السلام عليكم ورحمه الله وبركاته

ام الوليد ... آآآآآآآآآآآمين جعل ربي يستجيب لدعائك ويعجل الفرج لهم
ويزيح عنهم هالغمامه السوده ..... الله يجزاك خير على هالدعاء الطيب

ربي يعطيك العافيه على بارت اليوم الي فعلاا روعه وكل مرررره تخلينا ننتظر
سالفتك الجايه بكل شوق ومحبه الله لايحرمنا منك

عوق والله حبستك لزياااد جابت فايده لانه كان ناوي يتركك ويروح عااااد حزتها وش راح تسوين
مع قليل الخاتمه وانتي مره لا وبطنك قدامك عزة الله ان تروحين فيها بس الحمد لله ربي ستر عليك
بفضل التزامك بالاذكار ودعاء الوضيح لك

والله ياهالحريم لكم مليوون راي اللحين يوم الغبر جالس ينذل لك كل يوم وماغير مرتز عد باب بيتكم
تقل شحاذ يبي بس نظره رضا وانتي جالسه تمنين فيها ويوم طقت كبده الرجاااال وهج عنك صرتي تدورينه
دواره
الرجااااااال ماخلى احد يقول لااله الا الله الا وسطه بينكم وانتي ماغير تعززين عليه خلااااااص امسكي مجنونك
لا يجيك اجن منه واحمدي ربك الي رزقك بواحد مثل زياد يدور رضاك دواره ويحبالارض الي تمشين عليهااا

لااا وبعد دختوووور حريم عشان صار ماصار هو جنبك والرجال مامنه قصور

تعرفين ياطيوف مشكله عوق وشهي انها شايفه نفسها اشوي على زياد لانها عارفه اهلها منهم بعكسه هو
بس تراك انتي وياه بالهواا سوااااا
وينهم اهلك عنك ترااااهم مايدرون بوجودك والي يدري مو راضي يعترف فيك عيشي حياتك مع زياد وربي عيالك
مثل مالوضيحي ربتك واهلك عندهم رب يحاسبهم على رميهم لك

واذا على هالشبه الي ذبحوك الناس فيه مالك الا انك تلبسين برقعك واذا حد سالك قولي يخلق من الشبه الاربعين
وسبحااانه هم خافينك خايفين من الفضيحه ماحسبوا حساااااب ان في يوم راح تكبرين وبيشفونك نااااس ويشبهونك
فيهم


زيااااد شفت ان الثقل صنعه هذا انت يوم انك ماضربت لها كرت ولا عبرتها على طوووووول جاتك طاااايره وهي شايله شلايلها ولا اهتمت بعزيمه ولاهم يحزنون يمكن خايفه انك تهوووووون هههههه

وش عليك يادختور زياد>> يامهنا جاك ماتنمى وهذااااا العوق جالس بعقر داااارك وانت وياها جالسين تسولفون
على اطلال غرفتكم
بس هاااااا اياني وايااااااك ترجع لخبااااااااالك وتزعلها والله ماعاد تحلم بظفرهاااا

الوضيح
يابعدهم انتي والله حكيمه هالمره امووووت فيهاااا>> تكفين طيوف لاتموتينها ماتخيل الروايه من غيرها
عرفتي كيف تاعالجين الي بينهم وتخلينهم يعرفوووون غلطهم لا عاد انهم يرجعون له ليت عوق
ماخذه منك الحكمه والعقل بداااااال ماهي مطيره الرجااااال وراهاااا

ام الوليد جهلك تسمين يالغلااااا على سوالفك الناعمه

صباح الخير ام الولييد
ماشاء الله تبارك الله عليس كل مالي واتعلق بعوق والوضيحي
رب ضارة نافعه لو لا الله ثم تهجم ولد الجيران على بيت وضحى ما رجعت عوق لزوجها
حبيت كلام عوق لزيااد ورده عليها
وحبيت فرحة وضحى برجوع بنتها لبيتها وزوجها

الله يستر شكل منية الوضيحي قريبه
والله اني شايله هم وفاتها ومن الحيين مكتئبه خخخخ

الله يجزاس خيير على تذكيرس لنا ودعواتس لسوريا وربي يبييييد الطاغيه ويفرح المسلميين بالنصر ويعلي كلمة الحق

بسم الله الرحمن الرحيم

اللهم فرج عن إخواننا في سوريا ، اللهم عجل بنصرهم ، اللهم فرج همهم

ونفس كربهم ، واكشف عنهم الغمة ،وأبدل همهم نصرا وفرحا وسرورا

اللهم كن لهم عونا ونصيرا
اللهم كن لهم عونا ونصيرا
اللهم كن لهم عونا ونصيرا


اللهم يا خير من دعي ويا خير من سئل ويا خير من أجاب ويا خير من أعطى

نسأل الله لهم الثبات و أن تعجل لهم بالفرج القريب

يااااااااااااااارب

وحسبنا الله ونعم الوكيل
حسبنا الله ونعم الوكيل
حسبنا الله ونعم الوكيل
.
.
.

هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

او الغوالي الي كلفو على انفسهم وسجلو لمتابعة نوح الحمام ..,
.
.
اليوم بنشوف عوق المزايين وزياد في بيتهم..,
.
.
يا الله تعالوا معاي...!!

وسالفه جديدة؛

.
.

البارت الثاني والثلاثون
.
.
.

عوق\يمه في خاطرتس شي علي..!؟

ام عوق\لا والله وانه احسن علم سمعته رجعتس لبيتس..,

وبكرا بروح ادفع كفارات اليمين..,

يميني على زياد يوم حلفي في ساعة غضب وحلفتس انتي على الطلاق..,

عوق بتأثر\الله يخليتس لي يا ميمتي ..,

ام عوق بأمر\يالله اتركي عنتس التهنوص وشوفي رجلتس وترفقي بعمرتس..,

سكرت الخط هذي امي من عرفت الدنيا هينه لينه قوية با الحق..,

زيادبتهكم\وين وصلتي انا افكر ان ربي رزقنا بولد بنسميه سرحان على كثر ما تسرحين اخبارامك..!

عوق تبتسم \ماعليهاطيبه تقول ازين راي انك رجعتي لبيتك وتوصيني على نفسي وعليك..,

زياد\لوتشوفينها يوم جيت بحاول ارجعك احرجتني قدام ابو ابراهيم وانا جايبه واسطه..,

حسستني اني ولا شي كأني طفل يلومونه على غلط سواه غصب عنه..,

ولاكأن عمري 35سنه طاح وجهي خصوص يوم رفعت عصاها بوجهي..!

قالت عوق متربية ومتدينة ما تطلع منها الزلة

انت الغلطان عليها ولا انت قد الامانه وخيبت ظني فيك..,

ابو ابراهيم يوم شافني انا وامك احتد النقاش بينا سحبني وطلعني من مجلسكم

وانقهرت والله يوم طلعت من عندها وقلت لأابو ابراهيم خلاص

هذولي حريم بايعات بطلق واريح راسي

لكن ابو ابراهيم قال تعوذ من ابليس حرمتك ما تلقى مثلها ..,

وامها بثورة زعل وعجوز كبيره لو صار للبنت شي ذنبها برقبتها وهي الي بغتك لها وزوجتك

والاانا كنت ناوي من جد خلاص اطلقك..!

لكن لما رجعت لبيتي وهدت اعصابي تذكرت كلام ابو ابراهيم

وانه انارجال والحريم ضعوف ومن ها الكلام

وامك ما قالت كذا الا انها حست اني اهنتك واستضعفتك ...,

عوق بدهشه \معقوله ..,

زياد يبتسم ويضم عوق\واكثر مماتتصورين..!

الحمدلله ماكان معاي الا ابو ابراهيم وهو رجال فيه حكمه

والا كان خربت بيتي بيدي ولا شفتك الحين قدام عيوني

عرفت الحين معنى كلامه انه انا وانتي مالنا الا بعض ..

اردف بضحك\على انه بعد هالسالفه زعل علي مسلط

حتى اذا سلمت ما يرد علي يقول الي يزعل بنتنا عوق يزعلنا ..!

عوق با استغراب\ امي ماخبرتني عن شي بس قالت مالتس رجعه له

والحين تقول بتدفع كفارة يمينها عن حلفها..,

ما توقعت امي تدافع عني كذا تدري انها اكثر وحده تبيني ارجع لك واقفه معك ضدي..!

اردفت عوق بحزن\امي فعلن تحس اني امانه ولا تبي احد يقول وضحى قصرت بحق اليتيمه الي عندها..!

تقدم راحتي على راحتها ولما اناقشها واقول خلاص اني معزمه على الانفصال

ياليتك بس تسمع وش تثني عليك وتمدح فيك..,

زياد بتعجب \ ما اصدق صراحه والله كنت حاقد عليها بقلبي ..,

عوق با استنكاروحده\ يويل حالي امي من يحقد عليها ..

وربي طيبة الدنيا كلها بقلبهاوالله ما تتخيل معزتك عندها..,

زياد يبتسم\لو سمعتي الي سمعته منها والاشفتي وجه مسلط اذا شافني ماقلتي كذا..,

اردف زياد\صحيح ماهو كل شي يحكم عليه من ظاهره..!

عوق بضحك \عمي مسلط الله يطول بعمره ما اتخيل يصد عن الي يسلم عليه ..!

زياد بضحك\ ياقو زعل الشيبان وعتابهم خلوني اتوب ازعلك ..

مسلط يقول مابي سلامك لين ترضي عوق ...

قلت له وش اسوي كل باب طقيته ابي رضاها وهي معانده

يرد علي دبر عمرك ومثل ما ازعلتها راضها عوق ما تغلط على احد انت الغلطان..,

صوت الجرس شكل العشا وصل ونزل زياد..

صحيح ان الشيطان له مداخل على الانسان ..,

الله يجزاك الف خير يا ابو ابراهيم بعض الناس تحضر محضر خير وبعضهم تزيد النار حطب..!

وهذا زياد كان بلحظه راح ينهي كل شي بينا من غير الفكره الي اخذها عن امي..,

وامي ما تستاهل الا كل خير الحمدلله انه تفهم وجهة نظرها وغير فكرته عنها..

زياد داخله ابيض ما يعرف الحقد ولا الخبث ولا تفسير الامور على غير ما تستدعي..

له الي في وجهه..,

مصيبه اذا الزوج وام زوجته بينهم صدام او سوء تفاهم بتأثر بشكل كبير على حياة الزوجين..!


زياد بحب\وهذا العشا وصل لأاحلى ام عنادي با الدنيا..,

عوق\الله يسلمك لكن حرام عليك الاكل كثير..,

وش رايك تكلم خواتك يجون يتعشون معانا..!

زياد بممازحه\لا تكفين فكيني شبعت من وجيهن..

بكرا من يوم يدرون انك جيتي تشوفينهم يتسابقون عليك مره منحرجين منك..؟

عوق بدهشه\ليش ..!

زياد\علشان ما زاروك في بيت امك ولا حتى باركوا لك بحملك..

لا يصير في خاطرك من جهتهم شي ترى انا الي قلت لهم لا تتدخلون لابخير ولا بشر..,

عوق بتفهم\تدري فقدتهم بس قلت انتو طبعكم كذا ما تتدخلون بشؤن بعض ..,

زياديبتسم\لا تدققين كثير بتتعبين من زار والا من كلم احيان تكون في البال لكن مشاغل الحياه ماتعطي فرصه لتواصل..,

عوق \صادق الله وانا نسيت الموضوع بمجرد مازاروني با المستشفى ..,


ثاني يوم رجعت لبيتنا واخذت ملابسي واغراضي الشخصيه واشوف بعيون امي الفرحه اني رجعت لزياد

مر اسبوع وانا عند زياد ..

بشرى زميلتها عندها خادمه استأجرها زيادوهي بنفسها كانت واقفه على شغلها..,

زياد عزم نواف واهله وبيت ابو ابراهيم وطلب مني ما اسوي ولاشي نجلاء وبشرى تكفلوا بكل شي..

امي اليوم بتزورني لأول مره في بيتي بعد رجعتي كنت على اتصال دايم معاها وكل ماقلت بجيك ترفض ..

مع المغرب ارسلوا نجلا وبشرى خدامتهم بصواني حلى وسلطات ومقبلات ومعجنات مصلحينها في بيوتهم...,

زياد تكفل با العشا الخادمه الي استأجرها زياد كانت مره شاطره وسريع شغلها ريحتني كثير..

رتبت كل شي بسرعه وانااول مره انزل تحت من بعد ما رجعت من بيت امي ..

لبست وجلست انتظر الضيوف..

امي حياتي جات بدري هي وريم وخالتي ام ابراهيم..,

ام ابراهيم\ما شاء الله تبارك الله بيتكم كبير..!

عوق\ايه فوق نوم وتحت مجالس..,

ريم بدهشه\ حيكم هادي تحسين البيوت خاليه ما زاروتس جيرانكم ولاتعرفتي على احد..؟!

عوق\ لا والله ما اعرف الا اهل زياد وتعرفيني ما احب المعارف الواجد..,

ريم بضحك\ تعلميني فيتس تدرين واحد من زملاء جزاع ساكن حولكم

قبل شوي جزاع يورينا بيته يقول هذا بيت فهدزميلي تبارك الله كبيرمره

عوق\ قطع الاراضي هنا كبيره زياد واهله ماخذين قطعه وحده وقسموها بينهم..,

الي حولنا اتوقع كل فله على ارض كبيره مستقله كبر اراضي بيوتنا مجموعه..

وزميل جزاع يمكن بيته قطعه وحده..,

ريم \ تدرين كم مره فهد يعزم جزاع يقول خل اهلك يتعرفون على اهلي بس ما رضيت اروح..!

عوق بضحك \ليه اخبرتس ام الواجب انتي وخالتس نفلا غريبه ما تعرفتو عليهم..,

ريم بضحك\لا تكفين الا عاد زملاء جزاع تبين خالتي تشكوى مني عندحريمهم وتكب عشانا

خالتي ما تقدر على نفسهاوجزاع ينغث وهو ساكت اذا درى وش قالت

لا خلينا بحارتنا وش زينا عارفينهم وعارفينا والي بيزورنا في بيتنا حياه الله..,

اذن المغرب وصلينا..

وصلو نجلاء وبشرى وبناتهم وجلسنا با الصاله المفتوحه..,

ام عوق با استنكار\الحين انتي تطلعين وتنزلين الدرج ماهوبخطر عليتس..؟!

عوق\لا يمه اليوم اول يوم انزل فيه وقتي كله فوق وما قصروا البنات وبناتهم يطلعون لي فوق...

بشرى بضحك \بنات مره وحده الله يرفع من معنوياتك ويجبر بخاطرك ياعوق..

ريم\ طيب نزلي غرفة نومك تحت عادي الي بعد الولاده وطلعيها بعدين ..,

عوق\لا انا بولد عند امي..

نجلاء\عوق غرفة خالتي طلعنا كل الي فيها ليش ماتنزلين فيها ها الفتره..

ام عوق بحده\ماهو لازم انها تصير بغرفة ام زياد الله يرحمها وبعدين يمكن الرجال ما يجوز له رايكن..

انتن تشرعن وتفتن من كيفكن..؟

ام ابراهيم\يا وضحى ام راكان شورها طيب والحي ابقى من الميت وزياد اكبرمن هالسوالف..

بشرى بحزن \والله اتعبنا معاه حتى قدرنا نطلع اغراض خالتي الله يرحمها

حتى يوم حاولنا نطلع اغراضها طلع من البيت مارجع الا بعد مافضينا الغرفه وقفلها ما اتوقع راح يفتحها..

ريم\ ترى ما يجوز تسكير الغرف بدون فايده لازم تستغلونها..

عوق\انا بصراحه ما اقدر اكلمه وعادي اطلع فوق ماعندي مشكله الحين جلستنا صارت فوق ..


بعد صلاةالعشا وصلوا باقي المعازيم بنات نجلاء وبشرى ودينا وبناتها..

رضيت عن شكلي يوم شفت دينا وبطنها مره كبير..,

والجوهره وام جزاع وصلوا مع بعض..

عوق بهمس\ريم الحين خالتس جايه مع الجوهره..,

ريم بضحك\ابشرتس حولة الموجه للجوهره وانا ارتحت من الهمز واللمز..,

عوق\اخبر الجوهره حاره ماهي مثلتس..,

ريم بهمس \لا ما عليتس الجوهره استفادة من تجربتي معاها كثير واهم شي تحب زوجها..

لو اني اشوف الله يستر ها اليومين بوادر غيره من الجوهره تلوح با الافق

عوق بدهشه\ماتوقعت الجوهره كذا..

ريم بتهكم\لا حبتك عيني ما ضامك الدهر على ان نواف شايف نفيسته

لكن تعجبتس فيه جوجوماكملت شهرين وماشاء الله عليها..,

تسوي الي تبيه وتلزقه بظهر نواف ونافخه نواف لسماء قدام العالم ..

اردفت ريم بضحك\الله لايوريك خواتي مسميات نواف الطاووس وهي ماغيرتمدح فيه الله يسخره لها..,

عوق بضحك \ تلعب على وتر المديح مثل بعض الناس الله يوفقها تستاهل كل خير..,

انتهى العشا والكل طلع لبيته حتى امي كالعاده ترفض تنام الا في بيتهاوما بقى الا انا وزياد..,

زياد جلس جنبي والحركه الي ما ادانيها يوم يمسك يدي واشوف بياض يده ويديني صايره تروع مع الحمل..,

عوق تبتسم \كيف العشا..,

زياد با اعجاب \بصراحه شي يبيض الوجه تسلمين..

عوق \الي يسمعك يقول اني سويت شي اللهم اشرفت على القهوه حتى وانا جالسه وخواتك وبناتهم هم الي صلحوا كل شي..

زيادبتهكم \من عاد بيقول غير ان زوجة زياد راعية بيت مادروا من سوى والا من صلح..

عوق بتهكم\ يا كثر والله الي يستفيد من تعب غيره وينسبه له والمشكله انه يكذب الكذبه ويصدقها..,

زياد بضحك\ ماعليك يجي يوم وينكشفون وتصير فضيحتهم بجلاجل وخصوص ها النوعيةهم يكشفون انفسهم..,

اردف زياد\ما علينا منهم تبين نجلس هناوالا نطلع فوق..,

عوق بتردد\زياد ممكن طلب ..,

زياد بضحك\ شكل الطلب جامد وابشري قبل تطلبين..,

عوق بحذروتوتر\شوف لاتفهمني غلط وانا ماكنت صاحبة الفكره..,

زياد ترك يدعوق وبتوجس \عوق وش فيه هذي ماهي سالفة طلب هذا شي كبير..,

عوق\لا والله لكن بقولك وانت مخير بقرارك والي تبيه يصير..!

زيادبتوجس \بسرعه قولي اش عندك..,

عوق \البنات اقترحوا علي ليش ماتكون غرفة نومنا بغرفة خالتي العنود..,

زيادبهدوء\وانتي وش تبين ..,

عوق\انا عادي لكن حبيت انا نفتح الغرفه وكل من دخلها ترحم على خالتي..,

ولا فكرت تكون غرفة نومنا تحت مايصير نهجر غرفه داخل البيت..,

زياد بحزن\ لك الي تبين لكن ماراح انزل الغرفه لأنها مصممه خصيصآلمساحة غرفة النوم الي فوق..,

باخذلك غرفة نوم صغيره فترة حملك وبعدين عندي فكره ثانيه للغرفه..

عوق\وش فكرتك..,

زياد يبتسم بغموض\ خليها مفاجئه تجي افضل..,

عوق\ خلاص بطلع فوق اليوم وبكرا يحلها الله

طلعت لغرفتي مهدوده من التعب ورجلي صرت ما اقدر امشي عليها اسحبها سحب ما ابي زياد ينشغل علي ..,

الصباح زياد طلع لدوامه وانا كا العادةاجلس بغرفة الاشباح كلمت امي من الثابت اتطمن عليها..

عوق\السلام عليكم..

ام عوق\هلا وشلونتس اليوم..

عوق\يمه ابشرك طيبه لكن رجلي من امس مع الورك ذبحتني ..

ام عوق\راح الكثير مابقى غير القليل وغمضي فتحي الا انتي والده ومرتاحه..

اردفت ام عوق بتساءل\انتي قلتي لرجلتس انتس تبين تجلسين تحت ..

عوق\ قلت له ولا عارض عادي عنده لكن طلعت البارحه ابي ارتاح

تحت كلها مجالس مافي مكان انام فيه والارض ما اقدر انام عليها ما ارتاح بنومي..

ام عوق \ ان شفتي منه راي ثاني لاتعارضينه ولا تعاندينه اهم شي قلتي له

هو بيدبرتس وبيشوف الشي الي يصلح لتس ويرضيه ..,

عوق\لحظه يمه الخدامه جايبه فطور..

ام عوق \اجل روحي افطري انفعي نفستس ..,

عوق\ماعليه افطر وانا اكلمتس..

يمه امس سألت الخدامه وش تتوقعين حملي بنت والا ولد..

قالت انتي بطنك عرض يمكن بنت..

ام عوق بغضب\ وانتي تصدقينهن..؟!

ان شاء الله تجيبين ولد يتبعه ولد وقولها لها ومردود على وجها..,

عوق بضحك\والله عادي بنت ولد اهم شي اني اقوم با السلامه والطفل متعافي لكن كثير يقولن ويطلع صدق..,

ام عوق بتحذير\اقول بس خلي عنتس تنشد الخدامات يجرنتس لسوالفن غيرهذي

سالفه تجر سالفه ويطيحنتس با الشرك والا شي يغضب الله وكلها اولها تبدى بضحكه..,

عوق بخوف\ ماكان قصدي غير امزح ..

ام عوق \هي اكثر المصايب تبدى بمزوح انا حذرتس وانتي بكيفتس..,

انتبهي وانا امتس منهن والله مالهن امان ولولا حاجتهن كان مادخلن بيوتنا لكن الشكوى لله ..

عوق \ان شاء الله يمه تمريني اليوم ..,

ام عوق\لا بالله وضحى بنت ناصر زعلانه علي مرتني من كم يوم واتشره ..,

تقول ورى ياعمه ماتجيني قلت ابشري بجيتس بروح لها مانيب مطوله..,

عوق بقهر\سبحان الله يا اني اكرههاها الانسانه..,

ام عوق\وش علينا منها وانا امتس اوصلها صلة رحم لله تعالى والا هي ماعلي منها..

يوم يومين وراجعه لبيتي والا والله سوالفها هي واخوانها وسم على التسبد ما ينمحي..

عوق\يمه لاتتأخرين عندهم اخاف اولد وانتي بعيده..

زياد يقول الاسبوع الجاي تروحين تجلسين عند امتس..

ام عوق بسخريه\الله اكبر بتولدين بها اليومين باقي عليتس ازيد عن الشهر..

ومن هنا للأسبوع الجاي مية فرج يالله روحي شوفي امورتس هرج التلفونات مابه لا فودولازود..,

سكرت من امي وناديت الخادمه ترفع الفطور انسدت نفسي من وجع رجلي ومن زيارة امي عند وضحى بنت ناصر..,

خايفه تمسك امي مثل سعد يومها اخذها للبر ولا رجعت الا بعد ما تعبت وتنومت..,

قمت ودخلت لغرفتي بريح واسمع صوت الجوال

يوووووه زيادشكله من اليوم يدق..,

عوق \ايوا زياد

زياد بخوف \وينك عن الجوال من اليوم ادق انتي نايمه

زياد\لا الجوال كان بعيد بغيت شي..,

زياد\لا سلامتك لا تنتظريني على الغدا بطلع متأخر..

عوق\لا تتأخر علي البيت مافي الا انا والخدامه ولا اقدر انزل..

زياد\ماعليك بكرا بحاول افرش غرفة امي وتنزلين تحت

عوق بطفش \على راحتك بترجع تلاقيني مكان ماخليتني

زيادبضحك\ لا شكل النفسيه اليوم ماش تعوذي من ابليس واقري قرآن

خلك مثل زمان وابعدي عنك التفكير السلبي..

عوق\طيب انتظرك وقت ما تجي يرضيك ها الكلام..

زياد بحب \ اكيد يرضيني ام عنودي تكون مرتاحه...,

قفلت الخط وافكر بشغل زياد تعب وجهد غير طبيعي خصوص قسم الولاده الله يعينه ويعين الي يشرف على حالتهن..

ياربي حلم وعساه يتحقق قسم الولاده من ادارة المستشفى الي اصغر موظف كلهم نساء..

يارب سترك انا رجلي وقلبي يوجعني اذا فكرت انه يمكن يولدني وشلون الحريم الي يراجعون عنده

الله يستر على من دور الستر

انشغلت عن قرآني بشغل البيت وعن صيام من كل شهر با الحمل..

حتى اذكاري الحمدلله اني منزلتها بالجوال وهذا ساعدني كثير اني ما انساها..

مر يومي وانا مابين غرفة النوم لغرفة الجلوس الثانيه لمكتبة زياد..

نفسي انزل تحت لكن خايفه على حملي

زياد تأخر الي بعد العشا سمعت صوت سيارته داخل السور..

وخفت اناظرمع الشباك اعيد الغلطه دخلت غرفة النوم انتظره ..,

زياد بتعب \مساء الخير..,

عوق\وعليكم السلام ورحمة الله مساء النور شكلك تعبان..,

زياد بتهكم\تعبان وبس الا هلكان وجيعان وكل الي على وزن فعلان ..

عوق بضحك\ دقايق والعشا يجهز..

زياد \تكفين على ما اخذ شور..

عوق بمزح \لا تقول تكفين الحين انزل ركض للمطبخ..

زيادبضحك\لا تكفين تجيبين العيد واناماعندي قدره اتحرك شبر واحد من البيت بتعشى وانااااااااام..

عوق \مو مشكله انت خذ دش وانا بنادي الخدامه تجهز العشا وتطلع فيه فوق..

جهزت العشا بغرفة الجلوس وزياد جلس يتعشى ..

عوق\غريبه تأخرت اليوم..

زياد\حالات ولاده متعسره..

وخصوص اليوم انشغلنا في وحده جدآحالتها تعبانه الله يشفيها..

عوق بذعر\ لا تخوفني من الولاده..

زياد بملامه\وش اخوفك انتي وضعك جدآطبيعي الحاله الي جاتنا اليوم صعبه..!

عوق بخوف\كيف ولا دتها تكفى لاتقول قيصري..,

زياد\الا قيصري والحين هي با العنايه..

عوق تتنهد بوجع\وتقول وش يخوفك لا بعد با العنايه وقيصري..

اردفت عوق بحده\حرام عليكم صارواكل الحريم ولادتهم قيصري انتو ما انتودكاتره انتو جزارين..!

زيادبا استنكار \اما انك انسانه غريبه خليني اقولك سالفتها وانتي شوفي تستحق العمليه او لا..

عوق بتذمر\ ياالله اسمعك..

زيادبكسل\بقوم لغرفة النوم واقولك الحكايه هناك لأني مهدود حيلي ولا ابي انام هنا..

عوق \الحين بنادي الخدامه تاخذ العشا والحقك لا تنام شوقتني اسمع القصه..!

زياد يهز راسه\مشكله اذا اجتمع با المرأة خوف وفضول وتقولين ماانتي فضوليه ..,

ناديت الخدامه نزلت العشا وقفت لحد مانزلت السفره وقفلت انوار القسم الي فوق ..

ودخلت غرفتي اسمع حكاية زياد..!

عوق بفضول وترجي\زياد لا تنام خبرني يا الله..,

زيادبكسل \تخلينها لصباح بكرا..,

عوق بترجي واصرار\ابي اسمعها الحين..

زياديبتسم \طيب يا ستي هذا وحده تقريبآعمرها مقارب لعمرك بين 26و27سنه..

ماعندها اطفال لها اكثر من ست سنوات متزوجه..

راجعت كثير اخذت منشطات وابر وتعبت كثير علشان تحمل..,

حملت اخيرآبعد معاناه حولوها لي وهي با الشهر الثاني..!

وراجعت معاي اكتشفنا من خلال مراجعتها ان عندها توائم عملت لها سونار اكثر من مره ما كنت مصدق...؟!!

عوق بفرحه \ما شاء الله ولدت اثنين..

زياد يبتسم \لا تستعجلين جايك با الحكي دايم مسرعه..

عوق بخوف\زيادكلامك ما يطمن..

زياد بضحك\ قربي جنبي علشان تسمعين صح وين رايحه اخر السرير ..,

عوق باهتمام \ لاقريبه اسمعك..

زياد بتهكم\ناسيه ان حجم سريرنا غرفه كامله قربي بس..

عوق بضحك\قربنا يالله كمل..,

زياد\شكلك اعجوبه وانتي حاطه يدك تحت ذقنك كنك طفل..!

المهم بكمل علشان ماتكليني طلع عندها اربع توائم وتابعت معاها فترة حملها..

جدآتعبت المسكينه واثر الحمل عندها على وظائف الكبد وضغط على الكلى..,

وكم مره انصحها تعمل عمليه ترفض قاومت الي ان دخلت التاسع وحتى على نهايته اجبرناها تولد قيصري..!

عوق بخوف و استغراب\ياربي اربعه لاحول ولاقوة الابالله الله يعينها شايله عايله في بطنها مسكينه..!

زيادبتعجب\ سبحان الله لو تشوفين الاطفال لما عملنا لأمهم فتح بطن علشان نخرجهم تستغربين كيف كانوا محشورين ..!!

وشكلهم الي ما صدقوا يطلعون يتحركون بشكل عجيب بين ايدينا..!

المفاجئه انه كان في طفل خامس محشور بينهم وملتصق بكبد اللأم ..,

اضطرينا نستدعي اطباء علشان نفصل الطفل عن كبد الام

ونحاول ان الكبد ماتتضرر وقعدت مسكينه فتره تحت البنج..,

عوق بدهشه وخوف \ زياد انت صادق والا تمزح..؟!

زياد \لا والله صادق والحين كلهم با العنايه اربع اطفال طيبين والخامس يقاوم علشان يعيش ..,

اخوانه في فترة الحمل كانواضاغطين عليه وامهم تعبانه لكن ان شاء الله انها طيبه..!

عوق\سبحان الله شي عجيب وغريب خمسه مره وحده..؟!

زياد\والأعجب ان الام رفضت تعمل عمليه الا لما كملت شهور الحمل

وهي عارفه انه كل يوم والاطفال في بطنها بيأثر على صحتها اذا ماهو على حياتها..

عوق بخوف وترجي \بالله كم طفل في بطني..؟!

زياد يبتسم بكسل \بكرا افتح ملفك واشوف لأن التوائم ها اليومين كثير..؟!

عوق\طيب انا رجلي تعورني من يومين يمكن تؤم وانت ما خبرتني..,

زياد بملل وارهاق\والله اخر مره كان طفل واحد..!

بكرا اخذك معي للمستشفى ونتأكد يمكن في واحد جديد والامنخش ما شفناه..

عوق بزعل \انت ما ينعرف مزحك من جدك..,

زياد\اتركي عنك الهبال وطفي النور ونامي...,

طفيت النور ودخلت سريري وام التوائم في بالي..

سبحان الله خمسه وقاومت لحد ماوصلت فيهم لشهر التاسع سبحانك ربي ما اعظمك..

صحيت الصباح زياد ماكان موجود والم رجلي يزيد..,

سحبت نفسي لغرفة الجلوس اليوم حتى صلاة الفجر ما قدرت الا وانا جالسه..!

كلمت زياد بيتغدا معي او لا..

وخبرته عن الم رجلي ..

زياد\اتركي عنك الغدا واجهزي انا بجي اخذك اشوف سالفة رجلك هذي

على اني متأكد ان موضوعك بسيط لكن انتي تبالغين..

عوق بمعاتبه\انا رجلي احسها بتنكسروانت تقول تبالغين..,

زيادبضحك\من يوم اعطيك نغمه تطلعين ترى مستعجل ولا تكثرين كلام..,

عوق \خلاص بنزل الحين انتظرك..

لبست ونزلت تحت انتظر زياد غرفة خالتي الي الآن قافلها

ادري انه يتهرب ما يبي يفتحها بحاول اخليه يلغي فكرة انه يفتحها

ذكرياته مع امه مالي حق ادخل بينهم..,

دق جوالي نغمة زياد

طلعت له وصلنا المستشفى واخذت سونار لوضع الطفل..,

زيادبتهكم\قلت لك مافي شي الطفل جالس على الورك الايمن عادي وهذا الي يخليك تحسين بثقل والم

وفتره ويغير وضعه على شان يتهيئ للولاده وبعدين شوفي طفل واحد ولا في ثاني معاه..,

عوق بشك\ بنت صح..

زيادبضحك\ماهو باين احتمال بنت لكن يبين بعدالولاده بنت او ولد..

عوق بضحك\ ياشينك اذا ما بغيت تقول شي ترى اقدر اطلع اي مستوصف واعرف نوع الجنين..

زياديبتسم \ طلبتك لا تسوينها صدقيني ما بتكون مثل المفاجئه انا تمنيت اني ماعرفت الا بعد ماتولدين..

عوق \خلاص علشانك ماراح اسأل مره ثانيه وانتظر المفاجئه على اني حاسه انها بنت ..,

نزلت من سرير الكشف بمساعدة زياد هاالمره بدون مساعدة ممرضه وجلست بغرفة الا نتظار..,

رجعني زياد للبيت ورجع لدوامه..

حاسه بطفش امي ماكلمتني اليوم ولا سمعت صوتها..,

اليوم صلحت غدانا بنفسي وجلست انتظرزياد غدانا بعد صلاة العصر ..,

رجع زيادمن شغله وجلسنا على سفرة الغداء..

زيادبفرح \عندك خبر ان زوجة ناجي ولدت..

عوق بدهشه\ما شاء الله مبروك مسكينه المفروض من زمان والده لها عشر شهور من حملها ..

حتى تفاجئت يوم عشا نواف ماولدت استحيت اسألها..

زياد بدهشه\كيف عشر شهور ولدت طبيعي وبوقته ...

عوق\ ايام زواجنا قالت انها حامل واحنا قربنا ثمان شهور..,

زياد\مشكلتكم يا الحريم بكل شي مستعجلات ربي يقول تسع شهور خلاص تسع شهور يمكن لظروف ينولد خديج..,

بعدين المشيمه اصلن تمد الطفل با الغذاء فترة تسع شهور فقط منين تجيبون ها الخيالات

عوق بضحك\ بشر ولد والا بنت..,

زياد\ابشرك ولد وطيبين هو وامه ما يحتاج تروحين مكالمه تكفي كثر الحركه لك مضره..,

عوق\ مو مشكله انا كنت مستحيه منك اكثر منهم اني ما اوصلهم..

زياد \لا ما عليك اهلي جدآمتفهمين وهم عارفين وضعك..,

عوق\زياد بنام بمجلس النساء الداخلي تعبت من الحبسه فوق..,

زياد \اليوم انشغلت بكرا بشوف غرفة امي

عوق\لا ماله داعي خساير وبس وانا ما راح اجلس كثير فيها زحمة اثاث على الفاضي لو بتفرشها غرفة نوم..,

زياد يبتسم \شورك وهداية الله في كنبه عندي با المكتبه فوق نقدر نحولها سريربنزلها لك تحت..,

ولبسك انا انزل لك الي تبغينه والحين بطلع للمستشفى عندي شغل اخلصه وارجع بدري ان شاء الله..

طلع زياد وكلمت نجلاء ابارك لها بولد ناجي..

واعتذرت انهم ما يمروني كثير الكل مشغول واخذت جوال دينا علشان ابارك لها..

كلمت بعدها دينا الي كانت فرحانه انها ولدت ولد..

قلت للخادمه ترتب لنا المقلط الداخلي لأنه كانت جلسته ارضيه..,

غرفة الحريم حسيتها صعبه المقلط نقدر نستغني عنه عندنا غيره احتياط

لمارجع زياد انبسط من الفكره وطلع نزل الكنبه مع الخدامه وتحول المقلط لغرفة نوم

رتبناه علشان النوم

زياد \اعجبك عوق والا ارتب لك غرفة امي ..,

عوق \لا با العكس ارتب هنا خلنا نطلع لصاله نتعشى ونرتاح كم لنا ساعه واحنا نشتغل..,

تعشينا وجلسنا على التلفزيون..

عوق \زياد..

زياديبتسم بحب\عيونه..

عوق تبتسم بخجل\ ما ادري جا في بالي سؤال غريب شوي ..,

زياد \اسألي سؤالك الغريب ترى عمومآالليل يكون فيه اسأله غريبه واعترافات ليليه..!

عوق\لا والله ماهو قصد لكن بسأل عن اغرب حاله مرت عليك..,

زياد بضحك\ وهذا سؤالك عادي طيب...

كثير حالات تمر ...!

لكن قبل فتره واحد من زملائي خبرني عن حاله غريبه جات عنده..

دخل عليه حرمه ومعاها رجالين واحد كبير با السن والثاني شاب با العشرينات ..

كانت بينهم مشكله كبيره وهي ان البنت حامل وتقول حملها من زوجها الي هو الشاب..

وهو يقول كذب الحمل ماهو لي انا ما دخلت على البنت وانهم لسا في فترة الملكه..

اضطروا يجيبوا دكتورة نسا ء وتفحص عليها..,

المفاجئه انها كانت فعلآ بكر..

عوق با استنكار \والحمل طيب ..

زياد بوجع\الحمل كان في اقل من عشر دقايق اختلى فيها في بيت اهلها بحجة خطيبها جالس معاها لاتزعجونهم..,

متعه تهاونو ا فيها هم الاثنين وتوقعوا الموضوع بيعدي على خير..,

عوق بذعر \ وش صار بعدها..,

زياد\ يقول زميلي ما ادري وش صار با الأخير لكن زوج البنت كان باين انه خلاص بيتملص منها..,

وحالوا بزميلي انه يجري لها عمليه قيصريه يخرجون الجنين ورفض وطلعوا من عنده..,

واكيد الخسران با الاول والاخير البنت المسكينه في جميع الحالات ..,

عوق بشرود\هذي المصيبه يا زياد هي ان اللدغه تجي من مكان انت مأمن له ..,

زيادبتأكيد\صحيح كلامك انا الحين دائم احذر خواتي من انهم يطولوا فترة ملكة بناتهم..

خلاص ملكه وعلى طول زواج الي ماهو جاهز لزواج ليش اصلن او افق عليه يروح ويجي الي احسن منه..,

عوق\ليت والله الكل يفكر كذا..

اردفت عوق با استغراب \سناء بنت نجلاء تزوجت اكثر من مره ..

زياد\لا ليه ..!!

عوق \سمعت مجد تقول لها اخت طليقك معانا با المدرسه..,

زياد بشرود\سناء قبل زوجها هذا كانت متملكه على واحد ابوه من اصدقاء ابوها الله يرحمه..!؟

وطلقها قبل يدخل عليها ..,

عوق بتساءل\تدري سناء كنت اظنها طرمه عمري ما سمعت صوتها..,

على ان خواتها يقولن سناء كانت معاي بالكليه وتعرفني

احسها صوره بدون صوت وخصوص اذا شافتني يزيد هدوءها ومره تستحي مني..ّ!

وش فيك سرحت زياد الحين من ابو سرحان انا والا انت...

اردفت عوق با استغراب \حاسه ان سناء وراها سالفه..,

زياد يتنهد بحزن\لا معك معك سالفتها طويله ..!

عوق بفضول وتردد\زياد تكفى وش سالفتها ولو ماتبي تقول عادي..؟!

زياد يبتسم بتهكم موجع \ لا يا الفضوليه بقولك تخبرين الليل وش يسوي با الواحد اعترافات بدون ضغط..؟!
.
.
.
(كلمه اخيره)

إذا سألت الله الجنه فلا تقل اللهم إني أسألك الجنه

لان هناك أناس يدخلون الجنه بعد دخولهم لنار

ولكن قل ((اللهم إني أسألك الجنه بغير حساب ولا سابق عذاب ))

الشيخ/صالح المغامسي

.
.
.

الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه