عزالله بنفقد الإبداع والسوالف الي تشرح البال بس أكيد مانهون عليج بترجعين لنا بروايه عن قريب وبيكون للفرح جانب اكبر فيها (طرار ويتشرط)بس أمون :واثقه الاخت...عوق الحمدلله ربي عوضها بالعيال والزوج الجنتل بس للأسف موحاسه على نفسها وحابسه عمرها بالخوف المبالغ ياختي عيشي حياتك واحتكي بالمجتمع وانسي هالوضع عاد وزياد مافي منه اثنين دايم مبديها على نفسه ولا يضايقه بشي حتى بغى يسمي ع امها والله احتريت منه بهالموقف وين امي وامي واخرتها بغيت تسمي على غيرها المفروض مايكون فيه مجال العنود العنود رد جميل للي ضفتك من الضياع بس مايمنع انه جنتل مان خاصه اني متأكده انه عارف عن مشاعل وساكت ويمكن هالسكوت عشان عوق او عشان وضعه هو والريم أخيرا طلت علينا على انه ودي أشوف النهايه كيف تصير ومشاعل وشبيصير عليها الا اني مابيها تنتهي وأخيرا تقبلي حبي وتقديري لشخصك الكريم وقلمك الرائع *

السلام عليكم ورحمه الله وبركاته

يسعد صباحك يام الوليد ..... وجعل ربي يستجيب دعاءك ويهلك الطاغيه وزبانيته
انه على ذلك لقدير

والله يام الوليد حسيت ان العبره خانقتني يوم قلتي ان البارت الجاي هو الاخير ليييه ترى لسى ماتشبعنا
من ابدااااعك ولا زلنا نطالبك بالمزيد ......ز الله يسعدك دنيا واخره

عوق الحمد لله على السلامه وربيتي ماجبتي جعلهم من الصالحين والبارين
يالله صعب جداااااا على الوحده انها تولد ولاتشوف حد جنبها يساعدها او يهونها عليهاااا دائما يكون وجود الام
بهذي اللحظاااات مهم جدااا ويهون على الوحده بس زياد كفى ووفى ويمكن طلب عوق انه هو الي يولدها
يمكن لانها حست انه هو اشخص الوحيد الي تنتمي له وتقدر انها تستمد طاقتها منه

اجل طلعوا المزايين على ابوهم شقر يالله اجل هذا راح يعزز ان زياد اصله مو سعودي

زياد تعجبني شخصيته كثير احسه انسان متصالح مع نفسه وراضي بوضعه ومتصالح معه عشان يقدر
يعيش ويثبت وجوده ويحقق احلامه ويكون العز والسند لخواته وزوجته وعياله وحلووو انه سمى على امه
وزوج اخته الي ماقصرت لامعه ولا مع زوجته

ياااربي على اهل زيااد تاثرت كثبررر من وقفتهم بجنب عوق وزياد وكيف هم ملتفين حولهم ولا حسسوهم انهم
مو منهم بالعكس قاموا بعوق قومة الاهل الي انحرمت منهم الله
حتى البنات معطين الجلسه جو مرح ويقدورن يرسمون البسمه على وجه عوق يجزاهم خير ويكثر من امثالهم


عهووود يالله هذا نموذج بسيط لبعض بناتنا الله يهداهم الي انحرفوا وصاروا صوره مشوه للغرب في ظل غياب
الاهل وتوجيهاتهم ومراقبتهم وغياب الوازع الديني لان هالفئه لو لقت الاهتمام والمراقبه والتوجيه الصحيح والعاطفه
السلميه كان ماسلكت هالطريق الضايع
بس عهود لحق عليها ابوهاااا وقدر انه ينقذها قبل لاتضيع نفسها

ام ابراهيم هالانساااااانه اتعب وانا اقول عنها انهاااا فعلااا امراء طيبه ومعطاءه وصدق ان معدنها اصيييل
الي رغم ابتعاد عوق عنهم وانشغالها الا انها لاتزال تسال عنها وتهتم لها ولاخبارهاا لدرجه انها جااااات لهاعلى
طووول ما انتظرت لوقت ثاني

ام الوليييييد الله يجزاك عنا خير الجزااااء ويحرم وجهك عن النااااار ويرزقك من حيث لاتحتسبين

بسم الله الرحمن الرحيم


اللهم لا مغيث لأهل سوريا الا أنت اللهم أغثهم وفرج همهم وسددرميهم وأنصرهم على عدوهم,

ياحي ياقيوم بك نستغيث فأغثهم,

هذه جباه عبيدك الموحدين , ذليلة لجلالك , وهاماتهم منحنية لسلطانك ,

وألسنتهم لاهجة بذكرك , يا غياث المستغيثين , ويا ناصر المستضعفين ,

ويا رب العالمين ,نسألك باسمك الأعظم , يا حي يا قيوم , يا حي يا قيوم , يا حي يا قيوم ,

اكشف الغمة عن أهلنا في الشام ,واجعل لهم مخرجا من هذا المصاب الجلل,

اللهم عليك بطواغيت الشام ومن يعينهم ويرضى عنهم , اللهم مزقهم كل ممزق ,

واجعلهم أحاديث لا إله غيرك ولا رب سواك.
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

الاخوات الي ارسلو لي وبذات كلامهم لي اني حطيت يدي على الجرح واوجعت ..

والله ماهو قصد اني اجرح احد وانا اشوف اني جملت حياة عوق وزياد وبالأخص حياتهم قبل يلتقون في بعض ..,
.
.
اعتز بشهادتكم ان نوح الحمام كانت فكره غير مسبوقه في عالم الروايات تناقش اقل القليل من هموم ها الفئه.

المظلومة في مجتمعنا وتعاقب على ذنب ماكان لها يد فيه..,
.
.
.
كلمه قبل نزول البارت وتحملوني للمره الاخيره؛

البنات الي كانو مصدومات من حكم الابن الغير شرعي لا ينسب لأبوه حتى لو انعرف هذي هي الحقيقة..

ماهو مثل مايصور لنا المرجفون الداعون لرذيلة..

حبيت اقول بناتي خواتي اي علاقه خارج إطار الزواج محكوم عليها با الفشل والخاسر الاول والاخير البنت

هذي حقيقه ماراح تتغير بيوم وليله وتستند لأحكام شرعيه ..,

اي علاقة حب ما يسبقه زواج فاشلة وخصوص اذا كان فيها تواصل بين الطرفين,

واي علاقة تسبق الزواج تأكدي انهااستدراج ومخدر للبنت من ذئب بشري,

البيوت لها ابواب والي يبي يدخل معها يعرفها لأن القلب الي حبيتي فيه الشخص,

ماراح يكون فارس الاحلام وحده محتله طول العمراذاما انكتب لك نصيب مع الفارس بيكون فيه فارس غيره

وقلبك بيحتله ابناءك وما ادراك ماحب الابناء,

لا تسمحون لأحد يسحبكم بدعوى الحب العذري الطاهرلطرق موحله تدنس طهركن ,

بعد الزواج تنقلب كل الموازين الي ماينبنى على خوف وطاعة الله لامحاله بيكون الفشل مصيره,

فالحذر.. الحذر ..الحذر,
.
.
اليوم بنشوف عوق المزايين با اخر سالفه لنا تجمعنا معها وهي ان الدنيا صحيح صغيره,

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,
.
.
يا الله تعالوا معاي...!!


والسالفه الاخيرة؛
.
.

البارت الثاني والاربعون والأخير.
.
.

اليوم التؤم كملوا سنه وبدو يمشون وتبان ملامحهم العنود كان فعلآ شكلها غريب ماتشبهني ولا تشبه زياد..,

عيونها ملونه وشعرها اصفر وملفلف وساري كان نسخه طبق الاصل من زياد..,

نمر تقبل اخوانه ولوانه مرات يضربهم بدون سبب لكن اتغاضى عنه واسوي نفسي ما شفته..,

وبديت امتص جانب الغيره فيه من اخوانه..,

نمر ولد خالتي ام ابراهيم دخل الكليه العسكريه حلمه القديم...,

امس كانت اول اجازه له بعد ل45يوم تدريب..,

كلمتني خالتي ام ابراهيم تقول نمر خلص الدوره الاجباريه وبيجي بكرا مع خالتي يشوف عيالي..,

قلت خلاص انتظركم قفلت الجوال وبكيت ما ادري وش الشعور الي جاني..,

يمكن احساسي ان عايلة ابو ابراهيم هم اهلي الي فقدتهم..,

وبا الذات نمر كانت معزته عندي مثل عيالي على الرغم اني ماسكه وصيت امي..,

يوم قالت انتي يمكن قلبتس ابيض لكن وش يدريتس عن قلوب الناس..

دخل زياد راجع من دوامه..,

زياد بذعر \ عسى ماشروش فيك تبكين..,

عوق تمسح دموعها\لا والله مافي شي عادي ضايقه شوي..

نمر \ماما كانت تكلم جوال وقفلت وبكت..

زياد \من كنتي تكلمين..

عوق بحده\نمر كم مره اقولك اترك عنك اللقافه..

زياد بهدوء\ماما صادقه نمر اللقافه ماتصلح روح بابا العب مع اخوانك..

عوق وعينها على نمر الي دخل غرفة الا لعاب\كنت اكلم خالتي ام ابراهيم..

زياد با اهتمام \عسى مافيهم شي..؟

عوق بحزن\لا بس تقول ان نمر امس طلع من التدريب وبيجي يسلم عليك وعلى العيال..,

زياد يبتسم \طيب عادي وش الي يبكي با الموضوع..,

عوق تنهار با البكاء\ما ادري حسيت بشعور غريب ان لي اهل يهتمون ويسألون عن عيالي..

زياد بمعاتبه \لا عاد هذي بحق وخواتي الي عيالك عندهم هم المبجلين والمفضلين..,

عوق\لا والله ماهو قصد بس عايلة ابو ابراهيم ما ادري احس اني بنتهم..,

وحتى بناتهم يعتبروني اخت لهم ويقولون لنمر حنا خالاتك..,

زياد بملامه \ افاااا وخواتي ..

عوق \على عيني وراسي لا تزعل من كلامي لكن شي ما اقدر اسيطر عليه بداخلي لناس هذولا..,

زياد بسخريه مصطنعه\شوفي جزاء لك وردع لأمثالك با احكم عليك حكم قديم اصدرته عليك زمان وبكرره

بما اني شامم ريحة كأنك تفضلين بيت مسلط على اهلي

بكرا عشا نمر عندي ومحد بيطبخه غيرك ولا مانع انك تطلبين مساعدات خارجيه..,

عوق تبتسم وتمسح دموعها \ابشر احسن خبر واعزم الي تبي وبدون مساعدات خارجيه..,


عزم زياد عمي ابو ابراهيم ونمر وحاولو يعتذرون ان نمر ماعنده وقت..,

لكن زياد اصر عليهم وافقوا على العشا..,

اليوم الثاني بعد المغرب في بيت زياد..

عوق بفرحه\ يا حي الله خالتي ليش نمر يكلف على نفسه..,

ام ابراهيم بمعاتبه\الله يهديتس الي لو قلنا لتس وشلونتس قلتي كلفت عليكم,

والله ما نشوفتس غير مثل رويم وخياتها.

اردفت ام ابراهيم بضحك\والله ياهو يعلق على عويلتس ..,

عوق تبتسم\مقبول من نمر كل الي يقوله...,

ام ابراهيم \يقول عويل عوق بسم الله عليهم من كل بستان ورده كل واحد شكل..,

عوق تضحك\كلن يقوله ما يتشابهون..,

ليش البنات ماجو معتس..؟

ام ابراهيم \البنات كلن في بيتها الله يوفقتس ويوفقهن..

ريم بغت تجي بس ام جزاع الضعيفه صخنت وتنومت كم يوم با المستشفى وجلست عندها..

مستحيه تقول فشيله احضر عشا و خالتها اليوم طالعه من المستشفى..

والجوهره الله يصلحها طموح عندنا رجعت اليوم متهاوشه هي نواف.

عوق بذعر \عسى ماشر..,

ام ابراهيم بتذمر وقهر\ الله يهديها كنها معرسه على نواف البارحه جننتها الغيره عليه

لو في يدها طلعت معه لشغله..,

عوق بضحك\ماهقيتها من الجوهره العاقل.

ام ابراهيم بضحك\الرجال وانا امتس خشير العقل لا وصلت عنده العلوم ضاعت

تقول كل يوم اسمع قصة دكتور مع مريضه عالجها واعرس عليها والا دكتور اخذ زميلته..,

مارضت وراحت لبيتها غير يوم جا نمر ودرى

هاوشها والله ماخلى ولا بقى عليها يقول سوالفتس هي الي بتفطن نواف على العرس وهو معرس معرس..,

يامن تفطينتس له والا تنكيدتس عليه اخذتيه وهو دكتور وش الي تغير

وماصدقت بس دق عليها رجلها قالت تعال خذني..

منحاشه من سوالف نمر وملامته.

عوق بضحك\والله ماقصر فيها خله يخرشها بس لايكسرها قدام رجلها...,

ام ابراهيم بضحك\نمر ماعنده مجاملات الي يشوفه عايل والا غلطان طقه على خشمه ان كان البنات والا رجالهن..

الله يطول بعمره حار ولا يحب الغلط كل خواته يهابنه ..,

عوق بضحك \والله اني مشتاقه لشوفت البنات وجمعتهن سقى الله ذيك الليالي..,

ام ابراهيم \اي والله البيت الي كان مليان تعالي شوفيه الحين ما غير انا ومسلط والخدامه..,

البنات في بيوتهن يمرن لهن شوي ثم مشن والعيال ابراهيم في بيته وعبدالله بكندا ونمر بالكليه ..,

عوق\ ما اسرع الدنيايا خالتي والله كنها البارحه والبنات يركضون من بيت امي الله يبيحها لبيتكم مراسيل..,

يجيبون لي دفاتر ريم والا ياخذونها..,

ام ابراهيم تبتسم بوجع\ امتس الله يرحمها ماتحب البنت تمسك تلفون,

كم مره ريم تشتكي تقول ادق على عوق ابغى دفاتري وامها تصرفني وترسل خياتهاعليكم..

عوق تتنهد بحزن \ ياعسى مثواها الجنة ليتها تشوف الحين البنات كل وحده معها جوال وجوالين..,

ام ابراهيم \ يا بنتي هذي فتن عسى الله يكفينا شرها..,

عوق\وعمي مسلط بشريني عنه..,

ام ابراهيم \ما عليه طيب تزوجته وانا صغيره وهو ماشاء الله رجال كبير

شوفيني عجزت وهو تبارك الله عمتس الي انتي خابرته غير ان المشي شوي يتعبه

العصا الي اول ما يدانيها ها الحين ماتفارقه يتعنز عليها...,

عوق بضحك\تبارك الله وانتي ياخالتي زوجه صالحه عاونتيه على دنياه..,

بديتوا اثنين والحين انتي وعمي صرتوا اثنين من غير شر..

ام ابراهيم \هذا حال الدنيا..

عوق\لو انتس ما زوجتي بناتس الصغار يونسونكم..,

ام ابراهيم \لا والله ما نيب قاطعة نصيبهن يوم خطبوهن ريا جيل كفو وفيهم خير..

خليهن يشوفن نصيبهن واشترطنا عليهم يكملن دراستهن..

عوق\ ودي والله انهن يونسنكم والااناتعرفيني مع الزواج المبكر..

وازين ما سويتي هذي ريم اعرست وحملت يوم كنا با الكليه وكملت ونجحت بتفوق ماشاءالله..,

ام ابراهيم \والله يا بنتي ان البنت الي ترد الرجال الطيب الي فيه خير ودين بيجيها يوم تعض اصابعها ندم..,

عوق \ يا ليتنا نرجع الاحاديث الرسول صلى الله عليه وسلم كان تعدلت حياتنا وعشنا بسعاده..,

قدمت العشا الي انبسطوا منه ضيوفنا والرياجيل عاتبوا زيادليش يكلف على نفسه..,

خوات زياد ودينا لاموني ليش ارهقت نفسي وعاتبوني علشان ما طلبت مساعدتهم لكن يظل عتب الحبايب مقبول..,

مشيوا عايلة ابوابراهيم ولا بقى الا نجلا وبشرى وبناتهم مجد واصايل واثير..,

زياد ودع الضيوف ودخل عندنا..

زياد با اعجاب\ تسلمين ام نمر على العشا بصراحه انا انبهرت..,

نجلاء \ام نمر سنعه ماشاء الله عليها..,

بشرى \بسم الله عليها والله انك محظوظ ..,

عوق منحرجه\ عاد لاتنفخون راسي ماسويت شي لكن انتوا من معزتكم لي تشوفون اي شي اسويه حلو..,

مجد بضحك \لوماانتي سنعه ما كان خالي صار دب ,

نجلاء بحده\اذكري الله يام اللسان.

زيادبضحك\ هذا اكبر دليل ان زوجتي سنعه.

اصايل \من يصدق خالي انك كنت نحيف كل ماشفت صورك اضحك معقوله خالي زياد كان جسمه كذا

بشرى بتأثر\ زياد وهو صغير ماكان نحيف ما نحف الا بعد مرض خالتي ..,

زياد بممازحه\كنت شايل هم العرس ..

اردف زياد\والله مسلط وعياله استحوا يقولون اتعبنا اهلك..,

عوق تبتسم \ يستاهلون والله هم الي بمكان اهلي..

زياد يضحك \نمر احرجني بهداياه..,

عوق بملامه \كلف على نفسه وهو توه الضعيف طالب تلقاه ماخذ الفلوس من خالتي..,

زياد\نردها له ان شاء الله اذا تخرج والا بزواجه..,

بشرى تبتسم \يستاهل والله شفت هديته للعنود روعه ماشاء الله..,

اصايل بفضول\وش هديتها..!؟

بشرى تلتفت لزياد\الاسواره الي لابستها والا انا غلطانه توني اشوفها عليها..,

زياد يضحك\لا والله ما انتي غلطانه يوم فتح العلبه ولبسها مدت يدها الثانيه تبي بعد..,

طاح وجه نمر لا ومصره تنفض يدها تبيه يلبس يدها الثانيه..,

اصايل تضحك بتهكم\ احلى ام قراعيط تعرف الزين ..,

مجد بضحك \ كلها من دعاوي خالي والي طاحت فيها العنود مسكينه عمركم شفتوا شعر اصفر ومجعد..,

اصايل بتهكم تمسح على شعر العنود\ الحمدلله الي جات الدعوه با الشعر والا كان علوم..,

نجلاء بضحك \ياويلكم من الله تهبل عنوده هي وقريناتها الي ما ادري كيف تمسكهم عوق وتربطهم..,

بشرى\يعني ماشاء الله قال انك تمدحينها انتي خلك على ساري..,

نجلاء تضم ساري بمحبه\الا ساري والله جامع الزين كله اسمه على الغالي ساري الله يرحمه وولد الغالي زياد وش تبين اكثر من كذا..,

اصايل بضحك\خالي باقي عليكم تسمون على ابوي ترى هذا العدل بنيان وساري ازواج خواتك..,

عوق با اعتراض \لا تكفين ثلاثه وطلعوا عيوني تبين بعد رابع الله يرزقك وتعرسين وسمي على الوالد الله يخليه لكم..,

مجد بضحك\ لا عمي بنيان ان شاء الله تسمي عليه دينا حملها هالمره ماشاء الله تقول ولد ..,

اصايل \ لا خالي ناجي ها المره بيسمي زياد..,

بشرى \وازين ما يسمي على زياد..’

زياد بضحك\ ان شاء الله ها المره ابي اخت لعنودي وباسميها النيره..,

عوق با استغراب \وش معنى..,

زياد\امي الله يرحمها كانت تتمنى ان عاش لها بنت تسميها النيره..,

نجلاءبتأثر \ما شاء الله عليك زياد فعلن هذي كانت امنيتها تحب ها الاسم وكلنا نسيناه وانت متذكره..,

زياديبتسم بحب وامتنان\لا والله ما انسى كل شي يخص امي العنود ها المره بنتي على اسمها

والبنت الثانيه على الاسم الي تمنته ملحوقه ان شاء الله..,

مجد بفضول\واذا ولد خالي ..,

زياد بضحك\ما يبي لها مساعد ها المره..؟

انتهت السهره بعد يوم حافل طلعوا كل الضيوف حتى اهل زياد..,

صعدت فوق نومت عيالي ودخلت على زيادالي كان بينام لكن شافني وصحصح..,

زياديبتسم ويفتح ايديه لعوق \هلا والله با ام المزايين..,

عوق تبتسم بحب \ذكرتني با امي يوم تناديني عوق المزايين..,

زيادبااستفهام \ كل ما بغيت اسألك عن معنى اسمك انسى وش معناه ..,

عوق \امي الله يرحمها معجبها تقول كان عندها ناقه مزيونه وغاليه عليها

اسمها الوضحى والوضحى جابت بكرةاجمل منها سمتها امي عوق المزايين..,

و معناه ان المزايين ما يوصلون لجمالها..,

اردفت عوق بغرور مصطنع \وبما اني حلوه وامي احلى تناديني عوق المزايين..,

عوق بضحك\ طيب زياد تعرف معنى بكرة..,

زياديبتسم \بنت الناقه يا ذكيه ما تقولين الناقه الوضحى ولدت بكرة..,

عوق بضحك\ صح عليك وانامعروفه عند معارف امي بعوق الوضحى..,

زياد بتهكم \الله يرحمها الي اعرفه ان الناس تسمي اسامي زهور عطور لكن ناقه على قولتك اول مره اسمعه

عوق بتهكم \ليش ماهو معجبك..,

زياديرفع حواجبه بسخريه مصطنعه \يعني اسمك كله بعارين في بعارين..,

عوق بحده\والله امي ام الذوق كله..,

اردفت عوق بتهكم \ليه والاسامي الي كل يوم ناس راصين لهم حرف حرفين

واذا سألتهم قالو ا ولله معناه الغزال الشارد والا الغزال الطاير..,

زياد بضحك \يا زينك زيناه بكل حالاتك الا كلام ينذكر فيه اسم امك تقلبين وحش يخوف..,

عوق\ما ادري عنك كنك تستهزئ ..,

زياد يضحك ويغمز بعينه\لا حرام عليك وش استهزئ خالتي كل شي منها حلو..,

عوق\ اخبار نمر مع الكليه..,

زياد \ماعليه طيب بس لو تشوفينه ذاك الدب صاير جلد وعظم ومسود من التعب..,

عوق تبتسم\ هو يبيها رغبته يتحمل من يوم طوله شبر وهو يدعي انه يدخل هالكليه وبعدين فتره واذا تخرج بيرتاح ان شاء الله..,

زياد بعطف\مسلط كبر مره لو تشوفينه اليوم وعياله يسندونه علشان يجلس وعصاه بيده..,

عوق\ الله يكون بعونه من شفته وهو شايب لكنه رجال قلبه ابيض وفيه خير..,

زياد \والله ياهم يعزونك وطاروا بعيالك حسيتهم فعلن اهلك..,

عوق \الله يصلحه نمر ماهو مخلي لعبه في السوق ما اشتراها..,

من اليوم اجمع الالعاب الي اشتراهم انا والخدامه خفت ساري والا عنوده يحطونها بثمايهم..,

زيادبخوف وتحذير \لا تكفين انتبهي لهم والا تخلصي من الالعاب الي زي كذا...,

كثير ناس تهدي هدايا من محبتهم لشخص هذا وخصوص الاطفال لكن ما يفكرون با اضرارها او فوايدها لطفل..,

عوق بتذمر\ماتتخيل زياد ياكثر ما ارمي العاب تجي عيالنا هدايا من الخوف لايبلعونها..,

وانحرج لاقول لاتجيبون هالنوعيات من الالعاب على ان مكتوب عليها تحذيرات ومحدده لأي سن

لكن مافي وعي لها الاشياء..,

زياد بقلة حيله\ مجبوره لازم تجاملين علشان ماتجرحين احد..,

والا خطر ها الالعاب اكثر من نفعهم سمعتي بالطفلة الظبي بنت بتال العاجي كيف توفت

اختنقت بلعبه وعلى طول ماتت الله يرحمها..,

عوق بخوف\ بسم الله على عيالي والله اسوي جهدي واحصنهم واستودعهم الله صبح ومسى..,

زياد \هذا المفروض ان الانسان يبذل الاسباب ويوكل امره لله..,

اردف زياد با ابتسامه\انتي للحين ماخبرتي خواتي بحملك ترى والله ياخذون بخاطرهم...,

عوق تبتسم\الا خبرت بشرى ونجلاء من فتره وخالتي نوره اليوم.,

وهم احترمورغبتي اني ما ابغى احد يعرف بحملي والا متى احمل والا اولد..,

زيادبحيره\نفسي افهمك ها العقده عندك ليش احس ودك ان عندك طاقية الاخفاء وتختفين عن عيون البشر..,

عوق تبلع ريقها وتبتسم با ارتباك\اي والله انك صادق ولا ابي احد يشوفني غيرك انت وعيالي ليه انت ماودك..,

زياد يضحك وهو حاط يده على بطن عوق\ حتى البيبي يضحك على هبالك شوفيه يتحرك ..,

اردف زياد بتهكم\انتي نفعك سمنتك بعد ولادة التؤم والا كان كشفوك مجد واصايل قبل تخبرين امهاتهم

ماشاء الله عليهم عندهم دقة ملاحظه..,

عوق بخيبة امل وتناظر جسمها\ بالله زياد ماهو معجبك جسمي تبيني انحف..,

زيادبمحبه \كم مره قلت لك تعجبيني بكل حالاتك اخلاقك ودينك ماشاء الله عليك تزيد حلاك حلى..,

ويكفيني حديث الرسول صلى الله عليه وسلم (" ألا أخبركم بخير ما يكنز المرء ؟

المرأة الصالحة إذا نظر إليها سرته , وإذا أمرها أطاعته , وإذا غاب عنها حفظته " .

وهذولي الحمدلله كلهن فيك والله اني اغبط نفسي مرات اني تزوجتك.

عوق بممازحه\يعني قولتك زياد مااسوي ريجيم..,

زياد بضحك\ريجيم وانتي حامل بخمس شهور...,

اردف زياد \اقول بس قومي طفي النور وتعالي نامي ورانا يوم حافل وانتي وراك عيالك..,

عوق بنفسها\الله يا زياد ذكرتني بكلمة امي يوم حملي بنمر الله يرحمتس ياميمتي..,


مرت سنه على عزيمتنالنمر..,

ولدت با السلامه وجبت مساعد الحين عمره ثمان شهور..,

وطول فترة حملي ادعي ربي يرزقني بطفل معافى ولا يشبهني انا او اهلي..,

ادعي ان شبهه غير مثل ما ادعي بعافيته وصلاحه..

زياد واهله عادي عندهم الشبه وهذا مريحني من جهتهم..,

لكن انا نفسيتي ماهي مرتاحه لو بيشوفه احد من معارف اهلي وش بيقول..!

يكفيني نمروالرعب الي عايشته من شدة شبهه في بدر..,

وجا مساعد شكله غريب فديته ولا يشبه حتى اخوانه..,

العنود عيونها عسليه فاتحه ..,

مساعد غير شكل عيونه رماديه غريب لونها وشعره اسود وماخذ بياض زياد..,

عيالي من شافهم مايصدق اني انا امهم الا نمر..,


اليوم زياد بيسجل نمر با المدرسه..,

سجله ورجع للبيت وطلع مستعجل سألته وش فيك قال بعدين اخبرك اذا رجعت..,

تأخر مارجع وانشغل بالي عليه و حسيت بضيقة ولا قدرت اكلمه جوال خفت انه مشغول..,

رجع زياد بعد العشا شكله تعبان ومهدود..,

عوق بخوف\زياد وش فيك عسى ماشر صاير شي..

زياد بحزن\ لا بس في واحد توفى نسيب خوي لنا با الاستراحه وقفت مع اهله..,

عوق\ ان لله وانا اليه راجعون الله يرحمه ويصبر اهله هذا حال الدنيا..,

زياد\اي والله لازم تعزين اهله بكرا..,

عوق\ مو مشكله المتوفي من زملائك..,

زياد\خليني اخذ شور واخبرك متكسر جسمي من الصباح وانا واقف..,

عوق\ ابشر تعشيت والا احضر لك شي..,

زياد \ياليت عصير فرش من ايديك الحلوه..

دخل زياد للحمام وانانزلت للمطبخ اصلح لزياد عصير واتطمن على عيالي نايمين

رجعت للغرفه زياد كان يصلي وتره جلست انتظره..,

زياد ينهي صلاته ويناظر عوق\ الله لايحرمني ها الوجه كيف يومكم..,

عوق تعطي العصير لزياد\ابد والله ركض ومراكض ورا العيال الله يصلحهم سجلت نمر..,

زياديبتسم\اي خلاص سجلته ولدك صار طالب مدرسه عقبال ما يتوظف..,

عوق\الله يلحقنا ذاك الوقت..,

زياد\ آمين ..,

اردف زيادبترجي\عوق بطلبك طلب..,

عوق با استغراب \ابشر اذا اقدر عليه..

زياد\ ابي عيال غير عيالي هذولا..,

عوق بخوف\حرام عليك التؤم ومساعد توهم صغيرين والله كني والده ثلاث توائم ذبحوني الله يحفظهم..

تدري مابقى الا اركب اجنحه واطير وراهم.

اردفت بضحك\انت اليوم اكيد مكلمينك مجد والا اصايل اعرفهن هذي سوالفهن ..,

زياديبتسم \لا والله لا كلمتهم ولا شفتهم اليوم مشغول مره ما فضيت ..,

اردف زياد\انتي ما شاء ولادتك طبيعيه واحنا وضعنا المادي ممتاز

وانا ابي عزوه انا رجال وحيدوشوفي كم عمري الحين ..,

عوق بضحك\ العمر كله ان شاء الله توك صغير ..,

زياد \ با الاربعينات عندك صغير والله شايب لكن الحمدلله روحي شباب والا الشيب بدا يغزو مفرقي..,

عوق بتهكم \لا اليوم فيك شي خبرني لا يكون ناوي تعرس علي بس..,

زياد بممازحه\لوفي مثلك بطق ثلاث حريم لكن الشكوى لله مافي الا عوق الوضحى وحده..,

عوق \ لاعاد صدق البارحه كنت تنتقد الحريم الي عيالهم على بعض صغار ويحملون وحتى سعودي يا قلبي

حمله غلطه مطبعيه وش غيرك اليوم..,

زياد\الرجال الي دفناه اليوم غيرني مافي ولد من صلبه يقوم بعزاه..,

عوق با استغراب \ لا حول ولاقوة الابالله ماهو متزوج ..,

زياد \الا متزوج لكن ما عنده عيال ولا هو من الرياض اصلن لكن توفى هنا ولا بغوا ياخذون جنازته لديرتهم..,

عوق بتأثر \لا اله الا الله (وَمَا تَدْرِي نَفْسٌ بِأَيِّ أَرْضٍ تَمُوتُ )

زياد بوجع \الي قام با العزا انسباه ازواج خواته وقريباته وعيالهم هو اخر من بقى من عايلتهم من الرجال..,

لو تشوفين اقاربه شخصيات هم وعيالهم باين النعمه عليهم تبارك الله..,

لكن وش ينفع اذا ماهو عياله الي يقومون بعزاه..,

المستشفى اليوم قلب فوق تحت بس علشانه من كثر الامه الي جات يوم سمعوا بوفاته..,

وطلعوا فيه علشان الدفن جنازته الكل يتسابق يشيلها...,

والي ياخذ عزاه ناس اغراب صلة القرابه بينهم مجرد نسب ..,

عوق بتوجس\نعرفهم انا وانت ..؟!

زياد با ارهاق \الي توفى قلت لك عنه زمان..؟!

عوق بترقب\من الي قلت لي عنه ناسيه..!

زياد وهو يدخل لسريرمرهق و بينام\الرجال الي زعلتي يوم قلت لك يشبه نمر خفتي نفاول على نموري..,

عوق تصرخ وتضرب على صدرها\بدر...؟!!!

قام زيادمفزوع \بسم الله عليك عوق وش فيك اي هوبدر..,

عوق تجلس على الارض وتعض شفايفه \انا لله وانا اليه راجعون انا لله وانا اليه راجعون..,

زياد يحاول يقومها \مسكين موته افضل من حياته تعذب طول عمره مريض..

عوق بشرود ويدها على فمها\لا اله الا الله ان لله وانا اليه راجعون..

زياد بحزن \ما توقعتك عاطفيه الي ها الدرجه تعوذي من الشيطان..,

اغسلي وجهك عن هالدموع ونامي " قل لن يصيبنا الا ما كتب الله لناّ"..

عوق تحاول تتمالك نفسهاوتمسح دموعها \وانت وش ها المعرفه تروح تعزي فيه والا توقف بجنازته..,

زياد بنعاس \ماهو بس انا العيال كلهم الي معانا با الاستراحه وقفوا بعزاه..

المهم بكرا لاتنسين با اخذك انتي وخواتي تعزون اهله...,

عوق بوجع \طيب..,

غسلت وجهي ودخلت لسرير وغمضت عيوني اوهم زياداني نمت انتظره ينام..,

ولما انتظم تنفسه وحسيته نام طلعت من الغرفه..,

نزلت تحت ودخلت المقلط وبكيت بشده بكيت الاب الي ماشفت الا صوره..

الاب الي هو سبب عذابي وانا سبب عذابه ماادري ليش بكيت..!

هل هو حرقه على شبابه الي قضاه على كرسي..؟!

والا على ان بنته ما تقدر توقف بعزاه او فعلن مقولة ان الدم يحن صحيحه..؟!

انا جيت لدنيا وانت بعيد والحين انت طلعت من الدنيا وانا بعيده..,

ما الي حق اشوفك حتى وانت بكفنك..,

وحده بوحده ما شفتني بكافولتي..!

ولا شفتك بكفنك..؟!

يارب ثبتني ولا تفضحني وارحمه واعف عنه وتجاوز..,

عسى مرضه كان تكفير ذنوب ..,

نمت بمكاني بعد ما بكيت الاب الي يمكن ما درى هو كان له بنت اولا..,

لكن شعور حزين اكتساني عليه ما ادري ليش ..,

صحيت على صوت باب البيت شكل زياد طلع لصلاه..,

صعدت بسرعه فوق قبل يرجع زياد..,

تطمنت على عيالي وصليت دخلت سريري بنام اكيدزياد بيسألني وين كنت..,

لكن زياد دخل الغرفه قبل انام..,

زياد يبتسم\صباح الورد وينك صحيت ماشفتك..,

عوق بتردد\ها ايه نمت بغرفة عيالي..,

زياد بشك\دخلت غرفتهم ماشفتك ..,

عوق بخوف\ايواصح نزلت اشرب مويه..,

زياد يغير لبسه ويستعد لنوم\ وش ينزلك والمطبخ الي هنا فيه ثلاجه وبراده..!

المهم لاتنسين بس كلمي خواتي علشان تروحون تعزون اهل بدر..,

عوق تصرخ بذعر\لاااااااا

زياد بحده \وش فيك انتي كل ماجبت طاري ها العايله كن ضاربك شوط كهرباء..,

عوق\ لا لا لا مافي شي مافي شي بس انا تعبانه..,

زياد با استغراب\غريب امرك عن جد..؟!

اردف زياد بتهكم\امس سعد وسالم كانو موجودين با العزا ويناظروني بحقد..,

سألني فهد هذولا وش فيهم عليك..؟!

قلت لا بس زوجتي ربتها حرمة ابوهم وماخذين موقف مني..؟!

عوق بخوف وألم \ومن فهد بعد هذا..,

زياد\هو الي علشانه حضرنا العزا انا والعيال ..,

عوق بتوتر \وانت وش عرفك فيه..,

زياد\كان يدرس با امريكا معي من زملاء جزاع مهندس متزوج من خوات بدر اتوقع..؟!

عوق بذعر \ ولك علاقه فيه الحين..,

زياد\كنت اعرفه عرفت وجه ايام الدراسه..

والحين لا والله كثير اشوفه با الاستراحه اذا اجتمعنا وتعرفت عليه اكثر..,

اردف زيادبا استغراب\لكن الي الحين ماني مصدق ان امك تقرب لبدر..,

عوق بحده \وانا وش دراني من يقرب لها من مايقرب لها..,

امي شكل الناس هربوا عنها ولا يتقربون لها من يوم اخذتني من دار الايتام..,

وبعدين اي طريق يمسكونه عيال ناصر والا اي مكان تدوسه رجولهم انا ما اجيه..,

ولا اوصله لاهم ولا اي احد كدر خاطر امي وضحى والا زعلها..,

زياد يهز راسه بقلة حيله\لا حول ولاقوةالا بالله انتي فيك بلا يبي لك تراجعين اخصائي نفسي..,

عوق بسخريه \ مافيني غير العافيه لكن الي قهروا امي وهي حيه..

ما ابي لا اعرفهم ولااعرف حتى الي يعرفونهم هذولا ناس الله يكفينا شرهم طماعين وحسودين وعيونهم حاره..,

زياد \اقول روحي بس شوفي عيالك اسمعهم يصيحون شكلك بتموتين وانتي شبح سالم وسعد وراك..,

عوق بغضب مصطنع وهي تمشي بالغرفه وتدعي\ حسبي الله عليهم, حسبي الله عليهم..

حتى سيارة امي طردوا السواق واخذوها لو بيدهم كان نوموني با الشارع ولا تبيني اكرهم..؟؟!!

طلعت لعيالي وحمدت ربي اني لقيت سبب لثورتي على زياد الي هم سالم وسعد

اول مره يصير لكم فايده الله يسامحكم مثل ما عطيتوني سبب اعتذر فيه عن اني اروح اعزي بوفاة بدر

ياربي والله ما احقد عليهم سامحتهم ونسيتهم لكن وش اسوي ما قدامي الا هم عذر اهرب فيه من قرب اهلي..,

بعد وفاة بدر جلست كم شهر وانا ما ادري ليش صرت بس افكر فيه..!

اصحى وانام اتخيله قدامي خصوص بعد ما شفت صوره ليتني ما شفتها..,

يعني لو انا تبرعت له يمكن كان عاش حتى زياد لاحظ ها التغير ..,

ونزل وزني بشكل خوف زياد وكم مره يصر اني افحص فحص كامل ولا يطلع فيني شي..,

وحاول زياد يعرضني على اخصائي نفسي ولا شيوخ يقرون علي رفضت لأني عارفه علتي ..,

قررت با الأخير اسأل زياد يمكن عقلي يرتاح من التفكير فيه..,

عوق بترددوتوجس \ زيادتذكر الرجال ذاك الي قلت فيه من نموري الي توفى الله يرحمه..,

زياد با اهتمام\ ايوا اذكره وش فيه الي يجيك بلى اذا سمعتي طاريه..

عوق بتساءل حذر \هو ماعنده عيال..,

زياديناظرعوق با استغراب\ تستهبلين انتي والا ناسيه ماقلت لك الي قام بعزاه انسباه ماعنده لاعيال ولابنات..,

عوق با ارتباك \اي صح تذكرت كلامك..,

اردفت عوق\ يمكن لو تزوج قبل حادثه جاي عليه عيال..!

زياد بسخرية وانتقاد\كيف يجي له عيال حادثه كان بمرحلة الطفولة قبل يبلغ يمكن 10او 11سنه عمره ..,

عوق با استغراب \وانت وش دراك ..,

زياد\ الكل عارف قصته ان ابوه شاري له سياره مسكين مستعجل عليه يبيه يكبر واخذ السياره وصدم فيها..,

عوق بنفسها\ يا الله كيف الناس تقلب الحقايق بدر عمره كان 15سنه وقت حادثه ..,

احمد ربي اني ماتهورت بيوم وقلت اني بنت بدر من بيصدقني..,

ومشاعل من بيصدق انها حملت منه..,

الله يعوضك عليتس يا مشاعل محد خسر غيرتس با الاول والا خير..

زياد بضحك\ وين رحتي يا ام سرحان..,

عوق بتوتروارتباك \لا ابد معك لكن تذكرت كلامك يوم تقول انه بسم الله علينا وعلى عيالنا

مصاب بسرطان الدم ومات بعز بشبابه..,

يعني لو كان له ولد وتبرع له بنخاعه كان يمكن يعيش..,

زياد\الله يرحمه حادثه سبب له عجز كامل وينه وين العيال..!

عوق بخوف \لا ما اقصد يعني لوان حادثه صار وهو عنده عيال بينفعه لو تبرعوا له..؟!

زياد \تحصيل حاصل اذا على الحاله الي انا شفتها والعلم عند الله ما راح ينفعه ..!

طلب مني فهد اخر مره طلعت لألمانيا اعرض تقاريره على اطباء هناك ومختصين با امراض الدم..,

التقرير النهائي لوضعه مافي امل لكن اهله هم الي كانوا يحاولون انهم يلقون له علاج

في مثل حالته في الوقت الحالي الطب وقف عاجز عن علاجها..,

لكن يكفيه انه صبر على اوجاعه وحرمانه من شبابه وان يكون عنده ذريه تحمل اسمه الله يعوضه الجنه..

عوق با انكسار\امين ويعوض امي وضحى ..,

اردفت عوق بتردد\زياد صدق ان التبرع با النخاع يسبب شلل او ان المرض ينتقل للمتبرع..,

زياد يبتسم \ اموووووت فيك وانتي تاخذين وتعطين با الاسئلة يعني تحاولين تدخلين مجالي ..,

اردف زياد\شوفي هو ماهو اي واحد يتبرع..,

التبرع يكون على اساس نسبة التطابق النسيجي بين المتبرع والمريض..,

وبالنسبة للمتبرع مافي اي ضرر عليه ولا راح يكون عليه اي مخاطر صحية..,

وجسمه قادر على تعويض كميه نخاع العظام أو الخلايا الجذعية التي تبرع فيها في وقت قصير..

واصلن ما يحتاج انه يتنوم با المستشفى اكثر من 24 ساعه هذا يبين لك سهولة التبرع..,

عوق بدهشه \طيب والمخاطر الي نسمع فيها انها تصيب المتبرع..؟!

زياد بضحك\هذي من المفاهيم الخاطئه والشائعه بين الناس مالها اي اساس من الصحه ..,

اردف زياد\على طاري الطب والعلاج..,

تدرين عقم امك كان بسيط لو كان في وقتناهذا بتتعالج بكل سهوله..,

عوق بتساءل \كيف عادي ...؟!

زياد\الي فيها ورم ليفي ينشال وتحمل لكن اهمل وتطور وتحول لورم خبيث..,

الطب وابحاثه با الثانيه في تقدم كل يوم فيه شي جديد..,

عوق با استغراب \سبحان الله انحرمت من الامومه بشي بسيط..,

زياد \وامي الله يرحمها سبب موت اطفالها على ضخامة جسمها ضيق با الحوض..,

ما يسمح لطفل با الخروج طبيعي يختنق ويموت...,

واحيان امهات عندهم ضيق حوض يولد الطفل طبيعي لكن ضغط الحوض على راس الطفل

يتسبب له نقص في الاكسجين أثناء الولادة أو حدوث نزيف بالمخ مع الولادة تعتبر من الأسباب الرئيسية

لتخلف العقلي للمولود ...!

العمليات اسلم حل على ان الكثير يخاف منها..,

لكن سبحان الله فيها حياة كثير من الامهات والا طفال..,

اردف زياد بممازحه\وانتي تسمينا القصابين..؟؟!!


مرت الايام سريعه كلمتني مشاعل على الثابت وطلبت تزورني وخصوص انها خلصت العده..,

بتشوف عيالي اخر مره شافتني من اكثر من 4 سنين ..,

اتفقت معها انها تجيني الصباح يكون اهل زياد ماهم موجودين...

وزياد بشغله علشان مافي احد يشوفها عندي ..,

جاتني مشاعل كان معاها سواقها وخادمتها..,

عوق بحزن\اعذريني يا مشاعل ما قدرت اكلمك والا اجيك اعزي انتي عارفه الوضع..,

مشاعل \عاذرتك يا عوق الله يرحمه ارتاح من العذاب الي شافه وخلاني وراه ليتني رحت وراه..

عوق بوجع \الحمدلله على كل حال الحين هو راح لرحمة ربه وانتي خلاص شوفي حياتك..,

مشاعل بتهكم \وش اشوفها فيه تبينا ننفضح على اخر حياتنا..,

عوق بتأثر \ماهو شرط تزوجين ما وقفت على العرس اشغلي نفسك التحقي بدار تحفيظ اكفلي لك يتيم..,

اكسبي اجره شوفي ما شاء الله زياد كفلته العنود الله يرحمهاوالله لو عيالها ما يسوون سواته..,

الله يجزاه خير حتى بنته سماها عليها ..,

مشاعل \بحاول لو اني عارفة اني بواجة رفض من خواتي وبنات عمي الكبار..,

عوق\لا والله حاولي فيهم يوافقون واضغطي عليهم من جهت انك صرتي وحيده وهم كلن لاهي بحياته..,

وخلي خواتك يرضعونه علشان المحرميه بينكم..,

والله كفالة اليتيم مافيها الا تبارك باالرزق ..,

مشاعل با انكسار\صادقه ..,

عوق بتردد\مشاعل بسألك واذا ما بغيتي تجاوبين بكيفك..,

مشاعل با ابتسامه موجعه\اسألي ..,

عوق با ارتباك\بدر الله يرحمة كان عارف بوجودي ..,

مشاعل تتنهد بحسره \الله يرحمة قلتها له بيني وبينه ان لنا بنت اول شي ماصدق وتهجم علي بكلام جارح

وفسر الموضوع اني مليت من وضعي معاه واكيد شايفه لي شوفه وسكت ما ناقشته بشي..,

عوق بذهول\يعني مات ولا درى بوجودي..,

مشاعل بالم وحسره\ محد يدري بوجودك الا انا وساره..,

ماصدقني يوم قلت له عنك ..؟!

ما صدق الا ساره يوم خبرته بوجودك وانه محتاجين منك تتبرعين له بنخاع

ورفض وقال لساره اقطعوا السيره مره وحده..

عوق بمراره\هو درى انا عايشه مع مين ..,

مشاعل \لا ساره قالت له انك عايشه بملجأ واذا يبغاك تقدر تجيبك له يشوفك وترجعك للملجأ..,

عوق بتساءل\وافق يشوفني..؟!

مشاعل بحزن\رفض قال ما ابي اشوفها وانتو انسوها خلوها با الملجأ ولاتحاولون تبحثون عنها

يكفي واحد يتعذب ولا الكل ..,

عوق تبلع غصه\ هو صادق واحد يتعذب ولا الكل ..!

مشاعل بحزن وشوق\وينهم عيالك ما شفتهم..,

عوق\ نمر يدرس والصغار الحين بجيبهم تشوفينهم..,

طلعت من عندها ورجعت بعيالي الصغار من يوم شافتهم مشاعل بكت والصغار بكوا معها..,

مشاعل تمسح دموعها الحاره بطرحتها \يا قلبي روعتهم بسم الله عليهم..,

عوق بمزح \ان بكيتي مره ثانيه ما اخليتس تشوفينهم هاه وش رايتس فيهم..,

مشاعل \ماشاء الله يحفظهم لك يهبلون اخوهم الكبير ما يشبهون له كل واحد فيهم غير..,

اردفت مشاعل بترجي \اقدر اصور عيالك بجوالي..,

عوق بحزن \تكفين مشاعل لا اخاف احد يشوف الصور ويطلع لنا شي حنا في غنى عنه..,

مشاعل وتغالب دموعها لاتنزل \براحتك..,

عوق بتأثر\والله علشانك انتي ما ابي افتح عليك باب واجيب لك الكلام..,

اردفت عوق\ كيف قدرتي تجيني محد سألك وين رايحه..؟!

مشاعل \وحده من خواتي ساكنه هنا قريب منكم وجيت عندها اغير جو طفشت من الوحده ..,

وقلت لهم بشوف وحده من صديقات خالتي وضحى وجيتك..,

حافظه عنوان بيتكم من المره الي طافت...,

عوق با استفهام\فيه من خوات بدر زوجها مهندس اسمه فهد..؟!

مشاعل\لا هذا زوج اختي ضي الي انا عندها الحين وحده من التؤم اخر ما ولدت امي الله يرحمها ضي ومضاوي ..,

عوق بنفسها\ياربي دخيلك طلع فهدصديق زياد زوج خالتي ماهي عمتي لا وزياد يبيني اتعرف عليهم

والله لا ادفن نفسي با الحياه ولا اخلي احد منهن يشوفوني بعد رأي بدر فيني واحد يتعذب ولا الكل ..

مشاعل\وش فيك ازهمك ما انتي معي بمشي لكن قبل بشوف نمر فديته بس شوي ..

عوق با ارتباك\ لا معك نمر على وشك ما بقى شي ويرجع من المدرسه..

واخذتنا السوالف ومن حسن الحظ ان الي رجع نمر باص المدرسه والا عادة زياد هو الي ياخذه ويرجعه من المدرسه..,

غيرت لنمر لبسه وقلت انزل عندنا ضيوف يالله سلم نزل معاي ورفض يسلم..,

مشاعل بعطف تنادي نمر\تعال سلم علي ..,

نمر \عيب الرجال يسلم على الحريم الاجنبيات عنه..,

عوق\ سلم وبلا طولة لسان..,

نمر\ماعرفنا لكم تقولون اذا شفت حرمه غريبه حرام تناظر والحين تقولين سلم..,

عوق\هذي صديقة امي يا الله سلم وانت للحين صغير..,

نمربا استهزاء \مره صغير ومره كبير على كيفكم..,

عوق بحده\ما اقول الا الله يصلحك..,

نمر \ويصلح ساري ومساعد بعد..,

عوق بضحك\ الله يعين ها المساكين عليك..,

طلع نمر وهو رافض يسلم على مشاعل يقول ما يصلح اسلم على حرمه ما تقرب لنا..,

مشاعل تأثرت لكن مافي يدي ولا يدها شي نسويه وطلعت من عندي تبكي وانا نفسيتي مره تعبت من شوفة مشاعل..,

طلعت للمخزن ونزلت ملابس امي وختمها ما ادري ليش اشتقت لريحتها..,

ضميت ملابسها الي باقي ريحتها فيها..,

ختمها يذبحني اذا شفته ما تخيل الا اصابع يدها يوم تمسك الختم وتختم به..,

زياد با استغراب \انتي هنا وانا قلبت البيت عليك ..؟!

عوق تمسح دموعها وتحاول تتمالك نفسها\خلاص بنزل..,

زياد\ابفهم الي متى وانتي كذا..؟

عوق بخوف \ليش وش فيني..؟!

زياد\ طلعاتك هنا كثرت وتنزلين عيونك حمرا من البكى جيت بشوف وش فيها ها الغرفة..؟

لقيت شنطه وداخلها ثياب غريبه توقعتها لخالتي الله يرحمها..,

اردف زياد\ما يصلح الي تسوينه بنفسك امك لها اكثر من سبع سنين متوفيه وانتي كل مالك تجددين حزنك عليها..,

عوق\ والله لا اراديآ كل ما اشتقت لأمي اروح اطلع ملابسها واشمها ارتاح احس للحين ريحتها فيها..,

وخصوص ختمها احس انها قدامي اذا مسكته بيدي لا تستغرب زياد الي اسويه..,

يمكن علشاني بنت والبنات طبعهم عاطفيات اكثر وما ينسون..,

زياد يجلس على الارض جنب عوق ويضمها \تدرين اني احاول ما ابين للعيال ان العنوداقرب منهم لنفسي

على انهم كلهم اولادي لكن ها البنت احن عليها احسها غير عنهم اثاريها طالعه عليك ..,

عوق تضحك والدموع بعيونها\يمكن علشان قرعوطاتها فديتها تذكرك با امك الله يرحمها..؟

زيادبضحك\ والله يمكن ليتها مثل شخصية امي العنود و لو مساعد يطلع مثل شخصية ابوي مساعد بكون محظوظ..,

نزلت انا وزيادتحت وكل واحد منا يشيل بقلبه حب وتقدير..,

للأمهات الي اخذونا وربونا واحسنوا تربيتنا زرعوا وحصدوا..,

انا وزياد ما ننساهم لا بصدقه باينه والا خفيه..,

ندعي لهم بصلاتنا ونذكرهم بخير ونستغفر لهم كل ما تذكرناهم والا احد ذكرهم قدامنا..,

لمونا من ضياع واحسنوا لنا الله يلم اعظامهم با الجنه ويحسن اليهم..,


بعد كم شهر سمعت من زيادان مشاعل اكفلت ولد وبنت من دار الرعايه..,

كانوا مواليد وخلت اختها الي متزوجه صديق زياد..,

فهد ترضعهم على بعض علشان يكونون محارم لها وبنفس الوقت اخوان من الرضاعة..,

وان شاء الله تزرع فيهم خير وتحصد خيروحتى زياراتها انقطعت انشغلت بعيالها الي كفلتهم..,

وخصوص بعد رفض نمر انه يسلم عليها كان له اثر قوي انها ما تطلب تشوفني..,

حاولت تتواصل معاي عن طريق الجوال انا رفضت انها تكلمني ما ابي افتح على نفسي ابواب مسكره..,

اخبارها توصلني من زياد كنت اخذ منه اخبارها بطريقه غير مباشره..,

انا شفت حياتي وقدرت أأقلم نفسي مع وضعي مجهولة نسب تزوجت من رجل مجهول النسب وسعيده بحياتي..,

لكن الشي الوحيد الي مثل الموس بحلقي هو اني مجهولة النسب بنظر المجتمع..!

لكن بيني وبين نفسي اعرف اهلي ولا ابي اطلع بحياتهم واهدمها ما يعرف مكاني الا مشاعل..؟!

صرت لها مثل النار بفصل الشتاء تمرني من بعيداتدفى بي ولا تقدر تقرب مني تخاف اني احرقها..,

وامي وضحى ما نسيتها ريحتها مافقدتها بقت في ملابسها الي عندي كل ما اشتقت لها طلعت ملابسها اتخيلها قدامي..,

اشمها واضمها احسها تعطيني طاقه ودافع للحياه..,

واني اعطي اولادي مثل ماعطتني امي وضحى ..,

ضحت بكل شي علشاني با البر الي هو هوى نفسها..,

وابعدت عن عيال ناصر الي كانت على الرغم من انها تشوف طمعهم فيها

الا انها راضيه ومتصالحه مع نفسها شاريه راحت بالها..,

لكن يوم وصل الموضوع انهم غلطوا علي..,

مارضت علي وقفتهم عند حدهم..,

على الرغم من كل المواقف والاحداث الي مرتني وشفت كثير من مصايب الناس الي مرو علي..,

وعلى صدق المثل الي يقول من شاف بلاوي الناس هانت عليه بلوته..,

ما شفت بلوى اكبر من انك تطلع لدنيا ويطلق عليك مجهول نسب...,

لكن مع هذانا وزياد نتأمل انا نكون اسره مثاليه ونربي اولادنا ونحرص عليهم مثل ما ربونا الي كفلونا..,

بحب وحرص ومراقبة الله بكل صغيره وكبيره بحياتنا وحياة اطفالنا..,

لما تمرني لحظات يأس وخوف على مستقبل اولادي ونظرة المجتمع لهم ..؟!

كان زياديشجعني و يقول

لنا رب رحيم ما ضيعنا تخلو عناالي جابونا لدنيا..,

وعوض علينا سبحانه وتعالى با اهل افضل منهم ..,

نسيت اقولكم الختم اخذه زياد لأنه هو كان اكثر شي يخليني انهار وابكي كل ما شفته..,

ومخبيه بسيارته لقاه نمر وجابه لي يبني اعرف وش مكتوب فيه..,

ها الولد فضولي ما ادري من طالع عليه..؟!
.
.
تمت بحمد لله.
.
.
(كلمه اخيره)

عن عائشة رضي الله عنهاوارضاها مرفوعا { من أتى إليه معروف فليكافئ به فإن لم يستطع فليذكره فمن ذكره فقد شكره . }

اشكر من كل قلبي خواتي وبناتي الي تابعوا معي الرواية وماقصروا معي با الردودالي كانت تبهرني يضيق المتصفح بذكرهن..,

تشرفت ان قامات عاليه زينت نوح الحمام بمرورها الراقي من امثال كاتبتنا الأسطوره انفاس قطر,والمبدعه بلاحدود ام وسن ,

والكاتبه المميزه ساعة بلاعقارب ,

والشكر موصول لصديقه غاليه الي مهما قلت ماراح اوفيها حقها من الشكر وكانت تدعمني من خلف الكواليس..,

واول ماعرضت عليها الروايه قالت نزليها بقلب جامد تستحق ان البنات يقرونها..,

وهي الي اختار ت لنوح الحمام ولزياد ها الاسماء لأنها كانت محيرتني طول ما انا اكتب الروايه

ماقدرت استقر على اسماء لهم وهي حسمت الموضوع

ساعات احس با احباط وتدفعني وتشجعني ..,

الي هي ضمني بين الاهداب ام اليزيد

شكرآ من الاعماق ام اليزيد ..
.
.
ختامآ؛

عَنْ أَبي هُرَيْرَةَ رَضِيَ اللهُ عَنْهُ أَنَّ رَسُولَ اللهِ صَلَّى اللهُ عَلَيْهِ وَسَلَّمَ قَالَ :

« مَنْ جَلَسَ مَجْلِساً كَثُرَ فِيهِ لَغَطُهُ ، فَقَالَ قَبْلَ أَنْ يَقُومَ مِنْ مَجْلِسِهِ ذَلِكَ :

سُبْحَانَكَ اللَّهُمَّ وَبِحَمْدِكَ ، أَشْهَدُ أَنْ لا إِلهَ إِلَّا أَنْتَ أَسْتَغْفِرُكَ وَأَتْوبُ إِلَيْكَ ،

إِلَّا غُفِرَ لَهُ مَا كَانَ في مَجْلِسِهِ ذَلِكَ » .

.
.

طيف الأحباب

ام الوليد

تذكروني واحبابي بدعوه طيبه كل ما جيت في بالكم.