بسم الله الرحمن الرحيم
اللهم منزل الكتاب ومجري السحاب وهازم الأحزاب سريع الحساب اهزم بشار الاسد وجنودة
اللهم عجل بهلاكهم واجعلهم عبرة لمن يعتبر
اللهم أرنا فيهم آية تشفي صدورنا
اللهم منزل الكتاب ومجري السحاب وهازم الأحزاب سريع الحساب
اهزم بشار الاسد وجنودة وزلزلهم وانصراهل حمص وحماة واهل السنة فيها
ربنا إنهم مغلوبون فانصرهم
ربنا إنهم مغلوبون فانصرهم
ربنا إنهم مغلوبون فانصرهم
اللهم أهزمهم وزلزلهم , اللهم أقذف الرعب في قلوبهم , اللهم فرق جمعهم
اللهم شتت شملهم , اللهم خالف بين آرائهم , اللهم أجعل بأسهم بينهم
اللهم أرنا بهم عجائب قدرتك , يا قوي يا قادر
ولاحول ولاقوة الا بالله..
واستغفروا الله الواحد الأحد
.
.
هلا وغلا بكل الغوالي الي يعطرون متصفحي المتواضع سواء با لردود او الاعجاب او التقييم او الشكر..,
او با الرسائل الي تجيني على الخاص ممتنه للجميع..,
الغوالي الي يقولون طيف لا تموتين وضحى طيب انا من البدايه حطيت عندكم خبر انها بتتوفى
لأني عارفه كثير بيتعلق فيها علشان كذاماخليت موتها مفاجئه
وحتى مع الاحداث بتشوفون عوق كيف بتسير حياتها طبيعي وان وضحى بيكون وجودها ثقل على الروايه
اما حبايب قلبي الي ما يبون الروايه تخلص انا ماراح انهيها الا وانا عارضه عليكم كل الي عندي
والنهايه بأذن الله بتكون مرضيه للجميع ..’
.
.
البارت اهداء لكل من سطر في متصفح نوح الحمام ولو بكلمه وحده ..,
سواء مدح اونقد اوحتى يسأل عن مواعيد البارتات دليل اهتمامه با الروايه
او الي يتابعون من خلف الكواليس وراقت لهم نوح الحمام..,
بارت استثنائي با احداث استثنائيه اهداااء خااااص لعملاقة ليلاس ..
ممتنه للجميع بهذا التشريف من الالف الي الياء..
.
.
.
اليوم بنشوف عوق المزايين الي تهدد وقومة الدنيا على راس زياد
وش بتسوي مع مناوشات زيادلما استفرد فيها
بتصده وتهزئه والا ...!!
والا شاعات الي نسمعها من مصادر موثوقه ونرددها
هل هي حقائق فعلآ مهما كانت حبكتها والدلائل على صدقها؟؟!!!!!
يا الله تعالوا معاي...!!
وسالفه جديدة؛
.
.
.
البارت السابع والعشرون
.
.
.
دخلت بنام واحس ما فيني نوم الساعه 11الليل ..
اخذت الجوال بتسلى فيه من الطفش على قفلتي له من اخر رساله من زياد..؟
فتحته ومنبه الرسايل ما وقف رسايل كثيره..!
من ريم وخواتها ومن زيادورساله من رقم غريب ..!
ريم وخواتها تعليقات وسلامات ..!
وزياد مرسل رسايل استعطاف واعتذارت لي..!؟
والرقم الغريب الرساله فجعتني والمشكله عارف اسمي..؟!
(عوق ممكن تردين علي ابغاك ظروري عندي شي خطيربقوله لك )
ياربي ماني عارفه الرقم لمين..!
ما تعودت ارد على ارقام ما اعرفها الا اذا المرسل عرف بنفسه
ناظرت تاريخ الرساله شفته من اسبوعين..!؟
وقت ما طلعت امي للبر..!!
من مين يا ترى هالرساله لأن جوالي مايعرف رقمة الا بنات ام ابراهيم و استاذه شيخه وخوله ..!؟
والخادمه انا عطيتها اذا صار شي لأمي بغيابي تدق علي ..!
وامي اذا بغيتها اكثر مكالماتي من الثابت على جوال سعد ..,
احتمال وحده من المدرسات اخذته من خوله..!
جوالي دق كان رقم زياد كأنه ينتظر متى افتح الجوال ما رديت ..!
يكفيني الوجع والاحساس الي ضرب قلبي يوم شفتك با التلفزيون بعد تبي تسمعني صوتك
تبي تقضي علي خلنا بعاد احسن وبلاش ملامس للجروح..,
جاني تنبيه رساله فتحتها كانت من زياد:
(الليل موحش لا رفيق ولا صديق ولا ونيس
مافيه من يسعد مساك بخير ولا تسعده
حتى الرفيق اللي تنومس به وتختاره جليس
اقفى عليه الحظ من جور الليالي وابعده)
وش طرى لك يا زياد تالي ها الليل تدق وترسل كنك داري اني شفتك با البرنامج
عوق تتنهد بوجع\تدور ونيس وينك عني يوم انا عندك كل ما جيتك بمكان صديت عني كنك ماتشوفني
ما ادري وش الي خلاني ارسل له؛
(يمدحون النوم تغط ونم وراك مراجعات مايبون لهم دكتور سهران ويفحص وهوعين مسكره وعين مغمضه )
ارسل ؛
( متعود على السهرمن طلعتي من بيتك وانا نسيت وشلون النوم عايش مع طيفك )
ارسلت ؛
(اتركك من طيفي ماهو بنافعك واشبع نوم شغلك يبي له واحد مصحصح
ماهو فاتح فمه يتثاوب ويطيح في خطأ طبي ويسحبون شهادته ويضيع مستقبله)
ارسل؛
( لا ماعليك مصحصح انا ما يفتح فمي ويخليني افهي وانسى الي حولي
الا شوفتك تبهرني واذوب بسحر عيونك حتى الكلام يضيع ما جمع )
ماكذب من قال ان الرياجيل بياعين كلام تبي تضحك علي بها الكلمتين تبطي يا زيادوانا عوق
مارديت عليه هذا تمادى صدق ما ينعطى وجه..؟!
ارسل ؛
(حبي مسكره ومغمضه نفس المعنى يا مدرسة اللغه العربيه من هو الي طاح بخطأ تعبيري وبتنسحب شهادته ويضيع مستقبله)
كنت اظنه يكذب قفلت الجوال..؟
صار عندي فضول اشوف هو صادق او لا
رجعت فتحت الجوال وشفت الرسايل المرسله لقيت كلامه صحيح ضحكت على هبالي مسكره ومغمضه..!
دق الجوال الا زياد..,
ياربي ارد ما ارد
ارسلت ؛
(يا مزعج بطل ازعاج لا تصحى امي على صوت الجوال وتغسل شراعي
انت ماتمل من الدق ما افتح الجوال الا رقمك ناط بوجهي امارسالة والا اتصال )
ارسل ؛
( حبي تدرين اني على طول معلق رقمك ماعاد اشوف با القائمه الا هو
وادق عليه والا ارسل له وبعدين ماخبرك نصابه امك في البر وين بتسمع صوت الجوال)
ماشاء الله هذا عنده كل اخبارنا..!
دق زياد والح با الدق ورديت عليه بوقفه عند حده ازعجني ..,
تشوف يا زياد اذا ما خليتك تحرم تدق مره ثانيه..
عوق بغضب \خير زيادوش عندك اقلقتنا..!
زياد\........
عوق با استغراب\زياد انت معي ..!؟
زياد\.....
عوق بحده\ والله لو ماترد وتقول وش تبي سكرت..,
زيادبفرح\لا تكفين لاتسكرين انا يوم رديتي ماكنت معك حذفت الجوال
ورحت سجدت سجود شكر ماني مصدق اني سمعت صوتك..
عوق تبتسم \ طيب وش عندك داق..
زياد با استعطاف\ابي اسمع صوتك بس والله ما اطمع منك با اكثر ..
عوق\وهذا انت سمعته يا الله مع السلامه..,
زياد بترجي \لا تكفين شوي خلينا نسولف والله طفشاااااان ومتضايق ذبحتني الوحده ..,
عوق بتهكم \ليه وش مطفشك كل نهارك مشغول منين بيجي الطفش المستشفى ماخذ كل وقتك..,
زياد يتنهد بوجع\عوق الضيقه تجي من داخل الانسان ماهي من برى احيان يحس بضيقه وهو تحت ايده الف شغله..!
عوق با استهزاء\صادق لكن الضيقه الي يحس بها المشغول ماهي مثل الانسان الفاضي ..!
زياد\كلها مثل بعض..,
عوق بقهر \وين مثل بعض مرات الوحده تخلي الواحد يوسوس ينمرض وينسم حاله ولا احد درى عنه..,
صابر ومتحمل واخرت صبره يكافئ بالأهانه والطرد..,
زياد بوجع وترجي \ عوق والله اخذتي حقك مني اضعاف اضعافه
انا شوي والا انجن اطلع لبيتكم والف وادور عليه كني مضيع شي
واذا رجعت لبيتنا اسمع صوتك واتخيلك بكل زوايه في البيت
عوق انا بشر وعندي قدره معينه على التحمل فقدت امي وعقبها فقدتك
امي ماتت ماعاد لها رجعه للحياه..,
لكن انتي تكفين ارحمي حالي وارجعي لي
والله لو يصير لي شي ان ذنبي برقبتك عوق ترى بعدك عني نحرني نحر..,
عوق بسخريه\والله محد طقك على يدك انت الي جبته لنفسك..,
زياد بألم \والله عارف اني مذنب وخطاي كبير لكن غصب عني وفاة امي الله يرحمها فجعتني..!
فجاءه اختفت وحسستني بمرارة اليتم حتى يوم توفى ابوي ماتأثرت مثل كذا..!
ابوي يوم توفى الله يرحمه امي عوضتني فقدانه لكن امي مافي شي يعوضني عنها..
عوق امي كانت كل شي بحياتي تدرين على كبري هذا الا ان اي قرار اخذه احسه ناقص
اذا ما وافقت عليه حتى بمرضها كنت احب يكون لها رأي بكل شي حتى لو ماتدري وش ابي
اهم شي اشوف بعيونها نظرة الرضا لوما تكلمت انا ماكنت ابي من الدنياشي
بس اشوف راسها حي لكن قدر الله وما شاء فعل ..,
عوق انا امي على كثر ما كنت متولع فيها واحبها
ما يجي شي عند حبها لي وحنانها وعطفها علي ..,
زياد بوجع\لمادخلت للمدرسه مدرستي ما كانت بعيده من بيتنا كثير..,
ابوي ماكان يخليني امشي ياخذني على رقبته من باب بيتنا الي باب المدرسة
وهي تمشي ورانا وشايله شنطتي تناظرني لحد مايدخلني ابوي لباب المدرسه..,
والظهر ابوي بشغله هي الي توقف عند باب المدرسه حتى اطلع ..!
ما عليها من احد لا من تعليقات الماره ولا حتى الطلاب تجي للمدرسه سواء كانت تعبانه والا مريضه ماتتركني...
اطلع من باب المدرسه تشيل شنطتي بيد وانا تدخلني داخل عباتها صيف وشتاءواذا اعترضت ترفض
با الصيف تخاف علي من الشمس وبا الشتاء تخاف علي من البرد والايبللني المطر وامرض ..؟
عوق با استغراب\زياد وش في صوتك تغير..؟
زياد يتنحنح \ مافي شي..,
عوق \كل الامهات كذا..,
زيادبوجع\لا والله ماهو كلهم كذافي امهات خساره كلمة يمه فيهم..,
امي لو ترتفع درجة حرارتي شي بسيط ماتتخيلين وش يصيرفيها
تطيح وتمرض من خوفها انه يجيني شي..,
اردف زيادبحسره\تدرين عوق انها تعتبرني دايم انا الصح ولا يمكن اغلط او اكذب..,
يوم كنت صغير مافي احد يقدر يضربني او يتعدى علي حتى لو كنت غلطان..,
اذا طلعت العب بحارتنا امي تفتح باب بيتنا على كبره..,
وتراقب معاها عصا ولا تخلي احد يتعرض لي ..!
امي انتي شفتيهاكان جسمها اضخم بكثير من كذالكن اثرعليها المرض
عيال الحاره يخافون منها بدون شي..
حتى ناجي على انه ولد اختها الوحيد وانولد عنده إعاقه
الا انه ما يسلم من عقابها لو تعرض لي لو بمزح..
وخالتي موضي كانت تعلق وتضحك على امي تقول عنود ابلعي ها الولد وارتاحي ..
ماخليت لك صديق بسبته كل البزارين يتنافضون منك ..!
انا اختك ما اقول شي ولدي ولدك لكن الناس تزعل عند بزارينها..!
وامي تقول زيودي ما يغلط على احد الي يغلط عليه يزعل ولا يرضى ..
حتى يوم بغيت اسافر لأمريكا بعد الثانوي امي وقفت لي قالت زياد صغير من بيحميه هناك..؟!
ابوي بعد ما تقاعد من وظيفته صار مؤذن..؟
وصعب انه يترك المسجد الي كان يأذن فيه وياخذ اجازات طويله..,
وحاولت انها تجي معاي ما قدرنا واقنعتني اخلص الكليه هنا..,
وبعد الكليه لما رحت للبعثه جات معاي ..!
اول سنه جلستها كلها معاي تشجعني اكمل ..!
وبعدهاصارت تروح وترجع علي تجبر ناجي انه يسافر معاها يوصلها ويرجع
علشان ما احس با الوحده هناك..,
عوق انا تخصصت نساء وتوليد علشان امي والا كان با مكاني ادخل اي تخصص ثاني ماعندي مشكله ..!
قالت لي اذا تبي تبرني يازياد وترضيني ادخل ها التخصص..,
حتى كثير انتقدوني ليش نفذت رغبةامي ودخلت ها التخصص لكن انا ما همني الا اني ارضيها..,
تقول يمكن تنقذبأذن الله حياة كم طفل تفرح قلب امه ..,
والا تساعد كم ام تقطع قلبها مثل قلبي على ظناي وانا مافي يدي شي ..
عوق تبلع غصه بوجع \زياد سرقنا الليل واذن الفجر قم صل وريح كلناورانا دوامات..,
زيادبألم \والله ما حسيت با الوقت عوق خلاص ما ابي شي منك لكن اذا دقيت ردي علي تكفين..,
عوق تتنهد بضيق\يصير خير لاتفوتك الصلاه واشيل اثمك..,
قفلت من زياد وانا افكر فيه يسولف معي عادي ويوم جاب طاري امه
يبكي ويشاهق يحسب اني ما اميز نبرة صوته..,
يا حظ العنود فيك ما كذبت نجلاء والله لوولدها الي من بطنها ما حزن عليها مثلك ولا سوى سواتك..,
بقوم اصلي والله يعينا نروح مواصلين..,
وصلت للمدرسه وانا خلاص مهدوده من سهر امس ابي انام..,
الحمدلله مافي دروس تحتاج تركيز فترة مراجعه..,
دخلت غرفة المعلمات...
واليوم البنات الاكثريه غايبين ..!
والمدرسات اكثرهم موجودات ماعندهم دروس فاجئتني اميره بسؤال..؟!
اميره بقلق \عوق كلمتي زوجك علشاني..!
عوق منحرجه\لاوالله لكن سألت لك عن حركة الجنين ..!
ترى وضعك عادي علشانك بكريه انتظري 3اسابيع واذا ما تحرك الجنين راجعي..!
اميره با امتنان \ماقصرتي الله يجزاك خير..,
اردفت اميره بترجي\تكفين عوق لا تنسين قولي لدكتور زياد يقدم موعدي..!
ابي اتطمن ولك مني هديه اذا جيت اولد ادعي انك تحملين بتؤم..!
عوق بضحك\تؤم والله ان دعوتك من قلب نسأل الله الصلاح واحد والا عشر..؟!
ناهد بتهكم\وانتي يا ام الصلاح وش سويتي..!
عوق مستغربه\بأيش ..!
ناهد \ ما قلت لك شوفي نفسك يا بنت الحلال ترى شكلك ما يطمن لايكون فيك شي.!
والله انك تقهرين زوجك مقابلك 24ساعه لاهو الي كشف عليك ..!
وانتي شكلك فاهيه ما قلتي له ..؟!
اردفت ناهد بقهر\تدرين عوق قاهرني زوجك معقوله مايلاحظ ان فيك شي مو طبيعي
عوق تبتسم\زوجي كل يومه مشغول با المستشفى ما اشوفه الا اخر الليل..!
ناهد\ واذا مشغول خير ان شاء الله ماتشوفون بعض والا الكهرباء مقطوعه في بيتكم ..,
اسماء بضحك\يمكن عوق وزوجها يكرهون المستشفيات والتحاليل ودوختها..؟
ناهدتتنهد بحسره\لا والله تعب ساعه با التحاليل ولا معناه طول العمر ..؟
اميره \الله يعينك ناهد بلوتك بلوى فحص ماقبل الزواج والله انه رحمه للعالم خصوص بلي مثل وضعكم..؟
خلودبضحك\عاد الا الفحص ياهو زعل ناس واجد وتحايلوا من وراه وندموا..!
ناهد تبتسم بوجع\خلوها على الله انا معرسه من سنة السبلة
ايام زواجي ماكان فيه هالنظام المهم عوق لاتهملين نفسك..؟!
شاركونا النقاش المعلمات الموجودات ..
دلال باهتمام وتحذير\ صادقه ناهد يمكن فيك ورم والا حمل كاذب ..!
وحده مثل وضعك ما تحس بشي وبطنها يكبر لقوا اللهم يا كافي في بطنها ورم كبر الجنين..!
اسماء بملامه\جات ام التشاؤم لا عوق ان شاء الله انه حمل والا سمنه عادي كثير بدينات اشكالهم حوامل..؟!
دلال تتنهد بوجع\ حرام عليك اسماء والله انا ام التفاؤل والا تلقيني اعالج با النفسيه
اردفت دلال بممازحه\عوق انمغطي على الارض خليني افحص عليك واحدد حالتك..,
ناهد بضحك\بتلقينهاان شاء الله شحم والا يارب بيبي سليم ومنخش عن عوق وعن الاستشاري الكبير..
دلال \بنات تصدقون انه عندنا عجوزتعرف الحامل من تنفسها ولو كان حملها اقل من شهر..!؟
اسماء بدهشه\ معقولة..؟!
دلال \اقولكم انهبلت يوم طلعنا الصيفيه عند اهل زوجي...؟
اخت زوجي حلفت لو تحمل ماراح تخبرنا حتى تولد والعجوز كانت موجوده..!
قالت لحماتي ها المره راحت عليك لا تحلفين انتي حامل..,
وتقعدحماتي تحلف لهم انها غلطانه..!
اسماء بفضول \وش طلع من الي صادق العجوز والا حماتك ..؟!
دلال \اكيد العجوز وحماتي الحين حامل ولادتها قريب ..,
اسماء با استنكار \يمكن سامعه من احد..,
دلال بتهكم\وش سامعه يا بنت الحلال حماتي على طول طلعت للمستشفى وعملت تحليل ..؟!
قالو ا احتمال يكون فيه حمل واحتمال لا ماهو اكيد كانت حماتي بداية حملها..!
عوق تبتسم \وحنا عندنا عجوز ربي يحفظهابعد تعرف لكن هذيك بعد ما يعدي اكثر من شهر على الحمل..
دلال بضحك\اجل اختاري وحده من العجايز عجوزنا والا عجوزكم تفحص عليك اضبط من فحصي وفحص زوجك..؟!
كل الي با الغرفه ضحكوا على كلام دلال ..,
ناهد\عوق بسألك سؤال فيه فضول شوي..,
عوق تبتسم \اسألي يا فضوليه ..!
ناهد\البارحه انا وزوجي كنا نتابع البرنامج الي فيه زوجك وقلت له زوجة الدكتور هذا زميلتي با المدرسه ..,
قالي ايوا الدكتور زياد شخصيه معروفه وخبرني قصه غريبه شوي عن زوجك..,
اردفت ناهد بفضول\عاد اناقلت بسألك عن القصه تعرفين حريم نموت اذا سمعنا بشي ولا عرفناه..,
عوق بنفسها\ياربي سترك هذي وش عندها بعد ..,
ناهد بضحك \عوق وين وصلتي ..,
عوق با ارتباك\هاه لا معك ..
ناهد \هي صدق اولا قصة حياةزوجك ..,
عوق بتوتر \ما انتبهت عيدي الي قلتيه..,
ناهد تبتسم با احراج\لا والله ما راح اعيدها شكل ما ودك تقولينها
اسمحيلي عوق ترى والله كثير ناس يتناقلون ها السالفه..,
ما ادري عاد اشاعه والا صدق..,
اسماء بحزن\حرام عليك ناهد احرجتي عوق تكفين لاتعيدين السؤال انا أكتئبت منها ماهو عوق..,
عوق تبتسم\ما راح اشبع فضولك ها المره لأنه ليس كل ما يعرف يقال..!!
مجموعة المعلمات الي معاي كلهم طيبات ومرحات..!
الي يسمعهم يقول يا حظهم ما شالوا هم بيوم وقتهم كله وناسة وضحك ..؟!
اول ما تعينت معاهم كنت اهنيهم في قلبي ما هم شايلين هم مثل همي ..,
ومع الايام كل يوم اكتشف ان وحده فيهم وراها مآساه...!
دلال زوجها مدرس واهل زوجها ناشبين له يبونه يتزوج ارملة اخوه علشان عيالها..,
وتكره الاجازات السنويه لأن اهل زوجها ينكدون عليها وكل يوم مشاكل مع زوجهابسبب ها الموضوع..!
اسماء زوجها راعي سفر وخرابيط وعايشه برعب من خوفها انه يبلاها بمرض لكن صابره علشان اطفالها..,
وتقول مرات يتهيئ لي بيدخل علي بطفل يسحبه وراه و يقول هذا طفلي من وحده من الي تعرف عليهم با الخارج..,
اميره كانت راح تنهدم حياتها وزوجها كان معطيها فرصه بسيطه لو ما حملت..؟!
يا انه يتزوج او يطلقهابما انه هو سليم والسبب منها..!!
ناهد متزوجه ولدعمها وكم مره تحمل وتسقط لأن الاجنه تكون مشوهه والسبب وراثي لأنهم اقارب ..!؟
وحاولت تتطلق من زوجها لكن عايلتهم رافضه الانفصال بينهم
عندهم ان الطلاق عيب وبيفرق عوايلهم..؟!
ولا يعترفون بشي اسمه امراض وراثيه ...؟
وبتموت علشان تصير ام وكل ما شافت وحده حامل قعدت تنصحها من قلب ..؟
وخلود كانت متملكه وتطلقت لأنها بعد الملكه اهل خطيبها شافواخالها وكان جسمه في برص ..!
وطلقوها لأن البرص مرض وراثي ..؟!
اهل خطيبها ما سألوا كفايه قبل الخطبه واهل خلود ما خبروهم ان عايلتهم تحمل ها المرض ..,
والنتيجه ملكه وطلاق وخلود حملت لقب مطلقه بدون ذنب ..؟!
من شاف بلاوي الناس هانت عليه بلوته..؟!
الا بلوتي ما بعد لقيت الي يوازيها والا يخفف علي اني مجهولة نسب..!؟
حتى قصة زياد الي قالتها ناهد على حسب ما سمعت من زوجها عندي اهون من قصتي ..,
ما صدقت بس تجي الحصه الاخيره وارجع للبيت بصلي وانام..؟!
رجعت للبيت وانا في بالي سؤال ناهد
الي تظاهرت اني ما سمعته لأن ماكان عندي رد على سؤالها فكان السكوت ابلغ جواب
ناهد تقول ان زوجها سامع من مصادر موثوقه
ان زياد امه كانت بنت لشخصيه كبيره في البلد وكانت مريضه با القلب ..,
وسافرو فيها اهلها لأوروبا لعلاجها و كان مشرف على علاجها دكتور اوربي وحبها
حاول يتزوجها ورفضوا اهلهالأختلاف الدين والعرق وتواعدت هي والدكتور وهربت معاه وتزوجت غصب عن اهلها
وصارت قضيه كبيره واشتكوا على الدكتور وكسبوا القضيه وكانت حجتهم ان الدكتور
تلاعب بعقل بنتهم الي كانت مريضه با القلب وان الزواج خطر على حياتها
لما رجعت اكتشفوا اهلها انها حامل ولا خبرو زوجها الاجنبي ومع الولاده توفت امه لأنها مريضه با القلب
عاد اهلها كرهو الطفل وتشائموا منه ولا تقبلوه وكانو بيحطونه بملجأ ايتام
لكن بعدين اعطوه لرجال كان يشتغل عندهم سواق يربيه هو وزوجته مع عيالهم..!
ويقولون زياد كان منقهر على اهل امه ليش رموه هو وش ذنبه
وصمم يدرس طب مثل ابوه ولما صاردكتور مشهور
حاولو اهل امه انهم يتصالحون معاه ورفض وهرب لأمريكا منهم فتره طويلة وفي ناس يقولون انه بحث عن ابوه ولقاه
وكان يبي زياد يترك جنسيته السعوديه ودينه مقابل انه يعترف فيه لكن الدكتور زياد رفض
انه يبدل دينه او يغير اسمه ورجع لسعودية وبقى على اسمه الي متعارف عليه ..,
ناهد كانت تسولف بكل ثقه وانا شوي والا اصرخ بوجهاحرام عليكم وش ها الكذب
الي ها الدرجه الاشاعات خلت الناس تصور احداث خياليه لا ومصادر موثوقةبعد
يا الله يا زياد كنت بصدق الي سمعته لو ما قلت لي من راسك قصة حياتك
يا ترى انا بعد كم قصه واشاعها الفوها عن حقيقتي ..؟!!
صليت حتى الغدامالي نفس فيه انغثيت من كلام ناهد
نمت على افكاري وصحيت قبل صلاة العصر...؟!
الخدامه صحتني
الخادمة\عوق قوم تيلفون يدق يمكن مية مره..؟!
عوق بتعب \مين ..؟!
الخادمه \رجال هذا كل يوم دق وين روح عوق متى يجي عوق الحين يبي يكلم..؟!
عوق بذعر\بسرعه جيبي التيلفون يمكن من آل ناصر امي يومين ما كلمتني..!
المتصل \مساء الخير عوق..؟!
عوق \وعليكم السلام خير من انت...؟!
المتصل \كم مره ادق على جوالك ليش ما تردين..؟!
عوق بعصبيه\انت مين وش عرفك بجوالي..؟!
المتصل\ليش العصبيه خلينا ناخذونعطي مع بعض..!
عوق بحده \بتقول والا بسكرالخط..؟!
المتصل\انا اعرف كل شي عنك..؟!
عوق بقهر\والله انك ما تخاف الله ولا تستحي..,
سكرت التيلفون وشفت الرقم لقيته مكلم من جوال..؟!
طرى في بالي الرقم الغريب الي عندي شفته طلع نفسه..؟!
ناديت الخادمه
عوق \سورينا الرجال هذا من متى يدق تيلفون بيتنا ..؟!
الخادمه \من زمان ماما كبير يسافر ..؟!
هو يكلم قول انا ابغى جوال ماما كبير والا عوق..,
انا كلام ماما كبير مافي جوال ويعطي رقم انتي
عوق بقهر\الله لايعطيتس عافيه ومن عطيتي بعد رقمي..!
الخادمه بخوف\بس هذا عوق والله ما في احد ثاني..,
روحي راحت روحتس جبتيلي هم جديد فوق همومي..؟
صحيت وطار النوم من عيوني صليت العصروطلبت ستر ربي..,
رفعت ايديني ودعيت
<<اللهم كل من ارادبي او با المسلمات الغافلات سوءفاشغلةفي نفسة..,
وردكيدةفي نحرةواجعل تدبيرةفي تدميرةيامدبرني ولاأعلم لي حسبي انت ونعم الوكيل..,
اللهم اني اعوذبوجهك الكريم وكلماتك التامةمن شرماأنت أخذبناصيتة >>
على ان هدت نفسيتي شوي لكن انا بحيره وش اسوي ..!
نغمة رسايل على جوالي فتحتها من الرقم الغريب؛
(مصير الصخر يلين)
ورساله ثانيه؛
(خلينا نفلها مافي احد يدري زوجك مشغول والعجوز مسافره)
الي يرسل عارف من انا وشكله حولنا والا وش عرفه بسفر امي..؟
ياربي استرني..,
ما طلعت علي سوالف وانا بنت بتطلع علي الحين فضايح..,
قضيت اخر النهار بحيره وخوف وادور حل الخادمه خلصت شغلها وطلعت للملحق
وانا زاد خوفي..
نغمة رساله جديده صرت اكره تنبيه الرسايل ينرعب قلبي اذاسمعتها..,
واسمع الثابت يدق ما رديت ..
رساله من زياد:
(مهما تروح وتبتعد ما اقدر انساك
صورتك في داخل عيوني سكنها
أعيش كل الوقت مع طيف ذكراك
ياروحي الي ما تبريت منها
تنور حياتي لا تقابلت وياك
وتذبل ورودي لا بتعدت عنها
يا كثر ما احبك وياكثر مهواك
محبتي لك ما يقدر ثمنها)
والله انك فاضي يا زياد انا وين وانت وين
ورساله من الرقم الغريب ؛
(ردي مسويه نفسك شريفه وانتي بنت حرام انتظريني قريب داخل غرفة نومك )
قعدت اصيح ياربي استرني هذا من وين طلع لي ..!
قفلت كل الابواب وفصلت التيلفون وحولت جوالي صامت ونمت ما ادري كيف نمت ..؟!
صحيت قبل الفجر صليت الوتر ودعيت ربي يرشدني لصواب ..!
الحين لو اخبر زيادمعقوله بيفهمني والا بجيب لي حاجز جديد يبعدنا عن بعض فوق ماحنا بعاد...؟!
بصبر واشوف اليوم وش يصير..؟!
طلعت للمدرسه وانا راكبه السياره لاحظت سياره تتبعنا..!؟
المدرسه قريبه من بيتي ولو بمشي بوصل اسرع من السياره..؟!
المدرسه بين بيوت وبا السياره امسك طريق اطول علشان اوصل لها..؟!
اطلع با السياره استحي امشي با الحالي..؟!
سألت السواق مين الي ورانا..؟!
السواق \هذا ولد جيران بيت انتا..!
عوق بخوف ودهشه \انت تعرفه ..؟!
السواق \هذا ولد خربان مافي كويس مافي مدرسه مافي شغل ..؟!
ياكل حبوب خمس يوم اربعه يوم مافي نوم كل يوم مشكله ..؟!
بعدين سجن بعدين يطلع..؟!
نزلت عند باب المدرسه واسمعه يقول الموعد قريب..؟!
دخلت وانا انتفض داخل المدرسه ما صدقت ادخل غرفة المعلمات وعلى اقرب كرسي جلست..؟!
اجتمعوا علي المدرسات ..
سلامات عوق قلت لابس شوي ارهاق وشفت منظر روعني..
دلال با استغراب\ شكلك خوافه..,
عوق\بزياده بعد..,
هدت اعصابي شوي وحاولت ادور حلول عند البنات بدون ما يشعرون انه انا..؟!
عوق \بنات انتو لو جاتكم ازعاجات على الجوال وش تسوون..؟!
ناهد \على طول احول رقمي على جوال زوجي وهو يشوف شغله..؟!
اميره بتحذير \لا وين مشكله الي زوجها شكاك بتفتح على نفسها ابواب مسكره..؟!
عوق بتوتر\بنات وحده من صديقاتي جوالها تجي عليه رسايل من ارقام غريبه وهي شريحتها جديده..؟!
اسماء بوجع \يمكن ان الشريحه كانت لوحده والا واحد راعي حركات ولا يخاف ربه..؟!
خلود\لا اسماء ياما با الحبس مظاليم يمكن الشريحه عرفوا رقمهاناس هوايه عندهم الازعاج..,
وطفش صاحب الشريحه وباعها..؟!
دلال \وش نوع الرسايل الي تجي صديقتك..؟!
عوق \رسايله قذره وهي متزوجه..؟!
دلال \قولي لصديقتك لاترد على صاحب الرسايل وخوذو الشريحه واشتكوا على المزعج لكن عسى شريحته با اسمه..؟!
عوق تتنهد بقهر\ماعليه لا تبوق ولا تخاف والله يفرجها من عنده..,
غيرت الموضوع خفت يشكون فيني ماني ناقصه اشاعات ..؟!
طلعت من المدرسه وانا في بالي شي واحد خالتي ام ابراهيم..,
نزلت في بيتي وكلمت علي بيتها تجيني ضروري
ما بغيت اروح لبيتها اخاف احد يسمعني وانا اقولها ..؟!
وعلى طول جات وهي مرعوبه
ام ابراهيم \خير عوق فيتس شي امتس بها شي ..!
عوق\لا خالتي مافينا شي بس ابيتس بخدمه..؟!
ام ابراهيم با ارتياح \الحمدلله يوم انكن بخير كل شي يهون
والله اني ارتعت ياربي الصبح وضحى كلمتني مافيها شي يوم دقيتي كل طاري اقشر جا في بالي ..؟!
عوق بقلق\خاله انا من امس يجيني ازعاج على الثابت والجوال وتهديد وشكل الي يسوي كذا من حارتنا..؟!
ام ابراهيم \وعرفتيه..؟!
عوق\لا بس هو عارف عني كل شي واقري رسايله هذا هي..؟!
قرت ام ابراهيم الرسايل..,
ام ابراهيم بعصبيه\الله يخسه هذا شكله ماهو بعقله ..,
اردفت ام ابراهيم بترجي\يا بنتي ارجعي لرجلتس يحميتس ويفكتس من ها البلاوي..؟!
عوق تتنهد بوجع\ياخاله برجع لكن ماهو الحين بعدين
خليني افتك من ها المصيبه ورجعتي لزوجي ما بعد تشافيت من طعونه..؟!
ام ابراهيم\عطيني جوالتس انتي عارفه ان ابراهيم موظف با الاتصالات
بيعرف من هو الي مرسل ها الرسايل وعقبها نتصرف..؟!
عوق\خاله خوذيه وبسرعه رجعيه اخاف امي تدق علي ولا ارد وتقلق علي..؟!
ام ابراهيم تناظر ساعتها \اجل بكلم ابراهيم هالحين من التيلفون ما بعد طلع من شغله..؟!
كلمت ام ابراهيم ولدها وعلى طول عطاها الاسم
وطلع ولد جيرانا الي لحقني الصباح وجات شكوكي بمحلها انه هو ..؟!
عوق \خاله هذاواحد منتهي وينخاف منه ..؟!
ام ابراهيم\ ايه اعرفه هذا الله يكفيتس شره طاح له بشله فاسده وخربته والحين هايت با الشوارع
اهله بس يبون الفكه منه ماغير طاردينه من البيت وشره على خلق الله مافي حرمه تمر الا سمعها كلام مثل وجهه ..
اردفت ام ابراهيم\بكلم مسلط ها الحين واقوله يروح لأابو الولد ويقوله..!؟
ان ولدهم ماترك بناتنا بحالهن يلحقهن لمدارسهن..؟!
ورسايله على الجوالات ينشد الورعان الصغار عن جوالات خواتهم ويدقدق عليهن ويزعجهن..؟!
نعمم السالفه وانا خالتس لا يفكر احد انتس معطيته وجه والله يسامحني على ها التسذبه..؟!
بكيت من كلام خالتي ام ابراهيم
عوق تبكي بقهر \يا خاله والله العظيم اني بحالي ولا طرت لي الشينه الناس وش تبي مني..؟!
ام ابراهيم بوجع \يا بنتي هذي ضرايب توخذ على طول الازمان ما وقفت عليتس..؟!
وكل من دق له مسمار بجدار بيندق بجداره مثله..؟!
ارجعي لرجلتس وخوذي حقتس منه وانتي في بيته
ترى البعد يقسي القلب وان طلب قربتس اليوم وابعدتيه بكره ينساتس..!
ما تسمعين الي بعيد عن العين بعيد عن القلب..؟!
وضحى ماهي تامه لتس الحرمه تعبانه وتماسك لاتطيح بس علشانتس
عوق بذعر \خاله امي وش فيها انتي تدرين عن شي ما ادري عنه
ام ابراهيم با ارتباك\امتس مافيها غير الكبر عجوز مالها جيل الله يرحم حالها..,
عوق با ارتياح\ بسم الله على امي خوفتيني الكبر ولا غيره..,
طلعت ام ابراهيم وكلمتني في الليل قالت ان ابوابراهيم كلم اهل الولد انهم يمسكون ولدهم
والا الشرطه قريبه وان شاء الله انه خلاص ماعاد بيزعجني..؟ّ!
شبكت الثابت وشغلت جوالي..؟
مكالمات لزياد..
ومكالمه من جوال سعد اكيد امي كنت بكلمها..؟!
ناظرت الساعه كان الوقت متأخر بكلمها الصباح ان شاء الله..؟!
ياربي متى امي ترجع علشان احس با الامان..؟!
تمددت على سريري واقلب جوالي ماادري ليش تمنيت زياد يدق خيب ظني ما كلم
نمت وانا انتظر..
صحيت نهار جديد..!
ناظرت بجوالي اليوم جثه هامده ماله صوت..!
قبل اطلع للمدرسه كلمت امي..,
والحمدلله طيبه تقول الجو زين ولا راح ترجع الا بعد الاجازه النصفيه..؟!
طلبت منها تجي وتاخذني رفضت المكان بعيد ولا في احد فاضي لي..؟!
سكرت وطلعت لدوامي السبت تبدأالامتحانات النصفيه واليوم الاربعاء..؟!
نغمة رساله على جوالي..
يارب سترك
.
.
.
(كلمه اخيره)
قال ابن القيم :
" إن دور الجنة تبنى بالذكر "
فإذا أمسك الذاكر عن الذكر ,!
أمسكت الملائكة عن البناء "
فكرر قول : ( لاحول ولاقوة إلا بالله )
فإنها تشرح البآل ,وتصلح الحآل
وتحمل بها الأثقآل ..
وترضي الرحمن ..
وَ كنز من كنوز الجنة ..!
.
.
.
الي الملتقى قريبآبأذن الله
وسالفه جديده
طيف الأحباب
ام الوليد
تذكروني واحبابي بدعوه طيبه
22-02-12, 10:54 PM
جديد مواضيع قسم القصص المكتمله من وحي قلم الاعضاء
العرض العادي
