والله شي يحزن صراحه الي صار لعوق ومشاعل هذي ام مشتاقه ودها تمارس امومتها والثانيه بنت تبي تعيش حياتها بالنور وتتعامل وتتصرف بطبيعتها بدون خوف من الناس بس ارجع وأقول ان زياد عنده خبر من بعد المكالمه وأكيد انه جمع معلومات عنها وخاصه كلامه عن مشاعل يوم صادفها هذا اذا صادفها اساسا لكن هو وده يجس نبضها ....بدر يمكن ربي كاتب له الشفا والتعرف على زياد الي أكيد بتقوى العلاقه بعد الشفاء وتتشربك الاحداث بعدها هذي توقعاتي بس مدري صح او خطأ ...............الله يعطيج العافيه ويحفظ لج ويحفظ لي ذريتنا من كل سوء ويوفقهم بإمتحانتهم

السلام عليكم ياجماعة الخير. ..... أنا جاية حاطة رجلي في التانكي ذالة القصة تخلص وانا مابعد سدحت تعليقي... بلفيت يعني اخترعت الذرة خخخخخخخخخخ

يا حيا الله أم الوليد... تراني أحبش في الله يا وخيتي... وأحبش من حب أنفاسوه لش... وهي اللي كلت مخي من كثر ما تمدح قصتش..... جان أجي وأتبطح هنيا أقرأ لين وصلت معكم....

أنا عاد مغبرة من زماااااااااااااااااااااااان عن التعليقات... ما أدري عادني أعرف والا ضيعت الدرب.......... المهم قصتش حلوووووووووة بالحيل... الوكاد إنها تشبه روحش الحلوة .... أخس علي والله أعرف أقول كلام حلو أنا ووجهي

أول شيء وأهم شيء طبعا الفكرة الجديدة وتناولها بطريقة هم جديدة.. اللقطاء كظاهرة اجتماعية مسكوت عنها .. متعوب عليها خخخخخخخخخخخ... وبصراحة ياوخيتي حبيت لهجتش واجد واجد تحسينها مليانة حياة مهوب لهجة مغثة وإلا مملة... اللهجة كانت من الأشياء اللي عطت الرواية روح حلوة....

تمنيت لو ماكان نمر في البداية مع أمه... يعني تمنيت أعرف عنه من الأحداث... لأني حبيت نمر هذا واجد... لأني مابعد تنيلت وعرست وإلا كان حطيته تحت باطي

عوق وزياد ياما فقعوا كبدي ومرارتي وكان ودي أصاقع بين رووسهم لين تنفقع يمكن ينصلح حالهم ..
مشاعل أكثر حد كسر خاطري في القصة......... وأمي وضحى أكثر شخصية عجبتني... ذكرتني بناس
وجد أم الوليد قصتش فيها شيء شفاف وحلو يجذب القارئ لها... لازم نشوف لش قصة ثانية وقريب....
وإن شاء الله عقب ما تخلص القصة أرجع واسدح تعليق ثاني.... طبعا عشان نفسي لأني لو سكتت وعندي حكي أغص فيه ثمن أفنقش...


خوخة مرت هنيا وخلت بعض غبارها

بسم الله الرحمن الرحيم


اللهمّ منزل الكتاب ومجري السحاب وهازم الأحزاب أنصر إخواننا في سوريا على الطغاة الظلمة ,

اللهمّ احقن دماء إخواننا في سوريا , اللهم احفظ أعراضهم وأبناءهم وأموالهم ,

اللهمّ اجعل لهم من كل همّ فرجا ومن كل ضيق مخرجا ,

يا غياث المستغيثين ويا ناصر المظلومين , انقطع رجاؤنا إلا منك ,

ها نحن منطرحون ببابك , متذللون لجلالك ,

نسألك باسمك الأعظم أن تعجل بهلاك زمرة المجرمين , وأن تجعلهم عبرة للعالمين ,

لا إله إلا الله الحليم الكريم لا إله إلا الله العلي العظيم لا إله إلا ألله رب السماوات السبع ورب العرش العظيم.
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,


البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

اهداااء خاااااص لـ ضمني بين الاهداب , بنت خالة انفاس قطر, FARO7A ,للأوجاع قلـNــوب,موني موني ,

الصافيه ,صبا الجنوب,اللوتس الفواح,مشاعل,دوبي 55,وحيدة كا القمر,

ميروكالاينالا,Joode15.
.
.

اليوم بنشوف عوق المزايين والضيوف الجدد وعودة عهود..,
.
.
يا الله تعالوا معاي...!!

وسالفه جديدة؛

البارت الواحد والاربعين
.
.

عوق\بقول لك شي لكن ماهو اكيد..!

زياد بتوجس \قولي اسمعك..؟!

عوق بتردد\انا من يومين احس بطلق لكن مكذبه نفسي..؟!

زياد وقف بغضب\وشو .. وليش ماخبرتني وش تنتظرين ولا نسيتي الي صارلك..؟

عوق با ارتباك\ لايمكن اتوهم وش فيك عصبت ..؟!

زياد\اقول بس البسي عباتك والحقيني لسياره..؟!

عوق بخوف\زياد خايفه يصير فيني شي ...!ّ

زياد يجلس ويتنهد ويمسح وجهه \ اعوذ بالله من الشيطان الرجيم ان شاء الله مافي شي بس بتطمن عليك

وبعدين انتي اساسآ داخله التاسع من يومين..,

لبست عباتي وتركنا نمر عند نجلاءوطلعنا للمستشفى عملي زياد سونار قال لازم تنويم..!

التؤم روسهم تحك في بعض ومتضايقين ونازلين واحتمال اولد قريب..!

عوق تبكي\ خايفه يصير فيني مثل اول..,

زياد\لاحول ولاقوة الابالله انتي بس اهدي وانا متعمد اني احجز ك هنا..؟

علشان ترتاحين من المراكض ورى ولدك عمومآوضعك تمام ولا يحتاج تنويم..

عوق \انت تقول روسهم تحت كيف ما احتاج تنويم..؟!

زيادبطمئنه\عادي انتي داخله التاسع هذاوضعهم الطبيعي ..,

عوق\طيب اذا كل شي طبيعي بطلع تركت نمر عند نجلاء يمكن يتعبها..!

زياد بحده \نجلاء طفله ما تفهم للأطفال يعني مديرة مدرسه وعندها احفاد

بتعجز عن ولدك ارتاحي ولا تفكرين الا بنفسك..,

تنومت بقسم الولاده والي كان مشرف على حالتي زياد بنفسه

عرفت كلام زياد كان بس يطمني..؟!

لأن ثاني يوم كان معي اعراض ولاده..؟!

يارب عونك ضاق بي كونك مامعي احد بغرفة الولاده الا ممرضات...,

زياد عرض علي ان بشرى ترافق معاي بما انها ممرضه ورفضت..,

ما ادري سحا منها والا اني ما ابي يكون لأحد علي فضل..,

تمنيت بهالموقف امي واقفة عند راسي والا فارشه سجادتها تصلي وتدعي لي..,

خوات زياد استغربوا مني اني طلبت اذا تعسرت ولادتي زياد يولدني سواء طبيعي او قيصري..,

رغم احساس الاحراج منه الا اني حاطه قدام عيوني انه مالي بعد الله الا زياد...

هو ستري وغطاي وانا ستره وغطاه بعد معاناه مع الطلق والآم الولاده قرر زياد ان ولادتي بتكون قيصريه..

انا تعبت والاطفال قلوبهم تعبت من الطلق وافقت على العمليه..

وفي غرفة العمليات ما فقدت الامل بالله كنت ادعي ان ربي يسر ولادتي الي اخر لحظه..

حتى وانا على سرير العمليات توسلت لله تعالى بكل عمل خير سويته انه ينقذ حياتي وحياة اطفالي..

تخيلت انهم يعيشون وانا اموت ومن بيبقى لهم ماعندي لاام ولا اخت تراعيهم

لامن جهتي ولامن جهة زياد اثنينا مقطوعين..,

دعيت الله انه يمد بعمري وعمر ابوهم ونربيهم هم واخوهم بما يرضى الله ..,

شريط حياتي كان يمر قدام عيوني امنايتي واحلامي طفولتي ومراهقتي الي ماعشتها..,

عرفت قسوة امي كانت بمحلها حتى مشاعل جات في بالي وتذكرت كلام امي..,

يوم قالت ان مشاعل يوم كانت حامل فيني تقوم وتطيح طفله وبطنها اكبر منها..,

وش اسوي يا مشاعل مابيدي حيله ولا اقدر ابرك واعاملك مثل معاملة اي بنت لأمها..,

هذا فعل يدينك ومجبوره انك تدفعين الثمن وتدفعينياه معاك.

دعيت ان ربي يفرج همها وتسامحني على قسوتي عليها معاملتي لها من خوفي عليها..,

تيسرت ولادتي ولدت طبيعي بفضل الله بعد 10ساعات من المعاناه من 6المغرب الي 4الفجر..

زياد \ الحمدلله على السلامه ترى نادر ما يولدون الحريم طبيعي با القسم هذا..

عوق بتعب\الحمدلله كما ينبغي لجلال وجه وعظيم سلطانه ماني مصدقه اني افتكيت..

زياد بفرح\ربي سهل امرك تدرين ثواني ونعطيك ابرة تخديرونفتح بطنك مباشره لكن رحمة ربي سبقت..

عوق بتعب \كيف التؤم..؟

زياد يبتسم\ما شفتيهم..؟!

عوق\الا بس ما ادري شفتهم واحس اني ما شفتهم..!!

زياد \لا ماعليهم طيبين انتي ارتاحي وذا نزلناك للجناح ان شاء الله بيكونون معاك..,


حملي وولادتي بتؤم كانت صعبه وسهله بنفس الوقت اهون بكثير من حملي بنمر

زياد كان عارف من اول شهر انهم تؤم..

لكن ماخبرني الا بعد الشهر الثالث كان يمهد لي بكل طريقه انهم اثنين علشان ما اتفاجئ..

حتى يوم قالي اثنين ما تفاجئت لأن امي وضحى معلمتني ان وسميه ام مشاعل اخر ما ولدت تؤم بنتين..,

لكن انا الي اختلف عن ام مشاعل كان حملي ولدوبنت..

بعد ما نزلت لقسم التنويم كنت مهدوده بس ابغى انام على ان قلبي مشغول على نمر..

ما شفته من يوم تنومت زياد كان بيجيبه لي لكن خفت عليه من الامراض او اذا شافني يتعلق فيني ولا يطلع..,

نمت وصحيت على طق باب الغرفه كانوا اهل زياد خواته نجلاء وبشرى

معاهم عبير ومجد واصايل سلموا علي وباركولي ..,

نجلاء بفرح\ الحمدلله على السلامه وش المفاجئه الحلوه..

بشرى بمعاتبه \الف مبروك لو اني زعلانه منك..

عوق منحرجه\الله يسلمكم ويبارك فيكم لا يصير بخاطركم شي ما بغيت اتعبكم والا داريه انكم ما تقصرون..,

اصايل\ما عليك عوق ترى امي تجاملك والا مندبله كبدها من خواتي داخله طالعه للمستشفى..,

مجد\تصدقين خالتي بشرى معلقه عباتها عند الباب علشان ماتتعب تدورها..,

تلبس وطيران للمستشفى تلحق بناتها هذي حامل وهذي والد..,

نجلاء\ اذكري الله يا مجد محد سالم من لسانك..,

اصايل\ عوق من الكبير البنت والا الولد..,

عوق تبتسم \لا الولد اكبر من البنت بربع ساعه..,

دخل زياد وهو يضحك\اصواتكم يسمعها الي بآخر الممر ..,

عبير \الف مبروك خالي ليش ماخبرتنا ان زوجتك حامل بتؤم..

زياد يضرب راس عبير بممازحه\ لو قلت لكم ماراح تفرحون مثل كذا مفاجئه احلى ..,

مجد تهز راسها با استنكار\يا نصبك يا خالي احلفك بالله وتحلف لي ..,

نجلاء بعصبيه \ بنت وش ها الالفاظ..,

زياد يضحك\ماعليه نجلاء مجوده تتدلع على خالها..,

التفت زيادلمجد\وش اسوي فيك قلتي اسألك بالله يا خالي حرمتك حملها بنت قلت لك ايه بنت وانا صادق..,

مجد\تدري اني غبيه كنت احسب محد يعرف غيري وانك خصيتني بسر من اسرارك وخبرتني انها بنت..,

وانا شايفه نفسي عليهم عارفه ان زوجتك فيها بنت..

اصايل\لا والله انا الي اغبى منك اكلت قلب خالي وكنت اقول عندي احساس انه ولد..

وهو يسلك لي يقول ماشاء الله عليك كيف عرفتي انه ولد خليه سر بينا مافي احد يدري غيرك..

زياد بضحك\طيب بالله وش كذبت عليكم فيه انا جا لي ولد وبنت ماكذبت عليكم..

نجلاء \ما عليك منهم بلو ط وعلقم صاروا حريم وبيعرسن وهن العقول الله با الخير..,

عوق \عاد كل شي ولا مجد واصايل الا العقل والثقل ومحظوظين الي بياخذونهم..,

مجد\فديت يا ناس الي يقدرون عسى ربي ما ياخذك ويخليك للمزعج الي اسمه نمر..,

بشرى تبتسم\استغربت اول مادخلنا ما سألتي عن نمر..,

زياد\ لا تذكرينها تراها اتصبر عنه..

نجلاء \الا جو الي بيخلونها تسحب عليه..,

عوق وعيونها دموع\لا والله نموري محد مثله..

زياد بضحك \ما قلت لكم تتصبر الحين وش بيوقف ها الحنفيات اذا اشتغلوا..,

عبير \عاد حنفيات عوق الله يعينك بتسبب فيضان با المستشفى ..,

مجدبمزح\وهذا مشكلة الي عيونهم كبار الحمدلله ان عويناتي صغار طالعه على عمي بنيان وهذي من مميزات العيون الصغار..,

نجلاء بضحك\ الله يخس ابليسك عليكي اسلوب ما ادري كيف..,

زياد \تعجبني بنت اختي كل شي تعتبره من صالحها ها الحين عيونك الي كنها عيون صيني ميزه..!

مجدبسخريه مصطنعه \اكيد ميزه اجل عيون زوجتك الكبار ماشاء الله تبارك الله

علشان ماتاكلني معجبتك استغفر الله بس..,

مافي ميزه لعيونها الا اني ودي البس برقع اذا شفتها لابسته ..,

نجلاءتضرب على راسها بقهر\ والله مدحك ياعوق لها ماهو بمحله ترى اسلاك مخها ضاربه ها البنت..,

عوق تبتسم\ وش فيكم عليها والله كلامه عسل على قلبي..

مجد\يلوموني بحبك يا عوق اهم شي بس ان بنتك مزيونه

ترى دايم البنات هم الي يطيحون فيهاخصوص بعوايل المزايين يجون شيون..,

اصايل\لا عاد يويلكم كانها شينه انتي وخالي..؟!

نجلاء \يعني من بتطلع عليه شينه زياد وعوق كلهم ما شاء الله..,

بشرى بضحك\والله هي ان شاء الله بتطلع حلوه اذا بس افتكت من دعاوي زياد..,

زياد يبتسم\حرام عليكم وش قلت انا احد يدعي على ضناه..

عبير\والله انت يا خالي كسرت القاعده والا احد يدعي ان بنته تشبه جدتي العنود الله يرحمها..,

زياد بحب وامتنان \ امي العنود بعيني اجمل نساء الارض ليت بنتي مثلها وبشخصيتها..,

نجلاء بحزن\خالتي الله يرحمها ما يعرفها الا الي يقرب منهامن برى قويه وقلبها ابيض من حنانهاتبكي للي ما تعرفه..,

عبير \خالي وين عيالك بنشوفهم..!

نجلاء\اخترت لهم اسامي والا باقي..؟!

زياد يناظرعوق \للحين بما اني رجل ديمقراطي المره هذي عوق هي الي بتسمي انا يكفي سميت نمر..,

عوق\ اهم شي انهم يطلعون با السلامه والا الاسامي اتفق انت والبنات انا ماعندي مشكله..,

مجد تناظر زياد بنص عين \انا اذكر ناس كانوا يقولون اذا جتنا بنت بنسميها على جدتي العنود..,

زياد\ هذا الي انا مقرره واتمناه لكن بعدين شاورت نفسي لقيت ان ام عوق تستاهل بعد من يسمي عليها..,

عوق بحزن\ لا امي وضحى ماراح اسمي عليها هي حالفه اني ما اسمي بااسمها تبي البنت العنود عادي ..,

بشرى \سبحان الله الطفل ينولد واسمه مكتوب له حتى لو اتفقتم تسمونه اسم معين ..!

زياد\صادقه بشرى انا قبل كنت مقرراسميهم على ابوي مساعد وامي العنود لكن الحين احس اني احترت..,

اصايل \والله بكيفكم اهم شي بنشوفهم ولا حقين على الاسامي..,

زياد \با الحضانه توني جاي من عندهم..,

عوق بخوف\ لا يكون فيهم شي..؟!

زياد بطمئنه\ طبيعي الوضع هم اثنين وكانو شوي ضاغطين على بعض..,

ومعاهم صفارلازم يقعدون فتره هنا نتطمن عليهم يومين با الكثير ويطلعون..,

عوق تبكي\ الحمدلله على كل حال..,

نجلاء \وش فيك عادي عبير بنتها فيها الصفار تحت الضو ء اقل من اسبوع واطلعت ..,

عبير\احمدي ربك ليش تبكين ارتاحي لا حقه على شقاهم..,

عوق\نفس الكلمه انقالت لي يوم اولد نمريعني لازم كل ولاده اسمع هالكلمه..,

بشرى \ لاحول ولاقوة الا بالله الحمدلله هذي ولا غيرها البارحه نمر بسم الله عليها لو تشوفينه ذبح خليل يمعط بشعره..,

زياديضحك\والله قهرني بلي سواه بخليل لكن ناجي حلف اني ما اقوله شي عنيف ها الولد..,

اصايل\خليل يا قلبي خكري ومع ها الكدش الي مسويته دينا صاير شكله خطير..,

مجد\لا عاد فرق اشكالهم على ان نمر اصغر منه ما شاءالله شكله ابوه يوم يسحبه ..؟!

نجلاءبقهر \زياد تكفى لا توقف بحلقي ها المره اي احد يجي يخطبها بزوجه وانا مغمضه..,

مجد\ماعندي مانع اهم شي مزيون وطويل مثل خالي..,

اصايل بسخريه مصطنعه\اما عاد مثل خالي شوفي ما ابي اقول تحبين كوعك يمكن تقطعين يدك وتحبين كوعك..,

انتي متوقع منك كل شي لكن لو تحبين علباك ما يحصل لك مثل خالي..,

مجدبخيبة امل مصطنعه \ اجل باشوف ولدكم الجديد يمكن يشبه خالي والا نمر ماله فيه الا طوله والا ملامحه لعوق..,

زيادبممازحه\موافق لكن بشرط تثبتين لنا حسن سيره وسلوك حتى يكبر ولدي واخطبك له..,

عبير\عاد خالي انت لاتستعجل على ولدك اتركه على راحته لا تزوجه الا وهو كبرك..!

مجدبا استنكار\يا ظالمه كم بيكون عمري 100سنه..؟

زياد \الي اوله شرط اخره نور..,

اصايل بضحك\ تكفون بنشوف التؤم مجيده احلمي يا ماما على قدك ..

طلعوا يشوفون التؤم وانا اعتذرت اني تعبانه بشوفهم وقت ثاني..,

خفت بداخلي انهم مثل وضع نمر ياترى ها المره من بيشبهون عيالي اهلي والا اهل زياد..

يارب ما يشبهون اهلي ان شاء الله يكونون مثل زياد واهله..

زياد مافي اي حلقة وصل بينه وبين اهله انا الي صرت اخاف اني القى احد منهم بأي مكان اروح له..,

رجعوا البنات وهم مبسوطين..

عبيربا اعجاب \ماشاء الله عوق يهبلون عيالك..,

مجد با استغراب\فرق بينهم وبين نمر..,

نجلاءبعطف \يا قلبي عليهم..,

عوق تبتسم\ليش ما يشبهون نمر..,

نجلاء \الله يحفظهم لك شوفتهم تشرح القلب ولوانهم للحين مابانت ملامحهم غيير نمر يوم انولد..,

اصايل \لا احلى بكثيرمن نمر..

عبير \الولد كن فيه شوي من خالي لكن البنت مختلفه تمامآ..,

مجد \انا مافرقت بينهم ماعرفت البنت من الولد حتى خبرني خالي..,

عوق \وين زياد مارجع معكم..,

نجلاء \ما ادري احنا رجعنا لأن الزياره خلاص بتنتهي بنسلم عليك ونطلع..,

عوق منحرجه\ الله يجزاكم خير ما قصرتوا كلفتوا على انفسكم..,

بشرى \ احنا اهل ولا بينا كلافه وانتي والله تستاهلين كل خير..,

مجد\اسمعي اذ بتولدين مواليد طخمان مثل الي شفت انا سامحه لك كلفي علينا كل سنه عادي..,

نجلاء\اعوذ بالله اذكري الله هذا وجهي اذا جبتك معاي مره ثانيه..,

بشرى بضحك\ عوق احشريها وخوذي من اثرها..,

عوق بضحك \لا ما عليك انا احصن نفسي..,

نجلاء\الأ ثر والصور خوذيهم الي من يوم شافوهم تصوير الي يشوفهم يقول عمرهم ما شافو اطفال..,

اصايل\ومن وين بنشوف اطفال مثلهم تدرين ان عيال بناتكم يروعوني اذا جلست با الحالي معهم..

مجد\ خالي وعوق عارفيني عيني بارده وخصوص بعد وعد خالي لي انه بياخذني لعياله..,

بشرى \والله الشرهه ماهي عليك على الضعوف الي يموتون فيك وينادونك خاله..,

اصايل\امي وخالتي اجتمعوا يهزمزن اكبر قوه بشريه..,

نجلاء \اقول قدامي للبيت ان شاء الله مع اول خطاب يخطبونكم كرت ذهاب بدون اياب..,

انتهى وقت الزياره وانبسطت مع اهل زياد حسيتهم اهلي..,

يتكلمون عن زياد كأنه من لحمهم ودمهم قلوبهم بيضا ماتعرف الحقد..,

يد وحده تجمعهم على الرغم من ان بيتي وبيوتهم جنب بعض الا ان زيارتهم لي بمواعيد..

وانا نادر ما ازورهم ومع هذا عمرهم ماعاتبوني والا حاولوا يضايقوني ولا يتدخلون بخصوصياتنا اناوزياد..

عرفت كيف كسبوا حب زياد وتقديره وخوفه عليهم..,

معاملتهم له من اروع ما يكون والله لوما اختلاف اشكالهم كان قلت زياد ولدهم..,

تأخر زياد ما مرني غريبه وهو من يوم دخلت للمستشفى ما يطلع منه الا نادر يتطمن على نمر ويرجع..,

جوالي اخذه زياد وقت الولاده ولارجعه للحين..,

لبست عباتي بشوف عيالي طمنوني اهل زياد بكلامهم..,

وصلت لحضانة الاطفال عرفوني الممرضات الموجودات اني زوجة الدكتورزياد وام التؤم..,

وانا عرفت واحد من التؤم وكان الولد والبنت ماعرفتها حتى خبروني الممرضات..,

صحيح كانوا صغار و في يديهم ابرة مغذي والضوء مسلط عليهم لكن افضل واكبر بكثير من نمر..,

سبحان الله البنت ورديه وشكلها غريب يوحي انها بتصير شقرا..,

على ان شعرها خفيف اويمكن على شان لونه فاتح ما يبين..

والولد نسخة زياد شعره طويل وكثيف فحمي وبشرته حيل بيضا..,

حتى الممرضات يقولون اطفالك اجمل الاطفال الموجودين هنا..

تمنيت انهم يخرجونهم من الحاضنه لكن رفضت الممرضه تقول ما نقدر نخاف عليهم..,

تقبلت كلامها والحمدلله على كل حال ..,

طلعت من عندهم ومشيت لقسم الولاده كان في حرمه حامل تتمشى بممر القسم عليها جلال وبرقع

نادتني بعد ما تعديتها التفت عليها..,

....\انتي عوق عبد الملك..!

عوق با استغراب وتوتر\ايوا تعرفيني..؟

.....\ماعرفتيني..؟!

عوق\لا لكن صوتك ماهو غريب علي..؟

....\ما تنلامين كم لنا عن بعض اكثر من عشر سنين..؟!

عوق\انا ناسيه عشاي البارحه تبيني اذكر عشر سنوات ورى..؟!

....رفعت برقعهاوتضحك \ ماعرفتيني..,
عوق بدهشه\ياربي كان ما انتي بعهود..,

عهود تضحك\ الا بشحمها ولحمها والله اني اجود منتس عرفتس وانتي عليتس برقعتس وشوفي كم لناسنة عن بعض ..

عوق تسلم بضحك\ يا مرحبا وش الدنيا فيتس..,

عهود \ابد والله ربة بيت وانتي عسى ماشر وش عندتس هنا..,

عوق\ والده وامشي مليت من الغرفه..,

عهود بفرحه\ الف مبروك عقبالي يارب سمعت انتس تزوجتي من خمس سنين وبعدها انقطعت اخبارتس..,

عوق \والله انتي الي انقطعت اخبارتس والا انا ساكنه هنا بيت زوجي قريب من بيت امي الله يرحمها..,

عهود\ ماشاء الله انا رجلي ساكن بهجره بعيده ومتعوده اولد عنده لكن ها المره تعبت وحولوني للمستشفى..,

عوق\ما تشوفين شر..,

عهود\الشر ما يجيتس كم عليتس ورع ذا الحين..,

عوق \هذي ثاني ولاده لي..,

عهود بدهشه\لااله الاالله معرسه من خمس سنين وماغير ورعين..,

عوق تبتسم \اجل وش تبين..,

عهود تضحك بممازحه\ اقل شي اربع تدرين ان حملي هذا الثامن من غير الي سقطتهم..,

عوق بدهشه \ماشاء الله ..,

عهود\حالف زوجي اني اولد له درزن ورعان..

عوق بتعاطف\الله يعينك صحتك اهم والتربيه بالزمن هذا متعبه..,

عهود\ياو خيتي وش اسوي فيه تدرين اني من صلاة الفجر وانا اركض وراهم

وبعد صلاة العشا انسدح على فراشي لو يثورعند راسي قنابل ما سمعتها من التعب..,

عوق تكتم ضحكتها\ الله يعينك طيب مافي خدامه تساعدك..,

عهود تضرب صدرها بهلع واستنكار\يويلي ويلاه رجلي لو سمعتس تقولين ها الكلام كان سواها سالفه فيه حساسيه من شي اسمه خدامات..,

عوق\ ليش ..!!؟؟هو ضد الفكره ..!

عهود \ضدها وبس البلا انه عمر ما دخلت بيت اهله خدامه لكن من كثر ما يسمع من اشاعات تعقد بدون لايجرب..,

عوق\حاولي تقنعينه...,

عهودتهز راسها بحسره\يقول ميدي كان تبين احد يساعدتس اعرست على مره ثانيه تساعدتس..,

عوق تضحك\ عسى ما اعرس بس على ثانيه..,

عهود\لا ما اعرس قلت له تعب الجسم ولا تعب القلب..,

عوق بقلة حيله \الله يكون بعونك احتسبي الاجر وبيعينك الله ..,

تركت عهود تمشي با الممرات وانا دخلت غرفتي عجيب حال الدنيا..,

هذي عهود الي كانت مقومه المدرسه ومقعدتها معجبات وحركات..

من غير قصات شعرها الغريبه..

الممرضه جابت لي جوالي ارسله زياد معاها كان كله اتصالات ..

من زيادوخالتي ام ابراهيم ..

ورسايل معاتبه من ريم ليش ما خبرتهم اني حامل بتؤم..

كلمت زياد وقال ان خالتي ام ابراهيم كلمته وبتجي تزورني,

دقيت على ريم وردت على طول ..

ريم بغضب \ولا كلمه زعلانه عليتس لو تعتذرين من اليوم لسنه الجايه ما قبلت عذرتس..,

عوق بضحك\ شوي شوي طيب خلينا نتفاهم..,

ريم بعتب \ مافي تفاهم ليش ما خبرتيني انك حامل بتؤم..,

عوق بضحك\هديتي علشان اقولك..,

ريم بتعجب\ انا عمري ما شفت احد مثلك ماشاء الله عليك..,

انا على طول من يوم احمل والا اعرف نوع الجنين كل الوطن العربي يعرفون معي ..,

والله صدق انتس بنت عجوز ..,

عوق\يا ريومه انتي احسن مني انا ما احب اتعب احد با التفكير والا ينشغل علي..

ريم\ اجل يومي احسن منتس رضيت عليتس الف الف مبروك والحمدلله على السلامه عسى ما تعبتي..

عوق تبتسم\الله يبارك فيتس الحمدلله مافي شي بدون تعب..,

ريم\تدرين يوم بشرني جزاع استغرب اني ما ادري انهم تؤم وقال شوفي الحريم ماهو انتي..,

عوق با استغراب\من الي قال له..!

ريم\ ابو نمر ارسل رساله للكل جزاع ونواف وعلى جوال ابوي..,

وابوي ما درى عن رسالة زياد الا اخواني كانوا بيكلمون من جواله وقروها له..,

عوق بضحك\زيادالظاهر من الفرحه ما عاد يجمع..!

ريم \وشلون عيالتس..؟!

عوق \با الحضانه شوي تعبانين..,

ريم بذعر \سلامتهم ليش ماهو وقت ولادتهم..,

عوق \الا بس علشانهم ثنين وضاغطين شوي على بعض ,

ريم بطمئنه\ما عليه كثير توائم كذا وما شاء الله ما يطولون ويطلعونهم..,

عوق تتنهد\الله كريم..,

ريم \وش قررتو تسمونهم ..

عوق\ما ادري والله عن زياد شكله بيسمهم على امه وابوه مساعد والعنود.

ريم \ازين ماسوي يستاهلون من يسمي عليهم وبعدين ترى تسميته عليهم زياده في برهم.

عوق\الحمدلله ان اساميهم حلوه والا كان اكلوها ها الصغيرين.

اردفت عوق بضحك\لو تعرفين من شفت اليوم..,

ريم با استغراب\من..,

عوق \ تذكرين خويتنا عهود

ريم تضحك\ لا يكون بعد والده..

عوق بدهشه \ لا شكلها بتولد بطنها يروع كبير..,

ريم با استنكار\الله يعينها امي قبل فتره شافت امها..,

تقول عهود من تزوجت وهي مالها شغل الا حمل ولاده تزورنا با السنه حسنه

ولا نشوفها ماغير طايره تركض ورى بزرانها..

عوق\لو شفتيها ياريم ما بقى منها الا صوتها ماعرفتها الا يوم كشفت برقعها..,

لكن ماشاءالله عليها عرفتني من ورى برقعي ..,

ريم تضحك \ولابسه برقع بعد وين عهودالي تشوفين علابيهامن قصر شعرها..,

والا الساعات الرجاليه الي تلبسها وعصاقيلها مع الزبيريات عالم ثاني..,

عوق تضحك\استغفرالله ياربي لاتعاقبنا ليتك شفتيها..,

شعرها ما ادري عنه ماشفته لكن استبدلت الساعات الرجاليه بدرزن غوايش..,

والعصاقيل الي على خبرتس زود على حملها مسكينه صايره سمينه مره..,

ريم بتعجب \سبحان مغير الاحوال والله تستاهل كل الي هي فيه اللهم لاشماته..,

بغت تضيع لكن ابوها ماشاء الله عليه على طول نادى ولد عمها وزوجها..,

عوق \ على حركاتها قبل والله تحمد ربها على الي هي فيه من كلامها مرتاحه بوضعها..,

ريم\ يا عوق غصب عنها ترتاح ربي ستر عليها من بلوى بغت تطيح فيهاوتفضح عمرها واهلها

واكيد فهمت وعقلت بعد المصيبه الي صارت لها..,

عوق با استغراب وفضول\ وش مصيبته..,

ريم\ماتذكرين طلعت مع واحد من اخوان شلتها المعجبات فيها لكن انكشفت بسرعةقبل لايختلي فيهاويلعب عليها..,

عوق با استنكار\لا والله اول مره اسمع سالفتهاتذكرين عذر امها بزواجها المدرسه طردتها

ماهي فالحه با الدراسه دايم ترسب..,

ريم \ونفس الكلام الي قاله ابوها لولد عمهاالبنت ماتبي المدرسة

دفن ابوها السالفه قبل تطلع الريحة وتنتشر ويدرون عمانها..,

عوق بدهشه\سبحان الله ماسمعنا شي وحنا بيتنا قريب منهم..,

ريم\اسكتي بس ابوها بيوم جا عندنا وهو يبكي يقول تكفى يامسلط دبرني قبل انفضح..,

عوق با استغراب\وانتي وش دراتس..,

ريم\ابراهيم اخوي شافه واسمعه بمجلسنا يبكي لكن ما يدري وش السبب ..

وبعدها بكم يوم واحدمن اصدقاه كانو ايامها با المتوسط يعلمه..

ان في بنت من حارتنا طالعه مع واحد وصدمواعند اشارةمرور..,

الشرطه يوم باشرت الحادث عرفوا ان الي راكبتن معه ماهي من محارمه..,

عوق بتساءل\ طيب وش دراكم انها عهود با الذات..

ريم با استنكار \كيف وش درانا الي طلعت معه يقرب للي علم ابراهيم

و كان يحذر ابراهيم يقول هذي بنت قليلة ادب خواتك لايقربونها..

وان ابوي هو الي طلعها من قسم الشرطه يحسبنا ندري عنها..,

ابوي الي يومتس ماخبرنا عاد استنتجنا سبب جيت ابوعهود عند ابوي..,

اذكر ايامها جننا ابراهيم خايف نسوي مثلها ..,

اردفت ريم\توقعتس تدرين ...؟ّ!

عوق\لاوالله تخبريني ماواطنها بعيشت الله اول هبلت بي تلحقني هي ومعجباتها والمخفه الي معها..,

ريم\ ابوها ماقصر على طول كم يوم وزوجها ولد عمها..,

عوق تتنهد بوجع\زين ماسوى والله انه دواها ها النوعيه مالهم الا الزواج يشغلونهن با انفسهم قبل لا يشغلن اهلهن ..,

قطع مكالمتنا زيارة خالتي ام ابراهيم..

ام ابراهيم تسلم بفرحه \مبروك ما جاتس ذايقه نفعهم..,

عوق\ الله يبارك فيتس ..

ام ابراهيم بعتب \ورى مادقيتو علينا تبشرونا غير العيال الله يصلحهم قروا رسالة ابونمر على جوال عمتس والا كان مادرينا..

عوق منحرجه\ العذر والسموحه منتس جوالي مارجعوه لي الا قبل شوي وابونمر اكيد انشغل والا ماتفوته...,

من جيتي معه..؟!

ام ابراهيم تبتسم\مع نمر ويسلم عليتس يقول اطلبي من العوق تدعي اني ادخل الكليه العسكريه..,

عوق با امتنان\عسى ربي يوفقه والله ادعي لكم كلكم با الخير..,

ام ابراهيم\ الله يحفظتس يا الله تقعدين با العافيه لكن يوم دريت انتس والده قلت اجي اشوفتس..

عوق منحرجه\الله يجزاتس خير ليه الكلافه يا خاله اهل زياد العصر ماخلو شي ماجابوه..,

ام ابراهيم بملامه\اهل زياد الله يستر عليهم وانا كلافتي لتس الي تقولين كلافة ام لبنتها..

طلعت خالتي نوره الي كل يوم تطوقني بجمايلها وتحسسني اني ما فقدت امي ..

دخل زياد بعدها ...

زياديبتسم \ كيفك الحين..,

عوق \الحمدلله شفت العيال..

زياد\الحين مريتهم طيبين با الكثير يومين ويطلعون..,

عوق تبتسم\ وش قررت تسميهم ..,

زياد\ تبين اسم معين في خاطرك اسم..,

عوق\لا انا مايهم الاسم عندي شف الي يريحك..,

زياد \مافي اغلى عندي من امي العنود البنت اسمها العنود وش رايك..,

عوق\ زين ما اخترت العنود حلو والولد..؟!

زياد \ وش رايك بساري..,

عوق\زوج نجلا ء..,

زياد \الله يرحمه يستاهل من يسمي عليه وحسيت نجلاء ودها ان اسمي عليه..,

عوق \ ساري والعنود مناسبه اصلن لبعض..,

زياد\تدرين استغربت ان خالتي حلفت ما تسمين عليها..,

عوق تتنهدبحزن\امي الله يرحمها من مثلها تدري ان الاسامي لا تقدم ولا تأخر..

اردفت عوق با اشمئزاز\ وانا من الله ما احب وضحى بنت ناصر..

زياديضحك\ وخالتي رحمتك لا تسمين وضحى تبيك تنسين بنت ناصر..

عوق بتذمر\الله يسعدهم ويبعدهم بعدين نمر يكفي على اسم ابو امي وضحى..,

اردفت عوق\ماتحس البنت شكلها شوي غريب ..

زياد يضحك\شكلها شقرا انهبلو عليها خواتي وبناتهم وممرضات الحضانه يقولون انتاج سعودي جديد..,

عوق تبتسم بتوجس\ تخيل زياد لو تشوف احد نسخة العنودوش بيكون شعورك..

زياد يبتسم \ بيكون محظوظ انه يشبه البرنسيسه عنودي.

عوق بترددوتوتر\لا ما اقصد كذا يعني , يعني لو شفت احد يشبه لك او لي او طفالنا ما يجي في بالك يمكن يكونون يقربون لنا ..,

زياد يبتسم بسخريه\ واذا يشبهونا وش المشكلة يخلق من الشبه اربعين..

انا يا ما شبهوني بنات خواتي كل شوي مطلعين صوره من مجله والا من النت تشبه لي يعني كل ها البشريه تقرب لي ..!!

امي العنود الله يرحمها كانت في ممرضه زنجيه ما تشبه لها وبس كأنها تؤمها اسألي بشرى عنها زميله لها ..

عوق با استغراب ودهشه\معقوله نسخة نسخة من امك العنود..!

زياد بضحك \طبق الاصل عزمتها بشرى لبيتها وشافوها كلهم انبهروا ماكانوا مصدقين شدة الشبه الي بينهم..,

في صور لها هي وامي عند بشرى اتوقع بزواج منان بنت بشرى

بقولهم يورونها لك خساره انتهى عقدها وسافرت كانت هنا بقسم الولاده قابله ..,

حتى امك الله يرحمها ترى فيها كثير منك ماهو شرط قرابه ..,

اردف زياد\وتذكرين صورة الرجال المريض الي جبتها لك نسخه من نمر يعني بيقرب لي والا يقرب لك ..

عوق با ارتباك \اكيد لا ..,

زياد يبتسم بوجع\ عوق المفروض انك تعديتي هالمرحلة من زمان يشبه ويمكن يا ليته ...

ماراح نستفيد شي غير حرقه بقلوبنا اهلنا لو يبونا مارمونا انا بطريق صحراوي وانتي عند محطة بنزين ..

كانو يبون يتخلصون منا والاغلب انهم كانو مخططين انا نموت قطعوا مسافات علشان يرمونا ويهربون عن الأعين لاتكشفهم ..

اردف زياد بسخريه لاذعه\وش الفايده يعني مثلآ لو شفنا احد يشبه لنا بننشب له تعال يمكن انك تقرب لي..,

الا بيحاربني ويتهمني با الجنون يمكن يوصل الموضوع لأبعاد ثانيه..

والكل بيكون خسران انا وهو وبنجر با الرجلين معنا ناس واجدغير الاشاعات الي بتتضخم اضعاف الحقيقة ...,

عوق بحسره\طيب والبصمه الوراثيه الي يقولون عنها ما تثبت شي ..,

زيادبضحك \الظاهر شوفتك للبنوته جلبت لك خيالات لكن بشرح لك وامري لله

الخبراء والمختصين ( أقصد خبراء علم الوراثة والطب )اثبتوا أن فحص البصمة الوراثية والجينات

ماهو دقيق مئة في المئة،وعلشان كذامخلينها الفقهاء في دائرة الادلة 'ظنية الدلالة' وليس 'قطعية الدلالة'

بسبب الي يصير اثناء التحليل من اخطاء بشرية اومخبرية،

وحدوث أي تلوث تتعرض له العينة يؤثر اكيد في دقة النتائج، فاحتمال الخطأ وارد.

بعدين النسب ما يثبت إلا إذا كان من زواج شرعي،

((قال عليه الصلاةالسلام 'الولد للفراش وللعاهر الحجر' وماء الزنى هدر لا يلحق به النسب)).

عوق \ما فهمت ..,

زياد \وش مافهمتي..!!؟

عوق\كلامك ما فهمت وش تقول..؟

زياد بممازحه\تدرين جيد جدآ كثير عليك..,

اردف زياد\سبحان الله ما شفت احد يدور على الي يوجعه مثلك تبين الحقيقة يمكن تريحك وتبطلين فضول ..,

ولد الزنا لا يثبت نسبه حتى لو اعترف ابوه فيه ولا يلحق به ..

معرفة اللقيط لأبوه إن كان ابن زنا ما تفيده بشيء أبدا غير زيادة الهم والغم واتهام رجل بالزنا

وهذا الاتهام يستلزم اقامة الحد عليه .. والحد أصلا لا يثبت إلا بأربع شهود

يعني الي بيطالب با اثبات نسب يكون بكذا وقع بالقذف لرجل يمكن يكون بريء وشوهنا سمعته ..

حتى وان كان احتمال برائته هو 1 % الحدودتسقط بالشبهات..,

يعني اي حد مثل حد الجلد,

او الرجم لزاني المحصن اذا فيه شبه يسقط على طول عنه ..,

عوق بتردد\طيب مثلآ لو تزوجو بعد ما جاهم الطفل وش مصير الطفل..,

زياد\ يعني قصدك بعد ما ينولد لهم طفل سفاح يجون بيصلحون الغلط ويتزوجون..؟!

عوق \ايواوينسبون الولد لأبوه ..,

زياد \شوفي بجيب لك قول للعلامه ابن عثيمين..

قال الشيخ ابن عثيمين رحمه الله ( وأما الولد الذي يحصل من الزنا ، يكون ولدا لأمه ،

وليس ولدا لأبيه ؛ لعموم قول الرسول صلى الله عليه وسلم :

" الولد للفراش وللعاهر الحجر " العاهر : الزاني ، يعني ليس له ولد . هذا معنى الحديث .

ولو تزوجها بعد التوبة فإن الولد المخلوق من الماء الأول لا يكون ولدا له ،

ولا يرث من هذا الذي حصل منه الزنا ولو ادعى أنه ابنه ، لأنه ليس ولدا شرعيا.

اردف زياد\ولد الزنا – ذكرا كان أو أنثى – لا ينسب إلى الزاني ، ولا يقال إنه ولده ،

وإنما ينسب إلى أمه ، وهو محرم لها ، ويرثها كبقية أبنائها .

عوق بدهشه\ماشاء الله عليك زياد كل ها المعلومات عندك ما توقعت..

زياديبتسم بوجع\ يعني عمري صك الاربعين ولا تبين اعرف مثل ها المعلومات ..!

زياد يتنهد بحسره\عوق كل الي تفكرين فيه والا جا براسك قبلك فكرت فيه سنين وانا شاغلني ها الموضوع وماكل عقلي وقلبي

واكيد كل الي بوضعنا فكرو فيه وطلعت بنتيجة وحده ..,

عوق بتوجس واستغراب \الي هي ..,

زياد بقهر وحسره\ مجهول النسب يبقى مجهول نسب ليش اسرح بخيالي واضيع حياتي با اوهام ..,

ابغى اهلي يعترفون فيني هذي كلها ما تنفع..,

يعني لا يجي بخيالك يوم او تفكرين انه بيجيك احد يقول انتي بنتنااو انك تشكين انك تعرفتي على اهلك

ماراح ينفعك بشي بتبقين مجهولة نسب عرفتي ..,

عوق بخيبة امل \لا ماهو قصدي اني بدور لي على نسب بس كنت استفسر..,

زياد يبتسم \حاضرين لطيبين استفسري اهم شي عندي تكون نفسيتك مرتاحة اسألي مابدى لك ..,

عوق تبتسم بوجع \ جفت الاقلام وطويت الصحف ماعاد فيه ان شاء الله استفسارات..,

اهم شي با الدنياعندي انت وعيالي اشوفكم بخير وهذي قسمة الله لنا مالنا يد فيها ..,

زياد يبتسم بحب \خطيره من فمك كلمة عيالي احس اني مستغربها بس حلوه الله يحفظهم لنا وينبتهم نبات حسن..,

طلع زياد بعد ما قال لي كلامه الي فعلن ريحني رغم وجع قلبي من كلامه..

يعني بدر محد خبره بوجودي علشانهم عارفين ها الحكم انه مستحيل انسب له دفنو سري الي يعرفونه..,

وان شاء الله انا بعد بدفنه مثل ما قال زياد مافي فايده ولو عرفنا اهلنا غير هم وغم..

حتى لو زياد مقتنع ان الشبه ماهو دليل قرابه انا ماهو لازم طريقي يصادف طريقهم وصيت امي قبل كل شي ..,

بعد الولاده بيومين طلعت للبيت ..,

كنت قبل اولد مجهزه غرفة تحت اكيد بيزوروني معارف زياد واهله ..,

مر اسبوع على ولادتي والحمدلله طلعوا عيالي من المستشفى با السلامه..,

با البدايه انبسط نمر بشوفتهم لكن لما شاف اهتمامي فيهم صاريدور اي فرصه علشان يطلب منا نرجعهم..,

مره يقول هذولا مزعجين يبكون ومره يقول ليش ما يتكلمون رجعوهم..,

زياد\عوق اليوم لك اسبوعين من ولادتك تدرين نفسي اصلح حفل كبير..,

اعوض فيه حفلة زواجنا الي ما صلحناها وتمايم نمر الي ما ذبحناها الا يوم كمل سنه..,

عوق ترضع العنود\لا تكفى ماهو لازم ..,

عشا عادي هنا في البيت وخلاص..,

زيادبتعجب \تدرين انك تحيريني دايم تحبين تعيشين با الظل زي الي ماتبين احد يشوفك..,

عوق با ارتباك \عادي لكن العين حق والناس ما تعطي خير ليش اعرض نفسي وعيالي لشي انا في غنى عنه..,

زياد شايل ساري بحضنه \اتركك من الوسواس بس حصني نفسك واطفالك وما يجيك ان شاء الله الا الخير..,

عوق تبتسم \الحمدلله ان شاء الله ما نيب موسوسه لكن انا مكتفيه با العمره برمضان كل سنة

وباالتمشيه السنويه من يحصله دين ودنيا ..,

زياد يبتسم بحب\دايم تقنعيني لو ماني مقتنع..

عوق ب امتنان \ الله يخليك لي ولعيالك..

اردفت عوق \نمر احسه ماهو متقبل اخوانه تدري شفته البارحه يسحب شعر ساري..,

زيادبضحك \ ما يبي احد يشغلك عنه حاولي ماتهتمين فيهم كثير قدامه..,

عوق\ الله يعينا على تربيتهم..,
.
.
.
(كلمه اخيره)


ضاق بي أمر أوجب غماً لازماً دائماً،

وأخذت أبالغ في الفكر في الخلاص من هذه الهموم بكل وجه،

فما رأيت طريقاً للخلاص،

فعرضت لي هذه الآية:

{ وَمَن يَتَّقِ اللَّهَ يَجْعَل لَّهُ مَخْرَجًا وَيَرْزُقْهُ مِنْ حَيْثُ لَا يَحْتَسِبُ }

فعلمت أنّ التقوى سبب للمخرج من كل غم،

فما كان إلا أن هممت بتحقيق التقوى فوجدت المخرج،

فلا ينبغي أن يتوكل المؤمن إلا على الله،

فالله عزّ وجل كافيه، فيقوم بالأسباب ولكن لا يعلق قلبه بها. .

ابن الجوزي
.
.
.
الي الملتقى قريبآبأذن الله

مع السالفه الاخيرة.


طيف الأحباب

ام الوليد

تذكروني واحبابي بدعوه طيبه