السلام عليكم ورحمة الله
يسعد صباحك ميشوو بكل حب وراحه...ياحي الله هالطله
منورتنا وربي ..لك وحشه كبيره يابنت جعلها اخر الغيبات..
ومعذوره يالغلاا مايجي منك قصور ...الله يسهلها عليك ويسر امورك

والبارت ولاا اروع ياقلبي ابدعتي ياقلبي..ياااااالله ياني مشتاقه لعيالك المجانين
هههههههههه اما سيف ضحكني مع ردة فعله..سبحان الله الواحد مع التوتر والانفعال تطلع منه
افعال وكلمات مايحسب حسابها...بس اهم شيء اعجبته..

اما اماني هالبنت مالها حل وجها مغسول بمرقه...ذكرتني بوحده كاتبها التوبك حقها الله يجيبك
يالنصيب من كثر ماهي متشفقه على العرس الله يرزقها ويرزق جميع المسلمين...

ياعمري ياوليد شكل معه حاله نفسيه اللي يحسب نفسه سمين ويجوع عمره الله يشفيه ويعافيه..

ميشوووو مابقى بنت ماحملتيها جات على ابرار خليها تنظم للحمله ..ذكر جات فتره كل بنات العيله حملو مع بعض
وصارت ولادتها بالدور

اعذرين على تعليقي البسيط مو من مقامك بس من فرحتي برجوعك يالغلاا
ومشتاقه لاخبالهم...

يسعد صباحك ميشو
تسلم الأيادي بارت حلو

بتال والعنود
للصبر حدود راح يجي يوم وتكونين بين يده وما راح يرحمك
غلط صح وانت بعد غلطتي ومادامك رجعتي يعني سامحي وعطيه فرصه ثانيه
هو يحبك وحبك تملك بعد وطبيعي يغار عليك

بدر
قدر يتعامل مع مشكلته بطريقه صحيحه

زياد
واضح انه الى الان ماقدر يحل مشكلته مع زوجته وهي بعد شكلها موب متقبلته

وليد
المرض اللي فيه نفسي يأكل قدام الكل ويروح يرجعه
يعاقب نفسه لانه اكل
يحتاج للطبيب نفسي لعلاجه ويحتاج اهتمام من أهله اكثر


ميشو



سلمتِ

"





بسم الله الرحمن الرحيم ..

السلام عليكم ورحمة الله وبركاته ..

الحمد لله والصلاة والسلام على رسول الله ..

توكلنا على الله .. لا اله الا الله محمد رسول الله ..






البارت 57 ..








من لبّس عيونه ظلام المدينه؟
وهو الفضول بنظرته مالها أبعاد
يغوص بأوراق السنين الحزينه
وميعاد يولد كل مامات ميعاد
بعثر على درب الاماني سنينه
تضحك عليه بلاد ويلوذ ببلاد
ليا ظمت ذكراه ..يمطر حنينه
وتغرق ملامحهم ولاينقص عناد
وين الامل..وين السعادة ووينه؟
يقوده الوقت الرمادي وينقاد
تلطخت في دم شعره يدينه
وصار الزمن شاهد وقاضي وجلاّد
قابل بشين العمر من دون زينه
وهو الذي في ماضي الوقت زهّاد
اعشوشب ظلال المدينه بعينه
علمه بشمسه (تسع) والباقي مهاد
يلمس على الخلوه بقايا سنينه
ويدلي على بير الهواجيس ورّاد
تنسل من ضلوعه أغاني دفينه
تقرا بعيونه..شايبٍ يندب أمجاد
يحق النظر يرفع بعزّه جبينه
ويشوف بكره مثقلاله بميلاد
ترجع لوجهه ..طلته ياسمينه
وترقص على صدره مشاهير وأجياد
يفتح عيونه ماتحدّه مدينه
يرسم من الاول لنظراته..أبعاد




" سليمان المانع " ..







واقف عند المغسلة قبال المراية وهو لبس الثوب بدون الشماغ و البشت ..
وبهمس مسموع وهو يبتسم / السلام عليكم .. تفضلي العشاء جاهز ..
" و بتكشيره " .. قرسون انت يـ الخبل .. " اخذ نفس " .. يالله حياتي العشاء ..
" و بجمود " .. كذاب .. اول ما اشوفها اتغزل فيها .. " رجع يبتسم " .. حيك الله تفضلي العشاء ..
" وبطفش " .. كانها ضيفه .. يا ربي ايش اسوي .. " التفت وكان بيطلع من المكان الي هو فيه " ..
حتى يتفاجأ وبوقفها و هي تطالع فيها وعلامة الاستغراب بوجهها .. ابتسم بفشلة / كنت .. ااا ..
حتى تبتسم وتكتم ضحكتها وهي تحط يدها على فمها بخجل ...
سيف ابتسم و هو يفرك جبينه بتوتر / العشاء وصل من شوي .. وكنت .... " سكت لثواني " .. المهم تعالي نتعشاء ..
هزت راسها و مشيت وراه .. تذكر كلام طلال بان بعض البنات تستحي تاكل قبال زوجها باول ليله ..
اكل كم لقمه بسرعة و وقف حتى يعطيها حريتها .. / الحمد الله .. انا بدخل الحمام اكرمك الله .. انتي خذي راحتك ..
تركها و توجه للحمام " اكرمكم الله " .. الجوري بعد ما اكتفت من العشاء جمعت الباقي و رتبت السفره ونظفتها ..
طلع سيف من الحمام " اكرمكم الله " .. وجلس على السرير .. و بهمس / العشاء و تعدا .. طيب و الي بعده ..








ــــــــــــــــ








بمكان اخر ..




قبل جبينها بدفاء وهو يحتضن وجهها بيدينه .. وبهمس / ليه عيونك دامعه ...
نزلت راسها و هي تبلع الغصه .. وبهمس متقطع / اشتـ .. كان .. " حتى تفلت منها شهقة " ..
رفعت يدينها وغطت وجهها .. لمها لصدره و هو يمسح على ظهرها بحنان / وحسبالك انا مشتاقة لها ..
بس الله يرحمها .. و يجعل مثواها الجنه .. " ابعدها عن حضنه شوي ورفع وجها له " ..
انا بكون لك الاب و الام و الاخ و الحبيب .. " وابتسم بحب ".. وانتي كوني لي الام و الحبيبة .." غمز لها " ..
حتى تبتسم وهي تنزل راسها .. رفع يدها و قبلها ../ هاليلة ليلة فرح .. مو ليلة حزن ..
رفعت راسها و بخجل / اسفه متعب .. ضـا....
حط يده على فمها .. / لا تقولين شي .. انسي كل شي .. " و بخبث " .. الا انا ..









ــــــــــــــــ








اول ساعات الصباح ..
من وسط تعمقه بنوم سمع صوتها تناديه .. انقلب على جنبه الايسر وهو منزعج ..
عقد حواجبه وهو يسمع صوت الانين و الشهقات .. فتح عيونه وهو يتعوذ من ابليس ..
تلفت على يمناه ماشافها بجنبه .. رفع نفسه و اتكى على يده سحب الجوال حتى يشوف الساعة ..
شافها الساعة 8:15 ص .. سمع صوت شهقه .. واحد ينادي .. بعدم تصديق / غرام ..
فز من السرير وراح لجهة الحمام " تكرمون ".. ضرب الباب وبخوف / غرام ..
غرام وهي لفه يدها على بطنها .. وتبكي و تشهق / عناد ..
عناد بخوف وهو عاقد حواجبه / ايش فيك .. تقدرين تفتحين الباب ..
غرام حولت توقف بس ماقدرت .. حاولت واول ماوقفت جاتها دوخه .. خلت بتوازنها و طاحت على ارضية الحمام ..
بس مافقدت الوعي .. وبتمتمه / سند .. سند .. " غمضت عيونها بلحظة كسر الباب ودخول عناد " ..
شاف الدم على ارضية الحمام و ملابس غرام ملطخه بالدم .. وبرعبه .. جلس جنب غرام ورفع راسه ..
حتى يمسح وجهها بالموية و يفوقها .. و بخوف / ايش صار ..
غرام وهي تبكي .. مدري .. بس بطني يتقطع ..
" حملها بين يدينه و هو يجلسها على الكرسي القريب من باب الحمام " ../ خليني نغير ملابسك ونروح المستشفى ..








ـــــــــــــــــ








سمع صوتها تناديه .. بس جسمه مكسر .. وكل مكان بجسمه يوجعه .. فتح عيونه وهو عاقد حواجبه ..
شاف نفسه بالصالة ثواني وتذكر الي صار .. طالع بجهتها وعيونه تطير منها الشرار ..
شافها واقفه قبال طاولة الطعام .. لبسه بيجامه قصيره و رافعه شعرها بطريقة عشوائية ..
التفتت له و ابتسمت / صباح الخير .. قوم افطر وتحمم .. حتى تلحق على خطبة صلاة الجمعة ..
سلطان وهو ياكل من الخبز الي بيده بطريقة طفولية / لوح بابا ..
العنود ابتسمت له / السبك ثوب .. و تروح مع بابا .. تقعد عاقل ..
سلطان هز راسه وهو مازال ياكل بالخبز .. و الظبي تطالعه و تطالع امها .. حتى تنطق بغيره / انا ..
العنود ابتسمت لها / تروحين معايه .. " طالعت ببتال و شافته منسحد بمكان وحاط يده على عيونه " ..
تقدمت منه و هي تعض على شفتها .. قبلت جبينه وهمست / عسى ارتحت بنومه ..
نزل يده و طالعها بعصبية .. شافها مبتسمه .. / نامي مكان وتعرفين ..
العنود بخبث و غنج / ويطاوعك قلبك ..
طالعها لفتره بنظرات قاتله .. و ابعد الفرشة عنه ووقف .. ابتعدت عنه شوي ..
مشي من جنبها وتوجه للمغسلة غسل وجهه و يدينه و رجع جلس على الطاولة يفطر ..
العنود بعد ما افطروا اولدها ارسلتهم مثل العاده لساره و نايف الي عندها علم مسبق بانهم صاحين ..
طول ماهو يفطر ساكت .. تركته العنود يكمل فطوره ودخلت الغرفة .. كانت تطلع ملابسها و ملابس بتال ..
فاجاها وهو يحضنها من الخلف .. وبهمس / ضنك راح اترك حقي لمتى ..
العنود ابتسمت بدلع .. بس ثواني حتى تصرخ من الوجع و الخوف .. حطت يدها على كتفها مكان عضت بتال ..
العنود بقهر / اوجعتني ..
بتال باستمتاع / احسسسسسن ..
العنود تحاول تبعد عنه بس هو شاد على خصرها / وين وين ..
العنود بعصبية وهي تنفضه / وخر عني ..
بتال بهمس / ما اقدر .. مشتاااق لك مشتاااااق ..
العنود بتهرب / راح تتاخر عن خطبة الصلاة ..
بتال بضحكه وهو يقبل كتفها وعنقها من الخلف / عندنا ساعة الين يحين وقت الصلاة ..








ـــــــــــــــــــ







بعد صلاة الجمعة ..




خرج من الجامع وهو يسال الشباب / عناد شفتوه ..
الكل / لا ..
فارس / يمكن راحت عليه نومه ..
سند هز راسه باستغراب / مو من عاده عناد .. عسى خير .. " رفع جواله حتى ينطق ياسر " ..
ياسر وهو ياشر على جهة / هذي مو سيارة عناد ..
رفع راسه سند و شاف عناد يوقف قبال بيتهم .. توجه لهم سند . وشاف عناد يساعد غرام على النزول ..
بخوف وهو يسرع بالمشي .. / سلام .. عسى ماشر ..
عناد رفع راسه وكان وجهه اسود / خير ان شاء الله ..
غرام من سمعت صوت سند حتى تطلع منها شهقة ..
سند قرب اكثر منها وطالع بعناد حتى ياشر له عناد بانها اجهضت ..
سند حضن اخته و حملها بين يدينه وهو يهديها .. / هذا امر الله وانا اخوك .. عسى ربي يعوضك ..
دخل البيت وفارس و ياسر يتكلمون مع عناد الي قال لهم ان غرام كان حامل و طاح ..
ام سند كانت خارجة من المطبخ معاها ترمس القهوه و الفناجين .. من شافت سند داخل وبين يدينه غرام ..
بخوف / بسم الله .. ايش فيكم ..
دخل عناد و فارس و ياسر و القوا السلام .. سند توجه لغرفة غرام تارك المهم لعناد ..
ام سند وهي بتلحق سند ../ انت ماتقول ايش بها اختك ..
عناد بارهاق / كيف حالك ياخاله ..
ابو سند الي طلع من غرفته وهو يستغفر .. ابتسم من شاف عناد / يامرحبا ..
ام سند بخوف / ايش فيها غرام ..
عناد بهدوء / مقدر ومكتوب ان حملها مايتم .. و اليوم الصبح طرحته ..
ام سند حطت يدها على صدرها / حامل .. وليه ماقالت ..
عناد بضيق / ولا احنا فرحنا بها الخبر يا خاله ..
ابو سند بضيق / لا حول و لاقوة الا بالله .. روحي شوفي البنت ياحرمة ..
ام سند غصت بعبرتها / ابي البس عباتي وتودونا المستشفى ..
عناد / تونا جايين منه .. اعطوها ادوية و ملحول ومضاد .. و الحمدالله ما احتاجت تنظيف ..
ام سند تركتهم وتوجهت لغرفة غرام حتى تشوفها وتطمن عليها ..






:
:
:





بغرفة غرام ..


سند جالس قريب من السرير ويقرا عليها .. وهي تحاول تكتم شهقاتها ..
سند بهدوء / غرومتي .. اذكري الله و اهدي .. ولساتك صغيره و العمر قدامك ياروحي ..
انتي عارفه الي صارك .. ومازال اثاره موجود .. وكنا متوقعين هالشي .. فقولي الحمدالله انها جات على قد كذا ..
غرام وهي مغمضه عيونها وشاده الفرشة على اكتافها .. بصوت مبحوح / الحمدالله ..
سند وهو يوقف يقبل راسها / الحين نامي شوي .. وارتاحي ..
تركها وتوجه لتسريحة سحب احد الادراج وطلع مسجله .. شغلها حتى يصدح بالغرفة صوت الذكر ..
ام سند فتحت الباب و دخلت .. تقدمت من سرير بنتها و حطت يدها على جبين بنتها ..
... و بغصة / ياروحي .. سلامتك يا امي .. " وبدات تمسح على شعرها بحنان و تقرا عليها " ..
كان واقف قريب من امه وغرام .. لمن شاف انتظام انفاس غرام .. مسك يد امه واشر لها يطلعون ...
عند الباب .. سند / عناد يقول ماتحتاج مستشفى .. ايش رايك نوديها ..؟
ام سند بعجله وهي تمشي / لالا .. الحين روح للعطار و جيب الاغراض اللي اقولك عليها ..
مدام الجنين نزل و الرحم مابه شي .. ان شاء الله انها طيبه ..
شاف دخول خالته ام عناد وهي بعبايتها ووجهها مرعوب / السلام عليكم ..
ام سند .. و سند ../ وعليكم السلام ..
ام عناد / كيف حال غرام طيبه ..
ام سند هزت راسه / ان شاء الله طيبه .. الحين نامت ..
ام عناد بضيق / الحمدالله على سلامتها .. والله يعوضهم ..
وصل لهم عناد وهو تعبان و مرهق / نامت ..
ام سند هزت راسه / ايه نامت ..
عناد يمد يده / هذي الادوية الي وصفتها الدكتورة .. " تنهد " .. بعد العصر برجعها المستشفى .. نعيد فحصها .. والا ..
ام عناد وام سند بوقت واحد / لا ..
ام عناد / مدام تقول ان الججنين نزل و قالو الرحم مافيه شي و نظيف خلاص .. الباقي حنا نتصرف به ..
سند بهدوء / اذا احتاج الامر لقدر الله رجعناها المستشفى ..







ــــــــــــــ







قبل العصر ..





بتال يدخل البيت .. توجه للمطبخ شاف العنود قريبه من الفرن .. ابتسم / الحلو ايش يسوي ..
العنود وهي تسحب الصينية من الفرن / كيك .. بعد شوي مسوين جمعه بالاستراحة ..
بتال عقد حواجبة / وليه ..؟
العنود طالعته / البنات بيتعرفون على منار اكثر ..
بتال كشر / من زينها حتى يتعرفون عليها ..
العنود وهي تحط يدينها على خصرها / لا والله .. وايش فيها اختي .. تراك كانك تعيب فيني انا ..
بتال تقدم منها وهو يحضنها / هي السبب في مشاكنا ..
العنود هزت راسها وبسخرية / اهااا .. قصدك تفكيرك البطال هو السبب ..
بتال وهو يداعب انفها بانفه / طيب .. مابتعطيني من الكيكه الي مسويتها ..
العنود ببرود / طيب وخر عني ..
بتال ابتعد شوي وهو عارف انه زعلها .. تركها وتوجه لصالة .. رفع صوته / لا تنسين القهوة ..







ـــــــــــــــ







بعد العصر ..






منار عاقده حواجبها / كان المجموعة ناقصه ..
ساره باستغراب / ايوه صح ..
العنود بتساؤل / وين مرام و غرام و ابرار و شجون ورنيم ..
نوال وهي تاكل ايس كريم / ما ادري .. ماشفت مرام على الغداء اليوم .. اتوقع راحت تغدا عند اهلها ..
دخلت اماني وبيدها ترمس شاهي / سمعتوا اخر خبر ..
الكل التفت لها بفضول / لا ..
العنود / خير ..
اماني وهي تجلس / غرام سقطت ..
منار كشرت .. نوال حطت يدها على بطنها بخوف .. العنود بحزن / لا حول ولا قوة الا بالله .. متى صار ..
اماني / تو وانا جايه شفت جدتي رايحه لبيت عمتي سالتها وين ياحلو .. وقالت لي السالفه ..
وشوفوا حالات الواتس .. كله سلامات غرومه .. ربي يعوضكم ..
العنود / والله بنسبه لي من الصبح ماددخلت الواتس و لا شفت شي ..
نوال / ولا انا ..
اماني بضحكه / انتي اصحي اول شي واعرفي اخبارك و بعدين شوفي اخبار الناس ..
منار وساره و العنود يضحكون .. نوال بنص عين / مره ضحكتيني ..
دخلت ريهام و ريما و روان و رنا .. و بعدها جات رنيم و ابرار وشجون و مرام .. و هيفاء ..








ــــــــــــــ







بعد اسبوع ..




العنود بهمس لمشيرة / كيف اوضاعك ..
مشيرة بهمس / الحمدالله .. رحت اليوم العيادة وسويت فحص الحمدالله كل شي طيب ..
العنود / وعمي سلطان .. كيف ..؟
مشيرة ابتسمت / فرح و جاب لي هالعقد هديه .. بس طلب مني ما ابلغ احد بحملي ..
العنود باستغراب / ليه ..؟!!
مشيرة / هالايام اهتمامه بوليد .. مايغى حالته تنتكس .. وهو متحسن الحمدالله ..
العنود هزت راسها / قالي بتال عن مشكلته .. وخالتي الجوهرة .. ايش وضعها ..
مشيرة / لا الجوهرة كل اهتماماتها ركزتها على سامر و وليد .. لكن الحين طالعه بموال جديد ..
العنود بنبرة / ما تبيك معاها بنفس البيت ..
مشيرة باعتراف / تبين الصدق .. وانا بعد ودي اني ببيت لوحدي .. مو لزم كبير .. يكفيني شقة ..
اقعد فيها انا و ولدي منصور .. لا نضايق احد و لا نزعج احد ..
العنود عقدت حواجبا / من مضايقك في البيت ..
مشيرة / الكل .. او بالاصح .. سمر و سعود عندهم الوضع عادي مو مهتمين فيني .. بتال قريب مني ومحترم معاي ..
بس وليد و سامر ابدا مو متقبليني .. صحيح ما قالوها صريحه .. بس تصرفاتهم , نظراتهم لي , تكفي اني اعرف ..
العنود بهدوء/ جدتي و جدي يشتكون من الوحدة .. ايش رايك تنتقلين عندهم ..
مشيرة بتفكير / راح اشوف سلطان .. و يصير خير ..








ـــــــــــــــــ









بجناح زياد ..





كان جالس بصالة وقباله صحن فواكهه ..
طلعت ريهام من الغرفة وهي لبس بيجامة طويلة و باكمام طويلة .. جلست جنبة / كان الليلة برد ..
زياد هز راسه وهو يقشر البرتقال / ايه خلاص اقبل فصل الشتاء .. " التفت لها و بابتسامة " .. تحبين الشتاء ..
ريهام هزت راسة / ايه كثير ..
زياد وهو يعطية النصف من البرتقال / هالايام اجواء مكه مافي ازين منها .. ايش رايك نطلع مكه ناخذ لنا عمرة ..
ريهام بفرحة / ياليت .. بس شغلك ..
زياد وهو يريح ظهرة على الكنب / مافي شغل كثير وفية من ينوب عني ..
" رفع يد ومسح شفتها الي كان فيه اثر من البرتقال " ..
" ريهام احمر وجهها خجل و متفاجأه من الحركة .." ..
زياد طالع التلفزيون / خلاص جهزي اغراضك .. بكرة العصر رحلتنا لمكه ..
ريهام فتح عيونها / يعني حاجز و خالص ..
زياد ابتسم / كنت بسويها مفاجأة بس قلت يمكن انتي مو جازة او عندك عذرا او شغل .. اذا مو عاجبك ناجلها ..
ريهام هزت راسها / لا .. خلاص بكره نمشي .. ما عندي شي ..
زياد قرب منها وباس خدها بعمق .. وبامتنان / شكرا ..
ريهام كل مرة يفاجئاها زياد بحركه .. ابتسمت / العفو .. مافي شي تشكرني عليه ..
زياد بمصارحة / كل هالصبر و المساعدة و لا سويتي شي , الا سويتي و سويتي , و تستحقين الشكر عليه طول العمر ..
ريهام ابتسمت و بخجل / انت زوجي يعني هذا واجبي ..
زياد بصدق / ربي لا يحرمني منك ..









ـــــــــــــــــ







يوم جديد ..




دخل نايف البيت .. شاف العنود و ساره جالسين بالصالة .. نايف بتعب وهو يرمي جسمة على الكنب / سلام ..
العنود و ساره / وعليكم السلام ..
نايف طالع بساعته و رجع طالع بساره / ما رحتي المدرسة اليوم ..
ساره تنهدت / لا تعبانه شوي و راسي مصدع ..
العنود / وانت من فين جاي ..
نايف وهو يسحب شماغه و عقاله / من بيت جدي .. يقول الملكة نهاية الاسبوع ..
العنود عقدت حواجبها / مو بدري .. يبغى لها تجهيز ..
نايف وهو يمد يده لكاس الماء الي جهزت له ساره / ما يحتاج .. لانها عائلية بحته .. عصر نعقد ..
ونمشي المزرعة بعدها .. ويمكن مو الجميع يحضرون .. بس عمي و جدي و الشهود ..
العنود رفعت حواجبها / وليه هالعجله كلها ..
نايف وهو يسحب شماغه و يوقف / و ليه تكاليف و مماطله , ابي اخلص , يالله بروح انام شوي لاذن الظهر صحوني ..
العنود و ساره يطالعونه و هو يدخل لجناحه .. ساره طالعت بالعنود / عاجبك ..
العنود ببساطة / اذا مرتاح .. الله يوفقه و يسهلها عليه .. و عقبالك ..
ساره طالعت بالعنود / ما ابغى ..
العنود بهدوء / طيب و الاسباب ..
ساره سكتت .. العنود بهدوء / حبيبتي ساره .. صقر طيب و حباب .. واخلاقه زينه .. و يصلي و يعبد ربه ..
ايش اللي يعيبه .. بيت و عنده .. و شغل و يشتغل .. غير الاملاك اللي عنده .. يعني الحمد الله ماينقصة شي ..
ساره بخجل / طيب لساتني صغيره ..
العنود ابتسمت / كبر اماني و البندري .. و داخله الـ 17 .. يعني ما انتي صغيرة ..
ساره نزلت راسها / ............
العنود بهدوء / صلي الاستخارة .. وفكري زين .. و بعدين عالي قولي لي رايك .. تمام ..
ساره هزت راسها / طيب ..








ــــــــــــــــــ






بشقة سند ..




رنيم كانت ترتب ملابس فهد سمعت صوت الباب التفتت لباب باستغراب ..
حتى تشوف سند داخل .. بخوف / خير .. فيه شي ..
سند ابتسم / لا .. بس اشتقت لك و جيت ..
رنيم بغنج / اممممم .. صدقتك ..
سند وهو يحضنها و بهمس / للحين عندك شك بحبي لك ..
رنيم وهي لفه يدينها على سند / لا .. بس ما جابك لي الشوق ..
سند ابتعد عنها شوي بضحكة / والله مشتاق لك .. بس جيت اتطمن على غرام .. و اخذك مشوار ..
رنيم بابتسامه / امم قلت .. طيب و ين المشوار ..
سند وهو يقبل خدها / الاجواء حلوه هاليومين .. والبحر روعة .. ايش رايك ناخذ لنا يومين هناك ..
رنيم بدون تفكير / موافقه .. انا طفشانه و ودي اغير جو ..
سند رفع حواجبه / افا .. بخاطرك شي ولا يصير .. انتي تامرين على الروح . يالله جهزي حتى نتغدا سمك اليوم ..
رنيم بحب / ماشي .. تامر ..








ـــــــــــــــــــ







الساعة 12:00 ليلا




بمكه ..






طلع من الحمام وهو لف الروب عليه .. والفوطة على راسه ينشف شعره ..
فتح الشنطة وطلع ملابسه و لبسه وتجهز وخلص .. وهي مازالت تحت الفرشة ..
سمعت صوته .. زياد بفرحه / بنزل الحرم .. اذا بغت شي .. اتصلي عليه ..
ماسمع منها رد .. عذر حرجها وخجلها .. تركها و نزل .. رفعت الفرشه و وجهها احمر ..
لملمت ملابسها المرميه على السرير .. و لفت الروب على جسمها و توجهت لحمام ..
واقف قبال الكعبة .. حاس بشي غريب و نشوه غريبه .. فرحان .. قدر .. و كسر الخوف و العقد ..
رفع يدينه لله و بدا يدعي و يشكر الله .. كبر و صلى .. شكراً وحمداً ..
قبل صلاة الفجر بنص ساعة طلع لريهام حتى تنزل هو و هي ويصلون الفجر بالمسجد ..
بعد الصلاة .. طلبوا لهم فطور .. طول ماهم جالسين على الطاولة ما قالت كلمه ..
كانت فارده شعرها ونازل على وجهها .. زياد يتكلكم بكذا موضوع .. وهي ماردت عليه ..
زياد بضيق / ريهام .. ؟ .. انتي متضايقه من الي صار !!..
ريهام رفعت راسها .. و باستغراب / لا ..
زياد ابتسم / طيب ليه من صار .. ما سمعت صوتك ..
ريهام احمر وجهها ونزلت راسها .. و بهمس / ايش اقول ..
زياد ابتسم .. وكمل فطوره .. / تبين نزل جدة اليوم ..
ريهام رفعت شعرها عن وجهها .. و بهدوء / ليه متى راجعين لشرقية ..
زياد / الطيارة الساعة 10 اليله .. يدوب نرتاح بكرة .. و بعد ملكة نايف بعدها روحة المزرعة ..
" و بمزح " .. والا ماتبين جمعة المزرعة ..
ريهام بضيق / لا والله مشتاقه للمزرعة .. من زمان مارحنا لها ..
زياد بمحبه / اجل نصلي الظهر و نزل جده .. نتغدا هناك .. ان شاء الله ..
ريهام بابتسامه / ان شاء الله ..







ـــــــــــــــــــــ








بعد المغرب ..




جالسين بـ البلكونة قبال البحر .. صوت الامواج و ريحة البحر و نسمة الهواء .. ريحت الاعصاب و روقة المزاج ..
سند و هو جالس على المرجوحة و فهد بحضنه لفه بفرشته .. و رنيم حاطة الشال على كتوفها ..
طالعت بسند / مو بردان ..
سند ابتسم / لا حبي .. " وهو يحط كتفه على كتفها " .. قربك مدفيني ..
رنيم ابتسمت و طالعت بفهد / نام ..
سند و هو يوقف المرجوحة .. وبهمس / بدخله جوه و ارجع لك ..
رنيم وقفت و ببطنها المنتفخ .. طالع بسلة الي قريبه من مشب الفحم .. حست بيدين تلتف عليها ..
سند وهو يمسح على بطن رنيم / ايش بتسوين ..
رنيم ابتسمت / خاطري بشاهي بالحليب ..
سند ابتسم / بس .. من عيوني .. احلى شاهي بحليب لام فهد ..
رنيم وهي ترجع تجلس على المرجوحة / كلمت غرام ..
سند وهو يحرك الفحم و يحط ابريق الشاهي عليه ../ ايوه .. " وبضيق " .. رجعت بيتها ..
رنيم بهدوء / طيب حبيبي عادي .. الحمدالله غرام بخير .. و لها اسبوعين الحين ..
سند بتكشيرة / ولو .. احس لساتها تعبانه .. لازم ترتاح ..
رنيم / عناد عندها .. ماراح يقصر بشي ..
سند هز راسه / صدقتي .. " تنهد " .. هو مو مقصر عليها بشي .. بس غرام لساتها صغيرة و ضعيفة ..
مرات اقول ليتني ما زوجتها .. ومرات اقول ياولد لتوسوس البنت طيبه ..
رنيم ابتسمت / لا مو صغيره ما شاء الله .. وهي طيبه لا تشيل هم .. لو فيها شي كان قالت لك ..
سند تنهد / يارب تكون بخير ..







ــــــــــــــــــــــــ








الساعة 10:00 ليل ..



واقفه قبال المرايه و تعدل بشعرها .. و تعدل مكياجه .. رتبت فستانها الابيض مع الاسود بقصات تزيد جسمها جمال ..
رتبت الطاولة و شافت اذا ناقص شي .. رتبت الشموع سمعت صوت فتحت الباب ..
ضمت يدينها بتوتر ورفعتهم لفمها .. دخل وهو مستغرب من الوضع .. التفت وهو متفاجأ ..
اخذ ثواني وهو يطالعها بصدمه .. ابتسم و ضحك بصوت عالي .. / والله لو اشوف هالوضع باحلامي ما اصدق ..
فتحت عيونها بصدمه .. حتى تحط يدينها على خصرها بعصبية .. تدارك الي قاله وهو يتقدم منها و يحضنها ..
بتال بفرحة / فديت الحب انا ..
العنود بزعل تدفه / بعد .. مسويه لك مفاجأة و تعبانه فيها و اخر شي تقول كذا ..
بتال وهو يبتعد عنها و يرمي شماغه على الكنبة .. ابتسم لها وهو يقرب منها وبهمس / متفاجأ .. ما توقعت ابد ..
العنود طالعته بنظرات مقهورة .. بتال باس جبينها و ارنبة انفها وبهمس / احبك و احب جنونك , وعقلك و كل ما فيك ..
العنود طالعته و كانها رضخت له .. بتال بهدوء / عنودي .. بقولك شي .. من اول مارجعتك وانا ودي اقوله لك ..
العنود عقدت حواجبه / خير ..
بتال وهو لف يدينه على خص العنود / تذكرين اول مره .. لمن صار كان .....
العنود حطت اصباعها على فم بتال / اصصص .. اذا شي راح يرجع يفتح الجرح لا تقوله .. خل الي راح راح ..
نزلت يدها .. بتال وهو يضمها لصدره .. / اعذريني يا الغلى ..







ـــــــــــــــــــــــــ







بيوم عقد قران .. " نايف و اماني " ..






دخل طلال و سيف الي وصل من السفر فجر اليوم .. و هم يضحكون ..
طلال شاف اماني واقفه قبال باب المدخل تعدل نقابها .. و بضحكة / اوووه العروس مستعجله ..
اماني طالعتهم / ايه .. بلحق على البنات ..
سيف بضيق / مدري كيف بتتزوج ذي ..
اماني بجرائه / مثل ماتزوجت انت ..
طلال انفجر ضحك .. وسيف فتح عيونه على الاخير / شوف البنت .. مابوجهها حياء ..
اماني وهي تميل فمه على جنب وتحط يدينها على خصرها / ايش يدريني عنكم .. بدال ما تباركون لي جايين تعلقون ..
طلال بضحكه / ههه مبروك يا الخبله ..
اماني وهي تكشر / يعني الحين مره عدلت الوضع ..
سيف بقهر / احسن .. اصلا انتي ماتستاهلين شي ..
اماني بجرائة وهي تشوف ابوها داخل من وراء اخوانها / يعني انا الي مرة ميته و منتظره منكم شي ..
" وبغنج ودلع " .. يخلي لي نيوفي بكره مايقصر عليه بشي .. " وبثقة " .. ليه من بكره من الحين ..
سيف حط يدينه على راسه و هو فاتح عيونه .. و طلال عاقد حواجبه ..
ابو طلال انفجر ضحك / هههههههههههههههههههههههه .. تستاهل امون من يدلعه ..
" تقدم منها وحضنها وهو يقبل راسها " .. مبروك يا صغيره .. مبروك يا دلوعتي ..
سيف بقهر وهو يتمتم لطلال / ما خربها الا دلع ابوك ..
طلال ابتسم / متى تبطل غيره خلاص جاتك الجوري راح تدلعك ..
سيف يضرب جبينه و بصراخ وهو يتذكر / اوووه الجوري خليتها بالسيارة و نسيتها .. " وطلع يجري خارج " ..
اماني وهي ترمي الشيله على النقاب / يالله مشينا ..
ابو طلال وهو يتلفت بالصالة / وين امك .. و ام طلال ..
اماني / ماما تغير لهيام .. و امي بالمطبخ ..
طلال يترجم / ماما الي هي امك .. امي الي هي امي انا ..
اماني تطالع في ابوها / ما شاء الله على عيالك .. اذكياء ..
ابو طلال بضحكة وهو يقرص انفها / طالعين لاختهم .. هههههههه ..









ـــــــــــــــ









بالمزرعة ..







البنات مسوين حفله .. واماني ترقص بوسطهم و تضحك وتغطرف ..
ام سطام وهي تاشر بيدينها / جيل ما يستحي .. يا دافع البلاء ..
ام عبدالعزيز تضحك / خلهم يستانسون .. و هالجيل مو مثل جيلنا يا ام سطام ..
ام عناد وهي تاكل من الكيكة .. وبضحكه / يرحم زماني .. تذكرين يوم حجبوني ..
طرد وراي عبدالعزيز و مسكني من شعري و جابني لامي .. وانا متحسره و منقهره ابي العب مع البنات ..
ام سند تضحك / والله ياني فرحانه هذاك اليوم .. انا ملبسيني البرقع ومقعديني بالمطبخ وهذي بتروح تلعب ..
ام عناد وهي تبتسم / وتربط لي خالتي ام عزام الثمه .. عاد ما بي ازين من ام مزنه تزين الثام ..
وقالت لي لالا تفتحين .. و يجونك الحريم .. و ينثرون الحلو على راسي و الهيل و البن ..
وانا كبدي بطق على الحلاوه .. ودي اكلها .. مير خوفي من خالتي و امي لا افك الثمه ..
وانا امسك الثمه من خشمي وادخل الحلاوه من عندها وتطيح بوسط الثمه .. و ياويلك يالهنوف .. رحت اتنافض ..
جاتني الحمى من اروعه .. لان امي قالت لي ان فكيتيها مالك الا سلطان والله لرميك له ليسلخ جلدك ..
عاد سلطان يالطيف يا يده حاره .. وايش تسوين يا الهنوف و ايش تسوين .. وامد لساني واقعد الحس به ..
احوس بها الي تعبت و انهد حيلي .. و ما دريت الا اليوم الثاني العنود ترفسني قومي نظفي ..
من الرعبه رقدت و محطت عن العرب .. متى تعشو و متى مشيوا ..
ام سطام بحنين / يا زينها من ايام و يازينه من حياء . .لكن ذا الزمان يا بنتي ينخاف منه ..
ام عبدالعزيز / يا ام سطام .. لكل زمان زينه و شينه .. الله يهديك بس .. الواحد يقول يارب الذرية الصالحة ..
الكل / اي والله ..









ـــــــــــــــــــــ








عند البنات ..






العنود بابتسامة / رنيم صايرة سمراء .. من البحر ..
رنيم تتنهد / والله يا ان الجو و البحر بذا الايام ما ينمل منه .. رومنسية ..
اماني داخله عرض / يعني تنصحيني اقضي سهره مع نيوفي هناك ..
نوال تطالعها / اقول ابلعي لسانك .. والله لو تسمعك جدتي لتكسر العصى على ظهرك ..
ترا جدتي ماتعرف بذا الامور مزح .. بكرة تقول زوجوها .. بلا عرس بلا شي ..
اماني بخوف / ويه .. يمه .. لا .. بسكت .. خلاص ..
مشيره ابتسمت و بهمس لـ العنود / الله يعين نايف عليها ..
العنود بهمس وهي تبتسم / لا بالعكس .. لا تغرك بجنانها و شطانتها ..
و نايف يبيلها وحده مجنونه .. ترجع له حلاوة الحياة .. الا اخبار مجود ..
مشيرة بابتسامه / منقع ببيت عمي عبد المحسن .. كل يوم والثاني تلقينه عندهم يا يفطر يا يتغداء يا يتعشاء ..
العنود بابتسامة / الله يوفقه و يسعده ..
مشيرة / امين ..









ـــــــــــــــــــ







هيفاء بهمس لـ الجوهرة / مدري احس نظراتها لي .. كانها تلومني ..
الجوهرة عقدت حواجبها / بلا خبال .. حنا ايش دخلنا .. شي بينها وبين غيث و لا رضيوا يقولونا عنه ..
خلاص ما لنا دخل فيهم .. و انت شيلي عيونك عنها و لا توسوسين و تخربطين ..



:
:
:



مرام جالسه جنب ريما و بهمس / كيفك ..؟
ريما تهز كتوفها / طيبه .. عادي .. " ابتسمت " .. عايشه حياتي ..
مرام بتاكيد / اذا بخاطرك كلام قوليه .. اسمعك ..
ريما بهدوء / لا بخاطري كلام ولا شي .. هذا نصيبي .. ماراح اقعد ابكي و اندب حضي زي مايقولون ..
انا واثقة من نفسي .. ما غلطت و لا قصرت بشي .. وانا توني صغيرة .. بعيش حياتي ..
ما اقول مازعلت و انقهرت بس بقعد طول عمري بالوضعية الحزينة .. واقهر امي و اشمت عذالي ..
لا .. راح اعيش حياتي طول بعرض .. ومراح اقصر بشي يبسطني .. واذا الله كتب لي نصيب راح اخذه ..
مرام سكتت لثواني وهي تشتت نظراتها بالارض .. وبعدها رفعت راسها وطالعت بريما ..
... ابتسمت / قصة الشعر حلوة عليك .. حتى الصبغة .. كثير غيرتك ..
ريما ابتسمت / يخلي لي العنود .. ماقصرت جابت الكوفيره لعندي .. وقصينا شعرنا انا وهي و انا صبغت ..
مرام باعجاب / وبعد قصة شعر العنود حلوة عليها ..
ريما بضحكة / الحلو حلو لو يصحى من النوم ..
حتى تضحك مرام مجاراة لها ..








ــــــــــــــــــ






يوم جديد ..






سارة و روان واماني يمشون بين الشجر ..



ساره لفه الشال على كتوفها .. ومعاها الكاميرا و تصور اثر المطر على الشجر و الزرع ..
اماني وهي تفرك يدينها ببعض / يووووم هو برد و الا انا بردانه ..
روان بصدق / لا الجو حلو .. بس لو شربتي كوب حليب بالزنجبيل الي قالت لك امك شربيه ما حسيتي بالبرد ..
اماني و هي تنفخ بيدينها تدفيهم / لو نيوفي قريب كان دفاني حبيبـ آآآآآآآآآآآآآآآآآآآآ ..
روان فتحت عيونه بخرعة .. و ساره نقزت بخوف حتى تحط يدها على فمها وهي تشوف اماني بـ....







انتهى ..



لا اله الا الله .. محمد رسول الله ..

سبحان الله .. و الحمد الله .. و الله اكبر ..


اعذروني على القصور والاخطاء الاملائية ..


اختكم
مشاعل السعودية ..


كونوا بخير ..

يعطيج العافيه مشاعل كل بارت احلى من الثانى الله لا يحرمنا طلتج