راح انزل بارت الان ..

وغدا البارت الثاني ..

لااا تعتذرين أختي مشاعل حوسة النت دايم تصير

بس لا تطولين عليناااا

بتااال والعنود. حالهم. تحزن كثير وياخوفي ان بتااال يسمع كلام أمة ويتزوج. قبل لا يعرف بحمل العنود !!!!!!!
رنيم ماتستااااهلين سند ابد. هو الي بيض وجهك عند اهلك. تحملك. دلك. وهذااا جزااه.

نااااكرة. المعروف متهورة. يارا اصبر سند عليك بس

ننتظرك مشااااااعل بكل الحب

نتظرك يالغلا لا تطولين بليز

بسم الله الرحمن الرحيم

السلام عليكم ورحمة الله وبركاته

الحمد لله والصلاة والسلام على رسول الله

توكلنا على الله .. لا اله الا الله محمد رسول الله ..




البارت 22 ..




الليل هم وحزمة جروح وأوراق
وأنا أتناثر ب آخر الليل وأبقى

ما غير أولع كل تناهيد الأشواق
واللي بقى من الشوق دمعات حرقى

ما أقول ضاق الصدر لكن إذا ضاق
تنكسر ضلوعي على الروح وأشقى

وحدي وعيوني تمتلي وجيه وفراق
كان البكا فرقى ورى دموع فرقى

يا طيب! تاخذني على الناس بعناق
والحين أنا وياك والحزن نبقى

معقول ما مروا على بحر الأحداق
ولا شافوا دموعي من الشوق غرقى!

هذا انا من الليل واقف ومشتاق
وهذي كفوفي من الوله دوم عرقى

من ليل وإشراق الى ليل وإشراق
وارجع..أعيد حكاية الليل وأرقى

وأرقى انتظر بالليل نجمي إذا فاق
وأصاحبه حتى السما تصير زرقا

وأبقى وحيد ولا معي غير الأوراق
اكتب جروحي وسط الأوراق وأبقى


" سالم سيار " ..




بعد صلاة العصر ..

ريما وغيث بالسيارة ..
غيث من اول ما طلع من البيت ومعاه ريما وهو يحكي لها قصص من بعض القضايا و كان يقولها بطريقة تسحر ..
طول الطريق ريما فاتحه فمها ومندمجة اخر اندماج ولا حاسة باللي حولها جالسة تطالع بغيث وحركاته وتعابير وجهه ..
غيث بابتسامة / ريمي .. ما راح اوحشك ..
ريما بدلع / الا ..
غيث / ما راح تشتاقين لي لا غبت ..
ريما بدلع / الا .. " التفتت للأمام "
غيث التفت لها وبابتسامه / كيف يهون عليك اروح وتبقين لوحــ.....
قطع عليه صرخت ريما / غييييييييييييييييييييييييييييييييييييييييييييييث ..
غيث انفجر ضحك / ههههههههههههههههههههههههههههههههههههههه ..
ريما بعبرة / غيييييث .. رجعني لـ الخبر ..
غيث يتنحنح / احم احم خلاص .. مشينا نص المسافة باقي ساعة ونص ونوصل باذن الله ..
هههه " يتنحنح " احم احم لي ساعتين وربع وانا بس اهرج .. صوتي انبح ..
ريما زعلانه وصادة عنه / ...........................
غيث بشاعرية / لك حق تزعل ثم لك حق نرضيك
ما اقوى زعل حبيب قلبي وعيني
ما دام قلبي يا اريش العين مغليك
اطلب ولك روحي وما في يديــني
لا تـنـشـغل مالك وزينٍ يــضـاهــيك
ابـيــك أنا لـو كان غـــــيرك يبيني
يوم الله احسن صورتك خصني فيك
فـيك الجـمال وصــادق الــود فيني
شعري يزين بوصف زينك وطاريك
والأرض مــن مـمشـاك فيها تزيني
اول غــناتي صوت الأشـواق يدعيك
واخـر غـناتي شـق صدري حنيني

ريما ابتسمت وبغنج / ليه تخدعني ..
غيث يبتسم / لاني .. احبتس .. " يعرف ان هالكلمه تضحكها وتخجلها " ..
ريما بخجل / ههههههههههههه طيب راح اسامحك بس بشرط ..
غيث بعشق / امري ..
ريما / ما تخلي مكان بالرياض ما توديني فيه ..
غيث بابتسامه / بس .. غالي والطلب رخيص .. على هالخشم .. كم ريوم عندي انا ..
ريما / طيب يالله قول قصة ثانية ..
غيث بتعب / لا خلاص حلقي يوجعني من كثر الثرثرة ..
ريما / ههههههه علشان مرة ثانية ما تخدعني ..
غيث يبتسم .. مد يده ومسك يدها رفعها لشفايفه وباسها / ومرة ثانية لقلت تروحين معي تروحين ربي لا يحرمني منك ..
ريما بحب / ولا منك حياتي ..



ـــــــــــ


بيت ابو سطام ..

شقة رعد ..

توه واصل من الشركة .. تعبان وحاس بان حيله مهدود .. وده يحط راسه وينام ..
رعد فتح الباب وشاف هيفاء جالسه قبال التلفزيون .. بارهاق / السلام عليكم ..
هيفاء كتمت صوت التلفزيون .. وقفت وتقدمت منه .. كانت لبسه بنطلون اسود لاهو ضيق ولا وسيع ..
وبلوزة متموجة ابيض واسود .. / وعليكم السلام ..
اخذت شنطة الاب توب وشماغة .. وبهدوء / يعطيك العافية ..
رعد يرمي جسمة على الكنبة / الله يعافيك " وضع يده على راسة " هيفاء جيبي لي بنادول راسي بينفجر من الصداع ..
هيفاء بسرعة راحت جابت له كاس ماء وحبة بنادول / تفضل " مدت له الكاسة والحبة " ..
رعد اخذهم وبلع الحبة بسرعة وشرب شوي من الماء ... تاوه بتعب وهو ينسدح على الكنبه / آآآآه
هيفاء جلست على الارض جنب الكنب .. وضعت يدينها على راس رعد وبدات تعمل مساج ..
رعد فتح عيونه وطالعها .. هيفاء ابتسمت ../ غيث لمن تكون عنده قضية صعبة ويروح للمحكمة ويرجع يكون مصدع ..
فاسوي له مساج او تدليك .. انا ما اعرف بس يعني يهدي شوي .. غمض عيونك واسترخي حتى ترتاح ..
رعد ابتسم وغمض عيونه .. دقائق بسيطة وانتظم انفاسه .. معلنه نومه .. هيفاء بهدوء قبلت جبينه ووقفت ..
جابت فرشة خفيفة وغطته .. انتبهت انه من التعب الجزمة والجوارب ما نزلهم .. توجهت لها ونزلتهم بهدوء ..
هيفاء بحنان / يا عمري شكلة مره تعبان .. " توجهت للمطبخ وطلعت مكونات الكيك ..
تعرف ان رعد يحب كيكة البرتقال مع الشوكولاتة .. وبدات تعمل الكيك .. " ..


ـــــــــــــــــ


يوم جديد ..


بالمستشفى ..

العنود تمشي على الرخم وهي حافية القدمين ..
الجوري / العنود كذا راح تتعبين نفسك ..
العنود / لالا .. ما راح اتعب بالعكس راح ارتاح ..
الجوري / طيب ايش تحسين .. قولي لـ الدكتورة .. يمكن تعطيك علاج ..
العنود تهز راسها / ما عندها شي ..
مشيرة تدخل / سلام .. " وباستغراب للعنود " .. ايش فيك ..
الجوري والعنود / وعليكم السلام ..
متعب وراء مشيرة / سلام ..
العنود والجوري / وعليكم السلام ..
العنود / ما فيني شي .. " تتوجه لسرير وتجلس " .. بس حرارة برجولي قلت ابردها ..
متعب بنظرات غريبة للعنود / .....................
الجوري / لها نص ساعة تمشي .. الدكتورة تقول لا تمشين وهي تمشي .. وتعاند تحب الشقى ..
متعب يتقدم من العنود وبهمس / ايش اللي مزعلك ..
العنود بختناق تهز راسها بلا / ................
مشيرة انتبهت لأسفل السرير .. وبخوف / العنود تنزفين ..
العنود التفتت لمشيرة وشافت نظراتها موجهه للاسفل .. طالعت تحت وشافت الدم ..
متعب ضرب الجرس ومشيرة طلعت تنادي على الممرضات ..
بسرعة دخلت الدكتورة والممرضات .. طلع متعب والجوري ومشيرة برا الغرفة ..
الدكتورة / بسرعة غرفة الولادة ..
العنود بألم وخوف / راح اولد ..
الدكتورة / ان شاء الله .. " ما سمحت للعنود تسال اكثر اخذوها الممرضات بسرعة لغرفة الولادة " ..
متعب يوقف الدكتورة / وين تودونها ..
الدكتورة / لغرفة الولادة .. راح اولدها قبل لا يتطور الوضع ونفقد السيطرة على الحالة ..
مشيرة تبكي / يا ربي سترك .. يا ربي تقومها بالسلامه ..
متعب توجه لقسم العمليات ووقف عند الباب .. الا ان يصله خبر يطممنه ..



ـــــــــــ



بيت ابو سند ..

ام سند واقفه عند باب شقة رنيم / يا رنيم .. اجهز عمك ينتظرنا تحت ..
رنيم باستغراب / ليه وين بنروح ..
ام سند / سند كلم ابوه وقال انه يبيه يا خذك تسوين فحوصات ..
رنيم بعصبية / ما ابي اسوي فحوصات ما فيني شي ..
دخلت رنيم ودخلت وراها ام سند .. رنيم تجلس على الكنب بالصالة ..
ام سند تجلس جنبها / يا ماما يا حبيبتي .. وجهك اصفر وواضح التعب ..
رنيم تصد / انتم تعرفوني اكثر من نفسي .. اقول لكم ماني تعباااااااانه خلاص عاد ..
ام سند / انتي مو تعبانه بس حامل .. وخايفين ان يكون عندك فقر دم والا شي ثاني ..
رنيم توقف وبحدة / من قال اني حامل .. " ضربت بيديها بقوة على بطنها " .. مااااااااااااني حامل ..
ام سند تمسك يدينها / بنت مجنونه انتي ..
رنيم بعصبية / ايه مجنونه .. مجنونه من يوم ما تزوجتك ولدك .. اكرههههههاااااا اكرههاا وما ابيه ولا ابي ولده ..
وبدات تضرب بطنها بقوة وبشكل جنوني .. ام سند عصبت وكانت راح تتركها وتنزل تحت ..
بس تراجعت اول ما شافت رنيم تطيح على الارض فاقدة للوعي ..



ـــــــــــــ



بالرياض ..

عناد يرمي الملف على سند / هذا الملف جاب لي الصداع ..
سند / المبالغ كبيرة .. بس قدرنا نسدد نصها ..
زياد بتعب / الله يجازي ابو غازي بالخير .. قال انه ما راح يطالبنا بشي اللين يرجع راكان ونسدد كل ديوننا ..
عناد / اية والله .. الا ليش يسوي كذا ..
زياد / كان من زمان صديق خالي نايف .. هو ومتعب كانوا بعض الاحيان ينامون بالأيام عندنا بالملحق ..
عناد بنبرة مقصودة / اهاااااااااااااااا
سند بداخله " الله لو يسمع كلامك بتال ينتحر " ..قطع مجلسهم صوت رنة جواله ..
غيث / اقول زياد .. فيه ممتلكات لكم غير هالبيت ..
زياد / ايه فيه استراحة راكان والفلة اللي ساكن فيه هو وزوجته وفية قطعة ارض ومبلغ بحساب ابوي كبير ..
بس ما اقدر اتصرف فيها لان التوكيل مع راكان ..
سند اللي كان واقف ند الشباك يتكلم تلفون .. قفل وبغموض / انا رايح لـ الخبر ..
عناد وغيث وزياد باستغراب / عسى ما شر ..
سند بغموض ياخذ شماغة والمحفظة ومفتاح سيارته / لا ما فيه شي .. بس المدام تعبت ونوموها بالمستشفى لازم اروح ..
غيث يوقف / اجل انا اروح للمدام تلقيها مسوية مناحة ..
سند وهو مقفي / لا مو مسويه مناحة .. اختها حامل عقبالها .. سلام .. " وخرج " ..
عناد / ايش بلاه .. ليكون مو فرحان هو الثاني مثل طلال ..
غيث / يمكن ..
زياد بغصة / يمكن لو راكان كان موجود وسمع ان سمر حامل سوا عرس ..
عناد نزل راسة / ..........................
غيث تنهد / الله يردة بالسلامة .. ويفرحة بضناه ..
زياد وعناد / امين ..



ــــــــــــ


بشقة بتال .. اللي اخذها غيث .. تكلم بالجوال ابرار ونوال اللي جالسين بالاستراحة وحاطينه على السبيكر ..
ريما واقفه بغرفة العنود / اقولك غرفتين نوم ..
نوال / طيب ايش الغريب فيها ..
ابرار / عادي الموضوع ..
ريما تخصرت / لا طبعا مو عادي .. ايشلون متزوجين وكل واحد بغرفة ..
ابرار / وانتي ايش دراك ..
نوال / صح ايش دراك ..
ريما / لان فيه غرفة نوم نمت انا وغيث فيها كانت فيها شوية ملابس واغراض لبتال بس ..
وما فيها أي ريحة انثوية .. اما الغرفة اللي الحين انا فيها كلها ملابس و اغراض انثوية .. والريحة ..
وااااااااااي ياريحة تهبل .. وبعد فيه شي غريب اكد لي بان الوضع فيه شي ..
نوال / اول شي .. بتال تارك الرياض من شهور يعني اكيد زوجته ما تروح لشقة ومحد فيها .. ايش لون الريحة فيها ..
ابرار / صح .. وبعد ايش الشي الغريب اللي شفتيه ..
ريما / الشنطة ..
نوال وابرار / أي شنطة ..
ريما / مو يوم قرارُ يزوجونها مو طلبت جدتي من خالتي الهنوف تشتري جهاز للعنود ..
نوال وابرار / ايه ..
ريما / هذي هي قدامي مثل ما اهي بترتيبها وهداياها ما تحركة قطعة وحدة ..
ابرار ونوال / .................
ريما ابتسم / هاااا ايش رايكم الوضع مشكوك فيه والا لا ..
ابرار / الا مشكوك فيه
نوال / لا عادي .. ناسية ان ست الحسن مغرورة يمكن ما عجبها ذوقنا ..
ريما تهز راسها وكانهم قبالها / ابدا .. حدسي انا ريما زوجة المحامي الشاطر يقول ان الموضوع ختتتيييير ..
نوال بابتسامه / خفي علينا يا مدام كونان ..
ريما تلتفت للخلف تبي تطلع / من كونـ ... " وبحرج " .. بعدين اكلمكم باااي ..
غيث بابتسامة يتقدم لها / مدام المحامي الشاطر ايش تسوي هينا ..
ريما تسحب غيث / طفشانه وقلت اتسلى شوي .. " وبفرحة " .. الا ما دريت ..
غيث / رنيم حامل .. ادري ..
ريما / من قالك ..
غيث / سند .. يالله البسي اجهزي عازمك على طلعة برا ..
ريما / خلصت شغلك ..
غيث / لا رميت كل شي على عناد وجيت لك .. الا ريما لية ما تبين تزورين بيت خالك ..
ريما بضيق / لان بناته مغرورات وغريبات وما يحبونا فا ابي ابتعد احسن ..
غيث / على راحتك .. يالله بسرعة اجهزي لا نتاخر عن مشوارنا ..




ــــــــــــــــ




بالمستشفى ..

العنود تهمهم وتهذي بكلام مو مفهوم .. متعب يركز بكل كلمه تقولها ويحاول يفهم شي .. بس ابد ما فهم ..
تسال عن نايف عن راكان عن سارة ومنار عن امها حتى جدتها وجدهها وخالها نايف جابت الماضي والحاضر ..
حتى بتال طرت بس بهمهمه مافم شي منها متعب ..
مشيرة / متعب ايش قالت لك الدكتورة ..
متعب / تقول باعد ساعة تفوق وهذي هي لها ساعة وربع ولا فاقت ..
ام عبدالعزيز / يا ولدي روح نادي الدكتورة تجي تشوفها ..
متعب ضرب الجرس .. / الحين اخلي الممرضة تناديها ..
ابوعبدالعزيز / والعيال كيف حالهم ..
متعب / بخير الحمد لله بس صغار يبه كبر الكف ..
ام عبدالعزيز / توهم سته شهور ..
مشيرة / لا يمه .. هي كانت توها داخله السابع من يومين ..
ام عبدالعزيز / الله يحفظهم لها هم كلهم عيال ..
متعب / ولد وبنت .. " ابتسم " .. ما تدري العنود انهم توم ..
مشيرة تهز كتوفها / والعنود تعلم احد .. يمكن تدري بس ساكته ..
ابو عبدالعزيز / هذا الصحيح ويش له تعلم .. الله يقومها بالسلامة ويحميها .. ويحفظ لها عيالها ..
الممرضة تدخل / نئئم ..
متعب بحدة / بدري .. وين الدكتورة خليها تجي بسرعة .. المريضة للحين ما فاقت ..
الممرضة كشرت / دكتورة فيه عمليه .. شوي فيه يجي ..
متعب يوقف .. وبحده / روحي نادي رئيس الاطباء بسرعة ..
الممرضة رطنت وبربرت بضيق وراحت ..
العنود فتحت عينها .. حولت تتكلم ما قدرت .. متعب بيجلس الا انتبه لها ..
متعب بحان / الحمد لله على السلامة ..
العنود يبي تتكلم / .. مـ ... مــو....
متعب / ريحي نفسك ولا تتعبين نفسك ..
العنود غمضت عيونها بقوة وفتحتها .. وبنظرة تعني افهم .. / مـوي... " مدت لسانه تبي ترطب شفاتها " ..
مشيرة / تبين موية ..
العنود اشرت باصابعها لمشيرة .. تقدمت مشيرة واعطتها شوي ماي ..
ام عبدالعزيز / لا تكثرين منه لا يتعبها ..
ابو عبدالعزيز بابتسامه حنونه / الحمدلله على سلامتك يا بنتي .. ومبارك ما جبتي ..
العنود بتعب وصوت هامس / الله يسلمك ..
دخلت الدكتورة / السلام عليكم ..
الكل / وعليكم السلام ..
الدكتورة تقدمة من العنود / كيفك يا عنود ..
العنود بتعب وصوت هامس / طيبه .. كيف البيبي ..
الدكتورة / الولد والا البنت ..
العنود فتحت عيونها / ..................
الدكتورة / اللي كان متعبك هو البنت ضاغطة على الخصر وما كانت واضحه بالسونار ..
لان المشيمة والولد مغطين عليها .. الحمد لله على سلامتك .. وسلامة اطفالك ..
العنود / ممكن اشوفهم ..
الدكتورة / ارتاحي الحين .. وبعد ما تقدري توقفي وتتزنين راح اخليك تشوفينهم .. بس من وراء الزجاج ..
العنود بخوف / ليه ..
الدكتورة / لانهم صغار وراح يبقون بالحضانه شهر ..
ام عبدالعزيز / ما تقدر ترضعهم ..
الدكتورة / الا تقدر .. راح تجيك الممرضة وراح تسحب من صدرك حليب وتحطة برضاعة .. وترضعهم اياه ..
العنود / الحمد لله على كل حال ..
متعب / ما قصرتي دكتورة .. " الدكتورة هزت راسه و طلعت "
ام عبدالعزيز / الا العنود وشلون ولدت طبيعي والا عملية ..
مشيرة / لا الحمد لله طبيعي ..
متعب بهمس للعنود / والله خاطري اسلم على راس الدكتورة ..
العنود تطالع فيه مو فاهمة / .................
متعب بخبث / البنج .. خلاك تهذين وتقولين كل اللي مخبيتيه عني ..
العنود بخبث اكثر / عسى ما قلت لك عن عشقي لبتال ..
متعب عصب / مالقيتي تعشقين الا ذا .. من زين الطبايع ..
العنود تنهدت / ماني فايقة لك متعب " انتبهت لكوب الحليب اللي مدته مشيرة " .. تسلمين .. ابعدي ذا عني اتعبني ..
ابو عبدالعزيز سمع كلامها / متيعب قم .. قم من عند العنود لا توجعها ..
متعب ابتعد عن العنود ليريح جسمه على الكنب وهو يتنهد قهر ..



ــــــــــ


بيت ابو نايف ..
ساره بخوف / ما ادري ..
شريفة تقرب منها / الا تدرين .. وينهي فيه ..
ساره بخوف / راحت مع زوجها ..
شريفة بخبث / تكذبين يا سوير .. العنود مو مع زوجها وانا متاكدة من ذا ..
ساره / ...........................
شريفة / انا عرفت ان بتال بالشرقية جعلة ما يعود .. والعنود مو معاه .. وين هي فيه ..
ساره / ما ادري .. " وراحت تجري لفوق وقفلت الباب اللي بالوسط يقسم الدور العلوي عن الارضي " ..
شريفة تدق الباب بقوة / افتحي الباب يا سوير .. افتحي ..
ساره توجهت لغرفة امها وقفلت الباب عليهم ..
شريفة تضرب الباب بقوة برجلها .. وبقهر / ذا الباب متى ركبوه .. طيب يا سوير اعرف يعني اعرف وين بتروحين ..
ساره بحضن امها ترجف خوف / الحمد لله ان العنود قالت حطوا الباب بالنص ..



ـــــــــــــ



بالمستشفى ..

فتحت وشافت المكان غريب عليها التفتت يمين وشافت المغذي والسلك ممتد ليدها ..
..... تنهدت وجات بتجلس .. / ......
..... بصوت حازم / لا تتحركين .. " وقف وتقدم له .. والضح جدا الضيق على وجهه " ..
رنيم بتعب / ابي اطلع من هينا ..
سند بسخرية / لا والله .. ومن بأمره ..
رنيم رفعت حاجب مستغربه نبرة صوته وتصرفة الغريب .. / بأمري ..
سند يهز راسة بلا .. وبغرور / لا انتي مالك امر ... انتي شي " واشر بيده كان ماله قيمة " .. الامر لولد سند ..
" قالها وهو ياشر على نفسه " ...
رنيم بقوة / وهذا اللي تقول بامره هينا " وهي تاشر على بطنها " .. ويعيش بامري انا ..
سند بحدة / استغفري ربك .. العيش والفناء بيد الله .. " رفع يده وبدا بالعد على اصابعه " ..
هذا اولا .. ثانيا .. اذا صار للي في بطنك شي .. صدقيني راح تتمنين الموت وما تلقينه ..
رنيم تجلس وتسحب المغذي بقوة .. وقفت .. وبقوة / وايش بتسو.... آآآآآه ..
" رفعت نظرة للي ماسك يدها بقوة " .. " سند يجلسها على السرير " ...
رنيم من طاحت عينها بعينه صابها رعب وخوف شديد .. كانت سوداء سواد مخيف .. اول مره تشوف سند بذا الوضع ..
سند بحدة / اذا تبين سلامتك حافظي عليه ..
رنيم بخوف / ..........................
سند التف على السلة وطلع حافظات اكل حطهم على طاولة وقربها منها .. وبحزم / كلي ..
رنيم تصد عنه / ..............................
سند مسك فكها لفها لجته بقوة .. وحط عينه بعينها .. وبحدة من بين اسنانه / صبري نفذ ..
رنيم بعبرة / وانا بعد .. خلاص ما عاد اتحمل ..
سند بحجة / ما سالتك .. " فتح حافظة الشوربة " .. اشربي ..
رنيم تطالع فيه بقهر .. نزلت نظرها بعد ما اعطاها نظرة هزتها .. مسكت الحافظة وبدات تشرب وتاكل من باقي الاكل ..
سند توجه للكرسي وقعد علية يراقبها بصمت ..



ـــــــــــــــــ


يوم جديد ..


بيت ابو سند ..

غرفة ياسر ..

غرام بحدة / لا والله اضحك علية بهذا الكلام ..
ياسر بحزم / هذا اللي عندي .. وبعدين من الكبير فينا انا والا انتي .. اذكر الكبير هو اللي ينصح ..
غرام / و اذا كان الصغير يشوف شي ما شافه الكبير .. من اللي بنصح ..؟!!
ياسر تفف وصد / .....................
غرام بحدة / ياسر اذا صدق تبي شجون اخطبها واعقد القران .. وخلي كل شي رسمي .. وفي الحلال والعلن ..
ياسر / اذا خطبت .. بيقولون هي لك بس ما يصير قبل اخوانك .. واخواني اذا شابوا تزوجوا ..
غرام / صدق من قال عذرا اوقح من ذنب .. لو صار اللي تسوية معي والا مع مرام قبل بيرضيك ..
ياسر بعصبية / والله لو اعرف انه فيه شي من كذا لكسر راسك ..
شجون بعصبية / لا والله يعني تعرف ان هذا غلط وتمشي فيه ..
ياسر يصد / انا مو نيتي شر .. ابي افهمو شجون قبل العرس اذا تفاهمنا استمرينا واذا لا تركنا بعض بهدواء ..
غرام ترفع حاجب / احلف بس .. " وقفت وبحدة " .. اسمع اذا زاد هالموضوع راح اوصل العلم لسند ..
والله والله والله يا ياسر ان ليسريك سند بليل مابه ضوء تطلب الرحمة وما تلقاها .. فسم بالرحمان ..
ورجع عقلك لراسك .. لو عناد والا عمي خالد والا أي احد بالعايلة عرف بالموضوع .. لتقوم حرب البسوس ..
ياسر تنهد / هذا الكلام ايش فائدته الحين .. الحين قطعت علاقتي بشجون خلاص .. انتهى كل شي ..
غرام تحط يدها على خصرها / راح اصدقك هالمره .. بس والله يا ياسر لو اشك والا احس ان فيه شي يـ ..
" قطع كلامها اتصال فارس يستعجلها با نزول " .. احمد ربك رحمك اتصال فارس .. رايحين نزور رنيم ..
ياسر ما صدق يفتك / مع السلامة والقلب داعي لك ..
غرام عند الباب التفتت عليه واعطته نظرة سخرية ومشت عنه ..



ـــــــــــ


بالمستشفى ..

في غرفة رنيم ..
ام سطام وابو سطام .. وصقر وام صقر ..
ام سطام / خلها تاكل الدباء والقثاء والقرع .. وابعدي عن الدبنجان والملوخية والبامية .. وكلي القرص والسمن ..
واشربي الحليب .. " ابو سطام يسمع كلام ام سطام ويهز راسه .. شاركها بالحديث " ..
ابو سطام / عليك بالمرق واللحم .. والقرصان .. كلي الاكل اللي يشد العضم " وهو يشد بقبضت يده ويهزها " ..
قوي عضمك بالاكل الزين والمفيد .. لا تاكلاين الاكل الخربان ذا الملوي هنقرقر وبسبست ذا ..
صقر / هههههههه يبه هنقرقر اللي هو همبرجر بس ايش بسبست ..
ابو سطام / وانا ادري عن اكلكم .. انتم تقولونه << " الا الان لم يتم التعرف على بسبست " ..
ام صقر / .............................
سند ابتسم على كلام جده وجدته .. التفت على رنيم وشافها تبتسم مجامله .. لكن عيونها زعلانه .. " وبداخله " ..
عسى ما أزعلتك البارح وزودت الجراح جراح..
عسى ما مرت الدمعه على اهدابك من اسبابي..
جرحتك من كثر شوقي وخليت الكلام رماح..
ولا أدري شلون يا عمري طعنتك حيل بعتابي..
بدون شعور صدقني ترى كثر الغلا ذباح..
تعال وشوف بغيابك غلاك وشلون سوى بي..
حرام اتغيب من عمري وتعطيني الفراق وشاح..
حرام الدمع في عيني مناديله هي اهدابي..
غيابك يشغل عيون الزوايا وممتلي اشباح..
وانا انثر صوتك بقلب المكان واشعل ابواب..
تلفت للامل دام الرجى في عمري الملواح..
انادي لك ولو شرهت وصولك تقطع اعصابي..
ابيك الجاي من عمري انا ماابيك شي وراح..
مدامك اجمل وآخر مدامك اول احبابي..
أبي ارتاح ياعمري وانا ادري هم تبي ترتاح..
تعال وقبل ماأفرح ترى تفرح بك ثيابي..
احبك يابعد عمر الحزن والجرح والافراح..
احبك كثر مانامت عيونك داخل اهدابي..

.........بصوت عالي / سند ...
سند انتبه .. وبفزع / هلا ..
غرام بضحكة / الله يعوضك خير يبه .. طلع مو حاس باللي حوله ..
سند وقف وقبل يد ابوه وامه .. سحب غرام وقبلها على جبينها .. قرص راس انفها / بطلي شقاوة ..
ابو سند يجلس على الكرسي / ايشلونك يابوك ان شاء الله بخير ..
رنيم / بخير .. كيفك ياعمي ..
ابو سند يبتسم / دام ان الفهد الصغير بخير فانا بخير ..
رنيم بجمود / ....................
سند يبتسم / جعل عمرك سالم يبه ..
غرام وقفت وصارت تدور بالقهوه على امها وابوها واخوها .. صقر وام صقر وابو سطام وام سطام طلعوا من قبل ..



ــــــــــ



يوم جديد ..


بمزرعة العنود ..
متعب جالس على الكنبة / ابي افهم ليه ما رحتي لبيت امي ..
العنود واقفه على البلكون .. لبسه بنطلون اسود وبلوزة كحلية باكمام طويلة .. التفتت له ..
تقدمة خطوتين .. لتسحب النظارة الشمسية .. / ما يحتاج اتعبهم .. الحمد لله هذا انا لي 3 اسابيع ..
الجرح برا .. وسلطان والظبي بالحضانه .. والخدم حولي .. ما ابي اتعب احد ..
متعب / انتي ايش فيك .. احس بعض الاحيان مريضة نفسين ..
العنود ابتسمت وتوجهت له لتجلس على الكنبة بهدوء / ليه .. لاني ما ابي اتعب احد ..
متعب / مو بس كذا حتى " وهو ياشر على قدميها الحافيتان " .. هالعادة اللي ما خذتها ..
العنود تطالع لقدميها .. وباستغراب / ليه .. النبي صلى الله علية وسلم كان يمشي حافي القدمين ..
متعب / عليه افضل الصلاة والسلام .. لكن ما كان ينقعها بماي وثلج ..
العنود تهز راسها / امممممممممم ..
متعب / شنو امممم .. ليش تسوين كذا ..
العنود بغموض / لا ولا شي .. " وقفت ".. توديني للمستشفى ..
متعب تنهد / اكيد .. " وقف " .. مشينا ..



ــــــــــ



بيت ابو سند ..
مرام راجعة لبتها اليوم .. توها جاية من الصالون .. وتكمل تعديل بالبيت ..
مرام واقفة قبال المراية تضبط شكلها وفستانها .. والجوال بالاذن ..
مرام / نوال .. انا معتمدة عليك ها .. ما ابي لخبطه يكوف اخوك ملخبطني هاليومين ..
نوال / هههههههههه الله يعينك .. انا انتظر الحظة .. ابي اشوف صدق قرفان ..
مرام تنهدت بضيق / نوااااااال لا تذكريني .. اول ما امي وخالتي قالوا لي السالفة صابتني حمى وبعدها الالتهابات ..
نوال / هههههه والله حالتك صعبة .. من 40 يوم لشهرين ..
مرام / اووووووووف نوال بتبدين التشمت .. قولي ان شاء الله مو صدق توقع امي وخالتي ..
نوال / لا مرام .. طلال متغير .. واذا رجعتي البيت بشوفين شي راح ياكد لك قرفة ..
مرام باستغراب / ايش هو ..
نوال / لجيتي تعرفين .. يالله باي .. خليني اكمل شغلك ..
مرام تهز راسه / طيب باي ..
قفلت المكالمة والتفتت لغرام اللي تلعب مريم .. بعبرة / غرام خايفه ..
غرام ترفع راسها / ليه .. امي وخالتي مريم شنو قالوا لك ..
مرام / قالوا اذا صدك لا تزعلين .. وبلغينا ولا تستحين .. وحنا نعرف نعالجه ..
" وبخجل " .. تصدقين كل ما اذكر انه شاف الوضع استحيييييييييي ..
غرام / وليش تستحين .. هذا خلقت ربي .. ويمكن لا شاف تعبك يرحمك ..
مرام بضيق / اووووف خايفه وقلقانه ..
غرام / توكيل على الله .. وسمي بالرحمن .. ومايصير الا كل خير ..
مرام / توكلت عليك يالله .. " تركت المرايه وتوجهت لبنتها .. ابتسمت " الحلوه نامت ..
غرام بتعب / الحمد لله تعبتني الين نامت .. الله يعينك عليها .. دلوعه ..
مرام بحنان تحملها بين يدينها قبلتها بهدوء / فديت الدلوعه أنا .. يالله ننزل ..
غرام / فارس تحت هو اللي بيوصلك .. " ابتسمت " يقول ما ادري كيف راح اصحى الصبح و ما اسمع صوت صياحها ..
مرام تتوجه للباب .. بابتسامه / فديت الحنين أنا .. يالله خلينا منزل نتأخر ..



________



في المستشفى ..


وقفه عند حضانه الأطفال وتطالع الأطفال بحنان وابتسامه ..
متعب متوجه لها ومعاه اوراق .. التفت جهة اللي تطالعهم العنود .. ابتسم / بالله مو خاطرك تاكلينهم ..
العنود التفتت له .. وبابتسامه / مادام هي في خاطرك ليه ما تتزوج وتجيب لك بيبي وكله محد بيحاسبك ..
متعب يرفع حاجب / الحين هذي جزاتي .. مطلع عيالك بالف كلفه وعنا .. وتغثين كبدي بهالهرج ..
العنود بفرحه / صدق راح اخذهم اليوم ..
متعب ابتسم / ايه .. دورنا معارف و واسطه اللين كملت الاجرات وطلعتهم ..
العنود تنهدت والتفتت للأطفال / ابي ارجع لـ الرياض ..
متعب باستغراب / ليه ..؟
العنود التفتت له باستغراب أكبر / شنو الي ليه ..
متعب / ليه بترجعين ..
العنود / بيت ابوي وابي ارجع له هذا الصحيح ..
متعب بغموض / ....................
العنود / متعب فيه شي وأنا ما اعرفه ..
متعب / ﻻ بس ما ابيك تروحين ويرجعونك لبتال ..
العنود بنظرات مقصودة / ..................
متعب يتهرب / أنا رايح اكلم الممرضه تجهز العيال ..
وترك العنود واقفه وتوجه لغرفة الممرضات .. باقي الإجراءات ..



_______



بيت أبو سند ..

شقة سند ..

رنيم نايمه على السرير .. دخل سند بهدوء ومعاه صينية الاكل .. تركها على الطاولة .. وبهدوء / رنيم .. رنييييييم ..
رنيم فتحت عيونها بتثاقل / .............
سند بجمود / قومي كلي ..
رنيم تصد وبضيق / ما ابي ..
سند تقدم لها وسحبها من الفراش بحده / أنا ما طلبت رايك أنا امرك .. " توجه لمفتاح الاضاءة وفتح كل المبات "..
رنيم تصرخ بانزعاج / اووووووه ماا ابي .. ما تفهم ..
سند يسحب الطاولة ويقربها لرنيم .. وبحزم .. / وأنا قلت لك امررر .. يعني تاكلين وبدون صوت ..
قطع قطعت خبز ودخلها لفهمها بالقوة .. وقف / أنا داخل الحمام اخذ لي دوش واطلع .. القي حبة رز فالصحن ياويلك..
رنيم ضربت الطاولة برجلها بقوة وطاح كل الاكل على الأرض .. رفعت نظرها لسند وبتحدي ..
لكن سرعان ما غيرت النظره لخوف ..
سند يتقدم لها ووجه اسود من الغضب .. وبحده / أجمع الاكل الحين وادخله فمك بالقوة وهو حايس كذا ..
رنيم بتحدي وقبلها يرجف من الخوف / ماتقدر ..
سند يمسك شعرها بقوة ويمد يده على مجموعة من اﻷرز اللي مرمي على الأرض وممزوج بايدام وسلطه والخبر ..
وشكله مقرف جدا .. اخذ منه جزء وقرب يده من فم رنيم بحده / ما اقدر هااا ..
رنيم تخوف / سند بعد عني راح ارجع ..
سند بحده حط الاكل في فمها ودخله .. لعت كبد رنيم .. بسرعه بعد يده وهي راحت تجري للحمام " أكرمكم الله "..
سند مسح وجهه وتنهد / لا اله الا الله .. " رفع سماعة التلفون وطلب الخدامه تجي تنظف الغرفة وتجيب اكل ثاني "..
رنيم خرجت من الحمام ووجهها احمر وعيونها حمرا .. سند بداخله " ااااه يا قلبي عيونها بكت بأسباب جرحي "..
سند بحزم / الحين راح يجيبون لك اكل ثاني ..
رنيم تمسح انفها بقوة زادت من احمراره / ما ابي .. ليعه كبدي ..
سند يتوجه لمكان الفوطه اخذها .. وقف أول ما شاف الخدامه الخاصة برنيم تدخل / نعيمه جيبي اكل المدام بعد ساعه ..
نعيمه / هازر بابا ..
رنيم لعت كبدها مره ثانية لمن شافت نعيمه تنظف الأرض وراحت تجري للحمام .. لحقها سند ..
عند باب الحمام " اكرمكم الله " سند يسند رنيم .. مسح وجهها بالفوطة وبغموض / ﻻ تعانديني و الا بتتعبين ..
رنيم رفعت عينها فيه .. أبعدته وتوجهت سريرها ورمت نفسها بقوة مؤذيه لها .. سند بحده / رنيم ..
رنيم رجفت من الخوف بس طنشته ما يقدر يسوي شي / ......
سند توجه لـ الحمام قبل ما يتدهور ويسوي شي يندم عليه طول عمره .. تحمم وهو يحاول يهدي نفسه وينسى غضبة ..
بعد ما طلع ولبس كان بيتعطر بس تذكر ان رنيم ترجع ان شمت ريحة العطر فترك العطر ..
جلس على الكنبة قبال رنيم .. ورنيم ماسكه جالكسي اس 3 وتسولف بالواتس اب ..
سند بغموض / اتوقع معدتك هديت ..
رنيم / ..........................
سند رفع السماعة / نعيمه الاكل جاهز .. طلعيه .. وجيبي عصير الافوكادو مع فواكه مشكله ..
رنيم كشرت بوجهها .. رفعت الفرشة ودخلت تحتها وتغطت كلينا .. سند شاف حركتها وابتسم ..
بعد دقايق دخلت نعيمة .. ومعاها صينية الاكل .. وضعته على الطاولة وراحت ..
سند بغموض / قومي اكلي ولدي ..
رنيم / ......................
سند يقوم ويجلس جنبها .. رفع الفرشة بقوة .. وبحزم / قومي ..
رنيم فتحت عيونها ببطء / ما ا بي ..
سند يقرب منها .. وهي صدت عنه .. سند بهمس حاد / مو على شانك .. علشان ولدي ..
رنيم جات بتضرب بطنها .. الا بيد سند تمسكها وتضغط بقوة ..وبحدة / طول السبع شهور الجاية ..
راح تكونين خدامه لولدي .. تاكلين وتضحكين وتغيرين جو وتنامين بحضني .. ما ابي ولدي يطلع معقد من شي ..
رنيم ترفع حاجب / لا والله .. وهو ايش يدريه باللي يصير ..
سند بستفزار / حساس على ابوه ..
رنيم / لا اذا لابوة فابشرك بااااارد ..
سند / كل " ن " يراء الناس بعين طبعه ..
رنيم بعصبية / انا بارده ..
سند طنشها وتوجه لطاولة .. رنيم تنقز وتجلس جنبة .. وبعصبية / رد عليه تقصد انا باردة ..
سند قطع من الخبز وبداء يا كلها وهي تهاوش انا اللي احترق واقول واحس وتبربر وتلخبط بالكلام ..
وكل بعد شوي تطلع هرجه مختلفه وتفسر مقصدة بشي ثاني .. وسند شغال ياكلها مره رز ومره ايدام ..
وخلصت وبداء ياكلها حلا والعصير الا ان خلصت الاكل كله .. التفت لها بهدوء / انا طالع اذا ولدي يبي شي قولي لي ..
رنيم بعصبية / ايه يبي .. يبك تفارقه .. " سند طنشها وراح يغير لبسه بيطلع .." ..
رنيم بقهر / بااااااااااارد ويقول انتي الباردة .. وجع .. رمت نفسه على السرير ومسك جوالها ..


ـــــــــــ


بيت ابو طلال ..
عند الباب ..
فارس يقبل مريم بنت مرام بقوووة خلاها تبكي .. فارس بحب / راح يوحشني هالصوت ..
مرام بضيق / اف منك ومن غرام تحبون تبكونها ..
ريان يفتح الباب وبصراخ / مريم جاااااااااااااااااااااات .. شوفوا مريم ..
طلع سيف وابو عبدالعزيز .. مرام تراجعت بخجل .. فارس / ههههه هذي مريوم الحلوه ..
سيف بلهفه / اعطيني اياها ..
ابو عبدالعزيز ياخذها من يدين فارس بالقوة ويبوسها .. وبحنان / ليه حبيبت جدها تبكي ليه ..
سيف بارتباك / يبه اعطيني اياها ..
ابو عبدالعزيز يمد مريم له .. سيف بارتباك / لحضه .. كيف اشيلها ما اعرف ..
ابو عبدالعزيز / اجل انقلع عن وجهي ..
مرام تحس قلبها بين رجولها .. طاح من لمن مريم شالها ابو طلال بقوة وبسرعة وبعدين بيشيلها سيف ما عاد تتحمل ..
مرام بخجل / خالي ممكن تعطيني اياها ..
ابو عبدالعزيز / لالا .. " تذكر " يووووه يابنتي خليناك على الباب تعالي ادخلي طلال راح مشوار ولا الحين ما رجع ..
فارس / يالله مع السلامة " قبل مريم بقوة خلاها تبكي وهرب بسرعة " ..
سيف / والله لا ازعل بنت اخوك سند اوريك ..
فارس وهو واقف عند سيارته / ههههههههههه تعال بس خذ شنطة بنت اخوك ..
سيف يتوجه له وياخذ الشنطة .. مرام تدخل وبعدها طلعت فوق لشقتها تجهز اللي باقي ..



ـــــــــــ



على البحر ..

حاس بتعب وارهاق وضيقه .. تنهد .. التفت بسرعة للخلف بعد ما سمع صوت سيارة تقترب ..ابتسم بسخرية وصد عنه..
وقف سيارته واخذ وقت وهو يطالع بقفى اللي جالس قباله على الصخر .. نزل بهدوء وقفل الباب ..
توجه بهدوء وجلس على الصخره .. بهمس / السلام عليكم ..
..... بهمس / وعليكم السلام ..
بعد دقائق صمت .. يغنى فيها موج البحر بلحن حزين ..
...... / ايش جابك ..
......../ اللي جابك ..
......./ انا الصداع جابني .. مو قادر انام ..
........../ ضرب يديك .. محد بيبكي عليك ..
..... التفت علية وبسخرية / وانت من بيبكي عليك ..
...... ابتسم / قلبي ..
.... صد وصار يطالع البحر / .......................
...... بغموض / حنيت ..
........بضيق / .................
....... باهتمام / وجهك واضح عليه التعب .. ما تنام ..
......تنهد / لي من حول الشهر .. كل ما اغفى تجيني في منامي .. معاها سيف مكتوب عليه بتال وعمامتي .. " شماغي "
.... بنبرة مقصودة / ندمان يا بتال ..
بتال بضيق / ما اخفي عليك .. بعد ما طلقتها ورجعت لـ الخبر ووصلت سمر وتطمنت عليها .. راجعت نفسي ولمتها ..
تسرعت .. وكل مره اقول ابي اروح لرياض وارجعها بس انشغل بشي .. ويوم يجر يوم .. اللين انتهت العدة ..
مستحي وخايف من راكان .. بعض الاحيان اقول ليته يرجع وابلغه واعتذر منه .. واخلص من الندم وهمه ..
وبعض الاحيان اقول ما سويت شي اعتذر على شانه .. انا قلت له اختك فيه وفيها .. وهو رماها عليه ..
" ضغط راسه باصابعه " تعبان يا سند .. وماني عارف ايش اسوي .. المصايب لا جاتك تجيك مرة وحدة ..
سند بهدوء / من يدري عن طلاقك ..
بتال بسخرية / من غبائي .. في اول يوم علشان اهدي سمر واريح نفسها قلت لها كل شي ..
سند / يعني بس سمر تدري ..
بتال يهز راس / لا .. سمر قالت لامي .. وامي راحت وقالت لابوي .. وابوي من يوم ما عرف وهو يعاملني بجفاء ..
سند / هذا غلطك ولا زم تتحمله .. ولسه ما عرف جدي ولا احد غيره .. والله لو يعرف راح يشب فيك ..
بتال تنهد / الله يستر .. ابي حل يا سند ..
سند ابتسم بسخرية / كل له همه .. خليني القي لي حل بالاول ..
بتال بتذكر / الا عمك راشد وينه ..
سند / يقول في لبنان .. بس الرقم اللي كلم منه سعودي .. والله يستر ..
بتال / صقر مسيكين توه صغير وحامل حمل يهد ظهره .. هالايام ينام بالاستراحه وسامر معاه ..
سند / ايه .. يبي يبعد عن جدي .. ما سكه وماسك عناد .. عناد هرب لـ الرياض وصقر لـ الاستراحة ..
بتال / الله يعينهم ..


ــــــــــ


بيت ابو بتال ..
على طاولة العشاء .. سعود وسلطان ووليد ..
ابو بتال / ايه شاطر وليد .. كل كثير علشنا تصير بطل وتكبر ..
وليد يهز راسه وياكل / .............
سعود / ما شاء الله اول مرة اشوف وليد ياكل هالكثر ..
ابو بتال بحزم / قل ما شاء الله ..
سعود بضحكة / ههههههه قلت يبه ههههههههه
وليد يوقف / الحمد لله ..
ابو بتال بابتسامه / يستاهل الحمد .. هني وعافيه ..
وليد توجه للحمامات .. سعود / يبه ما احد جاب لك علم عن راكان ..
ابو بتال وهو يوقف ويتوجه لجلسة امام التلفاز / لا والله .. سألنا بكل مكان ولا حس ولا خبر ..
سعود باستغراب / والله غريبه غيبته ..
ابو بتال / جعله خير ..
سعود بارتباك / يبه ما كلمت عمي عبدالعزيز مرة ثانية ..
ابو بتال وهو يشوف البرنامج الاقتصادي / في ايش ؟
سعود / في موضوعي انا ونوال ..
ابو بتال / نوال للحين ما تبي .. وانت طول بالك .. والوقت الحين مو مناسب ..
سعود يهز راسه / ان شاء الله بنطول ونشوف نهايتها ..
ابو بتال مركز بالبرنامج / ......................
سعود مسك جواله ويطقطق بالواتس ..


ـــــــــــــــ






بيت أبو عبدالعزيز ..


أبو عبدالعزيز / يعني تخلينا ..
العنود ابتسمت / من الأول يا يبه كان ﻻزم أكون في بيت ابوي ..
متعب / يعني الحين مانتي في بيت ابوك توك تقولين يبه ..
العنود بحدة / أنت اسكت ..
متعب بضحكه / افاا ..
أبو عبدالعزيز بهدوء / الي يريحك يابنتي .. وهذا بيت ابوك بعد ..
العنود بهدوء / ﻻ تزعل يبه أنت تعرف بحالة أمي وابوي .. وساره صغيره ما تنترك الحالها ..
أم عبدالعزيز / حنا من الأول قالنا لك .. بس أنتي عنيده الله يهداك ....
ابو عبدالعزيز بحده / هصصصص هي ماعليه شرهه .. الشرهه علينا كانت حامل ومغبونه .. وطاوعنا حكيها ..
العنود / ﻻ والله يبه ما تلحقكم ملامه .. المشاريه على اخواني وأهلي اللي رموني و ﻻ سالوا عني ..
أبو عبدالعزيز بهدوء / يا بنتي اخوانك ...
........ يقطعهم بمرح / السلام عليكم ..
العنود وقفت بفرح / وعليكم السلام .. هلا ومرحبا .. ليه ما قلت انك بتجي ..
متعب يتقدم له / قلت ابي أسويها مفاجئة ..
بعد السلام و السؤال عن الحال والاحوال ..
أبو عبدالعزيز / الا ماجد جاء معاك يا نايف ..
نايف ابتسم / ﻻ يبه راح يجي برمضان ان الله راد .. الحين عنده اختبارات ..
العون بغموض / الله من هالجامعه اللي كل واحد تختبره بفترة غير ..
نايف بمزح / يعني افهم انك ما أنتي فرحانه لشوفتي ..
أم عبدالعزيز اللي متغطيه ببرقعها وجلال الصلاة / الا والله انها مبسوطة بس مستغربه من تعليم هالاجانب ..
أبو عبدالعزيز / هالاجانب يا بنتي ياخذون كل شي عكسنا .. الله يكفينا شرهم ..
العنود بحزم / بكره ننزل الرياض .. " قاطعها ابو عبدالعزيز بحلفان " ..
ابوعبدالعزيز / والله انه مايمشي اللين ياخذ حق الضيف ..
نايف / حقي واصل يا يبه .. وخيرك سابق ..
ابو عبدالعزيز / تغداء بكرة وامشي الله يسهل دربك .. هي من بعد الرياض ..
متعب / والله انكم ما تتعدون ضيافتي .. بكرة عشاكم عندي ..
العنود / ما نبي عشاك .. وعن الحلف صم الكفارة ..
متعب / ما هو لك لنايف والعشاء تكلفنا وعزمنا وكان ..
العنود بحزم / من عزمت ..
متعب بسخرية / ابوي وامي وسلطان والظبي والجوري ونايف .. وانتي لا اقعدي بالبيت ..
نايف / ههههههههههههههههه خلاص تم ..
العنود تطالعهم بنظرة غرور وصدت ..
ابو عبدالعزيز / والله ما يهناننا الاكل الا بشوفتك ..
متعب / الله الله .. أجل احجز لكم بكرة وبعد بكرة تسافرون من الدمام لـ الرياض ..
العنود بحزم / ﻻ نبي سياره ..
متعب / خلاص خذو سيارتي الثانية ..
نايف يوقف / أنا اسمحوا لي تعبان ومشتاق لصغار .. ودي لو احط راسي وانام ..
العنود توقف معاه / تعال لغرفتي ..
الكل / تصبحون على خير ..
العنود ونايف / وأنتم من اهله ..



________



بيت أبو طلال ..

شقة طلال ..

مرام متفاجأة من البيت .. طلال غير كل الاثاث .. حتى الارضيات .. سراميك الحمام غيره المطبخ كل شي غيرة ..
نيمت بنتها بالغرفة .. عدلت شكلها ورتبته من حوست العباية .. تعطرت وكثرت ..
ولعت الشموع القت نظرة على تجهيزات طاولة العشاء .. ما قصرت نوال والبنات جهزوا لها كل شي ..
ترتيب الطاولة اهتمت فيه ابرار .. ريهام الشموع ووضعها في أماكن تزيد روعه المكان ..
العشاء طلبته نوال ودفعته من احسابها الخاص .. أماني صممت علبة الهدية ..
شافت جوالها تضيء انارته عرفت ان طلال وصل هذي اشاره بينها وبين نوال مساعدتها..
طفت الانوار وخلت الشموع .. طلال فتح الباب وتفاجاء بشكل الصاله ..
مرام تقدمت وبدلع / مفاجأة ..
طلال بتلعثم وارتباك / ااا مرام .. متى .. متى رجعتي ..
مرام تراقب تصرفاته .. / ازعجتك المفاجأة ..
طلال / ﻻﻻ بس .. اا .. تفأجات .. يعني .. بس ..
مرام / طيب ليه ما تدخل واقف على الباب ..
طلال يتقدم بارتباك .. قفل الباب .. وجلس على أول كنبه قريبه من الباب .. بعيده عن مرام ..
مرام واقفه مكانها مصدومه / ...............
طلال يطلع جواله فتحه قفله .. رماه على الكنبه .. سحب المفاتيح عدها وكانه خايف تكون ناقصة ورجعها لجيبه ..
مرأم / طلال فيك شي ..
طلال بارتباك يهز راسه .. مسح جبينه المتعرق / ﻻ ابد ..
مرام بختناق / بـ ...
قطعها صوت بكاء مريم الصغيره .. تركت طلال وتوجهت لبنتها ..
طلال يفتح ازارير ثوبه العلوي / اووووووه .. الحمد لله راحت والا رجعت قدامها ..
بسرعة قام وتوجه لغرفة النوم .. غير ملابسه ورمى جسمه على السرير .. يدعي النوم ..



______



يوم جديد ..



يراقبهم من شهر ..
ما يغيبون عن مكانهم الا وقت بسيط ﻻ يتجاوز الساعه ..
رفع حواله .. / عرفتوهم من ..
طيب وين يروحون و من وين يجون ..
زين .. تمام .. مفهوم .. مع السلامه ..


شاف شخص يقترب من السيارة الغريبة ..


اللي بسيارة ..

...... الأول ياكل من ساندويتش طعمية / أقول لو نقول لطويل العمر ان فيه شكوك بأن البضاعه داخل البيت..
تظن ايش يامرنا فيه ... " شرب من البيبسي " ..
...... الثاني وياكل ايضاً ساندويتش / اتوقع يقول طبوا البيت وجيبوها ..
...... الأول وهو يعلق لثته بلسانه بطريقة مقرفة / ﻻﻻ توقعك مو في مكانه .. للأسف ما طلعت ذكي ..
...... الثاني / أجل ..
...... الأول/ ياذكي وهذا الحرامي يوم سرق البضاعة باعها ..
...... الثاني / الا ..
...... الأول / معناته يقول طبو على البنك ..
...... الثاني / والله انك عبقري ..
...... الأول / قول ما شاء الله ..
...... الثاني / سقارتي " سيجارتي " خلصت معك سيقارة ..
...... الأول / لا بس معي ريال ..
...... الثاني / وايش ابي فيه ..
...... الأول / تعطيه المجنون اللي ورانا ..
...... الثاني قفل باب السيارة .. وبخوف / ﻻ تخليه يقرب ترا يعدينا ونصيب مثله ..
...... الأول بسرعة يقفل الباب / تقوله صادق ..
...... الثاني وهو يلتفت بخوف / ايه صادق ولد جيراننا عليان صار مجنون لن مجنون طاح علية ثم عداه ..
المجنون ضرب السيارة عدت مرات ليصرخان الذين بداخلها بكى الثاني وأصبح هذي بكلام غير مفهوم ..
...... الأول يضرب الثاني ويصرخ / راح راح خلاص ..
...... الثاني يبكي كالطفل خائف / ااااا ااا ..
....... الأول / الحمد لله مصرت مجنون ..
....... الثاني يبكي/ وأنا وأنا ..
....... الأول / افتح عينك ..
....... الثاني يشد عينيه للاخير / هااا ..
....... الأول / لا مافيها شي ما أنت مجنون .. بس خبل ..


اما هو فقد انفجر ضحك على أشكالها المرعوبة / والله حاله ههههههههههههه ...


انتبه لدخول سيارة لساحة حوش المنزل .. دقق النظر ليراها سيارة شريفة وبكره / الله يفك شر الناس منك ..
ابتعد عن زجاج الشباك حتى لا يشك به أحد أو يجلب احاديث سيئة من الجيران عنه ..



_______



بيت أبو طلال ..

مرام / صحيت مريومه وصارت تبكي ورحت انيمها وما رجعت الا هو نايم ..
أم طلال / ما شفتي شي غريب مصرخ عليك شي ..
مرام تهز راسها / ﻻ ابدا بس كان مرتبك ..
أم سند / هاه مرتبك .. أول الخيط ..
أم طلال / مالنا الا عمي هو يحلها ..
أم سند تبتسم / وأنا ابي احضر لحظة العلاج ..
أم طلال / ليه ما حظرتي علاج بنتك ..
أم سند بصدق / الله ﻻ يطيح أحد باللي أنا طحت فيه .. يأختي صرت كاني طفله ما اعرف شي ..
وﻻ جاء الليل بكيت وصحت .. وﻻ جاء النهار مغير اتمسك بسند وهو يقودنا كاني طفله خايفه اضيع ..
أم طلال / اهاا ضيعي الحين ومالك دخل بولدي
أم سند / ههههههه لا والله اني ابي أحضر واتريق ..
أم طلال / تشمتي بكره سند حرمته تالد قدامه وأنا اتفرج بعلاجه واعلق ..
أم سند بخوف / ﻻ بسم الله على ولدي ..



ــــــــــــ



بيت ابو سطام ..

ابو سطام / اقول يا حرمة .. ايش رايك نروح للمزرعة كم يوم ..
ام سطام / بكيفك اذا خاطرك بالمزرعة مشينا ..
ابو سطام بضيق / والله ان صدري ضايق .. وودي اشوف العيال كلهم حولي ..
مياسة / ايه والله يبه من زمان وحنا محبوسين هنيا ..
روان / تكفى جدي خلنا نروح ..
ابو سطام يبتسم / على هالخشم امروا بس .. الا وين وصلتوا باستراحتكم ..
ريهام / حديدن سهل ويخلص ..
ابو سطام / ههههههههه حديدن سهل .. الله يسهل عليكم ويرزقكم بالرجل الصالح ..
ريهام ورنا وروان خجلوا وحمرت وجهيم ..
ابو سطام / اجل بلغوا البنات انا بنمشي بكرة والا بعده للمزرعة ..
ريهام و رنا وروان رفعوا جوالاتهم وبدأوا يتراسلون بالواتس اب ثواني وعائلة الفارس كلها عرفت بالروحه ..



ـــــــــــــــــ



يوم جديد ..


على طريق الرياض ..

العنود / ايش اللي بينك وبين متعب ..
نايف باستغراب / و ﻻ شي ..
العنود / ﻻ تكذب علية يا نايف .. أنا اعرفك واعرف متعب ..
نايف / ابي اعرف ايش اللي يشكك ان بيني وبين متعب شي ..
العنود / احساسي .. يالله قول .. وتساسركم اللايام اللي فاتت وتحججاتك بتاجيل الروحة .. ايش اللي بينكم ..
ابتسم وهو يسمع صوت صراخ صغير بخلفه / واحساسك ما قال ان ولدك جيعان ..
العنود بضيق وهي تلتفت للخلف والتقط ابنها انام على كرسي متخصص للأطفال / تمسخر لكن مردي راح اعرف ..
نايف يبتسم ويهز راسه بـ نعم / .............



_____



بيت أبو نايف ..


زهرة / الله يكيفين شر المخلوقه .. لها اربع ايام وهي كل يوم مضيفة عندنا ..
صبري يجلس بجانبها / من يوم دخلت هالبيت وهي محراك شر ..
زهره / كل بنات العيلة شفتهم كلهم غير عنها بكل شي ..
صبري / البيوت أسرار يا حرمه ونحن ما نعرف شي ..
زهره / صدقت .. ايوه .. الا كيف عمتي ..
صبري بضيق / يقولوا اولادها بأن حالتها جدا خطيره .. ما صحت .. وﻻ تدري بمن حولها ..
زهره تهز راسها / ما عاد بقي أحد من ريحت ابي وأمي غيرها .. ابغى أزورها يا صبري ..
صبري / اااه وأنا ابغى ازورها .. بس العم و العمه من يجلس عندهم ..
زهره / ايوه صحيح .. " تنهدت " .. الناس تقول اللي عنده مال ما عنده هم ..
وهذي الناس " وهي تاشر على الفله " .. عندها أموال بس بيتهم ما يخلا من الهموم ..



بداخل البيت ..

شريفه / هذي الغرفه لـ عبدالله ..
تفتح الغرفة الثانية .. / وهذي ليه ..
تفتح الغرفة الثالثه .. / وهذي لـ مها ..
تفتح الغرفة الرابعه .. / وهذي لـ حنان ..
....... من خلفها بسخرية / للحين عندك امل تأخذني هالبيت ..
شريف التفتت لتفتح عينيها للأخير / .....................



انتهى ..


سبحان الله و الحمد لله و الله اكبر

اعذروني على القصور والاخطاء الاملائية وهذا اللي طلع معي ..

هالبارت جزء كبير منه كتبته في التاب 10.1 .. يعني الله يعينكم على فك الطلاسم .. واتمنى انه مافيه طلاسم ..

البارت القادم سيحمل من المفاجآت والتقلبات الكثيرة .. انتظروني ..

اختكم مشاعل السعودية ..

مبدعه يسلموووووووووو.