بسم الله الرحمن الرحيم
.
.
.
هلا ومرحبا بكل الغوالي الي سطروا لي با المتصفح احرف من ماس تتلألأ فيها سماء الروايه
في نهاية البارت السابق قلت انه بيكون في حفلة زواج وبيت بيدخلونه لصوص
اجلت الجزئيه هذي لبارت السبت لأني كنت مقسمه البارتات وتفاجئت لماجيت انزل البارت لقيت انه اطول من الازم فا ضطريت اني اعيدالتقسيم
والروايه قصيره ماهي طويله لما قسمت البارتات اكتشفت اختلاف بطول البارتات فما ابي اودعكم بسرعه ...,
لا يفهم من كلامي اني بعلق الروايه او بمطط بها لااااا لأن خير الكلام ما قل ودل ...!
انا من القارئات الي يكرهون ها النقطه با الكاتبات ..,
الا الي عندها ظروف عذرها معاها..,
ما راح يكون فيه انقطاع بأذن الله الا بشي خارج عن ارادتي وغصب عني وان شاء الله بنوصل لبر الآمان مع بعض..
وانا ممتنه من كل قلبي من الالف الي الياء بدون تخصيص لكل الي مرواوقعوا بتعليق والا جاني اعجاب او تقييم على ما كتبت
بارت السبت اهداء لمعزوفة حنين ...,
وبارت اليوم اهداء للجميع بدون استثناء خلف الكواليس والا الي اسعدوني بتعليقاتهم...
البارت اليوم لا يقل قوه عن البارت الرابع بتتكشف فيها حقائق جديده...!
يالله تعالوا معاي نشوف عوق المزايين والتحديات الجديده..؟
.
.
.
البارت الخامس
.
.
.
من بعدالي صار بينا وبين ساره ومشاعل ..
وانا صارت فيني عاده شينه...!
صرت مجنونة تنصت وتجسس على كل احد يجي عند امي..!
وكل ما دق باب بيتنا ضيف قلت يارب سترك..
كثرت مسايير عيال خالي ناصرلأمي اذاماهو يوميآ يوم ورى يوم..؟
وبديت اخاف من جياتهم علينا ما عودونا يمرونا بالااسبوع اكثر من مره..!؟
وقبلها يكلمون على التيلفون يقولون بيزورونا..!
وخصوص انا فيني عقده قديمه ما احب احد يجي وامي ماتكون موجوده..!!
مره تفاجئنا انهم عند باب بيتنا..!
وطلبوا من الخدامه يدخلون عند امي يبونها ضروري ..؟
حتى ما عطوا امي فرصه انها تطلع تستقبلهم...؟!
انا بسرعه دخلت لغرفتي دخلتهم عليناوعجلتهم ابد ماهي طبيعيه...!!
ادخلوا على غرفة امي وهالشي اول مره يحصل منهم ..!
دايم مجلاسهم اذا زارونا من مظلة امي لمشبها ما يدخلون الا اذا تعشوا والا تغدواعندنا ومن المقلط ويرجعون..!
وطبعآرحت امارس هوايتي الجديده التجسس ..
واسمعهم يعاتبون امي..
يقولون لها ياعمه ورى سجلتي كل شي باسم عوق..؟!
وضحى بحزم \ حلالي وبكيفي وعوق بنتي..!
سعد بعتاب \ يا عمه الحلال حلالتس ماقلنا شي لكن عوق انتي عارفه انها ماهي بنتس ولا لها حق بمالتس..,
وضحى بغضب \وانت جاي تعلمني الحق من الي ماهو حق لو انها با الحقوق يا عيال ناصر ماوالله لكم خيط با ابره عندي..,
وضحى تأشر بيدها\ اسمع يا سعد انت واخوك الي جالس يسمع وجهه وجه الي جايز له كلامك..,
انا اول نصيبي مع ولد عمي اخذني ورعة يتيمه عمري ما تعدى 13سنه...,
ورباني على يده وضفني انا ووخيتي اهلنا ماتوا وخلوناوخلوا حلالهم ماله احد غيري انا والشقحا ...,
وهو رجال راعي خير ومال وحلال وما قصر ضف حلالي مع حلاله...
وزوج اختي الشقحاء خوي له وسافرت مع رجلها ..
قعدت مع ولد عمي سنين ماجانا ظنا..!
سيرت علي اختي الشقحاء ومعها بنتها وسميه توها والدتها...
ومن يومهاهجاد ما ادري وش جاه دايم متعومس وخاطره متكدر..!
جاني بيوم غاص حلقه بله سالفه وكل نهاره يبي يطلع هالسالفه وعقبها يهون ...
قلت يا هجاد والله ان وراك علم ماهي عوايدك تدس عني شي...!
رد علي يا بنت عمي انتي مالتس اخوان..,
وربي سبحانه ماكتب لعمي ضنا غيرتس انتي واختس الشقحا...,
هذي الشقحاء ما شاء الله اصغر منتس و بنتها بحضنها بطلقتس وترزقي الله..
يمكن يا بنت عمي البلا مني وانا وانتي كم لنا سنه مع بعض عسى ربي يرزقتس بولد يشيل كبرتس ...,
والله انتس يا وضيح تسوين عيوني والسنين تمر وعمر المره محسوب عليهاماهي مثل الرجل ...!
ولا اقدر اخذ حرمه وانتي عندي والله اني اظلمها واظلم نفسي...!
ولا تحسبين فراقتس سهل لكن عسى الله يصبرني عنتس ...!
يمكن ان طلقتس اتنساتس خوف من الحرام انتس بذمة غيري وتصيرين بدال ما انتي حرمتي اختي ...!
كلامه ذبحني لكن هذا الصحيح حنا كم لنا معرسين الي تزوجوا عقبنا عيالهم يركضون وراهم ..,
وهجاد غير انه ولد عمي طيب وكريم وامين قليل با الرجال مثله...,
قلت يا ولد عمي والله ان لك عندي مثل مالي عندك وازود...!
ماارخصك ولا اترك وانا الامر بيدي..,
لوان بتركتي لك وزواجي من غيرك الصبح اجيب ولد وبالليل اجيب ولد ما بغيتهم..,
انت قلت الي في خاطرك وانا بقولك الي في خاطري ...!
اهلنا مابقى منهم احد الا اناوانت ...!
حتى الشقحارجالها ماهو منا...,
طلاقي لايجي براسك ولاتفكربه...
ما يفرقنا انا وانت غير الموت...!
لكن دام فيها عرس ماني واقفه بحلقك ومن باتسر انا الي بجوزك ...,
ومهر حرمتك والله ما يوخذ غير من حلالي وحلال ابوي...!
يمكن يجيك ظنا يشيل ذكرك بين الناس وعيالك عيالي ...,
وحرمه ماتاكل حرمه ..!!
وانت ذيب ماتخون ولا تغدر ...!
ما غدرتني بحلال ابوي تبديه على حلالك بتغيرك علي حرمه..
ماهقيت ولا تصير ابد من هجاد...؟!
ويوم قلت له كذا قام وسلم على راسي وحلف وقال ؛
عهدآعلي يابنت عمي ما اعرس وراستس يشم الهوا...,
كل ربعنا وجماعتنا لاموه يبونه يعرس ..,
الحلال والخيرلو غابت عينه من يراعيه...,
كم رجال من خيرة الجماعه عطاه بنته وعيا عنها...,
قال ماخلي حرمه تشغل بال وضحى وانا وهي يا تدفني يا ادفنها ...,
واحج انا وهو ومن رجعنا من الحج وهو مريض وتوفى بعز شبابه الله يرحمه وراح وهو على كلمته وعهده لي مااخلفه..
عشت معه عشرسنين مرت كنها ساعه ماعمره جرحني والا غثني والا رفع حسه علي..,
وها المره انا الي ضفيت حلاله مع حلالي واصير حرمةً رجال وارعى ورث ابوي وعمي ...,
مرت على 4سنين وانا كل يوم يجيني مرسال من جماعتي والا من بعيد يخطب شباب والا رجال حريم من كبار الروس وصغارها..,
عقب هجاد طابت نفسي من الزواج كله...
مره طلعت ورى حلالي اتفقده وانشد الرعيان عن حال الحلال ...
ماشفت الا عجوز من الجماعه الحقتني قالت يا وضحى ابيتس بسالفه الا خلصتي شغلتس تلقيني في بيتس..!!
قلت لابالله امشي لبيتي هالحين وانا وراتس انتي ماجابتس الشي الهين..!!
ما جا في خاطري الا انها تبي منيحه والا معتازه تبي لها حاجه...!>أي أن تقدم عنزاً أو ناقة أو بقرة ، لفقير كي يستفيد من لبنها وصوفها>
وامشي معها وتسولف علي با الطريق..
العجوز \يا وضحى الاولين يقولون ان النصيحه بجمل وانتي وش رايتس..؟!
وضحى با اهتمام\وانا شراية نصيحه هاتيها يا ام عوض ..
النصيحة ليا عرضت ما يتركها و يبخس ثمنها الا الهبيل ..!
ام عوض \محشومه يا بنت نمر ماهو انتي الهبيل ...
وتمشي قدامي وتشلع من الارض شجرة شيح قالت تعالي ..
ام عوض بتساءل \ تشوفين اثر لشجره ...؟
وضحى\لابالله مالها اثر الا حفيرة بيجي عليها كم يوم وتندفن ماعاد نشوف لها اثر...؟
يدوسها البهم والا تهب عليها الهبايب...!<البهم الابل والغنم والهبايب الرياح<
ام عوض \انتي لاتصيرين مثلها ...
وضحى بوجع\عرفت مقصدتس لكن وش تبيني اسوي طابت نفسي عقب هجاد من قولة يا عرس ...,
اخاف اطيح لي بلي بلوة ابتلي بها وهجاد محد يسد بمكانه..,
ام معيض\هجادالله يرحمه انا اشهد ان مامن مثله ما قلنا شي بس ما يصير توقفين حالتس يا بنتي عقبه ..!
انتي تدرين وش يدور من وراتس..؟
وضحى بغضب\الله يقطع لسان الي يرميني با الباطل من خلقت وانا الحالي من عمره سمع عني علمآ شين ..ّ!
ما طلعت علومي وانا بزر بتطلع وانا عاد ذا كبري..!
ام معيض\والنعم بتس لكن انا احذرتس من غيرة الحريم منتس انتي بنتآ مزيونه وراعية خير ومطمع للعازب قبل المتجوز ..,
والله يا بنتي لو ينبح تسلب قدام بيتس ان العرب تقول وش نبحه حول بيت وضحى ...؟!
وضحى بضعف \وش السواه...!
ام معيض \انا اقولتس السواه فيه بناخي لي رجال كفو لكن يده خاليه مافيها شي ..,
ومن توفى هجاد وهو يبي يخطبتس يعزم ويهون ..,
يقول ودي في بنت نمر لكن العين بصيره واليد قصيره ماني من مواخذيها انا وين وهي وين..؟
بنتآ من وضحى عن مية ولد ..,
وضحى با استغراب\من هو ذا الي عنده بنتآ مني بمية ولد ..؟
ام معيض\ناصربن سعد..’
وضحى بضحك\راعي حلالكم..؟
ام عوض\اي بالله هو ..,
وضحى بثقه\ انا وضحى بنت نمر بن هجاد عييت من الشيوخ طويلين الاشناب اخذ راعي ..؟!
ام معيض بااستعطاف\خوذيه يا وضحى والله ما تلقين مثله صايم مصلي يخاف الله ..,
ما تقولين بيطمع بلي عندي والفقر ما يعيب الرجال...!
الرجال تعيبهم افعالهم..
وضحى\تعرفين من انا بنته يا ام عوض ..؟
ام عوض بثقه \ومن الي ما يعرفتس يا وضحى جعل اشباهتس ما تنقطع مع العرب ..,
وضحى بتهكم\رويعكم بكرا ما يتحمل لوم العرب له..!
بيقولون ناصربن سعداخذ له وحدةٍ اهلها اطيب من اهله..؟
ثم يزل علي بكلام ما يجوزلي والا يجرحني ..
وانتي تعرفيني نفسي ما تبلع الزله..
ام عوض بترجي \ طيعي شوري يا وضحى والله ماتنامين زعلانه والرجال ماهمه مالتس طمعه بنسب نمربن هجاد..
قلت اجل امهليني اشاور نفسي والله يقدم الي فيه خير وخيره لنا وله..
واخذلي حول الشهر افكر واقلب الامر براسي..,
ناصر رجال ماعليه عشاه من تعب يده ولا عمر احد عابه لابقول ولا بفعل عيبه فقره ..
كم شيخ ارسل علي خطابته يبني ثانيه والا ثالثه و عييت منه ما ابي مجاور الحريم وكيدهن..
انا نفسي ما تقبل المناحر والمداحرلقمتي لو انها بفمي وسمعت الي يغثني رميتها ماكلتها لو ذابحني الجوع..,
وكم ولد اتعب مراسيله طمعان بلي عندي ورديته ..,
ادري ان ما ناقصني زين ولا مال ولا اصلآ طيب لكن راحة البال تنشرى بغالي الاثمان..,
ويهداني الله واسمع شور العجوز واتجوزابوكم...,
كان ليى احلى لي من العسل ولا يسمع بي ..,
ما يدعونه الناس الا بناصر الوضحى ..!
ماعمره زعل وقال وضحى مهي ابوي يوم تدعوني با اسمها..؟!
الا يتفاخر ان اخذوحدة مثلي...!
واقعد انا وهو سبع سنين ما جالي منه ضنا دريت اني انا السبب ...,
واطلبه عقبها انه ياخذله حرمه يمكن ربي يرزقه وهو معيي..,
يقول يا الوضيح ماابي اجيب لتس حرمه تغثتس والرزق عند الله...
قلت له الرزق عند الله لكن يبي اسباب وانا جربت حظي مع ولد عمي ولا جاني منه شي...
ولو ولد عمي ربي طول بعمره اني لغصبه يعرس يمكن ربي يرزقه...!
ما ابي الي صار لهجاد يصير لك..؟!
لكن بكيفك يا بوسعد اختار يا انك تعرس لك على حرمه والا انا وانت نتفارق...؟
واغصبه غصب ياخذامكم انا الي اخترتها له..,
بنت حلال ما شفت منها الي اكره لين ماتت..!
وربي رزقه بكم وهو رجال يستاهل كل خير..
ويوم وكبرتوا شوي طلبته يترك البر ويدرسكم حياتنا ماتنفع لكم والدنيا تغيرت ..!
ولا عاد ينفع بها الزمان الا الشهادات...,
واطاع شوري واخذكم انتم وامكم ودرسكم ...
وقعدت لحالي با البر كل ماجاني ابوكم ارجعه علشانكم اقول لايضيعون وضحى وسعد وسالم عقبك ..!
وهذا انتم كبرتم وتعلمتم وكلكم ماشاء الله مدرسين وتزوجتم انتم واختكم وكلن شاف حاله ...,
وانا اخذت ها البنيه من الرعايه كفلتها يمكن ربي يرحمني بها...
وعقبها يا عيال ناصر جايين تحاسبوني وين اودي حلالي ...!!
اكلت لكم حق يا سعد انت واخوانك ..؟!
سعد بخجل \لا والله يا عمه..؟
وضحى بقهر\يا سعد وصلتوني لقصاي وقلت هرجآما تمنيت اقوله...
مالكم عندي من حلال ابوكم شي...!
تجوزته ماعنده غيرثوبه الي على ظهره ما طمعني فيه غيرانه من ساس طيب ونيته بيضا والفقر ماهو عيب ...!
كنت ابيع من حلالي واعطي ابوكم الله يرحم ذاك الوجه الي ماطمع بريال اعطيه من طيب خاطر..,
مالكم منه علي لا انتم ولا غيركم...!
حتى الشقحا الله يرحمها مانسيتها ولا اكلت لها حق وهي اختي الحمدلله عطيتها حقها واكثر مالها برقبتي ريال...,
والي له علي منه بريال واحد...,
يجي ياخذ بداله عشره...!
سالم بتردد\ياعمه ماهو المقصد لكن عوق انتي عارفه انها بنت استغفر الله...
انا واقفه قريب من باب غرفة امي واسمعهم واحس اني خلاص بدخل عليهم واذبحهم وخصوص سالم...!
يعني ما قال ها الكلام غير انت يا سالم لكن ما اقول الا سبحان الحليم الستار
الحمدلله امي بردت كبدي ما قصرت فيه ...!!
وضحى بغضب\اقطع واخس عن عوق..,
عوق بنتي والكلام الي يمسها يمسني والله ياسالم كم ولد حلال لعب في حسبت الناس وظلم ونهب واعتدى..,
هذي شي من الله عوق ماله يد فيه والي جابوا عيال الحرام تراهم عيال حلال ابليس اغواهم..,
وضحى تهز راسها بقهر\والحمدلله الي ربي بصرني ولا نسيت بنيتي وكتبت لها بيت يظلها ويستر عليها بعد الله...,
وضحى بألم وحسره \انتم يمكن عقب عيني ترمونها با الشارع ...؟!
سعد با استنكار\يا عمه انتي ماهو بس البيت كتبتيه باسمها الا كل حلالتس وحتى الوكاله الي با اسمي ملغيتها...!!
وضحى بتساءل\وانت وش دراك..؟
سعد بتردد\ هاه ايه ناس يبون واحد من بيوتس القديمه وعلموني ان البيت ماهو لتس با يعته لعوق ..!
ومره بغيت اشري لتس ارض بدون علمتس لقيتس ملغيه الوكاله من المحكمه..!؟
وضحى بحسره \يا خوفي ياسعد انت واخوانك رايحين تحصون وش عندي وتبون تورثوني...,
الحمدلله اجل الي الوكاله الي عندي الغيتها وقطعتها...
ما حاسبتكم يا سعد ولا قلت بكم بعتوا حلالي ..!؟
الدراهم الي تعطوني وتقولون هذا ثمن حلالتس اخذها ولا راجعكم فيها..!
وانا ادري ان حلالي يجيب اكثر ..,
الناس ماتستر شي يا عيال ناصر...!
كم مره يجوني ناس تحذرني منكم يا وضحى عيال ناصر ماعطوتس ربع حقتس بحلالتس ..,
وانا ارد عليهم عيال ناصر عطوني الي ارضاني ...,
والا تحسبوني ما ادري..؟
ثمن قعود من القعدان الي عندي يجيب لي بيت كبر ها البيت الي انا ساكنه...!
انا بس الابل الي عندي وانتم بعتوها تغطي عين الشمس..!
من غير الغنم..,
ما يكفي الي انتم حطيتوه ببطونكم وش تبون بعد..!؟
وضحى بوجع\تكاثرتم علي وعلى ها اليتيمه بيت يضفنا وبيوت اجارها يكد علينا وتكفينا مدت يدينا لكم ولغيركم..!
الي يعطي والي يمن عطاه..,
وضحى بحده\يا الله خذ اخوك ولاعاد لكم مقعاد في بيتي الله يخسكم لا بالله ما طلعتوا على ابوكم ..!!
ما اقول الا يا خسارة دموع كبيتها عند ابوكم علشان يعرس ..!
والا دموع فرح يوم ربي رزقه بكم ..,
بيتي يتعذركم وحتى الي انا ناويه اخصكم فيها برضاي حرمتوا حالكم منه..!
يا الله تيسروا وردو الباب وراكم تراه ماعا د بينفتح لكم غير ما انفتح..!
لا والله انه ماهو كل حبآ على بذره يا عيال ناصر..!
يوم سمعت حركتهم واركض للمطبخ واطلعوا واصفقوا باب البيت وراهم دليل انهم زعلانين...!
وارجع لغرفة امي الا هي تبكي ...
واقعد اضحك ..اضحك بشكل جنوني وامي تناظرني و تسمي علي
وضحى بذعر\ عوق بسم الله عليتس وش بلاتس وش جاتس..؟!!
عوق بممازحه\يمه انا وانتي على قولة الهندي سيم سيم..!
انا طردت اهلي وانتي طردتي اهلتس ماعاد لنا الا بعض...’
يمه اهلي واهلتس ما يبون يعطونا يبون ياخذون منا...؟!
وتقعد امي تضحك وهي تقول يا عويق انا وانتي ربي خالقنا وانا امتس لبعض...
رديت \جعلنا ما نتفرق يا ميمتي ..,
الحمدلله تغير مزاج امي بعد ماعكروا عليها هالجاحدين ...!
وضحى با استنكار\ تعالي انتي وش دراتس اني طردتهم..!؟
عوق بممازحه\يمه الله لايوريتس ها اليومين طايحه بطبع اقشر ماغير احب اتصنت على السوالف ..,
عاد يوم شفت سعد وسالم وهي تحكني اذني وتجرني لين سمعت هرجهم..!
وضحى تهدد بيدها\ لاعاد تعودينها ترى التسمع للهروج مافيه الا المغثه ماهو كل مره تجي السوالف على الكيف...
عوق بتساءل \يمه وش لون طرالتس تلغين وكالة سعد..!
وضحى\مره جو عندي سعد وسالم واشوفهم عندهم هرجه ويغصغصون بها ودهم يقولونها وكنهم خايفين..!
و يلمحون لي انهم ودهم في ارض طلعت لي منحه من الدوله الله يعزها قلت لهم يصير خير...,
يوم طلعوا من عندي وكني نايمه واحد جا وصحاني من النوم...,
قلت يا وضحى العرب الظاهر متقاسمه حلالتس وانتي حيه ...!
لكن انا اوريهم كيد العجز وش يسوي ..؟
عوق بضحك\ماشاء الله عليهم عينك عينك يبون ياكلونتس زين الي ماسوو شي من وراتس..؟
ام عوق بقهر\ والله يا بنتي من شي اخذوه من وراي فتحوا عيون الناس عليهم...!
والناس ما يخفاها شي...؟
قالوا حنا ما كلين وضحى ما كليناها ناكلها وهي تدري احسن من وهي غافله ..
كل ماهذا الي جايني واحد من الجماعه يحذرني ياوضحى عيال ناصر لعبوا بحلالتس
واناداريه بس وش اسوي مامن غيرهم لي قرابه..!
عوق بقهر \ حسبي الله عليهم وياليتهم اقتنعوا بلي الهطوه يبون يقعدونا على بساط الفقر ..!
ام عوق\يا عوق الوكاله انا ملغيتهامن طلعت لتس حفيظة نفوس مبطي...,
بس هم مادروا غير الحين منشغلين بلي نهبوه قبل...!
الحين تلقينهم بغو ا لهم حاجه من حلالي ويوم راحو للمحكمه دروا ان الوكاله ملغيه...!؟
عوق بخوف\يمه الوكاله من عطيتيها ...!
ام عوق\ارسلت على مسلط ونوره واشورهم با السالفه..؟
قلت يا الربع انا طحت بش لاينشكى ولا ينبكى عطيت عيال رجلي وكاله مني ودرعوا بحلالي ولا عاد يشبعون...!
انا خايفه يجي يوم يفلسوني حتى من بيتي الي ضافني ...
مسلط \يا ام عوق الي راح راح والي اخذوه ماعاد هو راجع انتي حرمه كبيره ولا انتي حمل شكاوي ومحاكم..
تلاحقي الي ما بعد مدو يدهم عليه...,
نوره ام ابراهيم بغضب\جعل ما خذوه منتس ياكل روسهم ..,
فكرت ولقيت مامن اصلح من مسلط يصير وكيلنا له مواقف طيبه ورجال فيه من مخافة الله واجد..!
واطلبه وكنه تردد اول شي وعيا وتلح عليه نوره وتطلبه..,
نوره با استنكار\ماتجي منك يا مسلط اتخلى عن وضحى وبنيتها هااليتيمه اجل الدنيا ما بها خير..
مسلط بتردد\يانوره ماني متخلي لكن وش بتقول الناس مسلط ضحك على ها الحريم وخلاهن يكبن قرابتهن ويوكلنه..؟
نوره بزعل \ جعل قرابتن مثل ها القرابه تنقطع وانت لاتسوي شي كثر الله خيرك وضحى ماتبي منك شي...!
نوره تلتفت لوضحى بمكر\وضحى اغسلي يدتس من جارتس الي انتي تقولين مثل اخوي ...
واذا على الوكاله انا اشوف واحد من عيال اخواني يمشون لتس بها يا خسارة مدحتس له با العون انقطع المعروف بين الناس ..
وضحى \ابو ابراهيم صادق والله ما الومه خلق الله ماهي داريه وش بقلبه ..!
مسلط يهز راسه بقلة حيله \ انتي صادقه يا ام عوق الناس مالها الا الظاهر لكن الله عارف بالخفايا والنوايا...!
جهزي اوراقتس وانا واخوتس باتسر امشي لتس بهن ..,
مسلط بمزح \اهم شي النوري ما تزعل علينا والله يعينا على ها الامانه ..,
ومن باتسر طلعت انا و مسلط ونوره معنا وسواقي يودينا ويجيبنا ..!
وابو ابراهيم له معارف وناس واجد بس تبي تخدمه ...,
رجال راعي نيه وصدوق والي يقدر عليه يسويه بلا منه ويا ما خدم ناس واجد غيري..،
ووكله الله يجزاه خير واكتب بيتنا هذا والبيوت الي انتي خابره والا راضي بسمتس...,
خفت يا امتس من سعد واخوانه وان شاء الله اني ما ظلمتهم ...,
والله ماهي منه وابو سعد الله يرحمه يستاهل وان كل الي هم فيه من خير انه من الله ثم مني..,
عوق بتعجب\وانا اشوف كل ما شيكت على حسابي لقيته زايد..!
ام عوق\ حسابتس الي با البنك ترى ماهو بس مني الدوله تصرف للي مثلتس يا بنتي معونه..,
عوق با استغراب \يمه عمري ماتخيلت سعد وسالم الا انهم عيال اخوتس...!
وضحى وهي تضحك\ انتي الظاهر ماهو بس اذنتس تحكتس لتسمع الا قلبتس يحكتس يبي يعرف كل شي..؟!
عوق بممازحه \ فديت عجوزي شيخة البنات الي فاهمتني..,
وضحى\ السالفه بسيطه من اخذتس وانا وانتي با الحالنا ما عشت في ذرا غير ذرابيتي ..
يوم كبرتي شوي وفهمتي قلت لتس ان هذولا عيال خالتس ...,
ولو قلت انهم عيال رجلي بتقولين اخواني وتجرئين عليهم ...!
وانا يا امي اخاف واحسب لسوالف ما تفكرفيها بعض ناس...,
واكيد الااخو ماهو مثل ولد الخال وانتي ما انتي قاعده طول عمرتس صغيره..,
فقطعت العلم من اوله وكل شي خليت له حد انتي بنتي وما يجوز تطلعين لهم ماهم محارمن لتس ..,
عوق با اعجاب\ والله منتي بسيطه يا الوضيحي..!؟
وضحى بضحك\ امتس اعجبتس..
قمت من عند امي علشان ترتاح وتنام الضغط الي جاها اليوم ماهو بسيط..
امي كل فتره يطلع لها احد يتعبها بسبتي...!
رحت لغرفتي افكر با المستجدات الي صارت بحياتي...؟!
وحاجات كثير تفسرت لي كانت با الماضي تجهلني ...!
خوف امي علي با الماضي كان نابع من انها تتكرر قصة مشاعل مع بدر الي بسن الطفوله صارو ام واب ...!
نظرات سالم المريبه لي يوم كنت صغيره وكم مره حاول يتحرش فيني لكن ربي حفظني منه...
وضحى اخت سعد وعيونها الي تقدح شراركل ما شافتني...!
كلها طمع بفلوس امي من جهه ونظرتهم لي اني لقيطه من جهه ثانيه مالي حق بمال زوجة ابوهم...!
ما دروا ان امي وضحى تقرب لي اساسآاكثر منهم ..,
وكم مره بنات جماعتنا يقولون لي يا عوق في شبه ودم يربط بينك وبين العجوزوضحى..!
وانا ارد اقول طيب امي اكيد اشبه لها..!
والا الي تقول بسم الله على وضحى منها..,
واثاريهن في بالهم شي وانا على نيتي ...!
متى بس اتخرج وارتاح..!!!
وين تلقين الراحه يا عوق واذا تخرجتي وش بتسوين ..!
مثلك مثل غيرك تبروزين الشهاده وتتفرجين عليها..؟
امي كل يوم يجي احسه يبعدها عني ويقربها من اخرتها..,
صرت اكرهه الايام تمشي ودي توقف ولا يتغير شي..,
الناس تحلم احلام سعيده في بكرا وانا كل ما يصبح صبح اقول ياربي تكفيني شرهاليوم...؟!
انا عقب عين امي وش بسوي..!
عيال زوجها من جهه..,
و ساره من جهه الي تبيني يمكن انفع علاج لأخوهاوعقبها تخفيني..!
من غير اعداء بيطلعون لي من تحت الارض لو امي بسم الله عليها جاها شي..!
ضغط علي من كل جهه ضغط الدروس الي با الغصب امشي فيها والا ضغط العالم الي حولي ..,
والا تعب امي الي يوم عن يوم يزيد وامي تقاوم على شاني..,
آه يا مخي ويا مخيخي باامد سجادتي اصلي واشحذ ربي على قولة امي ...’
العبد با التفكير والرب في التدبير..
.
.
.
نجوم اليوم كانت من نصيب؛
الغاليه اموووله با البارت الثاني توقعت ان عيال اخو العجوز كل ماجو ضغطوا عليها ورفعوا ضغطها ليش تسجل املاكها با اسم عوق
تستهالين النجمه اموووله.
(كلمه اخيره)
ُب ركعه في ظلام الليل :
.. أحيت قلباً
…. وغفرت ذنباً
….. وسترت عيباً
…….. ورفعت مقام صاحبها في عليين
صلاة الوتر جنة القلب
الي الملتقى قريبآبأذن الله
وسالفه جديده
طيف الأحباب
ام الوليد
13-12-11, 12:13 AM
جديد مواضيع قسم القصص المكتمله من وحي قلم الاعضاء
العرض العادي
