بانتظارج دوم ميشو وتسلمين على الابداع والتميز

"

بسم الله الرحمن الرحيم ..

السلام عليكم ورحمة الله وبركاته ..

الحمد لله والصلاة والسلام على رسول الله ..

توكلنا على الله .. لا اله الا الله محمد رسول الله ..





البارت 41 ..






كلك تعالي غـلا ولا ارجعـي كلـك
بعض الغلا منك ما يستاهـل الجيّـه
ما بَلّ ثوبك مطر شوقـي ولا بلّـك
لو علّتك من سحاب الروح وسميـه
ليه امشي الدرب دامه ما يوصّل لّك
تخاف رمضا الضياع اقـدام رجليّـه
يا بنت توّ الهوى ما صرت انا خلك
للحين ما زالـت الصـوره رماديـه
ومازال بعض الغموض الشره يحتلك
وشلون انا اعشقك واحبك على النيه
اشوفـك هنـاك قدامـي ولا ادلـك
صعب الكتابه إلى صار الورق ميّـه
ان كان شمسك تساومني على ظلك
ما عاد ابي منك لا شمسٍ ولا فيّـه
اما تعالـي لقلـبٍ فـز لـك كلـك
ولا اتركيني ما ابي لك بالهوى جيّه


" مساعد الرشيدي "..






سارة دخلت المطبخ .. فتحت الثلاجة وطلعت جبن و زيتون و طماطم وخيار ..
قطعت الخيار والطماطم شرائح و رتبت الصحون على الطاولة .. حطت الخبز في الميكروويف ..
التفتت باستغراب و قرف / ايش ذا الريحة .. شكلها من الفواحة ..
العنود دخلت وهي تلم شعرها وباستغراب / انتي .. ايش صحاك ..
ساره ابتسمت / حسيت بالجوع و قلت انزل اكلي شي .. دخلت عليك شفتك نايمه ..
العنود بضيق / ايه .. " وهي تحط لها ماي بالكاسة .. و بغصة " .. شفت كابوس خنقني .. اعوذ بالله منه و صحيت ..
ساره و قفت قبال الباب الزجاجي المطل على الحديقة الخلفية للبيت .. حطت يدها على الزجاج وهي تطالع لبرا ..
العنود باستغراب وقرف / ايش ذا الريحة ..
ساره هزت اكتافها / ما ادري .. " تنهدت " .. تصدقين اشتقت لامي و ابوي .. ودي ارجع انام بحضنهم ..
العنود نزلت الكاسة .. وطالعتها بضيق و حنين .. حت هي اشتاقت لهم ..
بلعت غصتها .. وهي تتقدم من الباب راجعه لجناحه .. طالعت ساره / بعد ما تتعشين .. ااا ..
........ بوووووووووووووووووووووووووووووووووم ....
صوت انفجار هز البيت كله .. العنود بصراخ / سااااااااااااااااااااااااااااااااااااررررررررررررر ررره ..
ساره برعب / اااااااااااااااااااااااه .. يمممممممممممممممممممممممه .. عنوووووووووود .. ااااااااااااااه ..
العنود توجهت لسارة بجنون وهي تطفي شرارات و تصارخ .. فتحت الباب الزجاجي ..
وهي تدفع ساره على الارض وتطفي النار .. شافت جسم سارة مرتخي ولا طلع لها صوت ..
العنود تهزها بجنون وهي ترفعها بين يدينها وتنزلها / سااااره ساااااره .. " وقفت ولفت حولها ورجعت جلست " ..
ساااره .. " وبصوت اختنق "... ساره .. " وبصراخ " .. سااااااااااااااره ..




راكان الي فزع من النوم على صوت القوي .. وانقطاع الكهرباء .. / الله يستر ..
سمر بخوف / بسم الله .. ايش هالصوت ..
راكان يرفع الفرشة / يمكن التماس والا ضرب فيوز .. انتي خليك هينا .. و خذي شيخة بحضنك ..
وقف وتوجه لشباك غرفته رفع الستارة وفتح الشباك .. / انا بفتح الشباك يجيكم ......
سكت وهو يسمع صراخ العنود / هذي مو صوت العنود .. " ابعد الستاره كلها و شاف حركة بالحديقة " ..
ترك الشباك وهو يجري جهت الباب عثر بطاولة و طاح على السراميك رجع وقف .. فتح باب جناحه وطلع ..
راكان نزل مع الدرج وهو يتعثر و يرجع يوقف .. سمع صوت زياد و نايف يطلعون من جناحهم و هو يسال ..
راكان توجه للمطبخ و شاف النار تركها و طلع من الباب الرئيسي .. و لف على البيت الا ان وصل لمكان العنود ..






ـــــــــــــ





بيت ابو بتال ..




طلع من الحمام " كرمتوا " .. و هو ينشف وجهها .. رمى الفوطة على الكنبة و تقدم من الشباك ..
ابعد الستار و توجه لتسريحة .. بس وقف فجاة .. ورجع لشباك وهو عاقد حواجبه و مستغرب ..
شاف النار اللي طلعت من بيت عيال عمه .. و هو يجري حافي .. فتح باب الجناح و راح يجري لباب المدخل ..
سلطان الي كان طالع من جناحه و هو يستغفر الله و يهلل .. و يعدل اكمام ثوبة .. متوجه لمسجد ..
باستغراب و خوف و هو يلح بتال على الدرج و بصوت عالي / بتال .. يا ولد .. ايش بلاك ..
بتال يصارخ و هو عند الباب الرئيسي / بيت عمي يحترق ..
ابو بتال بصرخ / عمك من ..؟
بس بتال طلع من البيت .. نزل سلطان بسرعة .. و خرج من البيت .. سعود طلع من جناحه بانزعاج ..
و هو صحي من النوم مفزوع ..و التفت في الصاله باستغراب وماشاف احد .. و رجع لجناحه ..






ـــــــــــــــ






بيت ابو سند ..



جناح سند ..


كان سهران .. يشتغل على الكمبيوتر .. فاتح شوي من الشباك حتى يتغير هواء الغرفة .. سمع صوت ضجه ..
وقف و طالع من الشباك ما شاف شي غريب في الحديقة .. ضل واقف لدقايق وهو يطالع .. تنهد بتعب ..
رفع يده يشوف الساعة .. و بهمس / الحين ياذن الفجر .. " التفت على الكمبيوتر و قفله .. لملم الاوراق و رتبها " ..
توجه للحمام " اكرمكم الله ".. توضأ و تجهز لصلاة .. فتح باب الجناح بهدوء و طلع قفل الباب بهدوء ..
نزل مع الدرج وهو بنص شاف فارس مستعجل طالع .. باستغراب / فارس ..
فارس التفت عليه وهو واقف عند الباب وبخوف / بيت خوالي فيه شي .. حركة غريبة ما تطمن ..
سند با خوف .. / الله يستر .. " وهو ينزل مع الدرج بسرعة فتح الباب و طلع قبل فارس و لحقه فارس " ..





ــــــــــــ






بيت راكان ..


راكان رفع راس ساره و صار يضربها على خدها يبيها تصحى .. ولمن ما شاف استجابة ..
حملها بين يدينه و توجه بها لسيارة .. نايف اللي طالع من الفله و توجه لهم هو وزياد اللي متمسك فيه ..
نايف بخوف / العنود .. العنود ايش فيك ..
العنود بضياع و صدمة وخوف / ما ادري ما ادري .. كنا في المطبخ و ما ادري ايش صار ..
التفتت على راكان .. و توجهت له .. راكان بعد ما نيم ساره بالسياره .. انتبه للعنود بتركب معاه ..
راكان بصراخ / بتروحين معاي كذا .. و ين عباتك ..
نايف نبه زياد / قفل الكهرباء بسرعة .. " زياد راح لمولد الكهرباء و قفله " ..
العنود بارتباك / طيب ابي اجيب عبايتي .. " بسرعة راحت للباب الرئيسي و دخلت بالضلام وهي تمشي بضياع ..
الا ان وصلت لمكان العبايات سحبت عباية و شيلة و برقع و هي بس تتلمس ولا عارفه لها او لغيرها ..
لبستهم و طلعت .. سمع صوت بتال و هو يصارخ .. " ايش صار .. فيكم شي " ..
العنود توجهت لسيارة راكان اللي كان راح يمشي و يتركها .. ركبت معاه و تحركوا ..
بتال سمع صوت بكاء عياله .. و دخل البيت و هو ينادي على " سلطان .. الظبي .. سمر " ..
سمر سمعت صوت ندا بتال .. و بخوف و هي حاضنه شيخة .. تلمس في غرفتها الا ان وصلت للاريكة ..
سحبت روب قميص نومها .. نزلت شيخة على السرير و لفت الروب و ربطته .. اخذت جوالها و فتحته ..
خلت اضائة الجوال مثل الكشاف .. نزلت مع الدرج بهدوء و شوي شوي تتلمس حتى لا تطيح ..
و هي تنادي بصوت عالي .. / بتااااال .. انا هينا .. راكااااان .. " خنقتها العبرة " ..
بتال اللي و صل لجناح العنود و دخل لغرفة عياله .. و صل لسرير سلطان و الظبي .. حملهم بين يدينه ..
و طلع شوي شوي و هو يمد رجله و يتلمس بها الارض خايف لا يصدم بشي و يتعثر و ياذي الظبي و سلطان ..
و بكل خطوه و هو يسمي على عياله و يدعي الله بسلامه .. طلع لصاله و شاف اضاءة جوال سمر ..
وصل سند و فارس و سيف و طلال و رعد .. سمع صوت ابوة و هو ينادي ..
بتال بصوت عالي / لحظه يبه .. لا تدخل ..
و صلت عنده سمر و بخوف و هي تمسك يده اللي شايل فيه سلطان اللي يصيح برعب هو و الظبي / ايش صار ..
بتال بضيق / ما ادري .. " شاف ابوة و رعد مشغلين جوالات بيدينهم و يكشفون عليهم " ..
ابو بتال بخوف / سمر .. بتال .. فيكم شي .. الصغار طيبين ..
بتال قرب منه .. و بتعب / بخير ..
رعد مد يده / هات الظبي ..
الظبي تمسكت برقبة ابوها و هي تصارخ برعب .. بتال بضيق / خليهم .. شوفوا سمر ..
ابو بتال اعطى سمر شماغه .. و رعد نزل شاله و لفه على الظبي .. طلع بتال ..
سند طلع شماغه و لف فيه سلطان .. طلال سحب الشال و رماه على بتال يلف فيه عياله ..
ابو بتال .. طلب من العيال يبتعدون عن الباب علشان سمر .. " وسمر بداخله تحمد ربها ان الروب ثقيل و ساتر " ..
دقايق حتى و صل الدفاع المدني و الشرطة و اجتمعوا رجال العايلة ..






ــــــــــــــ







بعد الظهر ..

في المستشفى ..



زياد و نايف و طلال ورعد على طول ركبوا السيارة و راحوا المستشفى ..

سند لحقهم بعد نص ساعة من الحادث .. معه لبس لراكان و اخوانه و اخواته ..
راكان بعد ما لبس هو واخوانه .. جلس بالاستراحة .. و هو يشرب كوفي .. و يقول لسند ايش اللي صار ..
سند بهدوء / الحمد الله ان جات على قد كذا ..
راكان تنهد / الحمد الله .. " و بضيق " .. تصدق ان احس انا و اخواني منحوسين ..
ما نرفع راسنا اللي يطيح عليها شي .. " تنهد بعمق " .. سارة للحين ما فاقت .. ولا فاقت و شافت الحرق ..
ايش بتسوي .. " وبوجع " .. يا اخي نايف الرجال اللي جروحه مخفيه و مو مهم اثرها نفسيته منعدمه ..
كيف هي .. " سكت وهو يصد عن سند و يطالع الشباك المطل على الشارع " ..
سند بهدوء / المهم تصحى من الاغماء .. و تمر الساعات على خير و بعدين الطب تطور عملية تجميل تزيل هالحرق ..
راكان بغصة والدمع محبوس بعينه / هذي سارة .. اصغرنا .. اكثر وحدة ذاقت كل شي ذقناه ..
ذاقت عذاب الكل .. موت جدتي و خالي .. مرض ابوي و امي .. موتهم .. و ضياعنا و تشتتنا .. و جع نايف ..
كل شي .. ذي سارة .. " هز راسة " .. صندوق مذكراتنا .. كل شي تعرفة عنا .. اللي واضح واللي مخفي ..
سند ساكت و يسمع .. راكان يكمل / بعض الاحيان اقول لو انا مكانها ايش كان سويت ..
" هز اكاتفه " .. هربت من ها الحياة اللي عايشتها .. مثل ما هربت اول مرة ..
سند بنبرة مقصودة / ليش تخطط انت ..
راكان التفت عليه و بغموض / ايش تقصد ؟..
سند بهدوء وهو يخفض صوته / راكان .. لك فترة ما انت عاجبني .. من لمن اخذت الملف .. وانت ساكت ..
وسكوتك غريب .. حتى توعداتك في بتال ما نفذت فيها شي .. هدوئك هذا .. " هز راسه يعني مو عاجبه " ..
راكان بهدوء / بتال مو راده عني " ابتسم ".. وعن العنود الا سلطان والظبي .. ربي يخليهم له ..
سند شرب شوي من لكوفي .. و بنبرة مقصودة / لو بتال كلم العنود و طلب ترجع على ذمته .. ضنك ترجع ..
راكان طالع سند بحدة و بحزم / لا .. وحتى لو هي قبلت انا ما اقبل .. بتال كسرها .. و كسرنا معاها ..
رماها و تركها و لا سال عنها .. " وبقهر " .. و فوق هذا كله ماد يده عليها .. وانا اللي و صيته عليها و وامنته ..
سند سكت لدقايق .. وبهدوء / كذا حكمت على مصير الظبي و سلطان .. يعيشون بتشتت .. حط نفسك مكانهم ..
راكان نزل عينه بكوب القهوة و صار يحركة بهدوء بشكل دائري .. / ....................
سند طالعه لدقايق و بعدها رفع يده و شاف الساعة .. وقف / انا صار لزم اروح .. ما تشوفون شر .. فمان الله ..
راكان هز راسه و هو ما زال على نفس و ضعه .. وبهدوء / الشر ما يجيك .. فحفظ الرحمن ..






ــــــــــــــــ





في جناح سارة ..




زياد واقف .. وبتعب / انا رايح .. راكان ينتظر تحت ..
العنود و هي جالسه على الكرسي .. ومغمضة عيونها بتعب .. تنهدت / فمان الله ..
نايف طالعها و رجع طالع زياد .. وبهدوء / انا ابي اجلس عندهم ..
زياد هز راسة و هو يسحب جواله من على الطاولة / مع السلامه .. " قالها وهو طالع " ..
بعد دقايق من طلوع زياد .. نايف كان يطالع بأخته العنود اللي مسترخيه على الكنبة و مغمضة عيونها ..
طالع بيدها الملفوفة بشاش ابيض .. العنود فتحت عيونها بهدوء و طالعت بسارة .. سرحت بسارة شوي ..
رجعت غمضت عيونها بس رجعت فتحتهم وهي تطالع بنايف كانت بتتكلم بس سكتت لمن شافت نظراته ..
العنود عاقده حواجبها / ايش فيك .. مضيع شي بوجهي ..
نايف بهدوء و نبرة مقصودة / منتظرك ؟!!
العنود رفعت خصل من شعرها طايحه على وجها .. بيدها اليسار السليمه .. و بنفس نبرته / ايش اقول ..
نايف هز راسه .. و بهدوء هامس / كل اللي بخاطرك .. المهم ما تكتمين بصدرك و تتعبين ..
العنود ضحكت و بسرعة حطت يدها على فمها و هي تكتم ضحكتها لا تصحى ساره ..
نايف بصوت به بحه غريبه / ليه ما تبكين ..
العنود سكتت وهي تطالع بوجه ساره و بعد ثواني طويله .. بصوت مبحوح متعب / اتمنى ..
" تنهدت " .. اخر مرة بكيت لمن ... " سكتت " .. ومن بعدها عصى الدمع ..
نايف سكت وهو عارف ايش تقصده .. اخر مرة لمن تهجم عليها عبدالله .. زفر بقهر ..
نايف يحاول يهدي نفسه / الحين قولي لي .. ايش اللي مضايقك من فترة و انتي مو عاجبتني ..
العنود بهدوء هامس / و لا شي ..
نايف بنبرة مقصودة / على نايف ..
العنود ابتسمت وهي ترخي جسمها على الكنبة .. دخلت يدها بشعرها و سحبت المشبك منه ..
حتى تفرد شعرها اللي محترق جزء منه .. / على نايف و غير نايف ..
نايف ابتسم و بنبرة مقصودة / لو متعب موجود كان ما سكتي ..
العنود بنبرة غامض / متعب ..
نايف التفت للباب الي انطق .. و قف وهو يمسك العكاز و تقدم من الباب .. و هو ينبه العنود / فيه احد عند الباب ..
العنود اعتدلت وهي تلف شعرها و ترجع المشبك .. نزلت يدها و شافت فتات من شعرها المحترق في الشاش الابيض ..
نفضت يدها و سحبت الشيلة و لفتها على راسها .. رمت الباقي على و جهها اول ما دخل نايف ووراه متعب ..
متعب وهو بالبس الرسمي العسكري و بيدينه باقة ورد ابتسم و العنود نزلت الشيلة عن وجهها .. / السلام عليكم ..
العنود بجمود و نظرات قاتلة / و عليكم السلام ..
متعب يحط باقة الورد على الطاولة و يجلس على الكرسي و هو يطالع العنود و ابتسامة ساخرة على شفاته / سلامات ..
العنود صدت عنه و هي تطالع بسارة .. وبرود / الله يسلمك ..
متعب ابتسم بسخرية وهو يطالعها / زعلانه .. " بحزم " .. الجدار يرضيك ..
العنود رفعت حاجب و طالعت فيه و بتحدي / نشوف من الي بيرضية الجدار ..
متعب و قف و هو يصد عنها .. التفت على نايف اللي مركز معاهم ولا فاهم شي .. / طمني عن سارة اول ما تصحى ..
و توجه للباب و طلع .. نايف التفت على العنود .. العنود بغضب اشرت له يسكت .. ونايف التزم الصمت ..





ـــــــــــــــــــ






بعد المغرب ..




سارة صحيت .. ام سطام و ابو سطام .. و ابو بتال و ابو عبد العزيز و ام سند و ام صقر و رعد ..
و طلال و راكان و نايف و زياد و العنود .. كلهم موجودين .. ساره تطالع بوجيهم و تغمض عيونها تمنع الدمع ..
و تبلع عبرتها .. حست بيد جدها على راسها و هو يمسح على شعرها مفرود على المخده و هو محترق جزء كبير منه ..
ابو سطام بحنان / الحمد الله على سلامتك .. و الحمد الله انها جات بسيطه ..
العنود بهدوء / الحمدالله ..
ابو سطام التفت على راكان / اللي ايش سبب هالحريق ..
راكان بهدوء / التماس كهرباء و فيه تنسيم غاز .. و شبت ..
العنود باستغراب / بس انا متاكدة اني مقفله الغاز .. و سارة ما فتحت الغاز بس استخدمت المايكرويف ..
راكان / سمر نزلت قبلكم استخدمته .. وقفلت الغاز بس ما قفلته للاخير .. وكان التسريب خفيف ..
ابو سطام / قدر الله , و امر مكتوب , و الحمد الله على كل حال " ابتسم و بمزاح " ويمكن خيرة حتى ترجعون عندي ..
العنود ابتسمت له .. طلال بضحكة / لالا .. ماهي براجعه الا على بيتها .. " يقصد بيت ابوها " ..
راكان بضحكة / شغلة التصليح ما بتطول.. بكرة والا بعدة و يرجع كل شي زي ما كان و احسن ..
بأذن الله .. الضرر بس بالمطبخ .. يعني ما تلحق على شي يا جدي .. ههههههههه ..
ابو سطام بحزم مازح / تجي عندي اللين اتاكد ان البيت امان .. انا مو معذر في بنتي ..
عبدالعزيز التفت على ساره و فز واقف و هو يحضنها .. الكل التفت باستغراب ..
سارة اول ما حست بحضن عبدالعزيز انفجرت بكي و صارت تشهق بقوة و كانه بكيت يتم توه حس بيتمه ..
العنود و اقفت و تسندت على الجدار .. كانت متوقعه ان سارة راح تبكي .. بس ما توقعته قدام الكل ..
كانت وهي نايمه تهذي بابوه و تناديه و تنادي امها و نايف وراكان .. وعبدالعزيز كان يشبة سطام لدرجة كبيرة ..
راكان بخوف و هو يحاول يبعد عمه عنها بس ساره متمسكه بعبدالعزيز و رافضة انه يبعد ..
العنود مدت يدها و سحبت راكان و همست بغصة / مشتاقة لابوي .. و مستاحشة .. خلها تفرغ اللي بنفسها ..
عبدالعزيز يهمس باذنها و يقرا ايات من القران .. سلطان اشر لموجودين يطلعون لصالة ..
ام سطام مغير تمسح دموعه بشيلتها .. وقف ابو سطام و هو يهلل " لا اله الا الله محمد رسول " ..
الكل طلع معادى عبدالعزيز اللي قعد مع سارة و هو حاضنها الا ان هديت ونامت ..






ــــــــــــــــ






يوم جديد ..





بيت ابو عناد ..


بغرفة الهنوف .. القريبة من مجلس الحريم ..


شجون تدور على ابوها و خوانها بترمس القهوة ..
ابو عناد بحنان / الحمدالله على سلامتك ..
بدر اللي جالس على سرير امه بصوت خافت / الله يسلمك ..
ابو عناد / ان شاء الله بعد اسبوعين و خروج امكم من النفاس بنسوي عزيمة عشاء كبيرة ..
منها سلامتكم .. و سلامة بنات خالكم .. " ابتسم " .. و ملكتكم ان شاء الله ..
عناد وهو ياكل تمرة / يبه .. ملكت بدر لحاله ..
ابو عناد بضيق / والله اني تمنيت افرح بكم كلكم مرة وحدة ..
ام عناد بهدوء وهي مستنده على المخدات / لعله خير لهم .. وربي يكتب لريهام الرجال الصالح ..
ويرزق عناد بالبنت الصالحة .. خلنا نخلص من بدر و رنا .. و بعدين نشوف عناد ..
عناد بنبرة مقصودة خبيثة / و نشوف فارس ..
ابرار اللي كانت تهمس مع شجون .. و تطلب منها تقرب المعجنات من عناد .. و منتبهة لكلام عناد ..
الكل ابتسم و ابو عناد ضحك بخفة و هو يهمس / ما انتبهت لك .. واص لا تحرجة ..
ام عناد بحزم / عناااد .. " عطته نظرة خلت عناد يسكت و بدر ضحك بخفة " ..
ابو عناد بعفوية / الا كيف صدرك .. وايش قالت الدكتورة ..
ام عناد بخجل و ارتباك / بس تقول من الحليب ..
بدر بضحكة وهو يتكي جنب امه / يمه ابي اذوق حليبك .. والله ما اتذكر طعمة وانا صغير ..
ام عناد بخجل خوف و توتر وكان احد بيغتصبها .. حطت يدينها على صدرها .. و هي فاتحة عيونها للاخير / تهبى ..
الكل / هههههههههههههههههههههههههههههههههههه ..
ام عناد بخجل و فشلة رفعت شيلتها و حطتها على خشمها و فمها تغطي ابتسامتها ..
بدر وهو يضحك و بقوة / هههههههههههه يمه هههههههههه انا هههههههه انااا ولدك هههههههههه ..
ورجع يضحك و يشهق من الضحك .. حط يده على رقبته و هو يتالم .. و صد عن الكل ..
عناد يمسح دموعة من الضحك / يمه .. ههههههههه .. جد يمه اذا يوجعك خلنا حنا نرضع هالحليب بدال لا ينرمي ..
ام عناد طالعتهم بنظرات وهي ودها تذبح ابو عناد لانه سالها .. ابو عناد يضحك و مو قادر يمسك نفسة ..
ام عناد صدت عنهم بزعل .. بس لمن سمعت تأوه بدر فزت برعب .. عناد بضيق / من الضحك ..
بدر وقف و بتعب / انا رايح غرفتي .. ابي اخذ مسكن و ابي انام شوي ..
ام عناد بحنان / بسم الله عليك .. ربي يحفظك يمه ..
بدر ابتسم لها وبخبث / ما تبين تعطيني شوي ..
ام عناد بتوتر و حزم / روح نام بس .. بلا قلة ادب .. يالله ..
الكل / هههههههههههههه
ابرار وشجون راحوا للمطبخ يسون الغداء .. عناد طلع وراح لشركة .. ابو عناد و قف و جلس جنب الهنوف ..
الهنوف بزعل صدت عنه .. ابو عناد بضحكة / افاا .. زعلانه هنوفي ..
ام عناد / ..............
ابو عناد بخبث / طيب ما يصير انا ..
" الهنوف شهقت بخجل " ..
ابو عناد / ههههههههههههههههههه ..





ـــــــــــــــ


"







بالمستشفى ..



العنود تحط الاكل قبال سارة .. سارة منسدحه السرير .. وبجمود تطالع بصحون الاكل قبالها ..
العنود بهدوء / كل الاكل كله .. علشان تاخذين علاجك ..
ساره بضيق / مالي نفس .. شيلي الاكل لمن قدامي ..
العنود بعصبية / سارة .. وبعدين معاك .. يعني بعيد الموال اللي كل يوم اقوله ..
الحرق بسيط .. واذا بيسبب اثر راح اوديك اكبر جراح تجميل و نخفي الاثر .. خلاص عاد ..
ساره غطت وجهها وصارت تبكي .. العنود بضيق و قهر من نفسها .. جلست جنبها وضمتها ..
العنود بحنية واعتذار / حبيبتي اسفة .. بس انتي مكبرة الموضوع .. منعتي الكل من زيارتك .. واكل ما تاكلين ..
وكان الحرق ماخذ وجهك كله .. كانه مو باسفل خدك و شوي من رقبتك .. " تنهدت وهس تبتعد عنها " ..
ساره تمسح دموعها و بعبرة / حلفي انك بتوديني احسن دكتور تجميل ..
العنود فتحت عيونه للاخير / يعني انا اكذب ..
ساره بحرج / ............
العنود بحزم / كلي يالله .. وانا قاعدة ادور وراح ارسل اوراقك اذا حصنا هالدكتور .. لانه ما راح تكونين لحالك ..
راح يروح نايف معاك .. وراح يسوي عملية يشيل التشوهات اللي بجسمة ..
سارة تذكرت جسم نايف .. وبقرف / صح لزم نايف يسوي هالملية حرام يقعد مشوة كذا ..
العنود بقهر / ما اقول الا حسبي الله و نعم الوكيل ..
سارة وهي تبدا تاكل / الا كيف وصل للمافيا ..
العنود وهي تاكل مع سارة / تذكرين صديق راكان تركي ..
سارة وهي تشرب من الشوربة / اممم .. " يعني ايه " ..
العنود تنهدت بقهر / هذا كان حاط بضاعة باستراحة اخوانك .. وهالبضاعة فيها مخدرات ..
نايف بصدفة كان رايح يشوف الاستراحة اخر الليل .. وشاف الحركة الغريبة عند الاستراحة ..
انتظرهم حتى يبعدون ودخل من الخلف .. وشاف الصناديق الغريبة .. وفتح وحدة منهم ..
شاف ان هالاشياء لزم يعرف عنها متعب .. بلغ متعب و متعب كلم طارق .. وتابعوا الموضوع ..
بس المفاجاة ان عبدالله كان متعلق بالموضوع .. و طلبوا من نايف يراقب و يدخل مع عبدالله ..
سارة باستغراب / كيف ؟؟
العنود تهز كتوفها / ما ادري .. هذا اللي قاله نايف ..
سارة / ايه وبعدين ..
العنود / دخل نايف و سحب اصدقاء عبدالله المقربين اكثر من تركي و شوي شوي و تطور الموضوع و سافر برا ..
سارة باستغراب / يعني نايف ما كان يبي يسافر علشان يدرس ..
العنود تنهدت وهي تدخل الاكل بفم سارة / الا .. بس التطورات بالموضوع و دخول الانتربول و كشف المافيا لنايف ..
حولوا كل السفرة لصالحهم .. و لمن مسكوا المافيا نايف .. وتدخلت الشرطة .. وانكشف تركي .. المافيا قامت وقتلته ..
العنود لملمت صحون الاكل و بدات تقطع فواكة لسارة .. سارة مو منتبهه لطاولة ومنسجمة بالسالفة ..
ساره متفاجاة / يعني تركي مات قتل ..
العنود تهز راسها / ايه .. لقيوة مقتول و مرمي بمكان معفن و موتته موته شنيعة .. الله يحسن خاتمتنا ..
سارة انتبهت لطاولة وشهقت بصدمة / من اكل الاكل ..
العنود بضحكة وهي تدخل البرتقالة بفمها / من غيرك يعني .. هههههه .. جعله هني و عافية .. ومطرح ميسري يمري ..
سارة ابتسمت / متى اطلع طفشت من المستشفى ..
العنود بهدوء / اليوم ان شاء الله .. اشتقت لصغاري .. ربي يسلمهم لي و يحفظهم ..
سارة تنهدت / حتى انا اشتقت لهم .. امين يا رب ..







ـــــــــــــــ






يوم جديد ..





بسيارة سند .. توههم راجعين من المستوصف ..



رنيم جالسة و بحضنها فهد الصغير .. و صوت الاذاعة يتردد بسيارة ..
سند بهمس وهو يلتف عليهم ويرجع يطالع الطريق / علية حرارة ..
رنيم تحسست جبين فهد و بهمس / لا ..
سند بهدوء / طيب ايش رايك نمر على مطعم هادي و نتغداء فيه ..
رنيم بضيق وهي تتكلم من غير نفس / الساعة ما جات وحدة .. ومفطرين متاخر .. ما لي نفس بالاكل ..
سند وهو يلف الدريكسون .. و يطالع الجهة الثانية من الشارع / اعرف مطعم اكلة لذيذ و هادي و رايق ..
رنيم تاففت بعصبية / اووووف .. قلت ما ابي ..
سند ابتسم / وصلنا .. " وهو يوقف سيارته قبل المطعم " .. " التفت عليها و هو يطالع فهد " / ياله ننزل ..
رنيم بعصبية / ما ابي .. وديني البيت و ارجع تغداء ..
سند يفتح الباب و ينزل .. قفل الباب و توجه لباب رنيم .. فتحة و احمل فهد بهدوء وهو يلفه عن الهوداء و الشمس ..
رنيم بغضب عدلت شيلتها و هي تتافف و تحلطم .. اخذت شنطتها و نزلت .. قفلت الباب و لحقة سند ..
دخلو المطعم و جلسوا على احد الجلسات .. سند وهو يقفل باب الجلسة .. وهمس / افتحي و جهك محد شايفك ..
رنيم تنزل البرقع .. رتبت المكان الي سند نيم فية فهد و غطته زين عن هواء التكيف ..
سند بهمس / اطلب لك شي ..
رنيم بتكشيرة / لا ..
سند ابتسم .. " وقف و طلع .. وبعد دقايق رجع " .. و بهدوء / طلبت اكل بحري ..
رنيم كانت تطقطق بجوالها .. رفعت عيونه له بنظرات .. " يعني انا ماسالتك " ونزلتهم ..
سند مد يدة و سحب الجوالها و قفلة و رجعة لها .. رنيم طالعته بقهر ..
سند قرب منها و بجدية و صوت خافت / فيه موضوع مهم لا زم نتكلم فيه ..
رنيم تطالعه و وجهها مشدود بعصبية / ...........
سند وهو مركز بملامح و جهها و نظرات عيونها / ابوك .. مطلوب ..
رنيم تغيرت ملامح وجهها لخوف و اهتمام / .............
سند تنهد / انا جبته من المغرب و حطيته بالشالية و محد يدري عنها ..
رنيم صدت عنه و بغصة / ايش مسوي هالمرة .. والا مثل المرة الماضية مخدرات ..
سند سمع صوت الجرسون و وقف .. رنيم رمت الشيلة علة و جها .. صحيح سند مغطي الباب كلة .. بس للحتياط ..
سند حط الصحون على الطولة .. رنيم رتبت الصحون الا ان سند قفل الباب .. ونزلت شيلتها ..
جلس سند جنبها و هو يقرب الصحون منهم .. رفع اكمام ثوبة .. / خلنا نتغداء و اقول لك السالفة كلها ..
رنيم طالعته بنص عين / قبل ماكن لي نفس و بعد هالكلام تبي اكل ..
سند ابتسم و هو يقبل خدها .. وبمزح / طيب كذا انفتحت ...
رنيم بضيق / الا لاعت كبدي ..
سند / هههههههه .. افااا .. " وهو يقطع من الخبز يدخلة فمها غصب و هو يضحك " ..
رنيم كانت بتبتعد بس سند ما سمح لها و اجبرها على الاكل ..






ـــــــــــــــ






بالمستشفى ..


العنود ترتب الشنطة الصغيرة اللي فيها ملابس ساره ..
سارة جالسة على طرف السرير و هي لبسة عبايتها و لفة الشيلة على وجهها ..
العنود وقفت و طالعت حولها .. تنهدت .. و رفعت يدها و هي تطالع الساعة .. / راكان تاخر ..
سارة تاففت / اووووف طفشت ..
العنود و هي تعدل شيلتها / استغفري الله .. و يرح الطفش ..
فتح الباب راكان وهو حامل بيده باقة ورد جوري احمر .. ابتسم / حبيبت تان وين ..
العنود ابتسمت .. سارة / ههههههه .. تان .. ايش ذكرك بها ..
راكان و هو يبوس خد سارة السليم و هو مبتسم و يحط الباقة بحضنها / وانا نسيتها علشان اذكرها ..
حط يده على راسها / ها .. جاهزين ..
ساره هزت راسها وهي تطالع الباقة.. راكان طالع العنود / ترا جدي عازمنا على الغداء .. والكل مجتمع ..
سارة بحزم و عصبية وهي ترفع راسها لراكان / لا ..
راكان طالعها باستغراب و العنود طالعتها بهدوء / ليه ..
سارة حطت يدها على خدها .. وبغصة / ما ابي اشوف احد ..
راكان بهدوء / طيب على راحتك .. " ابتسم " .8ظظ. طيب ايش رايك نروح لمطعم نغير جو ..
سارة وهي عاقدة حواجبة و بعصبية / لا .. ابي اروح البيت ابي ارتاح .. ابي انام ما ابي اشوف احد ..
ولا احد .. " و غطت وجهها بيدينها و انفجرات بكي " ..
راكان انحنا لها و هو يضمها بشويش .. حتى لا يوجعها .. / خلاص حبيبتي .. اللي تبينه يصير ..
لا تبكين يا روح تان .. " تان .. يعني ركان .. كانت سارة وهي صغيرة تناديه بهالاسم " ..
راكان عدل نفسه .. و هو يقرب الكرسي منها / تمشين و الا تطلعين على الكرسي ..
سارة توقف / لا امشي .. " رمت الشيلة على وجهها .. والعنود اشرت لراكان بان يخليها على راحتها "..
مشت سرة بخطوات قصيرة متعبة .. راكان لف يده حولها و صار يمشي معاها و هو يسندها لا تطيح ..
العنود مسكت الشنطة بيدها السليمة و مشيت وراهم بعد ما عدلت عباتها .. وتاكدت انه ما نست شي ..






ـــــــــــــ



في المطعم ..

عند سند و رنيم ..




رنيم باهتمام / بلغت امي ..
سند وهو يشرب من كوب الكوفي قباله / لا .. انا ابيك انتي تساعديني ..
رنيم صدت عنه وسكتت شوي تفكر .. بعدها رجعت التفتت علية و بغصة / مو افضل لو ينسجن ..
سند طالعها و يبيها تكمل .. رنيم وعيونها تطالع بكل شي بالجلسة الا و جه سند ../ يمكن يكون فيه هدايته ..
سند لف يده حول كتفها و ضمها لصدرة .. رنيم مسكت بجيبة و هي تحاول تكتم صوت شهقاتها ..
سند يمسح على شعرها .. و بهدوء / وهو هذا اللي بيصير .. بس ما راح احد يعرف من اخواتك ..
يمكن ريما راح تعرف .. لان غيث راح يمسك الموضوع ..
رنيم رفعت راسه و ابعدت عنه ..سحبت منديل و مسحت دموعها .. / وامي ..
سند بهدوء / راح اقول لها بالوقت المناسب ..
رنيم ببحة / بس انا ما اعرف مكان الخزنة ولا الرقم السري .. امي تعرف .. ويمكن ريهام ..
سند وهو يسحبها جهته و يقبل جبينها وبهمس / الله ييسرها ..
رنيم استكنت بحضنها لدقايق .. وسند يلعب بخصلات شعرها .. قطعهم صوت صراخ فهد .. الي صحي من النوم ..






ـــــــــــــــ





يوم جديد ..




بيت ابو سطام ..



سند بهدوء / راح اخليه يكتب توكيل باسم صقر .. و راح يكون هو ولي امر البنات ..
ام صقر تنهدت / انا مو قاطع قلبي الا هالصقر .. صاير مغير يشرد من البيت ..
" و بهمس وهي تطالع الباب " .. سند وانا امك ..
سند باهتمام / لبية ..
ام صقر بخوف / ابيك تراقب صقر .. مو عاجبني تصرفاته .. هالزمن يخوف .. و خايفة يمسك درب ابوة ..
سند باهتمام / ليه شفتي علية شي شين ..
ام صقر تهز راسها و بارتباك / بس مو متاكدة .. انا شميت ريحة دخان .. ولا تقول سيطة هذي بداية الهاوية ..
سند تراجع ليريح ظهرة على الكنبة وهو يفكر .. هز راسة بهدوء و وقف / انا الحين رايح مشوار ..
انتي يا خالة لمي اغراضك وارجعي بيتك .. و صقر انا اشوف وضعة ..
ام صقر بحزم / انا ما راح ارجع الا لصار البيت بيت ولدي ..
سند بثقة / البيت بيتك .. انتي صاحبة المال .. بفلوسك اشتريتي الارض و بنيتيها .. راشد ماله شي ..
ام صقر تطالعه بنظرات ضايعه فاقدة فيها الامان .. / ..............
سند بهدوء و هو طالع من المجلس / فمان الله ..
ام صقر وهي تطالع قفاه / فحفظ الرحمن ..






ـــــــــــ






بيت ابو عبد العزيز ..


العنود جالسة قبال مشيرة .. و بهمس / ما ادري ..
مشيرة / كيف ما تدرين ..
العنود تنهدت / ما ادري .. و الله ما ادري .. بس راح اخليهم يتصرفون مثل ما يبون وكاني ما ادري عن شي ..
مشيرة بنبرة مقصودة / و عيالك .. وبتال ..
العنود باستغراب / وايش دخل ذا بذا ..
مشيرة بوجع و هي تطالع بصغار اللي يلعبون داخل خيمة الكور الملونه .. / ما تشتاقين له ..
العنود سكتت لثواني .. / ربك سبحانه جعل رحمة ومودة بين الزوجين ..
وبتال قد ماجرني و كسر قلبي و حلمي و ظهري .. قد مازعر في قلبي شي ماقدرت انزعه ..
مشيرة و الغصة بحلقها / ليتني فرحته اكثر .. ليتني منعته من السفر .. ليتـ.....
العنود تقاطعها بحنية / هشششش .. استغفري ربك .. ولو هو عندك .. ربك كاتب بذا اليوم يقبض روحة ..
مشيرة تبكي / ما عمري قلت له احبك .. طول لسنتين اللي عشناهم مع بعض .. ويم قلتها له مااااات ..
انا شؤم .. كل ما قلت لاحد احبك مات .. ابوي .. نايف .. سمير .. " و غطت وجهها تبكي " ...
العنود ضمتها و بدات تقرا عليها ايات حافضتهم الا ان هدات .. ابتعدت عن لعنود وههي تتند و مسح دموعا ..
العنود بهدوء / قومي صلي ركعتين و ادعي لهم بالرحمة .. ما يصير اللي تسوينه .. ولا راح ينفعهم ..
مشيرة وهي ترفع خصلات من شعرها طايحه على وجهها .. و هي تستغفر الله و توقف .. توجهة لحمامات " كرمتوا " ..
طقات خفيفة على الباب و بعدها فتح .. حتى يدخل متعب .. و بهدوء / سلام ..
العنود رفعت عينها و شافته لابس البدلة الرسمية العسكرية وحاط يده بجيب بنطلونه .. و ببرود / وعليكم السلام ..
متعب يتقدم منها و العنود صدت عنه .. متعب بسخرية / تبين تقضين على الفارس .. " وبعصبية " .. انتي بعقلك ..
العنود ببرود / لا تتكلم بشي ما انت فاهم فيه شي ..
متعب بعصبية و هو يصرخ / ماني فاهم ايش .. كلامك واضح .. خسارة شركة الفارس ..
العنود توقف و بعصبية / انت ما لك دخل .. انا امرت الموضفين اللي عندي بامر و عليهم التنفيذ ..
واللي و عاجبة يطلع من الشركة و الباب يوسع جمل .. " متعب رفع يده وكان راح يصفعها بس قبض يده و نزلها " ..
متعب بفحيح / الباب يوسع جمل .. طيب يا العنود .. ان ما كسرت راسك ..
العنود بتحدي و هي رافعة حاجب / كان غيرك اشطر ..
متعب بصراخ و غضب / عنوووووووووووووود ..
حتى يقطع عليهم صراخ الظبي و منصور و سلطان المفجوعين من الصراخ و الصوت العالي ..
العنود توجهت لهم وهي تسمي عليهم و تحضنهم متعب ترك المكان بغضب وهو يسكر الباب وراه بقوة افزع الصغار ..






ـــــــــــ







بشركة الفارس ..



مكتب سعود ..
رفع التلفون .. وبرسمية / نعم .. " عقد حواجبة " .. طيب خليه يطلع لي .. " وقفل المكالمة "..
ورجع يشتغل بالملف الي قباله .. سمع طق على الباب رفع راسة و شاف حارس الامن ومعاه شاب ..
الحارس اشر على الشاب / طلبك بالاسم طال عمرك .. و رفض يقول لنا من حضرته ..
الشاب تقدم من سعود / استاذ سعود ..
سعود باستغراب / تفضل ...
الشاب يعطيه ظرف ابيض متوسط الحجم .. / هذا لك ..
سعود رفع حواجبة وهو يطالع بالظرف / ممكن اعرف من .. مين .. وايش بداخله ..
الشاب برسمية / كل شي بداخل الظرف .. انا علية اوصلة وبس .. " كان راح يطلع بس وقفه سعود " ..
سعود بحزم / لحظة .. " و هو ياشر لحارس الشركة يمسكه " .. " الحارس مسكة " ..
الشاب طالع بالحارس وطالع بسعود بسخرية و بعدها رفع حاجب و ابتسم ..
سعود فتح الظرف باهتمام و حرص .. شاف و رقة و مفتاح .. سحب المفتاح و حطة على الطاولة ..
سحب الورقة و طاحت ورقة ثانية على الارض .. انتبه لها .. ونزل اخذها من على الارض ..
شاف الورقة شيك و بمبلغ وقدرة .. فتح عيونه للاخير بصدمة .. و طالع بالوقة الثانية وشافها صك ملكية ..
بعدم تصديق طالع بالشاب و بذهول / كاميرة خفية والا تمزح عليه والا ايش بضبط ..
الشاب رفع كتوفه و بضحكة / ما ادري عن ايش تتكلم ..
سعود بحزم / عن الظرف ..
الشاب بهدوء / وانا ايش يدريني ايش فيه .. انا سويت اللي مطلوب مني وبس ..
سعود بذهول رجع يطالع بالورقة .. انتبه للاسم ورجع يقرا من جديد .. اشر للحارس والشاب يطلعون ..
اخذ كاسة الماي و شرب منها .. رجع قرا الورقة وركز بالاسم .. وقف و اخذ المفتاح و الاوراق و الظرف ..
و طلع متوجة لكتب اخوه .. طق الباب و دخل .. بتال بستغراب رفع راسة / هلا ..
سعود بسرعة وهو يتقدم منه نزل الظرف و اللي فيه على مكتب بتال / شوف ..
بتال يطالع الورقة والمفتاح و طالع اخوة و هز راسة / سلامات .. ايش فيك .. صاحي انت والا فيك شي ..
سعود يفرد الورقة قبال اخوة / اقرا .. ايش مكتوب ..
بتال بطفش يقرا / صك ملكية .. اممم .. امممم .. اممم .. " عقد حواجبه " .. ايش مكتوب ..
سعود بضحكة / سلطان بن بتال بن سلطان بن سعود الفارس .. هذا مو اسم ولدك ..
بتال يرمش بذهول و عدم تصديق / ...........
سعود يرفع الشيك و يحطه على الورقة / وشوف ذا .." سحب المفتاح ".. وذا ..
بتال سحب الورقة و الشيك والمفتاح و رجعهم بالظرف و وقف ../ ....
سعود عقد حواجبة / خير .. على وين ..
بتال وهو ينسف شماغة على راسة و يسحب جوالة و مفتاح سيارته و يطلع من المكتب / لـ ام سلطان ..
سعود يلحقة و بقهر / طيب وانا .. ايش ذنبي .. هات الظرف ..
بتال شاف المصعد فاتح دخل فيه و قفلة ونزل . سعود ضرب باب المصعد بقهر .. / انا الملقوف .. اووووف ..






ــــــــــــ








بيت ابناء سطام ..




العنود وهي حاطة يدها على راسها .. بالم .. سارة باهتمام / عنود .. طيب روحي المستشفى ..
العنود هزت راسه / لا ما يحتاج .. اخذت علاجي .. بعد شوي راح اتحسن ..
ساره بضيق / انتي من لمن تغير دكتورتك و تغير علاجك صرتي تتعبين كثير ..
العنود تنهدت / سارة .. لا تكثرين كلام .. وروحي تغدي .. وخذي علاجك ..
سارة تنهدت وهي توقف شوي شوي و راحت لطاولة الاكل .. سمر جلست على الطاولة ..
سمر التفتت على العنود و رجعت طالعت بسارة وبهمس / ماتبي تتغداء بعد ..
سارة هزت راسها وهي تطالع العنود .. اللي جاها اتصال و صارت تتكلم بصوت خافت ..
سارة بهمس / شيخة نامت ..
سمرهزت راسه / ايه .. " طالعت العنود بحزن و بعدها التفتت على الاكل "..
سمر و هي تحط لها رز و بهمس.. / نحفت كثير و صار تحت عيونها سواد ..
سارة وهي تنزل شعرها على مكان اثر الحرق المغطى بشاش ابيض / ايه .. من بعد ما تغير علاجها ..
التفتوا ثنيناتهم بخوف على صراخ العنود و عصبيتها .. قفلت جوالها حتى ترمية على جدار اللي قباله و يتكسر ..
سمر بخوف وهمس / بسم الله ايش صار لها ..
العنود بقهر و هي تعض على اسنانه / طيب .. طيب .. تغدرون فيني ..
دخلت الخدامة / مدام .. سير بتال يبي انته ..
العنود بعصبية / ايش يبغى ذا بعد ..
الخادمة تراجعت بخوف / .............
العنود بغضب توجهت لمكان العبايات و اخذت عباتها لبستها و شيلتها و برقعها .. و طلعت له في المجلس ..
دخلت حتى توقف قباله .. وبعصبية / خير .. ايش بغيت ..
بتال اللي كان يقرا بصك و يتاكد .. رفع راسة باستغراب .. و بعدها عقد حواجبه / جيت اسالك عن العقد ..
دخل راكان و باستغراب / بتال .. " طالع العنود بعصبية " .. انتي ايش عندك ..
العنود بعصبية / جايت اشوف ايش يبغى ..
بتال وقف و بعصبية / العنود .. احترمي كلامك .. لا اتصرف معاك تصرف ما يعجبك ..
العنود بعصبية / وايش بتسوي .. بتضرب .. بايش .. بعقالك و الا بيدك و الا برجلك ..
بتال بصراخ / عنووووود ..
راكان يصرخ / خلاااااص .. العنود ادخلي البيت .. يالله ..
العنود عصبية / لا مو داخلة .. لحد ما اشوف ايش اللي يقدر يسوي ..
راكان بغضب / العنود .. احسن لك تدخلين لا والله لزوجك اية مثل ما يبي جدي و اكسر راسك ..
العنود بغضب / اكسرة .. اكسرة يا اخوي .. مانت اولهم .. اللي بغو يكسروة و ما قدروا ..
" سكتت بعد ما شافت الصورة تسود قدامة و فقدة السيطرة على توازن جسمها .. وسط صراخ بتال و راكان " ..






ــــــــــــــ







شركة الفارس ..




طلال و سيف و فارس يضحكون على شكل سعود ..
سعود بقهر / تضحكون .. اااااه يا القهر .. اااه ..
طلال بضحكة / هذا من دعاوي نوال عليك ..
سعود يطالعه بقهر / انتم لو خليتوني اقابلها و اقعد معاها .. كان كل الدعاوي صارت لي مو عليه ..
سيف بتلذذ / معصي .. تبطي تشوفها قبل ما تلبي كل شروطها .. و لا تنسى العيادة ..
سعود بسخرية / تبطي انت واختك .. مصدقين عمركم انه بادفع كل هالمهر ..
طلال بثقة / بتدفعة وانت طيب ..
سيف / والا والله لتحلم تشوف ضفر اختي ..
فارس بضحكة / اللهم لا شاماته .. يالله لتذلني مثل مذلتك ..
سعود بثقة / يا اخي تراهم ما عندهم الا الخرطي .. والا لو اخلي اختهم معلقة ..
واتزوج بالخمسمئة الف عروس اصغر منها و احلا منها ...
سيف و طلال بحدة / قد هالكلام ..
سعود ينفخ الصدر وهو ينسف شماغة / لا والله مو قدة .. القلب و احد و ملكته العوبا ..
الكل / هههههههههههههههههههههههههههه ..
قطعهم صوت رنين تلفون طلال .. فتح المكالمة .. وهو مبتسم .. / الو .. هلا ..
" عقد حواجبة ووقف بخوف " .. طيب طيب .. في اي مستشفى .. جايكم .. جايكم ..
قفل المكالمة وهو يسحب مفتاح سيارته و يطلع ن المكتب .. لحقة سعود وفارس و سيف باهتمام وخوف ..
سعود بخوف / ابو عبدالعزيز .. خير ايش فيك ..
طلال و هو يدخل المصعد / العنود طاحت على راكان ووداه المستشفى ..
سيف بستفسار / طيب .. في اي مستشفى " بس قفل المصعد " ..
سيف و قارس و سعود طالعوا في بعض بضيق ..
سعود وهو يمسح وجهه / لا حول ولا قوة الا بالله .. استغفر الله العظيم ..
سيف بهدوء / انا رايح اقول لابوي ..
فارس / وانا عندي شغلة ابي اخلصها و اروح البيت ..
سعود بضيق / وانا ابي اتصل على بتال .. ايش ايش صار معاه ..






ــــــــــــــ





بالمستشفى ..


نايف قاعد على كراسي الانتظار وهو يهز رجلة بعصبية ..
راكان كان يتكلم مع بتال و يفهم منه الموضوع ..
زياد جاب من الكافتيريا علب ماي .. اعطى نايف علبة وراكان علبة ..
وبتال رفض ياخذ .. راكان جلس جنب نايف و بضيق / انت قلت لها شي ..
نايف بعصبية / لا ..
راكان هز راسة / ما اظن تعرف اصل .. كل ما افكر بكلامة .. اشوفه مو مفهوم ..
نايف بقهر وهو ياشر على بتال / ليهه ما يكون هو قالها ..
بتال طالع فيه بنظرات ساخرة وصد عنه / ...........
راكان هز راسة / لا ما قال لها .. وهو اصل رافض الموضوع .. وبلغ جدي بذا الشي ..
نايف بسخرية / وجدك مصر على رجعتها لبتال كذا مزاج ..
راكان بهدوء / لا .. يقول العنود غلطة و بتال غلط وحنا غلطنا .. ولزم ما نحرم الصغار من امهم وابوهم ..
نايف بسخرية / و نصلح الغلط بغلط اكبر ..
راكان تنهد وهو يوقف / نايف جدك كبر .. و اختك .. يبي لنا نفهمها .. الوضع اللي هي فيه مو عاجبني ..
ولا كلمناها شبت فينا .. كانا عداها ما حنا اخوانها .. وباخر فترة متغيرة حيل .. بعد ما نشوف الدكتور نكمل الكلام ..
" وهو يتوجة لدكتور اللي طلع من غرفة الكشف " .. خير دكتور ..
الدكتور بضيق / انت ايش تقرب للمريضة ..
راكان باهتمام / اخوها ..
الدكتور يا شر على باب مكتبة / تفضل معاية ..
دخلوا المكتب .. الدكتور يجلس على الكرسي و قباله جلس راكان ..
الدكتور بجدية / انت تعرف ان المريضة معاها الضغط ..
راكان هز راسة باهتمام / اية .. وعندها ادوية تستعملها .. هذي هي .. " وهو يسحب الوصفة من جيبة " ..
الدكتور شاف الوصفة وهز راسة بعدم رضاء / الوصفة خطاء .. وهالادوية كلها ما هي حقت ضغط ..
راكان متفاجأ .. / اجل ..
الدكتور بضيق / يبدوا انه خطاء طبي ..
راكان تراجع للخلف بصدمة .. / ...............
الدكتور تنهد / الان اختك .. كانت تعاني من ارتفاع ضغط .. جدا كان مرتفع ..
و فوقها كانت متعرضة لصدمة عصبية .. سببت لها انهيار عصبي .. دخلت على اثرها بغيبوبة ..
راكان بصدمه / غيبوبة ..






ــــــــــــ





انتهى ..

لا اله الا الله .. محمد رسول الله ..

سبحان الله .. و .. الحمد الله .. و .. الله اكبر ..

اعذروني عن القصور و التاخير .. و الاخطاء الاملائية ..

لا تنسوني من صالح دعائكم ..

كونوا بخير ..
اختكم ..
مشاعل السعودية ..