مسائك ورد الجوري
يعطيك العافيه ميشو على البارت الحلو

بتال
معقوله الحب يسويك في كذا ولا بعد تعاقب نفسك بالحرق وش الحاله بعد
لانك عارف نفسك غلطان حبيت تقتص لها على طريقتك
وكان قبلك جدك يعاقب نفسه على ظلمه للظبي
بس وش الظلم اللي كان يمارسه عليها
عشان يحرق ويشوه نفسه بالطريقه هذه
هو كان يحبها بس ليش متزوجها معقوله كان شاك فيها وهي عرفت الشئ هذا وتركته وبعدين عرف انها مظلومه
بس وش ذنب شيخه يعذبها بالطريقه هذه اذا حملت والله مجنون ولا بعد تتخيل الظبي مع زوجها وفي حظنه وانت وش كنت تسوي
ما انت بعد مع زوجتك وفي حظنها والا حلال عليك وحرام على الظبي
غيرته وعصبيته خسرته من يحب
وهذا انت يابتال رجعت الزمن بس بتقدر ترجعها لك والا لا
حقدها على الفارس مالي قلبها فلا تتوقع انها بترجع بسهوله
وجدك بعد واقف معها

العنود
في قلبك كره للفارس مع أنهم اهلك كل هذا عشان الظبي وظلمهم لها
والا بعد عشان بعدكم عنهم وتخليهم عنكم قست قلبك زياده
اللي أتذكرها ان سطام كان عايش مع أهله في الخبر وأبو نايف عمه هو اللي في الرياض وبعد وفاة نايف احتاج احد يوقف جنبه وراح سطام عشان الشئ هذا
كيف اجل تخلو عنهم ولا اهتموا فيهم
انتم اللي اخترتوا البعد
بعد كلامك لراكان ياترى بيتحرك ويكون هو العضيد اللي تتمنينه

راكان
ليش عصبت من اختك هي ماقالت الا اللي تشوفه صح انت غبت عنهم ولا سألت عنهم فتوقع منها اي شئ
إفلاس شركتكم هي اللي وراه وتقول كنت أنفذ كلام ابوي
ليش أبوك يبيك تخسر وهو اللي عينك كان يبيك تفتح عيونك بس على اي شئ
والعقاب اللي ناويه تسويه في الفارس وش مقدار حجمها يالعنود
اذا أخوك افلستي شركته الفارس وش بيكون مصيرهم من انتقامك

نايف
حالته خطره
مقدار الخطر وسببه ايش
معقوله المخدرات قضت عليه هو تركها من كان هنا
هو يشتغل مع الشرطه والاكيد أنهم يطاردون عصابه و جاءته رصاصه طايشه

راشد
وش يبي هذا مايستحي على عمره ما عاد بقى الا الشغاله
يمكن الشغاله هي اللي تفضحه في العائله
اللي قبل كانوا معك بإرادتهم بس هذه يمكن تغتصبها وتفضحك

طلال ومرام
صراحه مسخوها هالثنين
اذا حملت زعل قال ليش تحملين وإذا خبت عليه الحمل قال ليش ماقلتي
نسيت ردة فعلك على الحمل الأول خافت منك ليش ماجأ في بالك الشئ هذا
والا انت تعودت على الزعل على الفاضي والمليان

رعد وهيفاء
بعد هذول باطين كبدي
كانت تهتم فيك ولا هو عاجبك الحين هي تركت لك الجمل بما حمل ولا بعد تهدد ام زواج وأم طلاق
اختر انت الحين
اللي صار مع عبير قضاء وقدر وانت مؤمن ماكان لازم تجزع كذا
كل اللي تسويه بيرجع الزمن وتحميها من أبوها وتمنع الموت
لازم تروح لطبيب نفسي عشان تقدر تعيش حياتك الطبيعيه

الجد
صابته جلطه من عرف باللي صار مع نايف
والا بيموت
يمكن يطلب العنود ويقول لها وصيته
ويطلب منها ترجع لبتال

ميشو ابدعتي

بسم الله الرحمن الرحيم

السلام عليكم ورحمة الله وبركاته

الحمد لله والصلاة والسلام على رسول الله

توكلنا على الله .. لا اله الا الله محمد رسول الله ..




البارت 30 ..




من بادي الوقت هذا طبع الايامي
عذبات الايام ما تمدي لياليها
حلو الليالي توارى مثل الاحلامي
مخطور عني عجاج الوقت يخفيها
اسري مع الهاجس اللي ما بعد نامي
واصور الماضي لنفسي واسليها
اخاف العمر اراجع سالف اعوامي
وانوخ اركاب فكري عند راعيها
تدفى لى جال ضوه بارد عظامي
والمار يسوق بمعاليقي ويرويها
الى صفا لك زمانك عل يا ظامي
اشرب قبل لا يحوس الطين صافيها
الوقت لو زان لك يا صاح ما دامي
ياسرع ما تعرض دربك بلاويها
حتى وليفك ولو هيم بك هيامي
سيور الايام تجنح به عواديها



" خالد الفيصل " ..





العنود ومياسة جالسين على الكراسي قبل غرفة الطواري .. وخان واقف بعيد عنهم شوي ..
خرج الدكتور ووجهها اسود ..
العنود ومياسه بخوف توجهوا له ..
العنود / ها دكتور كيف ابوي ..
الدكتور تنهد بضيق / الحمدلله على سلامته .. سيطرنا على الوضع .. بس لازم ينام بالمستشفى حتى نطمأن اكثر ..
العنود / شكرا دكتور ..
الدكتور هز راسه وبسكات توجه لمكتبه كان مرهق من شفت متعب ليلة امس بالمستشفى وكان اخر حالة ابو سطام ..
مياسه جالست على الكرسي وهي تبكي .. العنود تشد على اكمام عبايتها ..
من العجلة نسيت قفازاتها اسود وتحس انها بدون قفازات عارية ..
التفتت على عمتها بضيق وحزن .. اول ما خطت اول خطوة لجهتها ..
...........من وراها بخوف / ايش بلاكم .. ابوي سعود وينه ..
العنود التفتت بهدوء لجهة الصوت .. شافت سند والتعب واضح بوجه ..
رفعت نظرها لخلف سند وشافت عمها سلطان وكل ثانية يطلع واحد من عيال الفارس .. ووجيههم ما تبشر بالخير ..
العنود وهي تتوجه لاخوها .. وبهمس / البلا بجوفكم يا عيال الفارس ..
كانت متصوره ان همسها محد راح يسمعه .. لكن سند سمع همستها وبوضوح ..
العنود وهي تمسك يد راكان وتسحبه على الجنب .. راكان بخوف / جدي ايش بلاه ..
العنود وهي تضغط على يده .. وبهمس حازم وعيونها من خلف الشيله على عيون اخوها / البلا عندكم ..
وين اختفيتوا فجاه .. وليه وجيهكم سودا .. ايش البلا اللي صابكم ..
راكان غمض عيونه بتعب .. تنهد بضيق / العنود .. " فتح عيونه .. وبحزم " .. جدي ايش فيه ..
العنود بنبرة مقصودة / اللي سود وجهكم هو اللي اتعبه ..
" راكان كان بيتركها ويروح لجهة سند وعمه وعيال عمه .. العنود شدت على يده .. وبسخرية / على وين يا العضيد ..
راكان من بين اسنانه .. / العنووووود مو وقتك ..
العنود تنفض يده .. / لو ابي اعرف عرفت من غيرك .. " وبسخرية " .. بس لانك العضيد ..
راكان فتح عيونه للاخير .. مو ناقصة استفزازات العنود له ابد .. مسك يدها .. بس العنود نفضته ..
الكل انتبه للحركة .. راكان كان بيمسكها لو ما مسكه عناد وطلال .. وعيونه حمر ..
العنود راحت لمياسة وهي تمشي بعصبية والغضب متمكن منها .. نزلت راسه لعمتها / عمه امشي نرجع البيت ..
مياسه تبكي / خليني اشوف ابوي وا....
العنود بحزم / جدي الحين بالملاحظة وما راح يسمحون لاحد بزيارته .. فامشي الحين ..
راكان يقرب منهم .. وبحزم / انا اوصلكم للبيت ..
العنود رفعت نظرها له / خلك مع اللي كنت معاهم .. خان موجود ويوصلنا ..
سند بهدوء وهو شايف وسامع كل شي / راكان .. خان يرجعهم ويروح معاهم صقر .. انت خلك هينا ..
راكان يشد على قبضة يده ومن بين اسنانه وبنبرة تهديد / في البيت نتفاهم ؟ ..
العنود طالعت فيه بنظره من فوق لتحت وتركته وطلعت من المكان اللي فيه ..
عناد يهمس لطلال ../ والله لو وحدة من خواتي سوت ذا السواه ان ما يردها عني الا القبر ..
طلال بسخرية / اجل الحمد لله انها مو اختك ..
" ترك عناد بصدمته من سخريته وتوجه لعمه وعيال عمه " ..
مياسة سندها صقر وطلع وراء العنود و خان .. ورجعوا البيت ..




ـــــــــــ




الظهر ..


الكل بالمستشفى .. قبال العناية المركزة ..

الجد اعتدل الضغط عنده بس ما زال تعبان وطلع عنده شريانين بالقلب مقفلة و يبي له قصدرة ..
ابو بتال يمسح وجهه المرهق .. وبتعب / يا عيال ..
سند يجلس جنبه / هلا ..
ابو بتال / قل للعيال يرجعون البيت ما يصير كلنا هنا ومابه احد بالبيت ..
سند / كلهم بس يطلع الدكتور ويطمنا يرجعون للبيت ..
الدكتور طلع .. ابو بتال يوقف / ها يا دكتور ..
الدكتور / لازم له عمليه قصدرة .. بس يعتدل الضغط راح نسويها .. باذن الله ..
ابو بتال يهز راسة بقلة حيلة / خير ان شاء الله ..
ابو فهد / اجل حنا خلنا نرجع للبيت ويقعد واحد من الشباب هينا والباقي يرجعون لشركة يكملون شغلهم ..
ابو بتال يهز راسه / وهذا اللي بيصير ..
الكل طلع اللي متوجه للبيت واللي متوجه لشركة واللي بقي بالمستشفى ..



ـــــــــــــ




بغرفة بتال بالمستشفى ..

بتال منسدح على سريره / ومن جابه ..
سعود / جابته العنود وعمتي مياسة .. يقولون العنود نادت خان وتشايلوا جدي وطلعوه السيارة وجابوه المستشفى ..
بتال يطالع سعود ووجه باهت .. بارتباك / لحالها جات مع خان ..
سعود اللي السهر والتعب ماخذ حقه منه .. رمى جسمه على الكنبة .. وبصوت ناعس / من ؟
بتال شاف اخوه يريح راسه على الكنبة ولف يده على عيونه .. بتال ريح جسمه وبغموض / محد ..
سعود دقايق وانتظمت انفاسه / ................
بتال سحب الاي فون وفتح الاستديو وشاف صور سلطان والظبي .. ابتسم بشوق و قرر اول ما يطلع يروح يشوفهم ..



ـــــــــــــ



بيت ابو سطام ..


جناح ام سطام ..

العنود بتعب / يمه يعني انا اكذب عليك ..
ام سطام تمسح دموعها بطرف شيلتها / .. انا قلبي مو مصدقكم .. ودوني له .. خلوني اشوفه ..
العنود تحط يدها على راسها تحس بصداع راح يفجر راسها .. وبهدوء / يمه ..
العصر اذا سمح الدكتور بزيارته سوين له اكل ورحنا له .. زين
ام سطام تهز راسها وهس تمسح دموعها / ................
العنود وقفت بتعب / عن اذنكم ..
الجوهرة تطالعها من فوق لتحت بقرف .. ام عزام و ام سند ومياسه / اذنك معاك ..






طلعت العنود وتوجهت لجناحها ..
كانت مرهق حد النخاع .. قلق على غياب نايف وهواجيس تدور في بالها .. حربها مع راكان .. ارهاق السفر ..
تعب جدها كلها تكومت على بعضها .. وهمست بداخلها .. " يفرجها رب كريم " ..
اول ما دخلت شافت مريم وساره .. العنود ابتسمت بإرهاق / السلام عليكم ..
مريم وساره / وعليكم السلام ..
مريم وبحضنها الظبي .. جلست بجنبها العنود .. مريم بحنان / شكلك تعبانه يا بنتي ريحي جسمك ونامي شوي ..
العنود تهز راسها / ابي انام بس ابي ارضع الظبي وسلطان ..
مريم / يا بنتي الظبي ليه ضعفانه اكثر من سلطان ..
العنود اخذ الظبي .. رمت الشيلة على كتفها وميلته على صدرها حتى لا ينكشف ..
فتحت ازارير قميصها الاولى وطلعت صدرها ترضع / لان وهي في بطني ماكانت واضحه ..
و ماكان يوصلها الغذاء مثل سلطان .. كانت تحته ومغطية عليها المشيمه .. وما عرفوا انهم تؤام الا يوم ولدتهم ..
مريم بحنان / لا اله الا الله .. ولدتي طبيعي ..
العنود بهدوء / الحمد لله طبيعي .. الحمد لله على كل حال شفت الموت اللين ولدت .. عسى امي للجنه ..
مريم تنهدت / امين .. الله يجازي الامهات كل خير ..
العنود ابتسمت وبحنان / ويجزاك يا خاله .. انتي تعبتي بوالدتك بطلال ..
ساره توقف بضيق وقرف وحيا من سالفة الولادة / انا ابي اروح للبنات ..
العنود ابتسمت / روحي حبيبتي ..
طلعت ساره .. مريم التفتت بهدوء للعنود / ليه ما بلغتينا بحملك .. يمكن الضغط النفسي كان مأثر على حمالك ..
العنود هزت راسها وهي تطالع بنتها / هو اثر .. اثر .. علشان كذا ولدت مبكر .. اما ليش ما بلغتكم ..
" رفعت راسها وبعتب " .. مثل جواب سؤال ليش ما بلغكم ولدكم بطلاقنا .. ليش ما سالتوه وين زوجتك ..
طول فترة جلوسة عندكم .. ليه ما سالتوا عنا .. عن ابوي امي .. اخواني عندكم وحنا لحالنا هناك ..
ليه محد فزع وقال اروح واسأل عن الحريم اللي هناك ماحولهم رجال غير شايب مريض ..
طيب .. مشغولين وماتقدرون على السفر .. مو لزم تلفون ارفعوه ما بيخسركم شي .. " وبنبرة مقصودة " ..
والا طاحت ام راكان وابو راكان خلاص حرق كرتهم ما عاد لكم منفعه معاهم .. انا ادري انك كنتي تتواصلين مع امي ..
ايش اللي خلاك تقطعين والا من الاول ماكنتي تتواصلين وامي هي اللي تسال علشان ولدها ..
لتفتحين باب المعاتب يا ام طلال انتم الخسرانين فيه .. وان كنت ساكته للحين حشيمه لسطام وشيخة مو لشي ثاني ..
" كانت تقصد سطام ابوها وشيخة ام فهد " ..
مريم بحرج صدت عنها فعلا من لمن تعبت ام راكان وانقطعت اتصالها فرحت ..
كانت تخاف ان طلال يتركها ويروح لها .. / ...............
العنود صدت عنها وطالعت بنتها شافتها شبعت .. رفعتها على كتفها وصارت تضرب ظهرها على خفيف ..
حتى يطلع الهواء .. بعد ما شافت الظبي طلعت الهواء وارتاحت ريحت الجلسة و نيمتها ..
سمعت صوت مناغات سلطان .. ابتسمت غصب .. وشالت سلطان وقبلته على خده ..
مريم وقفت .. وبنبرة مقصودة / الله يريح قلبك ويهديك يا بنتي .. " وطلعت من الجناح " ..
العنود رفعت نظرها فيها بغموض ورجعت طالعت بولدها اللي كان يحاول يشد شعرها ..
" وبهمس " / حبيبي ما تبي تنام .. ماما تعبانه وتبي ترتاح شوي .. " داعبت صدره بانفها وسلطان يضحك " ..
نيمت نفسها على الكنبه ونيمت سلطان على صدرها .. وصارت تلعب بشعرها .. الا ان غفى سلطان وغفت هي ..




ــــــــــــ



بيت ام عزام ..


ريما / انا ابي اعرف ايش مسوي .. اكيد ارهابي ..
هيفاء / لا ان شاء الله .. " وبضيق " .. مساكين عيال سطام المصايب نازله عليهم فوق بعض كانها مطر ..
ريما بحزن / صح .. يا قلبي يا ساره لمن تجي بين البنات تحسينها ضايعه مالها في سوالف البنات ابد ..
هيفاء باعجاب / ما شاء الله على العنود .. بنت راكزه وثقيله .. " وبقهر " .. ما ادري بتال ليه طلقها ..
ريما بهمس مسموع / لان الجوهرة وسمر هم اللي طلبوا منه ..
هيفاء عقدت حواجبه / ما اتوقع .. بتال صح يحب امه واخته كثير بس مو لدرجة انه يخرب حياته علشان امه واخته ..
ريما تهز كتوفه / ما ادري .. بس العنود شخصية غريبه ما تنفهم .. ومغروره شوي ..
هيفاء باستغراب / من العنود .. " وبثقة " .. مستحيل .. انا قبل لمن اسمع سوالفكم عنها كنت رسمتها بشكل كريه ..
ولمن تعرفت عليها اكثر وسهرت معاها اكثر من مره .. " باعجاب " .. البنت روعة .. اخلاق وفكر واناقه وذوق ..
استغفر الله .. كامله .. انا وانثى انغرمت بسلوبها وبشخصيتها وبكلامها ودلعها .. كيف الرجال .. تصدقين ..
لمن كان يقعد معاها رعد كنت اغار .. " وبفضول " .. بس عندي فضول كبير ابي اعرف ليش تطلقت هي وبتال ..
ريما / بصراحة .. ما ادري العنود شخصية غريبه .. رنيم ميته فيه صارت لمن تجي على طول عندها ..
هيفاء / ما تنلام جلست العنود ما تنمل .. الله يعينها ويقويها لمن يرجعون من بريطانيا ..
ريما بصدق / امين ..




ــــــــــــ



بعد العصر ..


بيت ابو سطام ..

بالصالة ..

الهنوف بحدة / والله ما تدخل ..
راكان وهو مو قادر يمسك نفسه / عمممممممممممممه ابعدي عن طريقي ابي اذبحها ..
العنود ام سند بحدة / ولد فكنا من شرك واطلع برا ..
راكان بحده / هذي ما تستحي يبي لها تربيه ..
ام سند تاشر لرنيم اللي واقفه وراء باب جناح اخواتها / اتصلي على سند ..
راكان كانت بيتجاوزهم ويروح لجناح اخته .. الهنوف تمسكت فيه وام سند بعد ..
ام سطام تطلع لهم من جناحها ... رفعت عصاتها وبحزم / انا ام سطام .. تبي تضرب بنتي في بيتي ..
والله ان ما طلعت لزعل عليك ليوم الدين اطلع برا اطلع ..




بغرفة العنود ..
من نص ساعة صاحيه من النوم .. دخلت الحمام " اكرمكم الله " .. توضأت وصلت العصر وغيرت لبسها ..
وهي تمشط شعرها الاسود الطويل .. سمعت ضجة وصراخ .. التفتت لساره باستغراب / هذا مو صوت اخوك ..!
ساره بارتباك والعبره خانقتها / الا .. " حطت يدينها على وجهها وصارت تبكي " ..
العنود تركت شعرها وتوجهت لها .. حضنتها وبخوف / ساره حبيبتي ايش فيك ..
ساره تشهق / راكان .. يبي .. يبي يضربك ... هو .. هو يصارخ .. وعماتي .. عماتي ..
العنود وقفت بسرعة وتوجهت لجلال الصلاة واخذته وطلعت من الغرفة بسرعة متوجهة لجهة الصوت ..
ما صدقت انها تشوفه تبي تفرغ غضبها .. وتبي تعرف ايش صار .. عندها احساس بان نايف فيه شي ..





دخل سند بسرعة لبيت ابو سطام ..
سند بحزم / رااااكاااااااان ..
راكان ابتعد عن عماته وهو يتنفس بغضب .. / خيررررر ايش تبي ..
العنود جات بتدخل وتراجعت بسرعة اول ما شافت الجسم العريض ..
العنود بحده ممزوج بسخريه / خير يا العضيد .. ايش عندك جاي ..
راكان بغضب / بننننننننننننننت .. " وهو يبي يتوجه لها " ..
سند لف يدين راكان وراء ظهره وطلعه برا البيت ..
العنود بعد ماطلع راكان وسند طلعت لصالة .. وبصوت حازم / ابيي اعرف ايش صار امس خله يهوش كذا ..
الهنوف بتعب / يقول انتي طولتي لسانك بالمستشفى ويبي يعاقبك ..
العنود بقهر / كذاب .. البلا مو مني البلا منهم ..
ورجعت لغرفتها وهي نار شاعله من الغضب .. اخذت الاي فون ورجعت تتصل على صلاح ومتعب ولا احد يرد ..
اتصلت على ابو عبدالعزيز ..حاولت قد ماتقدر تهدي صوتها .. تنفست بعمق .. وبهدوء ..
.. / الو السلام عليكم .. هلا يبه .. ايه .. اشلونك .. اقول يبه متعب عندك .. " بهت وجهها .. "
.. مع من ... متى .. " بهت وجهه اكثر وكل شكوكها تاكدت " .. طيب .. مع السلامه .. لالا .. سلامتك ..
" قفلت الخط .. نزلت جلال الصلاة وجلست بخوف على الكنبه .. مسكت راسها بيدينها الثنتين .. بداخلها ..
" نايف .. ناااااااايف ناااايف .. والله ان نايف ما هو طيب .. " .. رفعت راسها و صارت تضرب وجهها ..
وبقهر / ابكي ابكي ابككككككككككككككككي ..
دخلت رنيم و تفأجات بحالها .. ساره واقفه وراء الباب تبكي وهي خايفه ..
رنيم رجعت لصالة بسرعة متثاقله .. ونادت مريم ورجعت للغرفة العنود ..
مريم اخذت ساره وطلعتها ورجعت مع الهنوف .. اخذوا الصغار وطلعوا ..
رنيم تجلس جنب العنود .. مسكت يدينها وهزتها / العنووووود العنوووود .. اهدي ..
العنود بغضب / محد يبي يقولي ايش الي صار .. ابي اعرف .. نار نار .. " وهي تضرب صدرها " ..
رنيم بدون وعي وبخوف / هدي انتي .. وراح اتصل على سند وهو يقولي ايش صاير بس انتي هدي ..
العنود ترفع شعرها عن وجهها وتلفه وراء اذنها .. وبجنون / ايه .. ايه .. اتصلي .. اتصلي الحين ..
رنيم بارتباك .. اتصل على سند .. اول اتصل مارد .. اتصلت ثاني وثالث ورابع الا ان رد وهو معصب / نعم ..
رنيم بقهر / العنود تبي تعرف ايش اللي صار .. تقول فـ.....
سند بنبرة غامضة / هي عندك ..
رنيم باستغراب / ..............
سند بهدوء / الوووو ..
رنيم حست باحساس غريب .. وببرود / ايوه ..
سند بنفس النبرة الغامضة / العنود عندك .. " وهو يطول ويشد بالحروف " ..
رنيم بقهر / ايوه عندي ..
سند ابتسم ببرود / قولي لها ما فيه اي شي .. خلها تهدئ ..
العنود كانت تسمع اللي يقوله لان صوت جهاز رنيم مرتفع .. وبهدوء / لا تكذب يا ابو فهد ..
عيب تكذب وانت ارجلهم .. قولي ايش الموضوع .. انا متاكده انه يخص نايف ..
سند ابتسم وبداخله " الله يرحمك يا جدي والله انك وصفت لي العنود قبل لا تشوفها " .. بنبرة باردة / ايه يخص نايف ..
العنود بختناق / حي ارجيه والا ميت واطلب العوض ..
سند تعاطف معاها من نبرة صوتها / اذكري الله يا اخت نايف .. ان شاء الله كلها يومين وتشوفينه بخير وعافيه ..
العنود حطت يدها على راسها وغمضت عيونها .. رنيم شهقت وصرخت / دم دم ..
سند فز قلبه / رنيم .. رنييييم ..
رنيم اللي رمت الجوال وراحت تدور على شي تحطه على انف العنود ..
سند اللي كان جالس بالمجلس بعد ما ارسل راكان للاستراحة مع عناد يبعده عن العنود و البيت ..
راح يجري من المجلس لبيت جده بجنون .. اول ما دخل صرخ / يمه يممممممممممه ..
ام سند اللي كانت بصاله مع الهنوف ومريم وام سطام والجازي فزت بخوف وتوجهت لمدخل/ ايش بلاك ..
سند بخوف / وين رنيم .. كانت تصارخ تقول دم دم .. ايش جاها ..
الهنوف اللي قامت وراء ام سند .. توجهت بسرعة لغرفة العنود ودقايق رجعت ..
وبخوف / سند يمك الحق علينا العنود ما ادري ايش جاها ما ترد علينا ..
سند بخوف / طيب غطوها وانا ادخل اشوفها ..
الهنوف ومريم ورنيم لبسوها العباية وجاء سند شالها بين يدينه و طلع .. ولحقتها العنود ام سند والهنوف ..
ورنيم كانها بمقلاه تحوص وتدور ما تدري ايش صابها .. مغير تصارخ ومعصبه .. ومريم و مياسه اهتموا بالصغر ..




ـــــــــــــــــــــ




يوم جديد ...



بالمستشفى ..


طلعوا ابو سطام لغرفة جانبية قريبه من العناية ..


......../ يا سطاااااااااااام .. وين سطام .. جيبوا سطام ...
سلطان بضيق / يبه اذكر الله .. سطام مات الله يرحمه ..
ابو سطام يمسح دموعه / يا سند .. تكفى يا سند .. لا تخليهم يذبحوني ..
سند بغصه / ابشر يبه .. والله ما يلمسونك الا برضاك بس انت اهداء ..
ابو سطام يتصدد عنهم وهو يعابر ../ .......
سلطان مو قادر يتمالك نفسه طلع من الغرفة وشاف ابو عبدالعزيز وابو مطلق .. سلم ودخلوا ..
ابو عبدالعزيز / طهور .. طهور ان شاء الله ..
ابو مطلق / لا بأس .. لا بأس ..
ابو سطام بتعب / ان شاء الله .. ان شاء الله ..
سند واقف يصب القهوة .. / جزاكم الله خير على الزياره ..
ابو مطلق وهو يمد يدة ياخذ الفنجان / واجب يا ولدي واجب .. الا هم ايش قالوا له ..
سند ببساطة / يقولون لازم عمليه بالشريان بس ابوي ما يبي .. " وبمزح " .. الظاهر خايف ..
ابومطلق بفزعه / اخو وضحى .. ليه يا ابو سطام .. يالله لك الحمد على كل حال ..
انا شقوا صدري من ياه " وهو ياشر على نصف صدره " .. وطلعوا قلبي .. ومادري ايش سوا فيه ورجعوه ..
ويا ربي لك الحمد .. هذا انا بخير وعافيه .. " وبمزح " .. وافكر اني ادور لي عروس صبية .. اجدد شبابي معاها ..
بس لا تعلمون ام مطلق تفرشني بعصاها ..
ابو سطام وابو عبدالعزيز وسند / هههههههههه
ابو عبدالعزيز / وانا مسوين لي قصدره .. هذا بكل شايب والا انت ودك تخلفنا بتالي العمر ..
لا ابد بتسويها وتقوم لنا طيب .. بس قل يارب .. وصل الاستخارة .. وربك بيسر اللي فيه الخير ..
ابو سطام وكانه خوفه قل / هااا .. قولكم ..
ابو مطلق / الله الله .. الحين الطب تطور يالله لك الحمد .. وما يصير تجزع من رحمة الله ..
ابو سطام وهو يهز راسه / اهاا .. والنعم بالله ..
جلس شوي ابو مطلق وابو عبدالعزيز وطلعوا وبدا الزوار يدخلون ويطلعون ..




ــــــــــــــــ



بغرفة بتال بنفس المستشفى ..


بتال بعصبية وهو فاتح عيونه للاخير / من شالها ..
عناد بخبث / سند .. والله ياهو يتغـ .......
بتال رمى عليه علبة الماي .. بس تحاشاها عناد ..
عناد / ههههههههههههههههههههههههه
بتال بغضب / انقلع عن وجهي وشوف الدكتور قله اني ابي اطلع ..
الممرض دخل بنفس الحظة وبرسمية / السلام عليكم ..
عناد وبتال / وعليكم السلام ..
الممرض / هذي اوراق الخروج .. الدكتور وقع على خروجك .. وباقي توقيعك ..
بتال بفرح مسك الاوراق وكتب بياناته ووقع وفز واقف غير ملابسه وطلع ..
عناد بسخرية / لا اله الا الله .. كل هالعجله والصحة المفاجأة من الغيرة ..
بتال يرفع يدينه / جعلني اتشمت فيك انت وسند وطلال مثل ما تتشمتون فيني ..
عناد / هههههههههه طلال مو ناقصة حتى تدعي عليه ههههههههه ..
وسند قاضي بالعشق وخالص وانا على الطريق هههههههههههه ..
بتال / هههههههههههههههههههه " وطلع من المستشفى بعد ما مر على الصيدليه واخذ الادوية " ...




ــــــــــــ



يوم جديد ..


9 صباحا .. بحديقة الفارس ..

فرشة على الارض .. ترمس قهوة وحافظة تمر ..



ام سطام / لا اله الا الله .. ما شاء الله الجو كنه بدا يبرد ..
مريم / اي والله بدا .. شكلها بداية الشتاء ..
ام سطام / اي والله ..
مريم / بكرة وحدة الحج .. بتصومين يا خالة ..
ام سطام / باذن الله .. ان راد ربي صمنا 10 ذا الحجة ..
مريم / ربي يعطيك العافية والصحة .. ويطول عمرك بطاعة ..
ام سطام توقف / يالله .. اعذروني ابي ادخل شوي وارجع ان شاء الله ..
مريم توقف / وانا بعد .. ابي اشوف الفطاير مداها استوت .. الهنوف والعنود " ام سند " وينهم ..
ام سطام وهي تخطي قباله .. / الظاهر انهم داخل ما ادري ويش يحوسون فيه ..
مريم عاضدة خالتها تمشي بجنبها .. وتسولف معاها .. الى ان دخلوا ..
العنود كانت جالسة على الفرشة بصمت .. كانها مو موجودة من لمن طاحت واكتشفوا ان معاها الضغط وهم يراعونها ..
قبالها سلطان والظبي .. منيمتهم على الفرشه الخاصة بهم على الارض ويلعبون بيدينهم ..
العنود سرحانه للبعيد وتهوجس .. " حسبي الله العظيم .. كاني ما ني بشر .. ما افكر ..
بس الامر يخص نايف وقفوا لا قالوا لي هو حي والا ميت .. وراكان .. ااااااااااه يا راكان ..
من هذاك اليوم ماشفته ولا يرد على مكالماتي .. عارف انه لو قابلني ما راح اتركه .. " تنهدت بضيق " ..
الحين كيف اعرف الموضوع . كيف اتطمن .. لا متعب ولا صلاح يردون عليه ..
و جدي منصور ما يدري عن الموضوع .. ادخل على سند دخيله واخليه يقولي .. اكسر نفسي ..
" عضت شفايفها قهر " .. يا ويل حالي لو بسبتكم يا اخواني تكسروني .. والله ما عاد اقوى والله .. "
فزت برعب والتفتت بحدة لمن سمعت الصوت اللي وراها ..




ـــــــــــــ



بيت ابو بتال ..



بتال يعدل غترته قبال مراية المدخل .. وبهدوء / اسمعي وانا اخوك .. انتي اخطيتي وانا اخطيت ..
والعيب مو بالاعتراف بالخطاء العيب فانا نكمله .. الحين مانا لحالنا .. انا وعندي اثنين ربي يخليهم لي ..
" ابتسم بحنان " .. وانتي عندك بنتك الحلوه ربي يحفظها لك .. ارجعي لراكان وراضيه وتسامحي منه ..
راكان يحبك .. والصد اللي شايفته ماهو كره الا عتب عليك .. انا الحين رايح له وابي اطيب خاطره ..
سند وعناد مهدوا لي الطريق .. وانتي بينك وبين زوجك وتعرفين تتصرفين .. ارجعي بيتك وحليها ..
سمر باستغراب / ارجع بدون لهو يرجعني ..
بتال بتفكير وهو يلتفت عليها / خليني اجس نبضه اليوم .. وبعدين اشوف وضعك معاه .. وامي اتركي نصايحها ..
واذا تبين نصايح اسالي جدتي ام عزام ..ما تقصر معك .. امي الحين مااااا " وهو يهز راسه بعدم الرضا " ..
سمر بضيق / عرفت بهوشته مع ابوي البارح ..
بتال تنهد بضيق / سمعت لو مو صياح وليد كان صار شي كبير ..
سمر بعبرة / انا تعبانه مو عارفة ايش اسوي .. امي والا ابوي والا وليد والا راكان والا بنتي ..
بتال يسحبها له ويقبل راسها / اتركي الكل وانتبهي لبنتك وامك وابوك فترة وتعدي ان شاء الله ..
سمر تبعد عنها وهي تهز راسها " بنعم " .. وبتذكر / ابي اروح لجدتي بعد اشوي .. يقولون متجمعين بالحديقة الخلفية ..
بتال بخبث / اهاا .. طيب فمان الله ..
سمر / فحفظ الرحمان ..
" طلع بتال وتوجه للحديقة الخلفية .. شاف جدته ومريم بيدخلون البيت تخبى وراء الجدار لحد ينتبه له ..
وبعد ما شافهم دخلوا .. بسرعة توجه للفرشة .. كان عندة احساس بانها تكون معاهم .. وفعلن ما خاب احساسه ..
شافها من بعيد .. عرفها .. اشلون ما يعرفها وقلبه من شوفة قفاها صار يرجف " ..
(( و ما انتبه لـ العيون اللي شافته من خلف الشبابيك " النوافذ " )) ..





..... بصوت هادي مملوء بالشوق وهو يجلس على ركبه ويطالع عياله / صبحك الله با الخير يا ام سلطان ..
........ فزت برعب والتفتت بحدة .. طالعته بكرهه وصدت لمن شافت اللي جاين بسرعه يمهم .. / ......
بتال طالعها وبسخرية ممزوجه بقهر من صدها / زعلانه .. لـ " التفت وراه بقهر " ..
الهنوف بحدة / قوم قوووووووم ..
بتال طالعها وكتم قهرة التفت على سلطان اللي يحرك يدينه ويتبسم .. شاله وهو يبتسم / يا صباح الخير ..
" قبله بعمق وهو يستنشق ريحته " .. آآآآآآآآآآآآآآه ..
العنود " ام سند " بسخرية / آآآآآآآآآه .. تونن .. تونن يا بتيل .. تونن .. وياما بتون ونين .. و آآآآآآآآآآآآآآه ..
بتال طالع عمته وابتسم / الله يا عمه تبين الوجيعه لي .. تراني مريض وتوني امس طالع من المستشفى ..
الهنوف تجلس جنب العنود وتغطي على ظهرها .. وببرود / سلامتك وما تشوف شر .. ونزل الولد لا تعديه ..
بتال ينزل سلطان عقد حواجبه وهو يشيل الظبي .. وبحنان / يا روحي يا صغيرة .. " وبحزم " .. ليه ضعيفه ..
العنود " ام سند " .. طالعت العنود وشافتها صاده وتطالع لشجر البعيد .. رجعت و طالعت الهنوف ..
الهنوف بنبرة مقصودة / تعبانه .. مـ ....
قاطعها بتال بخوف / ايش فيها .. " قبل الظبي وهو يضمها على صدرة " .. بسم الله عليك يا روحي ..
العنود تحس بغثيان من وجودة .. و بداخلها " مو ناقصة شوفتك يا بتال .. اللي فيني مكفيني روح رووووح ..
قبل لا افقد اعصابي .. و تشعل النار اللي بصدري منك .. والله ما ردني عنك اللي عيالك ..
والا ادفعك ثمن كل وجيعه اوجعتني اياها .. " ..
الهنوف تهمس للعنود / ام سلطان .. ابو سلطان يكلمك ..
العنود اعطت عمتها نظرة من طرف عينها وصدت ..
ام سطام من وراء بتال .. / ولد .. وش عندك هنيا هاااا .. ابعد عن بنيتي ابعد .. لا تتعبها ..
بتال تذكر .. وبهدوء والظبي ما زالت بين يدينه / ما تشوفين شر يا ام سلطان ..
العنود " ام سند " .. بسرعة / الشر ما يجيك ومشكور وما قصرت وقم شوف شغلك وعطنا الظبي ..
بتال بخبث / من قال ان اسمها الظبي .. لا ابي اغير اسمها .. ابي اسميها الجوهرة ..
العنود التفتت عليه .. وبهدوء مستفز / ومن انت .. حتى تغير اسمها ..؟
بتال ابتسم وبغرور / ابوها ..
العنود بخبث / متاكد ؟
بتال بغضب / العنود لا تلعبين بالنار .. تحرق اصابيعك ..
العنود بهدوء / ما عمري لعبت بشي و اوجعت نفسي .. " وببرود ساخر مستفز " .. يا ولد الجوهرة ..
بتال فتح عيونه للاخير وبغضب من بين اسنانه.. / صكي فمك .. لا اهده لك ..
ام سطام تضربة بعصاتها .. وبحزم / انا ما اقول نزل البنت وقم .. و الا مالي حشيمة ومقدار يا ولد الجوهرة ..
بتال قبل الظبي ونزله بهدوء على فرشتها .. وبغموض / قريب نلتقي ونتصاف قريب ..
" تركهم وتوجه لسيارته وهو يقبض على يده يحاول يفرغ غضبة " ..
والعنود صادة عن الكل وتطالع للبعيد / ................
ام سطام تجلس جنبها وتمد رجولها .. وبحنان / يا بنتي لا تزعلين ولا تضيقين صدرك ..
والله ما يمس شعرة منك بدون رضاك .. انتي بنت الغالي .. والظبي والله ما يغير اسمها حنى ما صدقنا ترجع للفارس ..
الهنوف باستغراب / ليه يمه .. فيه بالفارس وحدة اسمها الظبي ..
ام سند باستغراب / ما ذكرها يمه .. ولا عمري سمعت عنها ..
ام سطام بغموض / الظبي ام نايف .. بنت عمي جابر رحمة الله عليه ..
الهنوف ومريم والعنود باستغراب / بنت عمك ..
ام سطام / الله الله .. مير الزمن ابعدها عنا .. الله يسامح من كان السبب ويرحمهم ..




ـــــــــــ



بالاستراحة ..


سند بهدوء / يعني ..
راكان بحزم / ما ابي اشوفه .. ولا اسمعه .. وقلة لا يجي ..
سند / لمتى .. " بحزم " .. راكااان .. بتال ابو عيال اختك .. و خال بنتك .. وولد عمك .. واللي صار بلحظة غضب ..
ندم عليها والحين يبي يضم عياله لحضنه .. مو حلو يعيشون بعيد عنه كانهم ايام وهو حي .. حس فيهم ..
راكان صد عنه وطالع التلفزيون / .............
سند / وزوجتك وبنتك لمتى بتخليهم في بيت عمك .. " وبنبرة مقصودة " .. والا بتسويس وات بتال في اختك ..
راكان بسخرية وهو ما زال يطالع بالتلفزيون / استاذ سند تعينت مستشار اسري وما ادري ..
عناد عض على شفته سند ابد ما يحب احد يسخر به بموضوع جدي ومهم ..
سند وقف وبعصبية / راااااكان ..
راكان طالعه ببرود / ............
سند بحدة / لا تحط خطاك على غيرك .. اذا بتال اخطاء يوم طلق اختك علشان اخته .. انت اخطيت اكثر منه ..
تركت ابوك وامك وهم بامس الحجه لك .. وتركت خواتك في بيت شيبان مرضا يا دوب يشيلون نفسهم ..
ورميتهم على رجال غريب اجنبي .. لا تقول عندهم نايف .. نايف صغير وطايش .. ما يتحمل مسؤلية ..
وهذي اخرتها .. الله العالم يجي فيه نفس والا مقطع نفسه ..
راكان قاطعه بخوف / لا تتفاؤل عليه بالشر .. ان شاء الله يرجع وهو بخير ..
" وبقهر " .. هالجواز والتذكرة متى تطلع ..
عناد وزياد ملتزمين الصمت ..
سند بنبرة مقصودة / وان طلع .. سافرت لهم .. ايش بتسوي .. " وبسخرية " .. بتمسك السيف وتحارب المافيا ..
راكان بقهر / سند .. لا توجعني .. اللي فينا مكفينا ..
سند يضرب يدينه بقهر / انا ما ادري ايش صابك .. انت عمرك ما كنت كذا .. والا انا اللي معمي عنك طول هالسنين ..
الا والله انا اللي معمي ومخدوع في مرجلتك .. " وبحزم " .. قم صل ركعتي وادعي ربك وهدي نفسك ..
الي جاء بتال تكون هادي وربي فتحهها بوجهك قم ..
راكان تنهد وهو يلتفت على التلفزيون .. سند بقهر / نفسي اعرف ايش عاجبك بالتلفزيون ..
لو هو شغال كان قلت يطالع برنامج بس المشكلة مقفل .. " وبصرخة حادة " .. قم تعوذ من الشيطان وصل ..
عناد وزياد كتموا ضحكتهم يوم شافوا نقزة راكان من صرخة سند ..
راكان بضيق / طيب .. لا اله الا الله .. ترعب يوم تعصب وهذا انت اكبر مني بشهر تخوفني اجل لو اكبر مني بسنين ..
سند يسحب عقاله اللي كان طايح على الكنبة جنب الشماغ .. وبجدية / شفت ذا لخلية على ظهرك ..
وقف راكان وتوجه لداخل الاستراحة وهو يتحلطم ويبربر ولا احد فاهم عليه ايش يقول ..
عناد بعد ما طلع راكان / ههههههههههههههههههه ..
سند ابتسم غصب وهو يجلس على الكنبة / والله انه بزر .. يا اخي يخلي الواحد غصب يتنرفز ..
عناد وقف عن الضحك .. وبابتسامه / كاني سمعت هالكلمة زمان عن شخص غير راكان ..
سند ابتسم اكثر وهو ياشر بيده / ما اخص من ذا الا ذا .. " يقصد ما اخص من راكان الا عناد " ..
عناد وزياد / هههههههههههههههههههههههههههههههههههههه
دخل بتال وهو يسحب نظاراته الشمسية ../ السلام عليكم ..
الكل / وعليكم السلام .. " صافح زياد وعناد .. وتوجه لسند صافحه وجلس بجنبة " ..
بتال باهتمام / وين راكان ..
دخل الصبي ومعاه ترمس شاي وصينية فطور ..
سند بهدوء / ساعة لمن تجهزه .. " الصبي هز راسة ورجع للمطبخ " ..
" سند التفت على بتال وهو يقرب الصينية وترمس الشاي " .. تفضلوا شباب ..
بتال رفع حاجب / مفطرين قبلك .. عطنا العلم ..
سند ببرود وهو ياخذ زيتون ويرميه بفمه / اي علم ..
بتال يمسك ترمس لشاي ويصب له فنجان وبتلاعب / ايش سبب نومتك بالاستراحة خايف من المدام ..
سند ابتسم وهو يقطع خبزة / حاب اغير جو .. " التفت عليه " .. تغير معاي ..
بتال يقرب منه وياخذ خياره وبخبث / لشبعت من حضن الي خبرك اغير جو ..
عناد نقز من مكانه وجلس على الارض قبالهم .. وسند وبتال جالسين على الكنبة طالعوه باستغراب ..
عناد بستهبال / عندكم سوالف " غمز بعينة " .. حقت المتزوجين .. واخوكم قريب ان شاء الله ..
بس تتعدل الظروف بيدخل السجن الذهبي مثلكم .. فلا تخلوني غشيم حاب اتعلللللللم ..
بتال رفع حاجب / الله المستعان يا عنيد انت العاشق الاول بالعائلة ناسي يا عدنان ..
عناد بضيق صد / لله يا هل الغلطة اللي ما تنمحي عندكم .. " التفت عليه " .. واحد مغمضة عيونه وتوه صغير ..
سافر برا وشاف الحريم بزينهم كله .. وانا ما عمري شفت الا حريم كبار بالسن وبجلابياتهم وريحتهم مطبخ ..
بالله ايش تتوقع يصير .. والحمد لله ان افتكيت منها قبل لا اضيع مثل غيري .. وانت شايف كيف الشباب الي يسافرون ..
سند يقطع الموضوع / راكان الحين يرجع اياك تكلمه عن سالفة العنود على طول اول شي تعذر منه ..
الين يلين معك شوي وبعدها كلمة بسالفة اخته .. واذا قال لك مالك رجعه لا تزعل و تصارخ خذه بالحلم ..
والعنود سهل امرها بس انت ما تعرفه انت ما تعرف لعسف المهور ..
" مد يدة واخذ ترمس الشاي وصب له فنجان " مثل الكاسر ما عرفت تروضة .. " وبخبث " ..
لو تقول لمتعب بن منصور عنه يمكن يعرف يروضه لك ..
بتال نزل الفنجان بقوة على الطاولة اللي ليها صينية الفطور .. عناد كان يسمع وياكل وزياد راح جهة اخوة ..
عناد مسك الطاولة .. والقمة في فمه / شوي شوي ..
سند مبتسم وهو يمد يده لصينية الفطور وياكل / ..........
بتال بقهر / يا شينك لمسكت خط الخباثة .. " صد عنه بقهر " ..
راكان دخل وبهدوء / السلام عليكم ..
الكل / وعليكم السلام ..
وقف بتال وتقدم منه .. راكان بجمود وقف مكانه .. بتال قبل راس راكان وبابتسامه / طلبناها منك يا ابو شيخة ..
راكان هز راسه بلا / .................
بتال بهدوء / قنا يا ابو شيخة .. الظاهر شيخة مالها قدر ..
راكان بنبرة مقصودة / نذل ..
بتال بنفس النبرة / مثلك ..
راكان ضم يدينه .. وبنفس النبرة / غدار ..
بتال هز راسه / ما هي من صفات الفارس ..
راكان يصغر عيونه وبجدية / اجل ايش تسمي سواتك ..
بتال بجدية / غضب والشيطان شاطر .. والله العالم .. كنت ابي ارجعها لكن انسحبت الايام من بين يديني وراحت ..
مو انا اللي يغدر بولد عمه ونسيبه وخال عياله .. بس السيف سبق ..
راكان طالعه بنظرة وصد عنه توجه للكنبة وجلس قريب من سند .. وبهدوء / والمطلوب ؟
بتال / السموحه .. يوجعني جفاك يا ولد العم ..
راكان وهو يمد يده وياخذ فنجان الشاي من عناد / مسامح .. بس لا تظن راح ترجع الامور مثل قبل ..
بتال ابتسم بفرح / الزمن يداوي الجروح يا ابو شيخة .. " كان يشد على كلمة ابو شيخة " ..
راكان هز راسه وبنبرة مقصودة / يصير خير ..
سند ابتسم وهز راسه لبتال يعني قبل راسه .. تقدم بتال وقبل راسه .. راكان تراجع / انت الكبير يا ابو شيخة ..
راكان بابتسامه جانبية / ما ضنيت بوجود سند انمسح ..
سند بمزح / لا اله الا الله .. اجل تتمنى فناي يا ابو شيخة علشان تصير الكبير ..
راكان بجدية / لا والله .. جعل عمرك طويل يا ابو فهد .. انت عزيز وغالي ..
عناد بصدق / يالله ياللي فرجت العتبة الاولى تفرج العتبات الثانية .. ابي افرح يا نااااس ابي افرررح ..
راكان ابتسم وبخبث / ما اقول الا الله يعوض على اللي بتتزوجها ..
الكل / هههههههههههههههههههه




ـــــــــــــــــ




قبل العصر ..


بيت ابو سند ..


العنود وهي تشرب من الشاهي الاخضر / الا فهد ابي اسالك ..؟
فهد وهو يطالع التلفزيون على برنامج وثائقي عن الحيوانات / هااا ..
العنود باهتمام / انت عمرك سمعت عن الظبي ..
فهد وهو مركز مع البرنامج / بنت بتال .. بس شفت صورتها الله يخليها لأهلها ..
العنود وهي تاشر بيدها وبحماس / لالالالا .. بنت عم ابوي وامي .. بنت عمهم جابر سمعت عنه ..
فهد التفت عليها وبغموض .. / وانتي من قالك عنها ..
العنود بقهر / امي قالته .. الله يسامحها بس قالت اول السالفه وسكتت .. ابي اعرف سالفتها .. انت تعرفها ..
فهد يوقف اول ما سمع صوت اذان العصر / لا اله الا الله .. لا ما اعرف وبعد الصلاة رايح ازور عمي تروحين معي ..
العنود توقف / ايه والله ابي اروح اشوفه ..
فهد وهو يتوجه لدورة المياة اللي بالدور الاول وهو يرفع اكمامه استعداد للوضوء / اجل اجهزي ..
لاجي من الصلاة وانتي ما جهزتي تراء امشي واتركك ..
العنود وهي تتوجه لجناحه / ان شاء الله ..



ـــــــــــــــــ




بيت ابو عناد ..

الهنوف بهدوء / يعني تعرف الظبي ..
خالد بنفي وهو يمسح وجه بالمنديل / لا الظبي ما اعرف عنها شي .. لكن عمي جابر اعرف انه الاخ الاكبر لعمامي ..
" رمى المنديل بسلة الزباله .. و التفت على الهنوف الواقفه قريب منه .. واخذ منها الشماغ " .. وماتوا كل عياله ..
الهنوف / لا اله الا الله .. " وباستغراب " .. اشلون كل عياله والظبي ..
خالد يهز اكتافه وهو ينفح عمامته لفوق / الله العالم .. يالله خليني الحق على الصلاة ..
ايه بعد الصلاة رايح لعمي تروحين معي ..
الهنوف برجاء / والله يا ليت ..
خالد ابتسم وقبل جبينها / تامر امر ام عناد .. بعد الصلاة القاك جاهزة ..
الهنوف بحب / جعل عيني ما تبكيك يا الغالي .. " وبطاعه " .. ان شاء الله ..




ــــــــــــــــــ




بيت ابو بتال ..


سمر عند المدخل ترتب شيلتها .. الخدامة بجنبها شايله شيخه الصغيرة ..
ام بتال جايه جهتها .. / ها خلصتي ..
سمر بهدوء / ايه ..
ام بتال / يا الله مشينا اجل ..
سمر اخذت بنتها وطلعت وراء امها والخدامه معاها الشنطة الخاصة بشيخه ..







بيت ابو سطام ..


بالصالة الداخليه ..



العنود ومياسة وريهام و ام سطام يتقهون ..


ريهام بهدوء / الحين ابي اروح انا و ابرار ونشوف ايش اللي بنغيره ..
مياسه / الله من ذا الاستراحة اللي كل مرة قلتوا بتفتحونها وتبطلون ..
ريهام بضيق / شنسوي يمه كيف نحتفل والمشاكل تطيح فوق روسنا ..
ان شاء الله جدي يقوم بسلامه ونسوي حفله يا كبرها ..
العنود ابتسمت بحب لها البنت .. ام سطام ومياسة / يا رب ..
العنود التفتت لسلطان والظبي اللي يحاولون يمسكون اللعاب الصغيرة المعلقه على الجلسه ..
.........من خلفهم / السلام عليكم ..
الكل / وعليكم السلام ..
وقفت العنود وصافحت ام بتال ببرود متبادل .. ابتسمت لسمر وبهدوء / الحمدلله على السلامه ..
قبلت خدين سمر .. سمر ابتسمت بهدوء .. العنود اخذت شيخه وهي تسمي وتقبلها ..
ام بتال جلست على الكنبه جنب مياسه .. سمر جلست جنب جدتها بعد ما قبلت راسها ..
ام سطام / مدراج العافية .. ايشلونك يا بنتي ..
سمر / الحمد لله بخير ..
ريهام توقف .. وبابتسامه / انا استئذن ..
الكل / اذنك معاك ..
ام سطام بحنان / عطيني .. عطيني شيخة يا العنود خلني اسلم عليها ..
العنود تعطي شيخه جدته وهي تسمي ..
ام بتال / الزين يا خاله اسمها الزين ..
ام سطام ترجع شيخة للعنود / الله يحفظها لبيها واميتها ...
....... من الباب الخارجي / يا ولد ..
ام سطام / من ؟
راكان بضحكه / ابو سطام يا يمه .. ادخل والا ارجع ..
ام سطام بخبث / تعال تعال وسلم على ام سطام يا ابو سطام تعال ..
راكان دخل وهو يضحكه / هههههههههه السلام عليكم .. " تغيرت ملامح وجه يوم شاف الجوهرة وسمر " ..
سمر نزلت راسها من اول ما سمعت الصوت والعبرة خانقتها ..
راكان يقبل راس جدته .. وبنبرة مقصودة / اشلونك يا ام سطام عساك بخير ..
ام سطام بتلاعبه / لشفت ابو سطام اكون بخير .. عديل الروح جعل عيني ما تبكيه ..
راكان بخبث / الا ما دريتي .. يقولك ابو سطام شاف له وحدة مزيونه ويبي يتزوجها ..
ام سطام عارفه القصد .. وعارفه ان سمر دجاجه مو فاهمه .. ضربتها بكوعها خل سمر تنقز وترفع راسها ..
شافت راكان مد يده يعني بيصافحها وبنظراته شي غريب بس مو الحب اللي دائما تشوفه بعيونه ..
ما عرفت ايش تسوي حست برجفه مسكت كل جسمها .. زعلان .. كارهني .. ايش يقصد .. كانت كلها تدور بداخلها ..
ام سطام تبعد شوي عن سمر .. مسكت يد راكان وجلسته جنبها يعني بينها وبين سمر ..
ام سطام / الا عطني علومك .. ايش سويت وين رحت ..
العنود تهز رجلها بتوتر .. شيخه بحضنها .. من لمن دخل سلم على جدته و عمته وام بتال وهي ابد ما حط عينه بعينها ..
راكان يميل جهة جدته ويعطي سمر ظهر يعني مو هامته ولا معطيها قدر .. وبدا يسولف مع جدته عن حالة جدة ..
العنود شغاله هز وناسية اللي بين يدينها .. شيخة تضايقت من الهز .. / وووووووااااااااااا >> اشتقتوا لها ^_*
راكان طالع جهة الصوت وشافها بحضن العنود .. العنود بسخرية / بنتك .. ولا ما شفتها بعد ..
راكان كتم ضحكته اول مره يشوف العنود بذا الوضع .. وقف وتوجه لها .. مد يده يبي يا خذها ..
العنود بقهر هامس / شارد يا ركين شارد .. لكن هذا انت رجعت .. وراح تقولي السالفه بغصب عنك ..
راكان ابتسم وهو ياخذ شيخه .. وبهمس / يصير خير .. " وبصوت مرتفع " .. يا الله حي الشيخه .. شيخة راكان ..
ام بتال تنهد وبصوت حازم / اسمها الزين .. ما هو بشيخه ..
راكان وهو يجلس بكنبه لحالة ذا المرة ومقابل الكل .. رفع حاجب وبسخرية / ااااايييييييه يصير خير ..
سمع صوت حريم بيدخلون الصالة ..
ام طلال وام سيف / السلام عليكم ..
الكل / وعليكم السلام ..
راكان يشيل شيخة بين يدينها .. ووقف .. / يا الله اجل انا استئذن .. " التفت على شيخه " .. يا لله مع بابا ..
وطلع من الصالة توجه لجناح العنود وساره .. العنود وقفت سلمت على الجازي ومريم ..
و وصت عمتها مياسه على عيالها وراحت بسرعة لجناحها ..
و ام سطام ماسكة سمر و همس باذنها بالنصائح وتفهمها مقاصد نغزات راكان ..





ــــــــــــ



بعد العشاء


في المستشفى ..



بعد خروج الهنوف والعنود من جناح ابوهم ..
وانتهاء الزيارة من وقت ..
الدكتور عند ابو سطام .. لستكمال بعض الفحوصات الزمة للعملية .. المقررة غدا ..
بالصالة ..
سلطان / انا الليلة ابات عن ابوي .. وبكرة انت يا سند ..
خالد بحزم / ترا انا لي نصيب في عمي .. كل ما قلت الليلة ابات عند عمي ..
نطيت لي انت والا سند والا واحد من العيال .. الليلة انا وبكرة كيفكم ..
سند / انا الليلة متنازل لكم عنها .. اما بكرة فلا ..
سلطان تنهد / اجل خلاص يا خالد بات انت .. ما اقدر ازعلك ..
خالد بمزح / زين انكم رضيتوا بسرعة والا هاا بذا " وهو ياشر على عقالة " ..
سند وسلطان / ههههههههههه
خرج الدكتور وهو مبتسم / الحمد لله كل شي تمام .. ان شاء الله بكرة ما يفاجئنا شي ويلخبطنا ..
الكل / ان شاء الله ..
الدكتور / عن اذنكم ..
الكل / اذنك معاك ..
دخلوا لـ ابو سطام وجلسوا معاه شوي الى ان نام ابو سطام طلع سند وسلطان وبقي عنده خالد ..




ــــــــــــــ




بجناح العنود ..

ساره / يعني كذا بس ..
العنود بعدم تصديق / كذا بس ..
ساره تهز كتوفه / ما ادري احس مو مصدقه ..
العنود بخوف / يا خوفي يكون الموضوع اكبر من كذا بكثير ..
ساره وهي تفرك يدينها في بعض / العنود .. ممكن يكونون متهمين نايف بالارهاب .. والله معاد نشوفه لو كذا ..
العنود بجزع / بسم الله عليه .. لا ان شاء الله .. جعله مثل ما قال راكان نقص باوراق التصديق بالسفارة ..
" وبعدم اقناع " بس انا مو مقتنعه بهالشي .. ايش لون انه ماله سجل بالسعودية .. ورفضوا دخوله .. ولزم احد يثبت ..
السالفه مو مرتبه .. واخوك جابها من عقلة كذا بس يبي يسكتنا .. لكان حنا مو اغبياء ..
ساره بضيق تنهدت / ............
العنود حطت يدها على خدها مالها حيلة .. / ...............
ساره / الا تتوقعين راكان بينام هينا صدق ..
العنود ابتسمت غصب / جدتك حلفت عليه ..
ساره / وسمر ..
العنود طالعتها بنظرة .. سارة وقفت / تصبحين على خير بكرة اخر يوم بالمدرسة وعندي اختبار ..
العنود / وانتي من اهله ..



ـــــــــــــــــ



بيت ابو سند ..


بشقة سند ..


خرج من الحمام وهو لف فوطه على خصرة والثانية ينشف فيها شعرة ..
رنيم واقفه ومتخصرة .. وبعصبية / غايب عن البيت لك فترة واخر شي تدخل لا سلام ولا كلام ..
سند ينشف شعره ومطنشها .. رنيم تتقدم منه .. وبحدة / سند قاعدة اكلمك ..
سند رمى المنشفه على الشماعه .. اخذ ملابسة ولبسها .. توجه لتسريحة ومشط شعره ..
ورنيم تمشي وراه .. رنيم بحدة وقهر / ســـــــــنــــــد ...
سند تعطر وتوجه للإضاءة وخفضها .. وتوجه لسرير رفع الفرشة ودخل تحته بمنتصف السرير ..
رنيم رفعت الفرشة وجلست بطرف .. رنيم بقهر / انت ليش ما تكلمني ..
سند بتعب وشوق / رنيم .. بكره عملية جدي في القلب .. فخليني انام بدري علشان اصحى بدري ..
واروح له قبل لا يدخل العمليات .. ممكن تريحيني مو علشاني .. علشان خاطر امك وجدي ..
رنيم / .....................
سند حط يده اليمنى على عيونه ويده اليسرى ممدوه .. يحاول يلجم شوقه ويكمل عقابه لها ..
ارتعش جسمه يوم حس بثقل راسها على عضده .. حاول ما يميل ويحضنها و يشبع صدرة من ريحتها ..
بس هو تعبان تعبااااان حد الموت .. رفع يده والتفت جهتها شافها معطيته قفاه .. التفت لها ..
حط يده اليمنى على بطنها البارز بوضوح وصار يمسح عليه بحنان ..
ابتسم وكل التعب اللي بجسمه راح اول ما حس برفسات الجنين .. وبحنان همس لها / اتعبك ..
رنيم بدلع لاول مرة حس فيه سند بصوتها / مثل ابوه عادي ..
لو كلامها يجرح بس نبرة الدلع اللي فيه جننته .. كان بقوم ويغرقها قبل واحضان .. عطشان واضماه جفاها ..
بس مسك نفسه ما استوت طبخته زين .. لزم لها شوي .. دخل انفه بشعرها واستنشق رائحتها العطرة بعمق ..
حس برفسات متتالية تالمت منها رنيم وتاوهت / آآآآآآآآآآه .. " وتلقائين وضعت يدها على يد سند مكان الرفس " ..
ليستكن الجنين وهداء .. ثواني لينتظم تنفس رنيم وسند معلنين التعمق بالنوم ..



ـــــــــــــ



بيت ابو سطام ..

دخل راكان البيت وما سمع اي صوت .. التفت يمين ويسار ما شاف احد ..
توجه لجناحه هو و زياد ودخل لغرفته .. " جناحهم من غرفتين وصالة وحمام " ..
فتح الباب وتفاجاء بسمر واقفه قريب من سرير صغير بأحد زاويا ..
طالع بسمر من فوق لتحت .. صابغة شعرة بني شوكولا .. وخصل خفيفه عسلي ..
شعرها طولان لنص ظهرها بقصة المتدرجة .. لبسه قميص سكري طويل ولفه عليه روب من الدانتيل ..
سمر شافت نظراته لها و نزلت راسها بخجل وحرج .. خايفه جدتها غلطانه .. وامها صح ..
وتتمنى يكون كلام امها خطاء .. سمعت صوت فتح الدولاب .. التفت عليه وشافته يطلع بجامه له واخذ الفوطة وطلع ..
غطت بنتها بالفرشة .. مسحت على شعر بنتها الاسود الناعم بحنان تركتها وتوجهت للكرسي جلست تنتظر رجوع راكان ..
وقلبها يدق خوف من صدة لها وجرح قلبها ..




انتهى ..


لا اله الا الله .. محمد رسول الله ..


سبحان الله .. والحمد لله ... والله اكبر ..

اتمنى يعجبكم .. واعذروني على القصور والا خطاء الاملائية ..



ززززيييييزززووووو انتي هديتك مخبيتها لك بصندوق من زمااااااان .. ما راح اطلعها الحين ..
انسى العالم كله ولا انساك يا قلبي .. انتي كل الرواية وصاحبتها هدية لك ..<< فيس خايف يطالع بعض الناس ..


لا تنسوني من دعائكم ..


احوووووووببببببببببكككككككمممممممممم


اختكم مشاعل السعودية ..

السلام عليكم شعوله

تسلمين يالغاليه

العنود بصراااحه قويه مره ما حبيت تعاملها مع اخوهااا راكان حتى لو حست انه غلطان هي الحين بعد غلطت
يمكن خلاص تعودت انها هي الي تحل وتربط استقلاليتها عطتها قوه تواجه الجميع بس بعد الاحترام حلو خصوصاااا للأهل أو كصلة رحم
ولأننا بنعيش طوال حياتنا بينهم موهب زين قطع حبال الود لو الوحد صلحها بتكون ضعيفه وتنقطع نهائي وشلون الواحد يعيش من غير أهل وعزوه
هم غلطوا صح تعيدين الغلط ليه فكري بمنطق العقل والحكمة وخلي التهور والاندفاع

بتااال الله يعينك مشوااااارك طويل ويمكن ماتوصل ......ينتهي بك لطريق مسدود
العنود كارهتك ومالك شفيع عندهاااا بالحب.......... يمكن عيالك يشفعون لك بس مهوب برجعتهااا لا بانها تخليك تشوفهم

راكان وسمر جفاها أهون من بتال والعنود شوفوا أيام حلوة مع بعض بتلين قلوبهم وشيخه الصغيره محامي لامها بقلب راكان

رنيم وسند عز الله انك عرفت مفتاح هالمغرورة. مابقى شي وتصير لعبة بين يدينك. ليتك معطي شباب العائلة من عقلك وصبرك



ننتظرك ميشو بكل الود

صباح الورد .......تسلم ايدك ياقلبي بارت رائع جدا مثل ماتعودنا منك .......ربي يسهل امورك ويفرج عنك وترجع امورك احسن من قبل ....

العنود وبتال

الكل قايم على بتال ولايمه لحاله متناسيين انو العنود تتحمل نصف الغلط يعني لاهي اهتمت بحياتها مع بتال ولا هو كلف على خاطره يكون صريح من الاول ويتعامل معاها بأسلوب يفهم منها الي محيره .........هو صرح انو لاالصوت ولا الشكل نفسه الي شافه قبل الزواج طيب ليش لما تعدلت اوضاعه مع العنود في فترة من الفترات ماسأل وارضى فضوله ومنها انهى شكوكه وارتاح

مثل ماسمع لامه الظالمة واخته العوبة كان من باب اولى يسمع لزوجته بعد ........مع اني متأكدة مليون بالمية انو عنودوه بتجاوبه بسخرية وبتتعامل معاه نفس تعاملها مع راكان

ا لشخص اذا يبغي الناس تحترمه وتقدره واذا يبغي شي من الناس لازم يكون تعامله معاهم مبني على الاحترام ومراعي لفرق السن وايضا لجنس هالشخص الرجال مهما كانت صلة القرابة اخو او زوج او ولد عم مااجي استخدم معاه اسلوب استفزازي هزلي وانتظر منه تعامل محترم العنود ماعندها احترام ابد للي اكبر منها تعامل الناس كأنهم اقل منها ومااستغرب عليها تربية الظبي الي غذت فيها الكره لاهلها وهذا هم الكل راح ومابقى لها الا الي تكرههم طيب وبعدين بتعيش لحالها في الدنيا ولا متعب وصلاح بيظلو مكفولين فيها طول العمر بيجي يوم بيتزوجو وبيفتحو بيوت وبيلهو عنها

الواحد مو ضامن عمره ولا دقيقة في الدنيا ليش تنفر الناس من حولها وهي ممكن بغمضة عين تكون تحت التراب عيالها الي عندها ماتقول لي شبيكون مصيرهم اذا انتقمت من اهلها وحاربتهم في رزقهم وماتت قبل ترجع لهم الفلوس ماتقول لي شالي استفادته ........كل انسان مايحمل معاه من الدنيا الا عمله والي تسويه مايرضي الله ديننا حثنا دايم على السلام وعلى الابتعاد عن الغضب يعني الظبي الي بقبرها لما العنود تنتقم من اهلها بترتاح وبتزيد حسناتها بدل ماهي شاغلة عمرها بالناس والانتقام تشغل حالها بالي بينفعها وتنشغل بعيالها ابرك لها لاالظبي بتدخل الجنة اذا هي انتقمت ولا بترجع للحياة تترك تخلف الظبي وتعدل حالها

الضغط ماجا لها الا من كثر الاحقاد الي بقلبها شاغلة فكرها بالي يخصها والي مايخصها ........بدل ماتناظر الفارس كلهم بنفس المنظار والسلبية تشوف الايجابية الي هم فيها

محراك الشر سند ومات تيجي تحاسب العيال والاحفاد بشي ماسووه لجدتها ونعم التفكير والتربية .....هي لو صدق تبغي اخوانها يشيلو عنها شوي من الهموم تعاملت معاهم بأسلوب محترم وماتحاسبهم على تصرفاتهم لانها هي مو اقل منهم في الاخطاء والتصرفات والتقصير ........هم قصرو من جهة وهي نفس الشي يعني لاتسوي لنا فيها الانسانة الي دايم على حق وغيرها على باطل

انا لو باجي اكلم اخوي بنفس طريقتها ماالومه لو قاطعني طول عمره .......هو رجال كبير مهما كانت اغلاطه مااجي احاسبه عليها ماضي التقليب فيه مابيرجع ولا بيغير الي صار المهم الوقت الحالي والمستقبل للاسف صارت ام ومازالت تبغي تتحكم في الكل وتصرفاتهم مثل ماهي راضية بحياتها وعقليتها ومقتنعة فيها نفس الشي غيرها اذا ابغي شي من شخص وابغي قربه اكون صريحة بدون استفزاز وقلة ادب العنود للاسف تفتقر للاحترام والتعامل الصحيح لغيرها لانها مغروووووووورة وحقودة ومايهمها الا نفسها والي تحبهم فقط لاغير

اما موضوعها مع بتال دامه طلقها مالها شي عنده ولا من حقها تنتقم منه الرجال طلقها ومايربطهم الا هالعيال الي مو هامينها ولا فكرت بمستقبلهم والنقص الي بيعيشوه .......بتال يستحق العقاب في حال طالبها بالرجوع انا معاها تنتقم منه بس بدون ماتأذيه وتحط ببالها انو ابو عيالها الي بيوم بيطالبوها بوجوده وماحد بيغنيهم عنه وهو حي

تقدر تعجزه بعدة شروط او ترجع له بس تربيه وترجعه لبتال القديم الي كان بأول الرواية بس بأسلوب غير الي مع راكان الي يقلل من احترام رجولته

مثل مابتال حبها وعشقها حتى العنود ومتأكدة مليون بالمية العنود انثى مهما كان مشاعرها تتحكم فيها لو تذكرت لحظاتها الخاصة مع بتال والي عاشو فيها حياة مختلفة وان كانت قصيرة بس مستحيل تروح من بالها لو كل فترة لابد تطري عليها بس لانها تكابر مستحيل تعترف بس لابد لهاللحظة بتجيها .......

العنود بتجيها مصايب بتحتاج فيها لسند قوي ومابيكون حولها لاراكان ولا زياد المريض ولا نايف الي دخل بمتاهات الله العالم متى تنتهي ومتعب وصلاح عندهم الي بيشغلهم مابتلاقي الا بتال ماد ايده لها ومتفرغ لدعمها

اما بالنسبة للتسمية هو كان بس بيستفز العنود علشان يسمع صوتها ولا هو ماهمه امه ولا اسمها كافي جوهرة وحدة ناقص علة ثانية

الظبي وسند

من اول ماعرفنا انو الظبي مهرة الفارس وانو سند عاشقها عرفنا انها بنت عمهم بس ليش تركتهم وهجت ومين ساعدها وكيف تزوجت اذا الكل مات ومن وين لها الفلوس الي ورثتهم للعنود علشان تحارب فيه اهلها اذا تركت كل شي وراحت .......اذا سبب ترك سطام لاهله واشتغاله بعيد عنهم هو احتياجهم للفلوس يعني هم مااخذو فلوسها ولا ورثها ومن وين جاها هالخير اذا عيلتها مو غنية

سند عرف اشياء كثيرة عن الي صار في الماضي لانه كان قريب من جده مثل ماالعنود كانت قريبة من الظبي لذلك هو متفهم بعض تصرفاتها ونغزاتها

والظبي ماحقدت على الفارس وتبغي تنتقم حتى بعد موت سند وموتها الا لانها مقهورة وعاشقة لسند بس الي سواه حرمها من قربه وغير زواجه من غيرها واعتقد نفس سند كل ماسمعت انو عنده عيال او جاه مولود اترقت بالغيرة لذلك تبغي تنتقم من عياله واحفاده ....... ماادري شبيفيدها والي صار عليها صار


سند ورنيموه

والله يعجبني تعامله معاها خليه يحرقها مثل ماحرقت قلبه وهو يبادرها بالحب وهي تجرح فيه بدون اهتمام خليها تعرف انها ممكن تفقده وانو ممكن قلبه يدخل فيه غيرها ويحرمها منه .......وحدة همجية ماينفع معاها الا نفس الاسلوب الهمجي خليه يطول هالموال الين تراكض هي وراه


سمروه وراكان

لو تموت هي وامها راكان مابيتنازل عن اسم امه شراح تسوي يعني ماتقدر تجبره وغصب عنها بتنطم وبتهجد ورجعتها لراكان بدون مايطلبها اول عقاب لها اعتقد اذا راكان ذكي ويبغي يربي سمروه مابيفشلها ولا بيردها وهي الي جايته لغرفته بس بيكون غير عن قبل بياخذ الي يبغي بدون مايعبرها ولا يفرحها بأي كلمة لانها مثل رنيموه مانفع معاها لاحب ولا معاملة عدلة ..........

بيكون جاف معاها ومابيتكلم معاها الا بحدود وبيحذرها من اي تصرف مايرضيه او انو اي احد من الي حواليهم يعرف عن الي بينهم وفي المقابل الدلع والحب والحنان لشيخة ........بنشوف تهجد وتبطل عباطة وعوابة او لا بتلم لسانها الي صاير وكالة متنقلة للاخبار او لا

نايف

نايف موضوعه له دخل بتجار المخدرات والي مااستبعد انو تكون مافيه يعني مو تركيوه الي بس هو كبيرها لا في راس اكبر وقدرو يوصلو له لانو شكله ماوقف عن تتبع حركاتهم والله يستر من الي بيجيه اكيد بيمر بمخاطر وصعوبات مابيتخلص منها بسهولة وهالشي بيشغل العنود فيه وبتهجد عن خبالها وانتقامها من اهلها

عناد وغرام

مستغربة شخصية عناد الخفيفة مو نفسها الي ببداية الرواية عناد كان عصبي ومختلف شفيهم عيالك ميشو صدموني بتغيراتهم مثل عناد وبتال وين كانو ووين صارو الحين ومافي اسباب لانقلاب حالهم

هو مالحق عرف غرام معرفة تخليه يعشقها علشان ينقلب حاله لقائات ماكانت حلوة ولا مشجعة ....

مريم ام طلال

شسالفة خوفها من ام راكان على طلال لو هي امه مرضعته كيف بتاخذه منها وعنده ام حقيقية وابو ....وبعدين طلال راضع مع مين هل مع راكان الي ابوه يوم يجي لاهله ويصدمهم فيه كان بعمر السنة يمكن مع زياد على ماتعدلت اوضاع سطام وجاب زوجته معاه ومريم كانت بحالة صعبة وشيخة رضعته

يعني هو اخو العنود واخوانها طيب ليش ماخبروه هو محرم لسارة والعنود دامه اخوهم من الرضاعة ومن حقه يعرف يمكن يكون لهم سند احسن من اخوانهم من الابو والام

بصراحة صدمتيني بمريم وانانيتها وتفكيرها والظاهر زوجها مايدري والا كان العيلة كلها تعرف انو طلال اخو لراكان واخوانه هل بيجي يوم والكل يعرف

في انتظارك ياعسل