مسااااءالغلا والحلا والأنوار على شيخة النسوان ام الوليد يشهد الله اني احبج في الله واستمتع بقراءة نوح الحمام الي حتى اسمها واسم بطلتها مميز وهذا شي أكيد مدام الكاتبه ام الوليد ...........اليوم حزنا على عجيزنا معني احس انها عارفه علتها وعشان كذا ماتبي تروح للمستشفى وخريش ( عوق) دائماً الفال الشين بين عيونها ولا كيف وحده تفاول على ولدها ولا بكرها بعد اما البرنس زياد عجبني موقفه من خواته وهو يشاورهن بالاسم ...............ودمتيبصحه وعافيه ولكل من تحبين يا شيختنا 

تسلمين ياام الوليد

يالبيه اكيد الوضيح هي الي تعبانه ياحياتي عليها عوق الله يصبرها بعد امها

ولدها ماعليه طيب ان شاء الله اذكر في اول بارت تكلمتي عنه قده مع امه وابوه

ولادتها جات هينه الله هون عليها

وضحى بنت ناصر باشين ذا الاشكال الي تمشي وتقط حكي تكون زيارتهم نقمه مو نعمه

زين عوق حست بجو الاسرة مع اهل زياد



الله يشفيك يالوضحي /احبها ذا العجوز 

يعطيك العافيه يا ام وليد عوق مسكينه تكسر الخاطر كل ما فرحت صار شى يكدر عليها الله يقوم امها بسلامه مع اني حاسه ان ما بتطلع منها عندي سوال بلنسبه لروايه ليه بس مقتصره الحوارت على شخصيات معينه ليه اهل زياد مافي بينهم حورات عشان نتعرف على شخصياتهم رايهم في عوق في ناس في الروايه بس اسماء

بسم الله الرحمن الرحيم


اللهم انا نسألك بسطوة جبروت قهرك , وبسرعة اغاثة نصرك , وبغيرتك لانتهاك حرماتك ,

نسالك يا الله يا الله يا الله يا سميع يا قريب يا مجيب يا سريع يا منتقم يا جبار...

اللهم عليك ببشار واعوااانه الخونه,

اللهم لاترفع لهم رايه واجعلهم لمن خلفهم عبرة وآيه وفرق بين كلمتهم وفرق بينه وبين جنوووده,

اللهم اجعل تدبيرهم تدميرهم و اجعل الدائرة عليهم,

اللهم اجعل بأسهم بينهم و اقذف بينهم العداوة و البغضاء و سلط عليهم شرارهم و دمرهم بأيديهم,

اللهم ارمهم ببعضهم و اجعل نارهم تحرقهم اللهم إنا نشكوهم إليك يا جبار عجل لأخوننا في سوريا نصرك و فتحك المبين,
.
.

هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,


البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

واهداااء خاص للغوالي ارادة الحياة-نوف بنت نايف

.
.

اليوم بنشوف عوق المزايين والحدث الاكبر في حياتها

يا الله تعالوا معاي...!!

وسالفه جديدة؛

.
.

البارت السادس والثلاثين

.
.
رفض زياد ادخل مع امي داخل قسم الاشعه و جلست انتظرها..,

طلعت امي بعد فتره من غرفة الاشعه..,

الي غرفة التنويم دخلت ممرضه وقالت في دكاتره بيدخلون تغطيت ولبست عباتي..

دخل زياد ومعاه اوراق ومعاه ثلاث دكاتره وممرضات امتلت الغرفه..,

زيادبقلق\خاله انتي من متى تحسين بوجع بطنك..,

ام عوق \ مبطي ..,

زياد بتساءل \طيب ليش مالك فحص سابق ملفك مافيه الا متابعه لضغط والسكر واخر مراجعه لك قبل اكثر من سنتين..!

ام عوق بتردد وارتباك \ انا ليا تعبت اراجع المستوصف الي جنب بيتي ويعطوني علاج ..

زيادبتودد\ياخاله غلط انك من بداية تعبك ما راجعتي للمستشفى ولا طلبتي فحص شامل..,

المستوصفات امكانايتها محدوده..,

ام عوق بحده\وش اطلب عليه انا مافيني غير العافيه اكتبوا لي خروج ابي بيتي..,

زيادبا اصرار\مانقدر نكتب لك خروج انتي تعبانه ياخاله ومحتاجه عمليه ..,

ام عوق برعب \ وش عمليته مانيب مصلحه عمليات ولاابي غير اطلع لبيتي..,

زياد بحزم \لازم العمليه مانبي نتأخر الوقت محسوب عليك

ام عوق\ليش تبون تجربون بي عقب ها العمر..,

زياد بقلة حيله \يا خاله وش نجرب لازم توقعين على العمليه ..,

عوق تمسح دموعها \وش عملياته العمليات للي بعمر امي خطيره احنا عارفين..؟

زياد بوجع\اي اعرف لكن ليش التشائم والأفكار السودوايه..!

ام عوق بوجع\زياد يا امك علمني وش هي له العمليه..,

زياد بمراره \عندك مشاكل بسيطه باالامعاء والرحم..,

ام عوق بتعجب\والرحم وش دخله انا عجوز لاني حامل ولا والد..!

زياد\خالتي هذي اشياء مالها دخل با الحمل والولاده احنا بس خايفين عليك..,

ام عوق\ لاصار هذا هي لابالله اكتبولي خروج وان شاء الله انها مثل ما قلت بسيطه..

زياد\يا خالتي وضعك ما يسمح انك تطلعين للبيت والمفروض من زمان متنومه..

احد الدكاتره بجمود\ مانقدر نسمح لك با الخروج هذي فيها مسؤليه..,

عوق بغضب \شكل الي في امي ماهو بسيط والا ليش كلكم مصرين على العمليه..,

دكتور ثاني\امك ماهي اول حاله تجينا كثير غيرهاليش مصعبين الموضوع..!

دكتور آخر \يا اختي لازم امك توافق على العمليه في خطر عليها ولازم توقعيها ما نقدر نسوي شي الا بموافقتها..,

ام عوق با اصرار\التوقيع ماني موقعه والي من الله حياه الله..,

طلع زياد من غرفة امي هو والدكاتره وخفت يوم اشوفهم مهتمين ويناظرون الاوراق..!

يتكلمون ويأشرون على امي وانا ما افهم وش يقولون..!

وزياد متأثر من كلامهم ويتنهد ويهز راسه..,

ام عوق بمعاتبه \انتي وش بلاتس بس تبتسين ماهو بزين الصياح لتس وانتي نافس..,

عوق من بين دموعها\ماتسمعينهم وش يقولون مره يقولون بسيط ومره يقولون لازم عمليه..,

ام عوق\لاحول ولاقوة الابالله ليتني ما طاوعتكم وجلست في بيتي انا وش جابني للمستشفيات وخرابيط الطبباء ..!؟

وقت الزياره زار امي سعد وسالم انا دخلت حمام جناح امي واسمعهم..!

سعد\عمه وشلونتس الحين ورى ما عطيتنا خبر انتس متنومه...!

ام عوق\بسيطه ان شاء الله ولا له داعي ازعجكم..,

سالم بملامه\مالتس حق والله يا عمه تتنومين وحنا آخر من يعلم..!

ام عوق بتذمر\وانتوا وش دراكم..,

سعد\مسلط كلمنا وعلمنا انتس با المستشفى..,

سالم\هم الدكاتره قرروا يصلحون لتس عمليه..!؟

ام عوق بسخريه\وانت من علمك بها السوالف..,

سعد\علمنا مسلط ونسيبتس الدكتوريقولون انتس ماتبين العمليه..

اردف سعد \وليه ياعمه رافضتها...؟

سالم بترجي\يا عمه الدكاتره اخبربوضعتس اكيد انتس محتاجتها..

ام عوق\مانيب مصلحه شي وبطلع لبيتي ماعقب ها العمراخلي التكاتره تلعب بي..

سعد\ياعمه هذولا ناس ماخذه شهادات ومار عليها مثل حالتس واجد..,

ام عوق\وانا وش حالتي ماعلي ان شاء الله خلاف وابي اطلع لبيتي..,

سعد\مافيتس ان شاء الله الا الخير لكن العمليه علشان تطيبين..,

ام عوق بغضب واستهزاء\هو انا بزير تاخذني على قد عقلي ياسعد..,

ام عوق با اصرار \اليوم طالعه طالعه ولا علي لا من خربطتكم انت وتكاترتك..,

سالم \هذا شي مافيه عناد لو ما شافوا انتس محتاجه ما قرروا عليتس شي..,

سمعت باب غرفةامي يندق وبعده صوت زياد..,

زياد بتفاءل\السلام عليكم ان شاء الله اقنعتوا خالتي..!

ام عوق بحده\وانت مفزعهم يقنعوني بالعمليه عساني ما اموت غيرتحت سقف بيتي..,

زياد با استعطاف\يا خالتي لا تعاندين العمليه ضروري لك ترتاحين من ها الألآم..,

ام عوق بمكابره\انا طيبه غير ماغص وراح الحمدلله..,

سعد\يا عمه انتي شورتس براستس حنا ماشين ولا نبي لتس الا الزين..!

ام عوق\لاتكبرونها وهي صغيره اليوم ان شاء اني بمسي في بيتي..!

سالم بملامه وتذمر\ ياعمه دايم مستعجله ولا تشاورين هذا طبعتس..!

ام عوق بسخريه حاده\صادق يا سويلم ما اشاوراحد لو اني اشاور احد كان قعدت انت واخوك على رواتبكم

ولا ركبتوا جيوب وسكنتوا فلل..!

سعد منحرج\الله يسامحتس ياعمه مع السلامه..,

ام عوق بحده\الله لايسامح كل خاين ولا عاد اشوفكم..,

سمعت صوت امي تنادي

ام عوق\عوق تعالي مشوا التسلاب..,

زياد بمعاتبه\يا خالتي ترى ماقالوا شي غلط..,

عوق بحده\وانت وش دخلك تدق عليهم هذولا ناس شماته..

زياد بغضب\حرام عليك وش ها الكلام انتي انسانه ملتزمه وتخافين ربك كيف تقولين كذا من يشمت بالمرض..

وهم مساكين يبون مصلحة خالتي..؟!

زياد التفت لوضحى بتأثر \ماتتخيلين كيف خافوا يوم قلت لهم انك تعبانه ورافضه العمليه..,

ام عوق بوجع\اسمع يا ولدي انا عارفه نفسي العمليه مابها فايده بس تعذبوني على الفاضي..,

زيادبتوتر\يا خاله الاعمار بيد الله لكن الانسان ياخذ با الاسباب ..,

عوق بغضب\ان شاء الله انها اطول منك عمر لا تفاول على امي ..,

زيادبنظره حاده لعوق\من يلومني ها الحين لو اذبحها ..

ام عوق تضحك\ عوق تمزح معك جعل عمرك طويل..,

زياد بتأثر\ الله يطول بعمرك يا خالتي لكن عوق الله يهديها مرات تصير مستفزه..

عوق تبكي وتبلع غصه\لا ما امزح ان شاء الله انتس اطول من اعمارنا كلنا..,

ام عوق تبتسم بوجع\من يقنع عوق اني وصلت التسعين الظاهر تحسبني ام عشرين سنه..,

زياد با استعطاف \خالتي لا تغامرين لازم عمليه وبا اسرع وقت..

طلع زياد من عندنا وهو زعلان..,

عوق بضيقه\يمه يمكن كلام زيادصحيح وحالتك لازم عمليه..!

ام عوق تتنهد بضيقه \ادري ان كل كلامه صحيح لكن يا بنتي ماعقب ها العمر بيشققون بطني..

انا معي سكر وضغط اموت في بيتي ولا بين ايدينهم..,

عوق ببكى\لا تقولين كذا خلاص لاتطرين الموت..,

ام عوق\ازهمي على السواق يجي يا خذنا بطلع رضوا والا بكيفهم..,

عوق\ لا يمه هنا افضل من البيت انا خايفه عليتس ..!

ام عوق بغضب\ابي ارجع لبيتي بالمستشفى ضاق صدري ولا نيب مرتاحه..,

اصرت امي على الخروج والممرضات حاولو يهدونهاوامي رافضه ..,

نادوالدكتور المشرف على حالتها وكلم زياد وجا معاه..,

ام عوق بترجي \اسمعوني بوقع على العمليه لكن بشرط

تطلعوني لبيتي اليوم وبكرا ان شاء الله من الصبح ارجع لكم..,

زياد يتشاور هو الدكتور الثاني الي مشرف على حالة امي..

الدكتور بتحذير\يا وضحى بنكتب لك خروج اليوم لكن بيكون على مسؤليتك اول شي..,

وبعدين لازم بكره من الصباح تكونين موجوده وتكونين صايمه من بعد الساعه عشرالليله توعدينا..,

ام عوق\اوعدك اني بس الليله امسي في بيتي وبكرا تلقاني مع فجة النور عندكم..

زياديتنهد بقلة حيله\ياخاله فيك عنادمو طبيعي..

اردف بتحذير\شوفي انا الي برجعك للمستشفى لاتقولين زياد ما قال..

ام عوق تبتسم بوجع \ابشر بس خلوني اطلع لبيتي ضاقت علي جدران مستشفاكم..

كتب زياد خروج لأمي وهو الي وصلنا للبيت بنفسه وطول الطريق يقول لأمي لاتنسين بكرا..

قبل الدوام امرك واخذك للمستشفى وتكونين صايمه..,

نزلنا للبيت وزياد رجع للمستشفى ..,

دخلنا بيتنا انا وامي و جلست با الصاله وتناظر الجدران وتتنهد..,

امي عمرها ما سوتها حسيت ان فيها شي غريب..

ما ابي ابكي قدامها ولا انا عارفه وش فيها..

دخلت غرفتي تعذرت اني بغير لبسي وبريح شوي ..

انا لازم اعرف من زياد امي وش فيها با الضبط

ماهو معقوله خوف الاطباء واصرارهم على العمليه من فراغ اكيد في شي خطير..

كلمت زياد وقلت تعال ابغاك ضروري واذا جيت لا تدق الباب عطني نغمه..

سألني فيك شي او في امك ما تمالكت نفسي وبكيت قلت لابس تعال..

طلعت من غرفتي ولالقيت امي با الصاله كانت منسدحه بغرفتها..

عوق بخوف\يمه وش فيك منسدحه...,

ام عوق \مافيني غير العافيه ابي ارتاح قبل الصلاة..

سمعت نغمة جوالي اكيد هذا زياد وطلعت من عند امي..

زياد بهلع\ افتحي انا واقف عند الباب..,

فتحت لزياد ودخلت انا وهو للمشب وسكرت الباب علينا..,

عوق ببكى\زياد حلفتك بالله امي وش فيهاانا كل ما سألتك تتهرب مني ولا عطيتني الكلام الي يريح..؟!

زيادبوجع\عوق انتي تخوفيني من ردود افعالك يعني لو بتعرفين وش بتسوين ..؟!

عوق وزاد بكاها\هذا الي كنت خايفه منه امي فيها شي خطير..؟!

زيادويده على فم عوق\تكفين اسكتي لاتسمع امك وتخوفينها بدون فايده..؟!

عوق تمسح دموعها الحاره\خلاص بسكت بس علمني وش الي فيها با الضبط..!؟

زياد باألم\الي في خالتي ابتلاء من الله سبحانه والي بقوله خليه بيني وبينك لا يطلع وخصوص لها..!؟

عوق بترقب \اكيد..,

زياد بوجع وتردد\خالتي عندها سرطان با الامعاء وورم با الرحم..,

عوق با استنكاروخوف\انت متأكد..؟!

زياد يتنهد بحسره\كم مره صلحنا لها تحاليل واشعه والمرض في مراحل متقدمه عندها..,

عوق\طيب وش فايدة العمليه ..؟

زياد \بنتلاحق لا ينتشر زياده..

عوق\زياد لازم تصارحون امي وش فيها ويصير القرار بيدها..,

زياد\صعبه وخصوص الي مريض بالمرض هذا النفسية لها دور كبيرفي علاجه..

عوق\تكفى زياد الا امي ان صار فيها شي يمكن اموت..

زياد \تعوذي من الشيطان وحاولي تسيطرين على انفعالتك ترى امك مقبله على ايام صعبه..,

اردف زيادبضيقه \ الحين اطلعي وغسلي وجهك ولا تحسسين خالتي بشي وبنحاول ترجع للمستشفى الليله..,

دخلت عند امي وهي تصلي العشا وانتظرتها حتى خلصت صلاه..,

ام عوق\انتي وينتس اقعدي ارتاحي توتس نفاس..,

عوق بوجع\ زياد هنا وكنت عنده..,

يمه يبي يشوفتس..

ام عوق\ايه زين خليني البس برقعي وقولي له يدخل..,

كلمت زياد جوال ودخل عند امي ..,

زياد\ مساء الخير يا خاله..,

ام عوق \هلا بك وقبل كل شي رجعه للمستشفى مانيب راجعه الليله..,

زياديناظرعوق بدهشه\ماشاء الله عليك يا ام العوق..

زياديبتسم بترجي\ خالتي خلينا ارجعك للمستشفى الليله افضل لوضعك..

ام عوق بحده \كلمتي وحده ماني راجعه ودك تاخذ حرمتك مانيب صايره بينكم غيره ماعندي..

عوق ببكى\ يا ليتنا ما طلعنا من المستشفى ياليتنا ما طاوعناتس ..؟!

ام عوق بغضب\وانتي وش بلاتس تدورين الي يبكيتس..,

ام عوق لتفتت لزياد\لاتروع بنتي علي عوق نفاس وانا ما فيني شي..,

زياديتنهد بوجع وقلة حيله\ان شاء الله ان مافيك شي برجع للمستشفى تبون شي..

ام عوق بضحك\ عسى عمرك طويل شف خاطر عوق الي يرضيها يرضيني..

طلع زياد ولحقته..

عوق من بين دموعها\زياد خايفه على امي شكلها تقاوم الالم وهي ساكته..

زيادبا الم\خلاص لاتبكين الليله بتقعد هنا والصباح بجي بدري اخذها للمستشفى غصبآ عنها..

عوق\وش بنسوي الحين كل ما دخلت عليها القاها منزله وجها على المخده وتون..

زياد يناظر جواله\دعواتك لها انا ماشي مافي يدي شي امك عنيده الله يجيب الصباح بخير..؟!

عوق\ الله يستر يارب تشفي امي..,

طلع زياد ورجعت لأمي بشوفها لقيتها منسدحه على سريرها وتستغفر قربت منها..,

عوق بوجع\يمه انتي زعلانه علي..,

ام عوق بمحبه\ الله يرضى عليتس دنيا واخره لاوالله راضيه..,

عوق بحزن\يمه خايفه طلعتس فيها ضررعليتس..!

ام عوق\لا بالله ازين ماسويت اني طلعت من المستشفى والحين بنتعشى انا وانتي ونعين من الله خير..,

عوق\لازم تصومين بعد الساعه عشر مثل ماقال الدكتور..,

ام عوق بشرود\الله خير وابرك وتو الوقت الساعه ماجات عشر..,

حضرو الخدامات العشا وتعشيت انا وامي وبعد العشا..,

ام عوق\دايخه وانا امتس ابي انام ما ارتحت بنوم المستشفى

وانتي هنيا ماريحتيني كل شوي فاتحه الباب..,

عوق \بروح ابدل لبسي واجي انام معتس..,

ام عوق\لا بالله لاتجين ارتاحي ونامي والا كلمي رجلتس يجي ياخذتس تشوفين وليدتس..

عوق تبتسم بوجع\وليدي الله يعوضني فيه خير شوفته ماتسر..,

ام عوق بتأنيب\ استغفري ربتس ولا يغرتس صغره ان شاء الله يطلع با السلامه الله يذوقتس نفعه..

عوق بحزن \لو انتس شفتيه ما قلتي ها الكلام الا بتقولين يمكن الموت رحمه له..

ام عوق\الموت والحياه بيد الله ما ادري لو انه اطول منا عمر..

اردفت ام عوق بوجع\لكن يا بنتي ما اعجبتيني على زياد كل شوي قابه بحلقه

زياد حبيب وما يستاهل منتس بعض كلام لا او صيتس عليه ترى زعلي ورضاي عليتس

مربوط برضاه ويالله انا برتاح ..,

عوق\انا بعد دايخه بنام خليني ارقد عندتس تكفين..

ام عوق بضحك\ تدرين انتس عله اقلقتي راحتي با المستشفى مانمت منتس والحين ناشبه لي..,

عشاوتعشينا وسوالف وسولفنا روحي ارقدي..,

عوق بترجي\يمه تو الليل الساعه ماجات تسع ..,

ام عوق\النوم اذا جا ما يعرف تسع من عشرريحي تراتس ما ارتحتي من ولدتي..,

عوق تبتسم بمحبه\ بنام بغرفتي اذا بغيتي شي ناديني..,

ام عوق\بحفظ الله يمي بس لاتنسين كلمتي لتس..!

عوق با اهتمام \ آمري يمه وش كلمته ..,

ام عوق \مهما طالت الايام بنات خالد وتركي ان مشو شرق انتي امشي غرب ماطريقكن واحد

عوق بذعر \يمه والله داريه بس لاتعيدين ها الكلام والله يخوفني كلامتس

ام عوق تبتسم\وش يخوفتس اخبرتس نسايه قلت اذكرتس ..,

اردفت \يا الله توكلي على الله انتي هروجتس واجد وانا دايخه ابي انام..,

تركت امي ودخلت لغرفتي تمددت على سريري وانا افكر احس امي اليوم غير عن الصباح ما اشتكت من شي..

معقوله كلام زياد صحيح ان امي مريضه ولازم لها عمليه والابس دكاتره يبون يجربون..!

او كانت تعبانه تعب بسيط واخذت علاج والحين ان شاء الله انها بخير..؟!!

كلمت زياد

عوق \زياد انت متأكد من مرض امي..,

زياد بتعجب\ليش..,

عوق\ما ادري بس احس الحمدلله مافيها شي وخصوص الليله تسولف وتمزح وتضحك عاااادي امي الي انا خابرتها..,

زيادبطمئنه\ ان شاء الله انها بخير..

عوق \بترجع الليله انتظرك..

زياد \لا نامي انا ان شاء الله الفجر بكون عندكم عندي شغل الليله..,

نمت وصحيت عطشانه واحس جسمي حمى ناظرت الساعه ثلاث الفجرمعقوله نمت كل هالوقت ..,

بموت برد ناديت الخادمه تعبت وانا انادي بموت من البرد على الاقل تعطيني بنادول..

وتنزل بطانيه اتغطى فيها..,

قمت من سريري وانا انادي صحت الخدامه على صوتي

قلت لها تلحقني ببطانيه وبنادول لغرفة امي..,

حسيت نفسي بموت من البرد وعظامي تكسرت..,

واسناني تصك في بعض من كثر ما كنت ارتجف عسى مافيني بس حمى نفاس..,

دخلت غرفة امي لقيتها نايمه والنور والع غريبه امي ما تنام با النور..,

اخذت البنادول من الخدامه وطفيت النور وانسدحت جنب امي قلت للخدامه تغطيني وحضنت امي..,

حسيت جسم امي بارد ولا تحركت با العاده تحس فيني..,

قمت على طول ولعت النوروناظرت وجه امي من قريب شكلها نايمه مسكت يديها لقيتها بارده..؟ّ!

لكن الي شد انتباهي امي اصبعها السبابه كنها تتشهد..,

حاولت اصحيها ماردت علي اكيد فيها شي احاول افتح يدها تنتفح لكن ترجع اصبعها على وضع التشهد..!!

ناديتها يمه اصحي يمه انا عوق اصحي يمه بس قولي نعم تكفين يمه لاتخليني..,

ما ردت علي حسيت قلبي صار يدق بسرعه من خوفي عليها..

اخذت عباة امي الي بغرفتها لبستها وتغطيت باجلال كنت لافته على راسي وطلعت اركض لبيت عمي مسلط..,

دقيت الباب وبعدها ما ادري وش صار..,

اسمع اصوات رجال حريم اختلفت علي الاصوات وصياح مرعب ..,

احس اني اصحي اشوف شي ابيض واشخاص قدامي تتحرك شكلي بمستشفى وارجع انام..,

عوق بوهن\آه راسي ..,

ام ابراهيم\الحمدلله على السلامه..,

عوق با ارهاق \خالتي انا وين شكلي بمستشفى ..

ام ابراهيم بحزن\تعبتي وجبناتس هنا..

عوق بتساءل\خاله كيف جيت هناوامي تركتها با البيت تعبانه..!؟

ام ابراهيم\ صحينا على صوت الجرس و لقيناتس طايحه عند الباب ..

دخلتس انا والبنات وكلمنا رجلتس واسعفناتس..,

عوق \طيب امي وشلونها ابي اشوفها ..,

ام ابراهيم تتنهد بضيقه \امتس با احسن حال ان شاء الله..,

عوق با استغراب\وينها الحين..

ام ابراهيم بحسره\في بيتها مرتاحه..!

عوق با اصرار\وانا بعد بطلع ما فيني شي الحين..؟!

ام ابراهيم \وين بتروحين انتي من ولدتي ما ارتحتي..؟!

عوق\خالتي بكلم زياد يطلعني..؟!

ام ابراهيم \ارتاحي بطلع شوي وارجع..؟!

طلعت خالتي ام ابراهيم بقيت با الغرفه با الحالي..!

انا بلبس المستشفى ويدي فيها مغذي من متى واناهنا..؟!

رجعت ام ابراهيم..؟!

عوق\خالتي وين رحتي ..؟

ام ابراهيم بحزن\قريب ..

عوق\ خالتي من متى وانا هنا..

ام ابراهيم\ من يومين ترى الحين بيجونتس زوار..

عوق بتعجب \ يومين اكيد امي بتجي..

ام ابراهيم \امتس مانبي نتعبها ..

صوت جوال مع خالتي ام ابراهيم..,

ام ابراهيم \ما عليك مافي احد الا انا من يوم تجي ادخل..

احس وجه خالتي فيه شي وتتهرب كل ما سألتها عن امي وعيونها فيها اثر بكى ..؟!

دقايق ودخل زياد..,

غريبه لابس ثوب ولاف شماغه بدون عقال شكله ذكرني يوم توفت امه وش صاير ..؟؟!!

زياد\مسا الخير..

ام ابراهيم \حيا الله ابو نمر انا با استراحة النساء اذا بغيتوني ..

زياد\ما قصرتي ام ابراهيم الله يجزاك خير..

طلعت خالتي وبقى زياد وجهه ما يبشر بخير يمكن ولدنا صار فيه شي..

انا اصلن متوقعه انه ماراح يعيش عقب ما شفت صغره وكثر الاجهزه الي عليه..

زيادسلم على راس عوق وجلس على السرير مقابلها\كيفك الحين ان شاء الله كويسه..

عوق بتوجس\زياد وش فيك وجهك ماهو طبيعي ان كان قصدك ولدنا لله ما اخذ ولله ما اعطى..

زياديبتسم بوجع ويبلع غصه \ما شاء الله عليك عوق والله اهنيك على قوة ايمانك

والله اذا حب عبدآابتلاه وعظم الجزاء من عظم البلاء..,


حسيت قلبي اوجعني من كلام زياد صدق انا قلت له الكلام الي قلته لكن ما توقعت انه بيرد علي كذا..

ما ادري ليش دموعي لا ارادي صارت تصب مع اني عارفه ان الموت راحه لنمر حجمه وشكله ما يويحي ابدآ انه راح يعيش..

زياد بوجع\ليش تبكين..

عوق بحسره\ما ادري كان عندي امل انه يعيش ..

زياد با الم\الله ارحمنا منا فينا الي تنتهي حياته بيموت مرات الموت يكون فيه راحه..,

عوق من بين دموعها\لوعاش نمر تتوقع راح يعيش بدون اعاقه او تشوهات جسميه..

زياد بضيق \حياة نمر وموته بيد الله مهما سوينا وحاولنا ماراح نقدر نسوي له شي الا الي ربي كاتبه له..

عوق تبكي وبملامه لنفسها\احس ذنبه برقبتي لو كمل تسع شهور يمكن عاش انا ماحافظت عليه ..

زياد يناظر با الارض \عوق لونمر وصل عمره لتسعينات وانمرض مرض خطير وش كنتي بتقولين..!

عوق بتهكم موجع وتمسح دموعها\وش بقول اذا عمر ولدي بالتسعينات انا كم عمري..

زياد بتوتر\لا مافهمتي علي اقصد لو هو كان عمره كذا اومثلآ انتي تعرفين انسان عمره كبير..

عوق بحزن \نمر كنت اتمنى بيني وبين نفسي انه يعيش لكن وش بيدي تدري امي الله يشفيها وش قالت لي..,

زياد يعض على شفايفه ويغمض با الم\ وش قالت ..؟

عوق بتهكم \لا يغرك صغر جسمه يمكن انه اطول منا عمر وهذا هو راح..

زياد يبلع غصه بوجع \عوق عندك فكره عن مرض خالتي..

عوق تمسح دموعها\الله يشفيها انت معلمني والا نسيت..

زياد\ خالتي كبيره با العمر و معها سكروضغط والمرض انتشر بجسمها..

عوق بترجي \تكفى بطلع اشوف امي خالتي نوره تقول انها طيبه..

زياد يكمل كلامه \ من زمان المرض فيها كانت تعاني وتتعذب لكن ماخبرت احدالا ام ابراهيم ومن فتره قريبه..,

عوق بحزن\امي صبوره ماهو اي شي يهزهافديتها والحمدلله الطب تقدم بتلقون لها علاج..,

زياد ضم ايدين عوق\قولي لا اله الا الله ..

عوق بخوف\لا اله الا الله وش صاير..

زياد با ارتباك\خالتي تطلبك الحل واسترجعي لا تضيعين اجرك..

انفجعت من الصدمه ..,

ماحسيت الا زياد يضمني بقوه وشي ثقيل نزل علي قلبي وهد حيلي..,

اكبر من الوجع الي شعرت فيه يوم حسيت اني فقدت نمر..,

صرت اصرخ بدون شعور واحس بنزيف اكثر من ولادتي بنمر ودخت..

اسمع زياد يصرخ ينادي الممرضات وعطوني ابره دوختني بزياده...

ما ادري الوقت الي مر علي لكن صحيت وانا احس بثقل بكل جسمي ..,

شفت بشرى جالسه على كرسي وشكلها تقرا قرآن..

يوم شافتني صحيت جات لي

عوق بوجع \انا بحلم والا علم اني فقدت امي..

بشرى بحزن\الحمدلله على السلامه عوق شدي حيلك انتي انسانه مؤمنه اصمدي والمؤمن مبتلى وامك عند ربآ رحيم ..,

عوق تبكي وتعض ايديها \انا لله وانا اليه راجعون..,

كلمت بشرى جوال تقول عوق صحت تعال..,

دخل زياد وطلعت بشرى..

زياد \الحمدلله على السلامه تماسكي ياعوق وارضي بقضاء الله سبحانه

عوق ببكى\متى امي توفت ..,

زياد\الليله الي طلعت فيها من المستشفى..,

عوق ببكى مرير\ياليتني رجعتها للمستشفى ياليتكم ما وافقتوا انها تطلع لبيتها..,

زياد يحاول يهديها \لاتقولين كذا خالتي كانت تعبانه..!

زياد يسولف علي ويحاول يهديني ودموعه تصب

ويذكرني بتجزعه يوم امه ماتت وانه ما فاده شي غير انه ندم انه ماصبر..

ولا عرف قيمة الصبر الا بعد مرور شهور على وفاةامه..,

دخلوا خوات زياد نجلاء وبشرى ومعهم ام ابراهيم ما ادري يصبروني والا يعزوني ما ادري وش صار فيني ..,

ماعدت احس بلي حولي ماعاد عندي قدره اخذواعطي معهم اشوف ازوال واسمع اصوات لكن ماني قادره ارد على احد ...!

وش فايدة الكلام امي الي رابطتني با الدنيا ماتت وولدي الي يمكن بيعطيني سبب علشان اتمسك با الحياه راح..

من بقالي با الدنيا مكتوب علي اكون مقطوعه من شجره طول حياتي فقدت كل الي من لحمي ودمي ..

ماعاد لي شي يذكرني بنفسي الي مني ولي راح خلاص ..,

ياربي الصبر الصبر..

ماغير دموعي تصب واعظ اصابعي..

صبرني يا الهي على ها الامتحان ولا تخذلني ..,

نجلاء \الحمدلله عوق امك توفت وهي راضيه عنك وهذي نعمه عظيمه..,

بشرى تبتسم بوجع\ لو شفتي وجها بعد وفاتها والله انه احسن من يوم كانت عايشه..

ام ابراهيم\ما شاء الله يا زين خاتمتها بفراشها وسجادتها بمكانها ما طوتها..

زياد\ام عوق تحملت مرض يعجز عنه عشر رجال ان شاء الله انها من الصابرين ولا شكت ورفضت حتى العلاج..,

كل الاطباء الي هنا وشافوا حالتها كانوا مستغربين كيف قدرة تقاوم المرض الي فيها..,

نجلاء \بتطلعين معانا لبيتك افضل بكثير لك من المستشفى...

ام ابراهيم \طالبتكم ابي عوق تطلع معي لبيتي بناتي كلهم عندي وبتساتنس بينهم..

زياد\ماعندي مانع بكيفها تدلل ام نمر..,

بشرى \ لو بعد تجي في بيتها ماراح نتركها كلنا بنكون حولها..

زياد\وش رايك وين تبين..,

عوق بوهن\بيت امي بطلع لبيت امي..

نجلاء \ما يصلح تطلعين بيت امك انتي تعبانه..

ام ابراهيم با اصرار\ام راكان صادقه وانتي للحين نفاس مانيب تاركتس يا معي يا معهم..

وبيت امتس مليان ناس ما انتي ماخذه راحتس فيه ..,

عوق تغمض عيونها بوجع وتهز راسها بنفي\ما اطلع الا لبيت امي ..,

زياد\ خلاص خلوها على راحتها متى تبين تطلعين..,

عوق تمسح دموعها\الحين طلعوني لبيت امي..,

نجلاء با انتقاد لزياد\ كيف تطلع الحين زوجتك ماهي طبيعيه شف كيف وجها وعيونها..,..!

زياد\نجلاء ساعديها تغير لبسها وانتظركم برا..,

نجلاء بحده \انت صاحي الحرمه تعبانه والنزيف الاخير الي جاها صفى دمها..!

زياد\ انا ادرى بوضعها النزيف الحمدلله وقف ودمها تعوض با الدم الي عطيناها..,

وبعدين انا معاها وانتو ما تقصرون..

فهمت من كلامهم ان زيادلماخبرني بوفاة امي جالي نزيف واضطروا يرجعون يعطوني دم يعوض الدم الي فقدته..,

و طلعت للبيت الي كان موجودفيه حريم سعد وسالم وضحى

دخلت للبيت وزياد جلس با المجلس كان فيه ناس طالعين وداخلين..!

لحقتني ام ابراهيم الي رجعت مع ابراهيم ولدها ودخلت بعدي..,
.
.
.
(كلمه اخيره)


هناك لحظات في الحياة لا يصمد لها بشر إلا أن يكون مرتكناً إلى الله

مُطمئناً إلى حِماه .. مهما أوتي من القوة والصلابة والثبات !

ففي الحياة لحظات تعصف بهذا كله ، فلا يصمد لها إلا المطمئنون بذكر الله !

“أَلَا بِذِكْرِ اللَّهِ تَطْمَئِنُّ الْقُلُوبُ ” ,


*سيد قطب
.
.
.
الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه