضيع قسم القصص المكتمله من وحي قلم الاعضاء
العرض العادي
