البارت السابع عشر
رفعت عيوني صوب الي صدمت فيه ..
عقد علي حواجبه وقال : حيا الله نوره..
أبتسمت غضبن عني وقلت بتوتر: الله يحيك ..
رفعت عيني صوبه شفته يطالعني وعلى شفايفه أبتسـامه مادري كيف أوصفها خبيثه غير طبيعيه مرررره خلت توتري يزيد ..
حرك واحد من حواجبه وقال: شو سلمتي على محمد ..؟
بلعت ريجي وهزيت راســي بــلا , تميت أطالعه مب عارفه شو أقول أو شو أسوي ..
زادت أبتسامته وهو يقول : أهــا هو الحين تحت في الصاله مع أمي وابويه وخوالي ..
هزيت راسي وقلت: الحين بنزل ...
مشيت متخطيه علي ووصلت للأعلى السلم , بــس ..
رن تلفوني ..
طلعته من شنطتي وشفت رقم الدريول ...
عقدت حواجبي مستغربه ليش الدريول يتصل ؟؟
حطيت رد ورفعت التلفون لذنيه , سمعت صوت الدريول يقول: ماما نوره ؟
رديت عليه وأنا خايفه مادري من شو: ها محمود شو فيه؟
محمود بصوت خايف: ماما كبير في مريض يقول يريد دواء !!
حطيت يدي على قلبي : الحين انا يجي دقايقه بس ..
وسكرت على ويها أكيييييييييييييييييد يدوووه تعبانه ياااربي أظن الضغط عندها مرتفع ..
ربعت على الدري بسسرعه , وأنا خايف على يدوه بدرجه كبيره وخطفت من الصاله بدون ما ألتفت للي هناك بس لمحت شخص خاطف بمسافه مب بعيده عني ...
طلعت برع الفله وشفت السياره واقفه برع , بطلت الباب الوراني ..
شفت يدوه متسانده على الدريشه ومغمضه عيونها وكان التعب على ويها ..ركبت السياره وتجدمت منها ...رفعت يديه وضميت جتفها .. وقلت بصوت واطي : يدوه ..
فتحت يدوه عيونها وأطالعتني بتعب وقالت : ها بنتي خلصتي ...
هزيت راسي وبعدين رفعت يدي لشنطة يدوه أبا أطلع الدواء..
بس مالقيت شي ..
عبست وتذكرت آني نسيت الدواء على الطاوله في غرفة يدوه ...
تنفست بعمق وأطالعت محمود الدريول وقلت: محمود ودنا الصيدليه ...
سرنا لأقرب صيدليه لمنظقه قوم خالي , ونزلت ويبت الدواء ...
خذت يدوه الدواء, وحاولت أسدحها علشان ترتاح بس هي ما طاعت أبدا
سمعت صوت رنت تلفوني وبسرعه طلعته من شنطتي وشفت رقم خالي ..
نفخت آه نسييييتهم مره وخلاص نحنا رحنــا صوب العين...
رديت على خالي : مــرحبا ..
سمعت صوت خالي البعيد شوي وهو يقول: وينج بنتي ؟
غمضت عيوني ياويل حالي يالفضيحـــــــــــــــــــــه , خذيت نفس و بلعت ريجي وقلت: سمحلي خالي ردينا البيت لان يدوه تعبت شوي ...
خالي سعيد بصوت قلق : شو فيهــا يدتج ؟ عسا خير ؟
أبتسمت وقلت: لا مافيها الا العافيه بس الضغط أرتفع عندها والحين هي كلت الدواء والحمدالله بخير ..
خذيت نفس وكملت : سمحلي خالي أني سرت عنكم وما سلمت بالي كان عند يدوه ونسيت ..
سعيد : مسموحه بنتي .. مسامحينج ..أنتبهوا في الدرب ..فمان الله
: الله يحفظك ..
بندت عن خالي وأنا صدق متلومه لاني لأول مره أسوي ها الحركه ...
أطالعت صوب يدوه لقيتها مغمضه عيونها وشكله الضغط عندها نزل .. الحمدالله ..
غمضت عيوني وسرحت بأفكاري ..مرت بس دقايق ..
وأنا أسترجع الي سويته في بيت خــالي ..
فتحت عيوني وشهقت بصوت عالي وحطيت يدي على شفايفي بسرعه..
لااااااا محمد نـــــــسيته ماشفته ولا سلمت عليه ..
عضيت شفايفي بقهــر كم كنت أترايا أني أشوفه وأسلم عليه ..
أسترخيت على الكرسي خلاص شو أسوي روحت بدون ما أشــوفه حتى ...
مرت نص ساعه ووصلنا للبيت ...
سرت غرفتي وخذيت لي شاور قصير, وبعدها تلبست لي جلابيه عنابيه وصليت المغرب ...
طلعت برع لقيت يدوه يالسه مع عمي خلفان سرت صوبهم وسلمت
على عمي ويلست ...
وطبعا عمي خلفان كلامه مثل كل مره عتاب ...
معظم الوقت كنت ساكته بس أسمعهم شو يقولون , مرت ربع ساعه ...
لفيت صوب صوت فتح الباب طلع عمي مصبح بوزاره وفانيلته كأنه توه واعي ..
حاس بوزه وهو يطالعنا ونفخ وكان بيرد داخل بس صوت يدوه خلاه يرد يطالعنا مره ثانيه ..
يدوه : تعال وين راد ..؟
رفع يده وحك شعره وبعدين تقرب منا ووقف عمي خلفان وسلم عليه..
وسلمت عليه أنا, يلس عدالي وقال: علومج..
قلت بصوت واطي: زييينه .. أنته أخبارك؟
هز راسه وقال: الحمدالله ...
رد نقاش يدوه وعمي خلفان عن البوش وعن حلال يدوه الي عندها عمي خلفان يبا يضمه لحلاله بس يدوه متردده , انا محتاره من عمي خلفان ليش يبا يحط بوش يدوه عند بوشه يعني هي لها عزبه بروحها مع عمي سالم ومصبح , وهو أمبونه وياهم بس أنفصل عنهم والحين يبا يدوه تي وياه بروحها ...
رفع عمي مصبح راسه من سمع رمسة عمي خلفان وقال: البوش بتمن في عزبتنا واذا انته تبا تضمهن لنا حياك بس بوش أمايه يروحن عندك فلا ..
عصب عمي خلفان وقال : انته حد رمسك أنا أرمس أمايه هن بوشها وهي كيفها ..
تنرفز عمي مصبح ووقف: اعرفك أنا تبا بس تاخذ البوش عندك وتستفيد منهن يالطماع ماتخاف ربك هاي أمك ..
وقف عمي خلفان بعصبيه: شو تقول انته عكيفك تخرف ..؟
صرخت يدوه على مصبح: شو ها يامصبح تقول على اخوك جي ..
صرخ عمي مصبح : هذا ولدج الي أدافعين عنه بشوفين شو بيسوي ...
ماتحملت الموقف وقمت بدون محد يحس ودخلت البيت وسيده سرت غرفتي ...
يلست على شبريتي بحزن ما احب أشوف ها المواقف أبدا أبدا ...
يوم الاحد ..
قمت من وقت , اليوم يالسه في اليبت بلا شغله بس باقي أسبوع وبيي الدريب في المستشفى (( مشروع التخرج ))...
الساعه 9
أففف ياهالملل التلفزيون مافيه شيء أحس الصبح مافي أفلام حلوه ولا حتى شي يطالع ..
عقدت حواجبي وأنا أسمع صوت رنت موبايلي , مديت يدي له وأطالعت الرقم ..
كان رقم غريب ؟؟
أممم أرد ولا .. سبحان الله يمكن شي مهم ...
رديت كان صوت حرمه ...
الحرمه: السلام عليكم ..
نوره: وعليكم السلام..
الحرمه: الاخت نوره خالد الــ....
خفت وقلت بتردد: نعم معاج نوره أختيه ..
الحرمه : اخت نوره يوم الثلاثاء بيكون في مؤتمر للممرضات في راس الخيمه في ............. من الساعه 10 الصبح لين 2 العصر ونتمنى أنج تحضرينه ضروري ..
عقدت حواجبي وقلت: ان شاء الله ..
الحرمه: مع السلامه..
وسكرت عنها , أممم مؤتمر شوه ؟ بتصل لأسوم , ضغط على أسم أسوم وأتصلت رن ورن وعلى خامس رنه ردت أسوم وكان صوتها كانها توها قايمه من النوم ..
قلت: صباح الخير أسوم ؟؟
ردت عليه : صباح النور هلا نوره ..
طلعت لساني كأني وعيتها من النوم آه بس قلت: شو كنتي راقده ..
أسوم: لا بس طايحه على الغنفه وفيه نوم ناشه من الصبح ...
قلت: أها تدرين أتصلوا لي مال الكليه يبوني أيي مؤتمر في راس الخيمه ..
أسوم: حلففففففي وأنا ليش ما أتصلوا لي يعني ..
ضحكت :شو دراني فيهم ...
تغير صوت أسوم على نبرت الدلع وهي تقول: ليش ليش بخبر عليهم أبووويه ..
متتت ضحك عليها وقلت: ان شاء الله يتصلون إذا عاده فكروا يتصلون فيج ..
أسوم : جب جب بتصلون ...
بندت عن اسوم بعد فتره , بس تمت تتصل كل ساعه محتشره أن محد اتصل لها بس على الساعه وحده أتصلت لي وهي تبااااغم : تنووووووره لحقي اتصلوا لي ..
عقدت حواجبي لأسم تنوره بقهر هاي كل يوم تطلع لي أسم حضرتها رديت عليها : تنوررره في عيونج .. بس مبرووك الحمدالله بتروحين ويايه ...
ردت عليه أسوم : الحمدالله كنت خايفه يعني أني ما أروح وياج ..
ضحكت بطنيز : أعرفج هييييه علشاني أونه ..
ضحكت أسوم بصوت عالي : أوونه ..
بعد الضحك مع أسوم سكرت عنها ودورت لي شغله أسويها , ومر اليوم عادي وحتي يوم الاثنين ماكان فيه شيء عادي جدا ..
يوم الثلاثاء..
وصلنا على الساعه 9 ونص مكان المؤتمر , الدرب كان شوي طويل بس عادي لان السوالف خذتنا ونسينا طوله ..
نزلن ورحنا صوب مبنى كبير وعند الرسبشن الي عدال الباب عطيناهم بطاقتنا الي تخص النيرس وعطونا هم بطاقات ثانيه ...
كانت هناك ورشات ووايد ولزم نختار وحده بس علشان نحضرها , يلسنا أنا وأسوم نفكر وبعد تفكير طويل أخترنا أهم ورشة "CPR" وهي الانعاش ..
" تعديلات على خطواطات انعاش القلب"
كانت الورشه تبداء الساعه عشر ومب باقي الا 10 دقايق..
أستغفر الله نفخت بتعب وأنا أصاصر أسوم : بروح الحمام أوكيه ..
أطالعتني أسوم وهزت راسها أوكي , رحت مع أسوم وتمينا نسأل وين الحمامات لين دلونا أياه , يلست أسوم تعدل شيلتها وأنا دخلت الحمام ..
سمعت اسوم تقول: نوره أنا بروح مابقى على بدء الورشه الا دقايق أنتي تعالي عقب ماتخلصين..
رديت عليها: أوكي ..
طلعت بسرعه وشفت الساعه ياربي مرت خمس دقايق على بدء الورشه ياااربيه ..
مشيت ومشيت لين وصلت أخيرا للمكان الورشه دخلت بسرعه ويلست ادور أسوم,وعقب موت لقيتها وقفت عدالها وقلت: شو بديتوا ..
هزت راسها وقالت ببتسامه : هيييه عرفنا رئيس الورشه عن نفسه وتكلم بعد عن اشياء ووايد آآآآآآآآآآآآآه يانوره لو شفتيه يقولون لج متخرج من جامعة مرموقه برع وهو شاب صغير في أخر العشرين وماخذ بعد الزماله في البورد الكندي في جرحة الصدر والقلب... وووووالله قلبي صار يقول طققق طققق من شفته ...
يتني ضحكه وأنا اشوف أسوم ترمس جي الخبال رد وشكله مابيروح ابدا , رفعت عيني بعد ماسكتت أسوم , أطالع الرئيس الي مخبل بأسوم ...
طاحت عيني عليه وجمدت محلي ...
ياااااااااااااربي ورررررربي أن أسوم ماجذبت أبدا هو من بعيد جي لو من قريب كيف بيكون, كان طويل وجسمه رياضي وضعيف ولابس بدله سوده وشكله صغير , نزلت عيوني مستحيه عنبو شو بلاني أطالع الريال جي ما أستحي ...
حاولت أرفع عيوني واشوفه وأفهم الكلام الي يقوله ... قام يشرح لنا ..
وبعدها ياب لنا أدوات الانعاش وهي عباره , عن عربة أنعاش “ crash brlleg”
وعرفنا على الادوات الموجوده داخلها , وكيف يستخدمونها ...وياب لنا المجسم المنيكان ويلس يشرح عليه كيف طرق الانعاش ..
بعد 3 ساعات أو أكثر خلصنا من الورشه , طلعنا أنا وأسوم واسوم خلاص منتهيه يوعانه وتهاذي برئيس الورشه ...
سرنا صوب المطعم ويلسنا على طاوله تقريبا تكون في النص وكان المطعم تقريبا ممزور , سارت أسوم تطلب لنا عن نفسي قلت لها تيب لي سندويشة أي شي ..
مرت ثلاث دقايق يلست أطالع الي في المطعم , ماعرف حد منهم الا مجموعة 4 بنات بس هن مب من كلاسنا ... ولا أعرفهن لذاك الزود الوحيده الي كانت من كلاسي وربعي أسوم على الحظ سبحان الله ...
بس لمحت حد كأني أعرفه .. عقدت حواجبي هذا الدكتور منصور وبعض الدكاتره الي في المستشفى ..
أبتسمت وأنا اتذكر الايام هذيج وأيام الدراسه بصراحه كانت حلوه ..
............................................................ ..........................................
أسوم ..
كنت ماشيه بطلب لنا سندويشات يالله يشبعن عصافير بطني , بس لمحت مطعم شكله يسوي باستا وأنفتحت شهيتي لاخر درجه ...وروحت ألهث صوبه...
بس دعمت في عامود , يااااااااااربي أنا عيوني شو فيها يعني ما اقدر أطالع جدامي
وعااااده الي يقول طلع لي الامير ويليم هاها ..
حليله الا هنـــــــــدي تم مبلق عيونه عليه بسسسسسسسسسسم الله زيقني غربلاته ...
كملت دربي ورحت صوب المطعم وحطيت يدي على الطاوله الي كانت هناك ويلست اطالع شو إلي عندهم واخترت الي فيها فلفل .. المهم شي أكله ...
قبضت تلفوني بتصل لنوره جان تبا , أتصلت لها فقالت أنها تبا ...
بعد ماطلبت لي ولنوره صديت على ورا أطالع الناس وأمزر عيوني .. بققت عيوني وأنا أشوف واحد وقف جدامي فجأه روعني , زيغ قلبي ... تميت فاجه فمي بلا وعي معقوله هذا أشوفه جدامي الحين , شو ها الصدفه ولا بعد عيوني بعيونه ..
بلعت لساني وحاولت أطالع مكان ثاني غير عيونه ...
بس هو ماخلاني , سمعت صوته المتمصخر يقول: هلا والله بأنسه أسماء ..
أسمااء أسماء ... دارت في راسي ها الكلمه وععععععععععععععععععععع رسميه ووايد ..
اطالعته أوني بقواة عين وقلت: هلا والله بالدكتور منصور ..
يلست أطالعه واتبصبص لالالا ما اقدر لابس كندوره وسفره وعقال لأول مره أشوفه جي في حياتي , لالاااا دا الرجال ناوي عليه اليوم ..
هزيت راسي أبا أرد لوعي صدق تخبلت من الخاطر الا ينيت ...
سمعت ضحكته الي خلتني أفج عيوني على وسعهن وأطالعه , من شافني شفته أختفت الضحك ليحل العبوووس والتجهم الي معتاده عليييييييييييه دووم ..
رفع حاجبه وهو يطالعني بحتقااار ويقول : لو سمحتي ساده الدرب علينا نبا نمر ..
رفعت عيوني عليه بقهر ودي أوطى في بطنه , بس بس فتحت فمي وانا اشوف الي وراه , إلي وراه!!! وقفت بلا أحساس .... كان رئيس الورشه ...
عاده هنيه أنا وقفت جامده محلي ماأقدر أتحرك أبداً أبداً ..
نفخت منصور عليه خلتني أفز وقال بعدها: وين سرحت الحبيبه ؟؟
حسسسيت ويهي أحمر والحراره كلها أنتقلت فيه , رديت على ورا وانخشيت في زوايه .,.. أخذ نفس ورا نفس لين رديت طبيعيه ........
يااااااااااااارب رحمااااااااااااااااااااااااك ..
هذا منصور الحمار شوه وشو يحس بالضبط دووم يفشلني وأنا دووووووم على ويهي ...
يااااااااااااااااربي الرئيس بياخذ عني فكره سيئه لالالا حرااااااااااام لالالا بعد ماحطيت عيني علللللللللللللليه يفهمني غلط ... ووويت كاني خرفت أستغفر الله أحسن لي أرد لنوره ...
رديت ولقيت نوره يالسه تعابل التلفون عاده أنا وحركاتي سرت صوبها بدون ماتحس ويت ورا كرسيها وقلت: بوووووووووووووو ... بقوه ..
بس أنا نسيت شي ... أن نوره أكبر خوافه ...
قامت نوووووره بصرخه هزت المطعم كللللللللللله ...
وأنا منصدمه , منصعقه , وفاجه فمي بكبره , نوووووووووووووووووووووووووره فشلتنا الناس كلها أطالعتنا , يلست أتصدد والكل يطالعنا ماعرفت شو أسوي وأنخشيت بسرعه تحت الطاوله من الفشيييييييييييييله ..
مجرد ثواني وأشوف نوره عدالي وتصصصصصصصصصصيح ..
............................................................ ......................................
نوره ..
كنت أطالع المسجات إلي في تلفوني ومندمجه , والا أحس بصوت وراااااااااايه خوفني ... طير قلبي .. بلا حاسيه قمت أباغم ...
وحطيت يدي بسرعه على شفايفي بصدمه , صدمه شلت حواسي ..
أنا شووووو سويت ... يلست اطالع الناس الي كانوا يطالعوني بنظرات أحتقار , صدمه , تعجب , حسيت برجفه بكل خليه من جسمي من الفضيحه ..
ماقدرت غير أني أنزل تحت بدون حاسيه ودموعي نزلت بدون حاسيه ..
يلست أشاهق من الصياااااااااح , وماحسيت الا بحد يضمني .. رفعت راسي شفت أسوم يالسه اطالعني وبعيونها نظرة خوووف ...بس هاي النظره خازت بسرعه ....
فتحت عيوني وأنا أشوفها منسدحه تضحك الا ميييييييييييييييييته من الضحك ..
دموعي الي كانت نتزل ومبلله ويهي وقفت فجأه بعدم تصديق هااي شوه بالضبط؟؟
توي مصارخه ومفضحه عمري والحين هاي يايه تضحك وبصوت عالي بعدد؟؟ لالا تخبلت شكلها الا عقلها راح ..
تقربت من أسوم وضربتها على جتقها أحاول أسكتها , لميت شفايفي وقلت بصوت واطي : أسوم أسكتي فضحتينا أسكتي يرحم أمج ...
ماسكتت والا وانا عافده عليها وكاتمه نفسها بصراحه ما اقدر أخليها جي ولا فضحتنا ...
بعد محاولات سكتت أسوم وخلاص ويها أستوى أحمرررر من الكتم ,, خوزت يدي عنها وأنا أضحك بصوت واطي ..
أطالعتني أسوم وويها أحمر, بس الطامه العوده يوم وقفت أن الناس بعدها أطالعنا .. ربعت برع وسرت صوب الحمام دخلت داخل ويلست أغسل ويهي حوالي خمس مرات ... ياربي شو ها الموقف ...
عقدت حواجبي وأنا أشوف ريال طالع من الحماااااام وفجيت حلجي بصدمه وعدلت شيلتي بسرعه , وقلت بعصبيه وتوتر : انته شوو شوو تسوي في حمام الحريم ..؟؟
لمحت أبتسامه على ويه وبعدها طلع ضروسه ببتسامه عريضه قال: الاخت شكلج ماتشوفين زين ..
عصبت شو ها القلت أدب , وبجرائه غريبه جدا عني ولأول مره : صدق أنك ماتستحي مب لها الدرجه وين الاخلاق ووو,,,
بس سكت لاني لمحت شي خلاني أبصصصصصم أن حمام ريايل , أحمر ويهي بفشيله .. ورديت على ورا وجمدت محلي بصدمه...
راح الريال صوب المغاسل ويلس يغسل يديه , كان لابس بنطلون وقميص رسمي لونه أسود ويلس يحسر عن يديه , وأنا في حالة صدمه مش قادره أسوي شي ...
أرتجف, وأطالعه بخووف , رفع عيونه صوبي وعقد حواجبه وأنا أطالعه بلاا حاااسيه , سمعت صوته إلي خوووووووفني: شو تترين واقفه ظهري ...؟؟
حاولت أقبض عمري وأوقف الارتجاف الي فيني وشوي شوي وصلت للباب وفتحته وطلعت بسسسرعه ... ويلست أتلفت أدور حمام الحريم وأول ماشفته دخلته بسرعه..
أول مادخلته سكرت الباب وتساندت عليه .,,, ياااااااااااااربي بعدني أرتجف من الخوف ...
وشوي شوي حسيت أنه خف الارتجاف ... أمممي كنننننننننننننت في موقف مرعب يخووووووووووووف آآآآآآآآه ...
بس كأني شايفتنه هذااااااااا الريال من قبل ؟؟؟
تعوذت من ابليس ووقفت عدل وسرت صوب المغاسل , وشفت أسوم واقف هناك وتضحك بعدها !!
آآآآآآآآآآآآآآه بس خاطري أجتلها ...
تقربت منها ويريت شيلتها بقهر وقلت: هب بسج ضحك ..
أطالعتني بطرف عينها وقالت وهاي بعدها تضحك: والله أن شكلج كان تحفه مووووت ...
تأففففففففت وصديت عنها بصراحه اليوم تفشلت بقوة الا مت من التفشيل..
صدت اسوم صوبي وقالت وهي تصارخ: والخيبه الاكل نسيناه ..
ظهرت ضروسي بضيقه : نفسي طابت من الاكل ما ابا شي وودي أرد البيت اليوم قبل باجر ..
ضحكت أسوم: منو قال أنج باجر بتردين ..؟!!
وردت لضحكها , يااااربي مابردها ,,, الصبر ياااارب ..
قبضت تلفوني واتصلت حق الدريول علشان أيي ويشلنا , وماكان بعيد عنا وخلال 15 دقيقه كان عند البوابه , قبل ما أنروح أشترينا لنا كرواسون وعصير ...
رديت على الساعه 6 البيت وتريت لين الساعه 7 وصليت المغرب وعيوني خلاص بتغفل من التعب.. طحت على شبريتي وغمضت عيوني..
رقدت وماحسيت بعمري الا على أذان الفير , نشيت فازه أستغفر الله.. صلاة العشاء مررره نسيتها ..
يلست على الشبريه أذكر يدوه يت توعني حق العشاء بس أنا قلت لها ما أبا ..
وكملت نومي بلا حاسيه
..قمت صليت العشاء أستغفر الله ..وبعدها تريت شوي وصليت الفير...
فصخت جلباب الصلاه ويلست بجلابيتي أم كم ...خطر في بالي أطلع برع أغير جو عاده الفير رووعه وخاصتنا ها الايام الي تكون فيها البروده معتدله وحلوه ...
مب لزم البس شيله أمم بس بحطها على جتفي ..
طلعت برع , نسيم بارد هب عليه وحرك شعري وتخللت برودة الهواء في شعري ..آآآآه محلااااات الجو ..
بس ها الجو يذكرني بأيام وبيوم ما اقدر أنساااه .. هذاك اليوم الي رحت فيه البحر مع محمد , بوزت والله خاطري أصيييح من أتذكر هذيج الايام تدمع عيني أيام حلوه .. ياليت أرد صغيره ..
لاهموم لا تعب لا تفكير بالياي وبالمستقبل بس التفكير يكون بأشياء سطحيه ..
يلست على الدري الموجود جدام الباب أتأمل ها الجو ...
رفعت يدي وغطيت جتفي بالشيله , أحس بالبرد شوي ...
كنت سرحانه أفكر بأشياء ووايد مشروع التخرج وبيدوه وبواايد أشياء .. أفقت من سرحاني على صوت , رفعت راسي أطالع منو هذا , كان عمي مصبح ببدلة الشرطه ياي ..
وقفت وأنا أشوفه يقترب وقلت: صباح الخير عمي ..
حرك حواجبه وهو يطالعني : صباح النوم ..
ضحكت وقلت: شو توك ياي من الدوام ..
تنفس بقوة وهو يقول: هيه وخاطري أرررقد بمووت تعبان ...
بوزت غمضني شكله صدق مرهق لاخر درجه , قلت له: عمي تبا أكل أو كوب حليب أيبه لك ؟؟
أشر بيده: لا شكرا , مالي خاطر في شي بس خاطري أوطي راسي ..
قلت : على راحتك ..
صعد الدري وأشر بيده لي : تصبحين على خير ..
أبتسمت : وأنته من أهله ..
الايام طافن بسرعه , وأقترب دوامنا التدريبي في المستشفى (( ها الشهرين يعتبرون مشروع التخرج ))
اليوم هو الاحد وبنروح للمستشفى , الي أن شاء الله بشتغل فيه في المستقبل القريب وهو من أكبر المستشفيات وهو نفسه الي كنا ندرب فيه ...
وصلنا على الساعه سبع ونص المستشفى طبعا يت مع الدريول وخطفت على أسوم لان بيتهم مب بعيد عن بيتنا , نزلنا وسرنا سيده صوب غرفة التبديل ولبسنا البلس الخاص بالمتريض وحطينا الأي دي على القميص ورحنا صوب ريئسة الممرضات علشان تخبرنا عن الشغل وشو نسوي ...
وها المره سرنا قسم الاطفال , الاطفال بالنسبه لي التعامل معهم شوي يروعني بس ماعليه عادي لاني دارسه وأعرف .. طبعا أشو عن مستشفى الامل مع اني خذيت ووايد أشياء عن مستشفى الامل بس يوم رحت هناك خفت ووايد ..
سرت صوب الدكتور اللبناني جوزيف وهو دكتور في قسم الاطفال , سرنا لطفل مريض بالحمى ومنوم من أمس ..
يلست أخذ له V/S ضغطه كان أوكي وحتى النبض بس درجة الحراره كانت مرتفعه شوي , أطالعت ملفه كانت حرارته 39 من ساعتين والحين 38 الحمدالله خفت شوي ..
بعد ماخلصت شغلي من المريض الصغير سرت عند الدكتور علشان أطعم واحد من الاطفال الي ياين حق التطعيم ..
غمضتني البنوته من عطيتها الابره صااااحت صياح يقطع القلب وجسمها كله يرتجف ...
بعد مامرت 4 ساعات وخطفت ربع ساعه على البريك رحت صوب غرفة الاستراحه مالت الممرضات والي مبدلين فيها شفت أسوم منسدحه وحاطه يديها على ويها ..يلست عدالها وحطيت يدي على جتفها ..
خوزت يديها عن ويها واطالعتني مبوزه , قلت وأنا أمط يدي لفوق : تعب ..
أسوم وهي تغمض عيونها: ووايد أبا أرقد ..
اطالعتها وأنا معقده حواجبي : ليكون مارقدتي أمس ..
حاست أسوم بوزها : ماياني رقاد ورقدت 2ونص لين 5 ..
رفعت حواجبي : زين والله الله يعينج عيل ..
مغطت أسوم يديها وقالت : نور تخيل روجح سيري يبي لي كوفي أبا اتنشط ..
آآآه أنا بروحي مصدعه وتعبانه , اطالعتها وقلت: يالله قومي ويايه بنسير نشتري لنا رباعه ..
أسوم بتأففف : ما اقدر ..
حاولت وياها : أسوم قومي يالله ..
قرصتني أسوم على زندي وقالت : روحي أنتي يبي لي ولج أنا ما أروم يالله روحي نوروه ..
أنقهررررررت منها ليش تقرصني , وقفت معصبه : ليش تقرصني ..؟
ضحكت أسوم : أسوالف وياج ..
حطيت يدي على خصري بقهر: لا والله سوالف هاي الحين ..
أطالعتني بتعب مصطنع وردت تجلب , أنقهرت لاخر درجه وطلعت سيده برع ..
سرت أمشي للكوفي الي موجود في المستشفى ..
مجرد دقايق ووصلت له , سرت سيده صوب وين يطلبون وطلبت لي نسكافيه أثنين ,,,, مجرد دقايق وخلص .. قبضت واحد ويلست أشربه في دربي والثاني في يدي اليسار ..
ويلست أمشي , عدلت الكوب الي في يدي اليسار لاني حسيته حرقني وقبضته من فوق صح هوه له غطاء وهذا أحسن شي فيه .. بس حارر ...
فجأة ولا أدعم في حد , وأضرب يده أخخخخخخخخخخخ ويطيح الي في يدي وينجب على ملابسي البيض ويحرق يدي ... حسسيت بالموت حااااار ضووو ...
قلت بصوت يشبه الانين : أأأأأأأأي ...
ورفعت عيني خاطري أصرخ على الي دعمت فيه , وربي مالي نفس حق أي شي الحين ... الحرق يعوووووووورني موووت ..
وقلت بصوت ينسمع : يعلك الحرق ,,, طبعا بدون قصد من القهر إلي فيني ..
لف صوبي وأنا تميت مبلقققققققققققققه عيوني عليه من االصدمه ..
هذا
هذا!!!!!!!!!!!!!!!!!!!!
نهاية البارت السابع عشر ...
14-01-12, 10:04 PM
جديد مواضيع قسم القصص المكتمله من وحي قلم الاعضاء
العرض العادي
