هلا وغلابس ياغنادير اسفرات وانورت وستهلات وامطرت

تسلمين على البارت الخيال وماقصرتي على البارتات الرائعه وننتظر حور وعمها وعندي احسساس بيتدخال سعود في الحضات الاخيره وننتظرك على خير في البارت الجاي

الجـــــزء التاسع عشـــــر"




(بيت عناد)

الظهر الساعه ثنتين وربع "
‏
حور واقفه بالحوش تنطر رجعت اخوانها من المدرسه وفوزيه واقفه معاها "
‏
حور : اووف احس تأخروا الساعه صارت ثنتين وربع
‏
فوزيه تهديها : اكيد زحمة الشوارع وبعدين هذا وقتهم ماتأخروا
‏
حور : لادايم يكونون موجودين من الساعه ثنتين أو ثنتين إلا ربع
‏
فوزيه : يلا فرق ربع ساعه الحين تلقين الشوارع زحمه وبعدين الدرب طويل من العدان للجهراء
‏
حور ماتطمنت طلعت فونها ودقت على العم مصطفى : ألو
‏
العم مصطفى: اهلين حور
‏
حور بخوف : هلا عمي وينكم ليش تأخرتوا صاير شي
‏
العم مصطفى : هدي يابنتي مافيش حاقه دلواتي قايين خمس دآيآ وحنكون عندكم
‏
حور : شفيكم تأخرتوا
‏
مصطفى : كان فيه تفتيش فالطري عطلنا
‏
حور برتياح : حمدالله اهم شي انكم بخير
‏
‏
‏
فوزيه : هاه ارتحتي قلتلج مافيهم شي
‏
حور : لاتلوميني اذا ماخفت على خواني اخاف على منو
‏
‏
سمعوا صوت عناد ينادي : فوزيه وينج طسيتي
‏
‏
فوزيه : بسرعه خشي تلفونج لايشوفه
‏
حور بسرعه حطت تلفونها بمخباتها
‏
‏
عناد يصارخ : ياملعونه الخير يافوزيه وينج فيه
‏
فوزيه بصوت عالي : هاه يبه انا بالحوش اشتبي
‏
راح عناد للحوش : انتوا شمقعدكم فالحوش من زين الجو الشمس حرارتها تصلخ الجلد
‏
حور : الله يجيرنا من نار جهنم اللي حرارتها اشد من حرارة الشمس
‏
عناد يشفط من الزقاره وينفخ : اسكتي انتي قعدت اتفلسف على راسنا مسويه نفسها مطوعه
‏
حور طالعته وصدت ماردت عليه لانها عارفه لو اتكلم من اليوم لي بكره مافيه فايده
‏
فوزيه : يبه تبي شي يومك تناديني
‏
عناد : ابي غدا ابي سم هاري يعني شبي ابي اكل
‏
فوزيه : اسأل امي مادري سوت غدا او لا
‏
عناد : يــــوه امج الخبله مكثره الجيله البارح وخامده متخدره يامال الضعفه وين فيها تطبخ
‏
‏
حور وقف شعر راسها وهي تسمع عناد يقول هالكلام والوضع عنده عادي حست بلوعت جبد
‏
‏
فوزيه انحرجت شوي : اذا هي ماسوت من يسوي انا ماعرف اطبخ وحور ماتعرف تطبخ
‏
عناد عصب : الله يلعنكم من بنات ماتعرفون تطبخون ويلعن جيرانا الكلاب ريحة غداهم تشق الخشم ياجعله زقوم في بطونهم مايدزون لنا شوي منه

فوزيه : تبي خبزه وجبنه
‏
عناد : ليه هذي حزت ريوق وإلا غدا لامابي ياجعلج ماتربحين بروح اخذ لي غدا من المطعم
(طلع برى يبي يروح للمطعم)

فوزيه : كيفك
‏
حور باستغراب :انتي ليش تقولين مافيه غدا والغدا اللي مسويته لنا
ليش ماخليتيني اعطيه منه
‏
فوزيه : الغدا اللي انتي مسويته مسويته لخوانج مو له
‏
حور : حرام عليج مهما يكون هذا ابوج
‏
فوزيه : هذا انتي قلتيها ابوي يعني اعرفه اكثر منج وبعدين ياحبيبتي لو عرف انج اتعرفين تطبخين ماراح يخليج بيخليج تطبخين اذا تجمعوا عنده الخمه يسهرون وبيجننج بالطلبات هذا اذا ماخلاج .... (سكتت ماكملت)
‏
حور فتحت عيونها : كملي ليش سكتي اذا ماخلاني اسهر وياهم عشان يتربح من وراي صح
‏
فوزيه حست بالاحراج واسكتت
‏
قطع كلامهم دخلت منار وخالد
‏
حور راحت صوبهم : هلا وغلا فديتكم تأخرتوا
‏
منار وخالد باسوا راس حور
‏
خالد : كان فيه تفتيش اخرنا
‏
حور حطت ايديها على كتوفهم : اهم شي انكم بخير يلا امشوا فوق غسلوا وبدلوا ملابسكم مسوية لكم برياني دجاج بتاكلون اصابعكم وراها
‏
منار : الله عاد حدي جوعانه وين انتغدى بالغرفه وإلا بالمطبخ
‏
حور : يعني كالعاده بنتغى بغرفة فوزيه شالجديد
‏
منار : اي نسيت
‏
‏
‏
( من سكنوا حور وخوانها واغلب وقتهم يكونون فوق ماينزلون إلا اذا الصبح عشان يروحون منار وخالد للمدرسه او الظهر تنزل حور وفوزيه يسون الغدا ويصعدونه فوق اما العشا والريوق فيه ثلاجه صغيره بغرفة

العصر بيت الجده هيا"
‏
‏
العنود راحت تشوف الباب"
‏
العنود : من عند الباب
‏
نايف تحنحن : احم سلام عليكم
‏
العنود : وعليكم السلام
‏
نايف : شلونكم عساكم طيبين
‏
العنود بحده : خير من انت وش تبي
‏
نايف : بسم الله الرحمن كليتينا
‏
العنود عصبت : بسم الله الرحمن منك خير ان شاءالله من انت جاي تزعج خلق الله
‏
نايف ابتسم : يابنت الحلال انا نايف اخوى منايل جاي اسلم على منايل اذا ماعندج مانع
‏
العنود تفشلت وطاح وجهها من درت انه يصير لمنايل
‏
نايف : الله لايهينج ناديها نقعتينا فالحر
‏
العنود تفشلت وافتحت الباب : اقلط الدوانيه على يسارك
‏
نايف دخل ولمحها بطرف عينه كانت لابسه برقع وجلال : يعطيكم العافيه
‏
العنود : يعافيك ( مشت رايحه تنادي منايل )
‏
‏
‏
‏
العنود ماصدقت ادخلت داخل الصاله شافت نوير نازله من الدرج وتركض لها "
‏
العنود مفتشله ومرتبكه : تكفين يانوير افزعيلي
‏
نوير مسكتها من كتوفها : وش فيج صاير شي
‏
العنود : نايف نايف
‏
نوير باستغراب : من نايف
‏
العنود : نايف اخوى منايل بالرضاع
‏
نوير استوعبت : اي وش جاب طاريه
‏
العنود بخوف : انا قلطته فالدوانيه
‏
نوير مسكة راسها : يافضحي فضحاه قلطتيه نعنبوا بليسج ماتستحين انهبلي
‏
العنود بخوف : مدري اشدراني حسبت امي موجوده نسيت انها رايحه المزرعه
‏
نوير : روحي بسرعه علمي منايل تنزله لايجي بندر وامي ويدرون انج قلطتيه بيذبحونج
‏
العنود بخوف : ياويلي ويلاه (راحت تركض لغرفه منايل )
‏
‏
‏
‏
‏

منايل كانت قاعده عالاريكه اتصفح مجله "
‏
‏
العنود لاشعوريا جات ركض ادق الباب بقوه وبسرعه"

فزت من مكانه من الخرعه وركضت تفتح الباب : العنود اشفيج صاير شي
‏
العنود برتباك : منايل انزلي لدوانيه
‏
منايل باستغراب : انتي اشفيج مرتبكه وحالتج حاله وبغيتي تكسرين
الباب وبعدين ليش انزل
‏
العنود توترت : يــــووه خلصي نزلي اخوج فالدوانيه بسرعه روحيله قبل لايجي بندر وامي ويشوفونه
‏
منايل عقدت حواجبها : خير واذا شافوه اخو جاي لاخته بعد هذي فيها شي
‏
العنود توهقت : يابنت الحلال انتي مو فاهمه شي
‏
منايل : خلاص فهميني
‏
العنود : انا قلطت اخوج فالدوانيه نسيت حسبت امي موجوده واذا جاو امي وبندر الحين اخاف يدرون اني قلطته بيذبحوني وانا ابيج تنزلين بسرعه له عشان يعني انتي اللي فتحتي الباب ودخلتيه
‏
منايل فطست ضحك : هههههههههههههههههههههههههههههههههههههههههههههههههه هههههههههه الله يقطع سوالفج يلا خلاص بنزل بس برش عطر
‏
العنود بخوف : ريحتج حلوه مو لازم يلا بسرعه روحي
‏
منايل رشت عطر عالسريع : يلا خلصت هذا انا نازله



‏
""الدوانيـــــه""
‏
نايف كان قاعد يقلب بموبايله "
‏
دخلت منايل دقت الباب اتنبهه : السلام عليكم
يلا حيه

نايف وقف وابتسم وفتح ايده : وعليكم السلام يامرحبتين الله يحيج
‏
منايل راحت له وسلمت
عليه : المرحب باقي يالله حي من جانا
‏
نايف : الله يحيج هاه شلون دلوعتنا
‏
منايل ابتسمت بتصنع :
عال العال
‏
نايف بشك : اكيـــد وإلا
‏
منايل تسوي نفسها طبيعيه : وإلا شنو اشقصدك
‏
نايف ابتسم : ماقصد شي بس مبطي من سوالفج
‏
منايل وقفت : دقايق بجيب القهوه واجيك
وبسولف عليك لين تزهق
‏
نايف تسند عالمركى : ههههه اربج انتي إللي مسويتها
‏
منايل ضحكت : هههههههههههههههه اخاف صج
‏
نايف ضحك : ههههههههه اني والله داري والظاهر بتحج البقر على قرونها وانتي ماتعلمتي
‏
ضحكت منايل وراحت تشوف فيه قهوه جاهزه
‏
‏

‏
لقت العنود قدامها شايله صينه فيها دله قهوه وشاي"

‏
منايل ابتسمت : هذي القهوه لدوانيه
‏
العنود : اي توني مسويتها زين جيتي تأخذينها
‏
منايل ابتسمت : تسلمين بعد عمري ماقصرتي
‏
العنود : ماسويت شي ويلا ودي القهوه وارجعي اخذي التمر والقيمات والرهش
‏
منايل باست خد العنود : بعد عمري عاد نايف يموت على القيمات (خذت الصينيه وراحت بسرعه لدوانيه)
‏
‏
العنود راحت للمطبخ اتجيب الصينيه الثانيه إللي فيها التمر والرهش والقيمات "
‏

رجعت منايل خذت الصينيه من العنود وشكرتها وراحت لدوانيه
‏
‏
‏
‏
‏
‏
‏
‏
‏
في احدى الشقق"
‏
رغد قاطه الشيله على كتفها وفاتحه عبايتها المخصره الشفافه كانت لابسه تحت العبايه فستان احمر ضيق لي فوق الفخذ كت مفتوح من الظهر "
‏
رغد تشفط الزقاره وتنفخ بوجه سامي : اوكي الشغله حلوه مبدأيا لكن شكثر تعطيني على كل وحده اجيبها
‏
سامي يعض شفايفه وعينه على صدر رغد : انتي اشتامرين فيه
‏
رغد بمياعه تقرب وجهها منه : كل وحده اجيبها اخذ 200 دينار
‏
سامي لمس خشمها باصبعه : وغير هالكلام ياقمر
‏
رغد هزت كتفها : مافيه غيره
‏
سامي قرب منها وباس ارقبتها : وعشان خاطر سموي حبيبج
‏
رغد بمياعه بعدت عنه واشفطت من زقارتها : امممم اشكثر تبي
‏
سامي : تعرفين حياتي توني راجع من لندن وحدي مفلس انتي كريمه وانا استاهل
‏
رغد : اوكي ياغالي والطلب رخيص بطيح 100 دينار عشان خاطر طروفك والعيش والملح اللي بينا
‏
سامي تنهد وسحب إيدها وباسها : يابعد روحي ياأم الذوق انتي
‏
رغد ابتسمت بمياعه وسحبت ايدها وقامت : يلا انا اخليك الحين
‏
سامي وقف وياها : وين وين توالناس
‏
رغد مدتله الزقاره إللي بإيدها :تفضل كملها عني وبعدين لاحقين على بعض
‏
سامي خذا الزقاره منها وسحب رغد لحظنه : بس انا الصراحه مشتاق لأيام لندن نبي نعيدها
‏
رغد وخرت من حضنه وضحكت بمياعه : ههههه بنعيدها بس مو مثل لندن اهني مانقدر ناخذ راحتنا حيل تعرف الديره صغيره والناس مبققه عيونها
‏
سامي : من هالناحيه لاتحاتين يالغلا انتلاقى بهالشقه ونأخذ راحتنا عالاخر
‏
رغد ابتسمت له وغمزة بعينها : اوكيك يـــلا بـــاي تأخـــرت
‏
سامي ذاب : متى اشوفج
‏
رغد وهي طالعه : بينا ألو
‏
‏
‏
‏
‏
‏" " " " " " " " " " " "

‏
‏
نايف هز فنجاله :بس اكرمي" عزالله إن هالقهوه ماعليها كلام من اللي مسويها
‏
منايل : العنود حماتي
‏
نايف : ماشاءالله عليها ضابطتها وانتي إشفيج ماتعلمين منها
‏
منايل ضحكت : هههههه اما اتعلم منها قويه
‏
نايف : اسفين غلطنا نسيت انج افضل طباخه على وجه الكوره الارضيه
‏
منايل خزته : اتطنز انت ووجهك
‏
نايف يستهبل : ابد لاتطنز ولاشي لكن اقول الحقيقه إللي شفتها بعيني انت طباخه ماهر
‏
منايل : اقول بلا استهبال ترى حدي طفشانه وابي اطلع
‏
نايف : وين تبين تطلعين
‏
منايل بطفش: أي مكان نايف تكفى طلعني حدي زهقانه طقت جبدي من البيت ابي اغير جو
‏
نايف كسرت خاطره : ماعندي مانع اهم روحي استأذني من زوجج واذا وافق انا ماعندي مانع البسي عبايبج وامشي
‏
‏
منايل استانست : يـــلا دقايق بروح ادق عليه وارد لك خبر (راحت تركض داخل عشان ادق على بندر )
‏
نايف ضحك على شكلها وهي متحمسه لطلعه :
هههههههههههه شوي شوي لاتكسرين
‏
‏
‏
‏
‏
دخلت لصاله لقت العنود قاعده تقرى جريده "
‏
العنود طالعتها باستغراب : اشفيج تركضين
‏
منايل : عنوده تكفين اتعرفين رقم بندر اخوج
‏
العنود : أي اعرفه ليه
‏
منايل : زين ممكن اتدقين عليه ابيه
‏
العنود : إن شاء الله
‏
خذت التلفون العنود ودقت رقم بندر وعطت السماعه منايل وراحت للمطبخ "
‏
منايل ماسكت السماعه وقلبها يدق خايفه اول مره اتكلم بندر بالتلفون"

بعد ثلاث رنه وصلها صوته : الـــو
‏
منايل سكتت شوي
بعدين تكلمت بربكه : ألو
‏
بندر عرف صوتها : نعم
‏
منايل زاد ارتباكها واسكتت
‏
بندر شافها طولت : بطولين وانتي ساكته
‏
منايل خذت نفس وقوت نفسها شوي : احم سلام
‏
بندر ابتسم توالناس : وعليكم السلام خير
‏
منايل ارتبكت : آمممم
‏
بندر : تكلمي اشعندج
‏
منايل : بندر
‏
بندر بحده : خير
‏
منايل : ممكن ماتعصب عشان اعرف اتكلم
‏
بندر ماسك ضحكته : ماعصبت تكلمي
‏
منايل : نايف اخوي عندنا ويبيني اروح وياه
‏
بندر : وين اتروحين إن شاءالله
‏
منايل توهقت : هاه أي يبي يغير اثاث غرفته ويبيني اروح اختار وياه الاثاث
‏
بندر : لي جيت يصير خير
‏
منايل : يعني اروح
‏
بندر بحده : قلت يصير خير
‏
منايل : يلا مع السلامه
‏
بندر : مع السلامه
‏
منايل اول ماسدت السماعه كشت عليه : والله براحته انا عطيته خبر وخلاص
‏
‏
‏
راحت البست عبايتها ونقابها وخذت جنطتها ونزلت لنايف "
‏
نايف : هاه جاهزه
‏
منايل بثقه : أي جاهزه يلا خلنا انروح

نايف : يلا مشينا
‏
‏
‏
‏
‏
" بيت عناد "
‏
غرفة فوزيه "
‏
حور قاعده تقرى قرآن وخالد ومنار يذاكرون دروسهم "
فوزيه ماكانت موجوده كانت رايحه لفرع الجمعيه إللي جمبهم
‏

دق الباب "

حور على طول صكت القرآن ولبست شيلتها ونقابها ومنار لبست لفتها
‏
حور : منو
‏
فواز تحنحن : احم احم السلام عليكم
‏
حور : وعليكم السلام (اشرت لخالد بايدها عشان يجي يفتح الباب)
‏
جا خالد فتح الباب وحور راحت تقعد عند منار"
‏
‏
فتح خالد الباب : هلا فواز
‏
فواز ابتسم له ومد إيده : حياالله خالد
‏
خالد مد ايده : الله يحيك
‏
فواز رفع عينه وشاف بنات عمه : مساكم الله بالخير يابنات العم
‏
حور ومنار : مساك الله بالنور
‏
فواز : شلونكم عساكم طيبين
‏
حور بختصار : بخير
‏
فواز : عساكم مرتاحين عندنا
‏
حور اتجامل : مرتاحين
‏
فواز : عسى دوم مرتاحين
‏
حور : شكرا
‏
فواز : إلا فوز وينها
‏
خالد : فوزيه راحت للجمعيه
‏
فواز ابتسم له :اي راحت الجمعيه وانت ماتبي تروح مكان تغير جو

خالد ببرائه : وين

بندر : اشرايك اتروح وياي انتمشى
‏
حور على طول هبت بوجهه : لا لايروح وياك ولاتأخذه ولوسمحت انا ماحب اخوي يروح أي مكان
‏
فواز استغرب انفعالها : لا انا بس حبيت اخذه امشيه يغير جو
‏
حور : لامشكور مايحتاج اتمشيه
‏
فواز هز كتوفه باستغراب : على راحتكم يلا انا استأذن تأمرون على شي
‏
خالد : ابد سلامتك
‏
‏
‏
منار بصوت واطي : حور ماله داعي كل هالانفعال
‏
حور : احسن ابيه يعرف اني مابي خالد يروح أي مكان وياه
‏
‏
منار : حرام احرجتيه
‏
حور : لاحرجته ولاشي ماني مستعده اجامل احد على حسابكم وبعدين صكي الموضوع فوزيه على وصول ولا ابيها تسمع كلامنا
‏
‏
‏
‏
‏
الساعه 11 الليل "
‏
بندر قاعد على اعصابه ينطرها فالحوش "
‏
‏
رجع من المزرعه بعد المغرب ومالقاها سأل العنود عنها قالت له انها قالتلك بتروح ويا نايف اخوها وانت سمحت لها"
‏
مسك اعصابه وسوى نفسه طبيعي قدام اهله وانه سامح لها تروح"
‏
بهالحزه امه وخواته كانوا نايمين وهو قاعد على اعصابه ينطرها اتشرف حضرت جنابها "
‏
‏
‏
‏
في هالحظه "
‏
دخلت وهي تبتسم كانت في قمة وناستها وبيدها اكياس ماخلت شي ماشرته "
‏
ماانتبهت لوجوده كانت لاهيه بالاكياس اتشوف إللي داخلها "
‏
‏
بندر وقف وصفق بإيده : ماشاءالله واخيرا وصلتي حضرت جنابج
‏

منايل تخرعت ومن الخوف طاحت الاكياس من إيدها وجمدت بمكانها
‏
مشى لها بندر وهو حده معصب وبدون مايتكلم مسكها وطلع وياها برى ركبها السياره وركب وشغل السياره وحرك"
‏
منايل خافت ومادرت اشناوي عليه : بندر اشفيك وين موديني بهالليل
‏
‏
بندر ضاغط على السكان وموجه نظره لقدام وحده معصب : مابـــي اسمع ولاهمسه تفهمـــين وإلا لا
‏
منايل حدها خافت وبدت الافكار توديها

وتجيبها ماخلت سوره ولا أيه ماقرتها وماخلت دعاء ماقالته"

ماتت من الخوف من شكل بندر وهو معصب ماتدري شناوي عليه خافت لايسوي فيها شي "
‏
منايل صوتها يرجف من الخوف وشوي وتبكي : بندر تعوذ من بليس انت اشناوي عليه
‏
بندر بعصبيه : ولاكلمـــه مابـــي اسمع صوتج
‏
منايل بدت تبكي : ودني لأهلي ابي ارجع بيتنا مابي اعيش وياك انت ماتصلح لي وانا مااصلحلك
‏
‏
بندر جن جنونه من كلامها صفط على جمب ولتفت لها مسكها بقوه من كتوفها وضغط عليها : بتسكتيي وإلا شلـــون انكتمـــي لاتخليني ارتكب فيج جريمـــه
‏

منايل خلاص بتمــــــوووت من الخوف قعدت ترجف وطالعه ودموعها تنزل بدون صوت
‏
‏
بندر هدها وكمل طريقه"
‏
‏
وصل للمكان المنشود" مزرعتهم فالوفره"
‏
‏
منايل زاد خوفها لما شافته وقف السياره عند وحده من المزارع ونزل يفتح باب المزرعه"
‏
‏
منايل من الخوف قامت ادور فالسياره موبايل بندر تبي ادق على اهلها "
‏
لكن للاسف ماامداها رجع بندر لسياره دخلها داخل المزرعه "
‏
صفط ونزل من السياره وراح لباب منايل "
‏
‏
منايل خـــلااااص من الخوف طاح قلبها ببطنها حست بيغمى عليها"
‏
‏
فتح بندر باب منايل وهو للحين معصب : انـــزلي
‏
منايل بخوف : مابي انزل
‏
بندر يضغط على ايده ويصر على اسنانه : اقولج انـــزلي
‏
منايل تحاول تقوي نفسها : اقولك مابـــي
‏
بندر جن جنونه معصب حده وزاده عصبيته مراددتها "
‏
سحبها من إيدها ونزلها
‏
‏
منايل اتجر ايدها منه : وخر عني هدني وخـــر
‏
‏
بندر ساحبها من إيدها يبي يدخلها داخل البيت : بتمشـــين غصبن عنج
‏
‏
منايل ادزه اتحاول تفلت ايدها منه بس ماكو فايده : انت اشتبي فيني اشتبي اتسويلي
‏
‏
دخلها للبيت "
دزها بقوه على القنفه "
‏
حذف غترته وعقاله : الحين اقدر اتكلم لاحاتي امي تقعد من صيحتنا ولا احاتي خواتي ( كان يتكلم بعصبيه وصوت عالي )
‏
‏
منايل ماسكه كتفها عورها لما حذفها عالقنفه تمت اطالعه وماتكلمت
‏
‏
بندر بصراخ : يلا تكلمي
‏
منايل بخوف : شتكلم واقول
‏
بندر : علميني من إللي سمح لج تطلعين من البيت
‏
منايل اتسوي نفسها قويه : انا كلمتك وعطيتك خبر وانت رضيت
‏
بندر معصب : ياسلام وبعد اتألفين من عندج
‏
منايل : ماألفت انت يوم قلتلك بطلع قلت خير إن شاءالله يعني موافق وبعدين انا ماطلعت ويا احد غريب طالعه ويا اخوي
‏
بندر قعد مقابلها وقرب وجهه منها : آهـــااا قلت خير إن شاءالله ماوافق يعني فيه فرق صح
‏
‏
منايل وقفت تبي تمشي لكن مسكها من إيدها : لي تكلمت تنثبري وتسمعين
‏
منايل خلاص تنرفزت : مابي اسمع شي وهدني ابي ارجع للبيت
‏
بندر نرفزته زياده وضغط على إيدها : بتسمعي غصب(ن) عنج
‏
‏
منايل : يـــووه تراك اذيتني وخر عني خلاص ترى العيشه وياك اتقصر العمر
‏
بندر بأسلوب ابتزاز : قصر نفسج يـــا (سكت) وإللى ماله داعي اتكلم انتي اصلا وحده مسكينه عقلج على قدج
‏
منايل عصبت : شنو عقلي على قدي شايفني مجنونه وبعدين انت احمد ربك انك تزوجتني
‏
بندر عقد حواجبه : من السنع واللي الزين لاسنع ولاجمال ولا شي اصلا غلطة عمري اني تزوجتج
‏

منايل جن جنونها من كلامه بالذات (لاجمال ولاسنع ) اول مره في حياتي احد يقول انها موحلوه : يكون في علمك اني مغصوبه عليك وانا اصلا مابيك واللي شلون ترضى على نفسك تعيش ويا وحده عايفتك
‏
‏
بندر ظلمت الدنيا بوجهه ماعاد شاف جن جنونه"
عطاها كف خلاها اطيح من طولها : انـــا انـــا ينقالي هالكلام اخو نوير
‏
ويمسك العقال وكمل عليها : ماتعلمتي الادب انا بعلمج انتي تحسبين اني تزوجتج علشان سواد عينج

منايل كانت تصارخ: ووخــــر عنــــي آآآآي ياحقيــــر وخر
‏

بندر ماعاد حس بعمره
مستمر بالطق ويتكلم بصراخ لاشعوريا :
انا ماخذج عشان خاطر ابوج خذيتج وانا داري بسالفتج مع الباكستاني

انا اللي بأدبج انا اللي بربيج " وكان مستمر بجلدها
‏
‏
منايل كانت تصارخ وتستنجد خلاص حست نفسها بيغمى عليها نفسها ضاق عليها صوتها بدى يختفى "
‏
تحاول ترفع نفسها على القنفه بس ماقدرت تشيل نفسها"
‏
بدا الضباب يغشى عيونها "
‏
اغمــــى عليها ماعاد حست بشي "
‏
‏
بندر ماحس بنفسه إللي لما طاحت توه يستوعب ان اسرف فيها "
‏
حذف العقال وشالها ركض فيها للمطبخ "
‏
يغسل وجهها يصطرها على خدها بخفيف : منايل منايل تسمعيني
‏
منايل ماكانت تدري عن أي شي غايبه عن الوعي"
‏
قرب إيده من فمها وخشمها شاف نفسها مافيه ماتقدر تأخذ نفس "
‏
‏
بندر انهبل لاتموت بسببه"
‏
سدحها على الارض وحط فمه على فمها وبدا بعمليه التنفس الصناعي"
‏


بعد عشر دقايق"
‏
من التوتر والجهد فتحت عينها "
‏
بندر بخوف : منايل انتي بخير
‏
منايل تعبانه وفي نفس الوقت مافيها حيل ترد عليه وبعد حاقده عليه "طالعته وصدت بدون ماتكلم"
‏
‏
شالها بندر ووداعها للغرفه حطها على السرير"
‏
خذا قلاص ماي يبي يشربها دزت ايده وصدت
‏ "
‏
‏
بندر حس بغلطه : ادري ان الاعتذار مايفيد لكن ارتاحي الحين وبعدين لكل حادث حديث
‏
‏
طلع من الغرفه وخلى الباب مفتوح"
‏
‏
منايل جسمها ذابحها من الجلد سحبت عمرها بالغصب للحمام فتحت الماي البارد ودخلت بملابسها فالبانيو تبي شي يبرد العوار"
‏
جسمها كله ذابحها بالغصب سحبت عمرها للحمام حتى باب الحمام ماصكته "
‏
خلت الماي البارد يملى البانيو وتنقعت فيه"
‏
‏
‏
‏
‏
بيت عناد"
‏
‏
حور كانت نازله تسوي بيض طماط لخالد كان مشتهيه ونزلت وياها فوزيه "
‏
حور تقص الطماط "
‏
وفوزيه واقفه اطالعها : ماشاءالله عليج اتعرفين تطبخين تصدقين انا حتى البيض ماعرف اسوي
‏
حور مصدومه : ماتعرفين اتسوين بيض احلفي
‏
فوزيه : والله ماعرف ليش مستغربه انا محد علمني الطبخ
‏
حور : عادي انتي تعلمي ماتشوفين امج شلون تطبخ
‏
فوزيه باستهزاء : تطبخ لها ولرجلها اما انا لا يا اكل في كفتيريا المعهد او اطلب مطعم او مرات فواز يطبخ لي وله
‏
حور عقدت حواجبها باستغراب : ويوم كنتوا صغار من يطبخ لكم
‏
فوزيه : ياناكل فضلتهم واللى فواز يسرق اكل من البقاله وإللى مقصف المدرسه ويجيبه لي وله
‏
حور انصدمت وحست بكتمه على صدرها مصدومه شلون فيه ابو وام قلوبهم ميته"
‏
فوزيه ابتسمت بحزن : اشفيج سكتي انصدمتي ترى عادي ابوي وامي غير عن الابهات والامهات
مافيه اي مشاعر بينا وبينهم
‏
حور ماعندها رد "
‏
فوزيه : الحمدالله على كل حال اللي ربي رزقني بأخوي فواز هو اغناني عن ابوي وامي واللى لولا الله ثم هو اللي انا وياهم خربانه
‏
‏
حور : بس فواز (واسكتت)
‏
فوزيه ابتسمت : ليش سكتي كملي قصدج فواز محشش وراعي تقحيص ولايعتمد عليه شلون احس بالامان وياه
‏

حور اسكتت خافت تجرحها"
‏
‏
فوزيه : تصدقين ياحور اني احب هالدنيا بس عشان فواز فيها احبه واموت فيه طيب ويخاف علي وحنون وشهم مايحب يتعرض لأي بنت ولاعمره فكر يسوي علاقات ويا بنات
‏
حور باستغراب : وانتي اشدراج انه ماعنده علاقات ويا بنات
‏
فوزيه ابتسمت : ادري بتقولين شلون محشش وماعنده شغل ولامشغله ولاعنده علاقات
‏
حور هزت راسها ب أيه"
‏
فوزيه : هو دايم يقول لي انتي عرضي ولاابي اتعدى على عرض الناس عشان محد يتعدى على عرضي وادري اني لو لعبت على بنات وهتكت عرضهم بدور الدنيا علي طال الزمن واللى قصر
‏
‏
حور ابتسمت تذكرت منال لو كانت موجوده وتسمع الكلام اللي ينقال عن فواز بتذووب"
‏
‏
فوزيه : تصدقين حتى لما يكون محشش مايجي صوب غرفتي ومعلمني ومحرصني

اذا دق علي الباب في الليل اذا كان طبيعي يكون لسانه موثقيل ويقصد لي قصيده من ورى الباب اذا شفت السانه موثقيل وهو طبيعي افتح له واذا عكس ماافتحله بس فواز فديته صار له مده مايحشش عسى الله يهديه"
‏
‏
حور : اميــــن الله يهديه ويخليــــه لج
‏
فوزيه ابتسمت بفرح : بعد عمــــري جزاج الله خير
‏
حور اتغير الموضوع : يــــوووه كله منج خذتنا السوالف وانا للحين ماخلصت البيض
‏
‏
فوزيه ضحكت : ههههههه يلا شغلي عليه وانا بروح اجيب الخبز من غرفتي عشان انسخنه
‏
حور : اوكي بس بسرعه لاتطولين
‏
فوزيه : اوكي دقيقه بس
‏
‏
راحت فوزيه "
حور حطت البيض والطماط فالمقلى ورشت عليه ملح وبهارات وشغلة عليه "
‏
‏

دخل عناد للمطبخ كان يبي ماي ويوم شاف حور واقفه ومعطته ظهرها "
ابتسم بخبث وتم واقف يطالعها ويشوف تفاصيل جسمها وقفتها كتوفها نفس نوره ام حور بالضبط بدى يمشي صوبها بهدوء عشان ماتحس"
‏
حور كانت لابسه دراعة بيت واسعه ولابسه شيلتها ونقابها منزلته كانت اتحرك البيض بالملاس ولا حست بوجوده "
‏

حست بحرارة انفاس قريبه من ارقبتها و صوت نفس قوي "
‏
لفت على طول وصكته على وجهه بالملاس اللي بيدها اليمين : ياكلــــب
‏
عناد صرخ من قوى الضربه والملاس حار : آآآآآآآآآآه يابنت الكلــــب
‏

حور رجعت ورا تسندت على الطوفه ومسكت المقلى اللي فيه البيض بيدها اليسار والملاس بيدها اليمين : ارجــــع ورااا والله لاتقرب خطوه لحرقك
‏
‏
عناد ماسك وجهه بإيده : ياكلبــــه ياحثالا حرقتي وجهــــى
‏
‏
‏
فواز توه داخل للبيت سمع الصوت جهه المطبخ وركض صوبهم"
‏
وفوزيه نازله بالخبز وسمعت الصيحه وركضت للمطبخ "
‏
‏
وصلوا للمطبخ وشافوا عناد يصارخ ويبي يطق حور "
‏
فواز على طول ركض له ومسكه : اشفيك انجنيت خلاص ماعاد فيك عقلك
‏
‏
عناد يتفلت : هدني عليها الكلبه تبي تحرق وجهي هدني ياملعون الوالدين
‏
‏
فوزيه كانت واقفه خايفه ومصدومه والدمعه حايره بعيونها"
‏

حور للحين على وضعها : والله لاتقرب خطوه وحده لاأسويها واحرقك
‏

فواز انجن سحبه وثبته على الطوفه : إشتبي اتسوي فيها انهبلت وسوس لك الشيطان تحسبها نوره طرتلك نوره ياأدمــــي اصــــحى هذي بنت اخوك عرضك وشرفك
‏
عناد يخاف من فواز اذا عصب : لا انا ماني ناوي اسويلها شي بس كنت واقف وراها عشان اشوف طبخها
‏
‏
حور صرخت : نصــــاب ووســــخ ونيتــــك وسخــــه
‏
‏

فوزيه وفواز يعرفون ابوهم ويعرفون نجاسته"
‏
عناد خاف من فواز : هذي كلبه لاتصدقها هي تتهمني انا ماسويت شي خلااااص خلاااص هدني بخليها ترتاح من وجهي
‏
‏
فواز كان معصب حده : بهدك لكن لو فكرت بس مجرد تفكير تعيد الحركه سواء ويا حور او منار اوحتى فوزيه واللى فكرت اتعرض لهم واللى لخالد والله لاقلب عليك الدنيا وانت عارف اشقصدي مايحتاج افهمك
‏
‏
عناد بخوف : لايالمهبول مايحتاج اتسوي شي انا مالي شغل فيهم انت بس هدني خنا اروح
‏
فواز هده "
وعناد ماصدق خبر انحاش من المطبخ
‏
التفت فواز لحور عقد حواجبه وهز راسه من القهر وهو يشوف الخوف امبين من عيونها بسبت ابوه"
‏
‏
حور من الصدمه للحين على وضعها "
‏
‏
مشى فواز صوبها ووقف قبالها مد ايده عشان ياخذ المقلى من ايدها : خلاص يابنت العم انتي في امان
‏
حور خلته يأخذ المقلى والملاس منها وهي للحين متجمده بمكانها ومصدومه"
‏
فوزيه ركضت لها ولمتها وقعدت تبكي : حور بعد عمري ماعليج منه لاتخافين
‏
حور بدت تنزل دموعها : والله ماتبليت عليه لاتصدقين كلامه
‏
فوزيه تبكي وتمسح دموع حور بكفوفها : ادري فيه اعرف سوالفه خلاص لاتبجين ماعليج
‏
حور بعتب : انتي ليش تأخرتي قلتي ماراح اتأخرين وتأخرتي
‏
فواز يحاول يهديهم:خلاص ماصار شي تعوذوا من بليس وهدوا
‏
فوزيه : كله مني تأخرت عليها
‏
حور توها تستوعب انها مولابسه نقاب "
‏
لبست نقابها ومسحت ادموعها وحاولت اتقوي نفسها : خلاص ماصار شي بس مابي اخواني يدرون بأي شي
‏
فوزيه عطت حور ماي : ان شاء الله ولايهمج
‏
فواز : وبعدين مره ثانيه لاتنزلون بهالوقت واذا بتنزلون انزلوا ويا بعض
‏
فوزيه : شنسوي خالد كان مشتهي بيض طماط ونزلت حور تبي اتسويله ونزلت وياها بعدين صعدت اجيب الخبز وصار اللي صار
‏
فواز ابتسم يبي يغير جو : يلا وهذا البيض وخلصته يلا فوز عطيني الخبز اسخنه
‏
حور قامت من الكرسي : لا خله انا بسخنه ماقصرت
‏
فواز يتغشمر وياها : اخاف اتجيبين العيد وتحرقين الخبز مثل بنت عمج
‏
حور ابتسمت من تحت النقاب تحاول تكون طبيعيه : حتى الخبز ماتعرفين اتسخنينه الصراحه حالتج ميؤس منها
‏
فوزيه : يــــلا عاد انتي وياها بسكم طنازه شسوي اخاف ماعرف اسخنه
‏
فواز ضحك : ههههههه شتخافين منه كلها خبزه حطيها وسخنيها بتصنعين الذره انتي
‏
حور ابتسمت غصب عنها : بتعلم إن شاءالله
‏
فواز : على ايدج يابنت الحلال
‏
فوزيه : مسوي نفسك الشيف منال العالم
‏
فواز : ههههههههههه خرطي طبخ منال العالم عند طبخي
‏
فوزيه : اي هين

حور اتحط البيض بصحون : فواز احطلك من البيض
‏
‏
فواز : لاعليكم بالعافيه انا متعشي
‏
فوزيه وقفت قباله وتخصرت : لا هذي خيانه متعشي ولاجبتلي عليك مخالفه
‏
فواز ضحك وقرص خدها : قولي فيه العافيه قولي دامك تعشيت كأني انا اللي متعشيه
‏
فوزيه : بالعافيه ودامك تعشيت كأني انا اللي ماكله بس هم عليك مخالفه
‏
فوز : وشلون طريقة تسديد المخالفه
‏
فوزيه : عشانا بكره شوي انت تشويلنا
‏
فواز : على خشمي ماطلبتوا شي
‏
فوزيه : فديت الخشم وراعيه
‏
‏
حور حطت صحون البيض والخبز بصينه بسرعه خلاص اتحس نفسها تقلب عليها كل ماتذكرت اللي صار : يلا فوز تأخرنا عليهم بالعشا
‏
فوزيه حست بتغير نبرت صوتها : يلا مشينا
‏
فواز : يلا تصبحون على خير
‏
حور ماعاد قدرت اتحس انها وسخه وجبدها تقلب عليها خذت الصينيه وطلعت بسرعه
‏
فواز بخوف : فوز بسرعه الحقيها شكلها مو طبيعي لايكون ابوج عطاها شي تأكله
‏
‏
فوزيه بسرعه الحقتها "
‏
‏
‏
‏
فتحت حور باب الغرفه بسرعه حطت الصينيه واركضت للحمام"
‏
وسط ذهول وخوف واستغراب من خالد ومنار "
‏
دخلت فوزيه وراها : وين حور
‏
منار وخالد بخوف : إشصاير إشفيها حور
‏
فوزيه تحاول تكون طبيعيه : هاه لا مافيها شي بس جبدها قلبت عليها من ريحة البيض الظاهر
‏
منار باستغراب : جبدها قلبت غريبه اول مره تقلب جبدها من البيض
‏
فوزيه : أي البيض هذا نوعيته غير وريحة ازفرته قويه شوي
‏
‏
منار وخالد بارتياح : الحمدالله حسبالنا فيها شي
‏
‏
فوزيه تبتسم بتصنع : لامافيها اللى العافيه يلا خلونا انتعشى قبل يبرد البيض
‏


خالد : وحور
‏
فوزيه : حور قالت ماتبي اتعشى
‏
منار : خلاص خلونا انتعشى بسرعه عشان انطلع المواعين وانعطر الغرفه عشان الريحه
‏
‏
‏
في الحمام "
‏
كانت قاعده بالبانيو والماي يصب فوقها اتحس بقرف تفرك بالشامبو صوب ارقبتها اتحس بنجاسة انفاسه ووساختها كانت تفرك شعرها وجسمها حيل"
‏
ماخلت شور جل بأنواع الروائح ماتسبحت فيه "
‏
بس مافاد للحين اتحس انها اتشم ريحه نفسه الكريه "
‏
ماقدرت اتحمل رجعت (استفرغت) كل اللي كلته
‏
‏
فوزيه وخالد ومنار فزوا من اماكنهم وركضوا للحمام خافوا عليها وهم يسمعون قوة صوت رجاعها (استفراغها)
‏
‏
فوزيه من ورا الباب : حــــور بطلي الباب فيج شي
‏
خالد : حور تسمعيني انا خالد افتحي
‏
منار على طول بكت : حور تكفين ردي علينا
وقفتي قلوبنا

مافيني شي
‏
فوزيه : انزين بطلي الباب
‏
حور : فوز مافيني شي بس عطوني روبي وملابسي
‏
منار ركضت على طول جابت روبها وملابسها : حور فتحي الباب خليني البسج
‏
حور : مافيني شي لوعت جبد بسيطه عطيني ملابسي مافيني شي اقدر البس
‏
‏
فتح حور الباب ومدت حور ايدها خذت ملابسها والبست وطلعت لهم "
‏
‏
الكل بخوف : حور انتي بخير
‏
‏
ابتسمت حور بتعب : اي بخير بس عطوني ماي اشرب
‏
‏
خذا خالد الدولكه وصبلها ماي بالقلاص : اشربي بسم الله عليج
‏
خذت حور القلاص : اشفيكم مكبرين السالفه ترى مافيني اللى العافيه
‏
منار : حور خفنا عليج
‏
حور : مافيني شي حبيبتي يلا خلصوا تعشوا وناموا وراكم مدرسه
‏
خالد : خلاص تعشينا
‏
حور : يلا فرشوا اسنانكم وتوضوا وصلوا ركعتين وناموا
‏
فوزيه : يلا هذي حور وتطمنتوا عليها مافيها اللى العافيه يلا النوم وراكم مدرسه
‏
‏
قاموا منار وخالد بعد ماتطمنوا على حور يسون اللي قالتلهم حور عليه"
‏
‏
فوزيه بصوت واطي : حور اشفيج ابوي وكلج شي واللى سوالج شي
شاللي صار بالضبط علميني
‏
حور تنهدت : مادري كنت واقفه اقلب البيض ماحسيت اللى بحراره النفس القريبه من رقبتي لفيت بسرعه والملاس بإيدي وصكيته فيه
‏
فوزيه : يعني قرب منج حيل شلون ماحسيتي بخطواته ولاسمعتيها
‏
حور : ماسمعت خطواته ولاحسيت فيه واللى وهو وراي (حست بقرف وهي اتذكر قربه منها)
‏
فوزيه هزت راسها : اكيد تخيل انج نوره امج وفقد عقله
‏
حور : خلاص تكفين سكتي لاتذكريني
‏
‏
‏
‏
‏
‏
‏

"الساعه 2 الفجر "
‏
صار له ساعتين قاعد على العشب ويفكر باللي صار كره نفسه الف مره على اللي سواه "
‏
عمره مامد ايده على اي مخلوق ولا اسرف في ضرب احد "
‏
كان ندمان حيل على جلدها صح كلام منايل مثل السم وتستاهل عليه الطق لكن تمنى انه ماسوى فيها اللي سواه"
‏

طالع ساعته شافها صارت 2 ونص قام ودخل البيت يبي يشوف اشصار عليها "
‏
‏
دخل للبيت واتجه للغرفه سمع صوت انين وصوت ماي يصب وقف يبي يتأكد من وين جهة الصوت "

‏
اتجه للغرفه وكل ماله يسمع الصوت اقرب "
‏
ركض بسرعه للحمام "
‏
وقف وهو مصدوم ومكسور خاطره بنفس الوقت عليها"
‏
شافها منقعه عمرها فالبانيو بملابسها ومخليه الماي يصب عليها"
‏
‏
دخل الحمام ووجهه معتفس ومتضايق"
‏
صكر الماي وشالها من البانيو "
‏
منايل كانت تون من العــــوار وشكلها يكسر الخاطر "
‏
خذاها للغرفه وحطها على السرير "
وطلع من الكبت روب سبوحه "
فصخ عبايتها الكتف ولفها بالروب"
‏
كانت لابسه تحت العبايه قميص ابيض وبرموده سودا فتح ازارير القميص يبي يوخره"‏

منايل بتعب وكره لبندر : وخر عني انت شتسوي
ماكفاك اللي سويته

بندر مارد عليها فتح صيدليه الغرفه وطلع منها شاش وقطن ومطهر ومرهم للجروح"
‏
منايل شافته جاي صوبها وهي حدها حاقده عليه وفي نفس الوقت مقهوره والعوار ذبحها : وخر عني تراني اكرهك ومادانيك الله ينتقم منك
‏
‏
بندر مارد عليها قعد قبالها وفصخ قميصها"


منايل مافيها حيل اتقاومه ولاتسوي شي قعدت تبكي : ياويلك من عذاب الله على اللي سويته فيني
‏
‏
بندر تضايق حيل وهو يشوف ظهرها شلون متجريح والدم طابع قميصها"
‏
عقم الجروح بالمطهر وحط مرهم وشاش عليها والجلدات اللي بس وارمه حط عليها مرهم "
‏
‏
منايل حرقها المعقم وزادت بكي : آآي خلاص لاتلمسها خلها
ذبحتني

بندر حس في خاطره ولاشعوريا باس ظهرها وقام وخذا عقاله ومده لها وعطاها ظهره : يلا قومي اجلديني مثل ماجلدتج
‏
منايل زادت بكي وحذفت العقال عليه : وخر عني انا ماعرف اتفرعن مثلك
‏
سحبها بندر لصدره وضمها : والله إني اسف انا انفعلت وماعاد ميزت
‏
منايل تبكي وتشاهق بحضنه : كله منك جسمي كله يعورني بسبت فعايل ايدك شيفيدني اسفك

بندر تنهد : الف مره قلتلج لاتقولين كلام يخليني انفعل وافقد اعصابي
‏
منايل تبكي : الحين بطلعني انا الغلطانه وانت لا
‏
بندر يمسح دموعها : كلنا غلطنا لكن غلطي انا اكبر خلاص قوليلي شاللي تبيني اسويه وبسويه
‏
‏
منايل وخرت من حضنه وطالعته بعيونها المليانه دموع : انا وانت ماناسب بعض ابيك اتطلقني وكل واحد يروح بحاله
‏
‏
بندر طالعها بصدمه وتنهد وهز راسه : خلاص اللي تبينه بيصير بس موالحين خليه على الاقل يمر سنه على زواجنا واذا مافيج صبر ثمان شهور
‏
‏
منايل : ليش يعني موالحين
‏
بندر تنهد : انتي تدرين ليش مايحتاج اذكرج
‏
منايل تذكر الكلام اللي طلع عليها بسبة الحرامي اللي دخل بيتهم : سكتت ماعندها رد
‏
بندر كمل : مابي اعطي مجال لناس اتكلم
‏
منايل هزت راسها ونزلته: والله انه مالمسني
‏
بندر غير الموضوع : بنمر البيت ناخذ جوازاتنا ونسافر لمكه كم يوم انغير جو ونرتاح وتهدى النفوس
وعقب ماتنقضي الثمان شهور اللي طلبتيه يصير وانتي روحي بحالج وانا بحالي
‏
"قام وطلع برى الغرفه"

‏
اما منايل قعدت تبجي ماتدري ليش تبجي وهي اللي تبي الطلاق"

‏
‏
قامت دورت بالادراج لقت دراعه خامتها مريحه للعنود البستها وخذت عبايتها ونشرتها عالحبل عشان تنشف من الماي "
‏
‏
مشت بخطوات ثقيله مافيها حيل طلعت برى تبي اتشوفه"
‏
لقته واقف عند باب الدوانيه وملقيها ظهره وسرحان "
‏
مشت ووقفت قباله وتمت اطالعه بدون ماتكلم
‏
بندر استغرب نظراتها ووقفتها : اشفيج
‏
منايل العبره خانقتها : بسألك سؤال انت ليش اتخاف علي ولاتبي الناس اتكلم عني وانت ماتحبني
‏
بندر ابتسم ابتسامه باهته : ماعندي جواب لسؤالج بس انتي على ذمتي واسمج مرتبط باسمي
‏
منايل : انت ليش قاسي وياي على اني اشوفك طيب ويا الناس
‏
بندر بهدوء : انتي اللي اتحديني على القسوه واللي انا مهو طبعي القساوه
‏
منايل : انا ادري اني اغلط بكلامي مرات بس انت تقهرني
‏
بندر : انتي منتي راضيه اتأقلمين ويا حياتج الجديده طايشه وماتهتمين ومتكبره وشايفه نفسج
‏
منايل عصبت : حتى انت عندك عيوب
‏
بندر ضحك : ههههه مافيه انسان خالي من العيوب
‏
منايل سكتت وراحت قعدت على الكرسي"

‏
بندر راح وقعد يمها : يلا نمشي للبيت انجهز اغراض السفر
‏
منايل بدون ماطالعه : خلنا شوي لي اذن الفجر بنصلي واروح
‏
بندر باحراج : تعبانه
‏
منايل طالعته : اشرايك قالولك جلدي صخر مايحس سبحان الله انت مثل اللي يقتل القتيل ويمشي بجنازته
‏
بندر ابتسم قال بخاطره (ماتخلي شي بخاطرها )
‏
منايل سندت ظهرها على الكرسي ورجعت راسها وغمضت عيونها"
‏
بندر رحمها كسرت خاطره راح جاب لها مخده من الغرفه : منايل شوي بحط المخده ورا ظهرج
‏
منايل دنت وهو حط المخده ورا ظهرها ورجعت لوضعيتها وغمضت عيونها "
‏
‏
بندر قعد يتمقل بملامح وجهها "
‏
فتحت منايل عيونها وانحرجت من نظراته ونزلت راسها وقامت راحت داخل"
‏
وهو ارتبك وابتسم في نفس الوقت اعجبه شكلها وهي منحرجه"
‏
‏
‏
‏
‏
‏"""

أقــــرب شــــوي
وخل عيني تراعيــكــ

يكفــــي علي بعــدكـ ويكفي تغليــكــ

لا تبخـــل بشوفـكـ
على عيـــون مغليــكـ

عطـــني ولو لمــحه وانا آفداك كلــي "
‏
‏
‏
‏""
‏
في نفس الوقت منال كانت سهرانه والنوم مجافيها "
‏
امها لاراضيه اتخليها تروح اتشوف حور والمكالمات صارت صعبه بينهم"
حور اغلب وقتها مسكره جهازها "
‏
‏
اشتاقت لها واشتاقت لايامهم وطول الوقت اتحاتيها صحيح اخبارهم توصلها منار لنرجس بالمدرسه لكن
لما تسمع الاخبار من حور نفسها غير عن لما أحد يوصل لها "
‏
‏

"كان الشعور متبادل رغم بعد المسافه "
‏
‏
حور طول الوقت اتفكر باللي صار وأول شخص تمنت اتشوفه بهالوقت هي منال

‏
تمنت ان الزمن يرجع وترجع الايام اللي كانوا مايفارقون بعض فيها"
‏
اول مره يفترقون من صغرهم كانوا ويا بعض مايعدي يوم مايشوفون بعض "
‏
مسكت فونها واكتبت لها مسج ( مشتاقه لج ومحتاجه لوجودج ) ضغطت سند ولكن فشل الارسال"
شافت الرصيد مافيه إلا 15 فلس مايدز حتى مسج "
‏
وصلها مسج وضغطت فتح على طول "
‏
(تدري بعد ماغــبت وش كــنت اسوي ؟
‏
كــنت وخيالك مثل جفن على عـــين "
‏
كــنت انتظر والوقت كــنه عدوي "
‏
لاطال زاد الشوق فيني بضعفــين "
‏
حتى قبل ملفاك هالحين تــــوي "
‏
سافرت افكربــك ولا ادري على وين ;;
‏
‏
<اتمنى تكونين بخير ياأغلى حور >)
‏
ابتسمت حور وباست شاشة تلفونها وضمته "
‏
بعد عمري منول دايم اتحس فيني الله لايخليني منها "
‏
‏
‏
‏
‏
‏
‏~~~ ~~~ ~~~ ~~~
‏
‏
بعد ماصلوا الفجر "
‏
طلعوا من المزرعه متجهين للبيت "
‏
الجو بالسياره هادي كل واحد فيهم ساكت"
‏
وصلوا للبيت وعلى طول راحوا غرفتهم "
‏
جهزوا اغرضهم وخذوا جوازاتهم وانزلوا لغرفة الجده "
‏
فتح بندر الباب ودخل شافها للحين قاعده على سجادتها واتسبح "
‏
قعد على السرير "
‏
انتبهت الجده هيا لوجوده والتفتت
‏
قام بندر وحب راسها وقعد جمبها : تقبل الله
‏
الجده بحنان : منا ومنك صالح الاعمال وشفيك يمه مانمت بعد الصلاه
‏
بندر ابتسم : ابد سلامتج تعالي يامنايل
‏
دخلت منايل : صبحج الله بالخير خالتي (حبت راسها وقعدت جمب بندر سوت نفسها طبيعيه ومافيها شي)
‏
الجده بقلق واستغراب : صباح الخير عسى ماشر اشفيكم قاعدين فيكم شي
‏
بندر مسك ايدها وباسها : ابد يالغاليه بس حنا ودنا نمشي لمكه نتعمر ونغير جو ان كان ودج اتخاوينا يامرحبا ومسهلا
‏
الجده حست ان فيهم شي وفي نفس الوقت استانست انهم بيسافرون ويغيرون جو على امل ان هالسفره اتحسن حالهم واتقربهم من بعض : هذا الشور المبارك يمه روحوا اخذولكم اسبوع ترتاحون وتغيرون جو
انت ومريتك ومرتن ثانيه نروح كلنا انا مافيني حيل على السفر هالوقت
‏
بندر ابتسم : اللي يريحج حنا بنأخذ لنا يومين ثلاث ونرجع مااقدر اطول عليكم اسبوع واجد

‏
الجده هيا : انتوا روحوا وإن شاءالله يعجبكم الجو واتمددون
‏
بندر قام وحب راسها وايدها : خير إن شاءالله يلا حنا ماشين توصين على شي
‏
الجده : دربكم خضر وسعوا خطركم واستانسوا
‏
‏
سلمت منايل على الجده وودعوها"
‏
ركبوا السياره واتجهوا لمكه المكرمه اطهر بقاع الارض"
‏
‏
‏
‏
‏
الساعه وحده ونص الظهر حور وفوزيه كانوا بالمطبخ"
‏
‏
دخلت سكينه وتنرفزت من وجود حور : بتعملي أيه ياوليه ياحربايه
‏
‏
فوزيه : يمه اشفيج داخله بشرج
‏
حور طالعت سكينه من فوق لتحت باستهزاء وماردت عليها كملت تقطيع السلطه
‏
‏
سكينه انقهرت من برود حور : انتي يابتعت الرقاله ياصيعه ياضيعه مابترديش ليه
‏
حور انصدمت من كلامها وعصبت لكن سوت نفسها طبيعيه وردت عليها ببرود اعصاب : ههههه كلن يرى الناس بعين طبعه
‏
فوزيه عصبت : يمه شنو تبين اتهاوشين ومالقيتي اللى حور بس عاد فضحتينا عند الجيران
‏
سكينه : انكتمي يافوزيه انا مش رايألك ( تخصرت ووقفت اقبال حور )
بتأولي أيه يابنت الشوارع
‏
حور بمنتهى البروده : اترفع عن الرد لاني وبكل بساطه ماحب انزل للاسلوب الواطي ويا الناس الواطيه
‏
‏
سكينه عصبت صابتها هستيرية هبال ودها تذبح حور ودها اطقها اطلع حرتها بس ماتقدر مو رحمه في حور ولاعشان سواد عيونها لا هذي اوامر عناد مايبي يصير في حور شي عشان مايخسر الصفقه اللي بينه وبين بوفيصل"
‏
‏
‏
شاشت بغت تنفجر طلعت من المطبخ وشافت قدامها منار توها داخله البيت راجعه من المدرسه"
‏
‏
مسكتها تبي اتطلع حرة حور فيها : قايه من وين يابنت الكلب ( قايه =جايه)
‏
منار تخرعت :
وخري عني انتي اشتبين (شوي وتبجي )
‏
‏
سكينه مسكتها من قميصها وقعدت اطقها ماصدقت خبر اتشوف احد من طرف حور اتطلع حرتها فيه: ياصايعه خلصتي صياعه وقايه عاوزه اتخربي سمعتنا
‏
منار تبكي تحاول ادافع عن نفسها ادزها بس ماقدرت سكينه اشكبرها وعرضها :
وخري عني حور الحقيني
‏
‏


فوزيه كانت مشغله الخلاط وماسمعوا الصوت ولاانتبهوا "
‏
‏
خالد كان واقف برى يشتري برد "
دخل وشاف سكينه طايحه طق في منار وراكبه فوقها"
‏
خالد حذف جنطته والبرد اللي بيده و سحب حزامه وبدون تردد قعد يجلد سكينه : يالبطه قومي الله يأخذ عمرج هديها حــــور الحقينا
‏
سكينه للحين قاعده على منار والتفتت عليه تبي تسحبه واتحطه فوق منار واطيح فيهم طق : تعال ياابن الكلب انا حوريك حربيك من قديد
‏
خالد كان مبعد ويجلدها ماقرب منها : حــــور الحقــــي
‏
‏
‏
حور حست بصوت : فوز صكي صكي
‏
فوزيه صكت الخلاط بسرعه : اشصاير
‏
حور سمعت صوت خالد وعلى طول فزت وركضت للحوش "
‏
فوزيه طلعت وراها "
انصدمت لما شافت امها طايحه طق في منار واجمدت بمكانها ماقدرت تسحب امها ولاقدرت ادافع عن منار وقفت بمكانه "
‏
حور ركضت صوبهم واسحبت شيلتها حذفتها على رقبة سكينه ازنطتها وسحبتها بكل قوه وطيحتها على الارض"
‏
طاحت سكينه على الارض وخالد للحين طايح فيها جلد بالحزام "
‏
حور سحبت اختها منار"

حور من القهر فصخت انعالها وقعدت اطق سكينه : ياحقير ياواطيه حطيتي الحرف فيها تف عليج وعلى اشكالج
‏
سكينه طاحت على ظهرها ومن متنها ماعاد قدرت اتقوم واذبحتها حور وخالد بالطق خلاص تبي الفكه تبي تنحاش منهم : الحأيني يافوزيه ياأولاد الكلب بعدوا عني
‏
حور استوعبت نفسها لما سمعت اسم فوزيه رفعت عينها شافت فوزيه واقفه مكانها وتبكي"
حز بخاطر حور يوم شافت دمعتها وحذفت النعال : خلاص ياخالد بس
‏
سمع خالد كلام حور ووقف عن الطق""
سحب جنطته وراح صوب منار يقومها"
‏

حور مدت ايدها لسكينه عشان تقومها : حديتينا على شي مانبي نسويه
‏

سكينه : بعدي عني ياحربايه تعالي يافوزيه اسنديني اولاد الكلب مرمطوني
‏

حور خلتها وراحت تأخذ منار وخالد وصعدون فوق"
‏

فوزيه راحت تقوم امها : يمه ليش جذي خلاص مالج شغل فيهم
‏
سكينه قعدت وقامت تلمس ارقبتها : بنت الحرام كانت حتزبحني (بعدين استوعبت وجود فوزيه وعطتها كف ) ياحقيره ماقيتيش تساعديني ليه ألبك حنين عليهم وقاسي على امك
‏
‏
فوزيه مسكت خدها : عمرج ماراح اتغيرين الصراحه مالومهم على اللي سوه فيج (مشت وخلتها )
‏
‏
‏
‏

( غرفة فوزيه )
‏
حور كانت معصبه على منار : انتي خبله ماتعرفين ادافعين عن نفسج واقفت لها اتكفخج زين ماذبحتج
‏
منار تبكي : شسوي خفت منها وماعرف اتهاوش واطق احد
‏
حور تنرفزت ازياده : اوكي ماتعرفين اطقين احد عالاقل انحاشي مو تقعدين واقفه لها اتكفخ فيج وانتي واقفه مثل الهبله
‏
منار زاد بكيها : شسوي مامداني انحاش ماخلتني
‏
خالد كسرت خاطره منار : خلاص حور لاتلومينها سكينه فيل اشكبره ماقدرت عليه
‏
حور معصبه : ادري انها فيل بس الوحده تدافع عن نفسها وإلا يوم شفتيها قربت منح صكيتيها بجنطتج متروسه كتب
‏
منار اتشاهق : خفت خفت ماتعودت على هالشي
‏
حور كسرت خاطرها
تنهدت ولمتها : خلاص حبيبتي بس انا اقول هالكلام من الحره قهرتني يوم شفتها طايحه فيج طق
‏
منار ماسكه حور حيل وتبجي : قعدت اناديج بس انتي ماسمعتيني
‏
حور اتهديها : خلاص اهدي في شي يعورج
‏
منار عيونها مليانه دموع : ظهري حسيت بينكسر يوم قعدت علي
‏
حور : والله ماردني منها اللى دمعة فوزيه واللى هي من اطيح على ظهرها خلاص ماعاد تقدر تقاوم
‏
خالد : حور بس الكلبه قويه ايدها اتقول عجرا مو ايد
‏
حور : ادري انها قويه ولو ماربي عانا عليها وطاحت على ظهرها واللى كان ماقدرنا عليها بس كل شخص له نقطة ضعف وهي نقطة ضعفها اذا طاحت على ظهرها ماعاد تقدر تقوم

دخلت عليهم فوزيه "
‏
اسكتوا وغيروا الموضوع "

قامت حور باست خد فوزيه : انا اسفه ادري انها امج بس انا من خوفي على منور ماعاد شفت
‏
فوزيه قاطعتها : لاتكملين انا مازعلت منكم ولاراح ازعل صدقيني ياحور امي عمرها ماراح اتغير عمرها ماراح اتحس فينا خليني ساكته احسن
‏
‏
حور احترم رغبتها واسكتت "
‏
‏
‏
‏
‏
‏
الساعه 12 الليل"
مكه المكرمه"
‏
‏
دخلوا الشقه بعد ماادوا مناسك العمره "
‏
‏
سبحان الله انقلب حالهم وانشرحت صدوره كانوا جايين بحال وبعد ماعتمروا تغير حالها "
‏
‏
بندر : الحمدالله اللى سهلها ويسرها
‏
منايل رغم التعب الجسمي اللى انها تحس براحه نفسيه عجيبه : اللهم لك الحمد يارب
‏
بندر التفت صوبها : عمره مقبوله إن شاءالله
‏
منايل : جزاك الله خير
‏
‏
قامت منايل تبي تأخذ لها شور "
‏
طلعت من الحمام بالروب لقت بندر متمدد على السرير انحرجت من وجوده
‏
راحت للكبت خذت ملابسها تبي تروح الغرفه الثانيه "
‏
‏
بندر قام خذا مخده والحاف: اخذي راحتج انا بنام بالصاله
‏
منايل سكتت ماقالت شي يوم شافته طلع صكت باب الغرفه البست بجامتها وجففت شعرها بالاستشوار رشت عطر من نينا رتشي"
‏
انسدحت على السرير ومامداها اتحط راسها عالمخده اللى راحت في سابع نومه من التعب"
‏
‏
‏
الساعه 9 الصبح "
‏
قعدت منايل راحت للمطبخ ادور شي تأكله"
‏
سمعت صوت باب الشقه ينفتح طلعت من المطبخ تشوف منو "
‏
شافت بندر داخل وبإيدها اغراض "
‏
بندر رفع عينه وشافها ابتسم لها
: صباح الخير
‏
منايل برسميه : صباح النور
‏
بندر حط الريوق على الطاوله : تعالي اقربي تريقي
‏
منايل كانت حدها جوعانه بدون ماتكلم راحت قعدت على طاولة الاكل وبدت اتريق وهي ساكته ومنزله عينها بصحنها "
‏
‏
بعكس بندر اللي ماشال عينه منها "
‏
وقف بندر : الحمدالله اللهم دمها علينا وعلى جميع المسلمين
‏
‏
منايل ماردت بأي كلمه "
‏
بندر بابتسامه : مافيه كلمة عوافي
‏
منايل ماردت هي للحين زعلانه عليه وخذت قرار انها تكون رسميه لحد ماتخلص المده اللي بينهم وكل واحد يروح في حال سبيله "
‏

بعد ماغسل بندر إيده رجع لصاله خذا كيس صغير من الاكياس اللي جايبها "
‏
وقف ورا منايل اللي كانت قاعده على الكرسي وتشوف حركاته بس مارفعت عينها من طقة انها لاهيه بالريوق "
‏
‏
فتح بندر الكيس وطلع منه قفص احمر مخملي مستطيل الشكل "

منايل مالتفتت ولاتحركت من مكانها "
‏
‏
فتح بندر القفص وحطه قدامها خذا العقد ولبسها ياه
مسكها من كتوفها ووقفها ولفها صوبه
حط كفوفه الثنتين على خدودها"
باس راسها ونزل لخدها وعقب شفايفها "
‏
منايل تيبست بمكانها بغت تدخل بملابسها من الخجل انحرجت تبي اتحرك اتوخر عنه لكن تحس عضامها تيبست ماقدرت اتحرك ولاحركه "
‏
سحبها لحضنه وحضنهــــا بقــــوووه تنهد وقال : آآآه منج خليتي صدري مثل البركان حرقتي اعصابي وجننتيني بس رغم هذا كل قلبي مايطاوعني اأذيج احاول قد مااقدر امسك اعصابي لكنها تفلت غصب عني صح انتي بوادي وانا بوادي لكن فيه شي يجذبني لج
‏
‏
منايل في هالحظه تمنت الوقت يوقف تمنت مايمر بسرعه رغم كرها للعيشه وياه ورغم انها شايله بقلبها عليه لما مد ايده عليها"
اللى انها حست بشعور حلو شعور تمنته ماينتهي"


حب راسها بندر مره ثانيه وهدها : يلا جهزي عمرج بنمشي لطايف وبعدين بنرجع للكويت
بأخذ لي شور ونمشي
‏
منايل تحس نفسها مثل الثلجه السايحه وكل اللي قدرت عليه انها هزت راسها بالاجابه بأن شاءالله
‏
‏
مشى بندر خذا روبه ودخل الحمام يتسبح"
‏
‏
منايل ظلت واقفه بمكانها عشر دقايق بعدين استوعبت نفسها اسحبت عمرها بخطوات ثقيله خذت القفص وحطته بالكيس وراحت للغرفه جهزت اغراضها وخذت عبايتها وقعدت

بالصاله تنطر بندر يخلص"
‏
شغلت التلفزيون وقعدت على الاريكه اطالعه بس ماكانت منتبهه على أي قناه حاطته ولا شنو فيه ولاكانت ملقيته بال"
‏
كانت سرحانه وتفكر في بندر مرات اتحس انه اطيب شخص بهالكون ومرات اتحس انه قاسي ومرات اتحسه مزاجي ومرات اتحسه عصبي لكن اللي تعرفه انه فالنهايه حنــــون
‏
‏
قطع عليها سرحانها صوته : يلا مشينا
‏
التفتت صوبه شافته شايل جنطتها وجنطته: يلا
‏
البست عبايتها ونقابها وخذت جنطة ايدها من على الطاوله وطلعوا من الشقه"
‏
‏
‏
‏
ركبوا السياره متجهين لطايف عروس المصايف "
‏
‏
الجو في السياره كان هادي جدا "
‏
منايل سندت راسها على الكشن ولفت وجهها صوب الدريشه وسرحت بافكارها بعيد
‏
‏"""
‏
‏
سعود نازل من الدرج وحده معصب : خلاص جايك الحين يلا صكر
‏
ام سعود باستغراب : يمه اشفيك عسى ماشر
‏
سعود بعصبيه : اللى الشر بعينه وعلمه
‏
ام سعود بخوف : خير اشصاير
‏
سعود : من وين يجي الخير وعناد موجود
‏
ام سعود : خير الله يقطعه ويقطع سيرته اشسوى بعد

‏
سعود وهو طالع من الباب : خذا حور واخوانها عنده فالبيت الله يأخذ عمره (طلع وصك الباب بقوه )
‏
ام سعود ركضت لتلفون دقت على بوسعود : ألو بوسعود الحق
‏
بوسعود بخوف : خير يامره اشصاير
‏
ام سعود : عناد الله ياخذه خذا حور واخوانها عنده فالبيت وسعود توه طالع من البيت معصب تكفى يابوسعود تصرف انا خايفه على سعود لايسوي شي
‏
بوسعود عصب وتعتزوا : انا ولد ابوي متى صار هالكلام
‏
ام سعود : والله مادري
‏
بوسعود : خلاص خلاص انتي صكي وانا بشوف الموضوع
‏
‏
‏

سعود طلع لنايف اللي كان ينطره برى
ركب السياره وهو معصب : صار لي ساعه ادق عليها وجهازها مسكر
‏
نايف يحاول يهديه : اهدى ياابن الحلال
‏
سعود : وين اهدى وهي عند عناد لا وصار لهم يمكن شهر
‏
نايف : يابن الحلال عناد عمهم وهم رايحين عنده برضاهم
‏
سعود زادت نرفزته : الشرهه مهو بعليهم الشرهه على سعاد اللي خلتهم يروحون عنده
‏
‏
دق تلفون سعود وعلى طول رد : هلا يبه

‏
بوسعود : سعود اسمع وانا ابوك انا شفت الموضوع وعرفت انهم رايحين برضاهم محد غصبهم ودامه برضاهم مانقدر انتدخل
‏
سعود : وشلون مالنا دخل انت نسيت عناد وسوالفه
‏
بوسعود : انا بكلم حور واشوف الموضوع واذا هم راضين ماني مخليهم بتابعهم من بعيد واشوف الوضع واشوف السبب اللي خلاهم يرضون يسكنون عنده
‏
سعود : يبه وانا شيصبرني من دريت انهم عنده وانا ماهدت اعصابي
‏
بوسعود يدري ان سعود يحب حور : يابوك اصبر الصبر زين وإن شاءالله ماهو بصاير اللى كل خير
‏
سعود تنهد مايقدر يعارض ابوه : خير خير إن شاءالله
‏
‏
‏
‏
‏
‏" " " " " " " " "
‏
في احدى مجمعات الطايف كانوا يتمشون"
‏
بندر : هاه بعد تبين شي من هالمجمع واللى نروح غير
‏
منايل : لا انا خلصت منه بس انت كيفك
‏
مسك ايدها وكانت بارده : دام خلصتي انا خالص يلا امشي نشرب لنا كوفي يدفيج
‏
منايل طالعته وابتسمت : اذا ممكن ابي لتيه
‏
بندر : ابشري وغيره
‏
منايل انحرجت من نظراته : بس
‏
‏
‏
خذولهم كوفي ودونات وركبوا سيارتهم وتموا يتمشون فالطايف وقفوا عند احد المنتزهات وانزلوا يتمشون فيه"
‏
خذاهم الوقت وهم طول اليوم يتمشون من مكان لمكان "
‏
اليوم هذا المفروض يكتبونه بتاريخ حياه كل واحد فيهم لانه اجمل يوم مر عليهم من تزوجوا "
‏
‏
الساعه 10ونص تعشوا بأحد المطاعم ورجعوا لشقتهم "
‏
‏
ومن دخلوا الشقه كل واحد منهم نام بمكان بندر نام بالصاله ومنايل بالغرفه "
‏
‏
‏
‏
انتهــــى البــــارت اتمنــــى ينال عجــــابكم"
‏
تحياتــــي"

الكويت موطني _ حلزونه _ كتشن _ بياض الصبح _ الريم اللعوب


اشكركم من كل قلبي على متابعتكم المستمره لاحداث روايتي واعذروني اذا ما قدرت ارد عليكم وحده وحده لاني حيل مضغوطه وقاعده احاول قد ماقدر انزل البارت بوقته فلاحد يزعل اذا مارديت عليه""

السلام عليكم و رحمه الله و بركاته

صباح الخير و الرضا من الرحمن

أبدعتي يا غنادير تسلم الأيادي يارب

=====================
(( بندر و منايل ))

ياليت بندر يكون صبور على منايل مثل ما هو على خواته للأسف طريقة تعامله معاها حيل

قاسيه وصلت فيه أن يجلدها بالعقال لو وحده غيرها ما قعدت عنده دقيقه بس للأسف

سالفتها مقيدتها حيل .. بنفس الوقت منايل للأسف للان ماهي قادره تستوعب طبع زوجها

و أنها ما يحب اللي يرادده أو يغلط عليه و هي ماخذتها عناد .. إن شاء الله بعد هالعمره تكون

الاحوال تعدلت و خصوصا مع القرار الجديد اللي ممكن يخلي منايل تهون عن عنادها شوي...

=======================
(( حور ))

اول الغيث قطره و الله يستر عليها هي و اخوانها من الجاي بس اتوقع ابو سعود راح يسأل

و يعرف تخطيط عناد الهم و يحاول يرجع حور للخاله سعاد ...

========================

سلمتي يارب

بــ انتظارج

احم أحم << نبي ثلاثه أجزاء

واحد اساسي

و الثاني بمناسبة اليوم الوطني

و الثالث بمناسبة ذكرى التحرير


<<< فيس طماااااااااااااع ^ــ^


..
..
..

الله يعطيكى العافيه اتوقع سعود هواللي ينقذ حورمن ابوفيصل وعنادويخطب حوروتسلمي غناديرحبيبتي بنتظارابداعك