بارت جميل مشاعل ويسلمو على مجهودك والتزام بالبارتات رغم ظروفك وارتباطات العيد
العنود
كان البارت موجع لها بدرجة كبيرة لانها اتربت واتعودت على انها ماتطلب من احد شيء تفضل شامخة واصعب شيء هو تنازل عفيف النفس وحتى التعامل معهم صعب جدا وعن تجربة الله يعينها توالت عليها المصائب فهل ستتوقف عند لجؤها للفارس اما ستبدء رحلة عذاب اخرى
راكان
اتمنى الصدمة هذي تصحيك وتخليك تنتبه لاخوانك واخواتك وتكون لهم سند ضد كل من اراد فيهم سوء
بتال
لايوجد لدي تعليق عليه من كثر ماني مقهورة منه ومن تصرفاته الهوجاء هو واخته كل واحد فيهم اخس من الثاني بس نفسي اشوف صدمته لمن يعرف عن العيال وكيف راح يبرر لجده
شريفة
لكل ظالم يوم ومثل ماعذبت العنود واهلها اخذت جزائها العادل بموت ولدها وفضيحة بنتها وفي النهاية قتلها وحرقها
تركي اعتقد انو ماراح يهرب ويمسكوه قبل مايشرد بس المحيرني مين هو البوص حقهم واحيانا اعتقد انو راشد يبغى يدمر العصابة خصوصا لمن عرف بموت سطام
بانتظار البارت القادم واعتقد انو بكذا انطوت ايام الرياض وشريفة وهتبدء العنود حربها مع الفارس

السلام عليكم ورحمه الله وبركاته

صباح الخير...صباااح الرضا وراحةالبال.......صباح الرياحين
ميشوووو فديتك وشهالبارت الموجع والله اني رحمتك يوم كتبتيه اذا انا وانا اقراه قلبي عورني
من قوة الاحداث كيف انتي الي جعل يدينك ماتمسها النار ويفرج همك ويوسع صدرك ويزيل كدرك ويشفي
بنيتك
ميشوووو الاحداث بالرغم من قوتها والاحداث توقف القلب الا اني وربي مستمتعه فيها بدرجه كبيررره
اقول يا ام سعيد اللحين اعيالك ما يمدي تموتين كم واحد الا جبتيبداله بديييل ماشاء الله تبارك بين فتره وفتره
تطلعين لنا وااحد

سطاااام
صدقين ان وفاته اثرت فيني حيييييل وقلبي عورني علييييه بالمرره حسبي الله ونعم الوكيل على الي كان السبب
احس موتته ما ذبحت بناته بس اذبحت العيله بكيرها من الجد الىاصغر وااحد لان هم كان السند والعزوه لهم
وهو السبب بعد الله في الحال الي وصلوا له ...صحيح اعيال الحراام فرقوا بينه وبينهم بس ما زالت معزته ومكانته
موجوده عندهم ...ووفاه اكيد انها بتغير في مجرى الروايه كثيررر

ابو سطام وام سطاااااام
حرااااام عليك ميشو بكيتيني مرررره على موقفهم وخاصة ان الجد عرف بوفاته قبل الكل صدقين انك ذكرتيني
بوفاة امي جعلها بالفردوس الاعلى هي وجميع المسلمين...سبحان الله تحسين بوفاه شخص عزيز عليك بشكل غريب
وهذا الي صار للجد يوم جاه اخوه سند وطلبه سطاااام
ام سطام ماتنلام ماشبعت من ولدها من يوم وهو صغير سافر لاجل يامن مستقبل عيلته ويكون لهم الاسم ويوم رجع
سافر مع اهل زوجته لشرقيه ..وبعدين سالفه السحرالي عيبته عنهم حتى لو حاضر بينهم
يعني هي عانت من غيابه كثيرررررام ثكلى الله يجبر مصابهاااا

والجد توه اللحين ينتبه ان بنات سطااام بروحهم ما معاهم لاا سند ولاا عزوه عايشين بروحهم عرضه للي يسوى
والي ما يسوى ..زين ما سوى في زيادوه اجل مقابل اخوه وتارك محارم شعره وجه بروحهم لاا والي ولاا تالي
تصفع الدنياااا بهم ..زياد لو تكون فيهااا عبر الدنيااا وحالته حااااااله معقوله يكون مايغير على خواته اخس عليه والله
وبتيل احسسسسسن والله اني فرحت عليه يوم هزءة الجد وطرده ولد جهيررر
راكان
الف الحمد لله على سلامتك وعظم الله اجرك على اني كنت كارهتك في البدايه على طريقه تعاملك مع اهلك
وخواتك الا انه بسبب الظروف الي مريت فيهااا حنيت عليك
اكفووووو والله تسلم يدك واخيرا صرت رجااال وبتاخذ بحق اختك الي ارخصتها لواحد ما حافظ عليهااااا
ولاا صانهاااا...عاد اللحين الباقي عليك تعالج هالاخووو الي قلته بسويه وتتحاول انك تتقرب من خواتك
زتكون لهم السند والعزوه بعد ابوك...والدور بعد على العنز الي ماخذها هي وامها الي كبروا السالفه براس
بتال وافرحواا بطلاقها ياريت تادبها عدل مو تخق لها وتطيح من اول دمعه

العنووووود
كان الله بعونك وعظم الله اجرك الحمل عليييك كبيررر ويهد الحيل ولاا عندك اخو زي الناس ترمين حمولك
علييه ...صحيح متعب وصلاح ما قصروا معك بس انتي شكلك تبين اخوانك هم الي يشيلون عنك
بس الي مو عاااااجبني فيك هو العنااااد ليييييه ترى الوحده مهما كانت قوتها وتحملها مصيرها تتعب تبي يكون
جنبها رجااال تتكل عليه وترمي حمولها عليه مهما دارت وراحت هي مررره تبي عزززوه ليه رافضه هالعزوه
مو معقوله عزت نفس انتي برقبتك ثلاث اعيالك التؤم واختك يعني الحمل ثقييل مره ....
وزين منهااا انهاا فهمت الحلم عدل وتراجعت عن قرارها انها تبقى بالبيت واقدرت انها تلحق تاخذ الاشياء المهمه معها
وتروح مع ام طارق لاهلهااا>>اللحين فهمت كلام صلاح كل طير مرده لعشه<<وهذا هي ردت لعشها عند اهلها وعزوتهاااا... واتوقع ان الملف الي يدوره تركي خذته العنود معهااا
صحيح انه صعب عليها تترك امها بهالحاله وهي محتاجه لهاا بس وش في يدها غير انها تطلب من الله يخفف عنها لانها شكلها راح تلحق زوجهاا الله يرحمها برحمته
وهي اختارت انها تكون بحمى الجد دون غيره لانها خلااص ما عاد عندها ثقه لاا باخو ولاا بزوج ولاا بعم فاختارت
الراس لكبيره عشان يحميها عن الكل
صحيح ميشوووو لاحظت وهي في المستشفى مع ابوها كبار الشخصيات تعزيها وتسميهااا باخت نايف هذا يبين انها
معروفه عندهم اكيد من خلال تعاملها معهم بالتجاره

لطاااام
هذا ولد ميشو الجديد ههههههه بس يااثقيل طينته احسه غثييييييث الله ياخذه المره وين وهو وين المره محزونه
وحالتها حااااله وهو جالس يتغزل فيهاااا حسبي الله عليه جعل تلطمه دنياه...وجوده بعد هالاحداث اكيد راح
يسبب مشاكل وتعقيدات للعنود

متعب وصلاح
هههههههههههه صدقين ميشووو كل ما اشوفهم تطري علي اغنيه>>خوالي يرفعون الراس << مدري ليييه
يمكن لانهم كانوا نعم السند للعنود وهم الي قاموا فيها وفي اهلهااااا يوم تخلى عنها الزوج والاخ والجد والعم
صاروا هم كل اهلها ...بس هي لو تترك يباس الراس معاهم كان هم بخير ياعمري يسوون المستحيييل
عشان ترضى
نفسي اشوف بيت لاذا شاف متعب وصلاح يزرون العنود وهي تجلس بينهم فاتشه وجهاااا ههههههههه يانه
بتجيه جلطه وخاصة اذا عرف انهم محارمهااا ...

تركي
موت سطام كان فرحه له اكييييد ..بس ياترى وشهالحقد الدفين الي بقلبه تجاهم وليه جالس ينتقم منهم
الاولى بنايف خلاه مدمن بعدين بشركه راكان واخلاهاااااا حنان ..الله يستر من البااقي

شريفه واعياالهااا
ميشوووووو احوووووبك مررررره ياشيخه الله يبرد قلبك مثل مابردتي فيها جزاهااااا واقل من جزاها
هالحيزبوووون ...ولاا بعد رايح تبي تنتقم من العنود هي وشذنبها هي الي قالت لك هملي بيتك واعيالك
والا هي الي قالت لكت اعملي بالسحر والطبوب
اهااااا يعني طلعت شريفوه بنت حراااااام لقيطه لقوها بالشارع وحنو عليهاااا ويمكن ارضعتها الظبي مع
احد من اعيالها وهي بداااال لاا ترد لهم جميلهم بالمعروف كادت لهم واسحرتهم لان الغيره والحسد والحقد
اعمو قلبهااااوبصيرتهاااا
هذاا عبدالله ولدها المدلل روحهاااا الي افرطت في تلبية رغباته وسخرت له كل شيءمااات مسموووم
وبنتها حنان ضااع شرفها بسبه اهماااال امها لها الي مخليتها تهيت بروحها لانصاص الليالي
لاحسيب ولاا رقيب لاتسالها وين رايحه والا من وين جايه والا من هم خوياتك
وترى مهااااا بعد مسؤله عن الي صار لاختها ليييه مانصحتها والا منعتها من الروحه خلت اختها تضيع
بسبة انتقام مالها دخل فيهااا..
ابو عبدالله البطل الصامت الي تارك الخيط والمخيط لزوجته ولاهي يجمع الفلوس بالله وشتنفعه الفلوس فيه
اذا ولده امتداده بالدنيا ماااات مسموم وبنته شرفه وعرضه اندااس وتلطخ ترى كل الي صار لعيالك برقبتك
وانت المسؤال الاول والاخير لاتقول مشغول ومدري ايش >>كلكم راعي وكلكم مسؤل عن رعيته<<

طلاال ومرام
هههههههههههههههه جات الحزينه تفرح مالقت لها مطرح
مسكين ياطلال يوم مرتك تسنعت وصارت حرمه عدله جاء من ينقص عليكم لحظاتكم هههههههههههههه

ابو طلال وام طلال
مدري ليييييه حس ان مريم عندها سر كبير يخص صحتها ومخبيته عن الكل وابو طلال حاس فيها
ومعوره قلبه ..يبيها تتكلم بس المفروض انه ما يكتفي بسؤاله لازم ياخذها للمشتشفى ويجري لها فحوصات
كامله عشان يتطمن عليها ....وشكله دااائما يحس بتانيب الضمير والذنب تجاه مريم

تسلمين يالغلاااااا على هالابداااااع لاخلاا ولاا عدم ...واعذريني على هذرتي
تعرفيني انا العسسسسسسسل وكل شيء مني حلوووووووووووو

صباح الخير .....تسلم ايدك ميشو على البارت الحلو والرائع لاخلا ولا عدم منك ومن مفاجأتك .....بس ياختي كم باقي من عيالك ماطل علينا .....الله يستر من الي بصندوقك خخخخ

راكان وسمروه

ويع ويع من ثقيلة الطينة يارب يبرد قلبي راكان بعد الي عرفه والي بيعرفه بعدين لما تصير المواجهة والعنود تصير حرمة وعاقلة لمرة وحدة بس وتوقف كل الي تهجمو عليها بالباطل بكل ثقة وتجاوب على كل اسئلتهم وراكان اذا عارف اسباب بتالوه وانو امه واخته سبب ظلمه للعنود يوقف معاها ويصير رجال لو لمرة ويعوض اهماله الي راح لاهله .......ويكون مع اخته وسمروه يخليها منقلعة عند امها الين تكبر وتصير كفو زوج وبيت وحمولة مو كل ماصار شي معاها راحت خرته عند الي يسوى والي مايسوى لازم تتعلم انو لسانها الي مايحفظ سر هو سبب خراب بيتها ..ميشو طالبتك طلبة بردي خاطري من هالعلة سمروه لايعة كبدي حرام يجي البزر ويكبر عند وحدة بعقليتها الى متى وتصرفاتها تجيب العلة خلي راكان يرد اعتبار اخته ....... ويخلي سمروه عند اهلها مثل مابتال رمى العنود وعندها بدل الطفل اثنين ...

العنود وبتيل ولطاموه

خير الاخ لطام جاي فارد عضلاته الظاهر مايدري انو العنود تزوجت من زمان وعندها بدل العيل اثنين ......ان شاء الله يطلع طلاقها باطل لانها كانت حامل وغير كذا تعمدت تخفي خبر حملها الين ولدت ......والطلاق وقع في حالة الغضب حتى لو مارجعت لبتالوه الحين ومانبغيها ترجع حاليا بس تقهر لطاموه الي اكيد بيجي بكل قواية عين يخطبها ويبغي يتزوجها وبينصفع اذا عرف انها على ذمة رجال وعندها عيال .........

ظهوره مايبرد القلب الا اذا راكان خبر الكل عن رفض سطام من قبل له وانه غير مرحب فيه بس هو عديم كرامة وحدة رافضته وماتبغيه وهو الا غصب يبغيها .........الا ميشو هالشايب كم عمره ومن وين شاف العنود واصر عليها ووين حرمته عنه جعله المرض الي ياخذه

بس تدري هو الي بياخذ حق العنود من بتالو وهو يشوف الكل يتمنى ظفرها وهو الي اخذها ماقدرها ........طبعا اول صفعة له التوؤم الي مابيقدر ينكرهم وعندها اوراقهم ........ثاني صفعة حقيقة متعب وصلاح وياليت تكون بوجود راكان وهو الي يفجر القنبلة براسه علشان يصغر بعين الكل ........ وبعدين برائتها من اتهامات سمروه وامها والشاهد سارة اختها وهم قادرين يجيبو مناروه الصايعة متى مابغو كأثبات للكل ...واتوقع انو بموت شيخة راح تحضر العزاء والكل بينطم ومابينطق من الفشيلة وبشوف سلطان هل بيكون الاب الثاني لبنات اخوه ويوقف زوجته وولده وبنته عند حدهم ........اذا ماتعاقب الثلاثة ماراح يكون للعقاب طعم لازم كل من غلط يكون حسابه عسير وصارم

واذا عرف بعد انو متعب وصلاح خوالهم وابو عبد العزيز جدهم .......هيبة بتالوه بتتبخر لانو رايح يطعن بشرف حرمته وماصار مثل سند الي جابو له دليل ومع ذلك كان يعرف الحق من الباطل قبل مايحكم


طلال ومراموه

والله هالمراموه سخيفة وتفكيرها مثل وجهها الناس في ايش وهي في ايش مو الي مات على اساس انو خالها جدها وجدتها نفسيتهم تعبانة وهي رايحة تحتفل والبقر الي جايات يساعدوها لا وبرمضان بدل العبادة والتهجد امحق تفكير مايهمها الا الاشياء السخيفة وشكل الاخت بعد حامل والا الدلع والتلميح ماجاء من الفراغ وانا اقول اذا طلال سكت لها ولعنادها هالمرة مو من حقه يزعل لازم يكون حازم وشديد مو يومين عافها وهي بالنفاس جاهم الشايب المهرج يسوي سخافاته غصب تروح تراضيها وهي الغلطانة والمهملة الكل واقف معاها


شرفوووووووووووووه

واخيرا ربي حرق قلبها وعرفنا سرها انها بنت لقيطة بدل ماتحمد ربها انو في مين رباها في بيت محترم رايحة تسحر بنات الناس الي ماقصرو معاها وطمعانة بفلوسهم الحين الفلوس بأيش نفعتها ولدها الي ماعرفت تربيه وهي عارفة بلاويه راضية وساكتة عليه وتبغي تبلش بنات الناس فيه
بناتها تعلمهم على الوقاحة وقلة الادب وماخافت على ضياعهم .......ماتقول لي الفلوس كيف بتغطي سمعة بنتها الي راحت ......اما مها تستاهل وماتعاطفت معاها لانها وقحة وماخافت ربها هذي حوبات العنود يوم تتبلى عليها واعتقد بتوصل هالشي لسمروه اذا ماعرفت من احد ثاني

ميشو انتي قلتي شرفوه بترجع بشر اعظم من الي راح يعني بعد الرصاصة والحريق بتطلع وبتقوم ولا كأنها شي حتى لو مااحترقت كان خنقتيها وريحتينا منها الله يعين العنود وعيالها عليها بس ميشو اذا مانهيتيها الحين لاتطولي بنهايتها فكينا منها بس مين الي بيعيشها اذا زوجها الثور طلقها والبيت مالها صفة تدخله حسابها خلاص ماراح يدخله اي شي جديد وولدها الي كانت مستقوية فيه فطس ومات وخالتها وانحكم عليها بالقصاص الا اذا لها معارف نفسها لسى ماعرفناهم الا ميشو كيف هي بنت حرام وعندها خالة مازال الكثير نجهله عن شريزة


راشد التبن

الحين يورينا كيف بيطلع خليه يعفن ويتربى على كل الخراب الي عاشه وماعقل بعد ماشاب الحين فضيحته بتكبر الا اذا العنود حلت محل ابوها وطبعا بمساعدة متعب وصلاح .......
مع اني ابغيه يعفن بالسجن ومياسة تخر فضايحه كلها وسالفة دلالوه الي شكلها اكثر خيانة اوجعت مياسة وسبب تصرفات رويشد وكرهه لمياسة وعدم تقبله لها مثل غيره الي كان زواجهم بنفس الطريقة


تركيووووووووه

وجع وجع هذا ليش كاره الفارس ويبغي ينتقم منهم ويشوه سمعتهم .........اكيد سر في الماضي والقهر شكله هرب ونفذ هالمرة بعد وماراح نرتاح منه قريب .......ايش الاوراق الي يبغيها من نايف اكيد صفقاته المشبوهة والي تثبت عليه بلاوي واعتقد انو هالاوراق من زمان صارت بأيد متعب والا كيف بيباشر بالخطط في قضيته لو ماكان عنده شي ملموس والله يستر على نايف منه

طارق

طارق من الافضل له انو يشوف غير العنود لانها مو من نصيبه هي الحين عندها عيال وابوهم اكيد بيحفى وبيسوي المستحيل حتى ترضى فيه العنود من جديد وبشروطها .......هذا غير اذا الطلاق ماكان باطل وماتم اصلا ...يعني لايعشم نفسه مع ان رجال يستاهل بس دام العنود من قبل مارضت فيه الحين اسبابها اصعب واكثر .....ربي يرزقه الي احسن منها وتبرد خاطره العنود ماتنفعه وبتشيب راسه بعنادها


العنود

الى متى هالعناد لو ماالحلم كانت شافت اختها وعيالها مقتولين قدام عينها والسبب سخافتها وعنادها الي ماعلمها من الي صار لها الحين هي وحيدة واختها وعيالها محتاجين حماية من اول مافي امان بحياتهم كيف الحين .... من نعمة ربي عليها جاتها هالحلمة وماطنشتها وقامت تلاحقت على عمرها .........مااقول الا الله يهديها وتفكر بغيرها قبل ماتفكر برضا نفسها وغرورها والكرة في ملعبها تنتقم من بتال واهله ببرود اعصاب وهي تفجر المفاجأت فيه وحدة ورى الثانية


في انتظارك لاتطولي علينا

بسم الله الرحمن الرحيم

السلام عليكم ورحمة الله وبركاته

الحمد لله والصلاة والسلام على رسول الله

توكلنا على الله .. لا اله الا الله محمد رسول الله ..




البارت 26 ..


تدري وش اللي يتعب البنت ياخوي...؟!
رجـلٍ يخـون اشواقـهـا و الـمـودة

إللي إذا احتـاج الغـلا صـار نمـرود
وليـا شبـع ممـا عـطـاه إسـتـرده

البنت ريحانة غـلا ... ناعمـة عـود
تبـي لهـا رجـلٍ ورث طيـب جــده

رجلٍ فعولـة كلهـا جـود فـي جـود
مـا يلتفـت للـي كفوفـه تمـده ...!!

رجـلٍ إذا جـتـه الليـالـي بمنـقـود
يتكـى لهـا مـا بيـح الوقـت سـده

مهوب خبلٍ مـا رعـى للهوى عهـود
وادنـاة مـا عـارض طريقـه يــرده

ولاهوب لاعلـة ...ولاهـوب ملهـود
ولا شكـوك ...و كـلٍ طـارئٍ يحـده

ما اشين من الرجـال لا جـاك ببـرود
وإن قال له تـرف القـدم شـي صـده

البنت تبـي بـراق طيـبٍ لـه رعـود
إن اجدبـت يمطـر علـى ريـف خـده

وإن نادته تكفـى لقـت عنـده الفـود
يشيـل عزتهـا علـى قــو زنــده

كفه نفل ... وانفاس صدره لهـا عـود
وظلالـه الضـافـي بيـدهـا تـمـده

البنت خد ... وقـد ...ونواظـرٍ سـود
وريحة غلاً ... ياسعد مـن شـم نـده

البنـت إذا ضحكـت ثمرهـا لـك ورود
يا خوي مـن يقطـف نواويـر وردة

واللي يهين البنت ناقـص ...ومقـرود
فرس غـلا ... ماهـي حمـارة مكده





فجر .. عيد الفطر ..

واقف قبال المراية .. لبس الثوب الابيض الجديد والكبك الاسود .. رفع عينه حتى تسقط على النائمة بوسط السرير ..
ابتسم بعشق .. مفكره انها لـ نامت بوسط السرير مايقدر ينام جنبها .. طول اشهر حملها اللي فاتت ..
وهو ينام على كنبة وسعه اشتراها بعد حملها وزيادة عصبيتها .. ما اشترها الا بعد ما نبهته جدته ..
بان حملها هو اللي مخليها حاره وعصبية .. ارخاء الحبل لها شوي .. بس بالاكل والمواعيد والادوية يشد عليها ..
التفت لها وتقدم بهدوء .. زادت ابتسامته وهو يشوف بطنها البارز بوضوح .. اخيرا خف الوحام .. وخفت عصبيته ..
عضا شفته السفليه .. وجلس قريب من السرير وبهدوء قرب منها رفع خصلات شعرها وقبلها بعمق على عنقها ..
الا ان علمت .. رفع نفسه بخفه .. كان راح تفلت منه ضحكه .. بس مسكها .. تخيل شكلها لو شافت العلامه ..
اكيد راح تصرخ وتسب .. رجع لتسريحة .. واخذ محفظته والمفاتيح وجواله .. لبس شماغة الجديد وطلع ..



ـــــــــــــ



واقفه قبال تسريحتها .. بغرفتها القديمه .. سمعت طرقات على الباب ..
....... وبهدوء / تفضل ..
........... بابتسامه / المفروض تكونين عند زوجك هذا اول عيد ..
....... ابتسمت بضيق / مو مهم ..
تقدم منها وباهتمام / تبيني اكلمه ..
...... هزت راسها بالرفض / الحين لا .. لمن اشوف اني ما اقدر اتحمل راح اطلب مساعدتك ..
..... وبضيق / اذا شفت الوضع زاد عن حدة .. راح اتدخل قبل لا تطلبين ..
........ بضيق / تكفى غيث لا تزود همي و تخرب اللي امشي عليه .. ترا اللي فيني مكفيني ..
غيث ضمها وقبل جبينها / تدرين اني مالي صديق بهالدنيا غيرك .. انتي كل شي بنسبة لي .. انت الاخت والصديقة ..
هيفاء ابتسمت / وريما ..
غيث ابعدها شوي وابتسم / ريما العشق .. " وباهتمام " كيف كتفك ..
هيفاء براحه / الحمدلله .. راح الزراق واختفاء الاثر .. والوجع خف .. بس لمن احمل شي او احركه يوجعني شوي ..
غيث يقرص راس انفها .. وبمزاح / يالله جهزي بسرعة علشان نلحق على صلاة العيد قبل الزحمة ..
هيفاء ابتسمت / طيب تبيني اعايدك الحين والا بعد الصلاة ..
غيث يقبل خدها بقوة .. / الحين وبعد الصلاة كذا والا كذا بتروحين معي ..
هيفاء بزعل / اااي عورتني .. وامي اكيد بتروح مع حبيبها عزام ..
غيث بغيرة / الله الله .. ابو رهف ورفيف و هذا محمد ما جاء باعتنا اجل لجاء ايش بتسوي فينا ..
هيفاء / ههههههههه شد حيلك وجيب محمد انت واخذ المحبه ..
غيث وهو يطلع من الغرفة / مو الحين بعد سنتين .. الحين ما ابي .. خليني اتمتع مو اتعنى مثل طلال ..
هيفاء / ههههههههههههههههههههه " خرج غيث وقفل الباب " ..
التفتت للمراية وتلاشت ابتسامتها .. بالقوة تركها رعد تنام هالليلة عند امها .. وبالف عذر وعذر قبل ..
تعبانه نفسيتها .. مشت بطريق لفت النظر .. وبعدها بعدم تركها لوحده دايم معاه رسايل سوالف ضحك مزوح ..
كانه غيث اخوها .. تحضر له الاكل .. ترتب اوراقه .. تجهز ملابسة .. كانه امير .. ما تخليه ثانية لحالة ..
ملت كل الاماكن .. غيرت ترتيب الجناح .. عطوراته .. اكسسواراته .. كل شي خلت لها لمسة واثر فيه ..
لحضت انه بدا يرتاح لها .. بس تنتظر يخبرها بالسر اللي اكتشفته وهي ترتب له الوراقة ..




ـــــــــــــ



واقف عند باب شقته ..
...... / اسمع انا رايح مع جدي وجدتي لصلاة يعني ماني براجع .. لمن اعطيك رنة ترجعين للبيت ..
اما مريم ارميها على امك امي أي احد .. فهمتي ..
مرام / ههههههههههههههههه .. ما اوعدك .. لان يمكن ما يستقبلونها ..
طلال بعصبية / مراااام لا تـ " وووووووووووووووااااااااااااااااااااااااااااااااااااااااااااا اااااا " ..
مرام تتركه وتتوجه لبنتها / ههههههههههههههههههههههههههه ما اوعددددددددداااااااااااك ههههههههههههه ..
طلال عضة على شفته ونزل .. تعود على ان ياخذ تغير اوامره بوساعة صدر .. ما عاد يقدر يفارقهم ..
اذا ما سمع صوت بكى بنته ولا عصت مرام امره يحس بان ناقصة شي .. حبها .. لالا اكثر .. عشقها ..




ــــــــــ




قاعده على الكنبة بصالة .. شافت ابوها نازل مع الدرج .. بجفاء / السلام عليكم ..
جات بتوقف .. اشر لها تجلس .. وبهمس متعب / وعليكم السلام ..
بتال ينزل بسرعة وراء ابوه .. وخطف يد ابوه وقبلها / تكفى يبه الا زعلك ..
ابو بتال يسحب يده / ابعد عن وجهي ..
بتال ركع وقبل رجل ابوه / والله يبه ساعة غضب .. وندمت عليها .. دخيلك يبه .. اذبحني ولا تجفاني ..
ابو بتال بضعف .. يحب بتال اكثر من باقي عياله / قوم قوم .. قوم الله يهديك ..
بتال يوقف ويقبل راس ابوه وكتفه / جعل عمرك طويل ولا يحرمنا منك ..
ابو بتال يتنهد / ويخليك لي .. بعد صلاة العيد تجي وتسلم على جدك وتطلب السموحه منه ..
وتطلبها من راكان قبل يروح الرياض .. ولو تروح معه وترجع العنود يكون زين ..
ام بتال من على الدرج بعصبية / لا .. انا مصدقت انه يفتك منها تبيه يرجعها .. لا والف لا ..
ابو بتال بعصبية / انقلعي يا حرمة والا والله لسوي سوات ولدك ببنت اخوي " وترك المكان وهو يستغفر بصوت عالي ".
بتال بضيق / الا يمه تخربين عليه ..
ام بتال بعصبية / وعساك بترجعها وتبيني اسكت .. لا .. غير خزامى ما تتزوج فهمت ..
بتال بضيق / وانا قلت اني ابي ارجعها .. يمه يمه دخيلك .. خليني في حالي .. والله تعبت يمه تعبت ..
" وهو ينفض بثوبه يعبر عن ضيقه .. صعد الدرج بسرعة .. وسعود وسامر ووليد نازلين وكاشخين " ..
سعود يقبل راس امه / عيدك مبارك يمه " وسامر كذالك ووليد " ..
سعود تقدم من سمر الي وجها باين عليه الضيق .. من لمن انتشر خبر طلاق بتال والعنود ..
وراكان ما كلامها ولا جاها .. زعلان منها .. خايفه انه يطلقها مثل ما بتال طلق العنود .. هالفكرة قالتها غرام لها ..
سعود / سمر .. ايش فيك ..
سمر بتعب / لا ما فيني شي.. بس تعبانه شوي ..
سعود / الله يقومك بالسلامه ..
سمر / امين .. " نزل بتال وهو كاشخ بالشماغ وطلع ولحقوة اخوانه " ..



ـــــــــ



بالرياض ..

الدفاع المدني حولين البيت .. اطفى الحريق ..

العسكري / سيدي .. وجدنا جثة محترقة داخل البيت ..
الضابط / انقلوها لطب الشرعي .. بلغتوا اصحاب البيت ..
العسكري / الا الان لا .. بس لقين واحد من الجيران واعطانا الرقم لقريب لهم ..
الضابط / يعطيكم العافية ..




في المستشفى ..
الدكتور / وقت الوفاة .. 5:00 صباحا ..
بلغوا ادارة المستشفى تبلغ اهل المريضة ..



ــــــــــــ




بالخبر ..


بيت ابو سطام ..
عناد جهز سيارته قربها من القصر ..
ابو سطام وراكان وزياد وطلال ورعد وابو بتال وسعود وسامر وسيف وابو طلال ووليد وريان واقفين عند الباب ..
بتوجهون للمسجد وبيصلون الفجر وصلاة العيد .. بتال كان بسيارته .. شغله علشان يطلعون معاه ابوه وجده ..
الكل التفت باستغراب على السيارة الغريبه اللي دخلت للفلة ..
طارق وقف سيارته قريب من مدخل القصر ..
ابو سطام استغرب السيارة .. نزل طارق .. وفتحت العنود بابها ونزلت بهدوء وسلطان في يدها ..
العنود بشموخ / لنا مكان تحت جناحك يا ابو سطام ..
ابو سطام تقدم وبخوف / من .. العنود ..
راكان بسرعة نزل وبخوف تقدم منها وضمها .. العنود دفعته عنها وبضيق / وينك .. وين رحت ..
راكان بغصة / سالفه طويلة .. كنت جاي لكم الرياض .. بس انتم سبقتوني ..
العنود بغموض / انزل سارة والصغار ونمشي .. خلك جاهز ..
راكان التفت على سارة اللي نزلت بخوف وهي تبكي .. ضمها راكان وهي ما قصرت انفجرت بكي ..
ابو سطام نزل الدرج وسلم على طارق وشكره وسلموا باقي اللي واقفين .. وابتعد طارق عنهم بعد ما سمع رنين جواله ..
العنود تقدمت من جدها لمن شافته نازل الدرج .. ابو سطام / يا هلا ويا مرحبا بريحة الغالي ..
العنود قبلت راسها ويده بصمت .. / ................
طارق بنبرة غريبه .. / راكان .. ممكن شوي ..
العنود التفتت عليه وبقلبها نغزه .. وبنبرة موجوعه / راكان لترجع الرياض بدون .. لترجع ..
راكان يطالعها وهز راسه .. وتقدم من طارق .. العنود اخذت ساره اللي حملت الظبي .. ودخلت على جدتها ومياسه ..




داخل البيت ..

العنود تركت سلطان على الكنبه .. وبسرعة قبلت راس جدتها وعمتها مياسه ...
وباستعجال لعمتها مياسه / العيال عندك امانه .. " وطلعت بسرعة مسل ما دخلت " ..
ساره بحضن جدتها تبكي .. وجدتها تبكي .. وتترحم على سطام ..
وتمسح على راس ساره وتقرا عليه من الايات اللي حافظتهم ..


طارق مو عارف ايش يقول .. متعب اتصل عليه ورماها بوجه ..
طارق بارتباك / فيه حريقة شعلت في بيتكم .. والشرطة طالبتكم .. " وسكت ما قدر يقول ان امك توفت " ..
راكان عقد حواجبه / وايش اللي اشعلها ..
طارق بيخلص / يمكن التماس كهربائي ..
راكان / جزاك الله خير يا ابو عبدالعزيز .. ما قصرت ..
طارق بغصة / هذا واجب .. ووو ... وعظم الله اجرك ..
راكان وضع يده على كتف طارق / جزاك الله خير ..
طارق / انا استئذن .. اخرتك عن الصلاة واخرت الاهل ..
راكان / اذنك معاك .. وسامحنا على القصور ..
طارق / ابد حنا اهل .. مع السلامه " وتركه وركب سيارته وحرك بسرعة " ..




العنود طلعت وبخوف .. توجهت لراكان وما كان احد موجود .. مسكت كتف راكان / ايش قالك طارق ..
راكان يهديها / ما قال شي .. " سمع صوت الامام يسلم .. معلن انتهاء الصلاة " .. اصلي الفجر .. ونمشي ..
العنود هزت راسها ورجعت دخلت البيت .. على طول على المغاسل .. توضأت وطلعت لمجلس الداخلي وصلت ..



راكان صلى ومعاه زياد وعناد .. وتوجهوا لسيارة .. عناد يسوق وزياد بجنبه ..
وراكان والعنود بالخلف .. راكان خلف عناد .. والعنود خلف زياد .. وتوجهوا لـ الرياض ...



ــــــــــ




بسيارة طارق ..
طارق بتذكر / يوووووووووه .. من العجله نسيت شنطة العنود ..
ام طارق / انت الله يهداك .. ما ادري ايش اللي خبطك وخلاك تستعجل ..
طارق بتوتر / يمه .. ااااا .. ام راكان ..
ام طارق بخوف / ايش بلاها ..
طارق / قولي لا اله الا الله يمه ..
ام طارق / لا اله الا الله .. لا اله الا الله ..
طارق / قالي متعب ان المستشفى اتصلت على صلاح .. وقالت له ان ام راكان توفت ..
البندري شهقت وحطت يدها على فمها وبكت بصمت / ............
ام طارق بعبرة .. والدمع سال / لا حول ولا قوة الا بالله .. ان لله وان اليه راجعون .. وانت بلغت راكان ..
طارق يهز راسه / والله ما قويت يمه .. انتي شفي الرجال وشلون شكله .. والله لو شفته بالشارع ما عرفته ..
ام طارق تبكي / الله يعينهم ويصبرهم .. يا قلبي هالبنيه ايش بتشل وايش بتخلي .. اجل يوم اخذته ايش قلت له ..
طارق تنهد بضيق / اشتعل نار في بيتهم .. والجيران بلغوا الدفاع المدني .. وبلغوني .. وانا قلت له ..
ام طارق بضيق ازداد / لا حول ولا قوة الا بالله .. يعني الحين محد يدري من عند وفاة ام راكان من الفارس ..
طارق يهز راسه / لا محد يدري ..
ام طارق تحط كفها على يد ابنها .. وبرجاء / لا يا وليدي لزم يدرون من بيوقف جنب راكان لعرف بالخبر ..
دخيلك .. ارجع وخلنا نعلم عمامه يروحون معاه ..
طارق خفف السرعة .. ولف بسيارته / في هذي صدقتي يمه ..
وقت دخول طارق .. كان وقتها عناد خرج من الحي ..
طارق شاف سند و فهد وخالد بسيارة متوجهين للمسجد الكبير لصلاة العيد ..
اشر بانوار السيارة وهدا الا ان وقف .. نزل من السيارة .. ونزل سند .. سند ابتسم مفكر انه نازل يعايده ..
طارق وجه واضح عليه الضيق .. شكك سند بان فيه مصيبه .. سند / هلا ابو عبدالعزيز ..
طارق / هلا بك .. " وبعد السلام والسؤال عن الحال " ..
طارق بارتباك وضيق / والله ماني عارف ايش اقول ..
سند بخوف وهو عاقد حواجبة / قول يا رجال والله ان عندك علم ماهو بزين .. فيكم شي .. تبي الفزعة ..
طارق بضيق / حنا الحمد لله بخير .. بس " وضع يده على جبينه .. ومسح وجه بضيق " ام راكان تطلبكم السماح ..
رماها كذا .. مو عارف كيف يقولها .. صعبه .. صعبه حيل ..
سند اسود وجه .. تنهد بضيق / لا حول ولا قوة الا بالله .. " التفت لمدخل المجمع " .. راكان اذكر انه بيمشي ..
قاطعة طارق / هو مشى .. انا ما قلت له عن خبر امه .. بس قلت له عن حرق البيت ..
سند بضيق زاد واهتمام / بيت من خالي سطام والا راكان ..
طارق يهز راسه بضيق / لا والله سطام .. " تنهد " .. انا معي اغراض بنات سطام نسيت انزلهم ..
وقلت مره وحدة اعلمك علشان ما يكون راكان لحاله هناك ويصير شي شين .. وهو شكله تعبان ..
سند بضيق / الا والله تعبان وبلحيل بعد ... الله يعينه ويعين اخوانه وهالضعيفات ..
" وبستعجال " .. ما قصرت يابو عبدالعزيز .. جعلنا ما نسمع فيكم سوء .. مع السلامة ..
طارق / واجبنا .. فمان الله .. " ركب سند السيارة وطارق ركب سيارته " ..




ــــــــــــ




بسيارة سند ..
قبل صعود سند ..
خالد / ولد عبدالعزيز وجه يقول ان به علم شين ..
فهد يراقب من المرآه الجانبية / لا تتشائم يا رجل .. تفاؤل خير ..
خالد بضيق / مير تاخرنا عن الصلاة .. الله يهديه سند ابطى علينا ..
فهد / هذا هو جاء ..
" صعد سند .. واقفل الباب بضيق .. حرك سيارته على طول دون ان يلف الى اليمين طريق المصلى " ..
خالد " ابو عناد " الجالس بالخلف .. باستغراب / سند ايش بلاك .. مضيع الدرب ..
سند بضيق وهو يرفع جواله يبي يتصل على طلال والا بتال / انتظر يا عم شوي ..
" رجع يطالع على جواله .. وثواني ورجع على اذنه " .. ابو سند بحزم / سند علمنا بالعلم اللي جابه ولد المنصور ..
سند بضيق / والله العلم ما يسر يبه .. " ورجع يكتب في الجوال لحظة ويراقب الخط لحظة " ..
خالد عصب / انت ما تعلمن ايش فيك ..
سند بعد ما خلص كتابة الرساله .. وارسلها على خاله عبدالعزيز ورعد .. وبتال وطلال ..
سند بضيق / اذكروا الله يا جماعه ..
خالد وفهد / لا اله الا الله ..
سند بضيق / ولد المنصور .. بلغني بان ام راكان تطلبكم الحل .. توفت الفجر ..
فهد وخالد / لا حولا ولا قوة الا بالله .. ان لله وان اليه راجعون ..
فهد ينفض يديه بضيق / والله يا عيال سطام كان احد داعي عليهم .. ما يخرجون من عله الا يطيحون باللي اعل منها ..
خالد / لا حول ولا قوة لا بالله .. وانا عمك .. كلم عناد وقله يتهون بسواقه ويخفف منها ..
كود نلحقه قبل لا ياصل العلم لهم وهم بالحالهم .. هذي امهم .. وجيعتها اكبر ..
وابوهم توه متوفي ما نشف ترابه .. ان لله وان اليه راجعون .. ان لله وان اليه راجعون ..
سند بضيق / ايه والله صدقت .. " رفع جواله وارسل لعناد .. عناد خفف السرعة وحاول تباطى ..
انا وراك .. جد علم جديد .. ولزم نروح سوا لا تنبهم ان فيه شي .. وتحجج باي شي .. "
ابو سند اتصل على العنود " ام سند " / الو .. السلام عليكم .. انتي وينك .. في بيت امك .. مارحتوا المصلى ..
لا والله ما رحنا .. جانا علم شين .. روحي مكان بعيد واعلم .. " اقل من دقيقة " .. قولي لا اله الا الله ..
ام راكان تطلبكم السماح .. خلكم خحول بناتها .. " وبحزم " .. اذكري الله يا حرمه .. اسمعي العلم زين ..
خلك حول بناتها لا يصلهم العلم .. ونشوف بعدين ايش يصير .. ما ادري .. ما ادري .. المهم انتبهوا لبنيات سطام ..
خالد بضيق .." بعد ما انهاء المكالمه فهد " .. / هو صحيح ان بنات سطام جابهم ولد المنصور ..
فهد بهم / الا والله .. وجزاه الله خير .. طول الفترة كان يرعاهم .. ويوم جاء لأهله ما خلاهم لحالهم وجابه لأهلهم ..
خالد تنهد بضيق / لا حول ولا قوة الا بالله .. ان لله وان اليه راجعون ..



ـــــــــ




سيارة عناد ..
لبس نظاراته الشمسية .. متحجج بشروق الشمس .. خفف السرعة قليلا ..
العنود تبحث عن شنطة اليد وتذكرت بانها نسيتها بسيارة طارق .. وقعدت تلوم نفسها وتفرك يدينها بتوتر ..
راكان يميل للعنود .. وهو يشوف توترها .. وبهمس / العنود .. امي ايشلونها .. قالوا لي انها متنومه بالمستشفى ..
العنود التفتت عليه وبضيق / ايه تعبانه حيل يا راكان حيل ..
"صدت عنه وبداخلها .. " الله العالم تلحق عليها والا ما تلحق " ..
راكان همس لها / زعلانه مني ..
العنود التفتت عليه من جديد وبضيق / هذا مو وقت العتب .. خلانا ناصل الرياض ونتطمن على امي ..
وبعدها نفتح باب العتب والمشاريه .. " التفتت لـ المام " خلنا نصل بالاول على خير ..
راكان استغرب السرعة الخفيفه .. التفت لعناد / عناد ليش خففت السرعة ..
عناد لمح المحطة قريبه وبارتباك غير واضح / ابي المحطة ..
العنود قلبها قرصها .. من لمن سمعت صوت الرساله .. بعدها اختلفت تصرفات عناد .. ارتبك وتوتر ..
نزل عناد .. ودخل البقاله .. وخرج من الباب الخلفي ووقف برا .. رفع جواله واتصل على سند ..




ــــــــــــ



بيت ابو سطام ..

البنات حول ساره والعيال الصغار ..
نوال شايله الظبي واهرتها بوس / ووووووواااي ما شاء الله عليها تجججنننننننننننن ..
ساره تبتسم / ...............
ابرار برجاء / نوااال عندك بنت اخوك خذيها اتركي لي ها القمر ..
نوال / وووووااااع من اخذ .. اترك هالقمر واخذ ها العفنه .. وووووووواااااااااع ..
مرام فتحت عيونها للاخير / الحين بنتي عفنه .. واللي قبل ساعة تتفداها وعيون عمه وروح عميمه .. وووين ..
نوال / قبل لا اشوف هالقمر .. لكن الحين لا هذي حبيبتي .. وهذي روحي .. وهذي عيوني ..
رنا / الا ساره من عياله هذول ..
ساره بارتباك وتوتر .. وبعد ثواني تفكير / عيال نايف ..
الكل صدمه / ................
ريهام بهدوء تخفي وراه صدمته / نايف من ؟
ساره تبلع ريقها .. / نايف اخوي .. وبداخلها " يا ربي يا نايف خليتني اكذب .. بس هو قال علشان محد ياذيهم " ..
البنات يطالعون بعض ويتهامسون .. ريهام اخذت سلطان وراحت لامها .. نوال اخذت الظبي وراحت وراها ..
لحقتها ابرار .. اماني وروان ورنا جلسوا مع ساره يسولفون معاها .. وساره شوي شوي التهت عن العيال ..




ــــــــــــ




في المسجد .. مصلى العيد ..


ابو سطام وسلطان يستقبلون المهنئين .. ويتبادلون التهاني .. سلطان بجنبه بتال كل ما حاول يتكلم جاء احد وقطع عليه ..
عبدالعزيز وطلال وسيف طلعوا بسيارتهم ومشيوا بسرعة اول ما خلصت الصلاة والخطبة ..
بتال رن جواله الا بـ امه تتصل عليه .. وهذي ثامن مره .. فتح المكالمه ..
بتال / هلا يـ.... " فتح عينه للاخر وهو يسمع امه تصارخ وتبكي وتستعجله للحضور " ..
انهاء المكالمه والتفت لرعد اللي يحاول يكلم ابوه .. وابوه ابد يسولف مع الكبار ويتبادل التهاني بالعيد ..
بتال بتوتر / انا رايح البيت الظاهر سمر بتولد .. انت بلغ ابوي وجدي ..
رعد اشر له براسه .. سعود لحق بتال وسامر بعد ..
صقر وبدر وياسر وفارس مشيوا مع بعض وراء خالهم عبد العزيز ..
رعد ضاق حيل .. واول ما شاف واحد من الشياب بعد مسك كتف ابوه ..
وبضيق / يبه .. اسمعني .. حنا لازم نمشي لـ الرياض وبسرعة ..
ابو سطام التفت عليه وباهتمام / ايش بلك .. صار شي ..
سلطان انتبه وقرب .. رعد يطلع مفتاح سيارته / امشوا واقول لكم بالسيارة تعالوا ..
مشي ابو سطام وسلطان وراه .. وطبعا كل بعد اشوي يصادفه احد .. ويسلم ويهني بالعيد ..
وما وصلوا الا بعد وقت طويل .. ابو سطام اول ما فتح الباب وجلس وقبل لا يقفل الباب .. / ايش العلم يا ولد ..
سلطان قاعد خلف ابوه / العيال وين .. كلهم اختفوا فجاه .. ايش صار ..
رعد بضيق / اذكروا الله .. يا جماعه الخير ..
ابو سطام وسلطان / لا اله الا الله .. " وكمل ابو سطام " .. محمد رسول الله ..
رعد تنهد بضيق وهو يحرك سيارته / ام راكان .. تطلبكم السماح .. توفت الفجر ..
ابو سطام وسلطان بضيق / لا حول ولا قوة الا بالله .. ان لله وان اليه راجعون ..
ابو سطام بغصة وعيونه تنذر بنزول الدمع / العيال دروا ..
رعد / عيالها .. لا والله العالم انهم ما دروا .. والحين سند لحق عناد .. وعبدالعزيز مشا من اول والعيال وراه ..
ابو سطام صد عنهم .. يمسح دميعاته .. سلطان بضيق / كلمتوا عناد وقلت وله يتباطى ..
رعد / ايه بلغه سند وقاله ..
حس سلطان ان جواله يهتز رفعه واذا بتال .. فتح الخط / الو .. " وباهتمام " .. ايه .. اها طمني انا رايح الرياض ..
ايوه .. خلك معاهم .. وكمني اول ما تولد .. الله يسهل عليها .. فمان الكريم ..
سلطان / هذا بتال يقول اخذ سمر للمستشفى .. بتالد .. لا اله الا الله احد يموت من على هالدنيا وحد يولد لها من جديد ..
ابو سطام بغصة / الله يقومها بسلامة .. وجعلها مدخال للفرح على هالعييل الضعوف ..
رعد و سلطان / امين




ــــــــــــ



وصل سند قريب من المحطة اللي واقف عندها عناد .. اتصل عليه وقال له يطلع ويمشي وما كان احد وراه ..
ركب عناد ومعاه كمية كبيرة من علب الماي .. وحمد ربه وشكره بان سند وصل بسرعة .. حرك بسرعة ..
راكان يطالع بعلب الماي / عناد ويش ذا الماي كثرت الله يهديك ..
عناد ابتسم بتوتر / لا ابد بس قلت ما ادري ايش يصير بالطريق فاخذت زيادة ..
راكان هز راسة .. وراح يفكر بـ امه وخواته .. وايش راح يسوي ..




بعد وقت ..

في المستشفى ..
دخل راكان وشاف صلاح ومتعب وابو عبدالعزيز وطارق ياللي نزل اخته وبسرعة رجع الرياض ..
وامه وجدته ام عبدالعزيز معاه .. وكانهم عارفين بان العنود راح تكون وحيده ..
العنود مسكت يد اخوها وضغطت عليها بقوة وهي تمشي وعيونها على اللي قبالها .. وبغصة / امي امي وينهي ..
تركت يد اخوها ودخلت لقيم العناية .. بس تفاجات بان مكان امها رجال ثاني ..
الممرضة بعمليه / بليز مدام ... بليز .. " تطلعها من القسم .. والعنود جسم بلا روح دفعتها بكل سهولا لخارج العناية "..
ام عبد العزيز وام طارق مسكوا العنود وجلسوها ..
ام عبد العزيز بضيق / يا بنتي اذكري الله .. وانتي عارفه حالها .. ادعي لها بارحمه .. " وهي تمسح على ظهرها " ..
ام طارق / قولي ان لا الله وان اليه راجعون .. " وتذكر فضل الصبر و تقرا ايات وتنفث عليها " ..
العنود بصمت / .............................


دخل سند وفهد وخالد وبعدهم بنص ساعة دخل عبدالعزيز والشباب وبعد ساعة الا ربع دخل ابو سطام ..


بغرفة الدكتور وبعمليه / الوالده من لمن وصلت واحنا متوقعين وفاتها .. وقلت لـ الاهل ..
" رفع له اوراق " .. عظم الله اجرك .. وهذي اوراق استلام جثمانها ..
راكان مو مستوعب / انت تستهبل .. ايش تقول ..
سند / راكان اذكر الله ..
راكان بعصبية يوقف وهو يرمي شماغه على طاولة الدكتور .. / الف من ذكره .. انت ما نت سامع ايش يقول ..
" وهو ياشر على الدكتور .. الدكتور انسحب بهدوء وطلع برا المكتب " ..
سند / ان الله مع الصابرين ياراكان .. قول ان لله وان اليه راجعون ..
راكان ضاق فيه النفس عيونه صارت حمرا فتح اول ازارير ثوبه .. وبصدمه / لا .. لا ..
ما ماتت .. ما تموت .. " انفجر بكي " .. آآآآآآآآآآآآآآآآآآآآآآآه يمه " جلسه سند على الكرسي وهو يقرا عليه "..
زياد كان خارج المكتب ومتلطم بشماغه ويبكي .. حس بخوف اكبر .. وضياع اكثر ..
دخل ابو سطام وسلطان على راكان .. وذكروه بالله وحاولوا يهدونه .. لكن هو ابد ..
طلب رعد من الدكتور ابره مهدائه .. يمكن يهدا فيها ..
راكان يون ويتأوه / اااااااااااااااه يامه ااااااااااااااااااااااااااامممممممممممم اااااااااااااااااااااااااااااااه ..
" تذكر العنود يوم ابو سطام طراها يبي يروح لها " ..
فز واقف الكل وراح يجري لها ..


صلاح ومتعب كانوا عند العنود .. بالجناح اللي حاجزته من لمن طاح ابوها وامها ..
كانت جالسه على الكنب وفاتحه وجهها والطرحه ملفوفه على وجهها وعبايتها طايحه على كتوفها ..
و ام طارق وام عبدالعزيز مو بعيد عنها .. جالسين على كنبه قريب منها ..
صلاح قبل راس العنود / عظم الله اجرك ..
متعب بضيق يجلس عند قدميها / العنود ما تبين تقولين شي ..
العنود / .................
صلاح بضيق يجلس قريب من متعب / العنود وانا خالك .. اذكري ربك وترحمي عليها ..
العنود غمضت عيونها اللي تحسهم نار مشتعله .. لهي قادره تذرف دمع تريحها .. لكن هي تصرخ بداخلها وتبكي ..
صلاح حط يده على فخذها / العنود حبيبتي .. لتخلينا خايفين عليك وقلقانين .. وحنا بعيد عنك ..
العنود فتحت عيونها الحمراء تبكي بلا دموع وبنظره كانها تقول وين بتروحون وتخلوني ..
صلاح بضيق / ابوي سعد بالشمال .. اتصلت وبلغت مسعود عن وفات امك ..
وقال ان ابوي سعد تعبانه وهو بالعناية جاته جلطه بلقلب وحنا لزم نكون حوله وحول خلود وخديجه ..
العنود هزت راسها .. وكانها تقول روحوا .. / ............
متعب بضيق / اذا ما تبينا نروح ما نروح ..
صلاح لمتعب / العنود مو بالحالها .. حولها اخوانها وعمامها .. " وقف وقبل راسها " .. عظم الله اجرك ..
متعب وقف وقبل راسها / عظم الله اجرك واشوفك قريب ان شاء الله واذا احتجتي شي اتصلي واكون عندك على طول ..
طلع متعب وصلاح .. وخرجوا من المستشفى متوجهين لـ ابو نايف ..



دخل راكان وشاف العنود حاطه يدها على راسها ومغمضه عيونها .. تقدم وجلس عند رجولها ..
ام طارق وام عبدالعزيز دخلوا داخل الجناحه بالغرفة اللي فيها السرير والعنود بالصاله ..
العنود فتحت عيونها ومن شافت راكان ضمته راكان صار يشهق وهو حاضنها ..
العنود قوة من ضمها له .. وهمس باذنه بغصه / راكان تكفى اكرمها .. اكرمها .. شد حيلك واكرمها ..
لا تخلي البراد يوجعها .. قوم خلنا نكرمها .." ابتعد راكان عنها وهو يمسح دموعها هز راسه ووقف " ..
دخل زياد وقفت العنود وضمته وهو يشهق ويبكي .. زياد علىى العقدة اللي فيه الا انه حنين زياده ..
دقايق طلع راكان وهو غاسل وجه وعيونه حمر .. اول ما خرج من الجناح شاف الكل متلطم و عيونهم عليه ..
سند مد يدها بشماغ راكان .. راكان اخذها وتلطم وتوجه لـ الادارة يكمل اجرأت شهادة الوفاة واستلام الجثة ..




ـــــــــــ




انتشر خبر الوفاة ..

العنود و معاهم مغسله للموتى .. غسلوا جسد ام راكان ..
المغسله تشرح للعنود والعنود تغسل امها وتدعي لها بالرحمه ..
العنود كانت تغسلها وهي تبكي بلا صوت .. بس صدرها يطلع وينزل وعيونها حمرا ..
المغسلة كثير شافت من قصص وحكايا .. رفعت نظرها للعنود وتفاجأت بقطرة دم تسيل على خدها ..
العنود تطالع امها .. الي رجع جسمها لشكله الطبيعي وكانها نايمه .. وجها الجميل المبتسم ..
العنود بغصة وهمس خافت .. وكانها تتمنا ان الاطباء والاجهز تكذب .. نادت / يمه ..
المغسلة نزلت دموعها وهي تردد / استغفر الله العظيم .. لا اله الا الله .. ان لله وان اليه راجعون ..
لا حول ولا قوة الا بالله .. اذكر الله يا بنتي واستغفري ..




يمه علامك ردي الصوت تكفين
......................ردي علي الصوت لا تذبحيني
اصرخ وانادي واتبع الصوت صوتين
......................يمه ويمه لين باح الكنيني
قالواعلامك لاتخلي المصلين
.....................بوسط الجنايز مايجوز الونيني
امك خذوها من رجوه المصلين
......................شف دارها مابين رمل وطيني
خذاني الهاجس وانا بين نارين
.......................قبل آصله مابين شك ويقيني
استغفر الله ليه ياحظي الشين
......................حتى المنيه ماتبيها تجيني
يمه حياتي ارهنه بين كفين
......................كفينك اللي عطفها محتويني
يمه حياتي لو تساوي ملايين
.......................فدوه ..وفدوه مابقى من سنيني
يمه وداعك زود الهم همين
.......................هم يروح وهم بعده يجيني
يمه وداعك زود الهم همين
......................هم يروح وهم بعده يجيني





بعد تغسيل ام راكان ولفها بالكفن الابيض .. وتوديعها وبعد انتهاء الصلاة .. كان وقت الصلاة العصر ..
نزل راكان لقبر .. وهو متلطم .. مو قادر يكتم صياحه .. نزل جثمان والدته .. بمساعدة زياد ..
كان جثمان ام راكان خفيف .. نزلها بهدوء راكان والدمع على خده يسيل .. وبعد ما وضع الطوب ..
وبدا تنزيل التراب ... كل ما نزل تراب اكثر كل ما زادت شهقاته اكثر ..
بعد ما انتهى راكان من الدفن .. جلس يمسح على قبرها ويبعد الحصى الكبير عن قبرها وهو يصيح صياح يوجع القلب ..






خايف عليها من الثرى غطاها
والآ الحصى حافيه أخاف أذاهاا ,,

أكرم عليها بالكفن يامطوع
بالبيت ظل فراشها وغطاهاا ,,

أكرم عليها بالكفن هذي أمي
وأشهد عليها فماعطت يمناهاا ,,

هذي الضحى والليل يتحروونه
هذي السماء ونجومها تنعاهاا ,,

هذي السوالف مثلنا تبكيها
والأرض تنشد عن آثر لخطاهاا ,,

هذي الكبيره كبر هذي الدنيا
هذي العظيمه جل من سواهاا ,,

أبكي عليها مو نهار وليله
ولآسنه تمشي وأعد قضاهاا ,,

أبكي عليها كثر ماشالتني
وكثر الحنين اللي اختلط بغناهاا ,,

وكثر الأسامي وكثر من سموها
وكثر النجوم ,, وكثر من يرعاهاا

أبكي عليها من القهر يادنيا
من لي أنا ,, من لي عقب فرقاهاا ,,

من فتحت عيني " ولآخلتني "
شوفوا ~ ولدها ~ بالقبر خلآهاا ,,

هل التراب بوجهها ماقصر
شفتوا ولدها كيف هو جازاهاا ,,

لو انها مكاني " ماسوتها "
لكن " أعز اعيالها " سواهااا ,,

يالدود شفها " ذابله "جنبها
أنا ولدها ,,وحاضر,,وأفداهاا ,,

قطعني هاك اللي تبي من جسمي
بس " الكريمه " لآتجي بحداهاا ,,

وأوصيك" أمانه ",, قلها تعذرني
وتكفى تروح تحبلي ماطاهاا ,,

أبيها تغفرلي مثل مااكانت
كل خمره مني بطيبها ترفاهاا ,,

يالله عساها بالنعيم الخالد
وعسى في جنة عدن سكناهاا ,,

ياافضو هذا الكون ياهو خااالي
ياضيق هذي الدنيا يامقساااااهاا ,,

يامر طعم فراااقها يامره
ماني مصدق أرجع وملقاهاا ,,

وشلون أجي غرفتها وماهي فيها
وش عذري لسبحتها ,, ومصلآهااا ,,

ش' قول أنا لدولآبها ,, وشنطتها
واذا سألني مشطها ,, وحناهااا ,,

وعباتها ,,ومآي زمزم ,,ومصحفها
والمبخره ,, ورشوشها ,, ودواهاا ,,

الكل في غرفتها متفقدها
حتى الجدار مفطر ويرجاهاا ,,

الكل يبكيها ماهو ناسيها
يالله صبرني وشلون أنساهاا ,,

ياليتها ماراحت وخلتني
( أو وسعت لي بالقبر وياهاا ),,




نزل عناد عليه وبالغصه ودموعه تنزل / اذكر الله يا راكان .. اذكر الله ..
راكان بوجع / يا ما اوجعتها ببعادي وجفاء .. ليت انا بالقبر ولا هي ..
ليتني انا ولا هي .. ليتني موجعتها .. ليتني قبلت رجلينها وطلبت منها السماح قبل روحتها ..
او جعتها واوجعت ابوي .. وراحوا قبل لا ارضيهم ولا ابرهم ..
" ضرب على صدرة بقوة " ليتني انا اللي مت ولا هي ..
عناد ضمه بقوة وهو يبكي من بكى صديقه .. سند ابعد عناد عن راكان .. وسحب راكان و وقفه ..
سند بحزم / راكان .. اذكر الله .. كذا راح تعذب امك .. ترحم عليها .. ترحم عليها ..
راكان بضعف / الله يرحمها .. الله يرحمها ويغفر لها .. " ومشى بتعب الى السيارة الي فيها العنود " ..
طلع راكان وزياد في سيارة سند والعنود كانت تنتظرهم فيها .. صلت معاهم على امها ..
وام طارق وام عبد العزيز معاها ما خلوها .. وطلبوا منها تنتظرهم في بيت ابو طارق لكن العنود رفضت رفض قاطع ..
راكان جلس بجنب العنود وضمها .. والعنود صمت اللي صار وهي تغسل امها محد درا عنه ..
تفرقوا الجموع اللي جات تشاركهم بالصلاة والدفن .. تحركت سيارة الفارس وتوجهوا لشرقيه ..
وصلاح ومتعب اللي حضروا الدفن والصلاة رجعوا لـ ابوهم سعد " ابو نايف " ..




ـــــــــــ



الخبر ..

الكل متجهز يستقبل المعزيين ..
ساره للحين ما تعرف عن الموضوع ..
سمر ولدت وجابت بنت .. والخبر افرح ساره .. ومتشوقه تشوف راكان وتبلغه ..


في المطبخ ..
ام سند / والله ما ادري ..
ام عناد / البنت تقول انهم عيال نايف .. طيب وين امهم ..
ام سند / يمكن من هالديرة اللي سافر لها ..
ام عناد ترفع حواجبها ومو عاجبها الكلام / استغفر الله العظيم .. هالولد انا ما اعرفه زين ولا ابي اظلمه ..
ام سند بضيق / الله يهديهم بس .. يوم امسكوه هينا وهو طايش يرسلونه لبرا علشان يزيد ..
ام عناد بضيق / لا حول ولا قوة الا بالله .. استغفر الله العظيم ..
ام سند / وهذا هو جايب له ولدين وراميهم على خواته وراجع .. لا حضر عزاء ابوه ولا امه ..
يالله يارب الذرية الصالحه .. ياربي لا تحطني بموقف مثل كذا ..
ام عناد بضيق / يا العنود لا تظلمين الولد .. وحنا مانا عارفين شي .. البنات خذوا العلم منها يمكن غلاطانات ..
ام سند / لا والله ماهم غلاطانات انا رحت وسالت البنت وقالت انهم عيال نايف ..
ام عناد / استغفر الله العظيم .. لا حول ولا قوة الا بالله ..
ام صقر تدخل عليهم .. والجوال بيدها / ادفنوا الحرمة الله يرحمها .. وهذا هم جايين بالطريق ..
ام سند وام عناد / الله يرحمها ..
ام عناد / من تقول لساره ان امها توفت ..
ام سند / انا ما اقدر ..
مياسة هزت راسها بارفض وعيونها اغرقت دمع ..
ام عناد / ما لها الا مريم .. انا ما اقدر اقول .. " وطلعت من المطبخ وتوجهت لمريم وقالت لها تبلغ ساره " ..
وفعلن مريم وام عزام وام سطام توجهوا لساره وخبروها الوضع .. وساره بكت بكي يوجع القلب ..





ـــــــــ



في الطريق
في سيارة سند ..
هدوء بس صوت القران من الاذعه يمل هالسكون ..
راكان ضام العنود من عند كتوفها .. وبهمس / ليه ما بكيتي ..
العنود /...............
راكان ابعدها شوي .. وبخوف / العنود .. هزها العنود ..
العنود راسها يطن طنين قوي ونفسها كل ماله يزيد .. ما تحس ياللي حولها ولا تسمع ..
راكان صرخ / العنود .. " وهو يهزها بخوف " ..
" سند اشر للي وراه بالانارة ووقف على الجنب ..وكان وقتها غربة الشمس والدنيا اظلمت " ..
العنود شهقت بقوة من فمها اول ما نزل الدم من انفها .. وحست باللي حولها ..
راكان فتح الباب ونزل وبسرعة راح جهت بابها وفتح الباب ونزلها بجانب الطريق وسحب البرقع عن وجها ..
العنود شهقت بقوة وكان النفس انقطع عنها تمام .. وصارت تشهق وتهتز بقوة وكانها ورقه خريف يهزة ريح قوية ..
راكان برعب يضمها ويصرخ بها / العنود .. العنود ردي عليها ..
العنود انفها ينزف وتهتز وتشهق بقوة .. وراكان مفجوع من اللي صار فيها وزياد واقف عندهم مو قادر يسوي شي ..
رعد اللي كان خلف سند .. وقف وراهم وزود الاناره .. نزل بسرعه وراح يجري للعنود ..
رعد يصرخ بسند / جيب المويه .. المويه بسرعه ..
سند اعطى علبه الماي لـ سلطان اللي نزل وراء رعد وتوجه بسرعة لهم ..
رعد غسل وجه العنود واعطاها كف خلى العنود تفوق وتشهق .. رمت نفسها بحضن راكان وصارت تون ..
العنود تون / ااامممم اااااااااااااه اامم اااااااااااااا ..
راكان يضمها بخوف ويبكي ويسم عليها ..
رعد ابعدها عن حضنه .. ولف وجها على وجها / العنود العنود اذكر الله .. قولي لا اله الا الله ..
العنود بتعب / لا .. الـــه .. الا .. الله ..
ابو سطام بعد ما وصل عندهم وبخوف / العنود .. وانا ابوك " وهو يمسح على راسها وينحني " .. بسم الله عليك ..
رعد يطمن ابوه / الحمد لله يبه بخير بخير .. الحمد لله ..
العنود اخذت غطاها ورجعتها على وجهها .. وبتعب / بخير .. يبه ..
رعد طلب من سند ياخذ سيارته .. وهو راح يطلع مكان سند ..
العنود رجعت مكانها بتعب .. راكان رجع مكانه وزياد كذالك .. راكان سحب العنود وخلاها تنام بحضنه ..
سحب الغطاء عن وجهها .. وصار يمسح عليها و يقراء عليها من الآيات ويسمي ..
اما سند اللي كان يراقب العنود بكل تصرفاتها .. والحادثة الأخيرة .. رسمت مشوار غير عن اللي كان مرسوم في باله ..




ـــــــــــ




في المستشفى ..

عند سمر ...

الجوهرة تقبل جبين بنتها .. وبحنان / الحمد لله على سلامتك يمه ..
بتال بابتسامه وهو يقرب لسمر / الحـــمــد لله على السلآآآآمه .. ومبروك ما جاكم ..
سعود يبتسم / الحمد لله على السلامه يا قلبي ..
سامر يبتسم / الف الف الف الحمدلله على سلامتك .. " وبشقاوة " .. البنت نسخه مني تهبببل ما شاء الله ..
سمر تدور بعيونه بالغرفة .. والدمع محجر فيها .. وبغصة / ........
الجوهرة طالعت بتال / .............
بتال بهدوء / الكل يسلم عليك .. ويتحمدوا لك بسلامه ..
سمر والدموع تسيل على خدها / وين ابوي .. وين راكان ..
الجوهرة بهدوء / يمه مشغولين الحين .. اول ما ارح يفضون يرجعون ..
سمر تبكي / ايش اشغلهم .. ايش يشغل اب عن بنته .. والا راكاااان .. اهئئئئئئ ...
بتال يقرب ويجلس جنبها .. وبهدوء / سمر .. اهدئي واسمعيني زين ..
سمر حست انه فيه شي كبير .. سكتت ومسحت دموعها وهي تهز راسها / .......
بتال بهدوء / خالتك ام راكان توفت الفجر ..
سمر شهقت بقوة .. الجوهرة عضت على شفاتها ما كانت تبي سمر تدري وهي توها والد ..
بتال بحزم / هصصصص .. ادعي لها بالرحمة ..وراكان الحين ابد لا تشرهين عليه .. لا خلص العزاء راح يجيك ..
واصلا للحين ما درا انك ولدتي .. " قبل جبينها .. ووقف " .. انا رايح اذا بغيتوا شي اتصلوا علينا .. سلام ..
الجوهرة بضيق / مع السلامه .. " سعود وسامر قبلوا جبين سمر .. وطلعوا من المستشفى .." ..
الجوهرة مسحت على شعر بنتها .. وهي تقرا عليها آيات قرانيه .. وسمر تبكي ودموعها تنزل بسكات .. الا ان نامت ..



ـــــــــــــ


وصلوا الخبر ..

طول الطريق ورعد عين على الطريق وعين على العنود اللي مايله على حضن راكان ومغمضه عيونها بس مو نايمه ..
وكانها كبرت ضعف عمرها .. تغيرت عليه حيل من اخر مرة شافها فيها .. السواد اسفل عيونها ..
وجهها الاصفر ... هزل وجهها .. كان وجهها فاتح .. راكان رفض انها تتغطى .. سيارة سند مضلله .. والطريق مظلم ..
فماله داعي تتغطى .. اول ما حست بانهم قربوا يوصلون والسيارة راح توقف .. عدلت نفسها ولبست غطاها ..


وقفت السيارة امام بيت الجد سعود " ابو سطام " ..

نزل زياد وفتح الباب لاخته .. نزلت بهدوء وتعب .. راكان نزل وقفل الباب ومسك يد العنود ..
اول ما دخلوا استقبلتهم ام سطام والعمات يعزون ..
ساره اول ما عرفت بوصولهم خرجت بسرعة من الغرفة اللي كانت فيها مع الصغار ..
ورمت نفسها بحضن العنود اللي كانت واقفه وتسلم على زوجات عمها والبنات ..


العنود بتعب .. وهي تمسح على راس ساره بحنان والغطاء بيدها والعباية طايحه على كتفها / حبيبتي خلاص ..
ساره تبكي وتشهق / ............
الحريم والبنات دخلوا غرفة ثانية .. دخل راكان وزياد ورعد وسلطان وابو سطام وعبدالعزيز ..
راكان سحب ساره من حضن العنود وضمها بقوة وهو يهمس باذنها / خلاص حبيبتي .. ادعي لها بالرحمة ..
وبداء يذكرها بالله ويقرا عليها الى ان هديت .. سحبها وجلس جنب العنود وساره بنص ..
ابو سطام على يسارها وعلى يسار ابو سطام سلطان وعبدالعزيز ورعد ..
وعلى يمينها ساره وراكان وزياد وام سطام والعنود والهنوف و مياسه ..
العنود حضنت ساره وهمست باذنها / وين الصغار ..؟
ساره بهمس ولزال اثار البكي موجود / عند خاله مريم ..
العنود هزت راسها و قبلت جبينها بحنان وضمتها على صدرها ..
ابو سطام بحنان وهو يمسح على ظهر العنود / ايشلونك الحين وانا ابوك ؟
العنود وهي تطالع بالرخام / بخير .. الحمد لله ..
رعد / الحين محمد يجيب العشاء " السواق " ..
ابو سطام وقف / وانا ابوك قم شوف المعزين ..
راكان وقف وقبل راس العنود وساره .. وبحنان / اشوفك بعد العشاء ..
العنود هزت راسها بنعم / .............
طلع الجميع .. ورجعوا الحريم والبنات حولين العنود وساره معادا رنيم اللي كانت بالحمام تكرمون ..
العنود تحس بالصداع بيفجر راسها ...
مريم بحنان / حبيبتي العنود .. تعالي الغرفه وريحي ..
العنود ما صدقت احد يقول لها كذا وقفت بسكات ووقفت معاها ساره .. وبتعب / عن اذنكم ..
الكل / اذنك معاك ..
مريم اشرت للام سطام ترتاح وراحت معاهم .. اول ما دخلت العنود للغرفه سحبت شيلتها وفسخت عبايتها ..
رمتهم على جنب وجلست بتعب على الكنبه .. انتبهت لدخول مريم وعدلت نفسها ..
مريم " ام طلال " .. ابتسمت بحنان / خذي راحتك حبيبتي .. بس لا تنامين قبل العشاء ..
العنود التفتت على ساره الي جالسه جنبها واسفل عيونها حمرا من البكي .. بتعب / انا ما ابي عشاء .. بس ساره تـ..
ساره قاطعتها وهي ترمي بنفسها في حضن العنود .. وبصوت خانقته العبرة / ولا انا ...
العنود تنهدت بتعب / لا بتتعشين ..
مريم بحزم / كلكم بتتعشون ..
العنود هزت راسها .. وبهمس متعب / طيب .. " سحبت ربطة شعرها وحررتها " ..
مريم بهمس وهي خارجه / ما شاء الله تبارك الله ..
قابلتها رنيم و بطنها البارز داخله على العنود .. مريم بحنان / الله يفرجها لك .. ويسهلها عليك .. لا تطولين حبيبتي ..
" وهي تاشر لها على جناح العنود " .. رنيم هزت راسها / بس ابس اسلم واعزي واطلع ..
مريم هزت راسها وطلعت .. رنيم طقت الباب طقتي وفتحته وهي مبتسمه / سلام ..
العنود بتعب وهي تلف لها بعد ما كانت تطالع عيالها قباله نايمين بالغرفة الداخليه على السرير / وعليكم السلام ..
وقفت العنود بتعب وسلمت على رنيم بالخد .. رنيم بضيق / عظم الله اجرك واحسن عزاك ..
العنود بضيق تنهدت / اجرنا واجرك .. جزاك الله خير ..
رنيم بحنان / اخليك ترتاحين الحين .. عن اذنك ..
العنود / شكرا .. اذنك معاك ..
طلعت رنيم والعنود توجهت لعيالها .. وتمددت جنبهم وقعدت تطالعهم بحنان وتفكر وتهوجس الى ان غفت ..
ساره تمددت على الكنبه اللي كانوا قعدين عليها في الصالة قبال باب الغرفة شافت العنود نامت غمضت عيونها ونامت ..


بعد ربع ساعه ..
دخلت مريم عليهم ووجعها قلبها وهي تشوف اثر الحزن على وجههم والتعب .. غطت ساره وغطت الصغار ..



ـــــــــــــ



عدت ايام العزاء ثقيله ..

تعدت الثلاث ايام ..

شخصيات كبيرة حضرت العزاء ..

تعزي راكان بوفاة ابوة و وفاة امه ..

متعب وصلاح وقفوا بعزا اختهم مع ابوهم سعد بالشمال ..

ابو عبدالعزيز وقف مع راكان ..

طول ايام العزاء راكان ما زار سمر .. عرف بولدتها اول يوم في العزاء قال له سلطان ..
اما بتال فقابله راكان بجمود ورسميه .. عكس باقي اولاد عمه ..



بعد اسبوع من وفاة ام راكان ..

بعد العصر ..
عيال سطام اجتمعوا بالغرفة ..
راكان يجلس بجنب العنود / كيف الحال ..
العنود بعد صمت لثواني وهي تصب لراكان وزياد شاهي / .. زي ما انت شايف ؟
راكان فهم مغزاها / .............
العنود بنبرة مقصوده وهي ترجع الترمس على الطاولة / ما اتصلت على نايف ..
راكان يمسح وجهها بتعب / اتصل ما يرد .. حتى ما جد اخذت رقمة من طارق .. دقيت عليه ما يرد ..
العنود بخوف / ليكون صار عليهم شي .. الاوضاع ما تطمن بالخارج ..
راكان بتطمين / لالا .. طارق يقول ماجد كلمه قبل اسبوع وقال انهم ريحين لرحله ..
وراح يطولون وما يعتقد انهم راح يقدر يتواصلون معاهم ..
العنود سكتت .. نفس التبرير اللي قاله لها صلاح .. بان نايف برحله .. هي مو غبيه .. راكان وضح عليه انه مو مهتم ..
العنود بحزم / راكان .. تعتقد ان لو شخص سمع خبر وفاة والده بيطنش ويكمل رحلته .. انا حاسه انه فيه شي ..
راكان بضيق / امماااا نايف فتوقعي منه كل شي .. من بعد سواته الشينه غسلت يدي منه ..
العنود بحدة / راكااااااان .. نايف انا اعرفه اكثر منكم .. " وبنبرة مقصودة " .. اذا انت اخطيت فهو اخطاء ..
راكان التفت عليها بحده وهو عاقد حواجبه .. / ايش تقصدين ؟
العنود صدت بعيونها عنه / اسال عن اخوك ..
" التفتت عليه وبقهر " .. وبطل برود وانانيه يا اخي وحس بالمسؤولية شوي .. ترا الوضع اختلف .. مو مثل قبل ..
راكان ضاق صدره من كلامها كان بيرد بس قاطعه طق الباب و دخول رعد .. رعد بارتباك / سلام ..
الكل / وعليكم السلام ..
رعد ياشر على راكان / تعال ابيك شوي ..
العنود عقدت حواجبها وبنظرات استغراب .. راكان وقف وتوجه له وباهتمام وهو يقفل الباب وراه / خير ..
رعد بتوتر / فيه عسكري برا .. جايب بلاغ .. يبون حضور العنود للمخفر ضروري ..
راكان بذهول / ............










انتهى ..

لا اله الا الله محمد رسول الله ..

سبحان الله .. والحمد لله .. والله اكبر ..

اتمنى يعجبكم ..

واعذروني عن القصور .. والاخطاء الاملائية ..

والله الله بالردود الزينه .. برغم اني عارفة ان البارت ثقيل وكئيب .. ولا هو طويل بعد .. بس هذا اللي قدرت عليه الحين ..


كونوا بخير ...


اختكم ... مشاعل السعودية ..