السلام عليكم ورحمه الله وبركاته

ام الوليد يهدى لك السعاده والبخت من عند رب العالمين مشكوره ياقلبي على الاهداء
لاخلاا ولاا عدم منك تعيشين وتهدين

الف مبروووك يالغلاا على الوساااام تستاهلين كل خير وجعله شاهد لك عند ربالعالمين
يسلم يدينك يالغلاا على هالسالفه الراقيه وعوق وما بعد الحزن ومواجهه لواقعها وهي متسلحه بوصايا
الوضيح وارشاداتهااااا

عوووق جرحك عميق ويبي له اياااااااام وشهور وسنين على باااال ماتشفين منه حتى لو نسيتي او تناسيتي
حزنك على امك الوضيح اقل موقف او مشكله تحتاجين فيها لها راح يتجدد الجرح ويبدى ينزف
بس رحمه من رب العالمين بعباده انه عطاهم نعمه النسيان عشان يقدر يوااصل حياته ويؤدي واجباته

واهم شيء انك تمشين على خطوات الوضيح وتتمسكين بوصاياها ولا تحيدين عنهاااا وربي راح يكون بعونك
والله الله بالحسناات والصدقات الي كانت امك تسويها ياليت تمشين عليهااا

واهم شيء اهلك الي تبرو منك لاتفكرين انك تتواصلين معاهم او حتى تفتحين معهم باب يدخلون منه
ولا تضعفين لتوسلاتهم او اغراءاتهم ترى اكبر خسراااااان هو انتي

زياد الله يسعدك انت وزوجتك كنت السند والعووون لعوق واثبت لها ان اختيار الوضيح لك
زوج لها بمحله وانها قدرت تامن لك من يقدر يحميك ويدافع عنك اذا راحت عنك

بس ياليت انك معلمها عن ولدهاااا نمر وانه تعدى الخطر عشان تتغير نفسيتهاااا وتلقى شيء
يلهيى عن الحزم والتفكير بامهااا وترى هي مو حول انها تفهم تلميحاتك وتحاول تحلهااااا

ام ابراهيم جعل ربي يرزقك الجنه انتي وزوجك وعياااالك كللهم كنتوا نعم الاهل لعوووق ودافعتوا عنهااا
في وقت ان الي من دمها ولحمها وقفزا متفرجييين وساكتين وهم يشوفون بنتهم تنداس وتنهان ولا حتى
قال كلمه الحق فيها
اثبتت ام ابراهيم انها الام الثانيه لعوق وانها تقدر تعتمد عليها اذا احتاجتها بيووووم

مشاعل هذا ماجنته يداااااااك وطبخن طبختيه يالرفلاا اكلييه اللحين جايه تدورين بنتك وينك عنها يوم رميتها
وهي لحمه حمرااا ولا سالتي عنهاااا
انتي كذا ماراح تستفدين غير وجع القلب لك ولها لان مستحييييييل اهلك راح يقبلون فيها بعد هالعمروهي مستحيل تسامحك على الي سويتيه فيها فالبعد بينكم احسن

ام الوليد تقف الكلمات عاجزه امام ابداعك الراقيه ولا تستطيع ايفاء حقه
حرمتي انتي ووالديك عن النااار

بنتضار البارت بفارغ الصبر
يالله ترى مره متحمسين ,,,,,
في انتضارك طيف
تحياتي : ابو فارس

بسم الله الرحمن الرحيم


اللهم إني أسألك بأني أشهد أنك أنت الله لا إله إلا أنت أن لا تكل أهل سوريا إلا أنفسهم,

وأن تحفظهم من بين أيديهم ومن خلفهم وأن تهيء لهم أمر رشد,

وألا تسلط عليهم من يستبيح بيضتهم وأن تصلح لهم شأنهم كله,

وأن ترحمهم برحمة من عندك فإنه لا ملجأ ولا منجى منك إلا إليك,

مقادير الأمور كلها بين يديك لا يعجزك شيء في الأرض ولا في السماء ..
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,


البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

اهدااااء خاص لساعه بلا عقارب ام تركي,ام الشهد, زارا ,سحابة رحيل ,احلى حنو,ريح الهوا,القمري,فوضة مشاعر,الهاله,ام البنين.

.
.

اليوم بنشوف عوق المزايين وتبريره لشد شعر عوق يوم الملكه واللقاءالاول بصديق زياد الصدوق.

يا الله تعالوا معاي...!!

وسالفه جديدة؛
.
.
البارت التاسع والثلاثون
.
.
عوق\والله مالي خلق نتعشى برا هنا احسن ..,

زياد بخيبة امل\ على راحتك ..

عوق\وشفيك احسك زعلت..

زياد\لا بس كنت اتمنى نطلع نغير جو من زمان ما تمشينا..

الاحداث الي صارت وحملك حرمني من اشياء كثيره كنت اتمنى اسويها لك..

عوق\ الله كريم تزين ان شاء الله الحين احس نفسيتي شوي تعبانه..

زياد يبتسم\لا تستسلمين لأحزانك بتمرضين وفي ناس محتاجه لك لازم تغلبين حزنك..

عوق\الله لايجعل لنا حاجه عند احد من خلقه ويغنينا بفضله عن من سواه..

زياد بمحبه\آمين لكن بجد عوق امك محتاجه لك تردين لها الجميل..

وانا محتاج لك وين بلقى زوجه مثلك وصديقي الصدوق يتمنى يتعرف عليك..

عوق بتذمر \انت بتلقى احسن مني وامي ذكرتني بكرا الجمعه ابيك تسحب من حسابي فلوس تصرفهم لي ريالات اوزعهم ..

زياد\ما يحتاج انا اعطيك..

عوق \ما تقصر ابي من حلال امي صدقه عنها.

زياد يرفع ايديه يدعي\الله يجزاك خير يارب متى اشوفك انتي وصديقي تتصدقون وين صرافتك..!

عوق بضحك\والله ها الصديق الي ماكل عقلك ناسيه الصرافه في بيتك..,

زياد بتهكم\مقبوله منك ها المره بيتك يا الله البسي بنروح للبيت ناخذ صرافتك..,

طلعت انا وزياد لبيتنا ودخلت البيت ما شفته من يوم ولادتي حسيته متغير والاثاث مكركب على بعض وريحة اصباغ..

كنت بتفرج على البيت بشوف وش سبب ها الحوسه رفض زيادوماني عارفه السبب..,

طلعت فوق لغرفتي بشوف الصرافه والاوراق الي تخص كل املاك امي الي كانت با اسمي..,

زياد بتعجب\انتي هنا وانا ادورك ..

عوق\يعني وين بكون كنت بتفرج على البيت من زمان عنه وانت شكلك وراك شي قلت بشوف اوراق مهمه وبطاقات الصراف افضل..

زياد يرفع حواجبه\ ماشاءالله زوجتي الظاهر بتصير سيدة اعمال..

عوق\الله يرحم امي كله من فضل ربي ثم خيرها..

زياد\ وعلشان ما تزعلين وش رايك نتعشى هنا اليوم وننام وبكرا دور بيتنا هذاك..

عوق بضحك\تركنا الخدامات يا راعي الادوار بالحالهم الخوف على خدامتك والا خدامةامي زوجها معهاومتعودين نتركهم با الحالهم..,

زياد يضرب راسه بيده\اووووف تصدقين نسيتهن ...!؟

عوق وهي تسكر شنظة اوراق\شفت اوراقي واخذت بطاقاتي يا الله نمشي بسحب مبلغ..

زياديبتسم\ابشري والعشا اليوم على حسابك..

عوق بضحك \مو مشكله صدقه عن امي..

زياد\ الله يكثر خيرك يا ام نمر وتستاهل خالتي الي يتصدق عنها سر وعلن لكن واجب الضيافه اليوم مسموحه الحساب عندي..

عوق تتنهدبشرود \امي كانت كل جمعه تنادي على البزارين وتوزع عليهم فلوس وبكرا بسوي الي كانت تسويه..,

زياد\الحي هذا مافي احد يطلع من بزارينهم لكن في طريقه ثانيه عندي..,

عوق\ لا انا ناويه بزارين حارة امي قلي وش طريقتك يمكن تعجبني..,

زياد بتفهم\ ماهو على كل حال بتسمح لك الظروف تتصدقين عنها كل جمعه بطريقتها..

لكن وش رايك كل صباح جمعه اطلع لأي محل خباز واعطيه فلوس كل خبز ذاك اليوم صدقة تحتسبينها لأمك ..

عوق بموافقه\والله فكره حلوه امي وش ما سويت ما الحق على جزاها..

زيادبخيبة امل\ يا الله ننزل نطلع مع بعض ونتعشى في بيتناهذاك شكل ماهو مكتوب لنا عشى الليله هنا..,

عوق \انتظر بشوف غرفة الاشباح اشتقت لها..,

زيادبتذمر مصطنع\ليش وش تبين فيها وبعدين ما تغيرت على خبرك..

عوق تتنهد بألم \كنت ناويه بعد ما اولد اجدداثاثها واخليها غرفه لطفل الي بولده قدر الله وما شاء فعل ..,

زياد يبتسم بتهكم\والله فكره وانا كنت مبتلش لو ربي رزقني باطفال وين بينامون خصوص انا ما احب ازعاج الاطفال..

عوق بحسره \ياليت كان همي ازعاجهم متى يجي ذاك اليوم الي يزعجوني ..

زياد يبتسم \الله كريم بيجي يوم تبكين تدورين النوم من الا زعاج ما يحصل لك..,

عوق\على طاري الا زعاج جوالي الظاهر صادروه آل ناصر يحسبون من املاك امي الله يرحمها..,

زياد \ابشري با العوض وجوالك اصلن ناسيه يعني من مكالمتك فيه..,

عوق \الله يسلمك..,

اردفت عوق با استفهام\فيه تغيير في البيت تحت ما ادري صحيح والا انا غلطانه غرفة امك مكانها فيه شي..,

زياد بضحك\اقول اطلعي بسرعه لا تخربين علي مفاجائتي لك..

وطلعنا انا وزياد بعد ما اخذت البطاقات وتطمنت على الاوراق الي كنت ابغاها..,

تعشينا بمطعم وتمشينا نزل زياد اشترى لي جهاز جديدوشريحه وسحب مبلغ طلبته منه..؟

زياد\شوفي الجهاز اعجبك والا اغيره والشريحه ترى شحن والا تبين فاتوره..,

عوق \لا عادي شكل الجهاز حلو والشريحه زينه والفاتوره مالها داعي مكالمتي جدآمحدوده..,

زياد\يالبى قلبك توفرين..

عوق بضحك\ اعجبك مدبره..

زياد يضحك بمشاكسه\تعجبيني بكل حالاتك..,

رجعنا للبيت بوقت متأخر لكن حسيت نفسيتي احسن با الناس الي حولي

امي مافي احد يسد بمكانها لكن حب زياد وحنانه وعطف ام ابراهيم علي خفف كثير علي..,

زياد\وش رايك عوق انا وانتي ننام بغرفتك احس ان حيلي مهدود..

عوق \ الا انت وش رايك ننام بغرفة امي انا على سريرها وانت على سريري..!

زياد بضحك\سمعآ وطاعه..,

اردف زياد\ الحين انتي تدرين كم لك والده ..؟

عوق با ارتباك\ ما ادري انا من كثر ما غبت عن الوعي ناسيه كم لي والده..

زياد\احسبي كويس علشان اول مفاجاءه من الي وعدتك بنطلع نعتمر انا عن امي وانتي عن امك..,

عوق بضحك\ اذا فيها عمره اليوم كملت 42يوم الله يوفقك زياد على ها المفاجئه ..’

زيادبدهشه\كل ها الفرحه اجل لو شفتي المفاجاءه الكبرى وش بتسوين اي شي الا انه يغمى عليك تكفين..

عوق تتنهد بحسره\لا ان شاء الله بستجمع قواي ماعاد فيه اغماءات ولا فقدان للوعي عقب امي كل شي يهون ..

زياد يبتسم\طمنتيني الله يجزاك خير.

اردف زياد\ بكرا الجمعه ودي نستغل اليوم من اوله..,

سهرنا بغرفتي انا وزيادواخذنا الوقت لحد ما صلينا الفجر ونمنا بعدها..,

صحيت شكل الوقت متأخر شفت الجوال على الكومدينه ويشحن ناظرت الساعه لقيتها عشر ونص ..,

اوووف معقوله كل ها الوقت وانا نايمه..,

طلعت اشوف وين زياد خبرتني الخدامه انه طالع من الساعه ثمانيه ولا رجع..

ياربي هذا متى ينام ومتى يصحى..؟

كلمته جوال ..

زيادبفرح \هلا ومرحبا با ام نمر..

عوق بدهشه\هلابك لكن وش دراك انه انا قبل اتكلم..,

زيادبضحك\ لأن الرقم الوحيد الي مخزن با الجهاز الي تكلميني منه رقمي وانا الي مخزنه الصباح..,

عوق \طيب وينك..

زياد\قريب عند صديقي..

عوق با استغراب\وصديقك عنده اطفال اسمع صياح اطفال عندك..

زيادبا ارتباك\لا هذولا زملاء صديقي الله يخليه لي يقلدون اصوات اطفال يلعبون..

عوق با استنكار\لا حول ولاقوة الابالله الله يشفيك ويشفيهم ..؟

زياد بضحك\ ليش تاخذيني على قد عقلي..

عوق\وش اسوي ما بقى لي غيرك بالدنيا ولازم اجاريك..

زياد\حتى صديقي يضحك على كلامك وبيزورك بعد كم يوم استعدي له..,

عوق \حياه الله..

زياد\برجع شوي تبين شي اجيب لك معي..

عوق \لاسلامتك استغربت اليوم ما عندك دوام وطالع ..,

زياد\ دقايق وانا عندك صديقي مل مني وبطلع قبل يطردني..

عوق بسخريه\ ما لومه يوم يبي يطردك شكلك غاثه دايم عنده يا الله سلم على صديقك..,

زياد\الله يسلمك جهزي الفطور والقهوه بفطر معك واتقهوى قبل اطلع لصلاة..,

اخذت دش ولبست جهزت الفطور مع الخدامات وصلحت قهوه..,

وخيال امي ما يفارقني وذكرياتنا كل جمعه انا وهي..,

تأخر زياد اذن لصلاة الجمعه صليت وقريت سورة الكهف ..,

طلبته على الجوال مارد..؟

ياربي وين راح وهو قايل لي انه من عند صديقه على طول بيمرني والحين له ثلاث ساعات مابين ..

اشغلت نفسي جهزت الفلوس عادة امي الله يرحمها..

فاضو من الصلاه من حوالي ساعه وزياد مارجع خبرت خدامة امي تفتح الباب الخارجي مثل عادة امي بعد صلاة الجمعه..

الي بكاني وقطع قلبي انه ما كان في احد اول ما فتحت الباب..

وقفت دقايق واول من وقف عندبابنا عيال ريم ناظرت شباك غرفة بنات مسلط..,

شفت ظل احد يطالع اكيدارسلوهم علشان ما انحرج وانا واقفه..

اكيد جيرانا يتوقعون ان امي توفت خلاص بتنقطع افعالها الطيبه..

بعدها طلعوا عيال جيرانا ووقفوا عند بابنا مثل يوم كانت امي موجوده الله يرحمهاوزعت عليهم..,

دخلت للبيت وحسيت احد يمشي وراي قبل التفت يد مسكت كتفي عرفته..

زيادبممازحه \من مال الله يامحسنين ابي مثل الحلوين والحلوات الي كانوا واقفين قدام الباب ..,

عوق منحرجه\يا ربي سترك ادخل فضحتنا الجيران يكشفون سور بيتنا..,

زيادبا اصرار\ واذا عادي اطلب من زوجتي حبيبتي الي عيونها حمرا من البكى لا عيب ولا حرام..,

عوق\ تعال نجلس با المشب الخارجي..,

زيادبترجي وخوف مصطنع\لا تكفين عندي عقده منه ..

ندخل داخل احسن عمري ما جلست بمجلسكم هذا الا جات مصيبه ..,

عوق بضحك \ لا تتشائم وبكسر تشائمك واليوم بنقضيه هنا مفطر والا احضرلك شي..؟!

زياد\لا والله انشغلت بطيح من الجوع..,

دخل زياد للمشب وانا دخلت للبيت احضر الفطور والقهوه..

رجعت للمجلس زياد مندمج مع الجوال..,

عوق بتعجب \وش عندك تناظر جوالك وتضحك..,

زياد\لا هذا صديقي مرسل لي رساله واضحك عليها..,

عوق\ من يوم تزوجنا عمري ما شفتك تتكلم عن احد من اصدقائك كذا حتى جزاع ونواف ما صرت تجيب سيرتهم..,

زياد يقرب من سفرة الفطور\ماشاء على ام النمر متوصيه فيني اليوم..,

عوق\عليك با العافيه ليش تأخرت توقعتك تجي قبل الصلاة..,

زياد بعد ما خلص فطور\كثر الله خيرك ابد رجعت من المستشفى للبيت وتجهزت لصلاة الجمعه ثيابي كلها هناك..,

عوق مستغربه\انت ما تقول انك عند صديقك وش جابك للمستشفى..,

زياد با ارتباك\ايه طلعت من صديقي مريت المستشفى وعلى طول لبيتي وهذي كل السالفه..

عوق \ ما اكلت شي وانت تقول طايح من الجوع..

زياد\با العكس انتي الي ماتاكلين وبعدين تذكرت وش كنتي بتسأليني تقولين ذكرني..

عوق بدهشه\سؤال ايش ..,

زياد\يوم اقولك بفتح لك مشغل ..,

عوق تتذكر\ ايه تذكرت وتقول الصدق..

زياديبتسم\ولا شي غير الصدق..

عوق \يوم الملكه تفاجأت فيك كل شوي ساحب شعري لدرجة اني شككت بعقليتك..,

زياد بضحك\والله ياهي ايام ذكرتيني با الذي مضى هذي يبيلها جلسه بجو شاعري ..,

عوق \هونت ما ابي اعرف شي..,

زياد يبتسم بحب\لا عاد شكلك زعلتي واناعاد ها المره من لي غيرك..,

بخبرك يوم الملكه بصراحه حسبت شعرك باروكه والا تركيبه وقلت ها الحين بسحبه ويجي في يدي..,

دايم اشوف بنات خواتي يركبون توصيلات ويلعبون بشكالهم مرات ماعرفهم خصوص في ملكاتهم قلت اكيد انتي مثلهم..,

عوق بذهول\انت جاد بكلامك طيب واذا باروكه ما خفت تفشليني قدام الناس..,

زياد يضحك\ تدرين ما فكرت ساعتها الا ان يدي تحكني وابي اسحب الباروكه..,

لكن كسرتي خاطري حسيت عيونك طلعت يوم سحبته قبل نطلع من عندكم..

حتى خواتي كانوا مبهورات بطول شعرك اكثر حتى من جمال وجهك..

عوق بدهشه \يا ويلك من ربي كيف هنت عليك..,

زياد يبتسم بحب\ وجاتني عقوبه شكلك داعيه علي ليلي كله وانا اناظر يدي والمسها اتخيل نعومة شعرك بيدي..,

عوق تبتسم\ كيف لو ما انت دارس برى والا مراجعاتك كلهم حريم المفروض كل شي عندك عادي..,

زيادبصدق \تدرين يمكن الي عاصمني ان امي تستودعني الله..,

ومااتذكر اني التفت لبنت كنهم رجال قدامي كذا سبحان الله نفسيآ..,

وهنا اعتبر كل المراجعات بناتي وخواتي وضع دكتور الولاده ترى غير ..

ما وصلت حالاتهم عندي الا وهم مضطرات وبحالات احيان توصل درجة الخطر..,

عوق\الله يجزاك خير ويثبتك بس استغربت فعايلك..

زياد\وانتي ما قصرتي رديتيها لي يوم جبت المهر دخلتي فجاءه وصرختي بغيت انجلط من صوتك ..,

عوق بضحك \ ربي اخذ حقي منك..

زياد يبتسم\والله ياعوق ما سمعت الا صوت صرخه وشي ما ميزته استنتجت بعدين انه جديلة شعرك يوم هربتي طاير وراك كنه حبل اسود..,

عوق بخوف \قل ما شاء الله ..

زياد بضحك \ما شاء الله طيب وش رايك ان لقينا حجز اليوم اعتمرنا..,

انتي جاهزه...؟

عوق بفرح\جاهزه مافي شي يربطني لكن غريبه مستعجل ..!

زياد\صديقي بيزورني ازعجني يقول انت تزورني ولا تعزمني..

وعدته بعد ما ارجع من العمره..؟

عوق\عادي اعزمه اليوم اذا انت منحرج منه..,

زياد يبتسم\لا منحرج ولا شي يا الله خير البرعاجله بشوف الحجز ارجع القاك جاهزه يوم يومين ثلاث با الكثير وراجعين..!

طلع زياد يشوف الحجز وانا رتبت شنطة سفر ملابسي وملابس زياد وكل الي نحتاجه بعمرتنا..,

كلمني زياد انه لقى حجز ذهاب واياب لمطار جده وخبرته اني جاهزه..,

رجع اخذ الخدامات يقول بيتركهم عند بشرى تبغاهم قفلت بيت امي..,

تركت السواق با الملحق يحرس بيتنا عيال ناصر ما ينضمنون الي حتى السياره ما سلمت منهم اخذوها..

عوق\ نحرم من الرياض والا من جده..,

زياد\لا معانا وقت بنحرم من جده ان شاء الله..,

نزلنا مطار جده وطلعنا اوتيل ريحنا وبعدها للميقات احرمنا واعتمرت انا عن امي وزياد عن امه..,

ورجعنا لجده علشان ماتفوتنا الرحله حسيت نفسيتي افضل بكثير ومن الي ما يشوف بيت الله وما ينبسط وينسى همه..,

زياد\باقي معانا وقت كان تبين اسواق..

عوق\عادي الرياض اسواقها لاتحصى ولا تعد..

زياد\انا طالع باخذ هدايا واجد باخذ ملابس لولد ناجي وولد صديقي وابي ذوقك..,

عوق با الم \ماله داعي روح انت انا بنام..,

زياد با اصراريسحب يد عوق \النوم لا حقين عليه لكن الشوبينغ ماهو دايم يحصل..,

طلعت مع زياد للمجمعات واشترينا ملابس وشغلات و ملابس اطفال لولد ناجي ولد صديق زياد..,

كسر خاطري زيادلما قال اعتبريهم اولادك ولا تخلين شي بنفسك الله يعوض علي وعليه بلي راح..,

اخذت كل شي تمنيت ان ولدي يلبسه ورجعنا للأوتيل..,

عوق \ياربي اتوقع ما بقى با اسواق جده ومجمعاتها شي..!

زياد بضحك\ماهو هنا المشكله ..المشكله العظمى كيف بناخذ ها الاغراض..,

عوق بتهكم\هذي المشكله الازليه اذا جينا نشتري ما نفكر بلي شريناه الا اذا رجعنا للبيت..

اردفت عوق بضحك\اشياء كثيره كان مالها داعي نشتريهازحمه علينا..,

زياد\يسهلها ربك بنرتبها و ونشحنهاان شاء الله ارتحتي بعد العمره..,

عوق با امتنان\الحمدلله..,

اردفت عوق\زياد انا ماحجيت اذا تقدر ترتب وضعك ونحج ها السنه..,

زياد\الله كريم بحاول والا انامسقط فرضي من زمان يا الله جاهزه بنمشي ما بقى وقت ..,

طلعنا للمطار وركبنا الطياره وطلب مني زياد نطلع لبيته بعد مانوصل..,

وافقت ماابي اكسر بخاطره وصلنا بيت زيادبعد المغرب..؟

دخلنا سور البيت وانوار البيت كلها مولعه وشكل البيت من برى فيه حياه ذكرني با اول مره ادخل بيت زياد..,

دخلت للبيت حسيته متغير زياد مغير الاثاث الي في الدور الارضي كله والمجالس..,

ومغير صبغة الغرف توني اشوفها المره الي فاتت لماجيت للبيت حسيت في شي متغير..,

لكن ما دخلت للغرف وزياد ما شجعني اشوف شي وريحت بخور..,

اكثرما شدني غرفة امه مغير شكلها ورسوم ورودعلى جدرانها ومفروشه بموكيت غرف اطفال..

اشكال العاب والباب مغيره استغنى عن الجدار وخلاه شفاف الي في صالة البيت يشوف الي يدخل غرفة ام زياد..

زياد يبتسم\ها وش رايك با المفاجاءه..,

عوق بدهشه \حلوه خصوص الوان الغرف ملونه الفكره الي انت رافضها سويتها..

زياد يضحك\ طيب و شفيك مكتئبه ما سمعتي ان الي يذم شي يطيح فيه..,

عوق بحزن\زياد ليش سويت كذا بغرفة امك..

زياد مستغرب\ ليش ماعجبتك الفكره..

عوق\ لا با العكس حلوه لكن ..؟

زياد\وش لكن بيجي يوم تشكريني على ها الفكره خلينا نطلع فوق نكمل الجوله..,

طلعت فوق

عوق تبتسم\ الحمدلله غرفة الاشباح على حالها..,

زياديضحك\هذي انا تاركها لك متى ما بغيتي غيرتها لك تعالي شوفي غرفة النوم..,

دخلت لغرفتي تفاجئت منها تغييرات بسيطه مغير اتجاه السرير ومفرش شكله حلو..,

عوق با عجاب \ما شاء الله عليك والله مجهود..

زياد\الله يسلمك هذا المفرش الي وعدتك فيه تذكرين مفرش زوجة نواف هذا اغلى منه للغاليه ام نمر..,

عوق بخجل \الله يسلمك بس شكلك تعبت..

زياد\ما قصروا خواتي والخدامات هم الي تعبوا..,

عوق \علشان كذا قلت بشرى تبغى الخدمات لا والله ماقصروا الله يجزاهم خير..,

زياد\توقعت ان بيصير في خاطرك اني ما اخذت رايك وانهم تعدوا على خصوصياتك..,

عوق\ لا با العكس متعبين انفسهم على شاني وتبيني ازعل..,

دق جوال زياد ورد عليه

زياد\هذولا خواتي بيجون يسلمون عليك تعالي معاي..

عوق\لا انزل انت انا بنزل شوي..,

زياد\لا تتأخرين..

فتحت دولابي ملابسي بمكانها ما تغير شي منها لكن ما ادري مقاسي اولا ..,

كلمت زياديطلع شنطه من شنطنا في ملابس لي اشتريتها من جده..

طلع لي الشنطه وطلعت لي لبس اخذت شور جففت شعري الي حسيته بدا يتساقط بكثره..

يمكن من فقر الدم ونقص كالسيوم بعد الولاده ولبست فستان قصير لونه خريفي اصفر على اخضر..,

غيرت شكلي بمكياج خفيف تعطرت ونزلت..,

كان موجود نجلاء وبشرى سلموا علي وتحمدولي با السلامه..,

بشرى \ان شاء الله اعجبك بيتك بعد التغيير ..!

عوق \ الحمدلله حلو..,

نجلاء\تجديدك في بيتك اصلن يغير نفسيتك..

زيادبمزح\وخصوص الالوان الي اختاروها بناتكم حفله با الحالها..

عوق\با العكس الالوان حلوه مره..,

نجلاء\الله يجبر بخاطرك لو يسمعونك البنات بينبسطون زياد رافض كثرة الالوان في البيت..,

عوق بضحك\ كلهم ذوق ..

زيادبتهكم مصطنع \كنت اضحك بناس صابغين غرفتهم وردي وربي عاقبني..,

طلعوا بشرى ونجلاء طلبت من بشرى تاخذ خدامة صديقتها انا تكفيني خدامة امي..,

وجلسنا انا وزياد..,

زياد\ بكرا بيزورني صديقي الي وعدتك..,

عوق\مومشكله كنت بتطمن بس على بيت امي ..,

زياد\لاحقين على البيت ان شاءالله وصديقي زعول ما ابي يقول اني اتهرب منه..

عوق\تبيني اجهز شي لك معين للعزيمه..

زياد\ لا صديقي مسوي ريجيم ما يبي شي..

عوق بضحك\غريب صديقك..,

زياديهمس بحب\والله انتي اليوم غريبه وشكلك صاير جناااان على قولة بنات خواتي خوقااااااقي..’

عوق بخجل \من ذوقك هذا وبعدين كلمة خوقاقي كم مره اقول ما ابي اسمعها معناها ماهو بزين..,

زياد با استسلام \حاضر كم عوق عندي..

عوق\زيادباخذ رأيك في موضوع..

زياد يبتسم بحب\خوذيني كلي لك ماهو بس رأيي..,

عوق منحرجه\ انا ابي ارجع ادرس بااشغل نفسي احس لو بجلس كذا التفكير بيجنني..,

زياد\ عندي فكره صديقي له واسطات قويه بقوله يوظفك وظيفه حكومي وش رايك..,

عوق بفرح\صدق زياد اهم شي قريبه ماتكون بقلايع ودارين..,

زياديبتسم\لا بتكون اقرب من ماتتصورين ما تحتاج مواصلات ..,

عوق\ يارب والله اتمنى على اني اكره المشي بعدين سواق امي موجود هو بيوصلني..,

زياد\لا ان شاء الله ما تحتاجين سواق امك المشوار قريب اقولك ما يحتاج مواصلات..

عوق با استغراب \وش فيك زياد كلامك محير..

زياد\لا محير ولا شي بكرا بتعرفين المهم نجلاء بترسل عشى لنا بتعشى وانام لا تنسين تونا راجعين من سفر..,

ارسلت نجلاء العشا تعشينا وطلعنا ننام وحسيت زياد فيه شي كنه يشوفني اول مره شكله عنده كلام ولا يبي يقوله..,

صحيت على صوت المؤذن صحيت زياد لصلاه..

هو طلع للمسجد وانا تجهزت لصلاه وصليت الفجر..,

جلست على سجادتي اقرا اذكاري...

وراجعت حفظي للقرآن من زمان ماراجعت حفظي اخذني الوقت وانا اقرا قرآن ارتاحت نفسي اكثر واكثر..,

الحمدلله امس كنت في اطهر بقعه واليوم اراجع حفظي لكتاب الله والله اني في نعم لا تعد ولا تحصى ..,

حتى فقداني لأمي وطفلي بديت اتقبله واحط اسوء الاحتمالات اصبر نفسي فيها..,

يمكن لو عاشت امي اكثر بتتعذب من المرض وانا مافي يدي شي اسويه خصوص لوضع امي اجتمع كبر سن ومرض ..,

(اللهم إني أعوذ بك من الجبن وأعوذ بك من أن أرد إلى أرذل العمر وأعوذ بك من فتنة الدنيا وأعوذ بك من عذاب القبر)

الشمس ارتفعت وزياد مارجع الي الآن معقوله طلع لدوام سيارته ماهي موجوده..؟!!

ناظرت الساعه كانت سبعه ونص صباحآ..,

باقي على دوامه نص ساعه يارب سترك ..,

كلمته على الجوال ..

عوق بخوف\ وينك..

زياد\صباح النور تحت ..,

عوق\ سيارتك ماهي موجوده..

زياد بضحك\ وش قلنا مانبي مطالع مع الشبابيك ..

عوق\ قلقت عليك مارجعت ولا هو وقت دوامك..

زياد\ها المره مسموحه دقايق وانا عندك..,

انتظرت زياد بغرفة الاشباح ها الغرفه احبها وارتاح اذا جلست فيها عكس اسمها سمعت صوت خطوات زياد..,

ودخل بوجهه البشوش ما ادري صرت اشوف وجه زيادغير ..,

ماادري هو انا تغيرت نظرتي لدنيا اوهو بفضل الله ثم دعائي ان ربي يسخرني له ويسخره لي..,

زياد بحب \صباح كل شي عذب وجميل على ام النمر..,

عوق تبتسم\هلابك شعندك نشيط اليوم..

زياد\ليش ماتناديني ابو نمر مثل ما اناديك ام نمر..,

عوق تتنهد بوجع\ الحمدلله على ما قدر وكتب لكن احس قلبي يعورني لو بقولها لك..,

زياد\ليش ها التشائم خليك متفائله وغيري لبسك والحقيني تحت..,

عوق تناظر لبسها\ ليش موعاجبك وش تبيني البس..,

زياد بتهكم مصطنع\يعني البسي قميص نوم وانزلي تحت مثلآاما عليك فهم مرات..,

عوق بضحك\صدق ماني فاهمه عليك..,

زياد بضحك\اقول بس البسي بطلع انا وانتي فهمتي الحين ولا تكثرين اسئله انتظرك با السياره..,

استغربت من كلام زياد وخصوص انه لابس ترنج رياضي يعني مستحيل بيطلع دوامه ويطالبني اغير لبسي..,

بدلت لبسي واخذت عباتي ونزلت طلعت لسياره الجو كان ربيعي حلو..,

زياد يبتسم\حي الله ام النمر معك مناديل..,

عوق با استغراب \الله يحييك ايه بشنطتي ليش تبي..,

زيادبغموض\لا يمكن انتي تحتاجينها..,

عوق بحيره\تدري اني ماعاد صرت افهم كلامك ما ادري وش تقول..

زياد يغمز بعينه\لا عندي لك مفاجئه اتوقع بتحتاجين كراتين مناديل لأنا بنغرق من الدموع..,

عوق \بسم الله عليك ماجاتك السوالف الا داخل السياره لا انت الي ماشي ولا انت خليتنا نسولف داخل لبيت..,

زيادبضحك\ماشين بنزور صديقي..,

عوق بدهشه واستنكار\بتزوره بلبسك هذا والصباح وانا معك بالله وش فيك اليوم..,

زياد\ عوق من بداية حملك لليوم تعرفين كم لك..؟

عوق بملل\اللهم طولك ياروح تسع شهور وزياده اتوقع..,

زياد\لا تسع شهور كملتي امس مافي زياده..,

عوق بضيق\وش الفايده كملت تسعه والا عشره المولود والله يعوضني فقدانه..,

زياد بتردد\ومن قالك فقدتيه..,

عوق تنزل قفازها وتلمس راس زياد\لا حرارتك طبيعيه ما تهذي وش الي مافقدته..,

زياد بثقه\ ايه مافقدتيه نمر ينتظرك با المستشفى ..,

عوق بذهول وعيونها على زياد\وش تقول ما استوعبت كلامك..,

زياد\اقول ولدك الي قد الكف صغنون ينتظرك با المستشفى..,

عوق امتلت عيونها دموع\ليه كذبت علي وقلت مات..

زياد با استنكار\متى قلت لك مات والا جبت ها الطاري..

عوق تبلع غصه\يوم وفاة امي..,

زياد\ماقلت لك شي انتي ما كنتي مستوعبه انه بيعيش وتوقعتيه هو الي توفى بدال امك وانا ما علقت على الموضوع..,

عوق تبكي \ليه خبيت عني ما تخاف الله ..,

زياد\ماخبرتك لأن وضعك ما يسمح وبعدين ما خبيت عنك كثير خفت اعلقك با امل ويحدث لنمر شي مو متوقع..

عوق بملامه\يا قسى قلبك..

زيادبوجع\عوق لا تقولين كذا حتى لو كنتي تدرين ماراح تسوين شي كنت ابغاك تستردين صحتك بدون تفكير بولدك الي با المستشفى ...,

عوق بوجع \تدري ما عندي شي اعاقبك فيه لا انت ولا كل الي كانواعارفين بوجود نمر ولا خبروني..,

حرام عليكم لو على الاقل كنت ارضعه طبيعي وهذي حرمتني منها..,

زياد با الم\تدرين الكل يظن انك عارفه انه باالمستشفى وصدمتهم في وفاة امك نستهم موضوع ولدك ..,

يبون يخففون عنك حزنك على امك والرضاعه الطبيعيه انا دكتور واعرف منك بها الاشياء..,

انتي تعرضتي لصدمه واخذتي حبوب مهدئه ومسكنات اكيد بتضر طفلك اذا رضعتيه طبيعي..,

عوق بقلة حيله\ماعاد للكلام معنى ..,

زيادبمعاتبه\شوفي عوق انا ماراح ازيد شي لكن انتي كنتي متشائمه من ناحية نمر وعلى طول عندك شعور انه ماراح يعيش..,

عوق با انفعال \ كنت اقول كذا لكن بداخلي غير الي على لساني..,

زياد يحرك السياره\طيب وانا اعلم الغيب وش عرفني في الي بداخلك احكم عليك من كلامك تدرين كنت خايف انك ماتتقبلينه..,

عوق بتهكم \ما اتقبل ولدي كيف تجي هذي..,

زياد\تجي كثير امهات الي يتعرضون لصدمات يصير عندهم اكتئاب ويكرهون اطفالهم وانتي بعد امك نفسيتك جدآكانت تعبانه..,

وقفنا عند باب المستشفى ما حسيت با المسافه من كثر التفكير..,

زياد يبتسم \انزلي علشان تشوفين صديقي الصدوق..

نزلت من السياره حسيت كل الكلام اختفى امشي ورى زياد بدون شعور هو يتكلم وانا بعالم ثاني..!

وصلنا حضانة الاطفال غير الي شفت نمر فيها اخر مره..,

زياد\ بوقع ورقة الخروج ارجع القاك متعرفه على صديقي..,

تركني زياد اناظر الاطفال الموجودين اكيد عرفته مثل كل مره اشوفه فيها لكن ها المره غير..,

كان اكبر وشكله مولودكامل باينه ملامحه وقفت عند سريره..,

ماقدرت اطلب من الممرضه تعطينياه وقفت انتظر زيادوانا رجولي ماعاد تشيلني وقلبي يدق بسرعه..,

حسيت اني طفله ابي الي يوجهني..؟!

رجع زياد معاه اوراق في يده..

زياديبتسم\ تأخرت عليك شؤن المرضى توهم يفتحون علشان ورقة الخروج شكلك عرفتي صديقي ليش ما شلتيه..,

عوق با ارتباك\ما ادري قلبي يدق بسرعه وايديني ترتجف..,

زياد\لا يرحم امك لا تجيبين العيد يطيح منك انا بشيله عنك..,

جاب لي زياد كرسي جلست عليه وكلم الممرضه تغير لنمر بلبس جديد شكل زياد شاريه له..,

بسرعه لبست الممرضه نمر و لفته في بطانيه سماويه وكانت بتعطيني اشيله ما قدرت ارفع ايديني..

زياداخذنمر من الممرضه وطلع وانا مشيت وراه ركبنا السياره..

ونمر مع زياد واكياس الممرضه كانت شايلتهم..,

زياد\امسكي نمر مالك عذر الحين ان شاء الله ما يطيح منك..,

عوق بخوف\زياد ما اقدر اشيله للحين جسمي ينتفض..,

زياد بضحك\يا خوافه..,

نزل نمر لمرتبة السياره من ورى وضبط مكانه علشان ما يطيح ولا يتعور ورجعنا للبيت..,

زياد بضحك\ للآن تحسين نفسك مضطربه..

عوق مرتبكه \مره ماني قادره اتماسك على بعضي..,

نزل واخذ نمر معاه دخلنا داخل البيت ونزل نمر على الكنبه جنبي وجلس مقابلني..,

زيادبمزح\ حي الله نمر في بيته وجنب امه الي خايفه منه..

عوق\ ماهو مسألة خوف لكن شعور غريب..,

بكى نمر ما ادري وش فيه ناظرت لزياد..

زياد\الولد شكله جايع تعرفي تصلحي له رضعه والا اعلمك..,

عوق مندهشه\ انا عمري ما تعاملت مع اطفال..

زيادبضحك\تدرين شكلي بنادي بنات ناجي يعطونك دوره كيف ترضعين ولدك شفتهم قبل كم يوم ..

معهم اخوهم وحده شايلته والثانيه معها الرضاعه..,

عوق بملل \خلاص لا تستهزئ بحاول اتعلم..

صلحت رضاعه لنمر قدام زياد وهو يناظرني ويضحك واخذته بحضني وارضعته..,

زياد\شفتي كيف الموضوع سهل باقي المشكله الكبرى..,

عوق بدهشه \وش بعد من مشاكل..,

زياد\مشكلة كيف بتغيرين له والا كيف بتحممينه..؟!

عوق بضحك \لا هذي يبيلها دوره عند نجلاء وبشرى ..؟!
.
.
.
(كلمه اخيره)

إننـآ سُعداءْ وَ لكن لا ندري !
سُعدَاءْ’ إن عَرفنـآ قَدر النِعَم التَي نستمتع بها ،
سُعدَاء إن طلبنـا السَعادة من أنفسنـا لا ممّا حولنآ*
سُعدَاءْ إن كَانَت أفكارنـآ دائماً مع الله ، فَشكرنـآ كُلّ نِعمَة ،*
وَ صَبرنـآ عَلى كل بَلِيَّة ، فِكنـآ رابحين في الحَالينْ ، ناجحين في الحياتيَن ..
الحَمدُ للـه على كُلِ حَالْ*

.
.
.

الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه