بسم الله الرحمن الرحيم



اللهم يا الله عليك ببشار واعوانه ومن سانده وداهنه,

اللهم احصهم عددا وابدهم بددا ولا تغادر منهم أحد,

اللهم إنهم طغوا وبغوا وعاثوا في الارض الفساد,

وساموا المسلمين سوء العذاب ,

اللهم عجل بنهايتهم واشفي صدور قوم مؤمنين ,

اللهم لاترفع لهم راية واجعلهم لمن خلفهم عبرة وآية,

اللهم اجعل بأسهم بينهم شديد,

وفرق جمعهم وشتت شملهم ,

أنك ولي ذلك والقادر عليه,

ولاحول لنا ولاقوة الابك,

انك على ذلك شهيد وبالاجابة جدير.
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,


البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,
.
.
اليوم بنشوف عوق المزايين واعترفات ليليه..!!!!!

يا الله تعالوا معاي...!!

وسالفه جديدة؛

.
.
.
البارت الثالث والثلاثون

.
.
.

زياد يتنهد بحزن\لا معك معك سالفتها طويله ..!

عوق بفضول وترجي\تكفى زيادوش سالفتها ولو ماتبي تقول عادي..,

زياد يبتسم بتهكم موجع\ لا يا الفضوليه بقولك تخبرين الليل وش يسوي با الواحد اعترافات بدون ضغط..؟!

هذا الله يسلمك بعد وفاة ساري كثرت دخلات خطيب سناء عليهم..,

نجلاء في حداد ونفسيتها مره كانت تعبانه ولا هي داريه عن الدنيا...

في يوم جاتني عبير قالت خالي سناء بتطلع مع خطيبها ومارضيوا ان راكان يطلع معاهم..

واطلع على طول وراها لقيتها راكبه معاه وبيمشون وانزلها من السياره..,

ثار علي خطيبها وقال انت وش دخلك زوجتي وبتطلع معاي قلت ما تطلع معك الا اخوها معاها..,

المهم ان سناء نزلت ودخلت البيت وصار بيني وبين خطيبها مشاده كلاميه مشى وهو زعلان ويهدد..,

دخلت ورى سناءوناديت امها وحذرتها تنتبه لبنتهااذا هو يبي زوجته امها ايام وتنتهي عدتها...

يحدد زواجه وبسلامته هو وزوجته..,

سناء واقفه معاه ضدي واتهمتني اني ابي اخرب عليها..,

تخيلي بعد الي صار بكم يوم الا الاخ مرسل لي رسايل على جوالي كلها تهكم وتهديد..

بعد ما يكتب الرساله يكتب لي اسمه الكامل..!!!!؟

عوق با استغراب\انت سويت الصح والمفروض سناء تعرف ها الشي..!

زياد بقهر\ماهو هنا المشكله سناء تحب الولد ولحظتها لو قالها طيحي بنار بتسمع له..!

عوق با استنكار \مصيبه والله اذا انت تحاول تحميها وهي ماهي مساعدتك بعدين وش صار..,

زياد\رسايله تمادى فيها وحتى سيارتي كنت اوقفها برى اطلع القى الكفرات منسمه عرفت انه هو..؟!

عوق با استغراب\ اشوفك دايم السياره داخل..؟!

زياد بضحك\ عقده الله لايوريك وسيارتي غاليه دافع فيها دم قلبي وسور بيتي كبير ليش ما ادخلها فيه..؟!

عوق با انفعال\يا طول بالك لو كان واحد ثاني كان سوى مصيبه..؟!

زياد\ ماني قليل شر لكن مهنة الطب علمتني الصبر واني احاول اختار اصلح الحلول علشان النتايج تكون مرضيه..,

كم مره اطلع من بيتي ويكون هو واقف اذا شافني راكب سيارتي غبر على سيارتي وهرب..,

راكان ومازن ذيك الايام صغار وكثير يطلعون معاي ويعصبون اذا شافوا حركاته واستفزازاته لي ..,

ويرجعون للبيت يطينون عيشة سناء كنت احذرهم ما يخبرون امي..

لأنها لو عرفت خربت بيت نجلاء على بناتها فماعندهم الا سناء مسكينه ينكدون عليها..,

عوق بدهشه\وانت على كل هذا صابر..,

زياد\انا اقدر اتخذ معاه اي اجراء وعارف نفسي انا الي صح ..,

اقل شي امسكه اكفخه لين يعض الارض او ابلغ ابوه لكن كان تخطيطي غير..!

عوق بفضول\وش كان تخطيطك اذكر انك تكتور على قولة امي ماانت مهندس..؟

زياد بضحك\ اقولك تخطيطي...

اذا مسكته وكوفنته بيصير قدام سناء البطل المضطهد..,

واذا كلمت ابوه بعدين بيمسكها على سناءاهلك دخلوا ابوي بيني وبينك وخربو علينا...!

خليته يفرغ كل شحنات الشر الي عنده

وبعدين حركاته كلها طفوليه ما شفت ذاك الضرر الي ماقدر اسيطر عليه..

انا كان هدفي الاساسي اني اشغله عن سناء حتى نجلاء تخلص العده وبعدين لكل حادث حديث..

عوق عوق مستغربه\واذا خلصت نجلاء العده يعني وش بيصير..!!

زياد\انا اقولك اذا نجلاء خلصت العده ماعاد في شي يمنع انهم يحددون موعد العرس ..!

ونجلاء تقدر تطلع وتدخل على كيفها وهذي امها...

اي خطوه تتخذها محد راح ينتقدهابيعرفون انها بصالح بنتها عكسي..

انتهت عدتها وطلعت لبيتهاوناديتها هي وبشرى وسناء..

وقلت شوفي سناء انا عارف انك زعلانه علي ولوبيدك كان ذبحتيني..

انا الي عندي بقوله انا عطلت دراستي وشغلي وجيت على شان وفاة ساري الله يرحمه

وماشي بعد كم يوم لكن قدام امك وخالتك الي بيكونون معاك ما ناديت امي معانا

علشان ماتقولين خالي زياد وجدتي ضغطوا علي..؟!

حددي موقفك من مشاري اذا هو شاريك خلاص وش المانع انه يحدد زواجكم ويكون قريب..,

اما مسألة انه طالع داخل عليك ابدآما تنفع ..!

وقبل كم يوم يبغاك تطلعين لوحدك معاه..!

حتى راكان نزله من السياره قدامك ولا حاولتي تمنعينه..؟!

با العكس كنتي فرحانه وصلحتيها مشكله يوم نزلتك من سيارته..؟!

ردت سناءاكيد هو شاريني وبعدين احنا متملكين ماهو خطبه ومشاري زوجي شرعآ..!

استفزني كلامها وقلت لهاهذي المصيبه الي ضيعت بنات كثير والعذر زوجها شرعآ..

ثارت علي وقالت انت مالك دخل لا تخرب علي ..,

نجلا ء يوم سمعت كذا ماتمالكت نفسها با الموت مسكتها انا وبشرى عنها..,

هدينا الوضع نجلاء تبكي وسناء مثلها..,

وانا وضعي حساس بينهم وكنت بكلم ابوه يتمم العرس ..

لكن بشرى اعترضت وقالت انا وبنيان بنتكفل با الموضوع زياد خلك بعيد ما نستحمل احد يجرحك ..

واتفقناعلى كذا نقولهم صلحو حفله بسيطه وتمموا الزواج..

بعد ما طلعت من بيت نجلاء على طول يمكن عشر دقايق جاتني رساله من خطيب سناء؛

مرسل ؛(انت تعرف الشرع يا لقيط مكانك الملجأيابن الحرام

وش دخلك بزوجتي وباخذها غصب عنك وبدون حفل زواج وهي راضيه)

وارسل بعدها رساله هي الي خلاص وصلتني للأخير ؛

( ليش تبي تمنعني عن سناء شكل لك علاقه معاها وصخه مثل اصلك الوصخ وخايف اكشفكم)

صدمني كلامه كنت راح انجن كيف يتهمني ها الاتهام

بنات نجلاء وبشرى بناتي انولدوا وكبروا قدام عيني..,

بلعت غضبي وقهري منه وتعوذت من الشيطان علشان نجلاء وبشرى

الي معزتهم عندي لو كانوا خواتي من لحمي ودمي ماراح يكونون مثلهم..,

وطلعت للبر عبرت عن شعوري بكيت بكى ما تتخيلنه ماهو على كلامه..,

لا والله لكن خفت ان غيره ينظرلي نظرة مشاري لبنات خواتي..,

ويظن فيني السوء خصوص ان البنات متعلقين فيني هم وامهاتهم..,

معتبريني اب واخ ويلجئون لي بأي مشكله تواجهم..

بقدر ما جرحني كلام مشاري بقدر ماعرفت ان المجتمع لايغفر ولا ينسى..

وانا لازم احافظ على سمعة ها الناس الي ضفوني وانقذوا حياتي من الموت ومستقبلي من الضياع..

كلمت بشرى قلت الحين كلمي اهل زوج سناء يستعجلون بعرس ولدهم..,

المهر واصل على حياة ساري وبيت سناء انا اتكفل بأثاثه وعلى ذوقها هي ومشاري..,

وشهر عسلهم با المكان الي يحددونه على حسابي هديه من عندي مالهم اي عذر..

سكت عن الموضوع اكثر من يومين وطلعت لبيت بشرى خلاص ببري ذمتي..

طفشت من ها الموضوع كله خصوص بعد الرسايل الوقحه الي جتني من خطيب سناء..

ونادت بشرى نجلاء واجتمعنا ما كنت ابغى سناء تسمع شي ..,

سألت بشرى وش سوت..,

قالت زياد اناكلمت امه والولد شكله ما يبي الزواج الحين

يقولون انه بدري ماكون نفسه..,

ردت نجلاءكيف ما كون نفسه والي اخر العرس وفاة ساري والا المفروض من زمان تزوجوا..,

قلت بشرى انتي قلتي الي قلت لك..,

ردت واكثر من الي انت قلت بعد..,

والله ما بقى الا اقول تفضلوا على العشا اليوم..

صلحنا حفل العرس على حسابناتعالوا خوذوا بنتنا وبنيان كلم ابومشاري..؟

سألتها طيب وش ردو عليكم..؟

الي فهمته من كلام بشرى ان الولد لعاب ومراوغ وان ابوه وامه قاعدين يحاولون فيه..,

بكت نجلاءتقول ماهو على كيفه والا علشان ساري توفى خلاص استضعفنا..,

قهرني بكى نجلاء فوق حزنها على ساري طلع لها موضوع بنتها..,

قلت مافي احد يستضعفك وانا حي يبيها يا خذها والا يضف وجهه..,

دخلت علينا سناء وجها ما يبشر بخير وتصارخ علي..

انت وش دخلك بينا والا مصدق يا اللقيط انك خالنا..,

تسمع انت غريب بينا مالك كلام ولا رأي ولا سلطه علينا..,

بشرى ونجلاء كانوا بيذبحونها لكن انا وقفت لهم قلت الكلام بيني وبين سناء..

ردت بشرى عليها وقالت انتي مخك مغسول ماعادي ينفع معك كلام..

ونجلاء مسكينه تبي الستر قعدت تترجى بنتها..

لا تفضحينا بعد ما توفى ابوك اذا هو يبيك خلاص يجي وياخذك...

وسناء انفجرت وتصارخ علي تقول..

خلاص اذا سمح لي الي مسوي نفسه ولي امرنا بكلمه واشوف وش عنده..,

قلت لهاما يحتاج اسمح لك وانتي 24ساعه مكالمات انتي وهو..,

انكرت سناء وتصارخ انا متى كلمته وانت ظالمني..,

رديت عليهاوهو وش عرفه برقم جوالي والكلام الي كان بينا..

يوم اقول ان عذر زوج شرعآ ضيعت بنات من الي خبره غيرك..

فتحت جوالي ورسايله القديمه والجديده كانت موجوده..

وقلت لها شوفي الرسايل الي جات للقيط الي يظن انه خالك

الرقم تعرفه سناء ما يحتاج بان من وجها لماشافت الرقم..,

بشرى ونجلاء انهاروا يبكون...

لكن سناء على موقفها معاه ولا عندها مانع يأجل الزواج..!

عوق بقهر\واضح ان مشاري قالبها انتقام ضدكم والنهايه وش صار..,

زياد\نجلاء كلمت ابوه شخصيآ واعتذر لها..

ان الولد ما يبي الزواج الحين ونجلاء وبنتها بكيفهم وانه حاول يضغط علي ولده مانفع..

وفي النهايه انا اقترحت حل وسط على سناء لأنها خلاص البنت ماعاد تسمع الا له خفت تجيب لنا مصيبه والولد مستهتر..,

وهو انها تكلمه قدامنا وتقول ان امها خصصت لها مبلغ من ورثها من ابوها الله يرحمه..,

وبتعطيه له ويتمم الزواج كلمته وطلع لها بستين عذر ..

طلعت مع امي لأمريكا كان الوضع معلق بينهم بعدها بكم شهر...

كلمتني نجلاء انهااقنعت بنتها با الانفصال وفعلن طلقها..,

وبعدهاعلى طول تزوجت سناءمن شاب من معارفهم والحمدلله توفقت معاه.. ,

عوق\وطليقها وش سوى ما اتوقع راح يتركهاشكله راعي مشاكل..!!

زياد بسخريه موجعه\وهو على توقعك..

اردف زياد\طليقها تدرين ماني عارف وش يبغى منها با الضبط..

تعلمني عبير انه كان يرسل رسايل لزوج سناء

انه كان يحبها وتطلع معاه وصلها لدرجة ان بينهم علاقه قبل الملكه ومن ها الكلام..

زياد بوجع وقهر\اتوقع الخسيس انه كان يظن ان سناء لها علاقه فيني بما اني دخيل على العايله حسبي الله عليه..,

وحب يخرب على سناء ويوهم زوجها انه دخل عليها قبله ..,

لكن زوج سناء كان جدآعاقل وسناء انكرت نهائي ان لها علاقه فيه تعدت حدودالشوفه الشرعيه

ولقاءاتهم كانت بوجود اهلها ونفت ان بينهم مكالمات مثل ما قال مشاري ..,

وزوج سناء صدقها لأنه تزوجها بكر وكلام خطيبها السابق كان بقصد الافساد..!

والي خدم موقف سناءان نجلاء وسناء هم الي طلبوا الطلاق وخلعوه با المحكمه..,

والحمدلله ان سناء ماكان معاها جوال وقتها وتراسل مشاري والا كان استعمل رسايلهاضدها وهدم بيتها

يعني مثل ما تقولين ستر الله عليها ..

عبير كانت تجي عندي وتبكي من كلام تسمعه من مشاري

يقوله لسناء با التلفون وسناء طايره من الفرحه..,

اردف زياد بوجع\مكالمتهم كانت بداية الشراره الاولى لطلاقهم لكن رب ضاره نافعه..,

عوق تبتسم بتهكم \سبحان الله تنتقد سناء على انها كانت تكلم خطيبها وانت كنت بتموت علشان تكلمني..

زياد بضحك\انا ماني صغير وبعدين ضامن نفسي لكن خطيب سنو ماني ضامنه ولا هاضمة ولاتنسين اني كنت محدد العرس..,

وابي اتناقش معك با التفاصيل..!

اردف زيادبفضول\صدق عوق انتي ماكان ودك تكلميني وتعرفين عني شي خصوص انه انا وانتي كل شي صار مستعجل..,

عوق تبتسم بتهكم\ بصراحه بيني وبين نفسي يمكن كنت اتمنى اعرف وش وراك لكن اتذكر كلام امي واقول مصيري اعرفه..,

زيادبا استفهام\ليش وش كلامها..؟!

عوق\تقول المكالمات مابها فود غير ان كل واحد يجيب ازين ماعنده...

وعقب العرس تبين العلوم الصحيحه شر المكالمات اكثر من خيرها..

كل واحد من الزوجين يعيش على سوالف قبل العرس ويبي خويه مثل ما تخيله..!؟

زياديضحك \شوفي يا خويتي على قولة امك..’

بغض النظر عن كسحتها لي الا ان كلامها حقيقي...!

كثير من زملائي يشتكون من زوجاتهم انهم تغيروا عليهم ماكانوا مثل فترة الخطبه...

وصاروا باردين وحياتهم ممله ماهو زي ما تخيلوها..,

عوق بضحك\حلوه زياد ان الزوجين كل يوم يكشفون شي جديد في بعض..

اردفت عوق بتردد\كيف علاقتك مع سناء الحين احس انها غلطت بحقك كثير..

زياد بوجع\شوفي احنا بشر ولو بقولك اني سامحتها بكون كذاب ...

على انها حاولت تعتذر لكن هي عارفه ان كلامها لي ماله عذرعندي وقلت لها

بستقبلك في بيتي علشان امي ماتحس بشي والا انا انسي بيوم انك قلتي خالي..

واهم شي انها عرفت انا ليش وقفت ضد خطيبها..

الي كان يقولها انه سبب تأخير زواجهم وضعه المادي..

بعد زواج سناء بكم شهر تزوج..

عوق\انا مستغربه ناجي وبنيان وينهم من ها الاحداث..

زياد بعطف \ناجي مسكين يا الله يجمع ينطق الكلمه..

عنده شوي صعوبه با النطق وتبينه يتفاهم مع واحد مثل خطيب سناء..

وبنيان بمزرعته ماهو داري عن العالم

عوق بتذمروملل\ما ادري الي متى زياد واحنا بنعيش كذا..؟!

زياد بدهشه\ليه وش فيها عيشتنا..!

عوق بحسره \زيادمافهمت قصدي اقصد نظرت الناس والمجتمع..,

زياد با ألم \لو بجلس افكر با الناس والا نظرتهم لي ما تقدمت خطوه بحياتي..,

عوق\من جد زياد بسألك حكاية انك مجهول النسب ما كانت تنقص عليك حياتك بما انك عارف الحقيقه وانت صغير..,

زياد يتنهد بوجع\انا بطفولتي عانيت كثير من نظرات الناس لي..؟

اردف بسخريه\ بكل الاحوال مسخوط علي..

مع اني كنت بحالي وماكان لي اصدقاء كثير اثنين ثلاثه ومن نخبة الطلبه..,

امي وابوي كانوا كل شي بحياتي مغنيني عن الكل ..؟

ومع هذا ما سلمت من كلمتين كنت اسمعهم داخل المدرسة وخارجها..,

اما الدافور في حالة المدح والا اللقيط في حالة الذم..

مره في يوم النتايج لما كنت بثاني ثانوي طلعت اصلي الظهر

بعد الصلاه ابوي طلع قبلي وانا تأخرت عنه في المسجد يمكن دقايق

تعرفين ابوي مؤذن وانا دايم اشيك على المسجد واقفله اذا طلعت من المدرسه قبل الآذان..!

قفلت المسجد وطلعت والااشوف واحد من الجيران ماسك ولده الي كان يدرس بنفس فصلي..,

ويضربه جيت مسرع بفك بينهم لكن قبل اوصله سمعته يقول للولده وهو يضرب

اللقيط ولد الشوارع زيادوه ينجح وانت تسقط..,

ضربته على كتفه لأنه ماكان منتبه لي وقلت له...؟!!

اللقيط ما سهرت تذاكر عنه ولا اعطاك ورقة الامتحان وحليتها عنه لا انت ولا ولدك

والحمدلله ان الارزاق بيد الله..,

عوق بتعجب\ ما شاء الله عليك عندك تحكم با اعصابك بصراحه تنحسد عليه..,

زياد بضحك \ لا واسمعي النكته بعدهادخلت للبيت ..

قالي ابوي ما شفت ابو علي جارنا هو وولده سألوني عنك وبشرتهم انك ناجح..,

يدورونك يبون يباركون لك با النجاح لو شفت يا زياد فرحتهم بنجاحك ماتنوصف..,

قلت الله يجزاهم خير لقيتهم وباركولي ودعوا لي با التوفيق..,

عوق بعطف \يا كبر قلب ابوك..,

زياد يبتسم بوجع\ابوي كتلة من الحنان والمسامحه تمشي على الارض...!

وباله طويل ودايم مبتسم مرات لما اطلع انا وهو نمشي با الحاره..,

عيال الجيران يعلقون علينا فانيليا وشوكلاته جنب بعض ..!

انا كنت انقهر وهو لاعادي ينبسط من كلامهم ويمزح معاهم ...!

وتشوفين كثير منهم صاروا يستحون يقولون قدامنا كذا يخجلون من ردة فعل ابوي عليهم..,

عكس امي الله يرحمها بسرعه تزعل وبسرعه ترضى ..!

مره كنت جالس انا وامي بسور بيتنا وعيال الجيران يلعبون كوره بين البيوت ودخلت الكوره في بيتنا..,

كنت بطلع لهم الكوره وقبل افتح الباب سمعنا واحد من العيال قال كورتنا دخلت في بيت السودا ام الابيض..,

امي على طول اخذت الكوره من يدي و دخلت وجابت سكين شقت الكوره من النص والولد كان معلق الجرس يبي الكوره..,

فتحت الباب وسحبت الولد مع اذنه وبيدها السكين قالت السودا ام الابيض ها المره شقت الكوره ..

المره الثانيه تقطع لسانك با السكين وحطت الكوره فوق راسه..,

عوق بضحك\الحمدلله انك ما اكتسبت من امك العصبيه..

زياد بحزن\الله يرحمها على كثر عصبيتها على كثر ما كانت طيبه وكريمه وحنونه والكل يذكرها بخير..

لايمكن احد من الجيران يطلب منها شي وترده والا يطلب مساعدتها وتخذله ..,

واذا سمعت وحده من الجيران مريضه او والده اول من يزورهم هي..,

عوق\فعلن ايام عزاها الحريم الي جو يعزون من كثرهم البيت ما اخذهم..,

زياد بحسره\حتى جنازتها حضرها امم الله يغفر لها..,

عوق \ يا الله زياد ذكرتني بموقف صار لي زمان..,

زيادبممازحه \ اتوقع طفولتك حلوه بعد ما شفت صورك مع بنات مسلط..,

عوق بضحك\ هو الموقف اساسه بنات مسلط..,

شفت المشب والملحق كان قبلهم حوش فيه نخل وشجر سدر..,

زياد \اي ماشاء الله مساحته كبيره..

عوق \ من يوم طلعت لدنيا وانا عايشه فيه كل اكثر ذكريات الطفوله بذاك الحوش..,

مره ريم راحت مع خواتهاوبنات خوالها للحديقه وتعلمني انهم استانسوا باالملاهي والعبوا با المراجيح..

وقالت عوق مره ثانيه تعالي معانا خوالي يطلعون بناتهم اذا نجحوا والله تستانسين ..!

جيت عند امي وقلت ابغى الحديقه بلعب با الملاهي والمراجيح..

ماعطتني وجه انقهرت وقعدت ابكي عندها..

ابغى اروح مع ريم اذا نجحنا..

قالت عيب البنت تبعد عن امها وين ماتروح امها تروح معها..

اذا جا الربيع ان شاءالله بنطلع مع سعد عند الابل ونخيم معهم ازين من الحديقه..,

وانا ابكي مافيه الا اروح للحديقه ابي المراجيح اذا نجحنا..,

انا عندي العاب كثيره عرايس وسيارات وفي هدايا من المدرسات..,

على اني ما كنت شاطره بس مدري وش يعطوني الهدايا عليه الله يجزاهم خير...

وهدايا ما ادري منين كانت تجيني اكتشفت بعدين انها من دار الرعايه

يرسلونها لي مع الراتب الشهري حقي ..

والعاب اذارحت مع امي لسوق اشتريها..!

المهم ان عندي العاب تكفي عشر بنات ..,

امي نادت الشغاله وقالت جيبي كل العاب عويق وخليها تلعب با الحوش..,

وانا مافيه ما ابي الا المراجيح الي با الحديقه

واخذ الا العاب من يد الشغاله واحذفهن با الحوش وتكسير وتقطيع فيهن ما ابيهن

من غير صياحي الله لايوريك تورمت عيوني..!

ريم يوم سمعت بكاي حطت رجلها لبيتهم وعلمت خالتي نوره اني اصيح ابي الحديقه..

وجات خالتي نوره فازعه وعلمتها امي اني ابكي ابي المراجيح..

قالت خالتي بنشتري لتس مرجيحه ونخليها بالحوش مثل مرجيحة الحديقه

وانا مافيه صياحي يسمعونه الي اخر الحاره ..

و تطور الموضوع ابي الحديقه ها الحين ماهو اذا نجحت..

وتروح خالتي نوره وتصلح لي مرجيحه بين السدرتين حبل و وتخيط عليه وساده واتمرجح فيها وانسى سالفة الحديقه..

ولا عاد طلبت حتى المراجيح

امي بعد فتره اشترت لي مراجيح وخلتهم با الحوش ..

صرت انا العب با المرجيحه الي صلحتها خالتي نوره..,

وبنات خالتي نوره يلعبون با المراجيح الي امي اشترتهم والي يومك ريم تضحك على ذيك السالفه

من كثرما انضربت عليها..

خالتي نوره وعمي عاقبوها ليش تقهرين اليتيمه وامها ما تنفذ لها الي قلتيه..!

زياد بدهشه\طيب ليش ماتاخذك للحديقه احس عادي طلبك ..

عوق با استنكار\زياد انت وش تقول امي زود على انها كبيرة عمر تخاف علي خوف موطبيعي..

تخاف اذا طلعنا للحديقه اضيع منها بزحمة الناس ..

تدري الي اليوم ماشفت حديقه ولا ملاهي ولا مطاعم الا معاك ولا سفر الا للبر..

زياد يضحك ويرفع حواجبه \احسن ما سوت امك علشان تكون ذكرياتنا مشتركه

واحداث اول مره تصير معاك تكون معي...

اردف زياد بحب وامتنان\انا وانتي جدآمحظوظين الله سخر لنا ناس تكفلو فينا وربونا احسن تربيه..

عوق بحزن\الحمدلله ..

زياد يبتسم \لا تكفين نظرة ها الحزن فكينا منها

تدرين اني اتكلم معاك واقول ها الحين بتنفجر علي مثل المره الي فاتت..

عوق بحزن وقلة حيله\لا تعودت خلاص انا ما كنت افتح ها الموضوع هذا مع احد

ويمكن ذيك المره اول مره اواجه احد صراحه بحقيقتي..

زياد با استنكار\ليش انتي ما كنتي عارفه من صغرك انك يتيمه..

عوق \لا انا ما عرفت الا با اخر سنه با الثانوي..,

زياد بدهشه\اووووف والله معرفتك كانت متأخره..,

عوق\حكايه طويله لكن جدآتأثرت منها..,

زياد\طيب وش سويتي احس صدمه وخصوص ان المرحله الثانويه هي بداية المشوار الحقيقي للأنسان

يتحدد منها مستقبله العملي..؟!

عوق تتنهد بوجع \ يمكن سبحان الله اكتشافي لحقيقتي با الوقت هذا بذات كان رحمه لي..!

يعني عسى ان تكرهو شيئآوهو خيرآ لكم..؟!

كم يوم بعد ما عرفت الحقيقه انام على فراشي وادعي اني اموت وارتاح..!

تخيل مرات امسك نفسي ماتنفس يمكن اموت..؟!

حاولت انتحر مره بلعت كم حبة بنادول ..!

والحمدلله انها بنادول ولا هي حبوب الضغط والسكر حقت امي..

يوم تعبت وطلعوا بي للمستشفى من اثر الحبوب..

كنت ادعي با الطريق يارب ما اموت يارب تشفيني التوبه ياربي..

صلحو لي غسيل معده ..

زياد با استغراب\امك ما درت انك حاولتي تنتحرين احس خالتي ما ينلعب عليها..

عوق بحب \ امي على الفطره ترى..

زياد بدهشه \الي اشرفو على حالتك ما خبروها..

عوق\ الا لكن قالوا البنت ماخذه كميه من الحبوب..

يوم سألتني قلت يمه من وجع راسي من المذاكره صرت اخذ كل شوي حبه..

ما درت اني بلعتهم مره وحده ومشت عليها وبعدين ساعتها امي مشغوله فيني..

اردفت عوق بضحك \ماتتوقع زياد من الي عرف اني حاولت انتحر ..

زيادبا استغراب \لايكون الخدامه..

عوق بضحك \لا والله نمر ولد خالتي ام ابراهيم كان معانا يوم كنت في المستشفى وسمع كلام الدكاتره لأمي..,

زياد بضحك\المحرم على قولتك..

عوق با اعجاب\يا زياد الولد ذيك الساعه صغير بس عقله يوزن بلد اتوقع عمره تسع سنوات اذامو اقل ..!

تخيل بعد ما طلعت من المستشفى جا في يوم الصباح قبل نطلع لمدارسنا..

وانا راكبه السياره قال عوق ابيك توصليني معاك بطريقك قلت ابشر يا المحرم ..

واصلن متعوده مرات ما يروح بسيارتهم يجي معي..,

يوم ركب معاي السياره..,

قال عوق انا ادري انك ما كله حبوب واجد تبين تموتين المستشفى قاله وانا سمعتهم..!

وانتي كبيره وتعرفين ان الي بيذبح نفسه يبلع حبوب واجد وتموته...,

انا كم مره اشوف با التلفزيون ان الي يبي ينتحر يبلع حبوب والا يجرح يده..,

لكن اذا ذبحتي نفستس والله ان تدخلين النار..,

المنتحر ربي ما يسامحه و كلنا بننساتس ..

محد بيحزن عليتس مثل خالتي وضحى هي الي بتتعب ..,

هي ماعندها بنات غيرتس وش بتسوي لو ان صار لتس شي من وين لها بنت..,

تدري زياد كلام نمر من ضمن اسباب واجد خلتني انولد من جديد..

طفل عمره صغير فكر با امي وانا لا..

ومن يومها تغيرت كليآ..

زياد\لا تستهينين بعقول الا طفال والله مرات عليهم اسئله واجوبه يتنح عندهاالكبيرما يدري كيف طرت لهم..!

عوق بترددوارتباك\زياد تخيل لو يطلعون لك ناس ويقولون احنا اهلك وش بتسوي..؟!

زياد بوجع\اهلي ماتوا ودفنتهم..!

عوق \من جد اسألك وش راح تكون ردت فعلك..,

زياد بمراره\عقب ما مشى الشيب براسي ماعاد ابيهم با الدنيا..,

بنجتمع عند الواحد الاحد واقتص حقي منهم..,

عوق بوجع\تدري مره لما كنت ادرس با المدرسه الاهليه سمعت اشاعه عنك انك ولدبنت شخصيه كبيره..,

وحتى وحده من المدرسات تتكلم وشوي والا تقسم ان كلامها صحيح وان ابوك دكتوراجنبي

زياد يبتسم بوجع وتهكم\ما شاء الله وعسى انولدت بجنيف والا باريس ماهو داخل سياره قديمه وسريري كرتون ..,

هذا الناس تحب الاساطيروالغموض وخصوص الشخص الي يكون معروف عند شريحه من المجتمع

وياما سمعت اكثر من كذا ..,

انا احمد ربي ان عمي خليل خبرني كيف لقوني والا يمكن كنت عايش بوهم اهلي وينهم..,

اردف زياد بتهكم موجع\قومي واتركك من الخيالات شوفي الساعه كم..؟

تحلمين اهلنا يطلعون لنا كان الاموات يرجعون..؟!

عوق بتوجس \طيب افرض لو يعني طلعوا..,

زياد يتنهدبقهر\مالهم مكان بينا ولا لهم عذر ولايستحقون نفكر فيهم ثواني..,

عوق تناظر الجوال وبتوتر\يووه الساعه وحده ومن متى واحنا نسولف..,

زياديبتسم\من الساعه ثمان لكن اقتنعت بشي ما كنت مقتنع فيه..!!؟

عوق با استغراب \وشو..!

زياد\اني اشكر الشخص الي نصحك ونبهك ان الحياه ماشيه ماهي واقفه لأاحد واسمي ولدي عليه..

عوق بضحك \لايكون قصدك نمر..,

زياد \ومن غيره على اني كنت حابب يكون اول ولد لي اسمه مساعد..,

عوق بترجي\لا عاد انا واعده نمر اسمي عليه..,

زياديضحك\والله ما بعد صورتك وانتي وهوبيكون عندي خيارات

ضابطه ام ولدها والشنطه اكبر من الام والولد..!!

زياد يتثاوب\خلينا ندخل نناااااااام ورانا دوام واجيال جديده تنتظر من يساعدها تطلع لدنيا
.
.
.
(كلمه اخيره)
النملة إذا وضعت إصبعك أمامها
و هي تسير لم تـ {ــقف ..!
بل تحاول!
فتغير اتجاهها و تستمر في طريقهاآ ..!
فما بال أحدنا يضرب رأسه
إذا حصل له عائق
و لا يفكر في
تغيير} طريقه؟!
ما دامت الإمكانآات تسمح
.. و الهدف يقبل ..!


لـ / د. سلمان العودة
.
.
.
الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه

شوكرن ام الوليد
بارت جميل..لكن ملاحظه عليك تكثرين السوالف يروح البارت سوالف نبي احدااث مهمه ومواقف حلوه:)
متابعين لك يالغاليه والله يعينا ننتظر ظهر السبت ..متحمسه لروايه ومايدور فيها..ودي اعرف شعور زياد لامن عرف اهل زوجته وموقفه منهم
اسلوبك جميل كلك حكم