الجــــــــزء الحادي عشر







قبل لايطلع همس لها : هدي يالغلا لوماتهميني ماتدخلت


طالعها نظرت استحقار وطلع

حور تعرف هالنظره مو اول مره يطالعها هالنظره هذي هي نظرته المتكرره لها

الجده وسعاد مانتبهوا له

بس نرجس ماطوف عليها كانت قريبه من حور وسمعت كلمته لها وحست بنغزه بقلبها وهي تشوف نظرة الاستحقار بعيونه كل المفاهيم إللي ادور برأسها تخربطت وأولها مفهومها إن سعود يمكن يكون يحب حور


الجده معصبه: انتي ماتستحين ولاتخيلين تقلين ادبج عالرجال هذا جزاه
حور : يمه وإللي يعافيج ممكن تصكين الموضوع
الجده : لا ولـــوا يلوي عدوج من زين اعلومج نصك الموضوع

حور تحاول تمسك اعصابها ماتبي ترفع صوتها على امها: خلاص ابشري ولا يهمج ماراح نصك الموضوع ودامج تبيني اتكلم بتكلم أولا فضايح عمي ماله داعي تنقال للي يسوى وإللي مايسوى ومالحد شغل فيها وعيال عمي مالهم شغل وانتي تدرين انهم اكثر المعارضين لعمايل ابوهم

الجده : ليش إشسويت لهم

حور : جايين يتحمدون بالسلامه لي وانتي ماقصرتي بالمعامله الطيبه لهم نسيتي كلام الله تعالى " و لا تزر وازرة وزر أخرى " يمه انتي عمرج ماكنتي جذي هم مالهم ذنب يكفيهم ان امهم وابوهم ضيعوهم وبيضيعونهم اكثر

الجده تكابر ماتبي تعترف بخطاها: اولا وسمعناه سمعينا بعد شعندج

حور : وثانيا سعود دكتور وانا مريضه يعاملني مثل مايعامل أي مريضه ولايتدخل بأمورنا الخاصه وواحد من الاثنين ياأطلع على مسؤوليتي يا يغيرون لي الدكتور

الجده : انتي انهبلتي ماعاد فيج عقل هذي جزاته متوصي فيج ومهتم

حور: لايتوصى ولايهتم يفكنا من شره وبنكون بخير

الجده : انتي إشجاج من الرجال علميني

حور: بس مابيــــه كيفــــي والله ان ماقلتولهم يغيرونه لا اطلع من المستشفى وبالطقاق لو يلتهب الجرح لويصير إللي يصير

الجده عصبت وقامت : والله لولا خوف من ربي لااكسر هالعصى عليج ياقليلة الخاتمه سعاد انا بنطرج تحت وصليني للبيت

حور سكتت خافت لايرتفع ضغط جدتها

سعاد : خالتي هدي السالفه ماتحتاج هالعصبيه ارتاحي

الجده معصبه: لاماني مرتاحه بتوديني وإلا بأخذ تاكسي

سعاد : لاشدعوه تاكسي ان شاءالله بوديج

الجده : انا بنطرج تحت إذا خلصتي تعالي

سعاد : إن شاءالله خالتي شوي وبييج

طلعت الجده

سعاد بجديه : امج وراحت قوليلي إشصاير

حور ارتبكت : شنو إشصاير

سعاد: حور الف والدوران هذا مايمشي علي قوليلي إشصاير إشبينج وبين سعود

حور: شنو مابيني وبينه شي

سعاد : حور تعرفيني كلمتي ماثنيها قوليلي إشصاير

حور سكتت ماردت

سعاد بحده: حــــــور تكلمي

حور ماقدرت تكتم اكثر : إشتبيني اقول اقولج اني ماارتاح لهرجال ومابيه يقرب مني لامن بعيد ولاقريب وان هالشخص إللي عادينه ملاك خالي من العيوب هاني وتشمت فيني وكل كلمه والثانيه بنت فقر بنت فقر وبالشركه يدور علي الزله عشان يسب ويشتم وماسك علي عمج وفعايله وانا صابره وبالعه الإهانات عشان ماخسر هالوظيفه وانه يشوفني انا واهلي ولاشي وانه يقول انتي واهلج ماتسون نعالي هــــاه
يكفيج إللي سمعتيه وإلا تحبين اقولج اكثر

سعاد انصدمت : انتي شتقولين
انتي متأكده من إللي تقولينه

حور : اي اكيد مومصدقه كلامي موهو لابس قناع الشهامه والرجوله قدامكم وفالحقيقه انه واحد حقير مغرور ومتكبر يشوفني انا واهلي ولا شي

سعاد عصبت : وليش ساكته ماقلتيلي ليش تسمحين له يهينج

حور : كنت مجبوره اسكت قلت كلها كم شهر ويرجع بوسعود ويداوم بالشركه وافتك من سعود وشره سكت لأني مابي اخسر هالوظيفه لاني محتاجه لها سكت لاني خايفه امي العودا تدري بأي شي وتتعب

سعاد شافت ساعتها: تأخرت على خالتي بنزل لها عشان ماتحاتي وباجر لي كلام معاج انزين

حور : انزين

سعاد : نرجس ديري بالج عليها اي شي يصير دقي علي

نرجس : إن شاءالله يمه

سعاد : انا بأخذ خالد وياي للبيت ومنال ومنار بيقعدون عندكم وإذا خلصت الزياره انتي رافقي عند حور ومنال ومنار يردون بسيارة حور المفتاح ويا منال

نرجس : إن شاءالله يمه بتلقينهم في الكوفي

سعاد : خلاص مع السلامه

حور ونرجس : مع السلامه

طلعت سعاد وخلتهم نرجس كان ألف سؤال يدور برأسها

نرجس : حور انا مصدومه من الكلام إللي قلتيه معقوله سعود جذي

حور : لاتنصدمين ولاشي ياما بتشوفين في هالدنيا من عجايب وغرايب

نرجس : أي بس شمعنى خوفه عليج واهتمامه فيج حور انا بقولج شي

حور طالعتها نظرت استفهام

نرجس : سعود كان مهتم فيج بشكل ماتخيلينه وخايف عليج حتي تخيلي لما كنتي نايمه يمر عليج يسأل عنج

حور ابتسمت بسخريه: يمكن يكون شعور بالذنب لااكثر ولا اقل وبعدين انا لما كنت تحت تخدير البنج مادري شلون سمحت له انه يقرب مني ويبلل الكلينكس ويمسح شفايفي يمكن شعوري بالعطش وتخدير البنج ماخلاني انتبه لهالموقف السخيــــــف بس انتي شلون تسمحين له امس يوم تذكرت الموقف كرهت نفسي

نرجس : مادري خوفي عليج ماخلاني انتبه

حور : خلاص غيري السالفه فكينا من سيرته

نرجس : اوكي بروح اييب قلم من الممرضات عشان نلعب اكس أو

حور ابتسمت : وبدربج شوفي وين منال ومنار ترى طولوا

نرجس وهي طالعه : اوكي





(بيت الجده هيا)

نوير تخظ البن وتغني : يانار شبي من ضلوعي حطبكي صابر على نار المولع وابكي أي والله ابكي واكثر الناس تبكي والناس لي سمعوا خبر شين يبكون

جاتها العنود وقعدت عندها : للحين ماخلصتي

نوير : لاماخلصت وانتي خلصتي الجريش

العنود : يوه من زمان وودته امي لجارتنا أم محيسن

نوير : أي زين

العنود متردده : اقول يانوير

نوير : اممم قولي

العنود : ابسألج سؤال وجاوبيني بصراحه

نوير : هاه اخلصي علي اسألي
ترى ماني فاضيه

العنود : انا عيوني لي لبست البرقع زينه

نوير طالعتها : اي زينه وش فيها

العنود : ادري زينه بس انا اقصد تلفت الانتباه يعني تفتن يعني تصلح لي اغنيه ماهقيت إن البراقع يفتنني

نوير شهقت : ياويلي ويلاه انتي انهبلتي وش تفتن انتي إشبلاج استخفيتي ماعاد استحيتي

العنود : يــــــوووه بسم الله الرحمن انا ماكفرت اسولف وياج

نوير : امحق سالفه اني داريه ان ورى هالسالفه شي اخلصي قوليلي إشصاير لج

العنود : خلاص انا بقول وإللي فيها فيها امس يوم كنا بالسوق يوم عطتني امي فلوس اشتري عصاير وماي شافني واحد وكان يبي يعطيني ورقه وانا صديته وعقب قعد يقصد ويغني ماهقيت إن البراقع يفتنني

نوير مسكت رأسها : يافظحنا بين العربان ياشيب رأسي ياقليله الخاتمه وليه رافعه غطوتج ماتسترتي وشنهي الورقه وهو سوالج شي

العنود : يــــــووه يانوير تراج تكرهيني بالسوالف معج الغطوه مااشوف منها وانتي تدرين اني اتغصب بها عشان امي ياسلام انا اتغطى وانتي لا وبعدين الرجال ماسوالي شي إشبلاج قومتي الدنيا

نوير : امي تغصبج اتغطين عشانها تدري ان عيونج زينه تفتن الرجاجيل وإلا انا عيوني حبوب مص محد ملتفت يمها نقطتين صغار المهم علميني إشصار

العنود: ماصار شي التفت عليه وقلت يابن الحلال رح في حالك ماني من صيداتك انا بنت اصل وفصل وصديت عنه ومشيت

نوير : أي بعدي ياختي خليج بنتن صاحيه ماتلتفت لضعاف النفوس

العنود : لا وانا اخت بندر مايهز شعري واحد من اشكاله وانا العنود

نوير : إلا على طاري بندر أمس يوم كلم أمي ماقال متى بيرجع

العنود تنهدت : لا ماقال كل إللي قاله قريب بيرجع الله يحفظه اشتقناله

نوير : أي والله اشتقناله الله يستر عليه وين ماكان




___ ___ ____ ___ ____

دز الباب بقوه ودخل بدون استأذان
حور كانت تقرى مجله واخترعت وطاحت المجله من إيدها

حور بعصبيه : انت شلون تسمح لنفسك تدخل بدون استأذان
وإلا ماتعرف الاستأذان يادكتور يامحترم

سعود رافع حاجبه : اووه والله وطلع لج السان يابنت الفقر
انتي ليكون صدقتي عمرج وعشتي الدور اني احبج اصحي ياماما ترى كل إللي سويته مجرد شعور بالذنب ومجرد واجبي كدكتور
ترى مو سعود إللي يلتفت لوحده من عايله منحطه

حور : منحط انت واشكالك انت واحد حقير تستغل مهنتك عشان تشفي غليلك وحقدك تدري انت واحد مسكــــــين

سعود : هههه ضحكتيني انا مسكين وإلا المسكين إللي لاأهل ولاسند وإلا المسكين إللي عمه طال الزمن وإلا قصر بيتاجر بشرفها لضعاف النفوس يتربح منهم

حور انربط السانها حست بنبضات قلبها كأنها طبول من الخوف مجرد مامرت في بالها فكرت ان عمها بيستغل ضعفها ويتاجر بشرفها


سعود عرف تأثير كلامه عليها وكمل اهاناته: انتي احمدي ربج انج للحين عايشه لولا الله ثم انا وإلا انتي الحين من اعداد الميتين

حور تحاول تكون قويه : الموت إشيلك ويأخذك انت واحد قذر منحط اطلــــــع برى

سعود : اطلع برى لا توني ماخلصت كلامي انتي المفروض إللي مثلج مايتكلم يبلع العافيه ويسكت هذا بدال ماتشكريني وتحبين إيدج

حور : اشكرك على شنو على منتك انك خلصتني من إيدين عمي وإلا على اسلوبك العدل عالعموم مشكور ومره ثانيه لوتشوف عمي ذابحني لاتسوي دور البطل وتساعدني

سعود : انا ساعدتج عشان نفسي مااقبل الاهانه على نفسي ان بنت تنطق قدامي واتم واقف واتفرج مو عشان سواد عيونج

حور : انزين انت الحين اشتبي جاي

سعود : انا جاي عشان اعلمج الادب شكل اهلج ماعلموج الادب قبل شوي مستقويه وتنافخين هـــاه يلا وين السانج اشوفج سكتي

منال ونرجس ومنار فتحوا الباب وسمعوا الصوت وتموا وقفين عند الباب مادخلوا

حور طالعته من فوق لي تحت وهزت راسها : مسكين اشفق على حالك تصدق خالد اخوي عقله اكبر من عقلك ويعرف الاصول ياولد الاصول

سعود نرفزته طريقتها واستهزائها: شكل لسانج طال يابزر ويبيله قص

حور بستهزاء : لا يارجال تصدق توني ادري انه طال اقول يلا يلا هناك (وتأشر بإيدها) لاصرت رجال مثل الرياجيل تكلم

سعود جن جنونه : رجال وغصب عنج (قرب ورفع إيده يبي يصطرها)

حور غمضت عيونها وغطت وجها بإيدينها عشان تحمي نفسها من الكف


منال ونرجس ومنار بصوت واحد : لاتمــــــد إيــــــدك
(دخلوا ووقفوا جمب حور)

سعود انصدم ماتوقع احد منهم موجود وترجع بخطواته

منال بصوت عالي : يالوطي اطلع مرايلك على بنت هاي هاي اصحى ترى احنا بديره فيها قانون ماحنا في غابه

نرجس اتخصر: لاوقبل شوي يمثل دور الشهم الشجاع إللي يعرف الاصول

منار : مسكين يبي يطلع عضلاته مالقى يطلعها إلا على بنت يحسب المراجل بمدت اليد

منال : اقول يادكتور يامحترم يابن الاصول هذي الاصول إللي ربوك عليها اهلك


سعود اربط السانه وماعاد عرف يتكلم وفضل الانسحاب وطلع


حور للحين مصدومه واطالعهم مثل المسبهه

منال تلم حور : يابعد عمري يعل إيده الكسر
منار ماسكه إيد حور وتمسح عليها : حور إشفيج ليش ساكته

حور ساكته ماردت

نرجس : حور ردي علينا

حور بهدوء: هالشخص مابيه يقرب صوبي دقوا على خالتي سعاد وخلوها اتصرف ابيهم يغيرونه

نرجس : هدي ماله داعي ندق على امي نربكها عالفاضي باجر يصير خير

منار : حور صدقيني بعد إللي صار ماراح تشوفين رقعة وجهه بس انتي ماعليج منه ياكل تبن

منال : حور شفتيه شلون ارتبك وماعرف يرد هو متقصد يحرج ويقهرج انتي بالذات

حور : انا بفهم إشسويت له عشان كل هالإهانات ماجاه مني شي

نرجس : خليه يولي وإللي على رأسه بطحى يحسسها

منال : حور فديت عيونج انسي السالفه وقطيها ورى ظهرج ولاجنه صار شي تكفين ماحب اشوفج معصبه

حور ابتسمت : انا بالطقاق ماهمني اصلا كله على بعضه موشايفته بس انا مستغربه إشهالكره حشي ولا ماكله حلاله

منار : ههههه حور شفتينا شلون صرنا قويات والسان الوحده فينا شطوله

نرجس : هههههه لاشفتوا شكله انربط السانه انصدم منا

منال : خل ياكل تبن يستاهل يزاه وأقل من يزاه

حور ابتسمت : فديتكم دخلتوا فالوقت المناسب

منال : خلينا من سيرته منايل دقت علي وقلت لها عنج وبغت تستخف وعصبت علي ليش ماقلت لها المهم طمنتها عليج

حور : الله يهديج ليش تقولين لها الحين تقعد تحاتي وحالتها حاله

منال : لاتحاتي ولاشي قالت بدق عليج وإذا سمعت صوتج بتطمن

حور : ماقالت متى بيردون

منال : تقول بعد اسبوع

حور : يردون بالسلامه






"لنــــــــــــدن"

بوسعود وأم سعود ومنايل كانوا قاعدين بأحد المقاهي

بوسعود : أقول يأم سعود وين عذاري

أم سعود : راحت اتسوق ويا داليا صديقتها

بوسعود : هالبنت ماتشبع من السوق

أم سعود : خلها على راحتها
ماوراها شي

منايل : يبه دريت إشصار لحور

بوسعود : أي الله يقطع هالعم احد يسوي بلحمه ودمه هالسوات حسبي الله عليه الظالم

ام سعود : عاد حور ماتستاهل


شاف شاب جاي صوبه

بوسعود : هذا بندر ولد حسن وإلا يتهيئ لي

بندر مبتسم : السلام عليكم

بوسعود قام يسلم عليه : وعليكم السلام يالله حيه

بندر : الله يحيك شلونك يابوسعود عساك طيب

بوسعود : بخير الله يسلمك انت شلونك وشلون الاهل

بندر : بخيرالله يسلمك الساعه المباركه إللي شفناك فيها

بوسعود يبتسم : ساعتك ابرك هاه شعندك في لندن سياحه
وإلا شغل

بندر ابتسم : لا ويـــن انا والسياحه في لندن وين إلا جاي زياره واحد من الربع يتعالج إهنيا وجاي اشوفه

بوسعود : أفـــا عسى ماشر

بندر : الشر مايجيك عنده ورم في رأسه وسوى له عمليه استأصلوه

بوسعود : وعساه طيب الحين

بندر: إن شاءالله انه طيب يلا انا استاذن تأمر على شي

بوسعود : وين توالناس ماضيفناك

بندر :والله مستعجل الجايات اكثر إن شاءالله

بوسعود : المره هذي بأسمح لك لانك مستعجل لكن المره الثانيه مالك عذر

بندر ابتسم : ابشر ان شاءالله يلا فمان الله

بوسعود : ياهلا فمان الكريم


ام سعود : هذا بندر ولد حسن
ماغيره غريبه جا لندن

بوسعود : اي هذا بندر يقول جاي يزور واحد من ربعه

ام سعود : ماشاءالله عليه من يصدق انه بيصير مهندس

بوسعود : أي ماشاءالله عليه اجتهد وكمل دراسته إلا خواته للحين ويا جدتهم في السوق مادرسوا ولاشي

ام سعود : لادخلوا محوا الاميه درسوا سنتين وفصلوا اهم شي عندهم يقرون ويكتبون

بوسعود يبتسم: ياحليلهم للحين عالدقه القديمه

منايل : ليش يمه أهم عجايز وإلا شنو

ام سعود : لا مو عجايز توهم شباب العنود عمرها23 سنه ونوير يمكن 28 سنه وبندر 29سنه

منايل مستغربه: أووه يمه توهم شباب ليش محو الاميه

ام سعود : توفوا اهلهم وربتهم جدتهم وجدتهم حرمه من الدقه القديمه تبسط فالسوق وعندها مزرعه صغيره فيها غنم وبقر ودجاج وتروح كل يومين ويا البنات يحلبون الغنم والبقر ويخضون البن للحين عالعيشه القديمه

منايل مستغربه : صــــــج يمه معقوله للحين فيه ناس بالكويت جذي يمه شلون عايشين

ام سعود: اي يمه فيه ليش مافيه عايشين على البساطه ومرتاحين

منايل : يمه شنو بيتهم عشه وإلا عايشين بخيام

ام سعود : لا عندهم بيت قديم في جليب الشيوخ بس ماعندهم تلفزيون ولا إلكترونيات

منايل تحمست : يمه شلون للحين عالرودي والفانوس والماي يجيبونه من البير وجذي

ام سعود : لاشدعوه عندهم كهربا وماي بس للحين عالرادو وينامون بعد صلاة العشا ويقعدون الفجر ويتريقون خبز رقاق ولبن غنيمتهم وزبده بقرتهم

منايل : اومبيه يمه حدهم سوفـــاج احسهم من العصر الحجري



_____ _____ _____ _____


""رومــــــــــــا""

نايف شاب يبلغ من العمر 29سنه يشتغل في السفاره الكويتيه في روما

قاعد يشرب كابتشينو في احد المقاهي
نايف يتكلم بالتلفون : احلف بذمتك جاي بكره يامرحبا ومسهلا " يارجال والله لك وحشه " شاللي غير رايك وخلوهم يعطونك اجازه " يارجال احمد ربك اسبوع نعمه اهم شي احد يجي من ريحة اهلي " انا ان شاءالله شهر بالكثير واخلص اموري واستقر فالديره ياخي تعبنا من الغربه" ههههه يلا تأمر على شي " هلا مع السلامه

سكر الموبايل انتبه للبنات إللي يطالعونه من أول مادخل
مبين عليهم خليجيات
نايف يكلم نفسه : ياليل هذولا شعندهم مبحلقين عيونهم فيني من أول مادخلت

البنات كان النقاش محتد بينهم
الاولى :شوفيه سبحان الله نسخه من فزاع
الثانيه : لا هذا احلى شوفيه يهبل
الثالثه : بس ترى مصختوها


نايف زهق من خزهم قام وطلع

(نايف شاب وسيم بكل ماتعنيه الكلمه فيه شبه من فزاع وكثير يشبهونه بفزاع بس نايف اسمر شوي وعيونه اوسع)





الدكتوره سمر : صباح الخير

حور : صباح النور

الدكتوره : هاه شلون مريضتنا

حور : الحمدالله

الدكتوره : من اليوم ورايح انا المسؤوله عن حالتج

نرجس : ليش دكتوره وين الدكتور سعود

الدكتوره : الدكتور سعود ماخذ اجازه اسبوع

نرجس ابتسمت وغمزت لحور

حور ابتسمت لنرجس فهمت قصدها : دكتوره لو سمحتي متى اطلع

الدكتوره : يومين ثلاث بالكثير وان شاءالله اكتبلج على خروج

حور : مشكوره دكتوره

الدكتوره : العفو يلا عن اذنكم

حور ونرجس : هلا اذنج معاج

طلعت الدكتوره وانفجرت حور ونرجس ضحك

نرجس : ههههه كفج كفج

حور كفت نرجس : هههه الحمدالله جت من الله فكه افتكيت منه

نرجس : يلا إن شاء كلها يومين وتطلعين من المستشفى








(في منطقه جليب الشيوخ في احدى البيوت القديمه)

الجده هيا : تجهزوا يابنات اليوم بروح نبسط بسوق الفحيحيل ام محيسن تمدح الربح فيه تقول ماشاءالله بضاعتها ماشيه فيه

نوير : يمه متى بنروح

الجده هيا : بعد شوي

العنود : يمه وإذا لقينا الربح زين فيه خلاص بنقعد نبسط هناك

الجده هيا : إن شاءالله إذا ربي سهل الرزق فيه بنستقر فيه

نوير : يلا انا بروح اجيب البضاعه وانتي يالعنود سوي قهوة أمي عشان اتقهوى هناك

العنود : خلاص جهزت القهوه والتمر وحطيتها بالسله انتي بس روحي جيبي البضاعه ويلا خلونا انروح الدرب طويل

نوير : يلا إن شاءالله


(جابت نوير البضاعه وراحوا ويا أم محيسن لسوق الفحيحيل )

دخلوا سوق الفحيحيل ومروا من عند المنشر والكوت (احد اكبر المجمعات في الفحيحيل)

(نوير والعنود كانوا مبهورين من اشكال المجمعات اول مره يطلعون ويبسطون برى سوق الجليب)
نوير : ياماشاءالله يازين هالقصور اكيد انها بيت واحد من الشيوخ

ام محيسن مطوره شوي : لا هذا مو بيت هذي مجمعات فيها محلات ومطاعم وفنادق

العنود شافت نافورت الكوت اتراقص : اللــــــه تكفون وقفوا بروح المسها

نوير : يوه وجع لا شلون تلمسينها يمكن فيها كهربا تشفطج واطيرج فوق انتي مهبوله ماتعرفين شي

العنود شافت باسكن روبنز: الله تكفين يمه هذا باسكن روبنز خلينا نشتري بريد (بكسر الراء)
( العنود تقرى مجلات بكثره ودايم تشوف علانات إيس كريم من باسكن روبنز عالغلاف وحفظته)

نوير : ليه وهذا سكن روز وشفيه زود

العنود : لا اسمه باسكن روبنز هذا محل معروف بجميع انحاء العالم البريد إللي يسويه روعه مافيه مثله

نوير : قولي والله اجل يأم محيسن تكفين وقفي حنا نبي نشتري منه

ام محيسن : إن شاءالله بس لاطولون

الجده هيا : انزلوا واشتروا بسرعه وتعالوا

نوير والعنود : ابشري يمه

نزلوا العنود ونوير ودخلوا باسكن روبنز ووقفوا عند الباب وقعدوا يطالعون الناس

العنود مسكت إيد نوير : امشي إشفيج خايفه تعالي نقول للي يبيع نبي إيس كريم

نوير : يافضحي فضحاه انكلم الرجال عويذ الله من شرج

العنود : حنا بنشتري بريد ماراح نطقها سوالف

نوير : الله يستر منج انتي والعسكريم

العنود : اسكتي فضحتينا اسمه إيس كريم لاتفشليني

نوير : خليني على بريد احسن لي من عسكريم يلا كلمي الحجي قوليلها يعطينا بريد

العنود : حجي بعينج اسكتي فضحتينا اسم قرسون موحجي انتي تحسبين انه نفس راعي البرد إللي يبيع فالشارع

نوير : قرصــــــان امحق اسم


العنود اسفهتها وتقدمت : لوسمحت نبي إيس كريم

القرسون : أي تكرمي شوبتحبي أي نوع

العنود توهقت ماتعرف الانواع : هاه شنو عندكم

القرسون : في بالفانيلا وفي

العنود قاطعته : أي هذا هو نبي بالفانيلا

القرسون : شو بتحبي نوع الصوص

العنود ونوير بتعجب : فصــــــوص؟؟؟

نوير : ياويلي يالعنود لايغشنا ويحط لنا في البرد فصوص وإلا ترتر (الفصوص عندها الشوارفسكي)

العنود : وين حنا جايين محل خياطه وإلا مطعم اسكتي انا بتفاهم معه

العنود : احم لوسمحت يعني شلون فصوص

القرسون : لامش فصوص صوص يعني نكهه يعني شوكلت كراميل شوبتحبي

العنود : أيــــــه نكهه خلاص حط شوكلت

القرسون : تكرمي

نوير : الله يستر من خرابيطج لو مخليتنا على بريد بوصاروخ وبوذهب احسن لنا من الفصوص والخرابيط الله يستر لاتنشب الفصوص في بلعومنا

العنود : خلاص اسكتي فشلتينا قدام العرب

نوير : والله محد بفاضحنا إلا انتي مادري شاللي خلاني اطاوعج واجي معج

العنود : انطمي خلاص

نوير : خلاص بننطم ونشوف اخرت الفصوص


(جا طلبهم ودفعوا الفلوس وطلعوا أول ماركبوا السياره كل وحده خذت إيس كريمها )

نوير تاكل : اللــــــه يازين طعمه اجل وين الفصوص

العنود : خــــــلاص انتي علقتي فصوص وفصوص اسمه صوص هذا الاسود إللي من فوق هذا هو الصوص

نوير : خلاص ياختي لاتفشليني أول مره اكل بريد كشخه




وصلوا المكان إللي يبسطون فيه الحريم وإنزلوا ونزلوا بضاعتهم بعد مابسطوا وضبطوا بضاعتهم

نوير : يازين سوق الفحيحيل يالعنود كشخه احسن من الجليب

العنود : إن شاءالله يتسهل رزقنا عشان نقعد نبسط إهنيا

ام محيسن : ياأمش يالعنود روحي اشترينا عصاير من المطعم
(ملاحظه ام محيسن اتكلم بحرف الشين فيه قبايل في الكويت يتكلمون بالشين وكذالك فيه قبايل يتكلمون بالسين "بس حبيت اوضح "غنادير )

العنود : وين مادل المطعم

ام محيسن : هذا إللي قدامنا شوفيه

العنود : أي هذا زين شقوله

ام محيسن : قوليلها نبي 4عصير برتقال طازج وهو بيعطيش

العنود : إن شاءالله يلا يانوير امشي وياي

نوير : يلا مشينا

راحوا نوير والعنود يمشون للمطعم

نوير : تصدقين يالعنود انا مستانسه إن حنا طلعنا نشوف الدنيا من عرفت نفسي وانا من البيت لي سوق الجليب ومن البيت لي مزرعة جدي الله يرحمه في الوفره

العنود : وانا والله مستانسه ياختي عالاقل شوفي ياكثر الناس ياكثر الكويتين إهنيا اما هناك ياكثر الاسويين الواحد يخاف منهم

مر شاب من عندهم : ادوخ انا ممكن تفتحوا البلوتوث

(نوير والعنود لزقوا في بعض)

نوير : ياويلي يالعنود هذا شيقول شنو البتوث

العنود : مادري ياأختج بس تقضبي في برقعج لحد يقطعه

نوير : ومسويه نفسج فاهمه وتعرفين كل شي

العنود : وانا شدراني

نوير : انا إللي بعلمج فيه

العنود : إشبتسوين يامهبوله

نوير : الحين بتشوفين (فسخت نعالها وحذفته فيها وماشافوا إلا غبرته )
نوير : لابوك لابو ستين كلب






ــــــ ــــــ ــــــ ــــــ ــــــ

(في بيت الجده )

اليوم طلعت حور من المستشفى والجده الفرحه مو سايعتها ماخلت حلويات ولا كيك ولافطاير ماشرتها

سعاد : الحمدالله على سلامتج يالغاليه

حور : الله يسلمج خالتي

نرجس : اواللــــــه كل هالحلويات وهالسوالف عشان حور

الجده : أي عشانها وحور شويه هذي الغاليه

حور : عساني ماخلى منج يمه

منار تحنحن : احم احم نحنوا هنا تراني اغار

منال : واااي ياكثر ماتغارين الله يعين إللي بياخذج

منار : اصلا يحمد ربه إني بتنزل ووافق عليه

نرجس : تلقينه يازبال ياحفار قبور

منار : حفار قبور بعينج أي هذي الغير وماتسوي يالبطه

نرجس : اي هين اغار منج شكيرا على غفله

سعاد تحط كيك وفطاير بصحن : خلو عنكم السوالف وانتي تعالي ودي هالصحن لخلود وفهود

نرجس : ياسلام عليهم هالبريعصيات وليش ماييون

سعاد : يلعبون بلاستيشن يلا قومي وديه ماراح ينقص منج شي

نرجس تقوم تأخذ الصحن وهي اتحلطم : نرجس صارت خدامه لهاشواذي عمى بعينهم حتى عمى بعينهم

حور ومنال كانوا يسولفون بصوت واطي
حور : ليش وانتي إشدراج

منال : منايل قالت لي

حور : وقالت بيستغرون في الكويت

منال : اي بيستقرون بورغد للحين معصب وزعلان على رغد عقب إللي سوته والظاهر زادت عصبيته بعد ما سعود قال مايبيها

حور : بس إللي اعرفه انه يحبها ويموت فيها

منال : بس هذي خيانه مو شي سهل

حور : عما بعينه وانا اقول ليش معصب اثاريه زعلان على حبيبة القلب ومالقى يطلع حرة رغد إلا فيني بلعنته هو ورغد انا شكوى فيهم

منال : اصلا هذي رغد مابلعتها سخيفـــــه ودلعها ييب الجلطه

حور : بس سبحان الله سعود ورغد لايقين على بعض هو خبيث وخسيس وهي نفس الشي كلهم من طينه وحده

منال : لابس ماتوقع بيرجع لها بعد إللي صار

حور : ماعليج القطو مايحب إلا خناقه إذا ردت لديره بيرد لها واحنا شعلينا منهم بالطقاق

منال : أي والله بالطقاق المهم ترى منايل بتوصل يوم اليمعه

حور : اي ادري قالتلي امس يوم كلمتني فديتها حدي مشتاقة لها






( رومــــــــــــا )

نايف : طيب علمني انت جاي روما عشان توسع خاطرك وتقط همومك وإلا عشان تقعد مكتم

سعود : نايف انا مقهور وفي قلبي إللي فيه انت منت حاس فيني

نايف : انت إللي جايبه لنفسك رغد ماتستاهل حتى اتحسف عليها

سعود : رغد بلعنتها ماهوسعود إللي يتحسف على وحده خاينه وانت تدري بهالشي
انا منقهر على الحب إللي عطيتها

نايف : لاتقعد تقولين كلام المسلسلات منقهر على الحب ومدري شنو انت إللي مضيق شي ثاني وانا عارفه

سعود ارتبك : إشقصدك

نايف : انا ولد عمتك وصديق دربك واكثر واحد فاهمك انت متضايق عشان حور

سعود طاريها اربكه: انسى حور اصلا حور تحب ولد عمها وتاليتها بتزوجه

نايف مستغرب : وانت إشدراك شاللي مخليك واثق

سعود تنهد : شفته زارها وكأن فيه بينهم موده وحب

نايف : يمكن تكون غلطان ماتوقع حور بعد إللي سواه عمها بترضى في فواز

سعود : اصلا هي ماتهمني ولايمكن افكر فيها انت نسيت ان عمها عناد سيرته على كل ألسان

نايف : سعود حرام عليك هي مالها ذنب ان عناد عمها

سعود : ياأخي تستريــح هذا إللي ناقص انا اخذ وحده اهلها الله لايبلانا سمعتهم في الحظيظ

نايف : انا عن نفسي عادي عندي اذا البنت زينه وسمعتها طيبه وعاجبتني ماعلي من اهلها انا بتزوجها ماني متزوج اهلها وبعدين الشخص إذا حب كل الامور تهون عشان الحب

سعود : لاماني معك بكره اذا تزوجت وحده سمعت اهلها فالحظيظ وجاني عيال وسألوا من خوالهم إلا خوالهم يوطون الراس لاابوه من حب

نايف : والله لو احب وحده والبنت وابوها سمعتهم طيبه ماعاد يهمني باقي عايلتها يكفي سمعت ابوها

سعود : خلنا من هالسالفه وعلمني متى تستقر فالديره

نايف : إن شاءالله عشرين يوم شهر بالكثير واخلص اموري واقدم استغالتي وارجع

سعود : وين ناوي تشتغل

نايف : بشتغل بشركة ابوي

سعود : اوه يافرحة عمتي بالخبر قلت لها شي وإلا للحين

نايف : افا عليك أول من درا هي اصلا ماحدني على هالشي إلا محاتاتها

سعود : ياخي لاتلومها انت وحيدها ماعندها غيرك

نايف : إشفيك نسيت شهد

سعود : ياخي انسى ان عندك اخت من ابوك وان امك مربيتها

نايف : هههه يالحبيب انت نسيت اني راضع معك واخواتك خواتي

سعود : لاعاد هذا الشي مستحيل انساه بعد مناشبني في حليب امي وتبيني انسى عزالله انك نشبه من صغرك

نايف : ههههه راضع منها غصبا عنك

سعود : تلايط يابزر

نايف : تكفى ياشيخ انت الكبير تراك اكبر مني بست اشهر بس

سعود : ماعلينا اسمع انا بروح انام مصدع وتلفوني بخليه عندك إذا دق الوالد قوله ان الشغل إللي قالي عليه خلصته والاوراق بدزها بالفاكس

نايف : ابشر ولايهمك بس علمني متى بترجع بكره وإلا بعده

سعود : لابعدبكره إن شاءالله

نايف : انا مادري شمطيرك توالناس ياخي مامداك جاي قبل امس بترجع بعد بكره

سعود : لازم ارجع قبل لايوصلون اهلي





ــــــــــــ ــــــــــــ ـــــــــــ

اليوم الجمعــــــه

سعود مسوي عزيمه لابوه وعمه


(في الصاله )

رغد كانت قاعده تسولف ويا عذاري شافت سعود داخل للمطبخ قامت واتجهت للمطبخ وقبل لا تدخل شافت نفسها بالمرايه إللي بالممر ضبطت شعرها ومشت

كانت لابسه نفنوف حرير لي فوق الركبه لونه أوف وايت حفر ومن تحت الصدر شريطه حمرا لابسه كعب احمر وتراجي احمر حاطه ميك اب خفيف مسكره وبلشر ترابي والحمره حاطته بارزه احمر فاقع


دخلت وشافت سعود معطيها ظهره ينطر الخدامه تصب القهوه فالدله عشان يأخذها

مشت بمياعه وصوت الكعب كان عالي لف سعود وشافها صد عنها ولاعبرها

رغد انقهرت من حركته بس ماهمها مشت ووقفت قدامه مدت إيدها وقالت بمياعه : مرحبـــــا

سعود طالعها من فوق لي تحت باستهزاء : تستري يابنت

رغد بمياعه : شدعوه مستخسر تسلم علي رغودتك سعودي إشفيك مااشتقت لي

سعود بعصبيه : رغد اقصري الشر واطلعي برى

رغد : سعودي إشفيك تخليت عني مادري إشقالولك وألفوا معقوله تصدق كلامهم وتجذب رغودتك

سعود : انا اصدق اذني اصدق الكلام إللي سمعته رغد خلاص انا طاب خاطري منج والله لوتحطين لي القمر بإيد والشمس بإيد ماارجع لج خلاص انا عفتـــج

رغد : شنو عفتني انا ملابس عندك عشان تعيفني اي اكيد وحده قصت عليك و أوهمتك بحبها وانت صدقتها

سعود عصب : انطمي ولاكلمه ويلا برى قبل لاتشوفين شي ماشفتيه

رغد خافت من شكل سعود وهو معصب : خلاص انا بخليك الحين بس تأكد إني لايمكن اتنازل عنك بسهوله

وطلعت وخلته


رغد كانت طالعه من المطبخ وهي معصبه ودعمت منايل وماعبرتها كملت دربها

منايل كانت اتكلم بموبايلها : اوف منال وينج ماصارت يكفي حور ماراح تجي بعد انتي تأخرتي ترى حدي مشتاقه لج " شنو اي وصلت ووياها منار " يلا حبيبتي لاتأخرين " يلا باي

صكت منايل من منال وشافت سعود ماخذ الدله وبيطلع

منايل : هلا سعود

سعود ابتسم لها : هلا منالي

منايل : إشفي هالخبله طالعه معصبه ماتشوف الدرب

سعود : خليها بلعنتها فوق شينه قوات عينه جايه بقوات عين تقول سعود مااشتقت لي

منايل هزت كتوفها : عادي مو غريبه عليها إن لم تستحي ففعل ماتشاء

سعود : يلا انا بودي القهوه تأخرت

منايل : الله معاك


ــــــ ــــــ ــــــ ــــــ


حور كانت قاعده اطالع التلفزيون جدتها ومنار راحوا للعزيمه وهي تعذرت لمنايل انها خايفه على عمليتها لاتلتهب من العطور والبخور وفي الحقيقه انها ماتبي اطب بيت بوسعود خير شر

سمعت صوت جرس الباب وراحت كارين تفتح الباب

دخلت لحور وبأيدها كيس ابيض

حور : كارين منو عند باب

كارين : هذا تأكسي يعطي هزا كيس يقول لحور

حور بأستغراب : لي انا مافي يقول من منو

كارين : لامافي قول

حور خذت الكيس : اوكي خلاص روحي

فتحت الكيس طلعت الكرتون إللي داخله فتحته كان الكرتون ابيض ومن داخل مليان ورد جوري طبيعي لقت عطر إيدول من جورج أرماني وساعه من جورج ارماني
خذت الكرت مكتوب فيه

[ " خنجرآلشــوق'
منتصف ~ بين ~ آلآضلاع

لآهو..اللي ذبحنــــي'
ولآني..اللي قويته "

الحمدالله على السلامه ياحور

تحياتي ]


انتهى البارت

الله يعطيكي العافيه اختي غنادير صراحه روايه روعه وسعود يحب حور بس يكابر بس خليه يخف عليها شوي وشكل نايف اذا شاف حور راح يحبها

السلام عليكم و رحمة الله و بركاته

صباح الخير و الرضا من الرحمن

ابدعتي يا غنادير .. بس تراني حنانه زنانه و بارت واحد بالأسبوع ما يكفي

بس عشانج سويت دسكاونت و اطالب ببارتين بس << حليلي قنوعه ^ـ^

================
(( حور و سعود ))

و الله سعود الغيرة لعبت فيه لعب و لا وصلت فيه انه يبي يصطرها بس كنه زاد عن

حده و مسخها بزود يعني اللحين بعد ما عرف حقيقه رغد القشرا و ازاحت عن دربه

يحاول يتقرب من حور عن يكسبها و خصوصا ما اتوقع لا أبو و أم سعود راح يرفضون

ارتباطه فيها بس شنقول مخها مصدي ولد الحلال ... الهديه اللي جت لحور اتوقع

انها منه و يمكن سمع كلامي و هذي أول خطوة << حيل واثقه >ــ<

=====================
(( عناد الهم ))

يا حر قلبي منه الاهبل ما تاب بعد يبي ينقتم و يدور طريقة ثانيه كله من السكينه

اللي متزوجها اللي الظاهر الغيره من نوره معشعشه بقلبها و تطلعها بحور المسكينه ...

===================
(( العنود و نوير ))

يالبييييييه يا حلوهم يهبلون .. ياحلو الناس اللي على سجيتها تدخل القلب على طول

اتوقع بتكون لهم حكايه و خصوصا بعد وصولهم اسواق الفحيحيل و يمكن يلتقون بحور و

منال و تصير بينهم علاقه ...

=====================
(( رغد ))

وجععععععع في عينها بعد شين و قواة عين و لا كنها مسويه شيء تستاهل اللي

جاها و اكثر ...

سلمتي يارب

بــ انتظار القادم

..
..
..

كيف احوالك عزيزتي الغاليه غنادير صراحه الحده هيا ونويروالعنود حضورهم فى القصه يهبل حلوه بساطتهم ومواقفهم وأظن بندر بيسيرله دور فى بحياة حور وسعود ذبحته الغيره من فواز على حور ويكابر وعناد شكله بيتحد مع غدير لماتعرف ان سعود يحب حور ودمتى لمحبتك