بسم الله الرحمن الرحيم

اللهم انا نسألك يا الله ياحي يا قيوم يا قوي يامتين,

ان تنصر اخواننا المسلمين في سوريا ,

اللهم انصرهم بنصرك وأيدهم بتأيديك وأمدهم بجند من جندك,

واربط على قلوبهم وثبت أقدامهم ويسر أمورهم ووفقهم واحفظهم يارب العالمين,

اللهم عليك بطاغوت سوريا وكل من طغى ودافع عنه، اللهم اقذف الرعب في قلبه ،

اللهم صب عليه سوط عذاب ، اللهم ارنا فيه عجائب قدرتك وعذبه عذابا شديدا في الدنيا والآخرة عاجلا غير آجل ،

وأرنا فيه بطشك وعقابك الذي لا يرد عن القوم المجرمين ، واخسف به الأرض واجعله عبرة للعالمين.

اللهم عجل بهلاكه اللهم عجل بهلاكه اللهم عجل بهلاكه.
.
.

هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

ممتنه من الاعماق لمنتدى ........ على وسام الكاتبه المميزه بقسم الروايات..,

واتشرف والله في ها اللقب والتكريم..,

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

اهداء خاص للغوالي , عبق الرياحين, كاشخه بطرحة وثوب أمي ,اسرفت بغلاه,

نموره,المرجانه,تراتيل الشتاء ,حكيمه,عزيزة نفس,مرسى الامال ,آستثنائيهـ بمزاجها. برستيج حزن.
.
.

اليوم بنشوف عوق المزايين واول مواجهه لها مع الحياه بعد فقدان امها ..,

.
.

لكن قبل توضيح بسيط لأن في منتدى تنزل فيه الروايه عدل في البارت السابق بسبب يمنع ذكر اسماء القبائل؛

(لما بديت اكتب الروايه كنت ابحث عن اسماء غير مكرره كثير با الروايات وهداني الله لأسم هجاد..,

واسم هجاد ماهو لا اسم قبيله ولا مر علي حموله بها الاسم,

واي وحده تنتمي الي ها الاسم تراسلني على الخاص وانا احذفه,

لأن الاسم راح يتكرر اكثر من مره في البارتات القادمة والعجوز وضحى انا اشرت انها تنتمي لنفس قبيلة اهل عوق

الي كنت اشيرلهم الــــ... دون ذكر الاسم وهجاد هو جد وضحى العجوز با الرواية ماهو اسم قبيلتها..,

اتمنى اني ما اتفاجئ ان الروايه تنحذف با اكملها بعد ما ينزل البارت الاخير ويبرر الحذف لهذا السبب )
.
.
يا الله تعالوا معاي...!!

وسالفه جديدة؛
.
.
.
البارت الثامن والثلاثون
.
.
.
كلمت على بيت خالتي ام ابراهيم ...؟

عوق\السلام عليكم

...\هلا انتي عوق..

عوق بتوجس\ايوا من معي ابراهيم..

نمر\لا انا المحرم كيف حالتس احسن الله عزاتس با امتس وعساها اخر احزانتس يا ام نمر..,

تذكرت كلام امي يوم تقول لا تاخذين وتعطين مع غريب انتي عارفه نفستس لكن الناس ماتعرفتس..!

عوق بهدوء\ الله يجزاك خير و يسلمك بغيت خالتي..

نمر\هذا هي كنت طالع للمسجد لكن شفت رقم بيتكم ورديت..

عوق\الله يحفظك..

نمر\الله يسلمتس ويطول بعمرتس لحظه بنادي امي..


ام ابراهيم\هلا وغلا وشلونتس الحين..

عوق\الحمدلله طيبه مشكوره على الغدا..

ام ابراهيم بضحك\ وانتي داقه تشكريني والا وراتس علم..,

عوق بوجع\ياربي يخليتس لي بغيت اسولف معتس..

ام ابراهيم بعطف \ويخليتس لشبابتس وضناتس تغديتي..

عوق بحزن\لا توني صاحيه..

ام ابراهيم \اجل بروح اصلي وانتي تغدي وعيني من الله خير وبمرتس ان شاء الله ..,

عوق ببكى\ خالتي لا تخليني تكفين..

ام ابراهيم بمحبه\اذكري الله كلنا اهلتس والبكى والدموع مافيها غير تعذب امتس..,

عوق بحسره\ والله غصب عني ماني قادره..,

اشوف زولها بكل مكان با البيت..,

ام ابراهيم\ما انتي اول ولا اخر الناس الي فقدو غواليهم بتطول الايام وتنسيتس ..

وتعوذي من ابليس وروحي تغدي الجوع ماهو بزين للي مثلتس واقري المعوذات وانفثي على صدرتس..,

تبعد عنتس الضيقه والوساويس وان حصلي جيتس..,

عوق \انتظرتس مع السلامه..

سكرت الخط وكلمت زياد مارد علي تذكرت وقت الصلاه..

قمت وانا احس بدوخه وقلبي خفقان ما ادري جوع والا من كثر ما بكيت..,

تمشيت اتفقد بيتنا..,

الخدامات كانوا يشكون من ناس جو البيت بعد وفاة امي مع بزارينهم..

عرفت انهم اهل سعد وسالم وضحى ما سلم منهم شي..

لا عبين في البيت لعب بزارينهم ماتركوا شي على حاله تكسير ولعب وحوسة..,

يا الله اسبوع جلسوا في بيتنا وشوي والا يهدونه الله يكفينا شرهم.

سمعت صوت التيلفون بغرفتي رديت وكان زياد..

زيادبحب \هلا والله صحيتي..

عوق \ايه قبل شوي..,

زياد\وكيفك الحين..

عوق \طيبه لكن فيني دوخه وحتى قلبي احس خفقان مو طبيعي ..

زياد\اكيد من قل الاكل..

عوق \خالتي ام ابراهيم ارسلت غدا ..

زياد\كويس اجل تغدي..

عوق \لا مالي نفس اذاجيت تغدينا سوا..

زياد\خلاص انا قريب منك نزلي السماعه تلقيني وراك..!

عوق تبتسم \طيب..؟!!

زياد ويدينه على عيون عوق ويضمها\شبيك لبيك وش تامر ام نمر..

عوق التفتت وراها\بسم الله ما توقعتك قريب ..

زياد يبتسم\الا طلعت من الدوام على المسجد الي جنب بيتكم قصدي بيتنا..,

عوق بدهشه\انت كيف تدخل بدون ما حس..

زياد\مفتاحك معي من زمان والا ناسيه..

عوق \ناسيه المفتاح..

اردفت عوق بخجل\ بعدين انت لاتنسى ان البيت فيه خدامات عن ها الحركات..

زياد بضحك\الخدامات با المطبخ والتيلفون داخل الغرفه والغرفه مسكر بابها والباب مسكر علي انا وام نمر..

عوق ببتسامه\ كل هاالموشح عاد..

زياد\وش نسوي عاد با الخجولين..

عوق\ ابعد عن الباب بااطلع..,

زياد با استنكار\ يا االله خدودك من الخجل صايره برتقاليه ماهو حمرا من سوء التغذيه..

عوق بوهن \ما احس لي نفس با الاكل..

زياد\شكل فيك للآن فقر دم لازم تتغذين كويس علشان ما نضطر نعطيك دم..

عوق بخوف\لا تكفى الا الدم..

زيادبحزم\اجل تغذي كويس وخوذي ادويتك بوقتها..

طلعت انا وزياد من غرفتي وقلت للخدامات يجهزون غدا خالتي ام ابراهيم الي ارسلته..

على سفرة الغدا جلست انا وزياد..

زياد\ما شاءالله عليهم متوصين فيك صح ..

عوق\الله يجزاهم خير كلمت ام ابراهيم بتمرني اليوم..

زياد بخيبة امل\يعني اصرف نفسي مع ان كان ودي نجلس مع بعض ..

عوق\ما عليش لاحقين على بعض..

زياد\اجل بطلع لصديق لي ..

عوق با استفهام\نواف والا جزاع..

زياد يبتسم بغموض \ لااااهذاتومتعرف عليه من شهر ولو تشوفينه يا عوق ينسيك همك لدرجة انه خلاني اسحب على نواف وجزاع..

عوق تتنهدبحسره\همي ما ينسينياه الا رب العالمين..

زياد \ونعم بالله بالنسبه لي صديقي هذاكل ما شفت وجهه انسى همومي..

عوق تبتسم\الله يخليك له ويخليه لك..,

زياد بحب\ ويخليك لنا..

عوق\سبحان الله مع السوالف ماتوقعت اكل كذا شكلك تستدرجني علشان اكل..

زياد بضحك\ لا الاكل لذيذ ما شاءالله يجبرك تاكلين غصب..

خلصنا اكل وزياد دخل يرتاح بغرفتي..

وناديت الخدامات يرفعون الاكل ويرتبون مجلس الحريم علشان زيارة ام ابراهيم..

كلمتني بعدهاواعتذرت جايين لها ضيوف فجاءه وقالت بتجي يوم ثاني مع البنات..

مر اليوم عادي على اني كنت اتمنى ان خالتي تزورني..

ومشت ايامي هاديه مابين قلبي الي يتقطع على فراق امي واشوف واسمع صوتها بكل زوايه من البيت ..

ويخلي الدموع تغزي عيوني غصب من يوم يطلع زياد مع الباب..

وبين عقلي الي يفكر ويقولي تماسكي علشان نفسك وعلشان زياد..

زياد الزوج الي كان من اختيار امي هي الي خطبته ورتبت لها الزواجة وكل مشكله تصير بينا دايم مع زياد

الحين عرفت يا يمه انك صادقه واختيارك لزياد في محله..

اليوم مر على وفاة امي 20يوم يعني امي قبل 20 يوم كانت على وجه الارض اناديها وتسمعني..

والحين وينها عساها بروضه من رياض الجنه وينفعها ربي بلي قدمته..

لازم ما اقطع عوايد امي كل شي بيكون زي يوم كانت عايشه حزني عليها ماهو بنافعها..

سمعت صوت زياد ينادي..

عوق \ نعم..؟

زياد\وحده كلمت تيلفون تسأل عنك سبحان الله نبرة صوتها كأني سامعها من قبل..,

اردف زياد بااستغراب \تخيلي قالت ابي عوق وبعدين قالت لاخلاص مع السلامه اكلمها وقت ثاني..,

عوق\يمكن من معارف امي وتوهم يدرون والا من الجيران واستحت منك..

زياد\شكلها كذاالمهم بطلع اشوف صديقي توصين شي..

عوق با استغراب\وش صديقه..

زياديغمز بعينه\نسيتي صديقي الي شوفته تسلي وتنسي الهم..

عوق بضحك\الحمدلله لقيت لك صديق يسلي عقبالي القى لي صديقه تسليني..,

زياديهز راسه بضحك\ والله لو عرفتي من هو صديقي ما قلتي ها الكلام..

عوق بممازحه\تدري انك فاضي المفروض على سوالفك تكون حلاق ما انت دكتور ..

زياد بضحك\ والله ما تنفتح نفسي لسوالف الا معاك وما لقيتي لي الا وظيفة حلاق ..

عوق تبتسم\ما ادري بس ماخذه فكره ان الحلاق سوالفه واجد..

زياد بتهكم\وش رايك عندي لك مشاريع ناجحه..

اردف زياد بضحك \ افتح لك انتي مشغل نسائي وانا حلاق رجالي اتوقع انها مشاريع مربحه بصراحه..

عوق بممازحه\تدري انك بعد انسان مادي من كل شي بتسوي لك مشروع وش معنى تفتح لي مشغل..,

زياد\بماانك شاطره ما شاء الله با المكياج وهذا شفته بعيوني وشعرك طويل ولمسته بيدي..,

عوق\ شاطره با المكياج بنمشيها ونقول صدقناك لكن شعري وش دخله..

زيادبا اعجاب\اما عاد شعرك هذا بتربحين من وراه صدق ملايين

اخلطي لك كم زيت واكتبي لك عليه كم وصفه وخبريهم انك مستخدمته..

واستعرضي قدامهن بشعرك وشوفي كيف الاقبال بيكون عليه..

عوق\ يعني نصب على العالم انا شعري خلقة ربي وامي كانت مهتمه فيه من صغري وترفض اني اقصه..,

زياد\من بيصدق ها الكلام ضحك على العالم وسحب فلوسهم بخرابيط جدآعاديه..

اردف زياد وهو يمسح على عوارضه\ لكن وش رايك انا انفع حلاق..,

عوق بضحك\ بما ان شغلك مقص ومشرط اتوقع لك صراحه مستقبل واحتمال من هالشغله بتصير مليونير..,

زيادبمزح \حتى صديقي بعد ان شاء الله بخلي شوفته بفلوس ..؟

عوق بسخريه مصطنعه\ترى ذبحتنا بصديقك يا الله كانك مواعده ترى زعل عليك طولت عليه..,

زياد يهز راسه\تدرين اكثر واحد بناخذ منه فلوس على شوفته هو انتي..

عوق\لو تعطيني فلوس متنازله لك عن هالشوفه..

زياد يرفع حاجبه بتحدي \بنشوف..

عوق\على الطاري الشعر من تزوجتك وعندي سؤال بسألك دايم وانسى..,

زياد يجلس \يا الله كلي اذان صاغيه..

عوق بترجي\ لاتكفى ذكرني بعدين اكيد ام ابراهيم على وشك خله بعدين..,

زياد يأشر على عيونه وبهمس \ابشري وكم ام نمر عندي يا الله سي يو

طلع زياد ودخلت غرفتي بكلم ام ابراهيم هي مواعدتني بتجيني اليوم عسى بس ما يجي احديخرب عليها..,

كلمتها قالت بتصلي المغرب وبتجي مع بناتها..,

طلعت من غرفتي ورجعت على صوت التيلفون اكيد هذي خالتي ام ابراهيم تذكرت شي..

لكن الرقم غريب

...\السلام عليكم

عوق\هلا من معي

...\احسن الله عزاك

عوق\الله يجزاك خير من انتي..؟

... بتردد\انا,انا مشاعل ..

عوق بقهر\من مشاعل..؟

مشاعل بحزن\قريبة وضحى..

عوق بحده\تبين شي..

مشاعل بترجي موجع\ابغي اجي لبيتها اعزيك..

عوق بغضب\لا تتعبين نفسك امي ماتت وخلاص دفنوها وكل شي راح معاها واندفن ماله داعي تحيون الاموات مع السلامه..؟

سكرت الخط وما ادري ليش بكيت مع انهم ما يهموني لكن حز بخاطري ..

تكلمني كنها غريبه ما كأنها الي جنت علي وحطمت حياتي جابتني لدنيا ورمتني ..

لو ما خذتني امي وضحى كان الحين وش حالي والا وش الايادي الي تلقفتني..!

منهم لله والله ما اسامحهم طول عمري الي ظلموا طفولتي وضيعوا حياتي وخلوني وحيده الي يبي الأجر يحسن علي..,

الخدامه نادتني تقول في ضيوف عند الباب..,

اكيد هذي ام ابراهيم قلت للخدامه تدخلهم غسلت وجهي وغيرت لبسي ما ابي ام ابراهيم تشيل همي يكفي وقفتهم معاي..,

طلعت عليهم وفعلن كانت هي وبناتها ميعاد وروان..

ام ابراهيم بحنان \هلا ومسهلا ما شاء الله على بنيتي ..

عوق بحزن \هلابك خالتي..

ميعاد \ الحمدلله على السلامه واحسن الله عزاتس..

روان \ان شاء الله طيبه..

دخلنا بمجلس النساء اخر مره جلست مع خالتي نوره وبناتها على حياةامي..

بلعت عبرتي مثل مابلعت همي يكفي خلاص استجدي عطف الناس غصب عني او بأرادتي..

ام ابراهيم \يا الله شدي حيلتس كم لتس مخلصه الاربعين اول بيت بتدخلينه بيتي ان شاءالله..

عوق\ابشري ياخاله والله ما ادري وين اودي جمايلكم والا وش اجازيكم فيه..,

ام ابراهيم \الحمدلله الناس لناس والكل با الله وانتي بنتنا..

روان\انا اقولك كيف تردين جمايلنا تاكلين كل الحلى الي مصلحته ميعاد..,

عوق تبتسم بمجامله\ميعاد هي حلى ما يحتاج تصلح حلى..

روان \ماعليه نشوف كلامك بعد ماتاكلين الحلى الي من اليوم وهي متعبه عمرها تحوس با المطبخ..

ميعاد \احم احم لعيون عوق يهون التعب..,

ام ابراهيم\بتذوقين شغل روان ان شاء الله اذا زرتينا بيعجبتس..

ميعاد\الله يسلم كتب الطبخ المضمونه كل يوم نجرب شي..,

اذا زانت اكلناها واذا خربت مافيه الا عيال ريم الضعوف هم الي يطيحون فيها..,

روان تضحك\يا عمري عليهم يمشون ويمدحون بطبخنا ما دروا انهم حقل تجارب ..,

عوق تبلع غصه\اناامي الله يرحمها علمتني الطبخ الشعبي وتشجعني حتى لو مايضبط ..

وغصب اذاسويت طبخه تاكل لو ما تعجبها والباقي الخدامه وزوجها ياكلونه..

ميعاد با اعجاب\تبارك الله شغلك كله روعه الحلى والمعجنات الي تصلحينها اعرفها واميزها انك انتي مصلحته..,

عوق تبتسم\الحلى والمعجنات لا والله تعلمتها من زميلاتي اخذ منهم وصفات

وعلى قولتك ومن كتب الطبخ المضمونة كل جمعه اصلح حلى جديد..,

روان \سبحان الله الجمعه احب الايام لله الا ان كثير ناس تستثقله..,

عوق تتنهدبحسره\ الا انا كنت احس بفرحة هااليوم كأنه عيد..,

خصوص انا وامي نصوم الخميس يصير جو الجمعه جو عيد سبحان مغير الاحوال ايام وراحت..,

روان \فعلن سعادة الانسان تنبع من داخله با اشياء بسيطه يسويها لنفسه جو وراحه نفسيه..,

ميعاد\على طاري الجمعه بكرا تكفين لاتنسين عادة خالتي الله يرحمها..,

روان با استغراب\وش عادته...؟

ميعادتبتسم\وش عادته بعد ليش ماتذكرين خالتي يوم توقف عند الباب ومعاها ريالات توزعهن علينا..

روان بضحك\اي والله اني ما تذكر اخذت فلوس الا منها..؟

ام ابراهيم بملامه \سبحان الله يا الجاحدات..,

ميعادبتبرير\لا يمه خالتي كانت تعطيهن من قلب بدون ما نطلب والي من القلب يوصل للقلب بسهوله..,

روان \لا وفلوسها فيها بركه ماهو انتم تعطونا بمنه ولا بعد ضربه على الراس بعد ماتعطونا..

ميعاد\اي والله مدري وش القصد تعطونافلوس بيدينا وكفخه على روسنا..,

روان بسخريه\الظاهر ان الضربه هي سبب نسيانا لفلوس اهلنا..,

عوق\ان شاء الله ماراح اسكر اي باب خير كانت امي فاتحته..

ميعاد\اي والله شوفي كم اسبوع اناظر مع الشباك على بابكم بعد صلاة الجمعه البزران يمرون ويناظرون بابكم..,

عوق عيونها مليانه دموع\ كنت تعبانه والا مانويت اخلف عوايد امي..,

ام ابراهيم بحده وملامه \الحين انتن جايات تونسنها والا تبكنها..,

ميعادمنحرجه \ماكان قصدي شي وعوق مثل اختنا عادي ناخذ ونعطي مع بعض..

روان تبتسم\ميعاد ارفعي كمك خلي عوق تشوف عضدك..,

عوق مستغربه\وشو..,

ميعاد رفعت كم بلوزتها وفي اثر ازرق ..,

عوق\بسم الله وش معور يدك..

روان بضحك\ استغفر الله ما دريتي ..

عوق \ لا والله ماعندي خبر من يد ميعاد..

ام ابراهيم بضحك\ يويل قلبي بغيت اكسر يد بنيتي كله من وضحى وحريم اخوانها..,

عوق\ لايكون هم الي اضربوا ميعاد..,

روان بتحدي \يخسن لا والله امي بغت شوشة وضيحه جعلها الجدري الهندري

طولت لسانها عليتس وقامت النوري بغت كفختها وميعاد وقفت بينهم..؟

عادامي من قهرها ما قدرت توصل لوضحى عضت ميعاد مع عضدها..,

عوق تتنهد بحزن وقهر\الله يعينكم علي دايم جايبه لكم المصايب...

ميعاد\لا والله انها احسن عضه عقبها كرشناهم من بيتس ولا عاد ارجعوا...

روان بضحك \ميعاد قعدت تصيح بصوت عالي وضحى انهبلت تحسب انها سوت فيها شي ما درت انه من عضت امي..

ام ابراهيم \ انقلعن طريق جدي ولا عاد ارجعن لو تشوفين ركضهن مع الباب الله يكفينا شرهن..

روان\حرام يمه ما نظلم بناتهم فيهم خير

اعرفهن يدرسون معي بنفس الكليه ولا معجبهم الي سووه اهلهم..

حتى يوم هوشتنا معاهن والله ماغير الضعيفات يبكن ويحجزن ويلومن امهاتهن..,

عوق\ داريه يا روان لكن سوايا اهلهن غسلت نفسي منهن كلهن..

ميعاد\شوفي عوق خلي بينك وبينهم شعرة معاويه ولا هو بضارتس شي..

بناتهم مصيرهم يتزوجون وينفصلون عن اهلهم وكل الناس ترى شايفين وعارفين ظلم آل ناصر لتس..

ام ابراهيم \عوق يمي ترى ميعاد صادقه ان بغوا بناتهم يصالحونتس والا يوصلونتس لا تصدينهم..

وانتي ما انتي بحاجتهن الله رزقتس من واسع فضله وكلمة هلا ماهي مخسرتس شي..,

عوق تتنهد بضيقه\ طعونهم يبي لها وقت ..

ام ابراهيم \الله كريم وماكل بنات جو على اهلهن..,

اردفت ام ابراهيم بتردد\لكن بقولتس شي وانتي عندي مثل بنياتي..,

عوق بمحبه\ تفضلي خاله والله ما اشوفتس الا مثل امي وضحى..,

ام ابراهيم بعطف\ كم لتس وانتي والده من شهر وعليه وانتي من ولدتي وانتي هو انتي..,

شوفي ريم بعد كل ولاده ماشاء الله عليهاتجهز كنها توها معرسه وانتي ماغير دافنه عمرتس با الحيا..

عوق\ياخالتي منسده نفسي عن كل شي من توفت امي ماعاد لي خاطرفي شي..,

ام ابراهيم\امتس لو انها تشوفتس كان زعلت عليتس من فعايلتس بعمرتس حياتس حزن بحزن يا كافي..,

ميعاد\امي صادقه ياعوق البنات يتزوجون ويتغيرون للأفضل انتي للأسوء وعلى ما سمعت ان رجلتس ماشاءالله عليه احواله الماديه زينه..

ام ابراهيم\زياد رجال اجودي و الخمال منتس يا عوق انتي الي مهمله عمرتس..,

عوق\ والله انه ما يقصر ما اظلمه..,

روان \طيب جددي في بيتك بشكلك علشان نفسك وطلعي نفسك من جو الحزن الي انتي فيه شكلك كن عمرك 100سنه..,

ام ابراهيم\انتي مير ناسيه كل شي حتى الامانه الي عندي ما سألتيني عنها..,

عوق\الي عندتس يا خالتي ماهو بعيد..

ام ابراهيم بترجي \ الله يرضى عليتس تجين تاخذينها..

عوق بوجع\ امي وش اتركت عندتس..؟

ام ابراهيم \عندي لتس دراهم وذهب واوراق ما فتحتها ولا دريت وش فيها وختم امتس خلتهن عندي امانه

تكفين خوذيهن وريحي بالي منهن..,

عوق بقهر\ هذا الي قلبوا غرفة امي علشانه وضحى وحريم اخوانها..,

ام ابراهيم\امتس يوم طلعت معهم للبر سعد عطاها دراهم يقول انها لها عنده ويبي يبري ذمته

ونزلت لسوق وخذت فيهن لتس ذهب يوم ولدتي بوليدتس حتى قبل تزورتس با المستشفى

تقول ابي عوق تلبسه الي طلعت من الاربعين..,

وخلته عندي خافت من الخدامه يوم تنومت معتس وبا الحفظ والصون متى ما بغيتيهن بشنطتهن..,

روان تضحك بتهكم\ يبري ذمته سعد ها الانسان عجيب مرات اقول حليل ومرات اقول اعوذ بالله منه...,

عوق تغمض عيونها بوجع \ما تقصرين ياخاله..,

اردفت عوق \سعد يتبع سالم ويسمع له ماله شخصيه وسالم يملي براسه الي يبيه وسعد ينفذ بدون تفكير..



انبسطت كثير بوجود خالتي ام ابراهيم وبناتها وخبرتني ان ريم تعبانه هي وعيالها من تقلبات الجو..,

والجوهره مشغوله بحياتها مع نواف واهله..,

وملاك با البيت جالسه ما تقدر تجي بالبنات كلهم معاها وتترك الشغاله باالحالها..

طلعوا من عندي بعد صلاة العشاء..

غيرو جوي ونسيت احزاني شوي حتى نصايحهم ماتجي الا من صديق..,

جوالي فاقدته ما ادري وينه دقيت على رقمي مغلق

سألت الخدمات مافي احد منهم شاف جوالي ..!

ردت خدامة امي وقالت اخذته وحده من الحريم تقصدوضحى..,

لاحول ولاقوة الابالله هي وش ناقصها تطمع بجهاز جوال تحسبه من ورث امي ..,

كلمت زياد قال انا قريب وبجي ها الحين..,

ناظرت وجهي با المرايه خالتي ام ابراهيم وبناتها صادقين يعني وش بيتغير با الدنيا اذا حزنت والا فرحت..,

عجلت الحياه ماهي واقفه علي..,

رفعت شعري عن جبيني يا الله اثر ضربة المفاتيح للحين معلمه براسي..,

ماراح اثرها شكلها كان كبير مره لكن صغر اثره يوم كبرت..

سبحان الله كيف عشت بعد هالضربه يا ليتني كنت مكان ولدي..,

فتحت دولابي كل ملابسي قديمه بجد دافنه نفسي با الحيا..

الله يصبر زوجي علي سكرت الدولاب لازم انفض ها الحزن واعيش مثل العالم والناس ..,

تمددت برتاح وصوت جرس التيلفون رديت عليه..

عوق\الووو

....بترجي وارتباك\عوق اسمعيني تكفين لا تسكرين الخط..,

عوق بحزم\خير مشاعل تبين شي..,

مشاعل\ لابس بسمع صوتك واتطمن على اخبارك..,

عوق باالم\من الله طيبه ومنكم لا والله هم وغبن وقهر توني اشوف اثر مفاتيح ابوتس بوجهي..,

مشاعل تجهش با البكاء\سامحيني..,

عوق بحده\وش اسامحتس عليه انتي ولدتيني بظلام وطول حياتي عشتهامن ورى جريمتس بظلام..,

ربي سخر لي امي هي الي كانت تضوي لي حياتي وراحت والحين زوجي بعد تبون تطفون ها الشمعه..,

يعني ماترتاحون لين تنكدون علي..,

مشاعل ببكى \انتي قاسيه ياعوق..,

عوق بتهكم \ لاحول ولا قوة الا بالله انا الي قاسيه والا انتي واهلتس..؟!

يا بنت الناس انسيني ماتعرفين شي اسمه نسيان وعيشي حياتك ..,

مشاعل ببكى\حاولت بس ما قدرت ما ابي شي منك بس تسمحين لي اشوفك كل فتره وفتره وماهو لازم تسولفين معاي بس شوفتك تكفيني..,

عوق بدموع حاره\مافي شي اسمه ما اقدر هذا انا اسولف واضحك وآكل وانا فاقده امي من 20يوم..,

الي شالتني لحمه حمرا ماكنت احسب نفسي امشي على الارض دقيقه وحده بعدها وهذا انا حيه مابي بلا ليتني بدالها..

مشاعل بحزن\ماراح تحسين احساسي..

قلب الام على ضناها غير قلب الضنا على امه..

عوق بحسره موجعه\لاوالله ان قلبي عليكم اكثر من قلبكم علي انا افكر بعقلي واقرر..,

لو طلعت بحياتس بيجي يوم تتمنين انك يوم ولدتيني دفنتيني..,

مشاعل بمراره\ما بيدي شي غير حرقة قلبي على شوفتك الي بقلبي ماتحسين فيه الا اذاجاك ضنا..

عوق بحسره\الا حاسه بلي بقلبتس جالي ضنا وربي اختاره وراضيه يمكن موته احسن من حياته..,

مشاعل تشهق\بسم الله عليك متى..

عوق بوجع\قبل اكثرمن شهر ولدت ولد على سبع شهور وماهو مكتوب له يعيش والناس الي حولي مستغربين..

شلون ما كملت تسع شهور من زواجي وجا علي ظنا..,

يلمحون انه ماهو طفل من زواج بما ان امه مجهولة النسب شفتي سواياكم فيني لوين وصلتني..,

مشاعل تبكي\ ياليتني مت ولا سمعت كلامك ياعوق..,

عوق تتنهد بوجع\ لو درى احد بوجودي والله حتى موتي وموتس ما ينسي الناس الي سويتيه..

اصلحي ما بينتس ومابين الله هو الي يغفر لكن الناس ماعندها غفران..

مشاعل بترجي موجع\تكفين يا عوق تكفين باشوفك بدر عنده مواعيد ومراجعات وانا معه مرافقه..,

بقوله اني بشوف اهل زوج خالتي وضحى وهو داري عن معزتي لها الله يرحمها..,

عوق بوجع\شفتي كيف حتى يوم بتجين علشان تشوفيني اعتذرتي بشوفت ناس لو بيدهم كان ذبحوني وخلصو من الغريبه الي اكلت حلالهم..,

مشاعل \ انتي اقرب لخالتي منهم ليش ها الهجوم عليك..,

عوق بتهكم\وهم وش دراهم من انا يحسبون امي اكفلتني من دار الايتام و لو في يدهم حتى انتوا ما دريتوا بموتها

خايفين احد منكم يطالبهم بفلوس امي..,

مشاعل \ يوم حضرنا عزاها ما شفتك ولا دريت انك كنتي حامل..,

خبرتني خالتي انك تزوجتي اخر مره كلمتها لكن ما قالت لي عن حملك..

عوق بتهكم موجع\ولو حتى قالت لك وش بتسوين امي راحت وحملي راح تكفون انسوني ولا تدورون وراي مع السلامه..,

زياد بحده\من كنتي تكلمين..؟!

عوق با ارتباك وغضب\وحده لو ما انت مصدق خذ التليفون وكلمها رقمها موجود با الكاشف وبعدين هي الي كلمت ماهو انا..

زياديجلس جنب عوق على السرير\ماهو قصدي لكن استغربت انك تكلمينها وانتي تبكين..

وضاغطه على نفسك شكلك ما تبينها تدري انك تصيحين وسكرتي السماعه بعصبيه..,

عوق با ارتياح\وحده من اقارب امي وذكرتني فيها..

زياد يضحك با استهزاء\لايكون بعد تبي ورث مثل عيال زوج امك..,

عوق تمسح دموعها\لا تبي تجي تعزي وتقلب علي المواجع وقلت لهالا تجين امي وخلاص راحت..,

زياد\ الله يرحمها والله يوم شفتها ياانا انصدمت وحتى نجلاء وبشرى تفاجئوا ما تتخيلي قد ايش استغربوا ..!

عوق با استغراب \من ايش !

زياد بتوجس وترجي \ بقولك لكن تكفين لاتبكين..,

عوق تبتسم بدهشه\شكل السالفه كبيره..,

زياديبتسم\ لاكبيره ولاشي لكن انتي اي شي عن امك يبكيك انتي عصاها سويتي مناحه يوم لقيتيه مكسور..!

عوق بقهر\حسبي الله على حرمة سالم الشغاله تقول هي الي كسرته ما ادري وش ها الحقد..,

زياد\ماعليك منهم هذا كله من القهر صارو مثل الاطفال يعبرون بأي شي..,

اردفت عوق بفضول\وش السالفه بالله ..؟

زياد \كلمني مسلط لما لقوك عند بابهم وعلى طول رجعت للبيت لقيت ام ابراهيم واقفه عندها والخدامات..,

شفتها بسريرهااستحيت اول شي بعدين دخلت وفحصت عليها لقيت مافيها نبض ..

اكثر شي استغربت الشبه الي بينك وبينها..,

عوق بخوف\يمكن يتهيألك والا وش جابني لها..

عوق بنفسها\يارب سترك وهذا الي خايفه منه الشبه والمقارنه..

زياد يوقف وبطريقه مسرحيه\ما علينا يمكن علشان احبك واموت فيك ومعجب بشخصية امك

صرت اشوف شبهك بكل مكان بعدين انتي بنظري جميلة الجميلات..,

عوق تبتسم\ انت المفروض على ها الخيال الواسع تكون ممثل ماهي ضابطه عليك مهنةطبيب ..,

زياد\علشان تعرفين انك محظوظة تزوجتي رجل متعدد المواهب..

عوق بوجع\ الحمدلله والله اني محظوظه بكل شي الا شي..

زياد \لا تكفين فهمت قصدك فكينا من تقليب المواجع عندي لك مفاجاءت فوق ما تتصورين..

عوق\عسى خير..

زياد\كل شي بوقته حلو لكن وش رايك نغير جو نطلع نتعشى برا..,

عوق بطفش \والله مالي خلق نتعشى هنا احسن..
.
.
.
(كلمه اخيره)

قال رسول الله صلى الله عليه وسلم :

((أحب الناس إلى الله أنفعهم للناس ، وأحب الأعمال إلى الله سرور تدخله على مسلم ،

أو تكشف عنه كربة ، أو تقضي عنه دَيناً ، أو تطرد عنه جوعا ،

ولئن أمشي مع أخ لي في حاجة أحبّ إلي من أن أعتكف في هذا المسجد شهراً - في مسجد المدينة -

ومن كفّ غضبه ستر الله عورته ، ومن كظم غيظه ولو شاء أن يمضيه أمضاه ملأ الله قلبه رجاء يوم القيامة ،

ومن مشى مع أخيه في حاجة حتى يثبتها له ثبّت الله قدمه يوم تزول الأقدام))
.
.
.
الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه

السلآآآآام علييكم
غاليتـــي أم الوليد ماشاء الله عليــك كــل ســالفة أروع من لي قبلها و تدخل للقلب على طوووول

أم الوليد والله فرحـــانة بزآآآآف بالإهداء ^^ بالإسم لي هنــاك ^^
الله يفرحك و يعطييك كل ما تتمنين و يصلح لك الذرية يــارب

الجزء لي كنت على أعصـابي و أنـا أقراه حـاطة يدي على قلبـي هو مكـالمت مشاعل لعوووق من كثر خووفي انو زيــاد سمع الكلام لي دار بينهم أكييد راح يفهم الصلة و يووم شفت اسمه في الحوار يتكلم بحدة قلت خلآاص لي سنييين و هو مستووور يـاويلك ياعووق بتبدى المشاكل و الأحزان و انتــي لسة ما تهنييتي
بــس الحمد الله وصل على الأخيير و من كلامه انه ما سمع وش دار بينهم
بــس الصراحة عووق غلطانة ليش تجاريها في الكلآآم و تقولها وش سوت و ما سوت هذي وحدة من نصايح الوضييحي لي عووق ما تمسكت بها انهـا تخلي الماضي و ادا أهلها كـانو يمشوون يميين هي تغير دربها ترووح شمال
الله يعيينها يـارب ..

تسلميين أم الولييد جعل يدك ما تمسها النـار ي يحفز لك كل من يعز علييك يــارب

والله عوق على مشاكلها تحمد ربها انه ربي رزقها زوج مثل زياد

وانا احس انها ماتحبة لكن متقبلته عشان وضعها على عكس مشاعره تجاهها ومشكووووووووووووره على الرواية

اللهم اغفرلنا ورحمنا سبحان الله العلي القدير

السلام عليكمـ...
.
.
.
مساء الخير على جميع القلوب المتحلقة بمحبة هنا...
.
.
.
أم الوليد مشتاقه لكـ جداً=(
و
الف مبروك التميز الدائم لك
.
.
.
بارتات موجعه...
أستنزفت أنين الحروف بحياة العوق...!

.
.
.

أنكسار أشرعة...يا الوضيحي...أنكسار أشرعة..!
أي وربي...
فقدانكـ...كـا العود الثمين المشتعل فـ َ سكب عليه الماء..فـ أنطفأ فجئه..!


/

العوق...؟
هل يعزى بـ فقدان الأم...؟
سؤال موجع مر..؟
وتبيض العيون من الحزن..و..نتذوق ذبول كل شي كان ينبض با الحياة...!
كـا مفاجئة فصل الخريف يحاول التمرد ونزع رداء الربيع..!
لكن أجابته هو ...
وبشر الصابرين..!



أللهم أحفظ لنا أحبتنا يارب...ولآ...تفجعنا ..




/


مشاعل...!


الوحوش تدافع عن صغارها....وتنهش كل من يقترب منها...!

وهي وحوش....لآ...عقل لها ولآ...ملة...!

لكن هي فطرهـ....فطرة الأمومة...!

من ينزعه من أحضاننا نحتول الى مخلوقات أخرى...تدفعنا غريزة الأمومة....و...تغذينا ...

نتعب ونسهر و..[نضحي...]...من أجل تلك قطعة من [الروح] تمشي على الأرض...!

فـ لـ أجل تلك الجنه تحت أقدامنا...لعظمة وكبر شأنا...!

وكل حب يتصاغر ويتلاشي بجانب عاطفة الأمومه...!


.
.
.
الأمومه...تضحيه...!
الأمومه ...أيثار...!
تربيه...!
سهر...!
دعاااء بـا أخر الليل والناس نيامـ...!

الامومه...مراقبة لخطواته ...وسكناته...بكائه...أبتسامته...ملامحه التي تكبر....!

الامومة تجهلينها يا مشاعل...

....فـ عوق كانت و

ستظل ذاك الماضي الأسود الذي مكانه الصحيح الثرى...!

لو كان الأمر بيد أهلكـ... لـكفتنو ذلك الماضي بسواد...!


أنسي يامشاعل....فـبرغم من ظروفكـ...و...ألمك..وندمكـ...وحزنكـ...الا انه يتصاغر ويتقزم بجانب ما تعانيه تلك الفئه...


.
.
.
ام الوليد..؟

هل تخبئين لنا ...كشف المستور بنهاية الرواية...؟





/



طبتي وطابت أيامكـ يا الغاليه...=)


.
.
.