السلام عليكم و رحمه الله و بركاته

صباح الخير و الرضا من رب العالمين

ربي يعطيج الف عافيه هموس عالبارت .....



فارس ردة فعله متوقع جدأ و لا واحد اناني نفسه وش ممكن تكون غير بهالشكل .. مستحيل يتسنع الا بعد ما يشيب راسه و اتوقع قريب شجون بتجيب راسه و تشيبه عدل ..

و لا ما حلا ولده بعينه الا بعد ما بغت تتزوج و ما كان خايف من كومه الشحوم و بالسرقه يشوفه بس الظاهر الغيره لعبت دورها وحن لشجون و لكل شيء فيها فلقى اسلم طريقه يهددها بولدها و لا ليش الفرحه بصوته لما وافقت ...

اتوقع فارس من الاول حبها او خليني اقول تعلق فيها اجذبته بحياها و دينها و حسن تصرفها بس كان الاصل اللي ما يشرفه عايق بينهم و دخول دلال على الخط زاد الطين بله ...

بهالوقت شجون رجعت و معاها ولده يعني عنده عذر كبير انه يرجعها من غير ما يبين هدفه الاساسي و كومه الشحوم اخيرا سوت شيء لوجه الله بسفرها خلت الجو لفارس يتنفس شوي منها ...

اتوقع اول العقاب و الصدمات لفارس شكل شجون الجديد عليه و خصوصا انه باقي على كلامه و تجريحه الاولي و كيف لا شافها بالحله الجديده بيطير عقله و هذا راح يكون اكبر عذاب نفسي له .. شوف و حر جوف ....



شجون رجعت عشان ولدها بس يمكن في سبب ثاني لان كان بامكانها ترفض ياسر و انتهى الوضع بس هي شكلها حبت تنتقم لنفسها شوي و توري فارس منو شجون اللي رفضها اول كيف صارت ...



مشاعل و سلطان بشاير خير تمر و خصوصا انه افكارهم عن بعض تغيرت عن اول اللي كل واحد يفكر انه الثاني كارهه بس يحتاجون جلسة صراحه و فتح القلوب على بعضها عشان تبين الصوره لبعض و ان شاء الله قريب ....



ياسر سبحان الله شجون مو مكتوبه له لا بالاول و لا تالي خيره اكيد .. و عشان ينساها لازم يتزوج و يشوف حياته بمراه تملا عليه حياته . اتوقع مشاري ممكن يعرض عليه غلا بس هي ما راح توافق ...



الدحمي و ريوف يا لبيه عليهم اتوقع حياتهم بتكون حلوه و هاديه .. و ممكن يكونون حلقه وصل بين فواز و غلا معنهم الاثنين قمة التناقض بالتصرفات ...



سلمتي يارب

بانتظارج

.......

السلام عليكم
كيفكم صبايا ؟
اولا الروايه جد حلوه ومن اولا بارت وهي شااادتني لدرجت اني قريت كل البارتات في يومين بس
عجبني وصفك لشخصيات والاحداث انتي مبدعه
بس كان عندي سواىل متى تنزلين البارتات اي يوم بالتحديد
واستمري بنفس اسلوبك هو اكثر شي شدني اني استمر في القراءة لين اخر بااااااارت
ويعطيك العافيه أمي روحي

مساء الخير والبركات
ممتنه لكم ممتنه لك من تفاعل معي ممتنه لك من شاركني روايتي ممتنه لكل من افرغ من وقته جزئا لروايتي
ممتنه لهم حتى النخاع وارى كلماتي قليله بحقهم
مع لق الي يردون علي بالمنتدى هذا بس من جد وبدون مبالغه ردهم عن الف رد فديت العسولات كفو ووفو واتمنى ماينقطعون زي غيرهم
عارفه فيه ناس خلف الكواليس بس التشجيع والرد له مردوه
وحياك ياقمر غروري ذابح غيري من ذوقك والله وماراح اغير اسلوبي بعون الله
بس من جدماوفيكم حقكم الا بعودة لكم بظهر الغيب

احبابي يانور روايتي
احببت ان اخبركم ان روايتكم بيت العنكبوت لم تنتهي فصولها ورمضان قرب فأنا مضطرة اكمل فصولها حتى برمضان حتى لاتنسون احداثها فسوف يكون موعد البارت السابع والعشرون يوم الثلاثاء بعون الله
لاني اعرف اول رمضان راح انشغل انا وانتم وماراح نتفرغ لا للكتابه وانتم ماراح تتفرغون للقرآءة
من يرى ان يوم الثلاثاء غير مناسب يقول لي ااخره اكثر
ومن يراه مناسب يقولي انتظر ردكم فرأيكم يهمني

اعذروني على قصر البارت اليوم معزومه ومشغوله حيل بس ماحبيت ااخر البارت عن موعده
قرآءة ممتعه

الــ ج ــزأ الــســادس والــثــلاثــون

في غرفة شجون
دق جوالها ردت ببرود
فارس: كل أهلي ينتظرونكـ تحت
شجون: بهدوء طيب
فارس: بعصبيه قصدي لاتتأخري عليهم ترا حتى نوال وغلا فيه عيب تخلينهم تحت ينتظرونكـ مو حب فيكـ ترا شوق لولدكـ
شجون: ترص على أسنانها قلت طيب ابغير لبندر وأجي سكرت بدون مع السلامة
فارس: يناظر جواله دق ثانيه وهو معصب ثالثه لارد زين ياشجين ان ما ماذليتكـ أشد من الي قبل كلماتك وشروطك اللي مالي أمها داعي ان ماخليتك تبوسين رجولي ندم ماأكون فارس ولد بندر حط جواله يحاول يظهر انه هادي قدام أهله شاف الطاولة المتروسه انواع واشكال وبالونات مكتوب عليها بندر وشي شجون بقلبه كذا جد راح تشوف حالها علينا مالت مادري ليه حابينها ومو متقلبين دلال لعيونها بس هي ثعبان تملك لسان ماعمري شفته بحياتي قام عنهم
أمه: وهي مبسوطه وين ياضناي
فارس: ابطلع مع ربعي بقلبه مابيها تنزل تظني ميت شوق عليها زيكم
أمه: ياوليدي مو زينه زوجتكـ توكـ رادها تطلع وتخليها
فارس: عصب مارديتها الا علشان ولدي يكون تحت نظري حتى النوم ابنام برا هي حاسبها حسبة مربية لولدي فقط لاغير يعني مافيها فرق عن شغالتنا ميري بس الفرق انها بدون فيزة
أمه: خاف ربكـ فيها هالمرة تراها وربي ماتستاهل تكلمه لحالها ماحد منتبه لهم
فارس: يووه يمه ماحد عارفها زيي كلكم منغشين فيها للأسف عن اذنكـ يمه ابروح لجورة المياه وانتي بكرامه واطلع
غلا: تنغز مشاعل اتمنى اشوف وجه لو يشوف شجون
مشاعل: تناظر غلا ليه ايش فيها
غلا: وهي مبسوطه رفعت كتفها مافيها شي بس الحين تشوفي بعيونك
مشاعل: جد قولي ايش فيها حمستني
غلا: تناظر فارس الي طلع من دورة المياه قالت لمشاعل اووص خلني اركز واشوف شغلي اخاف يفوتني شي من الحدث بس الاميرة مو راضيه تنزل مسويه ثقل شكلها
فارس: بدون اهتمام راح للمرايه المقابله للدرج وحط شماغه على كتفه ولبس طاقيته بعذين لبس شماغه وحطه تحت لحيته علشان يلبس ويثبت العقال سمع صوت رجولها تنزل بالدرج عرف انها نزلت شاف طرف تنورة بنيه شوي شوي لمح بالمرايه جسم مقسم كأنه مليكان رفع عيونه بههدوء شاف وحده ماسكه يد ولدها تعوده يمشي ومنزلة شعرها بس ماسكه خصلتين على الجوانب شعر اسود ناعم ووجه حلو بس مو واضح من المرايه ماقتنع انها شجون هذي وحده جايه مع شجون يمكن نسى انه ماكمل لبس شناغه لف بسرعه يبي يدقق بس المشكله كل مايدقق يشوف بنت ماعمره شاف مثل جمالها نسى نفسه ونسى الي حوله ونسى ان فيه وحده تراقبه وهي ميته ضحك
غلا: ميته ضحك على شكل فارس وهو متصنم مكانه وفاتح فمه
سحر: ايش فيك؟؟؟
غلا: ماقدر ماقدر اقول ميته ضحك شوفي فويرس ههههههههههههه
سحر: لفت تحت غطاها وشافت فارس واقف مكانه يطاله بشجون وهي تسلم على البنات
شجون: نزلت وسلمت عليهم يوم جاء دور مشاعل حضنتها بقوووووووة
مشاعل: بعدت عنها ومسحت دموعها فقدتكـ يالدوبا حيل
شجون: ابتسمت لها وأنا أكثر وربي ماتغابون عن بالي
فارس: ماحس بنفسه وهو يقرب منه شوفتها بالشكل اسكرته ضاعت علومه نسى كبريائه وشموخه ماح سالا وهو قريب منهم
أمه: فديتك فارس هونت تروح ليتك تكمل السهره معانا
شجون: بدون ماتلف وجهها له كانت مركزة مع البنات الي يبوسون ولدها
فارس: مرتبك هاهـ ايه قصدي لا يمه العيال ينتظروني
شجون: جلست على الكنبه مع البنات ومعطيته ظهرها
فارس: يشوف الجسم والعنق الطويل والشعر الي طايح مغطي نصف ظهرها بهدوء عن اذنك يمه وراح جهة باب الفله ولف بعنايه علشان يسكر الباب وتلاقت نظراته مع شجون بس هو نظرات وله وشوق وهي نظرات تحدي وكبريتء وشوخ سكر الباب وطلع لسيارته نظراته عالقه بذهنه وين نظراتها الي كانت هاديه وبريئه ماشوف الا نظرات كره وتحدي معقوله تكون كارهتني وهي كانت تحبني شغل سيارته بس كيف تغيرت كذا معقوله كانت ملامحها جميله بس ضعف وشحوب كيف مادققت الحين ماشوف الا عيون ذباحه خشم مستقيم فم مليان حواجب مرسومه على كثر ماشفت من البنات ماعجبتني ولا وحده منهم لأن كلهم مكياج اشد وحده لفتت نظري أختها فرح بس كانت مكياج وعدسات ورموش صناعيه هذي ماتعبت نفسها الا بروج خفيف وكحل وبس فركـ راسه معقوله هالجمال كان بخضني بيوم وماقدرته وربي احس اني احلم لو لون عيونه الي حافظه زين قلت هذي وحده غير شجون نزل مع ربعه بس سرحان مو معاهم ابد مشوق يرجع لشجون حاسم اشبع منها
أحمد: العب ايش فيك اليوم من جيتك هادي
فارس: يشغل زيقارته مالي نفس
ابراهيم: ايش فيك يابو الشباب
فارس: ابعد زيقارته عن فمه اوووف مافيني شي العبو انتم
جلسو الشباب يلعبون ويسولفون بس هو ابد مو معاهم طفى زيقارته وقام
أحمد: ويــــــن ؟؟؟
فارس: ابرجع للبيت حاس اني مصدع
ابراهيم: لاتخلينا اجل بكره ان شاءالله تروق
فارس: طلع قبل مايسمع ردهم وركب السياره حاس لسه ماشبعت منها ابشوفها ابمتع عيوني فيها معقوله كانت راح تروح لغيري مستحيل افرط فيها شجون لي انا وبس
=============
في بيت خال غلاب
غلاب: عازمه خاله يتعشاء عنده لان خاله رشوان جاي للسعوديه على حساب غلاب هو اصر يزورهم وياخد عمره ويحج
الكل مجمتعين ومبسوطين
رشوان: هاهـ اخبار ورشتكم
رشاد: الحمد لله كله من فضل الله ثم غلاب متقصر ابد وصارت الورشه تدخل دخل ممتاز
غلاب: قول ياخال من فضل ربي ثم فضل أمي انا مالي دخل
رشوان: حط يده على كتف غلاب وابتسم له سكت شوي ماعندك نية تتزوج ترا جلستك كذا ابد مو زينه شوف مستقبلك وجيب عيال يملون عليك البيت
غلاب: تنهد بضيق وهو يتذكر مشاعل الي راحت من يده ان شاءالله ياخال
رشوان: ناظر بأخوه رشاد ياخوي غلاب بحسبة ولدي وانا ابخطب منك بنتك سبيكه لولدي غلاب
غلاب: تفاجأ من طلب خاله كأنه حاس بالي بقلبه هو يتمناها لأنها سميت أمه وكانت تحبها بس منحرج من خاله رشاد بعد الي سواه وخاف خاله يفسر وقفته معاهم انه طمعان ببنتهم علشان كذا ماخطبها بس كيف خاله رشوان قرأ افكاره
رشاد: تغيرت نظرته من كره لغلاب الى حب واعجاب لأن غلاب تغير كثيررر رد بهدوء مالي شور الشور عند البنت وأنت عارف ياخوي ةالا انا ماراح القى احسن من ولد اختي لبنتي
غلاب: ابتسم لرد خاله مستبعد انه راح يقبله
رشوان: اجل شاورها ورد علينا
رشاد: ان شاءالله يالله تفضلو على العشاء
================
في بيت ياسر
كان جالس بالبيت الكبير لحاله حاس بطفش وملل كان يتمنى إن شجون تجي وتملا عليه الفراغ ناظر السقف انت اعلم يارب مابعدتنا عن بعض الا لأنك تعلم الخير لي وين يكون عدل جلسته الله يطلعها من قلبي خلاص صارت زوجة لواحد غيري مابي حتى افكر فيها بس يارب قلبي مو بيدي قلبي بين اصبعين من اصابعكـ يارب نسيني اياها يارب
=================
في بيت ابو مشاري
البنات مبسوطات سوا ضحك وسوالف
شجون: فرحت يوم طلع فارس حست هم وطلع أخذت راحتها مع البنات بس لفت تقطع من الكيكيه وهي مبتسمه بس تلاشت ابتسامتها يوم شافته راجع
فارس: فتح الباب وشاف بوجهه شجون وهي تبتسم طار عقله لإبتسامتها بس تلاشت فرحته يوم تغير وجهها وصدت عنه تكمل سواليفها مع البنات ومهمشته
غلا: يوم شافته قرب الا شجين كيف طلعتي كل هالزين شكلك مخبيته وقت الحاجه
شجون: وهي تآكل التورته ايه ايش عرفك وضحكت بنعومه
فارس: جالس بكرسي جنب أمه وباله معاها يوم ضحكت بلع ريقه بصعوبه ونزل راسه هالبنت ناويه تجلطني شكلها كل شي فيها جذاب مودلوعه بس انوثتها طاغيه حركاتها سواليفها صوتها كل شي فيها ايش فيك يافارس وينك ووين شموخك ترا الي قدامكـ شجون نسيت من شجون تخيل شكلها اول ماشافها بالفستان البنفسجي الوسيع والعيون الي الحكل سايل منها ووجه ذابل والكلف لاعب فيه وشعر منتف وحالته حاله رفع عيونه ويدقق وين الكلف اشوف بشرة صافيه وين الشعر المنتف اشوف شعر اسود ناعم والا العيون هي نفسها عيونها بس صارت تشع حيويه ونشاط وشموخ وكبرياء وقفت تحط صحنها شاف جسمها معقوله هذي حملت وولدت دلال انتفخت بدون حمل وهذي ماكأنها حملت ولا ولدت جسم مقسم وخصر صغير
غلا: حبت تزود الجرعه على خالها اقول خال ايش فيك سرحان اخاف نفسك بالكيكيه ومستحي وابتسمت له بقوة
فارس: عرف مغزى كلامها وانها تقصد انك مفهي مرة مع شجون غير وجهه عليها مالك شغل وبطلي لقافه لو بغيت قطعت لنفسي
غلا: وهي تآكل كيكتها ايه زاد قلت خالي اذا بغى شي مافيه شي يمنعه يطلب ولايبالي بأحد
فارس: غـــــــــلا
غلا: ابتسمت سم ياخال
فارس: اركدي وبلا قط كلام
غلا: تبلع تورتها افا يالخال انا اقط الله يسامحك بس
فارس: قام ووقف عند شجون ومد يدينه لبندر الي كان بحضنها
شجون: رفعت عيونها له
فارس: بإبتسامه هاتيه مشتاق له
شجون: نزلت عيونها بدون ماتبتسم بندوري روح مع ماتبي تقول بابا بس مضطرو روح مع بابا حبيبي
فارس: فرح وزادت ابتسامته يوم قالت بابا مبسوط انه فيه شي مشترك بينه وبينها جلس بسرعه جنبها يلعب بندر ويطلع له سبحته قالها وهو عيونه عليها عارف ماراح يرضى يجيني انا اجلس جنبه حتى يتعود علي
شجون: تحس ان انفساها مكتومه ريحة عطرهـ تحشرها وكل مايتحرك وهو يلعب ولدها تحس بضيقه أكثر مو قادرة تتحمل حاولت تحط بندر بحضنه علشان تغير مكانها بس بندر لاصق فيها همست له حبيبي هذا بابا
فارس: مبسوط انه لاصق بندر فيها علشان تضطر ماتقوم ابتسم لبندر وباسه مع خده بكره تتعود علي
غلا: تهمس لمشاعل قسم شكلهم يفطس من الضحك هذا لاصق وهذي شوي تموت وجهها حمر من الضيقه اخاف انفجر قدامهم وفويرس يجلدني
مشاعل: تناظرها مجنونة قسم وربي لو يلمحك وانتي تضحكين كان ينتفك مو بس يجلدكـ
غلا: ياختي قبل سنه طاردها والحين يتلصق فيها قسم عالم
مشاعل: غلو بطلي تريقه واركدي
غلا: مسويه مجروحه نزلت راسها طيب
مشاعل: لفت تناظرها غلو لاتزعلي مني
غلا: وهي منزلة راسها لاخلاص تعودت
مشاعل: حطت يدها على كتفها قسم مو قصدي بس خفت يشوفك
غلا: اصلا مافيه احد متقبلني كلكم ماتتحملوني
مشاعل: خنقتها العبرة غلو حبيتي امزح
سحر: لفت عليهم اقول لاتلعب بأعصابك تراها أكبر نصابه غلو لو تزعل تقوم الدنيا وماتجلسها ماتعرف تزعل بأدب
غلا: لفت على سحر ودخلت يدها تحت جلالها وربي لاشد شعرك لو فضحتيني مرة ثانيه انبسطت عليها وهي تترضاني خلني مرة اتدلع
مشاعل: زين بالدوبا كنتب تلعبين بأعصابي هذا جزاتي اني مابيك تزعلين
غلا: قربت لها وباستها بقوة مع خدها
مشاعل: وجع لاتبوسيني
غلا: خابره انا بس ماحب الي يبوسني متى صرتي زيي
مشاعل: الكل يبوسني الا انتي بوستك سامجه ودفشه ههههههههههههه
غلا: مسكتها وباستها اقوى من قبل
فارس: وهو جالس جنب شجون لف عليهم يبتسم ايش فيها غلاوي نازلة تبويس فيك ميشو
غلا: طلعت عيونها ماشاءالله خال اول مرة دلعنا ميشو شكلك رايق حؤة جيتك ولدك خلتك تروق
فارس: أكيد مافيه اغلى من الولد
شجون: قامت من جنبه كأنها قامت علشان تشرب مويه وهي بس حبت تغير مكانها شربت بندر وجلست جنب سحر اضمن انه مايجي جنبها
فارس: كان يتابعها وتغير وجهه يوم شافها قامت خلاص عزته مو متحمله وقف يالله تصبحون على خير
أمه: ليه ماتنام بغرفتك زوجتك مو بالبيت الحين
فارس: يطالع شجون بنظرات يبي يقهرها ماعرف أنام الا ببيتي الله يردها بالسلامة وطلع وهو معصب من حركة شجون
شجون: تنهدت براحه يوم طلع
غلا: قسم موقف فويرس لايحسد عليه اتاري شوشو مو سهله ابد
==================
في غرفة ريوف
ريوف: بالجوال مع حصه ماشفته كويس بس لمحته
حصه: هاهـ شكله حلو
ريوف: اشوفه رجال عادي بس ماعمره همني الشكل أخوي يثني على أخلاقه مرة وهذا اهم شي
حصه: يالخبله انتي تجنني المفروض تاخذين زين عليك يجونك عيال يجنون بعد بس لاتوهمي نفسك بالخرابيط اهم شي الشكل اصلا يوم الشبكه اشوف أخته عاديه سمراويه احلى مافيها شعرها
ريوف: ترا أخته حلوة مرة مادققتي بمراسمها وغمازتها بس سمراء وسمارها احسه محليها
حصه: انا الي مو ابيض ماعتبره حلو
ريوف: لو تدققين احلى من مراسمنا احنا ماحلانا الا بياضنا وانا اميل للسمار ترا
حصه: انا عكسك الي مو ابيض ماعتبره حلو
ريوف: وانتي الي مو حلو ماتعجبين فيه لو إنه رجال كفو مايهمكـ
حصه: ياختي ابي اطلع انا وياها وارفع راسي فيه
ريوف: الله يعينك على تفكيريكـ
حصه: المهم متى زواجكم
ريوف: بالإجازة النصفيه بعد شهر
حصه: ودراستكـ
ريوف: اخوي يقول هو مستعجل ويقول ماراح اعطلها عن دراستها بالإمتحانات اجيبها لكم
حصه: وانتي يالغبيه وافقتي
ريوف: ماقدرت اقول لا فشلت وربي
حصه: خليك من الحين ضعيفه وهو يسيرك ضعفك ماراح يفيدك راح يستغلك صدقني
ريوف: وربي الرجال اذا صار طيب ماراح يستغل طيبة زوجته
حصه: الرجال الطيبين انقرضو الحين
ريوف: شوفي اخوي فواز مانقرضو
حصه: اخوك فواز موطيب والي بباله لازم ينفذه وال انسيتي ادا منعك من الطلعات او نسيتي يوم يصمم مايطلع أختي ببيت ويقومن من الملاك ولاهمه ماتراجع ولاحتى اعتذر
ريوف: كل يوم تعيدين بالسالفه اصلا فواز مستحيل يتخلى عن أمي هذا اولا ثانيا يوم يمنعني من خوفه علي والا احصل هدايا منه ماحصلتوها من أهلكم
حصه: ايه غيري السالفه بس
ريوف: مابي اغير السالفه ابنام مع السلامه
حصه: سكرت مسويه زعلانه تزعل من الصراحه كيفها
ريوف: إف وربي مابي اجرحها والا كان مارديت على اتصالتها مشكله انها بنت خالي لو بس صديقه طنشتها
==============
في غرفة عبدالرحمن
نايم على سريره وحاط يده تحت راسه وسرحان بشكل ريوف وخجلها انقلب على التقويم يحسب كم بقى على زواجهم شهر احسه طووووووويل ناظر السماء وينك ياشعاع تفرحين معاي عارف انك راح تفرحين مرة وراح تعلقين علي تمنيتك تشوفينها تسولفين معاها وربي فاقدك كثيرررررر دمعت عينه ومسحها يوم شاف أمه داخله عليه
نوال: تحب ولدها وفخورة بعقله ورزانته ممكن ادخل او ازعجتك
عبدالرحمن: عدل حلسته افا يمه افرح بطلتك والله
نوال: مريت من عند غرفتك قلت اشتقت له مشغول هاليومين وماشوفكـ
عبدالرحمن: تعرفين تفصيل الغرفه وتأثيث جناحي سرق كل وقتي
نوال: انت ياوليدي حطته بوقت ضيق كان أخرته شوي ضيقت على البنيه وعلى نفسك بعد
عبدالرحمن: ابتسم وسكت
نوال: ابتسمت له عاد مالومك ماشاءالله عليها وردة ماشاءالله عليها الله يحفظها بس
عبدالرحمن: آمين واتمنى تصير لك زي بنتك
نوال: لا الله ياوليدي ابيها احسن من بنتي ايش ابغى بوحده تجنني زي غلو
غلا: تطل عليهم ايش فيها غلو
عبدالرحمن: جبنا سيرة الئط جاء الئط ينط
غلا: نطت لسريره وهذي احلى نطه ايش فيني
نوال: اخوك يقول اتمنى زوجتي تكون زي بنتك وانا اقول لا مابيها تجنني زي غلو
غلا: يع مالت لاتكون تصقد هذيك القشطه تعاند عبدالرحمن
عبدالرحمن: شدها مع شعرها ايش فيها القشطه
غلا: تجنن بس الشكولاته احلى منها
عبدالرحمن: شدها اكثر الشكولاته ان قالت شي لقشطتي نتفت شوشتها
غلا: آآآآآآي فكني طيب ماقول بس فكني
عبدالرحمن: فكها
غلا: نزلت راسها اهون عليك تنتف شعراتي علشان ريوفكـ
عبدالرحمن: ضمها تنقطع يدي ولا امدها عليك
غلا: اقول ابعد لاتضمني ماحب الي يضمني
نوال: ولاتحب الي يبوسها
عبدالرحمن: ضحك دفشه أكيد ماتبين احد يقرب لكـ
غلا: ايه حرمة سنعه ماعندي دلع وحركات بس على فكره شكل قشطتكـ مايعه زبده شوي تذوب
عبدالرحمن: ابتسم معجبتني كذا كيفي
غلا: ماعليك او ماتجي اثلجها بالفريزر واخليها تصير مرة سنعه والا وحده كذا حركاتها جلست على الكرسي وقلدت جلستها مايعه ياخوي بقوة هههههههههههههههههه
عبدالرحمن: وهذا الي محليها
نوال: ايه ماشاءالله عليها تجنن بنعومتها وانا اناظرها مو مصصدقه ان هذي خطيبة ولدي دورت عقل جاني حلاوة ونعومه وان شاءالله طيبة قلب
عبدالرحمن: باسها مع يدها انتي طيبه وراح ربي يرزقك على طيبة قلبك يمه
نوال: بعون الله لاخليها بعيوني
عبدالرحمن: انا ضامنك يمه بس خوفي من فلانه اخاف تجننها زي ماجننت سحورة
غلا: لا بس ابسنعها واخليها حرمة ذربه وتبطل نعومه زايده بس
عبدالرحمن: ياوليك ان خربتيها معجبتني كذا
غلا: ماتعرف ياخوي وين مصلحتكـ انا اعرف مصلحتكـ اكثر منكـ
عبدالرحمن: رمى عليها المخده روحي مناك بس يالفاهمه
==============
في بيت رشاد
سبيكه: يمه كيف اقبله وواضح انه متعلق بزوجته الأولى يوم يأس منها او يمكنها بعد توجت جاني خطلني
محمودة: يابنتي بطلي هالأفكار الغبيه هو حاس بتأنيب الضمير اكثر من انه يحبها يابنتي لاتفوتيه رجال مع ابوك سنه ويمدحه مرة
سبيكه: يمه خايفه مايتقبلني بعد زوجته
محمودة: استخيري ولاتخلي الشيطان يلعب بعقلك
سبيكه: ان شاءالله يمه راح استخير وارد لكـ يوم طلعت أمها انا مانكر انه عاجبني من اول ماشفته والحين شاغل تفكيري مانكر فرحت يوم خطبني بس خوفي يظل يحب طليقته ومايتقبلني لازم استخير واقرر
======================
في المستشفى
ياسر: جالس بمكتبه يراجع بعض الاوراق
الممرضه: ادخل عليك المريض العاشر
ياسر: ايوه دخليه
دخل رجال يمكن بالسبعين من عمره ومعاه بنت عمرها 25 مرضيه بالقلب
الرجال: السلام عليكم
ياسر: رفع راسه ورد وعليكم السلام بس ماكمل كلامه لأنه تفاجأ من الي واقف قدامه
=================
في مطار الرياض
رجعت دلال ماتحملت تجلس عن فارس شهر رجعت بعد اسبوع استغربت انه مايدق ولايسأل عنها خافت عليه دقت عليه مارد راحت مع ليموزين لشقتها مالقت فارس فيه استغربت كانت حابه انها تسوي له مفاجأه بس ماتوقعت ان فيه مفاجأة تنتظرها
فارس: دخل لشقته وتوه ينتبه لاتصالاتها رفع عيونه لقاها واقفه قدامه ماتمنى يشوفها الحين
دلال: تكتفت ممكن افهم ايش مشغلك عني طول هالوقت
فارس: دخل جواله بجيبه ويناظرها من فوق لحت وحاس بفرق كبير بينها وبين شجون بكل قوة وشموخ اشغلني عنك ولدي
دلال: عقدت حواجبها ايش
فارس: الي تسمعينه
دلال: سكتت تنتظر يشرح لها استغربت قوته يقولها بوجهها استغربت بروده بإستقبالها حاسه فيه شي متغير
فارس: دلال انـــــــا رجعت شجون لذمتي
دلال: أيــــــــــــــــــــــش ؟!؟!؟!
================
مين الرجال الي دخل على ياسر وتفاجأ ياسر بدخوله؟؟؟
ايش راح يكون موقف دلال بعد معرفتها برجوه شجون لفارس؟؟؟
هل راح تلين شجون لفارس بيوم من الايام؟؟؟
سلطان ومشاعل ايش راح يكون بينهم من احداث؟؟
راح نعرف كل شي بالجزا القادم بعون الله تعالي
عارفه تنتظرون زواج دحوم وريوف
بس أجلنا زواجهم لانها لسه ماخلصت اختبارات
راح يكون زواجهم يوم الثلاثاء الجاي بعون الله:graaam (172):
انتظر ردوكم على أحر من الجمر:graaam (109):
ووآسفه اني ماخصلتها قبل رمضان لكني اضطريتي اكملها برمضان والا روايتي الثلاث الي قبل اخلصهم قبل رمضان بليله او في ليلة رمضان
بس أحداث هالروايه تشعبت ومابي اخلصها بستعجال وماعطي كل بطل حقه واخيب آمالكم في نهايتها
مادامنا نكتب شي مفيد نرجي من الله الاجر وان لايشغلنا الا بطاعته فقط
حتى الحين مادري كم باقي من جزا لكن اتمنى انه مابقى منها الا القليل مع اني مابي اختمها لاني بجد راح افقدكم وافقد التواصل معاكم :graaam (23):
لأني اتوقع ان بيت العنكبوت راح تكون نهايتي مع الروايات لاني وضعت فيها كل جهدي وطاقتي وكل فكرة كانت تتوارد لمخيلتي
&&&&&&&&&&&&&&&&
فائدة:


من أقوال السلف في الإخلاص
قال بعض السلف : ” المخلص من يكتم حسناته كما يكتم سيئاته “ .
قال سهل بن عبد الله : ” ليس على النفس شيء أشق من الإخلاص لأنه ليس لها فيه نصيب “ .
وقال يوسف بن الحسين : ” أعز شيء في الدنيا الإخلاص وكم أجتهد في إسقاط الرياء عن قلبي وكأنه ينبت فيه على لون آخر “ .
وقال الربيع بن خثيم : ” كل ما لا يراد به وجه الله يضمحل “ .
وقال أبو سليمان الداراني : ” إذا أخلص العبد ، انقطعت عنه كثرة الوساوس والرياء “ .
وقال نعيم بن حماد : ” ضرب السياط أهون علينا من النية الصالحة “ .
وقال يحيي بن أبي كثير : ” تعلموا النية فإنها أبلغ من العمل “ .
وقال يوسف بن أسباط : ” تخليص النية من فسادها أشد على العاملين من طول الاجتهاد “
أسأل المولى لي ولكم الإخلاص بالعمل في رضمان وغير رمضان
بغلنا الله رمضان جعلنا ممن يصومه ويقومه ايمانا واحتسابا
دمتم لي بود
اختكم هـــمـــس ((( أمي روحي )))[/COLOR]