ام متعب""

يعافيج ربي وحياج الله اسعدني تواجدج

بياص الصبح""

هلا وغلا متابعتعج وتعليقاتج حيل تعجبني وان شاء الله الاجزاء الجايه تكون عند حسن ضنكم اما بخصوص ان بارت واحد مايكفي خلاص فيه اسابيع بحط بارت واسابيع بحط بارتين اوكيك

halazona""

هلا وغلا يالغلا الحمدالله انا تمام "
اممممم الجده هيا والعنود ونوير ان شاءالله تعجبكم تعجبكم شخصياتهم ومواقفهم
وحياج الله

"الجــــــزء الثــــاني عشــــر"





افتحت الكيس طلعت الكرتون إللي داخله فتحته كان الكرتون ابيض ومن داخل مليان ورد جوري طبيعي لقت عطر إيدول من جورج أرماني وساعه من جورج ارماني
خذت الكرت مكتوب فيه

[ " خنجرآلشــوق'
منتصف ~ بين ~ آلآضلاع

لآهو..اللي ذبحنــــي'
ولآني..اللي قويته "

الحمدالله على السلامه ياحور

تحياتي ]


صكت الكرت وألف سؤال يدور برأسها

من منو الهديه غريبه مانكتب اسم عليها يمكن وحده من صديقاتي ايام الثانوي بس ليش ماكتبوا الاسم
لا لا مااعتقد صديقاتي بيكتبون اسمهم بس من له مصلحه

من بين الافكار إللي توديها وتجيبه تذكرت شغله ورجعت تفتح قفص الساعه مره ثانيه لفت انتباهها إن الساعه رجاليه
اي رجاليه ياربي هي رجاليه وإلا يتهيئ لي حمدالله والشكر من هذا الاحول إللي شاري ساعه رجاليه

رنة تلفون البيت
نقزتها من الخوف

بسم الله إشفيني خايفه

كانت متردده ترد وإلا ماترد
فالاخير قررت ترد ارفعت السماعه بخوف

حور بخوف : ألو

وصلها صوت مرعب خشن : وصلتج الهديه ياقمر

حور مرعوبه والكلمات جمدت
بداخلها

كمل كلامه : على فكره تراني متقصد بالساعه الرجاليه
وقصدي فيها اوصلج خبر ان فيه رجل يراقبج على مدار الاربعه والعشرين ساعه

حور خذت نفس وحاولت ماتبين خوفها : احم عفوا من يتكلم

: بــــــدري ياقمر بعدين بتعرفيني

حور: ألــــــو ألــــــو

صكر الخــــــط

للحين ماسكه السماعه بإيدها ومصدومه

صرخـــت بخوف ورعب :
كــــــــــــــــــارين

جتها كارين تركض : شنو فيه

حور بدون مقدمات ركضت وحضنت كارين بخوف

كارين مليون علامة استفهام على وجها : هور شنو فيه

حور وخرت من حضنها وركضت بسرعه للباب

شافته مقفل وراحت لدرايش تبي اتأكد من انها مصكر

بعد ماتأكدت إن كل شي
مصكر رجعت لصاله قعدت
عالقنفه مسكت موبايلها بإيدها
وضمت رجولها وتمت تراقب حركة عقارب الساعه الموجوده بالصاله

وكل هذا تحت استغراب من كارين : إنتي ليش خوف

حور بخوف : كارين مره ثانيه لاتفتحين الباب لأي احد ماتعرفينه

كارين : إن شاءالله بس انت مافيه خوف

مسكت موبايلها بتردد ادق على خالتها سعاد أو لا شافت الساعه توها تسع يعني توهم فالعزيمه مامداهم قعدوا حطت الموبايل على الطاوله وقعدت تقرى المعوذات
خذت الريموت وشغلت التلفزيون وحطته على قناة المجد القرآن وعلت على الصوت تبي تبتعد عن الافكار إللي توديها وتجيبها

ياربــــــي إشهالورطه
منــــــو يطلع هذا بعد
يمــــــه صوته يخرع
موبس يخرع إلا يرعب إذا صوته ارعبني بهالشكل شلون
وهو يراقبني 24ساعه
ياربــــــي ساعدني والله خايفــــــه

&" "& & & " " &


قاعدين بعيد عن المعازيم في احدى زوايا الصاله الفخمه

(منايل ماسكه إيد منال)
منايل اتكلم بلهفه : وربي لكم وحشه اشتقت لكم انتي وحور

منال تبتسم : واحنا اكثر هاه إن شاءالله استانستي

منايل : اي عادي مافيه شي جديد نفس كل سفره بس تمنيتكم انتي وحور وياي

منال ضحكت : هههه لايامعوده احنا متعودين على حر الكويت فديتها خلاص صار الحر عندنا شي اساسي

منايل ابتسمت على بساطه صديقتها : خلينا من هالسالفه وقوليلي بالضبط سالفة حور
ويا الحيوان عمها

منال عبست وجهها بقرف من طاري عناد : عنادوه يعله العمى هذا عم هذا غم وهم

منايل : ادري طاريه يلوع جبدج بس قوليلي السالفه

منال عدلت قعدتها : اوكي سمعي ياطويلة العمر

منايل لفت راسها تشوف ريما إللي جايه صوبها : منال لحضه انشوف هذي إشتبي

ريما تمشي وهي رافعه كتوفها بطريقه اشبه لمشيت الرجال قربت منهم خشنت صوتها : مرحبا

منال تكره هالاشكال ماتحب البويات بدون نفس : هلا

ريما مدت إيدها تسلم : شخبارج

منال مدت إيدها كمجامله : تمام

ريما مسكت إيد منال ورفعتها لفمها عشان تبوسها

منال سحبت إيدها بسرعه وبققت عيونها بدهشه : انتي ماتستحين عمى بعينج ليكون حسبالج انا اليدي مالتج

ريما ببرود ولامبالاه : عفوا ليش كل هالعصبيه

منال فتحت عيونها بزياده طالعت منايل باستغراب واشرت بإيدها اشارة هذي مجنونه

منايل فاطسه على شكل منال شلون مصدومه : ههههههههه
ريما بليز ممكن تخلينا بروحنا

ريما هزت راسها : اوكي بس قبل لا اروح حبيت اسأل الحلوه إللي كان وياج وينها

منال للحين اطالعها نظرت تعجب وضع ريما عند أهلها شي عادي ولاكأنها شاذه

منايل بسرعه: تعبانه شوي خلاص ريما خلينا بروحنا

ريما : اوكي اوكي اخذوا راحتكم

مشت مشيتها الرجوليه بلبسها الساخر جنز مشقق لوست وبلوزه حمرا عليها صورت جيفارا مدخله نصها ومطلعه نصها الثاني بطريقه مبهذله ولابسه سلسله عريضه ورابطه سكارف احمر دمي بإيدها وشعرها الثلجي مطيرته فوق بشكل مبهذل

منال ودها ترجع شكلها مقرف ومغزز : وووع جبدي لاعت الله يخسها انتوا عادي عندكم محد ينصحها

منايل هزت كتوفها بلامبالاه :
كيفها كل واحد حر بنفسه

منال : عالاقل انصحوها لعن الله المتشبهين بالنساء والمتشبهات بالرجال

منايل : شسويلها ماتسمع النصيحه وامها كل ماقلت لها شي قالت بلاتعقيد بلاتعقيد

منال : تكسر خاطري احسها من داخل طيبه وحبوبه بس تسوي نفسها بويه عشان تلفت الانظار

منايل : خلاص صرتي مصلح اجتماعي خلينا من ريما وقوليلي سالفة حور بالتفصيل

منال : اوه نسيت السالفه ومافيها كانت مداومه وياها عمها بالشركه - - - - - - ( وقالت لها السالفه كامله)




& - && - & - && - &

في فيلا واسعه ذات فخامه يحيط بها الحرس من جميع الجهات كان قاعد بهيبه وكبرياء

جاه واحد من الحرس : سم طال عمرك

: هاه شالاخبار

الحارس : كل شي يمشي مثل الساعه طال عمرك

: قواكم الله ابي المرقابه أربعه وعشرين ساعه

الحارس : ان شاءالله طال عمرك



&& - & - & - &&

شافت الساعه صارت 11 الليل ماعاد قدرت تصبر اكثر الخوف ذبحه
دقت على منال

ردت منال : ألو

حور بخوف : انتي بروحج وإلا احد عندج

منال باستغراب : لا محد عندي منايل راحت تكلم خالتها ليش إشفيج

حور شوي وتبكي: منال انا خايفه متى ترجعون

منال بخوف : حور إشفيج إشصاير

حور : ماينفع إذا جيتي بقولج كل شي بس لاتأخرون

منال : خلاص نص ساعه ونطلع بس قوليلي فيج شي

حور تحاول اطمنها : لابس خايفه شوي لاتطولون

منال : إن شاءالله حبيبتي

حور : يلا باي

منال :باي




&& && *** *** && &&

( بيت عناد )

عناد : تخيلي ياسكينه بيدفع مليونين دينار فيها

سكينه مسكت قلبها : أيه مليونين دينار ياخرابي دي حتعيشنا امراء طول عمرنا

عناد : اي التجار ماتهمهم الفلوس شي يبونه يحبون ياخذونه سواء غالي أو رخيص

سكينه : مايكونش دا عاوز ينصب عليك معأوله عاوز يدفع مليونين دينار في دي البت (البنت)

عناد : اي انا في البدايه انصدمت بس بعدين شفته متمسك فيها والبنت شكلها عاجبته وداخله مزاجه

سكينه: ومالك آعد ماتأوم تقيبها وإلا آآولك دا المدارس بعد اسبوع وحور حداوم في كليه التربيه روح خدها بالغصب وعطها ابوفيصل وخد المليونين

عناد : كنت بسويها بس هو شرط اني ماأخذها بالغصب من عند جدتها يعني لازم تموت جدها بعدين اخذها تعيش عندنا

سكينه: ودا عندو صبر دي قدتها عمرها طويل يمكن نموت وهي لساتها ماماتتش

عناد بخبث : لا إن شاء الله بتموت قريب بس انا افكر في طريقه بعيده عن شوشرت الشرطه





ـــــ:ـــــ:ـــــ

(في غرفة حور)

منال تسوي نفسها مغمى عليها عالسرير : واااي ياحلات الساعه حور خن روح انبيعها شرايج

حور فتحت عيونها وعصبت :
احر ماعندي ابرد ماعندج شنو لهدرجه تشوفين السالفه بسيطه عشان تستهبلين اقولج رجال غريب وصوته رعب دازلي الهديه وتقولين خن بيع الساعه تراج سخيفه والشرهه موعليج علي انا

منال تفشلت : اسفه حور حبيبتي انتي والله موقصدي بس الساعه حدها ادوخ شوفيها تهبل

حور : ادري الساعه حلوه وغاليه بس ماتهمني كثر مايهمني اعرف منو الشخص هذا إللي متعب نفسه وجايب هالهديه ولابعد يراقبني

منال : حور يمكن احد معجب فيج

حور : حمدالله والشكر ومنو شافني عشان يعجب فيني

منال : انزين منو بيكون انتي لابنت شيخ ولابنت وزير عشان نقول يبي ينتقم أو شي

حور بخوف: وجع شنو ينتقم عمى بعين عدوج لاتقعدين تسوين فلم هندي

منال : وانتي بس خايفه وموعاجبج كلامي

حور : اقول نامي بس وخليه يولي

منال انسدحت عالسرير تنهدت : آآه ياحور لوكنتي اليوم معاي وشفتي الالماسات والساعات إللي لابسينها خالات منايل وعماتها وبناتهم بيغمى عليج

حور : الله يهنيهم قولي ماشاءالله

منال تنهدت : ماشاءالله الله يعطينا مثل ماعطاهم


:ـــــ:ـــــ:ـــــ:

(مـــــزرعه الجده هيا )

نوير تحلب الغنم والعنود تحلب البقره

العنود مالها خلق : أوف من هالبقره كل البقر ماتوا وماباقي إلا انتي ياهالبقره عزالله عمرتي

نوير شايله طاسة الحليب وتبي تطلع من زريبة الغنم : وجع ياعنيده انتي انهبلتي قولي ماشاءالله تبين تذبحين ابقرتنا

العنود : من زينج انتي والبقره لاتخافين عمرها طويل مثل عمرج

نوير طلعت من الزريبه وصكتها وحطت الطاسه عالطاوله وغطتها وقعدت عالكرسي: انت استخفيتي من قعدنا نبسط في سوق الفحيحيل وكل شوي شاريه مجلات وكتب من المكتبه وانتي مستخفه

العنود توقف وتخصر : ليه مستخفه شايفتني مجنونه والله ابي اقرى واتثقف يكفي اني ماكملت تعليمي وهالبقره احلبيها وإللي بالطقاق انا ماعادني حالبتها (طلعت من الزريبه وخلت البقره وماعاد كملت حلب )

نوير : العنود عنيده تعالي تعالي كملي حلب البقره

العنود احقرتها وخلتها تسب وتلعن وهي خذت مجلة قطوف وقعدت تقراها


ـــــــــــــــــــــــــــــــــــ

بدأ العام الدراسي الجديد

اليوم أول يوم دوام لحور ومنال ومنايل واتفقوا يروحون بسياره وحده سيارة حور بس إللي تسوق منال حور حالفه عليها جدتها ماتسوق لان مامر على عمليتها إلا شهر ونص بس حور تحس نفسها صارت زينه بس جدتها راكبه راسها




وقفوا عند بيت منايل وشافوا بوسعود وسعود يتريقون فالحديقه

منال : هذا بوسعود موجود نزلي سلمي عليه واشكريه عالاجازه شعليج ماراح اداومين إلا ورى رمضان

حور شهقت : انزل والغثيث اهني هذا إللي ناقص بروحي لايعه جبدي منه

منال : حور فشله روحي اشكريه هذا هو موجود

حور : منول والله لايعه جبدي من هالغثه مالي خلق له

منال : خلاص انا انزل وياج فشله الريال ماقصر وياج وهو اكبر من ابوج عادي امشي ننزل سلمي عليه واشكريه وبس ماراح انطقها سوالف

حور تغصب نفسها : لازم

منال بحده : أي لازم

حور عقدت وجهها : أوف يلا

منال : خليج طبيعيه وماعليج منه


نزلوا من السياره واتجهوا صوب الحديقه

بوسعود اول ماشافهم ابتسم وقعد يرحب فيهم :
يامرحبــــــا يلا حيهم

حور ومنال ابتسموا : الله يحيك
صبحك الله بالخير

بوسعود : هلا صباح النور حيالله هالبنيات الحلوات

حور ومنال : الله يحيك عمي

بوسعود : شلونكم عساكم بخير

حور ومنال : بخير الله يسلمك

بوسعود : وانتي ياحور شلون العمليه إن شاءالله احسن

حور: بخير الله يسلمك يعطيك العافيه ياعمي عالاجازه ماقصرت

بوسعود : افا عليج يابنتي ماسوينا إلا الواجب وإذا تبين زود ابشري

حور : ماقصرت ياعمي خيرك سابق

سعود يسوي نفسه مايشوفها ولا معبرها ياكل ولا رفع عينه


جاتهم منايل

منايل تبتسم : صباح الخير

الكل : صباح النور

باست رأس ابوها : شلون الشيخ

بوسعود : بخير دامه يشوف الشيخه منايل

منايل راحت جهة سعود وباسته على خده : شلون دكتورنا

سعود قاعد عالكرسي ابتسم وسحبها عشان تنزل لمستوه وباس خدها : بخير يالطالبه المجتهده

ضحكت وسلمت على حور ومنال

منايل : يلا نمشي

حور ومنايل : يلا عن اذنكم

بوسعود : الله معاكم

منايل : يلا مع السلامه

سعود وبوسعود : مع السلامه

حور مشت تبي تركب السياره ووقفها صوته

سعود : حــــــور

الكل لف جهة سعود

حور وقفت بمكانها وهي معطته ظهرها وعقب لفت له :
نعم

سعود طالعها وطول وهو ساكت عقب انتبه لنفسه : احم
حبيت اذكرج بموعد جدتج الاسبوع الجاي

حور : شكرا انا ذاكره مانسيت
عن اذنكم

سعود : اذنج معاج


(اركبوا البنات السياره وراحوا لكليتهم )








(بيت الجده هيا )

الجده هيا معصبه : انتي انهبلتي

العنود عصبة : ليه انهبلت انا كفرت وإلا اجرمت

بندر غمز للعنود بعينه عشان تسكت : يمه هدي اعصابج كل شي بالتفاهم ينحل إشفيها إذا كملت تعليمها وادرسة عادي العلم نور والرسول قال اطلبوا العلم ولو فالصين

الجده هيا : يوم شاب ودوه الكتاب تدرس على كبر إشتبي بالدراسه اهم شي تعرف تقرى وتكتب

بندر : العلم مايعرف صغير ولا كبير وبعدين مافيها شي انتي ليش معصبه

الجده هيا شغلت الرادو ورفعته لاذنها : خلاص كيفكم إللي تبون تسونه سوه انا مالي شغل

العنود استانست وقامت تحب راس جدتها : الله يخليج لنا

نوير : العنود فشيله تدرسين ابتدائي وانتي بهالعمر

بندر : لا بخليهم يمتحنونها اختبار مستوى وإذا انجحت بيحطونها متوسط تدرس مسائي

العنود : نوير ماودج تدرسين وياي

نوير بققت عيونها : لاوالله مابي ادرس انا انسانه كسلانه وماحب الدراسه وزين اني عرفت اقرى واكتب







(في الكوفي شوب)
نايف صار له اسبوعين راجع من روما وسوى له عزيمه كبيره استقر في الكويت واشتغل بشركة ابوه

سعود : تصدق من زمان عن هالقعده والسوالف تذكر ايام الجامعه24 ساعه مع بعض

نايف يتسند عالكرسي : اي والله ياشين الغربه تبعد الواحد فديت الكويت وترابها

سعود : يارجال زين انك استقريت وارتحت في ديرتك وبين اهلك

نايف : اي والله ياخوك مافيه احلى من الاستقرار وراحة البال

دق تلفون سعود وعتفس وجهه وحطه سايلنت

نايف : إشفيك من داق عليك

سعود : هذي مادري متي تفهم وتبطل هالحركات

نايف عرف من يقصد : رغــد

سعود بعصبيه : اي رغد ماهي راضيه تفهم اني خلاص شلتها من راسي ولايمكن افكر فيها مهما تسوي

نايف يحاول يهديه : يارجال هد اعصابك مصيرها تمل وتبطل هالحركات


ــــــ : ــــــ : ــــــ : ــــــ

من جهه ثانيه رغد كانت ادور في السوق ومقهوره ان سعود مايرد عليها ولايعبرها
لابسه عبايه مخصره على جسمها وشيله شفاف لافتها وشعرها كله إمبين وجود الشيله وعدمها نفس الشي
وحاطه حمره احمر فاقع
ومكثفه المسكره والكحل

مر واحد من عندها : اموت انا عالاحمر

رغد لفت بمياعه صوبه ورفعت حاجبها ومشت

الشاب مشى وراها يبي يرقمها:
البلوتوث

رغد بمياعه وقفت وتخصرت واشرت بصبعها : هاردلك مالك نصيب (لفت وكملت تسوقها والخدامه وراها تشيل الاغراض )







منار قاعده بالصاله تقرظ اظافرها حاطه التلفزيون على قناة الكويت الاولى تنطر الاخبار

جاتها جدتها بسرعه : هاه اعلنوا رمضان بكره

منار : لا للحين ماجات الاخبار

دخلت حور : للحين ماعلنوا

منار : لا للحين ماطلع شي

قعدت حور عالقنفه ورفعة سماعه التلفون تبي ادق على منال إلا يطلع خبر عاجر ( غدا الاول من شهر رمضان المبارك )

منار بصوت عالي : بكره رمضان يمه

الجده بفرح : جعله مبارك

حور قامت وحبة راس جدتها : الشهر عليج مبارك يمه

الجده : علينا وعلى المسلمين يتبارك

منار : الشهر عليج مبارك يمه

الجده : علينا وعليج يابنتي

دق التلفون وركضت حور : هذي اكيد منال

رفعت اسماعه وبسرعه قالت : بسبقج واقول الشهر عليج مبارك ياأحلى منوله

سعود: علينا وعليكم والشهر عليكم مبارك

حور تجمدت ماتكلمت ولاكلمه

سعود : ألو ألو

حور استوعبت : ألو

سعود : من الادب إذا احد قالج الشهر عليج مبارك تقولين علينا وعليك وإلا ماتعرفين

حور بعناد : لاماعرف ونعم داق

سعود : اقلبي وجهج وعطيني جدتج

حور شهقت بعدين وطت صوتها عشان ماتسمعها جدتها : انت إللي اقلب وجهك
( وصكت التلفون بوجهه )

الجده : من إللي داق

حور : هاه لاغلطانين يبون مطعم



(من جهه ثانيه)

سعود تنرفز : صكت التلفون بوجهي هين

نايف يضحك : ههههه تستاهل انت إللي بديت

سعود دق الرقم وينطر احد يرد




شالت التلفون حور وعطته جدتها : يمه ردي

الجده : وليه انتي ماتردين

حور : يمكن احد من جاراتنا يبون يباركون لج بالشهر

الجده رفعت السماعه : ألو

سعود طخ : مساكم الله بالخير

الجده : مساك الله بالنور هلا

سعود : شلونكم ياخاله عساكم بخير

الجده : بخير الله يسلمك شلونك وشلون اهلك

سعود : كلهم بخير والشهر عليكم مبارك

الجده : علينا وعليكم يتبارك

سعود : حبيت اسلم عليكم واسأل عن صحتج وابارك لكم بالشهر

الجده : الله يبارك فيك ياولدي ويسلمك من كل شر ويخليك لعين ترجيك

سعود : الله يسلمج ياخاله احم-كمل بتردد- اقول خاله بغيت اسأل عن رقم ملفج واسم الدكتور إللي متابع حالتج

الجده : والله ياولدي مادري

سعود بابتسامه خبيثه: اجل حور عندج عشان اسألها اكيد تعرف

الجده : أي والله عندي حور حور تعالي


حور شرقت بالعصير : كح كح كح احم (اشرت بإيدها شنو)


الجده : تعالي تعالي سعود يبي يسألج

حور فتحت عيونها : يسألني عن شنو

الجده : مادري يقول اسم الدكتور ورقم الملف مادري تعالي كلميه وهو بيقولج

حور : لاوالله قوليله انتي اسم الدكتور لؤي

الجده ماعرفت تنطق اسمه : لوي

حور : لايمه لؤي

الجده : ماعرفت اقوله

حور : يمه مابي اكلمه خلي منار تكلمه

الجده : خلاص تعالي يامنار علميه بالاسم

حور غمزت لمنار ومنار فهمت وقامت خذت السماعه : ألو

سعود انقهر وبدون نفس : هلا شسم الدكتور

منار بلعانه :الدكتور لؤي ورقم الملف

سعود قاطعها : لاخلاص مايحتاج رقم الملف

منار بلعانه اكثر : ليش توك تقول لامي تبي رقم الملف


سعود بعصبيه :لا خلاص ماله داعي مع السلامه

منار ببرود : براحتك مع السلامه







نايف : هههههههههه من حفر حفره لأخيه المسلم وقع فيها

سعود : وانت بفهم شاللي يضحكك

نايف يمسك ضحكته : ابد سلامتك





ــــــ & & ــــــ & & ــــــ & &

منال تسوي الفطاير ونرجس تقص السلطه

منال : نرجس ترى العصر ماراح نتابع ولا مسلسل نخليها باليل

نرجس : اي احسن خن خلص شغلنا بنودي اليوم لمنو من جيرانا

منال ادخل الفطاير بالفرن : بس بنودي لبيت حور وبيت ام محسن والباقي الايام اليايه

نرجس خلصت تقطيع السلطه : انا خلصت السلطه بسوي الحلو وانتي سوي الشوربه

منال : خلاص شوي واخلص الفطاير بعدين بسوي الشوربه

نرجس : امي سوت هريس وقالت بتسوي لقيمات وبرياني دياي






حور تسوي الجريش : منور طلعي السمبوسه والكبه عشان نقليها

منار : ترى مالي شغل ماراح اقليها يطشر علي الزيت

حور : خلاص جيبيها وانا بقليها الحين بسكر عالجريش وانتي قصي السلطه ولاتحطين عليها مايونيز امي ماتحبه

منار : ترى الساعه 4ونص وانتي للحين ماسويتي لقيمات

حور :خلاص الحين بسوي لقيمات بعدين بقلي السمبوسه والكبه بس انتي خفي إيدج عشان باقي الشوربه ماسويتها

دخلت الجده : قواكم الله

حور : الله يقويج يمه

الجده : هاه إشسويتوا

حور : سوينا جريش ومعكرونه بالباشمل والحين بسوي لقيمات واقلي السمبوسه والكبه

الجده : خلاص انا بسوي الشوربه

حور : لاوالله ماتسوين شي انتي وين فيج حيل عالوقفه وانتي صايمه روحي ارتاحي وانا بخلص كل شي

الجده : خليني اساعدج يمه من رجعتي من الكليه وانتي بالمطبخ

حور ابتسمت : لافديتج ارتاحي وهذي منور وكارين يساعدوني
بس قوليلي تبين شوربة عدس وإلا خضره وإلاشعيريه

الجده : سوي شوربه عدس وإذا خلصتي ودي لبيت سعاد وأم حمد وأم محسن وتنقصي لمريم الهنديه من الجريش ولقيمات تراها تحب جريشنا والقيمات

حور تشيل القيمات من الزيت : ابشري من عيوني

الجده : اي ولاتنسين خلي خالد يودي للمسجد فطور صدقه لنا ولموتانا بيتجمعون هالمساكين الضعفان فيه يبون الفطور

حور : ابشري ولا يهمج يالغاليه انا حاسبه احسابهم

الجده :بارك الله فيكم

منايل أول مارجعت من الكليه صلت العصر ونامت طبعا بحكم كثرت الخدم إللي تارسين البيت وعندهم 3طباخات فماعمرها دخلت المطبخ تطبخ أو حتي تسويلها قلاص عصير حتى تستغرب لما تشوف حور ومنال يطبخون


قعدت من النوم شافت الساعه5 للحين مااذن الاذان قامت غسلت وجهها ونزلت شغلت التلفزيون تنطر الاذان يإذن

دخلت امها : صح النوم منوله قعدتي

منايل ابتسمت : صح بدنج مامي وين ابوي وسعود وعذاري مالهم حس

امها : ابوج وسعود راحوا لجدتج عنده فطور وعذاري للحين نايمه

منايل : وليش مارحتي وياهم

امها : عبير اختج وبناتها بيفطرون عندنا اليوم

منايل : اوه نسيت عبير من كثر ماتسافر ألمانيا لأم زوجها وتقعد بالشهور انسى إن عندي اخت اسمها عبير









حور بعد الفطور خذت لها شور وريحت ساعه قبل اذان العشا عشان تروح ويا جدتها ومنار يصلون العشا والتراويح في المسجد"







فوزيه من بدى رمضان وهي عند خالها مصطفى تبي تبعد عن بيتهم والجو الوسخ إللي هم فيه حتى في رمضان هذا جوهم رقص وخمر وفجور


(في بيت عناد )

سكينه دايخه : ياخرابي دي الشمس شرق وإحنا لسا سهرانين ماحسيناش

عناد سكران : هههه الشمس شرقت عطيها ماي هههه

سكينه شالت بطل الخمر : اووم روح انخمد فوأ دنتى اضيت عالخمر كله

عناد يتطوطح : قضيت عليه وإلا ذبحته ههههه

سكينه : خلاص روح نام فوأ

عناد : انام وإلا اقعد ههههه

وقعدوا على هالحال لي الساعه 9الصبح)






دق الجرس وفتح خالد
خالد :يمه قرقيعان

الجده : دخلهم يمه دخلهم

دخلوا صبيان وبنيات ووياهم خدامتين

الصبيان والبنيات يغنون :قرقيعان وقرقيعان بين قصير ورمضان عطوا الله يعطيكم بيت مكه يوديكم

منار : قولوا الله يخلي منور

الصبيان والبنيات يغنون: الله يخلي منور الله يخلها لامها عسى البقعا ماتخمها ولاتواسي على


خالد : قولوا سلم خالد

يغنون: سلم ولدهم يالله خله لأمه يالله سلم خالد يالله خله لامه يالله عسى البقعا ماتخمه ولا تواسي على امه

حور توزع عليهم قرقيعان : خلاص نشفتوا ريجهم غنوا وغنوا خلاص قواكم الله

منار ماسكه ولد صغير وتبوسه وتقرص خدوده : ياحلوك شاسمك

الولد يدزها : وحلي يالبطه

حور وخالد فطسوا ضحك : ههههه وشهد شاهد من أهله

منار عصبة: جب من حلاتك مره ثانيه ماراح اعطيك قرقيعان

الولد : من حلاتج انتي عادي هذا تعطيني (ويأشر على حور )

حور باسته على خده : ماعليك منها انا اعطيك خلها تولي





بيت أم سعود مسوين قرقيعان لبنات عبير ريماس وريناد
منايل عزمت حور ومنال حور ماراحت تعذرت إن جدتها تعبانه ومنال راحت ويا اختها نرجس


وزعوا القرقيعان

فتحت نرجس القرقيعان وشهقت شهقه عاليه

طقتها منال بكوعها : يالخايسه فضحتينا

نرجس تفرك مكان الطقه وتقصر صوتها : شوفي القرقيعان فيه جنيه ذهب

منال بصوت واطي : عادي عندهم هم جذي يحطون بالقرقيعان جنيهات ومرات مفتاح سياره حسبالج نفس قرقيعانا حلاو وبسكوت ومكسرات

نرجس : مفتاح سياره انتي من صجج انا بروح افتش بقرقيعان اليهالوه يمكن القاه

منال : ويعه لاتفضحينا شنو تفتشين حسبالج هاليهال مايعرفون مفتاح السياره انثبري بس ترى دوختي راسي بالهذره

نرجس : منول شوفي اليهال شلون يقطون الجنيهات بروح اخذها وماعلي منج (قامت ولاهمها )

منال بصوت واطي : نرجسوه نرجسوه تعالي لاتفضحينا


نرجس راحت عند بنيه صغيره :هاه حبيبتي افتح لج الحلاو

البنيه مدت لها الحلاو : اي فتحيه

نرجس تضحك للبنيه وتسوي نفسها تلعبها فتحت لها الحلاو وخذت جنيهين كانوا طايحين عند رجل البنيه ورجعت قعدت عند منال

منال بصوت واطي : يالخايسه إشسويتي

نرجس : ماسويت شي بس خذيت جنيهين طايحه بدال مايخذونها الخدم

منال : انتي ماتستحين حراميه تبوقين

نرجس :مابقت شي اهم إللى حاطين الجنيهات عشان الناس تاخذها مو عشان تنقط وانا ماسويت شي خذيتها




العنود امتحنت امتحان مستوى وانجحت ودخلت متوسط
صارت اداوم مسائي تعرفت على بنات نصهم متزوجات وفيه منهم للحين ماتزوجوا ارتفعت معنوياتها يوم شافت بنات بعمرها يدرسون

(في المدرسه المسائيه)

العنود قاعده ويا بنتين صارلها فتره متعرفه عليهم

الجازي : العنود انتي بنت طيبه وعالفطره وماتعرفين البنات توس جديده عليهم ونصيحه لاتسولفين قدام احد منهم انس تبسطين وتبعين معا جدتس

(الجازي اتكلم بالسين فيه قبايل كلامهم بالسين ووضحه بالشين انا وضحت لكم فالبارت السابق بس حبيت اذكركم *غنادير )

العنود إبرائه :ليش انا ماقلت شي غلط

وضحه : ندري يالعنود انش ماغلطتي بس انتي على نياتش وبعض البنات بيقعد يستهبل عليش ويتطنز

العنود : ليش يتطنزون علي وش فيها البسطه حنا مابعنا شي حرام وإلا عيب

وضحه : ندري بس تعرفين الناس تطوروا وصاروا مايشترون إلا من الاسواق والمجمعات

الجازي : وضحه صادقه وانتي خليس معي انا ووضحه وإي شي تبينه ماتعرفينه اسألينا وبنعلمس وتعرفين الحين الناس همهم يشتروا كل شي ماركه

العنود : والماركه هذا شنو

الجازي : اسمعي انا ببسطلس شوفي الحين الملابس والعطورات والشناط والنعول صاروا يجيبونا من برى من دول خارجيه مثل فرنسا وإيطاليا وامريكا وبريطانيا وغيرها وكل ماركه لها اسم يعني كل نوعيه لها اسم فهمتي علي يعني هذي الجنطه إللي معاي ماركة ديور وفيه من هالماركه عطور ونعول ومكياج وغيرها فهمتي علي

العنود بدت تفهم:اي يعني الماركه نوعيه زينه

وضحه : اي يعني نوعيه زينه
وغاليه

العنود : غاليه يعني كم دناريين
ثلاث دنانير كم يعني

الجازي ابتسمت : لافديتس اكثر يعني هذي الجنطه انا شريتها تقريبا بثلاثين دينار

العنود فتحت عيونها مصدومه : ثلاثيــــــن دينار انتي صاحيه

وضحه ابتسمت بحب : ماعليه انتي محيطش بس البيت والبسطه فالسوق والمزرعه مابعد تعودتي على هالاسعار مع الوقت بتعرفين الناس والبضايع الماركه واسعارها













(سوق الفحيحيل )

نوير اتهاوش ويا وحده مصريه دعمتها نوير بدون قصد وطاح عصيرها
المصريه : قتيك نيله منيله دنتي عميا ماتشوفيش ياوليه ياحربايه انتي

نوير : عمى يعمي عينج يادرام البلديه لابوج لابو ستين كلب

المصريه : كلب ابوكي يابت الحرام

خذت نوير النعال تبي اطقها وتمسكها العنود : نوير امشي خليها تولي لاتفضحينا

نوير اتفلت :تف عليج هديني عليها انا بنت حرام ياصايعه ياضايعه

المصريه : غوري غوري عن وشي

نوير : انا غوري يادلة القهوه انا غوري ياكبت المواعين بكبره

(نايف كان مار من عندهم ويوم سمعها تقول كبت المواعين فطس من الضحك وقعد يتفرج عليهم)

العنود : امشي فضحتينا غوري عندهم بالمصري يعني اذلفي مو غوري الشاي

نوير بصوت واطي :قولي والله

العنود : والله

نوير تخصرت: غوري انتي واهلج غوري انتي وقبيلتكم كلهم

العنود سحبت نوير بالغصب : خلاص فضحتينا

نوير : ليه ماخليتيني اتوطى ببطنها الكلبه

العنود : خلاص المره راحت والسالفه انتهت وانتي للحين اتسبين

نوير انتبهت لواحد يطالعهم ويضحك : خير إن شاءالله فيه شي يضحك

نايف ابتسم : ابد سلامتكم (ومشى)

(نايف مايعرفهم بس كان رايح يخيط له دشداشه عند خياط متعامل وياه وشده منظر الهوشه وقعد يتفرج )

العنود : تستاهلين خليتي إللي يسوى وإللي مايسوى يضحكون امشي نرجع لأمي لابعد تفضحينا







الجده حصه كانت واقفه عند الحريم تشتريلها بوشيه وقفت عن الجده هيا

الجده حصه : عندكم بوشيه

الجده هيا شبهت عليها : انتي حصه بنت عبدالله

الجده حصه عرفتها : يامرحبا انتي هيا

ويقومون يسلمون على بعض ويرحبون ببعض

الجده حصه : شلونج ياهيا سعد عيني يوم شفتج

الجده هيا : بخير دامني شفتج يامرحبا بالساعه إللي جابتج

وقعدوا يسولفون وياخذون علوم بعض

حصه وهيا بنات خاله صار لهم 15 سنه ماشافوا بعض فرقتهم الظروف وجمعتهم الصدفه

ــــــ && ــــــ && ــــــ

بعد مرور اشهر

حور راجعه من الكليه اليوم اخر امتحان عندها

حور : السلام عليكم

الجده : هلا وعليكم السلام قواج الله يمه

حور فصخت عبايتها وحبت راس جدتها : الله يقويج يمه

الجده : هاه شلون الامتحان

حور : لاابشرج إن شاءالله زين

الجده : يلا إن شاءالله تنجحين

حور : إن شاءالله ضامنه النجاح طلعت كل المواد ناجحه فيها وبس باقي لي ماده وواثقه بإذن الله إني ناجحه فيها

الجده : الله يوفقكم انتي واخوانج بكره نتايجهم

حور : الله يسمع منج سبحان الله مسرع مشت الايام ماني مصدقه إني خلصت أول سنه بالكليه وباقيلي ثلاث سنين

الجده : بتركض الايام وإن شاءالله اشوفج لابسه لبس التخرج (كملت بحزن) امج رحمة الله عليها كانت تحب العلم والدراسه دايم كانت تقول عيالي ابيهم يكونون جامعيين

حور : رحمة الله عليها والله يطول لي بعمرج ياأغلى من بالكون يلا يمه بروح اريح لي شوي وإذا اذن الظهر قعدوني

الجده مسكت إيدها : لحظه يمه ابيج بسالفه

حور بخوف : خير يمه امريني

الجده تنهدت : شوفي يمه انا بتكلم بدون مقدمات الكلام إللي بقوله يمكن يفرحج أو يمكن يزعلج بس تأكدي إن إللي سويته لمصلحتج انتي واخوانج

حور باهتمام وخوف : خير يمه قولي

الجده : بتكلم بس لاتقاطعيني لين اخلص كلامي

حور : ابشري يمه بس قولي

الجده : شوفي يمه ماباقي من العمر كثر ماراح وانا يابنتي كان عندي مطعم صغير ومصبغه كاتبها جدتج رحمة الله عليه باسمي كنت مخليتها ابيكم لي كبرتوا يكون عندكم مدخول ثاني وتقعد لكم لليوم الاسود عسى عيونكم ماتشوفه بس ديون ابوكم والهم إللي اشوفه بعيونج شايلته عشان تخلصين هالدين حدني على شي ماكنت ابي اسويه وخلاني ابيع المطعم والمصبغه واسدد باقي ديون ابوج واسدد اقساط سيارتج (توضيح للي مايعرف مصبغه عندنا يعني المحل إللي يسون غسيل وكوي للملابس )


حور كانت بتكلم بس اشرت لها جدتها بإيدها عشان ماتقاطعها ففضلت حور السكوت

الجده تكمل كلامها : خليني اكمل يابنتي انا خايفه عليكم غدر الايام خايفه اموت وانا مرتاحه وماتكونون شايلين هم شي

حور خنقتها العبره : يمه تكفين لاتطرين الموت يومي قبل يومج

الجده كملت : يابنتي الموت حق وماعاد باقي من العمر كثر مامضى وخلاص يابنتي ان كان لي خاطر عندج بكره ابيج تقدمين استقالتج من شركة بوسعود وترتاحين بالبيت وتهتمين بس بدراستج

حور : يمه ليش تقضين دين ابوي ليش ماخليتي المطعم والمصبغه لج تأجرينها وتستفيدين من فلوسها

الجده : موضوع المطعم والمصبغه انتهينا منه وخلاص صكي موضوعه بس انتي للحين ماوافقتي على طلبي

حور : ابشري من عيوني إذا على الشغل من بكره بقدم استغالتي

الجده ابتسمت : بارك الله فيج يابنتي الموضوع الاول خلصنا منه باقي الموضوع الثاني

حور : امري يمه

الجده : مايامر عليج ظالم انتي ياحور كبرتي وماعدج صغيره ولازم تعرفين كل شي (تنهدت وكملت ) إن شاءالله إللي سويته صح بس قبل لاكمل ابيكم تعرفون انتي واخوانج انكم اغلى من مشى على هالارض يابنتي البيت هذا سجله ابوج باسمي واسمكم بس انا قلت لكم انه مسجل بأسمكم ولاتسأليني عن السبب

حور بخوف ليش جدتها اتكلم هالكلام وكأنها خلاص بتروح : يمــــــه

الجده : خليني اكمل كلامي

حور : تفضلي

الجده : امس رحت انا وخالتج سعاد وسجلت نصيبي فالبيت باسمها خفت ياخذني الموت وانتوا الوريث الوحيد لي وعقب عيني يغصبكم عمكم ويجبركم اتبيعون البيت وتالي يقطكم بالشارع فسجلت نصيبي باسمها عشان مايقدر يبيعه وانا ادري ان سعاد عمرها ماراح تضركم



حور خلاص ماعاد اقدرت تستحمل كلام جدتها دمعت عيونها وضمت جدتها بقوه تبي تحس بالامان كلام جدتها خلاها تحس بالخوف


الجده حاضنه حور وتكمل كلامها : حور يمه انتي كبرتي وبعد كم يوم بيكمل عمرج 19 سنه وانا ادري ان عقلج اكبر من عمرج انتبهي لنفسج واحذري من شر مرة عمج سكينه قبل لاتحذرين من شر عمج ولاتأمنين لهم تراهم نجسين ومايخافون ربهم وخليج قريبه من ربج وحافظي على صلاتج مهما كانت ضروفج خليج قريبه من الله هو وحده القادر انه يحميكم حافظي على شرفج ونفسج وحافظي على اخوانج ترى توهم صغار ومايعرفون لدنيا يمكن تمر عليكم ظروف صعبه بس هالله الله ماوصيج بالدعاء والصبر ترى الصبر مفتاح الفرج


حور زادت بالبكي : يمه تكفين ليش تقولين هالكلام

الجده ارفعت راسها وحبته وامسحت دموعها : روحي توضي وصلي لج ركعتين وريحي شوي

حور هزت راسها وراحت







(صبــــــاح يوم جديد )

قعدوا الساعه 8 الصبح

حور : خلود يلا خلصنا يالله يمدينا نشوف نتايجكم انت ومنور بعدين بامر عالكليه باقي ماده اليوم بتطلع نتايجها

خالد لبس دشداشته: يلا خلاص خلصت

حور : يلا ننزل منور تنطرنا تحت


نزلوا لقوا منار وجدتهم قاعدين بالصاله يتريقون

حور حبة راس جدتها : صباحج الخير يمه

الجده : صباحج الرضا يابنتي

خالد حب راس جدته : صباح الخير يالغاليه

الجده ابتسمت : صباح النور يالغالي

حور : يلا يمه حنا بنروح انشوف نتايجنا تامرين على شي

الجده : لاوالله ماتروحون إلا وانتوا متريقين

حور : يمه اذا رجعنا بنتريق

الجده بحده : انا حلفت

حور ابتسمت وقعدت : ان شاءالله من عيوني كم حصه عندنا وحده وعسى ربي يخليها لنا

الجده ابتسمت : ويخليكم لي

منار : إلا على طاري حصه يمه فديتج شنو الاسامي إللي تحبينها من البنات

الجده : والله الاسامي الزينه واجد بس انا فيه اسم احبه وإذا الله عطاني عمر وزوجت حور وجاتها بنت باسميها جود

حور ابتسمت : فديتج يمه إن شاء تشوفين عيالنا وعيال عيالنا

خالد ومنار : إن شاءالله الله يعطيج طولت العمر يمه



(بعد ماخلصوا ريوقهم غسلوا وقاموا يبون يروحون
قامت وياهم الجده وقبل لايطلعون مسكت خالد وحضنته بقوه )
الجده حاضنه خالد : يمه خالد ماوصيك في نفسك وخواتك ودراستك وصلاتك صل دايم فالمسجد

خالد باستغراب : ابشري يالغاليه لاتوصين

الجده هدت خالد ونفس الشي حضنت منار : هالله الله فالصلاه وفي دراستج و نفسج واخوانج خلوا إيدكم وحده

منار بنفس استغراب خالد : ابشري يمه

واخيرا الجده مسكت حور وضمتها بقوه اكثر : يمه حور انتي كبيره وفاهمه هالله الله بنفسكم وخلوكم جميع لايفرقكم الزمن

حور بدا قلبها ينبض بخوف خافت يصير لجدتها شي وحست ان دمعتها قريب بس مسكت نفسها عشان ماتخوف اخوانها : ابشري يمه

كل واحد فيهم حب راس جدته وإيدها واطلعوا

الجده : ودعتكم الله الذي لاتضيع ودايعه





مروا اول شي مدرسة خالد شافوا نتيجته ناجح ماخذ الاول نسبة 99% ومنار ناجحه ونسبتها 96% وحور نجحت فالماده الباقيه

مروا الجمعيه وشروا تورته صغيره وعصيرات وحلويات وشروا تمر مسمسم تحبه جدتهم


دخلوا البيت يركضون كل واحد يبي يبشر جدته الاول

لقوها في الصاله تصلي قعدوا ينطرونها تخلص صلاتها طولت وهي ساجده صار لهم تقريبا ربع ساعه من دخلوا وهي ساجده

منار طالعت حور بخوف : ماتحسين إن امي طولة في سجودها من دخلنا وهي ساجده

خالد بنفس الخوف : إلا طولت

حور قامت وقلبها يدق بخوف قربت من جدتها مدت إيدها وهزتها عالخفيف : يمه

على طول طاحت ووجها مبتسم

حور بخوف : يمــــــه يمــــــه إشفيج

حور حاضنه جدتها ودموعها بعينها صرخة : خالد بسرعه دق على الاسعاف

ركض خالد بخوف ودق على الاسعاف

منار جمدت عند رجول جدتها ودمعتها حارت بعينها خافت تكون ماتت

حور بدت تبكي : يمه فديتج قومي لاتخوفينا عليج

خذت حور تلفونها وضغطت على رقم خالتها سعاد
: خالتي سعاد لحقي علينا امي مادري إشفيها

منار بداخلها تقول خلاص ماتت تبي تصرخ وتقول حور ترى امنا ماتت خلاص بس السانها اربط وجسمها تجمد والدموع حارت بعينها





وصلت الاسعاف وانقلوها للمستشفى دخلوها

سعاد ايقنت ان الجده حصه خلاص فارقت الحياه بس كان صعب عليها تقولهم هالخبر

منار على حالها عرفة ان جدتها او بالاصح امها إللي ربتهم راحت خلاص فارقت هالحياه صابها ذهول وصدمه بس اطالعهم مثل المسبهه والدموع في عينها

خالد قاعد عالارض ويبكي خايف على جدته ونرجس عنده تهديه

حور حالتها حاله تركض في الممر رايحه جايه تبي احد يطلع يطمنها على امها للحين عندها امل انها بتعيش

سعود كان يمشي فالمستشفى وشافهم وراح لهم

سعود : ام فهد خير إن شاءالله عسى ماشر

سعاد بحزن : يالله عسى خير مادري امهم العودا طاحت عليهم ويابها الاسعاف للحين محد طلع


في هالحظه طلع الدكتور الكل وقف وحور ركضت لدكتور

حور ماسكه دمعتها بخوف : هاه دكتور الله يخليك طمنى

الدكتور بحزن : البقى برأسكم الوالده توفت

الكـــــــل : لالالالالالا


(انتــــــهى البــــــارت قراءه
ممتعه )

تسلم ايدك ع البارت بصراحه شوقتيني اعرف منو ها الرجال الي مراقب حور بس شكله هو الرجال الي كلم عمها انو يبيها
ننتظر البارت الجاي وانشالله انه يظهر ع الصوره لان عندي فضوووووول

الله يعطيش العافيه علي هاالبارت روعه والي الامام ان شاء الله بس ابي اعرف متي تنزلين البارت