كاتب الموضوع :
مشاعل السعودية
المنتدى :
القصص المكتمله من وحي قلم الاعضاء
رد: رواية بردان يا حضن الدفا .. عطشان واظماني الجفا / بقلمي
بسم الله الرحمن الرحيم ..
السلام عليكم ورحمة الله وبركاته ..
الحمد لله والصلاة والسلام على رسول الله ..
توكلنا على الله .. لا اله الا الله محمد رسول الله ..
البارت 53 ..
تخوفني مشاوير الطريق المظلم المهجور
وانا لا من ذكرتك قلت طولي يامشاويري
عزاي انك رجاي العذب لو كل الدروب عثور
وصلت اوما وصلت اعرفك ما انته منتظر غيري
حبيبي ..وكّل الله لاتحسبني بليد شعور
لو انت المستحيل الصعب ماابدي لك معاذيري
احبك .. لو يموت الحب وتصير القلوب قبور
اشوف الجرح يكبر وانت تكبر وسط تفكيري
احبك من هنا حتى طلوع الفجر حتى النور
صحيح انك قدر محتوم بس اجمل مقاديري
احد ربي يحطك له حبيب ومايجيه غرور ؟
انا ليه التفت للناس وعيونك جماهيري
هلا بك من قِدْمَك ... لغرتك لي شعرك المنثور
هلا في كل شيٍ فيك وانت اغلي مساييري
ترى صدق الغلا يجبر حطام الخاطر المكسور
وانا مهما منحتك من غلاي اشعر بتقصيري
ولو طالت مشاوير الطريق المظلم المهجور
انا لا من ذكرتك قلت طولي يامشاويري
" مساعد الرشيد " ..
الساعة 10 ليلا ..
سمعت صوت طقات خفيفه على الباب .. حتى تنطق بصوت مرهق / ادخل ..
دخلت ساره وهي مبتسمه .. وبهمس وهي تطالع سلطان والظبي / ناموا ..
العنود هزت راسها / ايه .. " ابتسمت لها بحنان " .. تعالي " و اشرت لها بجنبها على السرير " ..
العنود كانت جالسه بنص السرير و لمه رجولها لصدرها و تلعب بشعرها لمن دخلت ساره .. كان واضح انها تفكر ..
ساره جلست جنبها .. وبهدوء هامس / في ايش تفكرين ..
العنود سحبت ساره حتى تنام ساره بحضن العنود .. و بدات العنود تمسح على شعر ساره ..
العنود تنهدت وهي تطالع بالجدار قدامها / بكلام امي موضي ..!!
ساره بتردد / اممم ..
العنود التفتت لها .. وبحنان وهي مبتسمه / شنو ..
ساره اعتدلت وجلست بجنب العنود / تبين الصدق " العنود طالعتها بسكات " .. جدتي صادقة ..
انتي تهلكين نفسك بالاشغال .. لاتقولين جدتي ربتني على كذا .. صحيح جدتي كانت تحب تسوي كل شي بيدها ..
من قهوة وطباخ .. بس ما كانت في كل مكان تلهي نفسها و تتعبها .. " العنود رفعت شعرها عن وجهها وهي تتنهد " ..
ساره تكمل / انتي تذكرين كيف كانت الله يرحمها تهاوشنا وتزعل اذا ماكنا كاشخين و باحسن طله ..
العنود ابتسمت بحنين / الا .. " وهي تقلد جدتها " .. اخت نايف والله بناتي ما ينقصن بالزين ..
ساره ابتسمت / الله يرحمها .. " وبضيق " .. صدق العنود .. لمن اشوفك كاني اشوف عجوز ..
مو مهتمه بنفسك ابد .. حتى باعيالك .. ليش تسوين كذا .. قبل لان امي وابوي تعبانين .. بس الحين ..
العنود بضيق / ما عاد لي نفس بشي .. حتى اني ادعي القوة معاد عندي قدره عليها .. تعبت ..
ودي ارتاح والا ادري كيف .. " رفعت يدها حتى تخلخل اصابعها بشعرها .. "
" سمعت صوت تحرك بالسرير التفتت شافت الظبي تتقلب .. "
ساره بهمس ونبرة مقصودة / صدق ماتبين ترجعين لبتال ..
العنود بإجابه قاطعه و نهائية / لا ..
ساره طالعتها / سمعتي هواشهم بالمجلس بعد العصر ..
العنود هزت راسها / ايه .. ما ادري ايش يبي ..
ساره رفعت حواجبها / يبي عياله .. يبي يشوفهم ..
العنود هزت اكتافها وبدون اهتمام انسدحت على السرير جنب اولادها / تصبحين على خير ..
ساره عقدت حواجبها / طرده ..
العنود غمزت لها وهي تبتسم / يعني ..
ساره وقفت و شمقت لها وهي تطلع من الغرفة اول ما وصلت عند الباب / تصبحين على خير ..
العنود وهي تغمض عيونها / وانتي بخير ..
ـــــــــــــــــــ
فتحت الباب بقوة حتى تدخل الغرفة وقفل الباب بقوة اكبر .. وقفت على الباب و صدرها يطلع وينزل ..
صوت تنفسها العالي من العبره الي كاتمتها .. رمت الشنطه على الارض .. حتى تسحب النقاب و الشيلة ..
وترميهم بجنب الشنطة .. ركزت نظراتها على ارضية الغرفة البيضاء .. تذكرت اللي صار والي سمعته ..
بسرعة رفعت يدها على اذانيها وكان بتسكت الصوت الي فيه .. حست بان معدتها تقلب ..
بسرعه حطت يدها على فمها وتوجهة للحمام " اكرمكم الله ".. وقفت عند المغسله حتى تطلع كل الي في معدتها ..
فتحت الحنفيه .. اول مانزلت الموية بدات تغسل وجها و عنقها و صدرها .. كانت تجمع المويه بيدينها ..
وترميها على صدرها بقوه .. فجاه شهقت بقوه .. حتى تنفجر بصراخ والبكي .. حست بان رجولها ماتشيلها ..
جلست على الارضية صارت تبكي وتشهق وهي تتذكر الي صار ..
بعد ما لبست فستان ناعم لحد الركبة بالون العشبي .. من الوسط حزام دانتيل ابيض .. و الاكمام كت دانتيل ..
لبست جوارب بيضاء طويلة منقشه .. سوت مكياجها ناعم مثل ما تحب وترتاح له .. بعد ماخلصت من تجهيزها ..
وصلت العشاء .. رفعت جوالها و اتصلت عليه .. حتى تسمع صوت الرنين بالصالة .. قفلته وطلعت له الصالة ..
شافته منسدح على الكنبه و فاتح قناة المجد للقران .. نزل الجوال من يده على الطاولة و اعتدل بجلسه ..
مسح على شعره مرجعه على وراء .. انتبه انها واقفه عند باب الغرفة .. وقف ..
زياد بارتباك / اممم .. خلاص .. يعني .. نروح ..
ريهام ابتسمت بخجل / ايه .. جهزت بس البس عباتي ..
زياد بخجل و توتر / ااا .. ابي اغير الثوب .. تعفس من السدحه ..
ريهام ابتسمت خجل حتى ترجع للغرفة وتسحب عباتها و شنطة اليد و طلعت من الغرفة ..
دخل زياد الغرفة .. و بدل ملابسه وبعد ربع ساعة طلع .. طلعوا من الشقة و ركبوا السيارة ..
طول الفترة وهم ساكتين .. ريهام كل شوي تلتفت لزياد .. مملوح ..صح مو بجمال بتال ولا هيبة سند ولا حدة عناد ..
ولا وسامة راكان .. بس يعتبر مملوح .. حواجبه عيونه انفه شفايفه كانت تدقق بكل شي .. حست على نفسها ..
حتى تطيح عينها على يد زياد .. شافت اظافره الصغيرة .. عقدت حواجبها .. وبداخلها " ليش شكل اظافره كذا ..
ليش يقصصهم لها الحد .. والا تكسر .. هزت كتفها ومدت شفتها والتفتت على الشارع " ..
اول ما وصلوا للمطعم .. نزل و نزلت معاه .. دخلوا المطعم وتوجهوا لجلسه محجوزة مسبقا باسم زياد ..
ريهام بابتسامه وهي تنزل نقابه وتتلفت بالجلسه المقفلة من جميع الجهات والباب خلفها ..
وباعجاب / روعه المطعم .. بس عسى اكلهم لذيذ ..
زاد ابتسم وهو يطلع جواله و يحطه على الطاولة قباله ويفتح الرمز .. ريهام برجا / زياد خلي الجوال شوي ..
زياد طالعها باستغراب .. ريهام كملت / بس ماسك الجوال .. تكلم معاي شي .. ايش فيه ..
زياد سحب الجوال تحت الطاولة وطقطق فيه .. ريهام بغصة رجعت اسندت ظهرها على الكرسي ..
وهي تطالع بلوحات المطعم وبديكوراته .. اعجبت بالرسومات الي على جدار الجلسة والنقشات ..
حتى تركز عليها وتنسى زياد .. بعد دقايق .. / اممم .. ريهام ..
ريهام التفتت عليه بخرعه .. زياد ابتسم .. / ايش تبين من عشاء ..
ريهام تنهدت / اي شي مو مهم .. " ورجعت تطالع بالجدران .. بس مو مركزه معاها مثل قبل ..
وجه زياد يقول انه فيه شي راح يصير بعد شوي .. حست قلبها يضرب بقوة " ..
بعد ما انتهوا من عشاهم .. طلب قهوة زياد لهم .. ريهام رفعت الكوب و ارتشفت من القهوة شوي ..
زيادة بنبرة / فيه شي ابي اقوله لك .. وانتي حره وقتها .. اذا تبين تعشين معاي وتكملين حياتك او الانفصال ..
بس الي ابي اقوله اتمنى محد يعرف عنه شي .. اذا استمرينا او افترقنا ..
ريهام نزلت الكوب على الطاولة و هي تطالعه بصدمه وخوف واستغراب .. ماتدري هو يمزح او يتكلم جد ..
او يقرا شي من الجوال بصت عالي .. طالعته بصمت .. وهو منزل راسه يطالع بفنجان القهوة ويتكلم ..
زياد رفع يده حتى يفتح اول زرارين من ثوبه / كان عمري ثمان سنين .. " ابتسم بحنين " .. كنت شقي ..
وعنيد .. اروح واجي بدون لا اطرح خبر عند احد .. مره كنت رايح الدكان ..
وانا راجع مريت من جنب البيوت المهجورة .. سمعت صوت .. ما خفت و رجعت البيت .. لا ..
تقدمت من البيت .. و وقفت على احد الجدران المهدومة .. شفت .. " وسكت .. " ..
رفع كاسة الماء وشرب منها كم جرعه .. / شفت ولد كبر راكان معاه ولد صغير .. كان ..
" سكت مايدري ايش يقول " .. ريهام حست بان دمها نشف .. " زياد كمل / كان يمارس معاه ..
" ورجع سكت وهو يغمض عيونه " .. انفجعت .. ورحت اجري للبيت .. خالي نايف و راكان قالوا لي من قبل ..
الي يسوي ذا الاشياء وسخ يا ويله من الله .. اذا احد " وبارتباك و بتقطع بالكلام " .. اذا احد قرب منك ..
او .. او .. او سوا .. قول لنا .. واحنا نذبحه .. ارتعبت .. الولد الكبير كان في نفس المدرسة .. كنت اخاف منه ..
وهو كل يوم يتضارب مع راكان .. بعد فتره .. نقلنا لحي ثاني .. و نسيت الي صار .. كنت ملزم راكان ..
الا بيوم عندت وقررت اروح البقالة .. كنا وقتها بمزرعة جدتي .. " سكت " .. وانا راجع من البقالة ..
تهجم عليه كلب و انقذني راكان .. كان كل يوم والثاني يقول لي انت صغير .. ماتقدر تدافع عن نفسك ..
كنت انقهر منه .. بس اطنشه .. هو اخوي الكبير وملزوم يدافع عني .. لاكبرت اشيل نفسي ..
نل راكان لثانوية عيال عمي بالخبر .. وانا نقلت لمتوسطة بالرياض .. وافترقنا .. سنه وحده بس ..
بس بذا السنه .. صارت اشياء حطمتني .. و خلتني منكسر طول عمري .. عرفت اني انا ضعيف ..
او " ابتسم باللم " .. اعتقدت باني ضعيف .. خالي كان مسافر ولا قدرت اقول لاحد ..
ريهام بخوف وصدمه / ايش تقول ؟ ..
زياد رفع عينه وحطها بعينها وبنبرة غريبه / اغتصبت ..؟
ريهام حست بان المكان بارد حولها بارد حد الصقيع .. ركبها صارت تصافق ببعضها .. وريقها ناشف ..
عيونها موقادره تغمضها .. ولا تغير اتجاهها .. متصوبه على زياد ..
زياد / خفت صرت اكره المدرسة .. بس جدتي الظبي ما كانت تسمح لي اغيب .. وجدي سعد يضربني ..
ابوي دائما مسافر وامي معاه .. بعد سنه ابوي غصب راكان على الرجعه و يدرس بنفس المجمع ..
وبيوم .. تعبت فيه صابتني حمى .. و غيبتني جدتي رجع راكان و ثوبه مقطع من قدام .. عرفت انه تضارب مع واحد ..
ولمن رجعت للمدرسة بعد اسبوع .. عرفت ان الي .. "وسكت " .. نقله ابوه لمدرسة ثانية .. والسبب راكان ..
راكان .. فعلا هو الي قادر يدافع عني .. انا ضعيف .. هو يعرف يتصرف .. انا لا .. هو الصح ..
والكل غلط .. راكان وبس .. تعلقت كثير فيه .. محيت شخصيتي .. الا ان صار الكل معاد يشوفوني ..
الا ان اختفاء .. ما اعرف فين راح .. المشاكل والمصايب زادت .. ما اقدر اتصرف فيها .. الا ان رجع ..
وانحلت المشاكل .. و بعد فترة .. " تنهد " .. وبيوم وانا في المسجد .. كنت في حاله مايعلم بها الا الله ..
مخنووووق وابكي .. مالي ملجاء الا الله .. اشكي عليه الحال و اطلب منه العون .. جاني واحد وسلم عليه ..
وعرفت انه ولد جار جدي .. كان صديقي بالمدرسة ايام الابتدائي .. وكنت العب معاه ..
لمن جدي يسوي عزيمه و يحضرها مع ابوه .. " سكت مد يده و اخذ كاس الماء شرب منه شوي " ..
بالاول ما عرفته .. ولمن عرف عن نفسه وذكرني ببعض الاشياء .. تذكرتها .. اعطاني كرته ..
واخذ رقم جوالي ..دكتور نفسي .. و بعد شيخ وامام مسجد .. توصلت معاه بالواتس ..
الا ان يوم فأجاني واخذني معاه للمكتب .. كانت اعتقد يبيني اشوف مكتبه واعرف مكانه .. وازوره ..
بس تفأجات انه يبي يعالجني .. كان وضعي واضح للكل اني مو طبيعي .. " ابتسم بالم " ..
بس اهلي ما اشافوا حالي .. " رفع نظره وشاف ريهام على نفس الوضع .. وبنبرة " ..
ما كنت ابي اقول لك .. بس هو الي طلب مني .. وقال لي اخيرك .. " وسكت ينتظر الجواب منها " ..
ريهام بنبرة مخنوقه و يدوب يطلع صوتها / رجعني البيت .. " لفت شيلتها و ربطت نقابها ..
الي يطيح منها كل شوي بسبب رجفة يدها " .. كان يطالعها بنظرات مكسورة .. كان يتمنى مثل ما قال له الدكتور ..
وقف و هو يسحب المفتاح و الجوال و المحفظه و طلع من الجلسه .. توجه للكاشير ودفع الباقي ..
رجع للجلسه وشافها تطلع منها .. مشي قبالها وهي وراه .. طلعوا من المطعم وركبوا السيارة ..
رفع يده زياد وشغل الاذاعة .. حتى يتردد صوت القران في السيارة ..
قفلت الدوش وطلعت من تحت الماي .. سحبت الروب و لفت جسمها فيه .. طلعت من الحمام " اكرمكم الله " ..
وهي تسحب رجولها بثقل .. تحس بتعب بكل جسمها .. جلست على كرسي التسريحة وبدات تنفض شعرها بيدينها ..
طالعت بوجهها .. عيونها حمرا و منفوخه .. و تحت عيونها سواد .. تذكرت زياد .. حتى تحس بالغثيان يرجع لها ..
اخذت نفس عميق وهي تغمض عيونها .. فتحت عيونها و وقفت .. توجهة لدولاب حتى تسحب قميص قطني ..
لنص الساق باكمام طويله .. لبست على السريع ورمت نفسها على السرير .. غمضت عيونها حاولت تنسى الكلام ..
لكن ابد .. قامت واعتدلت بجلستها .. فكرت لثواني حتى ترجع للحمام " اكرمكم الله " .. توضأت وطلعت ..
فردت سجادتها ولبست جلالها .. حتى تتوجه لخالقها .. يوجهها لطريق الصحيح و يهون عليها ..
ـــــــــــــــــــــ
توه راجع من الاستراحة .. دخل غرفته .. بهدوء رفع الإضاءة شوي .. وغير ملابسه ..
تقدم من سرير بنته قبلها واستودعها الله .. اول ما جلس على السرير .. التفت على سمر .. شافها معطيته ظهرها ..
انحنى عليها حتى يتاكد نايمه او تسوي نفسها نايمه .. شاف رفرفت رموشها وحركت بوبة العين ..
ابتسم .. انتبه انها لبسه البجامه الي يكرها .. رفع حاجب وهو مكشر .. كل مازعلت منه تلبس هالبجامه ..
رفع الفرشة و مدد رجوله على السرير .. التف عليها و ارتكى على يده .. وبأذية ..
مسك خصله من شعرها وشدها بقوه .. سمر تأوهت .. راكان بخبث / احسن ..
سمر التفتت له وبعبرة / وجعتني ..
راكان ابتسم و هو يميل لها قبل انفها .. وبخبث / تستاهلين .. علشان مره ثانية ما تلبسين هالبجامة الخايسة ..
سمر و دموعها بدات تنزل / انت اصلا .. انا كلي .. مو .. عاجبتك ..
راكان يقلدها بتريقه وهو مبتسم ويهز راسه بسخريه / انت انا مو اصلا .. ناا ناا ناا ..
" ميل عليها وهو يحط انفه على انفها " .. وبنبره / يا الدلوعه ..
سمر دفعته بيدينها .. حتى يطيح على ظهره .. وهي تنفجر بكي ..
راكان سحبها لحضنه وهو يضحك وبهمس / انتي معجبتني بكل حالاتك .. زعلانه .. وانتي تضحكين ..
وكل شي معجبتني .. سمووور .. حبي .. روحي .. خلاص عاد .. " ابعدها عن حضنه "..
سحب منديل و ابعد يدينها عن وجهها حتى يمسح دموعها .. " ميل عليها حتى يقبل عيونها " ..
سمر صدت عنه وهي تمسح على اثار الدموع .. راكان بنبره / سمور .. طالعيني ..
سمر التفتت له وطالعته .. راكان يطالع فيها / ايش الي عندك .. " سمر طالعته " .. سالفة بتال و العنود مضايقتك ..
طيب .. ايش تبين مثلا .. اغصب اختي علشان ترجع لاخوك ..
" سمر طالعته بخجل .. وكانت بتتكلم بس راكان ما ترك لها مجال " .. ادري بتقولين علشان سلطان والظبي ..
ايش فيهم سلطان والظبي .. ترا وضعهم الحين .. افضل من انهم يرجعون بتال والعنود ..
وعيالهم يكبرون على شك الاب في الام .. وبدال مانكون بمشكله وحدة نكون بمصيبه ..
سمر عقدت حواجبه / كيف يعني يشك ..؟
راكان ريح نفسه وهو يحط يده تحت راسه / بتال اي تصرف تسوية العنود او اي حركه .. شك فيها ..
وكان اختي مو متربيه .. وضحنا لك و عرف كل شي لكن برضه يشك ولا واثق فيها ..
راكان طالع فيها / حطي مكانك بمكان العنود .. و تخيلي اني باي حركه اشك فيك .. يعني ..
واقفه مع خالك غيث .. وبدون لا اسالك اجي اهجم عليك واقول ايش تسوي ماتستحي ..
او وانتي ماشيه طالعه من بيت جدي و صادفتي فارس عند الباب .. و امسكك اقول تسولفين معاه ..
وايش بينكم .. راح تعشين بسعاده .. و تتمنين تكملين حياتك بها الشك ..
سمر هزت راسها / لا ..
راكان / اهااا .. وهذا الي ابيه لاختي .. الراحه .. واخوك .. لو تعطس قال ليه تعطسين ..
" غمض عيونه و بنعاس " .. مره ثانية لاتدخلين بموضوع مانتي عارفه ايش فيه .. اوووووكيه ..
سمر وهي تضم يدينها لصدرها هزت راسه / طيب .. " حتى تسمع تشخير راكان .. فتحت عيونها بصدمه " ..
لا اله الا الله .. محمد رسول الله .. ما شاء الله عليك .. نمت .. " ابتسمت وريحت راسها على المخده .. حتى تنام "..
ــــــــــــــــ
الفجر ..
طلعت من الحمام " اكرمكم الله " .. حتى تمتم " غفرانك " .. سحبت الفوطة وصارت تنشف وجهها ..
سحبت الربطه من شعرها حتى ترجع تلفها من جديد .. شافت الظبي جالسه على السرير وشكلها توها صحيت ..
حتى تقرب منها وهي تبتسم .. و ببحة النوم / صباح الخير ياروح ماما ..
الظبي رفعت يدينها حتى تتعلق برقبة امها .. قبلت خد الظبي وهي تستنشق ريحة شعر بنتها ..
التفتت على سلطان وشافت وجهه محمر و شكله يتنفس بصعوبه .. نقزت برعب حتى تحط يدها على جبين سلطان ..
العنود بخوف / لا اله الا الله .. استغفر الله العظيم .. " حتى تنزل الظبي على السرير وتتوجه للحمام " ..
الظبي صرخت برعب .. لكن العنود طنشتها .. طلعت وبيدها فوطة مبلله حطتها على جبين سلطان ..
توجهة لصالة جناحها و من بعده للمطبخ الصغير الي بالجناح .. حتى تفتح الثلاجة المتوسطه الحجم ..
سحبت دواء خافض الحرارة .. و علبة موية ورجعت للغرفة .. اعطت سلطان جرعة من خافض الحرارة ..
اخذت الفوطة ورجعت للحمام حتى تغير الموية وترجع تحطها على جبين سلطان .. توجهة لسجادتها وجلال الصلاة ..
حتى تصلي بسرعة و هي تستغفر ربها .. غيرت ملابسها وطلعت ملابس لـ الظبي و سلطان ..
اتصلت على راكان بس مارد .. ونفس الشي نايف .. حتى ترمي الجوال و تبدا تغير ملابس سلطان والظبي ..
اول ما انتهت من تلبيسهم .. سمعت دق على الباب .. العنود بامل / راكان ..
فتح الباب نايف وهو مبتسم / الله الله .. راكان .. بعتينا يا اخت نايف ..
العنود وهي تحط بعض الاغراض بشنطتها بعجله / نايف سلطان ارتفعت حرارته .. وديني المستشفى ..
نايف انتبه لسلطان والظبي الي على السرير .. باهتمام / من متى .. و قد ايش ارتفعت ..
العنود وه تلف الشيلة وبعصبية / هذا وقته .. فز يالله ..
نايف وقف وهو يشيل سلطان على كتفه .. والعنود لبست برقعها و حطت الشنطه على كتفها حتى تشيل الظبي ..
وهي طالعه من جناحها قابلت ساره عند الباب .. العنود بعجله / انا رايحه المستشفى ..
ساره بضيق / رجعت ارتفعت حرارة سلطان .. " بس ما سمعت رد من العنود لانها خرجت من البيت " ..
ــــــــــــ
بعد الفجر
دخل الشقة بعد ما صلى الفجر بالمسجد .. سحب شماغه و رماه على يد الكنبة .. سمع صوت في المطبخ ..
حتى يتقدم و يوقف على الباب .. شافها واقفه و تجهز الفطور .. تنحنح حتى تنتبه له ..
ريهام رفعت راسها حتى تصد بسرعة تكمل شغلها ..
زياد حس بالم في صدره .. و بنبرة / امم تبين تروحين معاي لـ الخبر ..
ريهام رفعت راسها بسرعة وبفرحه / ايوه ..
زياد ابتسم بالالم / طيب بعد الفطور نمشي ..
ريهام هزت راسها .. حتى تحط كوب الشاهي على الطاولة .. زياد توجه للمغسله يغل يده ..
انتبه ان ريهام تطلع من المطبخ .. و بتساؤل / ما تبين تفطرين ..
ريهام بنبرة جامده / لا .. " تركته و دخلت الغرفة " ..
زياد جلس على كرسي طاولة الطعام بتعب.. طالع بالاكل و هو مو مشتهي شي ..
رجع وقف وبدا يلملم الاكل .. رجع كل شي لثلاجة . غسل الصحون ورتبها ..
اخذ كوب الشاهي وشربه .. و غسل الكوب ورجعه مكانه .. مسح الطاولة و المغسلة ..
وطلع لصالة .. شاف ريهام تطلع من الغرفة رايحه للمطبخ .. / اذا خلصتي تجهيز بلغيني حتى نمشي ..
ريهام ما اعطته اي اجابه ودخلت للمطبخ .. وقفت عند باب المطبخ وهي تطالع بالمكان ..
شافت الاواني مغلسه و مرتبه .. طلعت وطنشت زياد دخلت للغرفة حتى تجهز نفسها ..
بعد نص ساعه طلعت .. وبجمود / جاهزة ..
زياد التفت عليها حتى يشوفها متوشحه بالسواد .. وقف وسحب شماغه وعقالة ولبسهم ..
شاف شنطة متوسطه معاها .. توجه لها .. حتى ريهام تتراجع للخلف .. زياد ابتسم وسحب الشنطه وطلع قبالها ..
حتى تلحقه وتقفل باب الشقة .. التفتت وشافت المصعد انفتح .. وزياد ينتظرها ..
اخذت نفس حتى تدخل معاه وتوقف بزاوية .. زياد ضغط الزر حتى يتقفل المصعد و ينزلهم تحت ..
ـــــــــــــــــــ
بالمستشفى ..
.... بعصبية / وليه ما بلغتني .. كيف يتعب وما تبلغوني ..
راكان طالعه ببرود / اخفض صوتك ..
بتال بقهر / تعال اعطيني كف احسن ..
راكان فز واقف وقرب منه .. حتى يدخل بينهم نايف وهو يبعدهم عن بعض ..
راكان من بين اسنانه / بتال .. اقسم لك بالله .. ان استمريت بذا الاخلاق .. والله ..
ما اخليك تشم ريحة عيالك الا مرة بالاسبوع .. احمد ربك معطيك قدر ومتصل عليك ..
بتال بسخرية / كثر خيرك والله ..
راكان بنص عين طالعه وهو يدخل غرفة سلطان الي راح يتنوم فيها / بغصب عنك ..
بتال بقهر / استغفر الله العظيم ..
نايف بهدوء / هذا هو اكثر منه .. استغفر ربك .. وروح كمل اوراق ولدك ..
بتال طالع نايف بقهر و طنشه و نزل تحت يكمل الاوراق ..
ـــــــــــــــــ
بعد صلاة العصر ..
عند باب المسجد ..
...... بابتسامه / زياد ..
زياد التفت على اللي ناده وابتسم / هلا .. " بعد السلام والسؤال عن الاحوال "..
زياد بصوت خافت / ما ادري .. بس ما اتوقع ترجع معاي .. متقرفه مني وكاني وسخ ..
..... بهدوء / ما عليه .. توها بالمرحله الاولى .. اتركها هذي الفترة لتتقبل الوضع وبعدها قرر ..
زياد بارتباك / اخاف استعجلت ..
..... ابتسم / حبيتها ..
زياد ابتسم وبهدوء / فيك تقول ارتحت لها ..
.... ابتسم و بمحبه / ربي يوفقكم ويصلح بينكم ان شاء الله .. ادعي الله .. و راح يتسهل كل شيء ..
راكان الي كان متاخر عن الصلاة وطلع من المسجد متاخر .. شاف زياد واقف مع الشيخ ..
تقدم منهم وبابتسامه / السلام عليكم .. كيفك يا شيخ سالم ..
سالم ابتسم / وعليكم السلام .. الحمدالله بخير .. كيفك حالك يا ابو سطام ..
راكان ابتسم / الحمدالله بخير ..
سالم بابتسامه / انا استئذن ..
راكان وزياد / اذنك معاك ..
بعد ما ابتعد سالم راكان التفت على زياد .. وبتساؤل / اكثر من مرة اشوفك معاه ..
زياد بارتباك / كان زميلي بايام الابتدائي ..
راكان هز راسه / اهاا .. طيب ما تبي تزور اختك ..
زياد / الا الحين رايح ..
راكان بتعب / طيب لا تنسى العشاء الليله بالاستراحه .. رعد مسويه يقول عازم صديق له ..
زياد ابتسم / لا مو ناسي ان شاء الله .. نلتقي الليلة باذن الله ..
راكان / باذن الله .. " وتوجه للبيت .. اما زياد ركب السيارة " ..
رفع جواله وفتح الواتس حتى يشوف اخر ظهور لريهام شافها متصلة .. ابتسم بحنين وشوق لها ..
ـــــــــــــــــ
باليل ..
في يده فنجان القهوة .. يشرب منه / الا ماتدرون من ضيف رعد الشبابي ذا ؟ ..
طلال ابتسم / انا اعرفه .. بس مفاجأة مخلينها لكم ..
راكان طلع نوى التمرة من فمه .. وبسخرية / يا الله .. لهدرجه ..
......../ السلام عليكم ..
الكل التفت للباب / وعليكم السلام ..
طلال بصدمه طالع الشخص .. الكل وقف باحترام ما عرفوا الشخص ..
بعد السلام .. جلس الضيف ورعد جنبه ..
رعد طالع بطلال بضحكه / مثل ردت فعلي اول ما شفته .. ما اعرفت لو ما تكلام ..
طلال بنبرة مليئة بدهشه / لا اله الا الله . ايش اللي غيرك يا رجال ..
حاتم ابتسم / احلويت والا صرت شين ..
طلال ابتسم وهو يطالع بلحيته و ثوبة القصير و شماغ ابيض بدون عقال / ربي يثبتك ..
عناد يطالع في الرجال / انا كني اعرفك .. " التفت على رعد " .. ما تعرفنا ..
سند و راكان يطالعون بالرجال .. والشباب الباقي يتحرك عادي ..
رعد بضحكه / للحين ما عرفتوه ..
راكان بنبرة تخمينيه / والله الصوت مو غريب عليه .. ومخمن بس .." وهو يحرك يده بعلامه الشك " ..
طلال يطالعهم / ذا حاتم .. حويتم الحبيب .. " وهو يقلد حاتم " .. ادعس يا ولد ادعس ..
راكان وقف وهو يحط يده على راسه / الله اكبر .. حـــــاتـــــم ..
حاتم وقف وبضحكه / بشحمه ولحمه .. " فتح يدينه حتى يحضن راكان " ..
سند الي رفع يده اليمنى / لا اله الا الله محمد رسول الله .. يهدي من يشاء سبحانه ..
وقف وهو يسلم على حاتم من جديد وبحرارة ..
حاتم طالع عناد بابتسامه .. عناد بعدم تصديق / ياهو بلا كذب .. تضحك علينا انت ..
حاتم طلع بطاقته الشخصية حتى يحطها بوجه عناد .. عناد قرا الاسم و فتح عيونه بصدمه ..
وقف بسرعة حتى يسحب لحيت حاتم فجاة .. وبصرخه / اووووووه حويتم .. ايش صار لك ..
حاتم / ههههههههههههه .. ربك الهادي يا المصروع .. " وهو يحضنه و يسلم عليه بحراره " ..
الشباب الباقي يطالعون فيهم باستغراب و يتهامسون ويسالون بعض ..
بعد ربع ساعه .. عناد قاعد جنب حاتم وبلقافه / ايوه .. ايش اخبارك .. تزوجت .. تخرجت .. ايش صار لك ..
حاتم ابتسم وبنبرة حزينه / الحمد الله على كل حال .. بعد ما انتم رجعتوا بسنه خلصت دراستي ورجعت ..
ابوي اصر عليه يزوجني بنت عمتي اليتيمه .. فالاول رفضت .. بس ابوي حلف عليه .. و اجبرني .. وتزوجتها ..
كملت حياتي مثل ما كنت عزوبي ولا تغيرت .. لكن هي غيرتني .. كنت اكرها .. تغصبني على الصلاة بوقتها ..
كنت اصارخ عليها و مرات اضربها لاني اجي سهران قبل الفجر وانام وهذيك تصحيني بالغصب .. وان ما صحيت ..
ما خلتني اكل في البيت ولا تقدم لي اكل .. و امي مسكت نفس الطريقة .. لو اصلي في البيت .. نفس العقاب اخذه ..
وهي تعرف اني ما احب اكل المطاعم .. وانا ما صدقت ارجع لديره حتى القي من يطبخ لي .. المهم ..
صرت اقوم اروح المسجد واصلي بس علشان افتك من زنهم و رجتهم .. حملت .. و جاتني بنت .. فترت الاربعين ..
قضتها عند ببيت ابوها زوجة ابوها حلفت عليها و انا فرحت اربعين يوم وانا مرات اصلي بالمسجد و مرات في البيت ..
ولمن رجعت خرب الجو عندي .. صرخت عليها و دعيت عليها .. وبيوم .. صحتني للفجر .. كنت تعبان ..
وعصبت عليها .. وقلت لها ليتك موتي وانتي تولدي .. اربعين يوم عشت فيها سعيد .. ربي يفكني منك لهون سبب ..
ابتسمت هي لي ابتسامه عمري ما انساها .. و قالت اذا موتي راح يسعدك و يهديك ..
جعل ربي ياخذ روحي باقرب وقت .. كانت بجلال الصلاة .. قلت بصوت عالي .. امين .. وطلعت للمسجد ..
ولمن رجعت .. لقيتها على سجادتها ساجده .. طنشتها و رميت نفسي على السرير .. بعد نص ساعه ..
الا اسمع صوت بنتي غلا تصيح .. طنشتها بس البنت ما سكتت .. فتحت عيني والا هي مو علا السرير ..
وقفت بطفش وانا ادعي عليها .. ورحت لسرير بنتي .. اول ما قربت من سريرها الا اشوفها ساجده ..
استغرب .. انا كم لي نايم .. طالعت بالساعه والا ما لي الا نص ساعه .. ايش الصلاة الي تصليها الحين ..
شلت البنت وهزيتها بس ما سكتت .. لحظت ان الادميه طولت بالسجود .. قلبي دقني .. بس طنشت الموضوع ..
لقيت رضاعة البنت جاهزة على الدولاب .. اخذتها وحطيتها بفمها .. سكت البنت شوي ورجعت تبكي ..
وهذي ما زالت ساجده .. نزلت البنت على السرير .. و تقدمت منها .. حركتها الا هي طايحه ..
وقتها ما عرفت ايش اسوي .. ضيعت كل الي تعلمته .. دكتور و ممتاز .. و ما عرفت افحص زوجتي ..
زاد صياح بنتي .. ما ادري كيف ربي الهمني .. وخلاني ارفع جوالي واتصل على امي .. امي تعالي ..
انا ساكن فوق بشقه بعمارة اهلي .. دقايق وامي عند الباب .. فتحت الباب لها .. و دخلت وهي مرعوبه ..
و بعدها كل شي توقف .. من اتصل على الاسعاف من الي اخذني للمستشفى ايش صار كنت مثل المبنج ..
يوم وفاتها .. نفس تاريخ زواجنا .. سنه .. سنه وحده بس .. غيرت اشياء كثيرة بحياتي ..
سند بهدوء / ربي يرحمها .. ويجعل الي صار درس لك ..
حاتم ابتسم و بالم / صار .. تركت التدخين والسهر والسفر .. بدات احفظ كتاب الله .. وغلا ..
صارت اهم شي بحياتي .. ربي يحفظها و يصلحها ..
الكل / امين ..
حاتم بانتباه / الا وين بتال ..
سعود / بتال ولده تعبانه و متنوم بالمستشفى .. وماقدر يحضر ..
رعد التفت له / ترا منوم بنفس المستشفى الي تشتغل فيه ..
حاتم بابتسامه / ازوره بكره ان شاء الله .. الا سماه سلطان مثل ما قال و الا تغير ..
رعد ابتسم / لا ابو سلطان ..
حاتم بمحبه / الله يخليه له و يجعله من الصالحين ..
الكل / امين ..
ـــــــــــــــــــــــــ
.... بضيق / مافي شي يمه ..
ام صقر بقهر / لا اله الا الله .. بتجلطوني انتم .. " وبغبن " .. وانا ليه استغرب ..
ما دام ابوكم راشد .. اكيد بتجلطوني و تذبحوني ..
رنا الي جالسه على السرير قبال سرير اختها ريهام .. / يمه الحين ليه الجمع ..
ام صقر الي جالسه على السرير بجنب ريهام .. بعصبية التفتت لها ... / انتي انطمي ..
والا الرجال كل يوم والثاني يتصل عليك و يرسل وانتي ولا تردين .. ليه ؟؟
رنا ببلاهه فتحت عيونها و بخرعه / اي رجال .. بسم الله عليه ..
ام صقر حطت يدها على راسه / لا حول ولا قوة الا بالله .. يارب لطفك ..
" وقفت " .. انا لو اقعد بينكم راح انجلط .. " تركتهم ونزلت لرنيم وريما و روان تحت " ..
رنا طالعت في الباب الي تقفل بقوة من قفلة امها .. طالعت في ريهام / انا ايش دخلني ..
ريهام تنسدح بتعب على السرير .. وبطفش / تقصد بدر يا غبية ..
رنا فتحت عيونه للاخير .. ووجهها حمر / لا ..
ريهام تنهدت وهي تحط يدها على عيونها .. وبخنقه / رنا طلعي و خفضي النور .. ابي انام ..
رنا وقفت و خفضت الاضاءة .. وقفت على الباب و طالعت باختها .. بعدها طلعت و قفلت الباب وراها ..
تنهدت اول ماسمعت صوت الباب حتى تنزل يدها عن عيونها ..
دخلت يدها تحت المخده الي نايمه عليها تتلمس للجوال .. اول ما حست بالجوال سحبته فتحت عينها ..
وبدات تطقطق بالجوال تفتح رمز القفل .. شافت التنبيهات كلها رسائل الواتس اب .. "قروب بنات الفارس " ..
فتحت القروب طالعته بطفش .. خرجت منه .. شافت اسم زياد .. دخلت الا تشوفه متصل ..
زمت شفايفها بسخرية .. وبتمتمه / اكيد متصل .. مو هو 24 ساعة بين يدينه ..
"فتحت عيونها بخرعه اول ما شافت جاري الكتابه .. حتى تجلس على السرير " / يكتوب لي ..
شهقة بخرعه و هي تبي تخرج من الواتس لكن ضغطت على الاحرف .. وبخرعه قفلت الجهاز كله ..
رمت الجوال على سرير رنا .. حتى تتنهد براحه و هي تحط يدها على صدرها ..
بعد ثواني بقهر من نفسها / غبيه .. مو هو زوجك .. " وبسخرية من نفسه " .. يا هملالي ..
تنهدت بضيق و هي تتوجه للباب .. فتحته حتى تطلع من الغرفة نازلة لصالة عند اخواتها ..
:
:
:
بعصبية وهي تشرب من كاسة الماء / بتجلطوني انتم ..
رنيم وهي مسترخيه على الكنبة / انتي ليش معصبة .. ترا ريهام عاقله .. يمكن زوجها قال لها خليك عند امك ..
ام صقر بعصبية / وليه ..؟ .. مو توها عروس ما لهم اسبوع .. كيف عريس يقول لزوجته روحي لبيت اهلك ..
رنا تاكل كرز وهي تطالع بالتلفزيون / عادي يمه .. الزمان هذا تغير .. كل شي جايز ..
ام صقر وهي تسحب الخدادية الصغيرة وترميها على رنا / انتي انطمي .. لا اسمع منك حس ..
رنا الي ضربت الخدادية براسه و انتكش شعرا .. بخرعه / يممممه .. " التفتت لامها " .. وانا ايش سويت ..!!
ام صقر وهي تشد فتحت قميصها الروز بقهر / انا ابي اعرف .. في هالزمن فيه بنت ما تكلم خطيبها .. هاااا ..
يجي لعند الباب و تموت نفسها بكي ما تبي تطلع .. ايش قصتك .. هااا .. لو مغصوبة عليه قلت يمكن ..
لكن ماخذين شورك .. ليش ما تبين تكلمينه ولا تقابلينه .. ليييييش ..
رنا زمت شفايفه بضيق / يمه ....
ام صقر بعصبية / وصمه تصم العدو .. انكتمي .. والا اقول .. انقلعي غرفتك يالله .. حسبي الله على عدوكم ..
ريما وهي تلعب بشعرها الي قصته فراولة / يمه ليه مستعجله على نكدها خلها تعيش حياتها ..
ام صقر ترفع الكاس / بهذي على راسك ان ما سكتي ..
ريما ابتسمت و رنيم تصحك بخفوت .. ريهام كانت على الدرج شافت رنا تطلع وهي تبربر مو عارفه ايش تقول ..
ابتسمت ونزلت باقي الدرجتين .. / ايش فيها رنا ..
ام صقر صدت عنها .. و لرنيم / ما بتروحين تزورين العنود بكرة ..
رنيم الا كانت تطالع بجوالها .. سكتت لثواني .. تتنهد وهي تقفل جوالها / الا يمه بكرة ان شاء ربي ..
" حتى تطالع باخواتها وهي مبتسمه " / ترا اليلة بـ انام عندكم انا وفهودي ..
روان الي كانت تلعب بالايبود .. رمت الجهاز .. وبخرعة / لا تقولين ..
رنيم طالعتها وبغرور / ليكون بيتك وانا ما ادري ..
ام صقر باستغراب / ليه سند وين ..؟
رنيم تسوي نفسها زعلانه / ما ادري عنه ..؟
ام صقر حطت يدينها على راسها / يا رب عفوك ..
رنيم بضحكه / الله يمه .. كله علشان ما تبيني انام عندك .. ترا سند قالي نامي .. لان بينام بالاستراحه ..
ام صقر وكان ماي انسكب عليها / الحمدالله .. نوم العوافي .. " وبفرحه " .. فهود بينام بحضن جدتها الليلة ..
فهد الي كان يلعب بـ العابه المنثورة بالأرض .. رفع راسه لمن سمع اسمه وابتسم لجدته ..
ــــــــــــــــــ
جالس بالصالة قبال التلفزيون .. شاف " جاري الكتابة ".. وين الرسالة الحين .. ليه تاخرت ..
يمكن انقطع النت .. او انتهاء الرصيد .. " عض شفته .. كان بيرسل عليها يسالها عن حالها ..
بس من شاف جاري الكتابة وقف .. ينتظر الي راح تساله .. كان متأمل انها تقول له تعال خذني ..
سمع نحنحه .. حتى يدخل بعدها راكان .. وهو لبس بيجامه رمادية بمكعبات بيضاء .. / سلام ..
زياد بهدوء / وعليكم السلام ..
راكان يطالع بزياد الي مازال لبس ثوب .. بس شماغه على الطرف .. بتساؤل / وين زوجتك ..
زياد / عند اهلها ..
راكان وهو يقلب بالقنوات / متى بتجيبها .. " وبخبث وهو يلتفت عليه " .. ترا راح اليل .. " وغمز له " ..
زياد بارتباك وخجل صد / ااا .. امممم .. بتنام عند اهلها ..
راكان التفت عليه بصدمه / تمزح ..
زياد نزل راسه يطالع الارض .. راكان قفل التلفزيون و التفت بجسمه على زياد .. وباهتمام / ايش فيه ..
زياد بتوتر و ارتباك / ااا .. ولا شي .. عادي .. جايه من الرياض ..
راكان بقى يطالع اخوه فتره و بهمس / ايش صار بينكم ..
زياد بعفوية / ولا شي ..
راكان فتح عونه للاخير .. حتى يمسك كتف زياد و يلفه له .. وهو يقرب منه / ايش اللي ولا شي ..
زياد بخوف طالع اخوه .. راكان فتح عيونه للاخير وبخوف من الي يفكر فيه / انت مااا .. " وهو يهز راسه " ..
زياد فهم المقصد حتى يحمر وجهه و يبدا يتعرق .. راكان فتح فمه و بقى يطالع اخوه بصدمه ..
زياد حس انه راح يختنق .. وقف و طلع من الصالة .. وراكان بقي على نفس الوضع ..
ــــــــــــــــ
كانت منسدحه على سريرها .. النوم مجافيها .. التفتت على رنا شافتها تطقطق بجوالها و تبتسم ..
تنهدت بضيق .. حتى تلتفت لها رنا و بطفش / والله من كثر ما تتاففين جبتي لي الطفش ..
ريهام طالعتها بنص عين و صدت عنها .. رنا بابتسامه / شوفي القروب .. سوالف و تعليق يجنن ..
ريهام بداخلها " انا وين وانتم وين " .. طالعت بالساعة حتى تشوفها ( 1 .. صباحا ) ..
جلست على السرير وهي ترفع شعرها وتلمه بالربطه / الساعة وحده .. خليني الحق اصلي قيامي ..
رنا ابتسمت وهي تقرا بالواتس / انا صليت اول ما طلعت الحمدالله ..
ريهام تركتها و توجهت للحمام " اكرمكم الله " .. ودها تبكي لكن مو قادره .. فصلاتها وربها خير علاج و خير مرشد ..
ـــــــــــــــــــــ
يوم جديد ..
كانت نعسانه .. مغمضه عيونها و مسترخيه على الكنبة .. غفت عينها بدون لا تحس ..
طق الباب اكثر من مره .. بس محد رد .. عقد حواجبه باستغراب .. فتح الباب و ناد .. بس بعد محد رد ..
رجع يتاكد من رقم الغرفة .. الا الرقم نفسه .. فتح الباب و نادى / سلطان ..
دخل حتى يشوف الظبي وسلطان .. اول شي ابتسم .. لكن بسرعة تذكر العنود .. عقد حواجبه باستغراب ..
التفت لباب الحمام شافه فاتح .. معناتها مو في الحمام .. طلع برا الغرفة .. وبتمتمه / هذي وين راحت ..
تنهد بقهر .. رفع جواله و اتصل على جوالها وهو داخل الغرفة .. قفل الباب وراه ..
سمع صوت رنين بالغرفة رفع حاجب .. وبسخرية / حتى الجوال ما شالته ..
سمع حركه .. حتى يلتفت .. وشاف شي يميل على الارض اسود .. صد بسرعة عنها ..
العنود بقهر و خجل و فجعه وهي تربط نقابها ويطيح .. وترجع تربطه .. والشيلة مرتخيه ..
انفتح الباب حتى يدخل منه متعب .. فتح عيونه للاخير وهو يشوف بتال مع العنود لوحدهم بالغرفة ما معاهم محرم ..
العنود بعد ما عدلت نفسها وقفت .. وبغضب / انت كيف تدخل بدون لا تستاذن ..
بتال بغضب يلتفت لها / وانتي كيف تنامين و الباب فاتح ..
متعب بغضب / وانت كيف تجيها بدون لا يكون معاها محرم ..
بتال رفع حاجب وبسخرية / عيالي متى مابغيت اجيهم ..
متعب بغضب / اطلع من الغرفة قبل لا اذبحك فيها .. " التفت للعنود ".. وانتي شغلك معاي ..
بتال طنش متعب وتقدم من سرير سلطان والظبي وسلم عليهم وهم نايمين و طلع ..
متعب يتقدم من العنود وبعصبية / انتي ما تستحين .. كم مرة نبهتك .. اذا بتنامين حطي الستارة بينك وبين الباب ..
العنود وهي تجلس على الكنبة وهي تسحب النقاب و تعدل شيلتها / الستارة كانت موجوده ..
بس يمكن دخلت الممرضة و سحبتها بدون لا احس ..
متعب بعصبية / وبدم بارد تقولينها ..
العنود بعصبية / ايش تبيني اسوي .. اروح اتضارب مع الممرضات يعني .. والا احط لي حارس على الباب ..
متعب بعصبية / والله يا العنود ان بغيت البحر يصير طحين طحنتيه .. لكن هالوضع على هوك .. و عاجبك ..
......./ السلام عليكم .. ايش فيكم اصواتكم طالعه ..
العنود ومتعب التفتوا على صلاح .. متعب تقدم منه و بقهر / هلا صلاح الحمد الله على السلامه ..
" وبعد السلام .. والسؤال عن الحال .. متعب قال لصلاح الي صار " ..
متعب بسخرية / لا والله الا مكيفها الوضع ..
العنود بعصبية / متعب تراك زودتها ..
صلاح طالع بمتعب / ما عندك دوام انت ..
متعب الي لبس الباس الرسمي العسكري .. وقف / الا .. يالله سلام .. " وبسخرية " .. ما تشوفون شر يا ام سلطان ..
العنود بنبرة بارده / الشر ما يجيك ..
صلاح التفت على العنود / ها ايش قالت الدكتورة ..
العنود تنهدت / سوت له تحاليل .. و ننتظر النتائج .. و نقول يارب ..
صلاح هز راسه / يارب ..
سمعوا صوت طق على الباب .. التفتوا على الباب .. العنود عدلت عباتها و شيلتها و نقابها ..
حتى يوقف صلاح و يتوجه للباب , فتح الباب الا سند .. ابتسم / هلا سند حياك ..
دخل سند / السلام عليكم .. " حط سلة على الطاولة .. و بابتسامه " .. هذا من امي موضي ..
قبل سلطان والظبي .. و سال عن حالهم وطلع .. صلاح التفت على العنود .. / للحين مو راضي يبيع ..
العنود جلست على الكنبة وبضيق / لا .. " طالعت بصلاح و بنبره " .. الموضوع كل اخباره عندك .. ليه تسال ..
صلاح ابتسم / لا بس اسال .. يالله " وهو يقرب منها السله " نفطر .. ترا انا من المطار للمستشفى .. ما افطرت ..
:
:
:
تحت بمواقف السيارات ..
بتال جالس بسيارة سند .. / اقولك نار هينا شابه .. ما ادري كيف مسكت نفسي ..
سند بهدوء / ما لاحظت شي ..
بتال طالعه وباستفهام / مثل ايش ..
سند بهدوء / انك توقعت العنود طلعت برا وهي قدام عيونك ..
بتال تافف وهو يصد / طيب و المعنى ..
سند وهو يحرك سيارته / وصلك المعنى .. " عقد حواجبة " .. الا هذا مو حاتم ..
بتال التفت على الجهة الي يطالعها سند / الا هو ..
سند اشر لحاتم بانوار السيارة .. حتى ينتبه .. حاتم ابتسم لهم و هو يتوجه لهم ..
سند و بتال نزلوا من السيارة و سلموا عليه ..
حاتم / سلامات ايش لكم هينا ..
بتال / ازور ولدي ..
حاتم / هو هينا .. اجل امر عليه ان شاء الله ..
سند / انت ايش لك هينا .. ما تشوف شر ..
حاتم ابتسم / انا اشتغل هينا ..
سند و بتال / ما شاء الله ..
بتال ابتسم / اجل ما اوصيك على ولدي ..
حاتم ابتسم / استودعه الله .. فهو خير الحافظين ..
بتال ابتسم / والنعم بالله ..
سند بابتسامه / اجل حنا نستاذن ..
حاتم يرفع يده بسلام / الله معاكم ..
ـــــــــــــــ
بالشالية ..
سلطان يفطر .. و منصور يلعب بالعابه في وسط الصالة ..
دخلت مشيرة وشافت سلطان يطالع بمنصور وهو مبتسم .. ابتسمت وهي تنزل كاسة العصير ..
سلطان بهدوء / جهزي نفسك .. راجعين اليوم ان شاء الله لبيتنا ..
مشيرة بهدوء / و ام بتال ..
سلطان رفع راسه / ايش فيها ..
مشيرة بهدوء / ما تبي تراضيها ..
سلطان بنبرة قاطعه / شي بيني و بينها ..
مشيرة طالعت فيه وبنبره / هذا ام عيالك و عاشت معاك عمرك كله بحلوه و مره و تسوي فيها كذا ..!
سلطان طالعها / ايش قصدك ...؟
مشيرة / فهمت قصدي .. سلطان خلاص .. هذي ام عيالك .. مهما سوت .. تقدير لعيالك قدرها ..
سلطان يوقف / الحمدالله .. مشيرة .. موضوع الجوهرة ما ابيك تكلمين فيه ..
مشيرة بنبرة واثقه / اسمح لي .. ماراح اشارك بظلمك لها ..
سلطان طالعها بنظرات و طنشها و دخل الغرفة .. مشيرة كملت فطوره .. بعد دقايق ..
شافت شريط العلاج يرمي على الطاولة قدامها .. طالعة بحبوب منع الحمل .. ورفعت راسها ..
الا سلطان يطالعها بنظرات تمنت الارض تنشق و تبلعها .. تركها بسكات و طلع من الشاليه ..
عضت شفايفها .. كانت بتقول له من زمان اخذها حتى بوقت العدة ما تركتها بس ما قدرت ..
تاففت بقهر وهي توقف و تلملم طاولة الطعام ..
ـــــــــــــ
بعد الظهر ..
بيت ابو سطام ..
سارة ونايف و ام سطام و ابو سطام على سفرة الغداء ..
ابو سطام / وانت متى بتمم خطبتك لبنت عمك ..
ساره فتحت الكشرة وهي تطالع بنايف .. نايف ابتسم / يبه خلها تخلص من الثانوي و انا اثبت نفسي بالجامعه و بعدين ..
ساره طالعت بجدها تنتظر جوابه و هي بنفس الكشره " يعني ضحكة معجون الاسنان " ..
ابو سطام / انتي علامك .. تبيني اسالك متى تبين ملكتك ..
ساره شرقت حتى تكح بقوه .. ووجهها يزرق من الشرقة .. ام سطام برعبه ../ بسم الله عليك ..
نايف يعطيها كاسة الماي .. و يحاول يشربها .. بس ما قدرت .. حتى يضربها على ظهرها .. ويقفله خشمها ..
حتى تكح بقة و تحاول تتنفس .. مسكت الكاسه من يد نايف وشربت شوي ..
ام سطام بعصبية وهي تعطي ابو سطام كاسة الماء / انفث عليها .. اعوذ بالله من الشيطان .. بغيت تذبح البنت ..
ابو سطام برعبه / اعوذ بالله .. " وهو يشرب شوي من الماي و ينفخه على ساره " ..
حتى تتفاجأ هي و تشهق بقوة و يعتدل تنفسها .. تنحنحت حتى تعدل صوتها / بغيت اموت .. كح .. كح .. كح ..
ام سطام وهي تمسح على ظهرها / بسم الله عليك .. شرق عدوك ..
ساره التفف على نايف الي كان منسدح من الضحك .. مسكت الخدادية حتى تضربه فيها ..
ابو سطام / ترا ملكتك انتي واخوك سوا ..
ام سطام بعصبية / اااصصصص .. تبغى تذبحها انت ..
ابو سطام / هاا طيب صقر يبغى يتزوج ..
ساره تركت السفرة و قامت و هي تمشي بخطوات سرعه و كانها تجري ..
ام سطام طالعت با ابو سطام / ها ارتح يوم قومتها عن غداها .. انت ما عندك سافه ثانية ..
ابو سطام / ...........
ام سطام بضيق منه / ما ودك تروح تزور رعد بعد ما سكن في بيته ..
ابو سطام وهو يبتعد عن السفرة / يالله تديم هالنعمه يا كريم .. الا ان شاء الله ..
و ابغى اروح اشوف العمال ايش سوو في بيت سند ..
نايف بهمس / يبه لا يسمعونك البنت ترا يعلمن ام فهد .. و سند ما يبيها تعرف ..
ام سطام وهي تمد لسانه مصدره صوت ساخر / هذا .. بير طافحه .. ما ينمسك بلسانه شي ..
ابو سطام بسخريه / اهاا عاد انتي الي توثقين العلم ..
ام سطام بثقه / الله الله .. انا ما قلت لاحد .. غير لبناتي .. اما انت بكره بتعلم كل من جاك ..
وهها جاك العلم يا نايف .. بكرة تلقيه يقوله عند البنات .. و انت اشهد ..
نايف ابتسم / ابشري ..
ابو سطام / ايه خلك شاهد .. وشوف مو هي الي تعلم .. تقول ما قلت لاحد غير بناتي .. و هي ما خلت احد ما قالت له ..
نايف الي يطالعهم وهو يضحك وهم يتناقرون على بعضهم ..
ـــــــــــــــ
يوم جديد
بغرفة الدكتور حاتم " صديقهم " ..
بتال بفرحة / يعني مو نفس النتائج الاولى ..
د. حاتم / لا .. الحمد الله ..
بتال / الحمد الله الحمد الله .. " حتى يسجد على الارض " ..
ابو بتال بفرحة / ياربي لك الحمد .. الحمد الله ..
د . حاتم ابتسم / يستاهل الحمد سبحانه ..
ابو بتال بعد ما قام ولده من السجود / طيب يا ولدي ايش سبب هالصخونه الي تجي كل فترة والثانية ..
د . حاتم / والله يا عم سلطان ما طلع شي بالتحاليل .. كلها سليمه الحمد الله ..
بتال عقد حواجبه / معقول هذا شي طبيعي ..
د . حاتم / لا طبعا .. بس على الي عرفته منكم .. انهم انخطفوا ..
بتال / ايوه ..
ابو بتال / الله لا يعاود الشر ..
د . حاتم / امين .. ما جربت شيخ يقرا عليه ..
بتال سكت شوي .. و بتفكير / لا والله ما جاء في بالي ..
د . حاتم بتفكير / وااا .. الظبي ..
ابو بتال / ايش فيها ..
د . حاتم / ما شفتوا حالتها ..
بتال / تقصد تعلقها بامها ..
د . حاتم / وخوفها من الجميع ..
ابو بتال / الا ملاحظين .. و فيه دكتور قبل قال اعرضوها على طبيب نفسي ..
د . حاتم / طيب .. ما عرضتوها ..
بتال بعصبية /هيا .. اعرضها على دكتور نفسي ..
د . حاتم فتح عيونه بصدمه / وهذا انت يا المتعلم كذا عقليتك ..
بتال بعصبية / هذولا اطفال .. كيف يعرفون نفسيه و ما نفسية ..
د . حاتم / وانت ايش عرفك بعلم الطب النفسي ..
بتال وابو بتال طالعوا بحاتم / .........
د . حاتم / الافضل تعرفون الحالة على طبيب نفسي وهو رتح يدلكم على طريقة العلاج ..
و يمكن حتى سلطان علاجه عنده ..
بتال طالع في ابوه و رجع طالع بالدكتور ..
انتهى ..
لا اله الا الله محمد رسول الله ..
الله اكبر .. سبحان الله .. الحمد الله ..
اتمنى يعجبكم ..
واعذروني على القصور و الاخطاء الاملائية ..
لا تنسوني من دعواتكم ..
مشاعل السعودية ..
|
09-07-13, 06:34 PM
جديد مواضيع قسم القصص المكتمله من وحي قلم الاعضاء
العرض العادي
