بس بتوقع من شافت يمكن ام ابراهيم هي الي معها المفتاح

وجات تتطمئن علي عوق

ام اليزيد الله يشفي ولدك ويلبسه لباس العافية

السلام عليكم ورحمة الله وبركاته ...


صبـــــــــــــاح التميز والـــرقي ...

ألــــــف مبروووك على التميـــــــز يا مميزة ...,,

أم الوليــــد أعلم بأني مقـــصرة بحقك وحق رائعتك ..
فــ عـــــذراً بحجم الكون غاليتي ...

وشـــــــكراً على إهدائي البارت ..
كنت بادخل اول وحدة وأقول لا أحد يرد البارت لي لحالي كيفي فيه ^_^
بس خفت تعلقيني على باب المنتدى يا عسوولة ة_ة


أنا مع عوووق بكل تصرف تتخذهـ فيه صد وجفاء لزياد..
وهذا ما يعني إني كنت معها بأكثر القرارات اللي أتخذتها..
بس في هذا القرار انا معها ..

لان زياد يستحق منها التنكر..
فهو بلحظات فقدانه لإنسانة غالية عليه ..
جـــرح إنسانة بريئة ..
وما اكتفى بجرحها وبس..
إلا تمادى وطردها واتهمها إنها السبب في وفاة أمه..
وإنها مشئووومة ودخولها حياته سبب له مشاكل..


زواج الجوهرة هل بيعدي على خير ولا اهلها بيخربونه عليها
باستهبالهم وافكارهم الحقودة ..؟؟


عوق دخلت المطبخ واتوقع انها لقت زياد بوجهها
لانه بعد ماخلص من العشاء فتحت الشغاله الباب حتى تاخذ
الاغراض من الملحق وهو دخل بعدها وبقي داخل


وخاطر ثاني يقولي إنها لقت ولد جيرانهم اللي ما يستحي ..


أم الوليـــــد فيه شيء اول مرة اعرفه من كلام عوق لجوهرة والبنات..
ومعلوومة مهمة ومفيـــدة رغم إني أنصدمت فيها مشكوورة عليها يا عسووولة ..
ما بأقووول وش تكووون عشان لا احد يضحك علي ويقوول توها تعرف ^_^

كونــــــــــي بخيــــر ..


صدووود’’’

اتوقع الوضيحي رجعت من البر بدون لا تعلم عوق صح

بسم الله الرحمن الرحيم


اللهم يا الله عليك ببشار واعوانه

اللهم يا الله عليك ببشار واعوانه

اللهم يا الله عليك ببشار واعوانه

اللهم لاترفع لهم رايه واجعلهم لمن خلفهم عبرة وايه وفرق بين كلمتهم وفرق وبينه وبين جنوده

اللهم اجعل تدبيرهم تدميرهم و اجعل الدائرة عليهم

اللهم اجعل بأسهم بينهم و اقذف بينهم العداوة و البغضاء

اللهم سلط عليهم شرارهم و دمرهم بأيديهم و ارمهم ببعضهم و اجعل نارهم تحرقهم

اللهم إنا نشكوهم إليك يا جبار عجل لأخوننا في سوريا نصرك و فتحك المبين
.
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,

او با الرسائل الي تجيني على الخاص ممتنه للجميع..,

ولد الغاليه ضمني بين الاهداب تعبان من كم يوم

اسأل الله العظيم رب العرش الكريم ان يشفيه شفاء لايغادر سقما

البارت اهداء لكل من سطر في متصفح نوح الحمام ولو بكلمه وحده من دون استثناء..,

سواء مدح اونقد اوحتى يسأل عن مواعيد البارتات دليل اهتمامه با الروايه..,

واهداء خاااص للكاتبه الغاليه الي اضاء بحضورها وتعليقها سماء نوح الحمام

الكاتبه المميزه ام وسن.
.
.

اليوم بنشوف عوق المزايين وثورتها على وضعها كالقيطه مع شخص ثاني غير زيادوكيف عرف زياد بحملها ..!

والاهم الزائر الغريب الي طلع بوجهها..,
.
.

يا الله تعالوا معاي...!!

وسالفه جديدة؛
.
.
البارت التاسع والعشرون

.
.
.

فتحت باب غرفتي وطلعت با كل شي ذبحني الجوع ..,

دخلت المطبخ الا بوجهي...!!!!!!

نط قطو لكن تفاديته بيديني

صرخت وطحت من الخوف واقوم واركض لغرفتي..,

قفلت الباب وقعدت اصيح من الروعه..,

بغى يوقف قلبي من الخوف ولا حولي احدلو انا ميته الخدامه ماهي فاقدتني لصبح..,

اذن المؤذن وصليت وجلست على سجادتي ما صحيت الا النهار طالع..؟

قمت وانا رجولي ماهي شايلتني..!؟

ما ادري من نومتي الغلط والا من الي صار الفجر..,

طلعت لقيت الخدامه ..,

عوق بغضب\في قطو داخل الفجر المطبخ ليش ما تأكدتي قبل تنامين ان الابواب كلها مقفولة..,

الخادمه\سكرت الباب كويس هو يدخل مع شباك مطبخ مفتوح فتحه صغير علشان تهويه

عوق بتعب \صلحي لي فطور وطلعيه لصاله ..,

ياربي احس وجع في بطني وظهري عسى حملي ما جاه شي ..,

ما قدرت اجلس ما ادري هو الم ولا خوف بطلع للمستوصف اشوف الدكتوره...,

ما عاد عندي صبر على الالم طلبت من الخدامه تترك الفطور وتساعدني البس ..,

قلت لها قفلي البيت وتعالي معاي ماني قادره امشي انقص ظهري..

دخلت على طول لدكتوره

الدكتوره \اهلين مدام عوق انتي طالبه كشف مستعجل..؟!

عوق\ ايوا دكتوره الفجر طحت وتعورت واحس وضعي مو تمام ..!

الدكتوره \اطلعي على السرير وان شاء الله خير حاسه بنزيف اواي حاجه..!

عوق\احس شي بسيط لكن ذبحني الم ظهري واسفل بطني الم وثقل..؟!

عملت لي الدكتوره سونار

الدكتوره\الوضع مش مطمئن خصوص ان في دم مهماكان بسيط عاوزه تحويل للمستشفى العام..!

او عاوزه اديك ابر مسبته وتلتزمي باالراحه التامه وتنامي على ظهرك

ماتتحركيش كتير ونشوف يحصل معانا ايه..!

عوق بتعب\خلاص دكتوره انفذ الي تطلبينه والجنين كيف وضعه ..,

الدكتوره بتحذير\اطمني ان شاء الله بخير لكن خودي بالك..!

لو ما وئفش النزيف بعد الابر والا زاد معاكي على طول تطلعي للمستشفى العام ما تجيش على هنا..!

هناك الامكانيات اكبر..,

عمومآالابر مفعولها سريع وان شاء الله يوئف النزيف..!

طلعت من عند الدكتوره واخذت الابر حسيتها مثل النار بجسمي..!

بكيت والخدامه تطبطب على ظهري وتمسح دموعي..,

رجعت للبيت وطلبت من الخدامه تساعدني اوصل لغرفتي..؟

جلست على سريري وبكيت وحدتي ويتمي بين ها الجدران محد درى عني..؟!

عماتي وخالاتي كثرهم يغطون عين الشمس ..!

وانا هنا ماني لاقيه الي يمسح دمعتي غير خادمه من اخر الدنيا جابتها لي الحاجه ..!

ذنبي من برقبته وتقول امي سامحيهم ليش اسامح الله لايسامحهم كلهم من كبيرهم لصغيرهم ..!

الي مافكروا وش حالي غلطه وتصلحت بنظرهم يوم رموني وتخلصوا مني ..!؟

تمددت على سريري جوع وقهر والم وخوف ..؟!

صحيت الظهر دايخ راسي واحس الدنيا تدور فيني ..!

تجهزت لصلاه وصليت وانا جالسه ناديت الخدامه..,

عوق با ارهاق\حضري لي شي اكله ماعاد اشوف من الجوع ..!

اكلت وشربت عصير حسيت نفسي افضل من الصباح..,

ما طرى في بالي الا ريم هذا وقتها

ارسلت على جوالها ريم ابغاك ضروري با اسرع وقت انا في بيت امي ..!

قفلت جوالي ما ابي ريم تستفسر ليش عن طريق الجوال..,

ولا ابي زياد يدق ويلقى جوالي مفتوح خله يظن اني نايمه..!

ساعه وجرس الباب يدق سمعت صوت ريم تسأل الخدامه عني ..,

وعلى طول دخلت غرفتي..

ريم بخوف\وش فيك عوق عسى ماشر ..؟!

ما قدرت اتكلم رديت عليها بكى ودموع

وهي تبكي معي ولا تدري وش السالفه ..؟

ريم ببكى \علميني فيتس شي خالتي وضحى فيها شي لتس ساعه تصيحين

فهميني وش فيتس يا بنت الحلال قطعتي قلبي ردي علي ..,

عوق ببكى مرير \انا هذي مصيبيتي وسبب بلايا لواني بنت حلال ماهذا حالي..؟

لكني بنت حرام ياريم بنت حرااااام..,

ريم من بين دموعها\لا يا عوق لا تقولين كذا والله العظيم محد مثل اخلاقتس وتربيتس..,

وكل ام عندها بنات تتمنى انهم با اخلاقتس وعقلتس وسترتس..

عوق تبكي وبملامه وقهر\وش نفعني فيه هذا انا بالحالي ادفع ثمن شي مالي يدآ فيه ..,

ليش وش ذنبي هو انا اخترت اكون بنت حرام الله لايسامح الي جنو علي ..,

ريم بوجع\الكلام ما ينفع بس تجديد جروح..

يا عوق كل ما ضايقتس شي قعدتي تلومين بنفستس والا انعزلتي عن الناس ..,

واخرتها سوءالتفاهم الي بينتس وبين رجلتس ما تبين احد يتدخل فيه..,

كلنا حاولنا نصلح بينكم لكن امي ارفضت..,

تقول لا خلو عوق على كيفها لين تشبع من رايها..

عوق تبكي بوجع\انا لو كان لي اهل كان من جيتهم وقفوا زياد عند حده..,

ولا انتظرو وش بسوي لكن مقطوعه مالي والي والا احد يدافع عني زياد داسني دوس ..,

وما شفت من يبرد قلبي فيه ويرجع كرامتي..,

ريم بملامه\يا مهبوله الرجال شاريتس وهو تعبان اكثر منتس ..,

لا يغرتس انه دكتور وشهاده والله انه ضعيف وعلى وجهه..!

عوق تمسح دموعهابقهر \ليه وش متعبه من الي وقف على راسه واجبره يطردني بليل ليته حتى نهار..؟!

ريم بقلةحيله\ياربي انتي ماتعرفين شي اسمه تسامح غفران زله..!

زوجتس غلط غلطه كبيره عارفين وهو مابقى احد مالامه كل الي عرفوا الي بينكم..؟!

اتوقع يمشي ويتلفت خايف حتى من الي مايعرفهم يلومونه بلي سواه فيتس..!

ابوي لليوم مايسلم عليه علشانتس ..!

سافر ورجع وابوي ما قاله تفضل على فنجال قهوه..؟

الي كل ماسافر قبل يعرس عليتس لو يومين ذبيحته جاهزه يقول ما ارضى عليه لين ترضى عوق..!

وامي كلمته ولا خلت ولا بقت عليه ياجاه شي الضعيف والله لو ما يبيتس كان طلق وارتاح من كثر مالاموه اهلي..

خالتي وضحى يقول ابوي هدت عليه بغت تضربه بعصاها وطردته قالت له مالك حرمه عندي..؟!

وتقولين محد دافع عنتس ..؟

وش تبين اكثر من ها الاهانه ان حرمه تهد على رجال وتحاول تضربه..!

لو ما كان ابوي عندهم ساعتها كان صارت علوم..!

عوق بدهشه\ متى هالسوالف ليه هوماكان يبي يسافر ماهو فاضي لي..!

ريم بملامه\انتي والله مثل الي رابط عيونه ولايشوف الناس ويحسب الناس مثله ما تشوفه..؟!

اردفت ريم \ الرجال سافر ومارجع الا قبل كم يوم..,

عوق \نمر قالي انه يبي يسافرلأمريكا شهرين..,

ريم بتذمر \نمر بزرآ ماعنده سالفه خم العلم من غير تفكير وانتي تصدقين كل شي تسمعينه..

جزاع ماخذ العلم من زياد وعلمني يقول المفروض انه يقعد شهرين وجا قبلها

زياد سافر بعد ماخلى ولا بقى احد

يدور الي يتوسط له عندتس وعند خالتي..؟!

عوق بحيره \غريبه سفرته عمري ما سمعته قال انه بيسافر..

ريم\يقول جزاع له اوراق متعلقه بشغله هناك اجلها على حياة امه و سافر خلصها بسرعه..,

رجع قبل تمشي امتس للبر بيوم ما ادري يومين..

الله يعينه مرض امه الله يرحمها اثر مره عليه الضعيف

حتى جزاع قال لي سالفة بس تكفين عوق بخبرتس وخليها بينا

والله ما قلتها لتس الا علشان تعرفين زيادوش كثرى عانى من وفاة امه..,

عوق بخوف\خوفتيني ريم وش صاير..,

ريم بتردد\عوق ترى جزاع اخذ زياد لشيخ الرجال بغى ينجن بعد ما ماتت امه اعوذبالله..,

بس تكفين عوق اذا تصالحتوا لاتطرين له شي..

ترى كثير ناس تراجع الشيوخ والاخصائيين النفسيين عادي ..,

عوق بسخريه\ليه يعني مافكر فيني ورجع له عقله الا بعد ماقروا عليه..,

ريم بتذمر \ ياربي عاد هذي الي بتفضحني ليتني ما علمتس

جزاع يقول زياد من طلعت حرمته من البيت طقته الحسايف

لكن ما قدر يلحقها كان خايف انكن تطلبن الطلاق ..,

اردفت ريم\وبعدين المشايخ قرو عليه الضعيف يشكي لجزاع يقول من توفت امي ما انام ..

وان كان قصدتس قراية الشيخ والله ان الي يراجعون الرقاه والمشايخه كثر الي يراجعون المستشفيات اذا ماهو اكثر..,

تعالي لبيتي وشوفي بيت المهندس جزاع..,

عندي دولاب كامل زيوت وعزايم ومويه مقري فيهاونوزع منها بعدكان تبين ..,

اردفت ريم بتهكم \لأن عندي شك انتس مطسوسه عين ماخبرتس عنيده وش جاتس اعوذبالله

عوق تتنهد بوجع \ انا بحيره يا ريم وش اسوي..؟!

ريم \ارجعي لزوجتس ولمي شملتس الي متى وانتي هذا حالتس..,

عوق با انكسار \ تحسبين انه ما ودي ارجع لكن ما ابي يظن اني راميه نفسي عليه..؟!

انا مالي ظهر يوقف زياد عند حده ان استسلمت ها المره بيركب راسي..!

وكل ما تضايق من شي صب غضبه على راسي عارف اني بسكت ..!؟

يغبني ويقهرني ولا يحسب لي حساب ..!؟

ريم \انامعتس بكلامتس لكن الحرمه ماهي مثل الرجال ولا تحط راسها براسه..!

ماتخلي احد يدوس على كرامتها ولاتسوي من الحبه قبه مثل ما سويتي ..!

عوق بقهر\انا سويت من الحبه قبه والا هو يتحداني ويحتقرني..

ريم \هذا الغضب وما يسوي لو كلن مسك اعصابه ماكان شفتي بيت انهدم..,

اردفت ريم تمسح دموعها بضحك وتسلم على عوق\الله يهديتس نسيتيني حتى السلام

وبعدين وش فيتس شكلتس متغير وتعبانه ما انتي عوق الاوله..؟!

عوق \الفجر طلعت للمطبخ نط علي قطوا غير دفعته بيديني بغى يطير قلبي وطحت من الخوف ..!

ريم بذعر\ بسم الله عليتس عسى حملتس ماجاه شي ..!

عوق با ارتباك\وش حمله..,

ريم بضحك\ ما قلت لتس انتس رابطه عيونتس وتحسبين الناس ما تشوفتس ..!

كلنا دارين انتس حامل يا ذكيه..؟!

عوق با استغراب\كلكم من قاله..؟!

ريم \زياد يمشي ويبشر بحملتس من زمان والرجال مسمي نفسه ابو العنود..

مايرد حتى على الي يقوله زياد لازم ابوالعنود ..!

عوق بدهشه\الحين زياد داري اني حامل

ريم بسخريه\اقولتس يبشر بحملتس تقولين داري ..؟!

اكيد داري ويمكن قبل تدرين بعد يعني دكتور نساءولاده

والحريم من شرق وغرب يحجزون عنده مواعيد ولا هو عارف ان زوجته حامل ..!

انا لو كنت ادري قبله كان طالبت بسحب شهادته..,

عوق بدهشه \ انا ماعلمت احد ولا في احد يدري الا شيخه وخوله..,

ريم بضحك \اقولتس درينا من زياااااد ولا تظلمين شيخه وخوله وش فيتس انتي..

المهم وش سويتي بعد ما طحتي..,

عوق تتنهد بوجع \طلعت للمستوصف واخذت ابر مثبته وقالت الدكتوره لاتتحركين..,

ريم \نفذي كلام الدكتوره وارتاحي خلي ها الحمل يتم ..,

ياعوق عيشي مع الناس وجيب لتس ظنا يونستس شفتي كيف نطت قطو وش سوت فيتس ..,

يمكن انها خيره علشان تفكرين بوضعتس وترجعين لبيتس خلاص يكفي وانتي عايشه وحيده..

الله يرحم حال ضعفنا الوحده تذبح الرياجيل وشلون الحريم الضعيفات..؟

قعدت انا وريم من بعد الظهر الي اذان المغرب ..,

ريم بضحك \ يا انا مشتاقه لتس ولأيامنا الخوالي والحوش النخل والمراجيح

ويوم نلعب حريم وانتي ونوف الي تبن تكبرن بسرعه ويجيلكن بزارين

تذكرين يوم اقولتس عن روحتنا مع خوالي

يا انا اكلت طق من امي عقب مارجعت من عندكم

ما فكني الا ابوي منها مسكتني وبا الخيزرانه ومنين الي يوجعتس ..,

وكملها ابوي جا يهاوش امي يقول وش بلاتس على رويم ذبحتيها

قالت له بنتك قهرت عوق على ها المغرب وبكتها ماشفت الا الي سحب اذني بغى يقطعها

ليتني قعدت على خيزرانة امي ولا اذني الي بغت تنقطع ..,

انتي تصيحن في بيتكم وانا اصيح في بيتنا

وليومتس كل ما طلعنا لمنتزه والاحديقه اضحك با الحالي كل ماتذكرت الي صار

يا زينها من ذكريات ياليت دولاب الزمن يرجع..,

عوق تبتسم بمراره\لو يرجع كان تغير شي واجد..,

ريم بممازجه \اقول ترانا من اليوم مبسوطات فكينا من تشاؤمتس

وشيلي عنتس ها النظاره السودا الي تناظرين الدنيا فيها..,

اردفت ريم \وش بلا ماتصيرين مثل نوف ما شاء الله عليها

تذكرين الضعيفه يوم اقولتس قطعت قلبي متحطمه ومتشائمه

كم مره تجيني تصيح تقول تهقين ياريم بعرس..,

كلكن كبري وعيلتن وخواتي الي اصغر مني اعرسن وانا لازقه بحلق اهلي..,

واقولها ماعليتس بيجيتس نصيبتس توتس صغيره..,

ويوم اولد فراس زارتني حرمة عمي ام متعب تقهويني ودخلت نوف شايله انفال نايمه

تخيلي وبوجه نوف قالت الحمدلله ان انفال مثلتس ياريم

اشوا الي ماجت لعمتهانوف والله ان تنشب بحلوقكم سويده ودبه

وتنزل نوف انفال وتختفي

حمدت ربي ان خالتي نفلا ماهي فيه والا كان مسكن شوش بعض

مافيه الا امي وتعرفينها بالها طويل ولا تداني الكلام الي يجرح

قالت لحرمةعمي نوف حظيظ الي ياخذها ليت عيالي كبرها

و ما ادري لو يجي يوم تدورينها لواحد من عيالتس

ردت مرت عمي بتكبر وما لقيتي الا انا اخطب بنتاخيتس الشينه

امي سفهتها وانغثت من كلامها ونزلت تحت عند خالي ..,

وانا ما صدقت حرمة عمي تروح وانادي نوف

بكت الضعيفه عندي تقول من بياخذني اكيد كل الناس هذي فكرتهم

قلت يا بنت الحلال الرزق بيد الله ماهو بيد حرمة عمي قوي صلتس بربتس

وبيرزقتس من حيث لا تحتسبين..,

افااا عليتس يا نوف تخافين ولتس رب اسمه الكريم ..,

وسبحان الله يا عوق ما جا سنه على كلام عمتي ام متعب الا وهي جايه تخطب نوف لولدها متعب

ولو شفتي متعب يوم العرس مستانس تقول نوف يويلي ياريم احس اني بحلم

وهذا هي ماشاء الله تبدل حالها وامس تبشرني بحملها

ومتعب ولد عمي الي يتشرط يبي لبنانيه هذا هو بالع العافيه ومستانس

متعب ممرض بمستشفى وشايف لين قايل بس

وهي ماهنا زود حلى تخبرينها لكن تبي تعيش ومسيره حياتها صح

تدور كل شي يسعدها ويسعد رجلها وتسويه

تقول والله متعب ما يداني يشوفني زعلانه

صبرت وشكرت وربي عوضها..,

وانتي يادافع البلا كل ها الزين والذكاء ولا انتي قادره تعيشين سعيده

تدورين الهم والغبن دواره ..,

عوق بوجع \الله يوفقها تستاهل كل خير..,

ريم \وانتي بعد تستاهلين كل خير انفضي عنتس الهبال وعيشي يومتس كم بنعيش الف سنة

هقوتي لو نعيشهن بعد انتي ياعوق بتقضينهن زعل وتنكيد على نفستس

اردفت ريم وهي تناظر بساعتها\من متى وانا مقابلتس وتاركه بيتي وعيالي ماغير حذفتهم على امي

خواتي يذاكرن محد فاضي لي..؟

عوق\عيالتس هنا غريبه خالتي ما دقت تدورتس...؟

ريم\لا امي داريه اني عندتس وحتى تقول ليني راسها خليها ترجع لبيتها...,

عوق بضيقه\البلا الحين ماهو فيني افرضي رضيت امي تقول لااشوفه..,

ريم بمشاكسه\دام فيها افرضي اجل طاح الحطب وخالتي ان شاء الله بيهداها الله ...؟

عوق بقلة حيله \والله ما ادري خايفه انها ماترضى..؟

ريم بضحك\يا قرادة حظك يازياداستفردن بك الحريم منين بتلقاها

هي من عوق والا من امها..؟

عوق تبتسم \بتفرج ان شاء الله اقعدي تعشي معي ..,

ريم\لا تكفين بروح لبيت اهلي اشوف احد يوصلني لبيتي جزاع محذرني ما اطلع لين يرجع..

عوق با استغراب \ ليه هو وينه..!؟

ريم\سافر عنده مشروع خاص بشغله خبرتس المهندسين وشغلهم ما ينعرف له كم يوم ويرجع ان شاءالله ..,

عوق \ريم كل ماجيت اسألك انسى صدق جزاع كان يدرس طب..,

ريم بضحك\لايكون زياد قالتس...

عوق تبتسم\ اكيدمن غيره مره نسولف وجاب طاري ها السالفه ..,

ريم با اشمئزاز\لا عادت من دراسه تروع الرجال يقول بمادة التشريح

يوم طلع سنه ثانيه طلعوا لهم جثه يشرحونها..؟!

بغى يموت طاح عليهم وانصرع و اخذ شهور وهو من شيخ لشيخ واستشاريين نفسيين ..,

ماتشوفينه طار بزياد من يوم شافه تعبان لشيوخ خاف عليه يجيه ماجاه

قعد اللهم يا كافي فتره كل ما يتذكر الجثه الي طلعوها لهم يستفرغ ويتعب...

راحت عليه سنه ونص من دراسته

يوم رجع يدرس حول هندسه ..,

اردفت ريم بتعجب واستنكار\مشكله يا عوق الي ما يعرف امكانياته حتى لوشاطر

لكن في فروق فرديه ربي ميز فيها ناس عن ناس..!

خالتي لو على كيفها كان عيالها كلهم دكاتره..؟!

نواف نفذ رغبتها ومشى وضعه لو انه تلكك شوي لكن قدر يواصل ويتخرج...

جزاع اشطر منه بواجد لكن ماقدر يكمل..

خالتي مسكينة ماتبي لهم الا الزين لكن وش عرفها هذا سهل وهذا صعب

اهم شي المظاهر والناس يقولون عيال نفلا دكاتره..

اردفت ريم\يا الله عاد انا بمشي ترى والله طولت عندتس..,

عوق بترجي \لا تقطعيني ..,

ريم بمزح\ ماني قاطعتس الله يقطع ابليس بكرا اذا جالتس بزران عرفتي كيف القطاعه

عوق بترجي\ريم تكفين ما ابي احد يعرف بلي صار لي اليوم

ريم بدهشه \ مع اني ماني عارفه وش هدفتس لكن ابشري

ودعت ريم وصليت المغرب وحسيت نفسي دايخه ابي اناااام..؟

صحيت على مثل الطيف جالس جنبي ما ادري حلم ولا علم ..؟!!

صحصحت ابي اتاكد من الي قدامي كان زياد..؟

جالس على كرسي هزاز بغرفتي شريته ايام دراستي با الجامعه..

كل ما شافته امي قعدت تضحك تقول الي يقعد على ها الكرسي كنه راكب هودج على بعير..,

زياد جالس ورافع راسه ما ادري نايم والا سارح بسقف الغرفه..,

غريبه جيته...؟!!

حس فيني يوم حاولت انزل من السرير..,

زياد با ابتسامه باهته \صح النوم..,

عوق \صح بدنك كم الساعه الحين..

زياد يناظر ساعته\ عشره ونص..,

عوق \ياربي ما صليت العشا..,

زياد\قومي الحقي الوقت تبيني اساعدك تقومين..,

عوق بتوجس \لا اقدر عادي الحمدلله ما فيني شي..

دخلت الحمام سمعت حركه با الغرفه..؟

طلعت ما شفت زياد صليت عادي احس نفسي احسن بكثير من الصباح ..,

حتى النزيف البسيط انقطع الحمدلله..,

طلعت من غرفتي ناديت الخدامه

عوق\سورينا من متى بابازياد موجود

الخادمه \من زمان ممكن بعد صلاة عشاء ..,

هو يجي انا كلام انتي في نوم هو يقول ما في مشكله..

عوق\شوفي الادويه حقتي بغرفتي جيبيها..,

الخادمه\انتي مافي عشالازم اكل بعدين عيلاج..,

عوق\والله يا سورينا اليوم انتي اهلي خلاص صلحي اي عشا خفيف..

تعشيت واخذت الادويه..

ودخلت غرفتي برتاح ولو انه ما فيني نوم ..

سمعت صوت جرس الباب ناظرت الساعه كانت على 11ونص الليل

مين بيجي ها الحين الخادمه طلعت للملحق طلعت بشوف مين ..؟

عوق بخوف\مين عند الباب ..!؟

زياد\افتحي بسرعه..

فتحت الباب ودخل

زياد بدهشه\ليش قافله جوالك والخدامه وينها..؟

عوق با استغراب\خلصت شغلها وطلعت للملحق وجوالي مدري وينه وش المشكله..!

زياد بقهر \المشكله خلينا ندخل ما ينفع الكلام على الباب

دخل زياد وانا وراه داخل البيت وجلس في الصاله

عوق\تشرب شي ..!

زياد بحده\ما ابي شي تعالي ارتاحي مانيب جاي اخر الليل ادور اكل وشرب..!

يارب استر هذا وش بلاه لايكون درى وش صار..!

اجل وش جابه اول الليل لغرفتي الا ان فيه بلا..!

معقوله ريم قالت شي وانا حلفتها ما تخبر احد..!

زياد بتهكم\وين رحتي انتي ما تتركين طبع ها السرحان الي فيك ..!؟

عوق بتوتر\لا معك بغيت شي..,

زياد با انفعال \ليش ماخبرتيني بلي حصل لك..!

عوق با ارتباك\وش حصل لي...!

زياد بتهكم وملامه\وبعد تسألين وش حصل لك انا شفت عدم مبالاه لكن مثلك ما شفت ..!

اردف زياد \اسأل عن طيحتك..,

عوق بتوتر\يعني وش الي حصل طيحه بسيطه والحين انا طيبه..

زياد بحده وملامه\كيف طيحه بسيطه وانتي طيحتك سببت لك نزول با المشيمه وش تنتظرين لين يصير شي اكبرمن كذا..؟!

عوق\الدكتوره ما قالت شي..

زياد بتهكم\ماهو كل شي لازم ينقال للمريض ..,

عوق باارتباك \وبعدين انت وش دراك مافي احد يدري اني طحت الا ريم..

زياد\ لايجي في بالك اني عرفت عن طريق اهل جزاع الي عرفت منه هو الي خبرني بحملك..,

عوق بتعجب\مين الي خبرك..!

زياد\ماهو مهم من خبرني لكن انتي يبي لك رعايه خاصه..!

اذاانتي ماتبين نفسك وطفلك انا مافي يدي شي لك

اي كلام بقوله راح تفسرينه على كيفك..؟!

انا رجال شاريك وابيك ويهمني اني ما افقدك ولاافقدالطفل..,

وحريص على صحتكم وسلامتكم لكن ماراح اكون احرص منك على نفسك واظنك فاهمه كلامي..؟
عوق انتي لو بتهملين نفسك ما تتخيلين المضاعفات الي بتصيرلك..,

اقل شي واهون شي ولاده قيصريه حرصآعلى حياتك وحياة الطفل..
كثير امهات فقدوا حياتهم بسبب المشيمه واطفال اكثر توفو ..,

وانا ما اتمنى لك ولا لطفلنا ها المصير..

عوق\اكيد اني حريصه عليه وكل شي بيدي سويته واذا ربي ماهو كاتبه لي ماراح ينفعني حرصي..,

زياد بتهكم\واضح حرصك من الهالات السوداء الي حول عيونك..,

عوق بتوتر \هذي من الارهاق والسهر

زياد\ماهو بس ارهاق وسهر انتي عندك نقص حديد و يبي لك رعايه اكبر مماتتخيلين خليني ادخلك للمستشفى .. هناك بتكونين تحت رعايتي والقرارلك ماراح اجبرك على شي..,

عوق\مومشكله الامتحانات السبت وبعد عشر ايام ادخل المستشفى

زياد بنفاذصبر\انتي كيف تستوعبين الكلام بتنتظرين عشر ايام ..!!

في البيت وراحه ما ينفع كيف راح يكون وضعك وانتي دوام وجلوس فتره لتصحيح..

القرار بيدك اولآ واخيرآ.. !

هاه وش رايك اشوف المستشفى احجزلك غرفه والا كيف ..!؟

عوق\زياد امي ماتدري اخاف تزعل اذا درت اني طلعت من البيت معاك..,

زياد بسخريه\يعني من طالعه معاه بالله...!

والا وين طالعين للمستشفى..؟

اردف بقلة حيله\اعوذبالله من الشيطان لحظة شيطان حضرة بينا ابعدتنا عن بعض

والله يهديك كبرتي الموضوع ودخلتي امك..,

عوق بقهروملامه\الحين اللوم علي انا طلعت من بيتك قدام عيونك ماهو من وراك

ولا كلفت على نفسك تلحقني وفتره وانا جالسه هنا مافي احد عارف ليش انا هنا..!

من سألني قلت انك مسافر..!

زياد بندم\بعد ماطلعتي من البيت ارسلت نجلا تكلمك وكلمتك وانتي رفضتي تتفاهمين وقطعتي كل طريق لتفاهم

وجيتكم هناوماقصرتي فيني ..,

ورجعت مره ثانيه وامك كملت الناقص واهانتني بشكل ماتتخيلينه و طردتني على شانك..,

عوق\طيب ليش ما عطيتني خبر بسفرك تخليني على نار هنا ولا ادري وش مصيري معاك..,

ما اطلع لأحد ما ابي احد يسألني ليش رجعت لبيت امي من عقب شهرونص من زواجي..,

زياد بقلة حيله \ ما ادري مخك كيف متركب..,

انا جيتك و انتي طردتيني ما عطيتيني فرصه حتى اتكلم وما كان براسك الا الطلاق والا الخلع..؟!

با الله كيف اقولك اني بسافروانا طاح قلبي يوم قلتي برفع عليك قضية خلع..,

رجعت بعدها الصباح مع ابو ابراهيم

امك طردتني وقالت مالك حرمه عندي لين تعرف قيمتها..,

و فعلن سافرت كانت لي معاملات متعلقه تركتها وراي

ماكان عندي وقت لها تعب امي ما خلاني اقدر اسافر

وبسرعه خلصتها ترى ما تأخرت با السفر المفروض تمتد لشهرين سفرتي

لكن خلصت اموري بسرعه وبوقت قياسي وتوني راجع

وبعدين البعد كان افضل علشان تاخذين راحتك با التفكير..,

لأني لو بجلس هنا ماعندي صبر على بعادك

بقعد رايح جاي عليكم وانتو بتعاندون اكثر

فا السفر كان افضل حل من وجهة نظري و يمكن تكون وجهة نظر صحيحه ويمكن خاطئه

تفاجئت لما امك طلبت اوراقك و بطاقة الصراف والجوال وانهم كانو عندي في البيت

دقيت على جوالك كثير يمكن اقدر اتفاهم معاك ولاحصلت رد

وبعدين صار يعطيني رد خارج الخدمه كان خالص شحنه..,

عوق\امي صادقه انا كل شي تركته وراي ..,

زياد با استعطاف\قبل تقولين شي مصروفك كنت احوله لحسابك توقعت انك عارفه..!

واكررها للمره المليون انا آآآسف وغلطان ماعندي اكثر من الي قلته لك كل اعذاري حطيتها قدامك ..,

اردف زياد وهو يمسك ايدين عوق ويقبلها\يعني العنود ما تستاهل انها تخلينا نبدى من جديد..,

عوق تتنهدبضيقه\خلاص سوالي تبيه والمدرسه انا مخلصه وضعي ..,

الاسئله والنماذج عندهم ماراح يكون غيابي له تاثير كثير..,

لبست وطلعت من البيت للمستشفى و زياد كان حاجز لي غرفه خاصه بقسم الولاده

من اول ماعرف اني طحت لكن كان ينتظر اوافق ادخل المستشفى

يوم الجمعه حضروا اهل زياد كلهم..؟

بشرى ونجلاء وبناتهم

قضينا وقت حلو مع بعض في المستشفى حسيت بدفئ العايله على اني فاقده امي..

خالتي ام ابراهيم ماتركتني ماترضى اني اكل من اكل المستشفى

يوميآترسل لي طبخ بيت اما هي بنفسها تجي او ترسل الاكل مع شغالتي والسواق
امي رفض زياديخبرها ..,

كنت اكلمها با استمرار ماابيها تحس بشي ..,

اذا بغيت تعرف نعم الله عليك ادخل المستشفى يوم واحدتحس ان كل اهل الارض في ابتلاء..,

وتحمد ربك على العافيه مهما كان وضعك...,

غرفتي مافيها الا انا بما انها غرفه خاصه احس بملل

بعد اوقات الزياره زياد كان يجي ويجلس معاي كان هو مشرف على حالتي..!

على ان وضعي ماكان خطيروزياد ماكان يستدعى الا لأوضاع خاصه يشرف عليها..!

زياد يبتسم\كيف ام العنود اليوم..,

عوق بتذمر\الحمدلله تمام لكن تعبت ومليت ابي اطلع حاسه اني هنا محبوسه

زياد \ليش هنا افضل لك وبعدين الحمدلله وضعك تحسن كثير..,

خلاص تقدرين بعد اوقات الزياره تطلعين من غرفتك لكن لا ترهقين نفسك با المشي..

وعلى العموم يومين با الكثير واحتمال اكتب لك خروج ..!

عوق بتردد\زياد بسألك سؤالين ولا تتهرب

زياد بضحك \ على حسب الاسئله

عوق\كيف عرفت اني حامل ..,

زياد بضحك\لو اقولك كيف عرفت ماراح تصدقين ..؟!

عوق بدهشه\ يمكن ماراح اصدق لأن كل فكره جات براسي كيف عرفت بحملي وارجع اقول لا غلطانه..؟

زياد\الحكايه جدآبسيطه وابسط مماتتخيلين..!

الي خبرتني هيام..؟!

عوق بتعجب \من هيام !

زياد\الدكتوره هيام الي انتي تراجعين عندها..؟

عوق بدهشه \كيف وصلت لك الخبر

زياد\ بنفس اليوم الي عملتي تحليل كلمتني تبارك بحملك..,

انا طلعت من عندكم منقهر ومغبون يوم اجيك الظهر

ودق جوالي قالت لي هيام دكتور زياد اسم زوجتك عوق عبد الملك

قلت ايه وبشرتني بحملك وانك توك طالعه من عندها فاتحه ملف رعايه

ولفت انتباهها اسمي بملفك الي فتحتيه عندها

عوق با استنكار وغيره\وهي وش عرفها فيك ..!

زياد بضحك\هيام دكتورة نساء وبينا زمالة عمل..,

كثير حالات تحولهم لي انتي ناسيه اني دكتور نسا ء

وحتى اخر مره راجعتي عندها كلمتني اخر النهارتسأل عنك تقول المدام كيفها

خبرتني انك مريتيها الصباح وضعك ماهو مطمن..؟

وطيحتك اثرت عليك كثير لكن ما حبت تخوفك وتسأل كيف وضعك

عوق بدهشه \وانت عارف بحملي وانا اخرمن يعلم..,

زياد\اي عارف وقلت لأمك لماجيتها انا ومسلط انك حامل وما يجوز تطلبون الطلاق..,

و قالت اي عارفين بحملهالكن انت ما انت عارف قيمتها

توقعت الكل عنده خبر..

حتى استغربت لما جيت عندك في البيت اخر مره وقلتي انك تعبانه من الدوره لكن مشيتها لك..؟

عوق\يعني تاخذني على قد عقلي...

زياد بضحك\تقدرين تقولين كذا في اسئله ثانيه..

عوق تبتسم بمكر\انت عارف جنس الجنين لأني سألت الممرضه الصباح تقول اسألي الدكتور..,

زياد بممازحه\اي عارف لكن زي ماخبيتي علي حملك ماراح اخبرك بشي..

لكن لا تتفاجئين الجنين احتمال يتحرك ها اليومين..؟

عوق تبتسم\قصدك الجنين تحرك من يومين وبعدين انا عرفت نوع الجنين

زياد بمحبه\صحيح تحرك الحمدلله ..

حركته جدآمتأخره المفروض قبل لكن حطيت الاحتمال الابعد يا الله يا ام العريف وش نوع الجنين..؟

عوق \واذا قلت لك الصدق..,

زياد يبتسم\خلاص اذا قلتي الصدق بقولك الحقيقه..,

عوق \ما ادري حسيت من يوم تقول العنود انها بنت..

زياد\بنت ولد مومشكله اهم شي تقومين با السلامه..

عوق\لا تتهرب زياد من الجواب..

زياد يضحك\ليش اتهرب انتي ماشاء الله عليك المفروض انك على ها الاستنتجات داخله طب

زياد جات له استدعاءواستأذن وطلع..

وانا طلعت برا غرفتي اشوف العالم في احد من الموجودات متعوسه داخليآمثلي والا بس انا..؟!

من باب اذا شفت هم الناس تقولي لهمك تعالى اضمك..!!
.
.
.

(كلمه اخيره)


ليس المؤمن بالذي يؤدي فرائض العبادات صورة ويتجنب المحظورات فحسب

إنما المؤمن هو الكامل الإيمان ..

لا يختلج في قلبه اعتراض

ولا يساكن نفسه فيما يجري وسوسة

وكلما اشتد البلاء عليه زاد إيمانه .. و قوي تسليمه ..

وقد يدعو فلا يرى للإجابة أثرًا

وسره لا يتغير ..,

لأنه يعلم أنه مملوك , وله مالك يتصرف بمقتضى إرادته

فإن اختلج في قلبه اعتراض ,خرج من مقام العبودية إلى مقام المناظرة

كما جرى لــ إبليس

ابن القيم
.
.
.

الي الملتقى قريبآبأذن الله

وسالفه جديده


طيف الأحباب

ام الوليد

تذكروني واحبابي بدعوه طيبه