بطلب من الكاتبه ....مشاعل السعودية تم تنزيل البارت


............................................................ ............................................................ ....................







"





بسم الله الرحمن الرحيم ..

السلام عليكم ورحمة الله وبركاته ..

الحمد لله والصلاة والسلام على رسول الله ..

توكلنا على الله .. لا اله الا الله محمد رسول الله ..





البارت 42 ..





عن كل نجم ظهر بسدل أجفاني
لعل ما عيش حزني لحظة غروبه

وعن كل خل طويل الصمت كفاني
الصاحب اللي قليل الهرج عذروبه

وعن كل ثوب جديد بالبس أكفاني
وأدله ولا ألقى رسايل هم في جيوبه

أنا الجفا ليه أخاف الناس تجفاني
وأنا الحبيب الذي من يعشق عيوبه

راعي الوعد وأن صدق مرة ولاقاني
يحتار بين السراب وقلب محبوبه

يامن عذابه يشققني ويرفاني
فرقاك غصب علي بالحيل مكتوبه

خبرت نصف تعب من نصفه الثاني
بعضي الرماد وبعضي نار مشبوبه



" المبدع .. بدر بن عبدالمحسن " ..





:
:
:



بعد ثلاث شهور ..




شركة الفارس ..


دخل سعود على بتال ومعاه ملف .. رمى الملف على الطاولة و بتعب / خلصت ..
بتال كان يطالع بالاب توب و مركز بالشغل .. طالع سعود وهو رافع حواجبة باستغراب / و ليش معصب ..
سعود تافف / مو معصب بس تعبان شوي .. و وراي شغلة ضرورية ..
بتال لف كرسية شوي و سحب الملف و هو يطالع بالملف / ايش هي الشغلة ..؟
سعود يعدل نسف شماغه .. ابتسم / رايح اشوف البيت اللي ابي اشترية .. " وبسخرية مع قهر " .. مهر بنت عمك ..
بتال ابتسم و هو يطالع بالملف / العيب مو في بنت عمك .. العيب في قلبك ..
سعود بنبرة مقصود / قلبي و الا قلبك ..
بتال ابتسم بوجع و هو يقفل الملف .. سحب جواله و فتحه .. و بحه محملة بتعب / ما ودك تروح لشغلك ..
سعود هز راسة .. و بهدوء / رايح .. الله يبلي اللي حبيناهم بحب يجعلهم يمسون ويهذون باسمنا ..
بتال رفع راسه يطالع اخوه / هههههههههههه .. لالا .. ههههههه .. العوبة انهتك خلاص ..
سعود ابتسم وهو يعضي شفته السفلية بقهر .. اشر لاخوه بيده .. " مع السلامة " .. و طلع ..
بتال رجع يمسك جواله و هو يقلب في صور سلطان والظبي .. ابتسم بشوق / كبرتوا يا عيون بابا ..
" تنهد بشوق " .. وحشتوني .. متى امكم ترحمني .. " تنهد " .. الله كريم .. الله كريم ..







ـــــــــــ







بيت ابو عبدالعزيز ..



صلاح ينزل فنجان القهوة وبقهر / انا بس ابي اعرف .. من يوصل لها الاخبار .. وايش اللي هي فهمته ..
و ايش اللي احنا ما فهمناه .. هالبنت بتجنني .. الا جننتني وخلاص ..
متعب بضيق / و حنا ابتعدنا عنها .. و من يوم سكنوا عند اهلها .. وحنا ما نجلس معاها ولا نعرف ايش اللي تبغيه ..
صلاح فرك جبينه بتعب / قالت لي بصريح العبارة .. اضعف لي شركة الفارس ..
سالتها ليه .. قالت لي نفذ الحين وبعدين اقول لك .. " طالع متعب " .. ايش تفهم من كلامها ..
متعب يهز اكتافه / ما ادري .. العنود ما تفهم لها الا لكلمتها وجه لوجه ..
صلاح بعصبية / انا كلمتها .. قلت لها بتكسرين اهلك .. بتطعنينهم بالظهر .. صرخت عليه و عصبت ..
و من بعدها ما تكلمني .. الا برسايل .. ويوم قلت لها ما راح انفذ اللي تبينه .. و دعمت الفارس بمشاريع ..
جن جنونها .. و سحبت كل الصلاحيات و التوكيل و حولته لـ غنام .. " سكرتير راكان سابقا " ..
متعب بنظرات ساخرة / وتسال من يوصل لها الاخبار .. اكيد غنام ..
صلاح بثقة / لا .. لو هو غنام ما كان كل طالعة ونازلة بلغني عنها ..
متعب بتساؤل / قايلك شي عن شركة الفارس ..
صلاح هز راسة / ايه .. قال ان خسروا الفارس مشروع .. بس المفاجأة قبل شهر .. سند كبر راس المال الشركة ..
و صار شريك بالنسبة اكبر .. و رعد كذلك زادت نسبته .. والعنود من عرفت ما عاد كلمته ..
متعب بخوف / ليكون تعبت .. و حنا ما نعرف ارضها من سماها ..
صلاح هز راسة / لا ما صار فيها شي .. لو صار شي كان عرفنا .. وانت مصدق ان راكان وطلال ما يعرفون مكانها ..
متعب بقهر / ويوم يعرفونه ليه ما يقولون لنا ..
صلاح و هو يتنهد بضيق / يمكن اوامر العنود ..
متعب ضرب رجلة بقهر و عصبية / هالبنت بتذبحني ..


بالمزرعة ..



صوت صراخ و ضحك سلطان والظبي بكل الصالة مسموع .. مع ضحكات سارة و نايف ينشد ..

حـمـام ياشـادي الـواحه
هيضتني يانـزيـل الـدوح
الـروح ماهـيب مـرتاحه
من حالـهـا والجـروح جـروح
لا شافـت الطير بـجـنـاحـه
يـكفـخ وجـو الـفـضاء مـفـتـوح
قامت بـالاشـوق نواحــه
لاشـك عـيـا يـسر الـنوح
صحيح مافـي الهـوى راحـه
لاصرت فـي غـابـتـك مـطروح
والـحـب بـلـواه فـضـاحـــه
راعـيـه لـو يجـحـده مـفـضـوح
شـكـواه مـاتـشـفـي جـراحـه
والـروح خـطـر عـلـيها تــروح
دايــم بالاسـرار بواحــه
لو كان مافي الحكي مصلوح


" خالد بن سعود الكبير " ..


العنود وهي على الكرسي الهزاز وتطالع المزرعة من خلف زجاج الشباك الكبير ..
تنهدت / الروح ماهيب مرتاحه ..من حالها والجروح جروح ..
سمعت صوت نايف قريب منها .. وهو يكمل غناه ../ شـكـواه مـاتـشـفـي جـراحـه ..
شـكـواه مـاتـشـفـي جـراحـه .. والـروح خـطـر عـلـيها تــروح .. والـروح خـطـر عـلـيها تــروح ..
دايــم بالاسـرار بواحــه .. دايــم بالاسـرار بواحــه .. لو كان مافي الحكي مصلوح .. .. لو كان مافي الحكي مصلوح ..
نايف وهو يمسح على شعرها و بهدوء / عنودي ..
العنود من قرب نايف عندها غمضت عيونها .. وبهمس / هممممممم ..
نايف بهمس / ازعجتك ..
العنود ببحه / لا .. غاني مرة ثانية ..
..... من وراهم / ايش رايك انا اغاني لك ..
العنود فتحت عيونها بسرعة و بحدة طالعت براكان اللي كان لبس بنطلون زيتي و بلوزة بيج مخططه بزيتي ..
راكان نزل نظاراته الشمسية و يقبل راس العنود و توجه لشباك اللي قبال العنود / ايشلون صحتك الحين ..









قبل ثلاث شهور ..




قبال العناية المركزة ..
نايف بعصبية و صراخ / ايش سويتوا لها .. هذا اللي وعدتني فيه يا راكان .. تهتم بها وتسمعاها ..
تبطل تعاندها .. هذي اخرتها .. ذبحتتتتتتتتتتتها .. غييييببببوبة يا راكان غيبووووووبة ..
راكان يشد بشعره مقهور و زعلان على حال اخته / .........




بعدها با عشر ايام ..


الممرضة .. / انا متاكدة انها فتحت عيونها ..
الدكتور برسمية / يمكن صحيت ورجعت للغيبوبة ..



دخل لغرفة اخته ..
شافها بنفس الوضع ..
كانها نايمة طبيعي .. قرب منها و هو يجلس على ركبتها مو مهتم للوجع ..
مسك يدها و قبلها .. و همس / عنود .. حبيبتي .. اذا تسمعيني اضغطي على يدي ..
العنود ضغطت على يده و فتحت عيونها بهدوء .. نايف بفرحة وقف / عنود ..
العنود بهمس خافت وهي تمسك يده / هششششش .. ابيك بشغلة ..
نايف بمحبة / امري ..



بعد يومين ..

ابو سطام بتعب / وين راحت .. علموني ..
راكان بقهر / ما ندري .. لو كنا ندري كان شفتنا قاعدين يا جدي ..
ابو سطام بضيق / كله مني .. كله مني .. هي حلفت .. وانا ما صدقتها ..







الان ..



العنود بقهر وهي تطالع بنايف / ليه قلت له ..
راكان ابتسم وهو يلتف لها / العنود .. ترا انا اللي قلت لنايف يجيبك هينا ..
و زياد هو اللي يجيب لكم الاكل و اللي تحتاجونه ..
العنود بصدمه تطالع راكان / .................
راكان جلس على كرسي ثاني جنب العنود و بهدوء / كيف صحتك ..
العنود صدت عنه و هي تطالع غروب الشمس / بخير ..
راكان بنبرة مقصودة / واخبار الشركة .. و اوامرك .. و مخططاتك ..
العنود طالعته وهي رافعة حاجب / ايش قصدك ..
راكان تنهد وهو يهز الكرسي و يطالع الشباك / فتحت شركة صغيرة .. شركائي طلال و زياد و سيف ..
النسبة الكبيرة لي انا .. و بعدي طلال و زياد نفس النسبة .. و سيف نسبته صغيرة جدا ..
العنود ببرود / مبروك .. وانا ايش دخلني تقولي عن شغلك ..
راكان وقف وهو يسمع اذان المغرب .. وبنبرة مقصودة / علشان شركة الفارس .. لا تتعرضين لها ..
العنود رفعت حاجب بسخرية .. راكان بادلها بنفس النظرة و تركها و طلع ..
ساره دخلت عليها .. كانت لبسه بنطلون اسود ضيق و عليه بلوزة بيضاء عريضة توصل لنص الفخذ ..
قاصة شعره مدرج قصير .. لنص رقبتها .. وبسبب الحناء صاير لونه احمر .. بابتسامه / العنود ..
العنود طالعت ساره وابتسمت .. من لمن سوت العملية و شالت اثار الحرق تغيرت نفسيتها / هلا بشيخة البنات ..
ساره / ههههههههه .. من انا والا هالصغيرونه الحلوة .. " وهي تمشي شيخه قبالها " ..
العنود تحضن شيخه و تقبل خدها / فديت شيخة البنات اللي كبرت وصارت تحط شباصة بشعرها ..
شيخه تلفت بالمكان مستغربه .. ساره بضحكة / وصارت تمشي ..
سمر بهدوء / السلام عليكم ..
العنود بهدوء و قفت / وعليكم السلام ..





ـــــــــــــــ

:







بيت ابو سند ..



سند توه داخل البيت بعد ما صلى المغرب ..
سحب جواله من جيبه و فتح المكالمة / هلا حسني .. " عقد حواجبه " .. وعليكم السلام .. خير حسني ايش فيه صوتك ..
" رفع حاجب " .. من .. " وبثقة " .. لا ما عليك .. راشد سافر خلاص .. تطمن .. من اللي يسالك .. وعن ايش .. اهاا..
" باستفسار " .. ومن معاه .. ايه .. ايه .. طيب حسني .. انت خلك طبيعي .. دقايق و جايك .. بس لا تقول لاحد ..
" قفل المكالمه و رجع جواله لجيبه .. توجه لسيارته .. شغلها و طلع من المجمع متوجه لـ الشاليه "..




ــــــــــــ





بيت ابو صقر ..
رجعت مياسة بعد ما انكتب البيت باسمها و غيرت البوية " صبغ الجدار " .. و الاثاث ..
وهذا اول يوم لهم .. بعد التغيير ..



ريهام تعدل و قفتها .. وهي تتالم من ظهرها / ااااه .. احس ظهري انكسر ..
رنا تنهدت .. و بفرحة / اهم شي انه خلاص بنرتاح .. و بنقعد في بيتنا .. بحرية ..
روان ابتسمت / انتي مو مطوله .. الدراسة قربت تخلص .. و العطلة شهر و تبدا ..
ريهام صدت بضيق / ................
رنا كشرت و بقهر / انا كل ما جيت ابي انسى تذكريني ..
روان / هههههههههههههه ..
ريما دخلت و وجهها ذابل / ايش فيكم ..
رنا بقهر / هالملقوفه روانوه .. ما تشوفني مستانسة الا تطري العرس ..
ريما ببرود / اذا ما تبين بدر قولي ما ابيه .. و محد راح يغصبك عليه ..
ام صقر دخلت عليهم و بعصبية / ايش ذا الكلام .. مو تاخرت الملكه معناتها خلاص ..
رنا لبدر .. وريهام و روان ربي يرزقهم .. وانتي هذا حنا خلصنا من البيت .. ترجعين لزوجك ..
ريما بضيق / يمه .. انا و غيث خلاص .. انتهى اللي بينا ..
ام صقر بعصبية / وليه .. ايش الموضوع ..
ريما انفجرت بكي / خلاص يمه .. ما ابيه .. معاد احبه ولا هو يحبني ..
رنيم دخلت و باستغراب / ايش فيكم .. " تنهدت بضيق " .. رجعنا لسالفة غيث وريما ..
ام صقر بحدة / اقول انتي وياها .. انتم عارفين ان ...... " سكتت و هي تطالع ريهام ورنا وروان " ..
ما ابي اتكلم .. " طالعت رنيم وريما " .. وانتم الحقوني .. لزم اتكلم معاكم ..
رنيم اتكت على الجدار و بيدها شال فهد .. مرت من قبالها امها و لحقتها ريما اللي تمسح دموعها ..
رنيم طالعت خواتها .. وبتعب / فهد نام بالصالة .. كل شوي طالعوا له .. نيمته على الارض ..
روان توجهت لها / انا رايحه عنده ..
رنيم تعدلت بوقفتها / طيب ..
ريهام رمت الفوطة اللي بيدها و جلست على الكرسي .. رنا طالعتها و بهمس / ريهام ..
ريهام و هي تطالع اظافيرها / هممممم ..
رنا بهمس و كان خايفه احد يسمعه / ظنك من جد ابوك مسافر .. والا بمكان ثاني ..
ريهام طالعتها و باستغراب / اذا مو مسافر اجل وين ..
رنا رفعت كتوفها / ما ادري ..
ريهام بطفش / فاضية صراحة ..
رنا كشت بيدينها على ريهام / مالت .. " وصدت عنها .. تكمل تمسيح الدولاب " ..






ــــــــــ





بيت ابو عناد ..




ام عناد بحنان / استودعت الله اللي لا تضيع و دائعة .. ربي يحفظك .. فمان الله .. لا تسرع ..
و لوقف عند الاشارة .. قفل الباب و الزجاج .. انتبه لنفسك .. و لا تطالع بالجوال .. طيب .. فمان الله ..
ابو عناد بسخرية / مو توك قايلتها له و هو عندك ..
ام عناد " نزلت جوالها على الطاولة " .. / اذكره .. فيها شي ..
ابو عناد هز راسه / لا .. بس التخرف ذا بطليه ..
عناد / هههههههههه يبه .. خلها على رحتها ..
ابو عناد هز راسه برضاء / انت الحين قلي .. تباني اخطب لك والا لا ..
عناد تنهد / والله يبه ما ادري اشلون نخطب و نفرح و ام سلطان ما ندري عن مكانها ..
ابو عناد بهدوء / لنا شهرين ونص .. وحنا ناجل .. وراكان قالها لك .. مشي امورك انت واخوك ..
و انا عندي احساسه بانه يعرف مكان اختها .. ولو ما يعرفه ما كان زين امور شركتها و فتحها ..
عناد بهدوء / والله ما ادري يبه اذا يعرف مكان اخته .. بس امور الشركة من زمان وهو يشتغل فيها ..
ابو عناد / الله يوفقه .. انا كلمت عمك فهد .. وقال بيشاور البنت ..
عناد بهدوء / خير ان شاء الله ..
ام عناد تنهدت بضيق / وربي يرزق ريهام .. والله انها مو عاجبتني ..
ابو عناد هز راسه و بهمس / ريهام جاها نصيبها .. و ان شاء الله ان امرها تزين ذا المره ..
ام عناد بتساؤل / من خطبها ..
ابو عناد بهمس / قالي سلطان .. يقول خالتي شارت عليه يزوج زياد .. وسالوا زياد و زياد ما عارض ..
عناد هز راسه / انا سمعت راكان من قبل قال شي عن ذا الموضوع .. " و باستغراب " .. بس اذكر ان زياد مو موافق ..
ام عناد / يمكن غير رايه .. و ليه ما يوافق .. " التفتت على ابو عناد " .. و فارس و ابرار ..
ابو عناد / طلعت نتايج تحاليلهم .. و الملكه ان شاء الله مع بدر و عناد وزياد .. باذن الله نفرح بهم جميع ..
عناد بابتسامه / انا لا تلزقوني فيهم .. انا خلوني لحاااااااااال .. وعلى كيفي ..
ابو عناد بضحكة / ايش بتسوي .. وين عناد الاول .. اللي ما يعجبه الحال المايل ..
عناد / والى ذحين ما يعجبني .. بس انا ما ابي الرجه .. ابي ملكتي عادية و بسيطه وبدون جنان .. رواقه ..
ام عناد وابو عناد ابتسموا .. ابو عناد / ربي يتمم فرحتك .. و يطول بعمرنا و نشوف عيالكم ..
عناد يقبل يد ابوه / ربي يخليك لنا .. " حس بالجوال .. سحبه من جيبه وشاف المتصل .. " ابو فهد " .." ..


:







بالشالية ..





ياسر يغني بصوت عالي و هو يزين الفحم لشوي / ياليل خبرني عن امر المعاناة .. ياليل خبرني ..
يالليل خبرني عن امر المـ.. " قطع عليه صوت احد ثاني يغني .. رفع راسة وبارتباك رمى العصى اللي بيده ..
و صار يمسح يدينه في بنطلونه الجينز الازرق " .. / هلا ..
سامر و صقر و كم شاب اصدقاء لياسر و سامر و صقر صارو يطالعون في بعض ..
سامر و صقر و ياسر مرتبكين و متوترين .. الشباب يطالعون فيه باستغراب .. واحد منهم / ماعرفتونا ..
سند جلس على الفرشة وسحب التكاية و تكى عليها .. و بصوته الحاد / معاك سند ..
بتال جلس جنب سند و اتكى و هو يلف السبحه على اصبعه بحركاة دوران / معاك بتال ..
عناد يرفع عاقلة و يشده على راسة ويرجع ينزله بين يدينه و بصوت بارد و كانه مو مهتم بس النبرة ما تطمن / عنااااد ..
الشباب طالعوا في بعض و شكل الوضع ما يطمن .. و قف واحد منهم / يبدو ان و جودنا غلط ..
ياسر وقف و بارتباك و هو يبتسم / لا .. هذا اخوي و عيال عمي .. ااا .. يتعرفون عليكم ..
عناد بسخرية وهو يلف عقاله على يده / اقول يويسر كم الفرق بينك و بين اللي معاك ..
ياسر طالعه وهو عاقد حواجبة بضيق .. و احد من الشباب / اعمارنا متفرقه .. انا 24 سنه ..
و هذا اخوي 15 سنه و هذا ... " قاطعه سند بنظرات حادة نارية " ..
سند بحدة / نعرف كل شي عنكم .. الله يستر علينا وعليكم .. " واشر له بحاجبه .. اطلعوا " ..
الشباب طالعوا في بعض بعصبية و قهر .. طالعوا في ياسر و بسخرية / ما دام انك بزر ليه تجي عندنا ..
و احد من الشباب و هو يشرب مشروب غازي / يا ابو .. لا انفطمت من حليب الماما والبابا تعال عندنا ..
" طالع سامر و صقر " .. وانتم يا الذنب .. لا عاد نشوفكم .. " وبخبث " .. لا ناكلكم ..
" وهو يغمز ويرسل لهم بوسة في الهواء " .. " سامر و صقر طالعوه بقهر " ..
عناد كان بيوقف و يربي هالمسخ .. لكن بتال مسك يده .. بعد ما طلعوا .. عم الهدوء المكان ..
سند بامر لسامر / صب شاهي ..
سامر ارتبك .. / اغيره لكم لان برد ..
بتال بسخرية / لالا .. و تعلمنا ..
سند ارتخاء على التكايه وغمض عيونه و بهدوء / انا ابي اريح شوي .. لخلص العشاء صحوني ..
ياسر من طلعوا الشباب التفت على الفحم و صار يقلبه و ينتبهه للحم و معطي الشباب ظهرة و هو متوتر ..
عناد سحب شماغه و نزلة جنبة و ريح جسمه .. و بتال نفس الشي .. عناد بتساؤل / وين راكان ..
بتال باستغراب / من جد ما تدري ..
عناد هز راسه / اي والله ما ادري .. ليه عسى ما شر ..
بتال تنهد / راح لأخواته .. و بعدها بيروح لخالاته بتبوك .. يبي يتطمن عليهم ..
عناد باستغراب / يعني يعرف مكان اخته ..
بتال تنهد / الله يهديك .. الخطه كلها من راس راكان و .. " اشر على سند " .. هالمنسدح ..
عناد رفع حاجب و بعصبية / وحنا لنا شهور ندور و شايلين هم .. " طالع بسند " .. و هذا يغيب بالايام ..
و لا سألنه قال ادور على نايف و خواته .. " اخذ فنجان قهوة كان طايح قباله و رماه على سند اللي كان غافي "..
سند فز بخوف و قعد .. وبعصبية / ايش فيه ..
بتال انفجر ضحك / هههههههههههههههههههههههههههههههههههه ..
عناد رفع حاجب و كتم ضحكته / تستاهل علشان مره ثانية ما تلعب علينا ..
سند بغضب / عنااااااد .. ايش الخبال هذا .. مانت شايفني نايم .. " نفض يده بالهواء و رجع انسدح وغمض عيونه "..
عناد و بتال عرفوا ان سند مو متحمل شي .. واضح ان عنده موضوع كبير .. سكتوا و كل واحد مسك جواله ..
و صار يطقطق فيه .. اما ياسر و صقر وسامر فالرعب تملكهم .. سند معصب و واضح ان جيتهم مو عابره ..







ـــــــــــــــــ

بمزرعة العنود ..


بعد العشاء ..




راكان جلس جنب العنود و اخذ فنجان الشاهي .. وبهدوء / ايش رايك بعد بكرة نروح لتبوك ..
خلود وخديجة ولدو وجدي سوا عمليه فأشرايك مره و حدة نسلم و نغير جو ..
العنود طالعته وبهدوء / اممممم .. نروح ..
راكان مسك جواله و صار يطقطق فيه ... ابتسم / فيه باقي من العشاء والا خلصناه ..
العنود باستغراب / لا اتوقع فيه ..
راكان ابتسم / تاكدي لان بيجونا ضيوف ..
العنود باستغراب / من الضيوف ..
راكان / ههههههه واحد ملقوف و زوجته و عياله .. اسالي قبل لا يوصلون ..
العنود رفعت جوالها و اتصلت على زهرة و قالت بان فيه عشاء و طلبت منه تبلغ الشغالات يجهزونه ..
راكان صور الظبي وسلطان و طقطق بالجوال و بعدها قفل الجوال و رماه جنبه ..
العنود طالعته و بهدوء / ايش عندك ..
راكان رجع يصب له شاهي ابتسم و بنبرة مقصودة / سلامتك ..
العنود تنهدت و هي تصد عنه / .................
راكان طالعها و بهدوء / انا عرفت كل شي .. كل اللي يملكة ابوي و اللي تملكينه .. بس فيه سؤال محيرني ..
ليه جدتي الظبي كتبت كل اموالها باسمك .. ما عداء كم عماره و كم محل باسم خلود وخديجة .. ليه ..
ليه ما كتبت شي باسم نايف .. و ابوي كان كاتب و صيته من قبل سنين .. وليه اسهمه بالشركة باسمك و باسم سند ..
العنود بغموض / ............
راكان بهدوء / عنود .. ابي افهم .. ايش اللي بينك و بين سند و شركة الفارس ..
صلاح جاني و قال انك تبين تخسرين شركة الفارس .. ليه .. وانا اعرفك مانتي طعانت الظهور ..
العنود تنهدت / هذي وصيت ابوك .. شركة الفارس ترجع تحت جناح سطام ..
راكان باستغراب و عدم فهم / كيف يعني ..
العنود التفتت على اخوها / شركة الفارس اساسا اسسها ابوك .. و لمن راح الرياض .. تركها لجدك و عمامك ..
و عمامك طلعوا ابوك منها .. ولمن استقر ابوك بالرياض .. قال ان شركة الفارس لزم ترجع تحت سلطة شركة النايفه ..
راكان بتفهم / يعني تكون من ضمن مجموعة النايفة ..
العنود هزت راسها / بالضبط ..
راكان تنهد / و انتي كيف كان ودك ترجعينها .. تكسرينها .. و تكسرين عمامك .. طريقتك خطاء .. كذا تذلين عممامك ..
العنود طالعته و بهدوء / يعني ؟؟!
راكان بهدوء / كان بامكانك ترجعينها تحت مجموعة النايف بطريقة تزيد قوة لعمامك مو تضعف ..
العنود رفعت حاجب / هااااا ..
راكان بهدوء / ابوك سنين وهو يدعم شركة الفارس .. وحتى لمن كان بعيد عنها كان يدعمها ..
و اي احد يبي يضرها كسره .. وهو مايبي يشارك اخوانه لانه مكتفي باللي عنده .. و تدرين ان ابوي الله يرحمه ..
كان يبي يدعم عمي عبدالعزيز علشان يفتح شركة مستقله له ولعياله .. و لعمي خالد بعد .. بس بفضلك ..
هديتي هالاشياء .. " هز راسة " .. انتي فهمتي طلبة بطريقة عدوانية .. ما ادري ليه ..؟
العنود بعصبية / ليه .. لان الفارس ما قدموا لابوك و لا لانا شي .. كانوا يتعاملون معانا بجفا ..
فتعاملت معاهم بجفاء .. جدتك قبل و بعده ابوك .. و بعده انا .. اشلون اقدم لهم شي فيه خير ..
راكان بصدمة / عنود ..
العنود مسكت راسه / اص راكان اص ..
راكان طالعها بضيق و حزن .. وقف و مسح على شعرها .. / اهدي .. وبعده راح نتكلم ونوضح الامور ..
تركها نزل تحت و هو ضايق على حال اخته .. عمرها ما شاف العنود بهالقسوة و هالضياع .. وقف على درج المدخل ..
وهو يفكر بايش راح يسوي مع العنود و يرجعها لوضعها القديم بايام ابوة و جدته ..
سمع صوت سيارة توقف و راه .. التفت و شاف طلال نازل وهو لبس برمودة بيضاء و بلوزه زرقاء ..
راكان ابتسم / يالله ايش هالنشبة ..
طلال ابتسم / بس حلوة ..
راكان انتبه لمرام وهي تنزل من السيارة صد عنهم و هو يقول / جيب لي عزوز بس ..
طلال اخذ عبدالعزيز من يدين مرام و تقدم لراكان .. مرام دخلت للفلة وهي تمسك يد مريم و تمشيها معاها ..
و الشغالة وراها شايلة شنطة عبدالعزيز ..اللي تو ما اكتمل عمره شهرين .. ابتسمت اول ماشافت سارة ..
مرام بابتسامة / ما شاء الله .. " بعد ما سلمت على سارة وسالتها عن الحال و الاحوال " .. محلوة يا بنت ..
ساره تنفخ خدودها / صرت دوبيه ..
مرام بضحكه / هههه لا والله جسمك ما شاء الله صار روعه .. و غمازتك وضحت مره .. الحمدالله على سلامتكم ..
ساره ابتسمت / الله يسلمك .. و الحمدالله على سلامتك .. وين عزوز .. جايبين له هدايا كثيييرررر من امريكا..
مرام ابتسمت / فديتكم .. و ين العنود وسمر ..
سارة و هي تدخل مرام / العنود هينا بالصالة .. وسمر راحت تنيم بنتها ..
دخلت مرام وهي مبتسمه / السلام عليكم ..
العنود ابتسمت وقفت / و عليكم السلام .. هلا وغلا ..






ــــــــــــــــ






ـــــــــــــــــ

بالشالية ..




بعد العشاء ..

سند يمسح يدينه بالمناديل وبسخرية / والله تعرف تضبط العشاء يا يويسر ..
ياسر بهدوء يخفي رعبه وتوتره وهو يصلح ابريق الشاهي على الفحم / هني وعافيه ..
سند طالعها بنظرات حادة و هو يفرك با اصابعه / ............
عناد بسخرية / اقول يويسر .. من وين اشتريت هالتيس ..
ياسر بنفس الهدوء وهو يشوف لون الشاهي / من ابو محمد ..
بتال بسخرية وكانه مقهور / تؤت ؤ تؤ .. ايش ذانب التيس المسكين ..
لو ذبحت واحد من هالتيوس اللي تسحبهم وراك يا الثور ..
ياسر وسامر و صقر " ينتظرون لحظة القصاص " / .................
سند طالع صقر و اشر براسة على ترمس الشاهي الي قبل قالهم يصبون له منهم / صب لي فنجان من ذا الترمس ..
صقر يبلع ريقه / بردت و اختلف الشاهي .. ياسر سوا ابريق جديد ..
سند توجه لترمس و صب له فنجان .. شرب منه و حس بمراره غريبه رمى الفنجان و الترمس على الارض بغضب ..
سند بغضب / تضحكون على من انتم .. على بالكم نايم على اذني .. وما ادري بسواياكم .. " وبسخرية " ..
لا .. وبدير مسوي فيها كبير و مغطي على افعالكم .. ما اردا منكم الا هو ..
ياسر بعصبية و قف / حنا كبار و عقلنا براسنا .. يعني انتم اللي تسـ....
كف من يد سند خله يلتف بالرمل .. ياسر حط يده على خده .. سند بعصبية / و الله و طلع لك صوت يا ياسر ..
سامر الي كان مرة يطالع ياسر ومرة سند و بنص عين يطالع بتال لم يدينه على صدرة ويطالع سامر بنظرات حارقة ..
صقر قابض يده و حطهم على فمه .. و يطالع ياسر و الدم طلع من فمه ..
لكن شهق اول ما شاف سند يضرب ياسر بالعقال .. التفت على عناد اليقال بسخرية / جايك الدور يا الصقر ..
صقر التفت برعب على سند اللي يتلفظ على ياسر باشين الالفاظ و ارذلها ..
سامر برعب يطالع ياسر .. حس بخدر برجولة ويدينه .. ما يدري كيف عرفوا .. كل اللي يسوونه كان بسر ..
التدخين .. التفحيط .. معاكسات البنات .. السهر .. المنشطات .. السحب عن الجامعه .. لمن طولوا و محد عاقبهم ..
فكروا ان محد يدري عنهم . ولا احد يراقبهم .. حس بشي حار على ظهر .. شهق وهو ينقز يبي يبتعد ..
بس حس بالضربة الثانية من عقال بتال اللي حس فيها انها قسمت ظهرة بنص ..
صقر انفجر بصراخ عليهم لكن عناد كان اسرع و بدا بجلد صقر ..






ـــــــــــــ







بيت ابو طلال ..


بالصالة ..


ابو طلال يقبل يدين صغيرته هيام .. و يلعبها ..
نوال جلست تحت الكنبة وهي ترج الرضاعة .. / بابا .. ابي ارضعها ..
ابو طلال يبتعد عنها / طيب .. " وبتساؤل " .. وين مريومه الصغيره ..
الجازي بهدوء / اخذهم طلال و راح لاخواته ..
نوال تمثل .. تنهدت بحزن / اخونا باعنا يبه ..
ابو طلال مو فاهم شي / انتم ايش تقولون ..
مريم بضحكة / طلال يوم عرف ان راكان رايح لاخواته العنود وسارة و قام قال لمرام اجهزي رايحن لهم ..
ابو طلال ابتسم / خله يروحن لها .. " تنهد بضيق " .. يمكن يريحون نفسيتها شوي ..
الجازي بضيق / اي والله .. مسكينه هالبنت .. ما شافت يوم حلو من طيحت ابوها ..
ابو طلال بضيق و حزن / ربي يفرجها عليهم .. و يعنهم .. " التفت على نوال بهدوء ".. بابا نوناا ..
نوال رفعت عيونها باستغراب وهي كانت تطالع بهيام وهي ترضع بحضنها / اوووووه ..
بابا انت تدلعني .. من زمان ما سمعتها منك .. نونا .. ايش صار ..
ابو طلال ابتسم / بكرة تسمعينها كل يوم من غيري اللين تلوع كبدك ..
نوال عقدت حواجبها / ايش قصدك ..؟
ابو طلال بهدوء / صار لزم تجهزين لزواجك .. سعود اليوم اشترا فله صغيرة .. وكتبها باسمك ..
نوال بحرج / ................
الجازي تنهدت / انا قايلة لها من زمان تشتري اغراضها وتجهز امورها برواقه لكن هي ما تسمع الكلام ..
ابو طلال بسخرية / مصدقة ان بتقعد اللين ما سعود يجمع مهرها ..
نوال بصدمة / وعسى مو منفذ شروطي ..
ابو طلال ببرود / من قال .. لا يا بابا بيدفعهم كلها وبنفذها .. بس تتزوجون و يدفعها بالاقساط ..
نوال بقهر سحبت الرضاعة من فم اختها / لا هذا غش ما يصير بصراحه ..
ابو طلال رفع حواجبة و فتح عيونه / ايش اللي غش ..
نوال وهي تحرك يدها والرضاعة فيها / انكم تقولون له خلاص خـ.....
الجازي تسحب الرضاعة بقوة من يد بنتها و هي تسكت الجازي باليد الثانية .. وبعصبية / قومي ..
نوال تطالع امها بخرعة / يمه ابـ.....
الجازي مره معصبة / اقول قومي من قدام وجهي .. بغيتي تذبحين اختك .. قووووووووومي ..
نوال تقوم بضيق / والله هذا ظلم حرام عليكم ..
ابو طلال / هههههههههههههههههههههههههههههههههه ..
ريان بشماته / تستاهلين .. انا قلت لك صيري اختي ومحد يقدر يقولك شي بس انتي تبين تصيرين اخت هويام ..
نوال بسخرية / هويام .. عاد من زينك علشان محد يخافون منك ..
ريان ينفخ صدرة / ايوه يخافون مني .. لاني انا السلطان سوليمااااااان ..
نوال تبوس وجه يدها وقفاها / يا ربي عفوك ..
ابو طلال يطالع بـ أولاده ويضحك عليهم .. مريم اخذت هيام الصغيرة اللي تو عمرها شهرين وصارت ترضعها ..






ـــــــــــــــ






يوم جديد ..




شركة الفارس ..


سلطان بعصبية / خلهم بالمزرعة .. وانا اوصي عليهم ابو محمد .. ان ما خليتهم يتربون ..
سند بضيق / بس اللي فرحني ان دمهم نظيف من المخدرات ..
سلطان تنهد / الحمد الله .. " و بنبرة مقصودة " .. و راشد ايش صار عليه ..
سند بجمود / وصل المدينه و سجنوه ..
سلطان بضيق / متى محاكمته ..
سند هز اكتافه / يقول المحامي اللي كلفه غيث انه بعد اسبوع ..
سلطان هز راسه بضيق / لا حول و لا قوة الا بالله ..
سند بضيق / الله يرحم خالي سطام لانه كان يحميه و يساعده .. تمادى عمي راشد بخطاه ..
سلطان وهو يرجع ظهرة على الكرسي / سطام ماكان يساعدة الا علشان البنيات .. خايف عليهم ..
لكن هو اللي تأذى الله يرحمه .. " وبصدمة " .. انا تفأجات يوم قلت حاولوا يقتلونه .. لكن راح فيها نايف و امه ..
الله يرحمهم ويغفر لهم جميع ..
سند بهدوء / اللي عرفته .. ان خالي كان يستخدم عمي راشد بدون لا هو يدري .. وكشف كثير من تجار المخدرات ..
بس لمن اكتشفوه ..كانوا بيقتلون عمي راشد .. بس هو تفطن بان الي يبلغ الحكومة هو خالي سطام وصار يلعب عليه ..
سلطان هز راسة / ولمن مرض سطام .. غيروا خططهم .. بان يسحبون راكان و نايف لعصابتهم ..
سند / بضبط .. " و باستغراب " .. بس ليه ما كانوا يتقربون من زياد .. برغم انه اخوهم ..
سلطان تنهد / بصراحة وانا عمك زياد مو عاجبني .. بارد و دايم سارح ..
سند هز راسة / اية انتبهت .. وراكان انتبه .. علشان كذا قال خله يتزوج راح ينشغل باله بعياله و يتحرك شوي ..
سلطان برضاء / ايه الله يوفقه .. راكان احسه هـ الايام مستكن شوي ومركز .. مو مثل قبل ..
سند بعذر / قبل كان مصدوم .. و الحين الحمد الله ..
سلطان بضيق / بس العنود مقطعة قلبي .. " و بهمس " .. شفت الشيب براسها .. من كثر الهموم شيب راسها ..
سند بضيق / ناسي كيف كانت حال خالي .. و بعد مات قدامها .. وبطريقة بشعه ..
سلطان هز راسة بالم / لا ما نسيت .. جعله بجنات النعيم هو وجميع المسلمين ..


يوم جديد ..




بالمول ..

نوال معاها مجموعه من الاكياس .. وتطقطق بجوالها و بضيق / ابرار ليه ما ترد عليه ..
مرام ابتسمت / يمكن خجلانه ..
دقايق و الا ابرار و شجون يدخلون عندهم .. و بهمس / السلام عليكم ..
مرام و اماني و نوال .. / وعليكم السلام ..
نوال / ليش تاخرتوا ..
ابرار بخجل / و لا شي ..
نوال بصدمة / نعم .. لي انا " و بعوبتها المعتاده " .. من عيونك اللي من وراء البرقع عارفة ان فيه شي .. قولي يالله ..
ابرار بخجل و احراج من مرام / خلاص بعدين ..
اماني بضحكة / نوال يا الخبلة مستحية من مرام ..
مرام باستغراب / تمزحين .. ههههههههه .. مو منجدك ابرار ..
شجون جامدة و حتى انفاسها جامدة / ............
ابرار ببحة خجوله / خلاااااص ..
مرام بضحكة / طيب خلنا نكمل تسوق ..
ابرار تهمس لنوال / يبي يشوفني .. وامي قالت اختاري فستان حلو ..
نوال ابتسمت و بخبث / مو هو شافك وخلاص ليه يعني يبي يشوفك مرة ثانية ..
ابرار تضربها بكوعها و بحرج / وجع لعدوينك نوالوه .. لا تحرجيني .. انا امي توها بلغتني .. يووووه نوال خايفه ..
نوال مبتسمة / لا تخافين ولا شي .. خلك عوبة مثلي حتى تطيحينه على وجهه .. الا تعالي متى يبي يجيكم ..
ابرار بغصة / اليوم بعد العشاء ..
نوال بصدمة و صوت عالي / ايييييش ..
مرام تضربها على كتفها وبفشلة / وطي صوتك ..
نوال بذهول / تعالي اسمعي .. اخوك يبي يشوفها اليوم .. امس مملك واليوم بيشوفها .. ايش الفجعنه هذي ..
مرام بضحكة / طيب ايش فيها .. المهم .. " وهي تمسك يد ابرار " .. انتم خلكم هينا .. " و هي تاشر لهم على كوفي "..
انا عندي شغلة مع زوجة اخوي نقضيها و نرجع .. " ابرار بخجل صارت تصدد عنهم " ..
نوال بقهر / لا والله .. رجلي على رجلكم ..
مرام اشرت لها بعيونها يعني فيه مفاجاة .. نوال بقهر و اصرار / ما نبي نقعد " وهست لها " .. من بعيد لبعيد ..
مرام هزت راسها و مسكت يد ابرار و مشت لمحل المجوهرات .. اللي كان ينتظرهم فيها .. فارس و عناد ..




انتهى ..

لا اله الا الله محمد رسول الله ..
سبحان الله .. و .. الحمد الله .. و .. الله اكبر ..

اتمنى هالبارت يعجبكم .. و يكون فتحح بعض العقد .. و ربط بعض الحبال و عقدها .. ^_^ ..
و اعذروني على القصور .. و الاخطاء الاملائية ..

لا تنسوني من دعائكم ..

اختكم ..
مشاعل السعودية ..











ــــــــــــــــ







بالمزرعة "مزرعة الفارس " ..




ياسر بتافف / هفففففففففففففف .. انا احس راسي صار يطبخ من حرارة الشمس ..
سامر و هو ياكل تمرة / و الله ينطبخ من الشمس و لا من بربرة هالنيجيري اللي حاطه اخوك فوق روسنا ..
صقر بقهر / انا مو قاهرني الا ابو محمد .. كل ما كلمناه .. قال مالي دخل ..
سامر بتساؤل / الا اقول و ين صبري ..
ياسر وهو يعدل مجرا الماي / صبري راح من زمان .. من لمن راح نايف ..
سامر يشيل الترب الي طلعه ياسر من مجرى الماي و رماة بمكان بعيد ...
صقر / اقول ايش رايكم نروح و نشوف الكاسر .. " و بخبث " .. و نسوي له شي يفقع كبد بتيل ..
ياسر و قف شغل و رفع راسة / والله من البزرنه .. الكاسر طلع حق العنود .. وصبري اخذه معاه ..
صقر رفع حاجب و شاف ياسر عاقد حواجبه بغضب .. كمل شغلة في رص الحجارة على مسار الماي وهو ساكت ..







ــــــــــــــــــــ



بمزرعة العنود ..



العنود على ظهر الكاسر و تركض به بجنون ..
طلال وهو متكي على السياج و بجنبة راكان / اووووف .. معصبة ..
راكان بضيق / ما ابيها تعصب ..
طلال طالع بنايف و زياد و رجع طالع راكان / ايش بتسوي معاها ..
راكان ببساطة / راح اخذ كل شغل الشركة .. فرع الرياض راح يكون تحت يد ابو غازي مثل ماكان ..
وراح اكبر شركة الفارس .. اتفقت مع عمي و سند على هالشي .. و راح ابقى انا بشركتنا الصغيرة اتعلم فيها ..
طلال / انا اقصد العنود ..
راكان ابتسم / راح ارجعها لمملكتها .. تامر و تنهي .. و تفرح و تغني .. راح ارجعها العنود الغنوج ..
طلال رفع حواجبه / الله يعينك ..
راكان برد سريع / وانت معاي ..
طلال طالعه .. وبصدق / والله اني حبيت العنود و قربت من نفسي و فهمتني اكثر من نفسي ..
" التفت يطالع العنود " .. بس انا ما فهمتها ابد .. " وبضيق " .. برغم اني اشوف الحزن والضيق بكل تفاصيلها ..
راكان تنهد وهو يطالع اخته / ما كانت كذا .. بس اخر سنه كان و اضح الهم عليها .. و اكسرتني ..
طلال طالع العنود و سرح فيها .. وابتسم وتذكر بتال اللي حلف انه يجي لهم بالمزرعة .. طالع راكان ..
طلال بضحكة / راكان ..
راكان طالعة و باستغراب اشر له براسة / ايش فيك ..
طلال بضحكة / بتال جاي .. ايش رايك نحوسة ..
راكان صد وبضيق تنهد / والله يا طلال ماني فايق له .. انا كل ما اشوفه و اتذكر انه هو اللي كسر ظهر العنود ..
النار تشب بصدري .. انا ما احط الوم كله عليه .. بعد انا اتحمل و العنود و جدي .. كلنا ..
طلال بضيق طالع الصغار اللي يلعبون مع ساره و نايف ../ ما اكلها الا هالصغيرين ..
راكان هز راسه / وانا ايش اللي مضيق صدري غيرهم .. ما ابيهم يعيشون بفراق و شتات ..
طلال بنبرة مقصودة / يعني بترجع العنود لبتال ..
راكان تعدل بوقفته و هو يشوف العنود تنزل من ظهر الكاسر .. / اذا العنود رضت .. واذا لا ..
والله لو يحب القمر ما رجعتها له .. لو اوقف بوجه الكل .. " ابتسم للعنود " .. كبرتي و عجزتي ..
العنود ابتسمت وهي تتنفس بتعب / لا والله .. بس لان من زمان عن الرياضة ..
راكان بحنان / بس لاتتعبين نفسك ..
العنود جلست على احد الكراسي و هي تنزل بوتها .. و بسخرية / راكان ما تعودت منك هالحنيه ..
" وبحزم " .. لا تحسسني باني ضعيفة ترا اجيبها على راسك .. انتبه ..
راكان بضحكة / ههههههههه .. لا بس ابي احسسكم اني اخوكم الكبير .. " لعب بشعر العنود شوي و نزل يقبل خدها " ..
العنود طالعته بنظرات ساخرة و شفاتها ترتسم ابتسامه بارده .. طلال بضحكة / او ياذي النظرة تقتل الطموح ..
راكان يتنهد بمزاح / اااااه العنود من يومها قناصة و بمقتل ..
راكان سمع صوت رنين جواله سحبه من جيبه و فتح المكالمه و بضحكة / هلا .. ايش تبي .. مالك عيال عندنا ..
هههههههه .. طيب يا قوي .. حياك .. " قفل المكالمة و رجع الجوال بجيبة " .. بتال يبي عياله ..
قالها و هو يطالع بالخيول تدور بالميدان و تاكل من حشايش الارض .. العنود صدت عنه و صارت تطالع الخيول ..







باخر الليل ..



طلال و راكان و نايف و زياد يلعبون و رق .. " بلوت او باصره " ..
طلال بقهر يرمي الاوراق اللي معاه / لالالالا .. هذي ثاني مرة نخسر فيها ..
نايف بتافف / الحظ قايم معاك الليلة يا ابو شيخه ..
راكان / ههههههههههه .. الحمدالله .. والله يبعد عيون الحساد عنا ..
طلال يطالعه بنص عين وهو يريح نفسه و يتكي / اهاا بس لا يكثر .. يا كم مرة كسرنا فيها راسك ..
التفت وراه .. و شاف العنود و مرام و ساره و سمر جالسين على الطاولة و قبالهم مكسرات و ترمس شاهي و قهوة ..
و كلهم ملفتين بجلال الصلاة .. و مرام و سمر متبرقعات ..
طلال بابتسامه / عنود .. تعالي عندنا نبي نسولف معاك ..
العنود طالعته و ابتسمت / ايش تبغى مني ..
طلال يرفع حواجبه و بضحكة / اول شي .. بطلوا اكل من هـ المكسرات .. مغير بتنفخكم ..
مرام فتحت عيونها للاخير و هي فاهمه بانه يقصدها بالكلام .. شهقت بصدمة ..
طلال يكمل بخبث / ترا نعرس عليكم ان انتفختوا .. نبي وحده جسمه مثل غصن البان ..
العنود اخذت فنجان قهوة واعطته مرام و بتحريض / ارمية ..
مرام ما صدقت خبر و رمته على طلال .. بس طلال تحاشاة و ضرب بالتكاية ..
راكان و نايف وزياد / هههههههههههههههههههههههههه
طلال ابتسم / هههههههههه ام عزوز حبيبتي انتي لو تصير كبر البرميل احبك ولا اعرس عليك ..
بس انا اقصد امسيكينه ام شيخة ترا راكان ما ينضمن ..
راكان يضحك / ههههههههه .. طلاليل و الله لو تكلم من اليوم لبكرة .. سمر متاكده ان قلبي مبصوم عليه اسمها ..
ختم كذا .. " وهو يضرب يديه في بعضها " .. حصريا لسمر بنت سلطان .. حب الطفولة و المراهقة و الشباب ..
العنود تقوم من على الكرسي و هي تاخذ ترمس الشاهي و صحن المكسرات و تقدم من اخوانها ..
جلست بينهم و هي مبتسمه / جعل ربي يهنيكم و يخليكم لبعض .. " طالعت طلال و بهدوء و ابتسامه رايقة " ..
ايش تبي تسمع طلال بيك .. ايش عندك من سوالف ..
طلال بضحكة / هههه .. ام سلطان .. الله يهديك .. تعرفين اني اخاف من نظراتك ذي و نبرتك الباردة ذي ..
العنود ضحكت / هههههههههه .. " وبغنج " .. طيب علشانك راح نغيرها ..
راكان بنبرة مقصودة وهو يطالع ملامح وجهها / خلي نبرتك الباردة ونظرتك هذي لبكرة لجاء بتال ..
العنود رفعت عينها له و برود / و خير اذا جاء .. يبي يشوف عياله .. " وبخبث " .. ما يشوفني ..
راكان ابتسم و بخبث / بس يمكن يطلب يكلمك ..
العنود بحزم / ما بينا كلام ..
راكان هز راسة و بهدوء / طيب ..
طلال بيغير الوضع / امممم .. العنود .. احكي لنا شوي عن الظبي ..
نايف بضحكة / طلال ايش فيك .. من زمان و ات بس تسال عن جدتي ما كفاك اللي قاله لك جدي ..
طلال بحماس / لا .. ابي اعرف اكثر ..
العنود باستغراب / جدي كلمكم عنها متى ..
طلال بحماس / من زمان .. المهم انتي قولي لنا غير اللي قاله ..
العنود بضحكة / هههههه .. طيب هو ايش قالكم ..
طلال باعجاب / قالي قصة يوم جاهم ضيف بعد وفاة اخوانها و مرض ابوها .. كيف تعلمت الذبح و طبخته ..
العنود هزت راسها .. راكان با استغراب / الا اقول يا العنود .. الاموال اللي عند جدتي الظبي .. من وين لها ..
العنود بهدوء / ورثته من ابوها .. ليه ؟ ..
راكان باستغراب هز كتافه / جدي سعود يقول ان جدي جابر خسر كل امواله بعد و فات عياله و مرضة ..
العنود بهدوء / انا اقولكم السالفه .. اللي كثير ما يعرفها .. جدي جابر .. لمن ماتوا عياله و مرض ..
خاف على بنته .. برغم ان ولد عمها سند و اللي كان راح يكون زوجها ماييبه شي ومعروف برجولته و قوته ..
الا انه خاف ان يكون حب سند لـ الظبي علشان مالها .. قام و باع حلالة كلة و ترك امواله عند صاحبا له برا القرية ..
وقال لمت يجيك احد و ياخذ هالفلوس وكان بينهم بيت قصيد يعرف انه مرسول من صاحبة ..
و يوم من الايام .. كانت جدتي الظبي تطرز ثوب .. كانت تطلع قهرها وحرقة قلبها على اخوانها بتطريز ..
كل ماخلصت من ثوب تصدقتبه على واحد فقير عن نية واحد من اخوانها .. وهذاك الليلة .. دخلوا عليها حريم ..
واسالوها ايش تسوي باخر اللي ياظبي يوم تشعلين نارك و تغنين و تسولفين .. قالت وحدة .. ليكون حبيبك ..
قامت جدتي وقالت لهم ايه حبيبي .. وانتم اشغلتون عنه .. و طردتهم .. وهم احتروا عليها .. و راحوا يهرجون بقفاها ..
و زاد الهرج .. وتناقلوة من لسان للسان وهي ما تدري .. الين سمعه سند و جاها ابخر اللي و سمعها ..
و ضربها و قهرها وقهر ابوها .. وحلف ابوها انه يزوجها لراعي اللي ربه و لا يزوجها لسند ..
اللي حفت رجولة وهو يترجى بعمه انه يسامحة و يدلة على مكان الظبي ..
راكان بصدمة / يعني جدتي كانت متزوجة قبل جدي سعد ..
العنود / لا .. الراعي هو جدي سعد .. المهم ..
راكان يقاطعها / كيف تزوجها .. وين اخفاها ..
العنود تنهدت / بنفس الليلة .. الي سند ضرب الظبي فيها .. جدي ارسل واحد من الرعيان اللي حول بيته ..
ينادي الراعي اللي عند جدي .. و نادوه و ما طاع الشمس الاوهو عنده و الشيخ بعد موجود ..
وقاله انه يبي يزوجه لبنته .. وجدي سعد كان يهوا جدتي الظبي .. و فرح ان جدي جابر يبي يزوجه بنته ..
لكنه تفاجاء يوم قاله الحين تتزوجها وتاخذها وتطلع من الديرة وقبل لا تغيب الشمس .. ولا احد يعرف لكم طريق ..
و فعلا تزوجها وراح .. وبما ان بيته باطراف القرية محد عرف شي الا بعد ما كانت الشمس بكبد السماء ..
راكان / وليه جدي بنى بيته باطراف القرية ..
العنود / لانه يبي يبعد عن ريحة عيالة والاماكن اللي كانوا فيها .. لعل يقدر يصبر كبدة و يقويها .. المهم ..
بعد زواج الظبي بكم يوم توفى جدي جابر .. وما درت عنه جدت يالا بعد شهور .. جاها الخبر مع واحد من الرعيان ..
قابل سعد صدفه .. و بعد ما قدرت تشد حالها راح عند صاحب ابوها .. واخذت الفلوس منه ..
و حلفت انها معاد تقبل على بيت الفارس اللي قهروها فوق قهرها .. و زودوا قهر ابوها اللين مات ..
راكان / و جدي سعد .. ايش سوا معاها ..
العنود تنهدت / جدي سعد .. لقاه واحد من عيال عمه بعد سنين من زواجه .. بعد ما جابت جدت امي و خالتي شمه ..
و جابت خديجة .. و بينهم جابت كثير بس كانوا يموتون .. و قهرها و ظامها اكثر . .لانها كسيرة جناح ..
لكن سبحان الله .. ربي جمعها مع اخوها اللي برضاعة منصور .. و شدت نفسها .. وقدرت تقهر ال سعد ..
لكن جدي سعد كان ابليس مرافقه .. و قدر انه يبعدها عن اخوها .. بانه غير البيت .. وبعد سنين ..
قابلته بالمستشفى وهي توها والد بنايف .. و يوم عرفت بان جدي سعد وده ياخذ كل ما بحيلتها و يرميها ..
رضعت متعب حتى يكون عزوة لنايف .. الحقية بصلاح و ارضعيه .. ومن بعيد لبعيد كانت تقرب من اخوها ..
الين ما صادفت ابوي بمكه ..و شافت الشبة اللي بينه وبين اخوها نايف .. و هو اللي قطع قلبها .. و سوت المستحيل ..
اللي زوجته من امي لكن حلفته انه ما يقول لاهله و خاصة ان سند كان متبطش باهلة و قاهر حريمهم وكاسرهم ..
وهي قلبها قاسي و حالفه على البعد والجفاء الا انه ضعيف جهة سند .. لو سند لقاها و قالها ارجعي لترجع معاه ..
طلال باستمتاع / يعني كانت تحبه ..
العنود / الا قول مجنونة فيه .. كانت لضاقت عليها و قهرها سعد بضربه لها .. تقص من شعرها و ترسله لها ..
وهو يعرف ذا العلامة .. كانوا يتراسلون نبها من قبل لا جافوها ابوها واخوانها .. فيقوم هو يترجاء عمه و يسامحها ..
وهو كل ما جاته من شعرها خصلة يجن جنونه .. و يروح يوجع نفسة ازود ..
راكان بتساؤل / طيب ليه ما يمسك الرجال اللي يجيب الرسايل و يساله عن المكان ..
العنود / كان يسويها .. بس هي اقوى .. كانت ترسلهم من سوق او من مكان بعيد و لا يعرفها فيه احد ..
و بعد هم ما كانوا يعرفون اسم جدي سعد الحقيقي .. غير الراعي ..
راكان هز راسه .. طلال باستغراب / كيف ما يعرفونه ..
العنود بتعب / ابوه كان شارد من عند اهله .. ثار او شي زي كذا .. وتزوج من قرية جدتي ..
و جاه سعد .. و طلو فترة ما هو جالس عند جدي جابر .. ساله عن اهله و عن اصلة و ماسمح لاحد يسالة عن شي ..
حتى لا يجيه احد من اهل الثار و يضره ..
طلال و هو ياكل فستق و بضحكة / مسلسل بدوي .. " و بكوميديا " .. و ضحى و ابن عجلان يا ولد ..
الكل / هههههههههههههههههههههه ..






ـــــــــــــ

مسائك سعادة تدوم
يعطيك العافيه ميشو على البارت
العنود
هذه مريضه نفسيه وش نتقمين من اهلك وتكسرينهم عشان ترجعين حق ابوك في الشركه
انتوا لكم نصيب فيه لو سالتيهم بينكرون ما اعتقد هم يدورون رضاك وانت تحفرين لهم
والحين يقالك تعاقبينهم ببعدك عنهم والا تعاقبين نفسك
اقولكم مريضه
طيب جدتك وغلط عليها ولد عمها وهو عصبي وماله الا اللي سمعه اجل في وحده عاقله تقول اخبط لحبيبي
والناس وش يعرفها ان حبيبها تقصد فيه اخوانها
وندم على خسرتك لدرجه انه كان يعذب نفسه كلما تعذبتي وش الحب
وهذا بتال سوا بنفسه زي ماسوى جده لما عرف انه ظلمك راح حرق نفسه
بس جدتك كانت تحب سند وياترى انت تحبين بتال والا تكابرين

راشد
احسن شئ صار له انه ينسجن ويبعد عشان يعرف قيمة النعمه اللي كان عايش فيه
بناتك هذا هم راح تمشي حياتهم هذه وحده من البنات بتتزوج وانت بعيد عنهم يعني وجودك زي عدمه

شباب العائله
اللي صار معهم بسب انشغال الكبار عنهم بس زين انهم لحقوا عليهم قبل فوات الاوان
ويستاهلون الضرب اللي جاهم من آمن العقوبه اسآء الأدآب
لو حالوا يرجعون راح يعرفون ان وراهم ناس تراقبهم

سعود
واخير بتجتمع مع العوبا الله يعينك عليها تصدق انها راح تبتلى بحبك لا تحاتي



وهذا عناد وفارس خطبوا وبيتزوجون
يعني ماله حجه ياسر يجي ويخطبك اخوانه وبتزوجون نشوف بيصدق في كلامها والا خلاص مل منك ولا عاد تجوزين له


ام الدانه
دمتي مبدعه

الله يعطيك العافية ويوفقك بارت أكثر من رائئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئئ ئئئئئع