بسم الله الرحمن الرحيم
هلا وغلا بكل العابرين الي يمرون على ها المتصفح ..,
و الي حبوا سوالف طيف الأحباب ..
ماهو كل من يقدر يكتب او يرد برد طويل اوقصير ..,
في الي مشغول وفي الي ماله خلق وكلن عنده ظروفه ..
دعوه طيبه بينه وبين نفسه هذي تكفيني من احبابي ..,
و لكم عندي بدال العذر ملايين الاعذار..,
العذر والسموحه من بناتي وخواتي الي يتابعوني وينتظروني..
بوقف تنزيل الروايه اسبوع بسبب اختبارات اولادي ..,
راح نتوقف بأذن الله فقط الثلاثاء القادم والسبت الي بعده ..
ونرجع نكمل مع بعض بحول الله وقوته مثل ماكنا سبت وثلاثاء..
يعني موعدنا الثلاثاء اخر يوم با الامتحانات بأذن الله تعالى..
قبل ماانسى في ليله سرمديه قادمه من ضمن ليالي بتمر على زياد وعوق ..,
بتكون اهداء خاص لآمووله واذا قرته معانا بتعرف ليش اهديتها..!!!
.
.
.
اليوم بنشوف عوق المزايين وذكرياتها با الايام الي قبل حفل الزواج..,
وشعورها وش كان ليلة العرس..,
تذكرو طيف الأحباب واسرتها بدعوه طيبه..
البارت اهداء للعابرين من هنابدون استثناء..
سواء الي خلف الكواليس والا الي اسعدوني بتعليقاتهم..!!
.
.
.
يا الله تعالوا معاي...!!
وسالفه جديدة؛
.
.
.
البارت الثالث عشر
.
.
.
مر على ملكتي عشر ايام وكل يوم صرت افصل خط التيلفون قبل الساعه عشرالليل اخاف زياد يدق..!
وامي تسمع او تدري انه يحاول يكلمني وتزعل..؟!
وانا ما ابي امي يضيق صدرها من شي..!
وفي الصباح اشبك الخط..
.
.
بعد اسبوعين من الملكه
.
.
قبل الظهر دق التيلفون وردت امي قالت خلاص حياك الله ..؟!
وانا عارفه انه زياد الي يكلمها ...,
عوق \ مين يمه ...
ام عوق\هذا زياد يقول بيمر يبيني بموضوع..؟!
ترى با امسكه على الغدا يالله عاد ورينا شطارتس ..!
عوق\ابشري لو انتس عارفه اني شاطره تربية الوضيح..,
رحت شيكت على المجلس ودخلت المطبخ اجهز القهوه والغدا..
انا با المطبخ ودخلت امي علي...!؟
ام عوق\استعجلي الغدا ترى الرجال بيمشي ..؟!
خلصت الغدا بوقت قياسي وجلست في الصالة انتظر امي وبعد الغدا جات امي ..!!
ام عوق\الرجال تغدى ورجع لشغله..؟!
الضعيف تلفونه النقال ما سكت من جلس الين مشى..
عوق با استغراب \وش عنده...!؟
ام عوق\ماعنده غير الخير يبي اوراق علشان يضيفتس معه...
وصور شخصيه يقول بيطلع جواز لتس ..؟!
والعرس حدده بعد عشرين يوم..!!؟
عوق بغضب\ خير بها السرعه العرس..!
وبعدين جواز وش ابي فيه مانيب مسافره واتركتس وراي..!؟
ام عوق بحده\ وش ها الهرج الي ماله طعم..؟!
ما زعلتيني وانتي صغيره تبين تزعليني وانتي حرمه في شور رجال..!
ماهقيتها منتس تعاندين ..!
عوق با انكسار\ يمه ماهو عناد بس..!
ام عوق بغضب\وش الي بس يا عويق كلمه وما ثنيها العرس مثل ما قال الرجال والصور العصر نشوف لها دبره ...!؟
واشوف بسرعه الاوراق تجهز بيمر بعد ما يطلع من شغله ياخذها...!؟
ودخلت امي لغرفتها..,
ليه هي وش زعلها انا كله علشانها ما ابي اتركها با الحالها مهما كان هذي امي..!
وكل يوم اشوف عيونها عيون المودع ومع هذا صرت انا الغلطانه ...؟!
حتى علاجها الي كانت تاخذه من يدي وانا الي اعرف مواعيده..!
الحين تزعل اذا قلت يا الله موعد علاجتس..,
تصدني وتقول اخذت علاجي وما يحتاج ان نسيت شغالتي تفطني ..؟
دخلت غرفتي محروره ومقهوره....
وانا ظر الشنط حقت جهازي ريم وخواتها ماقصروا تكفلوا بكل شي...!
وصلحوا لي شغل سنه بعشر ايام ..!
قلبي ما ارتاح وانا احس امي عصبت علي طلعت لها...,
ودخلت لغرفتها وهي تجهز نفسها لصلاة العصر..!
ام عوق\جهزتي الحاجات الي قلت لتس..؟!
عوق \لا بس ما يحتاج كل الاوراق اصلن جاهزه ومحفوظه بالخزنه عندتس..!
اردفت عوق با استعطاف\يمه ليه صايره بسرعه تعصبين وكل شي لازم يصير على مزاج زياد...
ام عوق بحده\وش الي يصير على مجاز زياد..!
الرجال سوى الي عليه ملك وارسل لتس المهر مدبول..
واليوم جاي يقول يا خاله انا رجال ملكت وابي حرمتي ..
وترى حددت العرس بعد عشرين يوم يناسب والا ما يناسب..؟!
قلت لا بالله يناسب وحرمتك اشهر عرسك وخذها محد بيوقف بوجهك...!
عوق بوجع\يمه ماهو بس على هذي انتي حتى علاجتس استغنيتي عني ..,
ام عوق بحده\انتي وش عندتس قمتي تدورين الحجات والاعذار..!
علاجي قبل انتي عندي مالتس شغل وتشوفين وش انا ابي..
لكن الحين عندتس شغلآ اهم من علاجي انا ادبر نفسي يا عويق..,
والله الظاهر انتس انتي صرتي ولية امري..,
وترى زياد جايب معه تلفون نقال يقول ابيتس توصلينه لعوق..!
قلت ماعندي بنات يكلمن با التلفونات..؟!
الرجال اذا ضوى حرمته تحت سقف بيته يهرج عليها ليله ونهاره محد قايل وش قالوا..!؟
ودامها تحت جناحي لا بالله ياولدي ما احب اطوالة الهرج وقصره..,
واردفت ام عوق \ايه قبل انسى العرس في بيتنا وماهوب جاي معه الا اهله الخاصين ...!
وبيسافر كم يوم واذا عودتو بيزين حفله كبيره انتي وش رايتس..؟!
عوق بقهر \يعني وش رايي انتي وهو خلاص قررتوا ونفذتوا..!
يمه من يوم قال عشرين يوم اعرفي انه خلص كل شي ..!
ام عوق \الحين انتي علميني وش الي تبينه من ها المطمطه..؟
تبين عيال ناصر يدرون بعرستس ويجون يساومونا ..!
والا تجي ساره وتقعد تنابح علي ..,
والله ان ما تعوذتي الشيطان وسويتي الي اقولتس انسي ان لتس ام وسوي الي يجوز لتس ..,
عوق با استسلام\ خلاص كل شي ولا زعلتس والله لو تبيني ارمي نفسي با النار ما قلت لا بس لا تضايقين..,
ام عوق\الله يرضى عليتس والله ما ابي الا ان ربي يستر عليتس ويوفقتس..,
عوق\خلاص بطلع الاوراق الي يبيها وبطلع للمشغل الي رحت له انا وانتي ذاك اليوم فيه مصوره بصور علشان الجواز..!
ام عوق \يا الله انا بصلي وانتي صلي وبسرعه اطلعي للمشغل ..,
هذا هو جنبنا مامن بعد الرجال الحين يمر..!
طلعت الاوراق وطلعت صورت صور شخصيه مثل ما طلبت امي ..
استغفر الله مالي حظ با الصور طلعت شينه بس يا الله ماشي الحال اهم شي الوضيح ما تزعل..
ورجعت للبيت وكان زياد موجودعرفت سيارته ..!
شفته راكبها يوم كنا با المحكمه..؟!
دخلت مع الباب الثاني وارسلت الشغاله على امي وجات اخذت الصور علشان تضيفهن للاوراق..,
رجعت امي قالت زياداخذ الاوراق وطلع...
ودخلت امي لغرفتها..,
دق التلفون بصالة البيت و رفعت السماعه..!
.....\عوق
عوق\من معي..!
عوق\انا زياد
زياد بترجي\عوق ابي منك خمس دقايق بكلمك ضروري...!
ما ادري وش الي خلاني ادخل با التليفون لغرفتي
عوق\ ياالله قل وش عندك..!؟
زياد\ عندك احد..؟
عوق بحده\اخلص الي عندك حتى لو عندي احد ماهو سامعك..؟!
زياد\ ليش ادق كل ليله ما تردين..؟
عوق\ وهذا الضروري الي تبي تقوله..!
زياد\ لا لكن ودي اسمع صوتك خالتي صاكتهاعلي صكه..!
حتى الجوال الي جبته لك ردتني طاح وجهي يوم قالت مانيب ماخذته راحمه حالك..
من هروج الليل لا تروح عليك نومه ثم يطردونك من شغلك..!
عوق بنفسها\ امي واعرفها ماعندها لف ودوران با الوجه..,
ضحكت استغفر الله غصب على كلامه ..,
زيادبضحك\الحين اكثر العالم جوالات الا انتي..!؟
عوق \ مالي حاجه فيه والا لو ابي طلعت بدال الواحد اثنين..؟!
زياد بقلة حيله\ طيب خلاص ماهو ضروري جوال تلفون على الاقل اسمع صوتك واخذ رايك بترتيبات الزواج..!
خلاص الزواج ما بقى عليه شي وانا ما ادري وش تبين من ترتيبات اخاف اسوي شي ما يعجبك..؟!
عوق بحزم\اسمع زيادانا ما خنت امي وانا مراهقه ولا زل عقلي مثل البنات ولا عمري خبيت عن امي شي ..,
يوم صار ذا كبري بكذب عليها واخدعها ..؟!
امي ما تحب سوالف التيلفونات حتى مع صديقاتي وهم بنات..,
وتضايق لو شافتني ماسكه سماعة التيلفون وانا الي يضايق امي مالي حاجتن فيه ..؟
وهذي اخر مره اردعليك وبسكر لكن قبل اسكر بطلب طلب واحد منك بس..!
زياد يتنهد بضيق \اطلبي ...!؟
عوق\ انت ما طلبت صور للجواز الا وانت مقرر تسافر برا المملكه..,
زياد\صحيح بحجز اسبوعين في بالك مكان معين..!
عوق بترجي\ما ابي اسافر برا المملكه ما اقدر ابعد عن امي..!
اخاف يصير لها شي وانا بعيده والله ما اسامح نفسي ولا اسامحك..؟!
زياد بملل\ طيب والمطلوب ...!؟
عوق بتردد\اذا ضروري تبينا نسافر نطلع مكه عمره ونرجع..,
واذا كاتب ربي لنا سفر للخارج بنسافر..!
زياد با استغراب\امرك عجيب البنات يسوون مشاكل بس علشان يسافرون شهر عسل..!
وانتي تترجين علشان ما تسافرين ..!
لك الي تبينه والله ما خسرت الي ربتك ياحظها فيك ..,
وانا الله يصبرني ياعوق العشرين يوم الجايه ..؟!
عوق \ وترتيبات الزواج خذ راي امي فيها ماراح اصير افهم من امي ومع السلامه وماقصرت..,
سكرت الخط ورجعت التيلفون لصاله خفت امي تحس اني اكلم و تنزعج ..,
رحت بشوف امي بغرفتها لقيتها نايمه..!
وكلمت ريم علشان اخبرها با التطورات الجديده ..!
قالت لازم اجل بسرعه نشوف الفستان ..؟
اليوم الثاني خبرت امي اني بطلع لبيت ريم اخذهاعلشان اخلص الي باقي من جهازالعرس ..!
فصلت فستان والمصمم قال اسبوعين ويخلص..
حجزت كوافيره تجي للبيت امي ما ترضى اطلع مشاغل...,
وخلصت شغلي كله...,
مرت الايام بسرعة البرق قبل زواجي بليله..؟!
جات ريم وخواتها وامهم معهم علشان نشوف وش الترتيبات الي بنسويها علشان حفل بكره..!
فستاني طلع ورجعته اكثر من مره لتعديل وزني حيل نزل خلال الاسبوعين...,
وجات الحنايه وهذا طلب امي تقول وشلون عرس بدون حنا والا عروس بدون ذهب ...!
وانا مستمعه ومنفذه ممتازه لتعليمات الغير...!
تمثال يشكلون ويحركون فيني على كيفهم امي وبنات ام ابراهيم...,
ما اعترضت على شي كل شي يقولونه انفذه ...,
يتهاوشن ويتصالحن هن وامي وانا بدور المتفرج ما ادري احس اني بغيبوبه ..,
حتى التصوير ما اخترت شي ولاهمني اذا فيه تصوير اولا..
خالتي نوره اقنعت امي علشان بعدين عيالي يشوفون صوري..
وكل العرايس يصورون وش معنى عوق ..!
تحنيت الحنه الي على مزاج امي يديني ورجولي حسيت اني صرت لوحه مانيب انسان..!
ما اسمع الا امي تقول زينيه من هنا وضبطيه من هنا نبيه احمر مثل دم الغزال ..!
اسمع اصواتهم ولا عندي قدره على الرد..
نمت بغرفة امي واحس با امي كل شوي تقوم تناظرني وترجع تنسدح ..!
لا انا نمت ولا هي تهنت بنومها كل وحده فينا تمثل النوم على الثانيه...؟!
صحتني وانا اصلن صاحيه على لصلاة الفجر..؟
قمت علشان اغسل الحنه طلعت امشي كني طفل توه يتعلم المشي..!!
حتى وصلت جناحي ودخلت الحمام اغسل طن الحنه الي على يديني ورجولي...!
شكل الحنه روعه مثل ما قالت امي دم غزال لكن مبالغ فيه..؟!
صليت الفجر وانا اقرا اذكاري ..,
اسمع امي تنادي واطلع لأامي وهي جالسه با الصاله تقول وينتس ابي اشوف حناتس..!
رفعت قميصي وريتها رجولي وجلست قدامها اوريها يديني ..,
قالت يا مشاء الله تبارك الله هذا الزين وتمسك امي يديني وتبوسها..,
واقعد ابكي تذكرت يوم كنت صغيره تحنيني ليلة العيد..
وتقول عوق ارقدي ترى ما يصبغ حناتس الا اذا نمتي..,
وانام علشان يزين الحنه واذا غسلته صبح العيد تبوس ايديني..,
وتقول الحنا ما يزهى الا بيديات عوق المزايين..,
امي قعدت تبكي يوم شافتني اصيح ..,
ام عوق تبكى وتبلع غصه\ياعوق وش فيتس تبكين والله لوماهي سنة الحياه..,
وخايفه عليتس من عقبي اني ما اخليتس تفارقيني..,
بس يا بنتي وش تبينا نسوي هذي كتبت الله والي مقدره على بنات حوا قبلتس ..,
احمدي ربتس يا بنتي واشكريه ان الله مد عمري لين حضرت يوم عرستس..
ان شاء الله ان زياد ما يخيب ظني وبيصير لتس نعم الرجال ..,
قطعت قلبي دموع امي لكن وش اسوي مالي حيله الا الصبر..
بعد الظهر جات الكوفيره علشان اخلص بدري..!
خصوص ان الحفل في بيتنا..!
صحيح مافي معازيم واجد...!
لكن لو ضيف واحد يربك كيف بحفل زواج..؟!
خلصت بعد المغرب ولبست فستاني..!
وامي كل فترة ماالكوافيره تشتغل على وجهي وشعري تنتقدها..!
مره قطعتي شعرها ..,
ومره تقول اعميتي عيونها ببلاويتس ..,
لكن الكوافيره كان بالها طويل مع امي..,
طلع شكلي مرضى الي حد ماوانا لو كنت بصلح مكياج لنفسي بيطلع احلى...,
لكن ريم قالت لا على الاقل التسريحه ماراح اضبطها لنفسي مثل الكوافيره..!
قلت اجل خليها تسريحه ومكياج مالي خلق احط المويه بفمي كيف بزين نفسي..؟
خالتي ام ابراهيم وبناتها ما قصروا ...,
رتبوا كل شي وانا جلست بغرفتي الي كلها شنط واكياس ...,
زياد جا امس وطلب من امي الشنط حقتي لكن امي رفضت ..!
قالت لا عوق هي الي تاخذ شناطها وترتبهن ..!
اعجبني كلام امي مع اني ما طلبت منها تقوله..!
ريم جهزت لي شنطه علشان حماها نواف قايل لأم ابراهيم..!
زيادبيطلع لفندق مع زوجته ليلة العرس خبروها ..!
من بعد طلبي من زياد انه ما يدق علي وامي ردت هديته شكل زيادخاف من انتقاداتها..!
نواف يوصل لعمته ام ابراهيم وهي تخبرنا وش يبي..!؟
ما ادري وش الي حطته ريم با الشنطه..,
لكن على الاقل ريحتني من الحيره ..,
.
.
بعد صلاة العشا
.
.
دخلوا علي ريم وخواتها علشان اطلع با المجلس الخارجي صلحت فيه كوشه صغيره...
من اختيار ريم وخواتها...,
ميعاد كانت تعلق وتقول والله كنت ابي الكوشه على شكل عربة سندريلا لكن زياد وشلون بيدخل ويوقف فيها..
بيصير لكم احدب نوتردام..!
كثير اعجب البنات شكلي وفستاني وخصوص ان فستاني كان موديل فرنسي فخم لونه سكري والمسكه ورد طبيعي ..,
ولبست طقم لولو رجعت اشتريته انا وريم من حسابي ..,
والفكره لريم لأن امي مايعجبها الا الذهب الاصفر..,
طلعت وجلست على الكوشه..
وجاو ناس قليلين ما ادري وش الاشكال ما ميزت احد الا ام زيادعلشانها على كرسي متحرك..,
لكن الاكيد ان المعازيم يعدون على الاصابع..,
اسمعهم يقولون ان زياد بيدخل..,
دقات قلبي حسيتها سدت اذاني ..,
لكن الي استغربته مافي احد تغطى يوم قالوازيادبيدخل يمكن الا حرمه وحده ..,
ما اشوف الا امي وام ابراهيم لا بسات براقع وبنات ام ابراهيم طلعوا..,
يعني عوايدهم ما يتغطون عن بعض امحق عوايد..!
دخل زياد يمشي با الحاله وعرفت ساعتها انه انا وانت يا زيادوحيدين ..,
مهما كثروا الي حولنا نبقى بنظر المجتمع لقطاء..,
مقطوعين وكل الي يشوفونا الحين اجناب عنا حتى نظرتهم لنا شفقه ورحمه بحال ايتام..,
جو لدنيا بغلطه ولحظه حظر فيها الشيطان بين اثنين..,
جابونا ورمونا ما اهتموا وش بيصير علينا اواي صعوبات بنلقاها بحياتنا ...,
ابآنا ذكور بينسى المجتمع الي سووه..!
وامهاتنا الاكثريه منهن لذة ساعه اورثت هم وندامه طول العمر..!!
الي انذبحت والي تحطمت حياتها الشي الاكيدان كلهن مشتركات با التعاسه الابديه للغلطه الي غلطوها..,
وانا با افكاري ما اسمع الا زياد يبارك لي..,
نسيت ما ادري وش ارد عليه ..!؟
هو يقول الف مبروك يا عروس..؟!
وانا اقول طيبه بخير..!
والحمدلله مافي احد يسمع..,
كل الحاضرات جو يسلمون عليه..,
واسمع الي تقول الف مبروك خالي والي تقول عروستك صاروخ والي تبارك وتمشي..!
ام زياد جالسه على كرسيها جنبنا تكسر الخاطر شغالتها واقفه وراها..,
وكل مارفعت عيني عليها شفتها مركزه على زياد ومبتسمه..,
نادى زياد امي وقال ياخاله بنمشي..!
انا سمعت كلمة بنمشي وطقتني ام الركب ابي اقوم ماعاد تشيليني رجولي وجات خالتي ام ابراهيم..,
تسمي علي وش فيتس قلت خاله احس اني ما اقدر اوقف وسمت علي ومسكتني مع يدي قومتني... !
زياد صاد عني يسولف مع حرمتين اتوقع الي اسمهم بشرى ونجلا..,
التفت علي يوم وقفت ومسك يدي قالت له خالتي ام ابراهيم انتبه لها تراها دايخه ومرتبكه ..,
اناظر امي ما ادري وين راحت ماعاد شفتها ابي اسأل خالتي ام ابراهيم حسيت اني انخرست
ماغير ماسك يدي زياد كنه خايف اني اهج ..!
طلعت وانا عيوني طايره ابي امي تلاشت بين الحضور الي حتى عددهم قليل اكيد امي دخلت داخل
يمكن اتعبت ارتفع الضغط والا السكر عندها ابي اتكلم لساني ماعاد يعيني على الكلام..!!
بس بشوفها ما احس الا خالتي ام ابراهيم وريم لبسوني عباتي والطرحه حذفتها على وجهي
ما ادري كيف لبستها وريم تقول بلحقتس مع المصوره للفندق ..!
ماعاد ابي عرس ولا مصوره ولا احلامي الهبله ..!؟
با الله يوم كنت افكر اني اتزوج مثل صديقاتي انا وين كان مخي بس ..!
ابي امي ماعاد ابي شي..!؟
يا ناس ياعالم فكو عني صارت زحمه على الباب اسمع ضجيج اصوات وعبايات سود..,
طلعت مع زياد والمعازيم ورانا يمشون..
فتحت خالتي ام ابراهيم باب سيارة زياد من ورى...,
اسمع زياديقول لا الباب الي قدام محد معانا بس انا وعوق..!
ركبت قدام وقبل تسكرالباب قالت الحين شنطتس يا امي معاي..!
بنلحقتس فيها انا وريم مع المصوره..!؟
فاضيه يا ام ابراهيم اول مره احس ان دمتس ثقيل ..!
انا ابي امي يلحقوني فيها ماهو شنطه ومصوره..!؟
مشتاقه احبب عيونها واشم شعرها ياطول ليلي طولاه..!
حرك زياد السياره وهو يسولف ما سكت من طلعنا من شارع بيتنا..!
وانا ما ادري وش يقول كنه بالع رادو..!
ما اسمعه الا يتحمد ربي اني صرت من نصيبه..!
واني اجمل ما شافت عيونه ولا اشوف شي غير انوار الشوارع من تحت الغطوه..!
وصلنا الفندق ونزل زياد وفتح لي باب السياره..
وها المره صرت امشي وراه بدال ما هو ماسك يدي..!
يعني الحين محتاجه احد يمسكني لا اضيع ماهو يوم كنت في بيت امي..!
طلعنا للجناح الي حاجزه زياد..,
ودخلت وانا امشي مثل الي مخدره احس نفسي بطيح ما ادري نوم ما ادري ارهاق ما ادري رعب او خوف على امي ..!
الجناح كان صالون استقبال وشكل وراها باب ثاني يمكن غرفة نوم..
صالة الاستقبال صغيره فيها كنبات اثنين فرديه والثالثه مزدوجه بينهم طاوله..!؟
ما يمدي جلست الا جوال زياديدق رد عليه قال خلاص بطلع لكم نزل بشته على الكنبه..
وطلع اقل من دقيقه الا وراه حريم..!
دخلوا رفعت راسي على صوت خالتي ام ابراهيم وريم والمصوره معهم..!
ريم معاها شنطتي ودخلت للباب الثاني وخالتي ام ابراهيم وقفت جنبي ودنقت علي قالت عوق..!؟
وش فيتس بسم الله عليتس..!
ما ادري كيف قلت سلامتس..!
ام ابراهيم\ هذي المصوره بتصوركم زياد طلع شوي ويرجع ..
وريم معاها شنطتس بترتب اغراضتس داخل
عوق بحزن\ خاله لا تتركين امي..,
امي ما تعودت ترقد با الحالها..,
ام ابراهيم\ لاتشيلين هم الليله كلنا بننام عندها..
انتي لا تفكرين الا بنفستس وبس ..
وانا امتس خلاص الحين انتي حرمة برقبة رجال لا تخيبين ظن وضحى فيتس ..,
طلعت ريم من الغرفه وجات جنبي..
ريم بهمس \ نزلت شنطتس وفتحتها ما طلعت شي منهاعيب الرجال برا واقف مع جزاع..!
بسرعة المصوره تصور وتضف وجها ننتظرها تحت..!
عوق بترجي\ريم تكفون امي لا تخلونها اختفت من عيوني ما شفتها يوم جيت امشي وين راحت
ريم بتهكم \يعني وين بتروح اكيد واقفه على روس الشغالات على شان ترتيب العشا..!
يا حبتس ياعوق لنكد اقول تعوذي الشيطان ...,
اردفت ريم بضحك\يا ربي لا تعاقبني شفت زياد قبل شوي والله ان شوفته تمزع التسبدتبارك الله..,
ماهو الي عندي لا وبعد امه ما كلتني عليه تبيني عقب كل صلاة اسجد سجود شكر على ان ولدها اخذني ...,
الحمدلله اني احب جزاع والحمدلله ان الحب اعمى وجزوعي معميني غلاه...
عوق بضيق بطفش\ياربي ياريم انتي وجزاع الي كنه شبه مع كل دواء..,
الحين اسألتس عن امي وش جاب طاري جزاع ..,
ام ابراهيم بحده \امتس طيبه ما عليها يا بنتي وحنا افتضحنا با الرجال واقف برا..!
وريم ماهي صاحيه من مرض جزاع لين يصقع راسها بحرمه علشان يمكن تصحى ..!
ريم بغضب مصطنع\ياويلي يمه اعوذ بالله ..,
ام ابراهيم\اقول عن القرقره امشي قدامي ..,
ورجعت ام ابراهيم سلمت على راسي
ام ابراهيم بحنان \استودعتك الله الذي لا تضيع ودائعه..,
نفس الكلمه البارحه يوم نمت عند امي حطت يدها على قلبي وقالتها..
طلعوا ودخل بعدهم زياد..!
لبس بشته الاسود الي مناقض لبياض بشرته..!
وبدت المصوره تاخذ صور..,
انا وزياد كلنا ملينا من التصوير انا قلبي ما كلني على امي ..,
وزياد ما ادري وش فيه شكله طفش مني..!
كل ما قالت المصوره حط ايدك هنا والا ناظر من الزوايه هذي قعدت اتأفف..
قال خلاص بسرعه خلصينا شالت عدتها المصوره وطلعت وبقيت بس انا وزياد با الحالنا مره ثانيه..,
زياد \ خوذي راحتك عوق شوفي غرفة النوم وراك كان بتغيرين لبسك..!
قلت بقلبي جاك الموت يا تارك الصلاة..!؟
وش بغير لبسي الحين انا ادري عن ريم المرجوجه وش الي اختارته وحطته بشنطتي..؟!
زياد يبتسم\انا بنزل دقايق وراجع لك على طول ما راح اتأخر ..!
هزيت راسي وانا ساكته يعني وين ابي اطير بترجع تلقاني تأخرت والا استعجلت ..!
هو طلع وانا اخذت عباتي وطرحتي ودخلت لغرفه النوم السرير كبير مره ومنثور عليه ورد
اول مره ادخل فندق بحياتي ..!
اول شي دورت ساعه ابي اعرف الساعه كم لقيت الحمدلله ساعه جداريه ..
ها الليل معيي ينتهي وانا ظر الساعه الا توها ماو صلت احدعشر ونص
ياربي سترك متى يصبح علينا الصبح...
يا ها اليله لو انتس ليلة امتحان ومذاكره كان مريتي بثواني..؟؟!!!
.
.
.
(كلمه اخيره)
عن أبي هريرة رضي الله عنه قال : أوصاني خليلي بثلاث لا أدعهن حتى أموت صوم ثلاثة أيام من كل شهر وصلاة الضحى ونوم على وتر .
يأمرنا الرسول صلى الله عليه وسلم
... ان نصوم الايام البيض
ولكن الغريب ليس بكلام رسول الله صلى الله عليه وسلم
فالمخابر الامريكية اكدت ان القمر
لديه القدرة على امتصاص
الماء الراكد من جسم الانسان
والغريب في الامر انه حسب المخابر الامريكية
لا يمتص القمر الماء الراكد في جسم الانسان ايام اكتماله اي
ايام 13 14 15 من الشهر القمري
"اقصد بالماء الراكد هم الماء الذي لا يطرح في العرق والبول"
لذا خرج المخبر بنتيجة وهي؛
"ننصح الشعب الامريكي بالانقاص من الاكل والشرب في الايام 13و14و15 من الشهر القمري
وهو ما اكتشفه الرسول صلى الله عليه وسلم قبل 14 قرنا
"وما ينطق عن الهوي ان هو الا وحي يوحى"
اللهم صلي وسلم على محمد وعلى آل محمد
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
07-01-12, 10:24 AM
جديد مواضيع قسم القصص المكتمله من وحي قلم الاعضاء
العرض العادي
