بسم الله الرحمن الرحيم
هلا وغلا بكل الغوالي الي يعطرون متصفحي المتواضع سواء با لردود او التقييم او الشكر..,
البارت اهداء للكل العابرين من هنا من دون استثناء..,
اليوم بداية تعرفنا على سالفة زيادالي راح يحكيها لعوق المزايين ..,
يا الله تعالوا معاي...!!
وسالفه جديدة؛
البارت السابع عشر
.
.
.
دخل زياد وسلم ..!
ونزل شماغه وعلقه با الدولاب ...!
زياد فعلن منظم حيل ولا هو فوضوي مثل ما اسمع ان الرجال فوضويين..!
سيارته مرتبه وريحتها حلوه ..!
حتى جناحنا رغم ان ما فيه الا الاشياء الاساسيه الا انه كل شي منظم ومرتب وفي مكانه ..
زيادبا استغراب\ وش فيك احس وجهك تعبان..!
عوق بتوجع وارتباك\لا بس شوي تعبانه..!
زياد\ طبيعي لا ترهقين نفسك اشربي شي دافي يسكن الالم...!
عوق \ماشاء الله عليك زياد احس ماعندك الفوضويه الي اسمعها عن الرجال..,
زياديضحك\علمتني الدراسه با الخارج اني اعتمد على نفسي كثيروانا اصلن طبعي كذا ما احب الفوضى
بعكس لما اكون متضايق تشوفيني ابو الفوضويه اقلب الدنيا فوق تحت..؟
عوق تبتسم\الله لايجيب ضيقه..,
زياد يضحك\ يا الله خلينا ننزل علشان تتفرجين على الدور الارضي..!
وبعدين خوذي راحتك بيتي مايدخله رجال من يوم جيتي الا بعد ما يعطوني خبر..
اردف زياد وهو يتنحنح بمزح\عارفين ان البيت فيه محارمنا مع انك اعجبتيني يوم نزلتي بجلالك..!
عوق منحرجه \ خفت احد يفاجئني توقعت في رجال..!
زياد\ نجلاء وبشرى عندهم عيال شباب لكن يعجبونك مؤدبين ...,
نجلا لها ولدين وبشرى ثلاث عيال...,
قبل شوي واحنا راجعين يقولون خالي سلم على خالتنا الجديده..
عوق \ الله يسلمهم...,
زياد بممازحه\بس...!
عوق بخجل\ومن جاب السلام...,
زياد\ يا الله خلينا ننزل تتفرجين على مملكتك...,
ونزلني اتفرج على البيت يختلف عن بيتنا..!
يمكن علشان بيتنا الي ساكنين فيه حريم..!
وهذا مافيه الا زياد وامه..!
الاثاث بسيط وفخم بنفس الوقت حتى اللوحات والتحف احسها جديه بزياده مافيها نعومه...,
المطبخ ويفتح على مخزن وغرفه فاضيه صغيره ومقلط ومجلس لرجال...!
الصاله الي اول مادخلت عليها مجلس نسائي اثاثه مودرن...,
وغرفه جلسه عربيه لنساء...,
وفتح الباب الداخلي للفله وكان موقف لسيارة زياد ومقابله مساحه صغيره مزروعه..,
عوق بتعجب \ تناقض بيتكم بايكه لسياره وعلى طول مقابلها المساحه الخضراء على ان حوشكم ماهو كبير ..!
زياد بدهشه\ ليش تناقض با العكس حلو المساحه ابيها بعدين عيالنا يلعبون فيها..
والا انت وش رايك ترى انا ابي عزوه ماهو واحد والا اثنين لاااابي درزن عيال وبنات...,
احرجني مارديت عليه..
عوق با ارتباك\ خلنا ندخل احسن ..,
دخلنا داخل الفله وزيادماسك يدي..,
عوق بتوتر\اتركني خايف اضيع..,
زياد بهمس \ لا خايف تهربين ابي احس انك حقيقه ما انتي حلم..
ماقدرت اقول شي الا صرت اتلفت اخاف احد يسمعه وفكيت يدي من يده ..,
زياد بضحك\ وش فيك مذعوره تعالي بس ما شفتي غرفة امي...!
واردف زياد\ ترى غرفة الغسيل وغرفة الشغاله فوق السطح..,
ودخلنا غرفة امه ياالله غرفه في البيت كأنها قطعه من المستشفى الغرفه كبيره
وفيها اجهزه اكيد كلها تستعملهاام زياد...!
ماعرفت منها الا جهاز الربو...,
سرير مستشفى ومقابله سريرين عاديات..!
وكرسي ام زياد المتحرك ...,
وفي تلفزيون مثبت با الجدار ودولاب ملابس..,
رغم التعقيم الي با الغرفه والنظافه الا ان المكان حزين وريحة مرض يصورها كثر المعقمات الي با الغرفه..,
ام زياد كانت منسدحه على السرير وجلس جنبها زيادومسك يدها..,
زياد بحنان\ يمه ازعجتني عوق تقول ابي خالتي اسولف معاها..!
يا الله نطلع با الصاله نتقهوى مع بعض..؟
ناظرتني وهي مبتسمه...,
العنود بتعب\ لا ابي انام..,
زياد بتودد\ على راحتك لا حقين ان شاء الله ارتاحي الحين..,
وطلعنا من الغرفه ..,
سبحان الله الانسان من غير العافيه مافي شي بحياته له طعم
ام زياد كل شي متوفرلها الا العافيه الله يرفع عنها..,
زياد با استنكار\ وين رحتي ..!
ما اشوفك الا سرحانه المفروض ان اسمك ام سرحان ما انتي عوق...؟!
عوق بوجع\ لا بس امك تقطع القلب حالتها ...؟!
زياد\ لا الحمدلله الحين تحسنت مره خصوص بعد مارجعت واستقريت هنا...,
عوق بتساءل\ الحين البيت هذا لك والا لخالتي...!؟
زياد بتهكم\ليش فيه فرق بينا..!؟
عوق منحرجه \ لا والله لا تفهمني غلط بس مجرد سؤال لأن كلكم قريبين من بعض بيتكم وبيوت خواتك..!
زياد بضحك\ لا امزح معك عارف ماهو قصدك ...,
يعني ياعوق عمري فوق 34سنه ولا تبين عندي بيت ملك..!
هذا بيتي من عرق جبيني بعد...!
عوق بدهشه\ ما شاء الله..
اردفت عوق \واربع ثلاثين مو كبير في اكبرمنك بكثير ولا يمتلكون بيوت عادي بالعكس انتي مسوي انجاز ..!
زياد بضحك\الله يرفع من معنوياتك انا اصلن مافكرت اني ابني بيت وخصوص بفترة دراستي با امريكا ..,
لكن زوج نجلاءهو الي كان السبب مثل ماكان سبب لأشياءكثيره حلوه بحياتي..,
هو من النوع الي يحب ينصح ولايخدعك بنصيحته واذا نصح نصيحته من قلب تجي ..,
عوق \الله يجزاه خيرصاروا عمله نادره الي من ها النوعيه محظوظه نجلاء فيه..,
اردفت عوق بفضول\زياد انت من زمان سافرت لأمريكا..,
زياد\من اكثر من 13سنه..,
عوق بذهول\والله فتره طويلةكلها قضيتها هناك..,
زياديبتسم \تقريبآ..,
عوق بدهشه \كيف تقريبآ..؟
زياد\ بلخص لك الحكايه خلصت الثانوي بتقدير عالي وقدمت بعثه لأمريكا وانقبلت بسرعه لكن امي رفضت..!
تقول انت صغير وادرس هنا وتسافراذا خلصت بكالريوس..؟
سافرت عمري صغير للبعثه بعد ماخلصت هنا طب..!
عوق با استغراب ودهشه\ متخرج من كلية الطب و صغير كيف تجي..؟!
زياديبتسم \اي صغير دخلت اولى ابتدائي مستمع ..؟
اردف زياد بوجع\زوج نجلاء كان مدرس وتوه خاطبها ويتميلح عند امي وخالتي وسجلني مستمع
وعمري ما كمل خمس سنوات...!
الحلوباالموضوع اني كنت اشطر من الطلاب الي اكبر مني ويدرسون سنةاولى معاي..؟
وبعدين حتى جسمي يعطي اكبر من عمري في صور لي بوريها لك بعدين..!
فا استخسروا اني اكون مستمع وانا عندي قدره على الاستيعاب وفهم الدروس..,
فعملوا لجنة وحولوني من مستمع الي منتظم..!
لما خلصت المرحله الابتدائيه وطلعت للمتوسط كان في نظام قديم يحق لطالب يقدم يدرس ثلاث سنوات بسنه وحده
ويكون مثل نظام الانتساب يعني احضر وقت الامتحانات بس ..
وفعلن ساري عمل جهدبالموضوع وقدرت اخلص 3سنوات بسنه وحده يعني اختصرت اربع سنوات دراسيه من عمري..,
والثانويه لا درستها عادي ثلاث سنوات ..,
زياد يتنهد بضيقه\زوج نجلاء الله يرحمه كان يحب العلم ويشجع كثير عليه..
عوق با استغراب\نجلا ارمله..!
زياد بمراره\ من اكثر من سنتين توفى بحادث فضيع ..!
طلع الصباح من بيته للمدرسه ...,
وهو واقف عند محطةبنزين والسياره شغاله نزل يبي ياخذ مويه من البقاله..!
مر واحد طايش من طلابه شافه قدام البقاله وقعد يستعرض قدامه وصدمه من دون قصد وعلى طول توفى وعلبة المويه بيده..,
وسيارته بمكانهاماجها ولا خدشة الي طفاها عامل المحطه..,
وعلى طول تم التبليغ واخذو ساري الله يرحمه لكن وصل للمستشفى متوفي..!
وترك نجلاء وراه عندها خمس بنات ولدين ..!
لكن نجلاء ما شاء الله قد المسؤليه الله يقويها..!
عوق بدهشه \تصدق اني من يوم شفتها حسيت انها مدرسه موجهه حتى بشرى ..!
زيادبضحك\ نجلاء مديرة مدرسه و بشرى ممرضه قديمه احساسك غلط..,
عوق تبتسم \ المهم ان اشكالهم موظفات طيب كيف التميتوا جنب بعض..!
زياديبتسم\ اصبري جايك با الكلام رجعت من البعثه توظفت هنا سنه قبل ارجع مره ثانيه...!
وفي صديق لساري الله يرحمه كان يشتغل با لعقار..,
اقترح على ساري يشتري ارض كبيره معروضه عنده با المكتب ..
وموقعها ممتاز وخبرتني نجلاء ليش مااشاركهم لأن المبلغ كان جامد وتصلح لأاخوان
والموقع ممتاز حرام تروح عليناوليش مانخذ الارض ونقسمها بينا ...,
اشترينا الارض وقسمناها بينا انا وساري وبشرى وناجي..!
عوق با استغراب \ مين ناجي..,
زياد\هذا اخو نجلا وبشرى ما شفتيه الي سلم عليك امس يوم دخلنا..؟!
عوق بتساءل\الي كأن رجوله تعبانه...!
زياد\ايواهو من يوم انولد كذا الله يشفيه اصغر مني بشهرين..,
قسمنا الارض بينا انا وساري ونجلاء مساحة اراضينا اكبر
لأن دفعنا مبلغ اكثر وبعدين بيت بشرى واصغر البيوت بيت ناجي ..!
وبنينا البيوت من برى تتشابه لكن من داخل غير...,
بيتي غير بيوتهم انا استغليت المساحه كلها وهم لا بنوا اشكال ثانيه بعدين يجمعنا سور واحد
كل بيت مستقل بسوره وابوابه مافي الا بيتي وبيت نجلا بينا باب مفتوح ..,
رجعت لأمريكا ادرس وارسلت المخطط لساري الله يرحمه وكنت احول له الفلوس وهو الي كان قايم با العمار وخلص بيتي مع بيوتهم...!
وانا كنت ادرس ما قدر ارجع تروح علي البعثه...,
نزلت اجازات بس علشان امي ويوم وفاة ساري...,
عوق\امك ماكانت معاك..؟
زياد\الا تروح وترجع ..,
عوق \زوج بشرى وينه..؟!
زيادبضحك\بنيان هذا عاد حاله خاصه..!
تقاعد واشترى مزرعه با الخرج ونسى العالم مع مزرعته...!
ما يجي هنا الا يبي شي من بشرى والا يرسلون عليه طلبيه اذا جااحد يخطب من بناته..
يعني بس واجهه اجتماعيه..,
عوق بدهشه\ياربي تعين خواتك..!
زياد\ لا ماعليك خواتي قدها..,
عوق\كم لك متخرج..؟!
زياد\ليش ...؟!
عوق\مجرد سؤال..؟
زياد\من اخذت شهادة البكالريوس تقريبآ14 سنه ..,
سافرت لامريكابعدسنه من التخرج ودرست وكملت على ان مرتني اوقات عصيبه لكن ربي يسرها با الصبر..,
خصوص وفاة ساري تعبت نفسيتي كان لي اكثر من اب واخ ..,
وش رايك نطلع نتغدى برا..؟
عوق \ لا بمر اشوف امي..,
زياد\ طيب كلميها تطمني عليها ونمرها وقت ثاني..,
عوق بضيقه \ كلمتها اليوم صوتها ما اعجبني..,
وبعدين بيتنا قريب...
زياد بتهكم\امس تقولين الطريق بين بيتنا وبيتكم طويل...!
عوق بترجي\تكفى زياد..,
زيادبضحك\فيها تكفى يا شيخه لو امك با المريخ الحين نمشي لها..!
يا الله البسي والله ما اكسر بخاطرك
طلعت لبست بسرعه خفت يتراجع ونزلت مالقيت زياد..
عوق بنفسها\لايكون بس تحسف انه بيوديني لأمي
طلعت جوالي ابي اكلمه اشوف وينه..؟!
واسمع صوت جواله كان بغرفة امه دخلت عليهم لقيته يعطي امه ابره..!
ويتكلم مع الممرضه شكله يوصيها عليها..,
زياد يبتسم\ هلا ثواني بس اغير وانزل علشان نطلع ..,
طلعت انتظره با الصاله ونزل...,
كان لابس بنطلون جنز اسودوعليه تيشرت رمادي شكله غير عن الثوب...,
زياد غصب يلفت نظرالي يشوفه..!
طوله وسامته بياضه حتى نحفه لابق عليه شعره اسود سواده ماهو طبيعي ياترى وش قصتك ..,
كيف وصلت الي ها العايله الي انت مندمج معاها بشكل لايصدق معقوله يكون زياد لقيط ..!!
زياد\عوق اكلمك وين رحتي...!
عوق بشرود\ لا معك ..,
زياد بتهكم\طيب وش قلت يلي معي ..,
عوق بخجل\لا بس بالي مشغول على امي ما نتبهت..
زياد\بطلبك طلب عوق ..!
عوق با استغراب\سم..!
زيادبتودد\سم الله عدوك لكن ابي كل ما طلعنا مشوار تدخلين على امي..,
وتستأذنين منها وتطلبين منها تروح معانا..,
امي يا عوق ماراح تقولك لا تطلعين ولا راح تطلع معانا لكن ها الكلام يفرحها..!
عوق\ هذا الواجب..,
زياد با امتنان\الله يجزاك خير ..,
عوق\كنت بسوي كذا بس استحيت وخفت انك تنتقدني...!
زياد با استنكار\انتقدك !
عوق بتردد\لابس قلت يمكن تقول عني لعابه او مــ
زياد\لا والله با العكس يا عوق خوذي راحتك ولا تفكرين ان عندي ظنون سيئه..!
دخلت على خالتي وسويت الي قاله زياد..!
وهي ابتسمت وفهمت من كلامه المتقطع انها تقول مع السلامه..!
يا الله يا زياد من اي انواع البشر انت تهتم بمشاعر امك الي يمكن اكثر كلامنا ما تفهمه
وكأنها انسانه سليمه غلبتني يا زياد غلبتني..!
طلعنالبيت أمي ودخلت با المفتاح الي معاي
زياد قال بروح لنواف وراجع ..!
لقيتها منسدحه بغرفتها وفعلن تعبانه ..,
حتى تفاجئت يوم شافتني سلمت عليها..
ام عوق بحده\وش جابتس ماكنتي تبين تسافرين..,
عوق\الا بس اجلناها..
ام عوق با استغراب\ليه اجلتوها مافي احد محتر جوفه على العمره مثلتس..!
عوق بخجل\ لا بس اخرتنا الدوره..!
ام عوق تبتسم \ غريبه ماهو وقتها خيره ان شاء الله عساها اخر دوره ما تشوفينها الا بعد تسع شهور..!
عوق بضحك\والله يمه دعوتس من قلب..!
ام عوق تتنهدبوجع\ انتي عشتي وحيده طول عمرتس الله يرزقتس بظنا يونست..,
عوق \الله يجيب الي فيه خير...,
يمه وش فيتس احس انتس تعبانه..!
ام عوق\سلامة عمرتس مافيني شي غير الكبر رجليني شوي مقدر ابعد با المشي واجد..!
دريتي سعد كلمني الصبح ..؟!
عوق با استنكار\خير وش عنده دبشة آل ناصر..,
ام عوق \يسأل يقول انتي مزوجه عوق ...!
ويهوش علي انتي تدرين وش الي زوجتيه بنتس..
قلت بنتي الي زوجها ربها ثم الدوله وان لف ودار زوجها خصيمه الشرع...,
ويحلف ياعمه ما قصدي بس مانبي تجيتس من وراها مشاكل..,
قلت بس انت اطلع منها انت واخوانك ولا صاير الا كل خير...,
وعان رجلها تكتوركان ودك تعرف عليه والا تعزمه خذ عنوانه من ابو ابراهيم...!
قال الله يوفقها ولها حق هذي بنتنا وتربت عندنا...!
قلت ما تقصر يا سعد وعوق مثل اختكم...,
وان كانكم تبون الي في يديتها روحوا الله لايسامحكم بكل الي اخذتوه مني خفى وبيان...!
عوق بتهكم\كن عاد همه دعيتي عليه والا لا ..؟
ام عوق بضحك \لا والله انه تروع ويترجاني يا عمه لاتدعين تكفين...
قلت اجل اتركوها بحالها وانا اسامحكم على الي حطيتوه بمخابيكم من وراي بدون وجه حق..,
مسامحي لكم مربوط بخاطر عوق وعلشان عوق كل شي يهون...,
وشوفوني قاطعت بنات اختي علشانكم والا جو وانشبولكم على كل ريال زرطتوه من عندي..!
قال لا بالله حلليناوسامحينا وعوق مثل بنتنا..,
قلت جزاكم الله خير ويا الله سلم على اهلك ..,
عوق بقهر\الله يكفيناشره كل شوي ناقز لنا بمصيبة هو واخوه..
ام عوق\ماعليتس كويته لتس وانا امتس ماعاد يتعرضتس هو واخوانه الا با الزين ..,
خايفين ان بنات الشقحاء الله يرحمها يلتفتون عليهم ويطالبونهم بلي اخذوه مني..,
ولا تنسين سعد ما دق الا هو حافر ورى رجلتس ولا لقى شي..,
والي ارتاع منه سعد ان زياد وظيفته طيبه ورجال قادر ماهو طمعان بلي عندتس..!
عوق بسخريه\ما درى ان كل عرق الشقحاودهم ان حطو بينا وبينهم سبع بحور..
اردفت عوق بوجع\ الله يعين على ها الدنيا بس ضيعنا وقتنا نسولف عن سعدوهباله..,
انتي علميني وشلون نومتس من غيري ..,
ام عوق\نمت ازين نومه بنيتي تطمنت عليها والحمدلله...,
وش عاد ابي من الدنيا ...!
عوق بحيره\احس اني غريبه بينهم على انهم طيبين...,
ام عوق بحده\كل البنات مثلتس ما وقفت عليتس الي تحسينه جربوه بنات حواء قبلتس...,
هذا انتي كنتي خايفه من حريمه والحين تمدحينهن الله يتمم ها المديح وعاد انتي ماهو كل شوي تنشبين لرجال ..
ابي امي الرواح لأمي بعد هو له حق عليتس..,
عوق بزعل\لا عاد الا هذي تدرين اني ما اصبر عنتس...,
يحمد ربه بعد اني اطلبه يجيبني لتس با اليوم مره...!
كنت ناويه يوم عندتس ويوم عندهم..,
ام عوق بغضب\يا فضحي انتي ورعن تدورين المرضاعه عندي اعقلي بس ولا تضايقين رجلتس....!
ترى ان طاوعتس اليوم بكرا يجي راي ثاني..,
ما تسمعين ليالي العرس ملس الحين كل شي تطلبينه بيقول لبيه..!
عوق تضم وضحى \ماعلي منه عاجبه,عاجبه ماهو عاجبه بكيفه..!
هذا هو امه عنده وانا بعد ابي امي حبيبتي حياتي كل يوم اشوفها..,
ام عوق بتذمر\اقول بس ابعدي عني كسرتي رقبتي واتركي عنتس الكلام الي ماله زبده..
عوق تضحك\ماتبيني اضمتس يازين ريحتس يمه..,
ام عوق تضحك\ يا مكاره اقول بس غرفتس ما خليت الشغاله تمرها الا يوم طلعت اغراضتس ..,
انتي عاد شوفي الي فيها الي يصلح والي ما يصلح...,
اجمعي الي ماتبينه وتصدقي فيه حرام يا بنتي والله يا قشن بغرفتس يكفي عشر بنات..!
عوق بملل\ طيب خليها مره ثانيه انا الحين تعبانه بفضي نفسي يوم واتصرف فيها..!
سمعت صوت زياد ينادي يا ولد..!
ام عوق بفرحه\ تعال جعل فالك الولد الصالح..!
ودخل عندنا بغرفة امي وسلم وجلس على كرسي مقابلنا..!
وانا جنب امي على سريرها
ام عوق\االله لايضيق علينا خلونا نطلع من الغرفه..,
زياد\ لاياخاله با العكس مرتاحين هنا..,
ام عوق بتحذير \يا ولدي لاتطاوع عوق كل ما قالت امش بي عند امي ..,
زياد\ لا والله كم عوق عندي متى ما طلبتك جبتها..
ردت \ اترك عنك الهياط التلفون يكفي وانت رجال مشغول وهي فاضيه مالها شغل
لا تضيق على نفسك وخل جياتها عندي على فضواتك لا تخلي الحريم يلعبن عليك..
عوق بضيق وقهر \الحين انتي امي والا امه..؟
ام عوق بحزم\اناامكم كلكم وانتي صرتي راعية بيت قابلي بيتس ازين من طق المشاوير سردادي مردادي..
تضايقت من كلام امي وليه طيب تحاول تبعدني عنها...,
زياد وقف \ يالله تامرين شي خاله بنمشي..!
ام عوق\حافظكم الله ...
قمت معاه سلمت على راس امي وطلعت..
زياد \ وش فيك كتمتي..!
عوق بشرود\لا مافي شي..!
زياديناظرجدران الصاله\ بيتكم شكله ماهوقديم..!
عوق\ايوا سكنا فيه وانا بالثانويه قبله كان بيتنا شعبي ..!
الي الحين فيه المشب والملحق حق السواق وزوجته ..!
زياد\ وين غرفتك ...!؟
ومشيت لغرفتي فتحتها ومثل ما قالت امي كل شي بمحله..,
حسيت انه طاح وجهي من زيادالغرفه حوسه وشنط واكياس
عوق منحرجه\معليش زياد غرفتي حوسه ومكركبه ..
زياديبتسم\عادي اكيد بتكون حوسه خلاص انتقلتي منها لمكان ثاني..,
عوق\ امي تبيني اتصدق با اغراضي الزايده..,
زياد\ ونعم الراي ..,
اردف بدهشه\ تدرين عوق غرفتك متناقضه..؟
عوق با استغراب\كيف يعني..!
زياديبتسم\غرفه نظام جناح وكبيره ولونها وردي غرف اطفال..,
الصبغ نوعه قديم مره انتو مختارين الالوان..,
عوق\لا امي سلمت الارض لمقاول وهو الي تصرف..,
زياد با استنكار\ لاعب عليكم المقاول..,
من يوم دخلت عرفت انه شغل اي كلام غريبه والله امك ما شاء الله ما يفوتها شي..!
عوق بضيق\احنا وش عرفنا مقاول واستلم الارض وعقدبينه وبين امي ونفذه..!
زياديضحك\سبحان الله كل شي بغرفتك طفولي وذوق بنوتات ..
عوق بوجع\ احب ها الغرفة هذي ماتتخيل وش كثر..!
زياد\عادي عوق كل انسان يحس با الانتماء لشي الي يطول عايش فيه...,
اردف زيادبا ابتسامه\لا تستغربين بعدين حتى با احلامك تحلمين فيها...!
واحداث تكون حول غرفتك او بيتكم هذا عمومآ...,
يا الله خلاص نمشي والا بعد تبين تجلسين...,
رديت\لا خلاص بروح اسلم على امي...,
زياد بترجي\لا عوق امشي نرجع بعدين ما عليك متى ما بغيتي جبتك..,
لبست وطلعت مع زياد وانا كل مره اشوف امي تبعد عني اكثر..,
قضينا يوم الجمعه كله برا البيت تغدينا وتعشينا ورجعنا للبيت متأخرين
دخلت انا وزياد على خالتي الي كانت نايمه سلمت على راسها وخليت زياد عندها...,
صعدت لغرفتناياربي شكلها يسد النفس ومكركبه..,
طلعت لي لبس ودخلت الحمام واخذت حمام دافي لبست وطلعت لقيت زياد..
زيادبضحك\وش فيك انقلب وجهك يوم شفتيني ..!
عوق با ارتباك\ مافي شي لكن وضع البيت كذا ماهو معجبني...!
زياد\اسمعي باادخل اخذ دش بارد بعد ها الفلفه الي من الظهر وبعدين اسمع الي تبينه..!
زياد دخل الحمام وانا مشطت شعري بسرعةولفيته ماادري ليه عندي عقده ان زياد يشوفه مفتوح..!
طلع زياد ولاف جسمه بفوطه وهذي اول مره اشوف جسمه..
غمضت عيوني مدري هو حيا والا اشفقت عليه من بياضه لا اصكه عين..!
ذكرت الله بقلبي عليه وهو دخل كمل لبسه با الغرفه الثانيه وطلع..!
زياد بتساءل\ هاه وش عندك وش الي مشغل بال الحلوه..,
عوق بترددوارتباك\ البيت ما ادري وشلون احسه مهجور مافيه حياه ابي اغيرفيه ويمكن ما يعجبك..!
زياد با استنكاروتهكم \ ومن وين بتجيه الحياه وامي تشوفين وضعها وانا رجال شغلي جدآمتعب
البيت بدون حرمه ما ينفع ابدآ...
اردف زياد با ابتسامه\وبعدين لك كل الصلاحيات سوي الي تبينه الا غرفة امي خط احمر تعديلاتك ما توصلها
عوق بتردد\لا ماهو قصد بس خفت انه ما يعجبك اني اغير شي..,
زياد\خلاص من بكرا ابدي شغلك وسوي الي تبينه بدون تردد...
ومثل ما قلت لك كل شي تحت امرك الا غرفة امي..,
عوق بعتب\عاد هذا كلام يا زياد امك امي واصلن غرفتها من شكلها مخصصه لها الله يشفيها بقولك شي...!!
زياديبتسم ويغمض عيونه\قولي يسمعتس قلبي قبل اذاني..!
عوق بخجل\لا من جد اتكلم..!
زياد بحب\وانا بعد من جد اتكلم..,
عوق\الحين ليش بنات خالتك يفتشون عليك يعني ما يتغطون عنك وبعدين بشرتك غيرهم ..!
زياد بضحك\والله كنت متوقع ها السؤال بس ماهو بهالسرعه هذي ...؟
وانسدح على السرير
زيادبمزح\تعالي السرير ياخذ فريق كروي مع مشجيعنه..,
عوق بضحك\لا مرتاحه هنا ..,
زياد \راحمك من الجلسه على الكرسي تعالي...,
انا من شفت لون غرفتك وانا شاك انك طفله...!
انسدحت على السرير وزيادقام طفى الانوار..,
عوق با ارتباك \وش تسوي..
زيادبتهكم\ وش اسوي بريح دماغي وبعدين جنبك ابجوره ولعيها اذا تبين..
انا ما تعودت انام بالنور ليش ربي جعل الليل سبات وراحه والنور قلق لنايم..!
اردف زياد\انتي ما تبين تعرفين حكايتي..؟!
عوق\الا بس الحين بنام حاسه اني تعبانه..؟!
زيادبا استسلام\ بكيفك نامي...!
رجع لسرير وعطاني ظهره وعطيته ظهري وكلن سبح في عالمه..
زياد انتظم تنفسه شكله نام..,
وانا قلبي مع امي حتى لو تبي تبعدني عنها..!
امي فيها شي وشي كبير صوتها با التلفون غير لما اقابلها ..,
.
.
.
(كلمه اخيره)
اكتموا أحزانكم عن البشر حتى لا تكونوا باءً سببيّة في إسقاط دمعاتِـهم وإفشاء أسراركم
وكونوا كـ يـعقوب حين قال
( إنَّمَا أَشْكُو بَثِّي وَحُزْنِي إِلَى اللَّهِ ) ..
فالبشر لن يشعروا بحجم آلامكم وإن تحسسوا بالقليل
فلا يعلم من في القلوب إلا الله
ولا يزيل ما فيها من همومٍ إلا ذكره..,
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
تذكروني واحبابي بدعوه طيبه
28-01-12, 12:33 AM
جديد مواضيع قسم القصص المكتمله من وحي قلم الاعضاء
العرض العادي
