السلام عليكم ورحمة الله وبركاته
والله دخلت بس عشان الرواية
لاني مشغولة حدي وما تمكنت اكتب توقعاتي كلها قبل البارت الجديد
وزحمة نفسي عشان اكتبه قبل ماتنزلي البارت كريستوا
تصديق لله الحمد ربي اشغلني الاسبوع الي فات بضيوف غالين على قلبي
وخلاني انسى شوي الكت الجهنمي الي قطعتي قلوبنا فيه
نيجي لتوقعات
سعود
اتوقع سبب استدانة سعود للفلوس هو من اجل النمر اخو عذوب يعني فزعه لاخو العذوب من بعد ما الشيخ لافي (ابو حمدة) منع القبيلة انها تجمع فلوس للنمر وهو لانه يحب ضاري وعشان خاطر عذوب مالقى قدامه الا ميشيل يستدين منه على امل انه يسدده بس ميشيل لعبها صح وما خلى لسعود مجال انه يدبر الفلوس وكان موقعه على اوراق تثبت دينه وكان يهدده انه لازم يقرب منه لافي ويصير حلقة الوصل بينهم بس رفض سعود خلى ميشيل يخطط للحادث منها يموت سعود ويقدر يضغط على لافي وهو عارف حب لافي لاخوه وكيف انه حاس بالذنب انه قتل اخوه فهو بسبب تانيب الضمير راح يكون ابسط شئ يقدمه لاخوه المتوفي انه يحافظ على سمعته
وبعد وفاته اتوقع انه ميشيل ضغط على لافي وهدده يا انه ييمشي معه ويتجنس ويصير فرنسي او انه راح يفضح سعود وانه هو كان متداين منه فلوس
ولان سعود شخص غالي وله صورة عظيمه عند الكل ما كلن وده يهز الصورة حتى لو على موته
وكذا نفذ طلابات ميشيل ولاه حاس بتأنيب الضمير
طلال & مرايم
اتوقع انه فقد الذاكره ويمكن يكون في غيبوبة وكمان احتمال الشلل وارد لان الضربة على الظهر
ولما يصحى يكون فاقد للذاكره وبعدها مرايم راح تهتم فيه ويتمموا الزواج بدون هيصة ولا زمبليطه
ووقتها مرايم راح تعيش احلى ايام عمرها وهو راح تخف عنه الشكوك

عبير & ضاري
اتوقع راح يتم زواجهم وبس اهل ضاري راح يحركوا الاحداث عندهم ووجود عذوب له الاثر


سالم & مناير & وردة &ام سالم & فهد &مرايم
اتوقع راحيصير لواحد منهم شئ وهو الي راح يخلي مرايم تندم على الدعوة الي الواحد يخاف يقولها لعدوه كيف باخوها
انا للحين شخصية مرايم مو بالعيتها كلها على بعضها غلط في غلط
يعني للحين ماشفتها تانت باي قرار ليليان البزر على قولت البعض تفكر احسن منها
وكله يا قرارات غلط ومتسرعة او ندم وبكاء ودواعي مثل وجهها للحين ما شفت لها موقف يبرد القلب

ليليان &لافي & تغريد
كويس الانفجار راح يعطي لافي وقت يفكر وراح يخلي ام سعود تنشغل عنهم وماتصر على اكمال الزواج
اتوقع بما انه البيت انفجر راح كون صعب انهم يعيشوا فيه اتوقع انه رسمية تاخذها حجة وتجمعهم عندها عشان لافي يضل قريب من تغريد وتبين انه تغريد كويسة كثير
او انهم كلهم يجوا يسكنوا عند ام سعود عشان تغريد وامها يراعوا ام طلال وهنا وقتها تبدا شغل الضراير يا ويلك يا لافي راح تروح فيها مابينهم
الحين بعد الانفجار والي راح يصيب طلال راح يتنافسوا الثنتين مين تجذبك لها اكثر
تغريد تشفق عليها وترحمها
وليليان تتحداها وودك تروضها

نيجي لتوقع الخطنطري احسه حلو كثير اتوقع اصابت طلال لازم سفر وطبعا راح تسافر معه زوجته مرايم وبما ان تغريد زوجتك وتعتبر محرم لها وعشان تقدر تهتموا بمرايم وكمان عشان تكون قريب من اخوك تسافروا اربعتكم

وتتركوا حبيبة الشعب وراكم ويمكن تاخذوا وقت طويل بحدود ثلاث لاستة اشهر طبعا وقتها ليليان من غيضها ياحبة عيني انك مسافر مه تغريد راح تكون امها مسجلتها وراح تاخذ حاسب وتكمل لغة فرنسية بدون علم اي احد والي يحفزها على اخذ اللغة الورقة الي لقتها ميري

جواهر & عبودي & علي
عبودي اتوقع راح يصير له شئ بالانفجار وجواهر اتوقع بعد الخوفة راح تحملي باذن الله
علي راح تكون ملجاء الكل والصدر الحنون للكل الله يعطيك على قد نيتك
واتوقع ان جواهر تحمل لانه هي مره لمحت انه في علاج وانها حابه تحمل منك وانت قطعت سالفتها
بس اتوقع انه بسبب كفالتك لليتيم الي صرت له احسن من ابوه راح ربي يرزقك بعون الله(هذا نقطه مهمه ماحد طرحها والي تشجع الناس على كفالة اليتيم الي هي سبب لكل سعادة في الدنيا والاخرة )


اعذريني على التاخر بس ان تاتي تاخر افضل من ان لاتاتي ابدا

السسلام عليكم ورحمه الله وبركاته

في ردود توها نازله ومالي وقت أقراها أكيد برجع بتعليق عليها ^ ^
أمممم
الفصل هذا ماتتخيلون شكثر كان موجع لي .. لدرجه بكيت معهم ...
وياارب أكون وفقت في أني أوصل الحدث بكامل تفاصيله لكم ...
أول مره أعتزل العالم حوالي حتى مايلمح أحد دمعه بعيني ويقول في أحد يبكي
قبال الاب ^ ^ ...
أييه .. أنا بشرط عليكم شرط صغيرووون .. وهو ندااء للي جالس ورا الكواليس واللي يتابعني..
أذا أكرمتوني بتواجدكم وبردودكم راح يكون فيه فصل أستثنائي يوم الثلاثاء ..
وأذا لاقدر الله ماشفت شي أسحبوا الفصل لحد السبت .. << فيس النذاله ..
يلا قراءه ممتعه للجميع ياااارب ..


الفصل ( 49)

الخطوة الرابعه والأربعين .. خطوة الأحلام المؤجله في حلم أريد منك أكثر مما أريد


( كُلّ الحَكَايا العَتيقه نَحَوّنَا .. أَشَيَاء جَمِيله لاَ تتكرر )



ماعادت تشوف غير الحجر يحوطها
والدخان .. النيران حولها في كل مكان تنير هالظلمه حولها ...
تشوف هالنار تاكل اللوحات حواليها .. تاكل كل شي ألا جسدها .. جسدها
ألي كان محمي بجسد طلال المرمي فوقها .. حركت رجولها وجسمها بقوة
وهي تصارخ بصوت عالي.. ماتبي تموت في هالمكان ولا تبي تحترق .. حاولت
ترفع جسد طلال من عليها والنار سرعتها تفوق سرعه أنفاسها المفجوعه ..


مرايم تبكي : طلال قوووم .. طلال ألله يخليك قوووم .. طططلاللل


بكت بقوة والكهرب فالبيت كله طفى من هالأنفجار الغريب .. ماكانت تسعف
حرقه هالأشياء غير النور ألي يتسلل بعجز من الشباك ألي تحول لونه للأسود ..!!
حطت أيديها على خصره حتى تحس بحراره جسمه مثل هالحراره ألي
تلتحف جسدها ... حركت أيديها بصعوبه وهي ترافس برجولها تبي الخلاص ..
صرخت بقوة من طاح على ظهر طلال قطعه خشب تشتعل نار ... فتحت عيونها على الأخر
وأبعدت أيديها وهي تتحرك بقوة تبي تفك روحها وتفكه
صارت تحاول تدفن راسها تحت جسمه .. تبعد هالخشبه عنها ..
.. تبيه يصحى وجسمه
فوقها يحترق .... غمضت عيونها من هالمنظر ألي بيدفعها للجنون ..
تصارخ وسط هالنار ألي تبلع كل شي ولا أحد يسمعها ...
ولا أحد ...!!




مرايم تصارخ بقوة : طلااااااااااااااال جسمك يحترق .. قووووم ..( رفعت صوتها
واللوحات تدفع النار تشتعل وتزيد أكثر وأكثر ) يمممممممماااااااااااااااااه ... ساااااااااااااااالم .. ساعدوووني .تك .. ( قامت تشاهق وحرارة النار تاكلها ) تكفوون .

من شافت بعيونها ثوبه يحترق وراسه مرمي
على كتفها يتحرك كل ماهي حركت جسمها ... قامت تبي تبعده وكل شي حولها
يتملكها لهيب هالنار .. بس أخذت نفس بقوة من سمعت
صرخات من بعيد وكأن أحد يستغيث ..


( ألحقوووووووووووني .. تكفووون .. بموووت .. ألحقوووني )



من عرفت الصوت بكت بقوووه ... قامت تصارخ وتصيح والصرخات من
بعيد تردد لها ... تشوف الموت قبالها جالس ينتظر هالنار تقرب
من جسدها ... لحظات سحبت جسدها من تحت جسد طلال من دفت كتفه بقوة ...
زحفت بعيد عنه وهي تشوف ثوبه يحترق ... فتحت عيونها على الأخر
وتساندت بأيديها على الأرض تبي تقوم .. تبكي بشكل هستيري ..
والدم في عروقها وقف
كانت للحظات جماليه هالأشياء ماتوصف .. أبتسامته ولوحاته ..
وهالحين هذا هو قبالها مرمي جسد بتفارقه الروح واللوحات تموت بسرعه حواليها ...!!

..فزت واقفه بس طاحت على الأرض من بدت النار تقرب
منها لحد ماوصلت لعبايتها .. الدخان يخنقها وماعادت تقدر تشوف شي ...
صرخت بقوة وهي تفسخ عبايتها ولحظة بس من هالجنون ألي شل عقلها
والشي ألي تشوفه راحت تركض للباب .. لصقت فالباب وصرخت من سمعت
شي أنفجر ثاني لدرجه كل الأثاث طار قبالها ..
الدخان أمتلى فالسيب وتشوفه جاي لمها مثل الدوامات ألي تدور حول بعضها .. تبعه صوت زجاج الشبابيك ألي أنفجرت
من الحراره والدخان ...طاحت على الأرض وهي تكح بقوة ...
خلاص ماعاد لها نفس تاخذه ..حطت يدها على رقبتها حاولت تاخذ نفس
ماقدرت .. لحظة بس حست أنها ماعاد تمتلى هالرئه ألي بداخلها
غير الدخان ... طاحت على الأرض مغمي عليها وماعاد لها سبيل
للنجاه وسط هالنار والدخان ...!!!

في جهه تقابل هالحريق ..

صراخ الناس وتجمهرهم قبال بيت فلاح حشد يملى هالمآسي ألي تقابلها
شمس دقت ساعة زوالها ... الأثاث من قوة الحريق طار لشارع مع الزجاج والحوش
ماعاد ينشاف أبد من الزجاج والأبواب المرميه على الأرض ... صرخاتهم تملى المكان وهم يحاولون ينقذون ألي داخل .. يسمعون الصراخ
بس النيران واقفه لهم ... أرتدد صوت الدفاع المدني أول ماتم البلاغ عن بيت
تاكله النيران في حي من هأحياء هالديره الطيبه ..!

فتح عيونه على الأخر أول ماوقف بسيارته بعيد عن بيت أبوه من زحمه
الناس وسيارات الدفاع المدني ألي محاوطه البيت من الجهتين ... حس بقلبه
بينشلع من شكل هالناس الواقفه بشكل مفجع .. ألي حاط يده على راسه ورافعه
يطالع لفوق .. وألي رافع ثوبه ويركض من جهة بيت أبوه لجهة البيت الثاني
شايلين بأيديهم سطول ماي كبيره وماعليهم من الدفاع المدني ..
وجوههم مفزعه .. ونظراتهم ترمي داخله ألف دوره للموت ..!
حرك عيونه صوب قطعه كنبه مابقى فيها غير الحديد
مرميه بوسط الشارع الباقي من أثاث الصاله ..!!!
فتح باب سيارته برجفه تملكت أيديه حتى يطلع يركض بقوته صوب البيت ..
يلصق ثوبه في صدره من قوه الهواء ألي تندفع لهالصدر .. وقف
والدخان الأسود يملى هالسما ... تنفس بقوة .. أقوى من لحظة العجز
ألي أنصبت في عظامه .. أبوه داخل .. أمه العوده .. أخته وزوجته ..
ظلت غترته البيضا مرميه لورا كتوفه وهو يسمع الصرخات والدفاع المدني
يركض لداخل البيت ويصارخون على ألي داخل يبونهم يطلعون حتى
يقدرون يحاصرون النار وينقذون ألي داخل ... الزحمه حوله
ماتحمل غير اليأس في الملامح ...
تحرك وهو يدفهم عن طريقه يبي يدخل ..
دفع جسمه من باب الشارع للحوش حتى يبدى يوطى الزجاج برجوله



......... : بسسسرعه ياشباب .. بسسرعه
......... : مانقدر ندخل النار كل مالها تزيد .. الحريق ماهو سههل يازياد
......... : مد السلالم لفوق .. بسسرعه .. أنا بصعد لفوق ..



تجمدت الدموع بعيونه وهو ينتقل فيها مابين باب المدخل ألي النار تطلع منه
والدخان للجدران ألي أنصبغ بياضه بالسواد ... راح يركض صوب المدخل
يبي يدخل ماعليه من هالنار .. يحترق أييه بس يطلعون أهله .. يطلعوون ..
ألتفت واحد من الدفاع المدني وشاف لافي يركض بجنون صوب المدخل .. وبسرعه
راح يركض حتى يعترض طريقه


.. : وين رايح .. بتموت داخل
لافي يصرخ بقوة : وخر عني أهلي داااخل .. أهلي وخخر
......... : بيطلعون بأذن ربك بس ماراح تقدر تدخل بهالشكل ... وكل ربك .. وكله وبأذن الله بيطلعون
لافي يحاول يبعد أيديه : شلون ماراح أدخل ..وخر عني الله ياخذك ..
( نزلت دمعه يائسه .. تتكسر لها عروق قلبه ) زوجتي وأختي داخل .. أمي ..
( صرخ وهو بالقوه يدفه ) مالك شغل فيني



لف بسرعه على صرخات سالم ألي واقف عند الباب والجيران يحاولون
فيه مايدخل ...


( زوجتي داخل وولدي قبل شوي منزلهم .. ياناااس أبعدووو ..)


صرخ واحد من رجال الدفاع المدني للناس ألي واقفين عند باب الشارع يتفرجون
سادين الباب ..

( تعالوا طلعوووه .. تعالوا ووخروا عن المكان .. أنتم بهالشكل تمنعونا
نقوم بشغلنا ... )



فجأه .. طلع واحد قدر يدخل للصاله شايل بين أيدينه وحده


( الأسعاف ياشباب وينهم ... غايبه عن الوعي لقيتها ..باقي ثنتين
ماقدرت أوصلهن..)



دف أيدين الرجال بعيد عنه حتى يركض للي شايل أخته .. ووجها مليان دم ...
وقف قباله وسحبها بالغصب من بين أيديه ...




لافي وملامحه تضيع .. ودموعه نزلت غصب : هذي عبير .. ردي علي
تكفففييين ... لا تموتين وأنا أخووج .. عبير (بكا ) ردي علي .. رددي




فجأه نزل على الأرض ماعاد يقدر يشيلها .. دخل سالم ووراه ضاري
يتعكز بعصاه وعيونه مفتوحه على الأخر ومسرع ماطالع سالم يركض صوب
باب المدخل ماهمه أحد ... رمى شماغه وطاقيته حتى يرفع ثوبه ويدخل
رجع يطالع لافي وهو يضم وحده بين أيديه يحط جبهته على جبهتها



لافي بصوت يتلاشى من بين دموعه : عبير ردي علي .. ردددي



.. صرخ
واحد من رجال الأمن وهو فاتح عيونه من سالم ...




( تعالوا أخذوها لسيارة الأسعاف ..الوقت يداهمنا وفي واحد مجنون دخل !! )





وسط الصرخات وصوت سيارات الأسعاف ألي وصلت للمكان بعد ماتم البلاغ
عن الحريق ..
أمددت السلالم لواحد من شبابيك الطابق الثاني فوقهم السما ألي تحتضن
غيوم المغيب المتفرقه .. وبدى ثلاثه
من رجال الدفاع المدني يصعدون بسرعه حتى يدخلون قبال تجمهر العالم قبال البيت ... أنشالت عبير من بين أيدين لافي بالغصب حتى تنحط على سرير
متنقل .. ويتحركون المسعفين صوب باب الشارع .. تحرك ضاري بسرعه
وبخطواته الواسعه وقف معطي باب الشارع ظهره معترض طريقهم
وبسرعه فسخ شماغه الأحمر حتى يغطي فيه وجها ونص جسدها



ضاري بصوت الخوف : أنتبه يطلع منها شي ..!!


تحركوا مارين من عنده أول مابتعد عنهم حتى يوقف يطالع في رجال الدفاع
المدني وهم يحاولون يقتحمون البيت ويطفون هالنار المشتعله بالماي ألي
يندفع بقوه من فوق لداخل البيت ومن تحت بعد ..
العجز موت يذبح هالدقايق ألي تحتضر قبال كل شي ..!!
تحرك بخطواته صوب لافي حتى ينحني ويجر يده ..


ضاري : تماسك يالافي .. تمااسك


تمايل يجسمه على الأرض متساند عليها بيد وحده واليد الثانيه يسحبها
ضاري حتى يقوم معه .. حرك راسه صوب ضاري حتى تتعلق ملامحه
في ملامح صديق أخووه المرحوم .. الصديق ألي غاب عن النكبه ألي صابتهم
وأمتددت لسنتين ..!


ضاري متجاهل ملامح لافي ألي أوجعت قلبه : قوم وأنا أخووك .. قوووم



تحرك بسرعه من طلع واحد من رجال الدفاع المدني شايل بين أيديه وحده ... راح يركض
صوبه مثل الممفجوع وهم بدووا فعلا يسيطرون على الوضع وينقذون ألي داخل ..
سحبها مو مصدق أنه يشوفها .. تتمتم بكلام ماهي بوعيها وتكح بقوة ...
دفن وجها المليان دم نفس عبير على صدره والراحه تقفز في صدره رغبات
خلته ينفجر بكا وهالراحه تلامسه حد العمى ..!!



لافي : الحمدالله ياااااااااااااااارب .. الحمممدالله ..!


ظل ضاري واقف يطالع بلافي وفي اللي يخبي وجها على صدره يضمها
بشكل غريب .. يجهش بالبكا وهي بين أيديه ..!
تحرك بسرعه صوب باب المدخل وليليان بين أيديه مابين الوعي والاوعي ..
بيركض فيها صوب سيارة الأسعاف
تبعها صوت واحد من رجال الدفاع المدني يصارخ بعالي صوته

( النار حاصرت واحد من الشباب معه ياااااااااااهل .. أدفعوا لي المااااي من هالصوب .. !! )



في مطار الكويت الدولي ..


جالس برسميه وهو لابس بدله رسميه توحي بالهيبه والمكانه ألي تحتويه ..
حرك رجله حتى يحطها على الثانيه وهو يطالع هالناس ألي منتشرين
في صاله المطار ..فز واقف من أرتفع صوت الأعلان عن رحلته لفرنسا
موطنه الأصلي .. أنحنى حتى يتمسك بشنطه السفر ويبدى يسحبها
.. دق جواله
وبسرعه فتح الخط حتى يستقر على أذنه وبلهجه فرنسيه بحته
( ألو )


وقف يستمع للي داق عليه .. عيونه بعبث تنتقل في كل شي قباله
ومسرع مابتسم بأنتصار

( أذا تمت المهمه على أكمل وجه ..حسنا هذا هو ماأريده ..أسمعني جيدا
لتبقى على أتصال دآئم بكل المستجدات هنا فالكويت .. نعم ..
هي صفعه بسيطه له ولما نمتلكه ونستطيع عمله .. أبعث بالوصيه
المهداه أليه بعد أيام من الحادث ... وأحرص على بقاء الحادث قضاء وقدر لاغير ..
حسنا ألى اللقاء )


نزل جواله وهو يبتسم بخبث .. ومسرع ماتحرك بخطواته مغادر هالبلد
ألي وقت ماهو معروف ..
يغادر ريحه الغربه والرحيل ألي سعى على أنتشارها ..
يغادر الأحلام ألي ضاقت بأصحابها ..
يغادر الأماني والجفا المنخور في صدر الرحيل ..!!


وبعد ساعات طويله .. مميته من ريحه الدخان وأضواء النيران ألي رغم غياب الشمس
ماغابت ..!!
كانت صرخاته تجلجل قبال مدخل البيت والظلام يحوط المكان ببشاعه
الأحزان وفاجعتها ... الحوش تملاه مستنقعات الماي ألي تعكس هالأنور حواليها بالحوش ..
وبرا أنوار سيارات الدفاع المدني والأسعاف تنير
شوارع ترتل الفراق نغمات تقاوم هالصدا ألي ينهش عظام البعد ..
يتمايل على الجدار حتى يمسكه علي بثوبه المبهذل


علي والعبره تخنق صوته : قوول أن لله وأنا أليه لراجعون سالم .. أصبر بهالمصيبه
سالم يضرب الجدار بقوة : راحت يااعلي .. رااااحت .. ماتت
علي يرص على أسنانه مايبي يبكي قباله ولا يضعف : سالم أمش معي .. خلاص مالك
قعده في هالمكان



( لا حول ولا قوة ألا بالله .. )
قالها المسعف ألي يشيل سرير هو وخويه أتغطت صاحبته بالكامل ومتحرصين أن الغطا ماينفتح
عنها أو يطيح حتى ماحد يشوف بشاعه المنظر .. مروا من عند سالم ألي نزلت دموعه بقوة وراح يركض لهم



سالم يوقف مو بوعيه : وين ماخذينها .. وين ... نزلوها ماتاخذون زوجتي .. ماتخذونها
والله ماماتت .. ماماتت
علي يمسكه وهو يجره عن السرير : سالم .. مالك ألا الصبر
سالم صرخ بقووه .. : آآآآه .. راحت ياعلي .. تكفون بشووفها .. تكفوووون .. لا تاخذونها
لأي مكان بعيد عني ..



نزلوا المسعفين السرير المغطى حتى يوقفون قبال سالم وعلي



واحد منهم : مانصحك تشووفها ...
سالم مسك راسسه : ماتت محترقه ياناس .. زوجتي راحت .
الثاني بحزن وضياع على حال سالم وملامحه ألي تموت وجع : أن لله وأنا أليه لراجعون ...
الله يصبرك ويبشرك بسلامة ولدك .. قدمت حياتها حتى تنقذه ويعيش هالولد ..!!
ولدك قبل شوي طلعناه بحاله مايعلم فيها غير الله . الله يصبرك


دخل رحيم يركض لباب الشارع ومن دخل وقفت خطواته...
حط يده على راسه والدموع تلمع بعيونه توه جاي من المستشفى وألي هناك حالتهم
ماهي أقل لكن ماهي أعظم من ألي يشوفه ... أنحنى المسعفين وشالوا السرير متحركين وسط
هالحوش المتبلل بالماي على الأخر وريحه الحرايق تذبح ..!
مروا من عنده وتمايل واحد منهم بالغلط من حصاه رطبه .. نوى يطيح بس وقف بطوله ..
تمايل السرير لثواني حتى يطلع من تحت الغطا يد .. شهق رحيم بقوة من لمحها ..
سودا على الأخر .. رجع خطوتين وهو يتنفس بقوة وجزماته تبللت بالماي وهو
يدوس عليه ... هذي مناير زوجه سالم .. لا مستحيييل ... لف صوب سالم ألي أطلق
صرخه حتى يطيح على رجوله ماعاد يقدر يتحمل ألي يصير ...
مناير رحلت عن هالدنيا وماعطاها أجمل مايمتلكه عشانها ..
ماعطاها شي داخل ضلوعه كان يعتقد أنه الأجمل .. ذيك الأشياء ألي نحتفظ فيها خوفنا
من أن جماليتها تغيب من نبوح فيها ..
نتمسك فيها ونخزنها في رف للكتمان ... نخاف من لذه الفرح لا ظهرت تختفي فيها ...
نخاف من كون هالشهوه الباذخه في ذات الشخص تنجرح ..
تتحول فجأه من شي لأشياء موجعه ..
نزل يده حتى يبكي على حال أخوه ... ولحظات طلعوا من المدخل أثنين يتحركون بسسرعه شايلين سرير
بعد ثاني مغطى ... حس أنه ماعاد يقدر يتنفس .. فتح عيونه على الأخر
وهو مايدري من ألي أنفقد بعد ..!!
من ألي كان صباح هاليوم يتقاسم معهم الحياه وهالحين مفقوود ...!
رفع علي سالم بالغصب حتى يمشي فيه بعيد عن المكان وعيونه تغرق
بالدموع



علي يطالع رحيم وبصوت بالعافيه طلع : تعال ساند أخوك معاي بسسسرعه
رحيم يمسح دموعه وغصب تنزل : أن شاءالله ..



تحرك حتى يلف يد أخوه حول كتفه وسالم بالعافيه منحني .. وبصوت يكسر
هالرجوله الماثله فيه


سالم : لا ياخذوونها ... لاتروووح ..
رحيم وقف يبكي : ..............
علي بصرامه حالة أخوه ماتسمح له يشوف أحد منهار محتاج ناس تحثه على الصبر : تماسك ..!
رحيم يمشي طالع من الحوش وهو يهز راسه : ............................


في أول أيام العزا ..


وقفت سياره علي قبال بيت سالم حتى ينزل وهو لابس ثوب أسود والغتره أطرافها ملتفه
حول رقبته بدون عقال .. تحرك بسرعه لطرف الثاني حتى يفتح الباب ويمد يده
يبي يساعد سالم ينزل ...تمايل بالعافيه حتى ينزل ببطء وهو يرتدي من الحزن
جلباب أسود في هالفقد الغالي ... غترته الحمرا طرف منها مرمي على كتفه وطرف مرجعه
لورا .. حزنه يتناثر على الأرض من أول ماخطى أول خطواته صوب المعزين في
ديوانيته ... سحب طرف من شماغه حتى يحطه على فمه ويجهش بالبكا قبال
علي أول ماتذكر أنه حتى أنحرم من شوفتها .. توديعها الوداع الأخير ..
وش بيودع فيها وهي على قولتهم قطعه من الفحم ...!!
ضم أصابعه ودموعه بقوة تنزل من عيونه حتى يحط هالقبضه على شفاته ..
يستقر على ظهر أيديه قطعه قطن ...
الكلمات داخل جوفه تموووت ..وملامحه تغرق في هاليوم ألي قدره بألف وجع ..!
أنتهى الزمن فيها ..
أنتهى ولاعاد له يعيش في قلبه ..
فقد الأنسانه ألي يشوف بعيونها مدائن شوق تفتح أبوابها في كل صباح وهو يصحى
على أبتسامتها .. وأحيان على صوتها وهي تهدي ولدها ماتبيه يزعج أبوه ..
راحت ولا برر لها ألي كانت تعتقده فيه ..
أنفتح الباب ألي وراه حتى ينزل سيف عيونه حمرا والصمت يقتل الحياه في وجهه
وتبعها رحيم ألي نزل من الجهه الثانيه



علي يمسك يد سالم : سالم تذكر أنها ماتت شهيده .. راحت لرب العالمين ألي أرحم مني
ومنك ..
سالم تمايل بجسمه الضخم على الباب وهو يصد بوجهه الغرقان بالدموع : .........................



وقفت سياره جيب ورا سيارتهم حتى ينزل لافي وبسرعه يركض يفتح لأبوه
الباب .. يسانده وهو فلاح بالعافيه يتحرك .. تبعها أبو تغريد ألي نزل ماسك
سايقهم محمد ألي كان حالته حاله ... فجأه وقف محمد وأنفجر بكا مال براسه
وهو يحط أيديه حواليه .. لف سيف ورحيم صوبه ومن شافوه ينحني على الأرض
وأبو تغريد يحاول فيه يوقف غرقت عيونهم بالدموع حتى ينفجرون بكا ..
كان شكله مؤسف وزوجته ميري صلوا عليها مع مناير بعد مارفض محمد أنهم يرسلون
جثتها لسفاره حتى تروح لبلادها هناك ...
قام يصارخ أول ماطلبوا منه يوقع على أستلام الجثه ...
رجع سالم يجلس على السيت ورجوله ماعادت لها قدره تشيله ... أنحنى علي حتى
يسحب يد سالم يبي يسانده


علي : يلا خلنا ندخل ضاري من الصبح فاتح ديوانيتك ويستقبل الناس
سالم يهز راسه بالرفض : أنا بمشي لحالي
علي : بس ..
سالم بالعافيه يوقف ويروح يمشي خطوه يتبعها خطوه بالعافيه تتحرك : تبيهم يقولون عني
ماهوب رجال ... ماقدر يتماسك يوم توفت زوجته ..




وقفت سياره فورد عند باب البيت حتى ينزل بو فواز وولده نمر تبعه فواز ..
عقد علي حواجبه بنظرتها الحزينه أول مانزل سامي من سيارتهم ووقف
ورا بو فواز ..
حاول يستوعب ألي يشوفه .. ومايدري وش ألي جمع سامي بعايلة بو فواز ..
لدرجه جاين معهم وبسيارتهم ...!!
لف براسه صوب سيف ورحيم


علي : ألحقو سالم .. تراه ماله حيل أساسا


تحركوا بخطواتهم الواسعه حتى يوقفون وراه .. الشمس برغم حراراتها
وتوسطها كبد السما .. مازال هالكون حولهم تلتحفه بروده هالهواء والمشاعر المتجرعه
أكواب الحزن حد الشبع ..!
تحرك بخطواته صوب محمد ألي بكاه يتردد على مسامعه ولافي صار يمشي يساند أبوه
ويده ملتفه بشاش كلها ..


علي ينحني ويرفع محمد حتى يحضنه : أمش معي ..
محمد يبكي ويتكلم بكلمات ماهي مفهومه : أنا .. راح .. مافيه ..
علي يحضن كتف محمد صوب صدره ويطالع أبو تغريد : شفت أمور السفاره
أبو تغريد : أييه .. رحت لهم قبل الصلاه ومحتاجين أجراءات والله يستر أذا ماوقفوا بوجه
دفن زوجته هنيه عندنا ..
علي يسحب ميري حتى يمشي معه : لاحول ولا قوة ألا بالله .. لاحول ولا قوة ألا بالله ..





تمر الساعات والأيام كئيبه ..رائحه الحزن تفوح في هالأيام حد الزكام ..
والفرح ماعاد له وجه ينشاف وماعاد يحمل البياض في ملامحه
.. الفقد عظيم والأبتلاء ماله ألا الصبر .. تمر أيام عزاهم في المستشفى مابين دموع
وصرخات تنكتم في شافتهم ..
واقف بتعب في سيب طويل .. قباله أبوه والحزن يملا تفاصيل الكبر فيه ...
صد بعيونه رغم أن الوجع يموت بداخله ألف مره ...
لابس ثوب لونه بني وشعره الرمادي مرجعه لورا .. هالمكان وريحته تجذبه
لماضي عاشه الكل بنفس الأحداث ...
غمض عيونه بلونها الأحمر من حس بالدموع تتسرب لها حتى يصد بوجهه
عن أبوه .. يحط يده على خسره ويلف بجسمه متمايل بكتفه على الجدار ...
صارت مشاعرهم في هالأيام رثه .. تنوح الرصيف البارد ألي يوقفون عليه ..!
والأسئله مايدري ليش صارت عقيمه ...ماتنجب ألا الفاجعه في أجابتها ..
أنقطعت الحبال ألي كان ممكن تسحبهم للأبتسامه ...
لكن حتى الأبتسامه تقفلت أبوابها من زمان ...
تحرك بسرعه من طلع الدكتور من العنايه المركزة ألي ينام فيه أخوه ومافي أحد
قدر يعطيهم الجواب ألي بيخلي الخوف ينام مرتاح بداخلهم ...
وقف قباله ومسرع ما أبوه فز واقف تبعه سيف جاهم يركض من أول السيب


فلاح بصوت مخنوق : تكفا يادكتور ماالنا صبر لسكاتكم .. طمنوني على ولدي ..
الدكتور أخذ نفس وملامحه ماتبشر بخير : ..............
فلاح رفع صوته والتعب يهد حيله : قووول لنا
الدكتور يضم شفاته يجاهد يتكلم : مالكم ألا الدعاء ياعمي .. ولدك بطنه على ظهره
حرووق من الدرجه
الثالثه .. ويده اليمين تشوهت بحروق صعبه ..ماسلم فيه ألا وجهه
لافي رفع يده وحطها على راسها : خسر يده يعني .!
الدكتور : طلبت أخصائي قبل شوي يكشف أذا كان فيه أمل نفصل الأصابع عن بعض أو حتى يسافر لبرا وهناك يعمل لها عمليات تجميليه بالي يقدرون عليه ..
فلاح حط أيديه على وجهه وقام يبكي : .................
الدكتور تقدم منه حتى يحط يده على كتف فلاح : الدعاء ياعمي هو ألي بيساعده .. كنا خايفين من كسور فالظهر أو حتى الحوض بس الحمدالله رب العالمين عطاه عمر
في هالحياه .. عليكم تصبرونه لا صحى وتوقفون جنبه ..
فلاح تمايل وعلى طول لافي تمسك فيه : راح ولدي العود وهالحين ولدي هذا بيعيش
طول عمره مشوووهه .. ياااااااااارب لطفك ورحمتك
سيف تساند بظهره على الجدار حتى ينزل بجسمه على الأرض جالس ويبكي : ..................
لافي ماعاد يشوف زين من عيونه ألي غرقت بالدموع : يبه تمااسك ..عشان طلال



تحرك فيه لافي حتى رجعه جالس على الكرسي


الدكتور بخوف : نطلب له ممرضه تكشف عليه ..
فلاح يرفع يده وهو يمسح دموعه بغترته : لالا مايحتاج .. ( سكت حتى يقول بحرقه وبصوت يتقطع ) لاحول ولاقوة ألا بالله .. يااارب أرحمه ياااارب ..



في أخر السيب وبغرفه مطرف بابها .. جالسه الجده على كنبه وهي ممده رجولها
والممرضه واقفه تقيس ضغطها .. على السرير جالسه ليليان بملامح بائسه لاتبكي
ولا حتى واضح عليها أنهيار .. بيدها مغذي يمتد بأنبوب لفوق ..حركت عيونها
صوب جدتها ألي وجها متورم وملامحها مكسوره .. ضعيفه ..!
على شفاتها لزقه وعلى جبهتها شاش مغطي فيه الجرح ألي خاطوه يوم أسعوفها أول ماوصلت
من بعد ماعطاها ألله عمر .. شعرها كله لامته لورا وجروح متفرقه تملى وجها ..


الجده تسحب يدها من أيدين الممرضه وبصوت واطي : ياااالله الصبر .. يالله الصبر


يرتفع صوتها حتى تختل نبرات صوتها وتختنق وهي تنادي رب الكون يمدهم
بالي صار لهم بجرعات صبر تواسي الأيام المقبله عليهم ..
أخذت نفس ببطء وهي تحس بمساحه نائيه بداخلها .. الأرض جافه ولاهي قادره تنهار
أو تبكي .. عاجزه .. صامده مثل هالحزن ألي يرافق صوت جدتها ..
كل شي فقد مناعته داخلها كل شي .. ومابقى غير أشياء تصرخ من ألي
شافته وكانت تسمعه يوم أحترق البيت .. جمعت أصابعها وصارت
ترصها بقوة وبرجفه وهي تطالع كل زوايا الغرفه بعبث ..
في شي يتناسل داخلها .. يمنحها عمرا واحداث ماتتنسى مايحتضنه ألا الغيااااب ..!
أنفتح الباب حتى تدخل الجوهره وتنزل شيلتها .. طالعت ليليان بعيون أمها المتورمه
ووجها الأحمر ..


الجده لفت لبنتها : بشريني يابنيتي
الجوهره تحركت واقفه قبال أمها : مرايم يممه للحين غايبه عن الوعي .. وعبير من زود
بكاها والله ماتنام ألا بمخدر عشان لا تنتكس حالتها ..
الجده بصوت مبحوح : حولها أحد ..؟
الجوهرة هزت راسها وهي تمسح دموعها : أيه يمه تغريد من أولى تحاول تهديها مع عايشه
تقول ( أنهارت تبكي ) أنها سمعت صوت مناير وهي تنادي أحد ينقذها هي وولدها
( حاولت تنطق ) راحت مناير يمه من هالدنيا تاركه ولدها يتيم .. ( رفعت يدها
ألي ترجف حتى تحطها على فمها ) وسالم من بعدها بدنيا ماهي بهالدنيا
الجده تساندت بيدها على الكنب ومسكت راسها : ........................
الجوهره تاخذ نفس من بين شهقاتها : حتى ميري راحت وتركتنا ...





غطت الجده عيونها أول مانزلت دموعها على فقد مناير وميري .. الكل قادر
يبكي وينهار وهي عيونها بجفا تنتقل مابينهم ... دخل علي عليهن وعلى طول راح للجوهره
وحضنها



علي يلف أيديه حول كتوفها : تسلحوا بالصبر .. لا تنسون أن الرسول عليه أفضل
الصلاه والسلام قال (إن عظم الجزاء مع عظم البلاء ، و إن الله إذا أحب قوما ابتلاهم ، فمن رضي فله الرضا ، و من سخط فله السخط ) ..
الجوهره تمسح دموعها : .....................




لف علي براسه صوب ليليان ألي تطالعهم بصمت ولها كم يوم الدمعه مانزلت
من عينها فرق عن عبير ألي حالتها مايعلم فيها غير الله ...
ترك الجوهره وتوجه بخطواته صوبها وهي عيونها تعلقت فيه .. مد يده وحضن راسها


علي : يابوك بخير أنتي ..؟
ليليان هزت راسها : .................
علي لف للجوهره ألي تطالعهم ومسرع مارجع يطالعها والخوف عانق نبرات صوته : مايصير يبه تخبين دموعك بهالشكل
الجده ترفع يدها وتطالعهم : والله ياولدي تعبت أبيها تبكي كود ترتاح .. لا نامت ماأسمع
منها غير الونين
علي حضن خدها : تبين تقولين لي أي شي عن ألي صار ..
ليليان بصوت جاف وملامح تذبل بهالات سود حول عيونها : عبادي بخير ..!
علي بسرعه هز راسه : أيه .. والله ماعليه خلاف بس فكه تعور شوي وهالحين الحمدالله
ليليان نزلت راسها تطالع حضنها وأصابعها تحطهم بهالحضن : ..................
علي يطالع الجوهره : بشريني عن أم سالم وفهود بخير
الجوهره : فهد توه كاشف عليه الدكتور ..يقول رحمه الله وسعته وأم سالم ماهي أقل
حال من أختك ...
ليليان بصوت خافت : أقدر أروح للحمام ..؟
الجوهره تقدمت لها بسرعه : بس أنادي لممرضه تنزل المغذي
ليليان بدون مقدمات شالته حتى ترص القطنه على مكانه : مايحتاج
علي طارت عيونه: أنتي شنو سويتي لا يضيع دمج ..!


سحبت رجولها حتى تنزلهم من على الأرض .. ومن وقفت حست بتوازنها يختل بس على طول
تمسكت بأيدينها الجوهره وهي تشاهق من البكا ...



الجوهره تمد يدها لعلي وبصوت أشبه بأنها مزكمه : شوف وراك عبايتها هاتها لي


لف علي وعلى طول مد لها العبايه من سحبها من الطاوله .. صارت الجوهره
تلبس بنتها عبايتها مع النقاب ولحظات تحركن طالعات من الغرفه


الجده : أخبار فلاح ..؟
علي ياخذ نفس وبصوت يحاول يطمنها بالحال : بخير ياخاله
الجده : هم عرفوا وش منه الحادث
علي رفع أيديه بعبث : طلع يمه عداد الكهرب الأساسي صاير فيه ألتماس وهو ألي سبب
هالأنفجار ... وأسطوانات الغاز الموجوده بعد زادت كل شي .. الله سلم ليليان وعبيريوم طلعن بسرعه من المطبخ قبل لاينفجر ...
الجده بأستغراب : كبف ألتمس ..؟!
علي تحرك حتى ينحني ويجلس الكرسي : هذا ألي قالوه لنا الشرطه بعد التحقيقات ..
ويوم سألو فلاح يا خاله قالهم أنه مايسوي صيانه للكهرب بشكل دوري
الجده ترفع عيونها للسقف : يااااااااااالله تحسن خاتمتنا وتلهمنا الصبر يااارب
وقف علي : يلا خاله بروح أشوف الباقين
الجده : ناد لي فلاح ياولدي
علي هز راسه : أن شالله


تحرك بخطواته الواسعه حتى يطلع من الغرفه ويتحرك في سيب طويل ..
معطي الجوهره ظهرها ألي كانت واقفه عند دوره المياه النسائيه ..تنتظر بنتها تطلع
بس تحركت من شافت رحيم جاي يركض لمها


رحيم : عمتي ألحقي أمي تعبت عن فهد وهو يصيح وورده زادتها بجي
الجوهره بخرعه : يلا



تحركت بخطوات متسارعه وراح رحيم يمشي معها .. بلحظتها وداخل دوره
المياه طلعت ليليان من الحمام حتى تتحرك صوب المناديل المعلقه ..
صارت تسحب منهن بصمت ومسرع ماصارت تجفف أيديها .. أبتعدت عن الحمام متحركه
صوب الباب ومن فتحته تحركت خطوه وسكرت الباب ومن حركت عيونها
ألا لافي يطلع من وحده من الغرف بالسيب ووراه تمشي تغريد
ومسرع مانحنى جالس قبال الكراسي ألي قبال هالغرفه ..
ينحني بظهره وبملامحه الغرقانه في بحر الصمت والحزن حتى يتساند
بكوع أيديه على ركبه ...
ماتدري ليش حست من شافته بشي يتصدع داخلها ..
ولحظات جلست تغريد على ركبها قباله .. حضنت أيديه وصار تطالع في عيونه
وتتكلم بصوت واطي مايوصل لها ..
وهو بنظره غريبه يطالع في عيون تغريد منسجم مع كلامها ونظراتها له ..
شعره الرمادي مبعثر حواليه ..
قبال هالمنظر حلم يووؤد تحت مخده النهايات ..
بحاجه لشي يفجرها ويخليها تشهق بهالبكا بدون ماتتوقف ..
ممكن محتاجه له تكون في مكان تغريد بهاللحظه .. رفعت تغريد أيديها وحضنت كفوفه
صارت تلملمها من بين أصابيعها وهو صد عنها ...
صد لدموع تايه فالطريق داخل الجمر ألي يكويه وبسرعه سحبت تغريد يدها
وحضنت خده ..قامت تبوس راسه .. وتلف يدها حول راسه ومسرع مابعدت عنه ..
تواسيه وكأنه بالصمت يحكي لها حجم هاللي بداخله
وهي فهمته .. فهمت هالنظرات وهالبوح ألي عايش بين جدران الصمت ..
رفع أيديه شابكها مع بعض حتى يقربها من بين شفاته ومسرع مافك أصابيعه
حتى تنزل على أيديها يسحبهم له ...
وهي واقفه بمسافه بعيده عنه محتاجه يلفظها المدى لأبعد نقطه تنتهي فيه ..!!
بينهم جمر أنكوا
وهالحين ماكان بينهم غير حزن ماعرف يجود بالدمع ..
هالمصيبه رغم فجاعتها بس قربت أثنين أنهكهم الوجع ..
هذا هو يطالع بعيون تغريد بدون شبع
وهذي هي تعوض اللحظه ألي رمته فيها بهاللحظه حتى تواسيه
باللي تقدر عليه
تهشمت أحلام وتحطمت مراياهم بس في ركن جميل مازال يحن لهم ..!!
مافي أصعب من أن الكلمات تفقد مناعتها في لحظة محتاجه تتعبى فيها بالأحاسيس
وهي صدت بعيونها حتى تبتعد بخطواتها وهي تفقد تفاصيل الحياه
برغبتها المفقوده فالبكا ..


<

<

<

كــــــــــــــــــــــــــــــت

( لاتنسووون صلاة الوتر )

الله يسامحك يا كريستال على الي سويتيه فيني والله اني مثل ليليان العبرة ساده حلقي وودي اصرخ
قلبي اوجعني بقوة
والله فاجعه ماهي بس مصييبة
وكلتي لهم الاوجاع مضاعفه

اوجاع نفسية اضعاف الاوجاع الجسدية
يعني الم في الم في الم
يعني مو بس فقدوا الي يحبوهم وتوجعوا منهم
كمان تشوه اجسادهم

اتوقع الوصية الي تكلم عنها ميشيل هي وصية سعود الي تركها لانه كان حاس انه راح يموت بسبب ميشيل
وميشيل اخفاها من بعد وفاة سعود لانه كان يراقب سعود مزبوط

وبكذا راح يعرف لافي انه ميشيل الي وراء كل شئ صار

ليليان راح ترجع وتعيش برود الي كان متملكها بعد وفاة ابوها بس المره هذه اكثر من قبل ويختلف انها راح تبدا تبني مستقبلها وما ودها تعتمد على احد

شفتوا كيف البزر كان عقلها كبير واكنت حاسبه حساب هاليوم الي راح يرجع لافي لحبه القديم لانه وقت ضعفنا ندور الصدر الي نحبه حتى ننثر عليه الامنا
يعني يزور اخته ويراقب وضع اخوها وزوجته نسيها ما حاول يشوفها
انا ما قول انه مايحب ليليان بس الي مستبدة في قلبه تغريد بلا منازع وليليان مجرد صورة بريئة لحبيبته الاصليه

طلال مو مكفيه الحروق والتشوهات الي يعاني منها كمان تشوهت ايده هل يقدر يرجع يرسم مره ثانية لانه رسام وفنان والرسم هو طريقته للتعبير حتى لما جاء يعبر لمرايم عن مشاعره خلى رسوماته تختصر عليه الشرح والتعبير

والله هذا الي طلع معي دموعي معبيه عيوني وبناتي صاروا يبكوا

من جد صرت اخبص بس ما اقول غير الله يسامحك ماكنت اظن اجرامك ياصل لهذا المستوى

واحس بالذنب لاني انا توقعت وفاة مناير وانه راح فهد يعيش يتيم والله شئ يوجع

مرايم اتوقع تحتاج لعلاج نفسي لان الي تعرضت له اشد من الي تعرضت له عبير وهذي عبير على المهدئات
وليليان تجمدة مشاعرها ايش الي راح يرجعها للحياة من جديد الله يعينها على ما بلاها

والسفر لافي مؤكد منها عشان علاج طلال وكمان علاج تغريج يسفرهم الاثنين فكذا يعملوا عشاء عائلي عشان تغريد تسافر مع لافي

ليليان الله يجبر قلبك وجعتي قلبي دايم الكل ملتهي عنك مالك الا حمده هي الي بس لك امك الفزعة غيبة عنها انك محتاجتها كيف راح يصير لك لو اغمي عليك كان قالت لرحيم ينادي ممرضة عشان تنتبه لليليان بس ايش نقول الله يعينك يا قلبي على ما بلاك لازوج داري فيك ولا حد يحظن ضعفك
اتوقع سامي يزور ليليان متخفي وويصيدهم لافي
او انه صالح يكون متزوج البندري ويجوا يزوروا ليليان ويتحجج فيهم ويزور ليليان ووقتها ينجن لافي الي الحين لاهي مع تغريد

لا تقولوا انه يحب ليليان وكيف تاثر وخبئ وجهها في صدره شفنا تصرف ضاري لما عرف انها عبير كيف سترها يعني ردة فعل طبيعية

انا ناويه على مظاهرات على كريستال وعلى لافي شيخ العازة خلاص ما نبيه خله يطلق ويشبع في تغريد
خلاص المشاعر الحقيقية طلعت
وليليان بعدها بداية حياتها تقدر تعيش وخلهم الشيبان يشبعوا في بعض


وكريستال بارت يوم الثلاثاء واذا ما طلعوا البنات راح اسوي انقلاب عسكري ونفجر في متصفحك اذا منزلتيه
واحرش عليك مشاعل وغيمة عطر يمقلبوك لما يشيبوا راسك
واذا اضطريت اتحالف مع مدراء المنتديات الي تنزلي فيها واسوي لك اكبر انقلاب
واخليهم يعلنوا عقوبات ومنه التصدير والاستيراد وعقوبات اقتصادية وسياسية ومنزلية حرة ترى صرت اقط خيط وخيط ومن الصدمة لكذا اتقي شرنا احنا الليليانيات من بداية الرواية وانتي مستلمه ليليان خفي عليها ياختي شوي



واخر شئ والله انك مبدعة مبدعة مبدعة والله عشت الجوا وبكيت معهم والله روحي طلعت لما بكاء سالم لما حط الشماغ على وجهه لاني عشت هذا الوضع والله دموع الرجال صعبة كثير كثير
ماشاء الله شجاعه منك الي قدرتي تكتبي مثل هذا الحدث وقدرتي توصليه بالبراعة هذه والله على ماقد ما كان البارت موجع على ماقد ماكان تحفة فنية

الله يحرم اديك عن النار يا رب

تسلمين حبيبتي على هالبارت الموجع لآخر حد..
الله يرحم مناير وميري. . ماتمنيت مناير تموت وفي خاطرها شي على سالم. .
وكسرت قلبي ليليان وهي تشوف لافي وتغريد تواسيه. .
البارت مهما قلت عنه موجع ما اقدر اوفيه حقه. . بسبب الانفجار والفقد اللي صار.
ذكرتيني بانفجار صار في البيت مأمنشهور واحترقوا فيه الشعمن 3 الله يشفيهم. .
الله يحفظ الجميع من الحرايق ومن كل شر..
تسلم يدينش ولو ان البارت مؤلم. .

يمممه خفت اقرأ البارت :o

قلت اول اشوف الردود .. ليه كذا كريستال كان بس خليتي ميري تموت استغفر الله بس

ليه مناير حراااااااام :(

هذا بعدني ماقرأت البارت وببكي هذا كيف لو قرأته مابانام :(

هذا اول رد ليي على روايتك

معحبتك من خلف الكواليس : ام هادي

الحين بقرأ البارت واذا صار لي نفس بعلق

تم الإرسال من جهازي GT-I9100 بواسطة تاباتوك 2