بسم الله الرحمن الرحيم
هلا وغلا بكل الغوالي الي يعطرون متصفحي سواء با لردود او التقييم او الشكر..,
والغايبين اقول والله مكانكم خالي ..,
اليوم بنشوف عوق المزايين والعائله الجديده الي صارت عضو منها..,
البارت اهداء للكل العابرين من هنا من دون استثناء..,
.
.
.
يا الله تعالوا معاي...!!
وسالفه جديدة؛
البارت السادس عشر
.
.
.
زياد بضحك\ وش فيك قلب وجهك..؟!
والحمدلله دق باب الغرفه ..,
وانقذتني دخلت عبير بنت نجلاء..!؟
عبير تهز راسها بتهكم \ خالي سلامات تاركينا تحت ..؟!
كل هذا تفرج المدام على عش الزوجيه...!
زياد بضحك\بسم الله وش عندك طبيتي مثل هادم اللذات ..؟!
عبير بضحك\ اسفه خالي اذا كدرت عليكم جوكم الرومانسي..,
وخصوص بها الاجواء الشاعريه مع ريحة الصبغ الي تكتم...!
لكن اهل مدامتك وصلوا بسرعه لا تتأخرون فضحتونا..
تحت في عذارى يتحسرون على شبابهم...!
زياد\اقول بسرعه انزلي الله يعينه عليك ..,
ونزلت عبير
عوق منحرجه\مره جريئه بنت اختك متزوجه..؟
زياد يضحك \لا بس متملكه عرسها قريب..َ!
عوق با ارتباك\ خلنا ننزل احراج هي صادقه الناس تنتظرنا..؟!
زياد بهمس \الناس تنتظرنا والا اشتقتي للماما...!
عوق با ارتباك\كلهن..,
نزلنا تحت وانا ظر الصاله مافيهااحدالا بنت اتوقع من بنات بشرى
ناداها زياد
زياد\ حنين خوذي عوق للمجلس الي فيه الحريم ..,
زيادطلع مع باب من ها الابواب الي ما ادري كيف ها العايله حافظين بيتهم من كثر الابواب...!
مشيت مع البنت ودخلت غرفه كبيره وكان فيه وجيه جديده..!
هذولا شكلهم بنات نجلا وبشرى المتزوجات لأن فيهم اشكالهم حوامل..!
والكل وقف يوم شافني الا امي فديتها جالسه وعصاتهابيدها..!
وخالتي ام ابراهيم جنبهاسلمت عليهم وعلى خالتي ام ابراهيم وحتى ريم جايه..!
خالتي ام ابراهيم حضنتني حسستني اني ماني وحيده وان لي ناس واقارب..!
وريم شوي والا تصيح ما صدقت جلست بين امي وريم..!
ريم بممازحه\ عوق احسك تغيرتي كأن لي سنين ما شفتك..!
عوق با استهزاء\الحمدلله والشكر وش تغيرت انا هو انا..؟!
ريم \لابجدعوق شكلك متغير يمكن علشان اول مره نجتمع بمكان غير بيتنا وبيتكم..؟!
اردفت ريم بممازحه\ نزلي عباتك شكلك يفطس ضحك با العبايه ما كأن العشا لك ..؟!
عوق با استنكار\ لا وين استحي من غير الذهب الي امي غصبتني عليه...!
خلي العباه ساتره عليه لايشوفه احدتبينهم ينقدوني يقولون من وين جايه..؟!
ما شفت الا خالتي ام ابراهيم قامت واجبرتني انزل عباتي..!
ولا بغيت احرجها قدام المعازيم...!
اشرت لها على جلابيتي ابيها تفرح اني لبست شي منها..؟!
ما شفتها الا ترفع كمها توريني الاسواره الي شريناها انا وامي لها...,
ياربي تسعدها ضحكتني بحركتهاوذكرتني بهديتنا لأم زياد..!
الحين وش اسوي الهديه معي با الشنطه كيف بعطيها ..؟!
عوق بهمس \ريم وش اسوي هدية ام زياد معي وشلون اعطيها..؟!
ريم با استنكار\ وش هديته..؟!
عوق\ اسواره..,
ريم بتهكم\لايكون ذهب بعد..!
عوق\اجل وشو..
ريم تضحك\ والله حالتكم صعبه يا آل وضحى..
بنتكم لابسه محل ذهب كامل ولا بعد هديتكم لأم المعرس ذهب..؟!
عوق بتذمر\الحين فكري لي بحل وبعدين علقي على كيفك من اليوم عندهم ولا تذكرتها الا الحين..؟!
ريم \ملحوقه لا تشيلين هم اذا طلعوا الناس اكيد زياد بيجي يدورعليتس ..,
سلمي على راسها قدامه ولبسيها هديتها وخلاص ما يبي لها خطط تكتكيه سهله..؟!
ومنها تكبرين بعينه ولا ينساها لك ابد..!
عوق\صادقه ريم وهذا الي بسويه...,
بعد فتره قامو نجلاءوبشرى وقلطونا على العشا...؟
دخلنا بمكان شكله مقلط لأن له اكثر من باب وفيه طاوله طعام كبيره ..,
ام زياد جالسه بكرسيها شكلها يكسر الخاطر جلست جنبها نجلاء توكلها وتضحك وتسولف معاها ويناظروني ويضحكون...,
بعد العشا جلسنا بغرفه ثانيه كانت جلسه عربي غير الغرفه الاولى الي جلسنا فيها قبل..؟!
وطبعن انا لازقه بحلق ريم ما اقدر اسولف الا معها..؟!
ريم\عوق الله يعينك على ترتيب شغلك ..؟!
عوق بتذمر\اي والله خصوص الجناح فوق يبي له شغل فاضي
زياد يقول انتي رتبيه بمزاجك..؟
ريم\ ايه هو كلم خالتي وضحى وقال نبي اغراض عوق..!
عوق با استنكار\متى..؟!
ريم\ما ادري بس خالتي جابت معانا شنط وش كثر..!
سيارة خالتي وضحى وجمس اهلي ولا كفوا بعد باقي لك تقول للحين غرفتس مليانه..!
سكت وش برد يعني خلاص بديت انفصل عن امي شوي شوي ..,
ريم با استغراب \عوق وش فيك قلب وجهك وانعقدت حواجبك ..,
لا يكون زعلتي بس علشان جايبين اغراضك معانا ...!
يا وخيتي هذي سنة الحياه واحمدي ربك ان ربي خلى زياد بطريقك...!
والله ياهو معجب ابوي واخواني ..,
حتى ابوي يقوم ويقعد يحمد ربي يقول الحمدلله ان ربي رحم ها اليتيمه به الرجال الكفو...!
ترى كلنا طارت قلوبنا من اقارب خالتي وضحى خفنا عليتس..؟!
خصوص سعد ينتظر بس يصير لخالتي شي..!؟
اردفت ريم بقهر\تدرين انه كم مره ينشب لأبوي على الوكالة الين ابوي هدده انه بيشتكي عليه وانثبر ..؟!
عوق بأالم \ الله يطول بعمر امي ويكفيني شرهم..؟!
ريم\آمين اما ياعوق البارحه فاتك مقلب صار لي..!
عوق بشرود\خير وشو..,
ريم\ البارحه بعد ما وصلت امي والمصوره..
يوم نطلع من عندتس ما ادري وش هفني بعد ما رجعت..!
جزاع جلس تحت عند اهله وانا طلعت لشقتي واقعد ارتب واحوس فيها..؟!
والقى كرتون شموع با المخزن ناسيته من زمن جدي وأشبهن كلهن واطفي الاانوار...!
وارتب عمري عيالي دايخين ونايمين..؟!
دق باب الشقه رحت اركض اهابد قلت اكيد جزاع ناسي المفتاح ..؟!
وافتح الباب من تتوقعين...؟!!
عوق تضحك\يا فضحي لايكون من اخوان رجلتس ..؟!
ريم بقهر\ لاوالله خالتي جايه نص الليل تبيني اكلم امتس علشان تعتذر انها ما حضرت عرستس ..؟!
اول ما دخلت قامت تصارخ وش هذا من قاطع الكهرب عليكم يوم شقتكم ظلام ..؟!
وش بلا ها الشموع تبين تحرقيناحسبي الله عليتس قلت لا يا خاله فيني صداع من العرس..؟!
وطفيت الانوار والشموع علشان اذا جا جزاع يشوف طريقه...؟!
قالت اجل لا تعودينها لو انتس نايمه ومحترقه عليتس الشقه ..؟!
وتروح تولع الانوار وابلش بلشه اكبر من الشموع..؟!
وهي تثور بوجهي انتي وش بلا مطلعتن زنودتس كنها زنود مصارعي..؟!
روحي البسي غطي ايدينتس ولا يقولون دارسه دين ..؟!
ورجع جزاع ودخل نام وشبع نوم..؟!
وهي للحين سهرانه مقابلتني الله يعافيها..!
تقص علي قصص وش كانت جدتي طخايم الله يرحمها تسوي فيها...,
وكيف انها صبرت على جدتي لين توفت وهي راضيه عنها..!
تخيلي عوق من 12ونص الليل حتى اذن الفجر وحنا على جلسه وحده انا وهي ..,
عوق تضحك \ الحمدلله ان حقي منتس اخذته ام جزاع بعدين من وين لتس زنود انتي جلد وعظم
ريم تتنهدبقلة حيله \ هي كذا لو تشوفني زايده كيلو قالت والله من الراحه اكل ومرعى وقلة صنعه..
لكن شكلك داعيه علينا من قلب...!
عوق با استهزاء\ لا حرام عليتس انتي ورجلك ما سويتو شي يستاهل اني ادعي..؟!
بعدين اتركينا من المزح تكفين ريم لا تشيلين على ام جزاع ...!؟
ريم بتهكم \ومن قالك با العكس احبها واصلن ادمنت هوشها لي لو ما تهاوشني انمرض ..!
اردفت ريم بحسره\هي ما مثلها لكل الناس طيبه وحبيبه الا انا سبحان الله..
لكن مقدره وضعها ترى جزاع هو الوحيد الي متزوج من اخوانه...؟!
وانتي عارفه زوجة الولد الكبير حقل تجارب ماراح يبقى شي على حاله...!
بدوا اهل زياد يستأذنون و يطلعون ولا بقى احد حتى ريم ناداها زوجها وطلعت..؟!
مابقى الا امي وخالتي ام ابراهيم ونجلاء..؟!
ام عوق بهمس\وش سويتي بهدية خالتس...؟
عوق با ارتباك\ للحين معي..!؟
ام عوق با استنكار\للحين يا فضحي قومي لبسيها بسرعه اشوف...!
واطلع الهديه من شنطتي اروح لأم زياد ادنق عليها واسلم على راسها
وافتح العلبه والبسها الاسوارةوتقعد تضحك وتدعي لي بصوتها المتقطع
حسيت حتى نجلاء استانست وارجع جنب امي..
ام عوق بتذمر\ وشفيتس لزقتي لي...؟!
عوق بعتب \ لا بس ليش تجيبين شناطي..؟!
ام عوق با استهزاء\اجل وش اسوي فيها وليه شاريتيها يوم بتتركينها...؟ّ!
عوق بوجع\ لا ماهو قصد بس خلاص بنبعد عن بعض يمه..!
ام عوق با انتقاد لاذع \الحمدلله والشكر رجعت اتهنوص اقول اعقلي تراتس صرتي مره..,
وشوفي رجلتس وبيتس لاتخلين الناس تنقدني علي آخر عمري...!
واصير علك بحلوق الحريم ومضرب مثل لهن يقلن لاتصرن تربية وضحى لبنتها..؟!
ووقفت امي قالت كرمكم الله نبي نمشي....,
ودي امسك عباتها مثل يوم كنت صغيره وامشي وراها..؟!
وهي كل شوي تلتفت وراها تخاف اني ابعدت عنها..!
لكن الحين خلاص حتى هي يزعلها شعوري اني ما ابي افارقها..؟!
طلعت امي ونجلا جنبها يسولفون وانا وخالتي ام ابراهيم وراها...!
توصيني خالتي على بيتي وعلى زياد وامه وسألتها
عوق بتردد\خالتي امي وش سوت امس يوم جيت اطلع ما شفتها وكلمتها في الليل صوتها متغير..؟
ام ابراهيم بتأثر\تحسبين فراقتس هين عليها..!
البارحةمن قبل تمشين دخلت غرفتها
وقفلتها ما فتحت بابها الا يوم قلنا رجل عوق يبي يكلمتس ..,
عوق تتنهدبوجع وحيره \والله ان قلبي حاس بوجعهابس وش اسوي..,
ام ابراهيم تهمس بتعجب\وش تسوين لا تغثين وضحى ياعوق
امتس حرمه كبيره وكل يوم عن يوم تنقص عافيتها الله يعينهاغير الكبر مرضها..
استريها عند اهل رجلتس ولا تخلين وانا خالتس احد ينقدتس بشي وضحى ما تبي لتس الا الستر وانتس تتوفقين بحياتس ..
طلعت امي وخالتي نوره مع الباب الداخلي لبيت زياد...!
نجلاء شكلها رجعت لخالتها ام زياد..,
وانا واقفه با النص اناظر امي تمشي وتسند على عصاها..؟
وخالتي نوره تبي تسندها لكن امي ابعدت يد ام ابراهيم عنها..,
دريت ان امي متضايقه ومضايقها فراقي..!
وانا ماني قادره الحق امي ولا قادره ادخل داخل...,
ياربي سترك وش تقصدخالتي نوره بمرضها لايكون امي فيها شي غير السكروالضغط ..!
نزلت دموعي ما ادري هي دموع فراق والا يتم والا خوف من المستقبل والا على امي ...!
سبحان الله من عرفت اني لقيطه وانا شاغلني من بياخذني ...!
متى اتزوج من بيرضى بلقيطه كل امانيي اني اكون زوجه وام كانت عندي مستحيله..!
وانها ماراح تتحقق الا باالخيال هذا انا تزوجت وفي بيت زوجي لكن قلبي مع امي..؟
وشلون عقلي المريض قبل يفكر ذيك الا افكار..!
وكله كوم ويوم بغيت استعجل رزقي واخذ صالح كوم ...!
صحاني من عالمي صوت زيادالي كان جالس على كنبه وراي ..,
زياد با استغراب\ عوق ما تعبتي من الوقفه قدام الباب..!
ترى لي ساعه جالس وانتي واقفه بشوف وش تناظرين..!؟
العالم كلها مشت ماعاد فيه هنا الا انا وانتي..!
حتى امي دخلت نامت ترى بكرا بنطلع مكه...؟!
مسك زياد يدي وطلعنا لجناحنا..!
لقيت كل شنطي وحتى المفارش الي شريناهم امي ارسلتهم..!
يعني وش بقالي هناك يا الوضيح غير روحي الي متعلقتن فيتس..؟!
زياد يسولف وانا احس اني ما اسمع وش يقول
وهذا طبعي اذا خفت والا استحيت اذاني احسها تنسد ما اسمع الي حولي..!
زياد يبتسم\ عوق غيري ونامي ترى ورانا سفر..!
على ان شكلك كذا خرافي ترى اعجبتي اهلي كلهم بدون استثناء حتى بنات اختي تفاجئوا يوم شافوك..!
عوق با استغراب\ليش ..,
زياد بااعجاب\يقولون نعرفها عوق عبد الملك من اجمل بنات الجامعه..,
عوق منحرجه \لا عاد يبالغون ...,
زياديبتسم \تدرين انك حليتي لهم مشكله يعانون منها من زمان..!
عوق بتعجب\اوف لهدرجه انا مهمه...!
زياد بحب\ اكثر مماتتخيلين..!
عوق با ارتباك\وش هي المشكله الي حليتها...!
زياد \ الكل كان يتمنى اتزوج وكل يوم مقترحين اقتراح..!
لكن الحمدلله جيتي با الوقت المناسب قبل ما يتطور الموضوع ويصير ازمه دوليه..؟!
المشكله انه يسولف معي وانا ارجع ورى وهو يتقدم لحد ماردني الجدار..!
زياد بضحك\ وش فيك احس انه ودك يصير لك اجنحه وتطيرين..
عوق بتوتر\لا عادي بس..!
زياد با استغراب\وش بسه في شي ..؟!
ياربي كيف اخبره ان ماعلي صلاه ولازم العمره تتأجل..؟!
غريبه تخربط علي وقت العذر الشرعي يمكن علشان نفسيتي..!
عوق بخجل\ لي اغراض بشنطتي الي كانت معانا با الفندق محتاجتها..؟!
زياد \ موجوده با السياره تبينها ضروري..!
عوق \ ايوا...!
ونزل علشان يجيب الشنطه..
وانا بسرعه فتحت الشنطه الي كنت مرتبه فيها لبس البيت ...
واطلع قميص بيت ساتر وركض للحمام ..!
ذهبي بعد ما نزلته فوق المغسله ناظرته ما كذبت ريم يوم تقول صايغ متحرك ..!
مسحت وجهي عن المكياج بمناديل زيتيه لقيتها بصيدلية الحمام وغيرت لبسي ولميت ذهبي..
وطلعت من الحمام لقيت زياد قدامي جالس على كنبه بزاوية الغرفه..!
زياد با ابتسامه\ وين جوالك..!
عوق\ موجود داخل الشنطه الي معانا انت جبتها..!
زياد\ ايه شوفيها وراك...!
وفتحت الشنطه وعطيت الجهاز زياد..
وذهبي رتبته داخل شنطه صغيره ..,
زياد\ تعالي با اعلمك كيف تستخدمينه ..
قربت منه ويفتح الجهاز ويركب شريحه..!
ويعلمني كيف استخدمه..!
زياد\ فهمتي...!
عوق\ ايه اصلن سهل ما يبي له شي...!
كثير شفت مع البنات مثله..
طلع جهازه ودق على جهازي علشان يخزن الرقم..!
زياد يضحك\ وش تبين اكتب اسمي بجوالك
عوق بتوتر\ بكيفك اكتب اسمك ..!
كتب اسمه وعطاني الجهاز ..,
جاتني فكره كيف بخبره انه ماراح نقدر نعتمر..!
لكن ما ابي اشوف ردت فعله..؟!
عوق\ابي مويه وين المطبخ..!
زياد بدهشه\ تحت..!
المطبخ التحضيري المفروض فيه مويه لكن نسيت ..!
بنزل اجيب لك..!
وما صدقت طلع وبسرعه افتح على الرسايل وارسل له..
(قدر الله انه يكون معي العذر الشرعي يمنعني من العمره)
وارسل الرساله واسمع نغمه ناظرت الا جهازه على التسريحه ..
وانقهر يوم ترك جواله وراه ليش يعني لازم الاحراج..!
رجع معاه علب مويه ونزلهم على التسريحه..!
عوق بخجل\ جوالك سمعت له صوت يمكن مكالمه او رساله..!
اخذ الجوال وناظر فيه
زياد بدهشه\ لا هذي رساله عسى خير...!
فتحها وانا ما صرت اعرف امشي والا اجلس والا اطير
ضحك , ضحك حتى شرق ..!
فتحت له علبة مويه بسرعه وعطيته يشرب..
عوق بخوف\ بسم الله وش جاك..!
زياد بتهكم\ عادي بس تذكرت سالفه ضحكتني...!
عوق با ارتباك\لايكون تضايقت ان السفر بيتأجل...!
زياد يبتسم\ لا عادي وش الي بيضايقني كل تأخيره وفيها خيرها..!
وفرصه تتعودين على بيتنا ونشوف الي ناقص ونكمله..!
نستغل الوقت والا انتي وش رايك ..!
عوق بهدوء \ صحيح كلامك ..!
زياد طلع للغرفه الثانيه جاب مفرش غير مفارشي وفتحه..
زياد\ تعالي ساعديني نفرش السرير بننام ترى ما ارتحنا..!
وفرشنا السرير مع بعض زياد حنون وطيب وحسيت ان كل شي ياخذه بساطه..!
الصباح صحيت متأخره ماشفت زياد با الغرفه..!!
غيرت لبسي ونزلت وانا لابسه اجلال تحسب لأي مفاجئه..
سمعت اصوات كانت نجلاء و زياد
وامه جالسين يتقهوون سلمت عليهم..!
ودنقت على راس خالتي ام زياد وسلمت عليها..َ
زياد بممازحه\ وش عندك يا كسلانه ما صحيتي ما عندي حريم يصحون الظهر..!
نجلاءتناظر ساعتها \ حرام عليك تو الساعه عشر ونص ..,
وبعدين اليوم اجازه العالم لو ما صلاة الجمعه كان سحبوها نومه الي الظهر...!
التفتت علي نجلاء \عوق ما عليك من زياد ترى ماعنده الا الهياط ..!
اثار امريكا للحين ماراحت يبي كل شي بنظام واحمدي ربك بعد كانت دراسته باامريكاماهواليابان..!
عوق بهدوء\ لا عادي اصلن انا متعوده اصحى بدري من غير شي اول مره اتأخر با النوم كذا..!
نجلاءبضحك\ الحمدلله اجل وافق شن طبقه...
ولا تربطين نفسك بخالتي عادي عندي..!
ما ادري وش تقصد نجلاء..؟
عوق \ خالتي مثل امي..!
وناظرت خالتي ام زياد كا العاده مبتسمه..,
زياد يناظرني ويبتسم ماا ادري وش فيه..!
نجلاءبا امتنان\ ما تقصرين عوق لكن صعبه ان خالتي تطلع معاكم لمكه وبعدين في رمضان الي فات اعتمرنا كلنا
خالتي با اجلس عندها حتى ترجعون خوذو راحتكم وخصوص زياداجازته قصيره استغلوها ...,
فهمت من كلام نجلا ان زياد قال لهم اني طلبته امه تطلع معانا عمره..
نجلاء وقفت \يا الله بقوم اشوف ها الشباب الله يصلحهم ما يقومون لصلاه الا هم منشفين حلقي..!
وجلست عند خالتي وزياد طلع مع نجلاء وصلها الباب ورجع علينا..!
زياد يبتسم\افطري لا تتعبين...
عندنا شغاله ما شاء الله عليها شاطره وفي ممرضه علشان وضع امي..
يا الله قومي افطري وانا بجهز لصلاه...,
زياد التفت لأمه \ يمه وشرايك بزوجتي..!
واسمعها تقول حلوه ما شاء الله واحسها فرحانه فيني..!
واسمع زياد يغني لأمه اغنيه غريبه..!؟
وهبها الوهاب لولد أم عبد الوهاب ويصفق لهابيدينه..!!!
وهي فرحانه مره وتضحك له ..
نادى زياد الشغاله الي جات بسرعه ..!
وقال فطور لمدام عوق ..!
زياد\ افطري وانا بطلع البس والحق الصلاة برجع ماراح أتأخر..!
صعد زياد فوق..,
والشغاله قالت مدام وين تبين فطور قلت با المطبخ مو مشكله..!
جات الممرضه حقت خالتي واخذتها اتوقع لغرفتها..!
لحقت الشغاله للمطبخ ولقيت الفطور جاهز..!
افطرت بسرعةوانا ظر المطبخ كبير
اكبر من مطبخنا بواجد واثاثه كامل..
طلعت لغرفتي ابي اشوف من وين با ابدى با الحوسه..!
والشنط الي بكل مكان ..!
الدوره متعبتني ظهري بينقص وماغص..!
حاولت اسحب الشنط لكن كلها ثقيله على الاقل ابدى شوي شوي..!
لكن ماقدرت وجلست اتذكر امي هذي اول جمعه ابعد عن امي..!
نصحى بدري انا وامي حياتي..!
ونحس يوم الجمعه فعلن يوم عيد ..,
دخل زياد وسلم ..!
ونزل شماغه وعلقه با الدولاب ...!
زياد فعلن منظم حيل ولا هو فوضوي مثل ما اسمع ان الرجال فوضويين..!
سيارته مرتبه وريحتها حلوه ..!
حتى جناحنا رغم ان ما فيه الا الاشياء الاساسيه الا انه كل شي منظم ومرتب وفي مكانه
.
.
.
(كلمه اخيره )
يقول الشيخ خالد الجبير
اكثرو من قول ؛
(استغفر الله الذي لا اله الا هو الحي القيوم واتوب اليه)
سترون عجبا من تفريج الهم..,
وتيسير الامر كل دقيقه من عمرنا انفاس لاتعود فلتكن لانفاسكم حلاوة الاستغفار..,
اللهم انت ربي لا اله الا انت خلقتني وانا عبدك وانا على عهدك ووعدك ما استطعت..
اعوذ بك من شر ما صنعة ابوء لك بنعمتك علي وابوء لك بذنبي ..
فغفر لي فانه لا يغفر الذنوب الا انت سبحانك..
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
تذكروني واحبابي بدعوه طيبه
23-01-12, 12:58 AM
جديد مواضيع قسم القصص المكتمله من وحي قلم الاعضاء
العرض العادي
