السلام عليكم ورحمه الله وبركاته

صباح الخير...صباح المحبه ....صباح الرياحين
صباحك نفحات من رضا الرحمن
ميشووووو انا جيت >>وحده خافت من العقوبات المبتكره الي تهددينها فيه
قلت اسلم على عمري وانزل ردي..مع انه مايليق فيك ..بس كلش ولاا منشارك
جعل يدينك ماتمسها النار ويفرج همك ويوسع صدرك ويزيل كدرك ويشفي بنيتك

نايف
ميشوووو جعل زوجك مايشوف غيرك^-*..وش مهببه بنويف حسبي الله على العدو عند نايف ووقفي وشتبين منه مو كافي عليه ماعاش لااطفوله ولامراهقه عدله ..
تحمل مسؤلية خواته ووالدينه وهو عوده طري ...في وقت الي كل رجاجيل عايلتهم تخلواا عنهم ورفعوا يدينهم وهو الي تحمل كل ذا بروحه ودافع عن خواته ضد شر شريفوه وغيرهااا..وبعد تحمل جرااايم مروجين المخدرات ودخل في لعبتهم الوسخه عشان يساعد متعب وصلااااح...بالله عليك في احد من اعيالك الرخمه تحمل مثله....
يمه واالله من شفت صدمه العنود بشوفته ان قلبي وقف مو قادره اخمن مره اقول انه على كرسي متحرك...ومره اقول يمكنانه انعمى او تشوه وجه مدري احترت معك....
ايه صح وترى العنود تتحمل جزء من المسؤليه بالي صار لنايف لانه حملته حمل فوق طاقته ماقلت الولد توه صغير على شيل الهموم والمسؤليه

العنود وبتال
العنود وآآآآآآه من العنود تحيرني معاها مررات اصير بصفها ومرات اصير ضدها...احيانا عندها تصرفات وحركات ترفع الضغط....تحمل كل العايله مسؤلية الي صار لهم طيب آمنا بالله انهم اخطاؤ ولاا سالوا عنكم ...
بس لو جينا للحق مين المفروض الي يسال عن الثاني الكبير والا الصغير ...والوصل المفروض يبداء منك انتي يالكبيره والفاهمه..اذا ابوك وامك ربي بلاهم بسم شريفوه وضيع عقلهم...
انتي بعد عقلك ضااع والا غرورك وعزة نفسك تمنعك من انك تستفزعين باهلك ...ترى اذا طلبتي عونهم ومساعدتهم هم ماراح يتاخرون ولاا تحسبينها يمنون ابها عليك لاا هذاااا واجب عليهم تجاهك..
شوفي حتى ابوك بالرغم منكل الي صار ظل يواصلهم ويزورهم ولاا يساعدهم من غير لايحسوون ...ليه ماتعلمتي منه هالشيء ..بس تعلمتي من الظبي القسوه والعناد وانك لازم تنتقمين منهم على شيء هم يمكن مالهم ذنب فيييه..
ولاا بعد تبين تفلسينهم وتجردينهم من حلالهم ...انتي كيف تفكرين ماستحيتي تسوين هالسواه وانتي جالسة بينهم وناكلين من خيرهم وعايشه تحت حمى جدك من بعد رب العالمين ...وهذا هم من قال نايف اخ الكل فزع له وراح له وجابه لعندك....بكره اذا دروا انك ورى كل هالمصايب كيف راح تقابلينهم والا تحطين عينك بعينهم اعيالك بكره اذا اعرفوا وش المبرر السخيف الي راح تبررينه لهم
مدري انا عندي مبدا ان المره عيب عليهاااا تناطح الرجاجيل وتستقوى عليهم ...وهي من قبل مستقويه من كلام الظبي الي ربتها على العناد والقسوه...يمكن هي في فترة احتاجت لقوتها وعنادها عشان تحمي اهلها ...
بس اللحين خلاااص تخلع هالثوب عنها وخاصة ان حولهاااا اهلها ورجاجيلهااا الي يرمون روحهم بالنار لاجلها تعتمد عليهم وتعيش حياتها وتربي اعيالها وتهتم باخوانها وجدانهااا....اما رجعتها لبتا لاحسه لسى يبي لها اشوي وخاصة ان العنود مازالت متاثره من سوايه وكلام الخايب..
بتاااال في مثل يقول >>في الصيف ضيعت اللبن<< وهذا انت يومكانت البنت عندك وتحت يمينك اهنتها وعذبتها وسمعت كلام امك واختك فيهاا...
ولاا لقتها من غير ذنب بسبب رعونتك وتهورك....اما رجعت العنوود لك فاحلم فيها الى تغدي رجاااال وتصير فعايلك فعايل رجال مو يترك اذنه للحريم يترسون راسه ويهدون على بنت الناس..ويازين مايسوي فيك راكان وسند خلهم يربونك عدل لان دلال ابوك لك خربك..

راكان وسميروه
هههههههههههههه صدق شر البلية مايضحك اللحين هالمخبل راكانوه عشان عنزته حت له شمعتين و وردتين وشخطت له هالكحله وسدحت الروج براطمها خق الرجااال ونسى كل فعايلها في اخته وانها تسببت بطلاقها وين الي يهدد ويتوعد بسوي وبسوي وياويله طلع كله كلام جرااايد ماااااااالت عليه هذا الي بياخذ حق اخته من زوجته الحمد لله والشكر بس ر جاجيل همهم بس شهواتهم...
وسمير اللحين يوم انها احتاجت للعنود جات تركض لها وتتميل عندهاااا ...والا من قبل حتى مافكرت تروح لها وتعتذر منها على الي صار والا اقل منها تبارك لها على اعيال اخوهااااا....وفوق شينها تقول بخلي زيون عندك جعل يزن عليك راسك ماتلقين علاجك .....
الجد وسند
الجد ماوصى سند على العنود الا انه واثق فيه ومتاكد انه هو الوحيد الي يقدر يساعدها وبيحميها من أي احد يحاول ياذيهاا..لان لاراكان ولاازياد ولاا بتيل ولاا عمامها كفوو انه يامنهم عليها كلهم راح يقهرونها اذا عاندتهم والا وقفت بوجيهم...ولان سند هو الوحيد الي يقدر انه يكسر العنود ويحد من عنادهااا

طلال ومرااام
سماجه وسخافه مالها حدوود ....مرامو الخبله ترى امثالها بالمجتمع كثيرر ياااااماحريم مثلهم زينتهم بس اول العرس بعدين تشوفينهم كنهم مطلعينهن من المقبره...
ولاا تعالي شوفيهن اذا حملوااا تقولين ملك الموت فوق روووسهم...لااتهتم لابرجل ورا بيت وهامله روحهاا هي خلاص حملت امنت ان الرجال مراح يطلقهااا...انا هالنوعيه اكرهااا الوحده المفروض تكون مرتبه دائما ما اقول تحط مكياج كاامل كنها بعرس لااااا مافيه احقر من الروج والكحله وتشذب كشتها الطايره..
وحده اعرفها من الاهل قبل لاتتزوج تعايب على الحريم وانها اذا تزوجت بتسوي وبتفعل وماغير متسنعه بس خل تتزوج الله وكيلك تعالي شوفيها الروج مايطبها والكشه الله اعلم بها ودااااائما بقمصان البيت حتى لو زارها احد وياريت قمصان عدله ام 10والا 105 رياااال...
انا افكر هذيلا كيف ارجالهم مستحملينهم اذا انا تلوع كبدي بس البلاا ان رجاالهم خاتم بيدهم...

غرام شجينه ووسميوه
اخخخخ بس ليت غراموه ماسكة شجينه من كشتهاااا وايحة فيها ضرب لين تقول آآآآمين...لان هالبنت استخفت واقعدت وتبي تجيب لنفسها مصايب هي في غنى عنها...
تحسب تودد وسميوه لها محبة ماتدري انها تبي تجرها لطريق نهايته دماااار وهي الي بتيح ذيك الساعهومايطلع منها الا وسميه وبتحط البلاا كله على راسك ...وهي عارفه اهلها عدل البنت لاا غلطت يدفنونها بارضها ...
ياليت غرام تتحرك ولاتظل ساكته ..مثل ماسكتت يوم شافت علاقة شجون مع ياااسر ولاا بعد ياسروه يتدبس فيييها ونفتك منهم الاثنين لانهم نفس طبع لاا خافوا من الله ولاا احشموا لاا جد والا اب ولاا عم ...
...
عناد
صدقين ميشووو انصدمت من شخصية عناد الجديده..وين ذااك الرجال الشديد القوي والثقيل ....طلع الاخ بالله رقله وخفيف ماصدقت انه هو ذا الي يمزح وميييييت على شجون وجالس يتحسر على عمره..سبحانه يغير ولاا يتغير

الجوهره وسلطان
يقولون غير بلد ولاا تغير طبع...وهذا جويهر وهذا خلاقينها ماتغيرت ابدااا يعني لااطق نفع ولاا طرد نفع حتى الهجر هجرها وهذا هي دق الماي وهي مااااي....
شكل ماراح يكسرها الا الضره اذا انحت على راسها ...والا حسن ميشووووو تستخدمين سلاحك السحري وتكوينها على راسها كود ربي يرد لها عقلهااااا ...
يعني حتى يوم صارت جده وكبرت ماحنن قلبها هالشيء ولاا انا حاولت تعدل بيت ولدها الي خربته بغرورها وعنجهيتهااااا وعاجبها حال ولدها واعيالها كل واحد فيهم بمكان..بعدين أي حياه تبين تعيشينها عقب ماشاب ودوه الكتاب وانتي اعترفتي بالسانك ان سلطان تغير وصار احسن من اول زواجكم المفروض هالشيء يخليك تتعدلين مو يزيد خبالك ..

ميشوووو فديت روحك ياعسل بانتظار طلتك الحلوه عليناااا
احووووووووبك مرررره ميشوووووووواعذريني على الغياب

بسم الله الرحمن الرحيم ..

السلام عليكم ورحمة الله وبركاته ..

الحمد لله والصلاة والسلام على رسول الله ..

توكلنا على الله .. لا اله الا الله محمد رسول الله ..




البارت 32 ..






أحبس دمعتي وأظهر فرحتي للناس
وأناديك ياخلي ساهر الليل أناجيك
قالوا مريضٍ وقلت ياناس لاباس
ليت المرض فيني ولاهو والله فيك
قطعت قلبي وأشتعل داخل الفكر هوجاس
وحال تموت وحال بها العين تبكيك
باب الفرح بيننا أنقفل ومفتاحه الياس
متى تجي وتعود وتفتحه بأياديك
أنهد حيلي وكل صرخة لها إحساس
يبات جفني سهران وشوقه يناديك
حبك وسط قلبي متحكم بكل الأنفاس
وأنتي بداخل الروح والله مغليك
ياليت المرض فيني ولافيه ياناس
وياليت يومي قبل يومك وعمري أهديك
ويالله يارب جعل ماصابه طهور ولاباس
ورجواي في الله أنه يعافيك ويشفيك








وقفت سيارة راكان قبال باب القصر ..
نزل راكان بسرعة وتوجه للباب الخلفي لسيارة .. فتح الباب مسك يد نايف وساعدة بالخروج من السيارة ..
راكان بضيق / لو رايح المستشفى مو احسن ..
نايف يادوب يقدر يفتح فمه ويتكلم / اناا .. قلت .. ابغى امي وابوي .. ليه تجيبوني هينا ..
راكان بختناق وهو يحاول يبلع عبرته / هينا .. كلنا هينا ..
زياد واقف وراهم ويحاول يتماسك لا يصيح من منظر نايف الموجع ..
عناد يقرب من راكان ونايف ومعاه العكاز.. / شوي شوي .. لا تشد على نفسك .. " مسك العكاز ومده لنايف " ..
سند يقرب منهم / مو احسن اجيب لك الكرسي ..
نايف بحدة / لا .. اا .. اقدر امشي ..
بتال بهمس / راكان ..
راكان رفع عينه لبتال وشاف بتال ياشر على مدخل البيت .. التفت على المدخل وشاف العنود واقفه ..



محد انتبه لوقوفها الا بتال ..
متعب وماجد وصلاح من المطار الكل تفرق .. صلاح رجع لرياض .. ومتعب توجه لاهله ..
عزام وغيث رجع لبيت اهلهم .. وبكرة عزام مسافر لـ الامارات يرجع لدوامه ..
عبدالعزيز ورعد كانوا يتكلمون مع سلطان و فهد وخالد وطلال .. ويتكلمون عن وضع نايف ..
سيف وفارس وبدر وسامر وسعود و صقر كانوا يتكلمون عن حالة نايف وايش ممكن صار له ..
راكان وسند وعناد وزياد مهتمين بنزول نايف ..



راكان بهمس وكانه يكلم نفسه .. / العنود ..
نايف رفع نظره لاخوه وشافه يطالع لجهه .. طالع للجه اللي اخوة يطالع لها ..
شافها واقفه تطالعهم وكانها مو مصدقه .. نزلت دموعها اول مرة تنزل من لمن صار اللي صار له ..
ما نزلت وهو يتعذب على يدين تركي و العصابة .. ولا اهتز وهم يهددونه بالموت ..
بس هذي العنود .. هذي امه .. هذي روحه .. هذي عنوده ..
خطئ خطوتين متعبه .. وكان يحاول يشد على نفسه علشان يوصل لها بسرعه ..
اختل توازنه وكان راح يسقط .. لكن بسرعه راكان لف يده حولين خصر نايف وقدر يمسكه ..
صرخ نايف من الالم .. راكان وضع يده على الجرح اللي بجنبه .. / آآآآآآآآآآآه ..



واقفه قبال باب القصر .. مصدومه .. تحس برجولها مشلوله ولا هي قادره تحركها ..
تحس بثقل في جسمها .. وكانه حمل ثقيل على كتوفها مو قادرة تشيله ..
نفسها يرجع لصدرها وينحبس تحاول تتنفس لكن النفس رافض ..


نايف تقدم كم خطوة .. و راكان وعناد يحولون يساعدونه وهو يرفض ..
بس بدا يحس بتعب .. والدوران ..
نايف بتعب / يـ.. يــ... يمه ..



العنود لمن شافت تعبه .. وبعدها مناداته بيمه ..
اهتزت وحست بالي حولها ..
تحركت ونزلت من الدرج بسرعه .. العنود وهي تفتح يدينها وتحضن نايف ..
وبلهفة وخوف / يا روح امك .. سلامة قلبك يا قلبي ..
العنود استغرب من ثقل جسم نايف وبخوف وهي تهزة / ناااايف .. نااايف لا تفجعني يا نايف ..
راكان سحب نايف لمن شاف العنود تصارخ وواضح ان نايف فقد الوعي ..
العنود تراجعت خطوتين بعد ما راكان وعناد وسند وبتال التفوا حولين نايف ..
حملوا جسمه الهزيل بين يدينهم وركبوة السياره .. تحركوا الشباب الباقين وتوجهوا لسياراتهم ..
الي توجه للمستشفى والي توجه لـ اضحيته واتمام امور العيد ..
زياد كان بيروح يلحق اخوه بس العنود تمسكت فيه .. وبحزم / لا تروح البس عباتي وارجع لك .. لاتروح ..




ليت الوجع بعروق قلبي
ولا فيك..
وليت التعب غلطان
ساهي ولا جاك..
لو الشفا بضلع صدري
لداويك..
واطحن جميع ضلوع
صدري فداياك..
الله من شر المقادير
يحميك..
والله يحفظك
يا عيوني ويرعاك





دخلت العنود للبيت بسرعة .. قابلتها ساره وهي تبكي .. طنشتها ودخلت لجناحهم ..
ساره لحقت العنود .. وهي تبكي / العنووو .. العنوووود .. نااا .. ناااايف ..
العنود بعصبية رمت جلال الصلاة و برقع جدتها .. وبحده / ساره انقلعي عن وجهي ماني فايقة لك ..
ساره تراجعت للخلف بخوف حطت يدها على فمه تكتم شهقاتها ..
العنود سحبت العباية من العلاقة ولبستهم بسرعه واخذت الاي فون وطلعت تجري لزياد ..
ام سطام طلعت من الصالة وتوجهة للمدخل .. كانت بتسالها لكن مالحقت عليها ..
العنود بسرعة وهي تجري مع الدرج / يالله مشينا ..
زياد اللي كلم راكان بالجوال وقاله العنود وقفته وتبي تروح المستشفى وراكان قاله لا تجيبها ..
العنود التفتت عليه باستغراب .. بعد ما وصلت السيارة وفتحت الباب وزياد ما تحرك / امشي ..
زياد بضيق واقف وبارتباك / العنود راكان يقول لا تجيبها ماله داعي ..
العنود جن جنونها .. ما يكفي انهم مخبين عنها الموضوع ..
العنود بحدة وصراخ / توديني ولا اركب لي اي تاكسي مع الشارع ..
زياد بخوف فتح عيونه للاخير / ايش تاكسي .....
العنود تقاطعه بحدة / هي امشي واركب قدامي والا والله يا زياد " وهي تضرب السيارة بقبضة يدها " ..
حرتي على اخوك لحطتها فيك في اخوك الثـــ** الثاني .. " وبقهر " .. بتذبحوني انتم .. بتذبحوني ..
زياد تحرك بضيق وركب السيارة العنود ركبت جنبة وهي تغلي من العصبية ..
شافت زياد يرفع جواله وبيتصل على راكان .. سحبت الجوال منه وبعصبية / اترك عنك هالخربان وامشي ..
زياد حرك السيارة بضيق وتوجه للمستشفى / .................





ــــــــــــــــــــــ





بيت ام عزام ..


عزام بتعب / الحمد الله وصلت لها الحد ..
غيث بتفكر / لو ما كان فيه خبر عند الدولة بالحادثة ما ظنتي انه طلع ..
عزام هز كتوفه / اللي قدرت اعرفه ان العصابة متابعينهم من السعودية وفيه اتصال مع بريطانيا ..
يعني الشغلة شغلت مخابرات ومباحث والإنتربول ..
ام عزام تنهدت / الحمدالله انه طلع ما حطوة بذاك السجن الله يكفينا شره والا ما عاد يشوفونه اهله ..
" رفعت يدينها لسماء وبصدق " .. جعل ربي يفك سجن كل اسير فيه .. ويردة لاهله ويقر عين امه بشوفته ..
الكل / امين ..
هيفاء بضياع / الحين مافهمت .. نايف مع المافيا والا مع الحكومه ..
عزام وغيث / الحكومه ..
هيفاء هزت راسها و عيونها فاتحتهم للاخير .. كانها تطالع فليم اكشن وبتركز فيه ليفوتها مشهد ..
غيث يضحك بتعب / هههههههه هيفوه ويش فيك كانك مفجوعه ..
هيفاء بابتسامه / السالفه مثيره ..
عزام يوقف بتعب / يالله ابي انام حس بجسمي متكسر .. " قبل راس والدتها " .. عيدك مبارك يالغالية ..
ام عزام ابتسمت / يبارك فيك يا روحي .. هذي ثالث مرة تقوله ..
عزام يهز راسه / من التعب معاد اركز .. يالله تصبحون على خير ..
الكل / ههههههههههههههههه
هيفاء بضحكه / تصبحون على خير وحنا الصبح ..
ام عزام تضرب رجل بنتها / وانت من اهله ياروحي نوم العوافي يا امي ..
عزام / صحوني الظهر حتى نروح نزور عمي ابو سطام ونعيد الجماعه ..
غيث يوقف بتعب / وانا ابي اروح انام .. سلاااااام .. " وكل راح جناحه يبي ينام " ..
ام عزام التفتت على بنتها بعد ما راحوا عيالها .. وبنبرة مقصودة / ها رعد رجع ما انتي ناوية ترجعين ..
هيفاء صدت عن امها / ماني راجعه يمه .. وابي الطلاق ..
............. من خلفها بحدة / ايشششششششش ..





ـــــــــــــــــــ





بالمستشفى ..


راكان واقف مع سند وبتال وعناد قريب من غرفة الملاحظة ..
راكان وهو يمسح وجهه بضيق / الله يعيني على العنود بس ..
سند بتفهم / اكيد بتعصب وبتزعل منكم لانكم ما علمتها السالفه من اول ..
بس احتويها انت و راح تهدا وتستوعب وتتفهم الموضوع ..
راكان ميل جسمه على الجدار وبضياع / كيف احتويها ..
سند بهدوء / اكيد اول ماراح تشوفك راح تحط كل الاوم عليك وكانك انت اللي اوجعت نايف ..
راكان بسخرية / لالا العنود تفكيرة اشرس من كذا ..
بتال / الحين ما راح يكون تفكيرة الا مثل ما قالك سند ..
راكان بسخرية / خف علينا يا الفهيم ..
بتال تنهد بضيق وجلس على الكرسي .. راكان مستحقرة جدا ولا يتكلم معاه بصدق دائما يتكلم معاه بسخرية ..
عناد اللي جالس على الكرسي بجنب بتال .. مال على بتال وبهمس / انصحك انك تبعد عن عيال عم سطام هذي الفترة ..
بتال بهمس / لا .. ما ابي ابعد .. لا بعدت يزود الجفاء .. انت ما سمعت كثرة الدق تفك الحام .. وانا ابي اكثر الدق ..
عناد ابتسم / بس العنود مو مثلهم .. " وهو ياشر بحواجبه " .. شوف ..
بتال التفت وشافها تمشي بسرعة وعصبية واضحه .. طالع راكان وسند يتكلم معاه بهمس وراكان مركز معاه ...
بتال / راكان .. " راكان طالع فيه " .. شف وراك ..
راكان التفت وشاف العنود وزياد .. توجه لهم ..
العنود كانت بتدفعه وتدخل للغرفة اللي فيها نايف .. بس تفأجات من يد راكان اللي سحبتها لصدره ..
راكان يهمس لها وهو حاضنها / العنود نايف بخير .. اهدي شوي ..
العنود ترجف من العصبية وهي بحضن اخوها .. وبقهر / بخير .. بخير يا راكان وهذاك حاله .. وين الخير وين الخير ..
راكان يهمس لها / لساته عايش .. يتنفس يتكلم .. يمشي .. موجود معانا .. الحمد الله .. قولي الحمد الله ..
العنود هديت شوي وبضيق وقهر / الحمد الله .. الحمد الله .. الحمد الله ...
" ميلت جبينه على كتف راكان وهي تحاول تهدي تنفسها " ..
راكان بهمس / اخذتي علاجك .. اخذتي حبت الضغط ..
العنود هزت راسها بلا وهي ما زالت مميله راسها على كتفه ../ ...........
راكان اخذها وهو ساندها بيده وتوجه لطواري النساء خايف لتطيح عليه .. وزياد وراه ..








سند التفت على بتال وعناد / الحمـ.........
قطع كلامه وهو يشوف نظرات بتال لراكان والعنود وعناد يحاول يكتم ضحكته ..
سند بضحكة يحط يده على كتف بتال / عيدك مبارك يا ابو سلطان ..
بتال يرفع راسه ويطالعه .. تنهد بعشق / عيدك مبارك .. " رجع طالع خيال راكان والعنود اللي ابتعد " ..
بتال بضيق / بعد اسبوع نكمل سنه .. سنه فراق ..






مـرت سنـه والقلـب محـرم وصايـم
يخيـل بـرق الوصـل حـولـك ويـمـك
أحـيـان جــوه عــج وأحـيـان غـايـم
وحاديـه وقتـه عــن مـواريـد جـمـك
ميت علـى شوفـك ومغـرم وهايـم
وده بـقـربــك ويـتـمـنــى يـظــمــك
وإن طعتنـي دامــه يــرد النسـايـم
إلحق عليـه إن كـان وضعـه يهمـك
ماعـاد يسمـع فـيـك نـاصـح ولايــم
أهــل الــدوادي والـكـلام المنـمـك
أنــــا وعــذالــي مـاغـيــر نـتــزايــم
وماسمح لحد منهم بكلمـه يذمـك
وإن قلـت دلونـي علـى حـل دايــم
قالو لي إنسه والعوض بنـت تحبك
متـى علـى الله يصبـح الحـظ قايـم
بـقـدرة كـريـم إنـــه عـلـيـه يـلـمـك
بأمره يسوقك من يسـوق الغمايـم
من بعد مانبـدي علـى أخـوك وجـدك
بالمـال وإن عـيـو حذفـنـا العمـايـم
تجـي معـي لازمـك بأطـراف كمـك
نـفـرح بجـمـعـة شمـلـنـا ونـتـلايـم
وننسى العذاب وكل همي وهمك
كنـي بيـوم النـصـر وأنــت الغنـايـم
لاصـرت فـي بيتـي بلحمـك ودمـك






ــــــــــ



بيت ام عزام ..




غيث بحزم / ابو رهف .. انت مو فاهم الموضوع ..
هيفاء بحضن امها و تبكي / ...........
عزام بحدة / وشنو اللي ماني بفاهمه .. تبي تطلق .. ليه هي اكملت سنه علشان تتطلق ..
ايش تبي الناس يقولون علينا .. رافضة سنين تعرس ويوم اعرست ما كملت سنه وتبي تطلق ..
غيث / عزام اترك الموضوع عليه .. انا اتفاهم مع هيفاء .. لكن يدك لا تمدها ..
عزام بسخريه / لا والله .. ليش ما امدها .. يوم الجوهرة سوت سواتها ماحميت عنها مثل حماتك عن هيفاء يالمحامي ..
غيث ابتسم بارهق / الجوهرة غير هيفاء يا السياسي .. عزام انا اعرف ايش فيها هيفاء علشان كذا ما تبي رعد ..
غيث بحدة / وليه ما تبيه .. هاينها مزعلها .. والله لو هو ظايمها لجيب حقها منه لو اقطع ارقبته ..
غيث / هههههه " قرب من اخوه وقبل خشمه " .. رعد مو مسوي شي .. انت روح لمرتك وهي تفهمك ..
عزام تراجع للخلف وباستغراب / هاا ..
غيث يبي يبعد اخوه وبس .. دفعه للخلف بمزاح / روح لمرتك وهي تعلمك عندها العلم الزين روح روووووح ..
عزام التفت للخلف وشاف ام رهف خلف باب جناحهم وهي لبسه جلال الصلاة وبرقعها وشكلها مرعوبه ..
عزام بتعب / طيب بس لتفكر تعيد الكلمة اللي قالتها ..
غيث يبي يخلص من اخوه .. ريما فوق وهو مشتاق لها وتعبان / ايه ايه طيب متعيدها روح لـ تفتف حقتك بس ..
عزام ابتسم / تفتف في عينك ..
غيث / ههههههههههههههههه " وبصوت عالي وهو يشوف اخوه رايح لجناحه " ..
يام رهف لاهنتي امسحي على راسه واقري عليه يمكن يهجد بذا اليوم الفضيل ..
عزام ابتسم / والله ماحد يبي له قراية كثرك وعساك تعقل .. " ودخل لجناحه " ..
ام عزام ابتسمت وهي تمسح دموعها ../ ...........
غيث التفت على هيفاء .. وبسخرية يقلدها / ابي اتلك .. " التفتت على باب المدخل وبتفاجاء " .. رعد ..
هيفاء فزت واقفه وهي تمسح دموعها .. طالعت جهة الباب وماشافت احد ...
غيث / هههههههههههههه ابي اتلك .. اقول روحي كلمي رعد واهجدي بس ..
ام عزام غطت وجهها بيدينها وهي تضحك / ههههههههههههه
غيث قبل راس والدته / فديت هالضحكة .. ادعي لهم يمه .. يالله انا رايح لريميتي ..
" وبخبث " .. واذا خاطركم بهوشة خلوها بعد ساعتين ساعه .. " وتوجه لدرج وهو يصارخ " .. جيتك يا الريم ..
ام عزام حمر وجهها وبخجل / استح ياولد ..
غيث وهو يصعد الدرج / ههههههههههههههههههههههههه ..





ــــــــــــــــ




عند العناية المركزية ..
من خلف الزجاج العازل ..



رعد بتعب / الحمد الله على سلامته ..
عبدالعزيز بتعب وضيق / طهور ان شاء الله يا الغالي ..
رعد لسلطان / متى يفوق ويقدر ياكل ويتكلم معانا ..
سلطان بضيق وتعب / الحين الوضع مستقر الحمد الله .. ان شاء الله يومين ويطلعونه ..
عبدالعزيز / هو ما كلمكم من وقت العملية ..
سلطان بحمد / الا .. الحمد لله صحي وكلمنا و سئل عن الجميع .. الحمد الله .. بس الحين نايم علشان العلاج ..
رعد وعبدالعزيز / الحمد الله .. الحمد الله ..
الممرض / لو سمحتم طولتوا وهذا فيه مضرة ليه وللمرضى لو سمحتوا ممكن تطلعون ..
سلطان / ان شاء الله .. " التفت لاخوانه " .. خلونا نطلع ونمر نايف نشوف حاله ..
عبدالعزيز بضيق وهم يطلعون من البوابة الرئيسية لقسم العناية / الله يهديه ..
حنا قلنا له من المطار على المستشفى انت تعبان بس هو عنيد .. ابغى ابوي وامي ..
سلطان بضيق / هو ماعنده خبر ؟!!
رعد وهو يمسح على وجهه / لا ما قلنا له .. ما قدرنا وخاصة هو بهالوضع ..
سلطان بقهر / الا هو ايش طيحه به المافيا ..
عبدالعزيز / يقولون من اللي عرفه عزام انه من السعودية وهو يعرفهم ..
سلطان باستغراب / ليكون من سلفة اللي خبرك ..
عبدالعزيز يهز كتوفه / ما ادري خل الولد يصحى ويتعافا ونسئله ..
" باستغراب " .. الا قبل لا نسئله هو راكان غيبته الشهور الطويلة هذيك وين كان فيه تعرف ؟..
سلطان وضع اصباعه السبابه والابهام على جبينه / لا .. والله يا عيال سطام كلهم الاغاز ومشاكل ..
يبك تمسك واحد واحد وتسئله .. ويالله تفهمهم ..
عبدالعزيز / يقوم ابوي بسلامه وتهدا الاوضاع ونفهم كل شي .. ان شاء الله ..
رعد / هذي الغرفة ..
عبدالعزيز / ايه هذي هي ..
دخل سلطان وعبدالعزيز ورعد .. وصوت خافت / السلام عليكم ..
سند وعناد وبتال بصوت خافت / وعليكم السلام ..
سند بخفوت / هذا حنا طالعين ..
سلطان ياشر بيده اطلعوا .. وطلع الجميع من الغرفة ..
سلطان / وين راكان ..
سند / راح لـ الطواري .. هاا هذا هو .. " وهو ياشر على جهة راكان " ..
راكان من الخلف / السلام عليكم ..
العنود تعدت الجميع ودخلت لغرفة اخوها ..
الكل / وعليك السلام ..
عبدالعزيز / سلامات ليه رحت الطواري ..
راكان / بس نشوف ضغط العنود ..
رعد بخوف / ضغط ايش .. متى جاها ..
راكان بتعب / الحمد الله على كل حال ..
الجميع / والنعم بالله ..
سلطان / واحد يقعد عن نايف .. والباقي يرجع .. ابو سند يقول البيت مليان ضيوف ..
راكان هز راسه .. / سامر وصقر اتصلوا عليه وطلبوني يقعدون عن نايف ....
قاطعه سلطان بحزم / الصغار لا ..
راكان هز راسه / وانا قلت لهم لا .. زياد يقعد عنده لـ الليل ويرجع .. وانا اقعد عنده الليل ..
سند حط يده على كتف راكان / وحنا موجودين متى ما بغيتنا لا يردك شي اتصل وحنا تحت امرك ..
راكان بابتسامه / ما يامر عليك عدو ..
رعد وعبدالعزيز وسلطان و سند تحركوا راجعين للبيت ..
عناد / انتظرك تمشي معاي والا بسيارتك ..
راكان تنهد / لا الله يسهل امرك .. انا معي ام سلطان ..
بتال بهدوء / ابو شيخه .. امانه لا بغيت شي .. لا تتحسس ..
راكان ابتسم بسخرية / لا ابي اتحسس .. " وبحدة مازحه " .. روح يالله لا اشوف الا مقفاك ..
شايف عيونك بتطلع من محله وانت تراقب اختي .. تراني ماني اعمى عن تصرفاتك ..
بتال / ههههه .. " وبستعطاف " .. يمكن يحن قلبك عليه ..
راكان رفع حاجب / ردد .. ردد ..
عناد وكانه يغني بصوت خافت / يالليييييييلللل مااااااا اااااطوووووووواااااالللللك ..
بتال ابتسم / لك يوم يا ابو شيخه .. رايح الحين للبيت .. ابي اشوف عيالي واعايدهم واعطيهم عيديتهم ..
راكان هز راسه ودخل لغرفة نايف .. عناد وبتال تحركوا وطلعوا من المستشفى راجعين البيت ..




ـــــــــــــ




بعد الظهر ..

في مجلس بيت ابو سطام ..

وقت الغداء ..


خالد يوقف صقر اللي يصب القهوة لضيوف .. وبهمس حازم / ابوك ما يكلمك ...
صقر تنهد بضيق وهو مايل على عمه / كلمته امس .. قال انه بالمغرب ..
خالد بغضب هامس / ابوك ذا مايستحي قبل فترة ماسكينه ومـ.... " سكت بضيق " ..
ما اقول الا الله يستر علينا و لا يفضحنا بتال العمر ..
صقر اسود وجهه قهر وغبينه .. سحب نفسه من امام عمه .. وضع الدله على احد الطاولة ..
وطلع من المجلس .. توجه للحديقة الخلفية وجلس على احد الكراسي بقهر ..
غطى وجهه بيدينه وصار يبكي بقهر .. حس بيد على كتفه ..
صد بوجهه وصار يمسح عيونه من اثار الدمع ..
سند جلس جنبه وبحنيه / اذا البكى يريحك ابكي ماهو عيب .. والله مو عيب ..
صقر زاد بالبكاء .. ومن بين بكائه / والله قهر .. بدال لا يكون قدوة لي وينصحني .. انا اللي انصحه ..
سند بهدوء وداخله نار من القهر / يمكن خيرة لك ما تدري ..
" وبداخلة .... عسى بس هذا اللي تعرفة يا صقر ولا تعرف عن بوك اكثر .. الله يستر من اخرتها الله يستر " ..
صقر تنهد بضيق / تدري اني ما ابي اقابل اخواتي .. علشان لا يسألوني وين ابوي ..
سند بهدوء / وان سألوك قول مسافر وبس .. وهم ما راح يسألون اكثر ..
صقر هز راسه بنعم / .................
سند تنهد بضيق وصد يطالع لبعيد / ................





ـــــــــــــ




بعد العشاء ..


بعد يوم طويل مرهق ومتعب ..
وبعد استقبال المهنئين بالعيد الاضحى المبارك ..


بالصالة ..


رعد يوقف وبارهاق / انا خلاص فصلت تعبت تعب عمري كله ما عبت مثله ..
ام سطام بحنان / ياروحي انت سلامتك من التعب ..
رعد يرفع يده / سلاااااااااااام .. " وتوجه لجناحه " ..
مياسه وام سطام / مع السلامه ..
مياسة باستغراب / غريبة هيفاء ما رجعت .. ما تدري بن رعد رجع ..
ام سطام باستغراب / والله ما ادري كلمتني مزنه وقالت انهم بخير وما تقدر تجي ..
علشان عزام مسوي عشاء والله ما ادري وانا امك لكن بكرة يروح رعد ويجيبها ..
مياسة هزت راسه / خير ان شاء الله ..
ام سطام / يا امي شفتي العنود وحاله ..
مياسة / ايه يمه الحمد الله احسن .. جاها راكان وتكلم معاها وطمنها عن نايف وبعدها اكلت من العشاء وارتاحت ..
ام سطام بضيق / يعزي لحالهم .. جعل ربي يفرجها علينا .. يا كريم يارب ..
مياسه وهي توقف / يارب .. ما ودك تنامين يمه ..
ام سطام تتسند على عصاها / الا والله .. يا الله .. يا الله .. " وتوجهت لجناحه وهي تدعي بالفرج " ..






ـــــــــــــــ




شقة رعد ..


دخل الشقه .. وفتح الاضاءة دخل على طول للحمام " اكرمكم الله " .. تدوش وطلع ..
لبس بيجاما توجه للكنبة اللي ينام عليها .. جلس وطار يطالع بالجناح .. بارد وباهت بلا الوان ..
رعد تنهد بضيق .. جلس يفكر شوي بينه وبين نفسه .. فز واقف وتوجه لغرفة الملابس ..
لبس جينز و تيشيرت ابيض و لبس ساعته البيضاء اللي اهدتها له هيفاء بعيد الفطر ..
تعطر و اخذ مفاتيحه ومحفظته و جواله وطلع من الجناح ..




ــــــــــــ




بيت ام عزام ..


جناح هيفاء ..


طلعت من الحمام وهي لفه الروب على جسمها وتنشف شعرها .. وجهها احمر من البكاء عيونها وانفها اكثر احمرار ..
رمت الروب ولبست بيجامتها البيضاء الحرير .. مشطت شعرها .. حطت كريم على يدينها ووجهها ..
و تعطرت .. توجهة للإضاءة وخفضتها .. توجهة لسرير .. رفعت الفرشة وهي تتنهد بضيق والعبرة خانقتها ..
دخلت تحت الفرشة وغمضت عيونها وهي تحاول تهدي نفسها وتنام .. بدات تقرا اذكار ماقبل النوم .. وبدات الاستغفار ..
استغفر الله ... استغفر الله ... استغفر الله ... استغفر الله ... استغفر الله ... استغفر الله .. استغفر الله ........
ابتسمت وهي تشم ريحة عطرة وكانه موجود بقربها .. عقدت حواجبها وهي تحس بثقل جنبها ..
فزت برعب وهي تحس بيدين التفت على خصرها .. كانت بتصرخ لكن الرعب شل لسانها ..
رعد بهمس / بسم الله عليك .. انا رعد ..
هيفاء تحول تستوعب وتحاول تهدي نفسها وتقنعها انه رعد .. هذا صوته وهذي ريحة عطره ..
رعد بهمس / تعبان هيفاء تعبااااااااان وابي انام .. " شد على خصرها وحضنها اكثر .." ..
هيفاء مو مستوعبه حاولت تتحرك لكن ما قدرت .. قالت بداخلها خله ينام واهرب ..
بس الدفاء والتعب اخذها هي بعد لرحلة النوم الهني ..






ــــــــــــــــــ





يوم جديد ..




بجناح العنود ..


العنود تلبس عبايتها .. وبحزم / ماني منتظرتهم ... ابي اروح له متى مابغيت وبغصب عنهم ..
زهره / براحتك .. اخوانك وانتي تتفاهمين معاهم ..
ساره بخوف / العنود ابي اروح معاك ..
العنود بحزم وانهاء للموضوع / لا .. بس يتحسن اكثر اخذك .. انتبهوا للعيال .. سلام ..
زهرة / العيال عندي لا تخافي عليهم .. بس من بيوصلك ..
العنود وهي تتفتح باب الجناح / يعني اذا راحوا واتركوني باتربط ..
زهرة تهز راسها / عنيدة الله يحفظها بس ..





العنود مرت على المطبخ وسحبت السلة اللي فيهم اكل وقهوة وشاهي وطلعت من المطبخ ..
ربطت برقعها ورمت الشيله على عيونها .. رفعت عبايته على راسها حملت السلة وطلعت برا البيت ..
التفتت يمين والتفتت يسار .. شافت وليد وريان جالسين قريب من العريش وشكلهم يلعبون ..
تقدمت منهم .. العنود بهدوء / السلام عليكم يا شباب ..
ريان و وليد رفعوا عيونهم يطالعونه .. ابتسموا / وعليكم السلام ..
العنود ابتسمت / وينكم اليوم ما مريتوا على السلطان والظبي ..
وليد نزل راسه بضيق .. و ريان بضيق / علشان وليد زعلان ..
العنود عقدت حواجبها / ليه .. " التفتت على وليد " .. ابو سلطان من زعلك ..
وليد بزعل / اخواني .. ابي ازور جدي ما خلوني ..
العنود ابتسمت بخبث / طيب ايش رايكم تروحون معاي تزورون نايف وتزورون جدي اذا كان مسموح ..
حتى انا ابي ازور بس مافي احد من اخواني وانا ابي لي رجال يروح معاي لانه ما يصير اروح لحالي ..
وليد وريان يطالعونها / .............
العنود / ها ايش قلتوا .. تروحون معاي .. والا انتم صغار ..
وليد ينفخ صدره / لا مانا صغار حنا رياجيل .. " التفتت على ريان " .. صح ريان ..
ريان ينفخ صدره / صح ..
العنود / اجل ريان روح نادي صبري تلقيه هناك عند الباب قله ام سلطان تبيك بسرعه ..
ريان راح يجري ينادي صبري .. العنود التفتت على وليد .. وبهدوء / وليد شنو كنت تسوي البارح ..
وليد باستغراب / البارح .. ايش اسوي ..
العنود اشرت على زاوية / هنااااك عند صندوق الزباله .. البارح بعد العشاء ايش كنت تسوي ..
وليد ارتبك .. وخاف انه ينكشف / .................
صبري من خلف العنود / نعم يا عمه ..
العنود / صبري جهز السيارة بنروح المستشفى نزور نايف ...
صبري / ابشري ياعمه ..
" صبري مازالت سيارة نايف معاه .. سيارة نايف اللي اشترتها له العنود قبل .. تذكرونها ؟؟.." ..
ريان يتنفس / هذا صبري مره طيب .. احسن من خان ..
العنود ابتسمت له .. التفتت على وليد وشافته منزل راسه ويحرك رجله يمين ويسار يلعب بالحجارة ..
صبري قرب السيارة اخذ السلة وحطها بشنطة السيارة .. العنود ركبت وراء وجنبها ريان و وليد ركب قدام ..
وتوجهوا للمستشفى ..





ـــــــــــــ





في المستشفى ..



في الصالة اللي بالجناح قبال غرفة نايف ..

ماجد بصوته المتعب من اسفر واللي صار لهم مع نايف .. / لا انا خفيف بس ضربتين ورموني بالشارع ..
واخذوا نايف وانا بلغت الشرطة .. بس ياهي ضربتين الله لا يوريكم ..
عناد عاقد حواجبه / بس كذا خطفوكم والا لكم ثار ...
ماجد هز كتوفه / ما ادري بس هم كانوا يبون نايف بالاسم ..
بتال بجفاف / انت لك كم هناك ..
ماجد بكره / سنه ..
بتال رفع حاجب وصد / ........................
سند / انت تدرس ..
ماجد وقف / ايه اول سنه الغة وبعدين الجامعه ..
طلال / تبي ترجع تكمل ؟
ماجد بصدق / اعوذ بالله .. معاد انا خارج من السعودية ..
الكل / هههههههههههههههههههههههه
متعب خرج من الغرفة .. طاحت عينه بعين بتال صد بقرف وكره .. / هاا مشينا ..
ماجد بضيق / مشينا .. والله بغيت اقعد عند نايف بس امي الله يهديها حالفه ..
طارق واقف جنب متعب / بالله مالها حق تخاف لك سنه غايب عنها ويوم جيتها يدك مكسوره و وجهه معدوم ..
ابو عبدالعزيز من وراهم .. يكلم راكان / اهاا المهم لبغيت شي والا محتاج شي كلمني ..
وقل للعنود تكلمني قطعت عني كني انا اللي موجع نايف ..
راكان ابتسم / ان شاء الله لرضت عليه و صارت تسمعني قلت لها ..
ابو عبدالعزيز وهو يتعكز على عكازته وطالع من الجناح / اجل بنموت ولا كلمتنا ..
متعب وطارق وماجد وراكان / ههههههههههههههههههههههههه
عيال الفارس عاقدين حواجبهم باستغراب معادا سند مبتسم / .............
طلعوا الكل من الجناح لان وقت الزيارة الصباحي قرب ينتهي ..
راكان التفت لماجد اللي مجبس يده اليسرا ولصق على حاجبه الايسر وطرف شفته فيها جرح ..
ماجد انتبه له وابتسم .. راكان بهدوء / الحمد لله على سلامتك مشكور ..
ماجد ابتسم / لخدمة غريب انشكر لكن نايف واللي يحبهم نايف لو يطلبون روحي تفداهم ..
راكان هز راسه وبابتسامه / تسلم روحك ..
متعب يمزح وكانه خايف / اوب اوب اوب .. ماجد الشرده ياولد .. العنود جات ..
راكان عقد حواجبه والتفت للخلف .. وشاف العنود تمشي ومعاها ريان ووليد وخلفها صبري ..
هز راسه بضيق .. / اذبحها والا ايش ..
متعب بهمس / حنا ماشين قبل لا ننذبح سلام .. ( " ولحق ابوه وطارق "..
راكان التفت وشاف ماجد ابتسم وهز راسه لعنود / سلم لي عليها .. سلام .. " وراح لحق متعب واخوه وجده " ..






العنود مانتبهت لمتعب كانت عيونها على ماجد .. رفعت يدها شوي واشرت له بيدها تهدده " يا ويلك " ..
راكان تقدم منها وبهمس حاد / انا ماقلت لا تجين ..
العنود بهمس حاد مماثل / وانا قلت جايه ..
راكان بهمس حاد / العنود ماني فايق لك ..
العنود تبتعد عنه وبهمس / ولا انا فايقه لك .. " وبسرعة دخلت جناح نايف " ..


كان بتال وسند وطلال مازالوا موجودين عند نايف رتبوا المكان ويشفون من يبقى عنده ..
لان راكان وزياد سرانين لهم يومين ولزم ينامون ويريحون ..
العنود بصوت هامس / السلام عليكم ..
الكل / وعليكم السلام .. " وطلعوا على طول " ..
دخل صبري / السلام عليكم .. الحمد الله على السلامة ..
نايف اشر له بعيونه يعني " شكرا " ... صبري " حط السله وطلع وهو يمسك عبرته " ..
دخل ريان ووليد بخجل / السلام عليكم ..
العنود / وعليكم السلام .. نايف مايقدر يرد علشان الجرح اللي عند فمه ..
ريان ووليد فاتحين عيونهم للاخير مفجوعين من شكل نايف ..
راكان من وراهم .. / يا عيال اخوانكم برا ينتظرونكم ..
طلع ريان ووليد .. دخل زياد وقفل الباب الجناح .. وبهدوء / اعلنوا عن انتهاء الزيارة ..
العنود رفعت البرقع لفوق وفتحت وجهها .. فتحت السلة طلعت شوربه وشوية فطاير بالجبنه والزعتر والسبانخ ..
وطلعت ترمس قهوة وشاهي .. وبحزم وهي تحطها على الطاولة / تعال كل انت و اياه ..
راكان يحول يكون هادي / عنود .. اذا قلت لك لا تجن لا تجين ..
العنود اخذت السلة وحطتهم على الطاولة الصغيرة اللي بجنب السرير ..
العنود رفعت السرير حق نايف شوي .. نايف يطالعها وساكت .. العنود جلست جنبه على طرف السرير
وطلعت ملعقه من السلة وفتحت حافظة الشوربة و بدأت تشرب نايف غصب ..
نايف ابعد شوي .. وبتعب وجهد / امي وابوي وين ..
العنود بحزم وهي تحاول ماتبين عبرتهم / عند من يرعاهم ويحفظهم لا تخاف عليهم كُل انت ومالك دخل بغيرك ..
ولا تحاول تكلمني مرة ثانيه لاني يادوب قادرة امسك اعصابي لا اذبحك انت وها الي قاعدين قبالك ..
انا ما ادري كيف قلوبكم لا حش مو قلوب حجر لالا الحجر لو يشوف حالتي يراف لها ويحس ..
" تنهدت بقهر " .. نايف كُل ولا تعصبني لاني راح احرق المستشفى باللي فيها ..
راكان كان جالس قبال نايف .. وجنبه زياد جالسين على الكراسي .. رفع حواجبه ونزلها ..
نايف انتبه و ابتسم وتوجع من الجرح الكبير اللي على فمه .. العنود سحبت منديل وبلته بالماي ومسحت شفايفه ..
رجعت مسكت الملعقه وبدات تشربه .. والكل ساكت .. وزياد وراكان ياكلون من الفطاير ويشربون الشاهي ..
راكان وهو ياكل من فطيرة بالجبن / متى سويتي ذا .. كله ..
العنود طنش ولا كانه يكلمها / .........................
راكان بقهر / ياكرهي لها الطبع فيك ياعنيد ..
انطق الباب .. العنود نزلت البرقع وغطت وجهها .. ودخلت الممرضة الفلبينية .. واعطت نايف العلاج ..
وعيونها تروح للفطاير اللي ريحتهم تشهي .. العنود فتحت السلة وسحبت حافظة واعطتها الممرضة ..
العنود / هذي لك انتي و زميلاتك تفضلي ..
الممرضة اخذتهم / شكرا مدام ..
العنود هزت راسها / العفو ..
بعد ماطلعت الممرضة .. راكان بخبث ومزاح / والله طيحتك حلوة ياولد .. مزيونه " وهو يغمز بعينه " ..
نايف ابتسم .. زياد احمر وجه وارتبك .. العنود بضيق / عاجبتك طيحة اخوك .. والله من الاخوة الزينه ..
راكان بضيق / هو هووووووووه علينا .. لا مزحنا زعلت ولا صرنا جدين زعلت ما ادري ايش يرضيها ..
العنود رفعت البرقع عن وجهها وشمقت .. نايف اشر لها انه اكفاء من الاكل .. ويبي يريحون السرير ..
العنود بللت منديل ونظفت فمه من اثار الشوربة .. نايف بتعب / اعطيني ماي ..
العنود فتحت علبه الماي و شربته شوي .. وقفت وريحت السرير دقايق وغط نايف بالنوم ..
العنود جمعت الاكل ونظفت الطاولة .. ورجعت كل شي لسلة ماعدا القهوة والشاهي ..
التفتت على نايف وتنهدت بضيق والم .. طالعت لوجهه .. حاجب الايمن مجروح وعليه لصق ..
عين اليسرى منفوخه وحولينها لون ازرق وبنفسجي واخضر واثار دم ناشف تحت العين ..
حمده ربها بداخلها انها مافقدها .. انف مجروح وعليه لصق .. شفايفه المجروحه ..
من اسف الجهة اليمنى واثر دم ناشف بحجم كبير .. طرف الشفه اليسرى من الاعلى مجروح لحد العين المنفوخه ..
وكانها مقطوعه بسكين .. اسفل اذنه اليمنى من الخلف ملفوف شاش ابيض مو عارفه ايش تحته ..
راسه ملفوف بشاش ابيض .. يد يسرى مكسورة باصابع ملفوفه عليها الشاش الابيض ..
واليد اليمنى ملفوف اصابعها بالشاش .. نزل الفرشة عن صدرة شوي وانكشف لها الجروح الكبرى ..
تقدمت بهدوء وقت استرخاء راكان وزياد .. ورفعت الفرشه وابعدتها عن صدره .. حطت يدها على فمه بسرعة ..
تمنع شهقته من الطلوع .. اعلى صدرة من الجهه اليمنى قطعة شاش ابيض مربعه واثر المضاد خارج من الشاش ..
يعلن التهاب الجرح واصابته البالغه .. بطنه كله ملفوف بالشاش وملتف على ظهرة ..
رجعت بترفع الفرشة اكثر عن جسمه تبي تشوف اللي مخبى .. بس قطع عليها يد راكان اللي سبقتها ومسكت يدها ..
راكان بهمس وصوت موجع / الفضل لاتشوفينه ..
العنود بخوف وهي تحس بالعبرة اخنقتها .. وبصوت هامس يرجف / وين ؟ ..
راكان رفع الفرشة وغطى نايف .. مسك يدها وطلعها لصالة .. / فخوذة .. حارقينه فيها ..
العنود بتاكيد / بس .. بس حرق ..
راكان هز راسه وبالم / بس حرق .. بس الحروق كبيره .. كبيرة حيل .. ورجله اليمنى مكسوره كسر خفيف ..
لكن اليسر في الساق فيه جرح طول الساق .. " وبالم " .. هالجروح بسيطه امرهم اهم شي نفسيته نفسيته ما تتعب ..
العنود جلست وبالم / ياربي ارحمنا .. " رفعت راسها " .. من سوا فيه كذا ..
راكان يجلس جنبها / يقولون مافيا خطفته .. والسبب مجهول .. " ما كان يبي يقول لها عن المباحث ..
يبي يعرف الموضوع من نايف ويبي يربطه بالي صار معاه هو شاك بشي ويبي يتاكد " ..
العنود بضيق / انتم ايش سويتوا .. انت انخطفت لشهور وما صدقنا رجعت بسلامة ..
والحين نايف .. " حطت يدها على راسها وسكتت ثواني ورفعته بخوف " .. راكان ..
راكان عاقد حواجبه ومستغرب من كلمتها .. " مخطوف لشهور " .. بنبرة غريبه / همممم ..
العنود بخوف / معقول يكون واحد مستقصد هالشي .. يعني السبب وراء اللي صار لك ولنايف ..
خطفك وخطف نايف واوجعه .. اكيد راح .. " وطت صوته وعيونها راحت لباب الغرفة " .. ياذي زياد ..
ويمكن ساره .. " طالعت راكان " .. ويمكن انا والا عيالي .. " فزت واقفه وبخوف " .. ممكن صح ..
راكان عاقد حواجبة / وليش .. يعني ايش يبغى منا ..
العنود تفكر / كيف ايش يبي .. حنا عيال سطام .. تعرف سطام ..
راكان ابتسم بسخرية / اللي يسمعك يقول اغنى ناس بالسعودية ..
العنود التفتت عليه وبنبرة مقصودة / تقصد بالعالم .. " وبحزم " .. من بكرة ما تتحرك انت واخوانك الا والحراس معاكم ..
راكان يحط رجل على رجل وبسخرية / البادي قارد .. ايه طيب و من وين نجيب فلوسهم .. لا تقولين من فلوس الظبي ..
" وبجدية " .. ما عاد لـ الظبي فلوس .. لان كل ممتلكات الظبي اللي بيد جدي سعد انا اعرفها .. وكلها كانت تحت يدي ..
وبسبب الخساير كنت ابيع منها .. وما عاد بقي الا البيت اللي بالرياض وهذا هو احترق ولا عاد ينفع لشي ..
العنود جلست جنبه وبدوء / وانا قلت مال الظبي .. " هزت راسه " .. لا كل اللي بنصرفه وراح نصرفه من مال سطام ..
راكان عقد حواجبة / انا مستغرب من كلامك مال ابوي ومال ابوي .. اذا صدق ابوي عنده ممتلكات ..
دليني على وحدة منها .. انتي شايفه وضعنا حتى بيت يلمنا مافي .. حاشرين نفسنا في بيت جدي ..
متضايقين ومضايقين غيرنا ..
العنود بهدوء / لانك اعمى .. " التفت راكان لها بحدة " .. مع احترامي " ابتسمت بسخرية " ..
لو تفتح عيونك بس شوي وتشغل مخك كان من زمان وحنا قاعدين في بيتنا .. اقصد بقصرنا قصر ابوي سطام ..
راكان عقد حواجبه / ...............................
العنود ابتسمت بخبث وقفت وهي تنزل برقعها وترمي الشيلة على عيونها رفعت عبايتها / رجعني للبيت ..
ونام وريح وبعدين راح افهمك قصدي لان الحين لو افهمك بتقعد متنح ولا فاهم شي ..
راكان يطالعها بقهر وعصبية / انتي تحبين تعصبين الواحد .. " رن جواله رفعه وشاف سيف " ..
راكان يوقف / هذا سيف وصل .. يالله مشينا ..
العنود رجعت للغرفه وقبلت راس نايف بهدوء .. راكان صحى زياد اللي غفى على الكنبة وسحب السلة معاه وطلع ..
دخل سيف وفارس بهدوء وبقيوا عند نايف راح يتناوبون عيال الفارس على نايف لين يطلع ..





ــــــــــــــــــــــــــ






بيت ام عزام ..



بجناح هيفاء ..



كانت تحس بصداع وثقل .. طولت بالنومه .. فتحت عيونها بدوء .. رفعت يدها ومسحت وجهها ..
جات بترفع نفسها بس حست بيد ترجعها على السرير فتحت عيونها بخرعه واللي صار البارح ينعاد لها ..
رعد بهمس وصوته مبحوح .. له ايام ما نام من منظر نايف الموجع .. الى التفكير بكلام غيث ..
الى مراجعة دكتور النفسي ..الى اعترافه بنبضات قلبه اللي تدق باسم هيفاء .. / صباح الخير
هيفاء فاتحه عيونها / ....................
رعد يرفع نفسه واتكى على يده الثانية .. عقد حوجبه وباستغراب / هيفاء فيك شي .. والا انا ضايقتك ..
هيفاء تمتمت بهمس / اعوذ بالله من الشيطان .. بسم الله .. " رفعت يدها ولمست صدر رعد " ..
رعد رفع حاجب مستغرب لها الدرجة مو مصدقه ومرعوبه ../ ..........
هيفاء بعد ماصدقت انه رعد .. وقفت بسرعه وابتعدت عن السرير .. بخوف / كيف دخلت هينا ..
رعد ابتسم بخبث .. وهو يشوف خوفها .. رجع نام وبهدوء / غيث دخلني .. ليه " وبخبث " .. ما اشتقتي لي ..
هيفاء تلبس شبشبها .. وبنبرة مقصودة / لا .. وبعدين من سمح لك تنام على سريري وجنبي ..
قفت عنه متوجه للحمام .. لكن رعد كان اسرع منها وضمها من الخلف بحيث ظهرها ملصق بصدره ..
هيفاء شهقت برعب ماكانت متوقعه الحركة / هئئئئئئئئئئئئئئئئ
رعد / ههههههه .. " قبلها اسفل اذنها وبهمس " .. اشتقت لك ..
هيفاء رجفت بقوة وحست بلسعة كهرباء بجسمها .. شدت نفسها .. رفعت يدينها وابعدت يدينه و ببرود / ما اسمح لك ..
رعد ابتسم .. كان متوقع هالشي .. زعلانه منه .. ولها الحق تزعل هو جرحها جرحها كثير ..
وهي حاولة تتقرب منها وتكسر حاجز تأنيب الضمير عنه .. وهو جازاها بالجرح و الجفاء ..
هيفاء دخلت الحمام .. لكن قبل لا تقفل الباب .. رعد مسك الباب .. وبحزم / غيري ملابسك واطلعي ..
عندك نص ساعة بس .. اذا ما طلعتي رحت وتركتك .. وراح يتصرف معاك عزام ..
هيفاء بغضب تطالعه وقبل لا تتكلم .. رعد بخبث يغمز لها وارسل لها بوسه / احبك ..
طلع من الغرفة مر على الصالة اخذ المحفظة ومفتاحه وجواله وفتح الباب وطلع لصالة ..
هيفاء ما زات واقفه عند باب الحمام مصدومه .. وبهمس / ايش صار له ..
دخلت الحمام وتوضت وطلعت صلت وغيرت ملابسها وطلعت لصالة ..





بصالة ..
ريما بحرج / يممممممممه شوفيهم ..
ام عزام وهي تضحك / يالله عاد انت وياه الا بنيتي الريم ..
رعد ابتسم / عاد غيث صاجنا يوم عرسي يوم عرسي .. هاا كم يوم وذكرا زواجكم جايه ايش بتسوون ..
غيث تنهد / والله كنت ناوي على الحجة ذا السنه مع امي وزوجتي بس ما الله اراد ذا الشي .. ان شاء الله السنه الجاية ..
الكل / ان شاء الله ..
ريما / وانت رعادي ايش بتسوي ..
رعد يشرب من فنجان القهوة بنبرة مقصودة وبخبث وهو يطالع لهيفاء اللي جايتهم ..
والكشرة والضيق واضح على وجهها .. / انا .. انا غير .. وحفلتي غير ..
ريما بحماس تلتفت له وتجلس متربعه / شنو بتسوون يعني ..
غيث فرح بانها اعطته ظهرها .. سحبها وجلسها بحضنه .. ريما شهقت بخوف وفشله .. / غيييييييييييييييييث ..
ام عزام تضرب غيث / استح يا ولد .. اوجعت البنت .. نزلها ..
" غيث نزل ريما وريما ابتعدت عنه بغضب وزعل .." ..
هيفاء ببرود .. تقبل جبين امها / صباح الخير يمه ..
ام عزام / صباح النور ..
رعد بنبرة حازمه / وين عبايتك .. تراني مو فاضي ابي اروح اشوف نايف ..
" رفع ساعته " .. باقي ساعة ونص وياذن الظهر ..
هيفاء انتبهت لساعة .. هذي هديتها الي اعطه اياها نص العيد وصار يتمسخر عليها .. صدت / ما ابي اروح ..
ريما انتبهت لنغزة غيث وهمس لها / عزام عند الباب ..
ريما بهمس / طيب .. بس انا رايحه مع عمي رعد ..
غيث بحزم / لا .. وقومي بسرعة ..
ريما قامت بضيق وهي زعلانه ودموعها بدات تنزل على خدها .. وعيون غيث تلحقها وهي تطلع الدرج ..
دخل عزام .. / السلام عليكم ..
الكل / وعليكم السلام ..
عزام ابتسم / يالله حي ابو سعود ..
رعد بابتسامه / الله يبقيك .. ويالله ادعي لنا عسى سعود السنه الجاية مثل ذا اليوم تعطية عيديته ..
عزام / هههههههههههههه يالله شد الهمه انه وغيث تراكم طولتوا ..
رعد بخبث / والله انا اتمنى بس اختك ما ادري عنها ..
هيفاء حمر وجهها .. هذي دعوة صريحة بانه يبيها .. صدت عنهم بحرج وكانت بتروح للمطبخ بس رعد وقفها ..
رعد يوقف / يا لله ام سعود انا انتظرك بالسيارة ..
هيفاء صدرها يطلع وينزل بسرعه .. مرتبكه ومعصبة .. رفعت نظرها لعزام وشافت ملامحة مشدودة ..
طالعت امها وشافتها تشد على شفايفها يعني يا ويلك ان رفضت ..
اما غيث كان يطالعها ببرود وكان يقول لها القرار قرارك وانا بكل الحالات معاك ..
فزت على صرخة عزام / مطوله واقفه ..
هيفاء نقزت حست على نفسها انها طولت وهي واقفه راحت لجناحها لبست عبايتها واخذت شنطة اليد وطلعت ..
كان ينتظرها بالسيارة .. كان خايف انها ما تطلع .. انتبه لها وهي طالعه من البيت وواضح من مشيتها متضايقه ..
طلعت السيارة وقفلت الباب بقوة ../.......................
رعد ابتسم وبهمس متلعب / شوي شوي على باب السيارة لا تكسرينه ..
هيفاء صد عنه / ............................
رعد طالع فيها مو باين منها شي الا يدينها .. مسك يدها وضغط عليها ورجعها بهدوء لمكانها ..
حرك السيارة وتوجه لبيتهم ..





ـــــــــــــــــ




بيت ابو سطام ..


بجناح مياسة ..


صقر بضيق / يمه ابوي ماهو في البيت .. وانا مليت وانا قاعد بالاستراحة .. احس احس اني ولد شوارع ..
مياسه مقهورة " وبداخله .. حسبي الله عليك يا راشد ان كان بتضيع الولد من يديني " ..
مياسه بضيق / يمه صقر .. بيت انهنت فيه ما اطبه .. وعن نومتك تعال نام هينا الجناح كبير ويشيلنا ..
صقر بضيق / يمه كيف يشيلنا .. الجناح كله غرفتين وصالة وحمام كيف يشيلنا ..
مياسه بحنان / خواتك بغرفة وانا معاهم وانت بالغرفة هذي والا اقلك تنام بحضني مثل ما كنت صغير ..
صقر ابتسم وقبل يدينها بحنان / يا روح صقر انتي ربي لا يحرمني من حضنك ..
" وبضيق " .. بس يمه ما يصير كذا اضايق بنات خالي سطام .. وبعد راكان وزياد وبكرة نايف بيطلع وين يجلس ..
وخواتي يتقيدون .. و زياد جاء الاستراحه علشان زوجة اخوة .. بس نايف ..
" هز راسه بضيق " .. يمه والا صعبة حنا لزم نرجع بيت ابوي ..
مياسة بغضب / تبي بيت ابوك روح له لكن انا ما اطبه .. " وقفت وطلعت من الغرفة والجناحة رايحة لامها " ..
صقر تنهد بضيق وشاف ريهان داخله عليه وشكلها واضح بانها سمعت الكلام ..
ريهام تجلس جنب صقر .. وبهدوء / ولا حنا نبي نرجع بيت ابوي .. حنا مرتاحين هينا ..
صقر بضيق صد / .........................
ريهام بحنان / ما راح يطول زعلاها عليك .. هذي امي .. " ابتسمت " .. ام الصقر ..
صقر تنهد بضيق وانسدح على رجل اخته .. وبضيق ممزوج بقهر / تعبان .. تعباااااااااااان ..
ريهام بحنان مسحت على شعره .. وبهدوء / يفرجها رب كريم ..
صقر هز راسه وهو مغمض عيونه .. وغفى ...




ـــــــــــــ





بالصالة ..


دخل رعد وهيفاء ..
كانت مياسه وام عناد وام سند جالسين مع امهم ام سطام ..
رعد جلس جنب امه وبابتسامه / اشلون ام رعد اليوم ..
ام سطام بحزم / انا ام سطام .. ولا تنادوني بغيرة .. الا تعال انت زرت ابوك اليوم والا ولد اخوك ..
رعد تنهد / لا والله ياميمتي .. انا ماصحيت الا متاخر اخذت حرمتي ورجعت ..
ام سند " العنود " .. بابتسامه / نمت في عندهم البارح ..
هيفاء بحرج وقفت / عن اذنكم .. " وراحت لشقتهم قبل لاتسمع اي رد " ..
رعد قعد يطالعها اللي غابت عن انظاره .. شرب فنجان القهوة ووقف / وانا بعد عن اذنكم ..
الكل يطالعه مستغرب .. ام سند بابتسامه / بسم الله عليه ايش فيه اللي يشوفه يقول توه معرس ..
ام سطام بهمس خافت / وهو اعرس اصلن ..
ام عناد اللي جلسه بجنبها / نعم يمه .. قلتي شي ..
ام سطام / اهوجس بابوك ونايف ..
ام سند / نايف بكرة او بعدة يطلع يقولون بس تطلع نتايج تحالي مسوينها له وانت طلعت سليمه طلعوه ..
ام عناد / العصر ابي اروح له ..
ام سطام / اه اخذوني معكم .. ويمكن سلطان يمر بي يم ابوكم ..
مياسه بصيق / مو ابوي ممنوعه زيارته ..
ام سطام بعصبية / وانا يقولون لي شي .. وايش يدريني ..
بنات ام سطام سكتوا .. واضح ان امهم معصبة حيل .. ولا يبون يكلمونها حتى لا تعصب اكثر ويرتفع الضغط عندها ..





ــــــــــــــــ





شقة رعد ...


دخلت بعصبية وضيق .. رمت شنطتها بعصبية على الكنبة .. سحبة الغطاء بقوة وعبايتها وعلقتهم على المدخل ..
دخل وراها وشافها تسحب الشباصه بقوة من شعرها قفل الباب وتقدم لها ..
هي من لمن سمعت الباب يتقفل التفتت للخلف .. شافته يتقدم لها بهدوء ..
رعد بهدوء مد يده واخذ الشباصة منها .. طالع فيها وشافها كله شعر متقطع ...
رعد بضيق / كله كره من قربي ..
هيفاء باختناق / ما خليت محل بقلبي سليم .. حتى يتحمل منك جرح جديد ..
رعد لف يدينه حولينه وضمها قبلها بقوة جرحت قلبها قبل شفاتها ..
هيفاء ابعدته بحدة عنها .. حتى ترفع يده وتصفعه بقوة على وجهه ...







انتهى ...




لا اله الا الله محمد رسول الله ..


سبحان الله ... و الحمد الله ... و الله اكبر ..


اتمنى يعجبكم .. واعذروني على القصور والا خطاء الاملائية ..


ويا رب توفق طلاب العلم بكل مراحلهم ..

فقدت كثير من المتابعين .. ما ادري هل هم ملوا من الرواية والا انشغلوا بدراسة ..



اختكم ... مشاعل السعودية ..