بسم الله الرحمن الرحيم


هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

يا خواتي اللقطاء مآساتهم ماتصطرها روايه وربي كل الحزن الي نشعر فيه اتجاهم

ما يجي جزء بسيط من حزن يوم واحد في حياة الكثير منهم

الروايه بتكون نهايتها من وجهة نظر ي نهايه مرضيه وملمعه لأنه مهما سطرنا من وجع ماراح نوصل لوجعهم..

نسأل الله السلامه لنا والجميع اعراض بنات المسلمين والله الاعداد في ازدياد..

الف الف لابآس على بنت الغاليه حكيمه اسأل الله العظيم ان يشفيها شفاءلايغادر سقما وجميع مرضى المسلمين
.
.
.
اليوم بنشوف عوق المزايين كيف بتواجه اول مشكله في حياتها الزوجيه وهل بتستسلم او لا


البارت اهداء للعابرين من هنادون استثناء...!!

واهداااء خاص للغاليه نوفاه,
.
.
.
يا الله تعالوا معاي...!!

وسالفه جديدة؛
.
.
.
البارت العشرين
.
.
.
عوق بترددوارتباك\ زياد ابيك بموضوع ..؟

كلمني بدون حتى ما يلتفت علي...!

زياد \ انا تأخرت عن شغلي خلي مواضيعك وقت ثاني ..,

عوق\خلاص مومشكلةاذارجعت انتظرك فوق..,

زياد بتهكم\ برجع متأخر عندي حالات مستعجله وانتي مواضيعك طويله ولا هو ضروري تنتظريني...,

وسكر الباب وراه وطلع...!!!!!!

صعدت لغرفتي ما شوف طريقي من الدموع يعني وش يقصد بكلامه..؟!

ماهو ضروري تنتظريني يعني خلاص بينهي كل شي بينا..؟!

ياربي وين كلام البنات عن الحياه الزوجيه والعالم الوردي الي يعيشونه..؟!

انا من اول مشكله انهد ما بيني وبين زياد ..!

طيب المفروض انه يراعي نفسيتي اني اول مره ابعد عن امي..!؟

وضايق صدري يعني ما يصير الواحد يفض فض شوي..

وكلامي الي قلته حابسته من زمان بصدري يعني من بيفهمني غيره انا وهو نفس الجرح

ياربي وش اسوي تسكرت بوجهي وضاقت على الوسيعه..,

اللهم بحق قولك "وربك يخلق مايشاء ويختار ماكان لهم الخيره"

خرلي مايسعدني ويرضيك في أموري كلها الدنيويه والأخرويه

با اصلي الاستخاره واشوف وش ربي يهديني عليه ..!

علشان بعدين ما الوم نفسي على اي شي يصير..,

صليت الضحى وركعتين االاستخاره..,

و حاولت انام ولا ادري كيف غفت عيوني..

اذكر الساعه تسع ونص قمت على صوت الاذان ..

بيت زياد قريب منه المسجد اذا اذن صوت الاذان اسمعه داخل البيت..,

بصلي الظهر وانزل اكل اي شي بس اسد جوعي على ان مالي نفس بشي..,

صليت ونزلت وظهر اليوم مثل ظهر امس البيت جوه واحد..!

الشغاله من المطبخ لغرفة الكوي ماشيه بشغلها ..!

والممرضه ما اشوفها اكيد بغرفة خالتي..,

خالتي يا الله نسيت حتى وجودها..

ليتها بصحتها كان اجلس اسولف معاها اضيع ها الملل والضيقه الي انا احس فيها..

دخلت غرفتها لقيتها صاحيه سلمت على راسها وجلست مقابلتها..!

قلت للمرضه بنطلع نجلس في الصاله..,

قالت لا الحين دخلتها غرفتها من اليوم هي في الصاله..!

وقفت بطلع قلت خاله ادعي ان ربي يفرجها ...,

ما ادري فهمت علي اولا لكن سمعت الله كريم..

ياربي وش اسوي النهار طويل ..

وبعد ما استخرت حسيت بشوي راحه لكن ماعرفت اقرر امشي والا اقعد..,

صرت امشي في البيت واتفرج على التعديلات الي طلبتها من زياد كلها نفذها

وكل شي في مكانه ..,

كلمت امي من تيلفون الصاله كان صوتها فيه نوم

قلت يمه وش رايك امرك قالت لا وش يجيبتس عروس وتدوجين

قابلي رجلتس ازين..,

تقول الي تقوله ام العوق اهم شي انها طيبه..,

تذكرت ريم احس من زمان عنهابكلمها..,

كلمتهافرحت يوم سمعت صوتها ...

ريم بضحك\وينتس يا القاطعه اعو ذبالله كنتس ما صدقتي تعرسين..,

انتي ناذره ان اعرستي ما تكلمين احد..,

عوق\حرام عليتس ماهو قصد لكن توني القى تيلفون..,

ريم بتهكم\يا النصابة كل ما كلمت خالتي وضحى تقول عوق كلمتني وطيبه..,

عوق بضحك \اكلم امي من جوالي...!

ريم بممازحه\احلى طلعتي جوال اخيرآهذا من بركات الزواج طيب ليش ما كلمتيني على جوالي..؟!

عوق\وش عرفني بجوالتس انا تيلفون بيتس ويا الله بعد انتي خابره امي ما تحب تشوفني ماسكه تيلفون..!

ريم بتساءل \عوق ماكنتوا بتطلعون عمره وش اخركم..,

عوق بوجع \زياد عنده اشغال واجلها..,

ريم \ الله يسهلها لكم دريتي الجوهره انخطبت ..!

عوق بفرحه\بالله الف مبروك ..,

ريم\والي خطبها بعد تعرفينه..,

عوق با ستنكار\وش عرفني فيه انا اهلتس ويا الله اعرفهم من هو هذا الي اعرفه..!؟

ريم\نواف ..,!

عوق با استغراب\من نواف ...؟ّ!

ريم \اخو جزاع يا مال الصلاح اخيرآاقتنع يعرس الظاهر ان زياد مادح له العرس..,

الجوهره تقول ليت عوق معرسه من زمان..,

عوق بضحك \ والله جوجو بايعتها...

وام جزاع وش قالت..!؟

ريم\ما قالت شي هي بس تبيه يعرس ملت من كثر ما يترززن حريم جماعتنا عندها تبي ولدها يستقر..,

اردفت ريم\البلا ماهو في خالتي البلا عيال عماني يوم سمعوا زعلوا ...؟!

يقولون بنات مسلط كلهن راحن لخوالهن وطولوا لسانهم على امي ولا خلو ولا بقواعليها وانه كله من تحت راسها ..!

عوق با استنكار\ استغفر الله هذي قسمه ونصيب مالهم حق يعترضون اذا ما كانو خاطبين قبل خوالتس..؟

ريم بقهر \لا خاطبين ولا شي بس قطع رزق بعدين ما تجوز خطبه على خطبه يا فهيمه...

اردفت ريم \والله قهرو ابوي يوم تبلوا على امي وقال كنت ناوي ازوجكم من الصغار..

لكن عقب كلامكم هذا مالكم لا صغيره ولا كبيره عندي..!

عوق بدهشه\عاد عمي مسلط حليم وباله طويل مايزعله الشي الهين...!

ريم\حركة عيال عماني تدبل الكبد,

لكن عماني الله يعافيهم تعذروا عن كلام عيالهم..,

وقالو يا مسلط لا تفوت نواف على بنتك وعيالنا بيلقون نصيبهم..,

اهم شي ان عماني سمحو من خاطرهم والباقي ماعلينا منهم..!

عوق بشرود\ما توقعت ياريم عمي مسلط يسوي كذا علشان خالتي..!

ريم بضحك \وليه يا حبيبتي ما توقعتي هذي زوجته وام عياله وامي ما مثلها با الحريم..,

عوق \وخالتي نوره وش سوت..,

ريم \ما سوت شي ابوي الله يطول بعمره واقف معها ماهمها لو كل عماني ضدها يعني وش بيضرونها فيه..,

اذا زوجتس على قلبتس ما عليتس من باقي الناس تزعل ومصيرهاترضى..!!

البلا يا عوق اذارجلتس جفاتس والا وقف ضدتس والله تحسين ان كل البشر محاربينتس..,

عوق بضيقه\ صادقه ياريم ..,

ريم بضحك\البارحة زياد عند العيال تحت والله يا ضحكهم استغفر الله كنه صياح..!!

اسمعهم وانا فوق بشقتي حتى جزاع يقول ما شاء الله زياد باين في وجه الراحه..,

يقول لهم يويلكم من الله تاركيني عزوبي كل ها المده ذنبي برقبتكم ورى ما زوجتوني غصب ..!!

عوق با استنكار\امس زياد عندكم..!

ريم بدهشه\لاتقولين ما تدرين وين انتي عن رجلتس..,

عوق باارتباك\ هو جا متأخر بس ما سألته استحيت وهو ما خبرني..,

ريم بضحك\كل ليله البارح وهو عندنا جزاع يقول نشبنا لزياد ما خليناه يطلع ..,

وهو يقول فكوني من شركم شوفوا زوجتي ترسل وتدق تدورني وانتم ماسكيني...,

المهم عوق متى اشوفتس دوري اي طريقه نتلاقى فيها تعالي في بيتي..,

والا في بيتس والا عند خالتي مشتاقه لتس يا الدبه..؟

ودي اشوفتس وانتي مدام ورجلتس هو الي يجيبتس لنا..

قهرني جزاع يقول زياد صاك صكه على حرمته عزمته شكله يتهرب ما يبي يجيبها..,

عوق بضيقه\مو مشكله خليني افضى وارتب وضعي وما يصير الا كل خير..!

ريم\خلاص قبل تقفلين عطيني رقم جوالتس..؟

عوق بحزن \والله ما عرفه اكلمك وقت ثاني واعطيك ..!؟

قفلت من ريم كلمتها ابي استانس زاد همي هم..,

هو مستانس وفالها وانا دموعي على خدي..,

ما عليه اليوم لازم يقرر يا نستمر يا كل واحد يمشي بطريق هذي ماهي حاله ..؟

اشغلت نفسي بشغل البيت غيرت ورتبت مع الشغاله صلحت قهوه وحلى ..,

يمكن خواته يمرون والا بناتهم..

طلعت لغرفتي صليت العصر وخلصت وردي واذكاري ..,

دخلت غرفة الاشباح شغلت التلفزيون وجلست افر با القنوات ..!

ياربي النهار طويل ماهو راضي ينتهي ..

غريبه نفسية الانسان يبي حتى الوقت على كيفه...

يوم زواجي كان النهار قصير والليل طويل ..

ومع مشكلتي مع زياد انقلب الوضع النهار طويل..,

نزلت تحت وجلست با الصاله با الحالي ..

يا ليتني اعرف ارقام تيلفونات نجلاء ولابشرى

كان كلمتهم يتقهوون معي هم والا بناتهم..,

واخيرآ دق جرس الباب مين يا ترى ..,

دخلو بنات ناجي وهم مستحيات ويناظرون وراهم...!

كانت معاهم امهم شايله صواني حلى وقهوه وكيس دخلتها وسلمت عليها هي وبناتها..!

عوق \وين تبينا نجلس هنا والا داخل..,

ام موضي\الي يريحك داخل احسن مابدنايجي زياد وينحرج ..,

عوق\ حياك بنتقهوى بمجلس النساء العربي..!

اخذت الصواني منها..,

ام موضي\بدخل على خالتي العنود اسلم وجايه وراك ..,

ناديت الشغاله تساعدني اخذت القهوه والحلى للمجلس...,

وجلست انتظر ام موضي اهم شي وجه جديد يغير جوي الكئيب ...,

رجعت من خالتي وجلسنا نتقهوى ونسولف ..!

بناتها مؤدبات ما شاء الله..,

عوق\ماعندك غيرهم..,

ام موضي\لا بس موضي سبع سنين وسمر خمس سنين وحامل بشهرين يارب يكون ولد..!

عوق\تبارك الله ..,

الله يعطيك الولد الصالح ما شاء الله مرتبه فترات حملك..,

ام موضي بضحك\ لا ترتيب ولا أشي ..,

ناجي عندو مشاكل صحيه وانا سليمه وفتره نتعالج علشان يتم الحمل

والحمدلله على كل حال الله يطعميك عوق موهيك اسمك..!

عوق تبتسم\ايوا..,

ام موضي\اسمك غريب..,

عوق تبتسم بخجل\كل من سمع اسمي اول مره يستغربه بعدين عادي يتعودون عليه..!

ام موضي تضحك\انا اسمي دينا ئبل ما تسئلي..,

عوق\لا انا بقولك ام موضي احلى..!

وموضي تضحك مستانسه على كلامي...,

عوق \انتي شفتي خالتي قبل تتعب.

دينا\انا متزوجه من شي عشر سنين وهيا اجتها الجلطه بعيد عنك ئريب

اردفت دينا بوجع\يالله ياعوق ما بتسدئي انو هي هذيك الانسانة القويه

حبابه كتير وما بتجامل حدا ولو تفوتي على بيتها وتاخديه كله ما بتئول ليش

الا ازا اشي يتعلق بزياد تنئلب شخص تاني مابتعرفيه

وزيادكمان ماشاء الله عليه حباب كتير ترك وظيفه كبيره با امريكامن شانه ..,

جلسنا اكثر من ساعتين انا ودينا وبعدها استأذنت وقبل تمشي..!

دينا منحرجه\ هديه مو من مئامك ..,

عوق بخجل\ ليش تكلفين على نفسك

دينا\لا كلافه ولا أشي احنا اخوات..,

يالله مع السلامه..,

طلعت ام موضي لبيتها ناديت الشغاله ترتب المكان وترفع الحلى..؟!

وانا طلعت اصلي المغرب صليت المغرب وفتحت هدية ام موضي لقيتها طقم عطورفاخر..!

رفعتها على التسريحه..,

طلعت لغرفة الاشباح شكلها حلو ما ناقصها شي ..,

اذن العشاء وصليت بغرفة الاشباح اول مره اصلي فيها..,

اتجاه القبله خمنته من شكل المسجد الي قدام بيت زياد..

اعتمدت على نفسي وحددت الاتجاه عسى صلاتي صحيحه...

نزلت وانا بالي مشغول كيف بواجه زياد وش الكلام الي بقوله له..!

جلستي مع دينا طلعت منها بدروس تصحي الغافلين..؟!

انا ليش احكم على نفسي اني مثل الارض البورالي ما تستصلح ولا فايده تنرجى منها..!!

دينا بنت بعز شبابها جميله وتنبض با الحياه..؟!

متزوجه ناجي فرق بينها وبينه بكل شي

ناجي انولد اطرافه السفليه رجل طبيعيه والثانيه قصيره ومشوهه ..,

وحتى النطق تعجزه بعض الكلمات يتأتأ الي ما يركز بكلامه ما يفهم وش يقول

كم مره سمعته يسولف مع زياد..!

من غير وظيفته البسيطه حتى بيته الي ساكن فيه الي بناه له خواته وزياد..!

دينا هي الي خبرتني بكل هالتفاصيل الا انها مبسوطه وهي تتكلم عن ناجي وحبه لها..

والله لو ما شفت ناجي كان قلت تتكلم عن شخص ثاني ..!

كل شي في حياتها كانت تفسره لي با اجمل صوره..,

الاعاقه الي انولد فيها ناجي امتحان من الله له...,

وحتى تأخرها با الحمل الي هو كان السبب فيه

فسرته انه ربي كافئهم على صبرهم وهبهم ها البنات وحملهاالي يتمنونه ولد..

حتى بيتها الي عايشه فيه تقول عيلة زوجي احسن عيله وقلوبهم على بعض

ساعدونا نبني جنبهم علشان ما نفترق..,

ماقالت احنا عاله على خلق الله والاحاولت تستنقص من رجولة ناجي..,

انسانه بانيه حياتها على التفائل وان بكرا بيكون احلى وافضل من اليوم..,

ماهو مثلي دافنه نفسي بصفحات الماضي وماني قادره انسى اني مجهولة نسب ..!

تشائمي نقلته لحياتي هنا ربي يعطيني من النعم وانا لاحمدآ ولا شكورا..!!

انا كنت راضية بناجي حتى بعد ماشفت اعاقته كنت ابي زوج يستر علي واستر عليه

حتى اعاقته ما كانت مهمه عندي وربي رزقني بزياد اكبر من كل احلامي..

مهما كانت جنسية اهله الحقيقين والا دينهم ماعاد لهم وجود..,

زياد نعمه ربي انعم فيها علي لو كنت بنت شرعيه لايمكن احصل على زوج بها المواصفات

خلاص بغير نفسي من ها الحين وراضية بأي عقوبه من زياد الا اننا ننفصل عن بعض..,

الي جابوني لدنيا لقوا جزاهم مثل ماقال زياد وانا بعيش حياتي..,

دخلت المطبخ وصلحت عصير تذكرته زمااااان ازعجتني فيه ريم اسمه عصير الحب..!

وعملت تورته بسيطه وسريعه بشكولاته وانا ما ادري هو زياد يحبها او لا..؟!

اهم شي اني اخطي خطوه اعدل بها حالي المايل الي ميلته بلساني ..!

قلت لشغاله تطلعهم با الثلاجه الي فوق مع اكواب وصحون وشوك في المطبح التحضيري ..!

دخلت عندخالتي ام زياد لقيت الممرضه تساعدها علشان تاكل ..!

اخذت من الممرضه صينية العشا وانا الي صرت اوكلها وتحاول تتكلم معي ..!

لكن لسانها ما يساعدها الا بكلمات بسيطه ..!

سألتني عن زياد قلت بيجي بعد شوي عنده شغل ضروري..,

وانا ما ادري هو بيجي الليله او لا ..,

تذكرت كلام زياد عنهاوخنقتني العبره

كيف حاولت وحاولت يوم رفضوا يعطونه لها...,

واصرت عليه تاخذه وتمشي وهي توها نافس وفاقده ظناها..,

كيف جتها الجرأه تطلع صدرها علشان زوجة المسؤل تشوف حليبها الي ما جف وتصيح تبي زياد يرضع..!

وش ها العزيمه والااصرار الي تمتلكهن ها الانسانه ماخلت اليأس يكسرها..,

مالوم زياد يومه يتنفس غلاتس ..,

زرعتي وحصدتي يا العنود..!

وزاد اصراري اصرار اني اتمسك بزياد..,

لو يصدني زياد بحاول واحاول لحد ما اصلح الي خربته ماراح ايئس..!

تعشت خالتي والممرضه عطتها ادويتها وانا طلعت من عندها..,

جلست شوي على التلفزيون ياربي للحين ماجات الساعه عشر..

طلعت فوق رتبت شكل غرفة الاشباح ورشيت فيها عطر

شبكت المدخنه الكهربائيه وبخرتها سكرت بابها..,

شيكت على الاغراض الي قلت لشغاله تطلعهم فوق..,

جهزت التورته الي صلحتها وخليتها با الثلاجه خفت تذوب..,

رتبت الشوك والصحون والسكين وخليتهم في مكانهم على طاولة المطبخ..!

سكرت انوار القسم الي فوق كلها الا نور بسيط خليته يعطي جو للمكان..,

دخلت غرفتي رتبتها ورشيت فيهاعطر وبخرتها بعود ريحة العود تحسسك بجو الافراح والمناسبات السعيده ...

والعود ميزته انه ما يكتم الصدر..,

وعلشان لا يلقى زياد حجه يقول كتمتينا بريحةالبخور..,

وشغلت فواحه اضائتها معطيه جو للغرفه..,

طلعت قميص نوم طويل ومفتوح مع الجنبين وصدره شيفون وعليه روب طويل..

يستر شوي على الاقل من ها الفتحات الي تروع والشيفون ..,

الله يذكر امي باالخير يوم كانت ترفض اني البس قصير ولا حتى بنطلونات في البيت ..,

تقول عيب اذا اعرستي البسي الي تبين عند رجلتس حتى يوم جهازي كنت احاول ادور استر شي واشتريه..!

على ان ريم ما قصرت لكن لبس ريم الي اشترته خليته بشنطه حتى ما فتحتها على طول فوق الدولاب..!

وجلست بغرفة النوم افكر بزياد ما ادري كيف بتكلم معاه...!

وكيف با اعتذر منه واطلب منه يسامحني..!

والا بقوله يحدد موقفه اتجاهي..

خير هو وهالسكوت الي يذبح..

لاانا لازم اضبط نفسي ولا احاول اثير اعصابه اذا كنت فعلن ابي اعيش معاه ..,

طيب اجلس انتظره هنا بغرفة النوم والا اروح للغرفه الثانيه..!

احس جو الغرفه هنا يرجعني ليلة الانفجار الي عساها ماترجع ..,

اخاف اذا رحت للغرفه الثانيه يفهمني غلط يظن اني اراقب من الشباك..!

اخذت شور معتبر..

فكيت شعري بخرته..,

وعطيته هوا سريع على شان يجف ورتبته بتسريحه بسيطه على طوله..,

لبست عدسات عسلي..,

مشكلتي على اني ماهره برسم المكياج الا اني اكرهه

ريم حطت براسي انه ماهو كل الرجال يجذبهم المكياج

حطيت تبييض خفيف ومسكرةوالروج اليوم خليته احمر صارخ ...!

كان ودي البس عدساتي الرماديه لكن ميعادوالجوهره يقولون اللون الرمادي

ما يصلح الا للي عيونهم صغاروانا ما ابي لزياداي ملاحظه على شكلي او انتقاد..,

غرقت نفسي عطر..,

ولبست طقم حلق وعقد واسواره ناعم

قررت اجلس بغرفة الاشباح اتفرج على التلفزيون واذا جازياد لحقته للغرفه...

اكيد هو على طول بيروح لغرفة النوم ..

طلعت للغرفه الثانيه وشغلت التلفزيون..,

وجلست اتفرج انا اخترت للغرفه كنب جلد اسود والخداديات فوشي

كنت ابي لون الخداديات اصفرلكن زياد رفض يقول الاصفر حار ويثير الاعصاب..,

الفوشي احلى ومريح لنظر..,

وبا النص سجاده فوشي با اسود عليها طاولة خدمه

فوق الطاوله رتبت شموع علشان اخلي التورته بينهم

وانا ما ادري ليش سويت كذا..!!!!؟

وش دراني ان زياد راح يطلع فوق يمكن مثل كل يوم يجلس تحت..!

بس انا عطيته خبر اني با انتظره فوق

اكيدهو طالع طالع هنا يمكن يدورني تحت وما يلقاني ويطلع فوق..,

احس كلام ريم يوم قالت ان زياد يقول زوجتي تدورني عطاني شوية امل..

طيب يمكن زياد الحين يطلع فوق ويطردني ولا يقبل اعتذاري ..,

لوكان بيشوفتس ياعوق كان شافتس ذاك اليوم يوم كشختي..,

ماهو قعد يهزئك على فتحت شباك بدون قصد ونسى سبب الزعل الاول..!!

سمعت صوت سيارة دخلت الحوش ..!

اكيد سيارته هو الوحيد بين بيوت اخوانه الي مخلي مساحه لسياره مثل مايقول..,

قمت بلم الشموع ياربي بطني مغصني عجزت اقوم طقتني ام الركب ..!

الحين اذا طلع فوق وش بيقول عني انا وجهي لابسه ها القميص يا فضحي فضحاه ..!

لا وبعد حاطه شموع مالت على العدو بالله وش احس به يوم سويت كذا ..!

الحمد لله اناباالحالنااذا جا وطردني والا فشلني مافي احد يسمعنا ولا يشوفنا غير الله سبحانه ..,

ياربي لك الحمد الشغاله نزلتها تحت لاتسمع ولا تشوف شي تخلي اخباري الخاصه على كل لسان..,

يارب هون ها الليله وعدها على امتك الفقيره عوق بنت الوضحى بيسر وسهوله..!

ما في صوت با العاده اذا طلع اسمع صوت مشيته على الدرج..!

شكله ماهو طالع فوق احسن بعد عن الاحراج..

بقوم اغير ها اللبس الي ما ادري كيف تجرأت ولبسته

وارجع الم ها الحوسه والحفله الي انا مسويتها وربي يفرجها من عنده..!!

وبكرا ندور خطه ثانيه لايأس مع الحياه ولاحياة مع اليأس ..,

وقفت بطلع من الغرفه الا زياد بوجهي ..,

زيادبهدوء\ مساء الخير..,

انربط لساني وانا بس افرك بيديني وهذا الي بهاوش واقول واحدد مواقف..,

زياد\اجلسي عوق ليش واقفه..,

رجعت لمكاني وجا وجلس جنبي ما اشوف الا جزمته البيضاء

شكلها غريب كنها رياضيه يمكن حقت شغله..,

زياد\اخبارك الحين عسى هدت اعصابك..,

عوق با ارتباك\الحمدلله ..,

زياد بجديه \شوفي عوق انا متعمداليومين الي فاتوا نتحاشى بعض حتى تهدا النفوس..,

وتفكرين زين وتراجعين كلامك الي قلتيه والحين انا الي بتكلم ولا ابيك تقاطعيني..!

يمكن اقول كلام مايعجبك كل الي بقوله القصدمنه المصارحه التامه بينا..,

علشان نتحاشي بعدين اي انفجارات تصير مثل المره الي فاتت او اي ردود افعال لاتحمد عقباها

ابغاك تسمعيني الي الآخر وبعدها قولي كل الي بخاطرك..,

سكت يعني وش بقول انا المذنبه وانا الغلطانه هو ما جا منه خطا..,

زياد\عوق انا تزوجتك وانا عارف كل ظروفك وضعك ماهو جديد علي..

راضي فيك بكل مزاياك وعيوبك ..!

اردف زياد بحب وامتنان\ يعلم الله ان كلك مزاياعندي ومهما سويت لايمكن اجازي الي كان سبب في زواجنا..,

انا سافرت برى المملكه وانا عمري ماكمل22سنه شفت كل شكل ولون من بنات حواء ..,

كثير بنات اعرضوا انفسهم علي بزواج وغيره وكنت ارفض سبحان الله عيوني فيها غشاوه عنهم..,

ما اشوفهن شي عمري ما غلطت ولا تهورت مثل الشباب..,

ورجعت هنا و تعينت ونفس الحكايه مر علي حريم اشكال والوان ..,

سواء مريضات او زميلات عمل وفي كثير من اصدقائي عرضوا اني اتزوج منهم لكن انا كنت ارفض..,

نواف كم مره يقول لي زياد جنب بيت عمتي حرمه عجوز مربيه بنت من دار الايتام

ليتها من نصيبك عمتي دايم تقول

والله ان جارتنا العجوز مربيه البنت تربيه يعجزون يربونها الي عندهم اعلى الشهادات..,

وعمتي تتمنى ان ربي يرزق البنت بزوج قبل لا يجي العجوز شي لأنها تعبانه وكبيره با العمر..,

قلت لا ما راح اخذ مجهولة نسب..,

واصلن فكرة الزواج ماهي في راسي..,

اذا فكرت اني اتزوج بتزوج من امريكا والا اي دوله اوربيه بنت عايله محترمه ..

انا لي صداقات واسعه هناك ومع عوايل كثير ماراح يصعب علي الاختيار

وهم هناك ما يهتمون انت ولد من والا من اي حموله مثلنا..,

وانا عندي اهم شي اولادي امهم يكونون اهلها معروفين للمجتمع..,

مجتمعاتنا قاسيه على مجهول النسب

والاجنبيه زواجي منها بيعتبرهامجتمعنا خطوه موفقه حتى لو انهم ما يعرفون اصلهامن فصلها

يعني شكليات ..!

وبعدين اطفالي يحصلون على جنسية امهم ..,

وهذا كان قراري والكل عارفه خواتي وبناتهم وامي قبل تتعب

كلهم عارفين اني بتزوج اجنبيه..,

في رجعتي الاخيره جزاع ونواف دايم يعزموني وانا انشغل عنهم ..,

وقبل كم شهر اصروا علي مره وحلفوا اني اتعشى عندهم ..,

وافقت وحضرت العشا بعد العشا دق جوال جزاع ..!

وكانت عمته يمكن تبيه يوصلها لبيتها المهم انها سألته ضيفك مشى..!

قال لا هذا هو موجود عطاني الجوال وقال عمتي بتبارك لك..,

اول مره اسمع صوت عمة جزاع ..,

باركت لي وقالت زياد طلبتك قل تم وانا عمتك ..,

قلت تم كنت اظن بتطلب مني شي المهم انه اي شي الا الي طلبته..,

قالت لا تفوتك بنت وضحى والله ان راحت منك انك دافنن حظك..!

الخطاب يصبحون امها ويمسونها لكن والله ما يستاهلها غيرك..,

واني ما صفطتها لك الا وانا عارفه انك تستاهلها وتستاهلك

البنت مكملها ربي زود على الزين عقل وثقل وانت ماشاءالله ما يحتاج امدحك

خوي عيالنا من سنين وسمعتك الطيبه سابقتك..

تفاجئت من كلا مها ولا عرفت ارد الا بكلمة يصير خير..,

قالت اوعدني يا ولدي انك تفكر..,

قلت ابشري..,

عطيت جزاع جواله وانا مصدوم من كلامها وش بردعليها كيف اطلع من ها المآزق..,

انا رافض الزواج لكن استحيت اعطيها جواب مباشر..,

قال جزاع وش فيك انقلب وجهك ..,

رديت عليه ما في شي بس عمتك احرجتني..,

ضحك جزاع اكيد كلمتك عن بنت العجوز

وافق تكفى والله ما تندم يازياد..,

ورد نواف علي يمكن انها من نصيبك انا من زمان خبرتك عنها..

يا شيخ الي متى بس وانت عزوبي شف جزاع كبرك يلاعب عياله ..

قلت نواف انت عارف وجهت نظري...!!

قال اقول بس وش وجهت نظرك تبي اجنبيه ما تدري عن دينها..!!؟

والا يمكن فيهم امراض وراثيه تخاف تجي في عيالك ..,

وبعدين العجوز هذي من زمان وهم جيران عمتي ..,

وعمي مسلط وكيلها الحرمه عندها خير وفيها دين ومن عايله كبيره ومعروفه ..,

حتى البنيه الي مربيتها اسمع عمتي تقول انها حافظه القرآن وبنت حياويه..,

جزاع ونواف كانوا جدآمتحمسين لزواجي منك بشكل ما تتصورينه..

واقتنعت لكن لو جا احد وقال لاتتزوجها اخذت رايه ورفضت الزواج..,

اخذت فترةانشغلت ونسيت الموضوع ..,

دق علي جزاع ورديت وعطاني اكلم مسلط ..,

قال زياد يا ولدي ترى ام البنت موافقه وحياك الله متى ما جيت..!

سألو عنك ولا عندهم مانع قلت طيب عطني فرصه يا ابو ابراهيم كم يوم

اشوف وضعي وامرك نرتب كل شي سكرت الخط..؟!!

وانا ما ادري وش اسوي ابو ابراهيم خلاني امام الامر الواقع..!

لخبطني وحيرني ..!

طلعت من دوامي للبيت وخبرت امي اني بخطب وحده سعودية ويمكن يصير نصيب واحتمال كبير لا..,

والبنت الي بخطبها مثل وضعي..,

امي رفعت ايديها ودعت لي بالتوفيق ..,

خواتي نجلا وبشرى رفضوا يوم قلت لهم قالوا زياد احنا مبرمجين تفكيرنا انك بتتزوج اجنبيه..,

ماكان قدامي الا اني اقولهم وجهة نظر نواف على انه تفكيري انا..؟!!

ومساوئ الزواج من الاجنبيه والدين بيكون عائق بينا..!

اوا مراض وراثيه اويمكن ما نتفق ويكون بينا اطفال يضيعون..,

وقالوا الحين الي بتاخذها هذي ضامن ان ما فيها امراض وراثيه..!

قلت لا والله لكن على الاقل دينها معروف انها مسلمه ومدحوها لي يقولون ملتزمه..,

خواتي رضوا مجبورات وبناتهم اساسآرافضينك

وسحبوا ايديهم مني لا يشوفونك ولا يسألون عنك..,

سألت عنك ناس وكلهم مدحوك انتي وامك..,

والحقيقه والله اني دورت وراك الزله عجزتيني ما لقيت عليك شي ..

وصلحت الاجراءات الازمه..,

اخذت ناجي ونواف وطلعت لأبوابراهيم وقابلنا امك ..,

قلت بشوفك شوفه شرعيه ورفضت امك قالت بنتي ماهي حبحب على السكين..!

حاولت اقنعها ان هذا الشرع رفضت تقول ما فيه تبي تشوفها ملك اذا ماهو بكرا ها الحين ..!

ابو ابراهيم طلع بيجيب شيخ لكن الشيخ قال الملكه تكون با المحكمه لأنك مجهولة نسب ..!

والصباح طلعنا المحكمه وملكنا وشفتك ما انكر ان شكلك اعجبني من وراء العبايه..!

وزاد اعجابي فيك يوم رجعنا بعد الشبكه خواتي يمدحون فيك مره ..!

وانا با اصدقك القول ان مدح خواتي لك ريح نفسيتي اكثر تقبلوك بسرعةوبشكل كبير..

علشان لاتتضايقون من بعض انتي وهم واصير انا بين نارين ..,

صار الزواج وحسيت اني مسؤل عنك خلاص مالك غيري..!

خصوص ان امك تحاول بأي طريقه انك تتأقلمين با العيشه معاي وتحاول تبعدك عنها..,

وانتو الثنتين تعانون على بالك انا ما ادري او ما احس بمشاعركم..,

واخرتها يا عوق قلبتي علي بدون سبب وقعدتي تهذين بكلام ماله داعي ولا حتى مبرر

ولا تبيني ازعل والا اخذ بخاطري منك طيب انا وش قصرت معاكي فيه..,

ما ضغطت عليك بأي شي ومقدر خجلك وكل طلباتك عندي اوامر..!

حتى المهر والله ماهو قصدي اتمنن عليك فيه هذا حقك وزود..,

الحمدلله الخير واجد لكن دبلته لك وحتى لو امك طلبت اضعاف الي طلبته دبلته بنفس طيبه..

انتي عارفه ليش ..؟!

لأني حرمتك اني اصلح لك حفل زواج ..,

اكيد انك مثل كل البنات توقعتي زواجنابيكون بقاعه فخمه وحفل كبيروتنزفين قدام العالم..,

قلت يمكن المهر يعوضها وتاخذ كل الي نفسها فيه...

تدرين ليش تحاشيت اني اسوي حفل زفاف كبير لك..!!؟

والله علشانك انتي اذا علي انا معارفي كثيرين واقارب امي وابوي الله يرحمه اكثر والكل يتمنى اعزمه..!

لكن انتي وامك مالكم احد...,

حتى سألت امك في لكم اقارب او معارف لو بنعزمهم يجون للعرس ..,

قالت لا ابدآ عيال زوجها وحتى تتكلم عنهم وهي متضايقه

ولا حبيت اضغط عليها من جهتهم يمكن بينهم مشاكل تنحرج تقولها لي

ولها اقارب من بعيد لكن مالها علاقه فيهم..,

حسيت اني بحرجك والمعازيم كلهم من طرفي وانتي لا ..!

اردف زيادبتأثر \عوق تصالحي مع نفسك وارضي بوضعك تجلدين نفسك وتعذبينها بذنب مالك دخل فيه..!

من اسلوبك وثورتك علي ذاك اليوم باين قدايش تعانين وضاغطه على نفسك ولا انتي راضيه بوضعك..,

انتي ماشفتي كيف انفعالاك وبكاك وكأنك تشوفين اهلك قدامك

تبين تبينين لهم كيف معاناة اللقطاء او تحسسينهم با الذنب ..!

ماينفع كل الي تسوينه لأن اهلنا الحقيقين يعتبرونا اشباح مرعبه..,

وارواح شريرةومستحيل يقبلونااو يرضون فينا

ولوتحقق المستحيل و رضوا فينا لمجتمع بينبذهم وبيعتبرهم اعضاء فاسدين

ونظرت المجتمع نفسها لنا ماراح تتغير ..,

والله خليتيني ذاك اليوم اتحسف اني خبرتك كيف لقوني..

كلامي لك ذاك اليوم حبيتك تعرفين معاناة امي

ولايجي في بالك انها مجرد انسانه كفلتني تدور الخير

فضل امي العنود علي مثل فضل اي ام على عيالها الي من بطنها

انا خلصت كلامي اذا عندك شي بتقولينه لا تترددين ...,

خلينا اليوم نحط النقط الحروف ولا نرجع مره ثانيه للموضوع هذا..,

انا وانتي ننسى انا لقطاء ونعيش حياتنا مثل كل الناس

عوق با انكسار\جزاك الله خير ما قصرت يا زياد..!

واذا قصدك المهر ترى ما صرفت منه شي امي تكفلت بكل شي..!

زياد يتنهدويرفع راسه فوق بقهر \ياربي الصبر من عندك عليها..

اردف بقهر\بالله انتي كيف تفهمين بأي طريقه تبين اشرح لك وجهة نظري علشان اقدر او صلك المعلومه بدون سوءفهم..!!

عوق بحزن \زياد انا ما اعرف اصفصف كلام مثلك ..,

لكن اذا انت تحس اني ما استاهلك ترى حنا الي الآن على البر نتفارق احسن ...,

اردفت بغصه\انا والله ماعندي خبر من ان خالتي ام ابراهيم خطبتك لي...

ظنيتك جاي من نفسك بدون وسيط قاصد ومتعني على شاني...!

ماهو الناس تترجاك علشان تتزوجني ...,

زياد بغضب\انتي مجنونةنتفارق والا افرط فيك

انا ماصدقت عيوني اول مره شفتك فيها ظنيت نفسي بحلم..

عوق بوجع\ زياد ليش تقلب الحقايق انا انفرضت عليك فرض وانت انجبرت توافق..,

انا ماني مضطره اضيع عمري مع رجال مجبور علي خلاص خل كل واحد يروح بحال سبيله من اليوم...

زياد بسخريه \تدرين اني انخدعت فيك وان مخ سمر بنت ناجي اكبر من مخك..!

انا كلامي لك ماهو قصد اني اذلك او ابين لك انك مفروضه علي..!

كنت ابيك تكونين با الصوره وتعرفين الحقيقه يا هبله بيجي يوم وتسمعين من الناس..,

ان مسلط وزوجته كانواواسطه بزواجي منك ..

كل عايلتهم عارفين الموضوع وكلهم يبوني اتزوجك..

اناوصلت لك الحقيقه علشان ما تنصدمين من اي كلام تسمعينه ويكون عندك خلفيه عنه ..!!

تعر فين الناس تضخم الاموروالكلام من اصحاب الشأن غير الي ينقلونه...!!

انا وانتي وضعنا غير انتي فاهمه وش معنى غير..!!

يعني لازم نكون واضحين لبعض ومع بعض من البدايه..,

اتمنى انك فهمتي شرحي..!

عوق بوجع\ما قصرت على الشرح رايتك بيضا ..,

اردفت با ارتباك\واساسآ انا كنت انتظرك من اليوم

علشان اقولك اني قررت انا وانت ما نصلح لبعض وكل واحد يروح لحال سبيله..!

زياد بهدوء\وهذا اخر كلام عندك ماراح تراجعين نفسك او تعطين نفسك فرصه تفكرين..!
.
.
.
(كلمه اخيره)

لا تحــزَنْ !
إنْ مَررتْ بِـ أمور صعبَة في حَيَاتك !
أفقَدتْكَ تَوَازنْك !
وَربمَا عانيَت منْهَا الكثير . .
فَـ القَلَمُ الرصَاص . .
يَتعَرض لبرْي مُؤلمْ بيَنَ فَتْرَة وَ أخْرَى .. لكَيْ يُصبحَ قلماً أفضَل !

لــ عائض القرني
.
.
.
الي الملتقى قريبآبأذن الله

وسالفه جديده


طيف الأحباب

ام الوليد


تذكروني واحبابي بدعوه طيبه

بنات البارت طوووويل وهو عباره عن بارتين