بسم الله الرحمن الرحيم


اللهم يا الله يا حي يا قيوم نسألك باسمك الأعظم الذي إذا دُعيت به أجبت وإذا سُئلت به أعطيت,

ان تنصر عبادك المستضعفين فلا ناصر لهم غيرك,

اللهم انصرهم على من عاداهم,

اللهم انا نسألك يا قوي يا منتقم ياجبار,

ان تسلط العذاب على بشار أعوانه و مناصريه وخلص حقوق اخواننا المظلومين منهم يارب العالمين,

اللهم ان بشار الأسد و عصاباته قد طغوا و بغوا وقتلوا و دمروا ونشروا في الأرض الفساد,

اللهم صب عليهم العذاب صبا يارب واجعلهم يتمنون الموت ولا يجدوه,

اللهم احقن دماء المسلمين واهلك الظالمين بالظالمين واخرجنا من بينهم سالمين,
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,


البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

اسأل الله العظيم رب العرش الكريم ان يكشف عن اختنا امووله ضر مسها هو اعلم به منا ومنها.

بارت اليوم بارت طويل اتمنى انه يخفف حدة حزن البارت السابق..

اهداء خاص للغوالي بياض الصبح,عذرآقلب,سراب,الهدف,ateralmasa ,شبيهة امي.
.
.
اليوم بنشوف عوق المزايين والصعوبات الي واجهتها وهل بتصمد قدامها..,

يا الله تعالوا معاي...!!

وسالفه جديدة؛
.
.

البارت السابع والثلاثين
.
.
طلعت للبيت الي كان موجودفيه حريم سعد وسالم وضحى

دخلت للبيت وزياد دخل للمجلس كان فيه ناس طالعين وداخلين..!

لحقتني ام ابراهيم الي رجعت مع ولدها ابراهيم ودخلت بعدي..,

نجلاء وبشرى رجعوا لبيوتهم ..,

دخلت وشفت البيت موحش حسيت حتى جدرانه تبكي معي فقد راعيته..,

الموجودات كلهم قاموا بوجهي فيهم الي كاره دخلتي وفيهم الي حزين معي مدري علي

لكن الي بقلوبهم ترجمته عيونهم ..,

وضحى\الله يحسن عزاتس يا عوق ويعينتس ..

عوق \جزاتس الله خير..

زوجة سعد\الحمدلله ان شاء الله ان خاتمتها طيبه..

زوجة سالم\والله ما شاء الله انها كسبت الدنيا والاخره..

وضحى بتهكم \اي والله وش عاد ينفع كثر العيال وقلهم..

رجلي يقول يوم جنازتها من كثر الناس الي حضرت كنهاجنازة امير

الطريق للمقبره غير جات الشرطه نظمت السير..

غزيل بنت سعد بحزن\احسن الله عزاتس عوق والله ان مصابتس مصابنا..

زوجة سعد \عمتي راعية خير والي تنفق يمينها ما تدري عنه شمالها..

وضحى\اي والله من غير الايتام الي ضفتهم وعطتهم شي ما يعلم فيه الا الله..

افراح بنت سالم\وان شاء الله ان عوق ما تقصر ولا تقطع افعال الخير الي جدتي سوتها..,

زوجة سالم\الي مثل عمتي حظيظ هذا هي راحت وتركت الذكر الطيب وراها..


انا ادري اكثر كلامهن يقصدوني فيهم لكن ماعندي رد عليهن ..,

سبحان الله هن وبناتهن ناس سم وناس بلسم وهم عايله وحده..!

تركتهن يسولفن ويعبرن عن شعورهن ماعاد يهمني اي كلام امي وراحت ..,

كنت بدخل غرفةامي لقيتها مقفوله بالمفتاح..

عوق بحده واستنكار\من قفل غرفة امي..؟!

وضحى با ارتباك \سعد, سعد قفلها..,

افراح منحرجه\ والله مالنا دخل عمي سعد هو الي قفلها ياعوق..

عوق بصراخ\ومن هو سعد علشان يتحكم في بيت امي يقفل ويفتح على كيفه وين المفتااااااااح..

ام ابراهيم\استهدي بالله يا عوق ما صار شي..

عوق بقهر\ليش على كيفه يقفل غرفة امي..

غزيل \اهدي يا عوق الحين بنجيب المفتاح..

زوجة سعد\ انتي انثبري يا غزيل وش دخلتس..

والتفتت لعوق\خير واذا قفلها غرفة عمته ماهي غريبه عنه..

عوق تصرخ\الغريبه تبي المفتاااااح بسرعة تسمعين ..

وضحى بغضب\الله يكفينا شر بنات الحرام تعوذي من ابليس ولا تصارخين

عيب المجلس مليان رياجيل تسمع صراختس ..

عوق تبكي وتضرب الباب \افتحو غرفة امي افتحوهااااا ..,

وضحى بتهكم \الكلام معتس ضايع الي مثلتس وشلون يعرفن العيب بنت حرام ماعليتس شرهه..,

عوق ببكاء مرير\الحين انتم وش تبون من بنت الحرام

طلبتكم شي اخذت منكم شي عشت على صوانيكم والا من مدة ايديكم..!

ام ابراهيم بحده وغضب \وضحى فكينا شرتس الحرمه تعبانه نافس وفاقده امها..

عوق بتهديد وتضرب باب الغرفه\بسرعه افتحوا الغرفة وبعدين يا وضحى نتحاسب..!

وضحى بسخريه\ليه وش فيها الغرفه خايفتنا نلقاه مير من دخلتي على طول طرتي لبابها..!

عوق بقهر \الي فيها فتشتوه واخذتوه قبل امي اتوسد التراب والا ما قفلتوا الغرفة..’

وضحى بسخريه \يا قو عينها وتظلم بعد..!

عوق بضعف تجلس قدام الباب\خالتي تعبت افتحو الباب والا نادي احد يكسر الباب..

وضحى با استنكار \وش يكسر الباب ليه هو حلال ابوتس والا وارثته من جدانتس الي من ينعرف منين هم..,

ام ابراهيم بحده وتهديد\ تعوذو من ابليس وخلو احديفتح الباب لعوق تدخل غرفة امها..!

زوجة سالم با استهزاء \ليه من قال انها امها..,

عوق بتعب\خالتي عطيني جوال بكلم زياد يشوف ها العصابه..

وضحى بغضب وسخريه\والله ماغيرتس انتي ريسة عصابه الي بينا وبينتس عجوز وماتت توكلي على الله..!

ما قصرت زوجتس بلوتن مثلتس كلميه خليه يقلعتس عنا مالتس مكان بينا..,

ام ابراهيم بغضب واستنكار\ليه وين تبينها تروح وتترك بيتها

هذا انتم ماشاء الله مثل الغزو من توفت ام عوق وانتم تبطحون بالبيت..,

زوجة سعد\البيت بيت عمتي والحين صار لعيال رجلها هي مقطوعه ومالها احد الا عيال عمي ناصر..,

ام ابراهيم بتحدي\كل شي يخص وضحى كتبته لعوق..

وضحى بسخريه \والله من النصب والكذب وبعدين انتي يا نويره وش دخلتس انتي ورجلتس

والا بعد ضحكتوا على عمتي ولفيتوا من وراها لين قلتوا بس مثل ها البلوى الي تدافعين عنها..,

ام ابراهيم تبتسم با استهزاء\ سبحان الله ياوضيحه كلن يرى الناس بعين طبعه

وحنا ناس معروفين مانحتاج شهادتس لا انتي والا الي على شاكلتس ..؟

وضحى الهجاد ما وكلت رجلي الا بعد ماطفح بها الكيل من سوايا اخوانتس..,

وعوق ماهي بلوى البلوى الي ما يخاف الله ويخون الامانه ..,

وضحى بحده\وش قصدتس اخواني العبوا على عمتي واخذوا حلالهاوخانوا بها..,

ام ابراهيم بسخريه وانتقاد \لا لا يا وضحى اخوانتس محشومين من الخيانه..

اردفت بتهكم \بس عمتكم وشيختكم ام العوق موصيه مسلط قبل تموت يرجع كل شي يخص وضحى الهجاد لبنات اخيها

والظاهر انكن شفتنهن با العزا انتم الي ما بينكم وبين وضحى غير شايب ومات لا قربه ولا صحبه..!

زوجة سالم با استهزاء\ومسلط وش دخله بلي يخص عمتي وضحى...

ام ابراهيم بتهكم\لا سلامتس بس هي موكلته با المحكمه ورجلتس واخوه عندهم خبر

وضحى الله يرحمها معلمتهم با الوكاله الي مشترطه فيها عقب موتها ان مسلط يشوف الي فيه صلاح ويسويه..,

وام العوق ان شاء الله انها ماهي مقطوعه مثل ما تقولن لا تغبرون على روسكم..!!

سكتت وضحى وحريم اخوانها بعد كلام خالتي ام ابراهيم..

طلعت زوجة سعد ورجعت معها مفتاح غرفة امي..

عوق بدهشه وخوف\من الي جا ياخاله بعزا امي من قرايبها..

ام ابراهيم وهي تفتح الباب\خلينا ندخل الغرفه واعلمتس ..؟

دخلت الغرفه ومثل ما توقعت مقلوبه فوق تحت دولاب امي وخزنتها..,

سريرها محيوس ومقلوب فراشه..!

ماتمالكت نفسي يوم شفت سريرها طحت عليه وقعدت اصيح..

بكى قلبي قبل عيوني على اغراض امي كيف ملعوب فيها

كل هذا علشان عيال ناصرعارفين ان امي مالها احد واثقين محد بيحاسبهم..

دخلت وراي خالتي ام ابراهيم وقعدت تبكي معي وتهديني ودخل بعدها افراح وغزيل يبكون معي..

ويحاولون يخففون عني مصابي..

عوق بغضب \ان كان صدق امي تهمكن خوذن اهلكن من بيتنا واطلعوا فكوني لاحقني بشركم من طلعت لدنيا..

غزيل ببكى\والله مافي يدينا شي من ثالث يوم العزا واحنا نقول بنرجع لبيوتنا لكن ابوي وعمي رافضين..,

افراح تمسح دموعها\يا عوق وش نسوي والله دارين ان اهلنا اكل قلوبهم الطمع..

وانتي لاتخافين حقتس حافظته الدوله ابوي وعمي بيملون ويطلعون بس انتي اصبري..,

عوق ببكى \ولمتى ان شاء الله اصبر على اهلكن وانتظرهم..!

اذا انتن صدق بتوقفن معي الحين اول من يطلع من البيت انتن..,

واهلكن اذا ما طلعوا با الطيب بيطلعون غصب..

ام ابراهيم بحده\الله يجزاكن خير يا بناتي

عوق توها طالعه من المستشفى تعبانة اتركنها ترتاح..,

طلعوا غزيل وافراح وبقيت انا وخالتي ام ابراهيم با الغرفه..,

ام ابراهيم تمسح دموعها \ذبحتي نفستس با البكى ولا انتي راده شي..

عوق ببكى\ياخالتي راحت امي من بقالي ماتشوفين الي برا جايين يدورون الفوايد..!

ام ابراهيم وهي تحضن عوق\يعلم الله انتس عندي وعند مسلط مثل بنياتنا وهذولا ما عليتس منهم..

عوق با امتنان \الله يجزاتس خير انتي وعمي..

ام ابراهيم تتنهد بوجع\الصبر وما مثل الصبرياعوق ما نتي اول الناس ولا اخرها

انا امي ماتت بين ايديني وهي مافيها الا العافيه شكت با الليل واصبحت متوفيه..

والا امتس حرمه كبيره ومريضه ومبطي ساطي بها المرض يعني وش بيدنا نسوي.

لو التجزع والصياح يرد الاموات كان كل ميت ردوه اهله..

عوق بوجع\خالتي انتي داريه بمرض امي ..,

ام ابراهيم تتنهد بوجع\اي والله دارية وعلمت مسلط ..

عوق بدهشه\من متى ..!

ام ابراهيم بحزن\من العام طلبتني اروح بها للمستوصف اسوي لها فحص تونس بطنها وعلمونا..

وعطونا تحويل على طول للمستشفى..,

حاولت فيها تدخل المستشفى لكن ارفضت تقول تكفين يا نوره لا تحرميني اجر صبري مابقى كثر الي راح..

عوق بوجع ودهشه\وانا وين انا امي ماتطلع الا وانا معها..؟!

ام ابراهيم \يوم رحت بها انتي هقوتي انتس با الجامعه وهي متعمده ماتبيتس تدرين..

وعجلت زواجتس من زياد وهي والله الي بغته لتس ..

كم مره تذكره نفلا عندها وهي الي شارت على امتس به

قالت زوجيه عوق وانه خوي لعيالها ورجال اجودي

اقتنعت الله يرحمه فيه وسالت عنه وارسلتني انا ومسلط عليه قالت مافي اصلح منه لعوق

ان صار لي شي بنتي تروح با الرجلين محد بيرحمها ..!

نوره تتنهد بحسره\وضحى سوت لتس الي ماتسويه الام لبنتهاوالحين دورتس تردين لها الدين فعل ماهو بكى وتجزع..!

والله لو تذبحين نفستس ماهو نافعها ولارادها..

بكاتس عليها ماغير يعذبها بقبرها ..,

عوق تجهش با البكى \يويلي على فراق امي ماكذبت بخوفها علي ماكذبت ..

ام ابراهيم ببكى\وضحى ماهي رخيصه عند كل من عرفهاوالحمدلله توفت بحيلها..,

ما طاحت وتعذبت والا خرفت وضيعت عقلها..,

عوق بتحسر\ياليتني شفتها قبل تدفننونها..,

ام ابراهيم تبتسم من بين دموعها\يا ليتس شفتيهاوجها ابيض كنه نور..,

وسبحان الله الي يسر تغسيلها ودفنها..

والله اني احرك جسدها مع المغسله طري تظنينها نايمه ها المسلمه ماهي ميته ..,

عوق تمسح دموعها\كيف دريتم بوفاتها..,

ام ابراهيم\يوم لقيناتس طايحه عند الباب درينا ماجابتس الا شي كبير..

والا رجلتس و سواقكم عندكم وش يطلعتس من بيتس اخر الليول دخلناتس داخل عندنا..

وفزعت انا ومسلط لبيت امتس وادخل عليها الله يرحمها من يوم شفت وجها دريت انها متوفيه..

واعود لمسلط قلت يا مسلط الظاهر ان وضحى متوفيه كلم زياد..

ونكلمه وجا على طول دخل عليها ومن شافها قال متوفيه..

ورجعنا عليتس واخذناتس بسيارة رجلتس للمستشفى..,

وهي الاسعاف جا وشالها وقرر الاطباء انها متوفيه من اول الليل..

عوق تبلع غصه \سبحان الله اخرعلمي فيها صلت وتعشينا حتى ما كلت واجد تقول ما ابي اثقل على معدتي..,

ام ابراهيم\الله يرحمها يقول زياد المرض فتك بجسدها كله لكن سبحان الله ما طيحت نفسها..,

عوق بقهر وتحسر\حاولت انام عندها وطردتني يمكن حاسه انها بتموت ولا تبيني اشوفها..,

ام ابراهيم\ويازينها من خاتمه هذا يعزي قلبتس ويصبره انها توفت وهي على طاعة ربها..,

وشدي حيلتس شوفي الي جالسات با الصاله ينتظرون بس طيحتس..

عوق تتنهد بضيقه\الله يكفيني شرهن ما سلمت منهن وامي حيه تبين الحين ماكذبت امي يوم تقول العرب مجهزه سكاكينها لتس ..,

ام ابراهيم\امتس الله يرحمهاجيده وعارفه وش وراها ما قصرت معتس خلت لتس الي يكفيتس..,

عوق\ الله يجزاها خيرعلى ان عيال رجلها حاولو ياخذون كل شي..

ام ابراهيم \ماعليه الي اخذوه ان شاءالله انه صدقه جاريه عنها غصبآعنهم

وانتي لا تنسينها بصدقه والا دعوه كثير والا قليل..,

عوق بحزن وتعب\ هذا طلبها مني قبل تموت..,

اردفت عوق وهي تمسك راسها\راسي بينفجر من الوجع ومهدود حيلي..,

ام ابراهيم\الله يعينتس تعب ولاده وفقر دم ووفاة امتس فتره ان شاء الله وتعدي..,

وهذي الدنيا لاحزنن يدوم ولافرحن يدوم..,

عوق بترددوتوجس \خاله صحيح قرايب امي حضروا عزاها..

ام ابراهيم بحزن\اي والله سمعوا بوفاتها الله يرحمها وجو حريم واجدات ..,

اردفت ام ابراهيم با استنكاروتعجب \اعوذ بالله تقل ملحوقات ماكأن هاك الحرمه الطيبه تقرب لهن..,

طول ثلاث ايام العزا يجن لهن شوي وثم يرجعن عن قولة ما حضروا وفاة قريبتهم..

ام ابراهيم بقهر\ياربي ياوحدتن فيهن اسمعهن ينادنها مره ساره ومره ام تركي شكلها هي اكبرهن..؟

من تدخل لين تطلع بسم الله وهي تناظر ساعتهاوالا تلفت يمين ويسارتقل خايفه من شوفت عدو..!

كل ما دخلت حرمة من الي يعزن طارت عيونها بها ثم هجدت

ولا بفمها الا كلمة تاخرنا تأخرنا والله اني مراقبتها ومتعجبه منها..

عوق تبلع ريقها با ارتباك\خاله سألوا عني ..!

ام ابراهيم بتساءل \من هم قصدتس قرايب وضحى..!؟

عوق بخوف وترقب\ايه هم عارفين انها كافلتني من دار الرعايه..

اردفت عوق بتأكيد\ رعاية الايتام ياخاله رعاية الايتام..!؟

ام ابراهيم بوجع\ادرى انها كافلتس من الرعايه تعلميني يا امتس..,

اردفت ام ابراهيم بتنهد\سألت عنتس وحده منهن وقبت بوجها بسم الله الي اسمها ساره..

قالت حنا جايات يا مشاعل نعزي بوضحى الهجاد..

الضعيفه هذيك تفشلت وسكتت غير دميعاته تصب وتشاهق بسكات تقطع القلب ..

عوق باارتباك \احد قالهن شي عني..

ام ابراهيم \ هي سألت وضحى ولا عطتها وجه كسرت خاطري بغيت اقولها عنتس مير استحيت..

عوق بقلق \وش سون الي برا يوم شافن قرايب امي جابو طاريي قدامهم..

ام ابراهيم بتهكم\وش سون والله ما صدقن على الله يطلعن مع الباب ..!

خافن بعد يجلسن في بيت وضحى ويطالبن فيه نسوا طاريتس يوم شافوا قرايب وضحى..؟!

اردفت ام ابراهيم بتعجب\يا سبحان الله ياعوق كيف يشبهنتس انتي والوضيح الله يرحمها ..؟!

تكفين على شان وضحى انا طالبتس تاصلينهن هذا رحم الوضيح جعلها للجنه..؟!

عوق تصرخ بذعر\لا يا خاله لا لاااا

ام ابراهيم بخوف\بسم الله عليتس وش جاتس..

عوق بتوتر وارتباك\لا تجيبين لي طاريهن غثن امي يبونها ترميني يقولون وش تبين في بنت حرام تضفينها..

ام ابراهيم بدهشه\تقولينه صادقه..

عوق بتوتر وارتباك\ايه يا خاله يوقولون خربتي سمعتنا جبتي بنت مايدرى من اهلها وحطيتيها في بيتس ..

وامي زعلت عليهم وماتت وهي زعلانه منهم..,

والي امي زعلت عليه في حياتها يبشر بزعلي عليه لين الحقها والله لو اشوفهن لأطردهن..

ام ابراهيم بقلة حيله\لا حول ولاقوة الابالله حرام عليهن يقطعنها من الاجر ولا يبنها تكفلتس..,

سبحان الله والله لو شفتيهن ياعوق تروعين من زينهن وحريم شخصيات ماهن حي الله غير الرياجيل الي جو معهن..

عيالنا والجيران تروعوا يقولون والله انا ما حسبنا ان وضحى تعرف ها الناس الكباريه..

من غير سياراتهم الي سدت شارعنا وعشا العزا ثلاث ايام هم تكفلوا يجيبونه للمعزين ..

عمتس مسلط يقول انهم يقولون هم ماهم من قرايب وضحى لا هذولا حريمهم هن الي من قرايب وضحى..

عوق تتنهد بحزن\الله يسعدهم ويبعدهم ويستر علينا وعليهم..

ام ابراهيم \ اي والله انتس صادقه ميراذا قمتي با السلامه لتس امانه عندي..,

عوق با استغراب \وش امانته..,

ام ابراهيم\بعدين اجيبها لتس خلي لين تهدا الامور الحين عيال رجل امتس شابين..,

عوق بقهر\وش يبون مكفاهم الي اخذوه يعني بقى ها البيت الي فيه ريحة امي بيحرموني منه..

ام ابراهيم بطمئنه \ما علينا منهم كل شي با اسمتس واعلى مابخيلهم يركبونه وضحى ماخلت لهم مدخل عليتس..,

وخلت لتس خير من الله غير ها البيت..

عوق\يا حياتي كانت عارفتهم ما يخافون من ربهم..,

ام ابراهيم\طبع البشر الطمع الله يكفينا شره وهم ما علينا منهم

بيقبون كم يوم وعقبها كلن بيتوكل على الله ويروح بيته..,

عوق\انا بجلس هنا خلاص ما اترك بيت امي..

ام ابراهيم\هذا شي بينتس وبين رجلتس تشاوروا فيه والصالح سووه..,

عوق بغضب\ماعلي منه بقعد في بيت امي وعلى ريحتها..,

ام ابراهيم بملامه\ما يصلح منتس ها الكلام ورجلتس تراه حبيب وسمح

وقف بجنازة امتس كنه ولدها وزود على هذا ما لتس غيره..,

اردفت ام ابراهيم\والله يوم النزيف الي جالتس الضعيف بغى ينجن ما كنه دكتور ما خلى احد مافزعه يتبرع لتس بدم..,

عوق \والله داريه انه ما يقصر لكن الا بيت امي ما اطلع منه..,

اردفت بقهر \ بطلع اطرد ها الحوش الي برا..

ام ابراهيم \ماعليتس منهن بس لا تعصبين البيت با اسمتس بيع وشرا يطلعون با الطيب والا غصب..,

عوق تمسك يد ام ابراهيم \لا تتركيني..؟!

ام ابراهيم تبتسم بعطف\ مانيب تاركتس ان شاء الله لكن ابيتس بشغله..,

عوق بترقب\آمري..

ام ابراهيم\ ما يامر عليتس ظالم باتسر من وفاة امتس يتم اسبوع

بنشوف اغراضها بعد ها الحوسه نرتبها ونتصدق باالي موجود..,

عوق با اصرار\اغراض امي ماتتحرك من محلها..,

ام ابراهيم تبتسم \والله الظاهر انتس مثل رجلتس سبحان الي جمعكم..,

اردفت ام ابراهيم بتوعد\ بروح اشوف لي ينابحن با الصاله والله لأبرد تسبدتس فيهن وانتي انسدحي ارتاحي..,

طلعت ام ابراهيم وسكرت باب الغرفه وراها رتبت سرير امي وانسدحت عليه..

معقوله خلاص راحت امي وتركتني من لي بعد الله غيرها..

حتى الطفل الي كنت حاطه بعد الله الامل فيه ربي اختاره..

هذولا اهلي جوومشوا مافي احد حتى ذكرني لو بكلمة وشلونها..,

مشاعل تسأل عني بدموع عيونها محرم عليها تسأل بلسانها..

وام ابراهيم منهبله من الشبه الي بينا وآل ناصر خايفين منهم يطالبون با املاك امي

مادرو آل ناصر ان اهلي في سبيل دفن اي اثر لي يحطون فلوس ما يطلبون..,

سبحان الله فعلن اذا نزلت المصيبه نزل الصبر معها ما توقعت اني بتصبر كذاولا اعيش دقيقه عقب امي..

لازم ما اطيح لمثل عيال ناصر الي ينتظرون طيحتي مثل ما قالت خالتي نوره..

والم احزاني واصبر نفسي وامسك وصاة امي اذا بنات خالد وتركي مشن شرق انا امشي غرب..,

ياربي ثبت قلبي واجبر مصابي

ربي لا تكلني الى احد ولا تحوجني الى احد واغنني عن كل احد,

يامن اليه المستند وعليه المعتمد وهو الواحد الفرد الصمد لاشريك له ولا ولد,

خذ بيدي من الظلال الى الرشد ونجني من كل ضيق ونكد يا الله ,

اللهم افرغ علي صبرآمن عندك,

اللهم افرغ علي صبرآمن عندك,

اللهم افرغ علي صبرآمن عندك,

على رغم سماعي للاصوات الي برا الغرفه

صوت ام ابراهيم وحريم سعد وسالم وضجه الحريم وصراخهم..,

الا اني نمت بسرير امي وعلى ريحتها..

صحيت ما ادري كم الوقت لكن شكل الوقت ليل والغرفه ظلام..,

فتحت الشباك وكان فعلن الجو مظلم بيت ابو ابراهيم قدام بيت امي..

اشوف الانوار مطفيه شكل الوقت متأخر..,

طلعت من الغرفه البيت فاضي وموحش يخوف وين العالم الي اول ماطلعت من المستشفى..,

ولعت انوار الصاله ودخلت غرفتي بغير لبسي ولعت نور الغرفه..

كان في احد نايم بسريري عرفت انه زياد متلملم على نفسه..

يا الله تذكرت تلملمه اونينه يوم ماتت امه فرق بين ونين امي ونين زياد..

زياد ونينه حزن على امه لكن ونين امي ونين المريض الموجوع ..

وشلون مادريت انتس مريضه وتعانين يا ميمتي دسيتي مرضتس عني ما تبيني اعاني معتس

واستعجلتي بعرسي على زياد ما تبين تخليني عقبتس وحيده وبلا سند

وش انتي من البشر يا الوضيح من البدايه لنهايه وانتي تظلليني وش اجازيتس به ..؟ّ!

كل شي سويتيه لي وانا وش سويت لتس ..؟؟

اخذت لبس من الدولاب ودخلت الحمام اخذت دش ولبست وطلعت ..

زيادبنعاس \هلا كيفك الحين..

عوق بهدوء\الحمدلله ان شاءالله طيبه..

زياد\ تعالي اجلسي جنبي ..

عوق جلست جنب زياد بوجع\خلاص ماعاد بقى لي غيرك..

زياد يضمها\يعني انا من لي غيرك..

عوق تتنهدبحسره ودموعهاتنزل\انت على الاقل عندك عايله انا امي وراحت..

زياد يمسح دموع عوق وبا امتنان\ولا عمرهم حسسوني الا اني ولدهم ويمكن مرات يبدوني على انفسهم..

عوق \يمكن لوكانوا اهلك ماكانت لك ها المكانه عندهم..

زياد يبتسم \وهذا الكلام الي دايم اقوله لنفسي لما احس با الغربه بينهم..

عوق مستغربه\معقوله يمرك ها الاحساس احسك مندمج معهم..

زياديتنهد بوجع\احنا مجبورين نساير ظروفنا..

او وحده من ثنتين ام الانتحار او مستشفى الامراض النفسيه..

عوق تبتسم باالم\عليك تعليقات ما ادري وش تبي..

زياد يبتسم\تبي الي تبي اهم شي انك ابتسمتي..

عوق بحسره\ احس اني خلاص داخلي فاضي ما ني قادره اتوازن مع نفسي..

زياد\علشان توك والده وبعدها جات وفاة امك انا اليوم كان المفروض ما اكتب لك خروج..,

عوق بحزن\جو المستشفى يمرض..,

زياد \ماهو على جو المستشفى لكن قلت احسن ابيك تواجهين الناس ويتقوى قلبك وتتغلبين على حزنك..

عوق تتنهد \ الله يعين كم الساعه؟..

زياد يناظر الجوال\ثنتين ونص الفجر..,

عوق\شكلي نمت واجد..

زياد\دخلت بعد العشاء ادورك قالت الخدامه انك للحين نايمه..,

عوق بتسأل\وين العالم الي كانوا هنا..,

زياديبتسم \الحمدلله انك نايمه ولا شفتي الي صار..

عوق\ليش وش صار دخلت غرفة امي مع خالتي ام ابراهيم

وطلعت وسكرت الباب وراها وبعدها نمت..,

زياد يضحك بتهكم\والله ها العايله ماتلحقين على جزاهم سبحان الي سخرهم لك..,

عوق \ لايكون بس تهاوشوا مع آل ناصر..

زياد با استنكار\وش تهاوشوا ام ابراهيم وبناتها داخل مع الحريم ...

وابوابراهيم با المجلس مع الرجال..

عوق بدهشه\ياربي وانا ماحسيت عليهم..

زياد\اصوات الحريم واصله عندنا وشكلهم تماسكوا الشعور بعد..

عوق با استغراب\تقوله جد والا تمزح..

زيادبضحك\وش امزح صراخهم اعو ذبالله شال الدنيا وجو حريم من برى دخلو عليهم والا الرجال شي مو طبيعي..,

عوق بملامه وقهر\وانت وش تسوي المعارك في بيتي وانت شكلك تتفرج..,

زياد بضحك \اسكتي بس بداية الهواش با المجلس كان موجهه لي واخره صرت انا الي افك بينهم..,

عوق با استفهام\وش السالفه..؟

زياد\بعد ما طلعتك من المستشفى دخلت للمجلس ..

قام في وجهي واحد شكله من عيالهم قال يبا جا النصاب الثاني..

ما عطيته وجه الا سالم بكبره قام وقال انت وش مرجعك للبيت هذا..

وانا بحسن نيه قلت جبت حرمتي لبيت امها قال وش بيت امها

هذي البيت راعيته ماتت بنشوف له دبره..

ويثور ابو ابراهيم عليهم قال انا ساكت عن علومكم وسوالفكم لين يعدي العزا ..

البيت بيت عوق شرا وبيع من امها ويقعدون يتهاوشون المشكله ما احترموا شيبة ابو ابراهيم ..

واحد من عيالهم حذف فنجال قهوه على مسلط لكن مسكته عنه قبل يوصله ..,

وكفخت فيه الي حذفه وشقيت وجهه..,

قاموا كل الي با المجلس علي ومضارب انا وهم وشوي الا دخل ابراهيم واخوانه والله لايوريك هواش بالمجلس يروع..,

عوق با استغراب \المجلس ما كان فيه الا انت وعمي مسلط ...؟

زياد يضحك بسخريه\لا كان فيه فريقين انا ومسلط فريق..,

والفريق الثاني سعد وسالم وزوج اختهم وعيالهم يمكن عشرين لا اله الا الله جيش ...,

عوق با استغراب\وعيال عمي مسلط كيف حضرواالهواش..,

زياد\ما ادري بس شكل واحد من البزارين شاف هواشي معاهم وراح خبرهم وعينك ماتشوف الا النور..,

عوق بدهشه\الي هالدرجه..,

زياد يضحك\واكثر المجلس قلبوه حلبة مصارعه اخر من دخل نمر وعلى اسمه وحش طاح فيهم طيحه اعوذبالله..!

ابي افكهم منه عجزت انا واخوانه وابوه ما قدرنا نمسكه عنهم..,

انا ومسلط ذبحنا الضحك وهذولاك لهم صياح كنهم اطفال ..,

ما خلاهم حتى حلف عليه مسلط انه يتركهم..

ذبحهم طق ماسلم واحدمنه الا وحصل المقسوم ويصرخ عليهم اطلعوا من بيت ام نمر ...,

عوق بترقب\وعقب وش صار..,

زياد\كلم مسلط الشرطه وجات وطردوهم واخذوا تعهد عليهم..,

ما يمرون بيتك وتعهد على عيالهم وعيال مسلط ما يتعرضون لبعض ..

وانا صكوني بشكوى يوم شقيت وجه ولد سالم با الفنجال ركبني حق علشان طلع دم ..,

وطلعوا وهم يتهددون ومسلط يقول بلطوا البحراوراق ام نمر صحيحه..

عوق تتنهد بحسره \ام نمر الله يجزاهم خير عمي مسلط وعياله..,

زياد بضحك\وش فيك تحسرين والله اول مره ماتحسف اني سميت ولدي نمر..

ولو تسمح لي الاحوال ويرزقني الله بعشر عيال كان سميتهم نمر ما تحسفت اذا هم بيطلعون مشاء الله مثل ها الكاسر..,

عوق تبتسم\عندك سوالف ما ادري كيف تطري لك تبي عشر بنات اسمهم العنود وعشر عيال اسمهم نمر..,

زياد\ با العكس بنكون عايله مميزه..

عوق تتنهد بوجع \لا خلاص هذا وبس وعسى ربي يعوض تعبي فيه ويجبر كسري..

زياد يبتسم بحب \الله كريم انتي ما اكلتي شي وهذا ماهو بزين لك اشوف لك شي تاكلينه..

عوق\دايخه مره ودي انام بس..

زياد\بتنامين مومشكله لكن قبل بصحي الخدامه تصلح لك اكل..

عوق\انا كم قعدت با المستشفى ..,

زياد\من صبح توفت امك اليوم يتم لك اسبوع كنتي تصحين لكن كنا نعطيك مهدئ خفنا من ردت فعلك..,

خصوص بعد ما دريتي بوفاتها جالك نزيف حاد اضطرينا نعطيك دم وتعبنا حتى وقف معك النزيف..,

حاولي ماتجهدين نفسك وارتاحي ومع العلاج والراحه بيرجع دمك طبيعي ..,

عوق بحزن\يعني امي اليوم تم لها اسبوع من توفت..,

زيادبوجع\وانا امي من توفت لها سبع شهور والايام تمر وتطوينا طوي مادرت عنا فرحنا والاحزنا والا صبرنا..؟

عوق تتنهد بحسره \ الله يصبرنا ظنيت البيت مافيه احد..

زياد\لا فيه الخدامه الي جابتها بشرى هنا وخدامة امك با الملحق مع السواق..,

بشرى ونجلاء جو ورجعوا يوم لقوك نايمه ..

اردف زياد با امتنان\وانتي بالمستشفى كل يوم تتنوم عليك وحده مره بشرى ومره نجلاء ومره ام ابراهيم..,

عوق بحزن\ ماقصرو الله يجزاهن خير..,

اردفت عوق با استغراب\الشغاله والسواق ما اخذوهم عيال ناصر..

زيادبتهكم \لا اخذوهم بس لهم رواتب متأخره مادفعتهم امك ورجعوهم..,

قالوامن زمان وضحى نقلت كفالتهم على اسمها لكن الجيب اخذه سالم يقول جيب سعد وباا سمه ..

عوق ببكى \سبحان الله في طمعهم يبون يورثون مالها وديونها لا ..

زياد يتنهد بحزن ويمسح دموع عوق\ ليه الدموع يا عوق عيال ناصرناس رديه وطماعه..,

ما حفظوا لزوجة ابوهم فضلها عليهم بعدين ما علينا منهم كل شي رسمي وحسب القانون..

وهم عارفين لكن قالوا بيجربون تضبط معهم ياخذون الي خصتك فيه امك وترى الكل عارف انهم لاهفين من ورى امك ..

نذالتهم مكشوفه للكل ..,

عوق ببكى \يويلهم من ربي الجيب انا اذكر امي يوم عطتهم فلوسه قالت لسعدابي جيب جديد..,

وشراه لها من فلوسها ما دفع فيه ريال وامي قالت لناس هذا هديه من ابوناصر تجامله وترزه بين الناس..,

زياد يبتسم\ ماعلينا منهم الحمدلله الخير واجد من فضل ربي اذا على الجيب من بكرى اشتري لك واحد اجدد منه..,

عوق من بين دموعها\انا الي قاهرني امي عمرها ماقصرت بحقهم ولا قهرتهم..,

لكن هم انذال يدرون لو امي عايشه مارضت بلي هم يسوونه الله يكفينا شرهم ..

زياد\انسيهم خلاص ولازم تبعدين غيمة ها الحزن عنك لأنه مهما سويتي والا بكيتي ماراح يتغير شي..

لا امك راجعه للحياه ولا عيال ناصر بيرضون عنك..!؟


صحى زياد الخدامه وصلحت لي اكل خفيف اكلت وانا احس الاكل ما ينزل من حلقي زياد يجبرني جبر عليه..

تعشيت واذن الفجر طلع زياد لصلاه وانا دخلت غرفة امي ولعت الاانوار..

فتحت دولابها ملابسها بعضها بمكانهاوالبعض مرمي داخل الدولاب..

والخزنه حقت امي مفتوحه فيها صور اوراق ,واوراق كثير مقطعه ومرميه بحقد..

دخل زياد بعد الصلاه علي بالغرفه..

زياد\صباح الخير وش تسوين..

عوق بتهكم\هلا ابد اشوف اغراض امي بعد حملة التفتيش..

زيادبا استنكار\فعلن قالبين الغرفه وش يدورون هذولا..

عوق بقهر\ اكيد يدورون اوراق وصكوك وكلها اخذتها معي لبيتك..

زياد بعتب \افاااا هذي عاد بحق طيب جامليني قولي بيتنا..

عوق بحزن\زياداحس مالي غير ها البيت لو تبيني اجلس معي هنا..

زياد\ابشري ما طلبتي اجلس معك هنا لكن بشرط..

عوق بفرح\موافقه على شرطك اهم شي نجلس في بيت امي..

زياد \انتي قلتي موافقه على شرطي يعني مافي تراجع..

عوق\ ابدآمافي تراجع..

زياد\شرطي نعيش في البيتين..

عوق با استغراب\كيف..؟

زياد\لازم العدل اسبوع هنا واسبوع هناك ..

عوق\ليش تعب عليك كذا..

زياد يبتسم\لا تعب ولا شي انا بعد كانت امي هناك ولي ذكرياتي معاها

اعتقد ماهو من العدل انك تحرميني من ذكرى امي..,

عوق\تم مافي تراجع اسبوع هنا واسبوع هناك..

زياد يضحك\الله يعين..

عوق بدهشه\ليش تضحك..

زياد\ من حماسك ترى بتتعبين والا انا با العكس دوامي من هنا اقرب من بيتنا الي هناك..

عوق \راضيه با التعب لاتشيل هم..

زياد يناظر جواله \شوي يبدا دوامي بطلع انتي حاولي ترتاحين ونامي لا تفكرين بشي..

طلع زياد من عندي وانا انسدحت على سرير امي حاولت انام ما قدرت..

تقلبت افكار تروح وافكار تجي تذكرت كلام زياد عن نمر يوم كان يتمنى انه يكون عنده عشر اولاد كلهم مثل نمر..,

ياربي تحفظه يوم كنت اشيله وهو صغير وخالتي نوره حملت بعبدالله ونمر ابو شهور توحمت في بيتها ماتدانيه

و تجلس عندنا وتجيبه معها بلفته من تجي لين تمشي وهو معي تصلح له الرضعه وتنساه..,

وامي تهاوشها تقول عوق لاتقطع ظهر الورع وخالتي تقول لا ماعليتس عوق اجود مني ومنتس

وكبر قدام عيونا كنه ولدنا ..,

عوق تتنهد وتمسح دموعها\الله على ايام راحت يوم كنت اساعده واخذ شنطته ثقيله عليه..,

يركب معي بسيارتنا والحين كبر وصار رجال يدافع عني ..,

يعني لو ولدي عاش كان فيه امل انه يكبر ياربي تعوضني با امي الي راحت ...,

وجنيني الي ماخلى وراه غير وجع صدري الي كل ماتذكرته صب صدري حليب ..,

الحمدلله على ما قدر ربي وكتب لي اللهم اني راضيه..

((اللهم احرسني بعينك التي لا تنام واكنفني بكنفنك الذي لا يرام لا أَهْلَكُ وأنت رجائي,

كم من نعمة أنعمت بها عليَّ قلَّ عندها شكري فَلَمْ تحرُمْني,

وكم من بلية ابتليتني بها قل عندها صبري فلم تخذلني,

اللهم ثبت رجاءك في قلبي واقطعني عمن سواك حتى لا أرجو أحداً غيرك يا أرحم الراحمين))

قمت غسلت وجهي عن ها الدموع لا يجي زياد ويشوفها ويضيق صدره

وناديت الخدامات يرتبون غرفة امي وينظفونها ويرجعون كل شي مكانه..,

رتبنا كل شي كأن امي موجوده علقت ملابسها ورتبت اغراضها..

احس اني للحين اشم ريحة امي فيها..,

وطفيت نور الغرفه وخليت بابها مفتوح ورجعت لغرفتي..

نمت بعد المجهود الي مع الخدامات على اني بس كنت اعطيهم اوامر الا اني حيلي احسه مهدود..,

صحيت على صوت اذان ما ادري الوقت ايش ظهر والا عصر..

ناديت الخدامه اسالها قالت صلاة العصر..

وخبرتني ان زياد جا مع صلاة الظهر شافني وطلع..

قالهم لا يزعجوني يخلوني انام وام ابراهيم ارسلت لي غدا..

قلت للخدامه تجيب التيلفون الي دايم بغرفتي من بعد سالفة ولد الجيران المزعج..

كلمت على بيت خالتي ام ابراهيم ...؟

عوق\السلام عليكم ..,

...\هلا انتي عوق....!!
.
.
.
(كلمه اخيره)

قَالَ شَيْخُ الاِسْلَامِ ابْنُ تَيْمِيَّه : " القَلُوبُ الصَّادِقَه وَ الأَدْعِيَه الصَّالِحَه .. هِيَ العَسْكَر الَّذِي لَا يُغْلَب "

.
.
.

الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه

أختي طيف الأحباب،

جزاك الله عنّا كلّ خير....

رواية رائعة، رغم أن البارت محزن إلا أنّك تشعر عند قراءته بالسكينة.

الله اقسم لنا الخير ورضّنا بما قسمت لنا...

السلام عليكم ورحمه الله وبركاته في هذا البارت انطبق المثل خيرا تفعل شراًتلقى والا المفروض عيال زوج وضحه يبين بعينهم ماسوت عمتهم معهم عطتهم برضاها واسكتت عن تجاوزهم وسرقتهم بس المشكله لاصرت تزرع بارض بور وضحى القشرا ياحسافة الاسم عليها ودج ان الطق فراسها مومبين الرجال ( حلات من يحطها عند غازي بدل هديل ) ،وعوق مراح ينسيها حزنها الا اذا شافت عوينات النمر فرحتها بسلامة ولدها بتخفف من مصابها وخاصه عندها بلسم اسمه زياد ياحلوه وياحلو رحمته لها مع اني بالأول ماكنت هاضمته اتوقع ان سعد وعصابته مراح يسكتون لو من باب المغثه ومشاعل بتفاجئ عوق بزياره ويمكن تنشا بينهن علاقه بالخفاء وزياد مراح يشك لانها من اهل امها ............... وأخيرا الله يوفقج لما يحبه الله ويرضاه ويسعدج ويسعد كل احبابج *

يالله هذي هي الحياه بمرها وحلوها
الله يسعدك على صدق وصفك للحياه الانسانيه تقبلي مروري يالغاليه
بنتظارك سواليفك الحلوه
يارب انها تكون اخر الاحزان