اهلين ام الوليد روايه بجد روعه تلتمس الواقع وفيه بعض الادوار سبحان الله كانك عايشه معنا وخاصه الوضيح انا احب الحرص على البنات لان الزمن تغير غدار

السلام عليكم ورحمه الله وبركاته

الله يجزاااااك خير على هالدعوه الطيبه وجعل ربي يستجيبها ويكتب لاهل سوريا
النصر على هالطاغيه ويعم عليهم الامن والامااااان انه قادر

تسلمين ام الوليد على سوالفك الراقيه والمبدعه الله لايخلينا منها يوالفك
يالغلاا تجيب العافيه وتنعشنا والله

واخيرااااااا تكرمتي علينا يا العوق وطليتي والله فقدناك وفقدنا كلامك الي زي البلسم للروح
والا حكمتك الي جالسين نتعلم منها
مدري وش نسوي اذا قررت طيووف انها تموتك ساعته يمكن نسوي عليها انقلاب
ياسبحان الله ابتعادك عن عوق وزياد كان سبب في انهم يتقربون من بعض وان كل واحد فيهم يعرف
قيمه الثاني ويحس انه مايقدر يستغنى عنه

وانتي بعد علمتي عوق ان مالها بعد الله بهالدنيا غير زياد و تنتظر من اهل العازه اهلها اي شء او انهم
راح يتقربون منها تبيها تعرف ان ماحد راح يصفى لها وتهمه غير زياد هو السند والعزوه

وعلمت زياد انه يحترم عوق ولا عاد انه يزعلها او يفكر انه يطردها تالي الليول وان زعل العوق وامها
كايد ولا ترضى الا بطلعه الروح
ما اقوووول الا كبييره يالوضيح كبيرررررره

نجي للمخبل عوق وزياد والله كل واحد فيكم ميت على الثاني ذي الخبله عوق الي خربت تخطيط امها بس
تنتظر من امها كلمه عشااان تطير مع رجلها وهي الي كانت تتوعد وتهدد طلعت خرطي ماعندها ماعند جدي
ونتظر اليوم الي تروح فيه مع زياد

الا يالخبل اللحين امك مسويه لك قدر وقيمه عند زياد ومانعتك تكلمينه تروحين تطلبين منه يجيب لك هديه
لجواهر واخونا في الله ماصدق عوق تطلبه رااح فوريره يجيبه لها بس عشان ترضى عليه

بس اشوى ان الوضيح ذهينه ولقطته على طول عشن تحرم عوقوه مره ثانيه تخالفهاااا

اماااااا عااااااد تقفل عليه بالمقلط والله قويه ليه و قطو خايفه يهرب منها هههههههه الصراحه ضحكت عليهم
لا والمصيبه جار السوء مالقى ينط عليهم الا وزياد محبوي بالمقلط بالله كيف يصيده

لاا والخبله الثانيه تراكض هي وكرشها تحسب روحها في سباق اهجدي يامال العافيه لا يخر ورعك انتي بروحك
ملزقه بعلك تقومين تراكضين لناااا

الله ياخذ يا هالجار كانك منت ناوي تجيبها للبر شكلك لازم تاخذ لك اكله من عصاة الوضيح عشان تتوب وتعقل
وتحرم انك حتى ترفع نظرك بالبيت او انك تفكر تمر من قدام البيت

ام الوليد جعل يمينك تحج يالغلاا لله يونسك مثل ماونستينا

السلام عليكم و رحمة الله وبركاته

اللهم امين ...اللهم لقد ضاقت صدورنا لحالهم ..يارب انت ارحم الراحمين قلت وقولك الحق لقد مس اخواننا في سوريا الضر فرفع عنهم البلاء وانصرهم بعزك وقوتك يارب العالمين


تسلم يمناك يامبدعة السواليف
تفوقتي وبجداره في البارت السابق من حيث الحبكه والوصف
نقلتي تفاصيل ضعف المرأة باسلوب مبهر
سو فهمنا لمن حولنا ... ونعصب اعيننا عن الناس ونعتقد انها لا ترى
لاننا لانرى سوى تحت اقدامنا
حال عوق مع اهلها وعتبها لن ينمحي حتى تواجهم وتدخل عقر دارهم وترى ان حالها افظل بكثير من غيرها ومن حال والدتها التي تحمل النسب
هي باعين الناس مرفوعه كسيره بين الجدران
سواليف المستشفات التي لا تنتهي
ولكم هو رائع المثل من شاف هموم الغير هان عليه همه
تعليمين هي لو لم تبحث عن هموم الناس لتهون على نفسها كان اخير لها
لا اعلم هل لم يتمكن القران وحفظها له من قلبها
اين هي عن حال النبي صلى الله عليه وسلم
حين كان بعام الحزن
فربط الله على قلبه وانزل عليه سورة يوسف
فكم بها من العبر والمواعض فكانت هي سلوته وونيسه
لماذا لم تجعل من هذه السوره سلوتها وهي تحفظها
فمن قرأها وهو مهموم خف همه وهو يرى ماذا حدث مع نبي الله

ما تعجبت له كيف يتكون كيس به جنين كامل فوق الرحم كيف خرج من الرحم كيف تغذى اين ذهب الحبل السري ....جعلتني ابحث في مواقع طبيه عن هذا الموضوع ولم احصل على نتيجه
اعلم ان هناك حمل كاذب ولكن لا يكون جنين متشكل...سبحان الله ولله في خلقه شؤن

زياد هل سيعتب وتحدث مشكله بينهم حين يعلم بانها اخفت عنه تهديد ابن الجيران ...
رب ضارة نافعه فحبسه سوف يمحيه ماحدث معها من اغماء من شدة الخوف
ام عوق
حياك الله يامبدعة الحديث و درة الكلمه
لكم اشتقنا الى عتبها بسلوبها القيم المبهر
ضحكت معها باسلوب مشاكستها لعوق
لو كل ام كانت مثلها لما حدثت هذه المشاكل والطلاق
لدي احساس انها هي من سوف يحدث له شي بسبب ابن الجيران وليس عوق في مجرد اغماء و هبوط نتيجة الخوف
هل سوف تودعنا بالبارت بعد القادم ونفقد سواليفها التي ستستمر بتذكر الاخرين لها



اسفه لعدم التواجد المستمر
وما اخرني عنك تحميل التولبار


سلمتي وسلم كل غاليك
ننتظر طلتك وسالفه جديده
حفظك المولى

بســم الله الـرحمــن الرحيــم

اللهم نسألك بنور وجهك الذي أشرقت له الظلمات ,

وصلح عليه أمر الدنيا والآخرة ,

من أن يحل بنا سخطك أو ينزل علينا عذابك ,

لك العتبى حتى ترضى ولا حول ولا قوة إلا بك

اللهم إن عبادك المؤمنين في سوريا يستصرخونك ويستغيثون بك
اللهم اغث لهفتهم
اللهم فرج كربتهم
اللهم اجب دعوتهم
اللهم اقض حاجتهم
اللهم استر عوراتهم
اللهم آمن روعتهم
اللهم اشف مريضهم

اللهم لا تكلهم إلى أنفسهم طرفة عين ولا أقل من ذلك

اللهم أخذل عصابات بشار الأسد
وكل من ينصره على الظلم
وكل من يعاونه على الباطل
اللهم خذهم اخذ عزيز مقتدر
اللهم أزغ أبصارهم وقلوبهم
اللهم ألق الرعب في قلوبهم
اللهم زلزل الأرض تحت أقدامهم

اللهم أذهب عن أرضك سلطانهم
اللهم لا تدع لهم سبيلاً على عبادك المؤمنين
اللهم خذهم أخذ عزيز مقتدر

اللهم إنا نسألك أمراً رشداً من عندك
تعز به أسودك المؤمنين في كل مكان
وتذل به عصابات الإجرام الكافرين

وصلى الله على سيدنا محمد وعلى آله وصحبه أجمعين
اللهم منّا الدعاء ومنك الإجابة
اللهم آمـــيـــن

.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

او الغوالي الي كلفوا على انفسهم يسجلون علشان يتابعون الروايه ممتنه من الاعماق للجميع..,

واهداااء خااص لحزين الاحزان &الزعيمه الهلاليه
.
.

اليوم بنشوف عوق المزايين بعد العواصف الي مرت فيها وهل عرفت فعلآ حاجتها لزياد...!!!


نسأل الله العظيم رب العرش الكريم ان يجعل لأختنا ارجوانة الياسر من كل همآ فرجا ومن كل ضيقآ مخرجا

يا الله تعالوا معاي...!!

وسالفه جديدة؛
.
.
البارت الواحد والثلاثون
.
.
فتحت عيوني حسيت ضباب قدام عيوني وفي شي على فمي شكله اكسجين ..!!

التفت كان في ممرضه داخل الغرفه حركت يدي فيها مغذي

الممرضه طلعت ورجعت كان معاها زياد شكلها نادته ..,

زياد يبتسم\ الحمدلله على السلامه طيبه ان شاء الله ..,

عوق بوهن \انا وين..؟

زياد\انتي با المستشفى ..!!

عوق بتعب\وين امي .. !

زياد\ موجوده الحين تجي كنا ننتظرك تصحين..,

عوق بخوف والم\وش جابني هنا وش صار..؟

ظهري ماني قادره اتحرك..!

زياد يبتسم\ارتاحي ماصار الا الخير بروح ابشر امك انك صحيتي وبجيبها لك

امس يوم شافتك ارتفع شوي عندها الضغط اتنومت هنا بغرفه قريب منك ..,

عوق بخوف \لايكون صار لأمي شي ..

زياد\ لا الحمدلله امك ماشاءالله عليهاعمري ما شفت احد بقوة ايمانها و صبرها بتشوفينها الحين ..,

عوق بنفسها\ياربي وش الي صار احسب نفسي خلاص في عداد الاموات ..,

حركت يدي ولمست بطني الحمدلله ماطاح جنيني..

دخل زياد وامي على عصاها تسندها شغالتها

زياديبتسم\هذي امك مارضت حتى با العربيه تقول بطلع لعوق مشي ..,

وضحى تسلم على راس عوق \الحمدلله على السلامه صحيتي يمي وشلونتس الحين طيبه ان شاء الله ..,

زياد\لا الحمدلله ابشرك ماعليها طيبه ..,

ام عوق وهي تمسح دموع حاره\والله مادريت انه بيصير عقبي كذا كان ماتركتها لحالها ..!

زياد \مقدر ومكتوب والحمدلله ربي لطف فيها وهذاهي قدامك ما فيها الا العافيه..

ام عوق بمراره\والله ياوليدي شوفة ها الاجهزه عليها انها ماتبشر بخير..

زياد\ياخاله كنا وين وصرنا وين اليوم او بكرا بتنزل للجناح

بنتطمن عليهااكثر ونشيل ها الاجهزه..

انتي اجلسي ارتاحي مسافه من غرفتك الي هنا..,

ام عوق \كل شي لعيون عوق يهون انا طيبه ماعلي اهم شي هي وضناها ..!

زياد يبتسم \ ماعليهم طيبين وبخير ..,

ام عوق بفرحه وامتنان \الحمدلله الحمدلله الي سلمها ربي ..,

عوق بتعب \ خبروني وش صار..,

زياد\لا ترهقين نفسك بخبرك وش صار..؟!

بعد ما قفلتي الباب علي وقفت عند الشباك اناديك وحسيت في حركه غريبه على الجدار

شفت واحد طالع على الجدار بينزل داخل السور

من طلع على سور بيتكم عرفت انه بيدخل داخل وشكله عارف الحي مافيه احد..,

كلمتك بسرعه بدون لا الفت انتباهه لي

شكيت انهم اكثر من واحد وتوقعت معاه مسدس او سلاح يضربني فيه وانا محبوس ولا اقدر اسوي شي..؟!

وحذرتك وبعدك كلمت جزاع بسرعه..!؟

قلت له بيت خالتي داخله حرامي كلم الشرطه اوصف لهم البيت ..

ومثل ما فكرت دخل داخل البيت..,

اخذت يد الهاون الي موجوده بدولاب مشب النار وكسرت فيها حديد الشباك ..,

طلعت لقيته كاسر باب غرفة خالتي وخلاص كسر باب غرفتك بيدخل عليك..,

هو ماتوقع ان في احد في البيت ضربته بيد الهاون الي معي على كتفه بدون لا يدري من الي ضربه..,

وتعاركت معاه وعلى طول وصلوا الشرطه واخذوه وكسرنا الباب عليك..,

لقيتك مغمى عليك وطوالي للمستشفى و من البارحه وانتي هنا وهذي الحكايه..

عوق بخوف وتعب \الحمدلله يعني ما تعرض لي..

زياد بحده وقهر\يخسي وبعدين ترى ماكان في وعيه شكلها يتعاطي مخدرات والحين من رمي با السجن..,

عوق بوجع وقهر \حسبي الله عليه فضحنا بين جيرانا..,

زياد بقهر\لا والله هو الي انفضح متهجم عل بيوت خلق الله خير الدنيا سايبه ..,

عوق بخوف\تعرف كلام الناس وش بيقولون عني وهم مطلعين الحرامي من داخل بيتنا..,

زياد بتهكم \ خيروش بيقولون الناس ..؟!

العالم التمت داخل بيتكم ما ادري من وين طلعوا اتوقع من يوم شافوا الشرطه واقفه اجتمعوا وادخلو مع الشرطه

وشافونايوم كنا نحاول نفتح الباب عليك يعني الكل عارف انه ما قدر يوصلك..!

هو وش يبغى فيك شكله داخل يسرق عارف انكم طالعين للعرس وتوقع البيت فاضي ..,

وبعدين كل الموجودين تفاجئو ان في شخص داخل الحمام لما طلبنا منهم يطلعون واحنا نحاول في الباب نفتحه ..,

ام عوق\الحمدلله عوق صايمه ومصليه وربي حفظها والله اني اصبح وامسي استودعها الله ..,

زياد\الحمدلله يا خاله احفظ الله يحفظك الي صارالعوق شي عجيب لو سمعته من احد ما صدقته وقلت يبالغ..,

انا مريت عوق بوقت ماهو متوقع تأخرت في المستشفى وكنت متردد اني اجي لها خصوص بها الوقت..

جزاع ازعجني اتصالات وينك وينك قلت له دقايق واكون عندك..!

طلعت لبيتي لبست وقلت بمر عوق حتى اني اروح وارجع على شارعكم اكثر من مره..,

وقفت سيارتي بعيد عن بيتكم وجيت مشي ..!

ودخلت عند عوق وكنت بدخل ثواني واطلع...؟

لكن قدر الله انها تقفل علي الباب واتأخر عن العرس ويدخل الحرامي..,

يعني لو ماقفلت علي كان طلعت قبل لايجي الحرامي..

وجزاع ما قصر بسرعه بلغ الشرطه..

و قدرنا نسيطر على الوضع قبل يصير شي لعوق..

عوق بفرحه\الحمدلله ثم الحمدلله ثم الحمدلله حتى يبلغ الحمد منتهاه ان ربي نجاني وسترني..,

زياد\ويمكن بعد درس للمدمن انه يدخل مصحه يتعالج فيها..,

شكله يسرح ويمرح ولا احد داري عنه انه متعاطي..!

ام عوق\ والله ان اهله ناس اجواد في حالهم

لكن ولدهم فاضحهم اعوذ بالله ماغير يهابد بها الشوارع عجزو فيه كلن يشكي منه ..,

امه اذا سألها احد عنه قالت انه مسحور و فيه سبب عجزوا منه الشيوخ ..,

زياد بحده\ماعلينا منه فيه سبب والا مافيه بيلقى جزاه الناس ماهي لعبه عنده وعند كل واحدآ مايخاف الله..,

مر اسبوع وانا با المستشفى كان عندي هبوط با الضغط والمشيمه نزلت ولازم رعايه خاصه..

زياد كان متابع وضعي وصارحني احتمال اذاتطورالوضع انه يكون في تدخل جراحي لكن الجنين مره صغير..

بيحاولون يأخرون ولادتي قد ما يقدرون علشان الجنين يكبروتكتمل اعضاءه داخل الرحم ..,

طلعت للبيت ضاق صدري من المستشفى وخصوص ان الجو شتاء وامطار..,

جو المستشفى كئيب ارتحت عند امي افضل من المستشفى

امي رضت على زياد بعد الموقف الي صار وانه بفضل الله ثم وجوده

ماقدر ولد الجيران يسرق بيتنا او يوصل لي ويضرني

ماخبرت امي ولا زياد عن تهديدات ولد الجيران خفت من ردة فعل زياد

وافتح ابواب على نفسي ماني قدها والولد انمسك بصفة سارق لبيتنا

وهو اصلن سمعته سيئه عند الجيران

يعني بيعتبرون الي سواه ماهو غريب عليه كان من الممكن انه يدخل اي بيت من بيوت الجيران

وامي ما ابيها تشيل همي اذا عرفت با الموضوع

سألني زيادوش الهدف من اني قفلت عليه المشب

وقلت له ابغى امي تعرف وش كثر انت شاريني وترضى عليك

فسر الموقف بأنه يتمنعن وهن الراغبات وان هذي حركه من كيد النساء

زياد اكثر وقته عندنا من دوامه يطلع لبيتنا نادرآما يروح لبيته..

مواعيدالمستشفى هوبنفسه يجي وياخذني ..

مرات يحاول نطلع نتمشى لكن اعتذر منه..

ما اقدر اطول جالسه با لسياره خايفه من الولاده المبكره..,

نقوم من صلاة الفجراناوامي ونجلس با المشب ونشب النار ماندخل داخل الا وقت النوم..

زياد ما كانت تعجبه ريحة الحطب دخل مره علينا الصباح قبل يطلع لدوامه..

بيتنا على طريق المستشفى واقرب لزياد اذا بيطلع من بيتنا

جلسنا انا وامي با المشب نتقهوى..

زيادبضيق \ انتو عارفين ان ناركم هذي دخانها سام ماهو كويس لعوق ولا للجنين..,

ام عوق بممازحه\هذاحطب سمر ما يضر ابد..,

خايف على مريتك خذها لبيتك وهي ما يجيها شي وريحة السمر خلوها لي..

زياد بترجي\ والله اتمنى ياخاله لكن هي ماهي راضيه اقنعيها تكفين..,

عوق بتذمر \الكلام هذا ماهو وقته..,

زيادبملامه وتذمر\كيف ماهو وقته اجل متى..!؟

تدرين كم لك عن بيتك لك ست شهور يامدام..,

عوق بحده\واذا ست سنين انا ما ترك امي با الحالها..,

زياد بقهر\ يعني عاجبك وضعنا ترى مليت تسمعين مليييييييت ما عاد عندي صبر استنفذتي الصبر الي عندي كله..,

ام عوق بملامه \ عوق تعوذي من الشيطان وش ها الكلام..,

عوق بزعل\والله يمه هو الي من دخل وهو ماهو طبيعي ..,

زياد بملامه\انا الي مو طبيعي ليه وش شفتي مني علشان تقولين ها الكلام..!

عوق بغضب \ايه انت ما انت طبيعي من دخلت اعوذبالله تدور المحارش..,

من طلعت لدنيا والسمر مافارق بيتنا والشتاء من يدخل حتى يطلع وحنا نشب ونتدفى على سمر ما جانا شي..,

زياد بقلة حيله ومعاتبه\الله يجزاك خير وانا استاهل على حرصي عليك ..,

سوي الي تبينه ياعوق خلاص ماتفرق معي تجين والا تروحين يا الله مع السلامه..,

وطلع زياد من بيتنا زعلان ..,

ام عوق بملامه \ارتحتي ها الحين يوم هججتي الرجال..,

عوق بقرف\والله عاد هو شكله يبي الهجه بكيفه لا يرجع اذا جيتي وروحتي عنده واحد..,

ام عوق \وانتي ما مسكتي غير ها الكلمه..؟

السوالف معتس ضايعه ولا اخذتي درس من الي صار لتس ..,

عوق بذعر\ليه يمه...!!

ام عوق بزعل\وش الي ليه مير على طول قبيتي بوجهه..,

الرجال خايف عليتس كان سكتي وقلتي ابشر

لكن ما تعرفين تسكتين غير ترادين ..,

تحسبين كثر محارش الرجال به خير..,

عوق بضيق \يعني وش تبيني اسوي انا عارفه وش يبي..

يبغاني ارجع معه للبيت بأي وسيله طيب انا تعبانه..,

ام عوق بملامه\هو طبيب وادرى منتس لا تشدين اكثر ترى مالتس غناة عنه ولا لتس رجل غيره..,

يعني للحين ماعرفتي قيمته لولا الله ثم هو وش كان صار بحالتس ليلة يدخل بيتنا الحرامي..,

عوق با انكسار\يمه والله اني عارفه كل شي لكن هو يحط يده بحلقي وينطقني غصب..,

والله استغرب له تصرفات انسان متعلم ودكتور لكن مرات يرمي كلام ما يعرف عواقبه..,

ام عوق بتهكم\ والله ما ادري من هو الي مايعرف عواقب كلامه..,

اردفت ام عوق وهي تتنهد بقهر\لك الله يا زياد لو انه محتال وبياع كلام كان حطتس بجيبه من زمان..,

مبطي مقيوله ان قام حظك باع لك واشترالك ..وان طاح حظك لا شراك ولا باع..,

والله ان زياد على نياته لكن ماله حظ معتس وش ما سوى..,

عوق بتهكم\واضح على نياته والله ماتدرين عنه..,

ام عوق بسخريه\ما شاء الله انتي الي تدرين..,

اصلحي ما بينتس وبين رجلتس ولو يبيتس تروحين لبيته اليوم روحي معه

الرجال معه حق ومن يصبر صبره عليتس من تاركه بيتس له ..,

وهو رجالآ يبي يختلي بحرمته ويجلس معاها وانتي كم لتس مقابلتني ..,

عوق بملل وتذمر \تعبانه ما نيب رايحه..,

ام عوق بملامه\خلي عنتس الخبال والعناد تراه احرص منتس على نفستس

بقوم اصلي الضحى واطلب ربي ازين من سوالف معتس مالها سنع..,

قامت امي من عندي ودخلت للبيت تصلي واتركتني بحيره..,

من تزوجت ما ارتحت لا مع زوجي مرتاحه ولا بدونه مرتاحه..,

كلام امي حقيقي بس وش اسوي ما ادري وش يجيني اذا شفته ..,

بنتظر منه اتصال واحاول اصلح الي بينا بدون ما احسسه اني راميه نفسي عليه..,

اليوم كله انتظرت من زياد اتصال الحين بعد المغرب ولاكلم ولا حتى ارسل با العاده ما ينقطع عني بالشكل هذا..,

دق جوالي توقعته زيادوخاب ظني كانت خوله..؟

تسأل عن اخباري وهل في امكانيه اكمل معهم النصف الثاني حتى لو ماده وبيساعدوني ..

اعتذرت منها ما اقدراكمل معاههم الحمل متعبني ..

وخبرتني انها بتزورني هي ومعها مدرسات ..,


مر على اخر مره شفت زياد فيها اربع ايام وهو لاحس ولا خبر..,

حتى امي ماصارت تجيب طاريه قدامي وانا الحين تقريبآحملي صارله 27اسبوع..,

مراجعاتي صارت اسبوعيه للمستشفى زياد مشرف على حالتي..

بكراعندي موعدمراجعه ماادري اطلع مع السواق والاهو بيجي ياخذني والااسحب على الموعد..,

عوق بتردد\يمه بكرا عندي موعد با المستشفى..,

ام عوق با استغراب \ليه اول مره تروحين للمستشفى انتي حملتس مير قضيتيه با المستشفى..,

عوق بقلق\لا بس موعدي مع زياد وما ادري وشلون..,

ام عوق\وشو لونه ..! باتسر ان ماجا ياخذتس مثل كل مره..,

البسي عباتس واطلعي انتي والخدامه مع السواق وادخلي عليه مثل كل الحريم..,

عوق بحزن\يمه خايفه ما يعطيني وجه والا يحول ملفي لغيره..,

ام عوق بسخريه\من هو زياد ماهقيت الضعيف يموت على اثرتس بس انتي راسآ يابس..,

عوق بتهكم\واضح الي ساحب علي اسبوع..,

ام عوق بضحك\ياالله با الستر اسبوع كلهن اربع مدري خمس ايام خليتيهن اسبوع..,

باتسر وانا امتس ليني الهرج معه ولا تركبين راستس وان قال با خذتس لبيتنا لا تعيين روحي معه..

عوق تتنهد بضيقه \بنفذ كل الي تقولينه واذكرتس بكرا ان ملفي ماهو عنده بيحوله على غيره..,

تصبحين على خير بنام ..,

دخلت غرفتي برتاح احس بطني ثقيل ياربي وشلون بخلص من هاالبطن

من كبرهالااقدراقوم ولااقدراقعد..,

هم الحمل وهم حالي مع ها الرجال معلقه لا انا با السماء ولاانا با الارض..,

وش اسوي بكرا ارسل رساله والا اكلم والا اخليها على الله ..,

نمت على افكاري وصحيت على صلاة الفجر صليت ورجعت نمت بعد ما قريت وردي واذكاري اليومية..,

خصوص بعد الي صار من ولد الجيران صرت احرص على الاذكار اكثر من اول..,

نمت وصحتني امي على الساعه عشر..,

ام عوق بااستغراب\وش عندتس اليوم طولتي با النوم لا يروح عليتس موعد المستشفى..,

عوق بكسل\هلا يمه لا الموعد بعد الظهر..,

ام عوق \اجل نامي وانا اقعدتس على صلاة الظهر..

عوق \لا خلاص بقوم الحين شبعت نوم من البارحه وانا نايمه..,

قمت صليت الضحى

طلعت ورى امي للمشب هجرنا البيت وصار هو مجلسنا..,

ام عوق\من الي بياخذتس للموعد..؟!

عوق بضيقه\زياد ما عطاني وجه ولا كلم بطلع مع السواق تجين معي..,

ام عوق\وش يوديني خلصي شغلتس وعودي..,

عوق بتذمر\اكيد بخلص وارجع ماعندي مشاوير عقب المستشفى..!

ام عوق بتوجس وشك\من هي البنت الحامل الي مع خوياتس يوم جاو قبل يومين..,

عوق\من.. ؟ مافي حامل الا اميره ..,

ام عوق\والله ما ادري وش اسمها لكن وجها ماهو غريب علي وش يقالهم..,

عوق\والله ما ادري يمكن اميره الـ...

ام عوق برعب\ تقولينه صادزه..؟؟!!

عوق با استغراب\اي والله يمه الظاهران هذا اسمهم لكن ليش مستغربه..؟

ام عوق بتعجب\يا صغر الدنيا يا بنتي هذي ان ماخاب ظني انها بنتاخي للهنوف واهلها هم الي ماخذين ساره..,

عوق با استنكار\من الهنوف ..!

ام عوق \الهنوف ام ساره و بدر رجل مشاعل..,

عوق تضحك بوجع \يمه تدرين انها كم مره تشبهني في بنات خالدوبنات تركي..!

تقول ياعوق كنك منهم ان قلت انك مثل بنات خالد تشبهينهم وان قلت مثل بنات تركي تشبهينهم..,

قلت يخلق من الشبه اربعين..,

ام عوق بحسره \ازين مارديتي وابعدي يا بنتي عنها مانبي عقب ها السنين نفضح الي سترناه..,

عوق تتنهد بوجع وحسره\يمه لاتوصين حريص داريه يعني حتى لودرت الناس من هم اهلي وش الفايده..!

هذا انا تزوجت لقيط مايندرى من اي ديره جابته الاقدارلي وغيركذا المجتمع مايرحم..,

الكل بيجيه من شرارنارالفضيحه الي صارلهامدفونه اكثرمن 26 سنه ..,

ام عوق تتنهد بوجع\الناس هذا طبعها دايم عينها وسيعه على الزلات وشلون فضيحه مثل هذي..,

هذا زين بعد ان ماقالوا بنت خالد ما يدري منين جابت هالبنت..,

ليت يقولون ابوها بدر الا بتسمعين الهوايل عن مشاعل..,

وانتي يا بنتي هذا قدرتس وش بتسوين..

مرات اوجس منتس كبرت نفس على رجلتس لا يغرتس كبر اسم اهلتس ماهم نافعينتس

عوق تبلع غصه با الم وتمسح دموعها\ ماكذبتي يمه والله مرات اجلس وافكر الحالي ليه انا من بد بناتهم كذا

وخصوص اذا سمعت احد اطراهم قدامي من زميلاتي والا اي احد من معارفهم

واحس نيران بجوفي تواقد مايطفيها غير خوفي من فضيحة اهلي..,

ام عوق بتأثر \السوالف ما تفيد مابها غير تجديد اوجاع

احمدي ربتس الي جاب لتس ها الرجال حبيب وعاقل ولا عنده لف ودوران ويتمنى بس يرضيتس

ترى هذي يا بنتي بعد نعمه عظيمه تبي من يشكرها

ولا اوصيتس سرتس لا يطلع حتى بينتس وبين نفستس انسي كل شي يتعلق بهاك العرب

عوق تبتسم بوجع\ما عليتس يا الوضيح السر في بير مير حتى اني افكر البس برقع ولا ينزل عن وجهي الا في بيتي..!

ام عوق تتنهد بتمني \يامنوة عيني ان برقعتس ما ينزل من وجهتس ..,

اردفت وضحى بتوجس \اهل زياد ماهم اهل براقع خوفي ينقدونتس ..,

عوق تبتسم بتهكم \ ياليت كل الناس مثلهم والا بطيبتهم وبعدين في بيتي مانيب لابسته..,

بلزم برقعي اذا طلعت عند احدوالا زارني احدغريب..,

انا وش عرفني بمعارف زياد يمكن احد من زملائه والا اصدقاه يقول ودي اتعرف على اهلك يا زياد

ويكون من معارف الـ خالد والا الـ تركي والكل داري انتس انتي ماتفكين برقعتس

بيقولون العرب الوضيح ربة اليتيمه وعودتها عوايدهامحد بناقدني..,

ماصدقت سنين الكليه تعدي وانا كل ماجات دفعه جديده نشبو لي

فيتس من بنات البندري بنت تركي وكنتس بياض بنات شهاليل بنت خالد..,

ليالي عساها ماتعود كل شوي مروعاتني

وانا ماعندي الا يخلق من الشبه اربعين والا اصددعنهن كني ما اسمع وش يقلن..

ام عوق تتنهد بحسره\يا جرح قلبي عليتس يا عوق جرحاه..,

عوق بحزن\ليه يمه..!

اردفت ام عوق باالم \ متحمله شي محد يتحمله الله يكملتس بعقلتس يا بنتي ويصلح حالتس ويستر عليتس ويهون عليتس ..,

عوق بوجع \اي والله يمه اني محتاجه ها الدعوات بروح اجهز نفسي اصلي واطلع للمستشفى..,

ام عوق تبتسم \مامثلتس عسى الله يوفقتس لكن توصلين لزياد وتخربين..!!


احترت وش اسوي اكلم زياداو اطلع مع السواق..,

صليت الظهر ودقيت على زياد ماردعلي دقيت مره ثانيه وعطاني مشغول ..,

عوايدك يا زياداذا زعلت تعطيني مشغول ليتك ترد بشين والا بزين ...؟!

لبست عباتي وطلعت للمستشفى قدمت او راقي وجلست بصالة الانتظار ..,

اليوم طولت وانا جالسه مواعيدي السابقه على طول ادخل vip لكن الحين عادي

استغليت الوقت كنت منزله بجوالي القرآن الكريم كامل وقعدت اقرا..,

نادتني الممرضه دوري ادخل على الدكتور..,

دخلت وكان ملفي مع زيادومعاه وحده شكلهايادكتوره او ممرضه..,

وممرضه فلبينيه اول مره اشوف وجه زياد كذا كان جدي مره معاي ..,

يسألني مثل اي مريضه غريبه عكس المواعيد السابقه..,

ويرجع يتكلم مع الحرمه الي معانا شكلها سعوديه طلعت فعلن دكتوره..

زياد كرر اكثر من مره كلمة دكتوره..

انقهرت ولا ادري وش يقولون انا با الانجلش ميح..!!

احس أني اول مره ادخل على دكتور..

زياداذا كلمني يطالع با الملف ما يطالع وجهي..

وانا استحيت من الدكتوره الي معانا اني اتكلم معاه..

اخاف ما يعطيني وجه كنت ارد على اسئلته بس..

طلبت مني الممرضه اطلع على سرير الكشف شكل زياد طلب منها تقولي..

ساعدتني علشان اطلع على السرير جا زياد ولا ناظر حتى بوجهي..

يناظر بكل شي الا وجهي وانا نقابي علي ما ادري ليه يوم جلس جنب السرير..

علشان يعملي سونار جاني شعور اني اضحك وابكي بنفس الوقت..

زياد نادى الدكتوره الي معانا با الغرفه وجات تناظر معاه..

يسولفون ويضحكون زياد والدكتوره حتى الممرضه شاركتهم..

ويأشرون على شاشة الجهاز وشكلهم يناظرون الطفل وانا محد معطيني وجه..,

عوق بتردد\كيف الجنين..,

زيادبهدوء \كل شي تمام..,

الدكتوره \ماشاء الله طفلك حجمه كويس واعضاءه متكامله ونموه مناسب لأاشهر الحمل..,

تركت زياد وصرت اكلم الدكتوره ما صدقت انها عطتني وجه..

ولا ادري ايش اختصاصها هي نساء ولاده والا اي شي بس ابغى اتطمن..,

عوق\ دكتوره كم باقي على الولاده..,

الدكتوره\هذا شي علمه عندالله لكن انتي وضعك خاص علشان كان عندك مشاكل في بداية حملك..,

باقي با التقريب من 7اسابيع الي عشر اسابيع وممكن قبل..,

عوق بتوتر وخوف\يعني ممكن اولد طبيعي والا مستحيل خايفه من القيصري..

الدكتوره\مافي شي مستحيل والقيصري صار عادي جدآلا تخافين دكتور زياد ماسك حالتك..,

اردفت الدكتوره بضحك \وزيادة اطمئنان لك ماراح نلجأللقيصري الا اذا في خطر عليك والا على الطفل..,

عوق با امتنان\مشكوره دكتوره الله يطمنك اول مره احد يطمني من بداية حملي للأن ..,

الدكتوره\لا ماشاء الله كل شي عندك طبيعي ليش ما تتطمني ..,

عوق بتردد\دكتوره ممكن اعرف نوع الجنين..,

الدكتوره بدهشه \واضح مره جنس الجنين ليش ماخبرك دكتور زياد ان ...

زياد بمقاطعه يبتسم\دكتوره سديم احنا نحب المفاجئات والمدام عندها خبر..,

ضحك هو والدكتوره وخلاني على نار نزلت من على سرير الكشف..,

لبست وطلعت من غرفة الكشف خلاص با اطلع للبيت توقعته بيقول شي لكن ظل صامت ...

وصلت للبيت مع صلاة العصر ولقيت امي تنتظرني ..,

ام عوق\هاه بشري وش سويتي..

عوق بتعب \انتظري خليني بس اغير لبسي واصلي واجي اعلمتس وش صار..,

دخلت وحذفت عباتي وقفازي على الشغاله تغسلهم اكره ريحة المستشفى احس تتعلق بملابسي..

اخذت دش عن ريحة المستشفى والجل حق السونار ولبست وصليت وطلعت لأمي..,

ام عوق بخوف\برد عليتس وش يطلعتس وانتي متسبحه..,

عوق بممازحه\ماعليه انتي تقولين الحامل ماتبرد ولا تحس با البرد..,

ام عوق بضحك\اقربي لنار من الي ما يحس با البرد هذا حنا على تالي الشتاء والبرد كل ماله بزود عطيني علومتس..,

عوق\والله يمه دخلت وطلعت ما شفت وجهه هو الي فحص علي ومعه دكتوره ماغير يقرقر هو وياها..,

ولا فهمت منهم شي غير يأشرون على الطفل بالجهاز..,

ام عوق بطمئنه\زين يومه هو الي متابعتس ..,

عوق بخوف\يمه خايفه من العمليه..,

ام عوق\اقول خلي عنتس الخبال ولا تفاولين على نفستس وخلي ثقتس بربتس اكبر من ظنونتس..,

عوق بحزن \الله كريم..

ام عوق\ القابله ان شاء الله عشا عند ابو ابراهيم للجوهره توها راجعه من السفر..

من عرسها سافرت ولا رجعوا الا البارحه خلينا نحضر عشاهم نوسع صدرونا..

عوق\يمه ما اقدر امشي واجد اخاف..,

ام عوق\اقول خلي عنتس الطيره نوره تقول خلي عوق تجي..

وبيتهم ماهو من بعده حذفت حصاه اقول بس البسي وانا امتس بنروح لهم بدري بعد صلاة المغرب..,

عوق\ابشري يمه اكلم زياد اقوله اني بروح ..,

ام عوق بضحك\كلميه لو اني داريه انه ماهوقايل شي..

عوق منحرجه\لا بس انا عمري ما طلعت هذي اول مره ومستحيه اطلع وهو ماعنده خبر هم اكيد بيعزمونه..,

ام عوق بضحك \كلميه كلميه الله يعين المستحي على شي جايز له طلعات المدرسه والسوق ماكانت طلعات ..,

وقت العصر قصير ما قدرت اكلم زياد ارسلت له ؛

(زياد بكرا بطلع المغرب لبيت ابو ابراهيم معزومه عندهم اذا ماعندك مانع )

ارسل ؛

(لا ماعندي مانع وبمر اعطيك الموعد الجديد للمراجعه الي طلعتي وخليتيه وراك)

قريت كلامه اكثر من مره ماني مصدقه انه بيجي ها المره جيته احسها غير

على ان رسالته فيها سخريه لكن ماعليه اهم شي عطاني وجه..,

خبرت امي ان زياد بيمر بكرابيجيب موعد نسيته..

ام عوق\اجل انا بروح قبلتس علشان تاخذون راحتكم ولا ارجع والقاكم متذابحين عقبي..!

عوق بضحك\ لا خلاص التوبه..,

ام عوق بسخريه\كم مره تقولين ولا تنفذين..,

مر اليوم بسلام ونمت بعد ارهاق المستشفى ..

اليوم الثاني

صحيت بدري ودخلت للمطبخ وصلحت حلى دخلت امي علي بالمطبخ

ام عوق بضحك\ماشاء الله وش ها النشاط ..,

عوق\ابد وش نشاطه اصلح حلى وانا جالسه بناخذه معنا لبيت خالتي نوره..,

ام عوق \ الله يقويتس ويعافيتس..

طلعت امي بدري لبيت ابو ابراهيم حتى قبل المغرب وانا قلت للخدامه ترتب البيت وتطفي نار المشب وتدخن المشب عن ريحة السمر..

ودخلت اخذت دش مستعجل جففت شعري علشان ما اخذبرد واحترت وش البس..!!

استقريت با النهايه على فستان حمل لونه ازرق نيلي من زيادهديه ..,

وبسرعه خفت يجي قبل اخلص اكتفيت بروج وردي ومسكرا ورشيت عطر..,

الحمدلله كل ما شميت عطر حمدت ربي اني صرت اتقبل ريحة العطر بعد ازمة الوحام وكرهي لكل شي ..,

اذن المغرب وصليت وجلست انتظر زياد انشغلت با اذكاري الي نقلتها لجوالي..,

جاني اتصال من ريم..,

ريم\وينك عوق تأخرتي خالتي تقول بتلحقينها..؟

عوق \شوي واجي مشغوله الحين..,

ريم \ايه تكفين لا تتأخرين ترى ننتظرك انا والبنات..

وانا اكلم ريم جات تنبيهات على جوالي سكرت بسرعه من ريم توقعت انه زياد..؟

مكالمه من زياد وبعدها رساله؛

(ساعه مشغول جوالك افتحي انا عند الباب واقف)

استغفر الله وش ساعه ريم مكالمتها ماتعدت دقيقتين..!!

يارب اربط على قلبي لأانفجر بوجهه..

ارسلت الخدامه تفتح وتدخل زياد داخل للمشب ..

افتحت وارجعت تقول رفض يدخل للمشب ودخل للمجلس داخل ..,

قلت خلاص جهزي القهوه والحلى الي صلحتهم وطلعيهم لزياد انا جايه وراك..

طلعتهم له الخدامه ورجعت ومعاها ورقه..

فتحتها كان فيها موعد المراجعه الي نسيته حسيت بخيبة امل

عوق بيأس \ وش فيك تأخرتي ..! بابا زياد خلاص طلع !

الخادمه\لا بس هو يسأل يقول مين صلح حلى وقهوه انا يقول مدام عوق وممكن يطلع الحين ..,

مشيت للمجلس وانا اقدم رجل وأأخر رجل..

ما ادري كيف وقفت داخل المجلس وقدام زيادوهو جالس يتقهوى ولا رفع راسه لا بس ثوب اسود..,

وبالطو جلداسودطويل وغتره بيضاء حسيت نفسي اول مره اشوفه..!

من زمان عن شكل زياد با الثوب حتى لماكان يجي ويجلس عندنا ماكان يلبس ثياب..

اخر مره شفته لابس ثوب بزواج نواف الي ما قدر يحضره بسببي ..

زياد جماله خرافي وفعلن مثل ماقالت ناهد زياد وجه مناقض للهجته ..

وقف وسلم علي اناظر بيده وهي ماسكه يدي احس يدي سمرا..؟!

وين الي يقولون يدين عوق حليب..

جنب ايدين زياد كنها ظهر قدر يطبخ على حطب كرهت حتى شكل ايديني..

زياد\وش فيك اجلسي والا مستعجله بتروحين..

عوق منحرجه\لا ابد عادي لا مستعجله ولا شي..

زياد بضحك \ على هالكشخه مااتوقع عادي..

عوق تبتسم بتوتر\لا والله اصلن ماني متحمسه على اني اروح للعزيمه..

زياد غمز بعينه \بنشوف اذا انتي صادقه او تصريفه..,

عوق با ارتباك\لا والله ماهي تصريفه..

زياديبتسم\ يا الله البسي عباتك بنطلع مع بعض وخلي عشى المسلط..

عوق\طيب لكن صلاة العشاء على وشك..

زياد\خلاص اجل نصلي ونطلع..

جلست انا وزياد اقهويه وجاه اتصال..

زياد\هلا نواف

نواف\...

زياد\لا والله ما اقدر كنت بجي لكن جالي شغل مفاجئ ..

نواف\.....

زياديضحك\وش اسوي حظي معك كذا..!

نواف\.....

زياد\خلاص بمرك دقايق وانا طالع لصلاة..!

نواف\.....

زياد\اي والله اهم منك ما يتأجل اخاف اجله ويروح علي..,

زياد بضحك \ مع السلامه

عوق\شكله نواف

زياد يضحك \نواف بينفجر من القهر يقول الظاهر الي مسك عن حضور عرسي هو الي حرمني شوفتك الحين..

عوق بحيا\لا عادي بتحضر العشاء خلاص انتظرك هنا..ّ!

زيادبمشاكسه\لا والله ماراح تصيرين اطيب مني يا ام العنود..!

اذن العشاء وطلع زياد يصلي..

وانادخلت اصلي وجلست لاذكار الصلاه انتظر زياد..,

كلمني اطلع ركبت السياره مع زياد..

الجو اواخر الشتاء و بعد العشاء لكن بياض الغيم معطي الليل جمال سبحان الله ..

زياد\وين تبين تتعشين..,

عوق\بكيفك بعدين تو العشا ..

زياد\اجل بنطلع مكان على مزاجي ويفرح فيك والا وش رايك..,

عوق\بكيفك..!

زياد يضحك با استغراب\لا الدنيا اليوم فيها شي انتي صادقه والا تمزحين..

عوق\وليش امزح لا والله صادقه تعبت وانا وانت كل واحد بجهه..,

وعلى قولتك العنود ما تستحق انها تعيش بين امها وابوها..

زياد\انتي رجعتي مقتنعه والا احد ضغط عليك ولا علشان الطفل..

عوق\انت وش رايك..

زياديبتسم \انا اسألك ..

عوق\انت وش تبي الجواب..

زياد\الجواب الي يريحك وتحسين انه الحقيقي لرجوعك..

عوق تتنهدبوجع\لو كان على الضغط كان رجعت من اول يوم طلعت من بيتك..

والطفل انا طلعت لدنيا ماعندي الا امي وهذا انا ماضعت ..

تربيت وعشت احسن من بنات عاشو بين ام واب واخوان ..

زياد\يعني افهم ان رجعتك على شاني..

عوق\بكون صريحه معك انا رجعت على شان نفسي اولآ..

انا اكتشفت اني بدونك ولا شي الطفل الي بجيبه بغض النظر ولد او بنت ..

اكيد ماراح اقصر بتربيته وبيكبر ويروح ويتركني..

اذا بنت بتتزوج وتنشغل بحياتها واذا ولد اذا ما ابتعد عني بعد ما يتزوج يمكن وظيفته تبعده عني..

زياد انا محتاجتك اكثر من حاجتك لي بغض النظر عن كل شي ما ابي اعيش وحيده..,

تعبت من الوحده انا ابي احس با الآمان معاك..

زيادبممازحه\افاااوانا اقول ام العنود رجعت علشان تحبني اثاريك تبين بودي قارد..!

عوق بضحك\عاد والله ناقصك كم كيلو وتضبط عليك الوظيفه..

زياد يبتسم \عوق من جد تحبيني..

عوق بحيا\ عن الاحراج عاد..,

زياد بحب \يكفيني هالجواب..,

اردف زيادبضحك\نفسي اشوف وجهك بس وهو يتقلب الوان عوق ترى الاحتياج احيان اكبر من الحب..,

عوق\الحب ماهو كلمة تنقال احبك وتحبني الحب الي ما يترجم افعال وش الفايده منه..

زيادبضحك \يا ام الفوايد الكلام الحلو بين الزوجين له دور..

بالله من يرضى بحالة الجمود اذا الزوجه ماتعبر عن حبها لزوجها بجنب الفعل على قولتك با الكلام..

عوق بضحك \هذا طريق بيتنا..

زياد\ايوا بيتنا اكثر مكان بيفرح برجعتك وخصوص غرفة الاشباح..,

عوق تتنهد براحه\والله حتى انا فرحانه فيه ومشتاقه لغرفة الاشباح..

دخلت لبيتي احس كل شي على حاله ماتغير غرفة خالتي مسكره..,

جلست با الصاله الي تحت نزلت عباتي ونقابي كنت متردده اطلع فوق..

زياد يضحك\وش فيك تناظرين الدرج اطلعي عادي لكن بشويش ان شاء الله ماعليك شي

عوق بتذمر\والله خايفه..,

زياد يبتسم وبطمئنه\لا الحمدلله وضعك جدآمستقر والحركه اصلن لازم لك لكن بدون اجهاد ..

طلعت فوق انا وزياد كل شي على حاله ماتغير لكن اثر غبار..

زياد\وش فيك تناظرين ترى من طلعتي الخدامه انتهى عقدها وسفرتها

وخواتي بين فتره وفتره يرسلون خدماتهم يهتمون في البيت وش اسوي عزوبي والناس تتصدق علي..,

عوق\الله يعين وانا طبعي حار وسواس نظافه الله لا يوريك..,

زياد\لا عاد اذا على كذا يا الله لبيت امك حتى اشوف لي خدامه ما ينفع كذا وانتي شكل مالك امان..,

عوق تضحك\احسن حل..,

زيادبدهشة مصطنعه\خير صدقتي بكرا بجيب خادمه مؤقته لحد ما اشوف حل..

ما توقعتك ترجعين الا بعد الولاده والا كان اخذت احتياطي واستقدمت خدامه..

عوق\مو مشكله..

دخلت غرفة النوم ياربي مآساه من الاعصار الي ضاربها..!!

تذكرت زياداول زواجنا قال انا اذاتضايقت اصير ابو الفوضويه..,

عوق بمزح\زياد في عصابه داخله على بيتنا والا حيكم ضاربه اعصار..؟!

زيادبتهكم\ لاهذا اعصار زيادليش امريكا احسن مني كل يوم مسمين اعصار با اسم جديد

ماعليك انتي ارتاحي كل شي له حل..,

عوق بتهكم مصطنع \ خيبت ظني فيك والله ماكنت كذاوش جاك عقبي اذكرك منظم ولا تعرف الفوضويه..,

زياد يتنهدبوجع\والله ماتدرين وش جاني ..

عقبك صرت مثل الطفل الي عنده حاله نفسيه و ياكل اظافره..,

عوق بتهكم \عسى بس ما انت على ها الكبر تقرمط اظافرك با اسنانك..

زياد بممازحه\ لا والله على قولتك اقرمط بغرفة النوم احوس وامشي بدون شعور..

عوق \اقول بس خلنا ننزل تحت احسن..

زيادبضحك \ لا تكفين خليك فوق وش ينزلك بعدين كل شي متوفر هنا بطلع اخذ لنا عشى وارجع ماراح اتأخر..

عوق بترجي\لا زياد تكفى لا تتركني با الحالي..,

زياد\خلاص بشوف بنات نجلاء هم الي عندهم ارقام المطاعم بكلم مطعم يوصل..,

عوق\ايواكذا افضل..,

طلعنا من غرفة النوم الي شكلها يجيب الكآبه ودخلت غرفة الاشباح وزياد ما ادري وين اختفى..,

الغرفه على ما تركتها قبل اكثر من ست شهوركل شي في مكانه شكلها مهجور ولا احد دخلها بعدي..,

فجاءه دخل ومعاه كاس عصير..

زياد\ياحي الله ام العنود في بيتها..

عوق\الله يحييك الغرفه هذي مثل ماتركتها..

زياد\ خواتي ما يقصرون يرسلون الخدامات مع وحده من البنات لكن تعرفين ماحك جلد مثل ظفرك..

عوق\لا والله جزاهم الله الف خير بعد بيتنا شكله كذا نعمه يعني من متى تركت البيت..

آواخر الصيف الحين مابقى شي على الشتا ويطلع..,

زيادبحب\الحمدلله يوم رجع للبيت نوره كان مظلم عقبك..

عوق با ارتباك\ماني مرتاحه هنا ابغى انزل تحت..

زيادبضحك\ ياخوافة وش الي ينزلك كثرة الطلوع والنزول لك ماهي كويسه..,

زياد كلم اثير بنت نجلاء واخذ ارقام مطاعم كلمهم وطلب عشا..

عوق\زياد لا تكثر ما اقدر اكل كثير ما انام من معدتي..

زياد\ماعليه الي ماتاكلينه انا با اكله اليوم شهيتي مفتوحه على الاخر ما ني مصدق انك قدامي..

كلمي خالتي لا تقلق عليك وقولي انك معي ...!!

عوق\امي ما معهاجوال اصلن رافضه الفكره من الاساس بكلم على جوال ريم واطلبها..,

كلمت ريم

عوق\هلاريم امي عندتس ..

ريم\ايه هذا هي قدامي لكن انتي وينك احرقت جوالك ماتردين..

عوق\قريبه بس انشغلت..

ريم بصوت منخفض\انشغلتي لنا الله من لقى احبابه نسى اصحابه يا عويق..

خالتي تقول وش تبن فيها نايمه في احد ينام هاالحين والله ياعذرالعجايز مكشوف لا وقبلها قالت الحين تلحقني ..,

عوق بضحك\ فديتها بكلمها..

ريم بتهكم\ يا النايمه لا اشوفك في بيت خالتي الا والنونو معتس ترى اقلقتي امنا..,

عوق بضحك\حاضر عمتي ريم ..!

ام عوق\هلا ومسهلا..,

عوق \يمه انا طلعت مع زياد لبيتي..

ام عوق \خيرآعلى خيرواطيب راي ولا تجين ان بغيتيني انا اجيتس انا اخف منتس..,

عوق\يمه في خاطرتس شي علي..!؟

ام عوق\لا والله وانه احسن علم سمعته رجعتس لبيتس..,

وبكرا ان شاء الله من اصبح بروح ادفع كفارات اليمين..,

يميني على زياد يوم حلفي في ساعة غضب وحلفتس انتي على الطلاق..,

.
.
.

كلمه اخيره

إذا أقسمت على شيء ثم رأين ان غيره خير منه فتكفر عن يمينك وتأتي الذي هو خير ، والكفارة مذكورة في قوله تعالى :

لاَ يُؤَاخِذُكُمُ اللّهُ بِاللَّغْوِ فِي أَيْمَانِكُمْ وَلَـكِن يُؤَاخِذُكُم بِمَا عَقَّدتُّمُ الأَيْمَانَ فَكَفَّارَتُهُ إِطْعَامُ عَشَرَةِ مَسَاكِينَ مِنْ أَوْسَطِ مَا تُطْعِمُونَ أَهْلِيكُمْ أَوْ كِسْوَتُهُمْ

أَوْ تَحْرِيرُ رَقَبَةٍ فَمَن لَّمْ يَجِدْ فَصِيَامُ ثَلاَثَةِ أَيَّامٍ ذَلِكَ كَفَّارَةُ أَيْمَانِكُمْ إِذَا حَلَفْتُمْ وَاحْفَظُواْ أَيْمَانَكُمْ كَذَلِكَ يُبَيِّنُ اللّهُ لَكُمْ آيَاتِهِ لَعَلَّكُمْ تَشْكُرُونَ (89)
.
.
.

الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه

السلام عليــكم
يــارب لا يخيب من دعـاك الله استجب دعوانا و أرنـا عجـائب قدرتك
في بشار و أعوانه و رحم المسلمين و افرج كربتهم يـا عزيييز يــا رحيم

طيوووف تسلم انــاملك على الإبداع المتواصل
و حبكة السوالف أنـا عن نفسي لما آقراها احس اني في جلسة عـائلية و نتبادل سوالف و ماشاء الله كلها فوائد و تعلمت منها كثيير الله لا يحرمك الأجر كل حرف كتبتييه لنه كله في سبييل التوعية هذا الجيل

الحمد الله و آخيييرا عووق طـاح لي في راسها و رجعة لزيــاد الله يجمع شملهم و يقومها هي و جنينها بالسلامة

الوضيح أم عووق أي امرأة هي فعلا حكييمة ولها بعد نظر و رأي صـائب نفتقده في زمننا الحالي كثيرا <<تدري أم الولييد والله كل لما تنزل سـالفة على قد ماني متحمسة أقراه على ما أكوون حـاطة يدي ع قلبي خايفة يكون آخر بارت نسمع فيه درر أم عووق

أم الولييد دمت متألقة
أنــار الله لكي طريقك
عــارفة انــي مقصرة كثيير في حقك بــس اختك في الله التعبيير عندي 000 ههههههههههه
خصووصــا لما يكوون ابداع و تألــق آكبــر بكثييير من انك توفيه حقه
آخر قولي رحم الله يدا ربتكــي والله يحفظ لك كل من يعز عليك

لبوونة نفسها لي هنــاك خخخخ